Leej Ntshiab John (Jean-Marie) Vianney (Curé d'Ars)

Nyob zoo Mim,

Tej laus ib txwm hais tias ib txhais tes tsis npaum kaum txhais npab; kuv xav paub txog LN. Txiv Plig lub neej, kuv nim mus nyeem qhov ub qho no, kuv twb tssi nco pom nws zaj Film. Zoo kawg, yeej ua raws kiag li nws lub neej, tseem muab lub suab zoo li nws lub thiab tus neeg zoo nkaus li nws los ua thiab. Ua tsaug ntau, khoom kuv mam saib kom tag.

Nyob zoo Mim thiab Mas Lias,

Yog neb xav nyeem txog cov lus tim khawv txog LN.Txiv Plig Ars no nias tau mus nyeem ua lus Fab Kis hav nov.

http://livres-mystiques.com/partieTEXTES/Ars/Intuitions/Intuitions/table.htm

Yog nej leej twg xav nyeem ua lwm hom lus, nej mam copy coj mus txhais (traslate) ces tawm ua hom lus uas nej to taub tau.

Hauv qab no yog mus nyeem ntau yam thiab LN Txiv Plig Ars lub neej:

http://livres-mystiques.com/partieTEXTES/Ars/table.htm

PHAU NTAWV KUB DAWB.

Phau ntawv hais tag nrho cov ntshiab lub neej ib tug zuj zus tag nrho.

Nyob zoo Mas Lias,

Kuv rov muab LN. Txiv Plig Ars tawm los rau koj qhov nov.

Zoo siab uas koj yuav muab lub caij muaj nqes los txhais zaj puav rau peb nyeem.

Ua tsaug.

Thov txim ntawm tsoom nyeem sawv daws, kev khwv tuav tes, lub sij hawm tuav taw thiaj sau ua khab ua khuav tsis kho li cia li muab tso rau hauv nov lawm...Hahahaah...! Hnub no xa rau TP.Txhiaj Foom, nws npaj siab yuav muab tso tawm rau ntawv xov xwm Tseb Nplej, thiaj rov tuaj nyeem mas sau tau yuam kev heev; tab sis tsam no muab kho tag rau lawm.

Kuv muab cov lus uas tub wb tham txog Leej Ntshiab Txiv Plig Ars los tso ua ke rau hauv nov tsam lwm hnub ho xav nrhiav ces nrhiav tsis tau lawm.

Maiv Tooj wrote:

Tub Ntxhuav Mom, kuv tsis paub tias lawv puas muab Curé d'Ars cov lus nthuav Ntawv Ntshiab txhais ua lus aas kiv, yog muaj cov txhais tau lawm no koj mus nyeem, yog tsis muaj no koj muab hauv lub site nov mus ua translate, koj nyeem mas nws qhia ntau yam rau koj; ua kom koj pom kev dua qub lawm.

http://livres-mystiques.com/partieTEXTES/Ars/Sermons/table.html

Ntxhuav Mom Xyooj wrote:Nyob zoo phauj Maiv Tooj

kuv ua koj tsaug ntau ntau uas koj tseem qhia txog tus SERMONS DU CURE DARS rau kuv paub. Kuv tau mus tshawb fawb thiab nyeem txog nws cov zaj lus,nws hais tau zoo heev.
Tab sis nyob hauv cov sob lus mas muaj  ib co lus nyuaj nyuaj,vim kuv paub lus America tsis tag. Phauj Maiv Tooj yog koj muaj caij no thov koj pab muab txhais ua lus Hmoob tso rau hauv nov es peb thiaj li tau nyeem kom paub zoo dua.


Thaum nyeem SERMONS DU CURE DARS cov sob lus no tas mas yus mam tig rov los saib yus cov mas yus yuam kev tag lawm. Zoo nkaus li thaum yus tseem kawm ntawv es yus
ua tej npaab lej yus twb qhuas hais tias yus yeej ua raug kawg lawm. Yus mam coj mus rau nais khu saib no cas tseem yuam kev tag lawm thiab. Ces kuv tseem muaj ib lub siab
xav tias,kuv tab tom raug ntxwg nyoog training kuv no tiag.

Ntxhuav Mom Xyooj

Nyob zoo tub Ntxhuav Mom,

Hahahah...! Nws mas yuav hais tau lo lus ntxim hlub ua luaj li!

Tus neeg nrhiav Tswv Ntuj ces mloog li nws me tshaj tus me nyum yaus,
tus neeg nrhiav ntxwg nyug ces mloog li nws txawj tshaj tej laus.

Leej Ntshiab Txiv Plig Ars cov lus ntuas, cov lus nthuav Ntawv Ntshiab mas nws tsis ua paj lug los yog piv lus hais, nws hais cov lus ncaj qha thiab qhia txoj hauv kev meej meej kom yus paub taug li tej niam tej txiv cov qhia me nyuam kom txhob yuam kev thiaj tau lub neej tsheej chim. Thiab LN.Txiv Plig Ars mas nws tsis yog lam hais lus dawb muag li sawv daws xwb, nws tau Ntuj lus, nws cuag tau sab yeeb ceeb los hais. Raws li cov tim khawv uas kuv tau nyeem dhau los (kuv muab ntev hli los nyeem vim kuv tsis muaj caij) mas muaj tus yeej pom nws nrog ib tug poj niam kauv phuam saum taub hau ti nkaus ko taw tham, ib pliag tus poj niam ho cia ploj lawm, lawv pom nraub qaum xwb ces lawv tsis paub tias yog Niam Mab Liab los yog LN.Phis Los Mes (Philomène); thaum lawv hais nws tias kuv twb tuaj nov ntev lawm tab sis koj tseem nrog tus poj niam tham ces kuv thiaj tsis hu koj xwb. Nws hais rau tus pom ntawd tias: "koj tsis txhob qhia leej twg kiag li nawb." Thiab LN.Txiv Plig mas nws paub yus lub neej yav dhau los, niaj hnub thiab lub neej tom ntej; nws qhia kom yus ua qhov tsis yuam kev. Li ntawd thaum nws ua neej nyob, neeg thiaj tuaj ua phab ua pheev tuaj cuag nws, tuaj Daws txhaum ntawm nws, tuaj nug kev pab ntawm nws. Txhua yam nws tau hais rau lawv, tsis muaj ib yam twg uas yuav yuam kev li. Thaum nws ua neej nyob mas ib hmos no nws pw 1-2teev xwb los tuaj kub tseem los nrog nws sib ntaus kom nws tsis tau zoo dab ntub thiab. 3h sawv ntxov nws twb sawv tuaj mus daws txhaum rau neeg lawm; 1 teev ib tag hmo nws nyuam qhuav pib yuav mus pw xwb.

Kuv kuj xav txhais nws cov zaj ntuas kawg, tab sis khwv heev es xyov yuav ua cas thiaj li txhais tau. Tej zaud yuav txhais tsis tag nrho, tab sis txhais lub ntsiab xwb. Kuv nyeem nws tej ntawv mas ua rau kuv lub siab deeg daws, pom yus tej txheeb ze, tej kwv tij phooj ywg, yus xav xav qhia lawv, xav xav kom lawv tig los hloov siab, qheb qhov muag tab sis lawv tseem ua cov paub tshaj yus lawm ces yus ua tij ywm tuaj sau tseg rau hauv cab sab no es leej twg ho xav tuaj nrhiav los nws mam li pom xwb; yog nws ho tsis pom los xij peem.

Nyob zoo tais Tooj thiab Ntxhuav Mom,

Cas zoo li kuv twb tsis nco tuaj pom neb cov lus sib tham li, kuv nyuam qhua pom hnub no xwb.  Kuv muab ib lub site no tuaj tso rau cov uas paub lus Aas Kiv kom nej ho tau mus tshawb LN TP John Vianney cov zaj qhuab qhia ntuas neeg los nyeem.  Tiam sis zoo li cov npe zaj(titles/titres) ho txawv cov ua lus Fab Kis.  Kuv saib mas nyob hauv tais Tooj lub site lus Fab Kis mas muaj txhij txhua dua, muaj txog 4 phau ntawv khaws cov lus qhuab qhia diam, hos cov lus Aas Kiv mas lawv xaiv ib co zaj los txhais xwb.  Txawm li cas los yuav tsum siv sij hawm maj mam mus nyeem ib zaj zuj zus mus, los puas xaiv tej zaj yus xav paub nyeem, yus thiaj li to taub yus txoj kev ntseeg kom tob tuaj.

http://www.catholicbible101.com/Vianney1.pdf

Nyob zoo Mim,

Ua tsaug uas nws muab qhov link rau lub site ua lus aas kiv tuaj tso rau hauv nov; LN.Txiv Plig Ars cov lus mas qhia tau rau yus paub txoj kev ntseeg no lawm ntau, ua rau yus pom qab thiab pom kev ntau heev tuaj.

Kuv nyuam qhuav pib nyeem cov zaj nthuav Ntawv Ntshiab xwb, kuj muaj ntau zaj uas hais tau zoo kawg li. Kuv nyiam zaj hais txog cov Kws Hnub Qub (cov vaj) tuaj hawm Me Nyuam Yes Xus, ntshe kuv yuav ua tiag muab txhais kom tau ua lus hmoob; vim nws hais tau zoo heev thiab qhia ntau yam zoo rau peb.

LN.Txiv Plig Ars hais tias:

Yog thaum yus yuav teev Ntuj es pheej muaj ib qho ua kom yus xav tias ib chim tso, ib chim tso, laug kom ntev ntev mam los teev Ntuj ces yog dab phem los ua kom yus txhob teev Ntuj xwb. Thiab tej zaud yus twb xav tias tsis ua txhaum no tab sis muaj ib qho pheej kom yus ua mas yuav tau hu txog Huab Tais Ntuj thiab Niam Mab Liab los pab yus. Yuav hais li no:

Huab Tais Tswv Ntuj, pab tiv thaiv kuv os!
Nkauj Ntshiab Mab Liab pab kuv os!

Hais li no ces dab phem tsis los zes yus lawm.
Kuv mloog tau tias tej thaum yus twb tsis xav noj kom tsaus tsau, tab sis ib qho pheem ua kom yus noj ntxiv noj ntxiv thiab. Kev noj tsau haus qaug mas kuj yog ib qho muaj txhaum thiab, vim yog yus ua neeg siab hlob, xav kom yus zoo zoo siab rau tej txiam xwm, kom yus tau ntau, yus tsis muaj lub siab xav faib rau luag.

Thaum LN.Txiv Plig Ars tseem ua neej nyob, nws yoo mov ntau, nws noj qos yaj ywm hau xwb los tseem tsis noj txhua pluas thiab. Tus niam ua mov nug nws tias: "Txiv Plig, ntshe ib lis piam koj noj ib pluag mov xwb pob?"
Txiv Plig teb tias: Tej zaud ib lis piam noj ib los ob los peb pluag mov tej."
TP. Hais tias kev yoo mov mas yog ib qho ua kom yeej dab phem. Thaum yus yoo mov mas khib dab phem heev, ua rau dab phem tsis miuaj zog.

Thaum txiv plig teev Ntuj, teev Saw Mab Liab mas nws hais lus yau yau twb yuav luag tsis hnov; vim noj tsawg tsawg ces zoo li nws tsis muaj zog hais lus li; tab sis thaum nws ntuas, nws nthuav Ntawv Ntshiab mas nws hais lus nrov nrov cuag dab tsi. Ib tug pog thiaj nug Txiv Plig hais tias: "Txiv Plig, ua cas thaum koj teev Ntuj no ces koj hais suab twb yuav luag tsis tawm, zoo li koj twb tsis muaj zog hais tau los lus tawm; ua cas thaum koj ntuas no ces koj ho hais lus nrov nrov?"
Txiv  Plig teb tias: "Huab Tais Ntuj mas nws tsis lag ntseg ces maj mam hais los nws hnov hos neeg mas lag ntseg ces yuav tsum nthe los tej zaud twb tsis hnov thiab."

Hnub Saturday tim 28/10/2017 nov, Mas Lias Tsab nyob Strasbourg, Fab Kis teb, teem kuv wb mus teev Ntuj ib hnub nyob rau Leej Ntshiab Txiv Plig Jean-Marie Vianey lub zos Ars (Fab Kis teb). Wb ob leeg xwb ces wb npaj siab mus koom lawv cov programme xwb, wb tsis muaj hom phiaj rau wb tus kheej.

Wb mus koom thawj lub Mis Xas yog 8h45, thaum ua Mis Xas, muaj 3 tug txiv plig, ob tug tsis hnov hais dab tsi, tej zaud yog cov txiv plig nyob txawm chaw, ib tug yog ib tug txiv plig nyob teb chaws Congo (suam teb chaws Africa) tuaj hla ntawm Lyon, nws yog ib tug Kws Tshuaj Kho kev yeej noob ( DR.Gynécologue), nws tuaj txog Lyon ces nws hais tias twb tuaj txog Lyon lawm yuav tsum tau mus daws txhaum tom Ars tso mam li rov mus tsev (Ars yog ib qhov Chaw Ntshiab "daws txhaum" nto moo rau Leej Ntshiav Txiv Plig lub hwj huam). Ua mis xas tag, Mas Lias wb txawm hais tias cia wb xub mus daws txhaum tso, wb mam mus lwm yam ntxiv.

Wb tawm los mus ces kuv pom ib tug txiv plig nyob hauv kem daws txhaum ntawm qhov rooj loj ib sab, kuv txawm hais Mas Lias tias koj mus daws txhaum no ces nyob qhov no, nws txawm mus nkag mus rau tus txiv plig ntawm ib sab qhov rooj lawm. Kuv ib nyuag theem ces kuv txawm pom muaj ib qho chaw daws txhaum ntxiv rau sab hauv tsev, kuv kuj mus rau tus txiv plig sab ped lawm thiab.

Mas Lias, muaj mob rau nws lub tsev me nyuam, nws ncuav cev tau ntev xyoo los lawm, thaum lub 5 hlis 2017 dhau los nov, kws tshuaj pom nws lub tsev me nyuam hlav ua nceb ( ua fibrome) luaj li lub txiv kab ntxwv loj (luaj lub nrig) thiab lawv kaus ncauj tsev me nyuam ( ua frottis) mus tshuaj pom muaj cellules cancéreux ces lawv yuav npaj phais xwb. Tau muaj ib hlis no Mas Lias cev ncuav tsis tu li. Thiab Mas Lias mob mob ceg, mus tsis tshua taus kev.

Tus txiv plig uas Mas Lias mus, ho yog mus ncaj tus txiv plig uas yog Kws Tshuaj kho kev xeeb tub. Ces nws daws txhaum tag, nws piav nws teeb meem mob nkeeg me ntsis rau txiv plig, txiv plig txawm hais rau nws tias yog koj hnub nyug 49 xyoos lawm ces yog koj lub cev yuav huv es nws ua li xwb txhob poob siab, koj yuav zoo sai nov. Yuav " tso siab rau Tswv Nrtuj, thov Ntuj tiag ces koj yuav zoo xwb", koj qhov mob ceg mus tsis taus kev los yog koj tej kev ntxhov siab tsuam koj xwb, koj yuav zoo xwb.

Wb daws txhaum tag, wb mus ncig xyuas LN. Txiv Plig tej chaw nyob, chaw pw tag ces wb mus noj sus, wb koom nrog ib pab tuaj lub xeev Savoie, Fab Kis teb tuaj, lawv muaj ze li 200 leej li noj mov ua ke hauv lub tsev rau cov neeg tuaj teev Ntuj chaw so noj sus. Wb hnov lawv hais tias lawv yuav mus xyuas daim xyam (vidéo) txog txiv plig keeb kwm thaum 14h no ces wb noj sus tag, wb taug kev mus rau tim lub roob uas thaum txiv plig xub tuaj thawj zaug rau Ars es nws tsis pom qab ke, nws nug ib tug me nyuam tub zov yaj hais tias: " Koj qhia txoj kev mus Ars rau kuv, kuv yuav qhia txoj kev mus saum Ntuj rau koj". Wb maj tsawv, vim wb muaj 40mn xwb twb yuav txog caij saib xyam, wb txawm maj tsawv thiab wb tsis tau sib ntsib ua ntej ces wb ib leeg nyob ib qho, wb tseem xav xav sib tham ces wb tsis nco qab muab wb lub siab rau Tswv Ntuj li qhov tseem ceeb. Wb txawm pheej tham taug kev mus, ho mus ntsib ib pab tub hluas coob tsawv, lawv twb nqes rov los lawm teev saw Mab Liab ces wb thiaj li nco tias yuav teev Ntuj taug kev; wb thiaj li pib teev Ntuj mus, wb mus nyob ib pliag saum qhov chaw sib ntsib xwb ces wb nqes rov los. Los txog, wb mus nrog lawv saib xyam tag, wb mus hawm lub Cim Yug, hawm Cim Yug tag wb mus xyuas lub tsev khaws txuj, yog lub tsev uas lawv puab cov mlom ciab, ua li lub neej thaum LN.Txiv Plig nyob, nrog rau tus neeg luaj nkaus li tus tiag thiab hnav tej tsoos tsho lub caij ntawd tiag nrog rau tej twj taig thaud. Wb mus xyuas tag ces wb nrog lawv teev Saw Mab Liab tag ces twb yog 18h yuav tsaus ntuj lawm, wb thiaj li los pw tom ib tug phooj ywg nyob lub zos Chatillon Sur Chalaronne (01), kom taig kis tom qab wb tau mus ua mis xas hauv lub tsev teev Ntuj nyob Chatillon uas xyoo 2017 nov tsoom ntseeg Fab Kis teb tau tuaj ua thaj Txiv Ntuj nco XH. Thoj Xyooj Txiaj Ntsim ua Tim KHawv rau lub Koom Txoos.

Hnub Chiv wb nrog tus phooj ywg uas wb mus pw hauv nws, peb mus ua mis xas thiab noj sus tag ces wb nyias mus nyias tsev lawm.

Mas Lias mus txog tsev, hnub tim 03/11/2017, nws rov mus ua scanner thiab ua échographie xyuas nws lub tsev me nyuam, tus Dr. xub ua scanner, nws ua ntev ntev, ces nws txawm hais rau Mas Lias hais tias: "Muaj ib qho hwj huam yees ntxwv, koj qhov fibrome ploj lawm, koj tsis muaj mob dab tsi li, koj zoo lawm". Mas Lias tsis nco qab xav dab tsi li, nws tsuas teb tias kuv nchuav cev tau ib hlis ntau nov, tau ob peb hnub dhau los mas kuv haj yam nchuav heev tab sis cia li tu tau ob hnub no lawm. Ces Docteur ho coj nws mus ua échographie los yeej tsis pom muaj dab tsi li lawm thiab.

Mas Lias tsis nco qab txog qhov nws tau tuaj mus teev Ntuj nyob Ars, nws hu xov tooj mus nrog ib tug phooj ywg tham, nws hais rau tus phooj ywg tias: Kuv haus cov nceb tshuaj "Reishi" mas zoo kawg li, kuv lub tsev me nyuam cia li zoo hlo li lawm. Tus phooj ywg thiaj hais rau nws hais tias: "Es koj twb hais rau kuv hais tias koj mus teev Ntuj nram Ars no nev! Cas koj tseem hais tias yog koj haus nceb tshuaj es koj zoo no thiab naj! Mas Lias mam li nco dheev txog hais tias tus txiv plig daws txhaum rau nws hais kom "nws tso siab rau Tswv Ntuj ces nws yuav zoo hlo".

Thaum Tswv Ntuj yuav pub txiaj ntsim rau yus mas yus tsis nco xav txog li, yus twb zoo lawm los yus tseem xav tias ntshe yog yus txawj ua kom yus zoo xwb. Zoo li zaj lus hais txog yus yuav xyaum ua neeg txo hwj chim, teev Ntuj kom teev zais ntshis, tsis txhob txaum tej lub yim loj loj ntawm luag tej xub ntiag kom luag pom yus teev Ntuj thiaj li yog teev hauv siab tuaj, yog yus xav kom neeg pom yus qhov zoo xwb ces tsis yog teev Tswv Ntuj, yog teev yus li koob meej xwb. Tshuav ib qho kuv tsis nco qab hais lawm, Mas Lias tus txha caj qaum nrib me ntsis ces yog nws sawv ntev thiab mus kev ntau ces nws sawv tsis taus lawm, tab sis hnub ntawd nws rau khau tawv, luj siab tsawv, thaum wb mus sib ntsib, nws pom kuv rau khau tiaj, nws twb txhawj tsam nws txom nyem, tab sis wb khiav ib hnub tau so 45 mn noj mov xwb, nws tsis mob ceg li...