LEEJ NTSHIAB FUAS (Sinte Foy, Santa Fe)

**Maiv Tooj** 27th August 2012, 5:38 pm

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°1

LEEJ NTSHIAB FUAS (Sinte Foy, Santa Fe)

Post Maiv Tooj 27th August 2012, 5:38 pm

Leej Ntshiab Foy, yog ib yim neeg noob nom tus ntxhais hlob, nws yug thaj tsam xyoo 290 nyob rau Agen, Fab Kis qab teb. Muab rau ib tug niam mis tu (txheej thaud cov poj nom yug tau me nyuam xwb tsis pub mis, muab rau ib cov niam mis pub thiab tu hlob). Tus niam mis yog ib tug neeg ntseeg Ntuj, Foy paub txog Yes Xus Pleev thiab hwm Ntuj li tus niam mis qhia.
Tus me ntxhais no nyiam mus nyob tom lawv lub tsev uas deb zos, mus saib cov neeg ntseeg txom txom nyem teev Ntuj thiab raug tsim txom. Thaum nws txiv paub tias nws nyiag nyiag mov mus faib rau cov neeg raug txom nyem noj, ces nws txiv nyiag mus nyas txhom. Muaj ib hnub, nws txawm muab tau ib cov mov ci qhwv hauv nws daim nqaws tiab, nws txiv txamw los ntes nws thiab nug seb nws nqa dab tsi ahuv nqaws tiab. Tus me nyuam tso siab tag nrho rau Yes Xus Pleev, teb ntua tias : « yog ib cov paj xwb », ces, tam sim ntawd nws thooj txhij qheb kiag nws daim nqaws tiab naj cas nws txiv qhov muag ntsia ntsoov yog tib cov paj de tshiab tshiab tsw qab ntxiag xwb… »
Tej yam li no mas tshwm sim ntau heev, lawv cia li siav npe tias « Leej Ntshiab Foy ua si ». Nws muab txiaj ntsim yooj yim thiab ntau heev suav tsis thoob rau cov neeg siab ncaj hwm Ntuj.
Thaum lub caij sij hawm Yes Xus yug los rau Yes Xus tuag 200-300 xyoo tom qab, cov ntseeg ib sij raug tsim txom ib zaug. Lawv ntau rog tsis yeej los hiam tias tim cov neeg ntseeg tsis nrog lawv teev dab, txi dab ais txhaum dab lawm thiaj tua tsis yeej. Yog muaj mob aws los lawv tias tim cov ua ntuj Kev Cai tsis nrog lawv teev dab ais txhaum dab lawm. Lawv nrhiav ntau yam kev hiam los tsim txom cov neeg ntseeg ua ntu zus. Ces lub sij hawm uas cov Los Mas tus vaj txheeb Dioclétien ua vaj, nws rov tsim txom cov ntseeg dua ib zaug ntxiv.
Hnub tim 24 lub 2hlis xyoo 303, vaj txheeb Dacien mus txog Agen, Fab Kis Qab teb, nws tso qeb txam ntes thiab tsim txom cov neeg ntseeg txog Yes Xus. Tus me ntxhais Foy txiv ntshai tsam lawv paub tias nws tus ntxhais mus ntseeg Yes Xus ces nws yuav poob nom ces nws thiaj li ntes nws tus ntxhais Foy mus cob rau vaj txheeb Dacien. Tab sis tus ntxhais Foy ua siab tawv qhawv zoo nkaus li thaum Yes Xus mus sawv ntawm Pis Las Tos xub ntiag, nws muab nws peb tug ntiv tes los tuav ua ib txaum, ua Ntoo Cuam lub Cim ntawm hauv pliaj, ntawm di ncauj, ntawm hauv siab hu txog Leej Txiv, Leej Tub thiab Leej Ntuj Plig lub npe thiab nws teev Ntuj tias :
« Huab Tais Yes Xus, koj ib txwm los pab cov neeg ntseeg txog koj,
Zaum no koj los pab koj tus ntxhais txib mog
Thiab qhia kom nws txawj hais cov lus thoob tsib los lwv cov neeg, cov nom tswv uas lawv tsuas taus lawv muaj zog. »
Xub thawj, lawv kuj tsis ua tawv rau nws, tab sis lawv kom nws teev tus niam ntuj Dias thiab Jupiter uas yog cov Los Mas lawv teev nyob Agen thiab tag nrho cov teb chaws uas Los Mas kav. Tab sis Leej Ntshiab Foy tsis kam, nws teb lawv tias :
« Kuv yog neeg ntseeg Yes Xus Pleev !
Kuv zoo siab hlo txais kev tsim txom txog ntua kuv txoj sia tu rau Yes Xus Pleev lub npe. »

Ces Dacien kom lawv muab nws ntaus, plawm, tso qeb txam kom muab nws hlawv saum ib lub txaj tooj liab (tso rau saum lub txaj tooj liab, rau taws rau hauv qab kom kub nws ib txheej zuj zus, xav tias thaum kub heev lawm ces nws yuav thim ces mam tso nws). Thaum lawv tab tom npaj yuav tsim txom nws, tus me nyuam ntxhais tshaj Yes Xus lub moo zoo rau tsoom sid thiab kom lawv txhob qaug luag quav mus teev tej dab qus dab cuav. Coob leej tau txiaj ntsim, khuv leej nws, thov kom lawv tso nws thiab qw hais tias :
«Neeg lim hiam siab nyoos, tsuas paub txiav txim xwb, yog tim li cas thiaj li tsim txom tus neeg dawb huv, ib tug nkauj xwb dawb huv tsis muaj txhaum uas yog Tswv Ntuj kwv luag. »

Mauj tej kev kub ntxhov tsiv nyaum no los yeej tseem muaj ib tug me ntxhais muaj cuab kav nam mus hais tias nws yog neeg ntseeg Yes Xus nrog Leej Ntshiab Foy thiab, thawj tug nov yog Alberte, Leej Ntshiab Foy tus niam hluas yau nws kiag.
Ib pliag tom qab, muaj ib tug tub hluas hais nws tus kheej rau yawg Txoov Kav tib yam. Yog Caprais uas nws niaj hnub thov Ntuj rau cov neeg ntseeg uas raug tsim. Lawv nug nws seb yog neeg dab tsi, ntseeg dab tsi thiab ua dab tsi. Nws teb tias : « Kuv yog neeg ntseeg Yes Xus Pleev, txais Cim Ntxuav tag, kuv npe hu ua Caprais. »
Cov nom tswv ua tawv zuj zus, tus nom Dacien muab Caprais rau lawv ntaus sab heev. Cov nom ua phem heev, ces ib pliag cia li muaj ob tug hluas teev dab txav los hais tias nkawd yog neeg ntseeg Yes Xus Pleev nrog cov i thiab. Tab sis qhov tseeb, nkawd yog haiv neeg Nitiobriges uas ib txwm tuaj César tog.

Tsoom neeg quaj tsawm quaj tsawm vim tus me ntxhais qw tshaj Ntuj Lus nrov nrov. Cov nom ntshai tsam tsoom pej xeem sawv tawm tsam ces lawv muab Foy, Caprais, Prime, Félicien thiab Alberte coj mus kaw tsev loj faj.
Txawm lawv niam lawv txiv mus xyuas lawv hauv tsev loj faj, cov nom tswv rov tawm tsam dua los lawv tsis zeem li, lawv hais khov kho tias : « Yes Xus Pleev yog tus cawm seej ! »
Dacien thiaj kom cov peeb coj cov me nyuam mus rau tom lub tsev teev niam Ntuj Dias, Dacien muab cov me nyuam thiab coob leej neeg nyuam qhuav ntseeg tshiab thiab Foy tua txi Dias.
Foy thiaj raug hlawv thiab txiav caj dab tua grau xyoo 303 tom qab Yes Xus yug, nws muaj 12-13 xyoos. Yawg Txoov Kav tso qeb txam kom muab Foy pw nrhab saum lub txaj hlau, kom lawv rauv ib tsag thee rau hauv qab txhiab kom cov tooj liab kub kub mus rau nws tej tes taw tu ib qho zuj zus kom mob nws tshaj plaws. Ces tus me ntxhais pw ko saum lub txaj hlau kub lam liab ploog. Pom nws tej tes taw qhuav nkaum zuj zus, lub cev caws lo nkaus cov kav hlau, lawv muab nws dov saum daim ntxaij hlau liab ploog. Cov tub txib xuas hlau duav yawm thee pov rau hauv qhov cub kub ntaiv heev tseem muab roj thuv cuam rau kom cov ncaig cig nplaim hlob txij kiag nws lub cev. Hlawv Foy li no tag tseem muab nws txiav cag dab thiab.
Tsis ntev tom qab ces cov neeg uas teev txog Leej Ntshiab Foy lub npe kom pab tsis hais kev mob nkeeg, kev txom nyem, kev tsim txom, taug kaw puav leej tau txiaj ntsim tib si.

Tuam tsev teev Ntuj Conque tshwm sim los li cas ?

LEEJ NTSHIAB FUAS (Sinte Foy, Santa Fe) 45059-10

Muaj ib tug yawg hu ua Dadon, yogi b tug yawg nyiam nyob ib leeg, caij nees nrawm heev thiab muaj zog. Zoo rau lub zim txwv uas muaj tub sab loj lub caij ntawd tau tiv thaiv tej zej zog. Muaj ib hnub, Dadon los txog pom tub sab tuaj tshawb nws vaj tsev ntxhov nyho thiab ntes nws niam mus lawm. Dadon txamw yaum ob peb tug phooj ywg, caij nees mus raws. Dadon kom lawv tso nws niam, tab sis tus Tuam tub sab hais thuam Dodon tias yog nws xav tau tus pog laus no ces kom muab ib tug txiv nees zoo nkauj tshaj los pauv. Dadon npau taws, cem cov tub sab tias yuav tsis pub kom lawv tau cuam nws lub eeb nees. Ces cov tub sab muab nws niam ntaus, tsim txom thiab tua txia ua tej yav ntawm nws qhov muag ntsia ntsoov. Dadon chim siab heev uas nws pab tsis tau nws niam thiab xav tias yog tim nws es nws niam thiaj tuag. Ces Dadon tsis pom qab ua li cas, nws thiaj li txiav txim siab mus ua Yes Xus Pleev tus tub txib kom tau them nws tej txim txhaum. Nws thiaj li mus nyob rau ntawm Conque, yogi b lub vos hev tais tais, com kawb uas neeg tuaj tsis txog, nws thiaj li mus pib txhim lub Tuam Tsev teev Ntuj rau xyoo 790-795.
Xyoo 866 lawv coj Leej Ntshiab Fuas lub cev los tso rau hauv lub Tuam Tsev teev Ntuj Conque. Lawv muab lub cev los ntim hauv ib lub phij xab tawv, muab leem rau ntawm tus ncej ruv ze ntawm lub tsev tsam phooj, txua ib tug neeg ntoo zaum ib lub theej kiab, muab kub los leem sab nraud, muab nws lub taub haus los dhos rau lub cev ntoo. Cov neeg uas mus teev tus mlom kub nov kuj tau txiaj ntsim zoo. Txog zoo caij zoo nyoog, lawv muab nruam ncig zej ncig zos, cov neeg caum kov, chwv tus mlom kub « Le Majesté » mas lawv tau txiaj ntsim heev. Muaj ib zaug, lawv kwv mus rau ib lub zos deb, cov Txiv Twj Cuab uas kwv nce toj sab sab ces lawv txawm so me ntsis ntawm ib tsob ntoo nkaum tshav naj cas neeg dhia tuaj thov txiaj ntsim coob cuag li thaum neeg tuaj ntsauv Yes Xus tim tus ntug dej Tis Npes Lias. Vim lawv thov dab tsi los tau tag raws li lawv lub siab. Cov muaj mob tuag ceg, dig muag los puav leej zoo hlo tam sim ntawd.

LEEJ NTSHIAB FUAS (Sinte Foy, Santa Fe) Conque10

**Maiv Tooj** 27th August 2012, 5:46 pm

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°2

Re: LEEJ NTSHIAB FUAS (Sinte Foy, Santa Fe)

Post Maiv Tooj 27th August 2012, 5:46 pm

Leej Ntshiab Fuas lub hwj huam :

LEEJ NTSHIAB FUAS (Sinte Foy, Santa Fe) 2011-410

Leej Ntshiab Fuas (Sainte Foy) nquag pab cov neeg raug txim vim txheej thaud mas lawv tsim txom neeg phem heev. Ib nyuag qhov ob nyuag qhov tsis hlob tsis yau los ntes neeg mus tsim phem heev, ntes mus ua txim tuag. Tej zaud twb tsis txhaum, lam raug hiam ces lam muab ntes mus tsim txom. Lawv kev tsim neeg thaud, lawv muab hlau hlawv los laum, muab rau taws hlawv, txhiab nqaij siav poob tej daim, muab txiav tej tes taw, muab riam hlais nqaij pleev ntsev kom mob, muab khi rau nyuj nees dua, muab khi rau log rub tes taw ntshua…thc…
Cov neeg uas raug txim es thov txog Leej Ntshiab Fuas pab tau lawv dim los, hle lawv cov saw hlau xauv tes xauv taws los ntau tau cov ntxaij hlaus uas xov lub tsev tsam phooj hauv Conque. Yog nej pom phab laj kab ntawd mas nej thiaj yuav mem tau tias cov neeg uas Fuas pab tau lawv txoj sia coob npau li cas. Tsis tag li tseem tshua ntau yam hwj huam rau lwm ya muas suav tsis thoob. Vim Fuas yeej pub txiaj ntsim rau neeg txij puag thaum lawv muab nws tua 303 los txog niaj hnub no. Lub caij uas cov neeg tau hwj huam ntau tshaj mas yog thaum Fuas tuag tag nrho los txog rau thaum 1789 uas lawv tua huab tais Fab Kis tag ces lawv txwv tsis pub neeg teev Ntuj, lawv lws tsev teev Ntuj tej cuab tam teeg tug tas. Thiaj li ntsiag tau ib ntus li 80 xyoo, rov qheb txoj cai tshiab ces neeg thiaj mam rov los teev Ntuj dua los txog niaj hnub no.

1-Txim tua neeg :
Ib tug nom nyob ze nyob lub zos Avalène khib tus yawg Hadimar ces txawm tso qeb txam ntes nws, ntes kiag hmo xwb ces txiav txim kom lawv muab dai caj dab kiag taig kis tom qab. Hmo ntawd lawv muab yawg Hadimar kaw hauv ib kem hauv nruab tiv, tsaus tsaus ntuj tsis muaj tsau lam li. Nws xav txog taig kis lawv yuav muab nws dai, nws tsis tsaug zog, txog ib tag hmo pom ib tug ntxhais tiav me nyuam hluas nkauj zoo zoo nkauj tshwm los. Nws xav tias yog cov neeg nyob hauv lub tsev Huab tais. Tus ntxhais tsis tuav tsau ntawm tes li tab sis nws ci lam lug. Tus ntxhais txav los ti, nug tias ua tim nws ua li cas thiaj li tau los nyob qhov ntawd. Yawg txawm piav nws kev raug hiam rau tag ces thiaj nug tias :
«koj yog leej twg ? » li no rau tus ntxhais.
-« Kuv yog Fuas, tus uas koj thov txog kuv naj. Taig kis koj yuav mus nce lub rooj txiav txim, tab sis nco ntsoov hu txog kuv lub npe, txog ntua thaum lawv muab koj dai, tus Tswv muaj txog sia yuav chua koj dim ntawm txoj kev tuag. »
Li no tag ces tus ntxhais cia li ploj ntais lawm ua rau tus yawg nyob ntshee ntshee cia tab sis lub siab tus yees. Taig kis tus yawg tua neeg txawm tuaj cab yawg Hadimar mus rau saum lub rooj tua neeg, muab lub voj hluas khuab ntawm caj dab. Lawv suav ib ! ob! Peb!, chua daim ntoo kom Hadimar plam taw poob nrov poog hauv av, txoj qab hluas nplawm sis cia. Rov daim dua ib zaug, khi lub pob kom zoo zoo dua ntxiv rov suav : Ib ! Ob! Peb ! lauj kiag txiag, Hadimar poob nrom ca hauv pem teb, qab hluas fiav yuj yees cia. Lawv ua li nov peb zaug tua tsis tau Hadimar ces lawv qw zom zaws tias yog Leej Ntshiab Fuas pab cawm Hadimar lawm.

Ces tus nom thiab Hadimar nkawd sib puag xwb pwg mus txhos caug hawm Leej Ntshiab Fuas. Ib tug ua yog tuaj ua tsaug, ib tug yog tuaj thov txim.

2- Tus neeg dig mag thaj tsam xyoo 1007:
Thaum thaj tsam xyoo 970, ib tug tub hluas hu ua Guibert, nyob lub zos Espeyrac tsis deb ntawm Conque. Nws yogi b tug neeg nrawm, txawj ua luam heev, nws txawm hnav cev tsoos tsho li cov neeg mus Sau Siab teev Ntuj los nrog ob peb tug phooj ywg los tom Conque los. Lawv mus ua Leej Ntshiab Fuas tsaug. Lawv mus ib hnub tsaus ntuj txawm los ntsib nws tus los pav tab tom caij nees txog tog kev. Nws xav tias ntshe yog Guibert mus tham hluas nkauj lo no ces cia li muab kiag nws ob lub qho muag dawj tawm plaws pov tseg. Tam sim ntawd muaj ib tug nquab dawb ya plho los khaws nkaus ob lub qhov muag ntawm yawg los pav xub ntiag ya ncaj qha mus tom Conques lawm, ua rau yawg yoob tag nyob tug ruam ntsuav cia.

Tam sim ntawd yawg los pav Géraud rov khuv xim qhov nws ua yuam kev tab sis twb lig dhau lawm. Guibert ntooj nws tus mob, ob lub qhov muag qhov txhab zoo zuj zus ua plaws pliav. Cov neeg nyiam muab nws zes ua si. Ua rau nws cia li tsis nco qab txog nws qhov dig muag txom nyem lawm. Tau yuav luag ib xyoos tom qab, Leej Ntshiab Fuas tshwm los rau nws pom, nws yogi b tug ntxhais hluas luaj li thaum lawv muab nws tua, zoo nkauj thiab hnav tau ib ce muaj peev feem heev.

Nws sawv pheeb ai rau ntawm Guibert thiab nws muab tes maj mam plhws sab plhu xis thiab hais tias :
-« Guibert, koj puas tsaug zog ? »
-« Koj yog leej twg ? »
-« Kuv yog Leej Ntshiab Fuas. »
-« Niam Hlob, koj los cuag kuv ua dab tsi ? »
Ces nkawd txawm sib tham, Leej Ntshab Fuas hais rau Guibert tias Tswv Ntuj tsis zoo siab rau qhov lawv ua phem rau nws, muab nws ob lub qhov muag dawj. Leej Ntshab Fuas thov thov Ntuj rau nws txog tav no ces Tswv Ntuj tso cai los kho nws ob lub qov muag kom zoo. Thiaj kom Guibert mus lawm tom Conque, nws thiaj coj nws tus los pav ob tug kis nrog nws mus. Mus txog tod Guibert yuav tau ob tug tswm ciab, nws hlawv ib tug tso rau ntawm lub thaj txiv Ntuj Saint-Sauveur, ib tug rau ntawm tus mlom kub Majesté Leej Ntshiab Fuas xub ntiag.
Taig kis, Guibert txho caug hawm lub thaj txi Ntuj Leej Ntshiab Fuas thiab teev Ntuj ib hmo. Thaum ib tag hmo, yawg dig muag pom zoo li ob lub voj voog dawb lias qes saum ub los rau ntawm nws ob lub qhov muag uas ntev los lawm uas tsis muaj ntsiab. Ua rau nws muaj ntsis kiv taub hau, ces nws cia li tsaug zog heev heev ib tsig. Tsim los hnov lawv hu nkauj teev Ntuj thaum sawv ntxov, nws ntsia pom cov tswm ciab uas lawv taws cia hauv tsev teev Ntuj, pom cov neeg ntseeg taug kev dub nyod li duab ntxoo. Ceeb tag, nws tsa nws txhais tes los xuas nws ob lub qhov muag naj cas nws cia li rov muaj ob lub ntsiab muag lawm. Nws rov pom kev. Tsoom ntseeg qw zom zaws tias : Hwj huam yees ntxwv ! Yog Leej Ntshiab Fuas ua hwj huam. Ces sawv daws hu nkauj cav txog Leej Ntshiab Fuas lub koob meej.

Guibert zaj no neeg cav nto moo lug txog rau ntau lub teb chaws.
Guibert ua neeg nto moo tuaj, lawv tsis hu nws ua Guibert no xwb, lawv hu nws ua « Guibert tus Pom Kev ». Lawv zoo siab heev, ces tus Txiv Plig tswv tsev Abbé Arlaldus II thiaj li nrhiav ib txoj hauj lwm rau Guibert kom tau laug caij. Kom Guibert ua tus saib xyuas cov muag tswm ciab rau cov neeg tuaj teev Ntuj uas muaj neeg tuaj laub lug tuaj teev Ntuj nyob Conque. Vim nws yogi b tug tau txais txiaj ntsim loj thiab ces neeg haj yam yuav thiab tuaj teev Ntuj coob. Guibert kuj yog ub tug zoo tub luam, nws txawj muag tau luam heev thiab. Guibert nplua nuj heev ces nws qaug kev nplua nuj, nyuag ub nyuag no ntxhov quav niab lauj. Nws tsis leem cai thiab ua ntau yam tsis khuav qhov muag rau lub Chaw Ntshiab. Leej Ntshiab Fuas muab txiaj ntsim rau nws, tsis ygo yuav muab tag ntsiag to, nws muab tag, nws ntsia ntsoos. Ntshe Leej Ntshiab Fuas pom tias nws ua tej yam tsis tsim nyog, tsis zoo nkauj, Leej Ntshiab Fuas thiaj li muab nws ib sab qhov muag rov qab, ces nws ib sab qhov muag rov tsis pom kev lawm. Nws poob ntau zaud rau kev txhaum, txhua zaud Leej Ntshiab Fuas rov ua kom nws ras xeev tab sis nws tsis mloog, nws ua ntxiv. Ces cov Tij npau taws thiaj li muab nws ntiab tawm, nws tawm hauv cov Tij mus ua neeg thov khawv tag nws sim neej.

Zaj nov pom tau tias Tswv Ntuj muab txiaj ntsim rau yus tag mas yus yuav tsum nco nws txiaj nws ntsig, yuav tsum hloov siab hloov ntsws txhob mom nws txheej. Yog yus tau txais txiaj ntsim tag yus zoo lawm, yus tsis nco txiaj ntsig, yus tsis ua neeg zoo mas tswv Ntuj kuj muab tau rov qab.

3-Tus ntxhais dig muag :
Muaj ib hnub thaum yuav tsaus ntuj, muaj ib tug poj ntsuam coj ib tug me nyuam ntxhais dig muag nrog cov neeg tuaj teev ntuj tuaj thov txiaj ntsim kom zoo. Muaj ob tug poj niam txhos caug thov Ntuj ntawm Leej Ntshiab Fuas lub cev. Tsaus ntuj, lawv pw txog ib tag hmo naj cas tus ntxhais pom kev lawm. Cov Txiv Plig thiab cov tub zov rooj vag khiav ntsoog qees mus xyuas tus ntxhais. Lawv mus txog, pom tus ntxhais, nws ceeb loj heev, nws tab tom suav cov tswm ciab uas lawv taws cia ntawm thaj. TP.Bernard ntsia ntsia, nws thaum ib lub nyiaj cev rau tus ntxhais, nws ntsia ntsia ib pliag ces zoo siab hlo cev tes los txais.

4-Tij Gimond thiab Leej Ntsiab Fuas.
Tij Gimond yog tus zov lub chaw Ntshiab hauv Conque. Thaum ub taws teeb roj xwb ces roj txeev tag sai. Ib hmo nws tsaug zog heev, lub teeb ntawm lub txee Cim Yug yuav tuag, nws hnov ib lub suab hais mos mos rau nws tias : « sawv mas, teeb yuav tuag. », nws tsim deev, nws ntsia naj teeb tuag lawm, nws tab tom yuav ze teeb naj cas pom ib txhais tes cev hla kiag nws qhov muag mus ze teeb cig plaws.

5-Tus tub rog do hau.
Muaj ib tug tub rog mob mob zoo ces nws cov plaub hau hle tag tsis tuaj. Sawv daws thuam nws heev ces nws cia li xav tuag tsis xav ua neeg. Muaj ib hnub cas zoo li nws pom Leej Ntsiab Fuas tshwm rau nws pom, hais kom nws mus tom Conque, kom muab cov dej uas Txiv Plig yaug tes thaum ua Mis xas los ntxuav. Nws txawm mus, teev Ntuj tag, nws txawm muab ntxuav nej ces nws cov plaub hau cia li rov tuaj tag ces nws thiaj zoo siab ua neej. ( Txheej thaum ub, nyob Fab kis teb cov txiv neej tso plaub hau ntev ntev).

6- Leej Ntshiab Fuas lub cev.
Thaum ub lawb nyiam nquam cov Leej Ntshiab lub cev mus hauv tej zos kom pab cov neeg ntseeg. Ib zaug kawv kwv Leej Ntsuab Fuas tus mlom Majesté (muaj nws lub taub hau nyob hauv tus mlom) mus rau ib lub zos. Cov kwv txawm so hauv ib cov qab ntoos naj cov neeg nyob ze ntawd khiav tuaj kov Leej Ntshiab Fuas, thov txiaj ntsim coob ntsawm nkaus li thaum ub neeg tuaj caum Yes Xus ntawm ntug pas dej Tis Npes Lias.
Thaum mus ntawd ces lawv tso cov tub kawm Tij ntawm lub tsev kawm tij nyob Conques nrog lawv nquam Leej Ntshiab Fuas mus. Yog ib co hluas xwb ces txawm plhom moj, lawv pom ib tug pog laus tuag ceg tuaj nrog lawv ua ke nquam thov txiaj ntsim. Ces cov tub kawm hluas ntawd txawm tso dag, tab sis yeej yog tso dag thuam tsawv hais tias :
" Koj tuaj dab tsi ntawm no naj, poj laus qias neeg vuab tsuab e! Koj tuaj yaim tshav puam lov! Koj xav tias ntshe tus Leej Ntshiab yuav tseg peb cov hluas no es yuav kho koj tug niag laus qias neeg twb yuav tuag, nyob nyav av xwb no lov ?"

Txoj kev laus yog ib tug mob uas txaus ntshai tshaj, tab sis Fuas tsis xav li ntawd. Tam sim ntawd, tus pog laus cia li sawv tsees thiab cuab zog hlo mus kev khov kho caum cuag cov tub kawm Tij. Ua rau cov neeg nyob ib ncig ntawd qw ntsoo qees cav txog Leej Ntshiab Fuas lub txiaj ntsim.
Tom qab, tus pog laus nov khiav los nrog ib tug poj ntsuam nyob Conques.

7- Tus peeb zeej raug kaw.
Lub tsev Huab tais (Château) nyob lub nroog Rouergue, nyob rau saum lub hauv tsua ntse heev, lub ruv siab tshaj nyob rau sab toj ntxhab ntseg nqes ncaj qha rau nram ib lub vos hav uas lawv cog txiv cawv. Tsis paub hais tias yog tim li cas, tus nom Amblard uas nyob lub tsev Huab tais ntawd ho mua bib tug peeb zeej ntes kaw. Nws muab kaw rau theem kawg saum ceg tsev uas siab tshaj (Donjon). Muab txoj saw hlau loj xauv tes xauv taw, tso 3 tug peeb zov. Tus nom Amblard thiab nws tsev neeg nyob cov kem tsev ntawm kem tsev kaw neeg ntawd ib sab.
Ces tus peeb uas raug ntes kaw tsis pom qab ua li cas, thiaj li tau vim Leej Ntshiab Fuas, nws teev Ntuj tsis so. Ib hnub nws thov tus nom kom cia nws ib tug neeg tuaj nyob txim taj nws kom tso nws mus tom Conques ib hnub. Ces nws thiaj mus txog Conques nws mus teev Ntuj ntawm Leej Ntshiab Fuas ko taw. Nws teev Ntuj ib hnub tag ces nws rov los rau lawv xauv nws li qub. Muaj ib hmos, nws chim siab heev, nws tag kev cia siab. Leej Ntshiab Fuas tshwm tuaj rau nws pom, cas yuav hluas zoo nkauj ci iab xwb. Ceeb tag, nws thiaj nug tias :
« Koj yog leej twg ? »
« Kuv yog Fuas, koj cov kua muag yeej kuv lub siab lawm, Tswv Ntuj xa kuv tuaj cawm koj. Koj tsoo lub qhov rooj ntawm qab khav es koj dhia lub qhov rais ntawm sab phab ntsa siab tshaj rau lawm hauv av.»

Hais mas yooj yim kawg, yawg kuj muaj siab heev, tab tom cov peeb zov tsaug zog lawm thiab, nws mus naj nws cov saw hlau nrov ces lawv sawv tag cia li ua tsis tau. Pw ib tsam Fuas rov rov los hais kom nws rov sim dua. Nws maj mam nkag ntawm qhov rooj qab khav, cas muaj ib lub qho rooj ntawm kem tsev rau khoom tsis kaw, nws thiaj maj mam nkag mus txog tom qho rai. Nws yuav dhia tab sis ntsia qhov siab, tob tob ncaj qha rau puag hauv qab tsuas lawm. Tab sis tus me Leej Ntshiab nyob rawv ntawd txhawb nws zog. Ces tus peeb ua siab cev taw rau nraum zoov, cia li dhia rau hauv. Aub ! Cas yuav zoo ua luaj li. Zoo li caij saum tis ya, cia li poob zooj nyoos haus qab tsuas, thaws thawv cia li mus poob tus yees rau puag nram tiaj nrag.

Thaum ntawd Amblard tsim los, nws tsa tag nrho nws cov peeb hauv yeej tag nrho mus khaws yawg. Tsis muaj neeg maj nqes mus saib yawg, vim lawv xav tias ntshe yawg ntsoog ua kua dis tag rau hauv qab tsuas lawm. Tsom teeb zom zaws tuaj rau ntawm yawg, yawg ntshai tshee na xyov yuav ua li cas, cas pom ib tug txiv nees nog eeb tib si sawv ntawd zoo li yog tos yawg. Yawg cev tes tua hlua cab kiag, sam plhawv rau, yog tug nyuag neeg dog dig tsis loj heev, cas dhia muaj zog cuag li ib tug txiv sam nees. Nws caij nees mus ib nyuag ntu kev deb tsawv li 8 tawm kev (milles), nws thiaj daws tau nws cov saw hlau. Tus nees cia ploj ntais cuag li ua khawv koob. Tsuas tshuav tus peeb zeej tib leeg los ko taw los txog rau Conques, nws kw txoj sawv hlau tus ntawm xwb pwg los. Nws nkag los txog hauv tsev teev Ntuj, nws hu nkauj cav txog Tswv Ntuj koob meej.

LEEJ NTSHIAB FUAS (Sinte Foy, Santa Fe) Calmon10

Château de Perse à Rouergue.
Lub château pob tag lawm tshuav lub cheeb lawm xwb.
Ces uas tus peeb raug ntes dhia yog sab rov tom ub nqes rau hauv kwj ha.

LEEJ NTSHIAB FUAS (Sinte Foy, Santa Fe) Grille10

Ntshiab Fuas pab. Lawv dim los lawv nqa lawv cov khawb tes khawb taw los txi rau nws. Ntev mus ces ntau zuj zus, lawv thiaj muab ntau kiag ua rooj vag xov Leej Ntshiab lub ntxa nyob hauv Tuam tsev teev Ntuj Conques.

Raws li Daim laj kab nov yog cov neeg raug txim uas tau thov txog Leej peb twb tau tham ib zaug los, Leej Ntshiab Fuas, zoo li ib tug neeg ciaj sia, nws mus xyuas cov neeg nyob tsev loj faj, nws saib cov muaj mob, cov neeg txom nyem. Nws lub hwj huam pab tag nrho txhua leej, cov niam txiv tsis muaj tub, mus thov txog nws los yeej tau raws li siab xav.

TUS NTAIV NTOB SANTA FE.

Mim tau hais txog ib cov Leej Phauj nyob Santa Fe ua tau lub tsev teev Ntuj, tsis muaj neeg thiab muaj nyiaj ua tus ntaiv nce, lawv thov Ntuj cuaj hnub sib law, cia li muaj ib tug txiv neej nqa ib lub thawv rau twj tuaj txua lawv tus ntaiv. Tus ntaiv ntawd yogi b cov ntoo ciab uas txawm nyob 1500 km ntawm qhov chaw ntawd xwb. Thiab ua tau tus nativ, yog dhos xwb tsis ntsia ib tug ntsia li. Xav tias yuav tsis khov no tab sis kuj kho kawg nkaus. Cov tub hu nkauj, nce sawv saum tus ntaiv hauv av nto plaws saud, tus ntaiv kuj tsis txav li.
Qhov nov, tej zaud twb yog Leej Ntshiab Fuas txiv Leej Ntshiab Yos Xes tuaj txua. Vim lo lus Santa Fe twb txhais tias « Sainte Foy », yog lub tsev teev Ntuj Leej Ntshiab Fuas

LEEJ NTSHIAB FUAS (Sinte Foy, Santa Fe) Escali10

Tus ntaiv nyob Santa Fe

https://hmongcatholique.forumdediscussions.com/t755-tus-ntaiv-nyob-santa-fe?highlight=santa+fe

Cov kwv huam kuv tham los saum no, tsuas yog me me ua piv txwv xwb, tseem tshuav txhiab puas zaj uas tsis muaj neeg sau cia ces peb tssi paub lawm xwb. Cov kuv sau saud, yog Txiv Plig Bernard nyob deb, hnov txog Leej Ntshiab Fuas lub hwj huam, es nws txhob txwm tuaj nyob hauv Conque seb puas muaj tseeb. Cov nov yog nws tus kheej pom ntawm nws qhov muag kiag es nws sau. Tseem tshuav zaj puav thiab tab sis kuv sau me ntsis ua piv txwv xwb.

Ob niam txiv Danemark tsab ntawv

LEEJ NTSHIAB FUAS (Sinte Foy, Santa Fe) Noix10

Xyoo 1997 ob niam txiv neeg Danmark Jacques thiab Christ tuaj taug Hauv Paus Xa Lus Yas Kos txoj kev ibn tus, nkawd hla Conques, nkawd rov mus txog tsev, nkawd sau tsab ntawv no tuaj rau cov Tij nyob Conques :

« Thaum lub 7hli, wb rov nram Leej Ntshiab Yas Kos los, nws los so ntawm Conques. Thaj tsam 11teev ib tag hmo, wb nyob ze pem lub Cim Nyug Ntshiab, pem hau tsev teev Ntuj, cia li muaj ib tug me nyuam ntxhais thaj tsam kaum tawm xyoo li. Nws muab nws txhais tes tsar au saum w bob lub xwb pwg tas, nws luag nyav rau wb thiab cev wb ib leeg ib lub txiv ntoo roj. Wb cia li yoob tag rau nws cov plaub hau ci tshiab lam lug. Ces nws cia li ploj ntai ntsiag to tsis muaj suab sab li. Wb ceeb tag, xav tias cas twb lig ua luaj tseem muaj tej tug me nyuam li ntawd tuaj yos thiab wb thiaj li nrhiav naj tsis pom nyob rau qhov twg li lawm. Kuv poj niam mas yeej hais tias yog Leej Ntshiab Fuas los ua wb pom xwb, tab sis kuv mas kuv ho tsis ntseeg. Taig kis tom qab, kuv rob nrhiav tus ntxhais dua, xav tias ntshe nws yuav nrog nws niam nws txiv rov tuaj Mis xas no tab sis tsis pom li. Kuv thiaj cia li ntseeg li Christ, kuv poj niam hais lawm. Tab sis tus me nyuam no yog hais li cas, ob lub txiv ntoo roj ne, yog txhais li cas, puas yog tias kom wb qheb w bob lub siab no ? Ob lub txiv ntoo roj, wb tseem khaws txog niaj hnub no. Puas yog txhais tias : « tsoo ib lub plhaub tawg, qheb ib lub siab tuaj. »

Tus sau : Maiv Tooj, niam Txooj tub Yaj.
Fab Kis teb, Tim 27/08/2012

Last edited by Maiv Tooj on 29th August 2012, 8:34 am; edited 1 time in total

**Maiv Paj Lug** 29th August 2012, 6:05 am

Maiv Paj Lug

Maiv Paj Lug: Tswv Cuab Hmong Catholique; Messages : 1234
Date d'inscription : 2009-08-17

Post n°3

Re: LEEJ NTSHIAB FUAS (Sinte Foy, Santa Fe)

Post Maiv Paj Lug 29th August 2012, 6:05 am

Wow....Maiv Tooj, tus Leej Ntshiab Foy koj piav saum no es puas yog tus nyob rau tom tsev teev ntuj ib sab es nej mus saib txhua tshuav kuv lawm xwb naj?

Cas kuv yuav tsis paub txog tej no li :;(

.....Tus Duab pob zeb uas peb nqa peb cov pob zeb mus txawb rau nej ho yog leej twg thiab? Kuv twb hnov T.P Cwjvuamchiv lawv tham tias nyob Conques muaj ib tug leej ntshiab nyob rau tom ib sab, tab sis thaum mus txog Conques ces kuv mob ceg dhau, kuv nrhiav chaw zaum lawm xwb, tsis nco tias yuav mus nrhiav Leej Ntshiab Foy li lawm...

Lub sij hawm peb mus txog Conques sawv daws maj maj yuav rov los ua Misxas li ces peb cia li sib txhib, cov tub tsav tsheb los maj maj kom nrawm nroos li thiab ces yeej tsis muaj caij mus ncig xyuas txhua li thiab... kav liam lau, li cas los twb kuv twb mus txog lub zos, lub tsev teev ntuj thiab qhov muag pom tej kev peb taug lawm ces zoo lub siab lawm, tos tias kuv nim npau suav mus pom tus dej ntws mus Conques qhib ua ob sab li thauv Moïse lawv hla dej ntuj liab, thiab pom tias rov qab mus txog ntua lub zos Conques, nsthe twb yog Leej Ntshiab Foy nyob thaj tsam ntawv tiag li lauj.

Ua koj tsaug koj tseem muab zaj no txhais ua lus Hmoob rau peb nyeem os Maiv Tooj.

Kuv sab hauv caug uas peb mus taug kev cia li mob mob tsis zoo li lawm os Maiv tooj. Yav dhau los kuv yeej tsis tau mob hauv caug li, tsuas yog mus taug kev zaum no es mob xwb, xav tias los tau 1 2 lis tiam nod lawm yuav zoo los tsis zoo li, tsis paub yuav thaum twg mam zoo, yog tsis zoo li lawm ces xyov yuav mus cuag kws tshuaj los xyov yuav ua li cas, yog mob mob li no mus li lawm es lwm xyoo kuv puas mus taug tau kev nyob Lourdes lawm mas

LEEJ NTSHIAB FUAS (Sinte Foy, Santa Fe) Maypa110

Pab kuv rov los cuag koj Huab Tais Yesxus

**dejntwstsirovqab** 31st August 2012, 8:32 am

dejntwstsirovqab

dejntwstsirovqab: Messages : 29
Date d'inscription : 2009-11-30

Post n°4

dua

Post dejntwstsirovqab 31st August 2012, 8:32 am

[img]https://i.servimg.com/u/f32/14/62/53/02/peleri28.jpg[/i[url=https://servimg.com/view/14625302/25] LEEJ NTSHIAB FUAS (Sinte Foy, Santa Fe) Peleri28

mg][/url]me nyuam yaus da dej

**Maiv Tooj** 18th September 2012, 6:44 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°5

Re: LEEJ NTSHIAB FUAS (Sinte Foy, Santa Fe)

Post Maiv Tooj 18th September 2012, 6:44 am

Nyeem cov cov txiaj ntsim uas Leej Ntshiab Fuas tau pab cov neeg vam txog nws, qhia tau tias thaum yus thov Ntuj, mas tej thaum yus kuj tau tam sim ntawd, tej thaum mas yuav yog ntev me ntsis yus mam tau txais cov txiaj ntsim uas yus thov. Yam li yuav tsum tos txog thaum Leej Ntshiab Fuas thov tau kev tso cai ntawm Tswv Ntuj los pab tus neeg uas vam txog nws mas thiaj li mam zoo. Li ntawd qhia tau rau peb tias yus thov ib yam dab tsi ntawm Tswv Ntuj, yog tsis tau kiag, txhob tag kev cia siab, rau siab teev Ntuj mus mas yus yuav tau txais lub txiaj ntsim ib hnub tom ntej. Piv zoo li yus xav tau nyiaj, yuav tsum ua hauj lwm kom puv qhov nqe mas Tswv Ntuj thiaj li mam them nyiaj rau yus.