Nyob ruaj nreb hauv txoj kev ntseeg txog Yesxus tus cawm seej

Nyob zoo tus phooj ywg Nrhiav Tswvntuj

Ua koj tsaug ntau uas koj tseem hais tau tej lo lus zoo los txhawb kuv siab thiab. Koj thiab kuv wb xav zoo sib xws thiab pom txog tsoom Hmoob uas twb los ntseeg Yesxus lawm es pheej tsis muaj kev tso siab rau Tswvntuj kiag li. Kuv yeej xav li koj hais ntawd thiab. Thaum muaj tej tug neeg ntxub yus, cem yus, thuam yus, yog yus tsis nyob tus yees es pheej khib thiab chim rau tus ntawd ces yus yeej tseem ua dab toj dab qhev li koj hais ntawd ntag. Yog luag thuam cem yus thiab hais lus xaiv txog yus es pheej khib heev mas dab ntxwg nyoob yeej zoo siab heev li thiab tseem hais tias yus yog ib niag neeg ntxias tau yooj yim heev mas ntxwg nyoog nquag los haub ntxias yus kawg. Yus yuav tau ua siab loj tawv qhawv txhob chim txhob khib kiag li, nyiaj ntxeem kom dhau mus ces tsis ntev xwb ntxwg nyoog yuav txeem tsis tau los rau hauv yus. Vim yus niaj hnub noj tshuaj pab yus lub cev kom txhob muaj kab mob nkag tau los hauv yus. Qhov ntawd yog yus noj Huab Tais Yesxus cov lus txhua hnub txhua hmo. Kuv thov ua tsaug rau koj lo lus zoo lus txhawb siab nawv Nrhiav Tswvntuj.

Ntxhuav Mom Xyooj

Nyob zoo Ntxhuav Mom thiab XH.Npuag Tub,

Huab Tais Yes Xus yog Tswv Ntuj tiag, vim nws lub hwj huaj, lub yeeb koob yeej huam nyob ib txhiab ib txhis tsis tsuag, tsis tag, tsis kawg. Haj yam ntev, NWS lub hwj huam haj yam loj ntxiv xwb. Hauv ntiaj teb no tsis muaj ib tug Saub twg yuav nyob mus li, txawm nws yuav muaj hwj chim nto moo, muaj zog npaum li cas, thaum tus saub tuag ces nws tej kev cai, nws pab ntseeg yeej ploj nrog nws.

Dua li, yuav hais txog cov uas thaum lawv muaj mob, lawv ntau siab yau, lawv mus fiv neeb, ua yaig. Thaum muaj mob, tsis mus kho raws li Kws Tshuaj hais, lub siab ua fab ua fwj, mus saib tsawv, mus fiv dab teem qhua ces zoo me ntsis. Zoo siab heev, xav tias yog dab pab, nthuav neeb saib es thiaj zoo. Qhov zoo yeej zoo tiag, zoo me ntsis thiab ib vuag dua xwb, vim tuaj kub mas nws tsis muaj zog tas mus li. Nws muaj hwj huaj me me ntxias kom neeg qaug rau nws xwb, nws cov hwj huaj nyob tsis ntev thiab tsis muaj hwj huaj ntev, li ntawd nws muab dab tsi ntxias neeg mas nws thiaj li maj maj tsam nws qhov hwj huaj tag lawm, nws thiaj li tsis muab lub caij rau cov nws ntxias ntawd tos. Li ntawd cov sawv saub muaj hwj huaj kho mob thiaj li tsis kho zoo ib ntus xwb, vim tuaj kub lub hwj huaj tsis muaj caij ntau, nws lub hwj huam tsuas yog ib vuag dua xwb.

>Nej sim ntsia seb, txhua yam uas yog Tswj Ntuj lub hwj huam kho, tej tug mos loj loj uas Kws tshuaj kho tsis tau, tej tug neeg uas nws tsis muaj ib qho khoom hauv nws nruab nrog cev, nws nyob zoo log li tej neeg tsis muaj mob uas yog tau lub hwj huam ntawm Tswv Ntuj los, lawv yeej tssi rov qab mob li. Lawv nyob dhia rhees, laus nkoos tag lawv sim neej.

Cov uas lub siab qaug mus rau tuaj kub kev ntxias, lawv ua ib qho tag, ntxiv ib qho, tsis muaj caij so li. Tseem siv nyiaj siv txiaj lawm ci tub, tus ntsuj plig los poob, tus neeg los tseem nyob tug mluas mlob cia thiab xwb.

THAUM KUV RAUG KEV NYUAJ SIAB,RAUG MOB RAUG NKEEG
TSWVNTUJ PUAS PAUB?

Muaj ntau zaus peb raug kev nyuaj siab,kev mob nkeeg, peb thov Tswvntuj pab. Tswvntuj tseem tsis tau teb peb sai, Peb txawm siv xav tias,ntshai tsis muaj Tswvntuj. Txawm siv chim rau Tswvntuj,los yog chim rau tus XH.los pab ntseeg uas tuaj thov ntuj rau peb ntawd. Peb txoj kev ntseeg mas me tshaj plaws puas yog? Thaum peb mus ua kev txhaum, Tswvntuj yeej pom thiab paub huv si. Yog li ntawd mas thaum peb raug kev nyuaj siab los Tswvntuj yuav tsum pom xwb, peb txhob maj chim rau Tswvntuj. Tej yam uas peb raug kev nyuaj siab es peb thov Tswvntuj pab Tswvntuj yuav tsis pab sai sai tam sis ntawd rau peb pom thiab kev thov Tswvntuj pab yog thaum peb raug kev tws lawm es peb ua tsis tau ntxiv li lawm kawg peb txuj,kawg tswv yim lawm Tswvntuj li pom zoo pab.

Nyob hauv ntawv Hauv paus Nomhes yog ib tug piv txwv zoo rau peb txoj kev ntseeg Ntuj. Nomhes tsis pom tom ntej li los Nomhes yeej ntseeg tiag tiag tias Tswvntuj tau hais li cas lawm yuav tsum muaj tshwm sim
li Tswvntuj hais xwb ces Nomhes thiaj li txua lub nkoj. Txog thaum kawg thiaj li muaj dej nyab lub ntiaj teb. Tom qab dej nqig tag lawm,
Nomhes tsev neeg thiaj li tawm los. Nomhes cov kwv tij neeg tsa tuag tag. Kuv xav tias lub sij hawm ntawd ntshe Nomhes yeej chim kawg tias,
cas nws tej kwv tij neej tsa tuag dua twg tag lawm. Txawm li ntawd los Nomhes yeej tsis chim rau Tsawvntuj kiag li. Nomhes tseem tsa ib lub thaj txi ntuj teev hawm Tswvntuj.

Nyob hauv Luskas ntawv Moo Zoo 7: 18-30
Thaum lub sij hawm Zam raug kaw nyob hauv tsev kaw neeg. Zam kuj raug
kev nyuaj siab. Zam thiaj li xa Zam 2 tug thwj tim mus nug Yesxus tias. Koj puas yog tus yuav tuaj, los peb tseem yuav tos lwm tus?
Thaum peb raug kev nyuaj siab xws li Zam raug peb txhob chim rau Tswvntuj. Tswvntuj lub hom phiaj txawv peb lub,thiab ncaj ncees tshaj peb neeg ntiaj teb lub.

Peb twb paub lawm hais tias Yesxus cov thwj tim raug kev tsim txom nyuaj tshaj, zaum no lawv thiaj li tsim nyog yog ib co leej ntshiab uas
muaj txoj sia nyiaj sia kub nyob pem ntuj.

Mas Tais 10:37-39
Peb puas kwv peb tus ntoo cuag tiag tiag? Peb puas nyiaj tas puas tsav
yam kev nyuaj siab, kev mob nkeeg es lawv Yesxus qab tiag?
Yesxus hais tias, tus tsis kwv nws tus ntoo cuam thiab tsis raws kuv qab,mas nws tsis tsim nyob nrog kuv. Tus nrhiab nws txoj sia,nws ua nws txoj sia ploj. Hos tus ua nws txoj sia ploj vim kuv, mas nws nrhiav
tau nws txoj sia lawm. Zaj lus no, Yesxus xav qhia peb tias thaum peb
raug mob raug nkeeg,raug dab tsim txom los yog raug luag hiam. Peb thov ntuj pab ntuj tsis tau pab peb sai,peb txhob mus vuag ub vuag no
ua lwm yam kev cai dab los pab. Peb tsuas tso siab nplhuav rau Tswvntuj xwb. VIM PEB NTSEEG YESXUS. Txawm peb lub cev no tuag lawm los peb tus ntsuj plig tsis tuag ces yog peb nrhiav tau peb txoj SIA
lawm.

Ntxhuav Mom Xyooj

Nyob zoo kwv Ntxhuav Mom,

Ua tsaug rau koj cov lus ras xeev, yog kawg peb ua neeg ntseeg, peb yuav xyaum ua ib cov neeg siab ntshiab, tsis ciaj caub, tsis siab hlob, siab dawb tsis qia dub, tsis xam txeem. Peb yuav xyaum pub luag es tsis yog peb yuav lob ntawm luag los rau peb. Peb yuav tsum zoo siab tiv thaiv kev txom nyem hauv ntiaj teb no los mus ua peb lub TSEV LOJ PEM TSWV NTUJ LUB TEB CHAWS TSHAV NTUJ NRIG UAS YUAV NYOB MUS LIS. Peb yuav tsis txhob ntshaw tej yam nyob ntiaj teb no uas yog ib vuag dua xwb. Kev muaj mob nkeeg thov Tswv Ntuj, muaj kev ntxhov siab lwj plawv thov Tswv Ntuj, txhob tos hwj huam yees ntxwv tas mus li, txhob siv Tswv Ntuj li ib zaj khawv koob es ua ces txawm yuav zoo kiag tam sim ntawd. Yog peb thov txiaj ntsim tau ntiaj teb no, tej zaum peb tsis tau mas yog Tswv Ntuj pom tias tsis muaj qab haus, tsis muaj nqes rau peb, vim NWS pom deb, peb pom ntawm peb xub ntiag xwb; mas yog tsis tau li peb siab xav mas peb yuav tsum ib nyuag xav tswv yim me ntsis seb yog tim li cas. Peb txhob xyaum ua ib cov neeg ntseeg rau lub neej niaj hnub saum yaj ceeb no xwb tsam peb yuam kev thiab hnub qab nram ntsis ho khuv xim vim tsis ua neeg ntseeg li Tswv Ntuj xav kom peb ua.

Nyob zoo os Maiv Tooj

Ua tsaug uas koj tseem txhawb kuv lub zog. Yeej yog li koj hais ntawd, tos kuv ho sau tej sob lus zoo li ntawd los, cov uas tuaj mus teev ntuj
es pheej sau ntawv rau XH thiab TP. lawv pab thov ntuj rau nws yuav luag txhua lub av thiv. Cov ntawd txoj kev ntseeg tsis ruaj khov li, ib ntus
ces cia li pom lawv rov mus ua neeb saib yaig lawm. Lawv npau suav phem thiab dias taub hau me ntsis xwb los lawv yeej tuaj kom XH lawv thov ntuj
thaum lub sij hawm ua thaj txi ntuj( mis xas) txhua zaus li.

Zam txim pub rau kuv thiab, tej kuv tau sau hais li ntawd los kuv yeej hais raws qhov tseeb thiab kuv tau pom dua tej yim neeg los li ntawd lawm


Ntxhuav Mom Xyooj

Nyob zoo Ntxhuav mom Xyooj,

Hais txog cov neeg ntseeg pheej nyiam thov txiaj ntsim tas mus li mas kuv saib zoo li zaj Ntawv Moo Zoo hnub no. Txawm tias nws ua paj lug hais mus rau lwm yam los kuj yog txhais li kuv xav kuj yog thiab. Yog pheej thov txiaj ntsim tas zog rau ntiaj teb tsam lwm hnub tsis seem rau lub neej tom ntej lawm ne...? Lub neej ntiaj teb yog ib vuag dua, lub neej tom ntej yog ib txhiab ib txhi tsis txawj tuag.

NTAWV MOO ZOO HNUB CHIV 10/03/2013
Lus Kav Ntawv Moo Zoo 15,1-3.11-32 Tub tub loj leeb rov los tsev.

1 Tas cov neeg sau se thiab cov neeg txhaum txav los ze Yes Xus, lawv xav mloog Yes Xus hais. 2 Ces cov Fas Lis Xais thiab cov Kws Ntawv Ntshiab nroo zom zaws tias : "Tus neeg ntawd txais cov neeg txhaum, nws tseem nrog lawv noj mov thiab !" 3 Yes Xus thiaj hais zaj paj lug no rau lawv : 11“Ib tug neeg muaj ob tug tub. 12 Tus tub ntxawg hais rau nws txiv tias :

'Txiv, koj muab koj lub cuab tam feem uas yog kuv tug faib rau kuv.' Ces leej txiv thiaj muab nws lub cuab tam faib rau nws ob tug tub. 13 Ob peb hnub tom qab, tus tub ntxawg sau feem uas yog nws tug tas huv si, nws khiav mus ib lub teb chaws deb. Nyob ntawd nws muab nws lub cuab tam phob vim nws coj ib lub neej tsis tsim txiaj. 14 Thaum nws muab nws lub cuab tam phob tas huv si lawm, ces lub teb chaws tshaib plab loj. Nws pib paub txoj kev yoo tshaib yoo nqhis. 15 Nws thiaj mus ua zog hauv ib tug neeg nyob txawm lub teb chaws ntawd. Luag kom nws mus zov npua tom teb. 16 Tus tub ntxawg ntshaw noj cov qos uas npua noj kom tsau nws plab, tab sis tsis muaj neeg pub rau nws noj. 17 Nws lub siab mam li ras dheev tias : 'Pes tsawg leej tub zog nyob hauv kuv txiv tsev tau mov noj seem noj so, hos kuv nyob tuag tshaib ntuas ntawm no. 18 Kuv xav mus cuag kuv txiv, kuv yuav hais rau nws tias : 'Txiv, kuv ua txhaum rau Ntuj thiab rau koj. 19 Kuv tsis tsim nyog koj hu kuv ua koj tus tub ntxiv. Thov koj saib kuv ib yam li koj ib tug tub zog.' 20 Tus tub ntxawg thiaj sawv kev rov los cuag nws txiv. Thaum tus tub tseem los txog deb, nws txiv twb pom nws. Leej txiv hlub kawg, nws khiav mus puag tus tub caj dab, thiab nwj nws tub tub ntev loo. 21 Tus tub hais rau leej txiv tias : 'Txiv, kuv ua txhaum rau Ntuj thiab rau koj. Kuv tsis tsim nyog koj hu kuv ua koj tus tub ntxiv.' 22 Tab sis leej txiv hais rau cov tub txib tias : 'Nej tsuag tsuag mus nqa lub tsho zoo nkauj tshaj los ntawm no, nej muab rau nws hnav, nej muab ib nti nplhaib los ntxig nws ntiv tes, thiab ib nkawg khau los ntxig nws ko taw. 23 Nej cab tus xyuas nyuj rog los tua. Peb noj, peb ua lom zem. 24 Vim tias kuv tus tub no tuag lawm, nyem no nws ciaj rov los. Nws ploj lawm, nyem no rov nrhiav tau nws.' Ces lawv sawv daws noj haus lom zem.

25 Thaum ntawd, tus tub hlob tseem nyob tom teb. Thaum nws rov los yuav txog tsev, nws hnov suab paj nruag thiab suab dhia seev cev nrov ntsuag qees. 26 Nws hu ib tug tub txib kom tawm mus cuag nws, nws nug saib lub suab ntawd yog dab tsi. 27 Tus tub txib hais rau nws tias : 'Yog koj tus kwv rov qab los tsev, koj txiv tua tus xyuas nyuj rog, vim nws tau koj tus kwv rov los, noj qab nyob zoo.' 28 Ces tus tub hlob npau taws, nws tsis kam los hauv tsev. Leej txiv tawm tuaj thov kom nws los hauv tsev. 29 Tab sis tus tub hlob teb rau nws txiv tias : 'Saib, kuv lis koj tej hauj lwm cuag li ib tug qhev tau npaum no xyoo, kuv tsis tau hla koj ib lo lus li, koj twb tsis muab ib tug me nyuam tshis pub kuv ib zaug, kom tau nrog kuv cov phooj ywg noj ib pluag lom zem. 30 Hos koj niag tub ntawd, mus nrog cov niam ntiav muab koj lub cuab tam nqos tas, thaum nws rov los tsev, koj tua tus xyuas nyuj rog rau nws !' 31 Ces leej txiv hais rau tus tub hlob tias : 'Me tub, koj ib txwm nrog kuv nyob. Ib puas tsav yam uas yog kuv tug, mas kuj yog koj tug. 32 Tab sis, peb yuav tsum noj ib roog qav thiab ua lom zem, vim koj tus kwv no tuag lawm, zaum no nws ciaj rov los, nws ploj lawm, nyem no nrhiav tau nws rov los."

POB ZEB TSIS KAM LEES YESXUS 3 ZAUG UA NTEJ QAIB TSIS TAU QUA

Zaj lus no, yog ib zaj lus piv txwv rau peb neeg ntiaj teb txoj kev ntseeg txog Yesxus. Thaum peb hnov zaj lus no lawm peb yuav ua tib zoo xav tswv yim, nws yog ib zaj niaj hnub no peb tsoom neeg ntseeg Yesxus lub tswv yim. Thaum ub mas yog Pob zeb tsis kam lees Yesxus,vim Pob Zeb ntshai tuag nrog Yesxus. Zaum no ces
yog peb tsis kam lees Yesxus tib yam ntag nawv tsoom ntseeg sawv daws. Peb yuav tau ua tib zoo ceev faj thiab xav tswv yim txog Yesxus cov lus tseem ceeb.

Thaum peb los lawb dab lawm thiab thaum peb txais lub cim ntxuav mas peb tau lees rau tej XH thiab txiv plig tias peb yuav nrauj txoj kev teev dab pov tseg, yuav tso tas puas tsav yam qub kev cai tseg tsis ua ntxiv li lawm.Tab sis,ntev mus thaum peb muaj mob muaj nkeeg thiab muaj kev nyuaj siab tuaj nphav txog peb ces peb tsis nco qab txog peb cov lus thaud peb txais lub cim ntxuav ntawm XH thiab txiv plig lawm, vim peb ntshai tuag li thaum ub Pob Zeb thiab puas yog?

Nyob hauv Tswvntuj nqi lus MASTAIS tshooj 10 nqi 28 hais tias: Nej tsis
txhob ntshai cov neeg tua tau nej lub cev, tab sis lawv tua tsis tau nej tus plig. Nej yuav ntshai tus muaj peev xwm rhuav nej lub cev thiab tus plig mus rau hauv hav hluav taws. Yesxus sob lus no nws xav qhia peb tias thaum peb los cuag nws lawm yog peb raug luag hiam luag ntxub luag xav muab peb tua vim peb ntseeg Yesxus, los peb yuav tau ua siab tawv qhawv nyob ruaj nreb hauv txog kev ntseeg mus li.

Kuv yuav muab ib zaj lus piv txwv rau peb xav seb thaum peb raug luag hiam peb yuav txiav siab mus li cas? Tom ntej no yog muaj tej pab neeg muaj hwj chim (power) hais rau koj tias, koj yog ib tug neeg ntseeg Yesxus puas yog? Yog koj yog no koj cia li nti qaub ncaug rau
phau ntawv MOO ZOO no seb thiab koj cia li thim kev ntseeg Yesxus tam
sim no kiag, yog koj tsis ua li ntawd ces koj caj dab tu nrho tam sim
no nawv! Thaum ntawd koj yuav txiav txim siab mus li cas?

Yesxus hais nyob hauv MAS TAIS tshooj 10 nqi 22 tias: Sawv daws yuav ntxub nej vim kuv lus npe. Tab sis,tus twg ua siab ntev nyiaj mus txog qhov kawg, mas tus ntawd yuav txais kev cawm. Yog li ntawd, peb tsoom ntseeg sawv daws, yog peb ntseeg Yesxus tiag tias li peb lub ncauj tau hais peb yuav nco ntsoov Yesxus cov lus cia rau nruab siab, yog hnub twg tsis muaj txoj hmoo peb ho ntsib tej teeb meem xwm txheej li hais ntawd peb yuav ua tiag nyiaj tas puas tsav yam nawv mog Hmoob.

Nyob hauv ntawv MOO ZOO MAS TAIS tshooj 16 nqi 22 thiab 24 hais tias:
Pob Zeb rub Yesxus los ntawm nws, nws nroo rau Yesxus tias Huab Tais,
xav kom Tswvntuj txuag koj, tsis pub kom tej yam ntawd tuaj raug koj!
Tab sis, Yesxus fee hlo, nws hais rau Pob Zeb tias:Xastas koj lawv kuv qab. Koj thaiv kuv kev. Qhov koj xav ntawd, tsis yog qhov Tswvntuj xav,
yog tej yam neeg xav xwb. Yog li ntawd, kom peb paub tias Yesxus txoj hauj lwm yuav tsum los tuag thiab sawv rov qab los kom xwv neeg
ntiaj teb cov uas ntseeg txog nws thiaj muaj txoj hau kev mus tau ntuj ceeb tsheej. Yog Yesxus tsis tuag thiab sawv rov qab los ces lub ntiaj neeg no tseem nyob hauv txoj kev tsaus ntuj.

MAS TAIS ntawv MOO ZOO tshooj 26 nqi 33, 34,35,56,70 mus txog 75
Thaum peb nyeem cov sob lus saum no lawm peb yuav ib nyuag xav tswv yim
me ntsis tias ua cas Pob Zeb thiab cov thwj tim uas caum Yesxus mus txhua txhia qhov chaw thaum Yesxus raug lawv tuaj ntes lawm es cov thwj tim cia tso tes plau tas lawm thiab lawv tseem ntshai tsam lawv tuag nrog Yesxus thiab lawv tsis kam lees paub txog Yesxus kiag li. Pob Zeb hais rau Yesxus tias: Yog tas sawv daws ntog vim koj, los kuv yuav tsis ntog ib zaug li. Yesxus hais rau Pob Zeb tias, kuv hais tseeb rau koj. Hmo no kiag ,thaum qaib tsis tau qua,koj yuav tsis kam lees kuv 3 zaug. Pob zeb hais rau Yesxus tias, tab yog kuv yuav tsum nrog koj tuag los kuv yuav lees koj. Tas cov thwj tim kuj hais ib yam li ntawd thiab. Tas ib puas tsav yam tshwm sim tuaj kom muaj raws li cov yaj saub cov ntawv sau tseg. Ces cov thwj tim tso Yesxus tseg,lawv sawv daws khiav tas.

Thaum ntawd Pob Zeb tsis lees, nws tab meeg hais rau sawv daws tias,kuv tsis paub koj hais dab tsi! Nws twv ntuj twv teb tias nws tsis paub Yesxus li nws hais 3 zaug li ntawd. Ces tam sis ntawd,muaj ib tug qaib qua, ces Pob Zeb thiaj li nco dheev txog Yesxus lo lus tias
thaum qaib tsis tau qua koj twb tsis lees kuv 3 zaug. Ces Pob Zeb tawm mus sab nraum zoov, nws mam quaj tu siab tas nrho.

Kwv tij Hmoob sawv daws Tswvntuj yeej paub peb lub siab puag thaum ntxov lawm tias thaum peb ntshai tuag muaj ib hnub peb yuav tsis kam lees paub Tswvntuj li sob lus ntawv MAS TAIS sau tseg no, yog li ntawd
peb yuav tau xyuam xim thiab es peb thiaj li yuav tau txais kev cawm nawv mog.


Ntxhuav Mom Xyooj

NTSES TSIS TAU DEJ NTSES YUAV TUAG

Dej sab siv yog ib tug dej huam tuaj lub caij ntuj nag. Cov ntses nyiam taug tus dej ntawd, tuaj mus nrhiav kab noj. Cov lus phem uas tuaj ntawm
neeg lub ncauj tuaj nws muaj ceem heev, vim muaj ntxwg nyoog nyob txuam rau hauv lawm. Cov lus uas ntxwg nyoog nyiam taug kev nrog yog cov lus:
DAG, KHIB, NTXUB, XYAV LUAG MOO PHEM THIAB LUS XAIV LUS DAG. Cov lus no zoo li tus dej sab siv uas ntses nyiam taug nrog. Cov lus phem ntawd yog ib co lus yug ntxwg nyoog lub zog.

Peb tsis txhob txhawb kom ntxwg nyoog lub zog loj, peb txhob muaj txoj kev dag, kev ntxub, kev khib thiab kev xyav luag moo phem, peb thiaj li tsis yog ntxwg nyoog cov me tub me ntxhais thiab cov muam cov kwv.

Xav kom peb txhua leej yog Yesxus cov muam cov kwv, peb yuav tau xaiv lo lus zoo los hais xwb. Peb thiaj li yog ib tug ntseeg Yesxus tseeb, peb yog Yesxus ib tug muam ib tug kwv. Yog thaum peb coj tau zoo li hais ntawd lawm, dab ntxwg nyoog txoj kev phem yuav tuag mus zoo li tus ntses tsis tau dej ces ntses yuav tuag mus.


Ntxhuav Mom Xyooj

ZAM TSHOOJ 1


Yesxus yog Tswvntuj Leej Lo Lus nqis puag saum ntuj los rau hauv ntiaj teb no thiab nws tseem yog cov MOV PUB TXOJ SIA (Zam 6, 35)  Yesxus hais tias, Kuv yog cov mov pub txoj sia. Tus twg tuaj cuag kuv mas nws yuav tsis tshaib ib zaug. Tus ntseeg txog kuv nws yuav tsis nqhis dej ntxiv.

Yesxus tau los qhia peb neeg ntiaj teb tias muaj dab phem teb thiab ntuj ceeb tsheej. Yog peb leej twg xav xaiv ntuj ceeb tsheej los ua nws tug, nws yuav tsum xaiv Yesxus txoj kev. (ZAM 14, nqi 2 thiab 6) Nyob pem Leej Txiv Tsev muaj ntau chav! Yog tsis muaj ces kuv yuav xub hais qhia nej paub! Kuv mus npaj ib qho chaw rau nej.  Yesxus hais tias kuv yog txoj kev,kuv yog qhov tseeb thiab kuv yog txoj sia.  Tsis muaj ib leej twg yuav mus cuag tau LEEJ TXIV saum ntuj ceeb tsheej yog nws tsis vam txog kuv.   Yog li ntawd, peb paub thiab ntseeg tau tias Yesxus tib leeg xwb thiaj li yog txoj kev mus cuag tau LEEJ TXIV TSWV NTUJ. Yesxus yog tus choj tuam puag saum ntuj los rau ntiaj teb.

Peb txoj kev lawb dab thiab ntxuav plig tas ces peb yuav xav hais tias kev ntseeg ntuj ces tag li ntawd lawm xwb. Tab sis nws tsis yog li ntawd.  Kev ntxuav plig yog ib txog kab ke nyuam qhuav pib yuav mus rau kev ntseeg ntuj xwb.  Zoo nkaus li daim permit tsav tsheb. Koj tau daim permit lawm, yog koj tsis mus xyaum tsav tsheb li ces txawm yuav pes tsawg xyoo los koj yeej tsis paub tsav tsheb li.  Koj yuav tau mus xyaum tsav tsheb kom tsav tau lub tsheb khiav zoo, ces mam li mus xeem kom tau daim license tsav tsheb tiag tiag es thiaj li yuav kav koj txoj kev tsav
tsheb mus ib txhis.  Yog li ntawd, thaum peb ntxuav plig tas lawm mas peb yuav tau
mus xyaum txoj kab ke ntseeg ntuj thiab xyaum mus nyeem phau ntawv MOO ZOO
kom thoob thiab peb yuav tau thov Tswvntuj LEEJ NTUJ PLIG los pab peb lub tswv yim cim xeeb kom txawj cim thiab nco cia rau nruab siab (Luskas 11,9-10) Kuv hais rau nej tias, nej thov ces yuav muaj tus pub rau nej. Nej nrhiav ces nej yuav ntsib. Nej khob qhov rooj ces yuav muaj tus qhib rau nej.  Vim tias tus thov nws yuav tau txais, tus nrhiav nws kuj yuav tau ntsib,tus khob qhov rooj kuj yuav muaj tus qhib rau nws.

Kwv tij Hmoob aw...Yesxus cov lus saum toj no yeej muaj tseeb tiag.  Thaum ub kuv lawb dab thiab ntxuav plig tas, kuv yeej tsis thov Tswvntuj thiab tsis tshawb fawb nyeem ntawv MOO ZOO li yus lub neej yeej tsis muaj qhov hloov li, tseem nyob
zoo li lub neej thaud tseem coj qub kev cai xwb.  Yog nej thov ces yeej yuav muaj tus pub rau nej. Nej khob qhov rooj yeej yuav muaj tus qhib rau nej tiag li. Nej nrhiav ces yeej ntsib tiag tiag li mog kwv tij Hmoob.  Thaum nej ntsib lawm mas nej yeej yuav ntxub nej lub qub neej tas los uas nej tau ua tej kev txhaum.  Vim muaj kev haub kev ntxias ntau tsav ntau yam txuam nyob hauv peb txoj kev ntseeg txog
Yesxus.  Ces muaj ib txhia nkees nyeem ntawv MOO ZOO kom to taub txog txoj kev ntseeg ntuj, ces thaum muaj kev nyuaj siab, kev mob nkeeg, kev haub kev ntxias tuaj nphav txog ces cia li tso kev ntseeg Yesxus tseg lawm.  Vim tib qho tsis tshawb fawb thiab nyeem ntawv MOO ZOO xwb ces thiaj li ntaus siab me, tsis muaj kev tso siab rau Tswvntuj. Ces yuav nkim caij nkim nyoog rau yus thaum tseem ua neej nyob rau lub ntiaj teb no.


Ntxhuav Mom Xyooj

Nyob zoo ib tsoom Hmoob ntseeg Yesxus sawv daws.

Tau ntev lawm kuv tsis tau tuaj sau tej sob lus kev ntseeg ntuj nyob rau hauv no lawm. Tab sis kuv yeej tuaj xyuas nraim hauv vas sab no thiab. Kuv cia siab tias
sawv daws tseem nyob ruaj nreb hauv txoj kev ntseeg Yesxus.

Peb lub neej nyob rau hauv lub ntiaj teb no, txawm peb yuav nyob rau qib twg, thaj chaw twg, lub teb chaws twg los xij, peb tsis txhob tso txoj kev ntseeg txog Yesxus tseg kiag li mog. Vim peb tsis paub hais tias, tag kis yuav zoo li cas, muaj dab tsi tswm sim tuaj?

* Kuv txawm yuav yog ib tug neeg me qig taub xwb los tsuav kuv ntseeg txog
Yesxus.

* Kuv yog ib tug tsis zoo nkauj zoo nraug los tsuav kuv ntseeg txog Yesxus.

* Kuv yog ib tug tsis tau nrog luag ua nom ua tswv kav teb kav chaw los tsuav kuv
ntseeg txog Yesxus.

* Kuv yog ib tug tsis nrog luag muaj nyiaj muaj txiaj los tsuav kuv ntseeg txog
Yesxus.

* Kuv yog ib tug tsis tawb luag nyiam, luag hmov tshua los tsuav kuv ntseeg txog
Yesxus.

* Kuv yog ib tug tsis muaj hwj chim,tsis nto moo,tsis muaj leeg twg nco txog kuv
los tsuav kuv ntseeg txog Yesxus.

* Kuv yog ib tug txom txom nyem tsis muaj noj muaj hnav khaub khaub hlab los
tsuav kuv ntseeg txog Yesxus.

* Kuv yog ib tug raug luag thuam luag ntxub los tsuav kuv ntseeg txog Yesxus.

* Kuv yog ib tug neeg lus tsawg tsawg,hlwb khiav qeeb qeeb tsis muaj leej twg
nco txog thiab khuv xim kuv los tsuav kuv ntseeg txog Yesxus.

* Kuv yog ib tug tsis muaj suab muaj npe nrov los tsuav kuv ntseeg txog Yesxus.

* Kuv yog ib tug tsis muaj phooj ywg, tsis muaj kwv tij,tsis muaj muam,ib hnub
tsaus ntuj los twb tsis muaj leej twg hu xov tooj tuaj nrog kuv tham los tsuav
kuv ntseeg txog Yesxus.

* Txawm kuv yuav nyob ib leeg twm zeej tsis muaj kev lom zem nrog luag los tsuav
kuv ntseeg txog Yesxus.

* Txawm kuv yuav txawj tshuab raj tshuab ncas, txawj ntaus thaj cheej hu nkauj
los tsuav kuv ntseeg txog Yesxus.

* Txawm kuv yuav noj nqaij haus cawv tsau plab los tsuav kuv ntseeg txog Yesxus.

* Txawm lub ntiaj teb no yuav ua tsov rog sib ntaus sib tua, neeg tuag pawg lug
los tsuav kuv ntseeg txog Yesxus.

* Txawm kuv yog ib tug khwv khwv hws tawm lug, muaj nyiaj txiag ntau nplua nuj
los tsuav kuv ntseeg txog Yesxus.

* Txawm kuv yog ib tug ua tsis tau hauj lwm,xiam oob khab lawm los muaj mob muaj
nkeeg los tsuav kuv ntseeg txog Yesxus.

* Tsis yog ib hnub los yog ib hnub kuv lub cev ntaj ntsug no yuav ploj mus los tsuav
kuv ntseeg txog Yesxus.

Kwv tij phooj ywg Hmoob peb ua neej nyob rau lub ntiaj teb no, txawm peb yuav
nyob ncaj rau seem twg los tsuav peb tso siab nphuav rau Tswvntuj xwb ces peb
yeej yuav nyob tau kaj siab lug mog. Kav tsij ntseeg Yesxus kom ruaj ruaj tsis txhob tso txoj kev ntseeg Yesxus tseg kiag li. Thaum peb dua lub ntiaj teb no mus peb yuav tau txais paj tshab zoo los ntawm Tswvntuj.

Kuv ntseeg thiab tso siab li ntawd es koj puas ntseeg tau li kuv ntseeg thiab?


Ntxhuav Mom Xyooj

Nyob zoo phauj Maiv Tooj

Kuv zoo siab ntau uas koj kuj yog kuv ib tug phauj thiab. Koj yog kuv ib tug phauj uas
muaj lub zoo tswv yim thoob tsib kawg lawm nawv phauj. Peb Hmoob tseem tsawg tsawg kawg li yog tsis nug xwb, yog nug ces yeej muaj qhov txheeb ze kawg.

Phauj kuv ua koj tsaug ntau uas koj tseem tuaj qhia rau kuv paub. Yog koj tsis qhia
ces yog sib ntsib ces yeej xav tias yog Hmoob xwb no puas yog.

Ntxhuav Mom Xyooj

2 TXOG KEV
MAS TAIS 7, 13-14

Huab Tais Yesxus hais nyob hauv ntawv Moo Zoo hais tias, nej chaws mus hauv lub
qhov rooj nqaim mog. Vim hais tias lub qhov rooj dav, thiab txoj kev loj coj neeg
mus zwm rau kev ploj kev tuag. Txoj kev loj ntawd, thiaj li muaj neeg coob coob
taug. Tiam sis lub qhov rooj nqaim thiab txoj kev ti ti ntawd, yog coj neeg mus zwm
rau txoj sia. Muaj tsawg tsawg leej kawg, thiaj li nrhiav tau txoj kev ti ntawd taug.

Kwv tij Hmoob sawv daws, nej puas ua tiag xav kom zoo zoo txog Yesxus sob lus
ntawd? Niaj hnub nim no, yog peb ua tib zoo ntsia zoo zoo, peb yeej pom tias txoj
kev dav thiab txoj kev nqaim yog txoj twg lawm.

Kuv muab ib qho piv txwv txog peb Hmoob lub ntees ploj tuag los rau peb saib seb
nej ho pom li cas. Nyob ntawd peb Hmoob lub ntees ploj tuag cov ntseeg Yesxus
thiab cov tsis ntseeg ho txawv npaum li cas.

Ntees ploj tuag ntawm cov tsis tau los ntseeg Yesxus mas yeej muaj kev lom zem
dua, neeg tuaj xyuas coob tshaj, muaj haus dej haus cawv, muaj ntaus phaib, muaj
tshuab nqeej ntaus nruas, neeg tham ywj siab nrov vig vig voog voog mus mus los
los, tsis hnov ib lo muaj lub li.

Ntees ploj tuag ntawm cov ntseeg Yesxus mas nyob ntsiag to tsis muaj kev lom zem
neeg tsis tuaj xyuas coob. Neeg tuaj xyuas ib vuag zoo li tsis muaj qab hau rau lawv
kiag li. Lawv nyob ntev li 15 feeb xwb lawv rov mus lawm.

Yesxus sob lus txoj kev dav thiab txoj kev nqaim no duav tau ntau ntau yam xws li
neeg lub siab nyiam thiab ua ywj siab. Zoo li peb cov Hmoob lub siab nyiam mus
taug txoj kev dav dua. Txoj kev dav ntawd, yog nrhiav kev plees kev yi, ua qub kev
cai los txuam rau kev ntseeg ntuj, vwm rau kev nkauj kev nraug, tej txij nkawg nyiag
siab thaum mus ua hauj lwm tom company, vwm rau kev nkauj kev nraug nyob rau
sab Nplog teb Thaib teb ua rau tej txij nkawm lub neej puas tag, muaj kev sib nrauj
nce siab zuj zus, ua lub neej zoo siab thiab lwj siab, tej me tub me ntxhais tsis mloog
niam mloog txiv lus qhia, tej kwv tij neej tsa muaj kev sib ntxub tej no puav leej yog
Yesxus sob lus hais tias taug kev dav.

Txoj kev nqaim yog ib txoj kev neeg tsis nyiam taug rau qhov hais tias, ti dhau thiab
tsis muaj kev lom zem, tsis muaj kev ua ywj neeg lub siab. Muaj mob nkeeg los ua
tsis tau txhua yam rau li, mus ua hauj lwm tom comany pom tej tus neeg hais lus qab zib, lus mos los nrog tsis tau ua nkauj ua nraug kiag li. Txoj kev no ti dhau neeg
tsis muaj coob leej taug txoj kev no.

Nej pom tej lub tsev teev ntuj loj uas neeg tuaj teev ntuj coob heev rau hauv yus xav
tias cov neeg ntawd puav leej taug txoj kev nqaim xwb no, tab sis feeb coob yog cov
taug txoj kev dav xwb, lawv tuaj hauv lawv looj hnab tsaj xwb, nyob hauv lawv lub
siab lawv tsiv npaum hma thiab tsov xwb, tsawg leej kawg thiaj li taug txoj kev
nqaim li Huab Tais Yesxus hais kom peb ras xeev.

Kwv tij Hmoob, peb ua tiag nyiaj ntxeem txiv tiag tiag mus rau txoj kev nqaim nawv
mog cov me kwv tij nkauj muam nraug nus hmov thiab tshua.

Ntxhuav Mom Xyooj

MASTAIS 21,12-17

Yesxus ntiab cov tub luam nyob hauv lub Tuam Tsev Teev Ntuj

Yesxus hais rau lawv tias:  Muaj ntawv sau tseg tias, luag yuav hu kuv lub tsev ua tsev Teev Ntuj.  Cas nej ho muab ua tub sab chaw nkaum.

Zaum no peb ua tib zoo soj ntsuam xyuas thiab xav tswvyim txog Yesxus tes hauj lwm thiab tus qauv kab lis kev cai puag thaum ub thiab txog niaj hnub nim no mas Tswvntuj yeej paub neeg ntiaj teb lub tswv yim puag thaum ntxov ntxov los lawm, tias neeg yuav ua mus zoo li cas!    Ces Yesxus thiaj li ua tus qauv piv txwv rau neeg pom.  Yesxus thiaj li ntiab cov tub lag luam uas tuaj muab lub Tuam Tsev Teev  Ntuj
ua luam muag khoom tej rooj tog thawb vau pawg lug.

Zaum no peb ho sim ua tib zoo ntsia zoo zoo niaj hnub nim no thiaj li muaj ntau lub
Koom Txoos ntau hom church puv nkaus rau lub ntiaj teb.  Peb ua tib zoo ntsia thiab
ceev faj peb pom tias muaj qee hom church yog ua lag luag yuav Yesxus lub npe los
nraim qhov muag kom lawv tau (member) neeg coob xwb.   Qhov tseeb tiag yog lawv
tuaj ua luam hauv Tswvntuj lub Tuam Tsev xwb.

Tswvntuj muab dej thiab hluav taws los tso nplhuav ntawm neeg xub ntiag.  Cia neeg mam xaiv raws neeg siab nyiam,  seb neeg yuav xaiv txoj twg? Kev tuag thiab
txoj sia. Yog dej thiab hluav taws.

Txoj kev tshaj Tswvntuj lub Moo Zoo peb tshaj tias Yesxus yog txoj Kev mus cuag tau
Leej Txiv,  Yesxus yog qhov Tseeb thiab yog Txoj Sia

Muaj qee hom church lawv tuaj yuam kom peb cia li mus koom nrog lawv,mus ntxuav
plig dua tshiab.  Lawv hais tias lawv lub thiaj li yog lub Church tseeb.  Txoj kev ntseeg yog ib txoj  kev yuam.

Kev ntseeg yuav tsum yog yus tus kheej txiav txim siab, yuav tsum yog yus ntseeg
puag hauv yus nruab siab tuaj, txhob  yog kev yuam.

Vim li ntawd, thiaj li muaj cov tub luam tuaj muab Yesxus lub Tuam Tsev Teev Ntuj ua lag luam thiab ua chaw rau tub sab nkaum.

Yesxus cov lus uas nws tau hais thiab nws tes hauj lwm nws tau ua los puav leej yog
lus paj lug tag nrho.  Yog peb tsis ua tib zoo xav thiab tshawb fawb peb yuav tsis to
taub txog nws tej lus nyiaj lus kub.  Piv txwv tias nws lub Tuam Tsev Teev Ntuj: Yog
lub ntiaj teb.


Ntxhuav Mom Xyooj

LUS KAS TSHOOJ 4, 1-11

THAUM PEB XAV HAIS TIAS PEB YOG IB TUG NTSEEG NTUJ RUAJ KHOV LAWM,TAB SIS PEB YUAV TAU XYUAM XIM CEEV FAJ THIAB.

Yesxus thiaj li ua tus qauv raug dab phem ntxias. Muaj ntau txoj kev dab phem ntxias neeg,  yog li ntawd, peb yuav tau xyuam xim. Dab phem muab tej yam uas neeg nyiam nyiam thiab ntshaw ntshaw los ntxeev ntxias neeg.  Thiab dab phem tos lub caij thaum yus qaug qaug zog, thaum muaj mob nkeeg, thaum tas kev cia siab, thaum nyuaj nyuaj siab, thaum chim chim siab thiab thaum yus siab qaug lias dai dhuam rau tej yam yus nyiam thiab ntshaw.  Thaum ntawd lau... dab pheb pib ntxias neeg.  Peb nyeem nyob hauv ntawv Luskas tshooj 4 peb pom tias Yesxus yoo mov tau 40 hnub 40 hmo thaum ntawd Yesxus tshaib plab thiab qaug zog heev ces dab phem pib ntxias Yesxus.   Niaj hnub no peb ua tib zoo ntshuam xyuas peb twb pom coob leej ntau tus cov neeg ntseeg ntuj uas yog cov tub tshaj ntuj lus, cov xib hwb, txiv plig thiab tej pej xeem uas ntseeg ruaj khov thaum ub, zaum no kuj raug dab phem ntxias tau lawm coob leej cov uas yus paub.  Yog li ntawd, peb cov uas ntseeg ntuj ruaj khov peb yuav tsum xyuam xim ceev faj tshaj plaws.  Vim kev haub kev  ntxias ntawm dab phem muaj ntau seem kev ntxias uas yus tsis faj txog.  Kev haub kev ntxias ntawm dab phem mas kom nej ceev faj zoo, dab phem los txhoov yus tej neeg txheeb ze yus rov ntxias yus nkaus xwb, yog nej tis ceev faj zoo ces nej yeej tsis paub tias yog dab phem ntxias li.  Vim hais tias, peb cov uas ntseeg Yesxus peb tseem yuav raug sim siab los ntawm leej tswv yim cuav, yog peb ua tsis tau lub siab tawv qhawv nyob ruaj nreb hauv txoj kev ntseeg Yesxus, ces dab phem tseem yuav chua tau peb ko taw thaum peb  nce yuav nto toj. Kuv pom coob leej cov ntseeg thiab xib hwb,txiv plig lawv tau nkim lawv lub caij nyoog los ntseeg Yesxus. Thaum  kawg lawv tus mob nkeeg tsis zoo ces lawv cia li mus ua neeb saib yaig. Cov xib hwb thiab txiv plig cia li qaug rau kev plees kev yi. Tej no puav leej yog dab phem ntxias tau lawm.  Thaum peb raug mob raug nkeeg loj lawm uas yog doctor kho tsis tau, mas peb yim huab ntseeg ntuj khov kho  peb thiaj li tsis mag kev haub kev ntxias os cov me kwv tij nkauj muam Hmoob aw.....

Thov caw txhua leej nquag nyeem ntawv NTSHIAB yuav pab tau yus maim dhau kev haub kev ntxias.


Thov caw txhua tus nyeem phau ntawv NTSHIAB yuav pab tau yus maim dhau kev
haub kev ntxias.

Ntxhuav Mom Xyooj

Tij Laug Ntxhuav yeej yog li koj hais lawm.
Peb txhua tus neeg ntseeg mas peb yuav tsus ceev faj kom peb txhob yoog luas cov coj tsi yog tus yam ntxwv.
Peb yuav tsum coj raws li HT Yes xus tus yam ntxwv.
Kwv tij tab txawm yog Yes Xus nkaus los dab phem twb muaj peev xwm ntxia, li ntawd peb yog ib cov neeg me me xwb, kuv xav mas dab phem haj yam yuav tsi ntshai, li ntawd dab thiaj li cuab voj hlua ntau kom saib leej twg ho mag, tus ua mas lawm, kav tsij rov nti kom dim, cia li los leeg koj lub txim sai sai tau, HT Yes xus yeej yuav zam rau koj xwb mog cov phooj ywg.
Kwv tij nyob rau hau Ntawv Ntshiab muaj ib qib hais tias: lub sij hawm thaum yuav kawg mas, tab yog cov neeg ntuj xaiv los yeej yuav yuam kev, tab sis tus nyob ruaj nreb mus li kom tom thawj mas Nws yuav txais kev cawm.

Li ntad Nyob rau peb tiam no mas peb yuav nco ceev faj tsam sawv cia li nov qab txoj kev ntseeg lawm og nawb.

LUS KAS; Tshooj 17 nqe 22 txog 23

Yesxus hais rau nws cov thwj tim hais tias:  Yuav muaj tej lub sij hawm uas nej ntshaw pom Neeg Leej Tub nrog nej nyob, tab sis nej yuav tsis pom. Ces luag yuav hais rau nej tias:
Neeg Leej Tub nyob tod, los yog nws nyob ntawm no.  Mas nej tsis txhob mus, tsis txhob tso sas ntws khiav mus rau tod.

Peb cov Hmoob ib txhia nyiam nquag pauv mus rau ntau hom lub church los yog lwm hom koom txoos.  Vim yog peb yog ib co neeg siab coob, zoo xws li ib tug hluas nkauj, hluas nraug nyiam tham thiab pauv mus rau coob leej nyob hauv txoj kev plees nkauj nraum.

Tej zaum nej yuav xav hais tias: Nyob tom lub church tod, Yesxus yuav nyob rau tod, cov XH tod thiaj txawj qhia kev ntseeg ua luaj li. Ces nej thiaj li tso sas ntws dua tod lawm.
Thaum i kuv pom koj nyob hauv lub Koom Txoos Catholic: Cas zaum no koj ho mus nyob tom lub Koom Txoos CAM.  Thaum i kuv pom koj nyob hauv lub Koom Txoos CAM sad: Cas
zaum no koj ho mus nyob tom XH Txawj Vag lawv lub church lawm.  Thaum i kuv pom koj nyob tom XH Txawj Vag lawv lub Koom Txoos:  Cas zaum no koj ho nyob tom Church Mormon. Thaum i kuv pom koj nyob tom church Mormon: Cas zaum no  koj ho nyob tom Church Baptist.

Kwv tij Hmoob:  Tswv Yesxus yeej paub peb lub siab ua ntej puag thaum ntxov ntxov los lawm. Tswv Yesxus thiaj li qhia sob lus saud ua ntej rau peb ras xeev.  Thaum Tswvntuj tsis
tau tsim lub ntiaj teb no Vaj Yesxus yeej nyob ua ntej lawm. Saib Zam tshooj 1.


Ntxhuav Mom Xyooj

NTSEEG YESXUS YOG KEV NYIAJ NTXEEM TAS PUAS TSAV YAM
----------------------------------------------------------------------

Kev Zam Txhaum/Kev Hlub/Kev Ua Raws Yesxus Qab/thiab Kev Mob Nkeeg

Yesxus tau yug los ua neeg tau los nyiaj ntxeem tas puas tsav yam kom xwv nws thiaj txhiv tau peb tus ntsuj plig rov mus cuag tau Tswvntuj
Yog peb ntseeg Yesxus tiag tiag li peb hais: Muaj 4 yam loj tshaj nyob hauv peb txhua leej lub neej.

1) Kev Zam Txhaum: Yog koj muaj ib tug kwv tij neej tsa los yog koj tus txij nkawm tau ua txhaum rau koj lawm es nws los thov koj kom koj zam lub txim rau nws,nws kuj tau los
   thov koj yam tu siab nrho mas koj yuav tau zam txim tiag rau nws. Hais txog kev zam txim mas kuj muaj ntau yam kev zam txim thiab. Piv txwv tias: yus thiab yus tus txij
   nkawm muaj lus sib cav sib ceg laib txog kev nkauj kev nraug thaum ub thiab niaj hnub nim no yeej tsis sib haum xeeb li yeej tsis xav los koom ib lub txaj pw li thiab los yuav
   tsum ua thiaj nyiaj ntxeem kom mus txog hnub kawg. Tsis txhob sib nrauj nawv mog. Hmoob muaj ib lo lus hais tias: ua cav lwj sib ib nyob kom mus txog hnub laus nkoos. Ib khub
   txij nkawm ntseeg twg tsis sib haum xeeb tsis muaj kev zam txim yog sib nrauj lawm,txhais tau tias nkawd nkim caij nkim nyoog los ntseeg Yesxus lawm tiag. Thaum sib nrauj
   tas lawm txawm tias nkawd niaj as thiv mus pe hawm Tswvntuj thiab txais Yesxus lub cev los yeej tsis muaj qab hau qab ntxhiab rau nkawd lawm. Caw saib ntawv Moo Zoo
   Maskos tshooj 10 nqi 3-12 thiab Luskas tshooj 16 nqi 18  Luskas tshooj 6 nqi 36 txog 38.

2) Kev Hlub: Yuav tsum muaj kev hlub puag hauv nruab siab tuaj. Vim hais tias Tswvntuj yeej pom tshab plaws hauv neeg nruab siab. Yus pom ib tug neeg tau txais kev quaj
   ntsuag,yuav tau mus plij nws hlub nws. Hlub tej neeg txom nyem,hlub tej me nyuam ntsuag thiab hlub tej poj ntsuam,yawg ntsuag thiab hlub tsoom txheeb ze yus. Yog peb
   muaj kev sib nyiam sib hlub lawm Tswvntuj yuav nyob nruab hauv peb. Tswvntuj yog txoj kev hlub. Piv txwv tias:  ib nkawm niam txiv twg yog txawj txawj sib hlub nws yog
   ib lub zog loj tiv thaiv kev haub kev ntxias. Tej kev phem yuav nkag tsis txeem.

3) Ua Raws Yesxus Qab: Yog mloog Tswvntuj lo lus nyiam Tswvntuj,Tsob hwb Tswvntuj,thiab teev hawm Tswvntuj ib leeg xwb. Yog tus Tswvntuj tsim lub ntuj lub teb thiab tsim tas
   ib puas tsav yam.  Caw saib ntawv Moo Zoo Lukas tshooj 8 nqi 21 thiab Lukas tshooj 6 nqi 47-49.

4) Kev Mob nkeeg: Hais txog kev mob nkeeg,thaum peb muaj ib tug mob loj lawm uas Dr. tsis muaj peev xwm kho tau li peb tsis txhob mus nrhiav neeb saib yaig los pab kho.
   Peb yuav tsum ua tiag nyiaj ntxeem nco dheev txog Yesxus tus uas twb tau los nyiaj ntxeem tus mob loj tshaj peb lawm. Peb tsuas tso siab plhuav rau Tswvntuj lawm xwb,
   ciaj thiab tuag los xij. Txawm tias peb lub cev ntaj ntsug no tuag lawm los peb tus ntsuj plig thiaj li yuav tsis tuag. Yog peb ua tiag nyiaj ntxeem tas puas tsav yam li hais
   saud.


Ntxhuav Mom Xyooj

TSO SIAB PLHUAV RAU TSWV NTUJ

Peb txoj kev ntseeg Yesxus puas muaj qab hau rau peb?

Kwv tij phooj ywg nej puas ntseeg tau li kuv ntseeg thiab?

Thaum peb sawv daws tseem ua neej nyob luag ntxhwb ntxhi nrog rau kev lom zem,kev ua noj ua haus rau kev khwv nyiaj khwv txiaj los yug lub cuab lub yig mas sawv daws tsis nco qab txog dab tsi li. Kuv tus kheej,kuv ntseeg thiab tso siab hais tias Tswvntuj yuav pub txiaj ntsim paj tshab thaum kuv lub cev ntaj ntsug no ploj mus tsis yog ib hnub los yog
ib hnub. Thaum ntawd, kuv txoj kev ntseeg Yesxus yuav muaj qab hau heev rau kuv tus ntsuj plig.

Thawj tug neeg yog Adam,nws yog tus coj kev ploj tuag tuaj tseb rau neeg ntiaj teb. Tus coj txoj kev kaj thiab txoj sia rov tuaj rau neeg ntiaj teb dua nws yog Yesxus.
Niaj hnub nim no peb lub ntiaj teb peb nyob no zoo nkaus li ib lub nkuaj kaw neeg nyob tsaus ntuj nti tsis tau kev tawm. Peb yuav ua li cas peb thiaj li nrhiav tau kev tawm ntawm lub nkuaj tsaus ntuj ntawd mus? Tsuaj muaj tib txoj kev nkaus xwb thiaj li dim tau ntawm kev tsaus ntuj yog NTSEEG Yesxus kom tas koj lub siab lus ntsws, TSO SIAB PLHUAV RA
TSWV NTUJ. Tsis txhob yog ntseeg ntawm lub ncauj xwb, yuav tsum ntseeg puag hauv nruab siab tuaj, txhob ua xyeem xyav rau Tswvntuj. Thaum peb dhia tawm hauv lub nkuaj
tsaus ntuj no mus lawm, dab ntxwg nyoog yuav soj peb qab taug peb lw nruj heev,vim peb tawm ntawm nws lub nkuaj mus lawm, zoo nkaus li peb yug ib pab npua peb muab kaw
hauv ib lub nkuaj npuas, tus npua twg tshom nkuaj tshaj thiab dhia tawm, peb yeej saib cim tus npua ntawd nruj dua. (qhov no kom peb ceev faj zoo).

Ib sob lus piv txwv piv los ntawm kuv tus kheej. Thaum kuv kawm tas college 2 xyoos. Kuv mus txais kuv daim Associate Degree Certificate kuv mam li pom tau tias txoj kev kawm ntawv muaj qab hau thiab tseem ceeb heev. Vim kuv mus pom txhiab pua leej neeg tuaj txais thiab peb hnav khaub ncaws ntoo kaus mom zoo tib yam tuaj ua tsheej phiaj tsheej kab sab yam zoo saib zoo nkauj kawg. Thaum ntawd, kuv mam li tig rov los xav tias cas kuv yuav tsis rau siab kawm ntawv kiag li. Kuv muab txoj kev lom zem nuv ntses,yos hav zoov,tua nas tua mos lwj saib hlob dua. Kuv thiaj li kawm ntawv tsis full time/kawm part time xwb ces twb yog siv 3 xyoos diam mam tiav.
Peb txoj kev ntseeg Ntuj los yuav zoo tib yam nkaus li kuv sob lus no thiab. Thaum peb tseem ua neej nyob peb muab tej yam peb nyiam thiab ntshaw saib hlob dua kev nrhiav
Tswvntuj yuav ua rau peb plam kev ntseeg NTUJ thiab peb tus ntsuj plig thaum peb dua lub ntiaj teb no mus lawm.

Kawg no thov kom Tswvntuj foom koob hmoov rau peb sawv daws kom ntsib kev kaj siab lug thiab noj qab nyob zoo.

Ntxhuav Mom Xyooj