COV ZAJ NYEEM NIAJ HNUB HAUV NRUAB LIS PIAM 2014-15

TIM  21 LUB 2 HLIS   2015

Hnub Xya tom qab Hnub Plaub Txais Tshauv

Zaj Nyeem Ib    HIS XAIS  58:9B-14

9b  Yog koj tshem rab quab yuam neeg ntawm koj tsev mus, yog koj tsis tsa nrig rau luag, yog koj tsis hais cov lus phem, 10 Yog koj yoo kom tau faib rau tus neeg tshaib noj, yog koj pab tus neeg txom nyem, mas koj qhov pom kev yuav sawv tuaj nyob hauv qhov tsaus ntuj, koj txoj kev tsaus ntuj yuav pom kev nrig li thaum tav su. 11 HUAB TAIS yuav coj koj kev tsis tseg, nyob hauv teb chaws qhuav nws yuav pub rau koj haus kom zoo nqhis, nws yuav ua kom koj cov pob txha rov muaj zog. Koj yuav zoo li ib lub vaj muaj dej ywg, koj yuav zoo li lub qhov dej txhawv uas dej ntws tsis txawj tu. 12 Koj cov qub vaj tse uas vau lawd yuav rov sawv tuaj, koj yuav rov txhim vaj txhim tsev rau saum cov qub taw ntsa txheej thaud, luag yuav hu koj ua tus kho tej yam tawg, tus rov txhim tej kev, kom  tau kev mus nyob. 13 Yog koj tsis hla hnub xas npas tos, koj tsis ua raws koj lub siab nyiam hnub ntshiab ntawd, yog koj hu hnub xas npas tos ua "Hnub qab zib",  ua HUAB TAIS hnub ntshiab uas "tsim nyog hwm", yog koj hwm hnub xas npas tos, koj tsis mus kev deb, koj tsis leg koj cov dej num, koj tsis piav tej zaj lus ntev ntev, 14 ces koj yuav muaj kev puv siab npo nyob hauv HUAB TAIS,  kuv yuav coj koj mus caij muaj hwj chim ntxiag saum cov toj roob siab nyob hauv lub teb chaws, kuv yuav muab koj txiv Yas Kos lub cuab tam los yug koj. Vim HUAB TAIS lub ncauj tau hais li ntawd.

NPN   86:1-2, 3-4, 5-6

Txais:    (11ab) Thov koj qhia koj txoj kev rau kuv, Huab Tais, kuv thiaj taug raws koj txoj kev ncaj.

Thov koj khoov cuab pob ntseg mloog kuv, HUAB TAIS, thov teb kuv,
vim kuv txom nyem thiab kuv pluag.
Thov koj txuag kuv tus ntsuj plig, vim kuv npuab koj;
thov koj cawm koj tus tub txib uas tso siab rau koj,
Koj yog kuv tus Tswv Ntuj.

Txais:    (11ab) Thov koj qhia koj txoj kev rau kuv, Huab Tais, kuv thiaj taug raws koj txoj kev ncaj.

Thov koj khuv leej kuv, Huab Tais,
vim kuv hu koj tas hnub.
Thov koj pub kev zoo siab rau koj tus tub txib ntsuj plig,
vim kuv tsa kuv tus ntsuj plig yuj plaws tuaj rau koj, Huab Tais.

Txais:    (11ab) Thov koj qhia koj txoj kev rau kuv, Huab Tais, kuv thiaj taug raws koj txoj kev ncaj.

Huab Tais, koj muaj lub siab zoo thiab txawj zam txhaum,
koj txoj kev siab zoo loj tas nrho rau cov uas hu txog koj.
HUAB TAIS, thov koj mloog kuv zaj thov ntuj
thiab cuab pob ntseg rau kuv lub suab thov.

Txais:    (11ab) Thov koj qhia koj txoj kev rau kuv, Huab Tais, kuv thiaj taug raws koj txoj kev ncaj.

Zaj tshaj Lub Moo Zoo   ES XES KIAS 33:11

Huab Tais hais tias, kuv tsis zoo siab pom tus neeg phem raug txoj kev tuag,
kuv xav pom kom nws tig los ua neeg zoo, ces nws thiaj yuav ciaj.

Ntawv Moo Zoo    LK 5:27-32

27 Dhau tej ntawd tas lawm, Yes Xus tawm mus. Nws ntsia pom ib tug sau se hu ua Les Vis zaum ntawm lub rooj se. Yes Xus hais rau nws tias : "Koj raws kuv mus." 28 Ces Les Vis sawv, nws tso tas ib puas tsav yam tseg, nws raws Yes Xus mus. 29 Les Vis ua ib rooj qav loj txais Yes Xus hauv nws tsev. Muaj ib pab neeg sau se coob thiab tseem muaj lwm cov neeg nrog lawv zaum ntawm rooj mov. 30 Cov Fas Lis Xais thiab lawv cov Kws Ntawv Ntshiab yws yws rau Yes Xus cov thwj tim hais tias : "Vim li cas nej nrog cov neeg sau se thiab cov neeg txhaum noj haus ua ke ?" 31 Yes Xus teb tias : "Tsis yog cov neeg noj qab nyob zoo yuav vam txog kws kho mob. Yog cov muaj txiab muaj nkeeg. 32 Kuv tsis tuaj hu cov neeg ncaj, kuv tuaj hu cov neeg txhaum kom tig los yuav lub siab tshiab."

TIM 23 LUB 2 HLIS    2015

Hnub Ob Thawj Lis Piam hauv Caij Plaub Caug

Zaj Nyeem Ib    LES VIS  19:1-2, 11-18

1 HUAB TAIS hais rau Mais Xes tias : 2 "Koj yuav hais rau tsoom tub ki His Xas Lais tias : Nej yuav ua neeg ntshiab, vim kuv yog nej tus HUAB TAIS Tswv Ntuj, kuv Ntshiab.
11 Koj yuav tsis txhob ua tub sab, tsis txhob hais lus dag, los hais tej yam tsis muaj tseeb rau lwm tus. 12 Koj yuav tsis txhob lam tuav txog kuv lub npe cog lus dag kom ntxias tau luag ntseeg koj, vim koj ua li ntawd yog ua saib tsis taus koj tus Tswv Ntuj lub npe. Kuv yog HUAB TAIS.  13 Koj yuav tsis txhob nrhiav kev noj luag los nyiag luag tug: koj yuav tsis txhob khaws tus tub ntiav zog nws tus nqe zog cia rau ntawm koj kom txog tag kis.  14 Koj yuav tsis txhob foom lus phem rau tus neeg ruam tsis txawj hais lus, thiab tsis txhob muab ib yam mus thaiv tus dig muag kev, tiam sis koj yuav ntshai koj tus Tswv Ntuj. Kuv yog HUAB TAIS. 15 Koj yuav tsis txhob coj tsis ncaj thaum koj txiav txim rau luag. Tsis txhob ntshai txiav txim rau ib tug neeg vim nws pluag los puas rau ib tug nom loj vim nws muaj meej mom, tiam sis koj yuav txiav txim rau txhua tus raws txoj kev ncaj nkaus xwb.  16 Koj yuav tsis txhob muab koj tsev neeg xyav moo phem, tsis txhob ua kom tus nyob ze ntawm koj tau lub neej nyuaj siab. Kuv yog HUAB TAIS.   17 Koj yuav tsis txhob ntxub koj tus kwv tij nyob hauv koj nruab siab. Koj yuav cem yuav qhuab qhia tus nyob ze ntawm koj, koj thiaj yuav tsis tau ris nws qhov txhaum. 18 Koj yuav tsis txhob nrhiav kev rob caub thiab yuav tsis txhob chim ntev ntev rau cov me nyuam nyob hauv koj haiv neeg. Koj yuav nyiam tus nyob ze koj ib yam li koj nyiam koj. Kuv yog HUAB TAIS.

NPN   19: 8, 9, 10, 15

Txais:   (Zam 6:63b)  Huab Tais, koj cov lus yog tswv yim thiab yog txoj sia.

HUAB TAIS txoj cai zoo tas nrho,
nws ntxiv siav rau ntsuj plig;
HUAB TAIS tus txhooj tsim nyog ntseeg,
nws ua kom tus neeg ruam thoob tsib tuaj.

Txais:   Huab Tais, koj cov lus yog tswv yim thiab yog txoj sia.

HUAB TAIS cov lus qhuab qhia yog lus ncaj
ua kom neeg lub siab kaj.
HUAB TAIS lo lus qhia ntshiab si,
ua kom neeg qhov muag pom kev.

Txais:   Huab Tais, koj cov lus yog tswv yim thiab yog txoj sia.

Txoj kev hwm HUAB TAIS dawb huv,
nws yuav nyob mus li;
HUAB TAIS cov lus txiav txim yog lus tseeb,
yog cov lus txiav txim ncaj.

Txais:   Huab Tais, koj cov lus yog tswv yim thiab yog txoj sia.

Thov kom cov lus ntawm kuv lub ncauj zoo ntxim koj siab  
thiab txoj kev xav hauv kuv nruab siab nyob ntawm koj xub ntiag,  
HUAB TAIS, kuv lub tsua thiab tus txhiv kuv.

Txais:   Huab Tais, koj cov lus yog tswv yim thiab yog txoj sia.

Zaj Tshaj lub Moo Zoo   2 KOS LIS MTHOS  6:2B

Lub sij hawm zoo, yog nyem no.
Hnub muaj kev cawm neeg, yog nyem no.

Ntawv Moo Zoo     MT 25: 31-46


31 “Thaum Neeg Leej Tub yuav rov los, nws yuav muaj koob meej. Tas tsoom Tshiab yuav nrog nws los. Nws yuav zaum saum nws lub theej kiab muaj koob meej. 32 Tas ib tsoom haiv neeg yuav sib sau nyob ntawm nws xub ntiag. Nws yuav cais tsoom neeg xws li tus zov yaj cais cov yaj ntawm cov tshis. 33 Nws yuav cia cov yaj rau ntawm nws sab xis, cia cov tshis rau ntawm nws sab laug. 34 Ces tus Vaj yuav hais rau cov nyob sab xis tias : “Nej los mog ! Nej yog cov uas kuv Txiv pub txoj hmoov zoo rau. Nej txais lub Ceeb Tsheej uas Ntuj npaj tseg rau nej txij puag thaum pib tsim lub sim ceeb los ua nej tug. 35 Vim tias kuv tshaib plab, nej pub rau kuv noj ; kuv nqhis dej, nej pub rau kuv haus, kuv yog ib tug pej kum neeg, nej txais kuv ; 36 kuv liab qab, nej muab rau kuv hnav ; kuv mob, nej tuaj xyuas kuv ; kuv nyob hauv tsev loj faj, nej tuaj tsham kuv.” 37 Ces cov neeg ncaj yuav teb tias : “Huab Tais, thaum twg peb tau pom koj tshaib plab ces peb tau pub rau koj noj, pom koj nqhis dej, ces peb tau muab rau koj haus, 38 pom koj yog ib tug pej kum neeg, ces peb tau txais koj, pom koj liab qab ces tau muab rau koj hnav ? 39 Pom koj mob los nyob hauv tsev loj faj, ces peb tau tuaj xyuas koj ?” 40 Tus Vaj yuav teb rau lawv li no : “Kuv hais tseeb rau nej. Nej tau ua npaum li cas rau cov me tshaj hauv kuv tsoom kwv, mas yog nej ua rau kuv.” 41 Ces tus vaj yuav hais rau cov nyob sab laug tias : “Nej txoj hmoov phem. Nej khiav mus deb kuv, mus nyob hauv cov hluav taws kub tsis txawj tuag, uas Ntuj npaj rau tus dab phem thiab nws cov dab. 42 Vim thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus, 43 kuv yog ib tug pej kum neeg nej tsis txais kuv, kuv liab qab nej tsis muab rau kuv hnav, kuv mob thiab kuv nyob hauv tsev loj faj nej tsis tuaj xyuas kuv.” 44 Ces cov ntawd yuav teb rau tus Vaj tias : “Huab Tais, thaum twg peb tau pom koj tshaib plab los nqhis dej, pom koj yog ib tug pej kum neeg, pom koj liab qab, pom koj mob los nyob hauv tsev loj faj, ces peb tsis tau pab koj ?” 45 Ces tus Vaj yuav teb rau lawv tias : “Kuv hais tseeb rau nej, nej tsis tau ua rau cov me tshaj hauv kuv tsoom kwv npaum li cas, mas yog nej tsis tau ua rau kuv.” 46 Ces cov no yuav mus raug txim ib txhiab ib txhis. Hos cov siab ncaj yuav mus txais txoj sia.

TIM 24 LUB 2 HLIS   2015

Hnub Peb Lis Piam Ib hauv Caij Plaub Caug Xyoo B

Reading 1   HIS XAIS 55:10-11

10 Xws li cov nag thiab cov daus uas poob saum ntuj los, lawv tsis rov mus saum ntuj ua ntej lawv yuav tsum xub ywg lub ntiaj teb tas tso, kom av muaj chiv thiab av zoo, thiaj yuav txi tau noob qoob noob loo rau tus tswv teb thiab pub tau mov rau neeg noj.  11 Lo lus tawm ntawm kuv lub ncauj los kuj zoo ib yam li ntawd thiab. Nws tsis tau ua hauj lwm tas, tsis tau leg qhov kuv xav, tsis tau ua tiav qhov kuv xa nws mus ua, mas nws tsis rov los cuag kuv."

NPN    34:4-5, 6-7, 16-17, 18-19

Txais:   (18b) Tswv Ntuj cawm tus neeg ncaj ntawm txhua yam kev nyuaj.      

Nej nrog kuv cav txog HUAB TAIS lub koob meej,
peb sawv daws ua ke qhuas nws lub npe.
Kuv nrhiav HUAB TAIS, nws tau teb kuv,
thiab tau cawm kuv ntawm kuv tej kev ntshai.

Txais:   (18b) Tswv Ntuj cawm tus neeg ncaj ntawm txhua yam kev nyuaj.

Nej vam txog nws ces nej yuav zoo siab luag ntxhi,
nej ntsej muag yuav tsis liab vim nej tau txaj muag.
Thaum tug neeg pluag hu, HUAB TAIS hnov,
thiab yuav cawm nws ntawm tas nws tej kev nyuaj.

Txais:   (18b) Tswv Ntuj cawm tus neeg ncaj ntawm txhua yam kev nyuaj.

HUAB TAIS muaj qhov muag pom cov neeg ncaj,
muaj pob ntseg hnov lawv lub suab quaj.
HUAB TAIS tawm tsam cov neeg ua phem,
rhuav lawv kom lub ntiaj teb txhob nco txog lawv ntxiv.

Txais:   (18b) Tswv Ntuj cawm tus neeg ncaj ntawm txhua yam kev nyuaj.

Thaum cov neeg ncaj hu, HUAB TAIS hnov lawv,
Nws cawm lawv ntawm tas lawv tej kev nyuaj.
HUAB TAIS nyob ze ze cov neeg siab lwj siab ntuag,
thiab nws cawm cov uas tas kev cia siab.

Txais:   (18b) Tswv Ntuj cawm tus neeg ncaj ntawm txhua yam kev nyuaj.

Zaj Tshaj lub Moo Zoo    MT 4:4B

Neeg tsis kawg muab mov los yug sia xwb,
neeg tseem yuav muab txhua lo lus tawm ntawm Tswv ntuj lub ncauj los yug sia thiab.

Ntawv Moo Zoo   MT 6:7-15

7 Thaum nej teev Ntuj, nej txhob ntuas mus ntuas los zoo li cov neeg teev dab : lawv xav tias yog lawv hais lus ntau, mas dab yuav mloog lawv zoo dua. 8 Nej txhob ua zoo li lawv. Vim nej Txiv paub tias qhov twg yog qhov nej yuav tsum muaj, tab yog nej tseem tsis tau thov, nws twb xub paub lawm. 9 Nej yuav teev Ntuj zoo li no :
"Peb Txiv nyob saum ntuj, koj lub Npe ntshiab nto moo lug.
10 Koj lub Ceeb Tsheej los txog.
Kom muaj raws li koj nyiam nyob ntiaj teb no li nyob saum ntuj.
11 Thov koj pub mov txaus peb noj hnub no.
12 Koj zam peb cov nuj nqis zoo li peb zam rau cov tshuav nqi ntawm peb.
13 Koj txhob tso peb raug kev ntxias. Thov koj npo peb dim ntawm kev phem."
14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab. 15 Hos yog nej tsis zam txhaum rau luag, mas nej Txiv kuj yuav tsis zam rau nej.

TIM  25  LUB 2 HLIS   2015

Hnub Plaub Lis Piab Ib Caij Plaub Caug Zyoo B

Zaj Nyeem Ib    YOS NAS  3:1-10

1 HUAB TAIS lo lus nrov tuaj rau Yos Nas zaum ob tias : 2 "koj sawv, koj yuav mus kom txog Nis Nis Vas, lub tuam tsheej, koj yuav hais rau lawv raws li kuv qhia rau koj hais." 3 Yos Nas sawv los, nws muab kev mus lawm Nis Nis Vas raws HUAB TAIS lo lus. Lub tsheej Nis Nis Vas yog ib lub tsheej loj kawg nkaus, yuav mus peb hnub ke thiaj hla dhau lub tsheej. 4 Yos Nas Nkag mus hauv lub nroog, nws mus kev ib hnub. Ces nws tshaj tawm rau sawv daws tias : "Tshuav plaub caug hnub ntxiv xwb, ces lub tsheej Nis Nis Vas yuav raug rhuav tas." 5 Cov neeg nyob Nis Nis Vas cia li ntseeg Tswv Ntuj;  lawv ceeb toom kom sawv daws yoo mov thiab lawv hnav ntaub tsaj, tsis hais tus hlob los tus yau. 6 Lub moo no kuj nrov tuaj txog tus vaj nyob Nis Nis Vas; nws sawv tsees ntawm nws lub theej kiab mus hle nws lub tsho loj tseg, nws muab zoj ib lub hnab tsaj los npua, nws mus zaum hauv cov tshauv. 7 Ces lawv mus qw thoob plaws lub nroog Nis Nis Vas raws li tus vaj lo lus ceeb toom tias : "Tej neeg thiab tej tsiaj txhu, cov tsiaj loj thiab tsiaj me,  sawv daws yuav tsis txhob noj dab tsi li, tsis noj mov tsis haus dej li. 8 Tus twg kuj yuav tsum npua hnab tsaj thiab yuav hu txog Tswv Ntuj tas zog, nyias yuav tso nyias txoj kev ua phem tseg, yuav cheem nyias ob txhais tes kom txhob ua txhaum ntxiv. 9 Tsis muaj neeg paub, tiam sis tej zaum Tswv Ntuj siab yuav nqig, nws yuav thim xav, yuav thim nws txoj kev npau taws, ces peb sawv daws yuav tsis tuag ?" 10 Tswv Ntuj pom lawv mob siab siv zog kom tso lawv txoj kev ua txhaum ua phem tseg, ces Tswv Ntuj hloov siab, nws thim txoj kev rau txim uas nws npaj rau lawv, nws tsis nplua lawv raws li nws tau hais.

NPN   51:3-4, 12-13, 18-19

Txais:    (19b)  Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.  
Thov koj ntxuav kuv lub txim pov tseg kom tas  
thiab muab kuv qhov txhaum tshem mus kom kuv dawb huv tuaj.  

Txais:  Tswv Ntuj, koj tsis thuam tus tus siab rau nws cov txhaum thiab ua neeg me.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,  
thiab txhob rho koj leej Tswv Yim Ntshiab tawm ntawm kuv mus.  

Txais:  Tswv Ntuj, koj tsis thuam tus tus siab rau nws cov txhaum thiab ua neeg me.

Vim koj tsis zoo siab txais cov kev txi ntuj;
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj,  
yog muaj ib lub siab xav lees txhaum,
muaj ib lub siab xav lees txhaum thiab ua neeg me, Tswv ntuj, koj yuav tsis thuam.

Txais:  Tswv Ntuj, koj tsis thuam tus tus siab rau nws cov txhaum thiab ua neeg me.

Zaj Tshaj lub Moo Zoo    YOS ES 2:12-13

HUAB TAIS hais tias, lub sij hawm no,
nej muab tas nrho nej lub siab tig rov los cuag kuv,
vim kuv muaj lub siab hlub thiab khuv leej neeg.

Ntawv Moo Zoo    LK 11:29-32

29 Thaum tej pab neeg coob coob tuaj sib txiv nyob ua ke, Yes Xus pib hais lus li no : "Tiam neeg no yog ib tiam neeg phem. Lawv taij ib lub cim, tab sis lub cim lawv yuav pom kawg yog Yos Nas lub cim xwb. 30 Vim tias Neeg Leej Tub yog ib lub cim rau tiam neeg no, xws li Yos Nas yog ib lub cim rau cov neeg nyob Nis Nis Vas. 31 Hnub txiav txim, tus poj vaj nyob Naj Fab yuav nrog tiam neeg no sawv, nws yuav muab txim rau tiam neeg no, vim nws tuaj puag tim npoo ntiaj teb tuaj mloog Xas Los Moos cov lus thoob tsib. Hos nyob ntawm no, twb muaj tus loj dua Xas Los Moos ! 32 Hnub txiav txim, cov neeg nyob Nis Nis Vas yuav nrog tiam neeg no sawv rov los, lawv yuav muab txim rau tiam neeg no, vim tias thaum Yos Nas tuaj qhia lawv, mas lawv thov txhaum, hos nyob ntawm no twb muaj tus loj dua Yos Nas !

TIM 26 LUB 2 HLIS   2015

Hnub Tsib Lis Piam Ib Caij Plaub Caug Xyoo B

Zaj Nyeem Ib   ES THES C: 12, 14-16, 23-25 (Raws ‘New American Bible Rev. Ed.’)

12  Tus poj vaj Es Thes kuj nrhiav kev vam khom HUAB TAIS, vim kev ntshai txoj kev tuag ua kom nws nyuaj siab loj.  
14 Nws thiaj thov His Xas Lais tus Huab Tais Tswv Ntuj li no:  “Kuv tus Huab Tais, koj ib leeg yog peb tus Vaj. Thov koj tuaj pab kuv vim kuv ib leeg xwb, tsis muaj leej twg pab, tsuas muaj koj ib leeg xwb.  15 Kuv tab tom yuav pheej hmoo rau kuv txoj sia. 16 Txij thaum kuv yug los, kuv tau hnov hais nyob hauv kuv haiv neeg tias, Huab Tais, koj yog tus tau xaiv His Xas Lais hauv txhua haiv neeg los, thiab peb phaj txiv hauv lawv cov yawg koob los ua koj tug mus ib txhis, thiab koj tau ua zoo rau lawv raws li koj tau cog lus.
23  HUAB TAIS, thov koj nco ntsoov peb. Thov koj tawm tuaj thaum peb ntsib kev txom nyem, thiab thov koj muab ib lub siab loj rau kuv, koj uas yog tus Vaj kav tas txhua cov dab, tus Tswj kav tas txhua tus nom tswv. 24 Thov koj muab ib co lus rau kuv qhov ncauj uas txawj ntxias kom tsov seej thiab txawj tig tsov lub siab mus ntxub peb tus yeeb ncuab, kom nws thiab nws cov neeg koom siab ploj mus kom tas. 25 HUAB TAIS, thov koj muab koj lub hwj huam los cawm peb, thiab thov koj pab kuv, vim kuv ib leeg xwb, tsis muaj leej twg pab, tsuas muaj koj ib leeg xwb.

NPN    138:1-2AB, 2CDE-3, 7C-8

Txais:   (3a) Huab Tais, thaum kuv hu koj, koj tau pab kuv lawm.

Kuv yuav ua koj tsaug, HUAB TAIS, tas kuv lub siab ntsws,
vim koj tau hnov kuv lub ncauj cov lus thov;
kuv yuav hu nkauj cav txog koj nyob ntawm cov tshiab xub ntiag;
kuv yuav tuaj pe hawm koj nyob hauv koj lub tuam tsev ntshiab
thiab yuav ua tsaug rau koj lub npe.

Txais:   (3a) Huab Tais, thaum kuv hu koj, koj tau pab kuv lawm.

Vim koj lub siab zoo thiab koj txoj kev tseeb,
vim koj tau muab koj lub npe thiab koj txoj kev cog lus
ua qhov loj tshaj tas txhua yam,
thaum kuv hu, koj teb kuv,
koj ntxiv zog rau kuv kom kuv lub zog loj tuaj.

Txais:   (3a) Huab Tais, thaum kuv hu koj, koj tau pab kuv lawm.

Koj txhais tes xis cawm kuv.
HUAB TAIS yuav ua kom tiav tej yam nws npaj ua rau kuv. ;
HUAB TAIS, koj lub siab zoo nyob mus li;
thov koj txhob muab yam koj txhais tes tau tsim los tso tseg.    

Txais:   (3a) Huab Tais, thaum kuv hu koj, koj tau pab kuv lawm.

Zaj Tshaj lub Moo Zoo   NPN 51: 12A, 14A

Tswv Ntuj, thov koj tsim ib lub siab huv lis si rau kuv,
thov koj pub kom kuv rov muaj kev zoo siab nyob hauv koj txoj kev cawm

Ntawv Moo Zoo     MT 7: 7-12

Yes Xus hais tias:  
7 "Nej thov, ces nej yuav tau txais, nej nrhiav, ces nej yuav ntsib, nej khob qhov rooj, ces luag yuav qhib rau nej. 8 Vim tias leej twg thov, nws yuav tau txais ; leej twg nrhiav, nws yuav ntsib ; leej twg khob qhov rooj, mas yuav muaj tus qhib qhov rooj rau nws. 9 Nej leej twg tus tub taij mov, nej puas yuav muab ib lub pob zeb rau nws noj ? 10 Yog nej tus tub taij ib tug ntses, nej puas yuav muab ib tug nab rau nws ? 11 Txawm tias nej yog neeg phem, tsis kav nej txawj pub tej yam zoo rau nej cov me nyuam. Li ntawd nej Txiv nyob saum ntuj haj yam txawj pub qhov zoo tshaj rau cov neeg thov nws. 12 Tas ib puas tsav yam uas nej xav kom luag ua rau nej, mas nej yuav xub ua rau luag tso : Txoj Cai thiab cov Yaj Saub qhia li ntawd.

TIM  27 LUB 2 HLIS    2015

Hnub Rau Lis Piam Ib Caij Plaub Caug Xyoo B

Zaj Nyeem Ib    ES XES KIAS   18:21-28

21 Tus muaj ib lub siab phem yog nws tseg tsis ua txhaum, nws coj cov lus qhia thiab nws ua raws nraim txoj kev ncaj kev ncees, mas nws yuav muaj txoj sia, nws yuav tsis tuag. 22 Kuv yuav tsis nco txog nws cov txhaum, nws yuav ciaj vim nws ua raws txoj kev ncaj. 23 HUAB TAIS Tswv Ntuj hais tias : "Yog kuv pom cov neeg txhaum tuag, mas kuv yuav zoo siab puas tau ? Kuv kawg xav pom tus neeg txhaum hloov siab kom nws tau muaj txoj sia nyob. 24 Tab sis yog tus neeg siab ncaj nws ncaim ntawm txoj kev ncaj thiab nws mus ua txhaum xws li cov neeg tsis hwm Ntuj lawv ua kam, mas tus neeg ntawd nws puas tsim nyog muaj txoj sia nyob ? Nws cov hauj lwm zoo uas thaum ub nws ua, mas kuv yuav tsis nco txog. Nws yuav tuag nyob hauv nws txoj kev ntxeev siab thiab hauv nws txoj kev txhaum. 25 Tim li cas nej yuav muaj cuab kav hais tias HUAB TAIS ua tsis ncaj ? His Xas Lais, nej mloog zoo zoo, puas yog kuv ua tsis ncaj ? Ntshai yog nej ua tsis ncaj los tsis sub ? 26 Tus neeg siab ncaj nws ncaim ntawm nws txoj kev tsis ncaj lawm, nws ua txhaum, nws yuav tuag nyob hauv nws txoj kev ua txhaum. 27 Tus neeg siab phem nws tso nws txoj kev phem pov tseg, nws los ua qhov ncaj qhov tsim nyog ua, nws txoj sia yuav nyob. 28 Nws pom dheev nws cov txhaum thiab nws tso nws txoj kev phem pov tseg, mas nws yuav tsis tuag.

NPN    130:1-2, 3-4, 5-6, 7-8

Txais:    (3) Huab Tais, yog koj cim ntsoov peb cov txhaum, leej twg yuav nyob taus?  

Kuv nyob hauv qab tiv txwv hu txog koj, HUAB TAIS,
HUAB TAIS, thov koj mloog kuv lub suab!
Thov koj cuab pob ntseg mloog kuv lo lus thov koj.    

Txais:    (3) Huab Tais, yog koj cim ntsoov peb cov txhaum, leej twg yuav nyob taus?

HUAB TAIS, yog koj cim ntsoov peb cov txhaum
leej twg thiaj yuav nyob taus?
Tab sis nyob ntawm koj muaj kev zam txhaum,
ces sawv daws hwm koj.

Txais:    (3) Huab Tais, yog koj cim ntsoov peb cov txhaum, leej twg yuav nyob taus?

Kuv tso siab rau HUAB TAIS,
kuv tus ntsuj plig tso siab rau nws lo lus.
Kuv tus ntsuj plig tos ntsoov HUAB TAIS
heev tshaj cov zov keeb tos lub caij kaj ntug.  

Txais:    (3) Huab Tais, yog koj cim ntsoov peb cov txhaum, leej twg yuav nyob taus?

His Xas Lais,  koj yuav tos ntsoov HUAB TAIS,
Vim nyob ntawm HUAB TAIS muaj txiaj ntsim koob hmoov,  
thiab nyob ntawm nws muaj txoj kev cawm nplua mias;
nws yuav cawm His Xas Lais ntawm tas lawv tej kev txhaum.

Txais:    (3) Huab Tais, yog koj cim ntsoov peb cov txhaum, leej twg yuav nyob taus?

Zaj Tshaj lub Moo Zoo      ES XES KIAS 18:31

HUAB TAIS hais tias, nej cia li tso tas nej tej kev ua txhaum pov tseg,
thiab yuav dua ib lub siab tshiab thiab ib lub tswv yim tshiab.

Ntawv Moo Zoo    MT 5:20-26

20 "Kuv hais rau nej : yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv Ntuj lub Ceeb Tsheej.  21 "Nej hnov cov lus qhia rau tej laus thaud tias : "Koj tsis txhob tua neeg. Tus twg tua neeg, nws yuav raug luag txiav txim rau nws. 22 Hos kuv, mas kuv hais rau nej : Leej twg npau taws rau nws tus kwv, nws yuav raug txim ntawm tsev hais plaub. Yog nws hais rau nws tus kwv tias "Niag ruam !" mas nws yuav raug txim ntawm lub rooj txwj laus Xas Nes Nrees. Yog nws hais rau nws tus kwv tias : "Niag vwm", mas nws yuav raug txim nyob hauv dab phem cov hluav taws. 23 Thaum koj cev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm. 24 Mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso, koj mam rov los cev koj cov txim. 25 Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 26 Kuv hais tseeb rau koj, koj yuav tawm tsis tau hauv tsev loj faj, mus txog thaum koj rho nyiaj qab nas txog npib kawg nkaus los them.

TIM 28 LUB 2 HLIS 2015

Hnub Xya Lis Piam Ib Caij Plaub Caug Xyoo B

Zaj Nyeem Ib TXOJ CAI OB 26:16-19

Mais Xes Hais rau nws cov neeg tias:
16 “Hnub no, HUAB TAIS, koj tus Tswv Ntuj ceeb toom rau koj tias koj yuav coj nws tej kev cai lij choj. Koj yuav ua zoo coj tej kev cai ntawd, koj yuav muab tas koj lub siab tus nstuj plig los ua raws li ntawd. 17 Hnub no, koj tau hnov HUAB TAIS hais tias nws yuav ua koj tus Tswv Ntuj, tab sis yuav yog koj taug nws txoj kev, coj nws tej kev cai lij choj, khaws nws cov lus qhia thiab mloog nws lub suab. 18 Hnub no HUAB TAIS hnov koj teb tias koj yuav ua nws haiv neeg, xws li nws tau hais, tiam sis koj yuav tsum coj nws tej lus qhia tas huv tib si. 19 Koj ua li ntawd, mas HUAB TAIS yuav ua kom koj muaj ntsej muag, nto koob meej, muaj hwj chim loj tshaj lwm cov haiv neeg uas nws tsim los. Koj yuav yog haiv neeg uas HUAB TAIS qee ua nws tug, xws li HUAB TAIS tau cog lus rau koj.

NPN 119:1-2, 4-5, 7-8

Txais: (1b) Muaj hmoov zoo yog cov uas coj raws Huab Tais txoj cai!

Muaj hmoov zoo yog cov uas taug ib txoj kev tsis muaj qhov xyeej,
yog cov uas taug raws HUAB TAIS txoj cai.
Muaj hmoov zoo yog cov uas coj raws nws tej lus qhia,
yog cov uas nrhiav nws tas lawv siab lawv ntsws.

Txais: (1b) Muaj hmoov zoo yog cov uas coj raws Huab Tais txoj cai!

Koj tau ceeb toom kom sawv daws
mob siab mloog koj tej lus qhia.
Thov koj pab kuv kom kuv nyob ruaj nreb
hauv koj tej kev cai lij choj!

Txais: (1b) Muaj hmoov zoo yog cov uas coj raws Huab Tais txoj cai!

Kuv thiaj yuav muaj ib lub siab ncaj ua koj tsaug,
thaum kuv tau kawm txog koj txoj cai ncaj ncees lawm.
Kuv yuav coj nraim koj tej cai lij choj,
thov koj tsis txhob tso kuv pov tseg li.

Txais: (1b) Muaj hmoov zoo yog cov uas coj raws Huab Tais txoj cai!

Zaj Tshaj lub Moo Zoo 2 KLN 6:2B

Lub sij hawm zoo yog nyem no
Hnub muaj kev cawm neeg yog nyem no.

Ntawv Moo Zoo MT 5:43-48

Yes Xus hais tias:
43 "Nej hnov tej lus qhia tias : Koj yuav nyiam tus nyob ze koj, koj yuav ntxub koj tus yeeb ncuab. 44 Tab sis, kuv hais rau nej tias : nej yuav nyiam nej cov yeeb ncuab, nej yuav thov Ntuj rau cov tsim txom nej ; 45 nej thiaj yog nej Txiv nyob saum ntuj cov tub ; vim nej Txiv ua kom lub hnub tuaj ziab cov neeg phem thiab cov neeg zoo, nws ua kom nag los rau cov siab ncaj thiab cov siab nkhaus. 46 Yog nej nyiam cov neeg nyiam nej, mas nej yuav tau koob haum dab tsi ? Tab yog cov sau se, lawv kuj txawj nyiam li ntawd. 47 Yog nej tshwj zias nej cov lus foom zoo rau nej cov kwv tij xwb, mas nej tau ua dab tsi zoo tshaj luag ? Tab yog cov neeg teev pej kum dab, los lawv kuj txawj ua li ntawd. 48 Hos nej, mas nej yuav ua neeg zoo tshaj, vim nej Txiv nyob saum ntuj yog tus zoo tshaj.

TIM 2 LUB 3 HLIS   2015

Hnub Ob Lis Piam Ob Caij Plaub Caug Xyoo B

Zaj Nyeem Ib   DN 9:4B-10

4b"Kuv tus HUAB TAIS, Tswv Ntuj tus loj thiab tsim nyog peb ntshai,  tus ua raws li lo lus cog cia thiab pub txiaj ntsim rau cov neeg nyiam koj thiab coj koj cov lus qhia. 5 Peb tau ua txhaum, peb tau ua qhov tsis ncaj, peb tau ua qhov phem, peb tau ntxeev siab, peb tau ncaim ntawm koj cov lus qhia thiab ntawm cov cai koj tau txiav. 6 Peb tsis tau mloog koj cov tub txib yaj saub, uas lawv sawv koj chaw hais lus rau peb cov vaj, peb cov nom, rau peb cov yawg koob, rau tas haiv neeg nyob hauv lub teb chaws. 7 Huab Tais, koj yog tus tau kev ncaj nyob koj sab, peb yog tus tau kev txaj muag hnub no, peb sawv daws uas nyob Yus Das, nyob Yes Lus Xas Les, tas cov His Xas Lais nyob deb nyob ze, nyob tas qhov txhia chaw uas koj ntiab peb mus nyob, vim peb ntxeev siab rau koj tsis mloog koj lus. 8 HUAB TAIS, peb tau kev txaj muag, peb thiab peb cov vaj, peb cov nom, peb phaj txiv tib si vim peb tau ua txhaum rau koj. 9  Peb tus Huab Tais Tswv Ntuj yog tus zoo muaj kev khuv leej thiab zam txhaum, vim peb tau ntxeev siab rau nws lawm,  10  thiab peb tsis tau mloog peb tus HUAB TAIS Tswv Ntuj lub suab, peb tsis tau taug raws li nws tej kev cai lij choj uas nws cov tub txib yaj saub tau qhia rau peb.

NPN      79: 8, 9, 11 + 13

Txais:   (103:10a) Huab Tais, koj tsis txhob nplua peb raws li peb cov txhaum.

Thov koj txhob nco txog peb txheej thaud tej txhaum ntxiv;
coj koj txoj kev khuv leej tuaj rau peb sai sai,
vim peb poob rau qhov qis kawg nkaus lawm.

Txais:   (103:10a) Huab Tais, koj tsis txhob nplua peb raws li peb cov txhaum.

Thov koj pab peb, Tswv Ntuj peb tus cawm seej,
vim koj lub npe muaj koob meej loj;
Thov cawm peb thiab zam peb cov txhaum rau peb
vim koj lub npe zoo.

Txais:   (103:10a) Huab Tais, koj tsis txhob nplua peb raws li peb cov txhaum.

Thov koj cia cov neeg nyob txim lub suab ntsaj tuaj txog koj;
koj siv koj lub hwj huam loj los cawm cov neeg poob rau kev tuag.
Ces peb, uas yog koj haiv neeg thiab pab yaj nyob hauv koj lub nras zaub
yuav ua koj tsaug mus li tsis muaj caij kawg;
tiam dhau tiam peb yuav cav txog koj lub koob meej.

Txais:   (103:10a) Huab Tais, koj tsis txhob nplua peb raws li peb cov txhaum.

Zaj Tshaj lub Moo Zoo      ZAM 6: 63C, 68C

Huab Tais, koj cov lus yog Tswv Yim thiab yog txoj sia;
koj muaj cov lus pub txoj sia nyob mus li.

Ntawv Moo Zoo        LK 6: 36-38

36 Nej yuav hlub luag tej ib yam li nej Txiv hlub neeg. 37 Nej tsis txhob txiav txim, Ntuj thiaj yuav tsis txiav txim rau nej. Nej tsis txhob muab txim, Ntuj thiaj yuav tsis muab txim rau nej. Nej zam txhaum mog, Ntuj thiaj yuav zam rau nej. 38 Nej pub rau luag, Ntuj thiaj yuav pub rau nej. Ntuj yuav xuas ib lub tawb loj los luj, yuav muab tswm muab co kom ceev thiab ntim nco lug ces Ntuj yuav muab hliv rau hauv nej nqaws tsho. Vim Ntuj yuav xuas lub tawb uas nej luj rov los luj rau nej.

TIM 3 LIB 3 HLIS    2015

Hnub Peb Lis Piam Ob Caij Plaub Caug

Zaj Nyeem Ib       HIS XAIS  1: 10, 16-20

10 Cov nom kav Xos Dos Mas, nej mloog Huab Tais cov mas ! Pej xeem nyob Nkos Mos Las, nej cuab pob ntseg rau peb tus Tswv Ntuj cov lus qhia mas !
16 Nej ntxuav nej kom nej huv tuaj! Nej tshem nej tej kev phem mus kom kuv qhov muag txhob pom ntxiv. Nej tso txoj kev ua phem tseg ! 17 Nej xyaum ua qhov zoo, nej nrhiav kev haum pheej, nej ntuas tus neeg siab heev, nej ua ncaj rau tus tub ntsuag, nej tuaj tus poj ntsuam tog. 18 HUAB TAIS hais tias : "Nej tuaj ! Peb sib tham saib! Txawm tias nej tej txhaum yuav liab ploog, los lawv yuav rov dawb li daus,  tab yog nej tej txhaum yuav liab dub nciab, los lawv yuav rov dawb xws plaub yaj. 19 Yog nej muaj siab tiag mloog lus, mas nej yuav tau noj lub teb chaws cov qoob. 20 Tiam sis yog nej tsis kam mloog lus thiab nej ntxeev siab, mas hniav ntaj yuav txo nej." HUAB TAIS lub ncauj hais li ntawd.

NPN       50: 8-9, 16BC-17, 21 + 23

Txais:    (23b)  Kuv yuav muab Tswv Ntuj lub hwj huam cawm neeg rau tus neeg ncaj pom.

Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis tshem ib tug heev nyuj hauv koj tsev mus,
los ib tug laug tshis hauv koj pab tsiaj mus.

Txais:    (23b)  Kuv yuav muab Tswv Ntuj lub hwj huam cawm neeg rau tus neeg ncaj pom..

Tim li cas nej lub ncauj thiaj lam qog kuv cov kev cai lij choj,
thiab lam hais kuv cov lus kuv tau nrog nej cog,
tiam sis nej ntxub kuv tej lus qhia
thiab muab kuv tej lus ua ntia pov tom nej qab xwb?  

Txais:    (23b)  Kuv yuav muab Tswv Ntuj lub hwj huam cawm neeg rau tus neeg ncaj pom.

Thaum nej ua tej yam zoo li no, kuv puas yuav tsum nyob ntsiag to?“
Nej puas xav tias kuv zoo nkaus li nej thiab?
Kuv yuav qhuab qhia  nej thiab yuav piav lub ntsiab rau nej.
Tus neeg twg tuaj ua kuv tsaug yog nws cav txog kuv lub koob meej;
kuv yuav muab Tswv Ntuj txoj kev cawm neeg rau tus neeg ncaj pom.

Txais:    (23b)  Kuv yuav muab Tswv Ntuj lub hwj huam cawm neeg rau tus neeg ncaj pom..

Zaj Tshaj lub Moo Zoo    ES XES KIAS 18: 31

HUAB TAIS hais tias, nej cia li muab tas tej txhaum nej tau ua pov tseg deb ntawm nej
thiab nej cia li yuav ib lub siab tshiab thiab ib lub tswv yim tshiab.

Ntawv Moo Zoo        MT 23: 1-12

1 Yes Xus qhia tsoom sid thiab nws cov thwj tim. Nws hais tias : 2 “Cov Kws Ntawv Ntshiab thiab cov Fas Lis Xais zaum Mais Xes lub theej kiab. 3 Vim li no nej ua tas txhua yam lawv qhia nej, thiab nej khaws huv tib si tseg, tab sis nej txhob ua raws li lawv. Vim lawv qhia, tab sis lawv tsis ua raws. 4 Lawv nog tej lub nra hnyav yuam rau tsoom sid xwb pwg, tab sis lawv tsis kam cev ib tug ntiv tes los kov. 5 Lawv ua txhua tsav txhua yam kom luag qhuas. Yog li ntawd, lawv thiaj coj tej txws ntim Txoj Cai dav dav, thiab dai tej tw ntxhoo ntev ntev. 6 Thaum lawv mus noj nqaij haus cawv, lawv nyiam zaum thawj lub rooj. Nyob hauv cov tsev txoos, lawv nyiam zaum cov rooj pem hauv ntej. 7 Lawv nyiam kom luag hawm lawv tom tej tshav puam, nyiam hnov sawv daws hu lawv ua “Xib Hwb”. 8 Hos nej, mas nej txhob cia luag hu nej ua “Xib Hwb”, vim nej tsuas muaj tib tug Xib Hwb xwb, thiab nej sawv daws yog ib co kwv tij. 9 Nej txhob hu leej twg nyob ntiaj teb no ua “Txiv”, vim nej tsuas muaj tib leeg Txiv xwb, yog tus nyob saum ntuj. 10 Nej txhob cia luag hu nej ua “Thawj Tswj”, vim nej tsuas muaj tib tug Tswj xwb, yog Leej Pleev. 11 Tus loj dua cov nyob hauv nej, yuav ua nej tus tub txib. 12 Tus twg tsa nws siab, Ntuj yuav txo nws qis. Tus twg txo nws qis, Ntuj yuav tsa nws siab.

TIM 4 LUB 3 HLIS 2015

Hnub PLaub Lis Piam Ob Caij Plaub Caug

Zaj Nyeem Ib YES LES MIAS 18: 18-20

18 Lawv hais tias : "Nej tuaj ! Peb sab laj saib peb yuav ua phem li cas rau Yes Les Mias ! Txawm nws tsis nyob lawm, yeej tseem yuav muaj cov Leej Choj uas txawj qhuab qhia, cov neeg thoob tsib uas txawj ntuas neeg, cov Yaj Saub uas txawj tshaj lus. Peb kav tsij nrhiav lus rau nws thiab tsis txhob quav ntsej mloog nws tej lus kiag li." 19 HUAB TAIS, thov koj mloog kuv, thov koj cuab pob ntseg hnov cov lus kuv cov yeeb ncuab hais. 20 Puas tsim nyog ua tej yam phem los pauj tej yam zoo? Lawv khawb ib lub qhov taub tos kuv. HUAB TAIS, thov koj nco txog tias kuv tau sawv nyob ntawm koj xub ntiag hais lus zoo txog lawv rau koj kom koj txhob npau taws rau lawv.

NPN 31:5-6, 14, 15-16

Txais: (17b) Huab Tais, thov koj cawm kuv, vim koj lub siab zoo.

Koj yuav cawm kuv dim ntawm cov rooj ntxiab uas lawv caws tos kuv,
vim koj yog kuv qhov chaw nkaum.
Kuv muab kuv tus ntsuj plig tso rau hauv koj txhais tes;
koj yeej yuav txhiv kuv dim, Huab Tais, tus Tswv Ntuj tsis txawj ntxeev siab.

Txais: (17b) Huab Tais, thov koj cawm kuv, vim koj lub siab zoo.

Kuv hnov tsoom neeg hais lus ntxhi nyob qhov txhia chaw ib ncig kuv ua rau kuv ntshai,
lawv sib tuav tswv yim txog kuv, tias lawv yuav txo kuv txoj sia.

Txais: (17b) Huab Tais, thov koj cawm kuv, vim koj lub siab zoo.

Tiam sis Huab Tais, kuv tso siab lug rau koj,
kuv hais tias: “Koj yog kuv tus Tswv Ntuj.”
Kuv lub neej nyob hauv koj txhais tes; thov koj tso kuv dim ntawm
kuv cov yeeb ncuab thiab cov neeg hiam kuv lub xib teg.

Txais: (17b) Huab Tais, thov koj cawm kuv, vim koj lub siab zoo.

Zaj Tshaj lub Moo Zoo ZAM 8: 12

Huab Tais hais tias, kuv yog lub ntiaj teb qhov pom kev;
leej twg lawv kuv qab yuav muaj txoj kev kaj lub neej.

Ntawv Moo Zoo MT 20:17-28

17 Thaum Yes Xus lawv mus pem Yes Lus Xas Les, Yes Xus coj Pab Kaum Ob mus rau ib cag. Lawv tab tom mus kev, ces Yes Xus hais rau lawv tias : 18 “Peb mus pem Yes Lus Xas Les. Neeg Leej Tub yuav raug luag muag rau cov thawj leej choj thiab cov Kws Ntawv Ntshiab. Lawv yuav txiav lub txim tuag rau nws. 19 Lawv yuav muab nws rau cov neeg teev pej kum dab kom lawv thuam nws, nplawm nws thiab muab nws tsa saum ntoo cuam. Hnub peb, nws yuav sawv rov los. 20 Thaum ntawd, niam Ntxes Npes Dais nrog nws ob tug tub los ze Yes Xus, niam Ntxes Npes Dais txhos caug thov ib yam ntawm Yes Xus. 21 Yes Xus hais rau nws tias : “Koj xav tau dab tsi ?” Leej niam hais rau Yes Xus tias : “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.” 22 Yes Xus teb tias : “Nej tsis paub qhov nej thov. Neb puas haus taus lub ntim uas kuv yuav haus ?” Nkawd teb tias : “Wb haus taus.” 23 Yes Xus hais rau nkawd tias : “Kuv lub ntim, mas neb yuav haus, tab sis qhov yuav tau zaum ntawm kuv sab xis thiab sab laug, tsis yog kuv yuav muab rau neb. Kuv Txiv npaj qhov ntawd rau leej twg, mas yog leej twg tug." 24 Kaum leej thwj tim hnov cov lus thov ntawd, lawv npau taws rau nkawd ob kwv tij. 25 Ces Yes Xus hu lawv kom txav los ze nws, nws hais tias : “Nej paub tias cov thawj tswj tsoom kuj cuab kav pej xeem nruj, cov loj ua kom luag pom tias lawv muaj peev xwm tswj pej xeem. 26 Tab sis nyob hauv nej, mas yuav tsis txhob muaj li ntawd : leej twg xav ua tus loj nyob hauv nej, mas nws yuav ua nej tus tub txib. 27 Leej twg xav ua nej tus thawj, mas nws yuav ua nej tus qhev. 28 Yog vim li ntawd, Neeg Leej Tub tsis tuaj nyob ntiaj teb no kom luag tsob hwb nws. Nws tuaj tsob hwb sawv daws, thiab muab nws txoj sia los ua nqi txhiv coob leej.

TIM 5 LUB 3 HLIS 2015

Hnub Tsib Lis Piam Ob Caij Plaub Caug

Zaj Nyeem Ib YES LES MIAS 17: 5-10

5 HUAB TAIS hais li no : "Muaj hmoov phem yog tus neeg uas tso siab rau tib neeg, nws muab lub cev nqaij los ua nws lub zog, hos nws lub siab txav mus nyob deb ntawm HUAB TAIS. 6 Nws zoo li ib tsob pos tuaj nyob hauv hav moj sab, txawm muaj yam zoo tuaj los tsis zoo dab tsi rau nws, vim nws nyob hauv tej thaj chaw qhuav qhawv hauv teb chaws suab puam, tsis muaj neeg nyob thiab yog av ntsev. 7 Tus neeg tso siab rau HUAB TAIS thiab vam khom HUAB TAIS, mas nws txoj hmoov zoo. 8 Nws zoo li ib tsob ntoo nyob ze ntug dej; nws nrhau cag mus txog cov dej. Thaum txog lub caij ntuj sov nws tsis ntshai dab tsi, nws cov nplooj ntsuab mus li; thaum txog lub xyoo ntuj qhuav qhawv nws tsis txhawj, nws txi txiv tas mus li. 9 Neeg lub siab nkhaus tshaj lwm yam tas nrho, thiab phem kawg li, leej twg yuav paub tau nws ? 10 Kuv, HUAB TAIS, kuv pom tau hauv neeg lub tswv yim, tsom tau hauv neeg lub siab, ces kuv pub rau neeg kom phim li tus yam ntxwv nws coj, raws li cov hauj lwm nws ua."

NPN 1: 1-2, 3, 4 + 6

xais: (40:5a) Muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (40:5a) Muaj hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg tau yam ntawd. .

Txais: (40:5a) Muaj hmoov zoo yog cov uas tso siab rau Huab Tais.

Tus neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (40:5a) Muaj hmoov zoo yog cov uas tso siab rau Huab Tais.

Zaj Tshaj Ntawv Moo Zoo LK 8:15

Cov muaj hmoov zoo yog cov muaj ib lub siab dav khaws Lo Lus,
thiab siv zog mus txog qhov kawg ces lawv txi tau txiv zoo.

Ntawv Moo Zoo LK 16: 19-31

Yes Xus hais rau cov Fas Lis Xais tias:
19 "Muaj ib tug neeg nplua nuj, nws hnav ntaub tsuj liab tsam xem thiab ntaub pag mos. Nws niaj hnub noj tej rooj qav zoo kawg. 20 Muaj ib tug pluag hu ua Las Ntxas Los, nws ib ce mob kiav txhab tas, nws pw ze ntawm tus nplua nuj lub rooj loog. 21 Las Ntxas Los ntshaw noj tej yam poob ntawm tus nplua nuj lub rooj mov kom tsau nws plab... Dev tseem tuaj yaim nws tej qhov txhab thiab. 22 Muaj ib hnub, tus pluag tuag, cov Tshiab tuaj nqa nws mus rau hauv Has Nplas Has xub ntiag. Tus nplua nuj kuj tuag thiab, luag muab nws coj mus faus. 23 Tus nplua nuj nyob hauv ntuj txias teb tsaus, nws txom nyem loj kawg. Nws tsa muag ntsia pom Has Nplas Has nyob deb thiab pom Las Ntxas Los nyob hauv nws xub ntiag. 24 Nws hu nrov tias : Txiv Has Nplas Has, thov koj khuv leej kuv, thov koj xa Las Ntxas Los tuaj muab nws ntsis ntiv tes tub dej rau kuv tus nplaig kom txias, vim kuv raug tsim txom nyob hauv cov hluav taws no. Tab sis Has Nplas Has hais tias : 25 Kuv tub, koj nco ntsoov tias thaum ua neej nyob koj tau txais koj cov nyiaj txiag, hos Las Ntxas Los tau txais kev mob. Zaum no Las Ntxas Los txais kev nplij nyob ntawm no, hos koj raug tsim txom. 26 Thiab tsis tag li ntawd : muaj ib lub qhov ntuj tob kawg kem peb rau ntawm nej, kom cov uas xav hla ntawm peb rau tim nej hla tsis tau, thiab kom cov nyob tim nej txhob hla tau los rau tim no. 27 Ces tus nplua nuj hais tias : "Txiv, kuv thov koj xa Las Ntxas Los mus hauv kuv txiv tsev, 28 vim kuv muaj tsib tug kwv tij, kom Las Ntxas Los mus ua pov thawj qhia lawv, kom lawv tsis txhob tuaj nyob hauv qhov chaw raug tsim txom no.” 29 Ces Has Nplas Has hais tias : “Lawv muaj Mais Xes thiab cov Yaj Saub. Cia lawv mloog Mais Xes thiab cov Yaj Saub qhia. 30 Tab sis tus nplua nuj hais tias : “Txiv Has Nplas Has, yog tias ib tug hauv cov tuag mus cuag lawv, mas lawv yuav hloov siab. 31 Tab sis Has Nplas Has hais rau nws tias : “Yog lawv tsis mloog Mais Xes thiab cov Yaj Saub, mas tab yog ib tug sawv hauv cov tuag mus qhia lawv, lawv kuj yuav tsis ntseeg nws.”

TIM  6 LUB 3 HLIS    2015

Thawj Hnub Rau Lis Piam Ob Caij Plaub Caug

Zaj Nyeem Ib     HAUV PAUS  37:  3-4, 12-13A, 17B-28A
3 His Xas Lais hlub Yos Xes tshaj nws cov tub huv si, vim Yos Xes yug thaum nws twb laus lawm. Ces nws kom lawv xaws ib lub tsho ntev txaij zoo nkauj rau Yos Xes hnav. 4 Nws cov tij laug pom tias nws txiv hlub nws tshaj nws cov tij laug txhua tus, mas lawv sawv daws ntxub nws, lawv tsis xav nrog nws hais ib lo lus zoo li.
12 Yos Xes cov tij laug mus zov lawv txiv pab yaj noj zaub nyob Xis Kes. 13a His Xas Lais hais rau Yos Xes tias : "Koj cov tij laug mus zov tsiaj dua tom lub tshav zaub Xis Kes lawm puas yog ? Los, kuv xa koj mus xyuas lawv."
17b Ces Yos Xes mus nrhiav nws cov tij laug, nws nrhiav tau lawv nyob Dos Tas. 18 Lawv pom nws tseem tuaj txog deb. Thaum nws tuaj tsis tau txog, lawv sib tuav tswv yim tias yuav ua kom nws tuag. 19 Lawv sib tham tias : "Nej saib ! Niag ua npau suav tuaj lawm ! 20 Zaum no, peb muab nws tua kiag thiab muab nws pov rau hauv ib lub qhov tim thaj, ces peb mus hais tias yog ib tug tsiaj qus tom nws lawm. Peb yuav pom tias nws cov npau suav leej tas nrho !" 21 Tiam sis Lus Npees hnov lawv tham, nws xav pab kom Yos Xes dim ntawm lawv tes. Nws hais tias : "Peb tsis txhob txo nws txoj sia." 22 Lus Npees hais ntxiv rau lawv tias : "Nej tsis txhob ua ntshav ntws, nej cia li muab nws pov rau hauv lub qhov tim thaj ntawm suab puam no xwb, nej tsis txhob tsa nej txhais tes rau saum nws." Lus Npees hais li no, vim nws xav cawm Yos Xes, nws thiaj li yuav coj tau Yos Xes rov mus rau nws txiv. 23 Ces thaum Yos Xes tuaj txog ntawm nws cov tij laug lawm, lawv muab nws lub tsho ntev txaij zoo nkauj uas nws hnav hle. 24 Lawv txhom nws thiab muab nws pov rau hauv lub qhov dej. Yog ib lub qhov dej qhuav tsis muaj dej. 25 Ua li tas ces lawv mus zaum noj mov. Lawv tsa muag ntsia pom ib pab neeg Is Mas Es thauj ib co nra, lawv tuaj Nkas Las As tuaj. Lawv cov ntxhuav thauj ib co tshuaj tsw qab uas lawv yuav coj mus muag rau Hais Nkws Tos teb. 26 Ces Yus Das hais rau nws cov kwv tij tias : "Yog peb muab peb tus kwv tua thiab muab nws cov ntshav faus, peb yuav tau dab tsi ? 27 Nej los, peb muab nws muag rau cov neeg Is Mas Es xwb, peb txhob tsa peb txhais tes rau saum nws : vim nws twb yog peb tus kwv, tawm ntawm tib lub cev nqaij los xwb." Ces nws cov kwv tij mloog nws hais. 28 Thaum ntawd muaj ib co tub luam Mis Dias tuaj hla ntawd, ces lawv rub Yos Xes tawm hauv lub qhov tim thaj los, lawv muab nws muag nees nkaum lub txiaj nyiag, rau cov neeg Is Mas Es ntawd.

NPN        105:16-17, 18-19, 20-21

Txais:  (5a) Nej cim ntsoov Huab Tais cov hwj huam loj nws tau ua cia.

Thaum HUAB TAIS hu kom kev tshaib plab poob los rau saum lub teb chaws,  
thiab ua kom tej qoob loo uas yuav yug lawv puas tas,  
nws tso ib tug neeg mus ua lawv ntej,      
Yos Xes, tus raug muag mus ua qhev.

Txais:  (5a) Nej cim ntsoov Huab Tais cov hwj huam loj nws tau ua cia.

Lawv muab khawb hlau khi nws ko taw
thiab muab kauj hlau pav nws caj dab.
Thaum txog caij, kuj muaj tuaj raws li nws taui ua saub hais tseg,
HUAB TAIS lo lus ua pov thawj tias nws yog tus tseeb. .

Txais:  (5a) Nej cim ntsoov Huab Tais cov hwj huam loj nws tau ua cia.

Tus vaj hu nws mus thiab tso nws tawm nkuaj,  
tus tswj cov haiv neeg  muab kev twj lij rau nws.
Tus vaj muab nws ua tus kav nws lub vaj lub tsev
thiab tus tswj tas txhua yam uas yog nws tug.

Txais:  (5a) Nej cim ntsoov Huab Tais cov hwj huam loj nws tau ua cia.

Zaj Tshaj Ntawv Moo Zoo    ZAM 3: 16

Tswv Ntuj hlub lub ntiaj teb npaum li ntawd
nws thiaj tso nws tib leeg tub los
kom xwv txhua leej uas ntseeg nws
yuav muaj txoj sia nyob mus li.

Ntawv Moo Zoo      MT 21:33-43, 45-46

33 “Nej mloog dua ib zag paj lug li no. Muaj ib tug tswv teb, nws cog tau ib thaj txiv cawv. Nws xov laj kab ncig nws thaj teb. Nws txaug ib lub zeb zom txiv cawv, thiab tseem txhim tau ib lub lawj siab siab cia. Nws ntiav ib co neeg zov, ces nws tawm rooj mus kev deb. 34 Thaum yuav txog caij de txiv, nws xa nws cov tub txib mus nqa txiv cawv ntawm cov zov teb. 35 Cov neeg zov teb ntes cov tub txib, muab ib tug ntaus, muab ib tug tua, muab pob zeb los txawb lwm tus kom tuag. 36 Tus tswv rov xa ib co tub txib coob dua thawj cov mus, cov zov teb kuj ua ib yam li lawv ua rau thawj cov. 37 Qhov kawg, nws xa nws tus tub mus cuag lawv, nws xav tias : “Lawv yuav hwm kuv tus tub.” 38 Tab sis cov zov teb pom dheev tus tub, lawv sib tham tias : “Tus ntawd yog tus yuav txais cuab tam. Tsuag tsuag ! Peb muab nws tua. Lub cuab tam thiaj yuav yog peb tug.” 39 Ces lawv ntes ntho tus tub, coj nws mus pov rau tom ntug teb thiab muab nws tua. 40 Thaum tus tswv teb txiv cawv tuaj txog, nws yuav ua dab tsi rau cov zov teb ?” 41 Lawv teb rau Yes Xus tias : “Nws yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb. Thaum txog caij txiv cawv siav, cov ntawd yuav xa cov txiv rau tus tswv.” 42 Yes Xus hais rau lawv tias : “Nej puas tau nyeem ib zaug li txog cov lus hauv Ntawv tias : Lub pob zeb uas cov tub txhim tsev muab pov tseg, yog lub pob zeb txheem lub ncov ruv tsev. Qhov ntawd yog tuaj ntawm Huab Tais tuaj. Yog ib yam zoo nkauj zoo saib rau ntawm peb qhov muag. 43 Vim li ntawd, kuv hais rau nej : Ntuj yuav thau lub Ceeb Tsheej ntawm nej los cev rau ib haiv neeg uas yuav muab siab rau tu kom txi txiv.”
45 Cov thawj leej choj thiab cov Fas Lis Xais hnov Yes Xus cov zaj paj lug, lawv to taub tias Yes Xus hais txog lawv.
46 Lawv nrhiav kev ntes Yes Xus. Tab sis lawv ho ntshai tsoom sid, vim sawv daws saib Yes Xus yog ib tug yaj saub.

TIM  7 LUB 3 HLIS   2015

Thawj Hnub Xya Lis Piam Ob Caij Plaub Caug

Zaj Nyeem Ib    MIS KES 7:14-15, 18-20

14 Koj muab tus tswv zov yaj rab pas nplawm koj haiv neeg mus noj zaub,  pab yaj uas yog koj li cuab tam, lawv nyob cais npoj nyob hauv ib koog hav txiv yeem muaj vaj txiv ntoo koos.  Xav kom lawv rov los nog zaub nyob Npas Sas thiab nyob Nkas Las As xws li yav thaum ub ! 15 Xws li thaum lub caij koj tawm Hais Nkws Tos teb los, thov koj pub peb pom tej yam hwj huam loj!
18 Tus Tswv Ntuj twg thiaj yuav tshem kev txhaum thiab zam txhaum zoo li koj ? Thiaj yuav tsis npau taws tas mus li tiam sis nyiam ua lub siab zoo zam txim txhaum?   19 Thov koj hlub peb ib zaug ntxiv thiab, muab peb tej kev phem tsuj pov tseg hauv av, muab tas peb tej txhaum pov lawm hauv qab tiv txwv ! 20 Thov koj ua zoo rau Yas Kos,  pub koj lub txiaj ntsim rau Has Nplas Has, xws li koj tau cog lus rau peb cov yawg koob thaum ntxov ub los.


NPN    103:1-2, 3-4, 9-10, 11-12

Txais:    (8a) Huab Tais siab zoo thiab khuv leej neeg.

Kuv tus ntsuj plig, koj cav txog HUAB TAIS;
kuv tej siab ntsws, nej cav txog nws lub npe ntshiab.
Kuv tus ntsuj plig, koj cav txog HUAB TAIS,
koj tsis txhob hnov qab nws tej kev zoo ib qho li.

Txais:    (8a) Huab Tais siab zoo thiab khuv leej neeg.

Nws tau zam tas koj tej txhaum rau koj,
nws tau kho tas koj tej kev mob nkeeg zoo.  
Nws tau cawm koj txoj sia ntawm kev puas nstoog,
nws tau muab nws txoj kev ua siab zoo thiab kev khuv leej rau koj ntoo.

Txais:    (8a) Huab Tais siab zoo thiab khuv leej neeg.

Nws tsis npau taws tas  mus li,
nws kuj tsis chim tas mus ib txhis.
Nws tsis nplua peb raws li peb tau ua txhaum,
nws tsis pauj rau peb raws li peb tau ua phem.

Txais:    (8a) Huab Tais siab zoo thiab khuv leej neeg.

Siab npaum li lub ntuj nyob  saum ntiaj teb,
nws kuj hlub cov neeg uas hwm nws loj npaum li ntawd.  
Deb npaum li sab hnub tuaj nyob deb sab hnub poob,
nws tau muab peb tej txhaum pov tseg deb ntawm peb npaum li ntawd .
 
Txais:    (8a) Huab Tais siab zoo thiab khuv leej neeg.

Zaj Tshaj lub Moo Zoo    LK 15:18

Kuv yuav sawv mus, kuv yuav mus cuag kuv txiv thiab hais rau nws tias,
Txiv, kuv tau ua txhaum rau Ntuj thiab rau koj lawm.

Ntawv Moo Zoo    LK 15:1-3, 11-32

1 Tas cov neeg sau se thiab cov neeg txhaum txav los ze Yes Xus, lawv xav mloog Yes Xus hais. 2 Ces cov Fas Lis Xais thiab cov Kws Ntawv Ntshiab nroo zom zaws tias : "Tus neeg ntawd txais cov neeg txhaum, nws tseem nrog lawv noj mov thiab !" 3 Yes Xus thiaj hais zaj paj lug no rau lawv :
11 Yes Xus tseem hais tias : “Ib tug neeg muaj ob tug tub. 12 Tus tub ntxawg hais rau nws txiv tias : 'Txiv, koj muab koj lub cuab tam feem uas yog kuv tug faib rau kuv.' Ces leej txiv thiaj muab nws lub cuab tam faib rau nws ob tug tub. 13 Ob peb hnub tom qab, tus tub ntxawg sau feem uas yog nws tug tas huv si, nws khiav mus ib lub teb chaws deb. Nyob ntawd nws muab nws lub cuab tam phob vim nws coj ib lub neej tsis tsim txiaj. 14 Thaum nws muab nws lub cuab tam phob tas huv si lawm, ces lub teb chaws tshaib plab loj. Nws pib paub txoj kev yoo tshaib yoo nqhis. 15 Nws thiaj mus ua zog hauv ib tug neeg nyob txawm lub teb chaws ntawd. Luag kom nws mus zov npua tom teb. 16 Tus tub ntxawg ntshaw noj cov qos uas npua noj kom tsau nws plab, tab sis tsis muaj neeg pub rau nws noj. 17 Nws lub siab mam li ras dheev tias : 'Pes tsawg leej tub zog nyob hauv kuv txiv tsev tau mov noj seem noj so, hos kuv nyob tuag tshaib ntuas ntawm no. 18 Kuv xav mus cuag kuv txiv, kuv yuav hais rau nws tias : 'Txiv, kuv ua txhaum rau Ntuj thiab rau koj. 19 Kuv tsis tsim nyog koj hu kuv ua koj tus tub ntxiv. Thov koj saib kuv ib yam li koj ib tug tub zog.' 20 Tus tub ntxawg thiaj sawv kev rov los cuag nws txiv. Thaum tus tub tseem los txog deb, nws txiv twb pom nws. Leej txiv hlub kawg, nws khiav mus puag tus tub caj dab, thiab nwj nws tub tub ntev loo. 21 Tus tub hais rau leej txiv tias : 'Txiv, kuv ua txhaum rau Ntuj thiab rau koj. Kuv tsis tsim nyog koj hu kuv ua koj tus tub ntxiv.' 22 Tab sis leej txiv hais rau cov tub txib tias : 'Nej tsuag tsuag mus nqa lub tsho zoo nkauj tshaj los ntawm no, nej muab rau nws hnav, nej muab ib nti nplhaib los ntxig nws ntiv tes, thiab ib nkawg khau los ntxig nws ko taw. 23 Nej cab tus xyuas nyuj rog los tua. Peb noj, peb ua lom zem. 24 Vim tias kuv tus tub no tuag lawm, nyem no nws ciaj rov los. Nws ploj lawm, nyem no rov nrhiav tau nws.' Ces lawv sawv daws noj haus lom zem. 25 Thaum ntawd, tus tub hlob tseem nyob tom teb. Thaum nws rov los yuav txog tsev, nws hnov suab paj nruag thiab suab dhia seev cev nrov ntsuag qees. 26 Nws hu ib tug tub txib kom tawm mus cuag nws, nws nug saib lub suab ntawd yog dab tsi. 27 Tus tub txib hais rau nws tias : 'Yog koj tus kwv rov qab los tsev, koj txiv tua tus xyuas nyuj rog, vim nws tau koj tus kwv rov los, noj qab nyob zoo.' 28 Ces tus tub hlob npau taws, nws tsis kam los hauv tsev. Leej txiv tawm tuaj thov kom nws los hauv tsev. 29 Tab sis tus tub hlob teb rau nws txiv tias : 'Saib, kuv lis koj tej hauj lwm cuag li ib tug qhev tau npaum no xyoo, kuv tsis tau hla koj ib lo lus li, koj twb tsis muab ib tug me nyuam tshis pub kuv ib zaug, kom tau nrog kuv cov phooj ywg noj ib pluag lom zem. 30 Hos koj niag tub ntawd, mus nrog cov niam ntiav muab koj lub cuab tam nqos tas, thaum nws rov los tsev, koj tua tus xyuas nyuj rog rau nws !' 31 Ces leej txiv hais rau tus tub hlob tias : 'Me tub, koj ib txwm nrog kuv nyob. Ib puas tsav yam uas yog kuv tug, mas kuj yog koj tug. 32 Tab sis, peb yuav tsum noj ib roog qav thiab ua lom zem, vim koj tus kwv no tuag lawm, zaum no nws ciaj rov los, nws ploj lawm, nyem no nrhiav tau nws rov los."

TIM  9 LUB 3 HLIS   2015

Hnub Ob Lis Piam Peb Caij Plaub Caug

Zaj Nyeem Ib     VAJ OB  5: 1-15AB

1 Nas Maas, tus thawj tub rog rau tus vaj As Las Mais, yog ib tug neeg uas tus vaj hwm nws thiab nyiam nws vim yog muaj nws mas HUAB TAIS thiaj pab mas cov As Las Mais yeej rog. Tab sis tus neeg siab loj ntawd mob ruas. 2 Muaj ib zaug cov As Las Mais tuaj lwg His Xas Lais teb, lawv coj tau ib tug me nyuam ntxhais mus lawm. Tus ntxhais ntawd mus ua Nas Maas tus poj niam tus ntxhais txib. 3 Nws hais rau nws tus niam tsev hais tias : "Kuv tus tswv kheev lam mus thov tus Yaj Saub nyob Xas Mas Lias teb mas tus Yaj Saub yuav cawm nws dim ntawm nws tus mob ruas xwb !" 4 Nas Maas mus qhia nws tus tswv tias : "Tus ntxhais tuaj teb chaws His Xas Lais tuaj hais li no thiab li no." 5 Tus vaj As Las Mais teb tias : "Yog li ces koj mus, kuv yuav xa ib tsab ntawv mus rau tus vaj His Xas Lais." Ces Nas Maas mus, nws nqa kaum choj nyiag, rau txhiab lub txiaj kub thiab kaum cev tsoos tsho ua zam. 6 Nws mus txog, nws cev tus vaj tsab ntawv rau tus vaj His Xas Lais nyeem. Nyob hauv tsab ntawv muaj cov lus hais li no : "Kuv xa kuv tus tub txib Nas Maas nrog tsab ntawv no tuaj. Thov koj kho nws tus mob kom zoo." 7 Thaum tus vaj His Xas Lais nyeem tsab ntawv tas, nws dua rhe nws lub tsho, nws hais tias : "Kuv puas yog ib tug tswv ntuj txawj ua kom neeg ciaj los tuag ywj kuv siab ? Ua cas tus ntawd thiaj yuav kom kuv kho ib tug neeg mob ruas ? Qhov tseeb yog nws xav nrhiav lus rau kuv xwb." 8 Tab sis thaum Es Lis Xais hnov tias tus vaj dua nws cov ris tsho, mas nws tso neeg mus hais rau tus vaj tias : "Vim li cas koj dua koj cov ris tsho ? Kom nws tuaj cuag kuv saib ! Nws thiaj yuav paub tias muaj ib tug Yaj Saub nyob His Xas Lais teb." 9 Nas Maas caij tsheb nees nrog nws pab neeg tuaj txog, nws theem ntawm Es Lis Xais qhov rooj. 10 Es Lis Xais tso neeg mus hais rau nws tias : "Koj mus da dej xya zaus nyob hauv tus dej Yos Las Das ces koj cev nqaij yuav rov zoo thiab huv tuaj." 11 Nas Maas npau taws, nws rov mus, nws hais tias : "Kuv vam tias ntshai nws yuav tawm tuaj, nws yuav hu txog nws tus HUAB TAIS Tswv Ntuj lub npe thiab nws yuav plhws kuv qhov nqaij mob, ces kuv yuav zoo hlo no. 12 Tus dej As Npas Nas thiab tus dej Pas Pas nyob Das Mas teb tsis zoo dua cov dej nyob His Xas Lais teb lod ? Yog kuv mus da cov dej nyob Das Mas teb kuv yuav tsis zoo tuaj sai dua lod ?" Ces Nas Maas lem loo nees rov qab, nws npau taws heev. 13 Tab sis nws cov tub txib txav los hais rau nws tias : "Txiv, yog tus Yaj Saub kom koj ua ib yam nyuaj dua mas koj twb yuav ua xwb puas yog ? Txawm yog nws hais tias kom koj mus da dej xwb ces koj yuav zoo mas koj haj yam yuav zoo siab ua xwb" 14 Nas Maas thiaj nqes mus hauv tus dej Yos Las Das, nws mus ntxuav cev xya zaus xws li Es Lis Xais hais, ces nws cov nqaij rov zoo tuaj xws li tus me nyuam mos tej nqaij. Nws huv tas lawm. 15 Nas Maas nrog nws cov tub txib rov los tom Tswv Ntuj tus neeg xub ntiag, nws hais tias : "Txij no mus, kuv paub tias tsis muaj dua lwm tus Tswv Ntuj nyob tas ntiaj teb. Tsuas kawg muaj ib tug xwb nyob His Xas Lais teb !”

NPN            42:2, 3;  43:3, 4

Txais:       (42:3) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Xws li tus kauv nqhis cov dej ntws lug,  
ib yam li ntawd, kuv tus ntsuj plig nqhis txog koj, Tswv Ntuj.

Txais:    Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Txais:    Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Thov xa koj qhov pom kev thiab koj txoj kev ua siab ruaj nreb tuaj rau kuv,
thiaj yuav coj kuv taug kev mus ntxiv
thiab coj kom kuv tuaj txog koj lub roob ntshiab, tuaj txog koj lub tsev nyob.

Txais:    Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Ces kuv yuav chaws mus hauv lub thaj txi Tswv Ntuj,
tus Tswv Ntuj ua kom kuv muaj kev zoo siab thiab kaj siab.
Ces kuv yuav ntaus nkauj nog ncas ua koj tsaug,
Tswv Ntuj, kuv tus Tswv Ntuj!

Txais:    Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Zaj Tshaj Ntawv Moo Zoo    NPN 130:5, 7

Kuv tso siab rau Huab Tais, kuv cia siab rau nws lo lus,
nws muaj lub siab zoo tas nrho thiab muaj kev cawm seej ntws lug.

Ntawv Moo Zoo     LK 4:24-30

24 Yes Xus hais rau cov neeg nyob hauv tuan tsev teev ntuj nyob Naj Xas Les tias : "Kuv hais rau nej tias, tsis muaj ib tug yaj saub uas luag yuav txais nws zoo hauv lub zos nws hlob. 25 Kuv hais tseeb rau nej : lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg. 26 Tab sis Ntuj tsis xa Es Lias mus pab cov poj ntsuam His Xas Lais ib tug li. Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb. 27 Lub caij tus yaj saub Es Lis Xais nyob, muaj coob tus mob ruas nyob His Xas Lais teb, tab sis tsis muaj ib tug mob ruas His Xas Lais rov huv, tsuas yog tus mob ruas Xis Lias hu ua Nas Maas thiaj rov huv." 28 Tas cov neeg hauv lub tsev txoos hnov cov lus ntawd, mas lawv npau taws kawg. 29 Lawv sawv tsees, lawv ntiab Yes Xus tawm sab nroog nraud. Lawv coj Yes Xus mus txog ntawm ib phab toj saum lub roob uas lawv txhim lub nroog, lawv yuav thawb Yes Xus kom poob lawm hauv lub qab toj ntxhab. 30 Tab sis Yes Xus hla plaws hauv nruab nrab lawv, nws taug nws kev mus lawm.

TIM 10 LUB 3 HLIS   2015

Hnub Peb Lis Piam Peb Caij Plaub Caug

Zaj Nyeem Ib    DAS NIAS 3:25, 34-43

25 As Xas Lias sawv hauv cov nplaim taws, nws cav txog Huab Tais tias :
34 "Huab Tais, vim koj lub npe,  koj tsis txhob tso peb pov tseg mus li; koj tsis txhob tso lo lus koj tau cog pov tseg. 35 Koj txhob thim koj lub txiaj ntsim ntawm peb rov qab, vim koj tus phooj ywg Has Nplas Has, koj tus tub txib His Xas Has thiab koj tus Ntshiab His Xas Lais. 36 Koj tau cog lus rau lawv tias lawv yuav muaj tub ki coob cuag li cov hnub qub nyob saum ntuj, cuag li cov suab zeb nyob ntawm ntug hiav txwv. 37 Huab Tais, hnub no peb yog ib haiv neeg me tshaj, nyob tas ntiaj teb peb txaj muag vim peb cov txhaum. 38 Nyem no, peb tsis muaj tswv, tsis muaj Yaj Saub, tsis muaj vaj ntxwv, tsis muaj tsiaj, tsis muaj xyab hlawv txi Ntuj, tsis muaj qhov chaw yuav cev paj tshab rau koj, 39 thiab yuav ua raws koj nyiam. Tab sis thov kom peb tus ntsuj plig raug txom nyem, peb lub tswv yim  tsis muab hlob zoo ntxim koj lub siab,  40 ib yam li cov laug tshis thiab cov heev nyuj thiab ib txhiab tus yaj rog hlawv txi rau koj. Thov kom hnub no peb thaj txi Ntuj yog zoo li ntawd rau koj, thiab thov kom koj zoo siab pom peb los raws koj tas lub siab ntsws, vim cov tso siab rau koj yuav tsis raug kev poob ntsej muag. 41 Nyem no peb muab tas peb lub siab los raws koj, los hwm koj thiab rov nrhiav koj lub ntsej muag dua. 42 Koj tsis txhob cia peb poob rau kev txaj muag, tiam sis koj mloog koj lub siab zoo thiab khuv leej neeg, koj ua zoo rau peb. 43 Thov koj ua hwj huam loj los cawm peb, Huab Tais, koj ua kom sawv daws cav txog koj lub npe."

NPN         25:4-5AB, 6 + 7BC, 8-9

Txais:    (6a) Huab Tais, thov koj nco ntsoov koj txoj kev hlub.

Huab Tais, thov rub kuv mus rau hauv koj tej kev,
thov qhia koj tej kev rau kuv taug,
txhawb kom kuv mus raws koj txoj kev tseeb thiab qhia rau kuv kawm,
vim koj yog Tswv Ntuj, tus cawm kuv.

Txais:    (6a) Huab Tais, thov koj nco ntsoov koj txoj kev hlub.

Huab Tais, koj yeej ib txwm muaj lub siab zoo,
thiab muaj kev hlub txij puag thaum ub los, thov koj nco ntsoov.
Huab Tais, vim koj lub siab hlub neeg,
thov koj nco txog kuv.

Txais:    (6a) Huab Tais, thov koj nco ntsoov koj txoj kev hlub.

Huab Tais yog tus ncaj tus zoo,
nws thiaj coj tus neeg txhaum rov los rau txoj kev zoo.
Nws coj tus neeg me mus raws txoj kev ncaj,
nws qhia nws txoj kev rau tus neeg txom nyem taug.

Txais:    (6a) Huab Tais, thov koj nco ntsoov koj txoj kev hlub.

Zaj Tshaj Ntawv Moo Zoo  Yos Es 2:12-13

HUAB TAIS hais tias, nyem no
nej cia li muab tas nej lub siab tig rov los cuag kuv,
vim kuv muaj lub siab zoo thiab khuv leej neeg.

Ntawv Moo Zoo    MT 18:21-35

21 Thaum ntawd, Pob Zeb txav los hais rau Yes Xus tias : “Huab Tais, yog kuv tus kwv ua txhaum rau kuv, kuv yuav zam pes tsawg zaus ? Kuv puas yuav zam txog xya zaus ?” 22 Yes Xus hais rau Pob Zeb tias : “Kuv tsis hais rau koj tias 'xya zaus'. Kuv hais rau koj tias, 'xya caum xya zaus'.” 23 “Li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. 24 Thaum lawv pib txheeb, ces luag coj ib tug tub txib uas tshuav nuj nqis ib vam nras nyiaj, tuaj rau tus vaj. 25 Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. 26 Tus tub txib txhos caug ntua ntawm tus tswv ko taw, nws pe tus tswv, nws hais tias : “Thov koj ua siab ntev rau kuv, kuv yuav them kom tas rau koj.” 27 Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. 28 Thaum tus tub txib tawm rov qab mus, nws ntsib nws ib tug npawg, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus npawg caj dab, zawm tus npawg caj pas, thiab hais tias : “Them koj cov nqi.” 29 Nws tus npawg txhos caug ntua ntawm nws ko taw thov tias : “Thov koj ua siab ntev rau kuv, kuv yuav them rau koj.” 30 Tab sis tus tub txib ntawd tsis kam li, nws kom luag muab nws tus npawg kaw hauv tsev loj faj mus txog hnub tus npawg them nuj nqis tas huv tib si rau nws. 31 Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv. 32 Ces tus vaj hu tus tub txib tuaj, nws hais rau tus tub txib ntawd tias : “Tub txib siab phem dab tsi ! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. 33 Ua cas koj tsis hlub koj tus npawg zoo li kuv tau hlub koj ?" 34 Ces tus vaj npau taws heev, nws muab tus tub txib rau cov tub hiam neeg mus txog hnub nws them nws cov nuj nqis tas huv tib si. 35 Nej txhua tus, yog nej tsis zam hauv nruab siab rau nej ib tug kwv tij, mas kuv Txiv nyob saum Ntuj kuj yuav ua ib yam li ntawd rau nej thiab.

TIM  11 LUB 3 HLIS   2015

Hnub Plaub Lis Piam Peb Caij Plaub Caug

Zaj Nyeem Ib     TXOJ CAI OB 4:1, 5-9

Mais Xes hais rau tsoom neeg tias:
1 "Cov His Xas Lais, zaum no nej mloog txoj cai lij choj, thiab tej kab lis kev cai uas kuv qhia nej hnub no, kom nej coj raws nraim txoj cai ntawd, ces nej yuav muaj txoj sia thiab yuav tau nkag mus thiab yuav txeeb tau lub teb chaws uas HUAB TAIS nej cov yawg koob tus Tswv Ntuj muab rau nej nyob, kom nej tau txais los ua nej tug.
5 Li ntawd, raws li Huab Tais kuv tus Tswv Ntuj kom kuv ua, kuv tau qhia rau nej ib co kev cai lij choj uas nej yuav tau coj raws nyob hauv lub teb chaws nej yuav mus txeeb los ua nej tug.  6 Nej yuav mloog yuav coj raws nraim cov lus qhia ntawd, nej thiaj yuav yog neeg thoob tsib, neeg ntse nyob ntawm cov pej kum neeg xub ntiag. Thaum lawv hnov hais txog txoj cai no, lawv yuav tsa suab hlo hais tias : Tsuas muaj ib haiv neeg xwb thiaj thoob tsib thiab ntse, yog haiv neeg loj ntawd !" 7 Haiv neeg loj twg thiaj muaj ib co tswv ntuj nyob ze ze lawv li HUAB TAIS peb tus Tswv Ntuj nyob ze ze peb niaj zaus peb hu txog nws ? 8 Haiv neeg loj twg thiaj muaj ib co cai lij choj thiab ib co kab lis kev cai ncaj npaum li Txoj Cai uas kuv muab tso rau nej hnub no ?" 9 Nej yuav tau ceev faj zoo tsis txhob muab nej lub neej saib hlob tshaj!  Nej yuav tau tsis txhob hnov qab tej yam nej qhov muag tau pom kiag, yuav tsis txhob muab tej ntawd tshem ntawm nej lub siab mus li txog thaum nej txoj sia tu; Tiam sis nej yuav tsum tau qhia rau nej cov me nyuam paub, thiab rau nej cov me nyuam cov me nyuam huv tib si.

NPN           147:12-13, 15-16, 19-20

Txais:   (12a) Yes Lus Xas Les, koj cia li cav txog Huab Tais.

Yes Lus Xas Les, cia li cav txog Huab Tais lub koob meej,
Xis Yoos, cia li cav txog koj tus Tswv Ntuj.
Vim nws tau ua kom cov tab ntawm koj cov rooj vag khov tuaj lawm,
nws tau foom hmoov zoo rau koj cov me nyuam nyob hauv koj.

Txais:   (12a) Yes Lus Xas Les, koj cia li cav txog Huab Tais.

Nws xa nws lo lus qhuab qhia tuaj rau ntiaj,
nws lo lus khiav nrawm nroos!  
Nws tseb daus los zoo li plaub yaj,
nws pov cov te los zoo li tshauv.

Txais:   (12a) Yes Lus Xas Les, koj cia li cav txog Huab Tais.

Nws tau tshaj nws lo lus rau Yas Kos,
nws cov kev cai thiab lij choj rau His Xas Lais.
Nws tsis tau ua zoo li ntawd rau lwm haiv neeg twg li,
nws tsis tau qhia nws cov lij choj rau lawv paub li.

Txais:   (12a) Yes Lus Xas Les, koj cia li cav txog Huab Tais.

Zaj Tshaj Ntawv Moo Zoo    ZAM 6:63C, 68C

HUAB TAIS, koj cov lus yog tswv yim thiab txoj sia,
koj muaj cov lus muaj txoj sia nyob mus li.

Ntawv Moo Zoo     MT 5:17-19

17 Nej txhob xav tias kuv tuaj rhuav Txoj Cai thiab cov Yaj Saub : kuv tsis tuaj rhuav, kuv tuaj qhia ntxiv kom thoob. 18 Vim tias qhov kuv hais rau nej muaj tseeb : lub ntuj lub teb yuav dua, tab sis tsis muaj ib tug txwm ntawv, los ib lub cim ntawv me me hauv Txoj Cai yuav ploj. Tas ib puas tsav yam nyob hauv Txoj Cai yuav tsum tshwm sim tuaj tso. 19 Tus twg hla ib txog cai me, thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua raws Txoj Cai tas huv si, thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej.

Tim 12  lub  3  Hlis   2015

Hnub Tsib Lis Piam Peb Caij Plaub Caug  Xyoo B

Zaj Nyeem Ib   YES LES MIAS  7:23-28

HUAB TAIS hais li no:
23 Qhov kuv tau qhia kom lawv ua yog li no: ‘Nej mloog kuv lub suab, ces kuv yuav yog nej tus Tswv Ntuj thiab nej yuav yog kuv haiv neeg. Nej yuav taug nraim txoj kev uas kuv qhia kom nej taug, nej thiaj yuav muaj kev zoo siab.’ 24 Tab sis lawv tsis mloog, tsis tig pob ntseg los li, lawv ua raws lawv lub siab xav, raws lawv lub siab twm xeeb thiab lub siab phem xwb,  lawv tig rov tom qab tsis yog tig mus pem hauv ntej. 25 Txij hnub nej cov yawg koob tawm hauv Hais Nkws Tos teb los txog hnub no, kuv tau xa kuv cov tub txib Yaj Saub tuaj rau nej tsis tseg. 26 Tab sis lawv tsis mloog tsis tig pob ntseg los li, lawv ua xwb qwb txhav qhi, lawv tseem coj phem dua lawv cov yawg koob lawm. 27 Koj yuav hais cov lus no tas huv si rau lawv, tiam sis lawv yuav tsis mloog koj li thiab. Koj yuav hu lawv, tab sis lawv yuav tsis teb koj. 28 Ces koj yuav hais rau lawv tias : Nov yog haiv neeg uas tsis mloog HUAB TAIS nws tus Tswv Ntuj thiab tsis kam txais tej lus qhuab qhia li. Kev mloog lus ploj lawm, lawv lub ncauj twb tsis hais txog ntxiv.

NPN     95:1-2, 6-7, 8-9

Txais:    ( 8 ) Hnub no yog nej hnov nws lub suab, nej tsis txhob ua lub siab cam thawj.

Nej tuaj peb hu nkauj luag ntxhi rau HUAB TAIS,
peb qw suab cav txog lub Tsua Cawm peb.
Peb tuaj nyob ntawm nws xub ntiag ua nws tsaug,    
peb hu nkauj paj nruag luag ntxi rau nws.

Txais:    ( 8 ) Hnub no yog nej hnov nws lub suab, nej tsis txhob ua lub siab cam thawj.

Tuaj peb mus khoov pe hawm nws,
peb mus txhos caug ntawm tus HUAB TAIS tsim peb los xub ntiag.
Vim nws yog peb tus Tswv Ntuj,
peb yog haiv neeg nws zovb, pab yaj nws coj.

Txais:    ( 8 ) Hnub no yog nej hnov nws lub suab, nej tsis txhob ua lub siab cam thawj.

Xav kom hnub no nej mloog nws lus suab hais:      
“Nej tsis txhob ua lub siab cam thawj li nyob Me Lis Npas,
lub caij uas nyob Mas Xas hauv teb chaws suab puam,
qhov chaw uas nej phaj txiv tau sim kuv;
lawv twb tau pom kuv tej hauj lwm los lawv tseem sim kuv thiab.”

Txais:    ( 8 ) Hnub no yog nej hnov nws lub suab, nej tsis txhob ua lub siab cam thawj.

Zaj Tshaj Ntawv Moo Zoo    YOS ES  2:12-13

HUAB TAIS hais tias, lub sij hawm no,
nej muab tas nrho nej lub siab tig rov los cuag kuv,
vim kuv muaj lub siab hlub thiab khuv leej neeg.

Ntawv Moo Zoo     LK 11:14-23

14 Yes Xus ntiab ib tug dab phem, yog tus dab ua kom neeg tsis txawj hais lus. Thaum tus dab tawm lawd, ces tus neeg nplaig txhav hais tau lus. Tej pab neeg coob ntawd ua siab poob nthav. 15 Tab sis, nyob hauv cov neeg ntawd, ib txhia hais tias : "Nws hu txog tus vaj dab phem Npes Ntxes Npus los ntiab dab." 16 Tseem muaj ib txhia xav sim Yes Xus, ces lawv thov kom Yes Xus ua ib lub cim tawm saum ntuj tuaj. 17 Tab sis Yes Xus paub qhov lawv xav, nws hais rau lawv tias : "Lub teb chaws twg sib tawm tsam, mas nws kawg raug kev puas tsuaj. Tej vaj tse, ib lub vau lawv ib lub qab. 18 Yog tias Xas Tas rov tawm tsam rau Xas Tas, mas nws lub ceeb tsheej yuav ua cas nyob tau ruaj ? Ua cas nej hais tias kuv hu txog Npes Ntxes Npus los ntiab dab ? 19 Yog kuv vam txog Npes Ntxes Npus los ntiab dab no, nej cov tub ho vam txog leej twg los ntiab dab ? Ua li mas, nej cov tub yuav txiav txim rau nej. 20 Hos yog tias kuv vam txog Tswv Ntuj tus ntiv tes los ntiab dab, mas Tswv Ntuj lub Ceeb Tsheej los txog nej lawm. 21 Thaum tus neeg muaj zog tuav ntaj tuav hmuv zov nws lub tuam tsev, mas nws lub cuab tam nyob nyab xeeb. 22 Tab sis, thaum twg lwm tus muaj zog dua nws tuaj ntaus yeej nws, txeeb tau nws cev ris tsho hlau uas yog nws lub chaw tso siab, ces luag muab nws tej cuab yeej cuab tam sib faib. 23 Leej twg tsis nrog kuv, yog nws tiv kuv. Leej twg tsis nrog kuv sau, mas nws ua txhua yam ploj.”

TIMH 13 LUB 3 HLIS 2015

Hnub Rau Lis Piam Peb Caij Plaub Caug

Zaj Nyeem Ib OS XES 14:2-10

2 Cov His Xas Lais, nej cia li rov qab los cuag HUAB TAIS nej tus Tswv Ntuj, vim nej tau ua txhaum, nej thiaj ntog. 3 Nej yuav npaj ib co lus, ces nej yuav rov los cuag HUAB TAIS. Nej yuav hais rau nws tias : "Thov koj tshem peb cov txhaum tas huv si pov tseg, koj tsuas khaws qhov zoo nyob hauv peb xwb. Peb yuav tsis muab heev nyuj txi rau koj, peb yuav txi peb di ncauj rau koj. 4 As Xws yuav cawm tsis tau peb, peb yuav tsis caij nees mus ua rog ntxiv, peb yuav tsis hais rau tej yam peb txhais tes puab ntxiv tias : ‘Peb tus Tswv Ntuj !’ Vim yog nyob hauv koj ces tus me nyuam ntsuag thiaj tau txais kev khuv leej." 5 Kuv yuav kho lawv kev ntxeev siab kom lawv zoo hlo, kuv yuav hlub lawv tas siab tas ntsws. Kuv yuav tsis npau taws rau lawv ntxiv. 6 Kuv yuav zoo li ib co lwg los yug His Xas Lais, ces nws yuav tawg taus paj zoo li paj ‘lis’, nws yuav nrhau cag khov xws li cov ntoo ciab nyob Lis Npaas. 7 Nws yuav huam kaus tshiab, yuav zoo saib xws li tsob txiv ntoo roj, yuav tsw qab xws li cov hav zoo Lis Npaas. 8 Nws yuav rov los zaum hauv kuv qhov ntxoov ntxoo. Nws yuav rov cog nplej mov mog dua. Nws cov hmab txiv cawv yuav rov tawg paj thiab nws cov cawv yuav nto moo xws li cov cawv Lis Npaas. 9 Es Fais puas tseem yuav vam txog pej kum dab ntxiv? Kuv yog tus mloog nws tej lus thov, kuv ntsia ntsoov nws. Kuv zoo puav tam li ib tug ntoo thuv ntsuab mus li. Yog vim muaj kuv, koj thiaj txi txiv tau. 10 Tus neeg thoob thiaj yuav to taub tej lus no, tus neeg ntse thiaj yuav mem tau lub ntsiab. Vim HUAB TAIS txoj kev yog kev ncaj, cov neeg siab ncaj thiaj yuav taug tau, hos cov neeg txhaum yuav ntog."

NPN 81:6C-8A, 8BC-9, 10-11AB, 14 + 17

Txais: (11 + 9a) Kuv yog HUAB TAIS koj tus Tswv Ntuj, cia li mloog kuv hais.

Kuv hnov ib co lus tshiab tias:
“ Kuv txo nws lub nra ntawm nws xub pwg,
nws ob txhais tes dim tsis tau tuav lub pob tawb ntxiv.
Thaum koj muaj kev nyuaj siab, koj tau hu, ces kuv tau tuaj pab koj.

Txais: Kuv yog HUAB TAIS koj tus Tswv Ntuj, cia li mloog kuv hais.

Koj tsis pom kuv, kuv tau teb koj nyob hauv xob quaj.
Kuv tau sim koj nyob ntawm cov dej Mes Lis Npas.
Kuv haiv neeg, nej mloog kuv, kuv yuav ntuas nej,
His Xas Lais, koj puas yuav hnov kuv?

Txais: Kuv yog HUAB TAIS koj tus Tswv Ntuj, cia li mloog kuv hais.

Nej yuav tsis txhob muaj dua lwm tus tswv ntuj,
tsis txhob teev hawm lwm tus pej kum dab.
Kuv, HUAB TAIS, yog nej tus Tswv Ntuj
tus tau coj nej tawm Hais Nkws Tos teb los.

Txais: Kuv yog HUAB TAIS koj tus Tswv Ntuj, cia li mloog kuv hais.

Kheev lam kuv haiv neeg cuab pob ntseg mloog kuv,
kheev lam His Xas Lais taug kuv txoj kev,
mas kuv yuav muab cov nplej mov mog qab tshaj rau lawv noj,
thiab kuv yuav tho cov zob mu saum tsua los daws lawv nqhis.

Txais: Kuv yog HUAB TAIS koj tus Tswv Ntuj, cia li mloog kuv hais.

Zaj Tshaj Lub Moo Zoo MT 4:17

Huab Tais hais tias, nej hloov siab,
Ntuj lub Ceeb Tsheej nyob ze ze lawm.

Ntawv Moo Zoo MK 12:28-34

28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, nws txav los nug Yes Xus tias : "Nyob hauv cov lus qhia tas huv tib si, lo lus qhia twg yog thawj lo lus qhia ?" 29 Yes Xus teb rau nws tias : "Thawj lo lus qhia yog lo lus no : "His Xas Lais, koj mloog mog ! Peb tus Huab Tais Tswv Ntuj tib leeg xwb yog Huab Tais. 30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog. 31 Lo lus qhia ob yog lo lus no : Koj yuav nyiam tus nyob ze koj ib yam li koj nyiam koj. Tsis muaj lwm lo lus qhia loj dua ob lo lus no." 32 Tus kws Ntawv Ntshiab hais rau Yes Xus tias : "Koj hais raug kawg, Xib Hwb, koj hais qhov tseeb : muaj ib tug Huab Tais Tswv Ntuj xwb, tsis muaj dua lwm tus Tswv Ntuj dhau ntawm nws. 33 Kev nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab nyiam tus nyob ze yus ib yam li yus nyiam yus, yog zoo tshaj tej tsiaj hlawv thiab tej thaj txi Ntuj huv tib si." 34 Yes Xus pom tus kws Ntawv Ntshiab txhab ib lo lus thoob tsib, ces nws hais rau tus kws Ntawv Ntshiab tias : "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug Yes Xus ntxiv.

TIM 14 LUB 3 HLIS 2015

Hnub Xya Lis Piam Peb Caij Plaub Caug

Zaj Nyeem Ib OS XES 6:1-6

1 Nej tuaj, peb rov qab los cuag HUAB TAIS. Nws tau dua peb ntuag, tab sis nws yuav rov kho peb. Nws tau nplawm peb, tab sis nws yuav qhwv peb cov qhov txhab. 2 Nws tos ob hnub ces nws yuav rov muab txoj sia rau peb. Hnub peb, nws yuav tsa peb sawv rov los, peb yuav tau ua lub neej nrog nws nyob. 3 Peb yuav tsum paub, peb kav tsij nrhiav kom paub HUAB TAIS. Nws yeej yuav tuaj tiag tiag, yeej tseeb ib yam li niaj hnub muaj sawv ntxov. Nws yuav tuaj xws li cov kob nag tshauv, xws li cov nag poob los ywg av lub caij ntuj tshiab. 4 Kuv yuav ua dab tsi rau koj, Es Fais ? Kuv yuav ua dab tsi rau koj, Yus Das ? Nej txoj kev nyiam kuv yog zoo li cov huab thaum sawv ntxov, zoo li cov lwg uas qhuav sai sai. 5 Yog vim li ntawd kuv thiaj kom cov Yaj Saub muab lawv dua ua ntau daim, kuv lub ncauj hais cov lus muab lawv tua, kuv kev txiav txim yuav ci tawm plaws tuaj xws li qhov pom kev. 6 Vim tias kev nyiam kev hlub xis kuv siab dua cov thaj txi Ntuj, kev paub Tswv Ntuj xis kuv siab dua cov thaj hlawv tsiaj."

NPN 51:3-4, 18-19, 20-21AB

Txais: (OX 6:6) Kuv xav pom nej txoj kev hlub neeg dua nej tej kev hlawv tsiaj.

Thov koj hkuv leej kuv, Tswv Ntuj, vim koj lub siab zoo,
thov so kuv qhov txhaum pov tseg, vim koj txoj kev hlub loj kawg nkaus.
thov ntxuav kom tas nrho kuv lub txim pov tseg
thiab tshem kuv qhov txhaum mus kom kuv dawb huv tuaj.

Txais: Kuv xav pom nej txoj kev hlub neeg dua nej tej kev hlawv tsiaj.

Vim koj tsis zoo siab txais peb tej kev txi ntuj,
yog kuv yuav hlawv tsiaj txi ntuj, koj yuav tsis kam txais.
Kuv txoj kev txi ntuj, Tswv Ntuj, yog muaj ib lub tswv yim xav lees txhaum,
ib lub siab xav lees txhaum thiab ua neeg me, Tswv Ntuj, koj yuav tsis thuam.

Txais: Kuv xav pom nej txoj kev hlub neeg dua nej tej kev hlawv tsiaj

HUAB TAIS, thov koj ua siab dav rau Xis Yoos; vim koj lub siab zoo,
koj rov tsa Yes Lus Xas Les cov ntsa loog.
Ces thaum ntawd koj yuav zoo siab txais peb cov thaj txi ntuj,
peb cov kev hlawv tsiaj txi tsiaj.

Txais: Kuv xav pom nej txoj kev hlub neeg dua nej tej kev hlawv tsiaj

Zaj Tshaj lub Moo Zoo NPN 95:8

Yogh nub no nej hnov nws lub suab,
nej tsis txhob ua nej lub siab tawv ncauj.

Ntawv Moo Zoo LK 18:9-14

9 Yes Xus tseem hais zaj paj lug no ntxiv, nws hais rau ib txhia neeg uas lawv khav tias lawv yog neeg ncaj, ces lawv thuam luag tej. 10 "Muaj ob tug neeg nce mus teev Ntuj pem lub Tuam Tsev Teev Ntuj. Ib tug yog Fas Lis Xais, ib tug yog neeg sau se. 11 Tus Fas Lis Xais sawv ntsug, nws teev Ntuj li no nyob hauv siab : 'Aub, Tswv Ntuj, kuv ua koj tsaug, vim kuv tsis zoo li zeej tsoom sawv daws. Lawv mas lawv ua tub sab, ua tsis ncaj, deev luag txij luag nkawm, thiab tseem ua zoo li tus sau se ntawd. 12 Ib lis piam, kuv yoo mov ob zaug. Kuv pub ib feem kaum ntawm tas txhia yam uas kuv khwv tau.' 13 Tus sau se nyob deb, tsis muaj cuab kav tsa muag ntsia saum ntuj. Nws ntaus nws hauv siab, nws hais tias : 'Aub ! Tswv Ntuj, thov koj khuv leej kuv, vim kuv yog neeg txhaum !' 14 Kuv hais rau nej : tus sau se nqes rov mus tsev, nws ntshiab huv lawm, hos tus Fas Lis Xais tsis tau ntshiab huv. Vim tias leej twg tsa nws siab, Ntuj yuav txo nws qis, hos leej twg txo nws qis, Ntuj yuav tsa nws siab."

TIM 16 LUB 3 HLIS 2015

Hnub Ob Lis Piam Plaub Caij Plaub Caug

Zaj Nyeem Ib HIS XAIS 65:17-21

17 Saib ntawm no, kuv yuav tsim cov txheej ntuj tshiab thiab ib lub ntiaj teb tshiab. Yuav tsis nco txog yav tas los lawm. Yav tas lawd, yuav tsis ntsawv lub siab ntxiv. 18 Nej yuav hom khaj, nej yuav zoo siab mus ib txhis txog yam kuv yuav tsim. Ntsia saib ! Kuv yuav muab Yes Lus Xas Les ua kev hom khaj, muab kuv haiv neeg ua kev zoo siab. 19 Kuv yuav dhia hom khaj nyob hauv Yes Lus Xas Les, yuav dhia zoo siab nyob hauv kuv haiv neeg, ces yuav tsis hnov suab quaj suab nroo ntxiv. 20 Nyob ntawd, yuav tsis muaj cov me nyuam mos yug los nyob ob peb hnub xwb ntxiv, yuav tsis muaj ib tug neeg laus uas nyob tsis puv nws lub hnub nyoog. Tus tuag hluas tshaj, yog tuag thaum hnub nyoog puv ib puas xyoo. Tus neeg txhaum yuav raug tsawm thaum nws muaj ib puas xyoo. 21 Lawv yuav txhim tsev rau lawv nyob, lawv yuav cog vaj hmab txiv cawv thiab yuav tau noj cov txiv.

NPN 30:2 + 4, 5-6, 11-12A + 13B

Txais: (2a) Kuv yuav cxav txog koj, Huab Tais, vim koj tau pab kuv lawm.

Kuv yuav cav txog koj lub koob meej, Huab Tais, vim koj tau npo kuv dim,
tsis pub kuv cov yeeb ncuab muaj kev zoo siab yeej kuv.
HUAB TAIS, koj tau thau kuv ntawm ntuj txias teb tsaus los
Nyob hauv cov poob mus rau lub qhov, koj tau txuag kuv txoj sia.

Txais: (2a) Kuv yuav cxav txog koj, Huab Tais, vim koj tau pab kuv lawm.

Nej cav txog HUAB TAIS, nej cov uas npuab nws zoo,
nej ua tsaug rau nws lub npe.
vim nws kev npau taws tsuas nyob ib pliag,
hos nws txoj kev ua zoo nyob ib tiam
Thaum tsaus ntuj kev quaj nkag los, thaum sawv ntxov muaj kev zoo siab.

Txais: (2a) Kuv yuav cxav txog koj, Huab Tais, vim koj tau pab kuv lawm.

HUAB TAIS, thov koj mloog kuv thiab khuv leej kuv,
HUAB TAIS, thov koj ua tus pab kuv
Koj tau hloov kuv txoj kev quaj ntsuag ua kev dhia zoo siab.
HUAB TAIS, kuv tus Tswv Ntuj, kuv yuav ua koj tsaug mus li ib txhis.

Txais: (2a) Kuv yuav cxav txog koj, Huab Tais, vim koj tau pab kuv lawm.

Zaj Tshaj lub Moo Zoo AS MOS 5:14

Nej nrhiav qhov zoo txhob nrhiav qhov phem, nej thiaj yuav muaj sia nyob,
thiab HUAB TAIS thiaj yuav nrog nej nyob.

Ntawv Moo Zoo ZAM 4:43-54

43 Dhau ob hnub ntawd lawm, Yes Xus sawv kev ntawm qhov chaw ntawd mus rau Nkas Lis Lais. 44 Yes Xus yeej hais meej tias ib tug yaj saub tsis raug luag saib muaj nqis nyob hauv lub zos nws hlob. 45 Tsis kav, thaum Yes Xus los rau Nkas Lis Lais, cov Nkas Lis Lais txais nws zoo, vim lawv tau pom tej yam nws ua nyob Yes Lus Xas Les lub caij nqaum paj nqaum nruas, yog vim lawv kuj tau mus nqaum paj nqaum nruas ped thiab. 46 Yes Xus thiaj rov tuaj Kas Nas xeev Nkas Lis Lais, lub zos uas nws muab dej los txia ua cawv. Tus vaj ib tug nom muaj ib tug tub mob nyob Kas Fas Naus. 47 Nws hnov tias Yes Xus los Yus Das teb los txog Nkas Lis Lais lawm, ces nws mus cuag Yes Xus, nws thov Yes Xus kom nqes mus kho nws tus tub ; vim tus tub twb yuav tuag. 48 Yes Xus hais rau nws tias : "Yog nej tsis pom ib co cim thiab tej yam hwj huam, mas nej tsis ntseeg." 49 Vaj ntxwv tus nom hais rau Yes Xus tias : "Huab Tais, thov koj nqes mus, cheem kuv tus me nyuam tsis tau tuag." 50 Yes Xus hais rau nws tias : "Koj rov mus mog, koj tus tub zoo lawm." Tus neeg ntawd ntseeg lo lus Yes Xus hais rau nws, ces nws sawv kev mus. 51 Thaum nws tab tom nqes mus, nws cov tub txib tuaj tos nws. Lawv hais tias nws tus tub zoo neej lawm. 52 Nws nug lawv saib yog lub sij hawm twg tus tub thiaj rov zoo. Lawv hais rau nws tias : "Nag, thaum ib teev hnub qaij, ces tus mob kub cev thim hlo lawm." 53 Leej txiv thiaj pom tias yog lub sij hawm uas Yes Xus hais rau nws tias : 'Koj tus tub zoo lawm.' Ces nws ntseeg, nws thiab tas nws tsev neeg huv si ntseeg. 54 Thaum Yes Xus los ntawm xeev Yus Das mus rau Nkas Lis Lais, mas nws ua lub cim ob zoo li ntawd.

TIM  17 LUB 3 HLIS     2015

Hnub Peb Lis Piam Plaub Caij Plaub Caug

Zaj Nyeem Ib     ES XES KIAS 47:1-9, 12

1 Ces nws coj kuv rov los txog ntawm lub qhov rooj mus hauv lub Tuam Tsev Teev Ntuj. Ua ciav muaj ib tug dej ntws hauv taw rooj los dua sab hnub tuaj lawm, vim lub Tuam Tsev tig mus rau sab hnub tuaj. Dej ntws tawm hauv qab sab xis lub Tuam Tsev Teev Ntuj nyob sab naj lub thaj txi ntuj. 2 Nws coj kuv tawm ntawm lub rooj vag nyob sab pej los, thiab coj kuv ncig sab Tuam Tsev nraud los txog ntawm lub rooj vag nyob sab hnub tuaj, pom dej ntws tshwm ntawm sab xis los. 3 Tus txiv neej mus rau sab hnub tuaj, nws nqa nws txoj hlua ntsuas ntawm tes, nws ntsuas ntev li ib txhiab tshim, ces nws kom kuv hla dej; dej txij li kuv qij taw. 4 Nws rov ntsuas ib txhiab tshim ntxiv thiab kom kuv hla dej dua, dej nce txij kuv hauv caug lawm. Nws rov ntsuas dua ib txhiab tshim ntxiv, nws kom kom kuv hla dej, dej txij kuv duav lawm. 5 Nws tseem rov qab ntsuas dua ib txhiab tshim ntxiv, thaum ntawd cia li yog ib tug dej loj kuv hla tsis taus lawm, vim tus dej loj tuaj thiab tob lawm, yog ib tug dej hla tsis tau li. 6 Ces tus neeg hais rau kuv tias : " Neeg leej tub, Koj puas pom?" Nws thiaj coj kuv rov los rau ntawm ntug dej. 7 Thaum kuv los txog, mas nyob ntawm ob sab ntug dej kuv pom muaj ib co ntoo ntau ntau. 8 Tus neeg hais rau kuv tias : "Cov dej no ntws toob fab mus rau nram lub hav As Las Npas, yuav mus rau hauv hiav txwv, yuav mus ua kom lub hiav txwv cov dej huv tuaj. 9 Tus dej no ntws txog qhov twg mas tas puas tsav yam muaj sia yuav ciaj; yuav muaj ntses ntau vim tus dej no ntws txog twg , nws yuaj coj kev noj qab nyob zoo rau qhov ntawd; ces tus dej no mus txog twg tas txhua yam yuav muaj sia npau xi.   12 Nyob ntawm tus dej ob sab ntug yuav tuaj tas puas tsav yam txiv ntoo, lawv cov nplooj yuav tsis zeeg ib zaug thiab lawv yuav txi txiv mus li. Niaj hli lawv yuav txi ib co txiv tshiab, vim cov dej ntws ntawm thaj chaw ntshiab los. Cov txiv yuav yog txhiam xws noj, cov nplooj yuav yog tshuaj."


NPN          46:2-3, 5-6, 8-9

Txais:   ( 8 ) Tus Huab Tais kav tsoom tshiab nrog peb nyob; Peb lub yeej ntsa zeb yog Yas Kos tus Tswv Ntuj.

Tswv Ntuj yog peb chawm nkaum yog peb lub zog,
yog tus pab peb mus li thaum peb ntsib kev nyuaj.
Vim li no, txawm ntiaj teb yuav ua zog koog thiab toj roob hauv pes
yuav nphau nphwv rau hauv qab tiv txwv los peb tsis ntshai.

Txais:   Tus Huab Tais kav tsoom tshiab nrog peb nyob; Peb lub yeej ntsa zeb yog Yas Kos tus Tswv Ntuj.

Muaj ib tug dej, nws cov ceg ncau mus ua kom Tswv Ntuj lub tsheej zoo siab,  
nws ntxuav kom tus Nyob Siab tej vaj tse dawb huv.
Tswv Ntuj nyob hauv lub tsheej, nws yuav tsis muaj kev swb,
Tswv Ntuj yuav pab nws thaum kaj ntug txoog.

Txais:   Tus Huab Tais kav tsoom tshiab nrog peb nyob; Peb lub yeej ntsa zeb yog Yas Kos tus Tswv Ntuj.

Tus Huab Tais kav tsoom tshiab nrog peb nyob,
peb lub yeej ntsa zeb yog Yas Kos tus Tswv Ntuj.
Nej tuaj xyuas HUAB TAIS cov hauj lwm saib!
xyuas tej yam txaus ntshai nws ua nyob ntiaj teb.      

Txais:   Tus Huab Tais kav tsoom tshiab nrog peb nyob; Peb lub yeej ntsa zeb yog Yas Kos tus Tswv Ntuj.

Zaj Tshaj lub Moo Zoo           NPN 51:12A, 14A

Tswv Ntuj, thov koj tsim ib lub siab huv lis si rau kuv,
koj pub kom kuv rov muaj kev zoo siab nyob hauv koj txoj kev cawm.

Ntawv Moo Zoo        ZAM    5:1-16

1 Dhau tej ntawd tas lawm, txog cov Yus Das ib lub hnub nyoog nqaum paj nqaum nruas, ces Yes Xus nce mus pem Yes Lus Xas Les. 2 Nyob Yes Lus Xas Les, muaj ib lub pas dej nyob ze lub Qhov Rooj Yaj, uas lus Hes Nplaws hu ua Npes Xas Thas. Lub pas dej no muaj tsib lub ruv vov. 3 Ib pab neeg coob kawg pw hauv cov qab ruv no : ib co mob, ib co dig muag, ib co ceg tawv, ib co tuag ceg. Lawv tos lub caij dej npau. 4 Vim muaj tej lub caij, Huab Tais tus Tshiab nqes los hauv lub pas dej, ces dej npau. Thaum dej nyuam qhuav npau tas, leej twg xub nqes mus hauv, mas nws tus mob zoo, txawm raug tus mob dab tsi los zoo tas huv tib si. 5 Muaj ib tug txiv neej nyob ntawd, nws mob tau peb caug yim xyoo. 6 Yes Xus pom nws pw, Yes Xus paub tias nws mob li ntawd tau ntev los, nws hais rau tus neeg mob tias : "Koj puas xav kom koj tus mob zoo ?" 7 Tus neeg mob teb rau Yes Xus tias : "Huab Tais, thaum dej npau, kuv tsis muaj leej twg pab muab kuv tso rau hauv dej. Thaum kuv tab tom mus, twb muaj lwm tus xub nqes ua kuv ntej lawm." 8 Yes Xus hais rau nws tias : "Koj sawv ! Nqa koj daim pua chaw, koj mus kev." 9 Tam sis ntawd tus neeg mob zoo hlo. Nws nqa nws daim pua chaw, ces nws sawv mus kev. Hnub ntawd yog hnub Xas Npas Tos. 10 Cov Yus Das hais rau tus neeg uas zoo lawd tias : "Hnub no yog Xas Npas Tos, txwv tsis pub koj nqa koj daim pua chaw." 11 Tab sis nws hais rau lawv tias : "Tus uas kho kuv zoo, nws hais rau kuv tias : Nqa koj daim pua chaw, koj mus kev." 12 Lawv nug nws tias : "Leej twg yog tus hais rau koj tias : Nqa koj daim pua chaw, koj mus kev" 13 Tab sis tus neeg mob uas zoo ntawd tsis paub yog leej twg, vim Yes Xus twb ploj lawm, thiab muaj neeg coob coob nyob ntawd. 14 Ib tsam, Yes Xus pom nws hauv lub Tuam Tsev Teev Ntuj, Yes Xus hais rau nws tias : "Nyem no, koj tus mob zoo lawm, koj txhob ua txhaum ntxiv, tsam ib yam phem tshaj ho rov raug koj dua." 15 Tus neeg mus hais rau cov Yus Das tias tus kho nws zoo yog Yes Xus. 16 Vim li ntawd, cov Yus Das thiaj pib hiam Yes Xus : vim Yes Xus ua qhov ntawd hnub Xas Npas Tos.

TIM 18 LUB 3 HLIS 2015

Hnub Plaub Lis Piam Plaub lub Caij Plaub Caug

Zaj Nyeem Ib HIS XAIS 49:8-15

8 HUAB TAIS hais li no : "Thaum txog lub caij ua zoo, kuv tau mloog koj thov; thaum txog hnub cawm neeg, kuv tau pab koj. Kuv tau puab koj, kuv tau muab koj ua ib haiv neeg txoj kev cog lus, kom tau tsa lub teb chaws rov sawv, kom rov faib cov cuab tam uas luag tau muab ua puas tas, 9 kom hais rau cov neeg raug kaw tias : 'Nej tawm los,' kom hais rau cov neeg nyob hauv qhov tsaus ntuj tias : 'Nej tawm tuaj rau sawv daws pom!' Lawv yuav nog zaub ntawm tej ntug kev, cov roob do hau yuav yog lawv tej roob zaub. 10 Lawv yuav tsis tshaib, tsis nqhis ib zaug ntxiv, cov cua kub thiab lub hnub yuav tsis ntaiv lawv ntxiv. Vim tus hlub lawv yuav coj lawv kev, nws yuav coj lawv mus rau cov dej txhawv. 11 Kuv yuav muab tas kuv cov roob huv si los ua ib txoj kev, kuv yuav txhub kuv tej kev loj kom siab tuaj. 12 Ntsia saib ! Lawv yuav tuaj deb tuaj, cov no tuaj pej fab thiab xib fab tuaj, cov ntawd tuaj Xis Nim teb tuaj. 13 Cuaj txheej ntuj, nej qw suab zoo siab, ntiaj teb nrag cai, koj dhia hom khaj ! Kom cov toj roob hauv pes qws tej suab, vim HUAB TAIS tau nplij nws haiv neeg, nws tau hlub nws cov neeg raug txom nyem. 14 Xis Yoos tau hais tias : ‘HUAB TAIS tso kuv pov tseg lawm, HUAB TAIS tsis nco qab kuv lawm !’ 15 Ib tug poj niam puas tsis nco qab nws tus me nyuam tau? Nws puas tsis hlub tus tub uas tawm hauv nws lub cev los tau? Tab txawm nws tsis nco qab tau los kuv yuav tsis muaj qhov tsis nco qab koj ib zaug li ! “

NPN 145:8-9, 13CD-14, 17-18

Txais: (8a) Huab Tais yog kev hlub mos thiab khuv leej neeg.

Huab Tais yog txoj kev hlub mos thiab khuv leej neeg,
nws npau taws qeeb, nws lub siab puv kev hlub.
Huab Tais ua zoo rau txhua leej txhua tus,
nws muab nws txoj kev hlub mos rau txhua yam nws tau tsim.

Txais: Huab Tais yog kev hlub mos thiab khuv leej neeg.

Huab Tais tej lus qhia txog qhov tseeb,
nws tej dej num qhia txog kev hlub.
Huab Tais tsa cov ntog kom sawv taus los,
nws tsa cov khoov kom sawv taus ntseg.

Txais: Huab Tais yog kev hlub mos thiab khuv leej neeg.

Huab Tais tej kev yog kev ncaj
nws tej dej num yog kev hlub.
Huab Tais nyob ze nyob cov hu txog nws,
cov uas muaj lub siab hu txog nws tiag. .

Txais: Huab Tais yog kev hlub mos thiab khuv leej neeg.

Zaj Tshaj lub Moo Zoo ZAM 11: 25A, 26

Huab Tais hais tias, kuv yog kev sawv rov los thiab yog txoj sia,
leej twg ntseeg txog kuv yuav tsis txawj tuag li.

Ntawv Moo Zool ZAM 5: 17-30

17 Tab sis Yes Xus teb rau lawv tias : "Kuv Txiv ua hauj lwm txog tav no, kuv kuj ua hauj lwm thiab." 18 Yog vim li ntawd, cov Yus Das yim huab xav muab Yes Xus tua : tsis yog tim nws tsis caiv hnub xas npas tos xwb, nws tseem hu Tswv Ntuj ua nws Txiv, nws tsa nws nrog Tswv Ntuj loj sib luag. 19 Yes Xus thiaj tsa ncauj hais rau lawv tias : "Kuv hais qhov muaj tseeb tiag rau nej: Leej Tub ua yam twg, nws tsis ua nws xwb, nws tsuas ua tau qhov nws pom Leej Txiv ua. Vim tias Leej Txiv ua yam twg, Leej Tub kuj ua raws nraim li ntawd. 20 Leej Txiv nyiam Leej Tub, nws muab ib puas tsav yam nws ua rau Leej Tub saib. Nws tseem yuav muab ib co hauj lwm loj tshaj cov no rau Leej Tub saib, kom nej qhuas. 21 Leej Tub ua kom leej twg muaj txoj sia kuj tau, nyob ntawm nws xav, xws nkaus li Leej Txiv tsa cov tuag sawv, thiab ua kom lawv rov muaj txoj sia. 22 Leej Txiv tsis txiav txim rau leej twg : nws tso txoj hauj lwm txiav txim huv tib si rau Leej Tub, 23 kom sawv daws hwm Leej Tub ib yam li hwm Leej Txiv. Tus tsis hwm Leej Tub, kuj tsis hwm Leej Txiv uas yog tus xa Leej Tub tuaj. 24 Kuv hais qhov muaj tseeb tiag rau nej : tus twg mloog kuv lo lus, thiab ntseeg txog Tus Xa kuv tuaj, nws tau txoj sia nyob mus li, nws tsis raug txiav txim, nws hla txoj kev tuag mus rau hauv txoj sia. 25 Kuv hais qhov muaj tseeb tiag rau nej tias lub zim txwv los txog lawm, yog nyem no ntag ! Txog lub caij cov tuag yuav hnov Tswv Ntuj Leej Tub lub suab. Cov uas yuav hnov, yuav muaj txoj sia nyob. 26 "Leej Txiv pub kom Leej Tub muaj txoj sia nyob hauv nws, ib yam li Leej Txiv uas nws muaj txoj sia nyob hauv nws. 27 Leej Txiv pub hwj huam rau Leej Tub kom txiav txim tau, vim nws yog Neeg Leej Tub. 28 Nej tsis txhob poob siab, vim txog lub sij hawm uas tas ib tsoom neeg nyob hauv qhov ntxa yuav hnov Neeg Leej Tub lub suab. 29 Ces lawv yuav tawm los. Cov tau ua zoo, yuav sawv rov los txais txoj sia, hos cov tau ua phem, yuav sawv rov los raug txim. 30 Kuv ua yam twg, kuv ua tsis tau kuv ib leeg. Kuv txiav txim raws li lo lus kuv hnov, thiab kuv cov lus txiav txim ncaj, vim kuv tsis nrhiav kom tau ua raws li kuv lub siab xav, kuv tsuas nrhiav kom tau ua raws li Tus Xa kuv tuaj lub siab xav.

TIM  19 LUB 3 HLIS    2015

Hwm leej Ntshiab Yos Xes, Niam Mab Liab tus txij nkawm




Zaj Nyeem Ib       2 XAS MUAS 7:4-5A, 12-14A, 16

4 Tib hmos ntawd, HUAB TAIS lo lus nrov tuaj rau Nas Taas tias : 5 "Koj mus hais rau kuv tus tub txib Das Vis tias:
12 Thaum koj ua neej dua tas thiab koj mus nrog koj cov poj yawm txwv koob pw tsaug zog lawm, kuv yuav nrhiav ib tug los tuav koj lub cuab tam, yog koj ib tug tub tawm ntawm koj roj ntsha los yuav hloov koj ua vaj. Kuv yuav nres nws txoj kev ua vaj kom nyob ruaj nreb. 13 Nws yuav yog tus txhim tsa ib lub tsev rau kuv lub npe, ces kuv yuav nres nws txoj keb ua vaj kom nyob ruaj nreb. 14 Kuv yuav ua nws txiv, nws yuav ua kuv tus tub.
16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag. Koj lub theej kiab yuav nyob ruaj nreb mus ib txhis."

NPN          89:2-3, 4-5, 27 + 29

Txais:    (37) Das Vis leej tub yuav nyob mus li ib txhis.  

Kuv yuav hu nkauj mus li txog HUAB TAIS txoj kev hlub;
tiam dhau tiam kuv lub ncauj yuav tshaj tawm txog nws lub siab ncaj
Koj yeej tau hais tias: “Kuv  txoj kev hlub yuav nyob mus li,”    
koj tau tsa koj txoj kev ua siab ncaj kom nyob ruaj saum ntuj.

Txais:    (37) Das Vis leej tub yuav nyob mus li ib txhis.

“Kuv tau hais haum nrog tus kuv xaiv,
kuv tau cog lus ruaj rau Das Vis kuv tus tub txib tias:
Kuv yuav nres koj caj ces mus li
thiab yuav tsa koj lub theej kiab kom nyob tiam dhau tiam.”

Txais:    (37) Das Vis leej tub yuav nyob mus li ib txhis.

“Nws yuav hais rau kuv tias: ‘Koj yog kuv txiv,
kuv tus Tswv Ntuj, lub Tsua cawm kuv.’
Kuv yuav muab kuv txoj kev hlub rau nws tas mus li,
thiab kuv txoj kev nrog nws cog lus yuav nyob ruaj nreb.”

Txais:    (37) Das Vis leej tub yuav nyob mus li ib txhis.

Zaj Nyeem Ob     LOS MAS    4:13, 16-18, 22

13  Tsis yog vim txoj cai ces Has Nplas Has thiab nws tsoom xeeb ntxwv thiaj tau txais txoj kev cog lus tias nws yuav tau txais lub ntiaj teb los ua nws tug, tiam sis yog vim txoj kev ncaj ncees uas los ntawm kev ntseeg los.
16 Vim li no txoj kev cog lus ntawd yog los ntawm kev ntseeg los ces nws thiaj yog ib qho txiaj ntsim koob hmoov thiab thiaj li nyob ruaj nreb rau tas Has Nplas Has tsoom xeeb leej xeeb ntxwv, tsis yog rau cov uas coj raws txoj cai xwb, tiam sis rau txhua tus uas coj txoj kev ntseeg raws li Has Nplas Has uas yog peb sawv daws tus yawg koob,  17 raws li muaj ntawv sau tseg tias: “Kuv tsa koj ua txiv rau ntau haiv neeg.” Tswv Ntuj yeej saib Has Nplas Has yog peb txiv, vim nws ntseeg Tswv Ntuj tus uas muab tau txoj sia rau cov neeg tuag thiab cia li hu xwb ces txhua yam txawj xeeb muaj tuaj. 18 Thaum tsis muaj kev cia siab li lawm, Has Nplas Has tseem cia siab tuag nthi thiab ntseeg tuag nthi, ces nws tau ua txiv rau ntau haiv neeg raws li cov lus hais rau nws tias: “Koj tsoom xeeb ntxwv yuav coob npaum li no.”
22 Vim li no thiaj muab Has Nplas Has txoj kev ntseeg luj tau ua nws txoj kev ncaj ncees.

Zaj Tshaj lub Moo Zoo    NPN   84:5

Cov muaj hmoov zoo yog cov uas nyob hauv koj lub tsev, HUAB TAIS,
lawv yuav cav txog koj mus li tsis muaj caij kawg.

Ntawv Moo Zoo        MT 1:16, 18-21, 24

16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
18 Yes Xus Pleev lub keeb chiv zoo li no : Mab Liab uas yog Yes Xus niam, lawv muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm. 20 Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum."
24 Thaum Yos Xes tsim los, nws ua raws li Huab Tais tus Tshiab qhia rau nws : nws coj nws poj niam los nyob hauv nws tsev.

Los:       LK 2:41-51A

41 Yes Xus niam thiab txiv nkawd niaj xyoo mus ua lub Ntees Hla pem Yes Lus Xas Les. 42 Thaum Yes Xus muaj kaum ob xyoos lawm, lawv mus ua lub Ntees Hla pem Yes Lus Xas Les raws li kev cai ua Ntees Hla. 43 Dhau cov hnub ntawd tas, ces Yos Xes thiab Mab Liab nkawd sawv kev rov mus, hos tus me tub Yes Xus tseem nyob Yes Lus Xas Les, nws niam thiab nws txiv tsis paub. 44 Nkawd xav tias nkawd tus tub nrog pab neeg tuaj ua ke rov qab lawm. Ces nkawd mus ib hnub ke, nkawd mam li pib nrhiav nkawd tus tub hauv cov txheeb ze thiab cov swm neeg. 45 Nkawd nrhiav tsis tau, nkawd rov mus nrhiav nws pem Yes Lus Xas Les. 46 Nkawd nrhiav peb hnub, thiaj nrhiav tau Yes Xus nyob hauv lub Tuam Tsev Teev Ntuj. Nws zaum hauv nruab nrab cov kws Txoj Cai, nws mloog lawv thiab nug lawv. 47 Cov neeg uas tau hnov Yes Xus hais lus, puav leej yoob tas rau nws lub tswv yim ntse thiab nws cov lus teb. 48 Thaum nkawd pom Yes Xus, nkawd xav tsis thoob, ces Yes Xus niam hais rau Yes Xus tias : "Me tub, vim li cas koj ua li ntawd rau wb ? Saib ! Koj txiv wb nrhiav koj, wb ntxhov siab tas nrho." 49 Yes Xus hais rau nkawd tias : "Vim li cas neb nrhiav kuv ? Neb tsis paub tias kuv yuav leg kuv Txiv cov hauj lwm lod ?” 50 Mab Liab thiab Yos Xes nkawd tsis to taub lo lus uas Yes Xus hais rau nkawd. 51 Yes Xus nrog nkawd rov mus Nas Xas Les. Nws mloog nkawd lus.

TIM 20 LUB 3 HLIS 2015

Hnub Rau Lis Piam Plaub Caij Plaub Caug

Zaj Nyeem Ib THOOB TSIB 2:1A, 12-22

1 Cov neeg tsis hwm Ntuj tsis txawj xav raws qhov ncaj, lawv rov sib tham lawv tias : 12 Peb kav tsij cuab ntxiab rau tus neeg ncaj, vim nws ua ntxhov peb siab, nws txiav txim rau peb tus yam ntxwv, nws cem peb tias peb ua txhaum rau Txoj Cai, thiab ua txhaum rau txoj kev peb niam peb txiv tau qhia rau peb. 13 Nws khav tias nws paub Tswv Ntuj, nws rov hu nws ua Huab Tais tus me nyuam. 14 Tus siab ncaj yog ib tug txiav txim rau peb zaj tswv yim, pom nws xwb twb ua rau peb nyuaj siab kawg lawm. 15 Nws txoj kev ua neej tsis xws luag txoj, nws tej xub ke txawv luag. 16 Nws saib peb zoo li tej yam cuav. Nws txav ntawm peb txoj kev cuag li peb yog tej yam qias qias. Nws tshaj tias hnub kawg cov neeg ncaj yuav tau txoj hmoov zoo, nws khav tias nws txiv yog Tswv Ntuj. 17 Peb sim ntsia saib qhov nws hais puas muaj tseeb. Peb sim nws saib nws yuav tuag zoo li cas. 18 Yog tus siab ncaj yog Tswv Ntuj tus tub tiag, mas Tswv Ntuj yuav pab nws xwb, thiab yuav npo nws ntawm cov ntxub nws txhais tes. 19 Peb yuav sim nws, peb ua tub qaug nws, peb hiam nws saib, kom peb paub nws lub siab zoo npaum li cas, thiab saib nws puas ua siab ntev nyiaj kom dhau. 20 Peb kav tsij txiav txim kom nws tuag raws ib txog kev poob koob meej, vim twb yuav muaj tus tuaj npo nws, nws khav li ntawd.
21 Cov tsis hwm Ntuj xav tswv yim li ntawd, tab sis lawv yuam kev, lawv lub siab phem mooj lawv lub qhov muag. 22 Lawv tsis paub Tswv Ntuj cov txuj zais tob tob. Lawv tsis tso siab tias Ntuj yuav pub nqi zog rau txoj kev ua neeg ntshiab, lawv tsis ntseeg tias cov neeg siab huv yuav tau txais paj tshab.

NPN 34:17-18, 19-20, 21 + 23

Txais: (19a) Huab Tais nyob ze cov neeg ntxhov siab lwj plawv.

HUAB TAIS tiv cov neeg ua phem,
nws ua kom ntiaj teb neeg txhob nco qab txog lawv.
Thaum cov neeg siab ncaj quaj qw, HUAB TAIS mloog lawv lub suab,
nws npo lawv ntawm lawv tej kev ntxhov siab.

Txais: (19a) Huab Tais nyob ze cov neeg ntxhov siab lwj plawv.

HUAB TAIS nyob ze cov neeg ntxhov siab lwj plawv,
nws cawm cov ntsuj plig qaug zog.
Tus siab ncaj raug ntau hom kev iab kev puas,
HUAB TAIS niaj zaus npo nws ntawm kev puas tsuaj.

Txais: (19a) Huab Tais nyob ze cov neeg ntxhov siab lwj plawv.

Nws zov tus siab ncaj cov pob txha,
nws tsis kheev kom ib tug pob txha lov li.
HUAB TAIS txhiv nws cov tub txib txoj sia:
cov tuaj nkaum hauv HUAB TAIS, tsis raug nplua ib tug li

Txais: (19a) Huab Tais nyob ze cov neeg ntxhov siab lwj plawv.

Zaj Tshaj lub Moo Zoo MT 4:4B

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm Tswv Ntuj lub ncauj los thiab.

Ntawv Moo Zool ZAM 7:1-2, 10, 25-30

1 Dhau tej ntawd tas, Yes Xus mus ncig hauv xeev Nkas Lis Lais. Nws tsis xav mus hauv xeev Yus Das, vim cov Yus Das nrhiav kev muab nws tua. 2 Yuav txog lub hnub nyoog nqaum paj nqaum nruas tsa tsev tsam phooj.
10 Thaum Yes Xus cov kwv tij nce mus nqaum paj nqaum nruas tas lawm, ces nws kuj nce mus thiab, tab sis nws mus nraim nkoos tsis pub leej twg pom.
25 Muaj ib co neeg nyob Yes Lus Xas Les hais tias : "Tus ntawd tsis yog tus uas lawv nrhiav nws tua lod ? 26 Saib, zaum no nws tab meeg hais lus, luag tsis hais dab tsi rau nws li. Cov thawj coj puas tau lees tias nws yog Leej Pleev tiag ? 27 Tab sis, peb paub nws nyob qhov twg tuaj. Hos Leej Pleev, thaum nws tuaj, mas tsis muaj neeg paub tias nws nyob qhov twg tuaj." 28 Thaum Yes Xus qhia nyob hauv lub Tuam Tsev Teev Ntuj nws hais nrov nrov tias : "Nej paub kuv thiab paub tias kuv nyob qhov twg tuaj. Tsis yog kuv tuaj kuv. Tus Xa kuv tuaj, nws yog ib tug tseem ceeb, nej tsis paub nws. 29 Hos kuv paub nws, vim kuv tuaj ntawm nws tuaj, thiab yog nws xa kuv tuaj." 30 Lawv nrhiav kev ntes Yes Xus, tab sis tsis muaj leej twg tsa tes tuav nws, vim nws lub zim txwv los tsis tau txog.

TIM 21 LUB 3 HLIS 2015

Hnub Xya Lis Piam Plaub Caij Plaub Caug

Zaj Nyeem Ib YES LES MIAS 11:18-20

18 HUAB TAIS qhia kuv mas kuv thiaj paub; koj tau ua kom kuv paub txog tias lawv npaj ua dab tsi. 19 Ntawm kuv mas kuv zoo xws li tus thav yaj uas tso tso siab tiam sis luag twb cab mus hauv lub tsev tua tsiaj ntag, vim kuv tsis paub tias lawv npaj xav ua phem rau kuv: "Peb muab tus ntoo uas tab tom muaj muaj zog tshem pov tseg, peb muab nws ntov kiag kom nws txhob tau nyob hauv lub teb chaws neeg muaj txoj sia ntxiv, kom neeg tsis nco nws lub npe ntxiv." 20 HUAB TAIS kav tsoom Tub Rog, koj yog tus txiav txim raws txoj kev ncaj, koj yog tus pom hauv neeg nruab siab thiab hauv neeg lub tswv yim xav, kuv yuav tau pom koj txoj kev ua pauj, vim kuv tau tso kuv txoj kev nyuaj tas rau koj lawm.

NPN 7:2-3, 9BC-10, 11-12

Txais: (2a) HUAB TAIS, kuv tus Tswv Ntuj, kuv tuaj nkaum hauv koj.

HUAB TAIS, kuv tus Tswv Ntuj, kuv tuaj nkaum hauv koj.
Thov koj cawm kuv ntawm cov caum ua phem rau kuv, pab kom kuv dim;
yog koj tsis pab ces kuv yuav raug tsov nthos kuv,
yuav muab kuv dua ua daim, yuav tsis muaj tus pab.

Txais: HUAB TAIS, kuv tus Tswv Ntuj, kuv tuaj nkaum hauv koj.

Huab Tais, thov koj txiav txim rau kuv, raws li kuv txoj kev ncaj,
thiab raws li qhov dawb huv nyob hauv kuv.
Thov koj ua kom tus neeg phem txoj kev phem ploj ntais mus,
tiam sis koj txheem tus neeg ncaj kom nyob ruaj nreb,
vim koj yog tus tsom tau hauv neeg lub siab lub tswv yim, Tswv Ntuj tus siab ncaj.

Txais: HUAB TAIS, kuv tus Tswv Ntuj, kuv tuaj nkaum hauv koj.

Tswv Ntuj yog daim leem phiaj thaiv kuv,
nws yog tus cawm cov muaj lub siab ncaj.
Tswv Ntuj yog tus txiav txim ncaj, nws npau taws qeeb,
tiam sis nws yog tus yuav niaj hnub rau txim.

Txais: HUAB TAIS, kuv tus Tswv Ntuj, kuv tuaj nkaum hauv koj.

Zaj Tshaj lub Moo Zoo LK 8:15

Cov muaj hmoov zoo yog cov muaj ib lub siab loj siab dav khaws nkaus lo lus coj
Thiab lawv txi txiv zoo vim lawv coj rawv lo lus.

Ntawv Moo Zoo ZAM 7:40-53

40 Thaum tsoom neeg ntawd hnov Yes Xus hais cov lus no, mas coob leej hais tias : "Tus no yog tus yaj saub tiag !" 41 Ib txhia hais tias : "Yeej yog Leej Pleev lawm tiag !" Lwm cov hais tias : "Leej Pleev puas yuav tuaj Nkas Lis Lais tuaj ? 42 Ntawv tsis tau hais tias Leej Pleev yog Das Vis xeeb ntxwv thiab nws yuav tawm hauv Das Vis lub zos Npes Les Hes tuaj, no lod ?" 43 Li ntawd, tsoom sid sib faib, tsis sib haum tim Yes Xus. 44 Lawv ib txhia xav ntes Yes Xus, tab sis tsis muaj leej twg tsa tes nthos Yes Xus. 45 Cov zov keeb thiaj rov los cuag cov thawj leej choj thiab cov Fas Lis Xais. Lawv hais rau cov zov keeb tias : "Vim li cas nej tsis coj nws los ?" 46 Cov zov keeb teb hais tias : "Tsis tau muaj leej twg hais lus zoo cuag li tus neeg ntawd ib zaug !" 47 Cov Fas Lis Xais hais rau cov zov keeb tias : "Puas yog nej raug nws haub tau nej lawm thiab ? 48 Nyob hauv cov thawj coj, puas muaj ib tug ntseeg txog nws ? Los nyob hauv cov Fas Lis Xais, puas muaj ib tug ntseeg txog nws ? 49 Tiam sis tsoom niag pej xeem ntawd yog cov tsis paub Txoj Cai li, lawv yog cov uas Ntuj foom phem rau. 50 Nis Kos Des Mos, yog ib tug Fas Lis Xais uas yav dhau los nws tau tuaj cuag Yes Xus, nws hais rau lawv tias : 51 "Peb txoj cai puas kheev kom cia li muab txim rau ib tug neeg uas peb tsis tau xub hnov nws thiab paub tej yam nws ua tso ?" 52 Lawv teb rau Nis Kos Des Mos tias : "Koj puas yog ib tug nyob Nkas Lis Lais tuaj thiab ? Koj soj ntsuam zoo zoo mas, koj yuav pom tias tsis muaj ib tug yaj saub sawv hauv Nkas Lis Lais tuaj li." 53 Ces lawv nyias rov mus nyias tsev.