Tswv Ntuj txoj kev hlub ib txwm nyob

Tswv Ntuj txoj kev  hlub, kev nyiam mas nws ib txwm nyob, tsis txawj hloov, tsis thim,  tsis txawj puas, tsis txawj qub, tsis txawj nphob, zoo li tus dej ntws tsis txawj rov.

Leej twg thov mas Ntuj yuav pub rau nws, leej twg tso siab rau Ntuj mas Ntuj yuav npo nws tawm. Tswv Ntuj tos nrhw peb lub suab thov thiab taij nws, Tswv Ntuj yuav maj zeeg cev tes los hlub. Peb sawv daws tig los saj Tswv Ntuj lub siab zoo, peb yuav paub nws txoj kev hlub tias muag nqes npaum li cas. Tswv Ntuj txoj kev hlub yuav ciaj sia nyob hauv peb nruab siab mus li.

Peb ua neeg nquag teev Ntuj, thov Ntuj tas mus li tsis txhob ncua. Kev teev ntuj tas mus  li yuav ua rau peb saj tau Tswv Ntuj lub siab hlub uas peb xav tau. Kev teev Ntuj yog ua kom peb nyob ze Tswv Ntuj thiab nrog nws sib raug zoo.  Kev teev Ntuj yog ib lub zog uas pab peb kom yeej dab phem kev haub kev ntxias.

Tswv Ntuj ib txwv nws nyiam thiab hlub peb, ua li peb yuav tig los nyiam thiab hlub Tswv Ntuj tib yam li Tswv Ntuj nyiam thiab hlub peb.  Tswv Ntuj xav los nyob hauv peb thiab kom peb nyob hauv nws mus li. Thaum peb nyiam thiab hlub Tswv Ntuj thiab nrog Tswv Ntuj sib raug zoo lawm, dab phem yuav txav deb ntawm peb mus.

Thaum kuv saj tau Tswv Ntuj lub siab zoo, lub siab hlub lawm ua rau kuv tsis xav ncaim nws ib pliag, kuv xav nrog nws nyob mus li. Kuv pom nws lub ntsej muag luag ntxhi, nws txoj kev hlub ntws los tsis tu ntawm nws lub ntsej muag los rau kuv. Ua rau kuv txoj sia loj, ua rau kuv lub siab puv npo, ua rau kuv lub siab kaj lug. Kuv ntsia lub ntiaj teb no tsis muaj ib yam dab tsi yuav los pauv tau. Kuv txaus siab muab Tswv Ntuj txoj kev hlub nthuav tawm rau txhua leej uas xav tau. Leej twg ntseeg yuav muaj raw lis nws ntseeg ,tus  thov yuav tau  txais, khob qhob rooj, yuav muaj tus qhib rau nws, nrhiav yuav ntsib.

Qhib peb lub siab tig los txais thiab saj Tswv Ntuj txoj kev hlub.

“ Kuv nyiam koj, kuv lub siab hlub koj mus li. Kuv tau rub koj los cuag kuv, kuv lub siab npuab koj. ”
( Yes Les Mias, 31 : 3 )

Npaub