COV ZAJ NYEEM-Xyoo C 2012-13

**NrhiavTswvNtuj** 19th April 2013, 11:22 am

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°26

Re: COV ZAJ NYEEM-Xyoo C 2012-13

Post NrhiavTswvNtuj 19th April 2013, 11:22 am

COV ZAJ NYEEM HNUB TIM 21/04/2013
( Hnub chiv 4 lub Caij Hla, Xyoo C )

Zaj nyeem Ib: Hauj Lwm: 13, 14.43-52

14 Paj Lug thiab Npas Nas Npes
nkawd hla dhau Pes Zes, mus txog As
Nthias Kias Pis Xis Dias. Txog hnub ,
nkawd mus hauv lub Tsev Txoos, nkawd zaum.
43 Thaum sawv daws tawm tas mas muaj
coob leej Yus Das thiab ib co pej kum
neeg hwm Ntuj raws Paj Lug thiab Npas
Nas Npes nkawd. Nkawd nrog lawv
tham, thiab qhia kom lawv npuab ruaj
nreb Tswv Ntuj lub txiaj ntsim.

44 Lwm Hnub Xya, yuav luag tas lub
tsheej tuaj sib sau mloog Tswv Ntuj Lo
Lus. 45 Cov Yus Das pom neeg tuaj
coob coob, mas lawv khib. Ces thaum
Paj Lug hais lus mas lawv teb tej lo lus
thuam Ntuj. 46 Paj Lug thiab Npas Nas
Npes nkawd ua siab loj hais tias :
"Peb yuav tsum xub tshaj Tswv Ntuj lo
lus rau nej tso, vim kev cai mus li ntawd.
Tab sis yog vim nej xyeeb Tswv Ntuj lo
lus, thiab nej saib nej tsis tsim nyog txais
txoj sia nyob mus li. Vim qhov ntawd
mas peb thiaj tig mus qhia cov neeg teev
pej kum dab. 47 Huab Tais twb qhia peb tias :

"Kuv tsa koj ua qhov pom kev kaj
txhua haiv neeg, kom koj xa txoj kev
cawm neeg mus txog tim npoo ntiaj teb."
48 Cov neeg teev pej kum dab hnov cov
lus no mas sawv daws zoo siab. Lawv
cav txog Huab Tais lo lus.
Cov uas lawv txoj hmoo yog txais txoj sia
nyob mus li mas lawv tig los ntseeg. 49
Ces Huab Tais lo lus ri mus puv tas ib
cheeb tsam ntawd. 50 Tab sis cov Yus
Das mus cob cov poj nom uas hwm Tswv
Ntuj, thiab cov ua hau nyob hauv lub
tsheej. Cov Yus Das pib hiam Paj Lug
thiab Npas Nas Npes nkawd. Lawv ntiab
nkawd kom tawm hauv lawv teb chaws mus.

51 Nkawd thiaj nchos cov plua av lo
nkawd ko taw rau lawv, ces nkawd mus
rau Is Kos Nias. 52 Hos cov thwj tim,
mas lawv zoo siab, thiab Leej Ntuj Plig
Ntshiab nyob puv hauv lawv.

Zaj nyeem Ob: Qheb yav tom ntej: 7, 9.14b-17
9 Dhau tej ntawd tas lawm, ces kuv pom
ib pab neeg coob coob suav tsis txheeb ;
muaj tas txhua teb chaws, txhua haiv
neeg, txhua xeem lus. Lawv sawv ntsug
ze ntawm lub theej kiab, nyob ntawm
Leej Yaj xub ntiag. Lawv hnav tsho
dawb ntev, thiab tuav tej rev nplooj ntawm tes.
“Lawv yog cov uas hla dhau txoj kev raug
luag hiam hnyav los. Lawv tau ntxhua
lawv cov tsho ntev, thiab muab raus Leej
Yaj cov ntshav kom dawb.
15 Vim li ntawd, lawv thiaj nyob ze
Tswv Ntuj lub theej kiab, lawv hawm nws
nruab hnub hmo ntuj, nyob hauv nws lub
tuam tsev. Tus zaum saum lub theej kiab
yuav nthuav nws lub tsev tsam phooj rau lawv.

16 Lawv yuav tsis tshaib tsis nqhis ib
zaug ntxiv. Lub hnub yuav tsis ntaiv
lawv. Pa sov yuav tsis kub lawv ntxiv.
17 Leej Yaj, uas nyob nruab nrab lub
theej kiab, yuav ua Tswv zov lawv, nws
yuav coj lawv mus txog cov qhov dej
muaj txoj sia. Tswv Ntuj yuav so cov kua
muag ntws ntawm lawv qhov muag.”

Zam Ntawv Moo Zoo: 10, 27-3
27 Kuv cov yaj mloog kuv lub suab, kuv paub lawv,
lawv raws nraim kuv. 28 Kuv pub txoj
sia nyob mus li rau lawv, lawv yuav tsis
tuag ib zaug li. Tsis muaj leej twg yuav
chua tau lawv ntawm kuv txhais tes.
29 Kuv Txiv yog tus loj tshaj txhua tsav
txhua yam, nws muab cov yaj no rau kuv,
mas yeej tsis muaj leej twg yuav chua tau
dab tsi ntawm kuv Txiv txhais tes li.
30 Leej Txiv thiab kuv, wb yog ib tug xwb."

NTHUAV NTAWV NTSHIAB.

Rau hnub chiv tim 21 lub 4 hlis 2013

Ib zeej tsoom neeg ntseeg thiab phooj ywg txhua leej,

Niaj xyoo lub lis piam plaub hauv lub caij Hla, yog lub lis piam thov Tswv Ntuj tshoj ib zeej tsoom tub ntxhais kom muaj siab los tshaj Huab Tais Yes Xus lub Moo Zoo (semaine de prière pour les vocations.) Vim li ntawd, peb thov caw txhua tus neeg ntseeg mus pe thiab mus taij Tswv Ntuj mloog peb lub suab thov Tswv Ntuj hauv lis piam no.

Peb yuav xyiv fab npuab peb tus Huab Tais Yes Xus li pab yaj mloog tus zoo tswv zov yaj lub suab. Peb ntseeg tias Huab Tais Yes Xus yog peb tus tswv. Hauv kev thov Tswv Ntuj tshoj kom muaj tus los xa Yes Xus lub Moo Zoo, kuj yog thov Tswv Ntuj tshoj peb txhua tus neeg ntseeg kom xyiv fab teev ntuj thiab nyiam Yes Xus cov lus qhuab qhia. Yog peb ua ib co neeg ntseeg Yes Xus tsis ciaj tsis tuag, ib co neeg ntseeg hle ntsuav tsis xav mus koom teev hawm Tswv Ntuj, twb ceeb laj nyeem Ntawv Ntshiab mloog Tswv Ntuj lus, hauv lub vaj lub tsev twb tsis coj yus lub cuab lub yig teev ntuj li, peb yuav ua cas hnov Tswv Ntuj tuaj tshoj peb tej siab ntsws ? Tswv Ntuj tsis tshuab qeej ntaus nruas ceeb toom tias Tswv Ntuj yuav tuaj ntsib peb. Tus neeg nquag teev ntuj, tus nrhiav kev kom tau caij nyoog ntsib Tswv Ntuj thiaj li hnov Tswv Ntuj lub suab lus ntxhi hauv nws tej siab ntsws, tam zoj tus neeg nquag thiaj li muaj qoob puv txhab, muaj tsiaj puv nkuaj. Peb tseem nco Tswv Ntuj ua yog toog tshoj As Nas Nias, tus neeg mloog Tswv Ntuj lus : “10 As Nas Nias yog ib tug thwj tim nyob Das Mas Kos, Huab Tais ua yog toog hais rau nws : “As Nas Nias” Tus no hais : “Yog kuv ov, Huab Tais.” 11 Huab Tais hais nws : “Koj sawv, koj mus rau txoj kev npe hu ua Ncaj, koj nrhiav Xauv tus nyob Tas Xes As hauv Yus Das tsev” Nws tseem teev ntuj…13 As Nas Nias teb : “Huab Tais, kuv paub ntau txog tus neeg no, nws ua phem heev rau koj cov ntshiab…nws tau cai ntawm cov thawj leej choj kom khi tas nrho cov neeg tuav koj lub npe.” 15 Huab Tais hais rau nws : “Mus, nws yog rab cuab yeej xaiv tau rau kuv ris kuv lub npe rau pej kum teb chaws thiab tej vaj ntxwv thiab His Xais Lais cov tub ki HL 9,10.11.13.15” Lub caij ntawd, Tswv Ntuj txawm xaiv tau Xauv ua Tswv Ntuj rab cuab yeej ris Tswv Ntuj npe los Xauv tseem nyob hauv txoj kev nkhaus thiab ua rau luag tej ob cag txhawj thiab ntshai ntsib Xauv. Tswv Ntuj thiaj li ua yog toog tshoj As Nas Nias, neeg teev ntuj neeg pom kev tuaj pab qhib Xauv qhov muag kom pom kev coj nws los taug txoj kev ncaj thiab As Nas Nias los kom txhob xyeej txhob ntshai ntsib Xauv. Txhua tus neeg ntseeg nquag teev ntuj, nrhiav kev fim Tswv Ntuj thiaj hnov tau Tswv Ntuj lub suab ntxhi li As Nas Nias. Tswv Ntuj kuj ntxhi rau peb txhua tus neeg ntseeg kom pab leg Tswv Ntuj ib qho dej num hauv Koom Txoos los pab peb lub cuab lub yig, tej zej zog thiab lub ntiaj teb neeg kom pom kev thiab los taug txoj kev ncaj li Xauv.

Txij thaum Xauv pom kev los taug txoj kev ncaj ua rau Xauv plhis dua tshiab tsis yog tus qub neeg thiab hu ua Paj Lug. Peb yuav tsum paub tias thaum Yes Xus lub Koom Txoos pib sawv thiab huam vam, cov los ntseeg Yes Xus yog cov Yus Das thim Mos Xes txoj cai ib yam li Pob Zeb, Yas Kos Npos, Zam thiab cov thwj tim. Paj Lug sawv los tshaj xo xa Yes Xus lub Moo Zoo, Paj Lug xub mus cuag nws cov kwv tij Yus Das, mus piav txog Yes Xus rau lawv. Tiam sis, Paj Lug cov kwv tij Yus Das sawv tiv nws thiab liam nws yuam kev thim Mos Xes txoj cai thiab thuam Tswv Ntuj : “46 Paj Lug thiab Npas Nas Npas nkawd tab meeg hais : “Nej yog cov thawj phim xub qhuab qhia Tswv Ntuj lo lus, tab sis nej xyeej nkaus nej tsis tsim nyog txoj sia nyob ib txhis, cia peb mam tig mus cuag cov pej kum neeg HL 13,46 ” Vim cov Yus Das tawv qhawv tsis lees Yes Xus lub Moo Zoo ntiab Paj Lug thiab Npas Nas Npas nkawd khiav. Paj Lug thiab Npas Nas Npas nkawd yog Yes Xus ob tug tub tshaj xo kub siab lug rau Yes Xus lub Moo Zoo, xav kom cov kwv tij Yus Das cia li los teev hawm Yes Xus. Vim Yes Xus yog tus cawm seej cov saub cav ntsuag qees tiam dhau tiam thiab yog tus Mos Xes teev tseg hauv nws txoj cai rau cov Yus Das. Tiam sis, cov Yus Das kaw nkawd kev. Lawv kev ntxub, kev ntiab thiab kev hiam tsis ua rau nkawd tws kev hos yim qhib thiab yim nthuav kev loj rau nkawd xa Yes Xus lub Moo Zoo : “50 Cov Yus Das haub cov poj nom nquag teev hawm thiab cov ua hau nyob hauv nroog sawv hiam Paj Lug thiab Npas Nas Npas ntiab nkawd tawm sab nraum lawv nrim teb. HL 13,50” Peb kev thov Tswv Ntuj tshoj kom muaj tus los xa Yes Xus lub Moo Zoo kuj yog thov Tswv Ntuj tshoj peb tus kheej kom ciaj Yes Xus ib co tub ntxhais txib. Txoj kev ua Yes Xus tub ntxhais txib, tsis yog ib txoj kev tseg cia rau tus niam nkauj xwb los tus txiv plig xwb, hos yog rau tag tsoom neeg ntseeg txhua leej kom sawv daws ciaj tau Tswv Ntuj rab cuab yeej ib yam li Paj Lug.

Ib tsoom phooj ywg, yog nyob hauv peb lub cuab lub yig peb nquag teev ntuj thiab nquag fim Tswv Ntuj, ces peb tej siab ntsws yuav hnov Tswv Ntuj lo lus hlub li Paj Lug thiab lo lus ntxhi li As Nas Nias hnov Tswv Ntuj lo lus ntxhi. Peb kev thov Tswv Ntuj txawm tsis pom muaj tshwm li peb xav los peb tsis nco txhawj tsis nco ntshai, vim Yes Xus yog peb tus tswv, peb yog nws cov yaj, peb paub nws lub suab ; txawm peb lub cev qaij qaug los txog, peb yuav tsis mus ciaj dab, vim peb yuav tsis txawj ploj, rau qhov Yes Xus twb sawv ciaj sia, peb yuav txais Yes Xus kev ciaj sia nyob ib txhis. Thov kom peb tus Huab Tais Yes Xus tshoj ib tsoom tub ntxhais zoo siab hlo muab lawv lub neej los ua Huab Tais Yes Xus cov tub ntxhais txib xa nws lub Moo Zoo hauv ntiaj teb no.

19.04.2013 Cwj Vuam Chiv

COV ZAJ NYEEM-Xyoo C 2012-13 - Page 2 48639587parousie-over-blog-fr-poisson-croix-coeur-gif

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 26th April 2013, 9:51 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°27

Re: COV ZAJ NYEEM-Xyoo C 2012-13

Post NrhiavTswvNtuj 26th April 2013, 9:51 am

COV ZAJ NYEEM HNUB TIM 28/04/2013
( Hnub chiv 5 lub Caij Hla, Xyoo C )

Zaj nyeem Ib: Hauj Lwm 14, 21b-27
21 Thaum Paj Lug thiab Npas Nas Npes nkawd tshaj
Ntuj lus tas nyob hauv lub tsheej Des
Npes, thiab nkawd qhia tau ib pab thwj
tim coob lawm, mas nkawd rov mus Lis
Ros, rau Is Kos Nias thiab rau As Nthias
Kias. 22 Nkawd pab kom cov thwj tim
ua siab ruaj tawv qhawv nyob hauv txoj
kev ntseeg. Nkawd qhia tias :
"Peb yuav tsum raug ntau yam kev txom
nyem, peb thiaj yuav tau mus hauv Tswv
Ntuj lub Ceeb Tsheej."
23 Nkawd tsa ib co txwj laus nyob hauv
txhua lub koom txoos. Thaum nkawd
nrog sawv daws hais cov zaj teev ntuj
thiab yoo mov tas, mas nkawd muab lawv
cob rau tus Huab Tais uas lawv ntseeg
txog. 24 Ces nkawd hla Pis Xis Dias teb
mus txog Pas Fis Lias teb. 25 Thaum
nkawd tshaj ntuj lus nyob Pes Zes tas
lawm, mas nkawd thiaj li mus nram As
Tas Lias. 26 Nkawd caij nkoj nyob As
Tas Lias mus rau As Nthias Kias uas yog
lub tsheej nkawd sawv kev mus tshaj Ntuj
lus. Tswv Ntuj lub txiaj ntsim tau pab
nkawd ua hauj lwm tiav lawm.
27 Thaum nkawd los txog As Nthias
Kias, mas nkawd hu lub Koom Txoos tas
huv si kom tuaj, nkawd piav txog tej yam
Tswv Ntuj tau pab nkawd ua rau sawv
daws mloog : nkawd piav tias Tswv Ntuj
tau qhib cov neeg teev dab lub siab kom lawv ntseeg.

Zaj nyeem Ob: Qhib yav tom ntej: 21, 1-5a

1 Ces kuv pom ib lub ntuj tshiab
thiab ib lub ntiaj teb tshiab. Vim
tias thawj lub ntuj thiab thawj lub ntiaj teb
ploj tas lawm. Hiav txwv kuj tsis nyobamntxiv lawm.
2 Ces kuv pom lub nroog Ntshiab, uas
yog Yes Lus Xas Les tshiab nqes saum
ntuj, pem Tswv Ntuj los. Nws ua zam
sees xws li tus nkauj nyab ntim zam tos nraug vauv.
3 Kuv hnov ib lub suab tuaj ntawm lub
theej kiab tuaj tias :
“Saib ! Tswv Ntuj lub tsev los nrog neeg
nyob : Tswv Ntuj yuav nrog lawv nyob !
Lawv yuav yog nws haiv neeg. Tswv
Ntuj yuav nrog lawv nyob.
4 Nws yuav so txhua lub kua muag ntws
ntawm lawv qhov muag. Yuav tsis muaj
kev tuag ntxiv. Yuav tsis muaj kev quaj
kev nyiav, kev ntsaj, kev mob ntxiv.
Vim tas txhua yam muaj sia uas tau xub
tshwm sim los, puav leej ploj tas huv tib si lawm.”
5 Ces tus zaum saum lub theej kiab hais tias :
“Nej saib ! Kuv tsim dua txhua tsav txhua yam tshiab.”

Zam Ntawv Moo Zoo: 13, 31-33a, 34-35
31 Thaum Yus Das tawm mus lawm, Yes Xus hais tias :
"Nyem no Neeg Leej Tub twb txais koob
meej lawm, thiab Tswv Ntuj kuj muaj
koob meej nyob hauv nws. 32 Yog
Tswv Ntuj muaj koob meej nyob hauv
Neeg Leej Tub, mas Tswv Ntuj kuj yuav
ua kom Neeg Leej Tub muaj koob meej
nyob hauv nws thiab. Tshuav tsis ntev,
Tswv Ntuj yuav muab koob meej rau
Neeg Leeg Tub. 33 Cov me nyuam me,
kuv yuav nrog nej nyob me ntsis ntxiv
xwb. Nej yuav nrhiav kuv.
34 "Kuv muab ib lo lus qhia tshiab rau
nej : yam li nej yuav sib nyiam sib hlub.
Nej yuav rov sib nyiam sib hlub ib yam li
kuv tau nyiam nej. 35 Qhov yuav ua
kom sawv daws paub tias nej yog kuv cov
thwj tim, yog qhov no : nej sib nyiam sib hlub."

NTHUAV NTAWV NTSHIAB

Rau hnub chiv tim 28 lub 4 hlis 2013

Ib tsoom niam txiv kwv tij neej tsa,

Peb nyob hauv lis piam 5 lub caij nyoog Hla. Peb yuav nthuav ob peb los txog Huab Tais Yes Xus lo lus qhia tshiab, raws li cov zaj nyeem hnub no.

Thaum peb tsis tau los ntseeg Tswv Ntuj, peb tsis paub npaum li cas Tswv Ntuj hlub peb neeg ntiaj teb. Txij li peb los ntseeg Tswv Ntuj, peb txoj kev teev hawm Tswv Ntuj qhib ib lub siab tshiab cog rau hauv peb thiab nthuav ib lub tswv yim loj thiab dav tuaj rau peb. Lub siab tshiab thiab kev muaj tswv yim no, peb tau txais hauv txoj kev teev hawm Tswv Ntuj. Peb thiaj hais tias txoj kev teev hawm Tswv Ntuj loj thiab tseem ceeb heev, qhia tau Tswv Ntuj kev hlub neeg rau peb taug, kom peb ciaj Tswv Ntuj tub ntxhais txib saum yaj ceeb no thiab saum qaum ntuj hnub ntiaj teb kawg. Tswv Ntuj kev hlub neeg ntiaj teb, tsis yog hlub tus neeg teev Tswv Ntuj xwb. Tswv Ntuj hlub tag nrho tus neeg teev dab qhuas, tus phem tus zoo, tus muaj tus pluag, tus mob nkeeg los tus zoo neej hauv tas txhua haiv neeg, txhua xeem neeg thiab txhua leej tib neeg. Huab Tais Tswv Ntuj kev hlub neeg loj thiab zoo npaum li ntawd. Peb twb los ua neeg teev hawm Tswv Ntuj, phim peb yuav nrauj peb lub qub siab nqaim siab ti kom tu taw pov tseg, coj dua lub siab tshiab, lub siab ntseeg Yes Xus kom peb muaj hwj chim hlub neeg loj thiab zoo cuag li Yes Xus peb tus Huab Tais : “34 Kuv muab ib lo lus qhia tshiab rau nej : kom nej ib co hlub ib co tam li kuv hlub nej kom xwv nej ib co hlub ib co. 35 Li ntawd, tas sawv daws paub tias nej yog kuv thwj tim, yog nej ib leeg hlub ib leeg Z 13,34-35.” Yes Xus yug los ua neeg, Yes Xus tsis tuaj ua ywj li Yes Xus siab nyiam hauv ntiaj teb no. Yes Xus yug los ua neeg vim kev mloog Leej Txiv Tswv Ntuj lus, tuaj nqus kom tau peb tib neeg mus saum qaum ntuj li Leej Txiv siab nyiam. Yes Xus thiaj li tuaj xa nws lub Moo Zoo khuv leej neeg, qhia rau nws pab thwj tim thiab tsoom pej xeem neeg tuaj mloog nws. Tej yam hwj huam yees ntxwv Yes Xus tau ua yog sawv Leej Txiv npe ua kom hlub tau cov raug txom nyem thiab quaj ntsuag. Yes Xus tsis ua tus muab hlob txeeb Leej Txiv npe ua hwj huam kom ntiaj teb neeg qhuas Yes Xus, hos nrog Leej Txiv, sawv Leej Txiv npe ua hwj huam kom ntiaj teb neeg teev thiab pe hawm Leej Txiv Tswv Ntuj. Yes Xus kev hlub ntiaj teb neeg yog hlub thiab teev nws Leej Txiv. Vim li ntawd, Leej Tub Yes Xus kev hlub ntiaj teb neeg ua ntxim Leej Txiv siab tag nrho. Leej Tub kev hlub ntiaj teb neeg tam ntua Leej Txiv kev hlub ntiaj teb neeg. Peb pom tau hauv ob lub cim no, qhia rau peb nkag siab txog Yes Xus kev hlub Leej Txiv thiab hlub peb ntiaj teb neeg :

-Thawj lub cim : Leej Tub Yes Xus kev hlub Leej Txiv Tswv Ntuj yog nrog Leej Txiv cawm ntiaj teb neeg li Leej Txiv siab nyiam. Vim Leej Tub mloog Leej Txiv lus mus txog qhov kawg, Leej Txiv pub nws Leej Tub muaj Leej Txiv hwj chim : “31 Thaum Yus Das tawm lawm, Yes Xus hais tias : “Ziag no neeg Leej Tub muaj hwj chim lug thiab Tswv Ntuj muaj hwj chim lug hauv nws, 32 Thiab Tswv Ntuj yuav ua nws muaj hwj chim hauv Tswv Ntuj, tam sis no kiag nws yuav ua nws Leej Tub muaj hwj chim. Z 13,31-32” Tswv Ntuj lub hwj chim tsis zoo li ntiaj teb neeg lub hwj chim saib tsis taus cov pluag. Cov tib neeg tsa hwj chim loj, tsis lam nrog cov neeg npluag neeg txom nyem koom tsum. Hos Tswv Ntuj lub hwj chim txhiv dawb paug peb tej neeg txhaum no, hlub peb tib neeg cov tsis ntxim hlub. Leej Tub tus nyob siab nqes nroos tuaj nrog peb tib neeg ris kev iab kev daw, qaij nrog peb qaij thiab qaug nrog peb qaug ua pawg thuv peb neeg txhaum kom peb muaj ntsej muag luag ntxhi nrog Leej Tub muaj Leej Txiv hwj chim. Vim li ntawd, cov thwj tim mloog Yes Xus lus, nrog Yes Xus muaj Leej Txiv hwj chim.

-Lub cim tim ob : Leej Tub Yes Xus hlub neeg ntiaj teb li Leej Txiv Tswv Ntuj hlub. Hauv Leej Txiv Tswv Ntuj kev hlub neeg, Leej Txiv hlub tus hwm Tswv Ntuj thiab tus rov taw tuam Tswv Ntuj, tus zoo los tus phem huv si. Hauv Yes Xus kev hlub ntiaj teb neeg kuj tib yam nkaus. Yes Xus pab thwj tim muaj tus mloog lus li Zam, tus tais caus ntxeev siab li Pob Zeb, tus siab dub lim hiam li Yus Das, tsis kav Yes Xus hlub tag nrho, ua lub kaus roos lawv sawv daws : “3 Kuv hnov ib lub suab tawm ntawm theej kiab tuaj tias : “Nov yog Tswv Ntuj lub tsev tsam phooj nrog leej tib neeg tsa nrog lawv ua ke, lawv yuav yog nws tsoom pej xeem thiab Tswv Ntuj yuav nrog nraim lawv,4 Nws yuav so tag lawv cov kua muag, yuav tsis txawj tuag ntxiv, tsis puas ntsoog, tsis quaj, tsis ncia, tej ntawd yuav dua ntais tas TP 21,3-4” Peb twb pom zem zuag ntawm qhov muag lub hwj chim Huab Tais Yes Xus yuav pub rau peb saum qaum ntuj. Yog ib lub neej tshiab tsis txawj ploj, tsis txawj tuag, dim plaws kev los kua muag. Twb yog lub cim Huab Tais Yes Xus sawv hauv tsoom tub tuag ciaj Tswv Ntuj sia, hnub kawg peb kuj yuav ciaj Tswv Ntuj sia ib yam li Yes Xus.

Ib tsoom phooj ywg, yog peb tsis ntseeg thiab tsis teev Tswv Ntuj li Yes Xus qhia, peb yuav tsis muaj Leej Txiv Tswv Ntuj hwj chim. Peb twb los teev hawm Tswv Ntuj li Yes Xus qhia, peb yuav ib leeg hlub ib leeg hauv peb lub cuab lub yig thiab hlub tag lub ntiaj teb neeg li Leej Txiv siab nyiam peb thiaj li yog Yes Xus thwj tim nyob ntiaj teb no.

25.04.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 3rd May 2013, 7:06 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°28

Re: COV ZAJ NYEEM-Xyoo C 2012-13

Post NrhiavTswvNtuj 3rd May 2013, 7:06 pm

COV ZAJ NYEEM HNUB TIM 05/05/2013
( Hnub chiv 6 lub Caij Hla, Xyoo C )

Zaj nyeem 1 : Hauj Lwm 15, 1-2.22-29
1 Thaum ntawd, muaj ib co neeg
tuaj Yus Das teb tuaj, lawv qhia cov kwv tij tias :
"Yog nej tsis ua lub cim txiav raws li txoj
cai tuaj ntawm Mais Xes tuaj, mas nej
yuav txais kev cawm tsis tau."
2 Paj Lug thiab Npas Nas Npes nkawd
nrog lawv sib cav muaj ceem hauj sim
txog qhov ntawd, lawv hais tsis sib haum,
ces sawv daws thiaj txiav tias yuav tso Paj
Lug thiab Npas Nas Npes thiab lawv ob
peb leeg mus pem Yes Lus Xas Les, mus
cuag cov Hauv Paus Xa Lus thiab cov
txwj laus, nrog lawv sab laj txog cov lus ntawd.

22 Ces cov Hauv Paus Xa Lus thiab cov
txwj laus nrog lub Koom Txoos hais sib
haum. Lawv txiav tias yuav xaiv lawv ob
peb leeg thiab xa lawv nrog Paj Lug thiab
Npas Nas Npes nkawd mus As Nthias
Kias. Lawv xaiv Yus Das uas hu ua Npas
Xas Npas thiab Xis Las nkawd. Nkawd
yog ob tug nto moo zoo nyob hauv cov
kwv tij. 23 Cov Hauv Paus Xa Lus muab
tsab ntawv no rau lawv nqa mus :
"Cov Hauv Paus Xa Lus thiab cov txwj
laus, uas yog nej cov kwv tij, xa lus foom
kev kaj lug tuaj rau cov kwv tij uas yog
pej kum neeg txais kev ntseeg, nyob As
Nthias Kias, nyob Xis Lias teb, thiab
nyob Xis Lis Xias teb. 24 Peb tau hnov
tias muaj ib co neeg tuaj ntawm peb teb
chaws tuaj. Lawv tuaj hais ib co lus ua
kom nej ntxhov siab thiab ua kom nej lub
tswv yim tws kev. Tab sis, tsis yog peb
xa lawv tuaj. 25 Peb thiaj ua ke txiav
tias cia peb xaiv ob tug sawv peb chaw
nrog ob tug kwv tij Npas Nas Npes thiab
Paj Lug nkawd, tuaj cuag nej. 26 Paj
Lug thiab Npas Nas Npes nkawd yog ob
tug neeg zoo siab siv nkawd txoj sia los
tsob hwb peb tus Huab Tais Yes Xus
Pleev lub Npe. 27 Ua li mas peb tso Yus
Das thiab Xis Las nkawd tuaj, kom
nkawd hais cov lus uas peb xa tuaj rau
nej. 28 Leej Ntuj Plig Ntshiab thiab peb,
tau txiav tias yuav tsis yuam tej lub nra
ceeb laj ris rau nej. Nej tsuas yuav coj ob peb yam no xwb :
29 Nej yuav caiv cov nqaij txi dab, caiv
ntshav, caiv cov nqaij pos tuag, caiv
kev ua dev ua npua. Tej no mas nej
yuav caiv, thiaj li zoo. Nej nyob kaj lug."

Zaj nyeem 2 : Qhib yav tom ntej 21,10-14.22-23
10 Kuv pom ib tug Tshiab, ces nws nqa hlo kuv lub tswv yim
mus saum ib lub roob loj roob siab, nws
muab lub tsheej Ntshiab Yes Lus Xas Les
uas nqes saum ntuj, pem Tswv Ntuj los
rau kuv saib. Lub tsheej muaj Tswv Ntuj
lub hwj chim. 11 Lub tsheej ci ntsa iab
xws li ib lub pob zeb muaj nqi kawg, xws
li ib lub pob zeb dawb ci nra paug.
12 Muaj ib lub ntsa zeb loj thiab siab xov
lub tsheej. Lub ntsa zeb muaj kaum ob
lub qhov rooj, muaj kaum ob tug Tshiab
zov qhov rooj. Muaj ib co npe sau rau
ntawm qhov rooj : yog cov tub hauv
kaum ob lub xeem His Xas Lais cov npe.
13 Sab Toob Fab muaj peb lub qhov rooj,
Pej Fab muaj peb lub qhov rooj, Naj Fab
muaj peb lub qhov rooj, Xib Fab muaj peb lub qhov rooj.
14 Lub ntsa zeb xov lub tsheej txawb rau
saum kaum ob txheej taw ntsa. Muaj
kaum ob lub npe sau rau saum cov taw
ntsa. Yog Leej Yaj kaum ob leeg Hauv
Paus Xa Lus cov npe.

22 Kuv tsis pom muaj tsev teev Ntuj
hauv lub tsheej li, vim tus Huab Tais
Tswv Ntuj Muaj Hwj Huam tas nrho,
thiab Leej Yaj nkawd yog lub tsheej qhov
chaw teev hawm.
23 Lub tsheej tsis tas yuav tos lub hnub
thiab lub hli qhov pom kev, vim Tswv
Ntuj lub hwj chim ci kaj lub tsheej, thiab
Leej Yaj yog lub teeb pom kev rau lub tsheej.

Zam Ntawv Moo Zoo 14,23-29

23 Yes Xus teb rau Yus Das tias :
"Yog leej twg nyiam kuv, nws yuav coj
rawv kuv lo lus, ces kuv Txiv yuav nyiam
nws. Kuv Txiv wb yuav los nyob ze nws,
wb yuav ua tsev nyob hauv nws.
24 Tus tsis nyiam kuv, nws tsis khaws kuv cov
lus. Lo lus uas nej hnov, tsis yog kuv lo
lus, yog Leej Txiv uas xa kuv tuaj lo lus.
25 Thaum kuv tseem nyob ze nej, kuv
hais tej no rau nej. 26 Tab sis Leej Nplij
Neeg, uas yog Leej Ntuj Plig Ntshiab,
mas Leej Txiv yuav xa nws tuaj vim kuv
lub npe, nws yuav qhia tas ib puas tsav
yam rau nej, thiab nws yuav pab nej rov
nco txog tas txhua yam uas kuv tau hais rau nej.

27 Kuv tso txoj kev thaj yeeb rau nej,
yog kuv txoj kev thaj yeeb, kuv muab pub
rau nej. Kuv tsis pub txoj kev thaj yeeb
xws li lub qab ntuj neeg pub. Nej tsis
txhob ntxhov siab, tsis txhob ntshai.
28 Nej tau hnov kuv hais rau nej tias :
Kuv mus, tab sis kuv yuav rov los cuag
nej. Yog nej nyiam kuv, nej yuav zoo
siab cia kuv mus cuag Leej Txiv, vim
Leej Txiv loj dua kuv. 29 Kuv xub hais
tej ntawd rau nej nyem no, cheem tseem
tsis tau tshwm sim tuaj, mas thaum tej
ntawd tshwm sim tuaj, nej thiaj yuav ntseeg.

NTHUAV NTAWV NTSHIAB.

Rau hnub chiv tim 5 lub 5 hlis 2013

Ib zeej tsoom neeg ntseeg thiab phooj ywg,

Peb nyob hauv lis piam hnub chiv rau hauv lub caij nyoog Hla. Peb hnov Huab Tais Yes Xus hais txog nws pub nws kev thaj yeeb rau peb hauv tsab ntawv Moo Zoo hnub no. Peb yuav xub hais txog peb tej kev iab kev daw, kev txob kev txhawj, peb mam los nthuav ob peb los txog Huab Tais Yes Xus kev thaj yeeb muaj txiaj ntsim loj npaum li cas rau peb.

Yug los ua neeg, leej twg los twb puav leej raug kev iab kev daw, kev txob kev txhawj hauv ntiaj teb no. Vim peb muaj nqaij muaj txha, peb lub cev txawj tshaib txawj nqhis, yuav noj yuav hnav peb thiaj li yuav ciaj taus neeg. Peb tsis yog ntshaw qhov noj qhov haus xwb, peb tseem xav kom muaj tus hlub tus nyiam tus plhws yus. Peb tseem muaj siab muaj ntsws txawj dhuav yam phem yam qias, txawj ntxub, txawj lim hiam, txawj txob txawj ntshai kev txom nyem, kev ploj kev tuag…Vim li ntawd, yog peb lub cev noj qab pw sov, ua rau peb nyob kaj lug kaj nrig, nyob tus yees thaj yeeb qas ntxiag. Yog peb lub cev muaj mob dia hau ces ua rau peb txhawj xeeb, siab ntsws ua voj ua viag tsaus ntuj nti tsis thaj yeeb : “27 Kuv tso kev thaj yeeb rau nej, kuv kev thaj yeeb muab pub rau nej ; nws tsis zoo li lub sim ceeb pub, kuv li, kuv pub rau nej. Nej siab ntsws tsis txhob txhawj tsis txhob ntshai. Z 14,27” Tib neeg kev thaj yeeb txawv deb pauv tsis tau Huab Tais Yes Xus kev thaj yeeb.

Peb los ua neeg ntseeg thiab teev hawm Tswv Ntuj tsis yog ua si, tsis lam los dawb los dag. Peb los ntseeg thiab teev hawm Tswv Ntuj tau txiaj ntsim tau koob tau hmoov. Leej twg lub cev lam los ntseeg, lub siab tsis npuab Tswv Ntuj, lub ncauj lam teev siab ntsws tsis pe hawm Tswv Ntuj, yeej tsis tau Huab Tais Yes Xus kev thaj yeeb : “7 Yes Xus hais rau cov thwj tim tias : “Peb rov mus Yus Dais teb.” 8 Cov thwj tim hais rau nws : “Las Npis, niaj hnub no cov Yus Das tseem nrhiav kev cuam zeb rau koj, koj tseem yuav rov mus ntxiv tod ? Z 11,7-8” Cov thwj tim twb pom ntsoov tshuav me me lawv puav Yes Xus tua, ua rau lawv ntshai tag, lawv tsis tau luag rov mus tshwm ntsej muag ntxiv. Cov thwj tim txawm pom Yes Xus muaj hwj huam loj kho tau neeg mob ruas, tsa tau neeg tuag sawv, los cov thwj tim yeej tseem tsis tau muaj Yes Xus kev thaj yeeb hauv lawv nruab siab. Lawv tseem zoo li tib neeg sawv daws tsuas paub tib neeg kev thaj yeeb, tsis tau paub Yes Xus kev thaj yeeb. Peb tib neeg kev thaj yeeb tsuas zoo rau qhov peb txhob ntsib teeb meem xwb. Hnub twg peb ntsib dheev tej yam teeb meem ces kev txob kev txhawj tawm plaws tuaj laum peb kev thaj yeeb ploj ntais yaj ntshis tag : “Yes Xus tuaj, sawv hauv nruab nrab, nws hais rau lawv : “Nyob thaj yeeb nej sawv daws” 20 Hais li tas, nws thws zoj tes thiab phab tav rau lawv. Cov thwj tim tau pom Huab Tais ua lawv zoo siab tas nrho. 21 Nws rov hais ntxiv rau lawv : “Nyob thaj yeeb nej sawv daws ; xws li Leej Txiv xa kuv tuaj, kuv thiab kuv xa nej mus. Z 20,19-20” Cov thwj tim tau txais Huab Tais Yes Xus kev thaj yeeb tas, lawv tawm plaws lawv qhov chaw nkaum mus tshaj Yes Xus lub Moo Zoo rau cov txwj laus thiab cov Yus Das paub. Lawv tab meeg taug kev, tsis ntshai mus hauv tej tsev txoos mus piav txog Yes Xus rau lawv cov kwv tij Yus Das : “19 Pob Zeb thiab Zam nkawd teb rau lawv hais tias : “Saib puas ncaj rau Tswv Ntuj tseev kom peb mloog nej lus dua mloog Tswv Ntuj, nej mam txiav nej, 20 Hos rau peb kom txhob hais yam peb tau pom thiab tau hnov yuav tsis tau. HL 4,19-20” Peb pom tias Yes Xus kev thaj yeeb muaj hwj huam hloov tau tus neeg ntseeg thiab tso siab rau Yes Xus muaj lub peev xwm ua tau tej yam peb tib neeg ua tsis tau : hloov peb lub siab me kom loj tuaj, kho tau peb kev txhawj xeeb los nyob thaj yeeb, txhab peb lub suab ncauj suab lus thawb tau peb cov yeeb ncuab thaub qab qaij thiab qaug li cua ntsawj qoob loo qaug : “Hnub twg kuv hu koj, kuv cov yeeb ncuab thaub qab zom zaws tag. NPN 53,10” Peb pom Yes Xus kev thaj yeeb loj thiab muaj zog tshaj huab tshaj cua, tos pom, twb ua rau cov neeg tuaj ntes Yes Xus thaub qab ntog zom zaws pem teb : “4 Yes Xus…hais rau lawv : “Nej nrhiav leej twg ?” 5 Lawv teb rau nws : “Yes Xus Nas Xos Lais.” Nws hais rau lawv : “Kuv yog tus kuv yog.”…6 Thaum nws hais rau lawv : “Kuv yog tus kuv yog” Lawv thaub qab vau hlo tas pem teb. Z 18,4-6” Peb ntseeg tias leej twg tau Yes Xus kev thaj yeeb, tus ntawd muaj Yes Xus koob hmoov. Muaj tseeb tiag raws li leej ntshiab Jeanne d’Arc lub neej. Jeanne d’Arc yog ib tug me ntxhais yug nyob Domrémy Faib Kis qaum teb sab hnub tuaj xyoo 1412. Thaum nws hnub nyoog 13 xyoos, nws pib hnov tej suab sab saum qaum ntuj tuaj txhib nws. Thaum nws muaj 16 xyoo, lub suab tau kom nws mus pab Charles 7 sawv ua vaj ntxwv kav Fab Kis teb ntiab cov neeg As Kiv tawm Fab Kis teb chaws. Thaum tiam 15 ntawd, haiv neeg As Kiv tuaj kav Fab Kis teb. Lub suab tau txhib kom Jeanne sawv kev mus cuag vaj ntxwv. Thaum Jeanne d’Arc nrog ib pab tub rog mus ntsib vaj ntxwv, vaj ntxwv twb muaj cov tub rog npaj tos kev ntes Jeanne d’Arc thiab pab tub rog ua nws luag no : “Thaum lawv xav zoj sawv tsees mus txhom, lawv zog cia li ntaug luas tas, zoo li nyias nplaum ntawm nyias lub chaw nti tsis taus lawm, Jeanne d’Arc thiab nws pab neeg tuaj dhau plaws tsis nco txhawj. Mais, au moment où ils pensaient la prendre, ils n’avaient pu se mouvoir de place, et tandis qu’ils demeuraient comme cloués, Jeanne s’éloigna avec ses compagnons sans empêchement. 11éme séance déposition de frère Séguin, frère prêcheur, Procès de Jeanne d’Arc Trad. R. P. Dom H. LECLERCQ 1906 Abbaye Saint Benoît.” Jeanne d’Arc muaj Yes Xus kev thaj yeeb nrog nraim nws, txawm nws yog ib tug nkauj xwb nruab nrab ib pab tub rog los lawv tsis muaj cuab kav siab phem tau rau nws ; txawm vaj ntxwv cov tub rog npaj tos kev sawv mus ntes, mus txhom los lawv zog ntaug tas nti tsis taus ntawm lawv lub chaw.

Ib tsoom phooj ywg, yog Yes Xus kev thaj yeeb tsis nrog cov thwj tim nyob, lawv yuav tsis muaj lub siab loj mus tshaj tau Huab Tais Yes Xus lub Moo Zoo thoob plaub ceg kaum ntuj ; yog Yes Xus kev thaj yeeb tsis txhawb Jeanne d’Arc ces Jeanne d’Arc yuav lawv tsis tau cov tub rog As Kiv tawm Fab Kis teb. Peb thiab, peb twb los ntseeg thiab los teev Yes Xus, peb yuav kub siab thov peb tus Huab Tais Yes Xus tso nws kev thaj yeeb tuaj rau peb lawv peb tej kev txhawj xeeb, tej lus chawj lus chim, tej lus xaiv lus ncua pov tseg.

02.05.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 8th May 2013, 9:15 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°29

Re: COV ZAJ NYEEM-Xyoo C 2012-13

Post NrhiavTswvNtuj 8th May 2013, 9:15 am

Cov zaj nyeem hnub tim 9 lub 5 hlis 2013
(Hnub 5, Huab Tais nce pem ntuj - xyoo C)

Zaj nyeem 1 : Hauj Lwm 1, 1-11

1 Tes Os Fis Los, nyob hauv kuv
thawj phau ntawv, kuv twb sau txog
tas ib puas tsav yam uas Yes Xus tau ua
thiab tau qhia txij lub hauv paus los, 2
mus txog hnub uas Ntuj nqa nws mus
saum ntuj. Thaum nws yuav mus, Leej
Ntuj Plig Ntshiab tshoj kom nws xub qhia
cov Hauv Paus Xa Lus uas nws tau xaiv.
3 Thaum nws raug luag tsim txom tas,
nws yees tawm los xyuas cov Hauv Paus
Xa Lus. Nws ua ntau yam zeem tseeb tias
nws muaj txoj sia, nws tawm los rau lawv
pom plaub caug hnub, nws tham txog
Tswv Ntuj lub Ceeb Tsheej rau lawv.

4 Thaum Yes Xus nrog lawv nyob, nws
hais rau lawv kom tsis txhob tawm hauv
Yes Lus Xas Les mus, kom lawv nyob tos
Leej Txiv lo lus cog tseg :
"Lo lus uas nej hnov kuv hais tias :
5 Zam ua kab ke ntxuav nyob hauv dej.
Hos nej, mas tshuav hnub puav xwb, nej
yuav txais kab ke ntxuav nyob hauv Leej Ntuj Plig Ntshiab."
6 Thaum cov Hauv Paus Xa Lus nyob ua
ke, lawv nug Yes Xus tias :
"Huab Tais, nyem no puas yog lub sij
hawm koj yuav rov tsa tus vaj His Xas Lais ?"
7 Yes Xus hais rau lawv tias :
"Tsis yog nej hauj lwm yuav paub txog
lub zim txwv thiab lub sij hawm uas Leej
Txiv siv nws lub hwj huam los teem cia.
8 Tab sis, Leej Ntuj Plig Ntshiab yuav
nqes los saum nej, ces nej yuav txais hwj
huam, nej yuav ua kuv cov tim khawv
nyob Yes Lus Xas Les, nyob thoob lub
xeev Yus Das, thiab Xas Mas Lias, mus
txog puag tim npoo ntiaj teb."

9 Yes Xus hais cov lus no tas, nws nce
zuj zus ntawm lawv qhov muag. Muaj ib
tw huab los thaiv ces lawv tsis pom nws
lawm. 10 Thaum Yes Xus nce mus saum
ub lawm, mas lawv nyob ntsia ntsoov lub
ntuj, ces muaj ob tug neeg hnav tsoos
dawb los cuag lawv. 11 Nkawd hais tias :
"Cov Nkas Lis Lais, vim li cas nej nyob
ntsia ntsoov lub ntuj zoo li no ? Tus Yes
Xus uas Ntuj nqa nws hauv nej mus rau
saum ntuj lawd, nws yuav rov los zoo
nkaus li nej pom nws nce mus saum ntuj thiab."

Zaj nyeem 2 : Hes Nplaws 9, 24-28 ; 10, 19-23: Leej Pleev kev nce mus saum ntuj.

24 Leej Pleev chaws mus hauv ib lub
tsev Ntshiab uas tsis yog neeg txhais tes
txhim, thiab tsis yog ib lub tsev ua piv
txwv txog lub saum ntuj : Leej Pleev mus
saum ntuj lawm tiag. Leej Pleev thiaj
tawm los nyob ntawm Tswv Ntuj xub
ntiag, nws cev lus pab peb.
25 Tsis tas Leej Pleev yuav rov cev nws
rau Tswv Ntuj ob peb zaug, xws li tus
tuam leej choj uas niaj xyoo nws yuav
tsum rov mus cev ib co ntshav uas tsis
yog nws cov ntshav nyob hauv Kem Ntshiab.
26 Yog Leej Pleev tsuas ua leej choj xws
li lwm cov leej choj xwb, mas txij ntuj
tsim teb raug los nws yuav tsum raug
txom nyem ntau zaus. Tab sis thaum txog
lub zwj ceeb kawg, nws tawm los ib zaug
xwb, nws los ua nws thaj txi Ntuj rhuav
kev txhaum pov tseg.
27 Leej tib neeg tsuas tuag ib zaug xwb,
dhau qhov tuag lawm, yog lub caij txiav txim.
28 Leej Pleev rov muab nws txi Ntuj ib
zaug xwb, kom nws tau ris ib zeej tsoom
cov txhaum. Nws yuav tawm rov los
zaum ob : zaum ntawd, nws yuav tsis ris
kev txhaum, nws yuav tawm los rau cov
neeg tos nws, nws yuav cawm lawv.

19 Kwv tij, peb tso siab lug tias peb muaj
ib txog kev mus txog hauv lub tsev
Ntshiab, vim Yes Xus cov ntshav.
20 Yes Xus rhawv txoj kev tshiab, yog
txoj kev muaj txoj sia rau peb taug : nws
siv nws lub cev nqaij mus rhawv txoj kev
ntawd. 21 Ces peb muaj ib tug Leej Choj
loj tas nrho saib Tswv Ntuj lub tsev.
22 Ua li mas peb kav tsij nqa ib lub siab
ncaj thiab ib lub siab ntseeg ruaj txav mus
ze Tswv Ntuj, nqa ib lub siab huv tsis
tsuas kev phem, coj ib lub cev ntxuav
hauv dej ntshiab mus.
23 Peb kav tsij tso siab lug lees khov
kho, vim tus tau cog lus rau peb, nws pheej xeeb.

Lus Kas Ntawv Moo Zoo 24, 46-53

46 Nws hais rau lawv tias :
"Ntawv sau hais tias Leej Pleev yuav raug
luag tsim txom. Hnub peb, nws yuav
sawv hauv cov tuag rov los. 47 Thiab
Ntawv tseem hais tias yuav tsum tshaj
txoj kev tig los hloov siab ntxub kev
txhaum kom Ntuj zam txhaum rau ib
tsoom haiv neeg nyob hauv Leej Pleev
lub Npe. Yuav xub tshaj nyob Yes Lus
Xas Les. 48 Nej yuav ua tim khawv txog tej ntawd.
49 Kuv yuav xa qhov uas kuv Txiv cog
lus tuaj rau nej. Ua li mas nej nyob hauv
lub nroog no mus txog hnub nej tau txais
lub zog nqes saum txheej siab los hnav tso."

50 Yes Xus coj lawv mus txog Npes Tas
Nias, ces nws tsa tes foom hmoov zoo rau lawv.
51 Thaum nws tseem tab tom foom
hmoov zoo, mas nws txav ntawm lawv
mus. Ces Ntuj nqa nws mus saum ntuj.
52 Hos lawv, mas lawv txhos caug pe
Yes Xus. Lawv rov qab mus Yes Lus
Xas Les, lawv zoo siab tas nrho.
53 Lawv nyob hauv lub Tuam Tsev Teev
Ntuj tas mus li cav txog Tswv Ntuj.

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 10th May 2013, 7:08 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°30

Re: COV ZAJ NYEEM-Xyoo C 2012-13

Post NrhiavTswvNtuj 10th May 2013, 7:08 pm

COV ZAJ NYEEM HNUB TIM 12/05/2013
( Hnub chiv 7 lub Caij Hla, Xyoo C )

Zaj nyeem 1 : Hauj Lwm 7, 55-60 Lawv xuas pob zeb tua Tes Fas Nos.

55 Leej Ntuj Plig Ntshiab nyob puv hauv
Tes Fas Nos lub siab. Tes Fas Nos tsa
muag ntsia ntsoov rau saum ntuj. Nws
pom Tswv Ntuj lub hwj chim thiab pom
Yes Xus sawv nyob ntawm Tswv Ntuj
sab xis. 56 Ces nws hais tias :
"Kuv pom lub ntuj qhib lug, thiab pom
Neeg Leej Tub sawv ntsug ntawm Tswv Ntuj sab xis."
57 Thaum ntawd, cov Yus Das nthe nrov
nrov. Lawv pos pob ntseg. Sawv daws
ua ib tsaug khiav mus nthos nkaus Tes
Fas Nos. 58 Lawv thawb Tes Fas Nos
mus rau sab nroog nraud, ces lawv txawb
pob zeb tua nws. Cov tim khawv tso
lawv tej khaub ncaws rau ntawm ib tug
tub hluas ko taw. Tus hluas ntawd hu ua
Xauv. 59 Thaum lawv tab tom txawb
pob zeb tua Tes Fas Nos mas Tes Fas Nos
hu txog Ntuj. Nws hais tias :
"Huab Tais Yes Xus, thov koj txais kuv tus plig."
60 Ces nws txhos caug, nws hais ib lo nrov nrov tias :
"Huab Tais, koj txhob muab qhov txhaum ntawd rau lawv ris."
Tes Fas Nos hais li ntawd tas, ces nws txoj sia tu.

Zaj nyeem 2 : Tshwm Plaws (Qhib lub caij tom ntej) 22,12-14.16-17.20

2 Saib, kuv lub caij rov los, twb nyob ze
lawm. Kuv nqa tus nqe zog los pauj rau
nyias raws li nyias txoj hauj lwm.
13 Kuv yog As Fas thiab Os Mes Nkas,
tus Thawj thiab tus Kawg, yog lub hauv paus thiab lub ntsis.
14 Cov tau txoj hmoov zoo, yog cov uas
lawv ntxhua lawv tej tsho ntev kom tau
tsob ntoo pub txoj sia. Lawv yuav tau
chaws ntawm cov qhov rooj mus rau hauv lub tsheej.

16 “Kuv yog Yes Xus, kuv xa kuv tus
Tshiab tuaj ua pov thawj qhia tej no rau
cov Koom Txoos. Kuv yog tus Ntsuag
Ntoo hlav hauv Das Vis caj ces, yog lub
Hnub Qub Kaj Ntug ci ntsa iab.”
17 Leej Ntuj Plig Ntshiab thiab tus Nkauj Nyab hu tias :
“Koj los mog !"
Kom tus twg hnov, nws kuj hu tias :
‘Koj los mog !’
Tus twg nqhis, kom nws kav tsij txav los
mog ! Leej twg xav tau, kom nws yeej
meem los nqa cov dej muaj txoj sia mus siv dawb !

20 Tus ua pov thawj hais txog tej yam
no, nws hais tias :
“Muaj tseeb tiag. Ib me ntsis, kuv yuav los.”
Ua li.
Huab Tais Yes Xus, koj los mas !

Zam Ntawv Moo Zoo 17, 20-26

Yes Xus yog Leej Choj thov Leej
Txiv rau lub qab ntuj neeg.

20 "Kuv tsis thov koj rau cov no xwb,
kuv tseem thov koj rau cov uas yuav
ntseeg txog kuv vim lawv lo lus, 21 kom
lawv sawv daws koom ua ib leeg. Ib yam
li koj, Leej Txiv, koj nyob hauv kuv, kuv
nyob hauv koj, kom lawv nyob hauv wb.
Lub qab ntuj neeg thiaj ntseeg tias yog
koj xa kuv tuaj. 22 Lub koob meej uas
koj muab rau kuv, mas kuv muab rau
lawv lawm, kom xwv lawv ua ib leeg xws
li wb ua ib leeg. 23 Kuv nyob hauv
lawv, koj nyob hauv kuv, lawv thiaj li ua
tsheej ib leeg tiag, lub qab ntuj neeg thiaj
paub tias yog koj xa kuv tuaj, thiab paub
tias koj nyiam lawv ib yam li koj nyiam kuv.
24 Txiv, cov uas koj muab rau kuv, kuv
nyob qhov twg, mas kuv xav kom lawv
tau nrog kuv nyob qhov ntawd thiab, kom
lawv pom kuv lub koob meej uas koj
muab rau kuv, vim koj tau nyiam kuv, txij
thaum tsis tau tsim lub sim ceeb.
25 Txiv siab ncaj, lub qab ntuj neeg tsis
paub koj, tab sis kuv paub koj, thiab cov
no kuj paub tias yog koj xa kuv tuaj. 26
Kuv twb ua kom lawv paub koj lub npe
lawm. Kuv tseem yuav ua kom lawv
paub ntxiv, kom txoj kev nyiam uas koj
muab los nyiam kuv, nyob hauv lawv,
thiab kom kuv nyob hauv lawv."

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 17th May 2013, 10:44 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°31

Re: COV ZAJ NYEEM-Xyoo C 2012-13

Post NrhiavTswvNtuj 17th May 2013, 10:44 am

COV ZAJ NYEEM HNUB TIM 19/05/2013
( Chiv 8 Caij Hla, Leej Ntuj Plig Nqes Los, Xyoo C )

Zaj nyeem 1: Hauj Lwm 2, 1-11 Leej Ntuj Plig nqes los.

1 Thaum txog lub Hnub Nyoog
Tsib Caug, tas cov thwj tim huv tib
si tuaj sib txoos ua ke. 2 Ib sij huam,
txawm muaj ib lub suab nrov saum ntuj
tuaj xws li ib nthwv cua hlob hlob ntsawj,
lub suab ntawd nrov thoob plaws lub tsev
uas lawv nyob. 3 Ces lawv pom tej
ntshua nplaim zoo li nplaim taws, ncau ua
tej tus nplaim me ya tuaj tsaws saum cov
thwj tim txhua tus. 4 Lawv sawv daws
tau txais Leej Ntuj Plig Ntshiab puv hauv
lawv, ces lawv pib hais ntau xeem lus
raws li Leej Ntuj Plig pub kom lawv hais tau.
5 Thaum ntawd, muaj ib co Yus Das kub
siab ntseeg tuaj ntawm tas cov teb chaws
hauv lub qab ntuj khwb tuaj nyob Yes
Lus Xas Les. 6 Thaum lawv hnov lub
suab nrov, tas ib tsoom neeg tuaj ntsauv
vij vog. Sawv daws ua siab poob nthav
vim tias thaum cov thwj tim hais lus, mas
lawv nyias hnov hais nyias xeem lus.
7 Lawv ceeb tas nrho, xav tsis thoob, ces
lawv hais tias :
"Tas cov neeg uas hais lus ntawd, lawv
tsis yog ib co Nkas Lis Lais lod ? 8 Ua
li cas peb thiaj nyias hnov lawv hais nyias
xeem lus ? 9 Peb yog ib co neeg Pas
Tos, Mes Dias, Es Las Mias, peb nyob
Mes Xos Pos Tas Mias tuaj, Yus Das, Kas
Pas Dos, Poos Tus, As Xias, 10 Fis Zias,
Pas Fis Lias, nyob Hais Nkws Tos thiab
Lis Npias teb chaws uas ze Xis Les Nas,
peb yog neeg Los Mas tuaj nyob ntawm
no. 11 Peb yog ib co Yus Das thiab ib co
teev dab txais kev ntseeg, ib co Khes Tas,
As Las Npias, peb puav leej hnov lawv
hais peb xeem lus cav txog Tswv Ntuj lub hwj chim."

Zaj nyeem 2: Los Mas 8, 8-17

8 cov neeg mloog lub cev, lawv ua xis
Tswv Ntuj siab tsis tau.
9 Ntawm nej, mas nej tsis zwm rau lub
cev, nej zwm rau lub tswv yim, vim Tswv
Ntuj Leej Tswv Yim nyob txawm hauv
nej. Tus twg tsis muaj Leej Pleev lub
tswv yim nyob hauv nws mas nws tsis
yog Leej Pleev tug. 10 Yog Leej Pleev
nyob hauv nej, tab yog lub cev tuag vim
kev txhaum, mas lub tswv yim muaj txoj
sia vim kev ncaj. 11 Yog tus tau tsa Yes
Xus tuag sawv rov los, nws lub tswv yim
nyob txawm hauv nej, mas nws yuav pub
txoj sia rau nej lub cev tuag, vim Leej
Ntuj Plig nyob txawm hauv nej.
12 Kuv cov kwv tij, yog li ntawd mas
peb tshuav luag nuj nqis, tab sis peb tsis
tshuav lub cev nuj nqis. Tsis tas peb yuav
ua neej mloog lub cev. 13 Yog nej ua
neej mloog lub cev mas nej yuav tuag.
Tab sis yog nej cia Leej Ntuj Plig muab
lub cev cov hauj lwm tua pov tseg, mas
nej yuav muaj txoj sia.

14 Txhua leej txhua tus uas Tswv Ntuj
Leej Tswv Yim coj, mas lawv yog Tswv
Ntuj cov me nyuam tas huv tib si.
15 Nej tsis tau txais ib lub tswv yim ua
qhev ; nej tsis txhob rov qab poob rau
hauv txoj kev ntshai. Nej tau txais ib lub
tswv yim ua tub ki tshiab, mas nej hu
Tswv Ntuj tias : ‘As Npas ! Txiv !’
16 Leej Ntuj Plig nrog peb lub tswv yim
zeem tseeb tias peb yog Tswv Ntuj cov
me nyuam tiag. 17 Vim peb yog Ntuj
cov me nyuam, mas peb yog cov txais lub
cuab tam : peb yog cov txais Tswv Ntuj
lub cuab tam ; peb nrog Leej Pleev txais
ib lub cuab tam, vim peb nrog nws raug
txom nyem, peb yuav tau nrog nws muaj hwj chim.

Zam ntawv Moo Zoo 14, 15-16.23b-26

15 "Yog nej nyiam kuv, mas nej yuav coj
rawv kuv cov lus qhia. 16 Kuv yuav
thov Leej Txiv, ces nws yuav xa dua ib
leeg Nplij neeg los nrog nej nyob mus li.

23 Yes Xus teb rau Yus Das tias :
"Yog leej twg nyiam kuv, nws yuav coj
rawv kuv lo lus, ces kuv Txiv yuav nyiam
nws. Kuv Txiv wb yuav los nyob ze nws,
wb yuav ua tsev nyob hauv nws. 24 Tus
tsis nyiam kuv, nws tsis khaws kuv cov
lus. Lo lus uas nej hnov, tsis yog kuv lo
lus, yog Leej Txiv uas xa kuv tuaj lo lus.
25 Thaum kuv tseem nyob ze nej, kuv
hais tej no rau nej. 26 Tab sis Leej Nplij
Neeg, uas yog Leej Ntuj Plig Ntshiab,
mas Leej Txiv yuav xa nws tuaj vim kuv
lub npe, nws yuav qhia tas ib puas tsav
yam rau nej, thiab nws yuav pab nej rov
nco txog tas txhua yam uas kuv tau hais rau nej.

COV ZAJ NYEEM-Xyoo C 2012-13 - Page 2 Yahveh10

NTHUAV NTAWV NTSHIAB.

Rau hnub chiv tim 19 lub 5 hlis 2013

Ib zeej tsoom neeg ntseeg thiab phooj ywg txhua leej,

Peb nco ntsoov tias peb twb ua Huab Tais Yes Xus lub hmoov Hla tau tsib caug hnub. Vim li ntawd, hnub no, tas lub Koom Txoos Kav Tos Liv thoob ntiaj teb ua lub hmoov Tsib Caug Hnub (πεντηκοστῆς-pentecôte.) Lub hmoov Tsib Caug kuj hu ua hmoov Leej Ntuj Plig Ntshiab, vim yog hnub Leej Ntuj Plig Ntshiab nqes los tshoj cov thwj tim.

Thaum Yes Xus tseem nyob, zoo li cov thwj tim tsis paub txob tsis paub txhawj. Tiam sis, hnub twg nws tsis nrog cov thwj tim nyob lawm, lawv yuav muaj kev nyuaj siab loj tuaj laum lawv. Vim li ntawd, ua ntej Yes Xus yuav ncaim lub ntiaj teb, Yes Xus tau qhia ntau zaus rau nws cov thwj tim thiab rau ib zeej tsoom neeg txog Leej Ntuj Plig Ntshiab : “5 Yes Xus teb : “Kuv hais tseeb tseeb rau koj, yog leej twg tsis yug ntawm dej thiab ntawm Ntsuj Plig, nws yuav nkag tsis tau hauv Tswv Ntuj qaum ntuj. 6 Tus yug ntawm nqaij yog nqaij thiab tus yug ntawm Ntsuj Plig yog Ntsuj Plig. Z 3,5-6” Kawg Leej Ntuj Plig Ntshiab yog tus yuav nrog peb nyob mus tag peb sim neej thiab coj peb ua neeg ntseeg xis Tswv Ntuj siab tiam dhau tiam mus txog hnub ntiaj teb kawg.

Xav kom peb tso siab lug rau Leej Ntuj Plig Ntshiab. Txawm peb leej twg lub neej yuav txom nyem loj npaum li cas, txawm peb leej twg muaj txoj hmoo ua luag nom thiab muaj hwj chim loj npaum li cas, yeej tsis cuag li peb lub siab dai dhuam rau Leej Ntuj Plig Ntshiab mus txog qhov kawg. Tswv Ntuj tus Ntsuj Plig thiaj li yog tus muaj peev xwm cawm tau peb txhua yam kev txom nyem thiab muaj hwj chim tshaj peb tib neeg cov hwj chim huv si : “10 Leej twg hais ib los tiv neeg Leej Tub, yuav zam tau rau nws ; tiam sis tus thuam Leej Ntuj Plig Ntshiab yuav zam tsis tau. LK12,10.” Yes Xus qhia rau nws cov thwj tim tias kawg Leej Ntuj Plig Ntshiab tus yuav pab tau lawv, yuav hlub, yuav txuag, yuav tiv thaiv tau lawv ntawm tas txhua yam kev txom nyem : “26 Leej Ntuj Plig tus Ntshiab, tus tiv thaiv, tus Leej Txiv yuav xa ua kuv lub npe tuaj, tus ntawd yuav qhuab qhia puas tsav yam rau nej thiab yuav pab nej nco tas txhua yam kuv tau hais rau nej. Z 14,26” Cov thwj tim txawm hnov Yes Xus cov lus qhia no tag, los zoo li lawv tsis xeev xwm dab tsi. Lawv siab ntsws tseem qaug zog luj luas, vim Huab Tais Yes Xus nce mus dua qaum ntuj lawm tso lawv ua ntsuag ; ces lawv muab tej qhov rooj qhov rai liaj ruaj ruaj kaw ntom ntom nyob ua pawg hauv ib kem tsev : “2 Lawv tseem zaum caws vos, ib sij huam, nroo ntws saum ntuj tuaj tam li ib nthwv cua ntsawj muaj ceem yim pliag thoob plaws lub tsev ; 3 Tshwm plaws tej ntshua lus tam li nplaim taws faib zoj rau lawv ib leeg ib ntshuas tsaws ntua saum lawv, 4 Leej Ntuj Plig Ntshiab nyab yees tag sawv daws, lawv cia li hais tau lwm xeem lus raws li Leej Ntuj Plig pub kom lawv hais. HL 2,2-4” Peb pom tias Leej Ntuj Plig Ntshiab hloov cov thwj tim dua tshiab tag nrho, tsis yog cov neeg tais caus li qub lawm. Peb to taub, txawm yog tus qub thwj tim los lawv muaj Leej Ntuj Plig lub zog nyab yees lawv, ua rau lawv nruab siab loj thiab tawv txaus, tsis txhawj xeeb, tsis ceeb sob, tsis ua neeg ntshai tuav plig cos li qub lawm. Txij ntawd los, lawv thiaj muaj cuab kav tab meeg tshaj Yes Xus lub Moo Zoo coj tau neeg los ntseeg Yes Xus huam vam nroo qas ntws.

Peb thiab, txij peb los ua neeg ntseeg thiab teev Tswv Ntuj, peb kuj hnov hais txog Leej Ntuj Plig Ntshiab ntau zaus. Peb ib txhia kuj tau txais (lub cim txhab zog) txais leej Ntuj Plig Ntshiab li cov thwj tim hauv hnub nyoog Tsib Caug. Ua li peb sim xav, peb puas muaj cuab kav mus tshaj Yes Xus lub Moo Zoo rau peb tej kwv tij neej tsa li cov thwj tim mus tshaj Yes Xus lub Moo Zoo rau lawv cov kwv tij Yus Das coj lawv los teev hawm Tswv Ntuj ? Peb puas ua neeg siab loj siab tawv tiv zaj dab ntub npau suav phem, thev lub mob lub ntsaj li tus neeg mloog Yes Xus lus tso siab rau Leej Ntuj Plig Ntshiab ? Peb yuav cuab ntsej mloog kom zoo Paj Lug cov lus no : “11 Yog Leej Ntsuj Plig tus tsa Yes Xus hauv tsoom tub tuag nyob hauv nej, tus tsa Leej Pleev hauv tsoom tub tuag yuav txuas siav rau nej lub cev tuag nthi vim nws tus Ntsuj Plig nyob hauv nej. 12 Li ntawd, cov kwv tij, peb tsis yog tshuav cev nqaij nqe es ciaj raws cev nqaij, 13 Yog tias nej ciaj raws cev nqaij, nej yuav tsum tuag ; hos tim Leej Ntsuj Plig ua nej lub cev tuag nthi, nej yuav ciaj sia. LM8,11-13” Leej twg tsis hloov siab ntsws dua tshiab, tsis yug ua tus neeg tshiab hauv Leej Ntuj Plig, tus ntawd yuav tsis ciaj tus neeg ntseeg Yes Xus. Tus tsis ciaj ua tus neeg ntseeg Yes Xus kuj tsis ciaj ua Tswv Ntuj me nyuam.

Ib tsoom phooj ywg sawv daws, Tswv Ntuj tus Ntsuj Plig muaj hwj huam tas nrho. Ua ntej Yes Xus ncaim lub ntiaj teb, Yes Xus tau qhia nws cov thwj tim kom tso siab rau Leej Ntsuj Plig Ntshiab. Peb yug los ua neeg hauv yab ceeb no, peb yeej paub qas ntsoov, peb yuav qaij yuav qaug, yuav ncaim lub ntiaj teb no ib yam li Yes Xus. Peb tsis txhob ntshai txoj kev mob kev nkeeg, kev ploj kev tuag. Peb yuav zoo siab hlo txais txoj kev ploj kev tuag nrog Yes Xus, vim Leej Ntuj Plig Ntshiab tus muaj hwj huam tsa tau Yes Xus sawv lis tsees ciaj sia kuj yuav pab peb, yuav tsa peb lub cev thiab ntsuj plig sawv lis tsees lawv Yes Xus qab ciaj qaum ntuj sia nyob mus ib txhis. Peb tso siab lug rau Leej Ntuj Plig Ntshiab mog, cov phooj ywg !

15.05.2013 Cwj Vuam Chiv

COV ZAJ NYEEM-Xyoo C 2012-13 - Page 2 13208010

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 24th May 2013, 1:40 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°32

Re: COV ZAJ NYEEM-Xyoo C 2012-13

Post NrhiavTswvNtuj 24th May 2013, 1:40 pm

COV ZAJ NYEEM HNUB TIM 26/05/2013
( Hwm Huab Tais Peb Leeg, Xyoo C )

Zaj nyeem 1 : Paj Lug 8,22-31
Keb thoob tsib ib txwm nyob

22 Leej thoob tsib hais tias :
"Thaum HUAB TAIS thawj cov hauj
lwm tseem tsis tau tsheej xeeb mas
HUAB TAIS tsim kuv, kuv yog nws thawj txoj hauj lwm.
23 Txij lub hauv paus los, thaum
tseem tsis tau muaj cov hnub nyoog,
thaum lub ntiaj teb tseem tsis tau xeeb
los, mas kuv twb nyob lawm.
24 Thaum tseem tsis muaj cov tiv txwv,
tseem tsis tau muaj cov qhov dej txhawv, kuv twb yug los.
25 Thaum tseem tsis tau muaj cov toj
roob hauv pes sawv, kuv twb nyob lawm.
26 Thaum tseem tsis tau muaj ntiaj teb,
tsis muaj lub sim ceeb thawj cov plua av
plua tshauv, kuv twb yug los.
27 Thaum HUAB TAIS tsim cuaj txheej
ntuj, thaum nws kos lub voj xov npoo
ntuj, kuv twb nyob ntawd.
28 Thaum nws sau cov huab nyob txheej
ntuj saud, thaum nws ua kom cov qhov
dej hauv tiv txwv phwj los, kuv nyob ntawd.
29 Thaum HUAB TAIS tu ciam teb rau
cov dej ntuj kom lawv txhob hla dhau
lawv tej ntug, kuv nyob ntawd.
30 Kuv nyob rawv ntawm HUAB TAIS
xws li ib leeg ntxhais. Txhua txhia hnub
kuv dhia hom khaj nyob ntawm HUAB
TAIS xub ntiag, ua nws chaw kaj siab lom zem."

Zaj nyeem 2 : Los Mas 5,1-5

1 Yog vim peb txais kev ncaj ntawm
kev ntseeg tuaj, mas peb thiaj nrog
Tswv Ntuj nyob kaj siab lug nyob hauv
peb tus Huab Tais Yes Xus Pleev. 2 Yes
Xus Pleev pub kev ntseeg, ces peb tau
txais txiaj ntsim ; peb tau los nyob hauv
lub txiaj ntsim ; peb cav lus zoo thiab peb
tso siab tias peb yuav txais Tswv Ntuj lub
hwj chim. 3 Tab yog peb raug kev txom
nyem, peb tseem cav lus zoo thiab, vim
peb paub tseeb tias txoj kev txom nyem
rub lub siab kom ntev,
4 lub siab ntev tsim tus yam ntxwv zoo
xwm yeem, tus yam ntxwv zoo xwm
yeem tsim kev tso siab. 5 Kev tso siab
ua kom peb tsis muaj chaw khuv xim,
vim Leej Ntuj Plig Ntshiab, uas Ntuj pub
rau peb, nws hliv Tswv ntuj txoj kev
nyiam rau hauv peb lub siab.

Zam Ntawv Moo Zoo 16,12-15

12 Kuv tseem tshuav ntau yam yuav hais
rau nej, tab sis nyem no nej ris tsis taus.
13 Thaum Leej Ntuj Plig qhia qhov
tseem ceeb tuaj txog, nws yuav coj nej
mus rau qhov tseeb tas huv si. Vim nws
yuav tsis hais nws cov lus, nws yuav hais
qhov nws hnov, thiab nws yuav xub qhia
nej txog tej xwm uas yuav tshwm sim
tuaj. 14 Nws yuav ua kom kuv muaj
koob meej, vim nws yuav coj yam uas
yog kuv tug tuaj qhia rau nej. 15 Tas ib
puas tsav yam uas yog Leej Txiv tug,
mas kuj yog kuv tug huv tib si. Vim li
ntawd kuv thiaj hais rau nej tias : Leej
Nplij Neeg yuav coj yam uas yog kuv tug tuaj qhia rau nej.

NTHUAV NTAWV NTSHIAB.

Rau hnub chiv tim 26 lub 5 hlis 2013

Ib zeej tsoom neeg ntseeg thiab phooj ywg sawv daws,

Lub lis piam tas los no, peb ua lub hmoov hwm Leej Ntuj Plig Ntshiab xaus lub caij nyoog Hla. Hnub no, yog hnub chiv 8 lub caij nyob nruab xyoo nco txog lub hmoov hwm Huab Tais Peb Leeg. Vim li ntawd, peb yuav nthuav ob peb los txog lub ntsiab lus kev hwm Huab Tais Peb Leeg raws peb lub Koom Txoos Kav Tos Liv kev qhuab qhia.

Peb txais kev ntseeg Tswv Ntuj ntawm lub Koom Txoos Kav Tos Liv, peb muaj kab muaj ke teev hawm Tswv Ntuj raws caij raws nyoog thawm niaj thawm xyoo. Koom Txoos Kav Tos Liv qhia peb teev hawm Tswv Ntuj muaj qib muaj quag, muaj txheej txheem. Hnub no, peb hwm Huab Tais Peb Leeg (La Trinité) raws li Koom Txoos Kav Tos Liv kev teev hawm. Kev hwm Huab Tais Peb Leeg tsis yog lam xav tswv yim ua, hos yeeb vim Koom Txoos mloog Tswv Ntuj lus, ua li Tswv Ntuj tshoj thiab qhia kom ua li muaj nyob hauv ntaub ntawv. Piv li cov lus hauv phau ntawv Paj Lug, peb hnov hnub no : “22 Huab Tais twb txhiv kuv ntev los ua ntej chiv nws tes dej num. 23 Kuv yog tus ib txhis txawm ua ntej chiv lub keeb xeeb daim av. 24 Twb txawm kuv thaum qab tiv txwv tsis tau yees, dej tsis tau txhawv. 25 Ua ntej hauv toj hauv pes sawv, twb yug kuv lawm. PL 8,22-25.” Cov ntsiab lus no qhia rau peb paub tias Leej Txiv thiab Leej Tub yeej ib txhis txawm thiab ib txhis raug, ua ntej tshwm lub ntuj thiab daim av. Kuj piv tau rau peb tib neeg, tos ho muaj yus, vim muaj yus niam yus txiv. Tos ho muaj lub ntuj thiab daim av, vim xub muaj Tswv Ntuj ua tus tsim, thiaj li muaj lub sim ceeb. Tiam sis, peb tib neeg tsis muaj tus paub Tswv Ntuj. Vim li ntawd, Tswv Ntuj thiaj xa nws Leej Tub Yes Xus nqes saum ntuj los ciaj neeg, qhia Tswv Ntuj rau peb paub, kom peb teev hawm tus tseem Tswv Ntuj, tus tsim lub ntuj thiab daim av thiab tsim peb leej tib neeg.

Cov thwj tim yog peb cov poj yawm txwv koob. Lawv yog cov xub ntseeg Yes Xus cov lus qhia ua ntej dua tej. Peb txais kev ntseeg Yes Xus ntawm cov thwj tim los. Peb mloog lawv qhia Yes Xus rau peb paub. Muaj ntau zaus, cov thwj tim pom Yes Xus xub teev ntuj thov Leej Txiv ua ntej Yes Xus yuav ua tej yam hwj huam. Piv txwv thaum Yes Xus kom lawv qhib Las Ntxas Los daim txiag zeb kaw nws lub rooj ntxas : “41 Lawv muab daim zeb tshem, Yes Xus tsa zoj qhov muag thiab hais tias: “Txiv, kuv ua koj tsaug vim koj mloog kuv.Z 11,41” Yes Xus yog tus qhia kom peb nrog Yes Xus hu Tswv Ntuj ua Txiv. Tsis tas li ntawd xwb, Yes Xus tseem tab meeg qhia rau tsoom neeg Yus Das tias Yes Xus tus kheej yog Tswv Ntuj Leej Tub. Leej Txiv yog tus xa Leej Tub tuaj hauv ntiaj teb no : “36 Tus Leej Txiv txi ntshiab si thiab xa tuaj hauv ntiaj teb, nej li nej hais tias : koj thuam ntuj, vim kuv hais tias kuv yog Tswv Ntuj Leej Tub Z 10,36” Vim li ntawd, peb paub meej tias Tswv Ntuj muaj npe hu ua Leej Txiv thiab Leej Tub. Cov thwj tim tseem hnov Yes Xus qhia ntau zaus rau lawv txog Leej Ntuj Plig Ntshiab : “26 Leej Ntuj Plig tus Ntshiab, tus tiv thaiv, tus Leej Txiv yuav xa ua kuv lub npe tuaj, tus ntawd yuav qhuab qhia puas tsav yam rau nej thiab yuav pab nej nco tas txhua yam kuv tau hais rau nej Z 14,26” Kev ntseeg Tswv Ntuj raws li Yes Xus qhia, tsis yog ib qho yooj yim raws li peb tib neeg lub siab xav. Yuav kom peb paub Tswv Ntuj tseeb tiag, yuav tsum muaj tus qhia Tswv Ntuj rau peb. Yog peb cia li muab phau Ntawv Ntshiab los nthuav nyeem, peb cia li sawv ua ib tug coj raws li peb kev to taub Tswv Ntuj lus xwb, yuav tsis txaus. Peb yuav tsis txawj qhia kom tshab plaws Tswv Ntuj rau neeg paub. Peb yuav ua ib cov neeg ntseeg Yes Xus pes tog pes nta, yuam kev rhuav, luag hais tias ib npoj (sectes). Vim li ntawd, peb yuav mloog peb cov poj yawm txwv koob ua peb ntej hauv txoj kev ntseeg qhia Tswv Ntuj rau peb. Cov thwj tim yog cov qhia kev ntseeg Yes Xus rau peb. Kev ntseeg Yes Xus yog kev teev hawm tus tseem Huab Tais Tswv Ntuj raws li Yes Xus, tus nqes saum ntuj los qhia rau ntiaj teb neeg kom paub hu Tswv Ntuj ua : “Leej Txiv thiab Leej Tub thiab Leej Ntuj Plig Ntshiab.”

Vim li ntawd, ib tsoom phooj ywg, peb txoj kev hwm Huab Tais Peb Leeg lub ntsiab yog qhia kom peb pom Tswv Ntuj kev sib haum xeeb thiab sib hlub. Leej Txiv thiab Leej Tub thiab Leej Ntuj Plig Ntshiab sib haum thiab sib hlub ua tib tug Tswv Ntuj. Peb leej tib neeg muaj txhaum teev hawm Huab Tais Peb Leeg tau txais txiaj ntsim nrog tau Tswv Ntuj ua Tswv Ntuj tub ki. Cov leej ntshiab yog cov poj niam thiab txiv neej nrog Leej Txiv thiab Leej Tub thiab Leej Ntuj Plig Ntshiab ua tib lub siab. Vim Pob Zeb npuab Yes Xus, nrog Yes Xus ua tib lub siab, Yes Xus pub Pob Zeb ua tau tej yam hwj huam ib yam li Yes Xus tus kheej : “34 Pob Zeb hais rau nws : “Ais Nes As, Yes Xus Pleev kho koj ; sawv los kho koj lub txaj rau koj.” Nws cia li sawv tam sis ntawd. HL 9,34” Cov neeg siab dawb siab ntshiab yog cov neeg sib haum xeeb thiab hlub li Huab Tais Peb Leeg. Thov kom peb txoj kev teev hawm Huab Tais Peb Leeg pub peb sib haum xeeb thiab sib hlub hauv peb lub cuab lub yig thiab nyob ntiaj teb no.

23.05.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 30th May 2013, 6:22 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°33

Re: COV ZAJ NYEEM-Xyoo C 2012-13

Post NrhiavTswvNtuj 30th May 2013, 6:22 am

COV ZAJ NYEEM HNUB TIM 02/06/2013
( Chiv 10 Nruab Xyoo Hwm Huab Tais Lub Cev Ntshiab, Xyoo C )

Zaj nyeem 1: Hauv Paus 14, 18-20
18 Mes Kis Xes Des, uas yog tus vaj
nyob Xas Les nqa ncuav mov thiab cawv
tuaj. Nws yog tus Tswv Ntuj nyob siab
tus leej choj. 19 Nws hais cov lus foom
hmoov no rau Has Nplas :
"Thov kom tus Tswv Ntuj nyob siab uas
tsim lub ntuj thiab lub ntiaj teb, foom
hmoov zoo rau Has Nplas. 20 Thov kom
tus Tswv Ntuj nyob siab nto koob meej,
vim nws muab koj cov yeeb ncuab tso rau
hauv koj lub xib teg lawm."
Ces Has Nplas muab ib feem kaum
ntawm tas puas tsav yam nws muaj, pub
rau Mes Kis Xes Des.

Zaj nyeem 2: 1 Kos Lis Nthos 11, 23-26
23 Cov lus kuv qhia rau nej, yog cov lus
kuv txais ntawm Huab Tais los. Yam li,
hmo lawv muab Huab Tais Yes Xus rau
cov nom ntes, Huab Tais tuav ib lub
ncuav mov, 24 nws ua Ntuj tsaug, nws
muab lub ncuav mov ntais, nws hais tias :

"Qhov no yog kuv lub cev uas cia cawm
nej. Nej ua qhov no kom nej nco txog kuv."
25 Thaum noj hmo tas Huab Tais
Yes Xus tuav lub ntim cawv, nws hais tias :
Lub ntim cawv no yog zaj cog lus
tshiab nyob hauv kuv cov ntshav ; nej
haus lub ntim no thaum twg, mas nej haus
kom nej nco txog kuv.

26 Kwv tij, txij no mus, nej noj cov
ncuav mov no thaum twg, thiab nej haus
cov cawv no thaum twg, mas nej tshaj
Huab Tais txoj kev tuag, nej ua li no mus
txog hnub Huab Tais rov los.

Lus Kas Ntawv Moo Zoo: 9, 11b-17
Cov Hauv Paus Xa Lus rov los.
Yes Xus faib mov rau tsib txhiab leej noj.

11 Tab sis, tsoom sid mem tau tias lawv mus qhov twg, ces
sawv daws caum Yes Xus qab mus. Yes
Xus txais lawv zoo, nws hais txog Tswv
Ntuj lub Ceeb Tsheej rau lawv, thiab Yes
Xus kho cov uas vam txog nws.
12 Thaum lub hnub yuav poob qho, Pab
Kaum Ob txav los hais rau Yes Xus tias :
"Koj kom tsoom sid rov mus, lawv thiaj
tau kev mus nrhiav chaw so thiab txhiam
xws noj hauv cov zos thiab tej tsev nruab
teb uas tsis deb ib ncig ntawm no, vim
peb nyob ib qho chaw tsis muaj neeg."
13 Yes Xus hais rau lawv tias :
"Nej muab mov rau lawv noj mas !"
Cov thwj tim hais tias :
"Peb tsuas muaj tsib lub ncuav mov thiab
ob tug ntses xwb. Tsuas ntshai tias peb ho
mus muas zaub mov rau tas tsoom neeg no noj."
14 Vim cov neeg tuaj ntawd muaj ze
ntawm tsib txhiab leej txiv neej. Yes Xus
hais rau cov thwj tim tias :
« Nej kom lawv zaum ua tej pawg tsib caug leej ua ke. »
15 Cov thwj tim ua raws li Yes Xus hais.
Lawv kom sawv daws zaum. 16 Yes
Xus tuav tsib lub ncuav mov thiab ob tug
ntses, nws tsa muag ntsia saum ntuj, nws
foom hmoov zoo rau cov mov thiab cov
ntses. Nws muab ntais, nws muab rau
cov thwj tim kom cev rau tsoom sid noj.
17 Sawv daws noj mov, sawv daws tsau
tas. Lawv khaws tej sab mov seem puv kaum ob tawb.

COV ZAJ NYEEM-Xyoo C 2012-13 - Page 2 Aa_jf_10

NTHUAV NTAWV NTSHIAB.

Ib zeej tsoom neeg ntseeg thiab phooj ywg hmov tshua,

Lub lis piam no yog hnub chiv 9 nruab xyoo 3, tsoom ntseeg hauv Koom Txoos Kav Tos Liv ua hmoov hwm Yes Xus Pleev lub cev thiab cov ntshav. Vim li cas, peb thiaj ntseeg thiab hwm Yes Xus Pleev lub cev thiab cov ntshav ?

Tus noj Yes Xus Pleev lub cev thiab cov ntshav coj tau nws ua leej tib neeg taug Huab Tais Yes Xus tus roj tus hneev thiab ua tau nws ntsib dheev peb tus Huab Tais Yes Xus. Peb yuav ntsib dheev Yes Xus Pleev nrog peb nyob hauv peb lub siab lub ntsws, hauv peb lub cuab lub yig, hauv tsoom neeg ntseeg, hauv lub Koom Txoos teev hawm Yes Xus thiab nrog leej tib neeg nyob thoob ntiaj teb. Peb txais txoj kev ntseeg Yes Xus ntawm yus niam yus txiv, yus tej pog yawg, tej txiv plig ib txheej qhia dhau txheej, mus txog cov thwj tim uas yog cov tim khawv tau pom xyeem, tau nrog Yes Xus nyob ua ke, noj ua ke. Peb cuab ntsej mloog Yes Xus tus thwj tim Paj Lug cov lus hauv nws tsab ntawv Kos Lis Nthos : “23 Yam kuv khaws tau ntawm Huab Tais, kuv muab rau nej, hmo nws raug ntes, Huab Tais Yes Xus tuav lub ncuav mov, 24 Nws ua ntuj tsaug tas, muab ntais nws hais tias : nov yog kuv lub cev pub rau nej, nej ua li ntawd kev nco kuv txiaj ntsim, 25 Lub ntim kuj tib yam, thaum noj hmo tas, nws hais tias : lub ntim no yog cog lus tshiab hauv kuv ntshav, nej ua li ntawd thaum twg, nej haus nco kuv txiaj ntsim 1KLN 11,23-25” Peb twb pom cov neeg ntseeg tsis ti txha, muaj coob muaj ntau tsis paub qab hau txog Yes Xus lub cev thiab cov ntshav. Tos peb ib txhia neeg ntseeg Yes Xus tsis kub siab teev ntuj, vim peb twb tsis pom Yes Xus lub cev muaj txiaj ntsim, twb tsis pom Yes Xus cov ntshav muaj nuj nqes daws peb kev nqhis. Txawm peb nyob tsheej qas hli, qas xyoo tsis teev ntuj los peb twb tsis ntshai tub qaug Tswv Ntuj. Tus neeg twg yim nkees teev ntuj cav tseem yim zoo nws siab. Yus yog tus pluag txiaj ntsim los tseem tsis txaus, yus cav tseem yig tsis noj Yes Xus lub cev kom yim huab pluag txiaj ntsim ntxiv ; phim peb cov neeg ntseeg Tswv Ntuj yuav zoo siab hlo, vim kev teev Tswv Ntuj yog koob hmoov, tsis kav coob tus neeg ntseeg tseem ua txuj yig, tsis kam haus Yes Xus cov ntshav ua tshuaj cawm lawv txoj sia, daws lawv kev mob kev ntsaj, kev txom nyem. Puas yog tim yus tsis sawm zoo, nej xav li cas ? Yog tias peb muaj chaw vam khom ib tug nom, peb twb taug kev ntsoov mus thov nom pab peb ; yog tias peb tau kev tws, peb twb yuav tsum nrhiav kev mus thawj ib tug vaj ntxwv pab peb. Huab Tais Tswv Ntuj tseem loj tshaj npaum li cas tej nom tswv, muaj hwj huam tshaj ntiaj teb tej vaj ntxwv, tsim nyog peb yuav lauj zias lub caij nyoog mus teev hawm Huab Tais Tswv Ntuj txhua lub sij hawm. Peb lub ncauj lam lees teev Tswv Ntuj, peb twb tsis ua li peb tau cog lus. Peb pom tus neeg ua li nws hais thiab kub siab lug hwm Huab Tais Tais Tswv Ntuj yog peb cov yawg koob. Vim li ntawd, peb yuav mloog lawv lus qhia.

Peb tus yawg koob Has Nplas, yog tus qhia kev ntseeg Huab Tais Tswv Ntuj rau peb taug, peb yuav tig xub ntiag thiab siab ntsws mus yoog nws, tsis txhob tig nrob qaum thiab ntsaws qhov ntsej rau nws tej lus qhia. Has Nplas kev tso siab tuag nthi rau Tswv Ntuj pab tau nws ntaus rog yeej nws plaub tug vaj ntxwv yeeb ncuab Xaws Dos thiab tseem tau lawv tej cuab tam los ua nws cuab tam. Yog ib co lus qhia kom peb muaj zog tso siab tuag nthi rau Tswv Ntuj cuag li yawg koob Has Nplas. Zim txwv no muaj ntau hom vaj ntxwv yeeb ncuab hauv nyias lub neej : vaj ntxwv txhawj xeeb laum peb lub neej, vaj ntxwv kab mob kev nkeeg hauv nyias nrog cev, vaj ntxwv nyiaj thiab kub deev yus siab, vaj ntxwv ua plees ua yis…Peb yuav tiv cov vaj ntxwv yeeb ncuab no nrog tej koob hmoov thiaj yeej. Yam li peb yuav tau qee peb teej peb tug los txi Huab Tais Tswv Ntuj, piv li Has Nplas muab ib feem kaum ntawm nws teej tug los txi rau Huab Tais Tswv Ntuj pauj txiaj ntsim. Xyov peb puas txawj nco Tswv Ntuj koob hmoov li Has Nplas nco Tswv Ntuj koob hmoov ; xyov peb puas pauj tau Tswv Ntuj tej txiaj ntsim hlub peb. Vim li ntawd, peb thiaj li yuav tsum tig mus ntsia tus tuaj cawm tag lub qab ntuj neeg thiab hlub peb tuag nthi rau peb.

Tus noj Yes Xus Pleev lub cev thiab haus nws cov ntshav, zoo siab nrog Yes Xus Pleev koom tib lub cev thiab tib cov ntshav. Txhais hais tias peb yuav nrog tau Yes Xus hla kev txhawj xeeb, hla kev ploj tuag, hla kev raug ntxub raug hiam, kev tshaib nqhis. Cov thwj tim nrog Yes Xus ua ke, lawv txhawj xeeb npaum li ntawd rau tsib txhiab leej neeg, tsis pom qab nrhiav mov qhov twg noj, xyov yuav ua cas muaj nyiaj muas mov txaus yug tsib txhiab tus neeg : “12 Lub hnub qaij nroos, pab Kaum Ob txav los ze hais rau nws tias : “Xa npoj neeg mus kom xwv lawv mus hauv cov zos thiab tej chaw nyob ib cheeb tsam lawv thiaj nrhiav tau chaw so thiab nrhiav tau noj vim ntawm no, peb nyob ib lub chaw ua twj cuab LK 9,12.” Peb kuj zoo li cov thwj tim, nyias muaj nyias kev txhawj xeeb tsis txawj tag. Hais txog kev txom nyem : nej mus pom peb cov kwv tij neej tsa Hmoob nyob ntuj qub qab lub neej tsis pom qab cob cuab, txaus txhawj kawg kiag. Lub teb chaws los nqaim, toj roob hauv pes ciaj quav poj quav pwm av nkig nkuav ti plaws qab ntug, tsis muaj tug xyoob ntoo sawv qhov twg yuav muab tau los ua taws rauv, xyov tej vaj ua tse yuav ua cas nrhiav tau rau tej tub ki, tsis muaj teb qoob teb loo qhov twg tsa lub cuab lub yig. Nej to taub, vim li cas tej pliaj plhu ntshaus qas ntsho, tib neeg nka nkib nyiaj tshaib yoo nqhis ua hnub ua hmo : “16 Nthos tsib lub mov thiab ob tug ntses, tsa muag ntsia saum ntuj, nws foom hmoov rau thiab muab ntais, nws muab rau cov thwj tim cev rau npoj neeg. 17 Lawv tau noj thiab tag sawv daws puav leej tsau npo, cov seem tej yav muab khaws puv kaum ob tawb.LK 9,16-17” Lub ncauj tsis hais los siab ntsws xav zoj tias : me kwv tij Hmoob nis me kwv tij Hmoob, cas nej yuav lwj siab lwj ntsws loj tag npaum li, xyov nej yuav ris lub neej txom nyem mus tav li twg. Tiam sis, ua siab loj os mog, yog Yes Xus Pleev muab tsib lub mov thiab ob tug ntses ua tau tsib txhiab leej noj seem noj so tseem seem kaum ob tawb, Yes Xus Pleev kuj yuav muab nej kev tshaib thiab nqhis ua nej cov txhab qoob txhab loo rau nej noj seem noj so tseem seem rau nej tej tub ki thiab.

Ib tsoom phooj ywg, peb noj thiab haus Yes Xus Pleev lub cev thiab cov ntshav ua rau peb tus neeg ntseeg thiab teev Yes Xus ciaj Yes Xus Pleev lub cev thiab roj ntsha thoob ntiaj teb. Cov neeg ciaj Yes Xus Pleev lub cev thiab roj ntsha, yog cov poj niam los cov txiv neej hlub cov neeg pluag neeg txom nyem thiab yug cov neeg tshaib thiab nqhis nyob ntiaj teb no. Peb ntsib lawv, tsis yog lawv peb pom, hos yog pom xyeem Yes Xus Pleev tus kheej, vim lawv ciaj Yes Xus Pleev lub cev thiab cov ntshav.

31.05.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 7th June 2013, 11:25 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°34

Re: COV ZAJ NYEEM-Xyoo C 2012-13

Post NrhiavTswvNtuj 7th June 2013, 11:25 am

COV ZAJ NYEEM HNUB TIM 09/06/2013
( Chiv 10, Nruab Xyoo C )

Zaj nyeem 1 : 1 Vaj Ntxwv 17, 17-24

Es Lias tsa ib tug me tub tuag sawv rov los.

17 Dua tej xwm ntawd tas, thaum Es
Lias tseem nyob hauv lub zos Xas Les
Tas, tus niam tsev uas Es Lias mus so
hauv, nws tus tub mob heev, ces nws tus
tub tuag lawm. 18 Tus niam tsev hais rau Es Lias tias :
"Tswv Ntuj tus neeg, puas yog vim koj
nyob hauv kuv tsev, ces Ntuj thiaj pom
kuv tej txhaum, kuv tus tub thiaj tuag lawd ?"
19 Es Lias hais rau tus poj ntsuam ntawd tias :
"Koj muab koj tus tub rau kuv saib."
Ces Es Lias txais tus tub hauv nws niam
xub ntiag los, nws puag tus tub mus rau
hauv lub paim uas nws pw nyob txheej
tsev saud. Nws tso tus me nyuam rau saum txaj.
20 Nws hu txog HUAB TAIS tias :
"Kuv tus HUAB TAIS, tus poj ntsuam
ntawd txais kuv nyob hauv nws tsev,
puas phim yuav cia nws tus tub tuag li
ntawd ? Puas yuav cia nws raug txom nyem ?"
21 Ces Es Lias tso cev pw peb zaug rau
saum tus me nyuam thiab nws thov HUAB TAIS tias :
"HUAB TAIS, kuv tus Tswv Ntuj, kuv
thov koj kom tus me nyuam no tus plig
rov los nyob hauv nws mas !"
22 HUAB TAIS mloog Es Lias hu txog
nws, ces tus me nyuam tus plig rov los
nyob hauv tus me nyuam, tus me nyuam ciaj rov los.
23 Es Lias nqa tus me nyuam, nws nqes
los, nws muab tus me nyuam rau nws
niam, nws hais tias :
"Koj ntsia, koj tus tub ciaj lawm."
24 Tus poj niam teb tias :
"Nyem no, kuv paub tseeb tias koj yog
Tswv Ntuj tus neeg tiag. Cov lus tawm
hauv koj lub ncauj los yog HUAB TAIS
cov lus, yog lus tseeb."

Zaj nyeem 2 : Nkas Las Tais 1,11-19

Yog Tswv Ntuj hu Paj Lug.

11 Nej yuav paub tias, lub Moo Zoo uas
kuv xa tuaj rau nej, mas neeg lub tswv
yim duav tsis tau. 12 Kuv tsis tau txais
thiab tsis tau kawm lub Moo Zoo ntawm
neeg los : yog Yes Xus Pleev yees tawm los qhia kuv.
13 Nej yeej tau hnov tias, thaum kuv coj
cov Yus Das kev cai, kuv tau ua dab tsi.
Nej yeej hnov tias kuv hiam Tswv Ntuj
lub Koom Txoos tsis tseg, kuv ua xwv
txheej loj kawg rau lawv. 14 Kuv kub
siab coj cov kev cai Yus Das. Nyob hauv
kuv phaum neeg, kuv nyiam peb cov
yawg koob Txoj Cai tshaj cov nrog kuv ua ib haiv neeg.
15 Tiam sis, thaum kuv tseem nyob hauv
kuv niam plab, tus uas muab kuv qee rau
ib cag, nws lub txiaj ntsim hu kuv.
16 Nws qhib nws Leej Tub tawm los rau
kuv paub, kom kuv tshaj nws Leej Tub
rau cov pej kum neeg. 17 Tam sim
ntawd, kuv tsis mloog kuv lub cev thiab
kuv tej roj ntsha, kuv tsis mus cuag cov
xub ua Hauv Paus Xa Lus nyob Yes Lus
Xas Les ; kuv ncaj qha mus As Las Npias
teb tau ib ntus, kuv mam rov los nyob
Das Mas. 18 Peb xyoos tom qab, kuv
thiaj mus pem Yes Lus Xas Les, mus
cuag Pob Zeb. Kuv nrog nws nyob kaum
tsib hnub : 19 kuv tsis tau ntsib lwm tus
Hauv Paus Xa Lus, kuv tsuas tau ntsib
Yas Kos, uas yog Huab Tais tus kwv.

Lus Kas Ntawv Moo Zoo 7, 11-17

Yes Xus tsa tus poj ntsuam nyob
Nas Ees tus tub sawv rov los.

11 Dua li ntawd, Yes Xus mus hauv ib
lub nroog hu ua Nas Ees. Yes Xus cov
thwj tim thiab ib pab neeg coob nrog Yes
Xus ua ke mus. 12 Thaum Yes Xus tuaj
yuav txog lub qhov rooj loog nkag hauv
lub nroog, luag tab tom kwv ib tug tuag
tawm tuaj txog ntawd. Yog ib leeg tub
twm zeej, hos leej niam yog ib tug poj
ntsuam. Ib pab neeg coob hauv nroog
nrog leej niam tawm tuaj. 13 Huab Tais
pom tus poj ntsuam, Huab Tais khuv leej
nws. Huab Tais hais rau nws tias : "Koj txhob quaj."
14 Yes Xus txav los tuav lub hleb, cov
kwv hleb nres. Ces Yes Xus hais tias :
"Tus hluas, kuv hais koj : Koj sawv !"
15 Ces tus tuag sawv zaum, thiab nws
pib hais lus. Yes Xus muab tus tub hluas
ntawd cob rau nws niam. 16 Tas sawv
daws ntshai tas nrho. Lawv cav txog Tswv Ntuj tias :
"Ib tug yaj saub loj sawv los nyob hauv
peb, Tswv Ntuj tuaj xyuas nws haiv neeg."
17 Cov lus hais txog tus hluas ntawd
ncha mus thoob tas xeev Yus Das thiab ib
ncig lub teb chaws ntawd.

NTHUAV NTAWV NTSHIAB.

Tas zeej tsoom neeg ntseeg thiab phooj ywg sawv daws,

Peb nyob hauv hnub chiv 10 nruab xyoo 3, yog ib hnub tseem ceeb kawg nkaus rau peb sawv daws txhua leej. Vim cov zaj nyeem hnub no hais txog peb tib neeg txoj kev ploj kev tuag. Peb yuav los nthuav ob peb los txog lub txiaj ntsim kev ploj kev tuag.

Peb yuav nco ntsoov peb Hmoob niaj txhis piv txoj lug : “Ua neej nyob, leej tib neeg ces xav muaj xwb tsis xav pluag, xav ciaj xwb tsis xav tuag.” Vim li ntawd, tus noj qab nyob zoo ces ua neej nyob kaj siab lug, tsis nco txob tsis nco txhawj dab tsi. Tus neeg muaj mob muaj nkeeg ces twb tsis muaj ib hnub nyab xeeb. Vim lub mob lub nkeeg ua rau peb lub cev nqaij ib hnub zog ntaug zuj zus, thaum ntej, noj taus, mus taus kev. Yog leej twg tau tus mob phem ces ua rau peb tus neeg mob nkeeg noj tsis taus zuj zus, qaug txaj qaug lav, ua rau tus mob nkeeg mloog ib hnub txoj sia yau zuj zus. Peb leej tib neeg txhua tus thiaj tiv tas zog lub mob lub nkeeg kom saib puas muaj leej twg pab tau peb, kom saib puas muaj yam dab tsi cawm tau peb, txuag tau peb txoj sia nyob kom txhob txawj ploj li. Tus yuav pab tau peb, yam yuav cawm tau peb, txuag tau peb txoj sia yog tus peb ntshaw tshaj tej. Vim li ntawd, peb yuav los hais txog lub txiaj ntsim kev ploj tuag.

Vim li cas peb twb ntxub kev ploj tuag tshaj plaws, kev ploj tuag twb ua rau peb ntshai thiab txhawj tshaj plaws, ua cas peb haj tseem hais txog lub txiaj ntsim kev ploj tuag, puas yuav txaus peb ntseeg ? Yog peb tsuas pom kev ploj tuag li peb tib neeg siab xav xwb, yeej tsis muaj txiaj ntsim dab tsi. Vim kev ploj tuag rhuav tus neeg peb hlub txoj sia yaj lis plho thiab tu lis nrho, rhuav tus neeg peb tshua lub cev ntaj ntsug yaj lis tshaws mus lawm ploj qab ntais, ciaj plua av plua tshauv lawm tiag tiag, ua rau peb ncav tsis cuag, pab tsis tau tus neeg peb hlub thiab tshua, tu siab tag npaum li. Yeej tsis muaj txiaj ntsim dab tsi hauv kev ploj tuag rau peb tib neeg li. Tiam sis, yog peb ntseeg thiab tso siab rau Huab Tais Yes Xus, tus hlub peb, tus cawm peb, tus tseem Huab Tais Tswv Ntuj muaj hwj huam, ces tus neeg peb hlub thiab tshua txawm ploj txawm tuag los nws kev ploj kev tuag ua koob ua hmoov pab peb, muaj txiaj muaj ntsig roos peb. Txawm tus neeg peb hlub thiab tshua lub cev qaij thiab qaug lawm los nws tsis ploj tsis tuag, yog peb tsis pom tsis paub xwb, nws nrog peb nyob : “Nej siab ntsws tsis txhob txhawj tsis txhob ntshai. 28 Nej twb hnov kuv tau hais rau nej : Kuv mus lawm thiab kuv yuav tuaj cuag nej. Yog nej hlub kuv, nej yuav zoo siab rau qhov kuv mus cuag Leej Txiv, vim Leej Txiv loj dua kuv.Z 14,27-28” Kev ploj tuag rau peb yog kev ntshai, kev txhawj xeeb, kev tu siab, chim siab. Kev ploj tuag rau Huab Tais Yes Xus, yog kev tsaug zog, yog kev tawm rooj mus ua qhua, yog kev mus cuag Leej Txiv Tswv Ntuj. Peb yuav tsum xav kom zoo, peb kev ntseeg Yes Xus yog dab tsi ? Peb kev ntseeg Yes Xus puas yog tso siab rau Yes Xus cov lus qhia : kom peb pom hauv kev ploj tuag yam peb tsis tau pom dua, kom peb ntseeg yam tsis txaus peb ntseeg hauv Yes Xus cov lus qhia txog kev ploj tuag rau peb : “14 Nws txawm txav zoj mus kov lub hleb, cov kwv tuag txawm theem zoj, nws hais tias : “Tub hluas, kuv hais rau koj, tsim dheev los.” 15 Tus tuag txawm zaum ntua nws cia li hais lus, Yes Xus muab nws rov rau nws niam. LK 7,14-15” Ib txwm, tus neeg ntseeg thiab mloog Yes Xus lus yeej txais tau Yes Xus cov koob hmoov. Peb yuav tig mus ntsia peb cov pog koob yawg koob mloog Huab Tais Yes Xus lus. Muaj tej txhia, lawv txais Huab Tais Yes Xus hwj huam. Thaum Yes Xus tseem ua neej nyob, Yes Xus tsa tau cov neeg tuag sawv tsees ciaj sia. Cov leej ntshiab, tej txhia kuj txais Yes Xus hwj huam tsa tau neeg tuag sawv tsees ciaj sia ib yam li Yes Xus.

Xyoo 360, Martin de Tours tseem yog ib tug txiv twj cuab (Moine), nws yog tus tsim cov txiv twj cuab lub tsev teev hawm Ligugé (Fondateur du monastère Saint Martin de Ligugé, Poitiers). Muaj ib npoj tub hluas tuaj raws nws qab, ua nws thwj tim teev ntuj. Hauv npoj tub hluas muaj ib tug tseem tsis tau ntxuav plig, tiam sis nws xav ua Martin thwj tim, coj lub neej tab seeb thiab teev ntuj nyob twb cuab. Nws txawm mob nthawv nthav tuag kiag lawm. Martin tseem tawm rooj lawm, nws rov los tom thawj lawv tseem zov hmo. Nws hais rau sawv daws kom tawm hauv kem tsev zov hmo, muab qhov rooj liaj nkaus rau. Nws txawm thov Leej Ntuj Plig Ntshiab ntev li 2 teev, thiab nws txawm xyab saum tus tuag. Ib sij huam, Martin pom tus tuag cia li nti taus, nws ob lub qhov muag cia li rua thiab ntsais duj doom. Martin tsa muag ntsia lub ntuj ua Tswv Ntuj tsaug. Cov kwv hluag nyob nraum zoov sib huas hnyev txeem los sab hauv, sawv daws ceeb tag pom tus tuag ciaj sia. Saint Martin de Tours 317-393 par Marie Borrély.

Ib tsoom phooj ywg, peb cov poj yawm txwv txoob tsoom leej ntshiab yog cov neeg siab dawb siab ntshiab muaj Huab Tais Yes Xus hwj huam. Peb yog lawv tej xeeb leej xeeb ntxwv ntseeg Huab Tais Yes Xus. Vim li ntawd, peb tsis txhob txhawj ntiaj teb neeg lub mob lub nkeeg, peb tsis txhob ntshai thaum kev ploj kev tuag los nphav peb. Yog peb tsis muaj mob tsis muaj nkeeg, yog peb tsis txawj ploj tsis txawj tuag ces peb tsis yog tib neeg. Vim tib neeg kawg txawj mob, txawj ploj, txawj tuag. Huab Tais Yes Xus kev hlub peb yog nrog peb ris peb tib neeg lub mob lub ntsaj, raug ntxub raug hiam, tau ploj tau tuag thiab sawv tsees ciaj sia. Peb yuav tuaj yeem ris peb kev mob kev nkeeg nrog Huab Tais Yes Xus ; peb yuav zoo siab ploj thiab tuag ib nqag npuab Huab Tais Yes Xus kev ploj tuag. Yog peb ntseeg li ntawd, kev ploj tuag yuav tsis ua peb tws kev. Peb tseem yuav txais lub txiaj ntsim kev ploj tuag nrog peb tus Huab Tais Yes Xus.

09.06.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 14th June 2013, 4:31 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°35

Re: COV ZAJ NYEEM-Xyoo C 2012-13

Post NrhiavTswvNtuj 14th June 2013, 4:31 am

COV ZAJ NYEEM HNUB TIM 16/06/2013
( Chiv 11, Nruab Xyoo C )

Zaj nyeem Ib: 2 Xas Muas 12, 7-10.13

7 Nas Taas hais rau Das Vis tias :

"Tus neeg ntawd yog koj ! HUAB TAIS

Tswv Ntuj hais li no : Kuv pleev koj.

Kuv tsa koj ua His Xas Lais tus vaj. Kuv

cawm koj dim ntawm Xas Ws tes. 8 Kuv

tau muab koj tus vaj tsev neeg rau hauv

koj txhais tes. Kuv tau pub tsoom His

Xas Lais thiab tsoom Yus Das rau koj.

Yog tseem tsis tau txaus koj siab mas tab

yog yam twg los kuv tseem zoo siab

muab rau koj tib si. 9 Tab sis vim li cas

koj thiaj li ua qhov uas HUAB TAIS tsis

nyiam ? Koj xuas ntaj tua Us Lis, koj

yuav nws poj niam los ua koj poj niam,

koj txhob txwm ua kom cov As Mos rab

ntaj tua Us Lis. 10 Ua li mas txij no

mus, hniav ntaj yuav tsis zam koj tsev

neeg ntxiv lawm, vim koj tsis nco txog

kuv. Koj coj tus His Tis Us Lis poj niam

los ua koj poj niam.

13 Ces Das Vis hais rau Nas Taas tias :
"Kuv ua txhaum rau HUAB TAIS lawm !"
Nas Taas hais rau Das Vis tias :
"HUAB TAIS zam rau koj, koj yuav tsis tuag."

Zaj nyeem Ob: Nkas Las Tias 2, 16.19-21

16 Tsis kav, peb
paub tias, neeg tsis ntshiab tuaj vim nws
coj Txoj Cai ; neeg ntshiab tuaj vim nws
ntseeg txog Yes Xus Pleev. Vim li
ntawd, peb ntshiab tuaj vim peb ntseeg
txog Leej Pleev, tsis yog vim peb coj
Txoj Cai. Kev coj Txoj Cai ua tsis tau
kom leej twg ntshiab tuaj.
19 Vim Txoj Cai, mas kuv

thiaj tuag rau Txoj Cai, kom kuv ciaj

nyob hauv Tswv Ntuj.

20 Kuv nrog Leej Pleev dai saum ntoo

cuam. Tsis yog kuv muaj txoj sia ntxiv

lawm, yog Leej Pleev txoj sia ciaj nyob

hauv kuv. Kuv muaj txoj sia nyob hauv

kuv lub cev, tab sis kuv ua neej nyob

hauv txoj kev ntseeg txog Tswv Ntuj

Leej Tub, uas nws nyiam kuv, ces nws

rov muab nws rau luag, kom nws pab tau

kuv. 21 Kuv tsis rhuav Tswv Ntuj lub

txiaj ntsim. Yog tias, txoj kev ntshiab

tawm ntawm Txoj Cai los, mas Leej

Pleev tuag tsis muaj nqis dab tsi.

Lus Kas Ntawv Moo Zoo 7, 36–8, 3

Yes Xus zam rau tus poj niam muaj txhaum.

36 Muaj ib tug Fas Lis Xais caw Yes

Xus mus nrog nws noj mov. Yes Xus

chaws mus hauv tus Fas Lis Xais tsev,

nws zaum ntawm rooj mov. 37 Muaj ib

tug poj niam nyob hauv lub nroog ntawd,

yog ib tug neeg txhaum, nws hnov tias

Yes Xus noj mov hauv tus Fas Lis Xais

ntawd tsev, ces nws nqa ib hwj tshuaj tsw

qab tuaj. 38 Nws tuaj nyob ntawm Yes

Xus nraub qaum, nram Yes Xus ko taw,

nws quaj, nws ua kua muag poob los ywg

Yes Xus ko taw, ces nws muab nws cov

plaub hau los so Yes Xus ko taw, nws

nwj Yes Xus ko taw tsis tseg, thiab muab

tshuaj tsw qab los pleev Yes Xus ko taw.

39 Tus Fas Lis Xais uas caw Yes Xus,

pom li ntawd, nws xav hauv siab tias :

"Yog tias tus neeg no yog ib tug yaj saub,

mas phim nws yuav paub tias tus poj

niam uas kov nws yog leej twg. Tus po

niam ntawd yog ib tug neeg txhaum !"

40 Tab sis Yes Xus tsa ncauj hais rau tus

Fas Lis Xais tias :

"Xis Moos, kuv muaj ib lo lus xav hais rau koj."

Tus Fas Lis Xais teb tias :

"Xib Hwb, koj hais mas !"

41 “Muaj ib tug neeg qiv nyiaj rau ob tug

neeg. Thawj tug tshuav nuj nqis txog tsib

puas lub txiaj nyiag ; lwm tus tshuav nqi

txog tsib caug lub txiaj nyiag. 42 Nkawd

ob leeg tsis muaj dab tsi them rov qab, tus

tswv nyiaj cia li zam rau nkawd ob leeg.

Ob tug neeg ntawd, tus twg yuav nyiam

tus tswv nyiaj dua ?"

43 Xis Moos teb tias :

"Kuv xav mas yog tus uas tus tswv nyiaj

zam nuj nqis ntau dua rau."

Yes Xus hais rau Xis Moos tias :

"Koj txiav raug lawm."

44 Yes Xus tig mus ntsia tus poj niam,

nws hais rau Xis Moos tias :

"Koj puas pom tus poj niam no ? Kuv

los hauv koj tsev, koj tsis tau hliv dej los

yaug kuv ko taw. Hos, tus poj niam no,

nws muab kua muag los ywg kuv ko taw,

thiab nws muab plaub hau los so kuv ko

taw. 45 Koj tsis nwj kuv, hos tus poj

niam no, txij thaum nws chaws los hauv

no, mas nws nwj kuv ko taw tsis tseg.

46 Koj tsis tau hliv roj saum kuv taub

hau, hos tus poj niam no hliv tshuaj tsw

qab ywg kuv ko taw. 47 Yog vim qhov

ntawd, mas kuv hais rau koj : tus poj

niam no muaj txhaum, nws tau ua txhaum

ntau, tab sis Ntuj daws tas lawm, vim nws

nyiam kawg. Tus uas luag zam rau nws

tsawg, mas nws nyiam tsawg."

48 Ces Yes Xus hais rau tus poj niam tias :

"Koj cov txhaum daws tas lawm."

49 Cov neeg nrog Yes Xus koom rooj

mov, nyias xav nyias tias :

"Tus ntawd yog leej twg, ua cas nws yuav

daws txhaum tau ?"

50 Yes Xus hais rau tus poj niam tias :

"Koj lub siab ntseeg cawm koj lawm. Koj

rov mus nyob kaj siab lug mog."

1 Yes Xus taug kev hla nroog

thiab hla zos. Nws qhia thiab tshaj

lub Moo Zoo txog Tswv Ntuj lub Ceeb

Tsheej. Pab Kaum Ob leeg nrog Yes Xus

mus. 2 Tseem muaj ib co poj niam uas

Yes Xus tau kho lawv dim ntawm dab

phem thiab dim ntawm lawv tus mob.

Cov ntawd muaj Mab Liab uas luag hu ua

Mas Ntas Las, yog tus uas Yes Xus ntiab

xya tus dab phem tawm hauv nws.

3 Muaj Zag, uas yog Sus Ntxas poj

niam, Sus Ntxas yog Hes Los tus tim

xyoob. Muaj Xus Xas Nas thiab coob

leej ntxiv. Lawv muab lawv lub cuab tam

los tsob hwb Yes Xus thiab cov thwj tim.

Ib tsoom neeg ntseeg thiab phooj ywg mloog Tswv Ntuj lus,

Hnub no, yog lis piam hnub chiv 11 lub caij nruab xyoo 3, niaj lub lis piam peb tuaj txoos ua npoj teev hawm Tswv Ntuj, vim peb xav ua neeg mloog lus txawj ua ntxim Tswv Ntuj siab. Thov kom Huab Tais Yes Xus cov lus hais rau peb hnub no, tho txoj kev zoo nyiam rau peb txhua leej taug.

Txoj kev zoo nyiam raws li Yes Xus qhia, txawv peb neeg ntiaj teb lub siab thiab zaj tswv yim xav. Txawm tias peb leej tib neeg ua dab tsi, yog peb ua li peb lub siab nyiam thiab peb zaj tswv yim xav xwb, peb yuav ua tsis tau zoo nkauj thiab zoo nyiam kom kawg. Txawm peb twb tsis ua txhaum leej twg, tsis ua siab leej twg, los peb yeej ua neeg zoo tsis txaus, yeej zoo tsis tag, vim tseem tshuav chaw ua kom zoo tshaj. Huab Tais Yes Xus cov lus xwb thiaj yuav qhia peb kom txawj ua tau zoo nyiam tshaj. Vim li ntawd, Lus Kas, tus sau Yes Xus cov lus hauv tsab ntawv Moo Zoo hnub no, qhia kom peb pom tshuav deb npaum li cas peb thiaj yuav ua tau neeg zoo nyiam ntxim Tswv Ntuj siab.

Hnub no, Yes Xus muab ob tug neeg lub neej los qhia peb. Tus Fas Lis Xais yog neeg muaj koob nto npe, ua neeg zej zog txwj laug, ua luag tus thawj coj, ua xib hwb qhia txuj ci. Nws saib nws tus kheej muaj nqes, vim lub teb lub chaw saib taus nws, vam khom nws, thov nws kev pab. Tus Fas Lis Xais txawm saib nws tus kheej yog neeg tseem ceeb : “36 Ib tug ntawm cov Fas Lis Xais caw Yes Xus mus nrog nws noj mov LK 7,36.” Tus poj niam ces lam yug txhaum los ua neeg xwb, twb tsis paub hais lus, hais tsis tau ib zag tseem ntsiab, lam tsa ncauj hais lo yaj lo yeeb, luag mloog tas los xyov luag twb tsis to taub nws hais dab tsi. Nws tseem ua neej nyob tsis muaj cuab muaj yig, lam nyob hnub xam hnub, ceeb laj ua neej ib hnub txog tsaus ntuj, raug luag ntxub, raug luag hnyos. Tus poj niam no lub neej yuav txom nyem tag npaum li, tuag los tuag tsis taus, lam ciaj sia nyiaj tshaib yoo nqhis, raug luag ntxias, raug luag xyav ua kua puv toj puv pes ua neeg plhom neeg plees, luag twb saib tsis taus hlo : “37 Muaj ib tug poj niam nyob hauv lub nroog ntawd, yog neeg txhaum LK 7,37.” Peb pom tus Fas Lis Xais thiab tus poj niam nkawd lub neej tug txawv tug. Ib tug yog neeg nplua nuj, neeg muaj meej mom, neej txawj ntse, luag tej qhuas thiab hwm. Lwm tus yog neeg pluag, me nyuam neeg pej xeem dog dig, pab tsis tau leej twg, tseem nkim luag lub caij nyoog thov khawv luag tej zog noj dawb, ua rau luag tej txaj muag.

Peb yuav tsum ceev faj, txoj kev ntshaw ua npau suav toog txog lub koob meej, qaug siab lias rau tej nyiaj txiag thiab ua tus neeg loj neeg khav theeb, tej ntawd, pab tsis tau peb ua nyog neeg ntseeg Yes Xus. Peb tsis txhob tsuj tus neeg ruam, tsis txhob ntshai tus neeg tshaib thiab nqhis, tsis txhob dhuav tus neeg pluag neeg txom nyem. Yes Xus zaj lus qhia rau peb hnub no lub ntsiab, tsis yog yog qhia tus neeg nplua nuj kom hlub tus pluag xwb. Tib neeg yeej paub, tus muaj yuav tsum cev tes pab tus pluag. Kuj tsis yog Yes Xus tsa ncauj thuam cov neeg txawj ntse thiab neeg nplua nuj. Yes Xus kuj tsis yog qhuas kom peb ua neeg tub nkeeg, ua neeg pluag nyob dawb thov khawv noj. Yes Xus qhia tias tus Fas Lis Xais thiab tus poj niam puav leej yog neeg luab nuj luab nqe, tshuav nuj tshuav nqe. Nkawd tshuav nuj nqes ntau heev them tsis taus rov rau tus tswv, txhais tias : peb txhua leej tshuav Tswv Ntuj nqe. Peb zoo li nkawd, peb yuav pauj tsis tau Tswv Ntuj kev hlub peb rau Tswv Ntuj. Peb zoo li tus Fas Lis Xais muab tsis tag peb lub siab los tiam Yes Xus. Peb ua ib sim neej haus tag pes tsawg ntu dej, rauv tag pes tsawg ntsum taws tsis txawj ua tsaug dej tsaug taws nco Tswv Ntuj txiaj ntsim. Tiam sis, peb tib neeg puav leej txhaum tag nrho li tus poj niam, kawg Tswv Ntuj thiaj ntshiab huv. Tus neeg kub siab teev hawm Tswv Ntuj muab tag nws lub siab los txi Tswv Ntuj, zoo tam zoj tus poj niam ua tau tej yam luag ntsia txawv txawv, nws tu siab rau nws tej txhaum quaj kua muag ntxaum Yes Xus ko taw. Yog tus neeg ntseeg Tswv Ntuj tseem txaj muag rau Tswv Ntuj, ces peb zoo li tus Fas Lis Xais, peb tiam tsis tau Yes Xus kom tag siab li tus poj niam tsis khuv xim hwj tshuaj tsw qab muab los pleev Yes Xus ko taw : “Nws li, nws kua muag ntxaum kuv ko taw thiab muab nws plaub hau los so. 45 Koj tsis nwj kuv, nws li, txij thaum kuv chaws los hauv no, nws nwj kuv ko taw tsis tseg. 46 Koj tsis tau pleev roj rau kuv taub hau, nws li, nws muab tshuaj tsw qab pleev kuv ko taw. 47 Yog vim qhov kuv hais rau koj no : nws txawm txhaum ntau puav leej thim tag rau vim nws muaj kev hlub loj ; tus luag thim tsawg rau, nws kev hlub yeej tsawg LK 7,44-47.” Huab Tais Yes Xus pom tus poj niam tsis txaj muag, nws hlub Yes Xus tag siab nrho ; hos tus Fas Lis Xais lam hu Yes Xus tuaj noj mov kom tag kev cai.

Yog peb tsis ntseeg Yes Xus zaj lus qhia hnub no, ces zoo li peb lam ua ib co neeg ntseeg teev hawm Tswv Ntuj yuav lub npe qhuav. Peb luj ncauj tuaj pos rhib, ua neeg hais tej lo lus loj loj tsis ntshai tub qaug leej twg. Luag pom yus lub siab nkhaus thiab lim hiam tag, yus twb pauv tsis ntxiv tus neeg phem neeg dog dig. Yog peb zoo li ntawd, ua neeg ntseeg thiab teev hawm Tswv Ntuj yeej tsis muaj txiaj ntsim dab tsi. Tiam sis, yog Yes Xus zaj lus qhia no ntoj deeg daws thoob plaws peb tej ntshuas siab, tshab plaws peb tus ntsuj duab ntsuj plig, ces peb yuav muaj Yes Xus kev thaj yeeb. Txoj kev mob kev nkeeg, kev txom nyem, kev ploj tuag los txog hnub twg los peb yuav tsis nco txhawj, tsis nco ntshai. Thov kom Huab Tais Yes Xus cov lus no pub kev kaj lug kaj nrig yuj xeeb lias nyab yees peb tej siab ntsws.

14.06.2013 Cwj Vuam Chiv

Last edited by NrhiavTswvNtuj on 9th June 2016, 10:07 am; edited 1 time in total

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 21st June 2013, 12:15 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°36

Re: COV ZAJ NYEEM-Xyoo C 2012-13

Post NrhiavTswvNtuj 21st June 2013, 12:15 pm

COV ZAJ NYEEM HNUB TIM 23/06/2013

( Chiv 12, Nruab Xyoo C )

Zaj nyeem 1 : Ntxas Kas Lias 12,10-11a ; 13,1
Lawv yuav ntsia tus uas luag nkaug.

10 Kuv yuav muab ib lub tswv
yim hlub neeg, ib lub tswv yim
nyiam thov Ntuj los rau Das Vis tsev
neeg thiab rau cov neeg nyob Yes Lus
Xas Les tib si. Lawv yuav tsa muag ntsia
txog kuv, lawv yuav xav pom tus uas
lawv nkaug. Lawv yuav nyiav nws xws li
nyiav ib tug tub twm zeej. Lawv yuav
quaj nws xws li quaj tus tub hlob.
11 Hnub ntawd, ib lub suab nyiav yuav
nrov loj zuj zus nyob Yes Lus Xas Les,
xws li Has Das Lis Moos lub suab nyiav
nyob hauv lub hav tiaj Mes Nkis Dos.

1 Hnub ntawd, dej yuav ntws nto rau Das Vis
tsev neeg thiab cov nyob Yes Lus Xes Les

rau lawv tej txhaum thiab kev luab tsuab.

Zaj nyeem 2 : Nkas Las Tais 3, 26-29

26 Vim nej sawv daws puav leej yog
Tswv Ntuj cov tub huv tib si nyob hauv
txoj kev ntseeg txog Yes Xus Pleev.
27 Nej sawv daws tau txais lub cim
ntxuav nyob hauv Leej Pleev, mas nej
hnav Leej Pleev lawm. 28 Tsis muaj
Yus Das los Hes Las, tsis muaj tus qhev
los tus twj lij, tsis muaj txiv neej los poj
niam. Vim nej sawv daws koom ua tib
leeg nyob hauv Yes Xus Pleev. 29 Vim
nej yog Leej Pleev tug, mas nej kuj yog
Has Nplas Has cov xeeb ntxwv, ces nej
yog cov txais lub txiaj ntsim raws li Ntuj
cog lus yuav pub.

Lus Kas Ntawv Moo Zoo 9, 18-24
Pob Zeb lees ntseeg. Yes Xus
qhia thawj zaug txog nws txoj kev txom nyem.

18 Muaj ib zaug, Yes Xus teev Ntuj ib
leeg, cov thwj tim nrog nws nyob, Yes Xus nug lawv tias :
"Tsoom sid hais tias kuv yog leej twg ?"
19 Cov thwj tim teb tias :
"Ib txhia hais tias koj yog Zam Ntxuav
Plig, ib txhia hais tias koj yog Es Lias,
tseem muaj lwm cov hais tias koj yog ib
tug yaj saub thaum ub sawv rov los."
20 Yes Xus hais rau lawv tias :
"Hos nej, mas nej hais tias kuv yog leej
twg ?" Pob Zeb teb tias :
"Koj yog Tswv Ntuj Leej Pleev."
21 Ces Yes Xus cheem thiab txwv lawv
kom txhob hais qhov ntawd rau leej twg.
22 Yes Xus tseem hais tias :
"Neeg Leej Tub yuav tsum raug txom
nyem loj. Cov txwj laus, cov Thawj Leej
Choj, thiab cov Kws Ntawv Ntshiab yuav
muab nws xyeeb pov tseg. Nws yuav
raug luag tua, tab sis hnub peb nws yuav sawv rov los."
23 Yes Xus hais rau sawv daws tias :
"Leej twg xav los raws kuv, nws yuav tsis
txhob nco txog nws, nws yuav niaj hnub
kwv nws tus ntoo cuam, ces nws yuav
lawv kuv qab. 24 Vim tias tus xav cawm
nws txoj sia, mas nws yuav ua nws txoj
sia ploj. Hos tus twg ua nws txoj sia ploj
vim kuv, mas tus ntawd cawm nws txoj sia.
25 Yog ib tug neeg txeeb tau lub ntiaj teb
tas huv si los ua nws tug, tab sis nws ua
nws ploj, los ua nws tus kheej puas tsuaj,
mas nws tau dab tsi zoo ? 26 Tus twg
txaj muag lees kuv thiab kuv cov lus, mas
thaum Neeg Leej Tub rov los muaj koob
meej, muaj Leej Txiv lub koob meej thiab
muaj cov Tshiab ntshiab lub koob meej,
nws kuj yuav txaj muag lees tus ntawd thiab.

NTHUAV NTAWV NTSHIAB.

Ib tsoom neeg ntseeg thiab phooj ywg hmov tshua,

Peb nyob hauv hnub chiv 12 nruab xyoo 3, yog ib hnub muaj nuj nqes heev rau peb tus neeg teev hawm Yes Xus. Peb txoj kev teev hawm Yes Xus yog ib txoj hau kev muaj txiaj ntsim tshaj plaws lwm txoj tag nrho. Peb thiaj muab lub sij hawm no los tham txog Yes Xus yog peb tus Huab Tais, txhawb peb txoj kev ua neeg ntseeg Yes Xus kom muaj zog tsis thim rov qab tau.

Peb yuav tsum pom thiab yuav tsum paub cais kev ua neeg ntseeg thiab teev hawm Yes Xus, txawv ntau Hmoob kev ntseeg thiab teev dab qhuas. Kev teev dab qhuas, yog teev dab niam dab txiv, teev dab caj dab ces raws li poj yawm txwv txoob coj thiab qhia kom ua. Hmoob ntseeg tias dab niam dab txiv muaj koob hmoov thiab muaj hwj huam pov hwm Hmoob. Hu ua tus Hmoob, thaum muaj ib yam xwv txheej, nws kawg hu niam hu txiv pab : “Niam aw ! Pab o ! Txiv aw ! Pab o !” Luag lwm haiv neeg, yam li tej Fab Kis : “Au secours !” Luag vam saib puas muaj tus tib neeg twg pab cawm luag. Yus thiab luag sib txawv, vim los ntawm txoj kev ntseeg los. Yus Hmoob teev dab, ua rau Hmoob ntseeg dab. Hmoob thiaj hais kam tias : “Ciaj ua neej nyob, tuag mus ua dab.” Piv li ntuj teb tag hmo, xyov tus tsiaj twg hla zos ua rau dev tom tsij qees qab zej dhau hauv zos. Hmoob lub ncauj tsis hais los lub siab yeej xav twj ywm tias yog muaj dab.

Peb yuav tsum paub tim li cas Hmoob thiaj teev dab qhuas ? Hmoob teev dab tsis yog tim nyiam dab, hos tim Hmoob ntshai dab looj koov, Hmoob thiaj teev dab, nplij ua zaj ua ntxeev ntxias kom tau dab. Neej thiab dab ciaj caub, ua yeeb ncuab nyob tsis taus ua ke. Neej yuav tsum teev, yuav tsum tiam dab noj dab haus kom dab txhob tshaib, ua dab qhev tas zog. Thaum muaj tuag, Hmoob thiaj muaj tua tsiaj txhu los txi los ntawg ua se plig npua plig nyuj rau tus tuag cab, tsis txhob los thab neej ; muab xyab ntaw los hlawv ua nyiaj ua kub rau tej tuag tau mus muas noj muas haus tsis txhob tshaib, txhob los txob neej. Tej kab mob kev nkeeg, tej xwv txheej yog tim dab looj koov rau neej, Hmoob ntseeg li ntawd. Yog tim yus tsis teev tsis tiam tej laus ntsuj duab ntsuj plig, cia luag tshaib thiab nqhis ces luag los txob, looj koov rau yus kom yus tsis nyab xeeb. Vim li ntawd, peb tsis xav kom muaj kev txob txhawj, peb thiaj nrhiav neeg pab peb nrauj dab pov tseg, los ua neeg ntseeg thiab teev Tswv Ntuj.

Peb txoj kev teev hawm Tswv Ntuj txawv ntau kev cai teev dab qhuas. Yav thaum peb teev dab, peb ua neeg ntxias thiab dag yeej dab. Ziag no, peb los teev hawm Tswv Ntuj, peb yuav qhib plho peb lub siab los npuab Tswv Ntuj, tso siab lug rau Tswv Ntuj ruaj nreb khov kho, tsis ntxeev, tsis thim lus, ua neeg ncaj ncees tso siab tuag nthi rau Tswv Ntuj. Tus yuav pab yuav cawm tau peb, yog Yes Xus. Peb ntseeg tias Yes Xus yog Tswv Ntuj Leej Tub. Yes Xus yog tus Huab Tais muaj hwj huam. Peb los teev hawm Yes Xus, peb yuav muaj Yes Xus lub hwj huam roos peb thiab pov hwm peb. Tiam sis, kom peb txhob to taub yuam kev tias peb los teev hawm Yes Xus kom peb muaj Yes Xus hwj huam tiv thaiv kab mob kev keeg, kev txob kev txhawj, kev ploj tuag, tsis yog li ntawd : “Npoj neeg hais tias kuv yog leej twg ?” 19 Lawv ib txhia hais tias : “Yog Zam Ntxuav Plig, lwm cov tias yog Es Lias, tej txhia tias yog ib tug yaj saub thaum ub sawv rov los LK 9,18-19.” Yog peb muab kev ntshai tuag los pauv kev teev hawm Yes Xus, ces peb yuav tsis ciaj neeg ntseeg Yes Xus. Peb yuav zoo li tej txhia neeg thim kev ntseeg Yes Xus rov mus zwm dab qhuas, nyiag kev rov mus ua neeb ua yaig, rov mus ua dab qhev los dab haj yam tsis muaj hwj huam pab lawv dim kev txob kev txhawj li.

Zaj ntawv Moo Zoo hnub no qhia peb tus neeg ntseeg kom paub Yes Xus kom tshab tshab. Kev paub Yes Xus tsam peev rau peb tog, nta tau peb taw, cuab tau peb zog ua rau dab txhawj thiab ntshai peb. Txoj kev teev hawm Yes Xus, yog kev nco Yes Xus txiaj ntsim tuag thiab pub qaum ntuj txoj sia rau peb : “Pob Zeb teb hais tias : “Koj yog Tswv Ntuj Leej Pleev.” 21 Nws txwv nkaus lawv tseev kom txhob qhia qhov ntawd rau leej twg hlo 22 Hais tias : “Neeg Leej Tub yuav tsum raug txom nyem loj, raug cov txwj laus, cov thawj leej choj thiab cov thoob xwm muab txhem pov tseg, tua tuag nthi, tiam sis hnub peb yuav tsim dheev los LK 9,20-22.” Yog peb tsis teev ntuj thiab, peb yuav muab tau dab tsi pauj Tswv Ntuj koob hmoov hlub peb ? Peb tej suab nkauj suab seev, lub caij nyoog peb muab los teev hawm Yes Xus thiab peb kev thim xav ua neeg mloog Yes Xus lus, tej ntawd pub peb ua tau lub siab loj siab tawv hla txhua yam kev iab kev daw. Peb tej kev txom nyem txawm loj npaum twg twb tsis cuag Yes Xus Tswv Ntuj Leej Pleev raug txom nyem hnyav tshaj peb. Txawm muaj neeg ntxub, muaj neeg lim hiam saib tsis taus peb los twb tsis cuag Yes Xus raug cov txwj laus ntxub thiab hiam, muab Yes Xus tua tuag nthi : “Leej twg ntshaw lawv kuv qab tuaj, nws txhob paub nws kheej thiab yuav niaj hnub pus nws tus ntoo cuam caum kuv, 24 Vim tus xav cawm nws ntsuj plig yuav ua nws plam plhuav ; tus ua poob nws ntsuj plig tim kuv, tus ntawd cawm tau nkaus nws LK 9,23-24.” Peb tsis txhob poob siab, yog peb lub siab npuab Yes Xus tuag nthi, txawm peb lub cev qaij qaug los txog, tsis muaj tug hlub, tsis muaj tug tshua los peb muaj feem nrog Yes Xus ciaj sia nyob ib txhis saum qaum ntuj. Tus tsis quam ntsej Tswv Ntuj tuag nthi, txawm neeg yuav tuaj nto nti ntsawm nkaus nta nws lub ntees los tej zaum nws twb yuav mus poob qho ciaj dab ciaj tso.

Peb txoj kev teev hawm Tswv Ntuj yog kev nco Tswv Ntuj txiaj ntsim hlub neeg li Yes Xus cov lus qhia. Yog peb ua tau li ntawd, txawm peb tuag los Tswv Ntuj tsis pub peb tuag, txawm peb ploj los peb muaj feem nrog Yes Xus ciaj qaum ntuj sia nyob ib txhis.

20.06.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 23rd June 2013, 6:09 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°37

Re: COV ZAJ NYEEM-Xyoo C 2012-13

Post NrhiavTswvNtuj 23rd June 2013, 6:09 pm

Tsoom nyeem cov zaj nyeem Hnub Chiv,

Thov txim ntau, cas cab sab hloov tshiab lawm es tej thaum cia li muab thuam yam tsis paub li. Kuv twb tso cov zaj nyeem tag nrho tib si, hnub no mam rov los saib cas ploj ib txhia lawm.

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**Maiv Tooj** 28th June 2013, 6:08 pm

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°38

Re: COV ZAJ NYEEM-Xyoo C 2012-13

Post Maiv Tooj 28th June 2013, 6:08 pm

COV ZAJ NYEEM HNUB TIM 30/06/2013
( Chiv 13, Nruab Xyoo C )

Zaj nyeem 1 : 1 Vaj Ntxwv 19, 16b.19-21
16 Koj tsa Yes Hus ua vaj kav
His Xas Lais thiab koj pleev Es Lis Xais
ua Yaj Saub hloov koj.
19 Ces Es Lias sawv kev mus. Nws mus
nrhiav tau Es Lis Xais uas yog Xas Fas
tus tub. Es Lis Xais tab tom laij ib thaj
teb uas muaj kaum ob plag. Nws tab tom
laij plas kawg. Es Lias hla mus ze
ntawm Es Lis Xais, nws pov rhees nws
lub tsho tshaj sab rau saum Es Lis Xais xub pwg.
20 Ces Es Lis Xais tso plhuav nws cov
nyuj tseg, nws khiav khiav mus caum
Es Lias. Nws hais tias :
"Koj cia kuv mus hais ob peb lo lus nplij
kuv niam thiab kuv txiv tso, ces kuv yuav nrog koj mus."
Es Lias teb tias :
"Koj rov mus. Kuv tau ua dab tsi rau koj ?"
21 Es Lis Xais thiaj rov mus, nws muab
nws nkawm nyuj tua. Nws muab rab
voom los rauv hau nqaij kom siav, ces
nws muab faib rau cov neeg nrog nws ua
hauj lwm noj, ces nws sawv mus nrog Es
Lias, nws ua Es Lias tus tub txib.

Zaj nyeem 2 : Nkas Las Tais 5, 1.13-18
1 Leej Pleev cawm peb dim, kom
peb twj lij mus li. Li ntawd, mas
nej nyob ruaj nreb mog. Nej tsis txhob
rov mus nkag rau hauv rab quab ua qhev.
13 Kuv cov kwv tij, Ntuj hu nej mus taug
txoj kev twj lij. Tab sis, yuav tsis txhob
cia txoj kev twj lij no ntxeev mus mloog
lub cev nqaij. Nej yuav cia txoj kev
nyiam coj, kom nej ib leeg tsob hwb ib
leeg. 14 Vim muaj ib lo lus qhia ntim
tau Txoj Cai tas huv si, yog lo lus no :
‘Koj yuav nyiam cov neeg nyob ze koj, ib yam li koj nyiam koj.’
15 Tab sis, yog nej sib tog thiab nej ib
leeg ntxo ib leeg, mas nej ceev faj, vim
nej rov rhuav nej pov tseg tas huv tib si.
16 Kuv hais rau nej tias : nej cia Leej
Ntuj Plig coj nej lub neej, ces nej yuav
tsis mloog nej lub cev ntshaw. 17 Vim
qhov uas lub cev ntshaw tsis yog qhov
uas lub tswv yim ntshaw. Hos qhov uas
lub tswv yim ntshaw, kuj tsis yog qhov
uas lub cev ntshaw. Lub cev thiab lub
tswv yim tsis sib haum, vim li ntawd,
muaj ntau zaus, nej thiaj tsis ua qhov uas nej lub siab xav ua.
18 Yog nej cia Leej Ntuj Plig coj nej,
mas nws tsis zwm rau Txoj Cai. 19 Yog
nej mloog nej lub cev, mas nej yuav zoo
li no : yuav muaj kev ua plees ua yi, ua
tsis huv, yuav nrhiav kev ua phem.

Lus Kas 9, 51-62
51 Lub sij hawm uas Yes Xus yuav
ncaim lub ntiaj teb, los yuav txog, ces
nws ua siab tawv qhawv mus pem Yes
Lus Xas Les. 52 Yes Xus xa ib co ua
ntej mus fi xov. Cov neeg fi xov sawv
kev mus, lawv mus hauv ib lub zos Xas
Mas Lias kom tau npaj txhua yam rau
Yes Xus. 53 Tab sis cov Xas Mas Lias
tsis txais Yes Xus, vim Yes Xus mus
pem Yes Lus Xas Les. 54 Ob tug thwj
tim Yas Kos thiab Zam nkawd pom li
ntawd, nkawd hais tias :
"Huab Tais, koj puas xav kom peb hu ib
co hluav taws nqes saum ntuj los hlawv
lawv ?" 55 Tab sis Yes Xus tig los cem
nkawd. 56 Ces lawv mus ntxiv rau lwm lub zos.
57 Thaum Yes Xus lawv mus, nyob
ntawm kev, muaj ib tug neeg hais rau
Yes Xus tias : "Koj mus qhov twg los
kuv yuav raws koj mus."
58 Yes Xus hais rau nws tias :
"Hma muaj hma lub qhov nkaum, hos tej
noog ya saum ntuj los lawv muaj lawv
lub zes. Tab sis Neeg Leej Tub tsis muaj
chaw rau ncoo."
59 Yes Xus tseem hais rau lwm tus neeg
tias : "Koj raws kuv mus."
Tus ntawd hais tias :
"Thov koj cia kuv mus faus kuv txiv tso."
60 Tab sis Yes Xus hais rau nws tias :
"Koj cia cov tuag faus lawv cov neeg
tuag, hos koj, mas koj mus tshaj Tswv
Ntuj lub Ceeb Tsheej."
61 Tseem muaj ib tug hais tias :
"Huab Tais, kuv yuav raws koj mus, tab
sis thov koj cia kuv rov mus hais ib lo lus
ncaim tseg rau kuv tsev neeg tso."
62 Yes Xus hais rau nws tias :
"Leej twg tuav rab khais lawm, nws
tseem tig ntsia rov tom qab, mas nws tsis
phim Tswv Ntuj lub Ceeb Tsheej."

NTHUAV NTAWV NTSHIAB.

Ib zeej tsoom neeg ntseeg txhua leej,

Hnub no yog lis piam hnub chiv 13, lub caij nruab xyoo 3. Xyov tsoom neeg ntseeg puas xam pom peb txoj kev teev hawm Tswv Ntuj loj thiab muaj nuj nqes rau peb. Vim li ntawd, peb yuav los nrog sawv daws tham txog kev ua neeg teev hawm Tswv Ntuj raws li Yes Xus qhia hauv nws zaj ntawv Moo Zoo hnub no.

Peb yuav tsum paub, txoj kev los teev hawm Tswv Ntuj, yog ib txoj kev peb tuaj yeem xaiv peb tus kheej, peb txaus siab thiab peb pom zoo los ua neeg ntseeg Tswv Ntuj, tsis muaj leej twg yuam peb. Ua li ntawd, kev ua neeg ntseeg Tswv Ntuj yog txoj kev zoo li cas ? Peb yuav tsum to taub txoj kev ua neeg ntseeg Tswv Ntuj. Peb los ua neeg teev hawm Tswv Ntuj, muaj ntau yam hauv peb lub neej, hauv peb lub siab thiab hauv peb lub tswv yim peb yuav tsum nrauj pov tseg, hloov dua neej, hloov dua siab thiab hloov dua tswv yim tshiab. Lub qub neej yam li kev sib cav sib ceg, kev sib chim, sib ntxub, sib thuam no, peb yuav tsum muab txiav pov tseg. Peb pib dua lub neej tshiab ua kom phim tus neeg teev Tswv Ntuj, vim Tswv Ntuj yog kev sib haum xeeb, sib hlub, sib pab sib nres. Peb yuav sib yoog kom nyob tau ua ke, hais tej lus zoo rau luag, ncheem yus lub ncauj txhob liam, txhob tsawm luag. Lub qub siab luv yuav rub kom ntev tuaj ; lub siab dub, siab nkhaus yuav tsum kho kom ncaj rau ; lub siab lim hiam yuav tsum nrauj thiab tso pov tseg. Tsis txhob ua neeg huab noj huab haus, tub sab, tub nyiag, khib rau luag, txeeb luag teej tug, thab luag txij nkawm. Txoj kev ntseeg Tswv Ntuj yog ntseeg Yes Xus tej lus qhia muaj koob hmoov hloov tau peb lub neej, muab lub siab thiab lub tswv yim tshiab kom ciaj cag hauv peb : “51 Thaum puv lub caij nyoog nws yuav ncaim los txog, Yes Xus ua ntsej muag tawv qhawv mus pem Yes Lus Xas Les. 52 Nws xa ib co tshaj xo sawv nws pliaj plhu, lawv sawv kev mus, lawv nkag hauv ib lub zos Xas Mas Lias mus npaj chaw tos nws. LK 9,52-53” Muaj ntau leej ntau tus neeg tsis paub txoj kev ntseeg Tswv Ntuj, txeeb txoj kev ntseeg Tswv Ntuj tib yam li tib neeg sib txeeb liaj txeeb teb, sib txeeb vaj txeeb tsev ua lawv teej lawv tug. Txoj kev ntseeg Tswv Ntuj tsis yog tus xib hwb ub tus xib hwb no lub “church” los nws pab neeg ntseeg. Cov neeg ntseeg coj li ntawd, yuam kev, lawv txoj kev teev hawm tsis tau koob hmoov. Peb tsis txhob muab Yes Xus lub npe los ua lag ua luam, ua “church” kaus tib neeg lub dab lub zog noj. Vim txoj kev ntseeg Tswv Ntuj yog Tswv Ntuj tug, tsis yog peb tib neeg leej twg teej tug. Txoj kev ntseeg Tswv Ntuj yog koob hmoov Tswv Ntuj pub rau tus neeg ntseeg txais, yam li Has Nplas Has thiab tsoom leej ntshiab muaj Tswv Ntuj hwj huam. Peb yog Yes Xus thwj tim yog peb mloog Yes Xus lus, ua kom peb lub neej tsim txiaj, muaj kev sib hlub sib pab nyob hauv peb ; tus neeg siab loj siab dav hlub nws lub cuab lub yig thiab hlub ib zeej tsoom sawv daws yog tseem Yes Xus thwj tim ; tus neeg ncaj ncees, tsis lim hiam, tsis khav theeb taj tau Yes Xus pliaj plhu : “Huab Tais, koj puas kam peb hu hluav taws nqes saum ntuj los muab cov ntawd hlawv?” 55 Nws tig ntiag los cem lawv ceev nrooj, 56 Thiab lawv taug kev mus dua lwm lub zos. LK 9,54-56” Peb tus neeg ntseeg thiab teev hawm Tswv Ntuj tsis txhob rawm khav tias peb yog neeg ncaj ncees zoo tshaj tej neeg teev pej kum dab qhuas. Vim Yes Xus tsis ua tus neeg loj neeg khav theeb. Tus neeg mloog Yes Xus lus, nws kuj yuav tsis txhob ua neeg loj thiab khav theeb. Peb tsis txhob taij Yes Xus tej hwj huam kom tau ntsej muag rau peb, zoo li cov thwj tim hais kom Yes Xus nplua cov Xas Mas Lias, tso hluav taws saum qaum ntuj los hlawv cov Xas Mas Lias. Yog peb hwm Tswv Ntuj li Yes Xus qhia, peb yuav cuab ntsej mloog Yes Xus kev txob txhawj, tav twg li muaj tus neeg kub siab thiab hwm Tswv Ntuj tag siab nrho : “58 Yes Xus teb rau tus ntawd : “Tej plis muaj qhov av, tej noog ya saum ntuj muaj zes, tab sis Neeg Leej Tub tsis muaj lub chaw tso taub hau LK 9,58.” Npaum li cas, Yes Xus tos peb txhua leej nrog Yes Xus ua kom Tswv Ntuj qaum ntuj tuaj txog ntiaj teb no. Yes Xus pom tus twg los yog tus xav txog nws tus kheej lub cuab lub yig, nyias tsuas txhawj nyias kev noj kev haus li tus plis nrhiav nws lub qhov nkaum thiab tus noog kom tau zes nyob. Yog tus neeg ntseeg thiab teev Tswv Ntuj tsis hloov neej, tsis hloov siab thiab tswv yim ces tsis tsim nyog txoj kev ua neeg ntseeg thiab teev hawm Tswv Ntuj : “61 Tseem muaj lwm tus hais ntxiv : “Huab Tais, kuv raws koj nkaus, tab sis tso lus rau kuv xub mus tu moo rau kuv tsev neeg tso.” 62 Yes Xus hais rau nws : “Leej twg cev tes rau rab khais, tseem tig ntsia rov tom qub qab tsis phim rau Tswv Ntuj qaum ntuj LK 9,61-62.” Peb tso siab tsis tag rau Yes Xus, qhov zoo Yes Xus qhia rau peb ua, peb tsis kam ua. Qhov qub yam phem peb ua kam, Yes Xus kom peb nrauj, peb tsis kam tso pov tseg. Peb tsis xav ua neeg npuab Yes Xus kom tag siab nrho. Peb zoo li tig ntsia rov tom qab, tseem khuv xim lub qub neej.

Ib zeej tsoom neeg ntseeg thiab phooj ywg, peb txeeb tsis tau txoj kev teev hawm Tswv Ntuj ua peb leej twg tug. Vim li ntawd, txawm peb lub ncauj hais tau tias peb yog neeg ncaj ncees, neeg zoo los luag pom peb lub siab dub txig nkhaus cees tsis hloov ces tsis muaj txiaj ntsim dab tsi. Tiam sis, tus neeg ncaj ncees ntshiab huv muab tag nws lub neej, lub siab thiab lub tswv yim cog rau Huab Tais Yes Xus xib teg, nws taj tau Yes Xus lub pliaj plhu ua tau Tswv Ntuj qaum ntuj kav tuaj txog yaj ceeb no.

27.06.2013 Cwj Vuam Chiv

Last edited by Maiv Tooj on 27th July 2013, 11:24 am; edited 1 time in total

**Maiv Tooj** 1st July 2013, 4:00 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°39

Re: COV ZAJ NYEEM-Xyoo C 2012-13

Post Maiv Tooj 1st July 2013, 4:00 am

Tsoom nyeem Ntawv Ntshiab lub lis piam no,

Thov txim, cas maj maj es tso zaj nyeem ib yuam kev lawm.

**NrhiavTswvNtuj** 19th July 2013, 9:55 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°40

Re: COV ZAJ NYEEM-Xyoo C 2012-13

Post NrhiavTswvNtuj 19th July 2013, 9:55 am

COV ZAJ NYEEM HNUB TIM 07/07/2013
( Chiv 14, Nruab Xyoo C )

Zaj nyeem 1 : His Xais 66,10-14 Haiv neeg Tswv Ntuj xaiv nyob thaj yeeb.

10 Nej kav tsij nrog Yes Lus Xas
Les zoo siab mog ! Nej sawv
daws uas nyiam Yes Lus Xas Les, nej
dhia hom khaj rau nws mas ! Nej sawv
daws uas nej tau ntoo xyom vim Yes Lus
Xas Les, mas nyem no nej kav tsij dhia zoo siab hom khaj !
11 Nej thiaj yuav tau mis noj tsau npo,
nej yuav tau ntxais nws lub mis nplij neeg
nyob ntawm nws lub xub ntiag muaj hwj chim.
12 Vim HUAB TAIS hais li no:
"Ntsia saib ! Kuv coj kev vam meej mus
cuag Yes Lus Xas Les zoo li ib tug niam
dej, kuv coj tsoom kuj cuab kev nplua nuj
mus cuag Yes Lus Xas Les xws li ib tug
dej phwj. Lawv ris Yes Lus Xas Les cov
mos liab ntawm duav, lawv plhws cov
mos liab saum hauv caug.
13 Kuv yuav nplij nej xws li ib tug niam
nplij nws tus me nyuam. Nyob hauv Yes
Lus Xas Les kuj yuav muaj tus nplij nej.
14 Nej pom muaj li ntawd, nej yuav zoo
siab dhia hom khaj, nej cov pob txha yuav tawg paj xws li nroj.
HUAB TAIS cov tub txib yuav paub HUAB TAIS txhais tes.

Zaj nyeem 2 : Nkas Las Tais 6,14-18

14 Ntawm kuv, mas yog kuv xav tau
ntsej muag, mas kuv kawg xav kom tau
nyob hauv peb tus Huab Tais Yes Xus
Pleev tus ntoo cuam xwb. Nws muab lub
ntiaj teb neeg dai saum ntoo cuam rau
kuv, thiab nws muab kuv dai saum ntoo
cuam rau lub ntiaj teb neeg.
15 Ua lub cim txiav tsis muaj dab tsi
zoo, hos tsis ua lub cim txiav kuj tsis
muaj dab tsi txawv : qhov tseeb yog yuav
tsum ua tus neeg tshiab.
16 Thov kom tas tsoom neeg taug txoj
kev no, thiab Tswv Ntuj tsoom His Xas
Lais, sawv daws tau nyob kaj siab lug,
thiab tau Ntuj txoj kev hlub.
17 Txij no mus, txhob muaj neeg tsim
kev ntxhov rau kuv ntxiv : kuv ris Yes
Xus cov caus pliav puv kuv lub cev.
18 Kwv tij sawv daws, peb tus Huab Tais
Yes Xus Pleev lub txiaj ntsim nrog nej
lub tswv yim nyob. Ua li.

Lus Kas Ntawv Moo Zoo 10,1-12.17-20
1 Dhau qhov ntawd lawm, Huab
Tais tseem xaiv xya caum ob leeg,
nws xa lawv mus tej pab ob leeg, ua nws
ntej mus rau hauv cov nroog thiab tej
qhov chaw uas nws yuav mus. 2 Nws hais rau lawv tias :
"Qoob loo zoo sau muaj ntau kawg, tab
sis cov tub zog muaj tsawg. Nej thov tus
Tswv qoob kom nws xa ib co tub zog tuaj
sau nws cov qoob. 3 Nej saib ! Kuv xa
nej zoo li ib co yaj mus nyob nruab nrab
ib cov hma. 4 Nej tsis txhob nqa nas
nyiaj, txhob ris hnab, txhob rau khau,
txhob hais lus hawm leej twg ntawm kev.
5 Nej chaws mus hauv lub tsev twg, nej
xub hais tias : "Lub tsev no nyob kaj
lug !" 6 Yog muaj txoj kev kaj lug ib
leeg tub nyob ntawd, mas nej txoj kev kaj
lug yuav roos nws. Yog tsis muaj, mas
nej txoj kev kaj lug yuav rov los rau nej.
7 Nej nyob hauv lub tsev ntawd, nej noj
nej haus tej yam uas lawv muaj hauv tsev,
vim tus tub zog tsim nyog txais nqi zog.
Nej txhob tawm hauv ib lub tsev mus
nyob dua lwm lub. 8 Nej mus hauv lub
nroog twg, yog luag txais nej, nej noj tej
yam uas luag muab rau nej. 9 Nej kho
cov neeg mob hauv lub nroog ntawd kom
zoo, thiab nej hais rau lawv tias : "Tswv
Ntuj lub Ceeb Tsheej tuaj txog ze nej lawm."
10 Tab sis yog nej mus hauv lub nroog
twg, luag tsis txais nej, nej tawm mus
nraum tej tshav puam nej hais tias :
11 "Tab yog tej plua av uas lo peb ko taw
hauv nej lub nroog no, peb muab so tseg
rau nej huv si. Tab sis, nej yuav tsum
paub tias Tswv Ntuj lub Ceeb Tsheej tuaj txog ze lawm."
12 Kuv hais rau nej, Hnub ntawd, lub
nroog Xos Dos Mas yuav raug txim sib
dua lub nroog ntawd.
yog nws xyeeb tus xa kuv tuaj."
Xya caum ob leeg thwj tim rov qab los.
17 Pab xya caum ob leeg rov qab los
txog, lawv zoo siab, lawv hais tias :
"Huab Tais, tab yog cov dab phem, tsis
kav lawv zwm rau peb "vim koj lub npe".
18 Yes Xus hais rau lawv tias :
"Kuv twb ntsia Xas Tas poob saum ntuj
los zoo li ib kab xob laim ! 19 Nej saib !
Kuv pub hwj huam rau nej kom nej ko
taw tsuj tau nab, tsuj kab lij tshooj, tsuj
Yeeb Ncuab lub hwj huam tib si, tsis
muaj dab tsi ua xwv txheej tau rau nej.
20 Nej tsis txhob zoo siab vim dab zwm
rau nej. Nej yuav zoo siab vim nej lub
npe muab sau cia saum ntuj lawm."

NTHUAV NTAWV NTSHIAB.

Ib tsoom neeg ntseeg thiab kwv tij phooj ywg,

Peb nyob hauv lis piam hnub chiv 14 nruab xyoo 3. Hnub no, peb yuav los tham txog lub txiaj ntsim kev tshaj Yes Xus lub Moo Zoo.

Txij hnub peb los ua neeg ntseeg thiab teev hawm Tswv Ntuj, peb txhua leej txhua tus puav leej yog Yes Xus thwj tim, tsis hais tus hlob tus yau, tus laus tus hluas. Kev ua Yes Xus thwj tim yog nrog Yes Xus tshaj nws lub Moo Zoo. Tiam sis, peb tsis muaj cai lam taus lam tshaj Yes Xus lub Moo Zoo li nyias siab nyiam siab xav. Tus thwj tim tsuas yog tus tub txib. Tus tub txib tsis yog tus tswv, tus tub txib ua tsis tau tag txhua yam ywj siab li tus tswv. Kev ua Yes Xus thwj tim kuj yog ib lub neej peb yuav tsum kawm kom muaj kws qhia, peb thiaj txawj hais Yes Xus lus, txawj nrog Yes Xus tshaj nws lub Moo Zoo raws kab raws kev cai, tsis yuam kev hauv paus nto plaws ntsis : “14 Koj yuav tsum txawm hauv yam koj tau kawm los thiab koj twb paub qhov tseeb, paub ntawm leej twg koj tau kawm los,15 Thiab puag thaum koj tseem me yau koj twb paub cov ntawv ntshiab yog yam muaj cuab kav ua tau koj thoob tsib kom tau kev cawm vim txoj kev ntseeg uas txoj hauv Leej Pleev Yes Xus. 2TMT 3,14-15 ” Li ntawd, peb twb pom muaj coob leej ntau tus xib hwb cia li sawv ua xib hwb coj ib pab neeg teev Yes Xus raws li nyias zaj tswv yim (Les groupes de sectes chrétiennes). Vim li, thiaj muaj ntau hom neeg ntseeg teev Yes Xus loj cov kem tsuab. Sawv daws twb teev tib tug Yes Xus xwb los nyias sib txawv nyias, npaum hmoob teev nyias dab qhuas, niaj hnub sib thuam ua tsis tau ib pab ib pawg. Neeg pom, neeg twb tsis qhuas, Tswv Ntuj yuav ua cas qhuas cov neeg teev Yes Xus tsis txawj sib haum no ? Tseem muaj ntau tus xib hwb koom tib lub Koom Txoos, tsis kav twb tsis txawj sib yoog, tsis xav sib pom, nyias fee nyias das ua nyias pab nyias pawg. Yog peb tseem Yes Xus thwj tim tiag, peb yuav txawj txaj muag rau peb tej kev sib ntxub fee duj de. Peb yuav tau mloog kom zoo Yes Xus cov lus ceeb toom Yes Xus hais rau nws cov thwj tim, thaum nws xa lawv mus tshaj nws lub Moo Zoo : “2 Nws hais rau lawv : “Qhov ib, qoob loo muaj ntau heev, ob tuaj tsawg tub zog ; nej thov tus tswv qoob kom xa tej tub zog tuaj sau nws tej qoob.3 Nej mus, kuv xa nej tam zoj cov yaj hauv nruab nrab cov hma. Lk 10,2-3 ” Yuav ua li cas txoj dej num tshaj Yes Xus lub Moo Zoo thiaj tau txiaj ntsim ? Tus mus tshaj Yes Xus lub Moo Zoo tsuas zoo li tus tub zog sau qoob xwb. Yes Xus yog tus tswv qoob. Cov tub zog sawv Yes Xus npe sau qoob, yog Vaj Qhia, cov Tswv Qhia thiab cov Txiv Plig. Vim Yes Xus yog tus tso lus thiab tso cai rau lawv. Yog lawv tsis hu peb leej twg ua tub zog sau qoob, peb cia li sawv peb tus kheej tshaj Yes Xus lub Moo Zoo, ces peb zoo li cov hma mus txhom tej yaj tom kom tawg tas. Tej pawg neeg teev Yes Xus nyias qhib nyias lub “church” pheem puam, muaj kiaj kiam sib khib, ua puas Yes Xus lub Moo Zoo. Vim Yes Xus lub Moo Zoo nthuav kev sib haum xeeb, rub tib neeg ua npoj, ua ib cuab ib yig, ua kwv ua tij, sib zam, sib yoog, sib hlub.

Tsis tas li ntawd, peb yog Yes Xus ib tug tub txib, peb yuav tso siab thiab ntseeg Yes Xus. Yog peb tsis ntseeg thiab tsis tso siab rau Yes Xus, peb puas yuav muaj zog teev ntuj thawm niaj thawm xyoo. Peb yuav ua dev nquag thawj peb hnub, ntev mus, peb yuav ua neeg ntseeg taug kev zij qab nki li tus qaug cawv taws qab ke, taws qaum kev ceeb laj ua neeg ntseeg kom tom thawj tas sim neej. Thaum muaj mob muaj nkeeg los txog, peb kawg yuav nyiag kev rov mus ua neeb ua yaig saib ; txhob vam tias neeb thiab yaig yuav pab tau peb kev txhawj xeeb, lam ua kom siab nqig xwb. Ntxiv ntawd, hauv ib tug tib neeg lub neej tseem muaj teeb meem ntau tsav ntau yam. Nyob hauv yus sim neej, muaj tej lub caij nyoog, muaj neeg lim hiam, muaj neeg ntxub, nrhiav kev tsim txom yus, lem yus, txheeb yus tej liaj teb, luab nuj luab nqi huab yus noj yus haus, ua plaub ua ntug khoo yus, tsuj yus. Tseem muaj tej txhia neeg ntseeg, lub cuab lub yig raug piam tseem puas tag vim kev plees kev yis, ua nkauj feb nraug fav. Tus neeg ntseeg raug tej teeb meem txom nyem no, nws kev tso siab rau Yes Xus lo lus, yog nws kev tshaj Yes Xus lub Moo Zoo thiab pus nws tus nkhib ntoo cuam taug Yes Xus qab : “10 Hauv lub nroog twg nej nkag mus thiab luag tsis txais nej, nej tawm mus tom tshav puam nej hais tias : 11 “Tab yog nej lub nroog tej plua av lo peb ko taw, peb muab so cia rau nej huv si. Tiam sis, kom nej paub, Tswv Ntuj qaum ntuj tuaj txog ze lawm. 12 Kuv hais rau nej, hnub ntawd, tseem yuav kws lub nroog Xos Dos Mas tshaj lub nroog ntawd LK 10,10-11.” Tej cim Tswv Ntuj ua tshwm tuaj rau peb pom hauv Koom Txoos Kav Tos Liv, qhia peb tias peb nyob hauv txoj tseem kev teev hawm Yes Xus thiab txoj muaj koob hmoov. Sawv daws paub Txiv Vaj Qhia Zam Paj Lug 2, ua Yes Xus ib tug tub txib khwv ciaj khwv tuag tshaj Yes Xus lub Moo Zoo qhia ntiaj teb neeg sib haum xeeb, sib hlub. Txawm nws tau ib tus mob phem tshee (Parkinson) ua rau nws raug txom nyem, los nws ntxeem tas zog mus ntsib ib zeej tsoom neeg, thaum tsis taus hlo tuag kus thiaj li tag : “20…txhob rawm zoo siab tias tej dab zwm rau nej, hos zoo siab tias nej tej npe sau tseg nyob txheej ntuj saud LK 10,20.” Thaum TVQ Zam Paj Lug 2 tseem ua neej nyob, neeg los qhuas thiab nws tej lus muaj ceem deev tau neeg siab. Nws tuag tas, Tswv Ntuj pauj hwj huam rau nws kev ua thwj tim tshaj Yes Xus lub Moo Zoo. Lub Koom Txoos Kav Tos Liv lees paub TVQ Zam Paj Lug 2 muaj Tswv Ntuj hwj huam cawm tau 2 tug neeg mob thiab txom nyem thov txog nws.

Ib tsoom phooj ywg, peb qhov muag pom xyeem TVQ Zam Paj Lug 2 ua Yes Xus ib tug tub txib mloog lus, nws tau koob tau hmoov muaj Tswv Ntuj hwj huam. Peb thiab, peb yuav mloog Koom Txoos Kav Tos Liv kev qhuab qhia, mloog cov Txiv Plig, cov Tswv Qhia thiab mloog Vaj Qhia lus, peb thiaj yuav txawj ua ib co neeg teev hawm Tswv Ntuj muaj txiaj ntsim tau koob hmoov.

04.07.2013 Cwj Vuam Chiv

Last edited by NrhiavTswvNtuj on 27th July 2013, 9:02 am; edited 1 time in total

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 19th July 2013, 10:22 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°41

Re: COV ZAJ NYEEM-Xyoo C 2012-13

Post NrhiavTswvNtuj 19th July 2013, 10:22 am

COV ZAJ NYEEM HNUB TIM 14/07/2013
( Hnub chiv 15, Nruab Xyoo C )

https://youtu.be/DC5uVTt8nVU

Zaj nyeem 1 : Txoj Cai Ob 30,10-14

10 HUAB TAIS yuav zoo siab pom koj ua lub neej kaj
siab xws li nws zoo siab rau koj cov yawg koob thaud.
11 Txoj cai uas hnub no kuv qhia koj,
tsis yog ib txog cai nruj rau koj, uas koj
yuav coj tsis taus. 12 Tsis yog ib txog
cai nyob puag qaum ntuj, koj yuav hais tsis tau tias:
"Leej twg yuav sawv peb chaw mus
nrhiav txoj cai qaum ntuj los qhia peb, peb thiaj coj tau ?"
13 Kuv txoj cai kuj tsis yog nyob puag
ntug hiav txwv sab tim ub, koj yuav hais tsis tau tias :
"Leej twg yuav sawv peb cev mus nrhiav
txoj cai sab ntug hiav txwv puag tim ub
los qhia peb, peb thiaj coj tau ? "
14 Vim tias lo lus nyob ze koj. Lo lus
xeeb txawm rau hauv koj lub ncauj, thiab
hauv koj nruab siab. Koj yuav coj tau lo lus ntawd.

Zaj nyeem 2 : Kos Los Xais 1, 15-20
Leej Pleev yog tus ntaus thawj.

15 Yes Xus yog tus Tswv Ntuj uas qhov
muag pom tsis tau tus duab. Nws yog tus
xub yug ntawm txhua tsav txhua yam uas Ntuj tsim los.
16 Nyob hauv Leej Pleev, Ntuj tsim
txhua yam nyob saum ntuj thiab nyob
ntiaj teb no, tsim txhua yam pom tau thiab
pom tsis tau, tsim txhua tus Tshiab zaum
saum theej kiab, thiab txhua tus Tshiab ua
Huab Tais, ua Vaj Txheeb, thiab muaj
hwj huam. Ntuj tsim tas puas tsav yam
nyob hauv Leej Pleev, kom lawv tsob hwb Leej Pleev.
17 Leej Pleev xub nyob dua txhua tsav
txhua yam. Tas puas tsav yam muaj txoj
sia nyob hauv Leej Pleev. 18 Leej PLeev
yog lub Taub Hau nyob saum lub Cev :
lub Cev yog lub Koom Txoos. Leej Pleev
yog lub Hauv Paus, nws yog tus xub yug
hauv cov tub tuag los.
19 Tswv Ntuj muab txhua yam uas zoo
tshaj, coj los nyob hauv Leej Pleev.
20 Nyob hauv Leej Pleev, Tswv Ntuj
xyiv fab hlo rov nrog tas txhua tsav txhua
yam sib haum xeeb. Vim Leej Pleev, mas
txhua tsav txhua yam nyob ntiaj teb thiab
nyob saum ntuj rov tau nyob thaj yeeb
hauv Leej Pleev cov ntshav uas ntws saum ntoo cuam

Lus Kas Ntawv Moo Zoo 10, 25-37

Lo lus qhia loj tshaj. Tus Xas Mas
Lias siab zoo. 10 : 25 - 37.
25 Lub sij hawm ntawd, ib tug Kws Lij
Choj sawv, nws xav sim Yes Xus ces nws
nug tias : "Xib Hwb, kuv yuav ua dab tsi
thiaj tau txais txoj sia nyob mus li los ua
kuv lub cuab tam ?" 26 Yes Xus hais rau
nws tias :
"Nyob hauv Txoj Cai muaj dab tsi sau
tseg ? Koj nyeem dab tsi ? 27 Tus Kws
Lij Choj teb tias : " Koj yuav nyiam Huab Tais,
koj tus Tswv Ntuj, tas koj siab ntsws, tas koj tus ntsuj
plig, tas koj lub zog, tas koj lub tswv yim,
thiab koj yuav nyiam tus nyob ze koj ib
yam li koj nyiam koj. 28 Yes Xus hais
rau tus Kws Lij Choj tias :
"Koj teb raug lawm. Koj ua li ntawd, koj
yuav muaj txoj sia."
29 Tab sis tus Kws Lij Choj xav cav tias
nws hais yog lawm, ces nws hais rau Yes Xus tias :
"Leej twg yog tus nyob ze kuv ?”
30 Yes Xus thiaj hais ntxiv tias :
"Muaj ib tug neeg nqes ntawm Yes Lus
Xas Les mus rau nram Yes Lis Kos. Nws
ntsib ib pab tub sab, lawv muab nws tej
ris tsho hle, muab nws ntaus to tas, ces
lawv mus lawv lawm, tso nws tseg,
tshuav txoj sia xwb. 31 Muaj ib tug Leej
Choj taug txoj kev ntawd nqes tuaj tom
thawj, nws pom tus raug mob, nws lug
kev hla mus. 32 Muaj ib tug Les Vis ho
tuaj txog ntawd, nws pom tus raug mob,
nws kuj lug kev hla mus. 33 Tab sis ib
tug Xas Mas Lias mus tawm rooj tuaj
txog ze tus raug mob, nws pom tus neeg
raug mob, nws hlub. 34 Nws txav los
ntawm tus raug mob, nws hliv roj thiab
hliv cawv rau cov qhov txhab, nws muab
qhwv. Nws tsaws tus raug mob caij nws
tus luj, ces nws coj tus raug mob mus
txog lub tsev txais qhua, nws tu tus raug
mob ntawd. 35 Hnub tom qab, nws rho
tau ob lub txiaj nyiag rau tus tswv tsev
txais qhua, nws hais tias :
"Koj tu tus neeg mob no, yog koj siv tshaj
lawd, thaum kuv rov qab los, kuv yuav
them rov rau koj."
36 Raws li koj xav, lawv peb leeg no,
leej twg ua tus nyob ze tus neeg uas poob
rau hauv tub sab txhais tes ?"
37 Tus Kws Lij Choj hais tias :
"Yog tus uas tau khuv leej tus raug mob."
Ces Yes Xus hais rau nws tias :
"Koj mus, koj ua zoo li ntawd thiab mog."

Nthuav Ntawv Ntshiab.

Ib zeej tsoom neeg ntseeg thiab phooj ywg,

Peb nyob hauv lis piam hnub chiv 15 nruab xyoo peb, yog ib hnub tseeb ceeb rau peb tus neeg ua neeg ntseeg thiab teev Tswv Nuj. Peb yuav los piav ob peb los txog lub ntsiab lus ua neeg ntseeg thiab teev Tswv Ntuj raws li Yes Xus qhia hauv nws zaj ntawv Moo Zoo hnub no.
Tswv Ntuj yog tus tshoj txoj kev ntseeg thiab teev hawm rau leej tib neeg taug. Peb los ua neeg ntseeg, peb yuav tsum muab tag peb lub neej, lub siab lub ntsws, lub zog, lub tswv yim thiab ntsuj plig los taug txoj kev ua neeg ntseeg thiab teev hawm Tswv Ntuj. Kev ua neeg ntseeg thiab teev Tswv Ntuj yog txoj kev ntiaj teb taug mus tshuam qaum ntuj, yam tus mev dej ntws mus tsuam lub hiav txwv. Kev ua neeg ntseeg thiab teev Tswv Ntuj yog ib lub neej tshiab yus yuav tsum yug dua li tus me nyuam mos. Tus neeg los ntseeg thiab teev Tswv Ntuj yuav tsum hloov neej, hloov siab ntsws, hloov tswv yim yam li hle daim khaub tsoos qub, ntsu kauv pov tseg hnav lub zam tshiab, hnav Leej Pleev Yes Xus, nws thiaj yuav ciaj Tswv Ntuj tub ki : “26 Tag nrho, nej yog Tswv Ntuj tej tub vim kev ntseeg Leej Pleev Yes Xus 27 Cov nej tau ntxuav plig hauv Leej Pleev, nej hnav Leej Pleev NLT 3,26-27” Tiam si, kev hnav Leej Pleev tsis yog hnub peb txais lub cim ntxuav xwb. Kev hnav Leej Pleev, peb yuav niaj hnub hnav lub zam Leej Pleev mus tag peb sim neej peb thiaj li yuav ciaj Tswv Ntuj tub ki. Kev ciaj Tswv Ntuj tub ki yog ciaj Tswv Ntuj sia tsis txawj tuag li Tswv Ntuj, pib txij hnub peb los ua neeg ntseeg thiab teev Tswv Ntuj hauv yaj ceeb no txog ntua hnub peb nkag hauv yeeb ceeb. Peb yuav ua neeg paub kev cai li tus thoob xwv paub cai hais cai : “Koj yuav hlub Huab Tais, koj tus Tswv Ntuj, tas koj siab ntsws, tas koj ntsuj plig, tas koj lub zog, tas koj lub tswv yim thiab tus ze ze koj ib yam li koj tus kheej LK 10,27.” Txoj cai qhia kom peb hlub Tswv Ntuj tshaj dua tej. Tiam sis, peb puas ua li txoj cai qhia rau peb ? Zoo li peb tseem xav kom Tswv Ntuj hlub peb tshaj qhov peb hlub Tswv Ntuj, xav kom Tswv Ntuj ua peb tus qhev, ua li peb nyiam rau peb, mloog peb hais thiab tseem xav kom Tswv Ntuj hwm peb teev peb. Qhov peb yuav hlub tau Tswv Ntuj yog peb kev mloog Tswv Ntuj lus, npaj peb lub siab kom teev thiab hawm Huab Tais Tswv Ntuj tag nrho. Muaj pes tsawg leej hauv zeej tsoom neeg ntseeg thiaj li mob siab rau kev teev hawm Tswv Ntuj tag nws sim neej ? Xyov peb tus kheej puas siv zog, puas nquag teev ntuj hauv yus tsev thiab mus koom haiv neeg ntseeg mloog Yes Xus lus, txais Yes Xus lub cev thiab cov ntshav kho nyias txoj kev tub nkeeg kom nquag thiab muaj zog ntseeg, ua tau neeg zoo nyiam ntxim Tswv Ntuj siab. Peb tus neeg ntseeg lub tswv yim puas tseem lim hiam tshaj qhov qub thaum peb tsis tau lees paub Tswv Ntuj. Xyov peb puas txawj sib hlub tshaj thaum ub thaum peb tsis tau cog lus teev Tswv Ntuj ? Qhov tseem ceeb, tsis yog yam tib neeg pom sab nraus, yog yam hauv nruab siab cov neeg ntseeg thiab teev Tswv Ntuj coj thiab ua tawm los puas muaj kev sib hlub sib zam thiab sib yoog.

Kev ua neeg ntseeg thiab teev Tswv Ntuj lub ntsiab tsis yog yuav ua tus neeg paub paub los txawj txawj txuj ci npaum ub npaum no. Txawm peb yuav txawj hu nkauj teev ntuj tas txhua zaj zoo mloog npaum twg, paub tag tej kab ke teev hawm, paub Koom Txoos tej txhooj cai txhua nqe thoob tag (le droit canon de l’Eglise), los yeej pauv tsis tau tus neeg siab ncaj siab zoo. Tsis tas li ntawd, kev ua neeg ntseeg thiab teev Tswv Ntuj lub ntsiab tsis yuam kom sawv daws paub ua kws qhia kev ntseeg, paub phau Ntawv Ntshiab thoob hauv paus nto plaws ntsis. Kev paub txuj paub ci txawj qhia neeg, muaj koob meej nto npe lug yeej pauv tsis tau tus poj niam los txiv neej siab loj siab dawb hlub neeg : “31 Ciav ib tug leej choj nqes tom thawj txoj kev ntawd tuaj, pom dheev nws lug zoj kev lawm ; 32 Tus Les Vis tuaj txog tib thaj chaw, ua tib yam, pom dheev lug zoj lawm. 33 Tab sis tus Xas Mas Lias neeg taug kev txog ntawm nws, pom dheev ua nws mob siab qeeg qas daws, 34 Thiab txav zoj los hliv roj thiab hliv cawv qhwv tus ntawd tej qhov txhab LK 10,31-34” Txawm peb ua ib tug neeg ntseeg thiab teev Tswv Ntuj paub kev cai cuag tus Leej Choj thiab txawj qhia kev ntseeg rau ib zeej tsoom cuag tus Les Vis, tiam sis, peb ua neeg nrhiav koob meej thiab hwj chim, ntshai txom nyem thiab ntshai khwv. Thaum zoo li ntawd, txawm peb yuav muab Koom Txoos tej txhooj cai los hais nuj neb thiab qhia Ntawv Ntshiab npaum li cas yeej tsis nkag kis Tswv Ntuj txiaj ntsim tus Xas Mas Lias kev hlub neeg no : “36 Saib koj, ntawm lawv peb leeg no leej twg ua tus ze ze rau tus poob hauv cov tub sab tes ?” 37 Tus no teb tias : “Tus tau khuv leej luag.” Yes Xus hais rau nws : “Koj thiab, mus koj ua tib yam li ntawd LK 10,36-37.” Ntau zaus, tus neeg ntseeg xav tias nws twb txais lub cim ntxuav lawm ces nyaj yog neeg teev Tswv Ntuj. Cav cuag tej neeg ntseeg ob cag, lam yuav lub npe ua neeg ntseeg, twb tsis quav ntsej teev ntuj tsheej qas xyoo, lawv kuj nyob lawv. Yus thiab, tsis txhob kub siab dhau, tsis txhob ua ntsuas nquag niaj lis piam teev ntuj tshaj sawv daws, nkim caij nyoog. Muaj coob leej neeg ntseeg thiaj li nyob tsheej pab tuag zawv tsis qab tsis tsuag. Tus neeg hwm Tswv Ntuj yuav tsum paub, txoj kev ntseeg yog txoj kev khwv. Tus neeg ntseeg yuav tsum nrog lub Koom Txoos teev hawm, sib pab, sib txhawb thiab nws tus kheej tseem yuav tau siv zog ntsos coj nws lub cuab lub yig. Hos tus neeg ntseeg puag tes nyob ncaj tsheej qas xyoo, hnub nws kev tws mam nco txog Tswv Ntuj, nej sim xav saib puas phim muaj ntsej muag hu Tswv Ntuj pab thiab.

Ib tsoom phooj ywg sawv daws, lub ntsiab ua neeg ntseeg thiab teev Tswv Ntuj yog nco Tswv Ntuj lub txiaj ntsim hlub lub sim ceeb, hlub lub ntiaj teb neeg txhua leej thiab hlub yus. Vim peb twb pom tias tsis yooj yim, tus neeg tsis zoo nyiam yus twb tsis xav hlub los yuav tau hlub, tsis xav ntsib, tsis xav pom tus neeg saib tsis taus yus los yuav tau pom. Tiam sis, qhov tseeb, tus neeg tsis zoo nyiam tsis zoo hlub twb yog yus, vim yus twb saib tsis taus Huab Tais Tswv Ntuj. Tiam sis, Tswv Ntuj xa nws Leej Tub Yes Xus tuaj ua tus ze ze peb, hlub peb. Vim li ntawd, tus tseem neeg ntseeg thiab teev Tswv Ntuj yuav ua tus ze ze rau tag txhua leej tib neeg li Yes Xus tuaj ua tus ze ze peb.

09.07.2013 Cwj Vuam Chiv

Last edited by NrhiavTswvNtuj on 27th July 2013, 9:01 am; edited 1 time in total

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 20th July 2013, 1:57 pm

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°42

Re: COV ZAJ NYEEM-Xyoo C 2012-13

Post NrhiavTswvNtuj 20th July 2013, 1:57 pm

COV ZAJ NYEEM HNUB TIM 21/07/2013
( Chiv 16, Nruab Xyoo C )

https://youtu.be/-Wpyubokw5A

Cov zaj nyeem 1 : Hauv Paus 18,1-10

1 HUAB TAIS yees tawm los rau
Has Nplas Has pom nyob hauv
tsob qab ntoo qhib ntawm Maas Les,
thaum nws tab tom zaum ntawm nws lub
qhov rooj tsev ntaub, yog lub sij hawm
uas sov tshaj thaum nruab hnub nrig.
2 Nws tsa muag saib, nws pom peb tug
txiv neej tuaj sawv ze ntawm nws. Nws
pom dheev lawv, nws cia li sawv tsees
ntawm nws lub qhov rooj tsev ntaub mus
txais lawv, nws khoov hauv av pe lawv.
3 Nws hais tias : "Huab Tais, yog koj saib kuv muaj nqis
no thov koj tsis txhob hla ntawm koj tus
tub txib tsis nres xyuas kuv li. 4 Kuv
mam li kom lawv nqa me ntsis dej los rau
nej ntxuav ko taw, ces nej thiaj zoo so
hauv tsob qab ntoos no. 5 Thiab kuv
yuav nrhiav ib qho mov rau nej noj kom
nej lub siab muaj zog ces nej mam li mus
ntxiv, vim twb yog li no, nej thiaj hla
ntawm kuv puas yog ?"
Ces lawv teb nws tias : "Ua li koj hais."
6 Has Nplas Has thiaj maj nrawm nroos
mus hauv nws lub tsev ntaub mus cuag
Xas Las thiab hais rau nws tias:
"Koj tsuag tsuag mus luj peb taig hmoov
nplej, cov hmoov nplej uas qab qab, koj
muab do, muab puab ua ib co ncuav mov."
7 Has Nplas Has tso sas ntws mus xyuas
nws pab tsiaj, nws ntes kiag ib tug xyuas
nyuj mos tab tom qab, nws muab cob kiag
rau nws tus tub txib coj mus ua kom siav
sai sai. 8 Ces Has Nplas Has nqa mis
nyuj khov thiab mis nyuj haus thiab tus
nyuj mos uas twb ua siav lawm coj los
rau rau ntawm lawv xub ntiag. Nws sawv
ntsug ze lawv nyob ntawm tsob qab ntoo, cia lawv noj mov.
9 Lawv nug nws tias :
"Koj poj niam Xas Las mus qhov twg lawm ?"
Has Nplas Has teb tias :
"Nws nyob hauv tsev tsam phooj."
10 Ib tug thiaj hais tias :
"Lwm xyoo tav lub zim txwv no, mas kuv
yuav rov tuaj xyuas koj dua, thaum ntawd
koj poj niam Xas Las yuav yug tau ib tug
tub." Xas Las hnov, vim nws nyob hauv
sab qhov rooj tsev tsam phooj, ntawm tus
txiv neej nrob qaum mloog

Cov zaj nyeem 2 : Kos Los Xais 1, 24-28
Paj Lug khwv tsob hwb cov neeg teev pej kum dab.

24 Nyem no, kuv ntsib kev kaj siab nyob
hauv txoj kev txom nyem. Kuv zoo siab
ris kev txom nyem kom pab tau nej. Kuv
yeem txais kev txom nyem nyob hauv
kuv lub cev, vim kuv xav kom kuv txoj
kev txom nyem ntxiv rau Leej Pleev txoj
kev txom nyem pab lub Koom Txoos, uas
yog Leej Pleev lub Cev.
25 Kuv tsob hwb lub Koom Txoos, vim
Tswv Ntuj pub txoj hauj lwm ntawd rau
kuv ua : kuv yuav ua kom Tswv Ntuj lo
lus tawm los rau sawv daws pom xyeem
nyob tim nej. 26 Tswv Ntuj Lo Lus, yog
ib yam txuj ci tob tob zais tau ntau txhiab
tiam los lawm. Nyem no, nws Lo Lus
nyuam qhuav tawm los rau nws cov
ntshiab pom xyeem. 27 Tswv Ntuj zoo
siab ua kom tsoom ntshiab pom tias, Ntuj
Lo Lus muaj hwj chim nyob nruab nrab
hauv cov neeg teev pej kum dab, yog Leej
Pleev nyob hauv nruab nrab nej ; yog txoj
kev tso siab tias, yuav tau txais hwj chim.
28 Leej Pleev yog tus peb tshaj nws rau
nej. Peb ntuas, peb qhia txhua leej txhua
tus, raws li txoj kev thoob tsib. Peb xav
ua kom neeg zoo tiav nyob hauv Leej
Pleev. 29 Yog vim txoj hauj lwm ntawd,
kuv thiaj siv zog ntaus tsam : yog Leej
Pleev lub zog thiab lub hwj huam ua hauj
lwm nyob hauv kuv.

Lus Kas Ntawv Moo Zoo 10, 38-42
Mas Tas thiab Mab Liab.

38 Thaum Yes Xus lawv taug kev, lawv
mus txog hauv ib lub zos. Ib tug poj niam
hu ua Mas Tas txais Yes Xus los hauv
nws tsev. 39 Tus poj niam ntawd muaj
ib tug niam hluas hu ua Mab Liab. Mab
Liab zaum ntawm Huab Tais ko taw, nws
mloog Huab Tais hais lus. 40 Hos Mas
Tas rau siab ntso lis ntau yam qav num.
Ces Mas Tas los hais rau Yes Xus tias :
"Huab Tais, koj tsis quav ntsej tias kuv
tus niam hluas cia kuv tib leeg lis qav lis
num xwb lod ? Koj hais kom nws pab kuv thiab mas !"
41 Tab sis Huab Tais teb rau Mas Tas tias :
"Mas Tas, Mas Tas, koj txhawj thiab ua
siab fab lis ntau yam, 42 tab sis yuav
tsum muaj tsawg, tsuas yuav tib yam
xwb. Mab Liab xaiv tau qhov zoo tshaj,
yuav tsis txhob muab tshem ntawm nws."

NTHUAV NTAWV NTSHIAB.

Nthuab ntawv ntshiab - Hnub chiv 16 Xyoo C

Ib tsoom neeg ntseeg thiab phooj ywg hmov tshua,

Peb nyob hauv lis piam hnub chiv 16 nruab xyoo peb, yog zoo caij zoo nyoog rau peb tuaj teev hawm thiab mloog Tswv Ntuj lus ua ke hnub no. Peb tsuas khaws tib lub ntsiab lus hauv cov zaj nyeem no txhawb peb txoj kev mloog Tswv Ntuj lus.

Xyov peb puas paub, ua neej nyob txawm peb ntseeg Tswv Ntuj thiab tsis ntseeg los peb txhua leej tib neeg puav leej yog Tswv Ntuj tsim, yog Tswv Ntuj me nyuam. Tswv Ntuj yeej hlub peb tas txhua leej, tsis hais tus teev Tswv Ntuj los teev dab qhuas los teev lwm yam kev cai. Tiam sis, nco ntsoov peb yuav tsum paub meej, txoj kev teev hawm Tswv Ntuj yog txoj muaj Tswv Ntuj koob hmoov. Tus teev dab qhuas tau poj yawm koob hmoov. Vim poj yawm yog dab qhuas. Tus teev Phus Thas, tau Phus Thas koob hmoov. Poj yawm hmoob thiab Phus Thas yog tib neeg xwb. Tib neeg tsis muaj hwj huam, tsis muaj peev xwm dab tsi. Vim li ntawd, tus teev dab qhuas los teev Phus Thas tsuas tau tib neeg koob hmoov xwb. Peb yeej paub, txawm hais thiab tsis hais, tib neeg yeej tsis luaj Tswv Ntuj, tib neeg yeej piv tsis nyog Tswv Ntuj. Tus teev tib neeg tsuas tau tib neeg koob hmoov. Tus teev Tswv Ntuj tau Tswv Ntuj koob hmoov. Peb thiaj li yuav tig mus mloog peb tus yawg koob Has Nplas Has, yog thawj tug neeg tso dab qhuas tseg los teev hawm Tswv Ntuj, tau txais Tswv Ntuj koob hmoov. Vim li, Has Nplas Has yog peb tus yawg koob, tus coj peb thiab qhia peb teev hawm Tswv Ntuj. Peb tus yawg koob Has Nplas Has kev teev hawm Tswv Ntuj zoo li cas ? Has Nplas Has kev teev hawm Tswv Ntuj yog kev hwm leej tib neeg. Vim Has Nplas Has hwm leej tib neeg, nws kev teev hawm Tswv Ntuj thiaj li muaj txiaj ntsim. Has Nplas Has teev thiab hawm Tswv Ntuj loj tshaj plaws hauv nws lub siab. Has Nplas Has yeej tsis paub tias Tswv Ntuj zoo li cas. Xyov ua cas muaj ib hnub, nws cia li pom peb tug txiv neej hla tuaj ntawm nws, ces nws cia li hais rau lawv : “Huab Tais, yog koj ntsia kuv muaj txiaj ntsim rau koj, thov txhob hla plaws koj tus tub txib, 4 Thov muab me ntsis dej ntxuav nej taw thiab so hauv tsob qab ntoos. 5 Kuv mus nqa ib thooj mov txhawb nej siab tas nej mam hla mus vim nej twb hla plaws tuaj ntawm nej tus tub txib HP 18,3-5.” Yog ib co lus qhia tias Has Nplas Has siab ntsws hlub peb tug neeg hla tuaj ze ntawm nws loj heev, tsis xav cia lawv tshaib thiab nqhis, pub mov lawv noj kom muaj zog, muab dej lawv haus kom los siav kom mus txog lawv lub chaw. Has Nplas Has txoj kev hlub neeg no yees ua koob hmoov hwm Tswv Ntuj teev Tswv Ntuj. Vim li ntawd, yog peb lub ncauj teev Tswv Ntuj, peb lub siab tsis txawj hlub neeg ces peb kev teev Tswv Ntuj tsis tau koob hmoov li Has Nplas Has. Tsis tas li ntawd, Has Nplas Has kev tshaib thiab nqhis tseem loj tshaj peb tug neeg no tshaib plab thiab nqhis dej. Has Nplas Has ntshaw tub ki ua hnub ua hmo, thawm niaj thawm xyoo laus qas nkoos lawm, twb dhau caij dhau nyoog yug tub ki lawm. Qhov Has Nplas Has tsis paub, nws kev hlub peb tug neeg no yog koob yog hmoov : “Tuaj, kuv yeej rov tuaj cuag koj sim neej no ov ib tug tub rau koj poj niam Xas Las HP 18,10” Rau peb kuj tib yam, peb nyias muaj nyias kev tshaib hauv nyias nruab siab. Tswv Ntuj twb pom Has Nplas Has kev tshaib thiab kev ntshaw. Peb tsis txhob poob siab, yog Tswv Ntuj pub txiaj ntsim rau Has Nplas Has, peb kuj yuav tau Tswv Ntuj koob hmoov hauv peb txoj kev hlub thiab hwm leej tib neeg tib yam nkaus.

Hauv Yes Xus cov lus qhia hnub no kuj tib yam li ntawd. Peb twb los ntseeg Tswv Ntuj li Yes Xus qhia, txhua tus neeg teev hawm Tswv Ntuj puav leej muaj cai tau Tswv Ntuj koob hmoov. Tiam sis, tas zeej tsoom neeg ntseeg Tswv Ntuj zoo li ob vim ncaus Mas Tas thiab Mab Liab nkawd. Xyov nyias txoj kev teev hawm Tswv Ntuj puas ruaj khov, puas tseeb tiag los lam duj de zuav zaws xwb. Yog nyias txoj kev teev hawm Tswv Ntuj ruaj khov tseeb tiag ces peb tsis txhob poob siab : “41 Teb rau nws, Huab Tais hais tias : “Mas Tas, Mas Tas, koj txhawj xeeb thiab phob fab rau ntau yam, 42 Tsuas ntshaw tib yam, Mab Liab txawj xyiv fab rau yam zoo tshaj plaws yuav tsis txhob thau hauv nws mus LK 10,41-42.” Peb puas ua neeg phob fab txhawj xeeb rau peb txoj kev noj haus tshaj, nrhiav kev ua neeg muaj koob nto npe, kev ua nom ua tswv li Mas Tas los peb xyiv fab rau kev ua neeg mloog Tswv Ntuj lus li Mab Liab ? Tsis yog Yes Xus yuav thuam Mas Tas kev nquag ua qav ua num los thuam peb kom txhob ua hauj lwm es nyob dawb nyob do. Yes Xus qhia kom peb ua neeg nquag thiab xyiv fab teev hawm Tswv Ntuj. Vim li ntawd, tus neeg xyiv fab ua neeg mloog Tswv Ntuj lus kuj yog ib tug neeg nquag, tsis khuv xim dag zog, tsis ntshai khwv. Tas txhua tus leej ntshiab yog neeg khwv, muab lawv roj ntsha thiab txoj sia tshaj Yes Xus lub Moo Zoo thiab nrog Yes Xus cawm ntiaj teb neeg. Hos tus neeg phob fab rau kev noj kev haus, kev nrhiav nyiaj txiag thiab lub koob meej tsis xyiv fab ua neeg teev hawm Tswv Ntuj.

Ib tsoom phooj ywg sawv daws, txoj kev teev hawm Tswv Ntuj yog txoj kev muaj txiaj ntsim loj tshaj plaws thiab tau koob hmoov dua tej tib si. Yog peb tseem tsis tau paub, peb yuav maj nroos tig ntiag los npuab Tswv Ntuj. Yog peb twb ntseeg thiab ua neeg teev hawm Tswv Ntuj lawm, peb yuav xyiv fab tuav kom ruaj txoj kev teev hawm Tswv Ntuj, tsis txhob ua li tej txhia taw tom ntej taw tom qab. Yam tej tsiaj txhu, hnub twg tsiaj tsis hwm tswv lawm ces tus tsiaj kawg liam txwv. Hnub peb dua ntawm Tswv Ntuj lawm ces peb ua cov neeg hmoov tag.

18.07.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 27th July 2013, 9:15 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°43

Re: COV ZAJ NYEEM-Xyoo C 2012-13

Post NrhiavTswvNtuj 27th July 2013, 9:15 am

COV ZAJ NYEEM HNUB TIM 28/07/2013
Chiv 17 Nruab Xyoo C

https://youtu.be/bAE3TIyYmnU

Zaj nyeem 1 : Hauv Paus 18,20-32
20 Ces HUAB TAIS hais tias :
"Muaj ib lub suab cem Xos Dos Mas
thiab Nkos Mos Las nrov kawg tuaj txog
kuv vim lawv niaj hnub ua txhaum loj.
21 Yog li kuv yuav nqes mus xyuas saib
lawv puas tau ua phem npaum li lub suab
nrov tuaj los tsis tau, ces kuv thiaj paub."
22 Ob tug txiv neej sawv kev mus rau
Xos Dos Mas lawm. Tshuav HUAB
TAIS tseem nrog Has Nplas Has nyob.
23 Has Nplas Has txav zog los ze, nws nug tias :
"Koj puas yuav txo cov neeg ncaj nrog
cov neeg txhaum ? 24 Tej zaum yuav
muaj li tsib caug leej neeg ncaj nyob hauv
lub nroog, koj puas yuav muab lawv
rhuav, tsis zam rau lub nroog tab yog
muaj lawv nyob hauv ? 25 Thov kom zaj
tswv yim uas rhuav tus siab ncaj nrog tus
txhaum ntawd nyob deb koj. Koj txhob
cia tus siab ncaj nrog tus neeg txhaum
tuag. Thov kom lub tswv yim ntawd
nyob deb koj. Tus txiav txim rau lub
ntiaj teb, nws yuav tsis txiav txim ncaj lod ?"
26 HUAB TAIS teb tias :
"Yog kuv nrhiav tau tsib caug leej neeg
ncaj nyob hauv lub nroog Xos Dos Mas,
kuv yuav zam rau lub nroog tas huv si vim lawv."
27 Has Nplas Has rov hais tias :
"Kuv yog plua av xwb, tsis kav kuv tseem
muaj cuab kav nrog kuv tus Huab Tais
hais. 28 Vim tias, tej zaum tsis muaj
txog tsib caug leej neeg ncaj, yog tsawg
tsib leeg, koj puas yuav rhuav lub nroog
tas huv si vim tsawg tsib leeg ntawd ?"
HUAB TAIS teb tias :
"Kuv yuav tsis rhuav, yog tias kuv nrhiav
tau plaub caug tsib leeg ncaj."
29 Has Nplas Has rov hais dua tias :
"Tej zaum muaj plaub caug leej ?"
HUAB TAIS teb tias :
"Kuv yuav tsis rhuav, vim plaub caug leej ntawd."
30 Has Nplas Has hais tias :
"Thov kom kuv tus Huab Tais txhob npau
taws thiab cia kuv hais lus. Tej zaum
muaj peb caug leej xwb ?"
HUAB TAIS teb tias :
"Kuv yuav tsis rhuav, yog kuv nrhiav tau peb caug leej."
31 Has Nplas Has hais tias :
"Kuv ua neeg muaj cuab kav tas zog, kuv
thiaj nrog kuv tus Huab Tais hais ntxiv :
Tej zaum nrhiav tau nees nkaum leej xwb ?"
HUAB TAIS teb tias :
"Kuv yuav tsis rhuav, vim nees nkaum leej ntawd."
32 Has Nplas Has hais tias :
"Thov kom kuv tus Huab Tais tsis txhob
npau taws, kuv tseem yuav hais ib zaug
ntxiv yog zaum kawg : Tej zaum yuav
nrhiav tau kaum leej xwb ?"
HUAB TAIS teb tias :
"Kuv yuav tsis rhuav, vim kaum leej ntawd."

Zaj nyeem 2 : Kos Los Xais 2,12-14
12 Hnub nej txais lub Cim Ntxuav, nej
nrog Leej Pleev nqes hauv nws lub ntxa,
thiab nrog nws sawv rov qab los, vim nej
ntseeg txog Tswv Ntuj lub zog tsa Leej
Pleev sawv hauv cov tub tuag rov los.
13 Nej tuag, vim nej cov txhaum, thiab
vim nej lub cev tsis txais lub cim txiav ;
tab sis Tswv Ntuj zam txhaum rau peb tas
huv tib si, ces nws ua kom nej nrog Leej
Pleev rov muaj txoj sia.
14 Raws li Txoj Cai thiab cov lus qhia,
mas peb muaj txim ; tab sis Leej Pleev
muab so pov tseg, nws muab rhuav, nws
muab ntsia rau saum ntoo cuam

Lus Kas Ntawv Moo Zoo 11,1-13
1 Muaj ib zaug, Yes Xus teev
Ntuj nyob ib qho chaw. Thaum
nws teev Ntuj tas lawd, nws ib tug thwj
tim hais rau nws tias :
"Huab Tais, koj qhia peb teev Ntuj xws li
Zam qhia nws cov thwj tim saib."
2 Yes Xus hais rau lawv tias :
"Thaum nej teev Ntuj, nej hais li no :
Txiv, kom koj lub Npe ntshiab,
3 kom koj lub Ceeb Tsheej los txog !
Thov koj niaj hnub pub mov rau
peb noj txwm hnub.
4 Thov koj zam txhaum rau peb vim
peb zam rau cov tshuav nqi ntawm peb.
Koj txhob cia peb poob rau hauv txoj kev ntxias
5 Yes Xus hais rau lawv tias :
"Yog nej muaj ib tug phooj ywg tuaj cuag
nej thaum ib tag hmo, thiab nws hais rau
nej tias : 'Phooj ywg, koj txais peb lub
ncuav mov rau kuv, 6 vim kuv ib tug
npawg mus tawm rooj los so hauv kuv
tsev, kuv tsis muaj dab tsi rau nws noj.'
7 Hos tus nyob hauv tsev teb tias :
'Txhob txob kuv, lub qhov rooj twb xauv
lawm, kuv cov me nyuam peb pw tas
lawm, kuv sawv tsis tau los muab dab tsi rau koj li.'
8 Kuv hais rau nej tias, tab yog nws tsis
sawv los muab vim tus ntawd yog nws
phooj ywg, tsis kav nws yeej yuav sawv
los muab rau tus ntawd raws li nws thov,
vim nws taij tsis tseg."
9 "Li ntawd, kuv hais rau nej : Nej thov,
Ntuj yuav pub rau nej. Nej nrhiav, ces
nej yuav ntsib. Nej khob qhov rooj, Ntuj
yuav qhib rau nej. 10 Vim tias leej twg
thov, nws yuav tau txais, leej twg nrhiav,
nws yuav ntsib, hos leej twg khob qhov
rooj, luag yuav qhib rau nws. 11 Nyob
hauv nej, leej txiv twg, yog nws tus tub
taij ib tug ntses, nws tsis muab ntses, nws
puas muab ib tug nab rau ? 12 Los leej
txiv twg, yog nws tus tub taij ib lub qe,
nws yuav muab ib tug kab lij tshooj rau ?
13 Txawm tias nej yog neeg phem, tsis
kav, nej tseem txawj pub tej yam zoo rau
nej cov me nyuam. Ua li mas Leej Txiv
nyob saum ntuj haj yam txawj pub Leej
Ntuj Plig Ntshiab rau cov uas thov nws !"

NTHUAV NTAWV NTSHIAB.

Nthuav ntawv ntshiab - Hnub chiv 17 Xyoo C

Ib zeej tsoom neeg ntseeg thiab phooj ywg,

Peb nyob hauv lis piam hnub chiv 17 nruab xyoo 3, yog zoo hnub zoo nyoog rau peb txhua leej. Zoo siab rov tau ntsib sawv daws ua ke. Lub ntsiab lus tseem ceeb Tswv Ntuj qhia rau peb hnub no, yog txoj kev ua neej sib vam khom saum neej no thiab hauv yeeb ceeb.

Peb sim xav saib, tus dab tsi yuav muaj zog tas npaum li ua tau tus tub los tus ntxhais muaj siab sib qaws ua neej saum yaj ceeb no ? Yeeb vim tus tub thiab tus ntxhais ib leeg ntshaw ib leeg, ib tug tseg tsis taus ib tug thiab ib tug txaus siab vam khom ib tug mus tag ib txhis. Nkawd ob leeg thiaj muaj siab sib qaws ua ib cuab ib yig. Li ntawd, tsis hais ib nkawm niam txiv, ib lub zej zog los ib haiv neeg…txoj kev sib vam khom yog ib lub txiaj ntsim loj tas nrho. Piv tias yog thaum ib nkawm niam txiv twg txiav nkawd txoj kev sib vam khom tu ncua mus, koj los dhuav kuv, hos kuv los tsis ntshaw koj lawm, nkawm niam txiv ntawd lub neej yeej puas tsuaj. Niam ua niam nkauj feb, txiv ua txiv nraug fav. Peb twb nrog cov txij nkawm tu siab cov ua lawv lub neej tawg tas no. Vim li ntawd, tib neeg txoj kev sib vam khom muaj txiaj ntsim loj kawg, rub tej niam txiv kom sib hlub, coj lub zej zog kom sib haum xeeb, ua kom ib haiv neeg nyob muaj teb muaj chaw. Txoj kev sib vam khom kuj tseem ceeb kawg rau txoj kev ntseeg Tswv Ntuj.

Peb txoj kev ua neeg ntseeg Tswv Ntuj yog ib txoj kev muaj hauv paus hauv ntsis, peb yuav teev hawm Tswv Ntuj raws kab raws kev cai, raws poj yawm kev qhuab qhia. Has Nplas Has yog peb tus yawg koob, tus qhia kev ntseeg Tswv Ntuj rau peb taug. Has Nplas Has txoj kev teev hawm Tswv Ntuj muaj txiaj ntsim vim Has Nplas Has txawj khuv leej neeg. Has Nplas Has thov Tswv Ntuj tas zaj tas zog rau cov neeg nyob hauv ob lub nroog Xaws Dos Mas thiab As Mos Las. Cov neeg hauv ob lub nroog ntawd ua neeg plhom neeg liam txwv chim Tswv Ntuj siab. Lawv twb tsis hwm ntuj los tseem tsis txaus, tseem ua tej yam xu siab tshaj, liam txwv ntsuav ua npog loj, txiv neej deev txiv neej thiab poj niam deev poj niam : “5 Lawv hu Los thiab hais rau nws : “Cov txiv neej tuaj cuag koj hmo no nyob qhov twg, coj lawv tawm tuaj rau peb thiab peb thiaj paub lawv…7 Nws hais tias : “Thov nej yom kuv cov kwv tij, nej txhob ua dab tsi phem 8 Saib, kuv muaj ob tug ntxhais tsis tau paub dua txiv neej, kuv coj tawm los, thov nej ua rau nkawd li nej pom zoo, hos nej txhob ua ib qho dab tsi rau cov txiv neej no vim lawv tuaj poob hauv kuv vaj kuv tsev HP 19,5-8.” Has Nplas Has paub ntsoov, Tswv Ntuj kawg nplua ob lub nroog ntawd thiaj tag. Tiam sis, muaj nws tus xeeb ntxwv Los tsev neeg nyob hauv ob lub nroog ntawd. Has Nplas Has cheem Tswv Ntuj tas zaj tas zog kom txhob nplua ob lub nroog ntawd, vim muaj cov neeg ncaj nrog cov neeg plhom neeg qias nyob ua ke : “Koj yuav nplua tus ncaj nrog tus lim hiam tiag los ? 24 Tsam ho muaj tsib caug tus ncaj nyob hauv plawv nroog, koj yuav nplua tiag tsis zam rau thaj chaw vim tsib caug tus ncaj hauv nws los ? 25 Koj yuav ua npaum lo lus no, ua kom tus ncaj tuag nrog tus lim hiam, koj ua rau tus ncaj li tus lim hiam, tus txiav txim rau tag daim av puas ua haum HP 18,23-25.” Has Nplas Has ntxias Tswv Ntuj tas zog kom Tswv Ntuj thim xav zam rau cov neeg hauv ob lub nroog ntawd.

Peb los ua neeg ntseeg Tswv Ntuj raws li Yes Xus qhia, peb yim huab yuav saib Yes Xus thiab nws cov thwj tim tej lus muaj nqes rau peb : “1 Nws ib tug thwj tim hais rau nws tias : “Huab Tais, qhia peb teev ntuj xws li Zam qhia rau nws cov thwj tim yom.” 2 Nws hais rau lawv : “Thaum nej teev, nej hais : Txiv, kom koj lub npe ntshiab huv 3 Koj kav tuaj kom txog, pub peb mov niaj hnub no rau peb 4 Thim peb tej txhaum rau peb tam li peb thim rau txhua leej tshuav nqi ntawm peb, txhob tso peb rau kev haub ntxias LK 11,1-4.” Yog tias kev sib vam khom twb muab peev xwm txhawb tau cov cuab yig neeg ua neej ruaj thiab khom. Hauv txoj kev ntseeg Tswv Ntuj kuj tib yam nkaus, kev thov Tswv Ntuj ib leeg rau ib leeg, thov rau cov neeg txom nyem, rau cov neeg lim hiam, rau yus tus yeeb ncuab…muaj txiaj ntsim ib yam Has Nplas Has thov Tswv Ntuj zam rau ob lub nroog Xaws Dos Mas thiab As Mos Las. Vim Has Nplas Has kev thov Tswv Ntuj, nws tus xeeb ntxwv Los thiaj dim kev raug xwv txheej, tsis raug tswv Ntuj nplua. Peb ntseeg tias Tswv Ntuj mloog peb tej lus thov thiab hu txog Tswv Ntuj. Yog peb tus neeg txhaum thov Tswv Ntuj twb mloog peb thiab cawm peb ; tus neeg teev dab khaub zig Tswv Ntuj twb pab tau nws. Npaum li cas ntxiv, cov neeg mloog Tswv Ntuj lus ua neeg zoo nyiam tej lus thov Tswv Ntuj haj yam tau txiaj ntsim dua peb tus neeg txhaum : “13 Txawm tias nej neeg phem, nej twb txawj pub paj tshab zoo rau nej cov me nyuam, npaum li cas ntxiv Leej Txiv nyob saum ntuj yim huab pub Leej Ntuj Plig Ntshiab rau cov taij nws LK 11,13.” Vim li ntawd, peb kev khaub zig thiab mus vam khom tsoom neeg siab dawb siab ntshiab pab peb tsis yog txhaum, hos tseem haj yam muaj koob hmoov rau peb xwb.

Ib tsoom phooj ywg sawv daws, peb txoj kev ntseeg Tswv Ntuj ib leeg vam khom ib leeg thiab peb txoj kev khaub zig tsoom leej ntshiab los puas vam khom peb leej niam Mab Liab tau txiaj ntsim loj tas nrho rau peb, yim ua kom peb nplua nuj muaj Tswv Ntuj koob hmoov. Tus neeg hais tias teev Yes Xus, tiam sis tsa ncauj thuam Mab Liab thiab thuam tsoom leej ntshiab zoo tam ntua tus neeg rov taw tuam ntuj, tsis hwm lub ntuj. Tus neeg thuam Mab Liab, peb leej niam siab ntshiab, zoo tam zoj tus me nyuam cam thawj tsis hwm niam hwm txiv. Vim Yes Xus tus kheej yog tus hais kom peb lees Mab Liab ua peb leej niam. Vim li ntawd, yog peb xav tau koob hmoov hauv txoj kev teev hawm Yes Xus thiab ua neeg teev Tswv Ntuj, peb tsis txhob tsa ncauj thuam Mab Liab, peb thiaj tsis khaum ua neeg pluag koob hmoov.

26.07.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 27th July 2013, 9:25 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°44

Re: COV ZAJ NYEEM-Xyoo C 2012-13

Post NrhiavTswvNtuj 27th July 2013, 9:25 am

COV ZAJ NYEEM-Xyoo C 2012-13 - Page 2 Img_3416

Txij thaum kuv hloov tsev cab sab tshiab ces kuv cia li tso video tsis tshwm li lawm. Li ntawd kuv tso Link video nrog, yog leej twg ho xav mloog TP.Cwj Vuam Chiv ntuas los ho nias mus mloog hauv youtube tau.

Hais ib los lus faj seeb rau txhua leej uas tuaj mloog TP.Cwj Vuam Chiv cov lus ntuas thiab nyeem nws nthuav Ntawv Ntshiab. Nej tso siab, txawm Txiv Plig tsis nyob Fab Kis Av Loj lawm; nws mus rau Nkws Yas lawm los nws tseem yuav ua nws txoj hauj lwm hauv cab sab li qub. Kuj yog ib qho zoo kawg uas tseem yuav hnov nws lub suab thiab tej lus qhuab qhia ntxiv lawm yav tom ntej.

COV ZAJ NYEEM-Xyoo C 2012-13 - Page 2 29692610

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 2nd August 2013, 9:06 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°45

Re: COV ZAJ NYEEM-Xyoo C 2012-13

Post NrhiavTswvNtuj 2nd August 2013, 9:06 am

COV ZAJ NYEEM HNUB TIM 04/08/2013
Chiv 18 Nruab Xyoo C

Zaj nyeem 1: Kos Es Les 1, 2 ; 2, 21-23

2 Kos Es Les hais tias :
"Txhua yam txawj yaj ntshis, yog zoo li
ib co pa yuav yaj mus."
21 Ntsia tus neeg no : nws tau
khwv ua hauj lwm, nws thoob tsib
thiab paub txuj, tab sis nws yuav tsum tso
tej yam ntawd tseg rau lwm tus khaws
xyeem yuav. Li ntawd nws cov hauj
lwm kuj txawj yaj ntshis, yog ib yam xwv txheej loj.
22 Tib neeg tau ua hauj lwm hnyav
hnyav, nws lub siab siv zog nrhiav ub
nrhiav no, nws txoj kev khwv tiv tshav tiv nag,
yuav tau tus qab hau dab tsi ?
23 Nws niaj hnub txom nyem, nws niaj
hmo tu siab, nws lub siab tsis tau kev so.
Tej ntawd kuj yuav yaj ntshis thiab.

Zaj nyeem 2 Kos Los Xais 3, 1-5.9-11
1 Nej pom xeeb nrog Leej Pleev
sawv rov los lawm, mas nej nrhiav
tej yam nyob txheej saud, vim txheej saud
yog Leej Pleev qhov chaw nyob, nws
zaum ntawm Tswv Ntuj phab xis. 2 Nej
lub siab yuav dai dhuam rau tej yam nyob
txheej saud, txhob dai rau tej yam nyob
ntiaj teb no. 3 Vim tias, nej tuag lawm,
hos nej txoj sia nrog Leej Pleev tsiv nraim
hauv Tswv Ntuj. 4 Leej Pleev yog nej
txoj sia : thaum nws yuav tawm los rau
pom xyeem, mas nej kuj yuav nrog nws
tawm los muaj hwj chim.
5 Nej yuam nej tej tes taw, uas nyiam lub ntiaj teb.
9 Nej txhob ib leeg dag ib
leeg. 10 Nej twb hle tus qub neeg thiab
nws cov hauj lwm pov tseg lawm, nej
hnav tus neeg tshiab, uas yog tus neeg
mus taug txoj kev paub zaj txuj tseeb, vim
tus neeg ntawd rov tshiab tuaj, raws li Tus
Tsim neeg tus duab.
11 Nyob hauv txoj kev ua tus neeg
tshiab, mas tsis muaj tus Hes Las los Yus
Das, tsis muaj tus txais lub cim txiav, los
tus tsis txais lub cim txiav, tsis muaj tus
neeg qus, tus Xis Kus Thes, tus qhev, los
tus twj lij : tsuas muaj Leej Pleev xwb,
vim Leej Pleev yog txhua tsav txhua yam,
thiab nws nyob hauv txhua tsav txhua yam.

Lus Kas Ntawv Moo Zoo 12, 13-21

Txhob dai rau lub cuab tam nyob ntiaj teb no.

13 Muaj ib tug neeg hauv tsoom sid hais rau Yes Xus tias :
"Xib Hwb, koj hais kom kuv tij laug faib
peb lub cuab tam rau kuv thiab."
14 Yes Xus hais rau nws tias :
"Npawg, leej twg tsa kuv ua tus txiav
txim los tus faib cuab tam rau neb ?"
15 Yes Xus hais rau lawv tias :
"Nej ceev faj, nej yuav txuag kom nej
txhob ntshaw, vim tias neeg txawm nplua
nuj npaum twg, los nws txoj sia tsis nyob
hauv nws lub cuab tam."
16 Yes Xus hais zaj paj lug no rau lawv :
"Muaj ib tug neeg nplua nuj, nws cov teb
ntsu qoob loo kawg. 17 Nws xav tias :
'Kuv yuav ua li cas, vim kuv tsis muaj
chaw rau kuv cov qoob ?' 18 Ces nws
hais tias : 'Kuv yuav ua li no : kuv yuav
rhuav kuv cov txhab, yuav rov ua ib co
txhab loj dua, kuv yuav sau kuv cov
nplej thiab kuv tej cuab yeej cuab tam
huv si los tso rau hauv. 19 Ces kuv yuav
hais rau kuv tus plig tias : 'Me ntsuj plig,
koj muaj qoob loo cuab tam ntau kav koj
ntev niaj ntau xyoo : koj so mog, koj noj,
koj haus, koj ua si.’ 20 Tab sis Tswv
Ntuj hais rau nws tias : 'Neeg ruam !
Hmo no kiag, Ntuj yuav coj koj tus ntsuj
plig rov qab. Tej yam uas koj npaj tau,
yuav yog leej twg tug ? 21 Tus uas
khaws nyiaj txiag tseg rau nws tib leeg
kheej, yuav zoo li ntawd, vim nws tsis
nrhiav kev nplua nuj nyob hauv Tswv Ntuj."

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 9th August 2013, 3:33 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°46

Re: COV ZAJ NYEEM-Xyoo C 2012-13

Post NrhiavTswvNtuj 9th August 2013, 3:33 am

COV ZAJ NYEEM HNUB TIM 11/08/2013
Chiv 19 Nruab Xyoo C

Zaj nyeem 1: Thoob Tsib 18, 6-9
Tswv Ntuj txuag tsoom tub His Xas Lais.

6 Tswv Ntuj, peb cov yawg koob
twb xub paub txog hmo uas koj
yuav muab cov Hais Nkws Tos tua. Koj
ua kom lawv xub paub vim koj xav pab
lawv tso siab rau cov lus koj cog, koj xav
pab lawv ua siab loj.
7 Koj haiv neeg thiaj tos ntshis tias cov
neeg ncaj yuav dim, cov yeeb ncuab yuav
ploj. 8 Vim tias koj ib txhij rob caub rau
cov ntxub peb, thiab koj muab koob meej
rau peb, koj xaiv peb los ua koj tug.
9 Vim li ntawd tas tsoom tub ki ntshiab
thiaj txi Ntuj twj ywm nyob hauv nyias
tsev, thiab lawv koom cog lus tsa ib txog
cai zoo li no : yam li cov ntshiab lawv
yuav sib faib lawv cuab tam, lawv yuav
sib pab ris xwv txheej. Lawv ua ke hu
cov yawg koob cov nkauj.

Zaj nyeem 2: Hes Nplaws 11, 1-2.8-19

1 Txoj kev ntseeg yog txoj kev
zeem tau meej tias peb yuav txais
yam uas peb cia siab tos. Kev ntseeg ua
puav pheej tias yam uas peb tsis pom,
yeej muaj tseeb tiag.
2 Yog txoj kev ntseeg ua kom cov poj
yawm txwv koob nto moo zoo.
8 Yog vim Has Nplas Has ntseeg, mas
nws thiaj mloog Ntuj hu nws kom sawv
kev mus ib lub teb chaws uas nws yuav
txais los ua nws lub cuab tam. Ces nws
sawv kev, nws tsis paub tias nws yuav
mus txog qhov twg. 9 Yog vim Has
Nplas Has ntseeg, mas nws thiaj tsiv mus
nyob hauv thaj av uas yog pej kum neeg
av, yog thaj av uas Ntuj cog lus tias yuav
pub rau nws. Has Nplas Has ua neej
nyob hauv tsev tsam phooj xws li Is Xas
Has thiab Yas Kos. Nkawd nrog Has
Nplas Has txais Tswv Ntuj lo lus cog.
10 Has Nplas Has tos txog lub tsheej
muaj taw ntsa uas Tswv Ntuj yuav txhim thiab yuav tsa.
11 Yog vim Xas Las ntseeg, mas tab nws
txawm laus heev lawm, nws muaj peev
xwm xeeb tub. Xas Las ntseeg tias tus
tau cog lus rau nws, yuav tsis fav xeeb.
12 Vim li ntawd, tus neeg uas twb yuav
txog nws lub caij tuag tseem yug tau ib co
xeeb ntxwv coob npaum li cov hnub qub
nyob saum ntuj thiab cov suab zeb nyob
ntawm ntug hiav txwv uas suav tsis txheeb.
13 Cov neeg ntawd, thaum lawv tuag,
lawv tseem tsis tau txais txhua yam uas
Tswv Ntuj cog lus tias nws yuav pub.
Tab sis yog vim lawv ntseeg, mas lawv
nyob deb pom thiab tshua txog txhua yam
ntawd, thiab lawv zeem tseeb tias lawv
tsuas yog ib co pej kum neeg tuaj hla lub
ntiaj teb no xwb. 14 Lawv qhia li no
kom pom tias lawv nrhiav ib lub teb
chaws nyob. 15 Yog lawv nco txog lub
teb chaws uas lawv yug los, mas lawv
tseem muaj caij rov mus nyob lawv qub
teb qub chaw. 16 Tab sis lawv tos txog
ib lub teb chaws zoo dua, yog lub nyob
saum ntuj. Vim li ntawd Tswv Ntuj tsis
txaj muag cia lawv hu nws ua lawv tus
Tswv Ntuj, ces nws npaj ib lub tsheej rau lawv tiag.
17 Yog vim Has Nplas Has ntseeg, mas
thaum Tswv Ntuj sim nws, nws cia li
muab Is Xas Has txi rau Ntuj, txawm tias
Is Xas Has yog nws tib leeg tub twm zeej.
18 Is Xa Has twb yog tus yuav txais tej
yam uas Tswv Ntuj cog lus tias yuav pub.
Tswv Ntuj twb hais txog Is Xas Has tias :
‘koj yuav muaj ib co xeeb ntxwv tawm
ntawm Is Xas Has.’ 19 Has Nplas Has
xav tias Tswv Ntuj tsa tau cov neeg tuag
kom ciaj rov los. Ces Has Nplas Has rov
qab tau nws tus tub. Zaj hais txog Is Xas
Has no yog ib zag paj lug.

Lus Kas Ntawv Moo Zoo 12, 32-48

2 Pab me yaj, nej txhob ntshai mog, vim nej Txiv
zoo siab muab lub Ceeb Tsheej rau nej.
33 "Muab nej lub cuab tam muag, nej
muab pub rau cov pluag. Nej tsim tej nas
nyiaj tsis txawj qub, tsim ib txhab kub uas
tsis txawj nqig rau saum ntuj. Nyob saud,
tsis muaj tub sab tuaj ze, tsis muaj kab
rws xwv. 34 Vim tias nej txhab kub
nyob qhov twg, nej lub siab kuj yuav
nyob qhov ntawd."
35 "Nej sia siv thiab taws teeb, 36 zoo li
ib co tub txib uas tos lawv tus tswv mus
ua tshoob rov los. Thaum tus tswv rov
los txog, nws yuav khob qhov rooj, ces
lawv yuav qhib rau nws tam sis ntawd.
37 Cov tub txib uas thaum tus tswv los
txog, nws pom lawv tseem zov hmo, mas
lawv txoj hmoov zoo. Kuv hais tseeb rau
nej, tus tswv yuav sia siv, yuav kom cov
tub txib ntawd zaum ntawm rooj mov,
nws yuav rau mov rau lawv noj. 38
Txawm tias, tus tswv los txog thaum ib
tag hmo los thaum qaib qua, yog nws
pom zov hmo zoo li ntawd, mas cov tub
txib txoj hmoov zoo ! 39 Nej to taub
qhov no zoo mog ! Yog tias tus tswv tsev
paub lub sij hawm twg tub sab yuav tuaj,
nws yuav tsis cia tub sab tho qhov tsev.
40 Nej kuj ib yam thiab, nej yuav npaj
kom txhij, vim yog lub sij hawm uas nej
tsis nco faj, mas Neeg Leej Tub thiaj yuav tuaj ."
41 Ces Pob Zeb hais tias :
"Huab Tais, koj hais zaj paj lug no, puas
yog koj hais rau peb, los hais rau sawv daws ?"
42 Huab Tais teb hais tias :
"Leej twg yog tus tub txib pheej xeeb
thiab xyuam xim, uas tus tswv tsev yuav
tsa nws saib tus tswv cov tub zog, kom
thaum txog caij nws faib hmoov nplej rau
lawv ? 43 Yog thaum tus tswv rov los
txog, nws pom tus tub txib tab tom lis
nws tej num, mas tus tub txib no txoj
hmoov yuav zoo. 44 Kuv hais tseeb rau
nej, tus tswv yuav tsa nws saib tus tswv
lub cuab tam tas huv si. 45 Tab sis yog
tus tub txib ntawd xav hauv siab tias 'kuv
tus Tswv yuav los lig,' ces nws muab tus
tswv tej tub txib ntxhais txib ntaus, nws
noj nws haus kom qaug. 46 Tus tub txib
no tus tswv yuav los txog hnub uas nws
tsis nco faj, thiab lub sij hawm uas nws
tsis paub. Tus tswv yuav ntiab tus tub
txib mus nrog cov tsis hwm Ntuj nyob.
47 Tus tub txib uas nws yeej paub qhov
uas tus tswv xav kom ua, tab sis nws tsis
npaj dab tsi li, thiab tsis tau ua raws li
qhov tus tswv xav kom ua, mas tus tub
txib ntawd yuav mag tus tswv rab
nplawm ntau teg. 48 Hos tus tub txib uas
yeej tsis paub qhov uas tus tswv xav kom
ua, thiab nws kuj tau ua tej yam tsim
nyog ntaus, mas nws yuav mag tus tswv
nplawm sib me ntsis. Tus uas Ntuj tau
pub ntau rau, Ntuj yuav taij ntau rov qab.
Tus uas Ntuj tso ntau yam rau nws ceev,
mas Ntuj yuav kom nws xa ntau dua rov qab.

NTHUAV NTAWV NTSHIAB.

Nco txog zeej tsoom neeg ntseeg thiab phooj ywg sawv daws,

Hnub no yog lis piam hnub chiv 19 lub caij nruab xyoo peb. Hauv cov zaj nyeem hnub no, muaj ntau lub ntsiab lus. Tiam sis, peb tsuas nthuav ob peb los txog lub ntsiab txoj kev ntseeg thiab kev tso siab rau Huab Tais Tswv Ntuj raws li nram no.

Kev ntseeg thiab tso siab rau Huab Tais Tswv Ntuj muaj kab muaj ke taug, muaj hauv paus hauv ntsis. Tsis lam cia li ntseeg los tso siab li ub li no yuav muaj chaw mus. Yuav tau ntseeg thiab tso siab li peb cov yawg koob ntseeg thiab tso siab rau Tswv Ntuj. Yog tias peb tsis qhib peb lub siab los npuab peb cov yawg koob tus lwj lwm kev ntseeg, yog peb tsis mloog peb lub Koom Txoos kev qhuab qhia, peb yuav tsis paub ua neeg ntseeg thiab tso siab rau Huab Tais Tswv Ntuj, peb yuav zoo li tus neeg dig xuas kab xuas kev. Peb yuav ua cov neeg ntseeg Tswv Ntuj khuam ntab khuam ntuv tej tog kev tsis muaj hauv paus hauv ntsis, tsis tseem neeg ntseeg Tswv Ntuj. Yog peb twb tsis tseem neeg ntseeg Tswv Ntuj yuav ua cas muaj Tswv Ntuj koob hmoov ? Sawv daws twb pom ntsoov muaj ntau tus neeg sawv ua xib hwb ncauj puam suab khawv, tiam sis, muab tsis tau lub keeb chiv kev ntseeg thiab tso siab rau Tswv Ntuj los qhia rau neeg. Tsis kav lawv tseem muaj ntsej muag khav tias lawv no paub thiab txawj qhia kev ntseeg tshaj Vaj Qhia thiab cov Tswv Qhia los tsoom Txiv Plig, cov tuav lub hauv paus kev ntseeg Tswv Ntuj. Vim lawv lub qe tsis yog qhia qhov tseeb txog Tswv Ntuj rau neeg, hos yog nrhiav txoj kev tswj kom tau ib npoj neeg ntseeg raws li lawv cob thiab lawv qhia (les sectes chrétiennes). Nej thiaj li pom muaj ntau lub “Church” sib txawv npaum li ntawd ib ncig ntawm nej nyob. Hmoob twb hais tias muaj tej txhia tub ki cam thawj niam txiv hais tsis mloog, tso kwv tso tij tseg khiav mus raws neej tsa, thaum kawg tsis paub dab, tsis txawj ua dab ua qhua lawm. Tej xib hwb cuav ntawd zoo tam zoj li tej tub ki cam thawj, tsis hwm poj yawm thiab muab tsis tau lub hauv paus kev ntseeg Tswv Ntuj los qhia rau neeg : “6 Peb cov yawg koob twb ntxov paub hmo ntawd, lawv ntseeg tej lus cog cia muaj tseeb tiag ua rau lawv zoo siab heev. 7 Koj haiv neeg tos nws ntshis li kev cawm rau cov ncaj ncees hos kev puas tsuaj rau cov yeeb ncuab TT 18,6-7.” Hos cov tseem xib hwb los tseem neeg ntseeg Tswv Ntuj, lawv txuag zias poj yawm txwv koob tus txhooj tus cai kev ntseeg thiab kev teev hawm Tswv Ntuj thaum chiv keeb los txog niaj hnub no tsis pub yuam kev ib qho. Peb ntseeg thiab tso siab rau Tswv Ntuj raws poj yawm kev qhuab qhia, raws li haiv neeg ntseeg Tswv Ntuj txoj kab txoj ke thiab tsoom leej ntshiab tej txiaj ntsim, raws li Koom Txoos Kav Tos Liv tus txhooj cai, peb yuav tsum mloog Koom Txoos lus. Vim li cas ? Vim Tswv Ntuj yog tus tshoj Koom Txoos Kav Tos Liv ua lub Koom Txoos niam sawv Tswv Ntuj npe qhia qhov tseeb, qhia Tswv Ntuj lus rau ntiaj teb neeg kom coj tas txhia haiv neeg los ua ib cuab ib yig, ua ib haiv neeg ntseeg raws li txoj koob txoj hmoo Tswv Ntuj foom tseg rau Has Nplas Has : “9 Tim ntseeg, Has Nplas Has thiaj mus nyob txawm hauv thaj av cog lus tseg li thaj tsis muaj tsw ua tsev tsam phooj rau nrog Is Xas As thiab Yas Kos cov yuav txais kev cog lus cia no ua lawv tug…12 Li ntawd, txawm nws tib leeg tuag nthi lawm los yug tau coob cuag li cov hnub qub saum ntuj thiab pawg lug li suab puam tom ntug hiav txwv HN 11,9.12.” Peb teev hawm Tswv Ntuj raws li Has Nplas Has kev cob qhia, peb yog Has Nplas Has xeeb leej xeeb ntxwv hauv Koom Txoos Kav Tos Liv muaj Tswv Ntuj txiaj ntsim. Vim Yes Xus yog tus tsa Pob Zeb ua tus tswj Koom Txoos, ziag no, Vaj Qhia sawv Pob Zeb chaw saib Yes Xus lub Koom Txoos. Cov neeg ntseeg zwm Koom Txoos Kav Tos Liv, yog zwm Yes Xus thiab koom Yes Xus lub cev (être avec le Christ par le sacrement de l’Eucharistie) : “42 Huab Tais hais tias : “Leej twg yog tus tub txib pheej xeeb xwb fab, huab tais yuav tsa saib nws vaj tse thaum zoo caij nyoog yuav pub nplej rau ? 43 Tus qhev ntawd hmoov zoo, nws tus huab tais los txog pom coj li ntawd. 44 Muaj tseeb, kuv hais rau nej, nws yuav tsa tuav tag nrho nws teej tug LK 12,42-44.” Yog peb hwm Koom Txoos Kav Tos Liv, peb kuj hwm Yes Xus. Cov neeg ntseeg cam thawj ncaim Koom Txoos Kav Tos Liv, kuj ncaim Yes Xus tam zoj cov yeeb ncuab, tsim kev kub ntxhov tiv Yes Xus. Vim li ntawd, yog Koom Txoos tsis tsa peb ua xib hwb, kuj yog Yes Xus tsis tsa peb ua xib hwb, peb tsis muaj cai sawv ua xib hwb peb tus kheej coj ib pab neeg ntseeg ua peb ntiag tug. Yog peb cam thawj hla Koom Txoos lo lus, peb kuj cam dhau Yes Xus thiab tsis npuab Koom Txoos lawm. Leej twg ua li ntawd, nws yuam kev tsis tseem neeg ntseeg Tswv Ntuj lawm (attitude des différents courants du protestantismes) : “45 Hos yog tus qhev twg xav hauv nws siab : kuv tus huab tais tsis hnyoo los, rho nplawm rau tej tub txib thiab ntxhais txib, noj thiab haus kom qaug, 46 Tus qhev ntawd tus huab tais los txog hnub nws tsis tos, thiab lub sij hawm nws tsis paub, huab tais yuav muab nws txiav ob ya faib nws feem cwb nws nrog cov cam thawj LK 12,45-46.” Peb pom xeeb ua neeg ntseeg thiab teev Tswv Ntuj, peb kuj xav kom txoj kev teev hawm muaj Tswv Ntuj koob hmoov thiaj li tsim nyog. Cov leej ntshiab yog cov neeg muaj Tswv Ntuj koob hmoov thiab tuav Huab Tais tej qoob loo, tuav Huab Tais teej tug, txais Huab Tais cov nplej. Yog peb ua neeg thoob tsib, peb yuav chim siab tsis nyob hauv lub Koom Txoos nrog cov neeg muaj Tswv Ntuj txiaj ntsim. Peb yuav txawj tu siab tsis txhob mus poo tej nyuag xib hwb cuav nyias kav nyias lub nyuag “Church” nkim yus sim neej ua neeg ntseeg tsis tau Tswv Ntuj koob hmoov.

Ib tsoom phooj ywg, txoj kev ntseeg thiab kev tso siab rau Huab Tais Tswv Ntuj li nyias zaj los ua li tej txhia xib hwb tej lus qhia, yog tsis raws lub Koom Txoos Kav Tos Liv txoj cai, peb nyias txoj kev ntseeg yuav tsis tau koob hmoov thiab nyias kev tso siab rau Tswv Ntuj yuav kav tsis tau nyias. Peb txawm yuav hais npaum ub npaum no los tsis ntsu rau peb dab tsi. Tiam sis, yog peb nyob hauv Koom Txoos ces txawm peb lub siab xav xwb, lub ncauj tsis hais tawm los yeej ntsu thiab tsam rau peb tog, vim muaj tsoom leej ntshiab ua peb cov pov thawj thov Tswv Ntuj koob hmoov rau peb.

08.08.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 14th August 2013, 8:51 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°47

Re: COV ZAJ NYEEM-Xyoo C 2012-13

Post NrhiavTswvNtuj 14th August 2013, 8:51 am

COV ZAJ NYEEM HNUB TIM 15/08/2013
Hnub Tsib, Mab Liab Mus Saum Ntuj

Zaj nyeem 1: Qheb Yav Tom Ntej 11,19; 12,1-6.10

Ces Tswv Ntuj lub Tuam Tsev nyob
saum ntuj qhib plho. Lub Xab Cog Lus
hauv Kem Ntshiab tawm los. Muaj xob
laim, muaj ib lub suab nrov, xob quaj nroo
ntws, lub ntiaj teb qeeg ua zog koog, thiab lawg poob dawb vog.
1 Muaj ib lub cim loj tas nrho
tshwm nyob saum ntuj : yog ib
tug Poj Niam hnav lub hnub. Lub hli
nyob hauv nws qab xib taws. Kaum ob
lub hnub qub vij nws taub hau. 2 Tus Poj
Niam ntawd xeeb tub lawm. Nws ntsaj
mob, vim nws tab tom daws cev.
3 Tseem muaj dua ib lub cim tshwm tuaj
nyob saum ntuj : ib tug niag Zaj loj kawg,
liab ploog cuag hluav taws. Nws muaj
xya lub taub hau thiab kaum tus kub.
Txhua lub taub hau ntoo ib lub kauj kub.
4 Nws tus ko tw cheb cov hnub qub saum
ntuj tas lawm ib feem peb. Nws muab
pov los rau hauv ntiaj teb.
Tus Zaj sawv ntsug ntawm tus poj niam
uas tab tom daws cev xub ntiag, npaj
nqos tus me nyuam uas tus poj niam yuav
yug. 5 Tus Poj Niam yug tau tus me
nyuam, yog ib tug me tub : yog tus yuav
tuav ib rab cwj hlau coj tas txhua haiv
neeg. Luag nqa tus me nyuam mus rau
Tswv Ntuj, nyob ze ntawm Tswv Ntuj lub
theej kiab. 6 Hos tus Poj Niam khiav mus
nyob hauv teb chaws suab puam : nws
mus nyob hauv qhov chaw uas Tswv Ntuj
npaj rau nws, thiaj yuav muaj tus yug
mov rau nws ib txhiab ob puas rau caum hnub.
10 Ces kuv hnov ib lub suab nrov saum ntuj tuaj tias :
“Zaum no, kev yeej, kev muaj hwj huam,
peb tus Tswv Ntuj txoj kev ua Vaj, thiab
nws Leej Pleev lub hwj huam los txog
lawm. Vim tus niag uas liam rau peb cov
kwv tij nruab hnub hmo ntuj, nyob ntawm
Tswv Ntuj xub ntiag, nws poob rau puag hauv lawm.

COV ZAJ NYEEM-Xyoo C 2012-13 - Page 2 Flowrber

COV ZAJ NYEEM-Xyoo C 2012-13 - Page 2 Flowrber

Zaj nyeem 2: 1 Kos Lis Nthos 15, 20-26

20 Tab sis tsis yog zoo li ntawd. Leej
Pleev sawv hauv cov tuag rov los lawm
tiag. Nyob hauv ib tsoom neeg uas mus
tsaug zog lawm, mas Leej Pleev yog
thawj tug uas tau sawv rov los.
21 Tim ib tug neeg, mas txoj kev tuag
thiaj li txeem los. Tab sis ib tug neeg rov
coj tau txoj kev sawv rov los rau cov tuag.
22 Sawv daws tuag nyob hauv As Das.
Tab sis sawv daws yuav ciaj rov los nyob
hauv Leej Pleev. 23 Nyias muaj nyias
lub sij hawm sawv rov los : tus xub sawv,
yog Leej Pleev, nws yog tus ntaus thawj.
Thaum txog Leej Pleev lub Hnub Nyoog
tawm rov los, mas Leej Pleev cov neeg
yuav sawv rov los.
24 Thaum ntawd yuav yog lub zim txwv
kawg : Leej Pleev yuav rhuav cov vaj,
cov tswj lub ntiaj teb, thiab cov muaj hwj
huam, ces nws yuav muab lub hwj chim
ua vaj cob rov rau Leej Txiv Tswv Ntuj.
25 Leej Pleev yuav ua vaj mus txog lub
caij Leej Txiv tso tsoom yeeb ncuab tas
tib si rau hauv nws qab xib taws. 26 Tus
yeeb ncuab kawg, uas nws yuav rhuav,
yog txoj kev tuag.

COV ZAJ NYEEM-Xyoo C 2012-13 - Page 2 52

COV ZAJ NYEEM-Xyoo C 2012-13 - Page 2 52

Lus Kas Ntawv Moo Zoo: 1, 39-56 Mab Liab mus xyuas Es Lis Xas Npes.

39 Tau ob peb hnub, ces Mab Liab sawv
kev mus, nws rau siab ntso mus pem toj
siab, rau ib lub nroog nyob xeev Yus Das.
40 Nws chaws mus hauv Ntxas Kas Lias
tsev, nws foom lus nyob kaj lug rau Es
Lis Xas Npes. 41 Thaum Es Lis Xas
Npes hnov Mab Liab foom kev kaj lug,
mas nws tus me nyuam dhia hauv nws
plab, thiab Leej Ntuj Plig Ntshiab los
nyob puv hauv Es Lis Xas Npes. 42 Ces
Es Lis Xas Npes tsa suab hlo hais nrov nrov tias :
"Koj tau koob tau hmoov tshaj ib tsoom
poj niam huv tib si, thiab lub txiv txi hauv
koj lub cev tau koob tau hmoov. 43 Ua
cas Ntuj thiaj pub kom kuv tus Huab Tais
leej niam tuaj xyuas kuv ? 44 Koj saib,
thaum kuv hnov dheev koj lub suab foom
kev kaj lug nrov txog kuv pob ntseg, tus
me nyuam hauv kuv plab dhia zoo siab.
45 Tus tau ntseeg tias cov lus Huab
Tais hais rau nws yuav tsheej xeeb, mas
nws txoj hmoov zoo !"
46 Ces Mab Liab hais tias :
"Kuv tus plig cav txog Huab Tais lub hwj
chim, 47 kuv lub tswv yim hom khaj
nyob hauv Tswv Ntuj, tus Cawm kuv,
48 vim nws dauv muag ntsia nws tus
ntxhais txib hauv txheej qis. Vim li
ntawd, txij no mus, txhua tiam neeg yuav
hais tias kuv txoj hmoov zoo, 49 vim tus
Muaj Hwj Huam ua tej yam loj rau kuv,
nws lub npe Ntshiab. 50 Nws lub siab
hlub roos cov neeg hwm nws tiam dhau
tiam. 51 Nws sab npab nthuav nws lub
zog rau sawv daws pom. Cov neeg uas
lub siab muab hlob, Huab Tais ua kom
lawv tawg. 52 Huab Tais nchuav cov
muaj hwj huam poob ntawm lawv lub theej kiab.
Nws tsa cov neeg hauv txheej qis kom siab.
53 Nws pub tej yam zoo rau cov neeg
tshaib noj seem noj so, hos nws ntiab cov
neeg muaj rov qab mus tes qhuav.
54 Huab Tais pab nws tus tub txib His
Xas Lais, vim nws nco ntsoov tias nws
lub siab hlub neeg,
55 nws ua raws li nws tau tshaj rau peb
cov yawg koob, nws ua zoo tas nrho rau
Has Nplas Has thiab Has Nplas Has cov
xeeb ntxwv mus ib txhiab ib txhis."
56 Mab Liab nrog Es Lis Xas Npes nyob
peb lub hlis tej, ces nws rov mus tsev.

NTHUAV NTAWV NTHIAB.

COV ZAJ NYEEM-Xyoo C 2012-13 - Page 2 Fra_an10

Ib tsoom neeg ntseeg thiab phooj ywg,

Hnub no yog ib hnub zoo caij zoo nyoog thiab ua hmoov loj nco txog peb leej niam Mas Lias ntsuj plig nrog tas nrho lub cev ntaj ntsug mus saum qaum ntuj. Peb tsis yog lam xev tswv yim hais, peb caw sawv daws mloog Txiv Vaj Qhia Zam Paj Lug 2 tej lus qhia.

Koom Txoos Kav Tos Liv yeej ib txwm lees paub peb leej niam Mas Lias nce mus saum ntuj vim lub txiaj ntsim Mas Lias nrog nws Leej Tub koom txoj dej num raws li Tswv Ntuj lub hom phiaj.

Leej Ntshiab Germain (Saint Germain de Constantinople mort en 733) hais cov lus no ua Yes Xus pus nws leej niam mus lawm qaum ntuj : “Koj yuav tsum tau mus nyob qhov chaw uas kuv mus nyob, leej niam tus nyob ti koj Leej Tub.” Leej Ntshiab Germain tseem hais ntxiv : Vim Yes Xus hlub nws niam nws thiaj kom Mas Lias mus saum qaum ntuj nrog nws Leej Tub ua ke.

Peb thiaj muaj cai hais tias Mas Lias cev xeeb tub ua kom nws lub cev yog tseem Huab Tais lub chaw ntshiab muaj koob meej.

Lub Koom Txoos Kav Tos Liv tus txhooj Lumen Gentium nqe 59 (LG 59), Tuam Rooj Ncauj Lus Vas Tis Kas 2 tau tshaj rau tsoom neeg ntseeg hais txog Mas Lias yog tus xeeb txawm ntshiab huv, vim li ntawd, Mas Lias tsis raug tib neeg kev ploj tuag khuam ntiaj teb tos txog hnub kawg li sawv daws. Nws txoj kev xeeb txawm tau ntshiab huv no ua tau rau nws uas yog Tswv Ntuj leej niam cev ntaj ntsug thiab ntsuj plig muaj hwj chim.

Cov ntsiab lus hais txog Mas Lias cev ntaj ntsug thiab ntsuj plig nce mus saum qaum ntuj no ntaus nqi loj txog tib neeg lub cev ntaj ntsug.

Peb yuav nco ntsoov tej yam uas tiam neej no saib tsis taus lub cev poj niam tam zoj li tej khoom ua lag luam ; Mas Lias kev nce pem ntuj ua lub cim qhia tias tib neeg lub cev ntaj ntsug muaj nqes, Huab Tais yuav pub kom ntshiab huv muaj Tswv Ntuj hwj chim.

Tos Mas Lias muaj Tswv Ntuj lub hwj chim yog vim nws txais Tswv Ntuj Leej Tub hauv nws lub cev thiab tas nrho nws lub siab. Tus neeg ntseeg yuav yoog Mas Lias saib ntsoov nws lub cev muaj nqes thiab txuag zias ua Tswv Ntuj lub chaw ntshiab kom txog hnub tsim dheev sawv ciaj sia.

Yog ib lub cim qhia tias peb leej tib neeg lub neej yuav taug Mas Lias txoj kab nce mus lawm qaum ntuj.

Vaj Qhia Zam Paj Lug 2 (Jean Paul 2) Audience 9 juillet 1997

Tus txhais: TP.Cwj Vuam Chiv.

Catéchèse de Jean Paul II

1. La tradition constante et unanime de l'Église met en évidence combien l'Assomption de Marie rentre dans le dessein divin et est enracinée dans la participation singulière de Marie à la mission de son Fils.

Saint Germain de Constantinople (mort en 733) met ces paroles dans la bouche de Jésus qui s'apprête à conduire sa Mère au ciel: «Il faut que là où je suis, tu y sois aussi, Mère inséparable de ton Fils »[1].
On peut donc affirmer que la maternité divine, qui a fait du corps de Marie la résidence immaculée du Seigneur, fonde son destin glorieux.

2. Dans un texte riche de poésie, saint Germain soutient que c'est l'affection que Jésus porte à sa Mère qui exige que Marie rejoigne au ciel son divin Fils:
«Comme un enfant recherche et dé-sire la présence de sa mère, et comme une mère aime vivre en compagnie de son fils, il en est de même pour toi; l'amour que tu portes à ton Fils et Dieu ne fait pas de doute, et il convenait que tu retournes vers lui. Et ne convenait-il pas que, de toute façon, ce Dieu qui a éprouvé pour toi un amour vraiment filial, te prenne en sa compagnie? »[3].
En rappelant dans la Constitution dogmatique sur l'Église le mystère de l'Assomption, le Concile Vatican II attire l'attention sur le privilège de l'Immaculée Conception. Précisément parce qu'«elle fut préservée de toute tache due au péché originel » (LG 59), Marie ne pouvait pas demeurer comme les autres hommes dans un état de mort jusqu'à la fin du monde. L'absence de péché originel et sa sainteté parfaite dès le premier instant de son existence exigeaient pour la Mère de Dieu la pleine glorification de son âme et de son corps.

5. Aussi succinctes soient-elles, ces notations nous permettent de mettre en lumière que l'Assomption de Marie révèle la noblesse et la dignité du corps humain.
Devant les profanations et l'avilissement auxquels la société moderne soumet souvent, en particulier, le corps de la femme, le mystère de l'Assomption proclame le destin surnaturel et la dignité de tout corps humain, appelé par le Seigneur à devenir un instrument de sainteté et à participer à sa gloire.
Marie est entrée dans la gloire parce qu'elle a accueilli dans son sein virginal et dans son cœur le Fils de Dieu. En la regardant, le chrétien apprend à découvrir la valeur de son propre corps et à le garder comme un temple de Dieu, dans l'attente de la résurrection.
L'Assomption, privilège accordé à la Mère de Dieu, constitue ainsi une immense valeur pour la vie et le destin de l'humanité.

Jean Paul II, Audience du 9 juillet 1997

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 17th August 2013, 6:19 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°48

Re: COV ZAJ NYEEM-Xyoo C 2012-13

Post NrhiavTswvNtuj 17th August 2013, 6:19 am

COV ZAJ NYEEM HNUB TIM 18/08/2013

Chiv 20 Nruab Xyoo C

Zaj nyeem 1 : Yes Les Mias 38, 4-6.8-10

4 Cov nom tswv hais rau tus vaj tias :
"Yes Les Mias, tus neeg phem ntawd, koj
muab nws tua mas ! Vim nws hais ib co
lus tsis zoo ua kom cov tub rog zov lub
nroog thiab cov pej xeem ntaus siab me.
Tus ntawd tsis xav nrhiav kev cawm
tsoom pej xeem, nws coj lawv mus raug txom nyem."
5 Tus vaj Xes Des Xis teb tias :
"Nej ntsia, nws nyob ntawm no. Nws
nyob hauv nej tes. Tus vaj ua tsis tau dab tsi los tiv nej !"
6 Lawv ntes Yes Les Mias, lawv muab
nws pov rau hauv vaj tus tub hu ua Mas
Kis Yas Hus lub qhov tim thaj uas nyob
hauv lub tshav zov keeb. Lawv muab
hlua tso nws nqes mus hauv lub qhov tim
thaj. Nyob hauv lub qhov tim thaj tsis
muaj dej, tab sis muaj av nkos, ces Yes
Les Mias zom rau hauv cov av nkos.
8 Es Npes Mes Les, yog ib tug neeg sam
ua kab xwm hauv tus vaj tsev. Nws tawm
hauv vaj ntxwv lub loog tuaj hais rau tus vaj tias :
9 "Huab tais vaj ntxwv, cov neeg ntawd
ua tsis zoo rau tus Yaj Saub Yes Les
Mias, lawv muab nws pov rau hauv lub
qhov tim thaj mas nws kawg yuav tuag nyob hauv xwb."
10 Ces tus vaj hais rau Es Npes Mes Les tias :
"Koj coj peb tug neeg nyob ntawm no
nrog koj, nej mus thau tus Yaj Saub Yes
Les Mias tawm los cheem nws tseem muaj txoj sia."

Zaj nyeem 2 : Hes Nplaws 12,1-4

Thaum muaj kev sim siab yuav ntsia ntsoov Yes Xus

1 Li ntawd, muaj tim khawv
coob kawg nyob ncig peb, mas
peb yuav muab txhua lub nra txo pov
tseg, thiab muab tej kev txhaum uas thaiv
peb kev xyeeb hlo pov tseg. Peb kav tsij
tso sas ntws mus txais txoj kev sim siab
uas Ntuj npaj rau peb.
2 Peb yuav ntsia ntsoov Yes Xus uas yog
tus ntaus thawj coj cov ntseeg. Nws pab
peb ntseeg kom tom thawj. Yes Xus tsis
kam taug txoj kev lom zem uas luag cev
rau nws, nws yeem kwv ntoo cuam, nws
tsis ntshai luag thuam, tsis ntshai poob
ntsej muag. Nyem no nws zaum ntawm
Tswv Ntuj lub theej kiab sab xis. 3 Nej
nco ntsoov txog Yes Xus uas raug cov
neeg txhaum tiv nws, nej thiaj yuav tsis
ntaus siab me.

4 Nej tseem tsis tau tawm tsam tiv kev
txhaum txog thaum nqaij ntuag ntshav nrog.

Lus Kas Ntawv Moo Zoo 12, 49-53
Yes Xus ua ntiaj teb neeg chaw sib ncaim.

49 "Kuv coj ib co hluav taws tuaj rau lub
ntiaj teb, kuv yeej xav kom cov hluav
taws ntawd twb cig lawm. 50 Kuv yuav
tsum txais ib co kab ke ntxuav. Kuv
ntxhov siab mus txog hnub uas tej ntawd
tiav tas. 51 Nej puas xav tias kuv tuaj
pub txoj kev thaj yeeb nyob ntiaj teb no ?
Kuv hais rau nej, kuv tsis tuaj pub kev
thaj yeeb, kuv coj kev sib ncaim tuaj.
52 Txij no mus, ib tse neeg muaj tsib
leeg yuav sib ncaim, peb leeg yuav tiv ob
leeg, ob leeg yuav tiv peb leeg : 53 sawv
daws yuav sib ncaim, txiv yuav tiv tub,
tub yuav tiv txiv, niam yuav tiv ntxhais,
ntxhais yuav tiv niam, poj yuav tiv nyab,
nyab yuav tiv poj."

NTHUAV NTAWV NTSHIAB.

Ib tsoom ntseeg thiab phooj ywg hmov tshua,

Peb nyob hauv lis piam hnub Chiv 20 lub caij nruab xyoo peb. Hnub no, peb yuav nthuav ob peb los hais txog tus neeg ntseeg Tswv Ntuj kev ua neeg nquag, ua neeg khwv li Tswv Ntuj cov lus qhia. Tiam sis, tus neeg ntseeg Tswv Ntuj kev nquag thiab kev khwv txawv tus neeg teev dab qhuas los teev lwm txoj kev teev hawm kev nquag thiab kev khwv.

Thaum peb tseem ua neeg teev dab qhuas, peb raug dab quab yuam ua rau peb raug txom nyem, ua lub neej nyob tuav plig cos. Vim sim neej dab yeej tsis khwv, cia neej khwv yug dab, ua dab qhev tiam dhau tiam. Neej yuav tsum nquag, neej thiaj muaj qoob loo thiab muaj tsiaj txhu los tua txi dab, ntxias dab, pauj dab yees kev hu dab. Tus tsis xwb fab, tsis muaj qoob loo thiab tsis muaj tsiaj txhu, nws yuav tsum tau luab nuj luab nqi txais luag teej luag tug, nws mam npeem khwv tseev kom tau them rov rau luag tom qab.

Dua ntawm peb Hmoob, tseem muaj lwm haiv neeg muaj ntau tsav ntau yam dab lawv teev. Tej txhia haiv neeg tej dab qhuas tseem heev thiab looj koov tshaj Hmoob tej dab, muab tsiaj txhu txi tsis txaus, tseem yuav tsum txi tib neeg thiaj pov khawv pauj tau lawv tej dab yees. Zoo li haiv neeg Aztèque txheej thaud, nyob teb chaws Mexique, npuas ciam teb Mes Kas. Haiv neeg Aztèque yog haiv neeg Mev cov poj yawm txwv koob. Cov Aztèques muaj ntau tus dab. Thawj tug dab loj hu ua Huitzilopochtli, yog tus dab hnub thiab dab tsov rog yuav tsum tiam tsiaj txhu thiab tib neeg ; tus dab Quetzalcoatl, yog dab cua daj cua dub ; Tezcatlipoca, dab ntuj txias teb tsaus...Lawv tsim tej lub pej thuam loj los loj siab los siab li ob peb txheej tsev, teeb tej lub thaj rau saum ncov. Cov neeg coj mus txi dab no yog tej poj niam, tej txiv neej thiab me nyuam tog yeeb ncuab lawv mus ntau rog yeej thiab ntes tau tsheej pab tsheej pawg. Kuj muaj tej txhia pej xeem neeg Aztèque tuaj yeem muab lawv tus kheej los ua txim txi dab. Lawv txhom neeg muab xyab ciaj ciaj saum thaj tho plab, kaus tej siab tej plawv tso tsheej pawg, ua ntshav ntws lug li dej txog hauv av. Muaj liv xwm sau tseg tias thaum lawv txi lub tuam tsev teev dab Tenochtitlan, xyoo 1487, lawv muab 4 hnub los ua hmoov txi tas 80 000 leej rau lawv cov dab. Thaum tiam 14, haiv neeg Espagnols mus tsuj teb tsuj chaw sab hiav txwv tim ub. Xyoo 1521, tus thawj tub rog Espagnols, Hernan Cortés, mus tua yeej haiv neeg Aztèque, txeeb tau lawv lub tuam ceeb, tswj hwm kav lawv. Tau 20 xyoo tom qab, muaj txog 9 (millions) tus neeg Aztèques thim lawv cov dab qhuas tig los ntseeg Tswv Ntuj. Tsis hais Hmoob, tsis hais cov Aztèques, cov neeg teev dab yuav tsum siv zog khwv thiaj pauj tau, txi tau lawv cov dab.

Txoj kev ntseeg thiab teev hawm Tswv Ntuj kuj yuav tsum tau muab tag nrho yus lub siab lub ntsws, lub tswv yim, muab tag yus sim neej los khwv ua neeg ntseeg Tswv Ntuj. Tiam sis, tus neeg ntseeg Tswv Ntuj txoj kev khwv txawv tus Hmoob teev dab qhuas los tus neeg Aztèque teev dab txoj kev khwv. Peb kev khwv teev hawm Tswv Ntuj tsis yog muab tsiaj txhu thiab tib neeg tua txi Tswv Ntuj, hos yog muab peb kev zoo siab muaj tub muaj ki, muaj nyiaj muaj txiaj, muaj qoob loo los puas muab kev nyuaj siab muaj mob muaj nkeeg, muab kev txhawj xeeb raug tshaib raug nqhis, raug ntxub raug hiam los ua txim, los ua suab seev, ua suab lus thov Tswv Ntuj. Tus neeg ntseeg Tswv Ntuj txoj kev khwv, yog khwv kom raws tau Yes Xus qab, kom nquag npaum Huab Tais Yes Xus nquag uv kev sib ntxub, nquag uv kev raug luag tsim txom, uv kev raug luag hiam dai tuag saum ntoo cuam : “3 Tus nej yuav qhuas tus uv cov neeg txhaum kev quab yuam nws xwv kom nej txhob qaug zog txawm nej ntsuj plig yuav tsaug luj luas 4 Nej twb tsis tau tiv kev txhaum txog txij ntshav los HN 12,3-4.” Peb los ua neeg ntseeg thiab teev Tswv Ntuj, peb txoj kev mob kev nkeeg, peb kev raug neeg lim hiam khoo peb teej peb tug, tej ntawd txawm yuav ua rau peb qaug qaug zog los kom peb nco ntsoov Huab Tais Yes Xus. Vim Huab Tais Yes Xus yog tus teev hawm Leej Txiv zoo, nws tseem raug neeg hiam loj tshaj plaws peb. Vim li ntawd, peb yuav npaj kom tau peb lub siab nquag plias, txaus siab khwv yog txaus muab, zoo siab hlo muab yus roj yus ntshav, yus txoj sia uv tib neeg kev lim hiam li tsoom leej ntshiab teev Tswv Ntuj, hwm Tswv Ntuj : “51 Ntshai nej xav tias kuv tuaj pub kev thaj yeeb rau daim av, kuv hais rau nej, laj yog, tseem ua kom tawg tas 52 Vim ziag no, tsib leeg hauv tib lub tsev yuav tawg tas, peb leeg yuav tiv ob thiab ob tiv peb 53 Lawv yuav tawg txiv tiv tub thiab tub tiv txiv, niam tiv ntxhais thiab ntxhais tiv niam, niam pog tiv nyab, nyab tiv niam pog LK 12,51-53.” Yes Xus kev ua tib neeg tawg tas tsis yog tim kev sib cav sib ceg thiab kev ua yeeb ncuab. Los lus Yes Xus hais tias : txiv tiv tub, tub tiv txiv los niam tiv ntxhais thiab ntxhais tiv niam no yog txoj kev sib hlub mus txog yus roj yus ntshav los yus txoj sia. Yes Xus hlub peb txog qhov Yes Xus muab tau nws roj ntsha thiab txoj sia los cawm peb. Tas tsoom neeg ntseeg tej txhia muab tau tej txhia muab tsis tau lawv roj ntsha ua txim rau Tswv Ntuj.

Ib tsoom phooj ywg sawv daws, tas tsoom leej ntshiab yog cov neeg ntseeg nquag thiab khwv li peb tus Huab Tais Yes Xus. Peb yuav vam txog tsoom leej ntshiab tej lus koob lus hmoov thov Tswv Ntuj pab peb, peb thiaj txawj ua neeg nquag neeg khwv teev hawm Tswv Ntuj xis Tswv Ntuj siab.

16.08.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 24th August 2013, 8:58 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°49

Re: COV ZAJ NYEEM-Xyoo C 2012-13

Post NrhiavTswvNtuj 24th August 2013, 8:58 am

COV ZAJ NYEEM HNUB TIM 25/08/2013

Chiv 21 Nruab Xyoo C

Zaj nyeem 1 :His Xais 66,18-21

Tswv Ntuj yuav txais tas tsoom kuj cuab los ua nws haiv neeg.

18 Kuv tuaj sau txhua lub kuj cuab thiab
txhua xeem lus. Lawv yuav tuaj, lawv
yuav pom kuv lub hwj chim.
19 Kuv yuav tsa ib lub cim nyob hauv
cov kuj cuab. Kuv yuav xa cov neeg dim
ntawm kev raug txim mus cuag cov kuj
cuab, thiab cov pov txwv nyob deb uas
tsis tau hnov hais txog kuv, tsis tau pom
kuv lub hwj chim. Cov dim ntawm kev
raug txim yuav tshaj kuv lub koob meej
nyob hauv cov kuj cuab. 20 Lawv yuav
coj nej tsoom kwv tij tas huv si nyob hauv
cov kuj cuab rov qab los, yuav cev lawv
ua thaj txi HUAB TAIS. Tus caij nees kuj
muaj, tus caij tsheb ob lub log los plaub
lub log kuj muaj. Tus caij luj los caij
ntxhuav kuj muaj.
Lawv tuaj txog kuv lub roob ntshiab Yes
Lus Xas Les. HUAB TAIS hais tias lawv
ua xws li tsoom His Xas Lais, lawv cev
toob xib nyob hauv cov phaj ntshiab huv
los txi Ntuj hauv HUAB TAIS lub tsev.
21 Kuv yuav tsa lawv tej tug los ua Leej
Choj thiab ua Les Vis.

Zaj nyeem 2 : Hes Nplaws 12, 5-7.11-13

5 Nej puas nco qab lo lus uas Ntuj
hais rau nej xws li hais rau ib co tub tias :
“Me tub, koj txhob thuam Huab Tais lo
lus qhuab. Thaum nws cob qhia koj, koj
txhob ua siab me. 6 Vim tias tus uas
Huab Tais nyiam mas Huab Tais cob
nws, thiab Huab Tais nplawm tus uas
Huab Tais txais los ua nws tus tub.”
7 Kev raug luag hiam, yog ib txog kev
cob nej. Tswv Ntuj cob nej xws li nws
cov tub. Puas muaj ib tug tub uas nws
txiv tsis cob qhia nws ?
11 Txoj kev cob qhia yeej tsis ua kom
leej twg zoo siab tam sim ntawd, tsuas
muaj ua kom chim siab xwb. Tsuas yog
yav tom ntej, mas txoj kev cob qhia thiaj
txi txiv rau hauv txoj kev thaj yeeb thiab txoj kev ncaj.
12 Ua li mas nej kav tsij rov tsa nej ob
txhais tes tsaug leeg, rov sawv ntseg saum
nej lub hauv caug ntshaus raws.
13 Thiab nej ua kom tej kev nkhaus ncaj
tuaj rau nej ob txhais taw, kom tus ceg
tawv txhob lem ko taw, nws thiaj yuav zoo taus.

Lus Kas Ntawv Moo Zoo 13, 22-30

Lub qhov rooj nqaim.
Cov pej kum neeg yuav txais Tswv Ntuj.

22 Yes Xus mus hauv cov nroog thiab
cov zos, nws qhia sawv daws. Nws taug
kev mus rau Yes Lus Xas Les. 23 Muaj
ib tug hais rau Yes Xus tias :
"Huab Tais, cov yuav txais kev cawm
puas yog cov tsawg ?"
Yes Xus hais rau lawv tias :
24 "Nej ua tiag mus hauv lub qhov rooj
nqaim mog. Kuv hais rau nej : coob leej
yuav nrhiav kev mus lawm hauv, tab sis
lawv yuav mus tsis txog.
25 Thaum tus tswv tsev sawv mus kaw
qhov rooj lawm, tab sis nej tseem nyob
nraum zoov, nej yuav pib khob qhov rooj
thiab nej yuav hais tias : 'Huab Tais, koj
qhib qhov rooj rau peb mas,' ces nws
yuav teb rau nej tias : 'Kuv tsis paub nej
nyob qhov twg tuaj.' 26 Ces nej yuav
hais rau nws tias : ‘Peb twb noj thiab haus
nyob ntawm koj xub ntiag, hos koj twb
qhia sawv daws nyob hauv peb cov tshav puam.’
27 Ces tus tswv tsev yuav hais rau nej
tias : 'Kuv tsis paub nej nyob qhov twg tuaj.
Nej txav mus deb kuv, tas nej cov ua
tsis ncaj huv tib si.
28 Nej yuav pom Has Nplas Has, His
Xas Has, Yas Kos, thiab ib tsoom yaj
saub nyob hauv Tswv Ntuj lub Ceeb
Tsheej, hos nej yuav raug luag ntiab mus
nyob sab nraud, mas thaum ntawd nej
yuav quaj ncia thiab yuav tom hniav
nkawv. 29 Luag yuav tuaj Xib Fab thiab
Toob Fab tuaj, tuaj Naj Fab thiab Pej Fab
tuaj. Sawv daws yuav tuaj zaum ntawm
rooj qav, nyob hauv Tswv Ntuj lub Ceeb Tsheej.
30 Ces muaj ib co neeg ua luag qab, yuav
tau ua ntej, hos ib co ua ntej yuav ua qab."

NTHUAV NTAWV NTSHIAB.

Ib zeej tsoom neeg ntseeg thiab phooj ywg,

Zoo siab ntau, peb rov tuaj sib fim ua ke hauv lis piam hnub Chiv 21 nruab xyoo peb no. Hnub no, yam peb yuav hais txog yog lub neej saum qaum ntuj nyob ntawm Tswv Ntuj xub ntiag raws li cov zaj nyeem peb hnov no.

Yog peb tsis rua muag, peb yuav ua cas pom kev ? Yog peb tsis xav tswv yim, peb yuav ua cas paub zaj twg yuam kev thiab zaj twg yog hauv peb lub neej los hauv txhua txoj kev teev hawm. Vim peb xav tswv yim, peb thiaj hais tau qhov tseem ceeb, phua tau lub ntsiab hauv txhua txoj kev teev hawm txhawb txhim tib neeg tej siab ntsws. Hauv txhua txoj kev teev hawm puav leej qhia txoj kev zoo rau neeg coj neeg hwm. Tiam sis, txhua txoj kev teev hawm tsis muaj peev xwm qhia qhov zoo mus kom tob kom kawg li txoj kev teev hawm Huab Tais Tswv Ntuj. Vim li cas ? Piv li Hmoob kev teev dab qhuas muaj qhov zoo los kuj muaj qhov yuam kev. Tej yam yuam kev, yam li neej khwv tas npaum li ntawd los tsuas khwv dawb khwv do rau dab noj dab haus tiam dab xwb, nkim nqe zog khwv tsis muaj nuj nqes. Tus dab yog tsav looj koov, auv mob auv ntsaj rau neej. Kev teev dab qhuas yog nplij dab, ntxias dab tas zog, los dab tsis pab tsis hlub neej. Dab zoo li lub kawm qab tshau ntiv nplej npaum li cas tsis puv. Tsis yog kev teev dab thiaj zoo li ntawd. Txoj kev teev Phu Thas kuj zoo li Hmoob ntxias dab. Tiam sis, tus coj kev cai Phu Thas tsis yog dab nws ntxias. Nws yuav tsum ntxias nws tus kheej lub cev thiab lub siab ; kom lub cev tsis txawj tshaib tsis txawj noj tsis txawj haus ; kom lub siab tsis txawj ntshaw qhov hlub, tsis txawj ntshai qhov mob qhov tuag. Tus tib neeg thiaj nkag tau hauv “Nirvana”, tsis rov los thawj thiab saum yaj ntxiv. Tsis li ces tseem yuav rov los thawj thiab dua. Tej lus qhia no tsis muaj hwj huam thiab cawm tsis tau neeg, tsis tso siab, tsis txaus ntseeg, txawv deb txoj kev teev hawm Tswv Ntuj.

Peb yuav tsum paub, Tswv Ntuj yog tus tsim tag txhua yam, yog tus ua vaj kav tag nrho lub ntuj thiab daim av, saum yaj ceeb no thiab hauv nruab yeeb txhua nrho. Tsis tshuav ib qho chaw twg luaj ntiv tes Tswv Ntuj yuav txhawj, yuav tsis pom, yuav kav tsis txog. Txoj kev ntseeg thiab teev hawm Tswv Ntuj, yog koob hmoov tsis txawj tag, tsis txawj kawg rau tag ntiaj teb neeg txhua leej txhua tus : “20 Lawv yuav coj tas nej tsoom kwv tij ntawm cov teb chaws luab nees, luab luj ua tsheb nco lug thauj ntxhuav tuaj txi Huab Tais saum lub roob kuv kev ntshiab Yes Lus Xas Les Huab Tais hais li thiab cov tub ki His Xais Lais tuaj txi hauv lub tais huv ntawm Huab Tais tsev YXY 66,20.” Yog peb leej twg npuab Tswv Ntuj tag siab nrho, Tswv Ntuj xav pub kom tus ntawd ciaj Tswv Ntuj tub ki, muaj Tswv Ntuj txiaj ntsim. Peb txoj kev khwv teev hawm Tswv Ntuj, twb pauv tsis tau lub txiaj ntsim hwj huam Tswv Ntuj xav muab rau peb tus neeg ntseeg teev hawm Tswv Ntuj. Tiam sis, ntiaj teb tib neeg feem coob twb tsis lees paub Tswv Ntuj ua Niam ua Txiv. Cov neeg ntseeg los tej txhia lam ntseeg Tswv Ntuj twb ntseeg tsis tom thawj, ntxeev siab ua saub cuav npuab dab phem zaj tiv Huab Tais Tswv Ntuj thiab tiv Tswv Ntuj cov tub ki teev hawm Tswv Ntuj. Peb thiaj li yuav tsum ceev faj txhob ua neeg khav theeb, neeg cam thawj, hos ua neeg siab dawb siab ncaj mloog lus li tsoom leej ntshiab : “5 Nej txawm twb tsis nco lo lus txhib hais rau nej li hais rau cov tub ki : “Kuv tub, txhob lam thuam Huab Tais lus qhub thiab txhob lam qaug zog rau nws lo lus ntuas” 6 Vim tus twg Huab Tais hlub, nws qhuab thiab cob tej nws yuav ua tub ki HN 12,5-6” Tswv Ntuj tsoom tub ki tsis yog tsoom neeg cav ncauj, neeg cam thawj, khav theeb, lim hiam thiab nkhaus, neeg dag. Peb twb muaj hmoo ua Tswv Ntuj tsoom tub ki, ua Tswv Ntuj haiv neeg ntseeg nyob ntiaj teb no. Cov neeg ntseeg txawj hwm Tswv Ntuj, ua tau xis Yes Xus siab nyiam, tsis muab hlob, tsis khav theeb, tsis khuv xim dag zog, txawj hlub neeg, mloog lus, yog Tswv Ntuj tub ki. Lawv yog cov neeg sib tw nkag qaum ntuj lub qhov rooj nqaim. Lub neej nyob saum qaum ntuj tsis yog tos thaum yus txoj sia tu, thaum tuag yus mam pom mam tau nyob. Lub neej saum qaum ntuj twb pib niaj hnub no ntawm taw thiab ntawm qhov muag, txhob tos thaum tuag ces lig dhau : “24 Nej yuav kam tiag kom nkag tau lub qhov rooj nqaim, kuv hais rau nej, vim coob leej nrhiav nkag, tab sis, lawv tsis muaj peev xwm. 25 Txij tus tswv tsev sawv los thiab kaw qhov rooj rau lawm, nej pib sawv sab nraud thiab khob qhov rooj hais tias : Huab Tais, qhib rau peb yuas ! Nws yuav teb rau nej hais tias : Kuv tsis paub nej, xyov nej nyob qhov twg. LK 13,24-25” Tej lus peb hais no tsis yog lus xev, yog lus hais thiab lus ntseeg raws li tej txiaj ntsim Yes Xus tsa cov leej ntshiab muaj hwj chim, raws li tej hwj huam Yes Xus ua rau peb pom xyeem tsis yog npau suav, tsis dag leej twg, txawv tas tej kev teev hawm thiab Hmoob kev dab qhuas tej lus tiam hais dhau tiam tsis pom xyeem thiab tsis txaus ntseeg : “ 28 Nej yuav pom Has Nplas Has, His Xas Has, Yas Kos, thiab tas cov yaj saub nyob hauv Tswv Ntuj qaum ntuj, pov nej rau sab nraud LK 13,28.” Tej hwj huam Yes Xus ua, Yes Xus tsis qia dub cia rau nws ib leeg ua, hos pub kom tsoom leej ntshiab ua tas tej hwj huam li Yes Xus ua. Peb thiaj li hais tau tias qaum ntuj qhov rooj qhib rau ntiaj teb pom qaum ntuj lawm.

Ib tsoom phooj ywg sawv daws, txoj kev teev hawm Tswv Ntuj muaj nuj nqes loj tas npaum li, yog peb txawj xav, peb yuav tsis nkim lub txiaj ntsim teev hawm Tswv Ntuj hauv peb lub neej. Txhob tos kom yuav tuag mam li sawv ntxov kub siab hwm Tswv Ntuj, teev Tswv Ntuj. Peb yuav niaj hnub niaj hmo ua tus neeg me neeg pluag vam thiab khaub zig Tswv Ntuj tas siab nrho. Peb yuav tau tsa ncauj thov tsoom leej ntshiab pab thov Tswv Ntuj rau peb.

22.08.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.

**NrhiavTswvNtuj** 30th August 2013, 5:51 am

NrhiavTswvNtuj

NrhiavTswvNtuj: Tswv Cuab Hmong Catholique; Messages : 1033
Date d'inscription : 2009-08-18

Post n°50

Re: COV ZAJ NYEEM-Xyoo C 2012-13

Post NrhiavTswvNtuj 30th August 2013, 5:51 am

COV ZAJ NYEEM HNUB TIM 01/09/2013
Chiv 22 Nruab Xyoo C

Zaj nyeem 1 : Npes Xis Las 3,17 - 18 + 20 + 28 - 29.

Cov nyiam ua neeg me, Huab Tais saib lawv zoo.

17 Me tub, thaum koj ua koj tes dej
num, koj txhob muab hlob, ces cov neeg
uas ntuj xaiv yuav nyiam koj.
18 Koj yim yog tus loj, koj yim yuav
nyiam ua tus me, koj thiaj yuav yog tus
neeg xis Huab Tais siab. 20 Vim Huab
Tais lub hwj huam loj tas nrho, thiab yog
cov neeg me thiaj cav lus zoo txog nws.
28 Thaum tus neeg muab hlob raug
txom nyem mas tsis muaj tshuaj kho tau
nws zoo, vim ib tug yub phem nrhau cag
tob nyob hauv nws lawm. 29 Tus neeg
xyuam xim xav ntsoov txog cov paj lug
nyob hauv nruab siab. Tus neeg thoob
tsib ntshaw ib lub pob ntseg qhib lug mloog.

Zaj nyeem 2 : Hes Nplaws 12, 18-19.22-24a

18 Nej tsis tau txav mus ze ib yam uas
nej kov tau, xws li cov hluav taws kub
kub, twv huab dub, qhov tsaus ntuj nti,
thiab cua daj cua dub, 19 lub suab hom
los tej suab hais lus nrov doog diaj. Cov
thaum ub tau hnov, lawv thov kom txhob
hais lus ntxiv rau lawv.

22 Tab sis nej, mas nej tau txav los ze
lub roob Xis Yoos, ze tus Tswv Ntuj muaj
txoj sia lub tsheej Yes Lus Xas Les saum
ntuj, ze txhiab vam tus Tshiab uas sib
txoos ua ntees lom zem, 23 ze ib tsoom
tub hlob uas muaj npe sau nyob saum
ntuj, ze tus Tswv Ntuj txiav txim rau tas
lub qab ntuj neeg, ze cov neeg ncaj cov
plig uas Ntuj twb ua kom lawv zoo txhij zoo txhua tas.

24 Nej tau txav los ze Yes Xus uas yog
tus sawv peb chaw cog lus tshiab, yog tus
tsuag nws cov ntshav uas txawj hais lus
zoo dua As Npes cov ntshav.

Lus Kas Ntawv Moo Zoo 14, 1a.7-14

Xaiv chaw zaum.

1 Muaj ib zaug, hnub Xas Npas
Tos, Yes Xus tuaj noj ib pluag
mov nyob hauv cov Fas Lis Xais ib tug thawj coj tsev.
7 Yes Xus hais ib zag paj lug rau cov
neeg tuaj noj mov, vim nws pom lawv
xaiv thawj cov rooj zaum. Nws hais rau lawv tias :
8 "Thaum luag caw koj mus noj tshoob,
koj tsis txhob mus zaum thawj cov rooj,
tsam luag caw ib tug muaj meej mom dua
koj tuaj thiab. 9 Nyob tsam tus tswv tsev
uas tau caw neb tuaj lam los hais rau koj
tias : 'Koj cia qhov chaw kod rau tus no.'
Ces koj yuav sawv mus zaum lub rooj
puag nram qab, koj yuav txaj muag.
10 Thaum luag caw koj, koj yuav mus
zaum lub rooj puag nram qab, kom
thaum tus caw koj los txog, nws hais rau
koj tias : 'Npawg, koj nce los pem toj.'
Ces koj yuav tau ntsej muag nyob ntawm
cov neeg tuaj nrog koj koom rooj qav xub ntiag.
11 Vim tias tus uas nws tsa nws siab, mas
Ntuj yuav txo nws qis, hos tus uas nws
txo nws qis, mas Ntuj yuav tsa nws siab."
12 Yes Xus tseem hais rau tus neeg caw nws tias :
"Thaum koj npaj ib roog su los ib roog
hmo, koj txhob nqua hu koj cov phooj
ywg, koj cov kwv tij, koj cov neej tsa,
thiab cov neeg nplua nuj uas nyob ze koj.
Tsam lawv ho caw koj thiab pauj koj rooj
nqaij rooj hno. 13 Thaum koj ua ib roog
qav, koj nqua hu cov pluag, cov tu tes tu
taw, cov ceg tawv, cov dig muag. 14 Koj
yuav zoo siab, vim lawv tsis muaj dab tsi
pauj rau koj. Thaum cov neeg siab ncaj
yuav sawv rov los, mas Ntuj yuav pauj rau koj."

NTHUAV NTAWV NTSHIAB.

Ib tsoom neeg ntseeg nyiam mloog Tswv Ntuj lus,

Peb nyob hauv lis piam hnub Chiv 22 lub caij nruab xyoo peb. Hnub no, peb zoo siab caw zeej tsoom neeg sawv daws qhib ntsej los mloog peb tus Huab Tais Yes Xus cov lus qhia txog lub meej mom ntxim Tswv Ntuj siab.

Leej tib neeg txhua leej tsis hais poj niam los txiv neej, puav leej ntshaw kom muaj neeg qhuas yus, ntshaw kom muaj koob meej nto moo lug. Li ntawd, tej niam tej txi nyias thiaj xav kom nyias tub nyias ki muaj neej zoo, muaj nyiaj muaj txiag, tuav dej num zaum rooj ntaub rooj ntaw, ua luag txwj luag laus, ua nom ua tswv tswj pej xeem huab hwm. Yog lam tau, tseem xav kom ciaj huab tais vaj ntxwv kav teb kav chaw tuav ciam dej ciam av. Yog leej twg ua tau li ntawd, ces nws yog tus muaj meej mom zoo tshaj saum daim av.

Tib neeg thiaj pheej ntshaw meej mom ua npau suav toog. Vim meej mom ua rau neeg muaj tsim, muaj nuj nqes, luag tej hwm. Tej nyiaj txiag, tej dej num, tej kev txawj ntse, kev ua nom ua tswv, ua huab tais no pub kom neeg tau ntsej muag thiab nto koob meej. Tus tau koob meej ua rau nws muaj meej mom. Ces meej mom ua rau neeg mob siab, cov tsis muaj khib rau cov muaj. Tus muaj los khav qhuas ntxhias rau cov tsis muaj : ua cas yus twb yog huab tais, yus twb yog nom, yog tus txawj ntse, tus txwj laug, tus nplua nuj, tej lus yus hais nyuag pej xeem qhev tseem cam thawj tsis mloog yus hais. Meej mom ua nom khib rau pej xeem. Hos cov pej xeem los hais tias : cas tus nyuag nom zoo li ntawd xwb yuav loj tag npaud, hais lus rau twb tsis xav teb yus lawm. Meej mom ua rau neeg ntshaw nplooj siab mob ncus nco. Peb thiaj pom muaj tej zaj tswv yim lim hiam, tsim txom, hiam neeg thiab nyoos tua neeg, sim neej yus xav tsis txog tias nyob ntiaj teb tib neeg yuav txawj phem npaum li ntawd.

Tej huab tais vaj ntxwv los ib tug tsis xav kom lwm tus loj dua, nto moo dua nws. Tus huab tais no thiaj txhij tub rog mus ntaus, mus tua lwm tus huab tais, txhav nws ciam dej ciam av, txeeb nws cuab yeej cuab tam, rhuav nws vaj loog, tsoo nws theej kiab kom puas tsuaj thiab ploj mus. Tsis yog tej nom tswv thiab tej vaj ntxwv thiaj muaj khib xwb. Tib neeg tej teeb meem feem ntau, ua rau tej zej zog sib cav sib ceg, tawg ua pab ua pawg, ua rau tej teb chaws sib ntaus sib tua ua tsov rog txheej dhau txheej tiam dhau tiam, puav leej tim lub meej mom : “8 Thaum muaj neeg caw koj mus noj tshoob, tsis txhob mus xyab ntawm thawj lub txaj, tsam muaj tus meej mom loj dua koj luag caw nws tuaj thiab. 9 Nws thiab koj neb tuaj, tus tswv yuav hais rau koj : cia lub chaw rau nws, koj lub tuaj tom tw, thaum ntawd koj yuav txaj muag LK 14,8-9” Peb tib neeg kev ntshaw meej mom ua rau peb tsuas xav txog peb tus kheej, tsis quav ntsej, tsis hlub tib neeg, saib tsis taus tus me dua yus thiab ntxub tus loj dua yus. Huab Tais Yes Xus kev qhuab qhia lub meej mom xis Tswv Ntuj siab txawv peb tib neeg ntiaj teb zaj.

Tus neeg ntseeg thiab teev hawm Tswv Ntuj, nws yuav nrauj nws lub qub siab thiab lub tswv yim qub kom tu taw thiab ploj mus. Nws thiaj li yuav ciaj tau neeg mloog Huab Tais Yes Xus lus muaj lub meej mom ntxim Tswv Ntuj siab. Vim lub meej mom phim tus neeg ntseeg muaj txiaj ntsim nyob ib txhiab ib txhis, tsis yog lub meej mom nyob xyoo puav los caum xyoo li neeg ntiaj teb. Tib neeg ntiaj teb lub meej mom yog kev iab kev daw lom neeg. Lub meej mom nyob ib txhis ntxim Tswv Ntuj siab yog koob hmoov, ua neeg nyab xeeb : “13 Tiam sis, thaum koj ua ib roog qav, koj caw cov pluag, cov tu ceg, cov ceg pauv, cov dig muag. 14 Koj muaj hmoo, vim lawv tsis muaj tus tsi thim rau koj ; tiam sis, thaum cov ncaj ncees yuav sawv tseem rov los, luag yuav thim rau koj LK 14,13-14.” Tus neeg ntseeg kev nrauj lub qub siab thiab zaj tswv yim qub, los yoog lub neej tshiab kev npuab Yes Xus lus qhia tsis yog yooj yim nrauj ib zaug los ob zaug yuav tau. Peb yuav niaj hnub mus pe peb tus Huab Tais Yes Xus thiab thov tsoom leej ntshiab pab peb thim peb lub qub neej thiab lub qub siab pov tseg kom tag peb sim neej. Peb thiaj yuav ciaj ua neeg ntseeg Tswv Ntuj thiab hlub tau cov pluag, cov ceg tawv thiab dig muag. Peb thiaj li yuav muaj ntsej muag luag ntxhi txais cov koob hmoov Huab Tais Yes Xus tuaj hu peb sawv hauv ntiaj teb cov plua av thiab plua tshauv mus lawm qaum ntuj.

Ib tsoom phooj ywg sawv daws, ntiaj teb lub meej mom muab tsis tau kev haum xeeb rau peb. Thov kom Huab Tais Yes Xus lo lus peb mloog hnub no pub lub meej mom hlub neeg rau peb txhua leej thiab tau nyob thaj yeeb mus ib txhis ntawm Tswv Ntuj xub ntiag.

27.08.2013 Cwj Vuam Chiv

Tus plig yim mus siab lub cev yim nyiaj mob
Tus plig yim ntshiab huv lub cev yim uv luag
Tus plig yim nyob ze Tswv Ntuj lub cev yim txom nyem
Tswv Ntuj tsom kwm koj vim koj yog tus neeg siab ntshiab
Tswv Ntuj txhais tes tsa rawv saum koj taub hau,
Vim koj ntshiab saum taub hau ti nkaus ko taw.