Yuav tsum ceev faj thiaj tsis raug dab phem looj

**Mim** 13th January 2012, 6:23 pm

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°1

Yuav tsum ceev faj thiaj tsis raug dab phem looj

Post Mim 13th January 2012, 6:23 pm

Zaj no yog ib zag piav txos tej tus saub cuav. Zaj no tshwm sim puag taum ub lawm. Yog hais txog ib tug leej phauj, muaj lub npe hu ua Sr.Magdalena of the Cross (Soeur Magdelaine de la Croix), nyob Spain teb chaws.

Yuav tsum ceev faj thiaj tsis raug dab phem looj Sister_Magdalena_of_the%2B_Cross_321 Nws yug xyoo 1487 nyob Cordoba, Spain. Thaum nws muaj 5 xyoos xwb nws yeej pib ua tej yam txawv txawv lawm, nws nyiam nyiam teev ntuj, tsis ua si li tej me nyuam yaus. Muaj ib zaug, nws tab tom teev ntuj hauv tsev teev ntuj, nws txawm hnov ib cov suab paj nruag nrov zoo mloog kawg nkaus li, ces nws txawm pom ib tug tub hluas zoo zoo nraug, plaub hau dub nciab, hnav ib lub tsho ci ci, ua rau nws ntsia tsis taus li nws yuav tsum qi muag xwb. Cov neeg uas hnov piav txog li no mas muaj ib txhia hais tias yog HT Yes Xus tshwm sim rau nws. Ces lub moo no nrov nroo ntws thoob lub nrog Cordoba, thiab muaj neeg tuaj saib tus me nyuam ntxhais ntawd coob. Nws niam nws txiv tsuas yog neeg thas mas das xwb, thiab zoo li cov xwn tshwm sim ntawd pheej muaj tsis tu ncua, ces neeg coob zuj zus tuaj saib. Vim neeg pheej tuaj tuaj, muaj ib zaug nws khiav mus nraim tim qhov tsua, ces nws rov ua yog toog dua. Thaum nws xeev los, ua cas nws twb rov los pw hauv nws lub txaj lawm, yog nws tus tshiab pov hwm nqa nws los.

Nws kuj xyaum yoo mov, ua tej yam nyuaj los them txim txhaum. Tsis ntev nws pom ib tug uas nws xav tias yog HT Yes Xus txawm los hais rau nws tias kom nws tsis txhob yoo mov heev dhau, nws thiaj tsis muaj mob, vim nws tseem me nyuam yaus xwb. Thiab tus ntawd qhia rau nws tias nws yuav muaj ib txoj hauj lwm loj, mas nws yuav tsum muaj zog thiaj ua tau. Ces nws txawm khiav mus hauv tsev teev ntuj mus ua HT Yes Xus tsaug. Txog ntawm kev, nws ntsib ib tug txiv neej ceg ceg pauv mus tsis taus kev zoo, txawm thov kom nws pab tuav tus txiv neej nce cov theem ntaiv nce mus ntawm lub qhov rooj tsev teev ntuj. Nws nyuam qhuav nce ob peb theem xwb, nws twb sawv taus ntseg zoo, thiab khiav taus ncig zej ncig zos qw tias nws zoo lawm!

Thaum ntawd Magdalena nkag mus hauv tsev teev ntuj, nws cia li rov ua yog toog dua. Muaj ib tug neeg tuaj pom nws nyob zoo li ntawd, tus neeg to taub tias yog nws yees pom dab tsi lawm, tus neeg ntawd txawm txav mus saib ti ti Magdalena ob lub qhov muag; nws hais tias nim pom zoo li yog nyob saum ntuj pom Tswv Ntuj peb leeg thiab ib tsoom leej ntshiab tus duab nyob hauv. Ces neeg txawm muaj coob leej muab Magdalena nug mus nug los saib muaj tseeblos cuav li cas tiag. Tsis ntev tom qab, muaj ib tug neeg tsis txawj hais lus txawm cia li txawj hais lus lawm.

Xyoo 1497, Magdalena muaj 10 xyoo, nws loj zoo nkauj rhib tuaj lawm, tiam sis nws tsis nyiam kom luag qhuas nws ces nws hnav tej daim tiab dub ntev ntev xwb. Txawm li ntawd los nws tseem xav tias luag pom nws zoo nkauj dhau lawm, ces muaj ib zaug nws muab nws ntsia dai rau ntawm nws sab phab ntsa. Nws xub ntsia nws ob txhais taw tas nws ho ntsia nws txhais tes laug, ces ntshav tsuag laws tuaj, ua rau nws cia li tsis nco qab lawm vim mob dhau. Ces nws cia li poob los rau saum ib lub phij xab rau khaub ncaw (a chest), ua rau nws nqaij ntuag thiab ob tug tav dam daws. Nws niam nws txiv hu kws tshuaj tuaj saib, kws tshuaj qhwv nws cov kiav txhab qhov ntsia hlau rau, tiam sis nws hais tias nws xav raug txom nyem tshaj nov los them txim txhaum, ces nws pheej ib sij muab cov ntaub qhwv hle. Ces tsis ntev nws cia li mob heev heev tuaj.

Thawj Hnub Xya hauv lub Caij Hla xyoo 1497, Magdalena mob heev heev, pw lawm xwb, zoo li twb yuav tuag. Thaum ib tag hmo, nws qw ib suab nrov nrov, sawv tsees los zaum. Nws hle tsuag tsuag cov ntaub qhwv nws tes taw, nws hais tias nws zoo lawm. Nws hais tias yog Yes Xus yees rau nws pom thiab kho nws zoo hlo lawm.

Peb lub hlis ua ntej nws txais lub Cim Yug thawj zaug, nws yoo tsis noj mov li lawm, nws niam nws txiv hais npaum twg los nws tsis mloog li, nws yoo mus txog ntua hnub Chiv uas nws txais Yes Xus lub Cev thawj zaug, tiam sis zoo li nws tsis yuag tsis ua cas li. Hnub ntawd thaum tab tom ua thaj txi ntuj, txog lub sij hawm uas leej choj hais HT Yes Xus cov lus tsim lub Cim Yug, nws rov qw ib suab nrov nrov, ces nws cia li khoov pe hauv av ntev ntev. Thaum nws tawm hauv tsev teev ntuj los, nws piav tias yog HT Yes Xus muab lub Cim Yug rau nws qhov ncauj, nws tsis tas mus kom txiv plig muab li.

Thaum nws muaj 16 xyoo, sawv daws qhuas nws kawg nkaus, vim nws ua ntau yam them txim txhaum, nws nplawm nws tus kheej ua nqaij to ntshua los ntshav liab vog, tiam sis tag kis txawj zoo tag tib si lawm. Neeg yeej hais tias nws yogi b tug leej ntshiab li lawm. Muaj ib yam txawv me ntsis yog nws muaj ob tug ntiv tes uas tsis txawj hlob, cia li ruam lawm. Lawv hais tias yog, thaum nws yau, muaj ib hmos HT Yes Xus tshwm sim tuaj rau nws, HT Yes Xus chwv ob tug ntiv tes ntawd ces cia li tsis hlob ntxiv lawm.

Xyoo 1504, nws muaj 17 xyoo, lawv kam nws nkag mus ua leej phauj rau hauv lub koom haum Franciscan. Vim sawv daws cav txog nws yogi b tug leej ntshiab, ces cov leej phauj Franciscan nyob hauv Cordoba zoo siab hlo txais nws los ua phauj rau hauv lawv. Muaj coob leej qhuas nws thiab saib nws yog ib tug qauv zoo rau lawv xyaum.

Tiam sis muaj me ntsis qee yam uas nws tab meeg ua ntau zog lawm tsis muaj qhov zais ntshis li, Xws li nws nplawm nws tus kheej rau sawv daws paub, nws kwv ib tug ntoo cuam hnyav hnyav ncig lub tsev koom haum, nws txhos caug mus hnia lwm tus phauj tej ko taw, thiab nws yoo tsis noj mov li, tsuas noj lub Cim Yug nkaus xwb. Nws kam ua tej hauj lwm qias neeg uas lwm tus tsis kam ua. Ces txawm sawv daws muaj ib lub siab xoom xais me ntsis los sawv daws pom qhov loj xwb tias nws yog ib tug neeg hwm Ntuj zoo tiag.

Nws mus nyob kawm ua leej phauj txog xyoo 1509, thaum ntawd nws muaj 22 xyoos, ces lawv txawm pom zoo cia nws cog lus ua phauj. Neeg tuaj coob coob. Cov nom tswv, cov neeg muaj koob muaj npe sawv daws tuaj saib tus leej ntshiab cog lus ua leej phauj. Hnub ntawd tus tswv qhia tuaj hais lus, nws tsis ntuas kom xyaum ua lub neej raws kev cog lus, hos nws hais ib co lus rau Magdalena kom thov ntuj rau nws(tus tswv qhia), thov ntuj pov hwm nws thiab nws txoj hauj lwm xwb. Magdalena yuav lub npe leej phauj hu ua Phauj Magdalena of the Cross, vim nws nyiam Yes Xus tus Ntoo Cuam heev.

Thaum tswv qhia pib hais zaj “HT koj khuv leej yuas” txawm muaj ib yam txawv txawv. Muaj ib tug nquab cia li ya saum qab ru tsev teev ntuj ncaj qha los tsaws rau ntawm Magdalena xub pwg, thiab ua zoo li hais lus rau Magdalena pob ntseg. Tom qab ntawd, tus nquab ya mus tsaws rau saum ib qho chaw ua nws nyob ntsia ntsoov thaj txi ntuj mus txog thaum kawg. Thaum txi ntuj tas, tus nquab ya tawm nraum zoov, muaj neeg khiav mus caum qab saib, lawv pom tus nquab ya ncaj qha dua puag saum ntuj lawm. Ces tej xwm no nrov ncha ntws mus thoob qhov txhia chaw.

Tsis ntev tom qab xwb, ces tus leej phauj Magdalena cia li txawj paub ntau yam. Txawm nws tsis tau tawm mus ncig nroog li los nws cia li paub hais tias muaj dab tsi tshwm sim hauv nroog. Hos nws yeej ib sij looj yees pom Tswv Ntuj tas li. Tej zaum uas nws looj sab nraum nws chav pw, ces nws cov leej phauj tau muab nws nqa los rau hauv nws chav. Qee zaum lawv hnov nws hais tej hom lus txawv txawv, thiab lawv kuj hnov nws ntsaj nws nroo zoo li nws mob mob.

Nws kuj txawj ua saub, paub tau yav tom ntej tib si. Xyoo 1515, nws hais tias lwm xyoo tus vaj Ferdiand yuav tas sim neej, ces txawm muaj li hais tiag, mas sawv daws haj yam saib nws tsim txiaj.

Tim 25 lub 3 hlis xyoo 1518, yog lub hnub nyoog ua hmoov nco txog tus tshiab tuaj xa lus rau Mab Liab, tus leej phauj Magdalena mus ntxhi twj ywm rau tus phauj loj(tus thawj coj) tias hmo ua ntej ntawd, leej Ntuj plig Ntshiab twb los ua kom nws xeeb tus me nyuam Yes Xus rau hauv nws plab lawm. Ces tus phauj loj tsis to taub li lawm. Nws ntshai hais tias yuav muaj teeb meem loj xwb yog tias neeg paub txog qhov no, ces nws txwv Magdalena kom txhob hais dab tsi tawm li, cia nws thov ntuj thiab xav tswv yim saib yuav ua li cas tso. Tus phauj loj saib ntsoov Magdalena saib yuav zoo Ii cas, nws pom tias Magdalena lub plab kuj su zuj zus lawm tiag, mas nws kuj ntshai kawg tias yuav ua li cas zais tau li…. Thiab xyov puas yog Leej Ntuj Plig ua los yog neeg ua li?...

Ces tus phauj loj thiaj txiav txim muab hais tawm rau tas cov phauj paub. Cov phauj muaj ib txhia kuj ntseeg Magdalena, ib txhia kuj tsis ntseeg. Lawv kuj nyob rau ib qho muaj teeb meem, vim tias Magdalena lub koob meej ua leej ntshiab nrov nrov li ces ua rau neeg pub nyiaj ntau rau lub koom haum leej phauj ntawd thiab. Tiam sis cov leej phauj sawv daws cog lus tias lawv yuav tsis txhob hais dab tsi tshwm sab nraud li.

Magdalena ua txoj haj yam ua kev them txim txhaum ntau heev tuaj thiab nyuaj tshaj qhov qub xwb.
Tus tswv qhia nyob Seville hnov txog lub moo no, ces nws xa peb tug poj niam uas paub tu cov poj niam tuaj saib. Lawv saib tag lawv hais tias, Magdalena yeej muaj me nyuam lawm tiag tiag, tiam sis nws lub cev hluas nkauj tseem tsis tau puas qhov twg li. Ces tas txhua leej txhua tus zoo siab thiab ua Ntuj tsaug. Hos cov leej phauj uas tsis ntseeg, ua twj ywm hais tsi tau dab tsi li.

Thaum txog hmoov Yes Xus yug 1518, Magdalena hais tawm tias nws yuav yug me nyuam sai sai. Ces lawv tsa tau ib lub me nyuam tsev rau nws nyob tim qab vaj, vim nws tus tshiab pov hwm qhia rau nws hais tias kom nws yuav tsum yug me nyuam ib leeg xwb, tsis pub muaj neeg pab li, kom nws thiaj tau nyiaj kev mob ntau tshaj los them txim txhaum. Magdalena mus nyob hauv lub me nyuam tsev tau peb hnub tsis tawm li. Cov leej phauj sawv daws thov ntuj tas zog rau nws.

Thaum nws tawm los, nws hais tau ib zaj loj kawg nkaus. Nws hais tias Hnub Yes Xus yug los thaum tsaus ntuj, nws yug tau ib tug me nyuam tub zoo nraug kawg li, thiab ci pom kev loj kawg nkaus mas nws pom cuag yog tav su nrig. Nws chav tsev txias txias no no, tiam sis cia li txawj sov tuaj kom tus me nyuam Yes Xus txhob tau tiv no. Lub caij ntawd nws cov plaub hau uas dub dub txawj cia li ntev ntev npws loo thiab hloov ua plaub hau daj rhuv, ces nws siv nws cov plaub hau los qhwv tus me nyuam kom nws sov. Nws txiav tau nws ib qais plaub hau daj los ua pov thawj, vim nws cov plaub hau rov qab dub tas lawm. Ces cov leej phauj sawv daws sib huas nplawg ntia kom tau ib leeg ob peb txoj los cia ua koob hmoov (relic).

Nws hais ntxiv tias, hnub tom qab hnub Yes Xus yug los, thaum sawv ntxov, tus me nyuam cia li ploj lawm, tshuav nws lawm xwb. Tiam sis nws mis tseem mob mob, thiab nws lub cev yug me nyuam tas tseem tsis tau zoo. Ces Tswv Qhia xa cov poj niuam laus rov qab tuaj saib xyuas dua saib puas muaj li ntawd tiag, thiab saib nws lub cev nkauj xwb puas tau puas li cas. Lawv tuaj xyuas tas lawv hais tias muaj li tiag, ces sawv daws nim zoo zoo siab thiab ua kab ke teev ntuj ua Ntuj tsaug hauv lub tuam tsev teev ntuj. Cov neeg tuaj coob coob thiab sawv daws xa nyiaj ntau tuaj pab.

Tiam sis vim tseem muaj tej tus neeg uas tsis ntseeg thiab hais lus xaiv li ub li no, ces lawv hu ib tug txiv plig ntiab dab phem (exorcist) tuaj xyuas. Thaum nws tuaj txog, Magdalena tab tom looj lawm (in ecstasy), ces txiv plig xuas ob rab koob ntev ntev los hno Magdalena, ib rab hno ntawm nws txhais taw, ib rab hno ntawm nws txhais tes. Ob rab koob ntev ntev, muab tsij tob tob rau tiam sis Magdalena tsis hnov tsis ua zog li, ces ua rau sawv daws ntseeg hais tias nws yeej pom Tswv Ntuj tiag, nws muaj ecstasy tiag.

Tus phauj loj kuj sim nws txoj kev yoo mov thiab, vim muaj tej tus tau hais tawm tias yeej muaj neeg nyiag nqa mov rau nws noj xwb. Ces tus phauj loj tso ob tug leej tij (monks) zov Magdalena lub qhov rooj ntawm nws chav pw li ob lub hlis, nruab hnub hmo ntuj huv si, thiab nws tseem kom muab cov qhov rai ntsia tib si rau. Lawv zov tau ob peb hnub, muaj ib hnub lawv xyuas ua cas tsis pom Magdalena nyob hauv nws chav tsev lawm. Lawv mus nrhiav txhua qhov chaw, lawv thiaj mus pom nws pw tsaug zog tim lub tog vaj ze ntawm ib lub qhov dej. Ob tug monks hais tias nkawd yeej tsis tau nrug ib pliag li. Magdalena hais tias yog leej ntshiab Francis tuaj coj nws los rau qhov chaw no lawm. Ces tsis muaj neeg yuav piav tau tias yog vim li cas, sawv daws tsuas qhuas tas zog tias yog ib qho hwj huam yees ntxwv uas muaj nyob hauv Magdalena lub neej xwb.
Thaum no lawm, nws haj yam nto koob meej thiab sawv daws haj yam qhuas nws tshaj xwb. Tus hlob tus yau, tus nom tus tsis yog nom sawv daws tuaj nug nws thov nws pab tswv yim rau lawv. Hauv nws lub koom haum leej phauj kiag los tus phauj loj twb tsis muaj nqes npaum nws lawm, yuav ua dab tsi yuav txiav txim tej yam tseem ceeb mas lawv los nug nws xwb. Ces tsis ntev Magdalena thiab cov uas ntseeg nws, lawv cia li xub paub txog ntau yam tshwm sim nyob hauv lub nroog uas Tswv Qhia kiag twb tsis tau paub txog li.

Xyoo 1523, tus tswv qhia xav tsa ib lub tuam tsev teev ntuj (cathedral) tshiab. Vim muaj Magdalena ces lub koom haum leej phauj uas nws nyob hauv yog lub muaj nyiaj tshaj, thiab lawv pab nyiaj ntau tshaj los tsa lub tuam tsev teev ntuj. Vim li ntawd, lawv thiaj yuav tsum nug Magdalena txog tias nws nyiam kom tsa ib lub tsev teev ntuj zoo li cas.

Tshuav ntxiv...

**Mim** 14th January 2012, 8:04 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°2

Re: Yuav tsum ceev faj thiaj tsis raug dab phem looj

Post Mim 14th January 2012, 8:04 am

Tej yam no muaj tau 29 xyoos; Magdalena lub moo nto lug. Txawm muaj qee yam ib nyuag ua kom muaj kev xyem xyav los sawv daws saib tias nws txoj kev yoo mov them txim txhaum zoo dhau lawm, thiab saib qhov tias nws ua rau nws lub koom haum muaj koob meej thiab kuj muaj nyiaj txiag los ua ntau yam zoo, nws los sawv daws saib yog ib tug qauv zoo rau sawv daws xyaum. Ces thaum txog caij xaiv dua ib tug thawj coj rau lub koom haum leej phauj, sawv daws txawm hais zom zaws tias cia xaiv tus leej phauj Magdalena ua thawj. Magdalena kuj ua txoj tsis kam ua li vim nws tsis yog ib tug yuav txawj tswj tau lub koom haum li ub li no. Tiam sis lub 2 hlis tim 17, 1533, cov leej phauj feem coob txawm xaiv nws los ua tus thawj coj.

Tus thawj coj tshiab txawm pib kom yuav tsum ua kev them txim txhaum ntau tshaj qub hnyav tshaj qub. Kev cai cov leej phauj lawv yeej muaj tej lub sij hawm uas lawv los tab meeg lees lawv tej txhaum rau ntawm sawv daws xub ntiag. Tiam sis vim nws kom ua ntau yam nyuaj dhau, ces cov leej phauj cia li tsis kam los lees tej yam loj li, lam los lees tej yam me me dog dig xwb. Tus thawj coj pom li no, nws cia li npau taws heev heev, ua rau sawv daws ntshai tas, hos nws cia li yuam kom lawv yuav tsum lees lawv cov txhaum kom zoo tshaj ntawd, ces sawv daws ntshai tag, muaj ib txhia cia li quaj, hos ib txhia cia li ntog da hauv av zoo li raug dab phem thiab. Nws rau txim rau cov uas tau ua txhaum ntau mas nws kom lawv nkag hauv av thaum lawv mus noj mov, thiab muab nplaig yaim cov leej phauj cov khau txhua nrho.

Tsis ntev tom qab, nws kom muab ib co pob hlau los tis rau ntawm lawv cov tw hlua uas lawv siv los nplawm lawv tus kheej ua kev them txim txhaum. Cov leej phauj txoj kev nplawm yus tus kheej ua kev them txim txhaum mas ib txwm tsis yog kev yuam, yog nyias yeem nyias. Thiab thaum lub caij uas lawv nplawm lawv tus kheej li ntawd mas lawv yuav tsum tua teeb kom tas, lawv nplawm lawv nyob hauv qhov tsaus ntuj xwb, tsis muaj leej twg pom los paub tias yog leej twg.
Tiam sis tus thawj coj tshiab no yuav kom taws teeb lug cia lawv nplawm lawv rau sawv daws saib. Tom qab no sawv daws thiaj mam to taub tias yog dab phem xav ua li ntawd kom muaj txoj kev muab hlob khav theeb txhawv nyob hauv cov leej phauj uas nplawm taus lawv tus kheej lub siab hos kom muaj kev qaug zog los poob tsim txhawv nyob hauv cov uas npalwm tsis taus lawv tus kheej hnyav npaum li ntawd.

Tus thawj coj tshiab hloov ntau yam hauv lawv txoj cai thiab kom lawv ua tej yam kev them txim tshiab uas yeej dhau kev cai lawm, xws li kom lawv txhos caug saum tej daim txiag uas lawv ntsia ib co ntsia hlau rau, tiam sis npuj tsis kawg, los yog kom lawv mus pw ntawm taw rooj rau lwm cov leej phauj taug kev los tsuj … tiam sis sawv daws kuj ua tiag mloog thiab ua. Thaum txog caij xaiv dua tus thawj coj tshiab, lawv tseem rov xaiv nws dua zaum ob.

Zaum no, nws pib ua tej yam txawv tshaj qub, nws pib muab tej txoj cai uas lawv lub koom haum Franciscan ib txwm coj tau ntau pua xyoo los lawd rhuav tshem, ces tus tswv qhia thiab lwm lub koom haum Franciscan tsis txaus siab, tiam sis sawv daws hais tias nws yog ib tug neeg ntshiab dawb huv, ces lawv kuj kav liam thiab.

Muaj ib zaug nws hais tias leej ntshiab Francis, tus uas tsim lawv lub koom haum, nim tshwm sim tuaj rau nws pom , hais rau nws tias nws tsis tas mus daws txhaum ntxiv lawm. Hos nws hais tias tsis tsim nyog kom pheej yuav tsum muaj ib daim niag ntxaij los thaiv tus neeg daws txhaum ntawm tus txiv plig li. Ces ua rau cov txiv plig sawv daws poob siab, vim lub Koom Txoos ib txwm coj li ntawd los.Tsis tas li ntawd xwb, nws tseem rhuav lawv qhov kev yoo nqaij yoo mov hnub Rau (Friday), uas yog lawv txoj cai, nws hais tias lawv tsis tas yoo ntxiv lawm.

Tsis ntev tom qab xwb, nws txawm siv hais tias hmo ua ntej ntawd muaj ib tug poj niam uas tuag lawm los xyuas nws thiab los daws txhaum ntawm nws. Yog li ntawd mas nws yuav kom cov leej phauj hluas thiab cov tseem tab tom kawm ua phauj yuav tsum los dawv txhaum ntawm nws niaj hmo hauv nws chav pw. Sawv daws kuj yws yws, tiam sis sawv daws kawg yuav tsum tau ua li tus thawj hais.

Txawm muaj tej kev tsis zoo siab los tej nom tej tsw tej muaj koob muaj npe, tej tswv qhia sawv daws saib nws hlob, tuaj cuag nws, kom nws thov ntuj pab lawv.

Tiam sis vim nws ua tej yam txawv txawv ces twb pib muaj ib co tsis zoo siab lawm. Xws li muaj tej tus ntxhais tuaj thov nkag ua leej phauj, tiam sis Magdalena tsis kam, nws hais tias vim lawv yog neeg Jews, yog Niam Mab Liab qhia rau nws paub. Muaj ib tag kis nws txawm hais tau ib yam txawv txawv thiab. Nws hais rau tus phauj hu ua Isabella of the Holy Trinity uas thawj zaug nkawd ob leeg muaj npe xaiv ua thawj coj, tiam sis nws yeej lawm, tias “nag hmo tsaus ntuj, Niam Mab Liab tshwm rau kuv pom, nws coj kuv taug kev mas nws ntsia koj thiab luag rau koj, tiam sis yog luag thuam koj xwb tiag.” Cov lus no haj yam ua rau cov phauj uas tsis ntseeg nws haj yam tsis ntseeg tuaj xwb.

Xyoo 1542, cov leej phauj rov qab xaiv dua thawj coj. Zaum no, lawv tsis kam xaiv Magdalena lawm, lawv xaiv tau tus leej phauj Isabella of the Holy Trinity, uas thawj zaug nws swb rau Magdalena lawm. Ces thawj hmo ntawd, tus thawj coj tshiab Isabella(tej zaunm nws yeej xav ua pauj me ntsis) txawm hais rau Magdalena tias kom nws yuav tsum ua kev them txim txhaum, mas nws yuav tsum xuas nplaig ua ntoo cuam lub cim rau saum txhua daim tile (carreau) uas pua hauv av hauv lub tsev noj mov.

Thaum nws tab tom ua qhov ntawd, Magdalena cia li looj lawm(ecstasy). Txhia niaj txhia zaus dhau los lawm mas cov leej phauj muab nws nqa mus rau hauv nws chav, tiam sis zaum no ces lawv kav liam nws nyob nws ntawd, thaum nws tsim los lawm nws mam mus nws hauv nws chav xwb.

Zaum no coob leej zuj zus ua xyem xyav txog nws txoj kev ntshiab, lawv xav tias yuav tsum muaj neeg ntyiag mov rau nws noj xwb, hos nws mas nws hais tias nws yoo mov tau peb caug tawm xyoo no tsuas noj Yes Xus lub Cev nkaus xwb. Thiab lawv kuj tseem mus tshawb tau muab ntsaws hauv nws daim qab pam pua ib lub txws hlau uas ntim ib co ncuav mov mog nyob hauv. Ces sawv daws thiaj to taub txog tias tos nws nim txawj cia li ua hwj huam tau txais Yes Xus lub Cev ntau zaus tsis muaj neeg nqa rau nws li…

Xyoo 1543, Magdalena txawm mob heev heev. Ces tus thawj leej phauj thiaj xav tias yog ib lub sij hawm zoo yuam kom nws yuav tsum tau los daws txhaum ib zaug (vim nws tau hais tias nws tsis tas daws txhaum ntxiv lawm). Thaum txiv plig tab tom muab daim ntaub los coj ntawm caj dab, Magdalena cia li ua cuag li qaug dab peg tuaj. Ces txiv plig thiaj li tso neeg mus hu ib tug kws tshuaj uas paub saib txog kev raug dab tuaj saib. Nws tuaj saib, nws pom tias, thaum Magdalena looj lawm mas nws ob lub qhov muag tsis nyob twj ywm li cov neeg uas muaj ecstasy tiag tiag. Nws ho muab koob los nkaug, Magdalena kuj ua li tsis hnov li, tiam sis thaum nws xub muab rab koob mus raus dej ntshiab (holy water) mam coj los nkaug, mas Magdalena ho nroo li mob mob. Ces qhov no ua rau nws xav tau tias ntshai yog tus neeg no raug dab phem lawm (posssed).
Ntev zuj zus, nws tus mob loj zuj zus tuaj. Ces zoo li nws cia li ntshai thiab txhawj heev, nws thov kom tus kws tshuaj qhia nws nraim tias nws tus mob loj li cas lawm tiag.

Muaj ib hnub. Thaum lub 12 hlis, kws tshuaj hais rau nws tias:
“Koj yuav nyob tsis ntev lawm, koj yuav tsis tau pom lub hmoov Yes Xus Yug ntxiv lawm.”
Ces nws cia li txhawj heev heev, cia li ua cev ntswj lees saum txaj, nws lub cev cia li txawj sawv mus rau saum ib nta hos nws hais tau ib cov lus txawv txawv tias:
“1544!... Yog txog 40 xyoo lawm! Kuv yog tus dev raug foom phem! Coj kuv mus lawm dab phem teb!”
Ces nws cia li rov poob kiag los rau saum nws txaj. Nws cia li pib hais ib co lus phem phem ces zoo li ib lub zog muab nws nqa kiag mus rau ib nta, muab nws tso pluav poob nthav los, ua li ntawd ob peb zaug, tiam sis nws kuj tsis raug mob li thiab.

Tus thawj leej phauj xav xav, ces nws txawm hu tau ib tug txiv plig laus laus uas paub txog ntau yam tuaj, kom tuaj xyuas saib txaus ua dab tsi los ua, txaus ntiab dab los yuav tsum ntiab rau (exorcise). Tus txiv plig laus tuaj txog, nws mus saib Magdalena ib pliag, nws ntsia ntsoov Magdalena, nws txawm hais tawv qhawv tias:
“Kuv tuav txog Yes Xus lub npe kom koj cia li tawm ntawm tus poj niam no mus thiab kom koj qhia koj lub npe!”
Cia li muaj ib lub suab nrov nrov txaus txaus ntshai tawm tuaj, thiab hnov lub npe tias”Balban” nrog lub suab ntawd. Tsis ntev tom qab lawv txawm pib ua cov kab ke ntiab dab phem (exorcism) rau Magdalena. Lawv thiaj paub tias tseem muaj ib tug dab ntxiv hu ua Patorrio thiab. Dab haj yam ua heev heev haj yam luag tej niag zaj thiab hais ib co lus phem phem. Nws khav txog tej yam uas nws tau ua rau lub koom haum leej phauj tau ntev npaum no xyoo, thiab nws cog lus tias nws tseem yuav rov tuaj dua…

Ces thaum ntawd lub moo tias yog raug dab phem pib nrov thoob rau cov leej phauj thiab cov txiv plig thiab cov neeg hauv lub nroog Cordova, thiab thoob lub teb chaws Spain.

Hnub tom qab tus txiv plig uas saib tas nrho cov Franciscans (Provincial of the Franciscas) txawm tuaj, nws nkag mus hauv Magdalena chav, nws mloog Magdalena daws txhaum thiab piav tas ib puas tsav yam rau nws. Nws tawm los, nws tsis hais dab tsi txog li, tiam sis cov neeg ntsib nws yeej pom tias nws ris ib lub nra hnyav kawg nkaus.

Ib ntus tom qab, tus tswv qhia loj nyob Spain xa ib tug txiv plig Inquisitor tuaj nug nws. Nws thiaj qhia tias, tus tub hluas zoo nraug plaub hau dub nciab uas nws tau pom thaum nws muaj 5 xyoos yog dab phem. Dab phem tau cog lus rau nws tias yog nws mloog dab phem hais mas nws yuav nto koob meej thiaj luag yuav hwm nws heev, ces nws tau nrog dab phem cog lus lawm. Yog dab phem tau chwv nws ob tug ntiv tes ua chaw cim cia, ces nws ob tug ntiv tes thiaj tsis hlob ntxiv. Yog dab phem qhia nws nyiag ua hwj huam cuav txais Yes Xus lub cev, thiab qhia nws ua txuj txawj looj tsis hnov dab tsi. Thaum nws qw qw ntuj teb tag hmo, tsis yog nws pom HT Yes Xus, hos yog dab phem los ua phem rau nws es nws qw.

Tus Inquisitor hnov cov lus no, nws ntshai, nws txawm ua Ntoo Cuam lub cim rau nws tus kheej. Ces Magdalena cia li pib hais lus phem phem. Nws cia li da hauv av, cia li tom tas puas tsav yam nws muab tau los tom, thiab nws cia li muab nws lub cev qoj ntswj ua tej yam qias qias uas nws tau nrog dab phem Balban niaj hmo ua los tau plaub caug xyoo.

Tus txiv plig Inquisitor yog ib tug neeg paub, ces nws twb xub hais rau cov leej phauj kom nyob sab nraud mloog thiab sau nws cov lus cia, thiaj li yuav muaj pov thawj tseg.

Tus Inquisitor siv sij hawm ntev tuaj nug ntau yam thiab ua kab ke ntiab dab phem. Lawv thiaj muaj pov thawj cia tias dab phem siv kev lim hiam kawg nkaus los ntxias Tswv Ntuj cov me nyuam. Tos Balban los ntxias Magdalena thaum nws tseem me me los yog vim Magdalena yeej pib nyiam Tswv Ntuj thaum yau yau ntawd lawm ces dab phem xav ua kom Tswv Ntuj plag tej tus neeg uas nyiam nws heev. Tiam sis peb yuav pom thaum kawg, Tswv Ntuj yog tus yeej.

Yuav tsum ceev faj thiaj tsis raug dab phem looj Praying_nun Thaum lawv ua cov kab ke ntiab dab phem, sawv daws mam paub txog tias twb yog thaum Magdalena loj tiav hluas nkauj lawm, dab phem mam tshwm tuaj tsis yog tus tub hluas zoo zoo nraug lawm: Muaj ib hmos, Magdalena tos nws li niaj hmo, thaum nws tawm tuaj, nws xub ua li ib tauv huab tsaus tsaus, ces tauv huav ntawd txia ua ib tug txiv neej neej siab siab plaub hau ntev ntev hos ci pom kev liab liab. Magdalena txawm qw ib suab tias “Yes Xus,” tiam sis lo lus ntawd ua rau Balban npau taws heev, ces nws muab nws ob txhais tes kub lug los nqa Magdalena thiab muab nws tso ntsawm hauv av. Ces nws thiaj hloov zuj zus ua ib tug tsiaj phem phem txaus txaus ntshai rau Magdalena ntsia. Magdalena piav tias lub qhov ntswg pluav txev, ob tug kub phem phem ntswj lees, hos niag qhov ncauj tsis muaj ib tug kaus li. Nws cia li yuam kom Magdalena ua nws poj niam tam sid. Nws cog lus tias Magdalena lub cev nkauj xwb yeej tsis ploj li, tiam sis nws yuav muaj kev zoo siab tshaj plaws li. Ces cia li rov qab yog tus tub hluas uas zoo zoo nraug lawm los nrog nws pw.

Magdalena qhia tias yog dab phem nyiag los muab mov rau nws noj thaum nws yoo mov, thiab yog dab phem Balban los ua ib niag kab ntsig ua kom nws xeeb me nyuam hauv plab, ces hmo Yes Xus Yug, niag kab ntsig tawm nrov cuag ib nthwv cua loj loj los thiaj rov los phlis ua Balban dua lawm.

Lub caij Magdalena ua neej ntawd yog lub caij uas leej ntshiab Ignatius Loyola thiab LN John of Avila ua neej thiab. Muaj sau tseg tias ob tug leej ntshiab no tsis ntseeg Magdalena. Muaj ib zaug LN John tuaj txog Cordova, lawv paub tias nws tsis ntseeg ces lawv tsis kam nws mus xyuas Magdalena.

Thaum lawv tuaj ua kab ke ntiab ob tug dab phem ntawd tawm tsheej lawm tiag tiag, tsis nyob ntxiv lawm, lawv coj Magdalena mus txiav txim ntawm tus Inquisitor loj uas yog tus Tswv Qhia loj nyob hauv Spain. Thaum ntawd Magdalena muaj 61 xyoo lawm. Magdalena los lees txhaum tas siab nrho, nws hais tias kom lawv txiav txim muab nws hlawv tsuag tsuag es nws tau mus nyob hauv teb chaws them txim pauj nws tej kev txaug kev txhaum. Tiam sis cov kws txiav txim hais tias lub txim loj yog dab phem lub, thiab thaum ntawd nws tseem yau thiab tseem hluas ces nws lub txim tsis hnyav heev npaum yog ib tug loj lawm. Vim nws twb los lees txim zoo zoo lawm ces lawv teem hais tias txog hnub ntawd, lawv yuav muab nws qhov ncauj nplaum rau, muab ib ib txoj hlua los khi nws caj dab, kom nws tuav ib tug tswm ciab ntawm tes nce mus saum sam thiaj li yuav mus txiav caj dab, tiam sis nws yuav mus nyob saud rau sawv daws nstia ntev li ib lub thaj txi ntuj loj. Thaum tas ces nws yuav tsum los tab meeg lees nws cov txim txhaum tas nrho. Dhau qhov ntawd lawm, peb lub hlis mas nws tsis txhob ntoo txoj phuam dub qhwv taub hau ua leej phauj li, thiab nws yuav tsum yog tus lawv qab kawg nkaus thaum nws nrog cov leej phauj taug kev.

Ces nws tau los lees nws lub txim txhaum rau ntawm sawv daws xub ntiag ntawm lub tuam tsev teev ntuj loj. Lawv muab nws xa mus nyob rau lwm lub koom haum Franciscan tsis nyob lub qub ntxiv. Nws nyob tau ntev xyoo tom qab, nws nyob them txim txhaum tiag tiag mus txog thaum nws tuag. Cov neeg thaum ntawd kuj to taub tias thaum nws yau, nws raug dab phem ntxias, nws qaug dab phem quav, tiam sis nws yav laus nws twb tau los lees txhaum tas thiab twb tau them txim txhaum lawm, mas Tswv Ntuj yeej zam rau nws lawm. Nws tuag xyoo 1560, nws muaj 74 xyoos.

Yam tseem ceeb uas peb yuav tsum kawm ntawm tus leej phauj Magdalena of the Cross lub neej yog li no:
Dab phem txawj siv tswv yim txuj ci los xyaum ua li Tswv Ntuj, thiab dab phem muab txoj kev nto koob meej txoj kev luag hwm yus qhuas yus los ntxias tib neeg vim nws yeej paub peb tib neeg lub siab nyiam tej yam ntawd tshaj plaws, yog li peb sawv daws yuav tsum ceev faj tiag tiag. Ib qho uas yuav pab tau yog qhov tias tus neeg raug tej yam txawv txawv yuav tsum muaj ib tug txiv plig (spiritual director) saib nraim nws coj nws qhia nws; nws tus kheej xwb yuav tsis paub txiav txim tias yog tseeb los yog cuav. Nws yuav tsum tau mloog tus txiv plig lus, ces yog mloog lub Koom Txoos lus. Txoj kev mloog lub Koom Txoos lus yog ib qhov pov thawj txog kev tseeb. Yog ib tug neeg hais tias nws pom Niam Mab Liab los HT Yes Xus, tiam sis nws tsis muaj ib tug txiv plig ua tus pab tus coj nws li mas peb yuav tsum tau ceev faj zoo tiag tiag.

**Yaj Suav Nus** 16th January 2012, 6:10 am

Yaj Suav Nus

Yaj Suav Nus: Phooj Ywg; Messages : 268
Date d'inscription : 2009-10-23

Post n°3

Re: Yuav tsum ceev faj thiaj tsis raug dab phem looj

Post Yaj Suav Nus 16th January 2012, 6:10 am

Nyob zoo Mim,
Kuv ua koj tsaug rau zaj koj muaj rau peb sawv daws nyeem no yog ib zaj zoo heev, nws zoo pab peb ua neeg xyuam xim ceev faj mus li. Peb yuav nco ntsoov tias nyob ib ncig ntawm peb yeej muaj ntau zaus uas dab phem siv peb tus neeg los ua tej yam kom peb tsis nco ceev faj ces peb yuam kev, txog thaum peb rov paub ces peb twb yuam kev mus deb dhau lawm peb yuav rov kho yeej tau tab sis nyuaj kawg nkaus rau peb.

Y. Suav Nus

**Bao X Mary** 16th January 2012, 7:17 am

Bao X Mary

Bao X Mary: Phooj Ywg; Messages : 168
Date d'inscription : 2011-07-09

Post n°4

Re: Yuav tsum ceev faj thiaj tsis raug dab phem looj

Post Bao X Mary 16th January 2012, 7:17 am

Wow!

Mim cas yuav muaj tej yam txawv ua luaj os.

**Maiv Tooj** 16th January 2012, 9:37 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°5

Re: Yuav tsum ceev faj thiaj tsis raug dab phem looj

Post Maiv Tooj 16th January 2012, 9:37 am

Nyob zoo Mim thiab cov phooj ywg,

Mim, ua tsaug ntau rau nws lub sij hawm txhais zaj kwv huam no. Yog ib qho qauv zoo rau peb yuav tsum ceev faj txog cov Saub Hmoob niaj hnub no. Niaj hnub no mas muaj coob leej heev uas yeej niaj hnub tau Ntuj Lus, cuag pem ntuj pem teb tib si.

Xav kom sawv daws yuav tsum ceev faj tus kheej me ntsis, muaj mob nkeeg, kev txom nyem lwj siab los yuav tsum tswj yus tus kheej, nrhiav teeb txheem los daws tej teeb meem xwb tsis txhob mus cuag cuag cov saub tshiab uas ua hwj huaj los daws tej teeb meem. Txawm ntseeg cov saub tshiab no los yeej tsis pom ib tug twg yuav zoo tshaj npaum li cas, tsuas yog haj yam nyob li ib cov neeg puas paj hlwb, nyob tej tug tem toob, yoob qauj les cia, tseem them nyiaj txog ntau caum txhiab Dos Las los yog ntau txhiab ntau puas Euros thiab. Tsis tag li ntawd lawv tseem muab yus tus ntsuj plig mus paub hwj huam ntawm dab phem thiab mas txaus ntshai dhau lawm. affraid

**Maiv Paj Lug** 16th January 2012, 10:09 am

Maiv Paj Lug

Maiv Paj Lug: Tswv Cuab Hmong Catholique; Messages : 1234
Date d'inscription : 2009-08-17

Post n°6

Re: Yuav tsum ceev faj thiaj tsis raug dab phem looj

Post Maiv Paj Lug 16th January 2012, 10:09 am

Wow....Mim aw!

Peb txhua tus yuav tau thov ntuj pab peb tus kheej tiag nawb, tsis hais tus phauj ntawv xwb, tab peb txhua tus kiag, tej lub sij hawm peb twb raug ntxias ua tej yam phem tiam sis tseem qhuas tias yog qhov zoo thiab qhov tseeb.

Kuv pom tau hais tias nim no peb Hmoob muaj coob leej ntau tus yeej zoo kiag li tus leej phauj koj piav saum no. Ib txhia Hmoob ces tsis mus teev ntuj thiab tsis mus daws txhaum li vim lawv hais tias Yesxus los xyuas lawv tas li, thiab Niam Mab Liab nim tshwm sim tas li rau lawv pom, los sis Leej Ntuj Plig Ntshiab nim xa xov ub xa xov no rau lawv.

Zaj koj piav saum no yog ib zaj zoo heev yuav tau muab nthuav rau peb tsoom Hmoob mloog kom to taub zoo tias ib txhia uas txawj saub thiab txawj pom Huab Tais Yesxus uas twb tsis kam mus tshwm tim tsev teev ntuj li kom ceev faj tsam raug dab phem li tus phauj saum no.

Kuv xav hais tias tus phauj saum no nws raug dab phem nws tseem yog tus txom nyeem tshaj sawv daws vim nws niaj hmo nrog dab phem ua neej. Rhiab neeg dhau lawm lau...

Txaus nsthai dhau lawm os affraid

**Tub Kawm** 17th January 2012, 1:45 am

Tub Kawm

Tub Kawm: Phooj Ywg; Messages : 375
Date d'inscription : 2011-10-13

Post n°7

Re: Yuav tsum ceev faj thiaj tsis raug dab phem looj

Post Tub Kawm 17th January 2012, 1:45 am

Nyob zoo sawv daws, vam thiab cia siab tias yog leej twg tau sab zaj lus no tas mas leej twg yuav txawj ua neeg xyuam xim tshaj qhov qub lawm. Vim tias dab phem mas yeej ua tau ntau yam hwj huam zoo xws li HT Yes xus thiab. Tiam sis qhov kawg mas dab phem tsim txom peb xwb. Ib phooj ywg zaj lus no nws tsi yog meeg lam sau xwb, yog tiag tiag muaj tseeb tiag tiag. Thov kom peb nco ntsoov HT Tswv Ntuj nyob tsam peb ho yuam kev xws li tus magdalena no.

**Maivxis** 17th January 2012, 2:42 am

Maivxis

Maivxis: Phooj Ywg; Messages : 191
Date d'inscription : 2009-11-05

Post n°8

Re: Yuav tsum ceev faj thiaj tsis raug dab phem looj

Post Maivxis 17th January 2012, 2:42 am

Txawj Tuam wrote:Nyob zoo sawv daws, vam thiab cia siab tias yog leej twg tau sab zaj lus no tas mas leej twg yuav txawj ua neeg xyuam xim tshaj qhov qub lawm. Vim tias dab phem mas yeej ua tau ntau yam hwj huam zoo xws li HT Yes xus thiab. Tiam sis qhov kawg mas dab phem tsim txom peb xwb. Ib phooj ywg zaj lus no nws tsi yog meeg lam sau xwb, yog tiag tiag muaj tseeb tiag tiag. Thov kom peb nco ntsoov HT Tswv Ntuj nyob tsam peb ho yuam kev xws li tus magdalena no.

Nyob zoo os tij laug " Txawj Tuam .

Zoo siab ua tau ntsib koj hnub no os lod , Ua tsaug nawb uas koj tuaj qhia rau peb sawv daws li ntawd os
cia kuv muaj caij tso kuv li mam mus nyeem kom zoo zoo os , Vim koj hais tau zoo heev li na

Maivxis .

**Maiv Tooj** 17th January 2012, 3:40 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°9

Re: Yuav tsum ceev faj thiaj tsis raug dab phem looj

Post Maiv Tooj 17th January 2012, 3:40 am

Nyob zoo sawv daws,

Zaj kwv huam no mas thaum nyeem tsis ntshai pes tsawg, tab sis cia ob peb hnub mas yim xav yim txaus ntshai li lawm. Niaj hnub no mas yeej muaj coob leej uas niaj hnub pom HT.Yes Xus thiab Niam Mab Liab, niaj hnub nrog cov Tshiab ua hauj lwm ua ke, tab sis tsis mus teev Ntuj, txais lub Cim Yug li. Zoo nkaus li zaj no ntag. Yam li Leej Phauj Madelena hais tias nws tsis mus txais lub Cim Yug, vim HT.Yes Xus twb muab kiag rau nws lawm. Yam li pom Huab Tais Yes Xus ci ci thiab zoo nraug tshaj li. Tej zaud kuj muaj tseeb tiag, tej zaud kuj yog muaj tus cuav rau lawv pom. Qhov yuav pab tau yus qhov tseeb thiab cua, tsuas muaj tib txoj hauv kev xwb, yuav rau siab mus teev Ntuj hauv tsev teev Ntuj, mus koom lub Txoos, Mis Xas, mus txais lub Cim Yug, mus Daws Txhaum, yog yus ua tag tej no, tseem pom thiab hnov cov suab hais lus, tej lus thoob tsib uas kom yus tshaj rau tsoom sid mas mam li xav tswv yim me ntsis seb yog tseeb los cuav.

Txaus ntshai heev, cas tseem yug tau ib tug me nyuam rau dab phem thiab. Ntuj e...! Rhiab neeg dhau lawm os...! affraid

Last edited by Maiv Tooj on 17th January 2012, 7:40 am; edited 1 time in total

**Maiv Paj Lug** 17th January 2012, 4:22 am

Maiv Paj Lug

Maiv Paj Lug: Tswv Cuab Hmong Catholique; Messages : 1234
Date d'inscription : 2009-08-17

Post n°10

Re: Yuav tsum ceev faj thiaj tsis raug dab phem looj

Post Maiv Paj Lug 17th January 2012, 4:22 am

Maiv Tooj wrote:

Nyob zoo sawv daws,

Zaj kwv huam no mas thaum nyeem tsis ntshai pes tsawg, tab sis cia ob peb hnub mas yim xav yim txaus ntshai li lawm. Niaj hnub no mas yeej muaj coob leej uas niaj hnub pom HT.Yes Xus thiab Niam Mab Liab, niaj hnub nrog cov Tshiab ua hauj lwm ua ke, tab sis tsis mus teev Ntuj txais lub Cim Yug li. Zoo nkaus li zaj no ntag. Yam li Leej Ntshiab Madelena hais tias nws tsis mus txais lub Cim Yug, vim HT.Yes Xus twb muab kiag rau nws lawm. Yam li pom Huab Tais Yes Xus ci ci thiab zoo nraug tshaj li. Tej zaud kuj muaj tseeb tiag, tej zaud kuj yog muaj tus cuav rau lawv pom. Qhov yuav pab tau yus qhov tseeb thiab cua, tsuas muaj tib txoj hauv kev xwb, yuav rau siab mus teev Ntuj hauv tsev teev Ntuj, mus koom lub Txoos, Mis Xas, mus txais lub Cim Yug, mus Daws Txhaum, yog yus ua tag tej no, tseem pom thiab hnov cov suab hais lus, tej lus thoob tsib uas kom yus tshaj rau tsoom sid mas mam li xav tswv yim me ntsis seb yog tseeb los cuav.

Txais ntshai heev, cas tseem yug tau ib tug me nyuam rau dab phem thiab. Ntuj e...! Rhiab neeg dhau lawm os...!

Hahaha.....Maiv Tooj, hnub no koj nyuam qhuav nyeem xwb los cas koj mam pib xav naj, nag hmo niam laus mim tuaj sau kiag xwb kuv twb muab nyeem tag lawm, rhiab los rhiab, nsthai los nsthai, kuv zoo li koj hais tiag, ib hnub xav zuj zus txog leej phauj Magdelena no txoj keeb kwm mas haj yam txaus ntshai,muab xav rau yus lub neej tej tsam yus tsis raug ntxias los tej tsam yus twb raug dab phem ntxias li leej phauj magdelena lawm thiab, tsis yog tus phauj ntawv thiaj li raug ntxias xwb, yog peb tsis ceev faj ces peb twb raug ntxias tsam puav lawm pale

Zaj no mas yog thawj zaj ua rau kuv rhiab tshaj plaws , tseem muaj me nyuam dab balban uas yug tau ib niag kab ntsig affraid

, cas tus phauj ntawv yuav raug tsim txom sab tag npaum li, kuv xav tias tam sim no tus phauj no tau nyob pem ntuj lawm, peb yuav tau thov txog tus leej phauj no kom pab peb thov ntuj rau peb hauv txoj kev txhob ntshaw mus ntxias tib neeg los ntseeg yus dua qhov kom nws mus teev ntuj.

Hmoob muaj coob leej cov uas txawj txawj saub thiab txawj txawj pom Huab Tais Ntuj rau ub rau no, los ntxias neeg coob leej ntau tus. Qhov tseeb tiag yog tuaj kub dag li dag tus leej phauj Magdelena no xwb ntsh

.

**Mim** 17th January 2012, 6:59 am

Mim

Mim: Tswv Cuab Hmong Catholique; Messages : 3770
Date d'inscription : 2009-10-16

Post n°11

Re: Yuav tsum ceev faj thiaj tsis raug dab phem looj

Post Mim 17th January 2012, 6:59 am

Nyob zoo tais Tooj, Maiv Paj Lug, thiab nej txhua tus uas tuaj nyeem ntawv hauv no,

Kuv thov txim nawb yog tias kuv zaj kwm huam no tau ua rau nej ntshai. Yog muab xav ces yeej txaus ntshai thiab rhiab neeg kawg nkaus li. Qhov kuv txiav txim muab tuaj tso rau hauv no tsis yog xav hem sawv daws, tiam sis yog xav kom peb yuav tau ceev faj zoo xwb, thiab kom peb paub txog tias muaj dab phem tiag tiag, thiab dab phem tuaj nkag tau rau tej tus neeg uas txaus siab nrog dab phem ua hauj lwm thiab tsis ceev faj nws tus kheej.

Tais Tooj, ib tug neeg uas nws hais tias nws pom Niam Mab Liab los yog pom HT Yes Xus mas txawm nws niaj hnub mus daws txhaum txais Yes Xus lub Cev los peb kuj yuav paub tsis tau tseeb tias yog tuaj ntawm Ntuj tuaj los yog tuaj lwm qhov tuaj li thiab. Nyob nram kawg hauv zaj kwv huam ntawd, kuv tau hais ob peb lo lus tias tus neeg ntawd yuav tsum muaj ib tug txiv plig spiritual director pab nws xav tswv yim, coj nws kev, qhia nws ua tas puas tsav yam kom haum lub Koom Txoos kev ntseeg thiab txoj cai. Thaum kawg muaj qee tus twb tseem raug txiav txim tias tsis muaj tseeb. Yog li ntawd kuv tsuas yog xav ntxiv qhov tias, ib tug neeg ntseeg thas mas das nws yeej yuav tsum mus teev ntuj, daws txhaum txais Yes Xus lub Cev nraim. Ib tug neeg uas pom tej yam txawv txawv, txawm nws twb coj zoo kawg lawm los tseem zoo tsis tau txaus thiab, nws tseem yuav tsum nyob rawv hauv txoj kev mloog lub Koom Txoos lus thiab.

**Maiv Tooj** 18th January 2012, 5:42 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°12

Re: Yuav tsum ceev faj thiaj tsis raug dab phem looj

Post Maiv Tooj 18th January 2012, 5:42 am

Nyob zoo Mim,

Thov txim os mog, tssi yog nws tso zaj no ua rau peb ntshai, tab sis yog peb ntshai dab phem kev cuav, ntxias neeg xwb. Kuv nyiam nws sau tej zaj tseem ceeb li no kawg li. Tsawg leej thiaj li ua tau tej yam zoo li nws ua nov, kuv zoo siab rau nws lub laj lim tswv yim. Cia ntev me ntsis, yog Maiv paj Lug khoom no tseem xav kom nws xaiv peb cov zaj hauv nov ib txhia coj mus hais ua video kom tau mloog yooj yim thiab ho ua tau ob peb yam ua ke. Yus tsis tshua khoom ces yog nyeem ntawd lawm ces ua tsis tau dab tsi ntxiv li, yog mloog xwb ces yus ua yus hauj lwm los mloog tau.

**Maiv Paj Lug** 18th January 2012, 9:07 am

Maiv Paj Lug

Maiv Paj Lug: Tswv Cuab Hmong Catholique; Messages : 1234
Date d'inscription : 2009-08-17

Post n°13

Re: Yuav tsum ceev faj thiaj tsis raug dab phem looj

Post Maiv Paj Lug 18th January 2012, 9:07 am

Nyob zoo hnub no rau nej txhua tus,

Mim, koj txhob poob siab tias tsam koj sau ua rau peb nsthai, qhov peb nsthai yog nsthai tsam tsis ceev faj es raug dab phem ntxias li tus phauj xwb, zaj kwv huam saum no nws zoo tshaj yuav cuab peb zog, qhib peb qhov muag kom peb deb xwb os nawd.

Kuv tseem xav kom koj tshawb tau tej zaj zoo zoo li no tuaj txhais tso ntxiv, Maiv Tooj hais yog lawm, cia kuv tsim kuv cov nkauj tas tso kuv yuav xaiv ib txhia nej sau hauv no los hais ua video rau cov laus tsis paub nyem ntawv Hmoob tau mloog.

Ua tsaug ntxiv nawb Mim, peb tsis nsthai yog peb muaj Tswv Ntuj nrog peb nyob...