Ib zaj kwv huam hmoob Moos Plais Nplog teb.

Thaum thaj tsam 1970 muaj ib yawg hmoob Moos Plais khiav los nyob Sayabuory, ib hnub lawv tua nyuj noj txawm muaj ib tug dev pheej los yaim ntshav ces nws txawm ua heev heev yuav muab tus dev tua; ib yawg txawm cheem nws kom txhob tua. Ces nws hlais nqaij naj nws txawm ua riam hlais nws txhais tes ib qho, tus dev txawm los yaim qhov riam raug me ntsis. Tus yawg ntawm txawpm vwm vwm; kho tsis zoo thiaj li mus cuag ib tug Xib Hwb nyob ntawm lawv zos. Muab nw stxiav dab tag ces nws txawm cia li zoo lawm.

Tom qab 1975, teb chaws Nplog tawg, nws khiav tau tuaj mus nyob rau teb chaws Mes Kas. Nws mus txog tid ces nws tso txoj kev ntseeg tseg; nws tsis mus teev Ntuj li lawm. Nws tsis mus teev Ntuj thiab nws thuam heev hais tias: "Thaum ub nyob tim ub, yus thiaj ntseeg xwb; tuaj rau teb chaws no ces tej kev ntseeg ntawd tsis muaj qab hau dab tsi."

Ces muaj ib tug kwv tij mus tim Fab Kis mus xyuas nws, nws pheej thuam heev thuam heev rau tus kwv tij ntawd. Tus kwv tij hais rau nws tias: "Tsis ntseeg lawm los tsis txhob thuam, vim thaum ub twb pab tau koj zoo los yam tsis tau poob nyiaj." Los yawg yeej thuam khav tas zog ntxiv. Ib hnub lawv txawm caij ob peb lub tsheb ua ke mus plog hav zoov. Yawg caij lub ua ntej, cov lawv qab, mus txog ib ntus kev muaj ib tug me nyuam choj, kev lem nkhaus me me xwb cas yawg lub tsheb cia li mus tsis tus ntxeev hlo. Iav tsis tawg li, tsis pom yawg tsoo qhov twg li tab sis zoo nkaus li ib lub pob zeb nkag kiag yawg qhov ncauj to lub qhov, ua hniav lov tag, yawg tuag kiag rau ntawm chaw.

Cov neeg tham zaj no tsis yog neeg ua Ntuj Kev Cai, lawv kuj xav tias ntshe yog mom txheej es Ntuj plua. Tab sis Tswv Ntuj siab hlub neeg tas nrho, txawm nws pab yus tag yus tsis nco nw stxiaj ntsig los nws yeej tsis plua yus. Tab sis lawv kuj xav tsis tag, lawv thiaj tham zaj no rau kuv mloog. Ces kuv lam coj tuaj sau tseg rau sawv daws nyeem ua si.