HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


TXIV PLIG TSHAJ XWM, NYOB XEEV TSEEJ MAIM, THAIB TEB. Empty

Latest topics

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Maiv Tooj Yesterday at 11:22 pm

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

Suav neeg tuaj saib, txij hnub 17/09/2010 los mus.


+3
Maiv Tooj
Maiv Paj Lug
Npuagtub
7 posters

    TXIV PLIG TSHAJ XWM, NYOB XEEV TSEEJ MAIM, THAIB TEB.

    Npuagtub
    Npuagtub
    Tswv Cuab Hmong Catholique
    Tswv Cuab Hmong Catholique


    Messages : 1000
    Date d'inscription : 2009-08-16
    Age : 58
    Localisation : Fresno, California, USA.

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty TXIV PLIG TSHAJ XWM, NYOB XEEV TSEEJ MAIM, THAIB TEB.

    Post  Npuagtub 25th August 2009, 5:25 am



    TP. Tshaj Xwm Thoj, XH. Npuag Tub Hawj, Anne Ly Yang, Maiv Paj Lug Vang.
    Nyob Ntawm Lub Tsev Teev Ntuj Our Lady of Victory
    Fresno, California.
    July 26, 2009


    Txiv Plig Tshaj Xwm, uas yog ib tug txiv plig Hmmoob,
    nyob xeev Tseej Maim, teb chaws Thaib.
    Nws tau tuaj xyuas peb cov Ntseeg Catholic,
    nyob hauv Fresno no thaum lub 7 hli tim 26 xyoo 2009.
    Txiv Plig Tshaj Xwm yog ib tug tub Hmoob uas hluas tshaj cov,
    tau los txais lub cim tiag tes ua Leej Choj nyob Teb chaws Thaib.
    Nws yog ib tug neeg muaj peev xwm heev,
    thiab txawj hais lus rau txhua leej txhua tus.
    Peb zoo siab heev uas tau yees duab nrog
    TP. Tshaj Xwm ua ke.
    Maiv Paj Lug
    Maiv Paj Lug
    Tswv Cuab Hmong Catholique
    Tswv Cuab Hmong Catholique


    Messages : 1235
    Date d'inscription : 2009-08-17

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty Re: TXIV PLIG TSHAJ XWM, NYOB XEEV TSEEJ MAIM, THAIB TEB.

    Post  Maiv Paj Lug 25th August 2009, 9:23 pm




    Nyob zoo Kzkz thiab Mp,

    Hnub no kuv yuav tuaj sau 2 3 nqe lus tseem ceeb ua TP. Tshaj Xwm tau hais rau peb cov ntseeg tim no tuaj rau neb paub.
    TP. Tshajxwm nws yog ib tug PT. tseem hluas heev, tiam sis nws muaj hmoo heev. Leej ntuj plig Ntshiab nrog nraim nws.
    Hnub peb noj pluas mov zoo siab txais tos nws, mas nws tau coj ib co( slide duab) tuaj tso rau peb saib. nws tau qhia me ntsis txog nws kev tshaj ntuj lus nyob tim Thaib Teb thiab nws lub neej thaum nws los kawm ua TP.

    TP. Tshaj Xwm yug los rau ib tse neeg hmoob nyob pem tej toj roob thiab txom nyem heev. Thaum TP. Tshaj Sawm tuaj mus tshaj Tswv Ntuj lub mooZoo txog rau TP. Tshajxwm lawv lub zos, ces nws niam thiab txiv lawv txais kev ntseeg. thiaj tso TP. Tshajxwm tuaj mus nrog TP. Tshaj Sawm lawv nyob hauv xeev Tseejmaim. TP. Tshaj Sawm txhawb nws txoj kev kawm Tshaj li 14 lub xyoos los txog hnub nws tau kawm tiav ua Txiv Plig.

    TP. Tshajxwm hais tias: Thaum nws mus kawm rau lub koom haum ua TP. mas kuj muaj cov hluas hmoob coob tus nrog nws mus thiab, tiam sis thaum txog xyoog lawv kawm tau lawv daim ( Master degree ) ces kuj muaj dab phem nkag rau sawv daws tej neeg txheeb ze tej siab, ces lawv kuj tuaj ua rau cov hluas hmoob sawv daws tawm los mus ua laj kam yug tsev neeg thiab lawv tus kheej tas lawm ces tsuas tshuav TP. Tshajxwm ib leeg yog hmoob nrog rau cov Thaib thiab lwm yam neeg lawm xwb. kuj muaj neeg tuaj kom TP. Tshaj xwm mus ua hauj lwm rau lawv tej chaw ua laj kam lawv kuj yuav tem nyiaj ntau rau nws thian nws yuav muaj nyiaj siv coj mus pab nws tsev neeg.

    Thaum lub caij TP. Tshaj xwm cov phooj ywg tawm los tas lawm, kuj ua rau TP. nws tsis xav kawm ua Txiv Plig lawm. Tiam sis nws kuj tau thov Ntuj ib hmos ces tswv ntuj kuj teb rau hauv nws lub tswv yim tias;  Cov neeg uas lawv ywj li lawv lub siab nyiam, lawv tau kev lom zem, zoo siab muaj nyiaj muaj txiaj, muaj phooj ywg coob, muaj koob nto npe, haus dej haus cawv lom zem xauv npo nrog nws tej neeg txheeb ze nyob ua ke, muaj ib hnub tej ntawd yuav ploj tas mus. Hos koj mas koj yuav ua li koj lub hom phiaj, uas koj twb npaj tau lawm. Ces TP. Tshajxwm thiaj li txiav txim siab nyob ib leeg nrog lwm hom neeg kawm ua TP. txiv mus.

    Qhov TP. Tshajxwm tu siab tshaj mas yog;  thaum txiv Plig Tshaj Sawm tau mob loj ces nws rov los kho mob nyob USA lawm, ces TP. Tshaj Sawm tau tis lub npe (TSHAJ XWM) no rau nws ua ntej TP. tshaj Sawm yuav rov los USA. Yog xyoo nws kawm tas ua Txiv Plig. Ces thaum nws txais lub cim Tiagtes ua Txiv Plig, TP. Tshaj sawm twb tuag tau ib hlis lawm, TP. Tshaj Sawm tuag thaum lub 10 hli, hos TP. Tshajxwm txais ua Txiv Plig thaum lub 11 hlis.
    Ces thaum lub 10 hli nws hnov hais tias TP. Tshaj Sawm tau tas sim neej lawm, ces nws chim heev rau Tswv ntuj thiab nws tu siab heev ces nws xav tias nws yuav tsis mus txais ua Txiv Plig, vim TP. Tshaj Sawm tuag lawm.

    Ces TP. Tshajxwm kuj rov thov Ntuj dua ib hmos li yav tas los thiab. Ces Tswv Ntuj kuj teb hauv nws lub tswv yim tias; TP. Tshaj Sawm ua hauj lwm tiav lawm. nws tau tso rau koj ua txuas ntxiv mus, nws zoo siab heev rau koj, koj yuav mus hlub cov neeg txom txom nyem uas nyob tsuas ntuj nti pem tej toj roob uas tshaib qhis txog lub Moo Zoo. Ces thaum TP. Tshajxwm lub tswv yim tau hnov Tswv Ntuj cov lusn teb li no tas ces nws thiaj li ua ib siab mus txais lub cim ua Txiv Plig.

    TP. Tshaj xwm thiaj los tuav Txiv Plig Tshaj sawm txoj hauj lwm, ces txoj kev tshaj lub Moo zoo mas yog mus rau cov neeg txom txom nyem nyob pem tej toj roob xwb, nws mus xyuas ib lub zos rau ib lub zos, tsis muaj lub chaw so li. Nws ua hauj lwm rau cov Hmoob thiab cov (neeg Yas) hom neeg no kuj tsis yog thaib thiab, lawv muaj lawv ib haiv neeg li peb Hmoob thiab. Lawv yog ib co neeg txom nyem heev. Nws coj ib co duab tuaj tso rau peb saib mas pom muaj tej yim neeg mas tsis muaj pam vov pw li, tsis muaj khaub ncaws hnav li. TP. Hais tias; nws mus xyuas lawv ces lawv yeej tsis muaj mov rau yus noj li, yus yog tus yuav nrhiav mov los rau lawv thiab yus noj rau hnub ntawd.

    Ib txhia lawv kuj tsis muaj chaw rau yus pw li, ces yus kawg pw hauv av khooj ntawm ntug cub xwb, muaj tej yim mas muaj* mub tom TP. kawg mas ceeb laj pw dhau ib hmos kawg. Tos TP. ho coj ib co duab tuaj rau peb saib los twb yog xyoo tas los thaum lub 10 hli, peb cov XH thiab ob peb tug cov txwj laus peb sau tau me ntsis nyiaj thaj tsam li $900.00 mus rau TP. tau yuav dej haus taug kev xwb, qhov nyiaj peb xa no TP.yeej tsis tau thov peb li. Peb nyob nyob peb cia li xav tau tias ntshai peb yuav tau tshw me ntsis nyiaj mus pab cov txiv plig Hmoob uas nyob rau tej lub teb chaws uas tseem Txom nyem.

    Ces TP.Nws muab peb cov nyiaj yuav pam tsoos hnav thiab khoom ua si coj mus pub cov ntseeg tim thaum lub caij Christmas. Ces zaum no nws thiaj li coj cov neeg uas nws nrog nyob ntawd tej duab tuaj rau peb xyuas. Nws tuaj zaum no peb kuj thov coov ntseeg donation nyiaj rau TP. thiab.
    Peb kuj npaj tias 1 xyoo twg peb yuav donation nyiaj mus pab nws rau tej lub caij lawv ua hmoov, tsis tau ntau los kom tau li $1,000 tej.

    Kzkz thiab Mp, kuv saib mas TP. Tshaj xwm nws ua tshaj ntuj lus zoo nkaus li thaum ub HT. Yesxus ua tiag. Nws ris ib lub nra hnyav kawg, tiam sis nws kuj txaus siab ua mus. Vim cov neeg nws nrog nyob niaj hnub tos nws xwb.  TP. Tshaj xwm muaj Leej tswv yim ntshiab heev, vim yav tas los muaj cov txiv plig txawj hais lus hmoob tuaj xyuas peb, peb kom nws ua lub cim daws txhaum rau peb cov ntseeg, tiam sis tsis muaj neeg coob mus daws txhaumli.
    Hos TP. Tshaj xwm no mas peb cov niam txiv hmoob laus mas lawv tuaj coob leej tuaj daws txhaum ntawm nws uas rau peb lub sij hawm tsis txaus rau cov neeg los daws txhaum, ces peb tau kom txiv plig ua ib zaum tom qab peb teev ntuj tas thiab hos nkawd.

    Hmoob ib txwm hais tias; COV NEEG LAUS LAUS MAM TAU UA NOM KUJ YOG NWS MUAJ HMOOV ZOO hos COV NEEG TAU UA NOM HLUAS HLUAS KOJ YOG NWS MUAJ TXOJ HMOOV ZOO thiab no tiag.
    TP. Hais 1 lo tias; Peb cov neeg ntseeg mas tas txhua leej yuav tsum rau Tswv Ntuj txiav los tas nws tej ceg raws li Tswv Ntuj pom zoo, ua ntej Tswv Ntuj yuav siv koj. Yog koj tiv dhau lub caij tswv ntuj tab tom txiav koj cov ceg, ces tom qab ntawd koj cov ceg ntawd yuav hlav dua cov kaus ntshiab ces koj yuav txi tau txiv ncw tuaj. Yog peb tiv tsis dhau lub caij nyuaj ntawd ces peb yuav tso tswvn ntuj tseg ces nws kuj yuav tso peb tseg ib yam thiab.
    Nkawd, kuv lam hais me ntsis li no raws li kuv nco rau neb paub xwb, mauj dab tsi peb mam li sib fim mus lawm tom ntej.

    Kzkz thiab Mp, zaum no neb hais tias neb pom kuv tseeb lawm no es yog pom tseeb hauv nruab siab los yog pom daim duab tseeb xwb?
    Neb xav tias kuv tseem ntshai ntshai neb, kuv yeej tsis muaj qhov ntshai leej twg li yog yuav hais txog kev tshaj lub Moo Zoo xwb, kuv tsuas ntshai tsam kuv ua yuam kev xwb. Neb thiaj yog ob tug ntshai tsam kuv paub neb thiab luag tej paub neb. Kuv mas tseem xav kom tas cov neeg txhua leej paub kuv kom tas hos. Hehehe.......Tso dag me me xwb txhob xav li cas nawv mog, kuv yuav ua neb luag thiab ua neb ib leeg nus zoo sib pab sau kev ntseeg rau hauv no kom mus txog hnug kawg.

    By Touheu
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty Re: TXIV PLIG TSHAJ XWM, NYOB XEEV TSEEJ MAIM, THAIB TEB.

    Post  Maiv Tooj 26th August 2009, 7:22 am



    Txiv Plig Thoj Tshaj Xwm tej hneev taw.

    TP. Tshaj Xwm, thawj tug TP. Hmoob Thaib, lub neej


    Txiv Plig Tshaj Xwm lub NeejDocument Actions Piav txog Txiv Plig Tshaj Xwm Lub Neej
    Txiv Plig Tshaj Xwm Lub xeem Thoj yug los hnub tim 24 lub 8 hli ntuj xyoo 1974, nyob rau hauv lub zos Naj Xuaj lub xeev Nan. Txiv Plig txiv yog Nyiaj Tsab xeem Thoj. Txiv Plig yog tus thij 3 nyob hauv cov kwv tij tas nrho 8 leej : 2 tug tij laug, 2 tus kwv thiab 3 leeg muam yau. Nyob hauv Txiv Plig lub neej yav yau, Txiv plig txais lub cim ntxuav xyoo 1983.

    Xyoo 1989, Txiv Plig kawm tiav P.6 nyob hauv lub zos Naj Xuaj, thaum tiav P.6 lawm Txiv Plig Tshaj Sawm tau txais nws mus kwm kev ntseeg thiab ntawv nyob rau Tseb Hauv Paus Hmoob Tsheej Maim.


    Xyoo 1993, Txiv Plig kawm tiav M.3 nyob rau lub tsev kawm ntawv Hov Plhab. (Hopra School). Ces Txiv plig Tshaj Sawm thiaj li xa nws mus koom lub rooj sab laj sau siab, nyob hauv tus Cawm Seej Lub Koom Haum (Redemptorist). Txiv Plig Tshaj Xwm thiaj hnov Tswv Ntuj lub suab hu kom nws mus xyuam coj lub neej nyob tab seeb. Txiv plig Tshaj Sawm thiaj li txiav txim siab xa nws mus kawm nyob hauv lub tsev kawm ua Txiv Plig rau Sriracha.

    Xyoo 1996, Txiv Plig thiaj li kawm tiav M.6 nyob hauv lub kawm ntawv Assumption Sricacha.


    Xyoo 1996 1997, Txiv Plig mus kawm nyob hauv lub tsev rau cov Leej Tij nyob NongKhai. Hnub tim 25 lub 4 hlis ntuj xyoo 1998, Txiv Plig Tshaj Xwm cog lus thawj zaug nyob hauv Tus Cawm seej Lub Koom Haum (Redemptorist).
    Tom qab uas cog lus thawj zaug lawm, Txiv Plig tau mus kawm ntawv txheej siab SaengTham.

    Hnub tim 25 lub 5 hlis ntuj xyoo 2002, Txiv Plig Tshaj Xwm cog lus tas sim neej nyob hauv lub koom haum.

    Xyoo 2003, Txiv Plig kawm tiav nyob hauv tsev kawm ntawv txheej siab SaengTham. Txij li xyoo 2003 2006, Txiv Plig Tshaj Xwm mus kawm ntxiv rau lub nroog Davao, teb chaws Fib Lib Pees (Philippines).

    Hnub tim 26 lub 5 hlis ntuj xyoo 2005, Txiv Plig txais lub cim tiag tes ua Tub Tsob Hwm.

    Hnub tim 23 lub 11 hlis ntuj xyoo 2006, Txiv Plig Tshaj Xwm txais lub cim tiag tes ua Leej Choj




    TXIV PLIG TSHAJ XWM, NYOB XEEV TSEEJ MAIM, THAIB TEB. Wieng_10

    TXIV PLIG TSHAJ XWM, NYOB XEEV TSEEJ MAIM, THAIB TEB. Wieng_11

    TXIV PLIG TSHAJ XWM, NYOB XEEV TSEEJ MAIM, THAIB TEB. Wieng_12

    Lub tsev teev Ntuj Hmoob nyob Wieng Kaen, Chieng Khong

    TXIV PLIG TSHAJ XWM, NYOB XEEV TSEEJ MAIM, THAIB TEB. Wieng_13

    TXIV PLIG TSHAJ XWM, NYOB XEEV TSEEJ MAIM, THAIB TEB. Wieng_14

    TXIV PLIG TSHAJ XWM, NYOB XEEV TSEEJ MAIM, THAIB TEB. Wieng_15

    TXIV PLIG TSHAJ XWM, NYOB XEEV TSEEJ MAIM, THAIB TEB. Wieng_16

    TXIV PLIG TSHAJ XWM, NYOB XEEV TSEEJ MAIM, THAIB TEB. Wieng_17

    TXIV PLIG TSHAJ XWM, NYOB XEEV TSEEJ MAIM, THAIB TEB. Wieng_18

    Zos Hmoob Wieng Kaen


    Last edited by Maiv Tooj on 21st March 2010, 6:50 am; edited 1 time in total
    Maiv Paj Lug
    Maiv Paj Lug
    Tswv Cuab Hmong Catholique
    Tswv Cuab Hmong Catholique


    Messages : 1235
    Date d'inscription : 2009-08-17

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty Re: TXIV PLIG TSHAJ XWM, NYOB XEEV TSEEJ MAIM, THAIB TEB.

    Post  Maiv Paj Lug 26th August 2009, 4:22 pm

    Wow.....ua tau haib ua luaj thiab!!!! cheers
    Maiv Paj Lug
    Maiv Paj Lug
    Tswv Cuab Hmong Catholique
    Tswv Cuab Hmong Catholique


    Messages : 1235
    Date d'inscription : 2009-08-17

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty By Npuagtub Touheu

    Post  Maiv Paj Lug 30th August 2009, 11:38 am

    By Npuagtou Touheu:

    Hnub no kuv tuaj tso 2 3 daim duab TP. Tshajxwm Thoj, nyob Thaib Teb tuaj ua lub txoos nteev ntuj rau peb rau nej saib.
    Cov duab no yog thaib nyob hauv lub tsev teev ntuj peb niaj hnub mus ua lub txoos teev ntuj. Lub Church no hu ua (Our Lady Of Victory).
    Maypaj thiab Kzkz tej zaum yuav tsis phim muab tso rau hauv no tiam si kuv lam tso xwb es yog tsis ntxim neb siab los neb muab tshem tawm thaum twg los yeej tau nawv.

    Maypaj, kuv tsis tau teb nws cov lus, ib tsam kuv mam li teb rau nws hais txog TP. Tshajxwm tau piav li cas rau peb cov ntseeg nawv.

    Maypaj thiab Kzkz, Hnub no TP. Tshajxwm twb rov mus Thaib Teb lawm.
    Peb cov ntseeg zoo siab heev ua xyoo no lawv tau pom tej tus tub hmoob tau ua TP.
    Thiab lawv tau ua lub cim daws txhaum ntawm tej tus TP. muaj peev xwm heev.
    Nkawd, cov duab no yog neb xav copy daim twg coj mus cia tau saib los nyob ntawm neb nyiam nawv.
    kuv lam tso rau peb tau saib xwb xyov puas yuav phim nyob hauv neb lub tsev no?
    Ib chim kuv muaj sij hawm no kuv mam li tuaj sau nqi puav lus uas TP. Tshajxwm tau piav rau peb, rau neb paub.

    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty Re: TXIV PLIG TSHAJ XWM, NYOB XEEV TSEEJ MAIM, THAIB TEB.

    Post  Maiv Tooj 1st September 2009, 6:38 am


    TP. TSHAJ XWM THOJ Thaib teb tsab ntawv



    Nyob zoo txog sawv daws huv tib si tau ntev lawm uas tsis tau sau ntawv tuaj rau nej sawv daws. Nej sawv daws los ntshai nyias ua nyias hauj lwm twb tsis tshua xyeej li thiab. Ces kuv thiaj li sau ib tsab ntawv ntev ntev me ntsi tuaj rau sawv daws.

    Vim li cas peb yuav tsum paub Tswv Ntuj?

    Yog peb rov mus rau Nplog teb, Thaib teb, los tej qhov chaw uas nyob xyaw hav zoov deb ntawm kev vam meej mas peb yuav hnov lawv tham txog dab ub dab no heev kawg li. Los thaum muaj ib tug tuag mas sawv daws ntshai kawg thiab tseem muaj qee leej pom dab tshwm nram tej los raug dab hem kuj muaj.
    Yam li pom tej tus neeg ntoo phuam taug kev mus caum yuav txog mas nws ploj lawm. Los mus tom tej mas hnov muaj neeg tham tab sis mus saib mas tsis pom muaj leej twg. Los lam muaj neeg txawb pob zeb los tog pas tuaj. Tej no mas ntshai sawv daws yeej hnov hnov tej laus tham txog lawm. Lwm haiv neeg los lawv yeej pom dab raws li lawv kev ntseeg. Dab Hmoob hnav tsoos Hmoob, dab Suav hnav tsoos Suav, dab Mes Kas hnav tsoos Mes Kas. Ntau zaus mas Huab Tais Yes Xus kuj ntiab dab ntawm tej tus neeg uas lawv raug dab thiab.

    Cov dab ntawd muaj tuaj zoo li cas? Nws los ntawm qhov twg los? Puas yog tib neeg tuag mus ua dab?

    Peb ntseeg tias nyob hauv tib neeg mas peb muaj cev nqaij thiab tus Plig thaum neeg tuag ces nws tus plig tawm ntawm lub cev mus lawm. Thaum ua neej nyob nws tsuas paub txog kev ua noj ua haus, paub tias tuag mus ua dab ua tsov. Yuav tsum npaj khaub ncaws ntau ntau thiaj txaus hnav, hlawv nyiaj hlawv ntawv coj mus siv dab teb. Tuag ces mus nyob nram tej kwj ha hav fab hav zoov.

    Yog nws paub txog tej yam no xwb ces thaum nws tuag nws yuav mus lawm qhov twg tau?

    Nws tsuas kawg mus txog tej qhov chaw uas nws paub xwb. Thaum nws tshaib nqhis ces thiaj li rov los thov nyuj dab, ua kev nyuaj rau tej me tub me nyuam uas tseem ua neej nyob. Vim li no peb thiaj li yuav tsum paub txog Tswv Ntuj, txais Nws los ua peb tus Tswv. Ces thaum peb tso ntiaj teb no tseg lawm peb thiaj li yuav txawj mus cuag nws tau. Huab Tais Yes Xus hais tias “yog koj tsis lees ntseeg txog kuv nyob ntiaj teb no, ces kuv kuj yuav tsis lees ntseeg koj nyob sawm ntuj ib yam” yog peb paub Huab Tais Yes Xus nyob ntiaj teb no ces Nws kuj yuav paub peb nyob saum ntuj ib yam nkaus. Thaum peb kawm paub me ntsis, teev ntuj nrog Tswv Ntuj tham.

    Tswv Ntuj mloog peb lo lus thov peb pib nrog Tswv Ntuj sib fim.


    Peb qhov muag pom kev zuj zus pom Huab Tais Yes Xus tseeb zuj zus tuaj. Peb nyiam nws thiab xav mus cuag nws. Nws kuj zoo ib yam nkaus li peb ua neej nyob ntiaj teb no, yog peb lam mus hais rau ib tug pog laus nyob pem roob tias muaj ib lub teb chaws hu ua As Mes Lis Kas nws vam meej thiab muaj vaj tsev zoo nyob dhau pem roob. Thiab koj mus hais rau nws tias nyob puag nram kuj ha muaj ib thaj av tiaj zoo ua teb zaub thiab yug qaib yug npua. Ces tus pog laus ntawd yeej xaiv mus ua teb zaub xwb vim nws tsis paub As Mes Lis Kas. Thaum ub kuv kuj hnov tej laus tham tias sawv daws ntshai mus Mes Kas vim lawv xav tias Mes Kas noj neeg, ces tom qab pib muaj neeg mus Mes Kas thiab sawv daws mam li pib paub zoo tuaj ces mam li pib xav mus Mes Kas.

    Peb thiaj li phim yuav tsum paub Tswv Ntuj mas thaum peb tso lub ntiaj teb no tseg lawm peb thiaj li yuav mus cuag nws tau, thiab tsis rov los ua kev nyuaj rau cov tseem nyob ntiaj teb no.

    Kev ntseeg yog kev tso siab rau Tswv Ntuj, yog peb tso siab rau Tswv Ntuj peb thiaj li tsis hloov peb txoj kev ntseeg.

    Muaj ib txhia thaum lawv yav hluas lawv muab siab rau kev ntseeg thiab ntseeg zoo tab sis thaum lawv yav laus pib muaj mob muaj nkeeg. Thov ntuj los tus mob tsis zoo raws li siab xav. Muaj tus tuaj hais tias ua yam no mas yuav zoo, nws yog tim qhov ub qhov no lawm. Yog pauj li no mas nws yuav zoo vim lawv twb pauj dua lawm. Ces tus uas nws kev ntseeg tsis ruaj pib ua xyem xyav thiab pib mus ua raws li luag tej hais rau nws. Muaj ib txhia mas ua yam ub yam no tas ces kuj zoo me ntsis tuaj kuj muaj. Ib ntxia ces tsis zoo kiag li kuj muaj. Peb sim xav saib yog peb muaj ib tug me nyuam nws muaj nws lub haum phiaj kawm txuj mus ua ib tug Kws Kho Mob. Thaum nws kawm mus txog ib nrab lawm nws ntsib kev nyuaj, nyiaj los tsis txaus siv kev kawm los nyuaj ua luaj li. Ces nws tej phooj ywg pib tuaj saib nws thiab hais rau nws tias cas koj tsis tawm ntawv los nrog peb ua teb zaub pob los tau zoo nyiaj cog paj ntoo los tau zoo nqe kawg li, ua teb pauv zog los lom zem kawg. Ces nws pib ua xyem xyav thiab qhov kawg nws hloov nws lub haum phiaj tawm los ua teb.

    Los txog zaub pob los poob nqe paj ntoo los tsis muaj tus yuav.

    Yuav rov mus kawm los lig lawm, nws tej phooj ywg lawv twb kawm tiav thiab mus ua hauj lwm tas lawm. Ces nws mam li xav txog lig tias cas tsis ua tiag kawm ces twb tau lub zoo neej lawm. Vim li no thaum peb ntseeg lawm peb yuav tsum tso siab rau Tswv Ntuj hais tias nws yuav tsis tso peb pov tseeg. Peb yuav tsum tso siab rau Tswv Ntuj, Huab Tais Yes Xus hais tias “Yuav tsum ua zoo li tus me nyuam yaus nws thiaj li mus tau hauv Tswv Ntuj lub Ceeb Tsheej”.

    Muaj ib tag kis kuv pom ib tug txiv tsev nws nrog nws tus me nyuam ua si nws muab nws tus me nyuam ua paj paws, cuam thiab thaum poob rov los nws mam li txais. Nws tus me nyuam kuj lom zem thiab luag luag. Vim nws tso siab tias thaum nws poob rov los ces nws txiv yuav txais nws xwb xwb li.
    Peb yuav tsum tso siab rau Tswv Ntuj zoo xws li tus me nyuam mos ntawd. Muaj tej thaum zoo li Tswv Ntuj muab peb cuam pov tseg, peb ntsib kev txom nyem zoo li nws tsis nco qab peb lawm, tab sis thaum peb poob rov los ces Nws yuav txais peb xwb xwb li. Vim li no peb thiaj li yuav tsum tso siab rau Tswv Ntuj thiab tsis txhob tso peb txoj kev ntseeg pov ntseg.

    Hmoov Txuj Xeeb Huab Tais Yes Xus Yug los 2007 dhau los no.

    Kuv npaj sau ntawv thiab xa koob hmoov Yes Xus yog los tuaj rau sawv daws tab sis kuj zeem tsis tau ib lub zoo sij hawm kiag li. Hmoov tsuj xeeb Huab Tais Yes Xus yug los xyoo dhau los no mas kuv tau mus xyuas ntau lub zos Hmoob. Koom nrog lawv teev ntuj ua ke mas sawv daws ntsib kev lom zem, cov Xib Hwb kuj npaj tau tej yam khoom ua si mus rau cov me nyuam yau kom lawm lom zem thiab. Muaj ib co pam vov mus rau cov txom nyem kom tau vov tiv no.

    Txhua lub zos puav leej npaj ib rooj mov rau peb noj ua ke.

    Lub xyoo no, kuv npaj siab tias yuav npaj kom muaj koom ua si kom txhua rau peb cov me nyuam, yog muaj leej twg xav pab yuav tej yam paj tsab rau peb cov me nyuam Hmoob mas kuv yuav zoo siab thiab lawv yuav tau kev lom zem xwb xwb li. Kuv kuj tab tom npaj zom ib co nkauj Yes Xus yug los kuv twb ua tau cov paj nruag lawm tseem tsis tau zom vim nws siv peev me ntsis ces kuv yuav tsum tos me ntsis.

    Ua li cas peb thiaj li kag siab tau txog Tswv Ntuj?

    Ces muaj ib zag hais zoo li no, lub caij ntuj no mas no no kawg li. muaj daus te poob thiab ua rau tej nroj, tsiaj txhu, xyoob ntoo tuag zom zaws vim nws no heev. Ces muaj ib tug yawg laus nws lub tsev nyob puag tim roob, muaj ib tag kis nws zaum hauv tsev saib ntawm lub qhov rais lawm sab nraud. Ces nws pom ib pab noog tab tom ya hla ntawm nws lub qhov rais.

    Tus yawg ntawd paub zoo tias yog pab noog ntawd ya ntxiv mus mas lawv yuav no thiag tuag tas li. Ces nws qhib qhov rais thiab hu kom pab noog ntawd ya los nkaum hauv nws lub tsev tab sis hu npaum li cas los pab noog ntawd tsis nkag siab li ces pab noog ywj ya ntxiv mus deb zuj zus lawm. Tus yawg ntawd nws zav zoj yog cia lawv ya li ntawd mus ces tsis ntev pab noog ntawd yuav no thiab khov ua dej khov thiab tuag tas xwb xwb li.

    Nws thiaj li txia ntshis ua ib tug noog thiab ya caum lawv qab mus txog thiab haiv pab noog ntawd lawv xeem lus ces pab noog ntawd thiaj li nkag siab thiab ya los nkaum hauv nws lub tsev ces lawv thiaj li ntsib kev cawm. Hos tus uas tsis mloog ces nws ya mus ntxiv thiab khov ua dej tuag lawm. Peb sawv daws zoo li pab noog ya tsis paub yav tom ntej, Tswv Ntuj hu npaum twg los peb tsis paub tsis nkag siab ces Tswv Ntuj thiaj li nqes los ua neeg li peb hais peb xeem lus kom peb nkag siab txog Tswv Ntuj. Tus ntseeg thiab los nkaum hauv Tswv Ntuj lub tsev ces nws ntsib kev cawm. Tus tsis ntseeg nws tso siab rau nws tus kheej ces nws thiaj li los tsis tau hauv Tswv Ntuj lub Ceeb Tseej.

    Kev Tshaj Ntuj Lus Nyob Tseej Maim

    Nyob rau Tseej Maim kuv mus saib haiv Yas thiab peb haiv Hmoob, txoj kev mus pem roob mas nyuaj kawg nkaus li. Lub caij ntuj nag mas ntau lub zos twb mus tsis tau hauv lawv lub zos. Cov zos nyob deb li no mas lawv deb ntawm tsev tshuaj kawg li. Thaum muaj ib tug muaj mob qhov ntau lawv siv tshuaj ntsuab xwb, ntau zaus kuv kuj nqa tshuaj mus faib rau lawv tau noj thiab. Kuv nyob pem roob mas thiaj li tsis muaj internet siv pes tsawg yog thaum yuav siv ces mam li nqe mus nram nroog thiab mus nrhiav nyob tom tej lub tsev muag mov thej xwb. Lub xyoo dhau los no mas kuv taug kev mus saib cov ntseeg heev kawg thiab tsis tshua tau so ces ua rau kuv muaj me ntsis ntshav siab.

    Tam sim no kuv npaj mus xyuas tej lub zos Hmoob uas tseem tsis tau muaj cov ntseeg.

    Xyoo tas los no kuv tau ua lub cim ntxuav rau cov Hmoob 20 tawm leej thiab cov Yas muaj li yuav luag 100 leej. Huab Tais ntuj hlub kuv kawg niaj hnub mas kuv tsib tej yam ua rau kuv ua tim khawv txog Tswv Ntuj. Muaj ib hnub ntuj los nag thiab kev nplua heev kuv ua tsheb poob qab ke thiab phim yuav ntxheev lawm hauv kwj ha vim tshuas muaj ib tsob tsawb txheem xwb. Cov neeg tuaj pom ces lawv sib tham zom zaws tias vim muaj tej dab hauv toj hauv pes pab ces kuv thiaj li tsis poob nram kwj ha.

    Ces kuv thiaj li tau lub sij hawm qhia kev ntseeg rau lawv tias raws txoj cai mas kuv yuav tsum poob nram kwj ha, dab mas nws nyob xyaw tej xyoob ntau kwj ha nws yog nature tab sis daim duab nej pom no mas yog ib yam uas nws siab dua nature. Mas tus uas nws ua tau li no nws yuav tsum yog Super Nature ces hais tau tias yog Tswv Ntuj thiab Niam Mab Liab pab kuv.

    Vim muaj cov dab phem muab kuv thawb nram qab ke thab sis Tswv Ntuj thiab Niam Mab Liab puag kuv cia, ces sawv daws tuaj mloog kuv thiab tuaj teev ntuj coob kawg. Ib zaug kuv ua tsheb ntxeev hauv ib lub zos Yas ces lawv thiaj li tuaj nrog tsa lub tsheb tau kuv pw thiab qhia ntuj kev cai rau lawv tau 4 hnub vim lub zos ntawd muaj cov ntseeg thiab tsev teev ntuj.

    Sij hawm ntawd lawv tau ib tug hais rau ib tug ib lub zos hais rau ib lub zos ces hnub kuv ua hmoov hla rau lawv muaj tib neeg tuaj ko taw ntawm
    5 lub zos tuaj koom teev ntuj ua ke thiab muaj cov ua txais kev ntseeg los ntev, cov hluas lawv thov txais lub cim ntxuav 50 tawm leej. Huab Tais Ntuj nws hlub peb thiab Nws muaj Nws tus txheej txheem rau peb, pem thiaj li yuav tsum tso siab rau nws tas zog.

    Nyob Koos Thej Kuv thiab Phauj Maiv Yi koom nrog ib co tub ntxhais hluas Hmoob peb los sib sau thiab teev ntuj ua ke. Tam sim no peb pawg ntseeg no nws hlob zuj zus tuaj lawm. Ces kuv thiaj li teem mus ntsib lawv thiab coj lawv ua thaj txi ntuj teev ntuj ib hli ib zaug. Tej lub hli mas lawv kuj tsis xyeej ces peb kuj tsis tau ntsib kuj muaj. Txiv plig Ntxhoo Lwv nws kuj tuaj nrog peb koom teev ntuj ua ke thiab.

    Peb cov Phauj Hmoob

    Tam sim no, peb kuj muaj phauj Hmoob 7 leej thiab vam tias tsis ntev no mas peb yuav muaj ib ob leeg ntxiv tuaj. Cov phauj sawv daws kuj nyias ua hauj lwm rau nyias lub Koos Haum, nyuaj me ntsis ua lawv yuav los ua hauj lwm rau Hmoob vim lawv yuav tsum mloog lus me ntsis.
    Tej thaum mas kuv kuj xav kom lawv pab kuv mus pem roob kom cov Hmoob pom thiab paub txog cov phauj, tab sis mas kuj yog ib qho chaw nyuaj rau lawv thiab nyuaj rau kuv thiab. Yuav tsum mus thov lus kheev, yuav tsum muaj chaw zoo pw, ces qhov ntau kuv mus ib leeg nws yooj yim dua.

    Hmong Catholic Games

    Muaj ntau zaus cov ntseeg sib ntsib nram tej nroog lawv tsis sib paub, ces sawv daws pom tias yuav tsum muaj ib lub caij los sib fim. Thiaj li ua kom muaj Hmong Catholic Games kom cov hluas tau tuaj ntaus pob ua si sib twv ua ke, cov niam tsev thiab cov txiv tsev. Xyoo tas los no ces muaj 5 lub zos tau tuaj koom. Nws yog ib qho zoo heev, ib xyoo mas muaj ib zaug, rov lawm lwm xyoo mas yuav yog lub zos Khoom Kam uas kuj yog ib lub zos txais kev ntseeg los ntev hauj sim. Qhov ntau mas cov ntseeg tsis muaj leej twg pab nrhiav paj tsab rau cov tuaj sib tw. Xyoo dhau los no txiv plig thiaj li nrog lawv nrhiav tau ob peb lub tais paj tsab. Txiv xav kom muaj kev sib fim ntxiv mus kom peb yuav sib paub dav tuaj.

    1 Haiv Yas

    Cov Yas yog ib haiv neeg toj siab qhov ntau lawv nyob rau Phab Maj teb, lawv muaj txiv plig peb caug tawm leej thiab muaj phauj coob hauj sim lawm. Yog ib haiv neeg nyiam nyob ntsiag to, siab txias heev. Qhov ntau haj tseem txom nyeem dhua Hmoob vim lawv tsis tshua mob siab ua noj ua haus. Hais txog kev ntseeg mas lawv mob siab rau kawg li, tuaj teev ntuj sawv txov tsaus ntuj nrog lawv tus xib hwb. Kuv kuj pab saib muaj kawm tawm lub zos yas thiab. Kev mus pem lawv zos mas nyuaj kawg, cov laus txom nyeem heev muaj mob tsis muaj leej twg xa mus tsev tshuaj sij hawm kuv mus xyuas lawv mas thiaj li npaj tshuaj muab faib rau cov muaj mob muaj nkeeg

    Cov leej tij Hmoob

    Peb kuj muaj ob peb leeg leej tij, kuv tsis tau ntsib lawv sawv daws tas nrho ua ke. Tsuas tau ntsib leej puav xwb muaj qee leej kuj los xyuas kuv thiab nrog kuv tham los tej thaum mas lawv kuj ntaus xov tooj tuaj nrog kuv sab laj tej. Tsaib no ces muaj ob leeg thiaj li los xyuas kuv ntawm Tseej Maim, nkawd lub npe hu ua Xob thiab Yas. Nkawd tab tom npaj yuav mus kawm nyob tsev npaj ua txiv plig txheej philosophy rau xyoo 2009 yuav txog no. Kuv kuj xav pab nkawd kom ua siab loj, thiab yog muaj leej twg xav ua niam qhuav txiv qhuav pab nkawd mas kuv yuav zoo siab xwb xwb li. Kuv yuav tsis pom zoo rau pab nkawd ncaj qha yog tau mas yuav tsum hla ntawm tus txiv plig uas saib xyuas nkawd, los yog cia kuv ua tus saib xyuas xav tias nws yuav zoo dua. Qhov ntau thaum lawv tuaj xyuas kuv los kuv ntsib lawv mas kuv muab me ntsis nyiaj rau lawv siv taug kev los yuav tej yam paj tsab rau niam thiab txiv li ntawd xwb. Xyoo no mas kuj xav tias yuav muaj tus puav mus kawm ua txiv plig ntxiv thiab.

    Sau los ntev thiab ntau lawm, ntshai nej twb ceeb laj nyeem tas ces cia sib ntsib dua rau lwm tsab ntawv. Thov txim ntau ntau rau sawv daws vim kuv tsis tau teb sawv daws cov tsab ntawv hauv email kuv thov ua sawv daws tsaug ua nej tseem nco txog kuv tas mus li thiab sau email rau tuaj rau kuv. Niaj hnub kuv nco txog nej sawv daws hauv zaj teev ntuj.
    Xob & Yas
    Thov Huab Tais Ntuj nrog nraim nej sawv daws mus li.
    Txiv Plig Tshaj Xwm Thoj, C.Ss.R.
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty Re: TXIV PLIG TSHAJ XWM, NYOB XEEV TSEEJ MAIM, THAIB TEB.

    Post  Maiv Tooj 1st September 2009, 7:07 am

    Peb yuab thov Ntuj pab TP. Tshaj Xwm, vim nws ib leeg xwb, nws muaj hauj lwm ntau heev ua, nws yog ib tug Txiv plig hluas hluas los nws yuav tau ua kwv tij Hmoob sawv daws niam sawv daws txiv.



    TP. Tshaj Xwm Thoj cov lus ua ntej ua Leej choj:



    TXIV PLIG TSHAJ XWM, NYOB XEEV TSEEJ MAIM, THAIB TEB. Tp_tsh10
    Tus Muam Phauj Ntxawm nrog Leej Tij Thoj Xwm
    tham txog nws lub neej tshiab..


    TXIV PLIG TSHAJ XWM, NYOB XEEV TSEEJ MAIM, THAIB TEB. H4
    Leej Phauj Ntxawm


    Phauj Ntxawm:

    Nyob zoo leej tij Thoj Xwm

    Leej Tij Thoj Xwm:

    Nyob zoo Phauj Ntxawm


    Phauj Ntxawm:

    Hnub no koj tuaj txog rau ntawm peb lub xov tooj cua hais lus Hmoob zoo Tswv Zov Yaj no, mas kuv xav kom koj hais ob peb lo lus rau peb cov kwv tij Hmoob.

    Leej Tij Thoj Xwm:

    Tau kawg mas kuv lub npe hu ua Xwm xeem Thoj nyob ntawm lub zos Naj Xuas hauv lub xeev Nan , Thaib teb.

    Phauj Ntxawm: Leej tij koj yog leej twg tub thiab koj muaj hnub nyoog pes tsawg xyoo lawm?

    Leej Tij Thoj Xwm:

    Kuv yug los xyoo 1974 mas tam sim no kuv twb muaj hnub nyoog 32 xyoo rau xyoo no lawm. Kuv txiv hu ua Nyiaj Tsab Xeem Thoj. Kuv niam hu ua Maim Dib, nws yog Hmoob Xeem Hawj. Kuv niam kuv txiv ob tug mas tseem niaj hnub mus ua liaj ua teb.


    Phauj Ntxawm:

    Koj muaj kwv tij muam phauj pes tsawg leej?

    Leej Tij Thoj Xwm:

    Kuv muaj ob tug tij laug- Tus tij laug hlob yog Xib Hwb Nkauj Neeb. Nws ua Xib Hwb pab Txiv Plig Tshaj Sawm thiab - Tam sim no nws saib cov ntseeg nyob hauv lub xeev Nan thiab hauv kuv lub zos. Tus tij laug ob mas nws kuj muaj poj niam me nyuam thiab ua liaj ua teb.- Ob tug kwv yau thiab peb leeg muam yau mas sawv daws tab tom kawm ntawv.

    Phauj Ntxawm:

    Koj txais kev ntseeg tau ntev li cas lawm?

    Leej Tij Thoj Xwm:

    Kuv txiv tau coj peb los txais kev ntseeg thaum kuv muaj hnub nyoog kwv yees li 4 los 5 xyoos - Lub sij hawm ntawd mas kuv nco tau tias : nyob hauv peb lub zos mas tsuas muaj 3 yim neeg ntseeg xwb.- Xyoo 1983 Txiv Plig Tshaj Sawm ua lub Cim Ntxuav rau peb tsev neeg sawv daws vim cov nom tswv Thaib tuaj thauj peb mus nyob rau hauv lub yeej tawg rog Tseej Khas- . Dua li mas Txiv Plig Tshaj Sawm thiaj li pab peb sawv daws rov qab los nyob pem peb lub qub zos thiab - Txiv Plig pab peb txhim tsa peb tsev – Nws kuj pab mov noj rau sawv daws, tsis hais cov ntseeg los tsis ntseeg yeej pab ib yam nkaus.
    Phauj Ntxawm: Hais txog koj kev kawm ne zoo li cas?

    Leej Tij Thoj Xwm:

    Kuv kawm ntawv nyob hauv kuv lub zos tau 6 xyoo - Thaum kuv tseem kawm nyob xyoo 5 , mas muaj ib hmos kuv txiv, kuv tij laug Nkaj Neeb thiab kuv, peb nyob ua ke hauv tsev ces kuv tij laug hais rau kuv txiv wb tias : “Yog kuv kawm 15 xyoo ntxiv mas kuv yuav tau ua Txiv Plig , tab sis tus yuav mus mas, Leej Tij Thoj Xwm od , ntshai yuav yog koj” - Nws hais li ntawd rau kuv ces kuv lub siab qhib hlo ces xyoo 1989 kuv kawm tiav nyob hauv kuv lub zos thiab Txiv Plig Tshaj Sawm txais kuv tuaj mus kawm nyob rau hauv tsev Hauv Paus Hmoob Tsheej Maim.- Kuv lub siab haj tseem xav txog kev mus ua Txiv Plig tsis tseg li.

    Nyob ntawm tsev Hauv Paus Hmoob mas niaj hnub Txiv Plig thiab cov Xib Hwb qhia kev ntseeg thiab ntawv Moo Zoo rau peb cov hluas yav hmo ntuj mas peb tau mus kawm txuj sab nraud.- Kuv kawm ib xyoo ntau xwb ces kuv twb kawm tiav nyob tsev kawm ntawv Thaib , ces kuv vam hais tias kuv yuav tau mus kawm ua Leej Tij.

    Lub caij ntawd mas muaj 5 los 6 leej tub hluas uas Txiv Plig twb xa lawv mus kawm ua Leej Tij.- Lawv ua Leej Tij zwm rau lub Ceeb Koom Txoos Tseej Maim. - Kuv thiaj li mus thov Txiv Plig mus ua Leej Tij ces Txiv Plig hais rau kuv tias : “ Koj tseem yau heev “- Nws kuj hais kuv kom kuv nyob tos ib xyoo ntxiv. Ces xyoo ntawd , muaj ib tug phooj ywg - nws hu ua Lauj Xeeb nws ua ntej kuv ib xyoo ces wb thiaj li npaj ua ke yuav mus ua Leej Tij.- Thaum lub xyoo kawm ntawv tas ces Lauj Xeeb tau mus ib leeg xwb - Txiv Plig tias kuv tseem tsis tau tiav xyoo plaub ces cia kuv tiav xyoo plaub tso ces Lauj Xeeb mus tseg kuv- ces kuv tu siab me ntsis- Kuv xav tias : “ Ua li cas yuav nyuaj ua luaj li ! “. Thaum kuv rov mus ntsib Txiv Plig ces nws hais rau kuv tias : “ Koj tseem hluas thiab siab kub heev npaj zoo zoo, mam li mus ua Leej Tij thaum koj kawm tiav lawm mas koj yuav kub siab tshaj Ntuj lus ib yam li tus Hauv Paus Xa Lus Paj Lug- . Ces kuv hais rau Txiv Plig tias : “ Kuv tsis xav mus caum lawv cov uas twb ua kuv ntej lawm.- kuv tsis xav mus caum lawv cov uas twb ua ntej mus ua Leej Tij zwm rau lub Ceeb Koom Txoos Tseej Maim - Kuv yuav mus hauv cov tub Koom Haum.”

    Ces kuv txiav txim siab mus hauv “Tus Cawm lub Koom Haum (Redemptorist) ces Txiv Plig thiaj ua ntau yam los pab kuv - Xyoo 1993 kuv thiaj li mus pib kawm nyob tsev kawm ntawv txheej siab rov mus txog xyoo 1995 - Xyoo 1996 kuv kawm me ntsis txog lub neej ua tub Koom Haum.- Ces lub plaub hli ntuj xyoo 1997 txog 1998 , kuv npaj kuv lub siab ua tub koom haum , rov mus txog lub plaub hli 1998 kuv thiaj li cog lus thawj zaug nyob hauv kuv lub Koom Haum.

    Xyoo 1998 – 2001 kuv kawm txuj ci “Philosophy uas yog kev thoob tsib txheej siab.” nyob rau hauv lub tsev kawm ntawv npaj ua leej choj uas hu ua Saengtham nyob Thaib teb.

    Xyoo 2002 kuv cog lus ua tub Koom Haum tas ib sim neej thiab kawm ib xyoo nyob Saengtham txog Theology uas nws yog txuj ci qhia txog Tswv Ntuj.

    Xyoo 2003 kuv tuaj kawm Theology ntxiv rau ntawm Fis Lis Pees teb nyob hauv lub nroog Davao - Lub 5 hli tim 28 xyoo 2005 kuv txais lub Cim Tiag Tes ua Tub Tsob Fwb nyob rau Koos Thej thiab rov qab tuaj kawm ntxiv nyob rau Davao - Kuv vam hais tias kuv yuav kawm tiav nyob rau hauv lub 10 hli xyoo 2006 no.

    Phauj Ntxawm:

    Muaj dab tsi nplij koj lub siab kom koj xav los ua Leej Choj?

    Leej Tij Thoj Xwm:

    kuv kuj tsis paub Huab Tais Ntuj tus txheej txeem uas Nws muab rau kuv-. Ib yam loj kuj mus li no tias : kuv niam kuv txiv tau pab txhawb nqa kuv txoj kev ntseeg kom loj hlob tuaj - Tsis tas li no xwb : kuv tij laug Nkauj Neeb uas nws tseb kev ua Leej Choj rau hauv kuv lub siab , thaum kuv yav yau -. Dua li ntawd mas yog vim kuv tau nrog Txiv Plig Tshaj Sawm nyob tau 4 xyoo : thaum ntawd kuv thiaj tau qhuas txog nws txoj kev ntseeg thiab tas nws tej dej num tshaj Ntuj lus mas kuv xav lawv nws qab , ces thiaj txiav txim siab ua ib tug tub tshaj Ntuj lus zoo ib yam li nws.

    Phauj Ntxawm:

    Yav dhau los koj puas ntsib tej yam kev nyuaj siab ua kom koj ntaus siab me?

    Leej Tij Thoj Xwm:

    Thawj xyoos uas kuv kawm ua Leej Tij mas khwv heev vim kuv tseg tau ob xyoo ntau uas tsis tau kawm ntawv nyob tom tsev ntawv Thaib mas kuv rov los pib kawm nyob hauv lub tsev kawm ntawv, uas lub npe hu ua Assumption, tom lub nroog Sriracha -nws kuj yog lub tsev kawm ntawv uas loj tshaj nyob rau Thaib teb sab toob fab thiab cov uas npaj siab ua Leej Tij sawv daws mas yuav tsum tsom txuj kom dhau li 75 / 100 - Vim li ntawd mas kuv thiaj li yuav tsum nyeem ntawv kom ntau dua luag tej.

    Dua li mas cov neeg Thaib uas nrog kuv kawm ntawv kuj saib kuv qes qes me ntsis vim kuv lub hnub nyoog loj dua lawv li 2 xyoos. Thiab yog vim kuv yog ib leeg Hmoob mas lawv yeej thuam kuv me ntsis- . Lub sij hawm ntawd mas kuv kuj muaj ib leeg Leej Tij Hmoob nrog kuv ua ib xyoo - hos ob tug yau kuv 3 xyoos mas peb yog 4 leeg ua ke. Thaum kawm tiav ces tus uas nrog kuv nws tawm lawm hos ob tug yau kuj tawm ib leeg - tshuav ib leeg. Txij thaum ntawd los ces kuv kuj ncaim mus nyob dua ib lub chaws tshiab ces yeej tsis muaj ib tug Hmoob nrog kuv los txog niaj hnub no li.

    Xyoo 2002 kuv ua xyem xyav txog kev cog lus mus tas ib sim neej - Kuv thiaj li nrog Txiv Plig Tshaj Sawm tham hais tias : “ Kuv yuav ua li cas coj tau lub neej tab seeb mus tas ib sim neej ? “ -. Txiv plig hais rau kuv tias : “ Yeej tsis muaj leej twg paub txog qhov ntawd li - Kawg yog Huab Tais Ntuj tib leeg xwb thiaj li paub txog qhov ntawd - txhob rawm ntaus siab me”.

    Kuv tseem xav txog qhov ntawd niaj hnub mas kuv cev kuv tej nplooj siab nplooj ntsws rau Tswv Ntuj tias : “Kuv yuav coj lub neej nyob hauv tub koom haum tas ib sim neej”.

    Yog vim qhov ntawd ces yav tsaus ntuj kuv ua Ntuj tsaug thiab kuv los thov txim ntawm Tswv Ntuj. - Niaj hnub mas kuv nrog tij laug Yes Xus tham thiab kuv thov Huab Tais pab txhawb nqa kuv lub siab - Kuv paub tseeb tias : Huab Tais Yes Xus yuav tsis tso kuv pov tseg ib zaug li - Ces kuv mus sau siab tau 30 hnub ntxiv, kuv thiaj li cog lus ua tub Koom Haum tas ib sim neej nyob hauv lub 4 hli xyoo 2002.

    Phauj Ntxawm:

    Ob hnub no koj puas tseem ntsib kev nyuaj siab dab tsi?

    Txuas ntxiv


    Last edited by Koojziagkabzaug on 1st September 2009, 7:21 am; edited 1 time in total
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty Re: TXIV PLIG TSHAJ XWM, NYOB XEEV TSEEJ MAIM, THAIB TEB.

    Post  Maiv Tooj 1st September 2009, 7:08 am

    Leej Tij Thoj Xwm:

    Txij thaum kuv tuaj kawm nyob rau Fis Lis Pees teb no mas yeej yog ib yam nyuaj rau kuv kawg , vim kuv yuav tsum siv xeem lus tshiab uas yog lus Aas Kiv thiab kuv kawm hnyav heev mas khwv kawg. - Qhov ob mas kuv dhuav kawm txuj kawg li lawm , vim kuv zaum thiab mloog Xib Hwb qhia ntau yam txuj ci nyob hauv tsev kawm ntawv, twb tau 24 xyoos txog tav no mas dhuav kawg li - . Dua li mas kuv kho siab vim tsis muaj ib tug Hmoob nrog kuv ua phooj ywg - Kuv nyob ib leeg mas yeej nyuaj siab ntau zaus.

    Phauj Ntxawm:

    Thaum koj txais lub Cim Tiag Tes ua Leej Choj lawm, koj puas npaj siab txog yav tom ntej tias koj yuav mus ua dab tsi?

    Leej Tij Thoj Xwm:

    Yog Huab Tais Ntuj hu thiab pom zoo mas lub ib hlis ntuj xyoo 2007 kuv yuav txais lub Cim Tiag Tes ua Leej Choj nyob rau hauv lub nroog Koos Thej Thaib teb. - Kuv kuj vam ntsoov tias kuv yuav rov qab mus tshaj Ntuj lus rau kuv haiv neeg Hmoob - Kuv yuav coj kuv txoj kev ntseeg thiab Huab Tais Yes Xus lub txiaj ntsim mus rau sawv daws . Kuv yuav ua nej tus Leej Choj - kuv vam tias sawv daws yuav pab qhuab qhia kuv - Tsis tas li ntawd xwb .mas kuj nyob ntawm tus Txiv Plig uas saib kuv nyob hauv kuv lub koom haum , saib nws yuav xa kuv mus nyob rau qhov twg.

    Phauj Ntxawm:

    Koj ua leej tij nyob hauv lub Koom Haum los mus ua tus dab tsi?

    Leej Tij Thoj Xwm:

    Kuv ua leej tij nyob hauv “TUS CAWM LUB KOOM HAUM” (HOLY REDEEMER) uas yog Leej Ntshiab As Fos Xaus ua tus tsa lub Koom Haum los tshaj Ntuj lus rau cov neeg txom nyem.- Kuv niaj hnub nco tias :Txiv Plig Tshaj Sawm kuj nyob hauv lub koom haum no thiab.- Mas nyob hauv lub nroog Hom Cis Mees, tom Cob Tsib teb , peb lub Koom Haum kuj muaj ib lub tsev kawm ntawv rau cov tub hluas uas npaj siab ua leej tij -. Nyob Suav teb mas muaj ib tug txiv plig Cob Tsib ua ke nrog ib pab txiv plig Aus thas lias, lawv kuj tshaj Ntuj lus rau peb haiv Hmoob -. kuv vam hais tias muaj ib hnub kuv yuav tau mus xyuas nej sawv daws nyob Cob Tsib teb thiab Suav Teb.

    Phauj Ntxawm:

    Yog muaj ob peb leeg tub hluas Hmoob uas yog Kav Tos Liv nyob Thaib teb thiab Los Tsuas teb xav npaj siab ua leej tij los ua Leej Choj zoo cuag li koj , koj puas xav hais lo puav lus txog lub neej ua leej tij los ua leej choj rau lawv?

    Leej Tij Thoj Xwm:

    Hais txog kev ua leej tij mas nws yeej tsis yooj yim li siab xav - Koj yuav kawm txuj yav siab uas yog lub Koom Txoos Kev Ntseeg txog ntawm 7 los 8 xyoo - Koj yuav kwv koj tus ntoo cuam thiab raws Huab Tais Yes Xus qab.- Koj yuav ua lub neej tab seeb thiab zwm rau Tswv Ntuj mus tas ib sim neej.- Thaum koj coj lub neej zoo li no lawm mas tsis yog tias koj yuav ntsib kev nyuaj siab - Qhov tseeb mus li no tias : koj yuav ntsib kev thaj yeeb nyob hauv koj lub siab. Yog Huab Tais Ntuj hu koj ces Nws yuav pab koj xwb mas txhob ntaus siab me tias : tsam kawm tsis tiav.

    Kuv ntseeg tias koj yuav kawm ntau yam txuj , mas tau xwb , vim peb haiv Hmoob kuj yog ib haiv neeg uas ntse tsis swb luag pej kum haiv neeg. Qhov kawg koj yuav yog ib tug Leej Choj tshaj Ntuj lus rau peb cov kwv tij Hmoob ces sawv daws yuav zoo siab heev - Koj yuav zwm rau ib lub Koom Haum xws li kuv kuj zoo - Ho yog koj tsis xav ua tub koom tes hauv hauv ib lub Koom Haum, mas tsis ua li cas – Koj yeej muaj peev Leej Tij Thoj Xwm kawm txuj ci txheej siab, ces thiaj ua tau ib tug Leej Choj nyob hauv ib lub Ceeb Koom Txoos.

    Phauj Ntxawm:

    Nyob hauv peb haiv Hmoob ib tug txiv neej tsis muaj poj niam tub se mas tsam nws coj lub neej tsis tsheej neeg, hos ntawm koj mas koj yuav coj lub neej qee rau Tswv Ntuj mas koj xav zoo li cas? Puas ntshai tsam koj lub neej tsis tiav?

    Leej Tij Thoj Xwm:

    Leej Ntshiab Paj Lug hais tias : “ Yog nej coj tau ib lub neej nyob tab seeb zoo li kuv no/ mas nws zoo kawg li tab sis yog nej lub siab xav mus ua txij ua nkawm mas nej mus ua txij nkawm los mas “..Yog Huab Tais Ntuj hu koj mus ua txij nkawm ces koj mus ua txij nkawm los mas .Lub neej ua txij nkawm , nws kuj tsis qes dua kev ua Leej Choj thiab nyob tab seeb. Huab Tais Ntuj foom hmoov zoo rau sawv daws ib yam nkaus.

    Tej zaus yuav muaj 2-3 tug Hmoob yuav hais kuv tias : “Peb Hmoob mas yog koj tsis muaj tub ki ces yeej tsis muaj tus saib xyuas koj rau yav laus - Ua li mas koj puas yuav tsum txhawj txog yav laus , tsam tsis muaj neeg saib ? “ Mas kuv yuav teb zoo li no tias: “ Kuv tsis txhawj li : yog koj siv tas koj lub neej ua tub tshaj Ntuj Lus , mas lub Koom Txoos yuav saib xyuas koj.”

    Saib ! puas yuav tau muaj ib cov kwv tij Hmoob rov hais kuv dua tias :

    “ Koj yuav ua tub tshaj Ntuj lus thiab koj yuav coj ib lub neej qee rau Tswv Ntuj , mas koj puas ntshai tsam koj lub neej tsis tiav no ne” – mas kuv yuav teb zoo li no tias : “Hais txog qhov no mas kuv kuj xav ntau mas vim kuv pom muaj coob leej mas lawv lub neej yeej tsis tiav lauj -Ntawm kuv ne kuv puas txhawj txog kuv lub neej yav tom ntej ? Mas kuv xav hais ib zaj lus ua piv txwv tias : thaum koj saib ntawv xov Leej Tij Thoj Xwm thiab koj hnov tias ib lub tsheb poob nram kwj hav thiab muaj neeg raug sab los tuag - mas kuv xav nug kuv tus kheej hais tias :” Koj puav yuav txiav txim siab tsis caij tsheb mus tas ib sim neej ?”. Ntawm kuv mas kuv yuav tsum caij tsheb xwb lauj, vim tsis yog txhua lub tsheb yuav tsum ntsib Leej Tij Thoj Xwm txheej. - Nyob hauv lub neej ua Leej Choj kuj zoo ib yam nkaus - muaj tej tus mas ntsib kev nyuaj thiab- Lawv lub neej mus tsis tiav - Kuv xav tias cia kuv sim mus saib yuav zoo li cas - Tej zaum mas kuv kuj yuav ntsib Leej Tij Thoj Xwm txheej - Tab sis kuv yeej tso siab lug rau Tswv Ntuj, Kuv yuav thov Ntuj pab kuv txhua txhua hnub ,ces thiaj vam ntsoov tias : kuv yuav tsis ntsib Leej Tij Thoj Xwm txheej lauj – Kuv lub zog yuav txhawv hauv kev tso siab lug rau Tswv Ntuj los ntag ..

    Phauj Ntxawm:

    Koj yuav ua Leej Choj lub 1 hlis xyoo 2007 yuav tuaj no mas koj yuav ua tub tshaj Ntuj lus rau haiv neeg twg ? Cov Thaib, cov Co, cov Khamu , cov Karen los peb cov Hmoob - Koj xav li cas?

    Leej Tij Thoj Xwm:

    Ntawm kuv mas kuv xav mus nrog Hmoob nyob mas ntshai Hmoob yuav hlub kuv dua thiab vim peb Hmoob nyob Thaib teb , lawv tseem tsis tau muaj ib tug Txiv Plig Hmoob ua Thaj Txi Ntuj ua lus Hmoob - Yog tias peb tsoom Hmoob nyob Thaib teb tsis muaj ib tug Txiv Plig Hmoob ces ntshai tsam yav tom ntej lawv yuav tsis txawj ua Thaj Txi Ntuj ua lus Hmoob lawm lauj.

    Puag ta kuv twb nthuav kuv lub tswv yim rau nej- Hos ziag no mas yuav tsum rov hais tib zaj ntawd dua los qhia nej , hais tias : muaj cov Txiv Plig loj, uas lawv saib kuv hauv peb lub Koom Haum, mas yav tom ntej saib : lawv yuav xa kuv mus rau qhov twg.

    Phauj Ntxawm:

    Koj tseem tshuav tej lo lus hais rau peb cov kwv tij Hmoob lod ..?

    Leej Tij Thoj Xwm:

    Qhov kawg no xav hais ob peb lo lus ntxiv rau peb cov kwv tij Hmoob sawv daws , tsis hais nyob rau qhov twg los nyob hauv lub zos twg, hais tias : thov kom nej sawv daws ua siab loj/ siab tawv qhawv/ thiab tso siab lug rau peb tus Huab Tais Tswv Ntuj - Txawm peb tsis muaj cov Txiv Plig Hmoob coob li lwm pab neeg ntseeg nyob pej kum teb…los nej tsis muaj Txiv Plig tuaj saib xyuas nej, tsis kav thov kom nej nco ntsoov hauv nruab siab tias : Huab Tais Ntuj tsis tso leej twg pov tseg kiag li- . Huab Tais Ntuj yeej muaj nws tus txheej txheem rau peb haiv Hmoob sawv daws.

    Tsoom kwv tij hmov thiab tshua , thov kom Huab Tais Ntuj nrog nej sawv daws nyob nraim – Thov kom Huab Tais Ntuj pov hwm nej txhua leej txhia tus, yam nej yuav tau coj lub neej nyob kaj lug kaj nrig mus li lauj ..
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty Re: TXIV PLIG TSHAJ XWM, NYOB XEEV TSEEJ MAIM, THAIB TEB.

    Post  Maiv Tooj 18th January 2010, 10:00 pm

    เสาร์, 01 ธันวาคม 2007

    TXIV PLIG TSHAJ XWM, NYOB XEEV TSEEJ MAIM, THAIB TEB. Duab10





    Fr. Waiyakorn and Hmong

    These last two weeks of September have been busy for the Hmong Catechists and Fr. Waiyakorn. All of the Catechists were at the Hmong Center for meetings and to celebrate the anniversary of death of Fr. Harry Thiel on September 23rd. Several days of retreat and instruction preceded this Anniversary Mass. Fr. Lawrence Chakrit, CSSR, the first Hmong priest of Thailand, came to celebrate this Mass with the Catechists. This year of 2007 has been so full of activity, beginning with the First Mass of Fr. Chakrit in January. A new church was blessed in February in the village of Mae Ta La by Bishop Sangvan of Chiangmai. A school year at the Hmong Center ended in March, giving our Catechist some vacation time at their homes. During April, there was a Catechism Camp for young students and another Camp for youth. Fr. Waiyakorn bought an old house in July and converted it into a church in the village of Mae Sa Mai. This church was dedicated in memory of Fr. Harry Thiel. Since Fr. Harry had a great devotion to Our Mother of Perpetual Help, the new church bears this name of Mary. Please enjoy this picture of Fr. Waiyakorn and his Hmong Catechists.








    Hmoob Kas Tos Liv Tseej Maim






    TP. Tshaj Xwm ua Mis Xas pem zos Hmoob nyob NAN.










    Major Seminarians in the Philippines

    Poowanai "Ole" writes from Davao, Philippines: "I am sending you pictures of our Thai CSSR studying Theology in Davao. One is a group picture of the Davao community. There are 19 students [10 Thai, 8 Filipino and 1 Malaysian], 6 priests and 1 Brother.
    Jun 2007






    Foom hmoov zoo rau dej.


    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    TXIV PLIG TSHAJ XWM, NYOB XEEV TSEEJ MAIM, THAIB TEB. Empty Re: TXIV PLIG TSHAJ XWM, NYOB XEEV TSEEJ MAIM, THAIB TEB.

    Post  Maiv Tooj 19th March 2010, 5:27 am



    txiv plig tshaj sawm tuaj mus Tresno.