Tus Ntaiv nyob Santa Fe

Tus ntaiv nyob hauv lub tsev teev ntuj Loretto nyob Santa Fe, New Mexico, USA


Muaj ntaub ntawv sau tseg tias, puag thaum xyoo 1873, muaj ib pab leej phauj muaj ib lub tsev koom haum nyob rau lub nroog Santa Fe ntawd. Lawv tsa tau ib lub tsev teev ntuj, tiam sis cov tsa tsev tsis ua ntaiv nce mus saum lub sam thiaj uas yog chaw rau cov neeg hu nkauj. Ces cov leej phauj ntawd pheej muab ib tug ntaiv me me los tuam rau lawv nce xwb mas tsis yooj yim li. Cov phauj mu snug ob peb tug kws ua ntoo kom tuaj txua ib tug ntaiv rau lawv mus lawm saum sam thiaj hu nkauj(choir loft). Tiam sis cov kws ua ntoo ntawd hais tias twb tsis muaj chaw txaus yuav ua ib tug ntaiv li. Ces cov phauj thiaj ua kev thov ntuj cuaj hnub(novena) rau leej txiv ntshiab Yos Xes(St. Joseph), uas thaum ub nws yog kws ntoo.

Thaum txog hnub kawg(hnub cuaj) hauv lawv txoj kev teev ntuj, txawm muaj ib tug yawg laus plaub hau dawb paug caij ib tug luj tuaj txog ntawm cov phauj tsev, nws nqa ib lub thawv rau twj ua ntoo. Cov twj nws nqa ntawd tsis muaj pes tsawg yam li, tsuas muaj ib rab kaw, ib rab rauj, thiab ib rab square xwb. Nws hais tias ib yam ntxiv uas nws xav tau yog ib cov thoob los rau dej tsau cov ntoo.


Ces cov phauj txawm txiav txim siab muab hauj lwm rau tus yawg laus ntawd ua. Nws pib hauj lwm yog lub 7 hli tim 25, 1873. Nws ua txoj hauj lwm ntawd tau kwv yees li 6 mus rau 8 lub hlis ces nws ua tiav. Nws tsis siv ib tug nstia hlau li, tsuas siv ntsia ntoo los ua kom cov ntoo sib dhos thiab sib tuav xwb. Tus yawg laus ntawd ua tau ib tug ntaiv ntoo liab ploog zoo nkauj kawg nkaus li, cov theem ntaiv kiv ua ob peb ntxees qwj mus nto saum lub sam thiaj, tsis muaj ib tug ncej txheem qhov twg li, tiam sis nws khov kawg li, qee zaum lawv pab hu nkauj yeej sawv daws mus sawv saum tus ntaiv los tsis muaj qhov yuav ua rau yus ntshai tsam dam li. Lawv twb siv tus ntaiv ntawd tau ib puas tawm xyoo no lawm los nws tseem khov tseem zoo nkauj li qub. Muaj ib co kws ua vaj ua tsev tau hais tawm tias raws li cov laws of gravity/lois de gravite, mas tus ntaiv ntawd yuav tsum vau kiag thaum uas ib tug neeg pib tsuj tus ntaiv lawm, tiam sis ua cas nws ho nyob tau ib puas tawm xyoo no, kuj tseem siv qees thiab.

Thaum cov phauj nqa nyiaj mus them rau tus yawg laus, nrhiav tsis tau nws qhov twg li lawm. Txog tav no yeej tsis tau them ib kis rau leej twg ua nqe zog txua tus ntaiv ntawd li.
Cov ntaub ntawv sau tseg tseem piav li no tias: “Thaum cov phauj mus teev ntuj hauv tsev teev ntuj mas lawv pom cov thoob nrog cov ntoo tsau dej nyob hauv cov thoob, tiam sis tus txiv neej khiav tawm mus lawm kom lawv tau zoo teev ntuj. Nws mam rov los ua hauj lwm thaum tsis muaj neeg lawm xwb.” Yog li niaj hnub no los yeej tsis muaj neeg paub tseeb tias tus txiv neej ntawd yog leej twg li.


Tseem muaj ib qho ntxiv hais txog cov ntoo ua tus ntaiv ntawd zoo li no: txij xyoo 1991 mus txog 2006, lawv ntiav ib tug neeg saib xyuas thiab tu lub tsev teev ntuj Loretto ntawd, hu ua Richard Lindsley no. Nws tau hais tawm tias, muaj ib zaug nws mus dawj tau ib qho txhais ntoo ntawm tus ntaiv, nws tau muab xa mus rau ib tug kws txuj hu ua Forrest N. Easley nyob hauv lub Naval Air Weapons Station nyob China Lake, California, kom muab kuaj xyuas saib yog hom ntoo dab tsi. Yawg Lindsley tos ntsoov tias ntev kawg los tsuas ob hlis tej xwb ces nyaj tus kws txuj yuav teb rau nws paub lawm.

Tiam sis ua cas tsis pom tus yawg Easley ntawd teb rau nws li. Ces nws txawm tu siab hais tias ntshai yuav tsis hnov xov ntxiv lawm laub, ces nws yeej tsis tos li lawm. Tiam sis muaj ib hnub twb ntev li 18 lub hlis tom qab, tus kws txuj Easley ho tuaj txog ntawm lub tsev teev ntuj. Nws hais tias nws xav tuaj ntsib kiag tus neeg nws mam piav rau. Tus kws txuj thiaj qhia tias cov ntoo ntawm tus ntaiv ntawd yog ib hom ntoo ciab, tiam sis nws yeej nrhiav tsis tau nyob hauv tej ntaub ntawv li hais tias yog hom twg kiag. Vim nws xav xwj qhov txhia chaw saib puas yuav paub hom ntoo ntawd tso, ces nws thiaj tau tos ntev ntev mam tuaj piav qhia. Nws tau hais tias hom ntoo ntawd mas zoo li yog ib hom ntoo uas maj mam hlob tuaj nyob rau ib thaj tsam no no, xws li Alaska. Nyob New Mexico, uas yog teb chaws sov, mas tsis muaj hom ntoo ntawd. Tiam sis xyoo 1873 mas twb tsis tau muaj kev tsheb nqag(railroad) li, yuav ua cas thiaj tau ntoo puag Alaska los rau puag nram New Mexico? Txawm li cas los hom ntoo ntawd kuj txawv zog cov ciab nyob Alaska thiab. Ces qhov tseeb yeej tsis paub tias hom ntoo ntawd yog ntoo dab tsi kiag thiab, tsuas paub tias zoo xws li cov ciab nyob Alaska xwb.

Tus kws txuj ntawd tis ib lub npe tshiab rau hom ntoo ntawd hu ua “Ntoo Ciab Loretto” no.

Ces tsis muaj neeg paub tseeb li tias yog leej twg ua tus ntaiv ntawd, cas yuav txawj ua tau zoo nkauj thiab ruaj khov ua luaj, thiab tsis siv ntsia hlau ib tug li, thiab tsis muaj ncej txheem li, thiab tseem lem tau xwm yeem zoo nkauj tiag tiag li…

Muaj ib txhia kuj hais tias, tus yawg laus uas tuaj ua tus ntaiv ntawd yog leej txiv ntshiab Yos Xes ntag. Cov phauj twb thov nws tau cuaj hnub, nws thiaj tuaj.

Txawm li cas los lub Koom Txoos yeej qhia thiab ntseeg tias leej txiv ntshiab Yos Xes muaj hwj huam pab tau cov neeg uas vam khom nws.

Wow... thawj zaug kuv hnov hais txog tus ntaiv Loretta nyob Santa Fe xwb os,...vuag zoo tiag tiag li od yom... cov phauj ntawv muaj siab dawb siab huv thov tiag tiag Tswv Ntuj leej tub YosXes thiaj nqis los ua tus ntaiv ntawv rau lawv yam tsis muaj neeg ntsuam tau thiab tsis muaj neeg paub tias nws yog leej twg, kuv yeej ntseeg tau tias thaum yus thov tiag tiag lawm, thaum yus kev cia siab tag kiag uas yus tso phluav rau Tswv Ntuj lawm xwb mas yeej muaj tej yam miracle zoo kawg nkaus tshwm sim rau yus tiag li. Zoo nkauj kawg nkaus li tus ntaiv Loretta Santa Fe, ua tsaug koj tuaj qhia peb nawb niamlaus Mim.

Nyob zoo Mim thiab Maiv Paj Lug,

Mim, ua tsaug os, nws mas tshaj lij tiag tiag li, txawj nrhiav ntau yam zoo rau peb paub txog...Nws yuav tsum nquag tshaj qhov nov ntxiv thiab nawb...Nws twb khwv khwv los peb tseem yuav kom nws khwv tshaj ntxiv thiab...
Mim, ntau zaud peb pheej thov Tswv Ntuj, zoo li NWS tsis hnov peb, ntshe yog peb thov tsis txaus...Peb twb tsis thov ob hnub sib law es peb yuav ua cas tau...Peb tsuas thov ib nyuag los xwb ces twb tsum lawm...Yog peb lam muab siab thov cuag hnub sib law no ntshe tsis tau ntau los yuav tau tsawg thiab...

Zoo kawg nkaus, tus ntaiv nov mas yeej tsim nyog qhuas nawb...Zoo los zoo nkauj, ci hob xwb. Thiab twb siv tshaj 100 xyoo lawm ces ho tsis yaig? Tus ntai hauv kuv lub tsev yog ntoo ciab thiab tiag...Tab sis kuv siv tau 20 xyoo xwb twb yaig heev, ua tus ntug kheej kiag lawm ces npua heev, kuv thiaj yuav ib cov puab roj hmab los puab rau kom txhob nplua xwb...

Huab tais Ntuj, cas koj txoj hauj lwm, koj lub ntuj yuav zoo tag npaum ntawd, kuv thov koj tso Leej tswv Yim Ntshiab los pab leej neeg kom tau mus coob me ntsis mus pem koj lub teb chaws, mus nuam koj tej teeg tug mog...Kuv ntshaw kom kuv pom koj lub ntuj, siv koj tej toob xib, nyob koj lub nroog, pom koj lub teb chaws...Tab sis kuv puas yuav muaj txoj hmoo pom tau? Es txoj kev mus pem koj puas loj los me, yooj yim los nyuaj...Com kawb los tav...?

Tais Tooj,

Hais txog qhov tias nws puas txawj qub los txawj yaig mas kuv kuj tsis tau pom ntawm qhov muag tiam sis kuv mus hloov daim duab saud kom pom hais tias nws kuj txawj qub txawj yaig thiab no. Tej zaum lawv yeej yuav tsum tu nraim, pleev nraim rau thiab es nws thiaj tsis puas sai sai...

Mim,

Txawm lawv tus, lawv pleev kob los yeej yog nws tsis puas, vim kiv tus ntaiv hauv tsev, kuv yeej pleev kob zas, kob thaiv ntoo tib si nws tseem yaig...Mim, koj rov muab daim duab tus ntaib daj tshiab ntawd tso rau hauv qab no yuad, vim zoo nkauj heev, daim ntawd mas thiaj pom tias yog ntoo tag nrho xwb, vim cov puab, tuav los puav leej pleev kob daj li lis ntoo.

Wow...! Pom cov Choeur yuav coob ua luaj li...Tus Tswv txua rtus ntaiv no mas nws yeej mem tau qhov uas cov tub hu nkauj yuav nqes los mus zoo nkauj npaum li cas...Cuag li nyob saum ceeb tsheej lawm...

Tais Tooj,

Yog koj ho nyiam kom tso cov duab uas pom tus ntaiv yog ntoo daj rhuv los kuv mam muab ob daig no tso rau ntawm no ntxiv os... (Tiam sis ib daig thiaj tawm xwb ib daig tsis tawm)


[/center]