Lub 11 Hlis tim 1 Ua Hmoov Nco Txog Ib Tsoom Leej Ntshiab

Cov leej ntshiab peb hwm hnub no yog tas ib tsoom neeg siab dawb siab huv uas tau coj ib lub neej hwm Tswv Ntuj thiab hwm neeg thiab tau dua toj lawm, tau mus nrog Tswv ntuj nyob lawm. Koom Txoos Kas Tos Liv tau zeem tseeb txog ib co leej ntshiab, muab lawv tsa ua leej ntshiab ua qauv rau peb cov ntseeg tau xyaum. Cov leej ntshiab uas lub Koom Txoos tau tsa mas peb paub txog lawv cov npe, thiab peb paub txog lawv lub neej, tias lawv tau ua yam dab tsi rau Tswv Ntuj tsim nyog qhuas. Muaj cov Tim Khawv uas tau tuag vim txoj kev ntseeg, “Lawv yog cov uas hla dhau txoj kev raug luag hiam hnyav los. Lawv tau ntxhua lawv cov tsho ntev, thiab muab raus Leej Yaj cov ntshav kom dawb” lawm.

Tiam sis kuj muaj ib co neeg zoo ib yam li peb xwb, coj ib lub neej ib yam li peb thiab, tiam sis lawv lub siab kub lug rau Tswv Ntuj, lawv niaj hnub ua lawv lub neej nco ntsoov xaiv txoj kev uas yuav haum raws li Tswv Ntuj txoj cai. Lawv tau siv zog coj lawv lub neej raws nraim li HT Yes Xus cov lus uas hnub no peb hnov nyob hauv Ntawv Moo Zoo: Cov pluag nyob hauv nruab siab, cov siab zoo, cov siab huv, cov tsim kev thaj yeeb, cov nqhis txog txoj kev ncaj, cov hlub luag, thc… Vim li ntawd lub Koom Txoos thiaj li muab lawv tsa ua leej ntshiab rau peb xyaum.

Hnub no peb kuj tseem nco txog tas ib tsoom neeg ntshiab uas Koom Txoos tsis tau tsa ua leej ntshiab, peb tsis paub lawv npe, tsis pom lawv ntsej muag, tsis paub tias lawv lub neej yog zoo li cas, tiam sis lawv yeej tau nyiam Tswv Ntuj tas siab tas ntsws tas tswv yim ib yam cov leej ntshiab uas Koom Txoos tau tsa thiab, ces lawv tau mus nyob ze ze Tswv ntuj lawm.

Peb nco txog ib tsoom leej ntshiab, peb ntseeg hais tias lawv tseem hlub peb, quav ntsej txog peb, thiab thov ntuj pab peb kom peb caum tau lawv qab. Lawv tsis yog ib co neeg uas tau mus txog saum ntuj lawm ces ua ntsej lag muag dig tsis paub tias tseem muaj cov nyob tom qab niaj hnub tseem tawm tsam ntxwj nyoog tsis tseg. Lawv yeej xav kom peb yeej ntxwj nyoog ib yam li lawv thiab.

Hnub no yog ib hnub ua hmoov tshwj xeeb uas peb cov ntseeg Kas Tos liv yuav tsum tau mus tsev teev ntuj zoo ib yam li yog hnub Chiv. Tiam sis tu siab kawg li vim peb cov ntseeg mus koom teev ntuj tsawg tsawg xwb. Cov coob uas lawv mus tsis tau vim lawv txoj hauj lwm mas kuv xav tias Tswv Ntuj yuav zam rau lawv; tiam sis muaj ib txhia twb tsis mus hauj lwm los zoo li lawv tsis saib tias yog ib qho tseem ceeb li. Los xyov yog lawv tsis to taub tias yog ib hnub muaj obligation mus teev ntuj li? Txawm li cas los thov kom Tswv Ntuj zam txhaum rau peb cov neeg txhua tus, thiab qhib peb lub siab lub tswv yim kom to taub zuj zus lawm yav tom ntej.

Nram no kuv yuav tso cov zaj nyeem uas peb tau nyeem los tau mloog thaum peb mus koom thaj txi ntuj hnub no:

Zaj Nyem Ib: QYTN 7: 2-4 + 9-16

2 Kuv pom dua ib tug Tshiab tawm sabToob Fab tuaj ; nws nqa tus Tswv Ntujmuaj txoj sia lub thwj. Nws hu ib suab nrov nrov rau plaub tug Tshiab uas tau txais txoj hauj lwm tso xwv txheej rau lub ntiaj teb tias: 3 “Nej txhob rawm tso xwv txheej mus rau lub ntiaj teb, lub hiav txwv, thiab tej me ntoo. Tos peb ntaus cim rau saum Tswv Ntuj cov tub txib hauv pliaj tso.”4 Ces kuv hnov lawv ntaus cim rau npaum no leej : ib puas plaub caug plaub txhiab leej nyob hauv tas nrho cov xeemHis Xas Lais.
9 Dhau tej ntawd tas lawm, ces kuv pom ib pab neeg coob coob suav tsis txheeb ; muaj tas txhua teb chaws, txhua haiv neeg, txhua xeem lus. Lawv sawv ntsug ze ntawm lub theej kiab, nyob ntawm Leej Yaj xub ntiag. Lawv hnav tsho dawb ntev, thiab tuav tej rev nplooj ntawm tes. 10 Lawv qw nrov muaj ceem tias : “Kev yeej yog peb tus Tswv Ntuj uas nws zaum saum lub theej kiab tug, thiab yog Leej Yaj tug !” 11 Ces tas tsoom Tshiab uas sawv ncig lub theej kiab, ncig cov Laus thiab plaub Leeg Muaj Txoj Sia, lawv txhos caug, ntsej muag khoov ti av pe Tswv Ntuj. 12 Lawv hais tias :
“Lo Lus cav, lub hwj chim, kev thoob tsib, kev ua tsaug, kev nto koob meej, kev muaj hwj huam thiab muaj zog yog peb tus Tswv Ntuj tug, mus tas ib txhiab ib txhis ! Ua li.”
13 Ib tug Laus txawm hais rau kuv tias : “Cov neeg uas hnav tsho dawb ntev ntawd yog leej twg ? Lawv tuaj qhov
twg tuaj ?” 14 Kuv teb tias : “Huab Tais, yog koj thiaj paub.” Nws rov hais tias : “Lawv yog cov uas hla dhau txoj kev raug luag hiam hnyav los. Lawv tau ntxhua lawv cov tsho ntev, thiab muab raus Leej Yaj cov ntshav kom dawb.”

Zaj Nyeem Ob: 1 Zam: 3: 1-3

1 Nej ntsia saib, Leej Txiv txoj kev nyiam peb loj tas npaum no : yam li peb hu ua Tswv Ntuj cov me nyuam, peb yog Tswv Ntuj cov me nyuam tiag ! Lub ntiaj teb neeg tsis paub peb, vim ntiaj teb neeg tsis paub Leej Txiv. 2 Cov zoo nyiam, nyem no, peb yog Tswv Ntuj cov me nyuam. Qhov uas yav tom ntej peb yuav plhis mus zoo li cas, tseem tsis tau tawm los rau qhov muag pom xyeem. Peb paub tias, thaum Leej Pleev yuav tawm los rau qhov muag pom xyeem, mas peb yuav zoo li Nws, vim nws zoo li cas, mas peb yuav pom Nws zoo li ntawd. 3 Tus twg tso siab rau Leej Pleev, mas Leej Pleev yuav ua kom nws huv tuaj, vim Leej Pleev yog tus huv.

Ntawv Moo Zoo: Mas Tais 5: 1-12a

1 Yes Xus pom neeg coob coob tuaj, nws nce mus saum lub roob. Nws zaum. Cov thwj tim txav los ze Yes Xus. 2 Ces Yes Xus tsa ncauj qhia lawv hais tias : 3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. 4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. 5 Cov tau txoj hmoov zoo, yog cov quaj ntsuag, vim Ntuj yuav nplij lawv. 6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. 7 Cov tau txoj hmoov zoo, yog cov hlub luag tej, vim Ntuj yuav hlub lawv. 8 Cov tau txoj hmoov zoo, yog cov siab huv, vim lawv yuav pom Tswv Ntuj. 9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam. 10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. 11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. 12 Nej zoo siab thiab nej hom khaj mog, vim nej yuav tau txais koob haum loj nyob saum ntuj.

Hmoov Leej Ntshiab yog lub Hmoov rau "tsoom neeg tau tuag ua Yes Xus Tim Khawv los yog tsoom neeg siab ntshiab hwm Ntuj". Lub Hmoov no yog Txiv Vaj Qhia Npos Nis Fav xaws IV ua tus tsim rau xyoo 610, kom tau hawm txog cov leej ntshiab Los Mas uas lawv muab cov pob txha teem tseg hauv qhov taub coj los rau ib qho chaw tshwj xeeb rau cov leej ntshiab (panthéon d'Agrippa), thiab lawv txhim ib lub tsev teev Ntuj rau saud.

Nyob zoo ib tsoom ntseeg txhua leej uas yog cov Catholic, ib xyoog puag ncig twb rov los txog rau hnub peb ua hmoov nco txog tsoom Leej Ntshiab, uas tuag ua HT Yes xus tim khawv lawm.
Thov kom hnub tim 1 lub 11 xyoo 2014 no peb sawv daws qee lub sij hawm los mus koom thaj txi ntuj mis xas, kom tau teev ntuj pab sawv daws.

Thov tsoom Leej Ntshiab pab thov HT Tswv Ntuj lub txiaj ntsim tuaj pub rau peb, kom peb txawj ua HT Yes Xus tim khawv, xws li tsoom Leej Ntshiab.

Nyob zoo ib tsoom ntseeg txhua leej uas yog cov Catholic, ib xyoog puag ncig twb rov los txog rau hnub peb ua hmoov nco txog tsoom Leej Ntshiab, uas tuag ua HT Yes xus tim khawv lawm.
Thov kom hnub tim 1 lub 11 xyoo 2014 no peb sawv daws qee lub sij hawm los mus koom thaj txi ntuj mis xas, kom tau teev ntuj pab sawv daws.

Thov tsoom Leej Ntshiab pab thov HT Tswv Ntuj lub txiaj ntsim tuaj pub rau peb, kom peb txawj ua HT Yes Xus tim khawv, xws li tsoom Leej Ntshiab.

Hnub no yog hnub sawv daws ua hmoov Hwm tsoom Leej Ntshiab, yog ib hnub uas ntshiab thiab huv, li ntawd sawv daws yuav tsum tau mus saib Mis xas, txais lub Cim Yug.
Hnub no mas tas nro cov ntseeg Kav Tos Liv nyob thoob ntiaj teb, sawv daws ua hmoov hu nkauj cav txog tsoom Leej Ntshiab uas tau mus nrog Tswv Ntuj nyob.

NKAUJ HAWM TSOOM LEEJ NTSHIAB

Tsoom npoj Leej Ntshiab tau ci ntsa hawm Tswv Ntuj, lub suab seev xyiv fab npoj Leej Ntshiab lom zem nrog, Ntuj Cov Tshiab nyob sau ntuj.
Tsoom npoj Leej Ntshiab xyiv fab los zem hawm Tswv Ntuj.
Npoj Leej Ntshiab ua zoo zov Tswv Ntuj txoj cai, Ntuj lub teb chaw yog lawv li tiag, lub koob meej sau ntiaj teb, lawv tuag ua tim khawv rau Tswv Ntuj.
Tau ci ntsa nrog Tswv Ntuj nyob saum ntuj.

Nyob sawv daws, zoo li zaj nkauj no kuv twb sau ib zaug rau hauv no lawm, tiam sis kuv sau ua lus hmoob ntsuab, thiab thaum ntawd peb tseem tsi tau kho kom haum lus thoob teb. Yog tias nej pom ob zaj sib txawv me ntsis los txhob xav yuav kev rau kuv.

Kuv tsi nco qab lub lub Topic kuv sau lawm, xyov nyob rau chav twg, kuv mus nrhiav tsi tau lawm. Yog nej leej twg pom nog pab qhia kuv, kuv mam mus kho rau.

Xyoo no yog xyoo 2015