Qhia keeb kwm kev ntseeg. TP.Cwj Vuam CChiv.

Lus Nug Thiab Teb

Tus Tswv Ntuj peb teev yog leej twg?

Tswv Ntuj yog tus tsim lub ntuj lub ntiaj teb. Nws tshwm sim ua ntej lub ntuj, lub ntiaj teb, thiab yuav nyob mus li tom qab uas tsis muaj lub hnub, lub hli thiab cov hnub qub tag lawm. Peb qhov muag tsis pom Tswv Ntuj, tab sis peb lub tswv yim muaj peev xwm nrhiav tau Tswv Ntuj nyob hauv lub sim ceeb no thiab nyob hauv peb siab.

Tswv Ntuj xav los nyob hauv peb kom peb thiaj yuav paub nws thiab tau txais Nws txoj kev hlub. Thaum ub Tswv Ntuj tau siv ib cov yaj saub los tshaj nws tej lus rau cov yawg koob His Xas Lais. Nws tau cog lus rau peb tias nws yuav cawm peb ntawm peb txoj kev nyuab siab ntxov plawv hauv lub sim ceeb no, kom peb tau mus nrog nws nyob muaj koob meej nto moo lug saum Ntuj Ceeb Tsheej. Tswv Ntuj cov lus qhia rau lub qab ntuj neeg tau muab sau tseg rau hauv phau Ntawv Ntshiab (Bible).

Ntawv Ntshiab (Bible) qhia txog dab tsi rau peb?

Ntawv Ntshiab (Bible) qhia peb tias tsuas muaj ib tug Tswv Ntuj xwb. Nws yog tus tsim lub ntuj, lub ntiaj teb, tsim nroj tsuag xyoob ntoo thiab tsiaj txhu. Tsis tas li ntawd, nws tseem tsim kom muaj cov dab ntuj thiab tib neeg. Tswv Ntuj tsim cov dab ntuj thiab neeg kom los hwm Nws, tab si ib cov dab ntuj thiab tib neeg tsis mloog Nws lus. Txoj kev tsis mloog Tswv Ntuj lus yog ib txog kev txhaum.

Tus thawj dab ntuj uas tsis mloog Tswv Ntuj lus, hu ua "Lucifer", "xas tas", los yog dab phem. Dab phem nrhiav kev ntxias neeg kom txhob mloog Tswv Ntuj lus, thiab kom neeg nrhiav ntiaj teb txoj kev lom zem.

Dab phem tsis muaj lub hwj chim muab kev txhaum rau neeg. Vim tias nws yog ib tug uas Tswv Ntuj tsim los xwb. Dab phem tsuas muab qhov cuav los ntxias dag kom neeg ua txhaum kom ncaim mus deb ntawm Tswv Ntuj. Yog vim li no, luag thiaj hu dab phem ua lub hauv paus ntawm txoj kev dag ntxias.

Txoj kev ua txhaum yuav coj txiab mob txiab nkeeg, kev tuag, kev tsov rog thiab kev tsis sib to taub tuaj rau lub ntiaj teb neeg. Tsuas muaj tib txoj kev uas peb yuav yeej tau qhov phem, yog txoj kev uas peb ntseeg thiab tso siab rau Tswv Ntuj, thiab nrhiav kom tau txoj kev rov los ua raws li lub chiv keeb Tswv Ntuj tau npaj tseg rau ntiaj teb neeg.

Yuav ua li cas peb thiaj rov tau nyob nrog Tswv Ntuj li thaum lub hauv paus?

Nyob hauv Tswv Ntuj, muaj Leej Txiv, Leej Tub thiab Leej Ntuj Plig. Huab Tais Tswv Ntuj uas yog Leej Txiv xa nws Leej Tub tuaj. Leej Ntuj Plig ua kom nws xeeb los ua neeg, kom tau tho txoj xub ke rau peb rov mus pem Ntuj Ceeb Tsheej.

Leej Tub “Yes Xus” yog txhais hais tias “Tswv Ntuj cawm” tau yug los ntawm tus Nkauj Tsim Txiaj Mab Liab los tau muaj 2000 tawm xyoo lawm. Txhua xyoo thaum lub 12 hli ntuj, mas sawv daws rov ua hmoov nco txog Yes Xus yug los, yog ua lub cim nco tias Tswv Ntuj yuav tuaj cawm peb ntawm txoj kev txhaum raws li nws cog lus tseg.

Tswv Ntuj Leej Tub tus zoo tas nrho uas tsis lo lub keeb txhaum raug tuag kom tau them peb txoj kev tsis mloog Tswv Ntuj lus. Nws tuaj yeem tuag nyob saum ntoo cuam kom qhia tau rau peb tias Tswv Ntuj txoj kev hlub peb loj npaum twg. Yes Xus sawv hauv cov tub tuag rov qab los kom thaum peb tso lub ntiaj teb no tseg lawm, peb tau nrog nws muaj txoj sia tshiab nyob hauv Tswv Ntuj lub Ceeb Tsheej. Lub txiaj ntsim hauv lub Cim Ntxuav coj peb los ua Tswv Ntuj cov me nyuam, yog peb ntseeg thiab tso siab rau Nws, mas peb yuav tau txoj sia nyob mus li.

Lub Koom Txoos Los Mas Kav Tos Liv yog dab tsi?

Yes Xus tau tsim lub Koom Txoos kom tau qhia lub sim ceeb txog Tswv Ntuj txoj kev hlub. Lo lus “Kav Tos Liv” (Catholic) muaj lub ntsiab hais tias "mus thoob ntiaj teb", thiab txhais hais tias lub Koom Txoos, mas loj tshaj li ib pab neeg sib txoos ua ke hauv ib lub zos. Yes Xus tau xaiv kaum ob tug thwj tim uas yog cov Hauv Paus Xa Lus, los coj lub Koom Txoos. Lawv tau qhia thiab coj thawj thawj pab neeg uas xub los ntseeg txog Yes Xus, los sib txoos thiab teev Ntuj ua ke.

Niaj hnub nyem no, cov uas los sawv cov Hauv Paus Xa Lus chaw hauv lub Koom Txoos yog cov Tswv Qhia. Ib tiam dhau ib tiam lawv yog cov saib xyuas txoj kev ntseeg, kom txoj kev qhia txoj kev ntseeg tsis txhob pauv mus raws li ib tug neeg twg txoj kev xav los yog tswv yim.

Tus thawj coj ntawm cov Hauv Paus Xa Lus yog Pob Zeb (Saint Peter). Tus hloov Pob Zeb chaw yog Vaj Qhia. Vaj Qhia yog tus Tswv Qhia nyob rau Los Mas (Rome), vim tias Los Mas yog qhov chaw uas Pob Zeb tau tas nws sim neej.

Yog vim hais tias Vaj Qhia yog tus thawj coj cov Tswv Qhia, mas lub Koom Txoos thiaj muaj lub npe hu ua "Los Mas Kav Tos Liv" (Roman Catholic)

Tam sim no, lub Koom Txoos muaj tshaj li ntawm ib txhiab vam tus ntseeg (over 1.2 billion members). Niaj hnub no, peb tseem taug lub Koom Txoos tej keeb kwm, thiab lub hauv paus qab, rov mus txog rau 12 tug Hauv Paus Xa Lus, uas Huab Tais Yes Xus tau tsa lawv ua cov thawj coj txoj kev ntseeg.

Leej twg tsim lub Koom Txoos Kav Tos Liv (Catholic)?

Yes Xus yog tus tsim lub Koom Txoos Kav Tos Liv (Catholic). Nyob hauv cov ntawv Cog Lus Tshiab, mas Leej Pleev thiab nws cov thwj tim tau los sib txoos ua kev, kom xwv tau tshaj lub Moo Zoo mus rau lub qab ntuj neeg. Yes Xus txoj kev sib txoos nrog nws cov thwj tim, mas yog lub hauv paus uas pib txhim kom muaj lub Koom Txoos Kav Tos Liv tshwm sim los.

Leej twg thiaj yog tus muaj cai nyob hauv lub Koom Txoos?

Tus muaj cai nyob hauv lub Koom Txoos yog Huab Tais Yes Xus Pleev. Vim Leej Pleev yog tus tsim lub Koom Txoos thiab tej txheej txheem hauv lub Koom Txoos. Nws yog tus tsa Pob Zeb (Peter) ua tus los ntaus thawj coj lub Koom Txoos thiab nws tso tej kev muaj vaj huam rau Pob Zeb. Yes Xus cog lus tias nws yuav nrog lub Koom Txoos nyob ua ke thiab nws yuav xa Leej
Ntuj Plig Ntshiab los coj lub Koom Txoos.

Vim li cas cov Kav Tos Liv thiaj hais txog "Tiam dhau Tiam" (Tradition)?

Vim li cas cov Kav Tos Liv thiaj li tsis hais txog Ntawv Ntshiab nkaus xwb, es tseem hos yuav hais txog tiam dhau tiam, tis dhau tis thiab ?
Lo lus tiam dhau tiam, mas txhais tias : “Tej laus yuav muab tej kev ntseeg tso rau tej me tub me nyuam, tiam dhau tiam, tis dhau tis”, yam li nyob hauv ntawv Kos Lis Nthos:

11:23 hais li no : "Cov lus kuv qhia rau nej, yog cov lus kuv txais ntawm Huab Tais los"
15:3 hais li no: "Qhov kuv tau qhia rau nej, mas yog qhov kuv xub tau txais, yam li Yes Xus yeem tuag kom tau ntxuav peb cov txhaum pov tseg raws li Ntawv Ntshiab xub hais".


Vaj Qhia thiab lub Koom Txoos puas txawj yuam kev?

Txoj kev ua qhov tseeb nkaus xwb mas yog ib lub txiaj ntsim tuaj ntawm Leej Pleev tuaj. Leej Ntuj Plig Ntshiab yuav kaj txoj kev ntseeg thiab kev ua neeg ntshiab. Qhov no, nws txhais tsis tau hais tias : “Lub Koom Txoos tsis txawj yuam kev, vim cov coj lub Koom Txoos yog tib neeg zoo tib yam li peb sawv daws. Yog vim li no, tej kev cob qhia uas lawv muab rau peb, mas kuj tseem yuav muab nthuav tau mus tob tshaj ntxiv thiab.”

Yog vim li no, peb thiaj cia siab rau Vaj Qhia thiab cov Tswv Qhia txog peb txoj kev ntseeg. Vim peb ntseeg txog Tswv Ntuj lo lus thiab Leej Ntuj Plig Ntshiab lub zog tuaj pab lawv nthuav Tswv Ntuj lo lus raws li Nws tau qhia.

Phau ntawv Ntshiab sau xyoo twg?

Muaj ntau ntau phau ntawv nyob rau hauv phau Ntawv Ntshiab. Phau NTAWV COG LUS QUB tau sau ua ntej Yes Xus yug los. Phau NTAWV COG LUS TSHIAB, mas sau tom qab zog cov qub, kwv yees li 50 mus rau 100 xyoo, yam li tom qab Leej Pleev tuag thiab sawv rov los.


Phau ntawv Ntshiab hauv lub Koom Txoos Kav Tos Liv txawv li cas?

Lub Koom Txoos Kav Tos Liv (Catholic) phau Ntawv Ntshiab, mas yeej tsis tau pauv li, twb muaj tshaj li ntawm 2000 xyoo los lawm. Peb puav leej siv tib cov ntawv cog lus qub ib yam li puag thaum ub Yes Xus thiab nws cov thwj tim tau siv los.

Peb cov kwv tij "Protestant", mas lawv tsis xav yuav ib cov ntawv ntshiab, ces lawv tau muab rho tawm nyob rau xyoo 1500 tej lawm. Txij thaum ntawd los, mas cov Protestant thiaj li pib muaj lawv phau ntawv Vaj Lug Kub.

Nyob hauv Phau Ntawv Ntshiab Kav Tos Liv, mas muaj 46 phau Ntawv Cog Lus Qub, hos 27 phau ntawv Ntawv Cog Lus Tshiab.Tas nrho tib si, ces cov Kav Tos Liv phau Ntawv Ntshiab, muaj 73 phau diam.

Vim li cas cov Kav Tos Liv hwm Leej Niam?

Cov Kav Tos Liv mas lawv tsis teev Leej Niam. Tab sis lawv hwm Leej Niam raws li Ntuj qhia. Muaj 3 yam uas cov Kas Tos Lis hwm niam Mab Liab.

Thaum Huab Tais Yes Xus dai saum ntoo cuam mas nws muab nws Niam rau peb, kom peb coj mus nrog peb nyob tom peb vaj peb tsev
Huab Tais Yes Xus ua raws Tswv Ntuj 10 lo lus qhia. Nyob rau lo lus qhia thib tsib mas hais tias: "koj yuav hwm koj niam koj txiv"
Peb tsoom ntseeg sawv daws, peb yog Yes Xus thwj tim, peb tsuas ua raws li Yes Xus ua xwb. Peb hwm nws Niam raws li Nws hwm Nws Niam

Vatican II (Tuam Rooj Ncauj Lus) yog dab tsi?

Lub Tuam Rooj Ncauj Lus (Council) yog Koom Txoos Kav Tos Liv tuam rooj sab laj, ib tiam neej muaj ib zaug xwb. Koom Txoos hu tag nrho nws tsoom Tswv Qhia thoob ntiaj teb tuaj sab laj txog Koom Txoos lub neej thiab tes dej num.

Vim yog zaum ob, muaj tuam rooj sab laj nyob Vas Tis Kas. Vim twb muaj Vas Tis Kas 1, tim 08.12.1869 txog 20.10.1870, muaj ib puas xyoo dhau los lawm.

TP. Cwj Vuam Chiv piav me ntsis ua lus Hmoob hais txog lub Tuam Rooj Ncauj Lus Vatican 2. Second Vatican Council 1962-1965