Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

Suav neeg tuaj saib, txij hnub 17/09/2010 los mus.


    XH. Yaj Zoov Ntxheb lub Tsev THOOB TSIB

    Share
    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 15th June 2017, 8:40 am



    Zaj 280- MUAJ NTAU YAM KEV NTSEEG.

    Nyob ntiaj teb no muaj ntau yam kev ntseeg, nws tsis sib xws. Nws tsuas yog zoo li ib txoj kev ntseeg nyob nruab siab ntawd, thiab lub npe ntseeg sib xws xwb.
    Yog xyuas kom meej tseeb los mas lub npe Huab Tais,thiab lub npe Tim Tswv mas tsis yog zoo ib yam! Muab peb txheej lus no los hais kom meej:
    A. Ntseeg li Haiv Hmoob ntseeg, mas yog ntseeg txog ib tug los ib co Tim Tswv. Zoo li yog ntseeg txog ib tug tib neeg muaj zog,thiab muaj hwj chim nyob qis dua tus uas yog Tswv Ntuj tiag.
    Zoo li hais tias, ntseeg txog Yaj Saub Siv Yis thiab nws cov txuj ci. Pab neeg ntseeg li no,lawv tuav txog Tim Tswv thiab niam txiv poj yawm lawv cov npe mas kuj pab tau lawv.
    Vim tus Tim Tswv uas lawv ntseeg ntawd, yog Huab Tais Ntuj ib tug me nyuam xws li zeej tsoom sawv daws. Yam uas nws muaj peev xwm, los muaj hwj huaj, pab cov neeg ntseeg tseem muaj txoj sia nyob ntawd.
    Vim tus Tim Tswv ntawd, yog ib tug neeg dawb huv, uas Tswv Ntuj tau txib nws ua Ntuj ib txoj hauj lwm ua ntej, los pab neeg dua ib zaug los lawm.
    Cov neeg ntseeg thiab teev hu txog, ces Tswv Ntuj cia li pab kiag rau cov neeg ntseeg li ntawd. Vim nws yog ib tug neeg nplua nuj nyob hauv cov npe hu ua neeg dawb huv, thiab yog Ntuj me nyuam.
    B. Cov ntseeg raws li Phab Phu Thas Caub, lawv ntseeg raws li hwm ib tug neeg loj tau ua Tim Tswv ib zaug los lawm thiab zoo li hwm ib tug tsiaj muaj zog. Nws muaj peev xwm,thiab txawj ua hwj huam yees ntxwv nrog yees siv,los tiv thaiv xwv txheej,tuaj ntawm ib lub zog yuav tuaj ua xwv txheej rau neeg lub cev.
    Xws li lawv hwm cov Zaj loj loj thiab cov nab loj nyob hauv lub hiav txwv, los nyob hauv cov qhov dej tob tob,uas neeg pom tsis tau, cia li ntseeg tias lawv muaj hwj huam los muaj zog.
    Thiab muaj peev xwm tuaj pab tau cov tib neeg muaj kev txom nyem, raws li lawv ntseeg thiab thov los pab neeg. Tej tsiaj uas yog Nab thiab Zaj no, kuj yog Ntuj tsim lawv los ua ib hom tsiaj muaj hwj chim,thiab txaus ntshai.
    Leej Tib Neeg txawm xav tias cov tsiaj no muaj zog muaj hwj chim loj, los yeej yog Tswv Ntuj tsim los kom muaj li ntawd.
    Tab yog neeg txawm hu txog tej tsiaj li ntawd, los Tswv Ntuj kuj hnov. Ntuj cia li pab hlub thiab pov hwm rau cov neeg ntseeg li ntawd.
    Vim cov ntseeg li ntawd,lawv kuj yog Tswv Ntuj me nyuam thiab yog neeg dawb huv, tsis ua kev txhaum kev qias rau leej twg. Lawv tsis paub Tswv Ntuj zoo, los lawv ua lub neej zoo li cov neeg ntshiab huv, coj tau Tswv Ntuj 10 lo lus qhia ib feem nyob hauv lawv lub neej.
    Lawv cov zaj teev Phab Phu Thas Caub, nws kuj nce mus txog Tus Tswv Ntuj tsim ntuj tsim teb xws li lawv yog Tswv Ntuj me nyuam nyob ua ke li lwm pab neeg.
    C. Cov ntseeg Tus Tswv Ntuj, uas yog tus tsim lub ntuj lub teb, thiab tsim tas txhua yam kom muaj los nyob. Yam pom taus thiab pom tsis tau huv tib si.
    Raws li phau ntawv Ntshiab, hais Tswv Ntuj cov lus hais tias, ntawv cog lus qub thiab cog lus tshiab. Muaj peb hom zoo li no thiab:
    A. Cov hu ua Ka Tau Liv, lawv ntseeg Txog Tswv Ntuj los Huab Tais Ntuj. Muaj Yes Xus thiab Leej Ntuj Plig nyob hauv sib koom ua ke loj sib luag. Thaum lawv yuav teev Ntuj, lawv ua ntoo cuam lub cim li + no.
    Thiab lawv hwm Niam Mab Liab yog Tswv Ntuj Leej Niam,tus nyob ze Tswv Ntuj thiab pab cov neeg muaj txhaum cev lus rau Yes Xus Pleev { Jesuchristo} los cev rau Tswv Ntuj.
    Thiab hwm tsoom Leej Ntshiab, xws li Ntuj cov Tshiab los cov neeg siab ntshiab, li Ntuj tus tshiab Miv Kas, Nkas Nplias,Las Fais thiab Leej Ntshiab Pob Zeb, Paj Lug, Zam lawv Thc...
    Cov Ka Tau Liv lawv muaj cov kab kev teev Ntuj raws li Yes Xus Pleev thiab Leej Tswv Yim Ntshiab qhia ua, los raws li Yes Xus txoj kev txi Ntuj nyob saum Nws tus ntoo cuam.
    Uas Nws txia ua tus Yaj Ntshiab huv los txi Ntuj thiab ua thaj cav txiaj ntsim. Kom tau nrog Tswv Ntuj sib haum xeeb ua kev koom ua ib cuab ib yig nyob rau Ntuj Ceeb Tsheej.
    Pab Ka Tau Liv no, lawv qhov chaw muaj zog, yog kev sib zam txhaum. Thov Ntuj hlub cov neeg poob hauv kev ua txhaum Ntuj thiab neeg.
    Kom cov neeg pw hauv kev ua txhaum hloov siab tig los yuav lub siab tshiab,rau Tswv Ntuj ua tus hlub lawv dua ib zaug ntxiv. Kom rov tau ua ib lub neej nyob kaj siab lug rau Txoj kev hlub los ntawm Yes Xus los rau leej tib neeg.
    B. Cov Christianes, muaj ntau lub npe los ntau pab paug. Lawv coj tus yam ntxwv xws li cov Ka Tau Liv thiab, Lawv hu lawv ua cov Ntseeg Vaj Tswv.
    Cov ntseeg Vaj Tswv lawv kuj coj sib txawv me ntsis thiab, yam li:
    B-1. Feem coob lawv ntseeg Vaj Tswv,lawv coj thiab ua raws nraim li Vaj Tswv txoj lus. Pab paug ntseeg lawv kub siab nyob ze Vaj Tswv txoj lus, ua zoo rau Vaj Tswv tsoom tub ki txheeb ze txhua leej txhua tus.
    Lawv kuj ua ib tug qauv zoo rau ntiaj teb me nyuam neeg sawv daws pom. Lawv muaj kev sib hlub ua pov thawj zoo nkauj zoo saib nyob ntawm txhua npoj neeg xub ntiag.
    B-2.Muaj qee pab mas lawv yuav lub npe ntseeg txog Vaj Tswv txoj lus. Tab sis lawv ntseeg lawv tus Xib Hwb xwb ntau dua ntseeg Vaj Tswv!
    Yog Xib Hwb hais li cas mas lawv coj thiab ua li Xib Hwb hais. Xib Hwb muaj cai txais yuav los muaj cai ntiab tawm mus rau tus tsis mloog lus, uas hla txoj cai tswj kav ntawm pab paug neeg ntseeg.
    Tej pab zoo li hais no mas lawv ntseeg tias, Vaj Tswg Nws tsis nyob saum ntuj thiab nyob tas qhov txhia chw. Vaj Tswv kawg nyob hauv lub tuam tsev teev ntuj xwb.
    Twb muaj ib tug neeg hais rau kuv ib zaug tias, nws caij dav hlau ya mus nto plaws saum txheej ntuj uas yog ntuj ntsuab, nws tsis pom Vaj Tswv nyob saud li.
    Nyob hauv peb txheej kev ntseeg no,kuj yog Tswv Ntuj los sis Vaj Tswv ua tus pov hwm tas txhua pab tib si. Vim tias Leej tib neeg cov tswv yim yog ib co tswv yim me me paub tsis txog txhua yam uas Leej Nplij neeg coj qhia.
    Los Tswv Ntuj ua ib zaug pov hwm tas nrho sawv daws ua ke. Tswv Ntuj tsuas saib tias, neeg yog Tswv Ntuj li me nyuam ua ke tas txhua tus.
    Nyob hauv pab twg los yeej muaj tej tus neeg siab ncaj,mas Tswv Ntuj tsis xav muab leej twg tso pov tseg uas tsis saib txog lawv.
    Vim sawv daws puav leej yog Ntuj cov me nyuam ib yam, ua li mas peb tsis txhob xav tias Tswv Ntuj tsis nyiam lwm pab neeg. Sawv daws koom ua ke nyob hauv Tswv Ntuj tib tug lub hwj chim ua ke xwb.
    Ntawm leej tib neeg, mas peb yuav sib nyiam thiab sib hwm, tas txhua leej txhua tus, yuav saib tias Tswv Ntuj yog sawv daws Leej Txiv uas nws hlub tas txhua leej txhua tus tib si.
    Tswv Ntuj tsuas saib tias sawv daws yog Ntuj me nyuam, qhov tias yuav ua zoo thiab ua phem yog neeg nws xaiv nws, los ntawm nws tus kheej xwb. Leej twg yog neeg paub tab lawm, mas tsis tsim nyog yuav los sib thuam tias nej tsis yog Ntuj li me nyuam.
    Tas sawv daws puav leej yog ib pab txheeb ze nyob hauv Tswv Ntuj lub npe sib xws ua ke. Muaj ib yam uas peb sawv daws yuav tsum tau ua:
    Ib leeg yuav hwm thiab sib pov hwm ib leeg,qhov tseeb mas nej sawv daws yuav pov hwm,nej cov Xib Hwb ua ntej tshaj plaws. Vim tias cov ua Xiv Hwb mas Dab Phem nyiam raws lawv qab ntxias kom lawv yuam kev.
    Yog nej qhuas nej tus Xib hwb ntau dhau lawm, dab yuav ntxias tau nws yooj yim sai kawg. Xib Hwb yuav tab meeg kov kev ua txhaum ntau yam uas Tswv Ntuj tsis nyiam.
    Thiab yog nej thuam nej tus Xib Hwb ntau dhau lawm, mas Xib Hwb tu siab tias, ua cas Nws ua Tswv Ntuj txoj hauj lwm. Tswv Ntuj tseem cia neeg thuam nws tas npaum no, nws qaug zog tsis xav ua Tswv Ntuj hauj lwm.
    Ces dab kuj ntxias tau Xib Hwb kom tso Tswv Ntuj pov tseg, mus taug lwm txoj kev ywj siab mus lawm thiab. Thov kom sawv daws nco txog lo lus kawg hais no kom meej nyob rau nruab siab.
    Kom sawv daws tau sib haum xeeb nyob ua Tswv Ntuj me nyuam nyob ua ke rau Ntuj Ceej tsheej. Ua li.
    Zaj lus no kuv tsuas yog muab ua ib tug piv txwv rau sawv daws tau kawm, kom paub tig los npuab Tswv Ntuj xwb. Tsis muaj ib lo lus hais tias, yuav thuam leej twg rau Tswv Ntuj hnov li.


    Tim 15/2/2017.
    Sau npe,Yaj Zoov Ntxheb X.H



    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 23rd June 2017, 7:58 am


    Zaj 282- KWV TXHIAJ NOJ TSIAB

    Yaj Zoov Ntxheb.


    1. Niaj Yaid...Kwv tij Hmoob los mus neej tsa,xyoo no, yuav zoo niaj los mus zoo xyoo. Cia tus Hmoob txwj los Hmoob laug yuav tsa ncauj tsa suab nqee lawm tej sil lis nqiab.
    Muab peb Hmoob kev txawj xeeb kev lwj lam,ntxhov siab ntuas tib tuj taws,rau lub xyoo laus rag lawm tej sis niab. Lub xyoo laus los txog lawm tej si ntua,txoj kev uas koj hais los kuv tsis mloog, kuv hais los koj tsis yuav.
    Kom lub xyoo laus coj mus rau ntuj kawg nkaus, teb kawg ntua. Coj mus poob rau ntuj to qhov los teb to ntshua. mus poob rau ncauj zag tsov lo xyuas. kom lub ntsej tsis tau hnov lub muag nyob los tsis tau pom.
    Kom lub xyoo tshiab tig los txog, cov me kwv tij Hmoob leej hlob nrog leej yau. Kom nyob txhij mus nyob txhua. Kom tej laus ces nyob txawj plhis rov txawj hluas. Tau nyob tus plaj plhu tshiab khiv, zoo puav tim tam li lub paj teeb paj vuam ci tuaj sib ncav cuag.

    = Niaj yaid... Xyoo no yuav zoo niaj mus zoo xyoo,tus Hmoob txwj hmoob laug yuav tsa ncauj tsa suab. Muab Hmoob kev lwj lam mus ntxhov plawv yws tuj taws,rau lub xyoo laus coj lawm tej tshwb tshaws. Lub xyoo laus los txog lawm tej sis ntua.
    Muab tus kev ploj, kev sib ntaus sib tshoj, kuv hais koj tsis mloog, koj hais kuv tsis hnov. Kom nrog lub xyoo laus coj mus rau ntuj to ntshua teb to qhov, mus rau lawm ncauj zog tsov lo, kom ploj qab tuaj mus ntsiag moo to.
    Lub xyoo tshiab no tawm lis plaws los, Kom peb kwv tij hmoob tsuas muaj kev noj qab tuaj pw sov. Tus muaj mob muaj nkeeg los kom txawj sawv lawm tej sib hlo.
    Tej laus los kom txawj plhis rov txawj mos,los nyob tus plaj plhu tshiab li khiv, puav tim tam li lub paj teeb paj vuam nyob ci ntsa li iab los.

    2. Niaj yaid...Kwv tij Hmoob, tawm lis plaws lub xyoo tshiab tuaj hnub xiab ib, yuav kaj ntug tej sib zus, ces tus tshav tuaj ces tshav ziab. Yuab ci ntuas rau tus hauv toj mus hauv hav.
    Ces yuav zoo peb kwv tij Hmoob siab tsis txawj tag,ua rau tas txhua npoj,los txhua pab cov tub ntxhais hluas Hmoob, yuav ntim tau cev txiaj saub zam lis yeev cev nqaj tub tus zoo nraug, los cev nkauj xwb tus zoo nkauj, tuaj nrog lub teb lub chaw khav.
    Muaj lawm cov hluas ntxhais seev lim yees tias,tej niam tej txi lub paj tsiab peb caug tsam loj lees los lawm tuj tiag. Xyoo no yuav coj cev nkauj xwb tus zoo nkauj, mus nrhiav saib puas yuav tau tuaj tus zoo vauv.
    Cov nraug hluas tub los niaj seev yaj yaum lis yeev tias, xyoo no tej niam tej txi lub paj tsiab peb caug tsam loj lees los lawm tuj tiag, Yuav coj cev nqaj tub tus zoo nraug, mus nrhia saib puas tau tuaj tus zoo nyab.

    = Niaj yaid...Kwv tij Hmoob tawm lis plaws lub xyoo tshiab tuaj hnub xiab yig. Yuav kaj ntug tej sib zus, cia tus tshav tuaj tshav yuav ci. Ci lis ntua tuaj rau lub hauv hav los hauv toj.
    Lub paj tsiab peb caug los lawm tuj tiag, ces yuav zoo zoo kwv tij mus neej tsa siab. thiaj li tuaj lawm txhua pab rov lawm txhua npoj. Ces cov Nkauj hluas ntxhais tub, yuav ntim tau cev txiaj saub zam lis yeev.
    Coj lub cev nqaj tub tus zoo nraug thiab lub cev nkauj xwb tus zoo nkauj. tuaj nrog lub teb mus lub chaw hoj. Cov me nkauj hluas ntxhais, yuav seev lis yees tias:
    Xyoo no lub paj tsiab peb caug los lawm tuj tiag, yuav coj lub cev nkauj xwb tus zoo nkauj mus nrhiav saib puas tau tuaj tus zoo txiv.
    Cov hluas tub kuj seev yaj yaum lis yeev tias, Leej niam leej txib lub paj tsiab peb caug los lawm tuj tiag. Yuav coj lub cev nqaj tub tus zoo nraug mus nrhiav saib puas tau nrog luag tau tus zoo poj tiag.

    3. Niaj yaid... kwv tij Hmoob, Lub xyoo tshiab los lawm tuj tiag, Ntuj Niam Ntuj Txi yuav foom lis zoj los tias:
    Cia nej muab lub paj tsiab peb caug mus noj tag, muab qab tsiab tuaj mus dhia dua. Tej Niam tej Txi, kom muaj zog ntxuaj ntxog.
    Rau txoj kev mus khwv noj khwv hnav, mus khwv nyiaj los kom tau nyiaj los rau ntawm npab. Cov me Nkauj hluas Tub Ntxhais,lub xyoo tshiab tawm li plaws tuaj ces nej rau siab ntsuj ntso mus nrog luag kawm ntaub coj kawm ntawv.
    Kawm tus txuj tus ci,kom muaj zoo laj lim plab plaw dav. Kom yav tom ntej ces nej muaj zoo liaj ia teb chaw tuaj nrog luag kav. ces mus qaws zog peb caj Hmoob nyob thoob qab ntuj los ua ib pab. Los nyob haum vam ntaws los xws li xub ntab.

    = Niaj yaid... Kwv tij hmoob, lub xyoo tshiab los lawm tuj tiag. Cia Ntuj Niam Ntuj Txi yuav foom li ntsees los rau nej tias:
    Nej muab cim paj tsiab peb caug los noj tag, muab qab tsiab los dhia dua. Kom tej Niam tej Txi muaj zog ho nyob ntxuaj ntxog.
    Rau txoj kev mus khwv nyiaj mus khwv kub yuav,kom tau nyiaj tau kub los nrog luag coj. Cov me Nkauj hluas ntxhais Tub, nej rau siab ntsuj ntso mus kawm ntaub coj kawm ntawv tob.
    Mus kawm txuj kawm ci, kom muaj zoo laj lim plab plaw tswv yim loj. Kom lub neej tom ntej nej sawv tsees los nrog luag ua nom ua tswv loj. yuav mus sau peb Hmoob los nyob ua npoj.
    Kom Yim meem teb chaws Mab Sua saib taus Hmoob luaj lub hauv toj.
    Zoo lub laj xeeb Khuam lis nkaus rau lub ntuj, ces noj cim paj tsiab peb caug no tag, kom peb hmoob tej txij tej nkawm, nrog tej laus tej hluas tig ntsej tig muag los sib hlub.

    Sacramento tim 27/2016.
    Yaj Zoov Ntxheb Xib Hwb.



    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 6th July 2017, 9:38 am



    Zaj 283- ZAJ LUS NTUAS COV UA TXIJ NKAWM.



    Hais rau neb paub, kev sib yuav ua txij ua nkawm. Tsis yog neb mus sib yuav ntawm tej Nom tej Tswv los! Neb tau sib yuav ua txij ua nkawm los ntawm niam txiv neej tsa los.
    Hnub twg yog neb muaj kev tsis sib haum xeeb ua ke, tau ua tej yam yuam kev, ib leeg tsis to taub txog ib leeg. Neb yuav xub hais rau niam txiv neej tsa kho ua ntej tso.
    Niam txiv lawv yog tau yug neb los, neb thiaj tau ua lawv tub lawv nyab, los yog lawv ntxhais lawv vauv mog. Neb txhob ncaj qha mus siv Nom Tswv tus cai, muab nyiaj mus ua plaub ntug.
    Tej Nom Tswv, muaj cov pob ntseg tsis to qhov zoo. Lawv tsom saib qhov twg nyiaj yuav poob saum ntuj los rau lawv tes.
    Lawv pom tau tias, poj niam lub zog muag, meej mom zoo nkauj los phim cev zam zoo. Ces lawv nrog txheem plaub ntug.
    Neb nco ntsoov txhob ua kev txhaum los tub qaug rau Ntuj. Vim kev los nyob ua txij nkawm,yog kev nrog Ntuj tsim Noob Neej nyob rau ntiaj teb no.
    Txhob coj kev txhaum los paug siab, phem cia luag vaj tsab xeem lis phem. Vim luag siab tsis lim laj los nthuav ntxeev luag thiaj phem mog.
    Peb nyob teb chaws vam meej lawm, txoj kev sib hlub kuj yuav vam meej mus nrog! Yuav muaj kev sib hlub, sib zam sib raug zoo nyob sib txig mus raws li kev Vam Meej mog.
    Nco ntsoov kev sib ntxub, sib cav sib ceg, yog Dab Toj Taug li, dab thiaj coj li ntawd. Neej li, mas yuav sib zam, mus kom dhau, ua pub rau neeg tau nyob kaj siab lug.
    Kev sib ntxub sib cav sib ceg, yog kev khaum. Koj cem koj tsawm los foom luag, ces luag tu siab luag tso tes khiav, ces koj twb raug khaum ua ntej lawm od.
    Hnub neb tau plam tus nkauj txhav qaib, nraug txhav noog no mus lawd. Niam tau lub npe ua nkauj feb, hos txiv tau lub npe ua nrug fav ces twb raug khaum lawm ntag.
    Ua neej yuav tsis tau ntuj ntoo, vim kev ua txij nkawm yog kev koom nrog Ntuj tsim noob neej kom huaj vam mus nyob thoob ntiaj teb no.
    Ntuj siab ntev kawg, Ntuj zam rau tas nrho rau txhua tus neeg tau ua kev txhaum. Ntuj tsis tau muab txim los nplua leej twg li.
    Ua li cas los Neb yuav nco ntsoov hwm lub ntuj lub teb thiab hwm tej niam tej txiv txoj hmoov thiaj zoog mus thiab tau ntuj ntoo.
    Tej niam tej txi yuav nrog Ntuj foom lus zoo los rau neb, ces neb yuav ua lub neej nyob kaj siab lug mus kav laus mog.
    Yaj Zoov Ntxheb Xib Hwb.





    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 13th July 2017, 8:27 am



    Zaj284- ZAJ LUS QHIA NEEG UA SIAB NTEV.

    Zaj lus qhia neeg ua siab ntev no, yuav zoo rau koj ib hnub tom qab. Lub caij ua ntej, mas koj yuav muaj kev tu siab ntau, thiab khib rau koj kawg nkaus li.
    Rau tej kev uas neeg saib tsis taus koj, muab koj cem los thuam koj ntawd. Kuv hais rau nej cov uas raug luag muab nej cem ua rau nej muaj kev tu siab nrho mus ntawd.
    Ua li tej laus hais, yog koj cheem tau koj lub siab nyob tiaj tus. Koj ua ib siab nyiaj kom dhau mus, ces hnub qab, koj yuav zoo cuag li ib tug tub tau muaj kev kawm txuj li ib tug Dr los.
    Hnub qab ntawd, koj cia li paub tej txuj zoo cuag li koj tau mus kawm txuj nyob hauv ib lub tsev kawm txuj los. Koj cov lus tawm los, zoo xws li ib tug neeg muaj txuj, yam tsis muaj neeg paub txog!
    Cuag li koj xeeb los ua neeg, koj yeej coj ib co txuj los puag nruab ntug los. Koj yuav ntse li ib tug neeg thoob tsib, yeej coj muaj txuj saum ntuj los.
    Koj hais lus yam twg, tsis tshua yaum kev, yog koj tseem tau kawm cov txuj li tej laus coj. Uas yog ib tug txiv muam, paub dab qhuas me ntsis thiab.
    nrog rau tej lus tshoob lus kos, los tej kab lis kev cai, ua kav xwm sawv qab nteeg. Hais txiv xaiv foom kom no ntxiv.
    Mas koj yuav zoo tsis txawv deb xws li, ib tug tub kawm tiav Dr los. Koj txoj kev kawm txuj no, Ces yog los ntawm qhov koj ua tau lub siab ntev.
    Tiv thiab ris luag tej khawv yeej khawv yws, uas luag muab koj cem ua hnub ua hmo ntawd los. Tias koj yog neeg ruam tsis paub tab, neeg tsis tsim txiaj.
    Neeg hmoov phem thiaj pluag thiab phem, ua neeg kob huam, neeg caj ces tsis zoo thiaj tsis tsheej haj. Muab koj cem thuam cuag li koj tsis yog neeg yug los, cem cuab rau dab rau tsov tseem phem dua li cem tug tsiaj.
    Hnub twg koj paub tab lawm, koj mam muab tej lus luag cem koj no los xav txog tej kev cem, xyav koj lub npe lub moo tsis zoo ntawd.
    Koj muab tej lus ntawd los tshau xyuas, Koj xaiv cov lus zoo los ua ib kab khaws cia. Muab cov lus phem tshau mus pov tseg tas, koj yuav pom thiab paub tias:
    Cov neeg cem koj, xyav koj lub moo no, Lawv yog koj cov Xib Hwb qhia txuj rau koj ntag. Nyob hauv cov Xib Hwb ntawd muaj ntau tus, kuj muaj ntau lub tswv yim zoo rau koj tau paub txog:
    1. Lawv sawv daws puav leej yog Xib Hwb qhia txuj ci tib si. tej tus yog Xib Hwb siab dub, ua neeg cuaj khaum, qia dub. Nws cem neeg vim nws xav ua neeg noj kheej, nws tsis muaj kev hlub, kev zam rau leej twg li.
    2. Tej tus yog neeg ruam tsab ntse, hnov luag cem, ces lam nrog luag cem kom muaj lus puv ncauj xwb. Nws qhuas tias pab luag cem kom luag qhuas nws, thiab nyiam nws, tus no, mas nws ruam kawg nkaus.
    Nws twb tsis paub tias luag ntxub nws cuag li, tus dev liam txwv. Luag xav siv nws los twb pab tsis tau, tsis paub dab tsi li.
    3. Muaj qee leej lawv cem koj, yog xav qhia koj. Kom koj ua neeg xyuam xim, yam zoo ua mam ua, yam tsis zoo ua txhob ua, thiaj tsis raug luag cem.
    Tsam muaj kev puas xwm ces tsis zoo, luag thiaj cem qhia koj li ntawd. Cov cem qhia li no mas muaj tswg leej kawg.
    4. Tej tus yog cov neeg siab tsis lim laj nthuav ntxeev, niag tsis txawj hlub leej twg li. Nws xwb tim lam ntxub tej neeg txom nyem. Los tej neeg tau poob tsag dua los ntawd...
    5. Lo lus kawg xav qhia rau koj tias, koj ua siab ntev, luag cem los ua khib koj lawm los cia luag ua tus yeej mus. Muaj ib hnub koj mam yeej puag tom qab, mas yog qhov zoo rau koj tiag.
    Ua siab ntev kev cem neeg, cav tsis ua kom nqaij ntuag, ntshav nrog, los lov ceg lov npab mus.
    Muaj ib hnub, koj yuav zoo siab, Koj xub ua tus swb rau luag ua ntej. Cia lawv cem lawv, vim peb ua neej nyob ib leeg muaj ib pab phooj ywg, yog lawv yeej ces lawv zoo siab lawm.
    Ces nws rov qhuas nws rau cov phooj ywg, nws tsis tau nthuav thiab qhia koj qhov phem rau leej twg. Nws pab phooj ywg tsis paub koj. Lawv hnov ib sab lus ntawm tus ntawd xwb.
    Nws cov phooj ywg mam ntsia nws mus, ua cas nws tawg paj los tsis tshiab. Txi txiv los tsis qoos, nws cov phooj ywg yuav tso nws pov tseg.
    Lawv yuav khiav los nrog koj. Ces yog hnub koj yeej nws, hnub no, nws swb mus ces, nws poob tas nws pab neeg tib si mus.
    Zaum no, koj yog tus yeej lawm. Vim koj tau muab lub caij nyoog rau nws yeej koj ua ntej. ces nws tej kev ntxub thiab cem koj ntawd.
    Nws tsis tau nthuav ntau yam qhia rau, nws npoj phooj ywg. Luag tsis paub tias, koj yog neeg phem, ces luag tsis nrhiav paub.
    Yog koj ua tus yeej nws ua ntej ntawd, ces Kuj zoo li koj yog tus swb, vim tsis muaj neeg caum koj. Nws khib heev ces nws muab koj lub npe mus xyav rau nws npoj phooj ywg txhua tus, tas lawm Lawv tsis paub koj, lawv cia li lam ntseeg mus.
    Kwv tij phooj ywg, zaj lus no yog ib zaj lus zoo kawg. Tab sis, peb leej tib neeg mas yoog tau nyuaj heev, vim leej tib neeg cov siab luv luv, yog feem coob.
    Ntshai cov yuav kawm li hais no, mas yuav nyuaj heev rau lawv. Vim tej neeg yuav paub sab hais no, yuav yog feem tsawg tsawg xwb.
    Cov coob yog cov, tab tom paub txog kev txawj ua neeg xam khib xwb, yog feem coob. Ces cia li muab khaws los ua kev ntxub thiab cib nyeej mus.
    Hmoob cov dab qhuas uas tsis sib thooj twb yog vim tej tsis txawj ua siab ntev li hais no. Leej twg los xav ua tus yeej tam sis ntawd, Ib lub xeem Hmoob xwb los dab qhuas tsis sib thooj, thiaj muaj cov 9 txim, 5 txig los 7 txim li sawv daws paub.
    Txoj kev siv nyiaj los ua plaub, mas qhov tseeb,tseeb yog kev xyob txhiaj tiag li ntag. Txoj kev ua kwv tij los phooj ywg tsis tas yuav siv nyiaj los muas, twb ua tau zoo tas nrho li lawm.
    Twb yog zoo kwv zoo tij los txheeb ze zoo tas npaum no, tseem yuav siv nyiaj los ua plaub. Kom ib leeg muaj kev yeej ib leeg mus, sib tawg sib ncaim mus, ua tsis tau, ib pab ib pawg, koom tsis tau dab qhuas.
    Txoj kev ua kwv tij thiab muaj Phooj ywg zoo, muaj koob meej thiab nplua nuj mus deb kawg. Uas cia li tau ua neeg nplua nuj los ntawm kev muaj phooj ywg los!
    Kuj muaj ib lo lus hais li no thiab, yog ib lo lus tseeb, tus neeg muaj nyiaj ntau, nws txawv tus neeg nplua nuj. Tus neeg nplua nuj, nws muaj phooj ywg coob nws tsis pluag.
    Hos tus neeg muaj nyia ntau, nws tsis muaj phooj ywg. Nws muaj nyiaj ntau, npaum li cas, txawm suav tsis txheeb li, los nws tseem yog neeg pluag!
    Hnub twg nws tsis muaj phooj ywg lawm, ces nws yog neeg pluag tiag! Nws poob ua nyiaj qhev lawm, nws siv nyiaj ntau los ntshai tsam luag paub.
    Noj qab los kuj ntshais lug paub, hnav zoo los ntshai luag pom. Ces nws yoo tsis siv nyiaj los muas noj muas hnav, ntshai luag pom los luag paub.
    Nws nyob txom nyem tshaj ib tug neeg pluag lawm thiab. Cov neeg pluag lawv tseem ntshaw noj, ntshawv hnav, lawv muas noj kom tsau,muas hnav kom huv du lug.
    Hos tus neeg muaj nyiaj ntau, nws muab nyiaj zais rau hauv tsev los zais rau qhov av tas lawm. hnub nws tuag tsis muaj neeg paub tias nws muaj nyiaj ntau npaum li cas.
    Nws cov poj tub se ua neeg pluag, nrhiav tsis tau nyiaj siv. Nws nqa tsis tau mus saum ntuj thiab. nyiaj yog av tug nyiaj rov mus ua av ta, los yog lwm tus tug lawm.
    Tus txawj siv nyiaj thiaj zoo ua neeg muaj nyiaj, Tus tsis txawj siv nyiaj, txhob ntshaw ua neeg muaj nyiaj ntau. muaj nyiaj ntau, ces nyob ua nyiaj qhev, ces koj tseem pluag tshaj tus ib txwm yog neeg pluag lawm.
    Zaj lus no kuv sau los ua kev kawm nyob nruab siab, saib leej twg puas xav tau li hais no. tus txawj txhais thiaj to taub, tus tsis txawj txhais ntshai nws yuav tsis paub.


    Yaj Zoov Ntxheb Xib Hwb.






    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 20th July 2017, 8:44 am


    Zaj 285- ZAJ LUS SIV NROG IB ZAJ TEEV NTUJ.

    Kwv tij, nyob hauv cov zaj teev ntuj muaj ntau lub ntshiab sib dhos nyob hauv:
    Yam li kev phem kev zoo yog ib tug, kev kaj thiab kev tsaus nyob ua ke. Cia muab zaj Kuv Lees Txhaum los ua piv txwv hais!
    Thaum peb hais zaj teev Ntuj,peb hais ntawm ncauj xwb, peb lub siab tsis nyob hauv. Mas lo lus peb hais yog ib nthwv cua xwb.
    Ib thwv cua tsis muaj zog, thiab tsis paub lub ntshiab lus tias, xa dab tsi mus txog rau Tswv Ntuj. Zaj lus peb hais, tseem hloov tau, ua ib co lus saib tsis taus Ntuj thiab saib tsis taus neeg.
    Zoo li zaj lus peb hais ntawd, Dab phem muab cais kom mus tsis txog Tswv Ntuj. Cuag li tsis muaj Ntuj, nyob ntiaj teb no kawg muaj peb thiab dab phem xwb.
    Yog peb tsis txawj teev Ntuj peb teev li hais no, peb ntseeg Ntuj yuam kev kev lawm. Peb tsis paub Ntuj li txuj ci. Peb tseem muaj kev ntxub neeg nrog kev thuam Ntuj.
    Txoj kev peb ntseeg thiab lub caij peb tab kaum tuaj teev Ntuj Tsis muaj qab hau rau peb li. Peb tuaj nyob ib teev hauv lub tsev teev Ntuj, peb tsis tau hais ib yam dab tsis rau Tswv Ntuj li.
    Zoo li peb tuaj sim Tswv Ntuj thiab xav pom saib Ntuj cov hwm huam puas loj thiab puas muaj tseeb li peb xav tias: Kom ua ib yam rau peb pom ntawm qhov muag tso.
    Cov xav li no, mas lawv tos ib sim neej los lawv yuav tsis tau pom ib yam hwj huam uas Tswv Ntuj ua rau lawv saib li.
    Lub Koom Txoos Ka Tau Liv nyob ruaj, vim muaj tej pab neeg lawv txawj teev Ntuj. Lawv niaj hnub teev Ntuj mas lawv raws nraim li lo lus uas lawv hais rau Tswv Ntuj.
    Tus rau siab teev Ntuj mas txawm nws tsis pom hwj huam tawm ntawm qhov muag. Los nws ntseeg ces nws zaj teev Ntuj, Tswv Ntuj muaj mus pab lwm qhov muaj teeb meem, nws cov lus puav leej muaj zoo paj tshab mus pab lwm tus neeg.
    Tswv Ntuj tau pov hwm neeg ntiaj teb nyob thoob plaws los yeej muaj ib feem paj tshab tawm ntawm cov neeg niaj hnub teev ntuj los.
    Nyob hauv lub Koom Txoos muaj ntau puas txhiab txhiab vam leej,yog cov neeg txawj teev Ntuj. Cov paj tshab lawv thov ib feem poob los nyob saum peb uas yus tsis ras txog los muaj.
    Cov neeg ntseeg muaj qee tus poob rau dab phem kev haub ntxias los muaj! Cov uas luag tau xyav lawv lub npe tsis zoo.
    Peb txhob poob siab, yog lib lo lus ntuas peb tus kheej xwb. Cov uas lawv pom ib tug thawj neeg raug dab phem kev haub ntxias.
    Lawv thim Ntuj, los hloov kev ntseeg. Cov ntawd lawv ntseeg tus thawj neeg ntawd, xws li yog ntseeg Tswv Ntuj ntag. lawv thiaj zoo siab thiab xyav los hloov kev ntseeg.
    Coc zoo li hais no tsuas yog ib feem neeg me me thiab tsawg tsawg xwb od! Yus ua li ntawd, yus txawm yog tus uas dab muas tau yus lawd lawm ntag.
    Ib tug neeg ntseeg coj li no, hloov mus rau yam tod los tsis txaus siab li, mas nws yog tus sim Tswv Ntuj lub siab lawm, ib sim neej nws yuav nrhiav tsis tau ib yam zoo nyob hauv nws nruab siab li.
    Lawv tsis ntseeg thiab tsis cia siab rau Ntuj. Lawv tuaj dab phem tog xyav tswv Ntuj lub npe tsis zoo rau luag hnov.
    Tsis kav lawv muaj peev xwm sawv nyob pem luag hauv ntej hais Tswv Ntuj cov lus. Nyob hauv nws nruab siab mas nws yeej saib Tswv Ntuj zoo li yog ib lub suab tsis tseeb li.
    Hom zoo li no nws yuam kev lawm, nws pom Huab Tais Ntuj tseem me dua tej me nyuam neeg, uas nws saib tsis taus lawv.
    Kwv tij zaj lus no tsis yog muab leej twg thuam li, yog zaj lus no yuav pab koj nrhiav Tswv Ntuj xwb. rau siab nrhiav tiag kom paub meej!
    Koj yuav txhob ntseeg ib tug neeg kom ti txha kiag. Koj tsuas mloog nws cov lus saib puas yog Ntuj txib nws hais los nws tuaj yeem nws mus ua neeg khav theeb los ua neeg muab hlob xwb.
    Koj yuav ntseeg koj ua ntej, ces koj thov Leej Nplij neeg qhia qhov tseeb, ces koj thiaj yuav to taub zoo.

    Yaj Zoov Ntxheb Xib Hwb.



    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 27th July 2017, 8:46 am



    Zaj 286- TXOJ KEV KAJ

    Txoj kev Kaj yuav ci qhov twg tuaj?
    Nws yuav Ci ntawm ib tug neeg hwm Ntuj tuaj! Leej twg thiaj yog tus ntawd? Tus ntawd, yog txhua tus neeg uas nws tau ua thawj neeg.
    Cov thawj neeg no yog cov muaj lub npe hu, li teev rau nram qab no:
    a. Cov thawj neeg xub muaj lub meej mom tawm tuaj, yog cov muaj lub npe hu ua, niam los ua txiv. Lawv yug muaj tub ki.
    b. Mam los txog rau cov muaj ib txoj hauj lwm ua thawj neeg, coj ib pab neeg nrog nws. Los yog cov muaj cai sawv cev, tawm rooj mus daws teeb meem plaub ntug...
    c. Mam los rau cov ua thawj neeg, coj sab ntsuj plig, kom ua neeg paub tab, paub cai, ua neeg thoob tsib to nrog. Coj kev pov hwm tib neeg ua neeg ntshiab huv, kom hwm Ntuj hwm neeg.
    Muaj kev ntseeg, kev tso siab rau Ntuj, Ntuj yog tus muaj zog pov hwm neeg tej ntsuj plig kom tau nyob ntshiab huv.
    d. Cov muaj lub luag hauj lwm hais saum no, mas muaj ntau phiaj neeg coo kawg li... Lawv cov hauj lwm txoj loj tshaj plaws, mas yog cov nyob ze, tus muaj lub npe hu tias:
    Tus Xeeb Teb Xeeb Chaw, Huab Tais Ntuj, Vaj Tswv, Yawm Saub, los Ntuj Niam Ntuj Txiv. Cov npe no yog tib tug xwb. Nws yog tus muaj zog tshaj plaws txhua lub Npe.
    Nws yog tus hais kom muaj ces muaj tuaj, Nws hais kom yaj mus ces cia li yaj ploj mus li lawm. Yam Nws kheev kom nyob mas thiaj nyob taus, yam Nws tsis kheev nyob mas nyob tsis taus.
    Nws yog tus muaj zog, Leej twg xav ua neeg pom kev lam lug. yuav khaub zig txog Nws.
    Sawv daws yuav paub tias, lub ntiaj teb no Vam Meej mus deb heev lawm. Txoj kev tsaus ntuj thiab txoj kev kaj khiav sib raws ntshaws mus ceev tib yam nkaus.
    Kev phem kev zoo, kuj vam meej cawm tau sib law ntsaws ceev kawg li thiab. Txhua yam khiav ua ib ntxaig sib law sib liag tsis muaj chaw nres li.
    Dab thiab neej khiav nrawm tib yam nkaus. Neej tsim tau lub xees te liv mus cia saum ntuj, dab kuj raws tau qab mus saud! Cov suab lus nrov tuaj saum lub xov tooj cua tuaj muaj neej dab hais lus sib npaug!
    Tus neeg xav nrhiav tus neeg zoo mas nws ntsib tau tus zoo. Hos tus xav nrhiav tus neeg phem, nws kuj tau ntsib nyob rau saud tib yam nkaus!
    Thaud tej laus hais tias, neej dab nyob ua ke. Dab neeg nyob sis nce, neej dab nyob ua pawg, dab neeg nyob sis xyaws ces yog txheej neeg no lawm ntag!
    Ib leeg nyob ib sab ntuj, los koj xav nrog tus phem tus zoo tham los yooj yim kawg li. Cuag li nyob ib kem tsev sib tham ua ke.
    Cov tsis paub kev ceev faj, mas tham lus los ua hauj lwm ua kev nrog neej ib chim, kuj nrog dab ib chim thiab. Lo lus no, yog tsis xav txog, ces tham lus los ua hauj lwm ua ke nrog dab tas nrho li.
    Yam tseem ceeb thiab tsis tseem ceeb los yus tsis paub txiav tias yam twg yog qhov zoo rau cov neeg nrog yus nyob ua ke. Yus muab mloog li yog kev tseem ceeb, tsis nco txog cov neeg nrog yus nyob.
    Yus txib luag ua hauj lwm cuag li yus yog Nom, cia luag ua yus tus qhev. Ua tau haum siab kuj zoo, ua tau tsis haum siab ces yus tseem muaj cai cem, yam tsis ris txiaj los muaj.
    Noj tsau, tsis nco ua luag tsaug, tseem muab dab lus los hais tias zoo tas nrho rau yus. Cia luag tiam yus cuag li tiam ib tug Nom loj.
    Koj qhib kiag koj lub xov tooj, mas muaj tas nrho txhua yam nyob hauv li. Kev Vam meej peb yuav txawj xaiv tias txoj nyob rau sab twg, thiaj yog Kev Vam meej mus raws Ntuj sab!
    Lub neej niaj hnub no, tsis hais tus me nyuam txawj kov lub xov tooj. Los tus hluas los tus laus thaum nws quav xov tooj lawm, nws yuav tsis nco qab tias nws yog leej twg li los muaj od!
    Yog koj tsis paub txog tej no ces koj coj koj tsev neeg mus taug tib txog kev tsaus ntuj tas nrho! Poj niam me nyuam ib leeg muaj ib lub xov tooj, nyias yuav qaug rau nyias lub xov tooj nrog nyias zaj.
    Txhua tus yuav saib yog kev tseem ceeb tas nrho tuaj, ces koj los tsis khoom, kuv los tsis khoom,lawv los tsis xyeej li. Ces tsis ntev tsev neeg kuj yuav tsis sib raug zoo nyob ua ke.
    Ib leeg yuav tsis xav mloog ib leeg tuaj lawm, cuag li sawv daws tsim txiaj tas tus. Cov laus lawv nyiam mloog kwv txhiaj los sab sij huam neej neeg dab neeg...
    Cov hluas thiab cov me nyuam nyiam ua Game, nyias saib nyias yam muaj nuj nqes tshaj lawm. Cov laus tsis paub hauj lwm, cov hluas kawm tsis kawm ntawv tuaj lawm. Ces sawv daws rov ua neeg ruam tas tib si li lub caij nyoog neeg tsis tau txawj ntawv.
    Kev Vam Meej tsis yog khwv kom muaj nyiaj txiag nplua nuj tuaj. Vam meej mus taug kev kob huam ntshaw noj ntshaw haus.
    Kev Vam Meej pluag, mas tseem zoo tsis cuag nyob hauv kev tsis Vam Meej muaj mov noj. Vim lawv siab ncaj dua, Ntuj kuj nyiam cov neeg ntawd dua thiab.
    Zaj lus no kuj xav kom sawv daws paub txog ua ib tug Tseem Ceeb uas yuav coj tau koj tsev neeg tawm mus rau txoj kev kaj tseeb yav tom ntej!
    Tus yuav coj koj tawm mus pom txoj kev Kaj Tseeb nws lub npe hu ua: CWJ MEM, tus CWJ MEM no nws paub tas nrho yam phem los yam zoo nyob ntiaj teb.
    Koj tig kiag mus rau Sab Zoo los koj paub tas nrho, hos loj tig loo mus rau Sab Phem los koj kuj paub tas nrho thiab. Dab Phem kuj nyiam caum rab CWJ MEM no kawg li thiab.
    Thaum koj txawj ntawv zoo lawm, koj qhia CWJ MEM sau sab lus zoo, mas tawg paj paug ci lam lug pom kev nrig. Puav leej yog cov lus nplua nuj, thoob tsib.
    Ua neeg siab ntshiab siab huv, uas Ntuj nyiam kawg, neeg kuj qhuas tas nrho. Hos koj qhia nws sau sab phem mas pom dab khiav ri sis nqug nyob hauv, cuag li neeg tso yeeb yaj kiab.
    Sab txuj twg los muaj cis tub li txuj ci nyob hauv, koj yuav pom Nyiaj thiab kub sawv los muaj tsheej roob. Hos yuav pom Ntuj Plig qaug mus lawm tsheej nceeg li.
    Suab nkauj paj nruag zoo siab nrov doog diaj, suab quaj suab nyiav nrov nroo ntws cuag dej nag sib tw laub tsaws ntxhee nqes hav.
    Tus CWJ MEM no ua ntaiv tuam rau neeg nce mus txog Ntuj Ceeb Tshhej los tau, hos qhib rooj ntug rau neeg nqis mus rau dab teb kuj tau thiab.
    Saib koj yuav tig hau CWJ MEM los tig qab CWJ MEM xwb. Daim ntawv kuj yog ntawv dawb xwb. Thaum Cwj Mem ntaus Cim tas rau Sab Lus Zoo, ntawv muaj nqes dua nyiaj thiab kub.
    Cov neeg siv nyob vam meej ntws cuag li neeg yog Qaum Ntuj npoj tub.
    Yog Cwj Mem ntaus Cim loo rau sab Phem ntawv yuav piam tseem mus ua ntawv kem tsuab.{ kem tsuab=qias neeg,} Cov neeg siv yuav liam sim, mus xws li yog neeg vuab tsuab.
    Zaj lus no tau sau ua paj lug piav los xwb, Koj nyeem koj yuav maj mam txhais kom nkag siab, koj thiaj to tau, tsis muaj kev ntxhov siab.

    * Sau nyob Sacramento, tim 1/4/2017.*

    Yaj Zoov Ntxheb Xib Hwb.



    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 3rd August 2017, 8:44 am



    Zaj 287- TXHAIS KEV DAB QHUAS.

    Hais txog saum ntiaj teb neeg cov dab qhuas, mas yog ib yam loj heev nyob hauv Leej tib neeg li kev ntseeg. Txoj kev ntseeg Tswv Ntuj, mloog Yes Xus zaj lus qhia.
    Nyob hauv cov ntawv Faj Lem uas yog Tswv Ntuj tshoj thiab txib tej tus neeg ntiaj teb kom tau ua Yaj Saub los hais ntawd, thiab Lo lus uas yog Yes Xus hais kiag los.
    Zaj no nrog rau txhua haiv neeg cov kev ntseeg los puav leej yog dab qhuas tas nrho tib si. Cov kev dab qhuas no, puav leej yog yam tseem ceeb rau leej tib neeg sab ntsuj plig loj tas nrho.
    Yog yuav hais qhov tseeb mas tsim nyog neeg ntiaj teb txhua haiv txhua xeem yuav tsum ntseeg txog tus sawv daws hu ua Tswv Ntuj no thiaj yog qhov tseeb.
    Tab txawm muaj ntau yam kev ntseeg suav tsis txheeb li los,cov kev ntseeg no tsis yog mus rau sab phem li. Txhua txoj kev ntseeg puav leej yog ua rau sab ntsuj plig , kom tau noj qab nyob zoo xwb.
    Sawv daws coj thiab ua los tuav pov hwm sab Ntsuj Plig, kom txhob muaj txiab xeeb mob nkeeg. Ces ua rau Leej Tib Neeg muaj kev zoo siab, ces lub cev muaj zog.
    Yeej kev tu siab thiab yeej sab foob khaub thuas uas muaj nyob nrog huab cua los, kom neeg yeej kev mob nkeeg. Ntawm kev ua neej nyob ntiaj teb no mus.
    Nyob hauv lub Sim Ceeb no, txhua txoj kev ntseeg puav leej nyob hauv qab, Tswv Ntuj txhais tes tswj hwm tas nrho, nrog leej tib neeg kev tso siab.
    Leej Tib Neeg zaj tswv yim tsuas muaj xav kom tau kev nyob dawb nyob huv. Ces Qaum Ntuj ua tus roos tas txhua yam uas neeg ntshaw los ntawd.
    Txoj twg los yeej tsis muaj cia li plhis mus, kawg laus ces yuav muaj tuag xwb. Yam loj uas neeg tso siab ces, saib tiam tom ntej tus Ntsuj Plig puas muaj kev tau mus nrog tswv Ntuj nyob rau Ntuj Ceeb Tsheej xwb.
    Kuv xav tias nyob hauv txhua txoj kev ntseeg yeej raug Qaum Ntuj ua tus pov hwm tas tib si. Nyob hauv txhua Haiv neeg thiab lawv txoj kev ntseeg, thiab kev tso siab.
    Leej Tib Neeg tsis paub, ces muaj qee txoj lawv qhov chaw muaj zog, ces mus zwm rau ib co Tim Tswv muaj hwj huam peev xwm raws li cov neeg tau ua ib tug Tim Tswv loj kav ib ntsug teb.
    Hos muaj qee yam kev ntseeg lawv qhov chaw muaj zog, mus zwm rau Xob thiab Zaj. Cov nteeg li no, yog cov ntseeg tso siab rau txheej Tim Tswv nyob qis dua cov xwb.
    Cov no, mas lawv qhov ntseeg loj tshaj nyob nruab siab yog, ntshais tsam muaj kev txhaum nrog kev khaum. Ces ua rau nws muaj kev txom nyem los tej tub ki muaj kev khaum, tuag tes tuag taw ua lub neej tsis xws luag.
    Tsis yog vim li cas, neeg tsis paub ces neeg tau xav li ntawd lawm xwb. Ces cia li ntseeg li ntawd mus thiab sib qhia ib txheej dhau txheej los mus.
    Lawv tso siab thiab ntseeg txog Xob los Zaj. Xav tias Xob thiab Zaj mas zog loj heev, yuav nphau toj roob hauv pes. Pob mus ua dej kuav tau thiab lub suab nrov loj, ua ntoo kub hnyiab mus tau.
    Cov ntseeg li no lawv ntseeg tau ib co Tim Tswv nyob qis qis hauv nruab yeeb Txawm yog li ntawd los Qaum Ntuj kuj tseem pom zoo dua cov tsis muaj kev ntseeg.
    Uas lawv coj thiab ua ywj siab, lawv cia li rov tsa lawv ua tus loj, txoj cai nyob hauv lawv ob sab tes. Xav xa leej twg mus ua neej nyob rau tub tuag teb los ua ywj siab.
    Nyob hauv txhua txoj kev ntseeg qhov tsis zoo yog! Leej tib neeg nws ua neeg muab hlob khav theeb Tsis hwm nws txoj kev ntseeg zoo.
    Nws muab kev ntseeg los tawm tsam ua xaiv ua lus, kom muaj kev sib ntxub hloov tau los ua tsov rog. Cov no, muaj nyob hauv txhua txhua pab neeg muaj kev ntseeg huv si thiab.
    Qhov tseeb tsis yog cov nom tswv ua kev phem. Feem coob yog cuab kwv tij nyob hauv nws Haiv neeg ua. Los yog nws muaj nplooj siab tsis zoo, ces nws mus taug xaiv rau tej nom tswv tias, lawv muaj kev ntseeg txawv txawv.
    Lawv yog yuav ua neeg ntxeev siab yuav los tiv thiab caij tsuj tej nom Tswv. Kom tsis zoo kav teb chaws raws li tej nom tswv tus cuj pwm cob qhia.
    Nyob hauv Qaum Ntuj sab, mas Ntuj tsis nyiam kom sawv daws muab kev ntseeg los sib tawm tsam ua xaiv ua lus thiab xeeb tau tsov rog.
    Txhua yam teeb meem kub ntxhov nyob ntiaj teb no tsis yog Ntuj ua rov teb ua rais. Tsis yog Ntuj yuav kawg teb yuav tas.
    Txhua yam teeb meem twb yog neeg tsim los thiab neeg ua xwb. Kwv tij los neej tsa tsis sib raug zoo puav leej xeeb tshwm sim los ntawm neeg tej ncauj lus los tas nrho.
    Qaum Ntuj siab ntev kawg, Qaum Ntuj tsis nplua txoj kev ntseeg twg li. Ntuj cia nyias xaiv nyias txoj kev pus thiaj coj tus ntsuj Plig mus nyob rau Ntuj kag, los mus zwm rau Ntuj tawg, cia leej tib neeg nyias xaiv nyias.
    Nyob hauv txhua txoj kev ntseeg yeej muaj kev sib nyiam sib hlub, yog leej tib neeg nws txiav nws siab tias, yuav hlub coob los hlub tsawg.
    Thiaj muaj li Hmoob txoj kev ntseeg, ib lub xeem los thiaj muaj 9 txim 5 txig los 7 txim los li ntawd! Los thiaj muaj cov hu ua Zag Tab thiab Zag Phaws li no los thiab.
    Ib lub xeem xwb los dab twb tsis thooj lawm, hlub tsis tau, muaj ib siab ob qig muab cais tawm mus tso rau nraum zoov. Tsis yog Ntuj Tsis pov hwm, hos twb yog neeg tsis pov hwm neeg ntag.
    Leej Tib Neeg lub siab tsis lim laj nthuav ntxeev, nyias txua nyias nplawg ntia rau nyias txoj kev ntseeg. Nyias khav nyias zaj zoo, ua rau niam txiv txij nkawm sib ncaim tub ki sib ncaim khiav mus thoob qab ntuj khwb.
    Zaj lus no, niaj hnub no tseem muaj tuab ntws: Tej txij nkawm tus yuav xav li cas los muaj! Lawv lawv tej tub ki twb muaj cov hais tias, Kuv txiv ua Xib Hwb muaj tus qab hau dab tsi rau nws tiag.
    Tej niam tej txi kuj zoo tib yam, Tub ki kawm tau ua Dov Tawj los tseem hais tias Tus Dov Tawj zoo dab tsi cas tsis mus ua nom ua tswv mus coj teb kav chaws, thiaj yog qhov kuv nyiam ned!
    Ib tug Leej Tib Neeg lub tswv yim, mas me me li lub tsig suab zeb xwb paub tsis txog. Yog koj 9 leeg tub mus ua 9 tug Huab tais, mas lub ntiaj teb no yuav tsis txaus nej pab txiv tub no nyob lauj!
    Muaj li hais no lawm tiag, Cov kev ntseeg no sib tsim teeb meem. Mas qee pab kev ntseeg tau quaj ntsuag hu Ntuj hu teb ua rau ntiaj teb qeeg tas los tseem tsis tau paub txaj muag rau Ntuj li thiab.
    Nyob hauv cov npoj neeg muaj kev ntseeg no, siab tsis loj tswv yim tsis zoo. Nyias muaj nyias lub siab khib los muab cov kev ntseeg no, lawv tej Ntuj plig tsim txom kom muaj neeg tau raug kev ploj tuag mas ua rau nws zoo siab kawg.
    Tab tom los dhos kiag rau Hmoob los lus tias, koj yuav raug khaum mus. Vim koj ua rau koj tug Ntsuj plig tsis dawb huv nyob hauv koj lub cev nrog koj lawm.
    Cov pab neeg ntseeg raug kev quaj ntsuag no yog cov ntseeg txog Yes Xus lub npe, lawv raug ntau tshaj lwm pab. Vim lawv qhov muaj zog yog kev nyiam kev hlub, lawv thiaj tau raug khiav qaum teb mus thoob qab teb los lawv tseem zam qees thiab.
    Kwv Tij Hmoob, Kev ntseeg tsis yog yuav los sib tw ua nom ua tswv ntxeev lub tej lub chaws kom tau los ua Vaj Ntxwv.
    Kev ntseeg tsuas yog ceev tej ntsuj plig kom tau tus Ntsuj PLig dawb huv xwb. Kev ntseeg yuav txhawb nom txhawb tswv, kom lawv muaj hwj chim koob meej nto moo lug mus.
    Kev ntseeg lub hom phiaj yog sib twv los ua neeg siab dawb siab huv kom tau ntuj ntoo, thiab tsim nyog txoj kev Ntuj tsim neeg xeeb los nyob ntiaj teb no ib zaug xwb.
    Kev ua nom ua tswv thiab kev nplua nuj yog nrog txoj hmoov, uas Ntuj tsim thiab xeeb los ua neeg. Nyias coj nyias daim ntawv pem ntuj los ua nom thiab los ua tuam los pav nplua nuj.
    Hais rau sawv daws paub! Dab qhua muaj ob hom:
    a. Yam ua rau sab Ntsuj Plig, yog kev teev tiam raws li poj koob yawg koob qhia los. Nyob hauv kev ntseeg, yog zoo li Hmoob teej tug, yog kev hu plig, ua neeb ua yaig tuav tseev ntsuj plig kom lub cev ntaj ntsug tau noj qab nyob zoo.
    Txog caij qaij mus mam li qaij. txog nyoog qaug mam qaug mus.
    b. Yam ob yog tej kab lis kev cai ua rau neej sab: Zoo lis Neej kev sib hlub kev ua tshoob ua kos. Luag hais tias, nrog neej sib txuas tis txuas tw nyob ua neej ua tsav noj nqaig haus dej haus cawv. ...
    Ua phooj ywg kom muaj txoj kev dav, tau luag mus tsham xyuas teb chaws qab ntuj mus dhau hauv ntuj. Ob yam hais no kuj zwm nyob nrog Ntuj Niam Ntuj txi tas tib si, hauv Ntuj kev hlub kev nyiam.
    Tsis tsim nyog uas sawv daws pheej yuav muab tej kev ntseeg no los sib thuam nce toj nqes taug, ua xaiv ua lus lawm. Vim kev ntseeg tsis tau muaj kev ua tub qaug rau leej twg li.
    Txhua npoj neeg uas, muaj ib txoj kev ntseeg, txhua txoj yeej zwm rau Faj Tim Huab Tais Ntuj tas nrho. Tis yog li ntawd, vim li cas Ntuj ho pov hwm sawv daws zoo tas npaum no.
    Kwv Tij tsis hais pab twg los npoj twg li, yog luag ua rau koj tau quaj ntsuag, li koj ua rau luag koj yuav xav li cas?
    Thaum koj zoo li ntawd koj kawg hu txog Ntuj Niam Ntuj txi tias, Ntuj aw, thov koj tsa zaj muag los ntsia lawv ua rau kuv li no thiab xwb yom.
    Koj yog ib tug Hmoob lawm thaum koj pom tej xwm zoo li no, luag ua rau ib tug Hmoob tau quaj ntsuag. Koj muaj koj ib txoj kev ntseeg los tsim nyog koj yuav hu txog tus koj ntseeg tias Kuv tus tswv ua kuv ntseeg koj.
    Thov koj ua luag siab kom zam rau tus Hmoob luag hiam nws tau quaj ntsuag no, thiaj yog. Koj tseem ua tus tshab xo thiab pab kom luag muab tus Hmoob zoo li koj no, mus tsim txom kom tau quaj ntsuag hu ntuj qaws koj thiaj zoo koj siab.
    Koj txoj kev ntseeg nyob hauv Qaum Ntuj sab tes tuav rawv od. Txog hnub luag tshau tawm los, saib koj yuav yog lub ntsiab los yog cov npluag.
    Nco ntsov niam txhob ua rau txiv, txiv txhob ua rau niam. Kwv tij tsis txhob sib ua li ntawd. Sawv daws yog poj koob yawm koob ib hom ntsuj roj ntsuj ntshav ntws los ua ke kom tau xeeb sawv daws los ua neeg.
    Cov kev ntseeg no, muab los sib piv ces zoo li no xwb. qee hom txawj hnav ris hnav tsho zoo nkauj zoo nraug nyob huv si. Los zoo li yam toob xib noj, lawv txawj ua noj qab zog co me ntsis tuaj lawm.
    Los zoo li txoj kev sawv daws taug mus ntawd, muab hais zoo li, Hmoob hais mus rau Tuam Tshoj. txoj kev ntseeg nplua nuj lawv caij cov nkoj tshuab hom ya nrawm tshaj plaws mus, lawv ya mus peb sij xwb twb txog tuam tshoj lawm.
    Qee hom kev ntseeg lawv ua neej txom nyem me ntsis, lawv caij cov nkoj tshuab ya tsis nrawm. Ces lawv yuav mus li 12-24 sij mam mus txog tuam tshoj.
    Hos cov kev ntseeg txom nyem thiab pluag me ntsis lawv mus tsheb muaj log, lawv yuav mus tsheej xyoo mam txog.
    Thiab cov neeg poob zoo los pluag heev lawv ntuj taw mus ces lawv yuav mus li 5 xyoos los 10 lub xyoo mam txog. qhov kawg sawv daws puav leej tau mus nyob Tuam Tshoj ib yam nkaus.
    Qee tus neeg yog cov caij tsheb muaj log, los cov mus taw, lawv qhov chaw thiab lub rooj zaum tseem nyob ze Faj Tim Huab Tais dua cov mus ua nej los muaj.
    Vim los ntawm txoj hmoo, uas nyiaj txawj ceev nyias tus ntsuj plig kom yog tus dawb huv ntawd los.
    Zaj lus no kuv sau los ua peb sawv daws kev kawm paub txog kev sib hlub. Nyob hauv txhua pab pawg muaj kev ntseeg coj.
    Yaj Zoov Ntxheb X.H.






    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 7th September 2017, 9:18 am



    Zaj 288- TXHAIS TSWV NTUJ LO LUS.

    Tswv Ntuj cov lus uas Tswv Ntuj txib neeg, tuaj qhia muaj kuab tas nrho! Nyiam no feem coob lawv hu Tswv Ntuj ua tus Tswv no ntau lawm.
    Tus Tswv no tau txib neeg ntiaj teb tuaj ceeb toom Nws cov lus coob leej kawg. Tus Tswv tsis xaiv tias, yuav tsum yog cov neeg ntseeg txog Yes Xus lub npe thiab coj phau ntawv Ntshib.
    Uas muaj Tswv Ntuj thiab Yes Xus cov lus, nyob hauv tuaj hais mas thiaj yog qhov tseeb. Ib co mas Tus Tswv yeej cia lawv coj tus Tswv cov lus nraim tsis pub ncaim li.
    Hos ib co mas tus Tswv xaiv thiab txib lwm tus neeg coj lwm hom kev cai, kom lawv los hais kev txhaum kev khaum, thiaj mus txhua qhov txhia qhov chaw.
    Sawv daws puav leej yog Tus Tswv cov tub txib tib si,tus Tswv tsuas xav kom neeg sawv daws ntshaw, txoj kev sib hlub thiab ntshaw muaj txoj sia nyob mus li xwb.
    Cov tsis nyob hauv txoj kev ntseeg txog Yes Xus lub npe. lawv muaj lub npe hu ua Pab Hlav Pub Xeem Txuas. {Yam li tu lawm rov txuas dua rau.}
    Cov neeg uas Qaum Ntuj xaiv li no, mas muaj coob leej kawg. Nws xaiv nyob hauv txhua Haiv neeg, los txhua xeem txhua tus tib si.
    Muaj cov Qaum Ntuj xaiv tau lawv tuaj Qaum Ntuj tog. Kuj muaj, cov Qaum Ntuj xaiv tau lawv, tsis tuaj tus Tswv tog los muaj.
    Lub ntiaj teb no muaj teeb meem ntau thiab loj kawg. Tsis hais cov coj kev ntseeg nyob ua ke los nyias muaj nyias pab nyias pawg, nyias coj nyias hom kev ntseeg li.
    Qhov loj, mas yog cov tiv tus Tswv ntau xwb. Tus Tswv yeej xav hais hnyav rau neeg tias, nej puas ntshaw kev sib hlub thiab ntshaw txoj siav?
    Tab sis tus Tswv maj mam hais rau neeg zoo li Nws tsis xav muab txim rau leej twg! Tus Tswv kuj xav tias, neeg ntiaj teb tsis paub tab thiab ua neeg twm xeeb li cov neeg xub qwb txhav, tsis xav mloog lus.
    Nyob hauv tus Tswv cov lus, tsuas muaj ob yam li no:
    A. Cov tuaj tus Tswv tog, mas txog lub caij txiav txim los. Lawv yuav tsis mag ntxiab. Tus Tswv yuav qhia kom lawv lug ntawm rooj ntxiab mus.
    B. Cov ntseeg los tsis ntseeg yog lawv tsis tuaj tus Tswv tog. lub caij txiav txim los txog, Tus Tswv yuav cia lawv mus taug txoj kev du du li txoj kab. Uas luag khia khia du lug ntawd, kom tau mus nphav tus cwj tsiag, ces ntxiab yuav tais lawv.
    Tej no, mas tsis hais cov neeg coj txoj kev ntseeg twg, los Haiv neeg twg li. yeej muaj ib npoj neeg tuaj tus Tswv tog, hos ib pab yeej tiv tus Tswv mus li.
    Ntiaj teb neeg no, zoo nkaus li Hmoob lwm Hmoob cov Sub. Thaum Hmoob lwm Sub, Hmoob hais tias lwm mus rau hnub coog hli kawg.
    Hnub hli tsis muaj chaw kawg, lub hnub lub hli mus ntsig lub ntiaj teb tsis txawj kawg li. Mus ncig lub ntiaj teb no, rau sab nraud xwb rov los qhov qub.
    Hmoob muab cov Sub no lwm nrog hnub hli mus, ces mus mus los los. Cov Sub no, thiaj nrog neeg nyob mus li. Thiaj muaj tej sub nyob nrog leej tib neeg tsis tas tsis kawg li niaj hnub no:
    Thiaj muaj Neeg poob deg, tsheb ntxeev,tsheb sib nraus, dav hlau poob. Tej niam txiv tsis sib haum, kwv tij neej tsa ua plaub ua ntug, thiaj muaj neeg rau cuab raug khi.
    Tej nom Tswv sib txeeb hwj chim, los sib txeeb nyiaj txiag. Cov Nom Tswv sib tw ua tsov rog. Tej kwv tij ua xaiv ua lus. me tub me nyuam tsis sib mloog lus.
    Tej neeg kho siab mus dai tuag, muaj kev sib foom kom khaum li ub li no mus. tus ua tsis yeej, nws fiv mus rau rooj tshoob rooj kos. Los fiv mus rau ntees ploj ntees tuag hais kom luag poob nyiaj poob txiaj mus.
    Tej no, yog Sub nphau rov los txog, vim Sub tsis paub mus. Mus mus los los, rov los txog qhov qub.
    Thiaj muaj cov neeg Qaum NTuj xaiv los uas lawv hu ua:
    Cov Hlav Pub cawm xeem Txuas no, {Txhais tias rov txuas dua tshiab.} Cov no tsis hais lwm Haiv neeg, Haiv Hmoob xwb mas twb sawv puv qab zej hauv zos txhua qhov chaw thoob plaws lawm.
    Ib pab kuj tuaj tus Tswv tog, hos ib pab kuj tsis tuaj tus Tswv tog thiab. Qee tus lawv rov tsa lawv ua Tim Tswv, kuj muaj, qee tus mus zwm rau ib tug Tim Tswv tshiab, nyobhauv nrun yeeb.
    Sawv daws puav leej hais txog lub Ntuj Tshiab, lis Yes Xus cov Thwj Tim hais txog Ntuj Ceeb Tsheej. Tej lus no, nyob Hauv zaj Paj lug uas Yes Xus tau hais txog tus Tswv teb tseb cov noob nplej noob ntsuas rau hauv nws daim teb.
    Tus Tswv yog Huab Tais Ntuj, Daim teb yog lub ntiaj teb no. Cov noob nplej noob ntsuas ntawd, yog peb neeg ntiaj teb no txhua haiv, los txhua tus neeg.
    Cov noob no puav leej zoo noj tib si, zoo li nplej ua txhuv, los nplej ua mov mog. Pob kws ,qib pias txhuv daj, qos hmab qos ntoo...
    Yam twg twb zoo yug siav rau tib neeg. Hom uas tus Tswv coj mus tseb los cog txi txiv zoo, siav los muaj hnab ncw ncw,sau ntsu. Ces tus Tswv yuav khaws noob cia tau cog rau lwm cim.
    Hos yam uas tsis txi txiv los siav tsis zoo ces tus Tswv yuav tsis sau, Nws yuav tso pov tseg, sau cov qoob zoo mus cia noj thiab ua noob cia lwm cim tas.
    Ces cov noob phem tsis txi txiv zoo, tus Tswv yuav cia lawv nyob xyaw nroj. Txog lub caij nplawm quav nroj, tus Tswv yuav muab luaj nrog cov nroj hlawv ua chiv rau cov qoob zoo rau rov lwm cim.
    Cov yuav tseb los cog rau lwm cim, yog cov noob zoo uas txi ncw ncw txhua cim. Hom uas tsis ntxim teb, tus Tswv kuj tsis hwm thiab tseg ua noob.
    Cov tsis txi txiv zoo los tsis ntxim daim teb, yog txi tau lub puav. Los cov noob tuaj pos kuj chob lwm cov ua kom qee hnab to qhov hliv cua los ua rau raug kab noj.
    Thiab hom ua mov noj tsis qab, tus Tswv kuj yuav xaiv tsis cog ntxiv lawm. Vim ua luam los tsis muaj neeg kheev nqi rau.
    Zaum no, yog muab daim teb thiab cov qoob no, los piv. Ces zoo li tiam neeg niaj hnub no ntag. Niaj hnub no kuj yog lub caij kub ntaiv uas tus Tswv yuav hlawv nws daim teb los cog cov noob zoo rau cim tshiab lawm.
    Lub ntiaj teb no, tsis hais Haiv neeg twg, los xeem Hmoob twg thiab tus neeg twg li. Suav cov thawj neeg mus ti nkaus rau tus pej xeem me me:
    Cov Nom Tswj teb kav chaw sib tawm tsam ua tsov rog, ib Haiv neeg sib txeeb ua tus Thawj Neeg kav teb chaws. Ob kwv tij kuj sib txeeb hwj chim.
    Cov Txiv Muam, sib tsawg sib khav cuam zom zaws. Ob tug Xib Hwb ntseeg tib txog kev sib txeeb ua tus loj. Ob tug Hauj Sam kuj sib ntaus. Ob kwv tij sib ua plaub.
    Ob tuag niam txiv tsis sib ntseeg siab, ob txiv tub tsis sib haum, ob niam tub tsis sib nyiam. Ob pab neej tsa sib nrhiav lus, ua plaub ua ntug.
    Tus yeej zoo siab tsis txawj tas, tus swb kuj tu siab tsis txawj tas thiab. Tus swb khaws kev cib nyeej tos coj mus xaus rau txhooj tshoob txhooj kos.
    Los tseg tos rau lub ntees ploj ntees tuag. Cia muam Phuj los txiv Dab Laug tuaj txiv ua tsiaj ua txhuv khi rau nram tswg tua los pauj khawv chim.
    Ua tsis tau li ntawd mas yuav khaum, tsis ciaj Nom ciaj Tswv, kom tsawg tiam los poob mus ua luag cev qhev ua neeg kob huam, ua nees rau luag caij, ua nyuj rau luag laij.
    Neeg ntiaj teb yog coj li no xwb, mas tus Tswv yuav muab tau lub ntuj tshiab nyob qhov twg tuaj rau neeg ntiaj teb mus nyob!
    Zaj lus no yeej yog tus Tswv cov lus, Lwm Haiv neeg mas lawv muaj lawv siab ntsws thiab tswv yim. Peb Haiv Hmoob mas tsim nyog peb yuav tau kawm zaj lus no, kom peb Haiv Hmoob muaj feem coob tau mus tuaj tus Tswv tog.
    Kom Haiv Hmoob paub ntshaw txoj kev sib hlub thiab ntxhaw txog muaj txoj sia tau. Kom txhob khiav raws nraim txoj kab du du cia li mus mag ntxiab tas.
    Tus Tswv txoj lus no, yog tseeb li Hmoob tej pog yawg hais tias:
    Yog lus nyiaj lus kub lus pov haum nplua nuj. 120 las nyiaj muas tsis tau los ua yus tug. Tab sis tus Tswv muab pub dawb xwb, Leej twg xav yuav, ces cia li hloov siab mus tuaj tus Tswv tog.
    Nws yuav ua neeg muaj hmoo cuag li khaws dawb tau los ua nws tug. Coj mua ua neej nyob rau lub ntuj tshiab.

    Sa cramento tim 12/6/2017. *Yaj Zoov Ntxheb X.H.*



    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 14th September 2017, 12:27 pm



    Zaj 289- TXOJ KEV TXOM NYEM LOS NTAWM TXOJ KEV PLUAG.

    Muaj ob txoj kev sib txawv xws li:
    A. Txoj kev txom nyem uas koj tsis muaj nyiaj, los noj tsis qab hnav tsis txaus. Koj txawm tsis muaj nyiaj ntau, los yog koj tsis muaj mob muaj nkeeg. Thiab koj muaj kev sib hlub txaus, koj mam mus ua dag ua zog, kom muaj mov txaus noj txwm hnub, mas yog ib yam zoo rau koj lawm.
    Los koj mus thov khawv noj kuj zoo dua, tsuav yog koj txhob mus tho luag qhov vaj qhov tsev, ua tub sab tub nyiag kom muaj neeg ntxub koj xwb. Uas niaj hnub muab koj cem mus txhub rau txoj kev ploj kev tuag, kom koj mus ua dab mus nrog dab nyob. Zoo dua qhov koj txom nyem siab ntsws
    B. Yog koj txom nyem siab ntsws, mas nyuaj dua txom nyem nyiaj txiag lawm ntau npaug. Vim tias thaum koj txom nyem siab ntsws tuaj lawd, koj tsis xav ua neej nyob, Koj yuav tu siab loj dua. Tab yog koj muaj mov los koj tsis xav noj li.
    Koj yuav txaus siab yoo mov thiab yoo dej, kom koj tuag mus dab los tsis yuav, neej los tsis nyiam. Koj kuj ntshai tsam koj ho tau tuag mus thiab. Mas tseem yog txoj kev txom nyem loj tshaj rau koj.
    C. Peb cov neeg ntseeg txog Tswv Ntuj, peb ua neej nyob rau saum lub ntiaj teb no. peb txhob xaiv txoj kev ua lub neej kom peb yog tus txawj ntse tshaj, los ua tus neeg muaj zog thiaj yog tus loj tshaj, tsam peb mus zwm rau txoj kev txom nyem siab ntsws li hais ntawd.
    Peb yuav xaiv txoj kev los sib tw ua tus Nkauj siab dawb, los ua tus Nraug siab huv tshaj, kom txaus rau Tswv Ntuj nyiam los txaus rau Leej Tib Neeg qhuas thiab hlub. Peb lub siab thiaj tau nyob thaj yeeb tsis muaj kev txhawj xeeb dab tsi txog ntawm peb tus kheej.


    * Yaj Zoov Ntxheb X.H.



    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 21st September 2017, 8:52 am

    Zaj 290- TXHUA YAM UAS HMOOB NTSEEG.

    Tsis hais kev ntseeg rau sab Ntsuj Plig los ntseeg rau sab cev nqaij daim tawv. Thiab ntseeg txog tej nroj tsuag xyoob ntoo uas zoo ua tshuaj kho neeg tej kev mob nkeeg.
    Txhua yam, twb yog ntseeg kom muaj txoj sia nyob ntev. Txhob tau tuag mus sai, Hmoob yeej paub tias tus Ntsuj Plig tsis tuag.
    Lub cev nrog tus Ntsuj Plig nyob, thaum lub cev tuag mus lawd. Mas tus Ntsuj Plig yuav mus thawj thiab dua. Ua lwm tus neeg, los sis mus thawj ua tsiaj ua txhuv rau neeg txib neeg siv.
    Nyob raws li thaum nws ua neej nyob, nws tau ua lub neej zoo, Los ua lub neej, phem!
    A. Hmoob hais txog kev mus thawj thiab, yog lub cev tuag mus lawm. Tus Ntuj plig tsis muaj chaw nyob, ces Nws mam li mus thawj thiab dua tshiab.
    Yam hais no, yog hais raws li neeg tswv yim xav, uas lub qhov muag thiab lub tswv yim tsis pom kev, hais los. Hos hais raws li kev ntseeg txog Tswv Ntuj thiab ntseeg Yes Xus lub Moo Zoo.
    Mas Tswv Ntuj lo lus hais txawv:
    Tus Ntsuj Plig mus thawj Thiab ua lwm yam tsis tau,yam li thaum lub cev tuag lawm, tus Ntsuj Plig tsis muaj chaws nyob. Nws rov mus cuag Tswv Ntuj, tus tau Tsim tus Ntsuj Plig no los.
    Xws nkaus li Hmoob hais tias, tus Ntsuj Plig rov mus cuag poj cuag yawm. Tus poj yawm ntawd, txhais tau hais tias yog Tswv Ntuj lawm.
    Tswv Ntuj yog cov tsuj Plig lawv Leej Txiv, lawv rov mus nrog lawv Leej txiv nyob rau Pem Ntuj ceeb tsheej li Hmoob hais tias, mus pem Qaum Ntuj.
    Tswv Ntuj cov lus nyob hauv Yes Xus lub Moo Zoo hais li ntawd thiab.
    B. Kev ntseeg txog dab, nyob hauv kev ntseeg txog dab, mas yog ib yam yuam kev loj lawm. Vim dab tsim tsis tau ib yam dab tsi yuav hais tau tias, yam no yog dab tsim tawm los.
    Hais tseeb, yam uas dab tsim tawm los. Yog txoj kev dag thiab txoj kev ntxub nkaus xwb. Nyob hauv ntawv hauv paus piav txog ntuj tsim teb raug los.
    Thawj lo lus yog Dab tuaj dag rau Thawj tug poj niam hu ua Es Vas. kom noj lub txiv ntoo uas Tswv Ntuj txwv tsis pub noj. Yog noj lawm, yuav paub txoj kev zoo, nrog txoj kev phem tas tib si.
    Thawj tug poj niam ntawd, xav muaj lub meej mom hwj chim, loj ib yam li tus Tswv Ntuj tau tsim lub ntuj lub teb. nws thiaj tuaj yeem noj kom paub npaum li Tswv Ntuj.
    Thawj lo lus dag, yog los lus ntawd. Yam dab tau tsim los, mas hais tias, yog txoj kev dag, ces zaum no txhua yam kev dag puav leej yog tawm ntawm dab los.
    Vim thawj tug Leej niam tau txais txoj kev dag ntawm dab los. Ces Nws tsoom xeeb ntwv thiaj puav leej xyaum dag kom yeej. Nyob hauv kev yeej thiaj muaj kev ntxub.
    Ntiaj teb neeg ua yam zoo tsis tau lawm, los tsis txaus siab. Ces ua zaj dag, kom muaj kuab thiab nrov muaj zog tuaj tib si. Lub Sim Ceeb no, kev dag yog yam muaj zog tshaj.
    Sawv daws thiaj nyiam sib tw dag kom yeej xaiv yeej lus los yeej plaub yeej ntug kom muaj yeej mus. Cov ua thawj neeg mus ti nkaus rau cov me nyuam neeg sawv daws siv kev dag yog ib yam loj.
    C. Leej tib neeg ua neej nyob ntiaj teb no, tos muaj kev tsis sib haum xeem los yog sawv daws nyiam txais dab kev haub ntxiag dag los siv, thiaj zoo li peb pom niaj hnub no.
    Vim tej hais no ntag nyiam no, ib haiv neeg thiaj tsis nyiam lwm haiv neeg. Tab txawm yog ob kwv tij, los ob txiv tub, tsis sib haum los yog tawm ntawm kev dag los tib si.
    Sawv daws puav leeg raug dab ntxias kom muaj kev dag tas txhua tus. Neeg muab txoj kev ntseeg zoo ntxeev los ua kev phem ntau tas zog, vim tib co kev dag no nkaus xwb.
    Cov thawj neeg ua nom ua Tswv coj plaub tsaws ntug los dag. Cov thawj neeg qhia kev ntseeg los ib nrab neeg puav leej yog neeg dag tas nrho.
    Hais tib yam kev ntseeg uas ntseeg txog Yes Xus lub npe xwb cov tseeb thiab cov cuav muaj sib npaug zos li. Lawv muab Tswv Ntuj lus los coj tsoom npoj yaig.
    Hais raws nraim li lub Moo Zoo tab sis muab ntxeev ua kev phem ua tub qaug rau tus Tswv Ntuj tseem ceeb ntau tshaj li.
    D. Hais txog saum kev ntseeg txog nroj tsuag xyoob ntoo, Yog Tswv Ntuj tsim los ua neeg ntiaj teb los tsisj txhu zaub. Puav leej yog yam zoo yug neeg txoj sia, zoo ua dej tshuaj kho neeg tej roj tej ntshav.
    Kom tau noj qab nyob zoo, Los neeg kuj hais tias, yog dab li tib si, cuag hom nroj los ntoo ntawd yog dab tsim los. Yuav muab ib yam tshuaj twg rau neeg tej mob nkeeg.
    Mas hais tias yuav hlawv xyab hlawv ntawv thov dab mam muab los siv, dab thiaj pov hwm kom zoo. Kev hlawv xyab hlawv ntawv tsis yog xub hlawv rau dab ua ntej.
    Thaum neeg poob ua kev txhaum lawd, NTuj muab txhua yam zoo rau neeg noj, los neeg siv. Neeg muab cev rau Ntuj ua txoj hauj lwm kom Ntuj Pov hwm, neeg khwv noj khwv haus.
    Thawj tug poj niam raug dab kev dag ntawd, nws ob tug tub. Yog Kas Ees thiab As Npes nkawd, Ib yug yug tsiaj, hos ib tug cog qoob loo, txiv xyoob txiv ntoo.
    Nkawd tau muab nkawd cov hauj lwm los hlawv rau Tswv Ntuj. Kom Tswv Ntuj saib nkawd cov hauj lwm muaj nuj nqes, kom khwv txaus noj txaus haus mus kav laus.
    Los lus hais tias, muaj dab tshuaj no, yog lus dag, tsuas yog tsis zoo sib thuam xwb. Ntuj Nws twb tsim nroj tsuag xyoob ntoo ua ntej puag thaum twg los lawm.
    E. Hais txog kev ntseeg tuav tseev Ntuj Plig, xws kev neeb kev yaig ua khawv koob. Hu Plug Plig saib yam ub yam no. Tsis yog Dab kev cai, yog Neej kab lis kev cai.
    Tej yam hais no puav leej yog ua los thaiv dab, neeg ntseeg tias muaj mob los ntog, yog tsis muaj kev hlub. Ces dab paub dab yuav los coj los coj mus.
    Ces neeg yuav muaj mob, yuav tuag mus, ces tau mus ciaj ua dab no. Ces neeg ua tej ntawd los tiv thaiv kom dab tuaj muab tsis tau neeg tej ntsuj plig xwb.
    Yam no hais tsis yog kiag lawm, ua li cas los tsis muaj zog los muaj hwj chim. Ces hais rau dab sab kom neeg ntshai thiab muaj zog tuaj. Ces txhua yam mam muab fij rau dab tias:
    Yuav tau hais li ub li no kom neej tau ntseeg thiab dab tau hnov. Ces mam li hais tau tias yog kev ua dab. Tawm ntawm dab kev dag los.
    Hais tas nrho lus, tsis muaj chaw cob ces muab cog rau dab xwb. puav leej tsis yog dab li los dab tug ib qho li.
    Sim muab xav los saib yog zoo li cas tiag! Raug dab mas tseem ntshai thiab txom nyem tsis cuag li raug neej! Yog ib tug neeg ua rau neej lawm, nws yuav tau mus thov.
    Los mus pe tus neeg ntawd kom nws zoo siab tuaj, Tseem yuav tau thov txog 1,12 lag nyiaj. Thiaj mam tau, los luag mam li zam.
    Yog nws ua tub qaug neej loj lawm, tub Ceev Xwm ntes, nws mus kaw. Peb hnub, peb hlis, peb xyoos, los 30 xyoo. Nws yuav muaj kev tu siab kev txom nyem ti nkaus txha.
    Hos yog koj ua tub qau dab lawm, koj yuav hlawv ib tswm xyab ib vam ntawv rau dab, ces dab twb kam lawm. ib vam ntawv thiab ib tswm xyab nyuam qhuav rau nyiaj li $5,00, xwb.
    Tej niag kev cai no, tej hom muaj xib hwb tej hom tsis muaj ib tug neeg paub los tsis muaj Xib Hwb. ces tsis muaj kuab. Yuav tau hais tias, Dab thawj los dab qhia thiaj paub los thiaj txawj. Hais kom muaj qib muaj quag nrog lus xwb.
    Qhov tseeb yog Tswv Ntuj pub ib lub Tswv Yim thoob tsib rau neeg kom nws paub txog los txawj siv txawj ua. Qhov kawg ho muab hais tias yog Dab thawj los dab qhia los.
    Lub Keeb yog txuas los ntawm Dab xub tau dag neeg tus thawj Leej niam ua ntej lawm, ces lub keeb dag tsis pluam ntawm neeg nplooj siab ntsws mus tau sai li. ces neeg thiaj nyiam, hais li ntawd.
    F. Hais txog cov thawj neeg kev dag rau lub tswv yim thiab rau lub cev, mas muaj ntau kawg li thiab:
    a- Ua ntej xyoo 2000, muaj ib tug Xib Hwb hauv kev ntseeg Yes Xus lub npe hais tawm tias, ntuj yuav kawg Yes Xus yuav nqes los. Nws coj nws pab neeg haus tshuaj tuag tas nrho.
    b- Xyoo 2000 Kuj muaj ib tug hais tias, ntiaj teb yuav tag mus nyob rau Mis Kuj teb los yuav tsaus ntuj xya hnub xya hmo.
    Ua rau ntau leej khiav tawm teb chaws, cov tsis khiav lawv kuj ntshai tsam ntuj tsaus. Lawv yuav tej kem tsev txhuv noj, los kas poom nqaij cia tseg tsam ntuj tsaus tsis muaj dab tsi noj.
    c- Xyoo 2015 thiab 2016 kuj muaj cov hais tias ntuj yuav tag teb yuav kawg. Yes Xus kuj yuav nqes los.
    d- Xyoo 2017 no lub 9 hli tim 23 muaj ib pab hais tias, ntuj yuav kawg tiag tiag li, Yes Xus yuav nqes los ntag
    e- Muaj ib tug Xib hwb nyob Ntsov Ntsias nws muaj Tswv Ntuj tus npaws xov tooj. nws niaj hnub hu mus nrog Tswv Ntuj tham lus tau. Leej twg xav thov dab tsis, mas mus thov nws hu xov tooj rau Tswv Ntuj tham tau no.
    Tab sis Ntuj cov lus mas tsuas yog nws hnov tau xwb, luag tej hnov tsis tau. Nws mam txhais los. Muaj ntau tus niam tsev mus kom Tswv Ntuj saib lawv txoj hmoov saib puas zoo.
    Cov poj niam ntawd, lawv qhuas kawg thiab lawv zoo siab, npuaj teg tas nrho li no.
    Zaj lus no kuv sau los ua kev kawm paub txog yam tseeb los cuav xwb.

    Yaj Zoov Ntxheb X.H.



    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 4th October 2017, 10:13 pm



    Zaj 291- TXIV NEEJ LUB HWJ CHIM LUB PEEV XWM.


    Zaj piav txog txiv neej lub hwj chim los lub peev xwm no, yog ib lub hwj chim peev xwm muaj zog kawg. Nws muaj zog muaj peev xwm, tiv thaiv tau neej thiab dab kom txhob los paug rau hauv vaj hauv tsev tau.
    Yam li ib lub tsev neeg twg,yog muaj tus txiv tsev nyob hauv lawm, mas neeg kuj saib taus, dab los kuj pov hwm zoo thiab. Muaj niam muaj txi roos, tej tub ki kuj hlob tau plhis ncos.
    Cuag li yog Ntuj pov hwm, thiab neeg saib taus lawv. Muaj xwm dab tsi los luag txib luag hu, lub zej zog muaj chaw vam khom sab laj ntaus tswv yim nyob nce toj nqes hav nrog ncig.
    Yog thaum tsi muaj tus txiv tsev lawm, lub tsev ntawd nyob ua poj ntsuam los tub ntsuag. Neeg saib tsis taus, tsis hwm tsev neeg ntawd zoo lawm.
    Kuj cuag li neeg los aib tsis taus, hos dab los kuj tsis pov hwm lawm. cia zej zog tsawm thiab thuam ua neeg tsis tsim txiaj. Cov tub ntsuag los luag tsis hwm, tus poj ntsuam los luag saib tsis taus.
    Tsoom txiv neej nruab zej zog xav tias, niag poj ntsuam lawm ntshai yuav yooj yim mus so taw rau. Cov txiv neej tsis hais cov laus cov hluas li.
    Sawv daws nrhiav mus ntsib cia tau so taw, txhob txwm mus hais lus ntau ntau rau. Kom tau swb lus, ces swb cev rau tau so taw.
    Thaum zoo li no lawm, ces hu Ntuj los cuag li Ntuj pab tsis tau, hu dab los dab tsis pov hwm li lawm. Qhov tseeb mas tsis yog Ntuj tsis pov hwm. Los yog nws hmoov phem.
    Yog neeg neeg txhob txwm ua kev txhaum los ziab rau Ntuj saib xwb. Thiab tsis yog nyiam los hlub vim tus poj niam ntawd raug kev txom nyem.
    Cov txiv neej ua txoj hlub kom tau kev so taw ua lawv kev zoo siab rau sab kev ua txhaum kom tsim nyog. Hos yog hais txog dab, mas dab nyiam tshoj kom tsoom txiv neej siv cov neeg tsis muaj zog li cov poj ntsuam no.
    Los ua kev txhaum so taw rau cov txiv neej, kom neeg tau ua kev tub qaug rau Ntuj, kom Ntuj tsis zoo pov hwm cov neeg txom nyem mus kom kawg lawv lub neej.
    Thaum dab ntxias tau tsoom Txiv neej, kom saib tsis tau tej tus poj ntsuam li no, mas neeg tsis paub xwb. Dab twb ua tej lub koob tsheej lom zem rau dab tsheej hnub tsheej hmo los cav thiab qhuas txog cov txiv neej nyiam mus so taw rau cov poj ntsuam li ntawd kawg lawm.
    Lo lus uas Hmoob hais tias, dab xwm kab los dab roog tsis pov hwm, mas yeej tseeb kawg. Raws li Hmoob teev tiam los, mas ob tug dab no yog pov hwm.
    Kom Hmoob ua neeg muaj txiag nplua nuj, txhob muaj vij sub vij sw los ua xyob txhiaj. Kom khwv muaj noj muaj haus hlub tau cov neeg txom nyem mus.
    Thaum ib tug neeg kov tej kev so taw no, mas yog kev xyob txhiaj mus lawm tiag! Vim nws txoj kev pub nyiaj rau tsis yog kev pab neeg txom nyem, yog muab nyiaj qhib cov neeg txom nyem lub siab los ua kev txhaum.
    Vim ib tug neeg txom nyem tuaj lawm, mas nws pluag txhua yam: pluag nyiaj txiag, pluag kev noj haus, los pluag kev hlub tib si.
    Thiaj ua rau nws tau swb ncauj swb lus thiab swb cev nrog. ces kev phem los plooj qhov musg tas. Ces nws thiaj ua neeg tsis paub txaj muag, nws thiaj raug luag zej zog ntxub thiab saib tsis tau nws.
    Haiv neeg nyiam ua tej kev txhaum no, mas cov vij ntawd yuav nyob nrog haiv neeg los pab neeg ntawd ntau tiam. Vim tej niam tej txi, lawv tsuas hais tham qhia tej tub ki ces tej tub ki khaws tseg rau lawv nruab siab nyob ntau tiam mus.
    Tej hais no, mas puav leej yog xwv txheej xwb, cov xwv txheej no, ua rau kom neeg txoj sia nyob tsis ntev! Yuav hais txog txoj sia:
    Peb ua neej nyob ntiaj eb no, yog tsis paub txog mas muaj ntau tsav ntau yam, los ua xwv txheej rau cov txiv neej. Ces cov txiv neej txoj sia luv dua cov poj niam.
    Cov txiv neej lawv muaj peev xwm thiab muaj zog, lawv ua cov hawj lwm hnyav dua cov poj niam. lawv lub zog xub ntaug dua ua ntej thiab, ces lawv tuag sai dua.
    Cov txiv neej lawv tsis paub txuag lawv lub zog, tab lawv nrog poj niam pw xwb los lawv siv zog cuag li ua ib txoj hauj lwm hnyav uas tawm hws dug xwb.
    Tseem ntxiv rau tej kev tsis sib nkag siab, uas ib leeg tsis to taub txog leeg. Sawv daws puav leej yog neeg ruam, tsis txawj cais lus.
    Sib raws tsis cuag, xwb los ib tug los ntxov lwm tus ho los lig, los cia li ua chaw tsis sib to taub. Xav tias ntshais yog muaj siab rau Hmoob tej txiv neej los Hmoob tej poj niam lawm.
    Ob niam txiv no ua tsov rog nrog quav dev, ib tug liam rau lwm tus muaj siab rau Hmoob li ub li no. Muqj qee leej neeg ruam tiag.
    Muab twm rau cab ces cia li cab lawm, nws cia li, muaj kev paub kev ntshaw. Ces cia li mus nrhiav ua neeg liam mus, thaum kev xyob txhiaj los raws tau ces ua neeg liam tiag li lawm.
    tsis xav sib raws ua noj ua haus khwv kom muaj xws li zeej tsoom neeg. Muaj me ntsis los xyaum ua neeg siab dawb, muab mus pub ua kev muas luag nplooj siab los ua si.
    Tsuav muaj kev kaj siab xwb, nkawd tej kev ua rog quav dev tsis paub tas li. qee nkawm niam txiv, mas ib hnub ua rog peb zaug los twb tsis tau tsau ntuj thiab.
    Hmoob hais muaj los lus no tias, neej dab nyob ua ke, dab neeg nyob sis nce. Neej dab nyob ua pawg dab neeg nyob sis xyaws, ces yog cov txij nkawm coj li hais no ntag.
    Tej uas hais no tiag yog cov xwv txheej los raug cov txiv neej ua kom lawv txoj sia luv. Cov txiv neej lawv raug cov xwv txheej no, mas cov nyob tshaj 80 xyoo rov saud thiaj yob cov tsawg.
    Cov Xwv txheej hais no, tsis yog raug cov txiv neej xwb, yeej raug cov poj niam txhua nrho thiab. Tab sis poj niam ua hauj lwm sib zog.
    Ces cov poj niam nyob siav ntev dua, poj niam ua hauj lwm sib, los poj niam khwv dua cov txiv neej ib npaug ntxiv.
    Yam li nyob hauv lub cuab yim, los poj niaj leg pluas noj ntau dua. thiab nws saib txog tsev neeg, tej tub ki kev noj kev hnav kom du dais xws teb chaws.
    Tej no xwb los, ua ntau dhau lawm kuj raug xwv txheej tau. muaj kev txhawj xeeb txog lub cuab lub yig. tseem muaj nrog txiv neej tej rog quav dev hais los lawd thiab.
    Kev tu siab, nrog kev tu tub ki thiab kev khwv muaj sib npaug, yog tseem pluag kev hlub thiab. Ces lawv yeej raug xwv theej ua kom tuag sai mus tau thiab.
    Yog hais qhov tseeb tiag mas tej ua niam ua txiv lawv txoj kev tuag yeej tsis yog raug kab mob tuag. Nws xub raug xwv txheej ua ntej lawm.
    Zoo li Hmoob hais tias, raug dab nyuaj tsis cuag li raug neej.
    raug neej, mas muaj kev tu siab, kev ua tsov rog los ntawm txij nkawm. los sis los ntawm tej kwv tij tsis sib raug zoo. Los pluag kwv pluag tij, thiaj raug neeg saib tsis taus ntawd los.
    Hos pluag kev noj kev haus, ntxiv siav ntxiv zog tsis txaus. ces nws lub zog roj ntsha tsis yeej tej sab foob khaub thuas, nrog huab nrog cua, dej nag tuaj. nws lub cev swb tas txhua yam hais no lawm.
    Ces nws mam li tuag mus, Neeg tsis paub txog tej hais no ces neeg hais tias raug mob tuag lawm. qhov tseeb tus neeg no nws xub raug tej xwv txheej no, ua ntej lawm mam ua mob.
    Yog yuav hais kom tseeb, mas cov txiv neej tsis tau muaj tshaj li 80 xyoo rov saud, mas puav leej yog raug xwv txheej tuag xwb. feem ntau.
    Zaj lus no, kuv sau los ua kev paub kev kawm rau peb sawv daws xwb od. tsis tau muaj ib tug hais ces kuv qog luag tej lus los hais ib zaj li no li.
    Yog hais tias, ib tug neeg xav kom yoog tau txoj kev kom txhob tau ua tej kob tsov rog quav dev no, nyob hauv nws lub neej.
    Mas muaj ob txog kev taug, koj yuav xyaum taug txoj kev mus nruab yeeb. kom tus xav ua rog quav dev ntawd khiav tod tuaj, ces kom mus nruab yeeb koj thiaj yeej!
    Txoj kev mus nruab yeeb, yog txoj kev zam, thiab txawj mloog cov lus tsis tseem ceeb. txhob npau taws, txhob ua neeg nyiam kev cib nyeej.
    Txhob ua neeg paub paub kev luag ua tub qaug rau koj, thiab koj ua neeg ib nyuag lag ntseg me ntsis txhob hnov lus sai sai. Yog muaj lus lawm,Koj xub ua tus swb nws mus ua ntej lub caij yuav npau taws rau tej yam tsis muaj qab hau ntawd.


    * Yaj Zoov Ntxheb Xib Xwb.*



    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 12th October 2017, 6:31 am


    Zaj 292- TUS NYIAM THIAB XAV MLOOG TUS TSWV LUS.

    Nyob ntiaj teb no, yog koj txawj nyiam koj tus Tswv lawm. Mas koj yuav tsis ntshai txoj kev tuag! Txoj kev tuag yog txoj kev muaj tsim nyob nrog tus Tswv li Yes Xus.
    Uas niaj hnub no nws muaj hwj chim loj tas nrho nyob ntawm tus Tswv sab xis. Tiam tom ntej no, cov neeg nyiam lawv tus Tswv lawv yuav yog cov noob nplej zoo. Uas tus Tswv yuav muab cog rau hauv Nws daim teb tshiab uas Nws tau npaj tseg.
    Tas nrho, cov uas Hmoob tau hu ua Huab Tais thiab Tim Tswv no. Mas kawg Yog Vaj Yes Xus tib leeg xwb thiaj rov muaj txoj sia nyob. Uas Nws zaum nyob ntawm Tus Tswv sab xis.
    Thiab Nws tau qhia tias, cov neeg mloog tus Tswv zaj lus qhia. Txhua tus yuav rov tau txoj sia los ua puav pheej, kom sawv daws txhob ntshai kev tuag.
    Lub kee tiam uas tus Tswv tau tsim neeg, los nyob ntiaj teb no ib zaug los lawd. yog los ntawm ob tug niam txiv hauv paus, uas ntawv faj lem hais tias:
    Yog As Das thiab Es Vas ntawd los, uas Hmoob hu ua Nkauj Iab thiab nraug Oo no. Ob tug niam txiv hauv paus no cov tub raws li Hmoob hu muaj:
    A- tus hu ua Niaj Mab.
    B- Tus hu ua Niaj Sua.
    C- Thiab tus hu ua Niaj Hmoob.
    ac- Niaj Mab yog tas nrho cov neeg muaj tsos nqaij daim tawv dawb, nyob Yus Lauj thiab nyob USA teb tas nrho.
    bc- Niaj Sua, yog cov Haiv neeg muaj tsos nqaij daim tawv daj li Suav, Cov Suav, Zim Pees, Kaus Lim, Cob Tsib, Thaib, Pha Maj, Is Daus Nes Xias,Fi lis Pi naum no....
    D- Cov hu ua niaj Hmoob yog peb Haiv Hmoob thiab cov Haiv neeg me; Xws li Co. Lij Xub, Khuaj, Laj Teem, Puab Yib, Yas, Ij Kob.... thiab qee pab neeg daim tawv dub. Cov Mab thiab Suav puav leej hu cov Haiv neeg tsawg no, lawv ua Hmoob.
    Cov Mab thiab Suav no, lawv txoj kev hlub, Mas Tus Tswv yeej qhia kom sawv daws sib hlub mus txog chaw kawg. Tas sis Mab Sua sib hlub mus raws li, kev nyob ua pab ua pawg ntau. Lawv nyiam hlub tus yog txheeb ze ua ntej.
    Thiab lawv nyiam hlub tus mloog lawv lus, qhuas txog lawv kev txawj ntse thiab kev thoob tsib ntawm lawv. Lawv thiaj hlub thiab muaj kev zam rau.
    Cov Mab thiab Sua lawv tus Vaj coj, cob qhia kom lawv sib twv siv tswv Yim thiab peev xwm los sib tawm tsam saib leej twg muaj peev xwm thiab muaj kev thoob tsib ntse thiaj loj dua cov.
    Yuav siv lawv cov peev xwm kev thoob tsib no los tav sawv daws kev kom sib hwm raws li txoj cai, pom zoo los ntawm coob leej ntau tus lub suab los.
    Cov Haiv neeg tsawg li Hmoob, mas lawv yuav siv tus Tswv txoj cai los sib twv ua tus, nkauj siab dawb Nraug siab huv los sib twv ua tus tshaj lij nyob thiab ua neeg zoo nyob ntawm tus Tswv xub ntiag.
    Tus Tswv mam li tsa lawv, los ua tus thawj neeg siab ncaj thiab dawb huv los ua tus Tim Tswv zoo tshaj cov. Muaj qee leej neeg tau txhais tus Tswv zaj lus zoo los hais tias:
    Lub kee ntuj los lub quag ntuj uas Phus Thas Caub, thiab Yes Xus los, mas yog, Mab Sua cov Vaj thiab Mab Sua cov Huab Tais los kav ntuj!
    Peb neeg ntiaj teb peb lub tswv yim me kawg, yog txhais li ntawd puas yuav yog qhov tseeb. Ntshai peb leej tib neeg yuav tsis paub tias, txhais tau los ua qhov tseeb. peb tsis paub tseeb puas txhais tau ua qhov tseeb. Los tsis tseeb!
    Tus txhais ua ntej no hais tias:
    Phas Phus Thas Caub, Nws npua ntaub daj, Nws tus tseev tsim{Politiques} Yog yog sib dag mus dag los, kom muaj yeej no. Tsis paub puas yuav tseeb li ntawd!
    Hos Yes Xus mas Nws npua daim ntaub liab, mas yog ntshav. Yes Xus tus tseev tsim muaj ob yam:
    a- Yuav muaj neeg ntxub Yes Xus txoj kev ncaj ncees heev, vim neeg nyiam nyob hauv kev tsaus ntuj. Kom tau tsiv nraim ua kev txhaum ywj siab.
    b- Cov tsis nyiam yes Xus tej lus, mas lawv yuav muaj kev sib tiv muaj sib ceg, sib ntaus sib tua. Ua kom nqaij ntuag ntshav nrog. yam twg hais tsis sib haum lawm ces npaj ua tsov rog los sib tua kom muaj yeej muaj swb mus.
    Kuj zoo li muaj li tus xub txhais ntawd hais thiab, Cov ntseeg txog Yes Xus lawv twb ua tsov rog los tau ntau tiam neeg lawm tiag thiab.
    E. Tus xub txhais ua ntej ntawd, nws hais tias, Hmoob tus Tswv los ntawm, tus saib cov haiv neeg tsawg los. Cov Haiv me. Mas tsuas hais tau tias:
    Yog Hmoob tus Vaj, hu ua Niam txiv Vaj Hmoob no xwb. muaj ntau lub npe zoo li yog ib co npe ua Ntuj tau tsim muaj nyob los lawd!
    Thiab yog ib co npe nyob hauv cov kwv huam los dab neeg Hmoob los, zoo li yog ib co qub Tim Tswv. Twb muaj npe nyob los tau ntau puas xyoo los lawm.
    Muaj tshaj txhiab pua xyoo los lawm thiab. zoo li:
    Yog cov npe hu ua Vaj Tswv tshoj, Vaj Xeem Xais, los Nkauj Ntsuab Nraug Nab thiab Nkauj hnub Nraug Hli lawv cov npe no.
    Tab txawm yog cov npe no, los yog peb tau hnov lawm peb kuj thuam tsis nyog. Vim lawv yog ib co npe muaj koob meej nyob saum ntuj los nyob ntiaj teb no dua ib zaug los lawm.
    Qhov zoo ces yog zwm rau ib co npe dawb huv, uas yog Tus Tswv tau tsim los. Kom muaj lub npe ntawd, nyob rau cov Haiv neeg tsawg. Tau nco txog thiab teev hawm los pab sab Ntuj plig ces yeej zoo kawg.
    Kuv kuj pom tias tus hu ua Hlav Pub Xeem Txuas no. Nws cov lus muaj Tus tswv lub Tswv Yim zoo nyob hauv, cia los qhia Haiv Hmoob.
    Sawv daws yuav nco ntsoov khaws nws lo lus los mus coj, kom Haiv Hmoob tau txav los zwm ua tus Tswv ib tsoom tub ki dawb huv mas yeej txaus siab lawm. Qee tus Xib Hwb tseem hais meej tsis npaum li ntawd.
    Peb yuav qhuas thiab ua tus Tswv tsaug rau qhov Tus Tswv tau xaiv tej tus neeg thoob tsib pab tshaj thiab ceeb toom rau Hmoob tau paub txog tej yam zoo no.
    Tsis muaj ib yam uas yuav tseeb tshaj li lo lus kom tib neg los sib tw, ua Tus Tswv cov Nkauj siab dawb Nraug siab huv no li nws tau hais.


    *Yaj Zoov Ntxheb X.H.*



    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5347
    Date d'inscription : 2009-08-18

    Re: XH. Yaj Zoov Ntxheb lub Tsev THOOB TSIB

    Post  Maiv Tooj on 18th October 2017, 10:46 pm



    Zaj 293- TUS NEEG NRHIAV KOOB MEEJ HWJ CHIM.



    Cov neeg nrhiav lub koob meej hwj chim nyob ntiaj teb no, lawv nyiam kev muaj koob meej, hwj chim los kev ua neeg nplua nuj.
    Mas lawv yuav khiav tsis dhau ntawm ob yam yam no mus. Lawv yuav mus tsis dhau ntawm lawv txoj kev muaj koob meej thiab ua neeg nplua nuj. Hnub kawg lawv yuav txais, txoj kev pluag mus ib sim neej.
    Cov nrhiav ob yam no, yog cov neeg nyiam kev ua neeg muab hlob thiab khav theeb. Cov coj li no, yog cov neeg tsis kam swb rau leej twg li.
    Lawv toj kev muaj koob meej thiab ua neeg nplua nuj no, yog muab hmoov zeb sib los tim thee pleev roj, los zas ntsej muag, kom ci tshiab nrog tshuaj tsw qab xwb.
    Thaum tshuaj tsw qab thiab roj yaj tas lawd, lawv yog neeg ceb muag. Muab ntxuav tawm tas kawg tshuav tawv qhwv pob txha lawm xwb.
    Nyob hauv lawv lub tswv yim tsis muaj dab tsi li, kawg yog hmoov nrog hmoov ncaig tim roj cia zas ntsej muag kom dawb nkaus lawm xwb.
    Lawv nyiam lub meej mom thiab tsa hwj chim xws li ib co Tim Tswv loj muaj koob meej thiab muaj peev xwm nyob ntiaj teb no.
    Lawv nyiam kev ua ib tug Tim Tswv loj, saib tas txhua yam muaj tuaj nyob ntiaj teb no. Qhov no lauj! Yog txoj kev uas lawv yuav tawm tsis tau ntawm kev nrhiav lub koob meej thiab ua neeg nplua nuj.
    Lub txiaj ntsim uas lawv xav tias, tsis muaj neeg paub lawv zais ntshis, tseg nyob hauv kev ua neeg nplua nuj no. Yog lawv txoj kev pluag thiab lub koob meej tom ntej uas lawv yuav ua neej nyob nrog mus tas tiam dhau tiam ntag.
    Cov no yog cov neeg yuam kev loj, thaum lawv ua neej nyob ntiaj teb no. Lawv yuav tig rov los tsis tau lawm. Vim tiam tias, lawv tau yuam kev mus deb dhau lawm.
    Lawv tau yuam kev mus deb txog theem xav nce mus ua ib tug Tim Tswv loj nyob ntiaj teb no lawm. Kev muaj nyiaj txiag thiab muaj koob meej nyob ntiaj teb no, yog txoj kev cuav.
    Nyob rau tiam tom ntej, cov nyiaj txiag thiab lub koob meej no, nce mus tsis nto pem ntuj kag.
    Cov neeg yuav ua kom lub ntiaj teb no rov tshiab tuaj tuaj, yog cov uas nws tsis xyeej kev iab kev khwv. lawv txawj hlub neeg ntiaj teb txhua tus.
    Noj sib faib haus sib ce, pom txog cov neeg pluag neeg txom nyem. Lawv txoj kev muaj koob meej thiab npluaj nuj loj nyob rau tiam tom ntej, txoj kev ua leej tib neeg muaj hmoo, mas lawv xav tsis txog li.
    Nyob hauv cov ntawv faj Lem hais txog cov neeg muaj hmoo thiab muaj koob meej nplua nuj nyob saum txheej ntuj siab, yog cov neeg txom nyem nyob ntiaj teb no ntau xwb!
    Cov uas Leej Ntuj Plig Ntshiab tshoj kom neeg ntiaj teb nrog Qaum Ntuj tsa ua leej Ntshiab. Feem coob yog cov pluag ntawd, Lawv cia li hloov los uas Leej Ntshiab muaj koob meej thiab nplua nyuj nyob saum ntuj.
    Cov ua neeg nplua nuj nyob ntiaj teb no, tsis tau muaj ib tug ua leej ntshiab loj nyob saum ntuj li. Tus uas Yes Xus tau hais, tus hu ua Las Ntxas Los txom nyem nyob ntawm tus neej npluaj nuj lub qhov rooj.
    Uas nws ntshaw noj cov mov poob saum tus nplua nuj lub rooj noj mov poob los rau haub av. Tiam tom ntej nws nyob ntawm Tswv Ntuj xub ntiag...
    Ib tug ntxiv, kuj yog tus hu ua Mab Liab Mas Ntas Las. uas tus neeg npluaj nuj xav hauv nws nruab siab tias, uas cas Yes Xus yog Tswv Ntuj tus Yaj Saub.
    Vim li cas nws nyiam nog ib tug neeg muaj txhaum li ntawd. Yes Xus paub hauv nws nruab siab, Yes Xus hais tias, yav tom ntej yuav muaj ntau leej tuav txog Mab Liab Mas Ntas Las lub npe. Los nrhiav kev ua neeg muaj koob meej kom tau ua neeg nplua nuj nyob saum ntuj.
    Kwv tij zaj lus no, sau los ua puav pheej rau cov neeg uas lawv nyiam kev muaj koob meej thiab ua neeg nplua nuj, nyob ntiaj teb no. Thaum txog hnub yauv txais lub koob meej muaj hwj chim ntawd, ces lawv hloov los ua tus neeg pluag.
    Vim lub koob meej ua neeg nplua nuj nyob ntiaj teb no raws li neeg xav, mas yog lub Koob meej thiab kev nplua nuj cuav.
    Yaj Zoov Ntxheb Xib Xwb.




    Sponsored content

    Re: XH. Yaj Zoov Ntxheb lub Tsev THOOB TSIB

    Post  Sponsored content


      Current date/time is 21st October 2017, 3:04 am