XH. Yaj Zoov Ntxheb lub Tsev THOOB TSIB

Lub zim txwv no, leej tib neeg muaj kev vam meej mus rau txhua fab. Mas kuj muaj cov neeg dag coob zuj zus tuaj.
1.Hais txog cov neeg nyiam kev dag, mas lawv kuj tsis yog cov neeg tsis paub txuj. Feem coob cov neeg dag no, lawv yog cov neeg muaj txuj ntau.
Lawv dag kom tau noj tau haus, los dag kom lawv tau ua neeg nplua nuj muaj nyiaj siv, ces txaus lawv siab lawm!
2. Cov neeg dag no, lawv xyaum dag kom muaj neeg ntseeg tias: Lawv paub yam ub los yam no zoo, kom muaj neeg ntseeg thiab saib lawv yog zoo li ib tug tub los ib tug ntxhais, uas yog Ntuj tso los.
Lawv paub txog neeg lub neej, paub txog neeg tej kev ua txhaum los kev khaum. Kom neeg mus daws lawv kev txhaum kev khaum, tau them nyiaj rau nws. Kom nws tau daws neeg tej teeb meem, kom neeg tau noj qab nyob zoo.
2. Kuj muaj cov neeg dag rau cov neeg txom nyem uas lawv tsis tshua paub tab tias: lawv tej ntaub ntawv tsis tau meej thiab tseeb, Kom qhia lawv tej chaw nyob los tus tsiaj ntawv xam phaj nyob hauv lawv tej tsev ceev nyiaj mus rau nws.
Nws yog tus saib los yog tub ceev xwm, ces yuav tau kho dua tshiab, tsis li, mas lawv yuav raug txiav nyiaj mus, yog txiav cov nyiaj uas Nom Tswv tau muaj los yug lawv kev noj kev haus.
Cov neeg txom nyem tsis paub tab no, tau qhia tas, ces siv lawv tus ntawv tsiaj xam phaj mus muab lawv tej nyiaj nyob hauv Ban rho mus siv tas nrho lawm.
3. Muaj qee tus neeg nyiam ua politique kuj tau dag tias, tus neeg tsis muaj ntaub ntawv nyob raug kev cai. Yuav raug xa lawv rov qab mus, nyob lawv tej qub teb qub chaw, uas lawv tau yug los.
Ua rau muaj neeg tau kev txhawj xeeb, lawv noj tsis qab pw tsis tsaug zog los muaj.
4. Cov ho dag tias, koj raug ntxub los ntawm yog neeg txawv nqaij txawv tawv. Ua rau lawv nyob tsis tiaj tus, lam nyob lam ntxub txog cov neeg nyob txum tim rau lub teb chaws los muaj.
5. Cov neeg dag tias, lawv niam muaj tej hom tshuaj kho mob zoo heev, kho tau tas puas tsav yam mob nkeeg. Leej twg yuav tau, mas nws tej mob yuav zoo hlo mus tas txhua yam mob.
Thiab nws yuav tsis muaj mob, ntxiv mus rau yav tom ntej lawm. Ua rau tej neeg tsis paub tab them nyiaj mus yuav. Lawv poob nyiaj mus lawm cis tub.
Yeej muaj tej yam zoo tiag thiab, tab sis yuav tsis muaj tej yam zoo tas txhua hom mob li hais no.
6. Cov ho dag kom muaj neeg ntseeg coob leej tias: Muaj tej tus neeg yug poob nthav los xwb, nws twb txawj hais lus lawm. Nws paub neeg tej teeb meem yav dhau los tib si.
Yog leej tawg xav paub thiab mus daws tej teeb meem yav thaud, uas tej pog tej yawg tau ua kev txhaum kev khaum los. Mas nws daws tau kom nyob dawb nyob huv mus tas sim neej.
7. Kev uas cov leej tib neeg dag no, yog piav kom tas, mas tseem tshuav ntau yam heev. Yim piav yim muaj ntau tuaj.
Cov neeg coj txoj kev dag no, lawv tsis paub, lawv puav leej yog dag rau Qaum Ntuj tib leeg xwb. Tsoom neeg txom nyem tsis paub qab hau no, txhua tus puav leej yog Qaum Ntuj los yog Vaj Tswv me nyuam.
Koj tau dag rau ib tug neeg lawm, mas yam loj tshaj plaws, yog koj tau dag Vaj Tswv los dag rau Huab Tais Ntuj lawm.
Los cov neeg dag no, yeej tsis zeem li, tseem niaj hnub nrhiav kev dag quj qees ntxiv mus, yam tsis paub txaj muag rau Tswv Ntuj li.
8. Zaj lus no, yog sau los qhia rau cov neeg nyiam txoj kev dag, nyias paub nyias tias, koj dab neeg. Ces yog koj tau dag rau Qaum Ntuj, uas yog tus tau tsim koj tuaj ua neeg nyob rau ntiaj teb no lawm ntag. Txoj kev dag no, tsis tshua zoo dag rau lwm tus neeg. Yuav ua rau luag yuam kev mus poob qhov ntuj.
Thaum muaj ib tug neeg poob rau hauv lub qhov ntuj lawm, nws muaj kev txom nyem loj npaum li cas!
Thiab Tswv Ntuj yuav hlub tus neeg txom nyem no loj npaum li cas thiab. Xav kom sawv daws paub txog thiab ceev faj me ntsis, hais txog txoj kev dag tsis muaj qab hau no.
Yog kev ua txhaum loj rau Tswv Ntuj thiab rau tus neeg raug kev txom nyem uas tsis paub qab hau no lawm ntag.

Sau nyob Sacramento
Tim 14/2/2020.
Yaj Zoov Ntxheb Xib Hwb.

Lub ntiaj teb ua zog koog rau tus kab mob Suav tuag Aws tuaj ntawm Suav teb tuaj!
=>.Peb sawv daws, yuav txhob ntshai dhau, tsam ua kev ceeb sob rau yus. Ces yus cia li swb mus, ua rau yus lub cev tsis muaj zog.
Peb yuav ras txog Yes Xus tej lus hais nyob hauv Nws lub Moo Zoo:
1.Nyob hauv Zam ntawm Moo Zoo, 10:10 muaj lo lus hais tias:
Tus tub sab, mas kawg nws tuaj nyiag, tuaj lwg thiab txo txoj sia kom xwb mus. Ces yus ntseeg raws li cov lus, dab tso hem thawj rau neeg.
Peb kuj yuav muaj kev tso siab rau tej lus Yes Xus hais nyob hauv Nws lub Moo Zoo tias: Kuv tuaj ua kom neeg cov Ntsuj Plig tau muaj txoj sia nyob kom thiab muaj zog tuaj.
2. Ntawv nkauj paj nruag hais tias:
Tab yog muaj 1000, 10 000 leej, tuag nyob ntawm koj xub ntiag. Los yuav tsis muaj dab tsi tuaj raug koj!
Lus Kas, 10: 19 Yes Xus hais tias:
Kuv pub hwj huam rau nej, kom nej taw tsuj tau cov nab muaj taug, los lawm kiav tshooj. Tsuj yeeb ncuab lub hwj chim tib si, yuav tsis muaj dab tsi ua xwv txheej tau rau nej.
A=>. Cov lus no yog Yes Xus hais, kom peb txhob ntshai thiab swb mus rau dab phem tej. Kev haub ntxias, kom yus ntshai, ces cia li ntshai tau tuag mus.
Yog yus tsis muaj kev ntseeg txaus, mas yus yuav txhob ntshai dhau tsam ces yuav ntshai tau.
B=>.Zoo li lo lus hais tias, tus tub sab, mas kawg nws tuaj nyiag thiab tuaj lwg, ua kom peb lub tswv yim puas tsuaj mus.
Yog koj ntshai tias, tsam yuav kis mob rau koj, ces koj khiav mus nkaum. Yus tab tom khiav mus thawj tus mob, los ntawm kev dag no los. Ces yus cia li yog tus swb lawm.
C=>.Zaj nkauj paj nruag 91: 7 hais tias:
Peb yuav muaj kev tso siab, yuav tsis kis rau yus sai li kev xav. Yam li lo lus hais tias: Tab txawm muaj 1000, 10 000 leej, tuag nyob ntawm koj xub ntiag, los yuav tsis muaj dab tsi tuaj raug koj.
Zaj nkauj paj nruag 91: 14 hais tias:
Tswv Ntuj yuav cawm cov neeg, uas lawv hlub Tswv Ntuj thiab lawv lees paub Tswv Ntuj, Nws yuav pub txoj sia nyob ntev dhawv rau nej thiab pub hwj chim rau nej, kom nej taw tsuj tau cov nab muaj taug thiab cov laum kiav tshooj.
Tej no yog Tswv Ntuj xav hais txog kev tso siab, txhob ntshai dab phem kev haub ntxias neeg mus ua neeg ceeb sob kom lub cev swb rau kev haub ntxias.
Vim Neeg tus nplaig, yog Dab phem chaw ua hauj lwm ntxias neeg mus poob rau kev tsaus ntuj.thiab tawm tsam ua kom neeg tsis muaj kev tso siab, kom neeg poob mus rau kev ntshai tuag.
Ces yus ua neeg ntshai loj, ces yus cia li npaj swb tas txhua yam mus. Vim yus qaug zog lawm, yus muab yus lub tswv yim qhwv cia tawm tsis tau mus rau sab twg li lawm, ces kawg tuag.
Hmoob yeej hais kam tias, koj khiav plis ces mus ntsib tsov no.
D. Yog peb muaj lub siab ntseeg thiab muaj lub siab loj siab tawv ces peb yuav tsis swb rau kev ntshai tuag. peb thiaj muaj zog tiv thaiv tau peb lub cev.
Yes Xus tau hais tej lo lus tseeb kawg, thaum peb txais Yes Xus lub cev. Peb yuav nco ntsoov nrog Yes Xus cog lus tias:
Yog koj hais, mas kuv ntseeg tias, yuav muaj raws li koj hais. Kom yus lub siab loj tuaj thiab muaj zog tiv tau kev ntshai, ces yus thiaj yuav muaj kev yeej tej xwv txheej mus rau qhov tseeb.
Yam tseem ceeb peb yuav nco ntsoov qhuas Tswv Ntuj yog tus muaj hwj chim txawj nyiam txawj hlub txhua leej txhua tus neeg.

Yaj Zoov Ntxheb X.H.

Thaum ib tug neeg laus so hauj lwm lawm, nws lub hnub nyug muaj li 70-80 xyoo lawm. Mas nws tus yam ntxwv thiab nws zaj xav yuav mus raws li cov qib lus yuav hais mus zoo li no:
1.Nws mam muaj qhov nco tias, yav nws hluas, nws tsis tau muaj kev hlub rau cov txheeb ze nws… Nws tsuas nco txog, cov nrog nws ua phooj ywg thiab ncawg nws, xav nrog nws ua si xwb.
2. Nws laus lawm, nws mam nco tias, nws tsis muaj phooj ywg. Thiab nws mam paub tias, phooj ywg yog nws txoj kev nplua nuj:
Yog koj muaj phooj ywg, mas koj cov phooj ywg coob heev. Nyias muaj nyias txuj ci, koj tau kawm los paub ntau zaj. Zoo li koj ntse tuaj thiab nyob kaj siab dua, vim koj tsis nco txog kev ntshai tias, luag yuav ua siab phem rau koj mus yav tom ntej.
Koj txawj pom tias, tab yog koj ruam, los koj pluag. mas koj cov phooj ywg lawv tsis ruam thiab lawv tsis pluag. koj muaj chaw tso siab tias, muaj kev txhawj xeeb los yeej yuav muaj tus hlub thiab pab koj.
3. Twb yog thaum yus laus muaj 70 tawm xyoo lawm, yus mam txawj xav txog tej no. Thaum no, yus txoj kev mus sib cuag, mas muaj tsawg kawg li, yus khoom los luag tsis khoom.
Tej tsam luag txawj tsav tsheb los yus ho tsis paub tsav tsheb thiab ces mus sib tsham sib cuag tsis yooj yim. Yus mam rov khuv xim ces lig rau yus kawg li lawm.
4. Zoo li ua cas yus twb laus caum tau yus niam yus txiv lub hnub nyug lawm. Yus mam paub nco txog yus niam yuav txiv cov txiaj tsim hlub yus.
Lawv twb dua toj tas lawm, yus tseem tsis tau pauj lawv tej txiaj tsim rov qab rau lawv li, khuv xim tas nrho lauj.
5. Thaum yus twb laus lawd, yus mam paub tias: Txhua yam yuav ua zoo rau luag, yus yuav pib ua mus. mas lig rau yus kawg li lawm. Yus yuav pauj tsis tau rov qab rau luag li lawm.
6. twb yog lub caij laus lawm tus laus no, nws mam pom los paub tias, yuav ua txoj kev zoo. Mas yog lig kawg rau nws lawm, ua tsis tau lawm.
Thaum no, nws lub siab twb nyob tsis tiaj tus lawm. Nws tsuas xav txog tias: Zoo li luag pheej tsis hwm thiab hlub nws thiab saib nws tus laus tsis tsim txiaj li los tsis muaj nqi li lawm.
7.Cov neeg laus li hais no, mas lawv saib zoo li cov txheeb ze nyob nrog nws. Mas nws mloog zoo li lawv tsis hlub nws, los tsis nyiam nws no xwb.
Ces nws khaws kev tu siab tuaj,muaj qhov hloov mus, zoo li ib tug neeg nyiam yws taus thiab nyiam cem neeg. Nws lam xav tias, nws cov neeg txheb ze tsis nyiam nws li.
8. Thaum ib tug neeg laus li hais no lawm, mas nws saib zoo li nws yog tus neeg paub ntau yam thiab ntse kawg. luag tej paub tsis npaum nws li.
Qhov tseeb tiag, mas nws twb hais tej lus tsis meej pem thiab tsis muaj ko lawm. tsis muaj ib lub ntsiab zoo li. Los nws tseem saib nws yog tus zoo thiab paub tshaj luag lwm tus.
9. Thaum cov hluas paub tias, ib tug neeg laus coj li no lawm. Mas cov hluas yuav nco ceev faj tias: Nws xav tsis nrog xav lawm, mas yuav tau ua lub siab ntev zam rau lawv.
10. Cov hluas, yog tsis txawj zam thiab hwm nws. Mas nws yuav nyiam tig mus rau sab, nyiam cem los foom kom muaj kev khaum mus. Los raug kev txom nyem.
11. Nyob hauv cov tub ki, los tus neeg mus saib cov laus. Mas lawv yuav to taub tias, cov laus mas lawv nyiam thiab ntshaw kev hlub kev qhuas heev.
Thaum yus mus ua ib tug Nawj, nws mus saib ib tug neeg laus. Mas tus laus ntawd, saib tus hluas no, zoo cuag li yog Ntuj xa Ntuj ib tug tshiab tuaj saum ntuj tuaj mus xyuas nws ntag. Tus laus no , mas nws zoo siab kawg li od.
12. Cov neeg laus, mas ib tug tsis xws tug thiab. Thaum laus muaj 70 tawm xyoo lawm, mas nyias muaj nyias zaj xav:
A. Ib co, mas lawv rov qhuas lawv tus kheej tias, thaum lawv hluas mas lawv niam zoo nkauj los zoo nraug npaum ub npaum no! Nws mas niam muaj nkauj Hmoob los nraug Hmoob coob npam ub npaum no nyiam nws.
B. Hos ib co, mas tham txog lawv kev ua neeg thoob tsib txawj ntse dua luag tej. Lawv ntse puag thaum hluas los lawm. Lawv kawm puag thaum lawv pog lawv yawg qhia lawv thaum tseem hluas los lawm.
Tham yam twg los sawv saib luag yog tus ruam dua nws. Yus tsis kam swb leej twg li. Saum cov lus piav txog ib tug neeg laus, hais mas tseem muaj ntau yam dua no. kuv tsuas hais me ntsis li no xwb.
Kuv hais ib yam ntxiv, yog muaj neeg xav hais tej yam tsis zoo rau koj. Los hais yus dab plig tsis zoo. Mas koj cia luag yeej, koj txhob khib.
Nws tsuas yeej tam sim ntawd xwb, cia ib ntus ntev mus ces nws cov phooj ywg lawv mam pom thiab paub tias: Nws hais lus los, tawg paj los tsis tshiab, txi txiv los tsis qoos.
Ces nws cov phooj ywg tso nws pov tseg tas, lawv mam khiav los raws koj. Ces koj mam yeej puag tom qab,ces koj yuav yeej mus tas ib sim neej li mog!


Yaj Zoov Ntxheb.

Hmoob lo lus hais tias, hlob cev tsis hlob siab, lo lus no twb raug raug peb Haiv Hmoob. Los lawm tau ntau txhiab xyoo lawm.
Peb Haiv Hmoob hais kam lo lus no, thaum Hmoob qua ntxhais, mus ua luag nyob. tej niam tej txi ntuas ntxhais mus ua neej.
Lawv nyiam hais los lus no, rau niam txiv tom ub tias:
lawv tus ntxhais no, lam loj hlob cev xwb tsis hlob siab. Tsis tau paub tab, tsis txawj hais lus thiab tsis tau txawj ua qav ua num li!
Niam txiv tom ub yuav tau mus ua lawv nyab, los tseem yuav tau cob qhia thiaj txawj ua qav ua num thiab txawj hais lus haum rau tej pog tej yawg.
Thiaj yuav haum tau rau tej uas yog kwv yog tij thiab tsoom txheeb ze hlob yau txhua tus!
1=>. Nyob hauv peb Haiv Hmoob, txhua lub xeem los txhua pab pawg neeg. Tsis hais cov ua thawj neeg los cov yog pej xeem li!
Sawv daws tseem coj thiab ua lub neej, raws nraim li lo lus no ntag. Peb sawv daws tseem tsis tau hloov tawm ntawm lo lus no mus.
Peb Haiv Hmoob tseem muaj kev xav nyob hauv peb nruab siab tias: Peb loj hlob txaus lawm, kev ua neeg thoob tsib to nrog, mas yus muaj txaus yus lawm.
Tsis thawj leej twg li, yus ua taus niam taus txiv lawm. Nyias saib nyias, loj hlob tiav hlaub tiav ces thiab tiav siab lawm. Nyias txoj kev khav theeb thiab ua neeg muab hlob, tseem hais thiab coj li Hmoob lo lus qub hais tias:
Tso quav tsis thawj xub tsag lawm, tsis ntshai quav los pob tw los lo ris lawm. Tab sis tej Mab Sua, los cov neeg thoob tsib to nrog saib.
Mas luag pom Hmoob tus yam ntxwv, uas Hmoob coj nyob nruab siab, ntawm lub tswv yim tawm los. Mas Hmoob tseem coj thiab ua raws kiag li Hmoob lo lus, uas Hmoob hais los no kiag!
2=>.Hmoob tseem yog Haiv neeg hlob cev tsis tau hlob siab, vim Hmoob tseem tsis tau txawj hlub Hmoob. Hmoob tsuas txawj hlub thiab hwm Mab Sua nkaus xwb.
Hais txog tus Mab Sua, Hmoob yeej ntxub nyob nruab siab, tab sis sab nraud. Mas Hmoob hwm tus Mab Sua loj cuag li yog Hmoob tus Huab Tais, los yog Hmoob tus Nom loj heev.
Nyob hauv txhua tus Hmoob lub siab, mas nyias tsuas paub tias: Nyias yog tus hlob cev thiab hlob siab tiav log lawm.
Hos saib tus Hmoob, mas zoo li, lam hlob cev xwb tsis hlob siab kiag li. Yus tseem muaj kev xam khib thiab cib nyeej, khaws tej qub lus cia ua kev caws ntxiab kom rov mag rau lub caij Hmoob raug kev txom nyem loj.
Tos thaum luag tau kev tws, zoo li saum lub rooj tshoob kos los lub rooj mob rooj tuag. Ces muab hais rau thaum luag raug kev txom yem, rau lub caij luag tau kev tws ntawd.
3=>.Peb yuav nco tias, peb Hmoob txhuas tus, yog nws tau ua yuam kev lawm. Mas ntshai txhua tus yeej zoo tib yam, puav leej yog cov neeg hlob cev tsis hlob siab.
Leej twg los yog neeg tsis thoob tsib li, zoo li sawv daws ua neeg ruam ib yam nkaus. Sawv daws puav leej yog neeg hlob cev xwb tsis hlob siab, leej twg sawv los ua tus coj. Los thiaj tsis paub los tsis txawj coj kom haum txhua tus li peb pom thiab paub no!
Yog leej twg txawj pom los txawj paub lawm, yuav ua neeg qhib siab lug. Txhob zais dab tsis rau leej twg, nthuav thiab qhia siab dawb paug, los sib hwm sib coj qhia kom mus nto plaws. Lub paus mus xaus rau lub ntsis rau Hmoob paub.
Kom Hmoob tsim dheev los txhob ua neeg, thoj chim xav tias, luag yog neeg phem. Yus thiaj yog neeg zoo tshaj dsawv daws, uas luag caum tsis cuag raws tsis tau yus qab li!
4=>. Peb Hmoob yog ib Haiv neeg qub tshaj thiab laus tshaj li tej Haiv neeg muaj suab muaj npe qub qub puag ntxov los lawd.
Zoo li Haiv neeg Hais Nkws Tos nyob ua ntej Haiv neeg His Xas Lais thiab zoo li Haiv Neeg His Xas Lais uas Tswv Ntuj tau pov hwm lawv puag ntxov ntxov los lawd. puag thaum Yes Xus tsis tau yug los ntawd.
Peb yuav ras txog tias, peb lub npe Hmoob ntiaj teb neeg muaj ntau haiv neeg muab tsim txom ib lub teb chaws mus dhau lub los mus lawm.
Los peb Hmoob lub npe tseem muaj nyob, yog Qaum Ntuj pov hwm. Thiaj tseem muaj Hmoob lub npe, nyob txog tav no. Peb yuav hwm, nyuav nyiam thiab hlub peb Haiv Hmoob.
Qaum Ntuj twb hwm lub npe Hmoob thiab pov hwm, los tau ntau txhiab xyoo. Lub npe Hmoob thiaj nyob txog tav ntuj li no. Hu ua leej twg yog Hmoob lawm, yuav tau nrog hwm thiab pov hwm kom zoo li zoo tau.
Txhob nrhiav xaiv lus rau, kom lub npe Hmoob phem zuj zus tawm los. Rau ntiaj teb neeg tau muab thuam mus kom ploj mus los cia li yaj mus yam ntsiag to. Uas tsis muaj Hmoob lub npe, nyob ntiaj teb no ntxiv mus lawm!
5=>. Kom lub npe Hmoob, muaj qhov phem tsis zoo tawm los. Kom txhob yog ib tug Hmoob, los ib lub xeem Hmoob tau tis lub npe phem tsis zoo no. tawm los rau ntiaj teb neeg tau paub txog Hmoob yog Haiv neeg phem.
Peb Hmoob yog Haiv Neeg txawj hu Plig neej, los hu Plig tsiaj, plig txhuv, los plig qoob plig loo, kom los nyob pub vaj puv tsev.
Peb txhua lub xeem yuav hu peb Ntsuj duab Ntsuj Plig, kom los ua ib Haiv Neeg zoo coj lub ntiaj teb dua ib zaug mus ntxiv. Muab Qaum Ntuj kev nyiam kev hlub kev pov hwm los hu Hmoob cov Ntuj Duab Ntsuj Plig rau lub ntiaj teb neeg pom.
Tias Hmoob yog ib Haiv Neeg muaj hwj chim koob meej thiab Txawj txuas lus nrog rau Ntuj Niam Ntuj Txi thiab Tim Tswv Xeeb teb xeeb chaw.
Muaj noj muaj haus, muaj kev txhawj xeeb txawj hu txog Qaum Ntuj. Thiab txawj laig txawj npws txog, Ntuj Niam Ntuj Txi tus Xeeb teb xeeb chaws los nrog noj nrog haus pov hwm pov yawm.
Kom taiv tau Vim dab vij npog, txhob muaj hmab dawm tes hlua los dawm taw. Kom mus thoob plaws rau Tub ki xeeb leej xeeb ntxwv, txheej laus mus kav txheej hluas mus txog txhiab niag tim puas xyoo.
Mus tiam dhau tiam nyob ntshiab li dej huv li txhuv, nyob ua Ntuj me nyuam mus…

Sacramento tim 5/8/2019.
Yaj Zoov Ntxheb Xib Hwb.

Muaj thawj ob hauv tshuaj zoo kho Neeg ntiaj teb tej mob nkeeg:
1=>.Thawj hauv tshuaj, yog Neeg lo lus zoo muaj muaj zog, nyob hauv neeg nruab siab, tawm los tshwm ntawm Neeg lub ncauj, los rau tus neeg nyob sab nraud tau hnov.
Yog los lus mos lus muag, nyob nrog tus neeg siab dawb. Nws txawj ua tau ib hauv tshuaj, cawm tau neeg tus Ntsuj plig thiab Neeg lub cev kom yeej mob yeej nkeeg mus!
Nyob hauv cov neeg muaj txij nkawm, thiab tsoom txheeb ze. Yog muaj ib tug Neeg siab dawb, nyob ua ke ntawd, mas Nws lo lus thiab nws txoj kev nyiam kev hlub.
Txia tau ua hauv muaj kuab tsuas zoo, los cawm Neeg txoj sia. Cov neeg paub muaj tus neeg siab dawb, ces lawv tau yeem mob yeej nkeeg mus.
Nws lo lus tshem tau kev tu siab, kom luag muaj kev nyob kaj siab lug. Tsis muaj kev txob kev txhawj, nrog kev tu siab, ua rau neeg noj hno mus poob plab, haus dej mus paug siab.
Ces neeg muaj zog, tiv tau neeg tej sab foob khaub thuas. Cia li coj Neeg mus yeej mob yeej nkeeg, vim neeg tsi tau ris kev tu siab, nyob nrog neeg kev txom nyem mus ntxiv.
Ces neeg muaj yeej txhua yam, vim neeg lub cev tau muaj zog, tus Ntuj Plig los kuj muaj zog. Nws tsis tau ceeb mus ntshai Neeg, los tau ceeb ntshai Dab.
Dab thiab mob nkeeg tsis nyiam tus neeg muaj zog ntawd, vim nws tau ua neej nyob kaj nyob huv, Nws tsis muaj kev ntshai dab hem los ntshai Neej ntxub nws. Ces nws muaj yeej kev ua mob ua ntsaj mus.
2=> Hauv tshuaj ob,yog nws tau raug ntshai, muaj kev ceeb rau Neej los ntshai rau dab. Nws thiaj tau swb rau, tus sab foob khaus mus lawm, los nws tseem muaj hmoo.
Nws muaj kev tso siab rau cov kws tshuaj kho tib neeg, nyob tom tsev tshuaj. Nws muaj kev tso siab los ntawm cov Neeg siab dawb los, nws ntshaw txoj kev ua neej nyob txuas ntxiv mus. Nw tsis seev mus rau kev ploj kev tuag.
Ntuj yuav pab nws kom muaj ib lub siab loj, rau nws kom muaj yeej, kev mob kev nkeeg. Vim nws muaj zoo tus cawm seej, nyob hauv tej tus neeg siab dawb. Ces nws yeej mob nkeeg mus.
Nws tsis muaj kev txob kev txhawj, kuj cuag li mob nkeeg tsis nyiam ua nws phooj ywg. Pom Neej los nws tsis muaj chaw ntshai, pom dab tsov los nws tsis muaj chaw ceeb.
Nws tau ua lub neej nyob, cuag li muaj zoo lub Vaj zeb xov nws, muaj zoo Loog tsua koos ruaj. kev tus siab tsis coj nws mus, zwm rau kev mob nkeeg. Tuaj haub tuaj coj nws mus zwm rau kev ploj kev tuag.
3=>.Cov neeg ua neej nyob tsis ntsib tus cov neeg siab dawb, lawv ua neej nrog vij sub vij sw. lawv tsuas muaj kev tu siab thiab kev ntshai. Thiab muaj kev ceeb ntshai los ntawm neej thiab tej dab tso los!
Mas cuag li mob nkeeg thiab kev ploj tuag, nyiam los nrog lawv ua phooj ywg sib puag ntxub ua hnub ua hmo.
Tab txawm mob nkeeg los tsis txog, los lawv seev yees mus ua phooj ywg nrog voj hmab voj hlua. Los seev yees rau txoj kev ua phooj ywg mus nrog kev dhia zeb dhia tsua nrog dej dag sib ntswg mus! Lawv saib tias, ntxov mus ntxov tau thawj thiab ces ntxov tau zoo xwb.
Yog ib txoj kev yuam kev, loj tshaj plaws rau lawv. Txij li ntuj tsim teb raug los, tsis tau muaj ib tug neeg los hais qhia tias: Nws twb tau mus thawj thiab ua ntxhais Nom los ua tub Huab Tais, nyob muaj koob meej nto moo lug mus lawm.
4=>.Ua li, mas peb cov me nyuam neeg, tseem muaj txoj kev rau peb xaiv. Peb xyaum ua neeg zoo, ces peb yuav dhau mus ua ib hauv tshuaj zoo rau neeg ntiaj teb tau siv.
Cov neeg twg tau siv, peb hauv tshuaj muaj kuab zoo no. Tseem yuav ua ib hauv tshuaj zoo, rau neeg ntiaj teb mus nrhiav tau lawv tus zoo Niam zoo Txiv. Uas yog tus Tswv Ntuj tus tsim lub ntuj lub teb no.
Peb yuav muaj nqes li cov neeg Tswv Ntuj tau tso lus rau lub Koom Txoos Ka Tau Liv muab lawv lub npe tsa los ua Leej Ntshiab pov hwm txoj kev mus ntsib tau Tswv Ntuj.
Mas tseem yuav yog ib hauv tshuaj muaj kuab zoo nqes pem Ntuj los. Mas peb haj yam yuav txaus siab, rau lub Meej Mom Koob Meej. Uas Ntuj tau tso peb tuaj ua ib sim Neeg, nyob rau lub Ntiaj Nrag teb cai no!
Vim peb tau hloov, los ua ib hauv tshuaj. Coj Neeg kev mus ntsib tau, tus zoo Niam zoo Txiv nyob saum txheej ntuj siab saud.
Raws li kuv lub tswv yim, nyob hauv kev ua npau suav. Mas kuv yeej ntseeg tias, yog ib zaj lus muaj tseeb. Nyob hauv Tswv Ntuj cov lus, mas yeej muaj tej txoj cag nrhau mus txog zaj lus no!

Sacramento
tim7/8/2019.
Yaj Zoov Ntxhe X.H.

Hmoob muaj co keeb cag lus, uas Hmoob ib txwm hais los, uas tsis pauv, los tsis hloov mus li!  Yog cov keeb cag lus, tawm nyob hauv Hmoob cov npe.  Uas hais tias, Poj qhia tseg Yawm qhia los:
1-Lo lus hu ua Poj Saub Yawm Saub.
2- Niam Nkauj Hnub thiab Txiv Nraug Hli.
3- Cheeb quag ntuj, Zeej xeeb tsim.
4- Yaj Dub thiab Yaj Doog, los yog Yaj Yuam thiab Yaj Yeem.
5- Noob Yaj, thiab Noob Yeeb, Noob Yaj yog Neej, Noob Yeeb yog Dab.
6-Yawm Siv Yis thiab Yawm Ntxwg Nyug.  Siv Yis yog tus cawm, Ntxwj Nyoog yog tus rhuav.
7- Niam Nkauj Iab thiab Txiv Nraug Oo.  Yog Neeg lub keeb chiv muaj ua Noob Neej los.
8- Cij Tus thiab Tuj Npug. Yog Nkauj Iab Nraug Oo nkawd ob tug tub.
9-Nkauj Ntsuab thiab Nraug Nab.
10 -Yawm Zaj Laug thiab Yawm Txoov Xob
11- Nkauj Mim thiab Nraug Nus.
12-Liaj Lwg thiab Rhwv Yis Mus nkawd.
Nyob hauv 12 nqes lus no muaj 12 lub caij  nyoog, tej laus thaud, thiaj hu ua 12 lub quag ntuj no.  Muaj tsib lub quag ntuj:
Thawj lub quag ntuj uas,Poj Sawb Yawm Saub qhia los hais tias:
A.Lub quag Ntuj, Zeej Xeeb Xab Zeej Tim, yog thawj lub zog muaj hwj chim ntawm Yawm Saub los.  Los yog lub caij Yaj thiab Yeeb thiab cov Txuab  Zeej los Txuab Xeeb.
Uas hais tias, Neeg nqaij toog, txhav hlau thiab cov Tsiaj loj loj tuaj nyob hauv lub sim Ceeb no.  Vim Nkauj Hnub Nraug Hli cuaj txog sab txoov, hwj chim tseem muaj zog thiab kub heev.
B. Lub quag ntuj zeeg ob {2} Yawm Saub hu ua Txwv Zeej Txwv Koob no.  { Lub quag ntuj no=yog lub caij no}, Yog lub caij Ntuj tsim  Noob Yaj tuaj  nyob ntiaj teb no.
Thiab Qaum Ntuj tso, Noob Yeeb uas yog Ntxwj Nyoog thiab nws npoj dab nqes saum ntuj los nyob rau ntiaj teb no. Vim Ntxwj Nyoog thiab nws cov dab, tsis mloog Tswv Ntuj lus.  Ntuj tau muab lawv pov los rau ntiaj teb, yog lub quag ntuj ntawd.
Kom Noob Yaj thiab Noob Yeeb los nyob ua ke, Yog Neej thiab dab.
C. Lub quag ntuj zeeg peb {3} no, hu ua Poj Koob Yawm Txwv, yog Nkauj Iab thiab Nraug Oo nkawd lub quag ntuj.  Yog lub caij Hmoob rhawv muaj cov zaj cov haiv:
Zoo li cov Zaj tshoob los txiv xaiv, foom Kom thiab tus paj ntsha lus taum.
D. Lub quag ntuj zeeg plaub {4}, hu ua Poj Yawm Txwv Txoob. Poob los rau Nkauj Ntsuab Nraug Nab nkawd lub caij. Los nkawd lub quag ntuj.
Yog lub Caij dej nyab ntiaj teb, Hmoob pib hais tias, yog Poj rhawv kab yawm  rhawv kev no los. Muaj kev sib txis ua txij ua nkawm.
Tis ntsuab tis ze los nyob ua neej ua tsav ua ke. Pib muaj los ntawm Nkauj Mim thiab Nraug Nus, los rau Liaj Lwg, thiab Rhwv Yis Mws lawv lub quag ntuj los.  
Mam los txog rau Poj Yawm , Pog thiab yawg, los rau niam tais yawm txiv.  Thiab Nyab thiab Vauv, los muaj li niaj hnub no!  Lub quag ntuj hu.
E. Lub quag ntuj zeeg tsib{5}, yog lub quag ntuj zim txwv neej dab tsis ntsuab tis ze.  Nyob ua neej ua tsav ua ke, Lub quag ntuj no, twb muaj 12 lub xeem Hmoob los tis neej tis tsav nyob ua txheeb ua ze lawm.
Noob Yaj Noob Yeeb twb nyob ua ke los tau ntau roob xyoo lawm.  Yog Poj Saub Yawm Saub, Nkauj Hnub nraug Hli, lawv qhia.  Kom Nkauj Mim thiab Nraus Nus, los Liaj Lwg thiab Rhwv Yis Mws, lawv coj tau tsib lub quag ntuj. Los kav lub ntiaj teb txog txij no lawm.
5=>Nthuav lub Quag Ntuj tsib { 5 } Txij thaum muaj Noob Yaj thiab Noob Yeeb los nyob ua ke, lub Keeb Noob Yeeb kuj yog Qaum Ntuj me nyuam, li Noob Yaj thiab.
Noob Yaj muaj lub cev nqaij, nyob nrog tus Ntsuj Plig, hos Noob Yeeb tsuas muaj tus Ntuj Plig xwb. Yog hnub twg ib tug Noob Yeeb xav yuav ib lub cev Noob Yaj  zoo li neeg.
Mas Noob Yeeb yuav tau nkag, mus rau hauv ib tug Noob Yaj lub cev.  Mas nws mam qiv tau Noob Yaj lub cev, los hais lus nrov tawm los rau Noob Yaj hnov tau!...
A-Thaum lub hauv paus chiv keeb muaj los, Noob Yeeb nyob saum ntuj, Noob Yaj xub tuaj nyob ntiaj teb no. Noob Yeeb uas yog cov Noob Dab, tsis kam mloog Qaum  Ntuj tus hu ua Yawm Saub no lus.
Ces Yawm Saub thiaj tau muab cov Noob Yeeb pov los rau saum lub ntiaj teb no.  Kom Noob Yaj thiab Noob Yeeb nyob ua ke. Qaum  Ntuj hais kom  Neej thiab dab, nyob muaj kev sib nyiam sib hlub.  Li yog ib co Ntsuj plig nyob ua ke ntawm Yawm Saub xub ntiag.
Dab pom tias, Qaum Ntuj nyiam Noob Neej dua, Vim  Noob Neej tseem ua neej nyob ncawg rau Qaum Ntuj heev.  Cov Noob Dab muaj kev ntxub Qaum  Ntuj los lawm, vim Dab tsis tau nyob saum ntuj ntxiv mus.
Ces Dab thiaj ntxias kom Noob Neej, nyiam tsav hwj chim loj ib yam li Qaum Ntuj. Kom txhob mloog Qaum Ntuj lus. Dab cob kom Noob Neej noj lub txiv ntoo uas Qaum Ntuj txwv tsis pub noj.{=Yog kev thuam Ntuj.}
Yog Noob Neej noj tas, mas Noob Neej yuav paub txuj ci loj ib yam li Qaum  Ntuj.  Zaj txuj ci ntawd, ces yog paub kev txom nyem kev iab kev khwv thiab kev mob kev tuag thiab muaj kev tu siab li niaj hnub no peb paub ntag.
B- Noob Yaj thiab Noob Yeeb nyob ua ke, thiaj muaj lo lus Hmoob ib txwm hais los tias. Neej dab nyob ua ke, dab neeg nyob sis nce.  Neej dab nyob ua pawg, dab neeg nyob sis xyaws no.
Dab thiab neej nyiam txis txij tsis nkawm ua ke, thiaj muaj lo lus hais tias:  Tsis tau yuav saum yaj no, los mam mus sib yuav nyob rau dab teb…
Neej thiab dab thiaj mus thov Yawm Saub, kom Yawm Saub muab noob qoob noob loo rau Neej thiab dab coj los cog. Neej li Neej coj ib co los noj tseg. Neej thiaj muaj no txhua niaj txhua xyy.  Nrog txhua cim li muaj los no.
Hos Dab li Dab coj los txog, ces dab muab noj tas tib si, lawm, tsis tseg cia tau yeej noob noob li.  Dab pheej tuaj txeeb neej li mus noj,  ntau cim ces tsis txaus rau Neej noj.
Dab thiab Neej thiaj muaj lus, ces mas mus thov kom  Yaj Dub thiab Yaj Doog={ Yog Yaj Yuam thiab Yaj Yeem} nkawd tuaj tu plaub ntug rau Neej thiab dab.
Neej thiaj muab tau ib txaum noob, rau dab coj mus cog.  Dab muab cog, ces pom ncho ib tw pa xwb tuaj tsis taus.  Dab thiaj tuaj txeeb Neej li mus noj, ua hnub ua hmo.
4-1. Yaj Yuam thiab Yaj Yeem nkawd, tuaj nrog Neej thiab dab tu.  Dab hais tias, Dab yuav noj cov siav tuaj saum lub paj.  Tso cia neej noj cov siav tuaj ntawm lub yas nrab thiab siav tuaj rau ntawm lub mag!
Cov siav tuaj saum lub paj, ces yog nplej. hos cov siav tuaj ntawm lub yas thiab siav tuaj ntawm lub mag.  Ces yog pob kws thiab qos.
Neej thiab dab siv tus cai no, tau ob niaj peb xyoos los. Tsawg cim los Dab xub tuaj, dab tsis khwv los dab pheej txeeb noj cov siav tuaj saum lub paj ntau xwb.
Yaj Yuam thiab Yaj Yeem thiaj qhia kom Neej thiab dab mus thais tus Muj Khem los cim tseg.  Nyias yuav nyias li.  Txhob sib txeeb ntxiv lawm.
Muaj ib lub quag ntuj, Dab tuaj txog.  Ces Dab tuav tas nrho peb theem muj khem tib si lawm. Yaj Yuam thiab Yaj Yeem nkawd pom tias:
Noob qoob noob loo los yog Neej cog, ces cia rau neej ua kom siav log.   Neej noj lub paj lub txiv mus nrog lub nco, Dab tsis tau khwv ua.   Ces dab mam nrog Neej yoog tus pa ncho, Vim tias dab coj mus cog ces pom nho pa xwv tuaj tsis taus kaus.
Yaj Yuam thiab Yaj Yeem tau muab rooj plaub rooj lus, hais yuam thiab hais kom yeem tias.  Cia Neej noj tas nrho mus, dab mam li nyob tos yoog, nrog neej tus pa ncho xwb no.
Noob Neej ces hu ua Noob Yaj, thiaj hais tias Dab los Neej yog txog caij mus hloo los nyob rau dab teb lawm ces yuav tau nrog dab yoog tus pa ncho mus li no lawm xwb.   Hmoob txoj kev laig dab ces yog mus raws li hais no!
4-2 Yawm Saub hais tias:  Neej thiab dab, mas tsis txawj mob tsis txawj tuag.  Kawg txawj laus thiab txawj plhis mus xwb.  Thaum Neej ua neej nyob, Neej laus lawm neej yuav mus hloo nyob rau dab teb.
Hos yog dab laus laus, los dab yuav tuaj hloo nyob rau  Neej chaw. Neej teb thiab dab teb mus hloo tas ces nyias rov hluas li qub tuaj lawm!
Neej mus rau dab teb mas  ib xyoos 12 lub hli twb yog 120 xyoo lawm.  Dab tuaj hloo nyob rau neej chaw los ib yam nkaus, kuj yog 120 xyoo thiab.
Nyias nyob nyias teb nyias chaws, mas hnub thiaj yog hnub hmo thiaj yog hmo.
4-3. Nyob dab teb los Yeeb teb, mas Dab tsis muaj mov noj.  Dab yoog pa xwb, yog Neej ua tau Neej hu ces dab li tau yoog.  
Thaum neej nyob puv 120 xyoo neej yuav mus hloo rau deb teb. Tej tub ki los kwv tij thiaj yuav ntim mov rau nws nqa mus tau noj tau haus.
Thiab muab dab nyiaj rau nws kom nws tau coj mus muas noj muas haus.   Rau thuam muaj kev tshaib kev nqhis. ho tau nrog dab yoog tus pa ncho.
Thaum Neej nyuam qhuav mus hloo, nyob rau dab teb.  Mas neej tshaib kawg,  Neej ntim tau mov su mus.  Los dab muab huas noj, huas haus tas tib si lawm.
Neej mus tau ib tsug 13 hnub xwb, Neej twb thov kom muaj lus kheev rov los thov nqa mov mus noj. Nyob dab teb.   Ib tsug 13 hnub, mas twb ntev 130 xyoo lawm.
Neej maj kawg yuav tau plhis ua ib tug zoo li thaum yus tseem hluas hluas ntawd, rov los ua tus tshiab.  Poob los rau lo lus Hmoob hais tias, yuav tau mus thawj thiab.  
Los lus no kawg hnov luag hais xwb tsis muaj tus tau mus pom dua los li.
Zaj dab neeg no, tawm tas nrho, nyob hauv Hmoob cov zaj cov haiv.  Los cov kev cai hu dab los yoog rau saum tus pa ncho.
Zaj lus no yog peb yawg Vaj Sua 9.5.16. Vaj Sua ib leej sau.  Nws Zaj dab neeg, uas kuv tau kawm los  ntawm Pog Nyiaj Ntxawg xyoo 1968 ntawd los.

Yaj Zoov Ntxheb Xib Hwb.

Thaum twg yus yuav hais lus, mas yus yuav tau saib kom yus hais tau. Lo lus haum thiab raug neeg txhua tus neeg siab, yus yuav coj xws li ib tug laus neeg!

Ib tug neeg muaj txwj nkawm lawm, yuav piv tau, rau li tus Yawg Koob Has Nplas. Uas yus muaj ib meem tub lawm, yus lub hwj chim koob meej nyob muaj li 90 rau 100 xyoo lawm ntag.
Yog yus yuav muaj lus hais tawm los, rau saum cov rooj noj haus no, mas yus xub hais tia:

1-.Hais rau saum muaj tub ki yug los tshiab:
Ua Ntuj tsaug, uas hnub no Ntuj txoos peb tuaj nrog. ( N…) zoo siab, uas nws muaj hmoo, tau muaj tub ki yug los tshiab. Kom muaj Noob Neej huaj vam coob los ua Ntuj me nyuam nyob ntiaj teb no mus….

2- Hais rau saum kev muaj noj haus:
Ua tsaug uas rau Ntuj uas ( N…) muaj hmoo, vim Ntuj tso tshav tso nag. los yug qoob yug loo, ( N…) nws tu tau tsiaj tau txhuv, ua tau rooj nqaig rooj hno los noj.
Nws muaj cia zoo siab nrog zoo plawv, nws hu niam hu txiv, hu neej hu tsav. Nws nco txog nkauj muam nraug nus, cov zoo kwv zoo tij nyob qab zej hauv zos. Tuaj noj sib hlub haus sib ce….

3- Hais rau saum tshoob kos.
Ua tsaug ua Ntuj tau pov hwm ( N…) muaj tub muaj ntxhais hlob lis ncos, zoo muab nyab qua ntxhais. rau saum tshoob saum kos, tau neej tau tsav. Muaj kev tis ntsuab tis ze, hu tus txheeb neej, txheeb tsav tuaj.
Tsa tub tsa ntxhais mus ua neej, tsheej cuab ntseg yim, los sawv saws muaj lub chaw khiav. Tsis tsheej cuab ntseg yim los sawv daws ho pab nrog qhia!
Hnub no thiaj muaj qhua tub qhua ntxhais, Qhua tshoob qhua kos, tuaj muaj npaum nplooj. Tuaj txhawb qhua tub qhua ntxhais lub yeej koob yeej huam.
Ua neej kom nyob mus kav laus, ua neej nyob nqaj nto ntuj ploog mus nto ntsis no. Thov kom Ntuj Niam Ntuj Txi pov thiab puag nkawd lub neej, kom niam txawj mloog txiv qhuab, txiv txawj mloog niam hu kom mus kav laus no.
( tas cov txheej lus hais)

LUS NTUAS.
Ntuas mus rau sab kev ua neej nyob, kom muaj noj sib hlub muaj haus sib ce.
Txhob xyaum ua neej noj sib ntxub haus sib nthe,
noj thuam tub ntsuag, haus cais tub pluag.
Noj hu cov tub muaj, haus faib hlo cov tub ntsuag.
Yus muaj noj los cais tus laus, muaj haus los cais tus nkaus. Peb ua neej tsis pom hmoov, tus yuav cawm koj tsis yog tus muaj nyiaj ntau. Tus yuav cawm tau yus yog tus siab ncaj siab thiaj cawm tau.
Nco ntsoov tias, phooj ywg zoo nws nyob tsiv kev, tus yeeb ncuab yog tus nyob ti cev. Ua yam twg yuav xyuam xim, yus thiaj muaj kev tawm dim 100 %.

Yaj Zoov Ntxhev Xib Hwb.

Noj lwm yam tshuaj, mas cov kws tshuaj, lawv tsuas muab dej coj los yaug plab saib puas cawm tau rov ciaj los. Tshaj ntawd lawm kuv tsis paub lawm.
1. Hos yog ib tug neeg noj yeeb lawm, mas thaud peb cov pog yawg lawv muab cov dos ntaj. Coj los tuav ua kua los cawm, kuv pom dua lawv cawm tau neeg rov ciaj los lawm.
2. Hos hais txog cov neeg noj tus tshuaj kuab taws hnyuv no, mas muaj neeg qhia hais tias:
a. Lawv muab kua ntsev los rau nws haus kuj cawm tau lawm thiab.
b. Los muab roj npua rhaub kom yaj, ces muab rau tus noj tshuaj no haus, kuj cawm tau lawm.
c. Muab cawv rau nws haus kom cov npuas tshuaj txhob txhaws nws caj pas ces lawv kuj cawm tau dim ntau leej lawm.
d. qhov kawg, thaum neeg noj tus tshuaj kuab taws hnyuv no lawm. Mas koj yuav muab ib tug dev los tua, ces koj cug cov ntshav dev no rau nws haus. ces koj cawm tau nws lawm.
Plaub yam tshuaj hais no, yog plaub yam tshuaj mus ntaus kom cov npuas tshuaj kom yaj. Ces tsis txhawm chim rau tus noj tshuaj no lub caj pas, thaum nws ua pa tau lawd, ces kuj ua kom cov kuab tshuaj no.
Txawj tsuag zuj zus mus, ces tus neeg noj tshuaj yuav rov muaj zog tuaj. Ces nws yuav dim ntawm nws txoj kev tuag.
3. Hais txog cov neeg noj tshuaj no, vim li cas lawv ho tau txiav txim siab los mus noj tshuaj?
Yog hais qhov tseeb tawm los, mas yam li tsis txaus ntseeg li. Nws muaj ib tug ntsuj plig dab phem qhia nws kom nws noj tshuaj, nws muab txoj kev tu siab no.los xav, npau taws, kom nws tus ntsuj Plig, tau ncaim ntawm Tswv Ntuj mus.
Yog tus Hmoob hu ua Qaum Ntuj no, Nws yog tus saib xyuas thiab pov hwm neeg ntiaj teb nyob kom muaj txoj sia ntev.
Thiab maj mam hloov siab los ua neeg zoo, kom tau mus nrog cov Poj Koob Yawm Txwv nyob nrog Tswv Ntuj nyob ua ke.
Cov Ntsuj Plig phem no, lawv ntxias txhua pab neeg uas nyias muaj nyias kev ntseeg. Kom muaj kev npau taws thiab tu siab, sib huas kev tuag mus ua neej nyob rau cov dab tub tuag teb.
Tsis hais hom kev ntseeg twg li, cov Ntsuj Plig phem no, lawm nyiam ntxias cov neeg muaj zog. Kom txawj ua ntau yam rau cov tsis muaj muaj zog, kom lawv tu siab chim los npau taws ces lawv txo lawv txoj siab mus.
5. Ua li mas thaum cov neeg tus siab dhau lawd, vim lawv tsis muaj zog. Uas lawv raug kev txom nyem loj los, mas lawv thiaj hlawv xyab lawv ntawv hu txog lub Ntuj lub teb pab lawv.
Kom cov neeg muaj zog saib tsis taus lawv, muaj kev raug khaum mus rau yav tom ntej. Kom lawv poob rau txoj kev khaum raug txom nyem raws li lawv txoj kev saib tsis tau cov tsis muaj zog no mus.
Ces qhov kawg neeg phem neeg zoo, mus rau tub tuag teb, uas Hmoob hu ua ntuj txias teb tsaus no. Sawv daws yuav rov tau sis pom sis ntsib dua.
Lub txim loj tsis yog thaum ua neej nyob ntiaj teb no, yog lub caij ua neej nyob rau ntuj txias teb tsaus. Koj yuav pom kuv nyob txom nyem dua, los kuv yuav pom koj nyob tau zoo dua.

Sacramento, USA
Tim 5/6/2020
Yaj Zoov Ntxheb. X.H.

Yog koj tus kheej yuav kho koj lub siab kom nyob thaj yeeb thiab nyob tiaj tus. Mas muaj 5 yam uas zoo pab tau rau koj!
1.Koj yuav tau tso tas nrho txhua yam teeb meem tuaj laum koj lub siab tseg, muab cais tawm mus. Koj yuav txawj ua siab loj, txhob nco txog ib yam tseg nyob rau hauv koj nruab siab li.
Koj txhob muab tej teeb meem me me no, los xav thawm niaj thawm hnub, tso nyob rau hauv koj nruab siab.
Nws yuav ua kom koj tau ris ib lub nra hnyav hnyav heev, uas tsis muaj kev tawm tai li, ces koj yuav tsis muaj kev nyob kaj siab mus li.
2. Koj txhob muab tej teeb meem me me no, los xav nyob rau hauv koj nruab siab. Ua rau koj yuav tso tseg tsis tau, koj yuav txhob xav tias, tej yam luag ua rau koj ntawd. Khaws los mus ua kev pauj kua zaub ntsuab rau luag!
Thiab khaws los ua kev cib nyeej, ces koj ntsib leej twg los, koj muab tham qhia rau luag paub tias: Nws yog neeg phem, nws tau ua rau koj los ua rau luag lwm tus npaum ub npaum no lawm.
Koj muab nws lub npe thiab lub koob meej hais thiab xav nyob nruab siab mus thawm hnub thawm hmo, mus txwm hli los txwm xyoo rau luag hnov.
Koj tso tsis tau tej teeb meem no tseg, koj pheej muab khaws cia rau koj nruab siab nyob mus li. Ces yuav ua ib lub nra hnyav rau koj ris ntev niaj ntau xyoo mus.
Ces koj yuav tsis muaj zog, vim koj pheej muab luag teeb meem, khawv yeej khawv yws los ris, ua nra hnyav rau koj! Koj yuav tsum txawj tso cov teeb meem no tseg kom koj lub siab txhob muab los rau koj lub cev ris.
Koj thiaj muaj zog ua txoj kev zoo thiab yeej txoj kev phem mus, koj lub tswv yim thiaj zoo, koj lub cev thiaj muaj zog, yeej kev mob kev nkeeg los ntawm tej sab foob khaub thuas nyob nrog huab cua los.
Yog koj lub siab tso tsis tau tseg, ces koj yuav tau muab tham rau koj tej phooj ywg hnov tias: Muaj tus neeg zoo li no, nws phem li ub li no hais rau koj thiab hais txog lwm tus neeg, zoo li ub li no mus.
Qhov zoo, mas koj yuav txhob khaws tej teeb meem no tseg nyob rau hauv koj nruab siab. Yog luag li teeb meem txhob nco txog, koj thiaj noj qab nyob zoo, koj lub siab yuav tau nyob kaj lug.
3. Koj tso tseg, txoj kev cib nyeej thiab yuav pauj kua zaub ntuab rau luag. Txhob khaws tej no tseg, nyob rau nruab siab. Txhob npaj kom koj tau pauj rau luag, kom luag tau txaus kev khaum los ntawm koj los.
Koj yuav npaj kho koj lub siab lub neej kom zoo dua li peb npaug ntxiv. Koj yuav twv kom tau ua qhov zoo tshaj, kom tau yeej qhov phem.
Koj yuav muaj kev zam, kev ua siab zoo, txhob muaj kev tu siab los chim siab mus.
Ceev faj, kom kev txij nkawm, txhob muaj kev xav yam phem rau yus tus txij nkawm, uas tsis muaj qhov tseeb.
Yuav ua chaws xav thiab kev ua xyem xyav kom kev hlub nrug deb mus tsis muaj kev sib ntseeg thiab sib hlub mus ntxiv. Yog koj xav ntau ces yuav muaj kev tu siab mus, tsis sib ntseeg siab, ces yuav muaj kev puas tsuaj mus txog rau kev tseeb tiag!
Vim kev tsis tso siab yuav muab kev txij nkawm rhuav mus yam tsis txawj sib hlub. Cais tawm mus, ces mam mus kis rau kev muaj tseeb tau.
Ces yuav tau mus txog rau kev sib nrauj. tau yooj yim heev. los ntawm kev xav thiab tsis tso siab los, txhob xav tias, yog yus xwb. Neeg muaj coob li coob xav thiab coj li koj coj, ces koj xav li ntawd, lawv kuj xav li ntawd thiab.
Yog neb sib ntsib, koj thiab nws twb yog ib hom neeg, ib hom siab xav mus tib txoj kev. Ces hais lus sib nkag siab zoo, Koj txais nws, nws txais koj, koj thiab nws neb muaj kev xav thiab kev ntseeg sib xws.
Vim neb tau xav mus ib yam, neb txoj kev npau suav puav leej yog kev tsis tseeb li. Zoo li Hmoob lo lus hais tias:
Xaiv xaiv tau paiv, xuas xuas tau ruas. Ua rau yus txoj kev npau suav, npau tsis ncaj lub hom phiaj lawm. Vim yus khaws teeb meem los ris, ces yus thiaj ua npau suav yuam kev mus ntawd lawm.
4. Koj yuav nrhiav kev kaj siab, kev zoo siab rau koj tus kheej. Yog koj tso tsis tau kev npau taws, kev nyuaj siab los kev tu siab pov tseg mus.
Mas tab yog koj ua neeg nplua nuj muaj nyiaj ntau los koj cov nyiaj tsis muaj txiaj ntsim qaub hau rau koj li!
Nyob hauv koj lub neej, koj zaj npau suav tsis yog ib zaj npau suav tseeb rau koj. Vim koj tsuas muaj kev xav txog kev tu siab, chim siab, yuav npaj kev cib nyeej thiab mus pauj kua zaub ntsuab rau luag xwb.
Koj ris tej no niaj hnub mus txwm hli txwm xyoo, ces koj tau ris lub nra hnyav dhau lawm. koj lub cev yuav tsis muaj zog tiv tej mob nkeeg nrog sab foob khaub thuas nrog huab cua tuaj.
koj lub cev kuj yuav tsis muaj zog, txhawb koj lub neej kom ua neej nyob mus kav laus thiab.
5. Peb sawv daws cov muaj ib txoj kev ntseeg, zoo li peb tsoom Hmoob.
a.Cov ntseeg Ntuj, yuav thov Tswv Ntuj txib kom Leej Ntuj Plig Ntshiab, qhia txoj kev thoob tsib kom nyias paub cawm nyias tus kheej.
Kom txawj to taub txog zaj lus no, kom nyias txawj pab nyias ua siab loj. Txawj xaiv yam muaj nqi los cawm yus lub neej. kom nyias muaj kev nyiam kev zam thiab kev hlub, ua yus kev kaj siab mus.
b. Cov ntseeg poj koob Yawm Txwv, yuav tau ua tej pluas mov npws poj npws yawm. Hu txog tej niam tej txiv los tej pog tej yawg los noj pov hwm pov yawm kom txhhob raug tus teeb meem hais no.
c. Cov ho coj Phus Thas kev cai, los yuav tau nqa mov mus rau Hauj Sam noj thov koob hmoov rau yus kom txawj xaiv txoj kev tau nyob kaj siab lug.
Kom yus tau yeej kev tu siab txhob npaj mus ua neeg phem. uas ris kev ntxov siab mus li tawm tsis tau los ua neeg nyob kaj siab lug.
d. Zaj lus kuv hais hnub no, mas tsis tshua tau muaj neeg hais dua los. Vim neeg tsis muaj tus ras txog los tsis paub paub txog, Thiab kuj tsis tau muaj neeg tau ua npau suav hais txog zaj no thiab
Tsim nyog neeg tiam nees nkaum no, yuav tau paub txog. Vim teeb meem muaj npau to nyob sab hnub tuaj mus txog sab hnub poob lawm. Tsuas yog tej teeb meem no xwb.


Yaj Zoov Ntxheb X.H.

Zaj 536- LUB NTIAJ TEB MUAJ KEV PUAS XWM LOJ.

Cov teeb meem uas muaj kev puas xwm loj no, yog pib los ntawm tus kab mob aws sib kis tuaj Sauv teb tuaj.
1.Ces lub ntiaj teb txawm muaj ib co teeb meem loj, nyob Mes Kuj teb:
Xws li cov Nom Tswv xub muaj teeb meem ua ntej, cov thawj neeg zoo li cov Vaj, cov Vaj Txheeb, cov Txoov Tswv Tim kav teb chaws.
Lawv sib liam tias, muaj ib co Thawj Neeg, zoo li cov saib kev noj qab nyob zoo. Tau nrog Suav zais tus kab mob aws no, cia kom sib kis mus thoob plaws lub qab ntuj khwb no xwb.
Cov tau liam tias, yog Suav txhob txwm tso tus kab mob no, tuaj kom ntiaj teb neeg tau tuag mus los muaj!
Suav kuj liam tias, yog cov neeg Mes Kuj xa mus tso rau Suav teb los kuj tau hais li ntawd thiab.
2. Kuj muaj qee leej cov Thawj Neeg nyob Mes Kuj teb hais tias: Cov Nom Tswv nyob Mes Kuj lawv, sib ua lawv ib co teeb meem.
Rau lub caij nyoog uas yuav xaiv tus Txoov Tswv Tim, los kav Mes Kuj Teb. Rau yav tom ntej no, ces muaj cov Nom Tswv tau hais lus ntxhi, rau cov pej xeem uas muaj tsos nqaij daim tawv dub no, ua kom muaj teeb meem, sib liam los ntawm kev sib ntxub ntxaug los.
Ces muaj teeb meem tawm tsam, lub caij cov tub ceev xwm mus txhom tus dub uas nws nqa ib dim nyiaj cuav 20 mus yuav khoom.
Tus tswv muag toob xib tau hu rau tub ceev xwm tuaj ntes nws! Tub Ceev Xwm tau ua nws tuag lawm, cov neeg dub tsis txaus siab. Lawv sawv tawm tsam cov tub ceev xwm thiab cov tsev muag toob xib.
Cov neeg Dub no, tau sawv tawm tsam nyob Mes Kuj teb yuav luag txhua tas cov xeev muaj neeg nyob.
Qab teb mus thoob plaws rau qaum teb, hnub tuaj mus thoob rau hnub poob tib si.
3. Tus tub ceev xwm ua tus neeg dub no tuag mus lawm, lawv kuj ntes cov tub Ceev Xwm nrog nws tuaj ua ke ntawd, mus kaw lawm thiab.
Pab tub ceev xwm no, muaj ib tub tub Ceev Xwm yog Hmoob. Thiab tus tub Ceev Xwm uas tau ua tus dub ntawd tuag, nws kuj yog Hmoob ib tug vauv thiab.
Mas Tsoom Dub lawv kuj tsis nyiam, Tsoom Hmoob nrog rau cov neeg dawb no thiab. Kuj muaj qee leej dawb koom siab nrog cov dub no, tawm tsam cov co tub Ceev Xwm thiab cov kiab khw muag toob xib no.
4. Cia li ua rau Hmoob muaj kev sib cais mus yam tshiab nrog yam qub ua ke lawm! Ua rau kev ntxhov siab yuav muaj mus rau yav tom ntej:
Hais txog Hmoob, mas zoo li Hmoob txoj hmoo yeej tsis zoo, los yog vim dab tsis li! Yav thaud, mas Hmoob cais dais dab qhuas xwb.
Nyiam no, Hmoob muaj cais lub xeem, nyias tsa nyias koom haum nplawg ntia tuaj lawm. Lub teeb meej ntawm tus dub tuag no!
Mas nyob hauv lub npe hu ua Hmoob no, tsoom Hmoob nyob Mes Kuj teb cov poj niam Hmoob feem coob lawv nyiam txhawb cov dub tog.
Hos cov Txiv neej Hmoob lawv tsis txhawb leej twg tog li, Saum tsoom Hmoob, mas ob sab muaj kev txhaum tsis tshaj li. Yog muab teev muab tsi los luj, mas nyias yeej muaj nyias kev txhaum tsis ntau tsis tsawg!
Hais saum qhov hnyav, mas ntshais tus tw teev, yuav tsis tsa tog twg siab dua li los tsis paub! Yog luj cov txiv neej Hmoob thiab cov poj niam Hmoob no.
Mas ntshia zoo li yuav mus raws li Hmoob txoj kev sib cais: Zoo li Hmoob xub muaj kev sib cais dab cais qhua los lawd, zoo li Hmoob xub tau tau cais, dab cais qhua mus lawm, los tseem tau cais kwv cais tij mus ntxiv. Uas Hmoob tsis sib raug zoo thiab tsis sib ncawg lawm.
Nyiam no, Hmoob ib nyuag muaj kev vam neej tuaj, ces Hmoob ho pib cais lub xeem mus. Nyias tsa nyias koom haum los saib nyias lub xeem mus.
5. Mloog li lub suab lus ntawm tus dub tuag no, cov poj niam Hmoob feem coob tuaj dub tog. Yog muaj tseeb li hais no tiag, mas kuj ntshais tsam Hmoob yuav cais txij cais nkawm mus tom ntej thiab .
Tsis paub yog cov poj niam lawv yeej ntse dua cov txiv neej los li cas! Mloog li tus nru lus hais no, Yog hnub twg Hmoob tseem muaj kev cais txij cais nkawm mus lawm tiag.
Mas Haiv Hmoob yuav tu noob mus yuav tsis muaj Hmoob nyob ntiaj teb no li lawm. Cov txiv neej Hmoob muaj ntsis ua dhau kev cai me ntsis thiab!
A. Hais sab yuav niam yau yog cov txiv neej xub pib yuav kom muaj niam yau. Los cov poj niam tseem kam nyob ua ke thiab.
B. Hais txog kev sib nrauj, los feem ntau yog pib muaj teeb meem ntawm sab txiv neej sab los ntau thiab. Thiaj muaj kev sib nrauj, ua Nraug fav los nkauj feb puv qab ntuj khwb no.
Hais txog saum cov sib nrauj no, mas cov Txiv neej yog cov tau muaj kev txom nyem loj dua cov poj niam. Hais saum tus tshiab, mas poj niam yog tus xub nrhiav tau sai dua thiab.
Lo lus kawg, xav kom txiv neej thiab poj niam nyias yuav tau kawm nyias kom to taub zoo, ib leeg txo hwj chim rau ib leeg me ntsis thiab.
Kom ua tau ib tug qauv zoo, rau tej tub ki xyaum kawm thiab taug mus ua lawv lub neej kom txheej cuab ntseg yim ua tau ib lub neej zoo rau Haiv Hmoob yoog mus rau yav tom ntej.
Kwv tij zaj lus no kuv hnov lub ntiaj teb qeeg zoo li no, kuv lam muab sau ua ib zaj lus kom Hmoob tau kawm xwb tsis muaj kev hais leej twg dab plig li od!
6. Tseem tshuav ib yam ntxiv, yog yam zoo tshaj nyob hauv cov neeg Dub no. Qhov uas lawv sawv los tawm tam no, txhob xav tias, ntshai yog cov neeg Dub no phem dhau lawm!
Kuv ho muaj ib zaj xav txawv me ntsis tias, peb yuav txhob thuam cov neeg dub no. Thiab saib tsis taus lawv, Leej tib neeg muaj cov phem cov zoo sib npaug zos nyob ua ke.
Cov phem tsis hais pab neeg twg li, cov muaj tsos nqaij los daim tawv dub, los dawb thiab daj li. Cov dub tau ua li no; tawm tsam rau cov tub Ceev Xwm, thiab cov kiab khw li no!
Vim lawv tau raug kev txom nyem, siab ntsws los lawm pes tsawg xyoo. Vim yeej muaj ib txhia leej saib tsis taus cov dub no, Los lawm ntau pua xyoo lawm.
Cov tub Ceev Xwm txhom tus dub no, lawv yuav coj mus nplua thiab cuab nws ntev li cas! Vim tib daim nyiaj 20 yog nyiaj cuav xwb, tab sis daim nyiaj 20 cuav no. Puas tau tsim nyog muab tus neeg dub no nias caj dab kom tuag mus?
Kuv pom tias, yog ib txoj kev ua kom txhua Haiv neeg nyob rau Mes Kuj teb no. Txoj kev sib raug zoo mus rau lub neej yav tom ntej mus xwb.
Nyob Mes Kuj teb cov Dub no yog pab coob tshaj, yog lawv tawm tsam li no. Yeej yog txoj kev zoo lawm, lawv tau qhib txoj kev kom cov neeg dub, neeg dawb thiab neeg daj nyob taus haum xeeb mus, txhob sib ntxub lwm txog tej hom neeg sib txawv li yus ntawd.
Yuav xav tias, yog lub qhov rooj, uas tas txhua Haiv neeg nyob Mes Kuj teb. Yuav tau mus nyob thaj yeeb, tsis hais hom tsos nqaij tawv zoo li cas, sawv daws yuav tau nyob sib haum xeeb sib raug zoo mus rau yav tom ntej.
Sawv daws yuav tau ua ib lub neej nyob kaj siab lug, ib leeg yuav hwm ib leeg. Ces Mes Kuj teb, yuav yog lub teb chaws muaj txoj hmoov zoo, tas txhua Haiv neeg daim tawv tsos dawb, tsos dub thiab tsos daj.
Nyob tau sib haum xeeb mus, txhob xav thiab muab ntaus nqi mus ua yam phem rau lawv. Yog leej twg paub txog lub ntshiab lus no, Tsim nyog nws yuav hwm thiab thov vam txog Martin Luther King Jr. Lub txiaj ntsim tuaj pab, Kom txhua Haiv neeg sib hwm sib raug zoo nyob ua ke tau.
Kom Mes Kuj teb muaj kev thaj yeeb loj hlob, coj tas ntiaj teb txoj kev sis nyiam sis hlub. pub rau txhua Haiv neeg nyob hauv lub qab ntuj khwb no tau pom thiab paub txog tias, Mes Kuj ua tus qauv zoo lawm tiag.
Lub Ntuj yuav muaj kev zoo siab loj, lub Teb kuj yuav muaj kev hom khaj. mus tas ib txhiab ib txhis.

Sacramento USA,
tim 4/6/2020.
Yaj Zoov Ntxheb X.H.

Hais txog kev ua Nom thiab Hmoob cov thawj neeg. Lawv txoj kev thoob tsib, coj los ntawm Hmoob tej pog tej yawg uas tau coj los lawm ntau tiam sib xwslos lawd:
1.Tsis yog ua Hmoob tus Nom yuav tau coj Hmoob sawv los mus vam meej, hlub Hmoob sib luag sib npaug!
Cov Nom Hmoob tiam twg, sawv los ua Nom coj Hmoob, mas lawv coj ob yam los rau Hmoob:
A.Coj kev zoo siab tuaj rau ib pab, hos coj kev tu siab, kev txom nyem tuaj rau lwm pab los rau lwm tus neeg los lwm pab xwb mus li!
Yuav nco ntsoov tias, nrog Mab Sua ua nom, mas luag cia koj ua nom. Kom koj tau pab luag rhuav koj Haiv neeg Hmoob mus no xwb mog!
Leej twg tau ua Nom, mas koj txhob muaj ib lub siab nyiam thiab pab tus txheeb ze koj xwb, koj yuav nyiam sawv daws sib npaug zos.
Koj txhob ua kom tau ntsej muag zoo, rau ib tog thiab khib rau lwm tog. Ces koj xav tias, koj yog tus ntse thiab thoob tsib lawm.
B. Cov hais no, mas yuav muab piv zoo li cov neeg txom nyem, ua tsis muaj kwv tij, los tej tub ntsuag uas luag saib tsis taus ntawd los hais piv rau!
Ces thiaj muaj ntau tiam Hmoob, ua neej los txog tiam 20 no, mas Hmoob cov teeb meem, thiaj tawm tsis tau mus deb ntawm Hmoob kev vam meej mus.
Thiaj li muaj ntau tiam los txog tav no, Hmoob cov teeb meem no, yeej tseem muaj nyob nrog Hmoob txhua tiam los:
Tiam twg los cov tau ua thawj neeg rau Hmoob, sawv los ua thawj neeg, thiaj pheej txav mus tsis deb ntawm tus teeb meem no li. Hmoob thiaj nyiam kev pab ib tog tseg lwm tog.
Puas yog cov neeg txom nyem, cov tub ntsuag, lawv cov lus tu siab uas lawv tau quaj no. Tau nrog tej pa xyab pa ntawv, nce mus txog lub ntuj lawm los li cas tiag?
Tsam zoo li Hmoob tej kev fiv yeem, uas tau muab tsiaj txhu, los fib rau Ntuj. ces tsawg tiam, los Qaum Ntuj tsis muab cov vij cov swv no xyeeb pov tseg li.
Tsawg tiam, los cov tau ua nom ua tswv thiab ua thawj neeg, lawv, thiaj pheej nco ntsoov txog, thaum nws tau ua thawj neeg lawd. Thiaj nco ntsoov qhov uas yuav tau tsim txom tus neeg tsis muaj zog li yus mus xwb!
Tsis hais Hmoob nyob lub teb chaws twg li, zoo li Cob Tsib teb, Los Tsuas teb, Thaib teb, los cov teb chaws phooj ywg nyob ib ncig ntawd.
Thiab nyob rau cov teb chaws nyob deb, tsuav yog Hmoob mas sawv daws tseem, coj sib xws tib yam.
2.Yuav txhais lo lus Hmoob hais kam los lawd tias:
Nyob luag ntuj yoog luag txuj, nyob luag teb yoog luag ci. Thiab lo lus hais tias, qiv luag toj yug yaj, qiv luag tais tsau ntxhai no:
A. Yog ib lo lus txhais mus tob tas nrho, Yam li tej Mab Sua tsa Hmoob ua Nom. Tsis yog tsa los coj, kom Hmoob ua neeg paub tab hno xaiv, tsim txiaj thiab vam meej mus raws lub ntiaj teb.
B. Zoo li yog Mab Sua tsa Hmoob los ua Nom, kom tau siv Hmoob tau coj los tsim txom Hmoob. Nws yog tus nyob ze Hmoob tshaj, thiaj paub siv nws lub tswv yim los tsim txom kom ti txha nkaus.
Ua li mas Leej twg tau ua Hmoob tus Nom, los Hmoob tus thawj neeg. Mas nws thiaj muaj peev xwm muab Hmoob tsim txom mus raws txoj kab txoj kev ntawd.
Mab Sua tsa ib tug Hmoob ua Nom, ces yog Mab Sua tsa tus Thauj yeeb ncuab los rhuav Hmoob tau lawm ntag.
Zoo li Tsoom Hmoob uas tseem nyob rau Cob Tsib teb, Los Tsuas teb chaws. Leej twg tau ua Nom, mas tus ntawd yog Hmoob thawj tug yeeb ncuab loj.
Nws yog tus txawj taug xaiv thiab nrhiav lub txim, qhia Nom Tswv Mab Sua paub tias:
Muaj neeg siab tsis ncaj ncees, ua tub qaug rau Nom Tswv txoj kev cai yuav ntxeev teb chaws mus! Kom tau kev liam txim rau tus neeg txawj ntse paub tab, los tus neeg siab dawb, txawj nrhiav noj nrhiav haus, mus raws lub tswv yim neeg thoob tsib.
B. Ua li mas yog muaj ib tug Hmoob ntse thiab thoob tsib. Mas Nws tsis muaj peev xwm hais tau lo lus tawm tias nws ntse los nws paub.
Nws yuav nyob twj ywm, tsab ua neeg ruam. Nws yug los nws yeej tsis muaj tswv yim thoob tsib. Los yuav tau tsab ua neeg ruam, li tus tsis paub dab tsi li. kom nws tsis txhob raug lus xaiv. Los tau raug plaub ntug, raug mus nyob txim.
3. sawv daws yuav tau paub yam no:
Leej twg tau sawv ua Nom nyob ze Hmoob, kom nws tsis txhob yog tus sawv los, ua tau Hmoob tus yeeb ncuab.
Uas muab cov neeg txom nyem tsis muaj kwv tij thiab cov tub ntsuag, los cov poj ntsuam. Muab lawv coj los tsim txom, li lawv yog ib co tsiaj. Muab lawv siv los txi rau yus yog tus ua Nom saib lawv, kom yus tau zoo siab loj tas nrho.
Yog leej twg tau ua Nom coj li no, txhais tau hais tias, nws tsis yog Hmoob tus Nom. Nws yog Mab Sua tus thawj dab noj nyoos hais txias, uas Mab Sua muas tau nws lawm.
Thiab Mab Sua tso tuaj thiab nws tseem yug los ntawm Hmoob pog Hmoob yawg cov roj ntsha Hmoob los thiab!
Nws tau siv cov txom nyem, lub cev los txi rau nws, nws, hos siv cov txom nyem lub tswv yim, los txi rau cov dab Mab Sua lub siab ntxub ntxaug neeg thiab muab hlob ntais ntuj, los tsim yus Haiv neeg.
Thiab siv cov txom nyem, no lawv cov Ntsuj Plig, los txi rau cov dab ntsuj Plig tsis huv, tawm hauv dab teb tuaj.
Yog cov uas Hmoob ib txwm hu ua yog cov dab noj nyoos haus txias phem, uas coj neeg cov ntsuj plig mus rau tub tuag teb. Uas yog ntuj txias teb tsaus ntawd.
4. Ua li mas tus Hmoob twg, nws yug los ntawm caj ces Hmoob uas lawv pog lawv yawg. Yog caj ces Hmoob tsim txiaj thiab Hmoob dawb huv, Tab yog lawv yug los ua neeg thoob tsib ntse.
Mas nyob hauv lawv sim neej, lawv tsis muaj plhus hais tau tias: Lawv yog neeg thoob tsib, ntse thiab daWb huv, rau leej twg paub thiab hnov tias, lawv muaj peev xwm thiab coj ncaj ncees.
Nws txawm yog neeg dawb huv, yog nws tau hais lo lus tawm tias: Nws ntse, nws paub kev thoob tsib no.
Ces nws yuav raug cov uas Nom Tswv Mab Sua tau tsa lawv los ua Nom, lub ncauj liam tawm tuaj tias:
Nws yog Mab Sua tus yeeb ncuab, nws muaj lub siab lub tswv yim thoob tsib yuav ntxheev siab rau cov Nom tswv Mab Sua. Ces nws yuav raug liam ua ib tug yeeb ncuab tiv rau tej Nom Tswv Mab Sua.
Tus hloov Nom Tswv chaws nyob txum tim no, nws yuav hais ib cov lus kom muaj kuab. Zoo muab tus neeg ntse dawb huv thiab txom nyem uas txij thaum nws yug los.
Nws yeej yog neeg dawb huv liam thiab coj nws mus ua neej nyob rau tub tuag teb!
= Cov lus kawg, kuv hais rau sawv daws paub tias: Kuv hnov Hmoob cov lus, sib tso moo thoob qab ntuj nyob hauv lub zos nyob hauv Hmoob cov fasbouk tas, ces kuv cia li muaj lub tswv yim los sau tau zaj lus no, los ua kev kawm xwb.
Kuv hais tseeb tias, kuv tsis tau tsom leej twg lub siab, los tuav leej twg lub npe. Los sau kom peb tau muaj lus xaiv, lus ncua ua kev sib tu siab.
Tsuas yog sau kom muaj ib zaj lus tso tseg rau ntawd, kom muaj kev kawm paub thiab coj ib tug qauv zoo. Kom muaj kev ua phooj ywg sib hlub mus deb thiab txog txhua leej txhua tus, kom mus thoob rau Tsoom phooj ywg muaj lub npe hu ua Hmoob.
Thiab tseem xav coj lub neej thiab ris lub npe, hu ua Hmoob no mus tas ib sim neej xwb.
Hais tsawg lo lus, los kuv thiaj tuav txog lub npe Hmoob no, nyob hauv zaj lus no. Qee tsam, mas kuv kuj meem txom, rau Hmoob cov lus xaiv sib hais dab plig no thiab. Nyob hauv lub zos nyob saum Hmoob cov Youtube.
Nyob hauv txhua hom kev coj, los txhua hom lus cov txij nkawm tau sib nrauj sib tso. Thiab cov kev txom nyem uas cov neeg siab dawb tau raug ris muaj los.
Kuj yog nco txog tej dab neeg nyob hauv cov tub ntsuag lub neej, tau txais txoj kev ua ntsuag tau ua lub neej poob qab ntawd.
Ces kuv thiaj sau tau zaj lus no, tawm los rau sawv daws tau pom thiab hnov li no.

Yaj Zoov txheb X.H.

Tas txhua yam teeb meem yuav hais no:
a. Muaj av qeeg ncaj, ua rau neeg tau ploj tuag mus.
b. Muaj khauv zeeg cua coj dej los nyab zej zog neeg puas tsuaj mus.
c. Muaj nag xob nag cua los, xob tua raug neeg thiab tsiaj txhu.
d. Muaj ntuj los nag loj, dej huam los nyab zej zos liaj ia teb chaws qoob loo, ua rau muaj neeg ploj tuag mus!
e. Xeeb muaj cov kab mob aws sib kis tuag thoob plaws lub qab ntuj khwv no.
f. Muaj suab quaj suab nrov ncha tau ntau hnub nyob Suav teb.
g. Leej tib neeg tej kev ua ntsoj ua ntsuag, rau tub ki thiab txij nkawm. tau ua lub neej nyob nrog kev tu siab poob kua muag.
h. Kev sib nrau sib tso ntawm cov txij nkawm…

Tej xwm no, yog leej twg tsim thiab tso los rau leej tib neeg. Puas yog Ntuj tso rau neeg, saum lub ntiaj teb no?

1.Hais tseeb tias, tsis yog Tswv Ntuj tau tso los rau neeg ntiaj teb. Kom Neeg raug npluas, vim neeg tau ua txhaum. Kom neeg raug kev txom nyem kev quaj ntsuag mus!
Tswv Ntuj pom xeeb tsim tau neeg, los ua neej nyob rau saum lub ntiaj teb no. Ntuj tau tsim neeg zoo li Ntuj tus duab, txhua lub caij thaum neeg muaj kev txom nyem, Ntuj xa Ntuj cov Tshiab, los xa tej tus neeg siab ncaj tuaj pab cov raug txom nyem.
Uas tog cov muaj peev xwm tuaj cawm, cov neeg txom nyem uas lawv raug teeb meem thiab raug kev txom nyem, kom dim mus.

2. Hais tseeb rau peb sawv daws paub tias:
Tas txhua yam teeb meem, tuaj ua rau neeg tau kev txom nyem, tau kev quaj los muaj kev ploj kev tuag mus.
Tsis yog Tswv Ntuj nplua thiab Ntuj rau txim rau neeg ntiaj teb. Tshua yam teeb meem, nws los ntawm Leej Tib Neeg, kev tsis ncaj ncees los.
Yog los tas nrho ib puas tsav yam ntawm kev txhaum nphau rov los rau Tib Neeg.
Saib neeg txoj kev lim hiam, kev sib ntxub thiab kev tsis sib hwm nws nphau rov los rau neeg. Neeg tsis ua raws li Ntuj tus duab uas Ntuj tau tsim los zoo li Ntuj tus duab uas yuav muaj kev sis nyiam sis hlub.

3. Tej Vij tej Swv kev ua txhaum nphau los li cas?
a. Nws nphau los raws li cov Leej Tib neeg kev sib ntxub sib ceg thiab sib tua kom neeg muaj kev tu siab thiab neeg tau ploj tuag mus:
b. Nws los ntawm cov vij sub vij sw, uas neeg muaj cov tsos tawv nqaij sib txawv los. Muaj cov tsos tawv nqaij dawb, tsos tawv nqai dub thiab tsos tawv nqaij daj no los thiab.
Nyias muaj nyias tus yam ntxwv sib txawv, nyias nyiam nyias hom tawv nqaij. Ces koj cia li lam sib ntxub, mus, kuv cia li lam ntxub lawv, Cov Leej Tib Neeg tau ua tej yam tsis nyob hauv kev hwm Ntuj thiab hwm neeg.
c. Nyob ntawn Leej tib neeg, cov xeem lus los ib yam thiab, nyias muaj nyias hom lus, yus hais tej lo lus phem rau luag. Ces luag tsis paub, sawv daws tau hais lus sib thuam lawm.
d. Ib pab thuam lwm pab, yam saib luag tsis taus luag ua neeg tsim txiaj, ces ua rau sawv daws muaj kev tsis sib ntseeg siab tuaj. Muaj kev sib ncaim mus deb zuj zus xwb.
Ua rau sawv daws muaj xaiv muaj lus tsis sib raug zoo. Thiab tsis sib hwm li sawv daws yog Qaum Ntuj me nyuam loj sib luag.
Muaj kev sib cais mus, xws li ib pab yog Ntuj me nyuam, hos pib pab yog dab me nyuam. ib pab yog tsiaj me nyuam. Plhis ntawm liab los ua neeg.

Ces yog tej vij tej swv no nphau los rau leej Tib neeg txhua tsav txhua hom nyob rau sawm lub ntiaj teb no.

4. Tsis hais tas txhua haiv neeg li, hais txog li peb Hmoob xwb twb muaj ntau ntau yam, uas suav tsis txheeb lawm.
Peb hmoob twb muaj ntau yam kawg nkaus li lawm thiab:
a.Peb Hmoob twb cais mus muaj 18 lub xeem, yog mus nrhiav mas tseem yuav tshaj ntawd lawm.
b, Cov xeem los twb cais muaj nyias dab nyias qhua mus ua ntau pab lawm….
c. Cov xeem kuj cais muaj nyias pab nyias pawg, nyias muaj nyias koom haum tsis ib yam, nyias hlub nyias pab nyias pawg ntau lawm xwb.
d. Nyob hauv ib lub xeem xwb los, sib cais tsis sib hlub txog tej tub ntsoj ntxhais ntsuag, mus kom sib luag.
e. Nyob hauv cov tsij nkawm los sib cais mus, tsis muaj kev sib hlub. Niam mus ua nkauj feb, txiv mus ua nraug fav.
Tso tej me nyuaj mus ua luag puab rooj puab ntsa, nrog tsiaj nrog txhuv pw. los sawv daws tseem cav muaj ntsej muag nrog luag ua neej nyob thiab.
Txhua yam teeb meem no, puav leej yog nphau los ntawm Neeg kev ua txhaum los. Thiaj muaj kev tu siab, kev quaj ntsuag los kev txom nyem loj li kuv tau hais los saun no.

5. Lo lus kawg, peb yuav tau them lub txim txhaum no mus kom tas!
Yuav muab dab tsi los them, thiab yuav them li cas?
Peb yuav ua tiag nyiaj tiv kom dhau, yuav ua siab ntsev ris kev txom nyem, sib coj ua kom muaj kev sib hlub sib zam. ua siab ntev nyias daws nyias li teeb meem, kom Ntuj pom Ntuj hlub, neeg pom neeg qhuas.
Ces yuav daws tau tej teeb meem no mus kom tsis muaj dab tsi li. Ntuj yuav pov hwm kom dim mus, dab los yuav tsom kwm kom tau, neeg los yuav pab kom zoo sib xws.
Neeg ntiaj teb yuav nyob yam kaj sib lug mus. Tsis muaj yeeb ncuab los tsim txom, kuj yuav tsis muaj dab muaj tsov los tom, tsis muaj neeg muaj ntxoog los hem.
Ces sawv daws yuav ua neeg dawb neeg huv xws li, Ntuj tsoom Tshiab nyob saum ntuj lawv tsuas muaj kev zoo siab nqua suab hu nkauj cav thiab qhuas txog Tswv Ntuj ib leeg xwb.

Sacramento UAS
Tim 8/6 /20.
Yaj Zoov Ntxheb X.H.

Txoj kev ntseeg txog Vaj Tswv, nws yog ib txoj kev tob heev thiab loj dua yam uas neeg xav nyob rau neeg tej nruab siab!
Kev ntseeg Vaj Tswv, tsis yog ntseeg, kom koj tau muaj nyiaj txiag. Thiab ua neeg nplua nuj noj tsis tshaib haus tsis nqhis, tas koj sim neej li neeg xav.
Tswv Ntuj txoj kev muaj nyiaj txiag, ua neeg nplua nuj. Txawv li neeg lub siab ntseeg thiab xav tawm los. Tus neeg qhia tias, koj mus ntseeg Vaj Tswv koj yuav ua neeg nplua nuj muaj nyiaj thiab muaj cuab tam ntau.
Mas nws xav thiab ntseeg tsis raug li Vaj Tswv lub hom phiaj lawm. Tus tseem Vaj Tswv nyob hauv cov lus Hmoob hais tias, tus Vaj Tswv nyob hauv cov lus Vaj Lug Kub no.
Nws txoj kev nplua nuj txawv li neeg txoj kev muaj nyiaj txiag cuab tam ntau nyob rau hauv lub ntiaj teb no! Tus tseem Vaj Tswv tiag.
Mas Nws tsis yog tus kav nyiaj txiag cuab tam kom tau ua neeg nplua nuj nyob ntiaj teb. Tus Tseem Vaj Tswv tiag, mas Nws yog tus muaj koob hmoov nplua mias nyob thoob plaws saum ntuj thiab ntiaj teb:
Tus Vaj Tswv no, Nws kav txoj kev ncaj ncees kom neeg ntiaj teb muaj kev Vaj huam loj sib luag. Sawv daws txawj sib hwm, sib nyiam, sib hlub tias, koj thiab kuv yog neeg muaj nqi ib yam mkaus xwb.
Tus Vaj Tswv uas peb ntseeg txog, yog neeg ntiaj teb sawv daws tus zoo niam zoo txiv. Vaj Tswv yog tas nrho lub Sim Ceeb no txhua tsav txhua yam tus tswv.
Nws yog nyiaj tus tswv, Nws yog txhiam xws noj tus Tswv. Nws xav kom neeg muab nyiaj thiab txhiam xws noj los sib faib pub rau txhua tus neeg kom muaj noj sib npaug.
Txhob ua neeg vum loj ntshaw ntau yam,txeeb yuav los ua nws ib leeg tug. Tas txhua yam yog Vaj Tswv ntiag tug, Vaj Tswv xav kom sib faib noj sib faib yuav kom koob pheej sib npaug!
Tus muaj nyiaj txiag cuab tam ntau thiab muaj txhiam xws noj seem noj so. Tsis yog nws ib leeg ntiag tug, txhua yam muaj nqes yog neeg ntiaj teb sawv daws tug.
Koj muaj ntau lawm, yuav faib pub rau tus tsis muaj. Vim luag nyob ze koj, ua koj luag txhawb nqa koj lub peev xwm. Yog Vaj Tswv tau pub lub tswv yim thoob tsib rau koj ua sawv daws tus thawj neeg nyob tom lawv hauv ntej.
Koj muaj feem xyuam, yuav nrog Vaj Tswv hlub cov neeg nyob ze koj. Koj txhob nce los nyob Vaj Tswv chaw, yuam luag ua koj qhev khwv rau koj noj. Cia luag raug kev tshaib kev nqhis, ua lub neej txom nyem.
Cov Xib Hwb mus qhia Vaj Tswv txoj lus, yog luag twb pluag los tseem kom luag them 1/10 rau tus Xib Hwb, hais tias, yog them rau Vaj Tswv. Saib Vaj Tswv yog ib tug Vaj Tswv pluag thiab ntshaw nyiaj heev.
Tus coj thiab qhia li no, nws yog neeg thuam Vaj Tswv. Thiab nws xav nce mus nyob hloov Vaj Tswv chaw kiag lawm ntag. Yes Xus tau hais meej kawg tias:
Tus tau ua luag tus thawj neeg, nws yuav ua sawv daws tus qhev! Los lus no yog hais li cas tiag? Yog hais tias, Koj ntseeg Vaj Tswv tiag! Mas koj muaj nyiaj, los muaj txhiam xws noj. Koj yuav nco txog tus tsis muaj, Koj yuav tau faib pub rau luag noj kom puv plab npo li koj.
Vim tus muaj nyiaj thiab tus pluag nkawd ob leeg muaj nqi ib yam nkaus, nyob ntawm Vaj Tswv Xub ntiag. Tus muaj nyiaj, nws tsis muaj kev hlub kev zam rau luag.
Tus pluag tsis muaj myiaj los tsis muaj txhiam xws noj, nws muaj tsawg, los nws tseem qee tau faib rau luag tau noj. Nws siab zoo dua, nws txawj hlub txawj zam rau luag. Nws ua neeg nplua nuj sab muaj koob hmoov.
Nws cov koob hmoov tsis muaj ub sab tub nyiag yuav nyiag tau mus ua luag tug! Tus muaj nyiaj thiab muaj txiam xws noj. Yuav muaj tub sab tub nyiag, soj nws qab taug nws lw. Ntsia ntsoov tos nws ncaim ntawm nws txhab nyiaj mus.
Ces tub sab tuaj tho qhov tsev, nyiag du luag mus lawm. Nws yuav yog tus pluag tshaj cov, nyiaj txiag txhiam xws noj los nws pluag. koob hmoov txiaj ntsim los tsis muaj li.
Vim tias, Vaj Tswv tsis yog tus kav thiab saib nyiaj txiag. Vaj Tswv yog tus kav thiab saib neeg tej koob hmoob maj mam xeeb muaj tuaj nyob rau neeg tej nruab siab.
Tus Xib Hwb mus qhia Vaj Tswv lus nws hais tias, yog koj los ntseeg txog Vaj Tswv. Mas koj yuav muaj nyiaj thiab muaj cuab tam ntau, nws tau hais muaj npaum li no.
Mas nws raug ib tug dab muaj peev xwm tuaj qiv Vaj Tswv cov lus mus hais, kom neeg ntseeg yooj yim. Nws yuav maj mam nyiag nce mus nyob Vaj Tswv chaw ua ib tug Vaj Tswv ntshaw nyiaj txiag thiab ntshaw cuab tam heev.
Yog lub Cuab tam yuav txawj ploj mus sai sai ib hnub tom ntej no ntag. Thiab zaj lus nws tshaj tawm rau neeg hnov puav leej yog ib co lus cuav, tsis nyob hauv Vaj Tswv cov lus tseeb. Nws tsuas mus qiv los hais kom nws nce tau mus hloov Vaj Tswv chaw nyob xwb.
Tus tau coj li kuv hais no, nws tau ua tub qaug rau Vaj Tswv. Nws qhia kom neeg ntseeg tias, Vaj Tswv yog ib tuag Vaj Tswv pluag pluag dua neeg. Yog neeg them nyiaj rau Vaj Tswv, mas Vaj Tswv yuav zoo siab loj kawg.
Yog muaj neeg ntseeg Xib Hwb coob npaum li cas, mas Vaj Tswv nplua nuj npaum li ntawd. zaj no, nws tus Vaj Tswv. Yog tus hais lust as ces tos saib nyiaj puas poob saum ntuj los xwb.
Hos nws lub Meej Mom yog tus tuam thawj dab noj nyoos haus txias lub meej mom. Cov ntseeg txog nws zaj lus, mas nws tau muab tus tuam thawj dab.
No lub hwj chim meej mom los hom rau lawv ntoo, saib sawv daws puas yoog tau dab thiab soj tau dab lw yuam kev mus zwm rau tus tuam thawj dab no.
Qhov ua cov neeg ntseeg tso 1/10. yog thxeej thaud cov Xib hwb muaj tsawg leej dhau lawm. lawv thov 1/10. Ntawm cov neeg ntseeg. Yog tso pab tus Xib hwb kom nws muaj noj muaj haus, xws li zeej tsoom sawv daws.
Yog tsis muaj qhov tso 1/10 no, ces Xib Hwb yuav tau mus khwv noj khwv haus. Xib Hwb tsis muaj caij nyoog txaus los mus saib sawv daws tej kev vam khom:
Nuob hauv tsoom neeg ntseeg muaj cov muaj mob nkeeg, cov raug kev txom nyem tsis xws luag. Mus xyuas tsis txog. lawv muaj kev txhawj xeeb ntau yam, thiaj muaj lo lus thov kom sawv daws cov yim neeg tso 1/10. Los pab tus Xib Hwb, kev noj haus.
Nyiam no lub ntiaj teb hloov mus lawm ntau. pawg neeg tseeg tso nyiaj raws li yus qee tau los tso. Kev tso nyiaj yog tso los pab lub tsev teev hawm, tau kho tej yam yuav puas mus thiab them nqi dej nqi taws xob.
Koj tso li koj qee tau, tsis hais 1/10 lawm.Lub tsev teev hawm no yog sawv daws li ntiag tug. Puas los yuav tau kho, se los yuav tau them.
Yov sawv daws yuav them tuaj, cov lawv qee tuaj ntawd, twb siv tsis tas. tseem khaws tau cia muaj txog li ntau pua txhiab roob nyiaj. Cov nyiaj no coj mus siv ua dab tsi?
Pawg ntseeg coj mus pab cov neeg txom nyem tsis muaj noj, los tsis muaj nyiaj pab tej lub teb chaws txom cov tub ntxhais kawm ntawv. coj mus pab rau cov neeg txom nyem ntawd.
Thiab cov tej lub teb chaws muaj cov neeg ntseeg tshiab, lawv tsis muaj peev xwm tsa cov tsev teev hawm Vaj Tswv. nyob hauv lawv teb chaws.
Zoo li peb cov Hmoob lub caij tawg rog muaj coob leej yuav tuaj mus rau Mes Kuj teb los Fuaj Kuj teb thiab lwm qhov chaw. tsis muaj nyiaj ua nqes dav hlau.
Yog cov KaTau Liv lawv ua cov pab qev txais mus them rau peb cov Hmoob. tom qab cov khwv tau ho them rov qab. Cov khwv tsis tau los them los luag muab xuam mus kom koj tsis tshuav leej twg nuj nqes mus.
Cov neeg ntseeg txog Yes Xus lub Npe, muaj ntau leej neeg nplua nuj. lawv tau pab ua nyiaj siab dawb tseem tshaj li 1/10 los lawv zoo siab pab. Vim lawv muaj hmoo khwv tau nyiaj ntau.
Lawv pab rau lub Koom Haum, kom muaj nyiaj pab rau cov neeg pluag nyob thoob ntiaj teb, lawv saib tias lawv koom nrog Vaj Tswv pab vaj Tswv tej tub ki txom nyem thiab raug luag yuam nyob qhov ub qhov no xwb.
Tus muaj ntau nws qee ntau, tus muaj tsawg nws kuj qee tsawg. tus tsi muaj los tsis yuam, nyiaj yeej siv tsis tas li. Ib xyoo twg kuj muaj cov neeg nyob cov teb chaws txom nyem, lawv kuj tuaj thov kev pab.
Lawv tuaj thov ib zaug, kuj coj mus pab tau ntau txoj haum lwm ua tiav log. Yog Ntuj li hauj lwm pab cov tib neeg txom nyem. Lub Koom Txoos tsis suav tias, cov neeg ntseeg tshuav Vaj Tswv Nuj nqes.
Yog neeg kev siab dawb, yog yus tus nqi hlub yus tsoom txheeb ze nyob ua Ntuj me nyuam ua ke. Yog kev sib faib txiaj ntsim ua li zaj Yes Xus qhia peb zeem Vaj Tswv ua peb Leej Txiv.

Sacramento, USA.
Tim 31/7/2019.
Yaj Zoov Ntxheb Xib Hwb.

Zaj 540 - COV TEEB MEEM XWM TXHEEJ XYOO 2020.

Lub xyoo 2020 no, muaj teeb meem ntau tsav ntau yam, tuaj raug rau lub Sim Ceeb no ntau kawg.
Xyoo no muaj cov teeb meen no:
1.Yog cov teeb meem uas tsoom thawj neeg, li cov Huab Tais thiab cov Tim Tswv, uas yog cov txoov Tswv Tim kav teb chaws, nyob hauv lub qab ntuj no.  Lawv tsis muaj kev sib haum xeeb, ces nyias taus nyias heev; ces sawv daws sib liam txog kev tsim hob pob plas mas nus, los sib tw ua tsov ua rog.
Sawv daws sib liam thiab sib rau txim, rau cov teb chaws me ua muaj ciam dej ciam av nqaim.  Tsis yog ib los ob Haiv neeg thiaj txawj tsim Plas mas nus xwb, sawv daws ua neeg thoob tsib koj tsim muaj los nws tsim tau thiab.
Sawv daws ua neeg txawj ntse, thoob tsib sib xws.  Yog sawv daws tsis muaj kev haum xeeb, los ntawm kev siab saib taus thiab ua phooj ywg zoo.
Ib lub teb chaws npaj kev tawm tsam txog kev ua tsov rog rau lwm lub.  ces thiaj ua rau neeg sib mob siab los ntawm saum kev sib ntxub los.
Neeg sawv daws tsis muaj kev sib zam thiab sib hais, kom muaj kev sib haum nyob nrog kev sib raug zoo.  Cov teb chaws muaj neeg coob thiab muaj kev vam meej mus deb dua luag.
Lawv nyiam muab kev tso hem thawj thiab kev rau txim rau cov teb  chaws muaj ciam dej ciam av tsawg.  Rau txim rau kev lag luam, cuab tam txhiam xws noj, rau tej toob xib siv, li tej roj a los nyiaj txiag.
Txwv kev lag luam, txhua yam toob xib, ua kom luag teb chaus pluag kev noj muaj haus, thiab ua rau luag pej xeem raug kev txom nyem thiab tshaib nqhis.
2. Muaj tus kab mob aws sib kis Kaus viv 19 no, tuaj Sauv teb tuaj, kis mus thoob lub qab ntuj khwb no.  Nws yog ib yam loj thiab txaus ntshai heev, Leej twg kis tau hom kab mob no lawm, ces tsis dhau 14 hnub ces nws kawg tuag mus.
Cov neeg laus txij li 40 xyoo rov saud lawm thiab cov uas lawv lub cev tsis muaj zog, nrog rau co me nyuam mos, nyuam qhuav yug tau los, mus rau cov muaj ib ob xyoos.  Yog lawv kis tau tau hom kab mob Kaus Viv 19 no lawm, feem coob ces kawg tuag mus.
=>.Cov neeg tau kis mob thoob qab ntuj no, muaj tas nrho 74.872.883 leej los txog hnub tim 17/12/2020 no lawm.
=>.Cov tau tuag mus lawd twb tuag txog li 1.661.574 leeg rau hnub tim 17/12/2020 no.
=>Hos hais txog Mes Kuj teb, peb lub nroog uas muaj Hmoob nyob coob tshaj:
=>. Califonia, twb muaj cov kis mob txog li 1.714.939 leeg lawm.
Hos cov tau tuag mus lawd, twb muaj li 21.883 leeg rau hnub tim 17/12/2020 no.
=>. Menessota, cov kis mob, muaj 1.714.939 leeg.
Cov tau tuag mus lawd, twb muaj 4.634 leeg.
=>.Wisconsing ,cov kis mob mob muaj 444.798 leej rau hmub tim 17/12/2020 no kiag lawm.
Cov tuag mus lawd muaj 4.196 leej los txog hnub tim 17/12/ 2020 no kiag lawm. Txij no mus yav tom ntej tseem yuav muaj npaum li cas ntxiv los tsis paub.
3. Lub xyoo 2020 no, Cov xwv txheej ua nrog huab cua tuaj uas yam neeg tsis paub txog:
Xws li los nag xob nag cua, dej sab siv nyab, toj roob hauv pes tu phau swb mus nyab zej zog.  Cua khauv zeeg, dej hiav txwv nphau tuaj nyab zej zog teb chaws. Xob tua, av qeeg,  dej sab siv huam los av xaub, kuav zej zog thoob qab ntuj khwb los muaj, muaj daus xib daws npu poob saum ntuj los, los kuj muaj ntau npaum thiab.
Lub teb chaws raug sab tshaj, yog Suav teb, Tau yuav muaj li peb lub hlis tsoom pej xeem Suav tsis tau pom lub hnub tshav ntuj tuaj ziab ib hnub li.
Muaj ntau lub nroog thiab neeg ntau txhiab vam leej tsis muaj vag muaj tsev nyob, tsis muaj zaub mov noj tsis tau dej haus.
Tseem muaj kooj txom fav, ya puv ntuj los noj qoob loo, nroj tsuag kug tas thiab.  Tej me ntses nyob hauv dej nyob tsis taus, dhiab tuaj mus tuag rau tim ntug nqhuab, muaj tsheej paug li.
Tseem hnov tej lub suab quaj, xws li tsov quaj, ho xws li nyuj nqov los noog quaj.  Tsis muaj leej twg twv tau thiab paub tias; yog lub suab dab tsi li.
4. Lub xyoo 2020 no, hnub tim 17/12/ 2020 no, nyob Sauv teb tseem pom muaj peb lub hnub ib txhij ci tuaj rau lub ntiaj teb no thiab.  Tsis paub yuav txhais mus zoo li cas li thiab.
Lub zim txwv no, mas lub ntiaj teb no, muaj txhij toob puaj yam li lawm lauj!  Nyob hauv leej tib neeg tej nruab siab tsis muaj kev sib raug zoo, los kev sib haum xeem li lawm.
Kuv xav mas tshai yuav tsum yog, cov dab tsis huv xav tuaj kav Leej Tib Neeg tej siab ntsws tswv yim, kom qaug mus npuab rau Cov Dab tsis huv no, lub tswv yim thiab nws txoj kev tsis hwm Ntuj lawm.  Kom neeg tau ua tub qaug rau Ntuj mus , kom neeg tau ncaim mus ntawm kev ua  Ntuj me nyuam.
Tus dab tsis huv no, ua tsis tau li cas rau Ntuj, ces nws xwb tim tuaj ua rau neeg, kom neeg rov tawm tsam rau neeg, ces tau ua tub qaug rau N tuj mus.  Thaud tej laus yeej ib txwm hais tias Neeg yog Ntuj me nyuam no.
Nws xwb tim yuav tuaj ua kom neeg rov taw tuam Ntuj, ces neeg yog Ntuj me nyuam, kom neeg tau kev ua tub qaug rau Ntuj. Kom Ntuj tso neeg pov tseg, ces neeg tau mus zwm rau txhua hom dab tsis huv mus tas nrho.
Ces cov thawj neeg los lawv rov tsis sib haum lawv, cov pej xeem los dab tsis tso leej twg tseg li thiab.  Dab muaj peev xwm tshob kom tej txij nkawm tsis sib haum xeeb nyob ua ke.
Muaj coob leej ntau nkawm  niam txiv lub cuab piam sij mus, rau txoj kev sib nruaj sib tso.  Los muaj kev ua xaiv ua lus, sib tua tuag mus.  Kom kev neej kev tsav tsis muaj kev tso siab thiab sib haum xeeb.
Tus dab tsis huv no, nws muaj peev xwm loj kawg, rau sab tuaj ntxias neeg kom ua kev txhaum.  Neeg tau plam mus tsis paub tias; muaj Ntuj li lawm.
Yav thaud, mas neeg tseem ua tau khauv koob los daws dab ntiab dab mus tau.  Kom cov dab tsis huv swb mus, txhob muaj mob muaj nkeeg.   Hos lub zim txwv no, neeg ua tsis tau cov khauv koob daws dab ntiab dab lawm.
Cov khawv koob txheej no, yog neeg tej ncauj nplaig, kev sib tsawg sib ntaus sib tua no. Yog hom khawv koob daws thiab ntiab neeg thiab ncaim ntawm Ntuj mus!
Yog cov khawv koob tshiab ua neeg daws thiab ntiab neeg kom tau kev cais thiab tau kev sib ncaim mus; yog hom khauv koob tawm ntawm neeg tej ncauj nplaig uas peb neeg sib cav sib ceg no ntag.
Thaum peb sib ceg sib ntaus sib ncaim, los sib tua, mas yog peb ua khawv koob ntiab thiab tua neeg li Hmoob ua khawv koob ntiab dab tawm mus ntag.
Lub ntuj lub teb mas yuav tsis txawj kawg, thaum kawg ces yog yuav hloov mus ua Ntuj Ceeb tsheej rau peb cov ntsuj Plig nyob lawm xwb. Qhov yuav kawg li tej neeg hais, ces yog  koj teg kuv tuag nthi, kuv ho teg koj tuag ntais. ces yog koj kawg thiab kuv kawg mus lawm xwb.
   
Yaj Zoov Ntxheb X.H.

Muaj 10 thoob tshuaj zoo, uas Tswv Ntuj muab rau ntiaj teb neeg siv los sib cawm. Yog cov hauv tshuaj no:
1.Yog txoj kev uas Tswv Ntuj nyiam thiab hlub txog yus tus kheej.
2. Yog txoj kev nyiam kev hlub los ntawm Niam thiab Txiv los rau yus.
3. Txoj kev nyiam kev hlub txhawb nqa los ntawm yus tsev neeg txhua tus los rau yus.
4. Yog tas nrho tsoom txheeb ze sawv daws kev nyiam kev hlub nrog rau cheeb tsam yus nyob.
5. Yog yus kev nyiam kev hlub, txhawb nqa rau lwm tus neeg, uas nws tsis muaj peev xwm txaus.
6. Tsoom txheeb ze, los phooj ywg, lawv kev nyiam kev hlub los txhawb nqa rau yus.
7. Yus yuav nco ntsoov, tus tsis muaj peev xwm; zoo li yus tej me nyuam yuav tau pab lawv.
8. Yus nyob qhov twg, nco ntsoov nrog pab pawg neeg nyob ntawd, sib yoog tus yam ntxwv nyob ntawd, kom sib haum tau ua ke.
9. Txhua yam zoo uas yog lub Sim Ceeb no tug, yuav nco ntsoov them lawv tus nqi. Hwm thiab txuag tas txhua yam, kom muaj kev huam vam thiab vam meej mus!
10. Yus yuav nco ntsoov cov hauj lwm uas Ntuj muab rau yus ua los pa blub Sim Ceeb no!
Peb neeg tuaj ua neej nyob rau hauv lub Sim Ceeb no, nyias muaj nyias cov thoob tshuaj. Cia siv los ua kev sis pab sis cawm, yus yuav siv yus cov tshuaj thiab yus li peev xwm los pub rau tus vam txog!
Cov Tshuaj no, nws yuav ntws mus tshwm rau Neeg kev ua neej muaj peb yam loj:
1-.Lus Mes Kas hais tias: Phiscal love.
Kev nyiam kev hlub los ntawm lub cev nqaij daim tawv los, hais txog kev zoo nkauj thiab zoo nraug. Thiab kev nplua nuj:
a-Laus zus, ces yus muaj kev ntxub zus thuaj.
b-Laus zus yus khuj muaj kev dhuav zus thiab.
c- Thaum nws pluag zus, sis ntxub zuj zus tuaj tsis xav nyob ua kev ntxiv lawm.
2. Lo lus Mes Kas hais tias: Spiritul love no. Nws yog kev sib hlub nyob rau sab Ntsuj Plig!
Yam no, tsis suav tias, los xav tias:
Niam zoo nkauj dua, los txiv zoo nraug dua li. Ces yus yuav hlub nws mus kom tas yus sim neej.
3. Mes Kas lo lus tias: Mental love no.
Tsis hais txiv Neej los poj Niam li.
Hu ua Leej Tib Neeg no, mas tsis hais txiv neej los poj niam li. Neeg lub siab xav txog thiab hnov xwb, ces cia li nyiam lawm:
a-Thaum yus tsis tau pom, mas yus twb nyiam heev lawm thiab yus nco heev kawg li.
b- Yog thaum yus pom kiag lawd, yus tsis nyiam thiab tsis nco lawm.
Nyob hauv txiv neej thiab poj niam nruab siab, nyias muaj nyias yam uas nyias nyiam nyias sib txwv.
Cov txiv neej lub siab lawv nyiam Xya yam no:
1.Cov txiv neej, nyiam kom luag sab nraud, hwm nws ua tus tswv kom nws muaj koob meej.
2. Nws nyiam kom luag mloog nws thiab saib nws yog tus thawj.
3. Nws nyiam kom poj niam tuav rawv lawv kev zoo nkauj cia rau nws.
4. Nws nyiam kom poj niam hais lus nrog kev hlub pub rau nws, kom tsim nyog!
5. Nws nyiam kom luag, txaus siab rau nws ua txhua yam hauj lwm.
6. Nws nyiam kom luag qhuas txog nws tus yam ntxwv mus li.
7. Nws lub siab xav kom luag paub tias; nws muaj nqes dua nws tus txij nkawm.
Xya yam uas poj niam ntshaw thiab nyiam nyob rau nws nruab siab muaj cov no:
1.Poj niam ntshaw thiab nyiam, kom tus txiv neej muaj ib txoj kev ntseeg ruaj khov.
2. Poj niam xav paub tias; nws puas ua tau raws li
txiv neej lub siab nyiam. Kom nws paub hloov thiab kho nws tus kheej!
3. Poj niam nws kuj xav paub tias; tus txiv neej puas saib nws muaj nqes!
4. Nws xav kom txiv neej paub tias; poj niam lub zog tab dua txiv neej lub.
5. Poj niam xav paub tias; txiv neej puas txaus siab qee ib lub caij los nrog poj nian nyob thiab tham ua ke!
6. Nws kuj xav paub tias; poj niam puas yog tus nyob ze txiv neej txhua lub caij nyoog!
7. Poj niam kuj xav paub tias; txiv neej puas muab nws lub siab thiab lub neej los cog rau poj niam!
Nyob hauv zaj lus no, Hmoob yeej muaj ib lo lus hais tias; tus txiv yog tus chiv, hos tus nyab yog tus pab no.
Kwv tij phooj ywg zaj lus no, zoo rau peb sawv daws kom nyias paub nyias tias; yus yog neeg tsim txiaj muaj koob meej. Siv yus lub peev xwm thiab lub zog, los ua tej hauj lwm pab lub Sim Ceeb no. kom tiav log li Qaum Ntuj lub siab nyiam, uas Nws vam txog neeg. Los sis pab sis nres, ua lub neej nyob, kom muaj txoj kev thaj yeeb pub rau sawv daws.

Yaj Zoov Ntxheb X.H.

Muaj ob tug neeg nrog ob lub siab xav sib txawv li hais nyob hauv zaj no:
Thawj tug nws muaj lub tswv yim, xav qhov phem,mas nyob rau hauv nws nruab siab, nws hais tawm los nws tau khaws tseg tas nrho, rau nws nruab siab tseg.
Hos tus ob nws kuj xav tau muaj, tib yam nws tau hais tawm los, tab sis nws txawj muab cais thau tawm mus, nws tsis khaws tseg cia rau nws nruab siab, nws txawj muab cais tawm mus. Ces zoo li kawd, nyias nyias txoj kev taug.
Yam sib txawv, ib tug khaws tseg, hos ib tug nws txawj muab cais tso tawm mus lawm.
Cov lus lus phem thiab cov lus zoo hais no, yog xav hais txog dab tsi? Yog xav qhia tias; koj ua los koj xav tau yam phem nyob nruab siab, mas koj yuav txhob khaws tseg.
Nyob rau koj nruab siab nrog koj lub tswv yim, nws yuav ua rau koj xav thiab nco mus li ib sim neej nyob hauv koj nruab siab, los nruab tswv yim.
Ces koj muab tej yam koj xav tau thiab hais tawm ntawd, khaws los coj, ces koj cia li ntseeg tias; koj ua tsis tau dab ts li lawm, los koj tsis txawj ua, ces koj cia li tsis muaj peev xwm ua lwm yam mus ntxiv lawm!
Cov kev phem koj tau xav thiab hais no thiab cov kev zoo no, tsis yog cov luag hais txog tej kev phem los kev zoo uas lwm tus tau ua phem los rau koj!
Yog yam uas koj tus kheej ua thiab xav tau nyob hauv yus nruab siab tawm los!
Koj tsis txawj daws tso tawm mus, koj tau khaws yam tsis zoo. Los koj daws tseg txhob khaws cia nyob rau koj nruab siab nruab plawv.
Koj cia li tsis paub tias; yuav yam zoo thiab yam tsis zoo, koj tsis paub xaiv yam twg tseg li. Yam phem, nrog koj nyob lawm, ces koj xav tias, ua cas koj yuav tsis paub li luag, tsis txawj ua li luag, cas yus yuav ruam ua luaj li no.
Ces koj cia li ntseeg tias; koj ruam, ces koj rov ntxub koj thiab ntxub cov neeg txawj xav thiab neeg txawj ntse. Koj tsis nyian cov neeg paub qab hau, vim luag ntse dua koj lawm, ces koj cia li yog neeg ruam lawm.
Koj lam ntxub luag qus qus li luag tau ua txhaum, los ua tub qaug rau koj mus lawm. Tus xav li no, yog tus xav tau tias, Kuv yog neeg tsis tsim txiaj thiab kuv tsis muaj nqes,kuv tswv yim tsis tsis zoo, ces nws tsis muaj zog thiab tsis muaj peev xwm ntxiv mus.
Ces koj yuav ris ib lub nra hnyav, ua neeg ruam tu siab mus li tas koj lub neej. Koj caum raws tsis cuag luag.
Tus txawj cais qhov tsis zoo tawm mus lawm, nws khaws yam zoo tseg, yog tus xav li no:
Luag ua tau zoo, kuv yeej yuav ua tau zoo li luag xwb, kuv yuav paub thiab, kuv yuav ua tau, kom kuv muaj peev xwm xyaum ua ib hnub kuv yeej yuav txawj.
Ua lub neej nyob hauv lub Sim ceeb no, mas yeej muaj cov neeg xav li hais no. Peb yuav saib, kuv puas yog tus neeg khaws kev phem li ntawd!
Yog kuv xav thiab ua tsawg yam tsis zoo los khaws tas nrho cia rau nruab siab, mas kuv yog tus khaws yam tsis zoo rau kuv nruab siab lawm.
Kuv yuav xyaum kom kuv txawj dawm teeb meem mus, yam tsis zoo uas yus tau ua los tau xav nyob nruab siab ntawd, mas muab daws tso tawm mus, ces kuv thiaj yuav tau nyob kaj siab mus rau yav tom ntej.
Tus khaws cov zoo, yog tus nws xav tias; kuv yog neeg kuv yeej zoo thiab muaj peev xwm, luag twb muaj peev xwm ua tau tus neeg zoo, kuv yeej yuav muaj peev xwm ua tau zoo ib yam li luag mus xwb.
Yog lawm yam twg uas kuv xav tau phem, kuv muab daws tso tawm mus, kom kuv txhob nco, ces kuv yuav nyob kaj siab lug mus. Tsis muaj ib yam uas kuv yuav tsis txawj los tsis paub ua.
Yus ntsia ces yus kawm, yus xyaum thiab tso siab rau yus ces yus yuav txawj ua zoo tshaj luag mus thiab. Ces koj txhob xam khib nyob hauv koj nruab siab.
Txhob cia zaj lus xav tau phem li hais no, nyob rau koj nruab siab. Ces koj yuav tau xav qhov ua zoo los nyob puv nkaus rau yus nruab siab.
Koj pom tus neeg thoob tsib ua koj ntsia nws ua thiab nws zaj tswv yim, ces koj xyaum ua raws li nws tus piv txwv los nws tus yam ntxwv. Ces koj yeej muaj kev txawj ntse paub npaum li tus tau mus kawm tiav los.
Cov tsis txawj xav, mas lawv pheej cia yam phem nrog lawv nyob mus li. Rau rau lawv nruab siab, los cov phem no twb nyob ruaj rau lawv tej nruab siab lawm. Ces yam zoo xav los nyob, los tsis muaj chaw txais tos lawm.
Li Hmoob hais, ces koj lub kawm koj ris, koj twb sau tej kev phem nyob hauv puv nkaus lawm. Cov kev zoo, lawv los lawv tsis muaj chaw rau lawv nyob lawm.
Ces lawv mus dhau sab nraud lawm, los tshau mus poob hauv qab kawg tas lawm. Ces tshuav cov phem nyob nkaus lawm xwb.
Koj saib tsawg zaus, los koj tsuas pom muaj cov phem xwb, tsis muaj cov zoo. Ces koj tsis muaj siab nrhiav kev xyaum ua zoo, ces koj cia li ua phooj ywg nrog cov phem nyob mus li.
Ces koj ua neeg ruam thoj chim. Koj cia li qaug zog tu siab nyob nrog yam phem uas koj tau tsim muaj los ntawd. Koj qaug zog tsis xav ua qhov zoo mus ntxiv vim koj muaj cov kev phem ntau dhau lawm.
Yog koj tsis ceev faj, koj tsuas muaj cov zoo txog li 20 rau 30 % xwb, Koj khaws 10% kev tu siab, 10% kev ntxhov siab, 10% koj tej kev yuam kev, 10% kev khib, 10%, kev kev cib nyeej npau taws, los ntxiv rau thiab, 10%, kev tsis ua neeg tsis muaj peev xwm, 10% kev ua neeg tsis muaj peev xwm.
Ces koj twb muaj qhov tsis zoo txog 70% lawm cov kev zoo yuam qhuv qhuav muaj li 20 rau 30% xwb. Tsis muaj chaw txais tos cov zoo. Lawv los, los tsis muaj chaw rau lawv nyob. Ces lawv poob mus rau sab nraud tas lawm, ces koj cia li zoo li tus neeg pluag heev lawm:
Ces koj yuav muaj kev qaug zog thiab kev tus siab mus, ces koj cia li ua neeg ruam thoj chim, koj qaug zog tsis xav khaws sab kev zoo li kev txawj ntse ua neeg thoob tsib mus.
Ces koj yuam koj lub siab lub tswv yim, mus ua neeg tsis muaj tswv yim thoob tsib xws luag. Vim koj tsis txawj cais tso qhov phem tawm mus. tseg chaw rau qhov zoo los nyob.
Ua rau koj tus Ntsuj Plig nrog koj tu siab loj, vim koj khaws kev tu siab ntau rau koj ris ua nra hnyav dhau mus tsis tau rau sab zoo.
Koj lub kawm koj ris tsuas ntim ib kawg hnyav qees yog ris kev thoj chim tu siab nyob koj nruab siab nrub plaw, ces koj tus Ntsuj Plig nws raug kev sab nkeeg, cuag li kev raug txim luag muab kaw nyob tsev loj faj, tu siab txaus nkaus.
Peb ua neej nyob rau ntiaj teb no, peb yuav xyaum khaws cov zoo pub rau peb cov Ntsuj Plig, kom nws kom nws roos tau peb lub cev ntaj ntsug nyob kaj siab lug.
Nco ntsoov txhob cia koj lub siab ntim kev tu siab, nws yuav ua ib tug yeeb ncuab rau koj. Ces koj yuav tsis muaj kev hlub.
Kev tu siab kev thoj chim yuav los tswj koj, ces koj yuav tsis txawj ua yam zoo mus ntxiv lawm. Sawv ntxhov tsees los koj maj mam muab yam phem no, tso tshem tawm mus kom tas.
Zoo li tej kev txhawj xeeb, kev ua mob nkeeg rau koj tshem mus. Ces koj thov Ntuj daws teeb meem thiab tso siab lug rau Ntuj, ces koj yuav nyob kaj lug mus rau txoj kev kaj siab ua neeg thoob tsib mus.
Nyob hauv zaj nkauj paj nruag 103 ntawm qib 5, muaj lo lus hais tias:
Tswv Ntuj yuav txhab kev zoo kom puav nkaus rau koj. Nyob hauv koj lub neej, tab txawm koj laus lawm, los koj lub tswv yim thiab koj tus Ntsuj Plig, yuav hluas li koj tseem yog ib tug neeg hluas. Ces koj yuav muaj zog muab kev phem tshem tawm mus thiab muab kev zoo los ntsaws rau hauv koj nruab siab nruab tswv yim, kom puv nkaus rau.
Zoo li koj tau kev poob nyiaj lawm, los koj qhib koj lub ncauj kawm kom loj. Ces muab koj lub kawm nchuav tshem cov phem tawm mus kom tas!
Ntuj yuav muab yam zoo, los ntim rau hauv koj lub kawm kom puv nkaus. Koj yuav muaj peev xwm los ua dua yam tshiab, ces koj yuav nplua nuj dua qub tuaj li yav dhau los lawd ob npaug ntxiv!
Yog koj ris rawv lub kawm qub uas ntim cov kev phem, mas nws yuav hloov los ua ib co tshuaj los lom koj. Ces koj yuav muaj mob, yog koj tsis rho nws tawm mus.
Yog koj khaws cov phem tseg rau hauv koj, mas nws yuav ua tau ib co tshuaj los lom koj ntxiv. Cov phem no nws yog ib co kua toj taug.
Koj khaws thiab tseg chaw rau nyob pub rau co lus xav thiab ua tsis zoo, yuav ua rau koj tsis muaj zog tiv co lus tawm hauv kev xav tau phem los, yuav ua kom nyob hauv txoj kev ncaim mus kom los rau sab zoo tsis tau ntxiv lawm.
Peb mus saib tus Vaj Das Vis zaj, Nws kuj muaj tej yam uas ua tsis zoo thiab, yog luag dig tshawb tawm los. Mas nws lees tias; nws tau ua tiag, nws thov los daws txhaum tas ntawm Ntuj lawm.
Nws ntseeg tias; Ntuj twb zam tas lawm, txhob ua ntxiv lawm xwb, ces nws tau nyob kaj siab lug mus. Yog yus tseem nco ntsoov tias; yus tau ua ib zaug kev txhaum zoo li ntawd, yog yus khaws tseg nyob rau yus nruab siab mus li, tsis nrauj tso tawm mus.
Mas yam koj khaws tseg nyob hauv koj nruab siab, nws yuav ua ib hauv tshuaj los lom koj ntxiv, ces koj yuav mob txog koj tus Ntsuj Plig. Ces tsis muaj ib tug kws tshuaj yuav kho tau kom rov zoo mus li!
Nco ntsoov koj pom luag tau txij tau nkawm zoo nkauj, koj yuav qhuas rau Ntuj hnov tias; Ntuj txawj tsim tau tej tus neeg zoo nkauj zoo nraug, kom sib phim li ntawd, yog luag tug.
Koj yuav xav tias;yus tus tseem los tsis tau txog xwb, los txog mas yus tus tseem yuav yog tus zoo tshaj ntawd, yus ua Ntuj tsaug.
Yam Ntuj muab rau yus mas Ntuj yeej sau yus lub npe tseg rau, tsis muaj leej twg yuav txeeb tau mus ua nws tug.
Yog koj xav tau yam zoo thiab txawj khaws yam zoo tseg, nyob rau koj nruab siab. Mas koj twb laus muaj hnub nyug li 80 xyoo lawm, los koj lub tswv yim kev thoob tsib nws tseem hluas hluas li cov hluas uas nyuam qhuav tau mus kawm txuj tiav los.
Lawv tej tawv nqaij tsis txoom tsis ntsws thiab tsis nrwg mus. Hos tus tsis txawj cais cov kev phem los ntawm nws kev xav thiab kev hais phem nyob nruab siab los.
Mas tab yog lawv tseem hluas, los lawv tawv ntsws lawv nqaij txoom tswv yim tsis meej pem , lawv hnub nyoog 60 70 xyoo xwb los lawv coj tus yam ntxwv li lawv twb nyob ze 120 xyoo lawm.
Yes Xus hais tias; Ntuj yuav foom lus zoo rau cov neeg siab huv, uas lawv txawj khaws yam zoo nyob rau nruab siab uas nws coj ntawd.
Yuav tsis muaj kua lwj kua paug nyob rau hauv lawv tej nruab siab nruab cev, kom txhob muaj kua lwj kua paug, mus ua mob ua ntsaj rau lawv.
Leej Tib Neeg muaj txhua yam mob, mas vim lawv muaj cov kua lwj kua paug tsis muaj chaw tawm mus, los ua rau lawv muaj mob muaj nkeeg loj nrog lawv kev tus siab ua neeg thoj chim ntawd.
Yeej muaj tseeb li Yes Xus hais tiag:
Thaum Ntuj foom los yus tsis kam txais cov zoo, ces yus nyob rawv rau qhov txais co phem. Thaum Ntuj foom los ces poob los ces cov phem cov zoo poob los rau hauv sawv daws cov kawm.
Yog yus lub kawm muaj cov tshuaj kuab lom neeg tsuag li kua lwj ua paug. Yam zoo los, los yuav tiv tsis taus nrog cov kuab phem.
Ces zoo yuav poob mus rau sab nraud lawm, ces yus tsuas tshuav cov phem zoo li cov kuab ua paug nyob, ces ua rau lub kawm hnyav ces lub kawm yuav ntuag mus. Ces yus yuav laus thiab tuag mus sai xwb.
Leej Tib Neeg yog xav ua kom tau zoo, rau Ntuj hlub thiab zoo rau neeg qhuas. Mas koj yuav cheb koj lub kawm kom huv si, koj thiaj mus tau ib ruam kev rau tom ntej.
Nco ntsoov tias; Ntuj tus tshiab yuav xa qhov zoo tuaj rau koj, mas nws yuav saib kom zoo, kom txhob muaj neeg nyiag tau mus ua nws tug!
Yog koj tuav rawv qhov phem, thaum Ntuj tus Tshiab nqa tuaj. tsis muaj chaws rau nws tso tseg rau koj. Nws yuav saib nraim, yuav tsis muab tso pov tseg, rau qhov twg rau neeg pom. Vim yog ib yam muaj nuj nqes heev!
Tej yam qub kev txhaum, uas luag tau mus tshawb txog tej yam qub qub. Uas koj tau ua tsis zoo yav tas tawm los lawm.
Hais rau koj hnov, los koj yuav muab yam qub nyob hauv nruab siab no nrho tso tawm mus. Txhob nco tseg, vim koj twb tau hais qhia rau Tswv Ntuj tas ua ntej tas lawm. Thaum koj mus daws txhaum ntawd.
Ntuj twb tau zam rau mus lawm. Koj txhob rov muab los khaws tseg dua rau nruab siab.
Yog koj rov khaws tej yam qub qub no, los ua kev tu siab. Rau koj rov ris dua mus, ces yuav tso tsis tau tawm mus ntxiv.
Koj yuav ntseeg tias; Ntuj twb tau daws tawm mus tas lawm, koj thov Ntuj pab koj kom txhob nco txog ntxiv lawm. Qhov tseeb, mas saib koj puas rov zam rau koj lub cev thiab lub siab xwb.
Tsis yog Ntuj mus tshawb tawm los rov rau koj, hos yog koj mus tshawb koj coj los ris, ces koj yuav ris kev txom nyem ua kom koj sawv tsis tau los ua dua tus neeg tshiab.
Nco ntsoov tias; tus mus khaws nws cov qub txhaum rov los, mas tsis yog Ntuj rov muab los rau koj. Koj tuaj yeem mus nrhiav los ris dua, ces kawg yuav rov ua ib tug yeeb ncuab rau koj. Kom koj rov ntog mus rau theem tob dua, uas koj yuav tawm tsis tau los xwb.
Ces koj yuav mus tsis txog, lub hom pliaj uas koj tau teeb tseg, uas yuav mus txog lub chaw nyob thaj yeeb, mus rau lub neej tom ntej li koj tau xav tseg.
Koj yuav txhob nco txog, koj tsa koj ua tus nyob siab tsis zoo li tus tsis muaj kev txhaum. Koj thiaj mus tau ib ruam tom ntej, koj thiaj yuav tau yam tshiab uas Ntuj tau foom los rau koj!
Muaj cov neeg hais tias; kuv ua txhaum ntau dhau lawm. kuv tsis tsim nyog yuav tau txais Ntuj koob hmoov lawm.
Tus hais li no, nws tsis ntseeg tias; nws yuav muaj zog nyob ua Ntuj me nyuam zoo mus ntxiv, mas nws xav yuam kev lawm od.
Koj yuav nco ntsoov tshais ib kauj ruam rau yav tom ntej, nco ntsoov tias; kuv yog tus tshiab lawm, kuv yuav taug txoj kev tshiab, ces kuv thiaj yog tus yeej no mog!
Thaud koj tau ua txhaum, zej zog tau hais koj dab plig, koj txhob rov khaws tseg, rau koj nruab siab.
Koj lees nyob nruab siab tias; kuv tau ua tiag, Ntuj twb zam tas thaum kuv mus daws txhaum lawm.
Ces koj coj lo lus no; kuv yog tus neeg tshiab lawm, thaud, kuv tau ua kev txhaum kev qias lawm. Kuv twb tau ua tsuas rau kuv lub siab thiab kuv tus Ntsuj Plig ib zaug lawm.
Zaum no, kuv txhob khaws los nco txog lawm, ces tus mob nkeeg thiaj tsis tau rov los paug tsuas rau koj lub tswv yim thiab kuv tus Ntsuj Plig.
Ces koj zam rau luag, koj thiaj mus tau ib kauj ruam rau yav tom ntej. Koj yuav tau nyob kaj lug, li tus neeg dawb huv!
Ces koj mus tau raws li lub hom phiaj uas koj tau teeb tseg lawm.
Zaj kuv sau no, yog Leej Tswv Yim Ntshiab lub tswv Yim, uas Yes Xus Pleev tau thov kom Leej Txiv tso tuaj nplij. Cov neeg tsis paub qab hau thiab tsis to taub txog nws tus kheej txoj kev ua neej.
Nyob nrog Leej Tswv Yim Ntshiab, tus txawj qhia kev thoob tsib rau neeg. Kom txawj coj lub neej mus taug kev kaj siab kom tau lub neej zoo mus nto ntsis.
Thiaj tsis muaj kev tu siab, tau mus txog lub hom phiaj uas nws ntshaw thiab tau teeb tseg kom tau ua lub neej zoo mus nto teej nto luag.

Sau nyob Sacramento
Tim 22/ 3/ 2021.
Yaj zoov Ntxheb Xib Hwb.

Leej tsob Hwb Vam Tub Muas,zaj dab neeg ntuas cov tub ntsuag. Kom lawv muaj peev xwm ua lawv lub neej kom mus nto ntsis.
Xib Hwb hais tias:
Muaj ib tug tub ntsuag niam txiv tuag tas, tseg nws ib leeg nyob, tsis muaj leej twg xav hlub thiab qhia kom nws txawj ua no ua haus.
Tus tub ntsuag no hlob tuaj, ces nws txom txom nyem, nws mus thov kom luag tej qhia saib nws yuav ua li cas nws lub neej thiaj yuav rov zoo xws luag.
Nws lub neej raws nraim li tej laus hais tias, niam txiv tuag ces vaj tse ntuag. Vim niam txiv tso nws tseg thaum nws lub hnub nyug tseem me.
Nws loj tuaj lawm nws mus ntsib cov laus neeg kom lawv pab qhia nws ua neej. Nws xub mus ntsib ib tug tswv zos, nws hais tias:
Yawg Tswv zos, kuv niam kuv txiv tuag tas thaum kuv tseem yau, kuv tsis txawj ua noj li, kuv tuaj nug koj, thov koj pab qhia kuv saib yuav ua li cas thiaj muaj noj muaj haus thiab muaj hnav xws li lub teb chaws.
Tus tswv zos hais rau me tub ntsuag tias, koj ntim mov ces koj nce mus lawm pem lub roob siab siab ped, Muaj ib tug yawg laus nyob ped yuav qhia rau koj.
Nws hais ntxiv tias yog koj mus mas yuav mus kom ntxov, mus txog ped kom lub hnub pib tawm kiag xwb luag thiaj qhia koj od!
Ces tag kis xwb tub ntsuag ntim mov, nws sawv ntxov mus. Nws nce nto plaws ped,ces lub hnub pib tawm kiag. Nws tsis pom muaj neeg li.
Nws zaum zaum ntsia, ces nws pom ib tug choj tuam hla ib lub pas dej mus rau sab tid. nws taug tus choj ntawd mus. Nws mus txog sab ntug tid.
Ces nws pom ib tug yawg laws zaum nyob ntawd, nws nug tus yawg laus ntawd, thiab hais tias, Yawg, kuv tsis muaj niam muaj txiv li, kuv tsis paub tias yuav ua li cas, thiaj li yuav muaj noj muaj hnav xws luag.
Kuv tuaj ntawm no, yog kuv tuaj kom koj pab qhia kuv saib kuv yuav ua li cas, kuv thiaj ua neej xws li luag no! Tus yawg laws ntawd tsis teb dab tsis rau nws li.
Tub ntsuag ntim mov mus saib tus yawg laus ntawd tau peb hnub nkaus. Hnub twg los tus yawg laus ntawd yeej tsis hais lus thiab tsis teb li.
Hnub peb nws rov mus ua tib yam li thawj ob hnub nws tau mus. Nw nug tias yawg laus kuv twb tuaj peb hnub lawm thov koj pab qhia kuv tiag tiag li lauj, txom nyem ua luaj li no.
Tus yawg laus ntawd muab nws tib thawb poob kiag rau hauv lub pas dej lawm. nws ntshai tuag, ces peem lwj pem liam tawm tau los, Nws hais tias, Yawg kuv tuaj nug koj thov kom koj qhia kuv no.
Ua cas koj cia li muab kuv thawb poob rau hauv pas dej kuv twb yuav tuag li no!
Tus yawg laus ntawd hais tias,qhov kuv qhia koj ces yog li no lauj! koj yuav tsum siv zog li koj tau ua luam dej no. Ces kev noj kev haus kev hnav thiab nyiaj ces koj yuav muaj, noj hnav thiab siv tsis tas.
Neeg ntiaj tog qaum pes yuav ntshaw txog koj kev noj kev haus thiab kev nplua nuj txhua yam tib si. Ua li mas,tsis hais cov ua tub ntsuag xwb.
Txhua tus neeg tsis muaj noj muaj haus tsis tau ua neeg nplua nuj, ces sawv daws puav leej zoo li tub ntsuag tib si. Cov neeg txom nyem ces yog lawv tsis hov txha li tej laus cov lus qhuab qhia tias neeg tsis hov txha.
Tsis siv zog ua ces tsis muaj noj muaj haus, nws yuav ntshaw luag kev noj kev haus. Kev siv zog tsis yog siv zog los mus ua qoob ua loo li Hmoob ua xwb.
Koj yuav siv zog ua txhua yam:
Tus kawm txuj ci los siv zog, tus ua hauj lwm los yuav siv zog, kom luag txhob ntiab nws tawm hauj lwm. Tus nyob xav tswv yim xwb los yuav tau rau siab xav txoj zoo kom muaj nqes thiaj tawg paj txi txiv tau.
Kev rau siab thiab siv zog,mas lub zog tsis tawj tag li. yim rau siab ua yim paub,thiab yim txawj, ces yim nplua nuj tuaj.
Hos kev tub nkeeg ntshai siv zog, yog kev pluag thiab kev ua neeg ruam, nyob ntshaw luag noj ntshaw luag haus. Kev tub nkeeg txawm ua zam zoo cuag hnav tsuj hnav npuag los tsis yog txoj kev zoo nkauj zoo nraug.
Kev zoo nkauj zoo nraug tawm ntawm lub ncauj thiab ntawm ob txhais tes los mas thiaj yog zoo nkauj zoo nraug tob, ua rau neeg nyiam thiab neeg ntshaw.
Tus neeg tub nkeeg ua zam zoo, cuab phiaj rau luag saib, mas ua neeg dawm luag taw. Nws ua rau tej neeg yog qhua ntawd, qhov muag laim los tes taw qeeb mus nrog txhua yam tib si.
Yam li koj yuav tau ntsia nws ib plia, koj yuav tau zam nws kom deb nws, tsam ua tsuas nws lub zam. Koj yuav npaj kom muaj lub chaw zaum nrog cov neeg muaj meej mom rau nws, li no ces yog tus neeg dawm luag taw, kom ua hauj lwm qeeb lawm.
Ua neeg nyob koj txhob ntshai tsam luag noj koj zog. Koj yuav tshai tsam luag tsis tau koj zog noj, mas yog qhov zoo, uas luag yuav qhuas thiab nco koj mus li.

Yaj Zoov Ntxheb Xib Hwb.

Hais txog tus dab tsis huv no, mas peb sawv daws tsis paub nws lub npe yog hu li cas tiag!

1.Hais txog peb Leej Tib Neeg nyob ntiaj teb no, mas tsis muaj leej twg paub txog cov dab tsis huv no lub tswv yim zoo.
Peb tsoom neeg, tsis hais yog Haiv neeg twg li, sawv daws puav leej yog Tswv Ntuj me nyuam. Ib txheej zuj zus, txij thaum ntuj tsim teb raug los txog niaj hnub no.

A.Cov dab tsis huv no, lawv yeej paub zoo tias; Neeg Yaj Ceeb tau zoo lub neej dua dab lawm. Dab hais lus tsuas yog dab thiaj paub xwb, neej paub tsis tau.
Ces dab tuaj yob ntxias neeg lub siab, kom xib mus rau dab lub tswv yim, kom neeg tsim teeb meem rau neeg kom dab ntxias tau neeg yooj yim los mloog tau dab sai.
Ces dab tuaj ntxias cov thawj neeg, kom tsim tej teeb meem tsis tsis tu ncua rau neeg muaj kev sib tu siab loj, ces dab yuav ntxiag txhua tus sawv los ua thawj neeg yooj yim dua.
Kom neeg ua tub qaug rau neeg ua ntej, ces neeg thiaj yuav ua kev txhaum mus tub qaug, rau Tswv Ntuj. Kom Ntuj los tsis muaj kev hlub thiab neeg los tsis muaj kev qhuas.
Ces sawv daws muaj kev ua chawj chim, muaj kev cib nyeej puv ntiaj teb. Yus twb yog tus phem, los yus tseem hu txog Ntuj, tuaj muab txim rau neeg, zoo li hmoob hais kam los tias; nws raug khaum mus lawm.
Ntuj tsis rau txim thiab tsis muab kev khaum rau tus neeg yus tsis nyiam ntawd, los yus tsawm Ntuj mu sib zaug. Ces yus hu dab thiab fiv kom dab tuaj tom nws mus.
Yog nws muaj mob, los raug me ntsis xwv txheej, ces yus qhuas rau dab tias; yus hu rau dab, ces dab tom kiag lawm ntag.
yam zoo li no, mas cov neeg zwm rau dab mas lawv ntseeg kawg. Ces neeg tau tham puv qab zej hauv zos, ces lub ntiaj teb thiaj no.
Thiaj ua rau tsoom neeg tsis thoob tsib, thiaj tau ntseeg tias: Dab muaj peev xwm kawg, yog hu txog ces dab tom thiab dab nplua tau neeg mus no.
Ces thiaj ua rau neeg tej nplooj siab tswv yim, tsis tso siab rau leej twg. nyiam hu nyias txog dab tuaj rhuav tshem kev sib hlub mus tas nrho.
Ib leeg tsis nchawg leeg, tsis muaj kev tso siab. Nyias muaj nyias dab nyias qhua, sib txawv sib pab tsis tau. Yuav kom sib pab tau, mas yuav kiav xeem kiav dab tib si los ua yus xeem, mas mas thiaj pab tau, dab thiaj tsis tom!

B. Tej hais no, puav leej yog tawm ntawm, cov dab tsis huv lub tswv yim los tas nrho. Tos ib lub xeem xwb los muaj txog 5 hom dab qhua sib txawv vim yog yog raug cov dab tsis huv no, cob qhia los lawm.

C . Kuv tog Hmoob Yaj, kuv tsuas paub cov nyob hauv kuv lub xeem kuv yuav qhia me ntsis tias; vim dab tsi tiag!

ac=>.Yav ua ntej ntawd, kuv kuj tsis paub tias; lub keeb kwm tej laus ua zoo li cas! Kuv paub txij Yawg Tsim Nuj thiab Pog Tsim Nuj nkawd los xwb.
Pog Tsim Nuj thiab Yawg Tsim Nuj, nkawd yug tau ob leeg tub. Tus tub hlob nws muaj 9 leeg tub, tus yau nws muaj 5 leeg tub.

bc=>.Thaum nkawd, muaj tub ki hlob los, Ces tus kwv nws ua dab ua qhua ua ntej. nws tau ua 5 txig kom txhua nws 5 leeg tub. Nws tsis hu tus tij thiab nws 9 leeg tub tuaj koom.

dc=>. Ces tus ua tij nws ho ua nws dab nws qhua, nws ua 9 txim kom txhua nws 9 leeg tub tuaj lawm thiab. Nws kuj tsis suav tus kwv cov tub nyob hauv thiab.
Yog Yawg Tsim Nuj ob tug tub no, nkawd xub ua dab qhua 5 txig thiab 9 txim. Ob kwv tij no, nkawd tau xub ncaim dab qhuas li no ua ntej tsaj sawv daws mus li hais no.

dc=> Tom qab no, muaj ib tug kwv tij nyob hauv pab 9 txim. Muaj ib tug, nws yug muaj ib leeg tub xwb, los tseem tsis kheev hlob li thiab.
Nws ris mus ywj ke saib puas ntsib neeg, thov luag ua niam qhuav txiv qhuav, pov hwm saib puas hlob zoo tuaj!
Muaj hmoo kawg, nws mus nyob tom kev tos, ces txawm muaj ob lub xeem hmoob tuaj! Yog Hmoob Tsab thiab Hmoob Tsheej.
Nws thov nkawd ua niam qhuav txiv qhuav pov hwm, kom tus tub loj hlob zoo tuaj. Nkawd muab tis npe hu ua Tsab Tsheej no.
Nyob rov tom qab, ces cuab kwv tij no, tsis sis hlub zoo. Lawv hais rau Tsab Tsheej tias; koj tsis yog peb kwv tij, koj cov kwv tij ces yog Hmoob Tsab thiab Hmoob Tsheej no.
Ces nws muaj kev tu siab nws tsiv mus nrog Hmoob Tsab thiab Hmoob Tsheej nyob lawm. thaum nws laus yuav dua toj, ces nws qhia rau nws cov tub tias: Cuab kwv tij tsis suav nej.
Dua kuv lawm ces nej ua dab ua qhua, ces nej ua ib taig laig rau kuv ib leeg xwb. Los tom qab no, cuab Hmoob Yaj Leej twg caum tsis cuag kwv tij lawm, ces lawv tsis paub ua dab ua qhua.
Ces lawv thov Muam Phauj tuaj qhia kom lawv ua taig laig mus lawm. Ua taig laig, yog 9 tug 10 tus dab los tuaj koom noj tib taig xwb.

Cc=> Nyob los mus pab 5 txig, muaj ib tug, thaum nws ua dab ua qhua. Nws hlub tus ntxhais tus vauv heev, nws caw tus txhais thiab tus Vauv tuaj koom.
Ces nws ntxiv 2 txim rau, thiaj ua 7 txim tuaj lawm thiab peb hu nws ua yawg siab dawb no. Ces Cuab Hmoob Yaj twb tau ncaim mus, ua plaub tug dab lawm.

Dc=>Pab ncaim ua qab kiag yog pab no! Muaj 3 tug me nyuam, lawv niam lawv txiv raug li Hmoob hais tias; Ntuj tsis nqus tes, Ntuj tau nqus taw lawm.
Niam txiv ploj tuag tas tsoom kwv tij, tsis muaj neeg xav hlub thiab zeem lawv ua kwv ua tij nyob kom tau kev sib pab sib txhawb.
Lawv raug kev txom nyej loj kawg, tsis muaj noj tsis muaj hnav li. Cuab kwv tij los tsis hlub tsis pab ib yam dab tsis rau peb tug kwv tij ntsuag no l.
Lawv lam noj qos noj nroj, noj xyoob noj ntoo hlob los mus tiav hlaub tias ces xwb. tsis muaj leej twg los lwm xeem hmoob tuaj saws mus ua lawv tub kom muaj kev hlub.
Thaum lawv paub tab lawm, yuav yuav paub ua dab ua qhua. Kom muaj dab qhuas pov hwm pov yawm lawv, ces lawv thiaj ua cov Yaj 3 taig, lawv cov dab qhuas ces muaj peb tug yawg lawm xwb.
Peb thiaj paub tias; Cuab Hmoob yaj no, lawv muab txoj kev ua dab ua qhua no, los sib cais sib ncaim mus ua 5 pab neeg nyias muaj nyias dab nyias qhuas li no.

Ec=>Kev sib ncaim los ntawm dab qhuas los, mas yog ib txoj kev tu siab loj kawg:
Thaum yus nyob koom zej zog nrog luag, muaj mob muaj tuag, mas luag hais rau yus tias:
Pab tsis tau, vim peb tsis thooj, tsis dab koom qhua, yog pab ces dab yuav tom peb. vim tsis yog yus li dab qhuas, mas dab tsis nyiam. Yog mus pab lawm, ces dab yuav tom, kom yus tau ploj tuag mus li xwb.
Hais rau koj paub, txhob tu siab mog, ces luag khiav luag mus tsev lawm. Tsis muaj kev hlub kev tshua. ib qho luaj ntiv luaj rau li.
Txoj kev sib ncaim los ntawm cov dab qhua no, puav leej yog tus dab tsis huv no lub tswv yim tuaj haub ntxias neeg kom sib ncaim mus li no!

2.Txhua txoj kev ntseeg yeej muaj chaw hlav ncau nqes saum ntuj los tas nrho:
Kuv yuav muab txoj kev ntseeg Ntuj, uas yog Tswv Ntuj lub siab cob qhia los hais me ntsis:
Cov kev ntseeg txog Txwv Ntuj uas Ntuj xub tshoj Yawg Has Nplas Has tau ntau pua xyoo ua ntej los ntawd los hais!
Tswv Ntuj npaj kom muaj txoj kev zoo rau Tswv Ntuj Leej Tub Yes Xus tau tshwm sim los qhia txoj kev cawm neeg txoj sia, pub rau lub sim Ceeb Neeg.
Tswv Ntuj tau xa ntau tus Yaj Saub tuaj tshaj Tswv Ntuj txoj cai ua ntej. Ntuj mam tso Nws leej tub tuaj cawm lub qab ntuj neeg.
Taum lub qab ntuj neeg hnov Leej tub cov lus qhia ncha tuaj txog. Muaj ib co neeg siab ncaj, txais Yes Xus zaj lus cawm Ntsuj Plig los coj, kom hnov tau Yes Xus cov lus nyob txawm hauv lawv nruab siab.
Kom nyias hloov tau nyias ua neeg ncaj ncees thiab dawb huv ntxim rau tswb Ntuj nyiam thiab hlub. Ces tus dab tsis huv no cob qhia ib lub tswv yim rau cov neeg muaj lub siab ncaj no.
Kom nws yuav tswv Ntuj txoj kev nyiam kev hlub no, ua nws txoj. Kom nws cia li nce tau mus zaum Tswv Ntuj thiab Ntuj Leej Tub lub chaw zaum. Hloov nce ua Tswv Ntuj Leej tub kiag.

A=>Nyob hauv txoj kev ntseeg txog tus Tswv Ntuj tsim ntuj tsim teb. Uas hais Txog, Yes Xus tsa nyob saum lub Pob Zeb uas Dab phem cov rooj loog yuav tsis yeej lub pob Zeb no.
Mas yog pab uas lub qab ntuj neeg hu ua ka Tau Lic no. lus Hmoob yog hais tias; lub Moo Zoo cia rau lub qab ntuj neeg.

B=> Suav txij thaum Yes Xus mus saum ntuj lawv twb mua kev sib ncai ncau mus txog 400 pab lawm. nyias txawj txawj txua thiab tis ib co npe neeg tseem paub tsis tau lawv cov npe sib ncaim mus no!

C=> Ib pab yog Has Npla Has ib tug tub xub ncaim mus thaum tsis tau muaj Haib neeg His Xas Lais. Tom qb Yus Xus mus saum ntuj lawd, nws tau tuaj hnov Yes Zaj lus lus nws kawm tau mus.
Ces nws yog tus hu ua Mas Hos Mes no, Nws hais tias; nws yog tswv Ntuj ib tug yaj Saub lo jib yam li Tswv Ntuj Leej Tub. yog cov kev cai lub ntiaj teb neeg hu ua Mas Hos Mes kev cai no.
Thiab Cov laug hu lawv ua cov As Las no,lawv teev Tus Tswv Ntuj ua nyob saum lub Pob Zeb Has Npla Hais tau mloog Tswv Ntuj lus.
Has Nplas Has muaj nws tus tub tua txi ntuj nyob saum lub pob Zeb ntaw.
Nyiam no mas xyov li, tus dab tsis huav tuaj ntxia neeg ntiaj teb. Kom txhua pab txhua pawg, cov thawj neeg teev Ntuj kom, nyias sawv nyias zom zaws nce mus nyob Vaj Tswv Ntuj. Lub chaw loj ib yam lis Vaj Tswv Ntuj.
Kom tas nrho tej thawj neeg nyob ntiaj teb no, tau ua tub qaug rau Ntuj. Kom Ntuj muab Noob Neej nrau mus nyob ntuj txias teb tsaus ib yam li tsoom dab tsis hun
Nej mus saib lub zos nyoh saum Youtube saib, neeg nyuam qhuav mus txo rau puas thiab txhiab leej xwb.
Lawb twb ua tsis tau phooj ywg li lawm, kwv tij los sis ntxub tau. neej tsa los tsis suav ua neej ua tsav li lawm thiab.
Yog hnub twg cov tub txawj tub ntse, mus txog lub zos Youtube no tas nrho lawm. tej niam txiv los yuav sib tua, kev tij los yuav sib cais dab qhua tas.
Ntshai tus peb Hmoo hua ua Ntuj niam Ntuj txi no, yuav tsis pov hwm lub zos los lub tev chaws youtube no ib qho li. Vim cov xeem lus uas Leej Tib neeg hais, tsis yog xeem lus zoo ntxim rau tswb Ntuj mloog.
Kwv tij zaj lus no kuv sau los kom peb sawv daws ua neeg pom kev txawj xaiv txoj kev nyob ua niam tub txiv tub thiab muaj kev mus tig nrog rau kev neej kev tsav xwb

Sacramento tim 23/10/20.
Yaj Zoov Ntxheb.

Qhov yuav thaiv yus txoj kev vam meej, yog tej yam tawm hauv neeg nruab tswv yim los. Nws tsis txawv li tus duab ntoo ntxoov, los ntawm ib tsob ntoo loj los.
Zoo li ib tsob ntoo loj, nws ntxoov thiab roos tas nrho, co ntoo me uas yog ib hom ntawd kiag. Nws ntxoov thiab roos tas nrho cov ntoo me, ua kom lwm cov loj hlob tsis taus mus.
Nyob hauv peb lub neej, tsis txawv kiag li ntawd. Muaj qee tus thawj neeg thiab qee tus phooj ywg. Lawv cov lus thaiv lwm tus txoj kev vam meej, kom loj hlob mus tsis nto ntsis.
Yog yus raug luag thaiv thiab roos yus kev tom hauv ntej lawm, mas yus yuav xav saib, yus yuav ua li cas. Kom yus tawm mus tau, txbob nyob hauv luag qhov ntxoov thiab thaiv los tsuam yus txoj hauv kev ntawd.
Yus yuav ntsia thiab xav txog cov neeg nyob ze yus tshaj ntawd, muaj ntau hom neeg. Xws li yus tus txij nkawm, los cov hlob ua thawj neeg nyob ntawm yus sab xis los sab laug ntawd.
Lawv coj thiab hais ntau yam lus, los thaiv thiab khi yus tseg; kom txhob hloov ub hloov no. Tsam yuam kev ces ho muaj kev tub qaug rau neej los rau dab no.
Ces yus cia li ua ib tug neeg tsis muaj tswv yim thiab tsis nrhiav kev tawm tau mus.
Kom yus tau mus txog yus lub hom phiaj, thaum yus pom meej tias, muaj kev tsaus ntuj thaiv yus txoj hauv kev lawm. Ces yus tso tseg kiag, nrhiav kev tawm mus kom ncav tau yus kev vam meej.
Peb yuav paub tias, peb tus yeeb ncuab, mas tsis txawv li dab phem lub tswv yim. Nws yeej paub thiab xav kom peb ua neej nyob, nraim nkoos rau txoj kev tsaus ntuj.
Kom yus tsis pom kev deb thiab mus tsis txog, qhov chaw pom kev nyob kaj siab lug. Kom nws tau roos peb lub tswv yim lub siab nyob tsaus ntuj nti xwb. Kom yus ua neeg ruamnyob hauv kev yuam kev mus li.
Hais txog kev yuam kev, yog peb tsis paub, mas peb tseem ntseeg thiab lees tias: yog lawm ntshai, txhob hloov, tsam yus tau raug txoj hmoov phem. Ces ho muaj kev txhaum ces yus yuav raug kev khaum mus.
Ces yus cia li tsis nco qab txog yus tsev neeg, xws li cov tub ki. Lawv lub neej yav tom ntej, yus tsis tau muab txoj kev pom kev pub rau lawv. Muaj ib hnub yus xav txog, ces yuav ua rau yus muaj kev tu siab los muaj mob.
Yuav nco tias, peb txoj kev ua neej nyob rau ntiaj teb no, yuav ua lub neej nyob khov kho. Li tus neeg sawv tus yees txhob qaug zog, ces yus thov Ntuj pab yus, tshais ib ruam mus rau tom ntej.
Yog txoj kev zoo, yuav ua tau lub neej nyob kaj siab lug. Txhob ua li cov neeg, uas yus yuav tau tus txij nkawm, tsis txaus siab. Yus ua lub neej tsis tsheej kiab, nyias xia nyias kev sib nrauj sib tso mus.
Npaj yuav dua tus tshiab, yus txoj kev ruam khi rawv thiab thaiv yus txoj kev vam meej, ces ua li cas los yus yeej mus tsis txog yus lub hom phiaj li.
Yus tseem coj tej tub ki thiab tej xeeb ntxwv ua lub neej thaub qab mus. Tsis paub tshais ib ruam mus tom ntej, kom raws tau yus tus npau suav.
Nyob hauv Tswv Ntuj sab, mas Tswv Ntuj tsis muaj txoj kev cob qhia mus thaub qab. Ntuj tsuas muaj ua kom, muaj lub teeb cig pom kev lam lug mus thoob plaws rau txhua fab kev tseem ceeb xwb.
Yog neeg cov yeeb ncuab, mas lawv thiaj muab, cov lus cuav los khi kom yus nyob twj ywm, txhob hla mus, tsam muaj kev ua txhaum rau neej los txhaum dab.
Ces yog kiag li tus duab ntoo loj roos thiab thaiv tas nrho cov ntoo qis mus hlob tsis tau li. Peb txhob muab luag cov lus hais no, los thaiv peb txoj kev yuav taug mus rov tom ntej. Yus thiaj mus txog lub hom phiaj.
Kev yuav muaj txiaj ntsim loj, yog kev xyaum thiab kawm nrog cov neeg nyiam kev txhawb nqa luag. Kom ua lub neej zoo thiab tsis ntshai luag yuav txeeb los ua tus thawj.
Cov nyiam txeeb ua luag tug thawj neeg ntawd, nws xov vaj thaiv nws kev. Kom nws rov ua neeg taug txoj kev thaub qab li qub mus xwb, nws yuav mus tsis tshwm rau qho li.
Yus yuav xaiv txhob nyob nrog cov neeg nyiam hais lus thaub qab ntawd. Nrhiav dua phooj ywg tshaib, yog yus nrog cov neeg thuam neeg nyob ua ke. Tus ntsuj plig thuam neeg ntawd, yuav txeem los nyob hauv yus nruab siab.
Ces yus yuav hloov los plhis tau mus ua ib tug neeg txawj thuam luag tej thiab. Xav saib yus yuav ua tsob ntoo loj kom raug tshav rau nag, kom yus loj hlob nyob hauv txoj kev nplua nuj nyob nrog tshav nrog nag mus.
Los yus tuaj yeem ua cov ntoo me cia luag ntxoov roos yus mus li, tsuav yus tsis tuag xwb. Neeg thiab tsiaj yuav tsuj thiab hla li cas los xij.
Hais ib yam tseeb thiab yog:
Yus yuav xyaum nyiam thiab mus raws cov neeg muaj txuj siab. Uas lawv yog cov hom neeg nyiam txhawb cov neeg me lub siab thiab lub tswv yim, mus rau rau sab kev vam meej.
Txhob nyiam mus ua neeg quav yeeb quav tshuaj thiab vwm cawv, nyiam mus twv txiaj yuam pov. Xav tias; yog kev tsim txiaj thiab vam meej mus rau yav tom ntej no!
Muaj txhiab txhiab vam vam leej, nyuam qhuav muaj ib tug txiaj ntsim xwb. Los tsis txawj ua neej, twb tsis kav laus thiab.
Yog yus paub ib tug neeg, coj tus yam ntxwv tsis zoo, txhob nyob ze nws. Ntuj yuav coj tej tus phooj ywg zoo dua tuaj ntsib yus.
Yus txhob ua tus neeg ntshai thiab tais caus, nkaum twj ywm nyob hauv qhov ntxoov thiab qhov tsaus. Kom luag tsis pom yus tawm li.
Yus yuav coj li yus yog ib tug neeg tshaj lij{ phab ej} tawm plaws los rau luag pom tias, yus muaj peev xwm.
Yus txhob ntshai, vim yus muaj Ntuj lub zog nyob hauv yus. Thiab yus lub peev xwm tawm ntawm ib tsev neeg txom nyem los. Yus tau khiav dim ntawm, kev tsaus ntuj thiab kev tais caus tawm los.
Yus lub peev xwm, yuav coj tau neeg, coob leej los nyiam lub tswv yim, muaj peev xwm li hais no. Vim yog lub tswv yim tawm hauv ib tsev neeg ua lub neej poob qab tawm los.
Peb yuav saib tias,yog Ntuj coj peb, mas peb yuav muaj peev xwm, yog yus raug Ntuj hu yus lawm, mas yus sawv tsees mus tam sim ntawd.
Tsis muaj neeg paub thiab nco txog li tias; yuav muaj tej yam zoo, tawm ntawm tej tus neeg ua lub neej poob qab qis qis tawm los zoo npaum no li.
Peb mus saib ib tug neeg hu ua Nkis Dim no, nws tau tawm hauv kev tsaus thiab qhov ntxoov tawm los. Ua ntej nws yog ib tug neeg tais caus, Ntuj tau muab ib lub tswv yim zoo rau nws.
Ces nws tawm los, muaj coob leej tau cav thiab qhuas txog nws lub npe loj tas nrho tias:
Nkis Dim, Ntuj tau muab lub hwj chim hwj thiab huam loj rau koj, nyiam no, yog koj zeeg lawm. thiab yog koj ncua kev taug mus lawm. Nkis Dim. Ntuj ntxiv zog rau koj, ces koj yuav muaj peev xwm tawm plaws los ua koj txoj hauj lawm mus.
Ces nws muaj 300 leej xwb, nws mus txog twg los cov yeeb ncuab muaj txog ntau txhiab ntau vam leej, los lawv ntshai nws mus tas tib si lawm.
Peb yuav tso siab thiab coj li N kis Dim tus yam ntxwv ntawd, yoog raws li Nws tus piv txwv. Ua siab loj, sawv tsees, hauv kev tais caus tawm plaws los.
Ntuj yuav pov hwm thiab pub lub tswv yim thoob tsib rau yus, ces yus ua yam twg los tau raws li Tswv Ntuj lub siab nyiam. Thiab mus raws cuag yus lub hom phiaj hauv yus kev vam meej.
Ces yus yuav khiav mus caum tau kev vam meej thiab mus ncaj ncees dawb huv. Nyob hauv txoj kev tshav ntuj nrig. Tsis muaj leej twg yuav tav thiab thaiv tau txoj kev yus taug mus rau sab kev vam meej.
Yog peb ua neeg tais caus, peb yuav thov Ntuj pab kom sawv tsees tau. Peb thiaj ua tau peb txoj hauj lwm mus nto ntsis raws tau peb lub hom phiaj.
Peb txoj kev muaj peev xwm yuav rub tau coob leej los kawm, kom tau paub txog. Peb txhob ua neeg nyob twj ywm hauv kev tais caus tu siab mus li tawm tsis tau.
Ntuj yuav qiv cov neeg txom nyem li no, los ua ib tug piv txwv zoo qhuab qhia rau neeg ntiaj teb tias:
Ntuj siv cov neeg txom nyem, tawm hauv kev tsaus ntuj thiab ua lub neej poob qis qis, los ua ib tug qauv zoo rau cov neeg tsis muaj peev xwm paub. Kom coj tau ntau tus neeg mus txog lawv lub hom phiaj uas lawv ntshaw txog ntawd.

Sacramento
Tim 11/8/2021.
Yaj Zoov Ntxheb X.H.

Zaj LUS no kuv xav qhia, kom peb ua neej nyob rau lub ntiaj te`b no. tsis hais leej twg li, txiv neej los poj niam. Yus txhob tos thiab dai rau lwm tus neeg mus li xwb. Lo lus no, lub ntsiab yog xav hais tias:
Yus txhob tos thiab nyiam kom luag qhuas qhuas txog yus, tus neeg tos thiab dai rau luag kev qhuas tias; yus yog neeg paub tab thiab neeg ntse paub ua yam ub nam no zoo kawg.
Mas nws tau txais qhov zoo, los ntawm luag tej los xwb. Nws lub luag hauj lwm thiab nws kev ua hauj lwm, yog ua kom neeg qhua nws xwb. Ces nws tsuas muaj tib qhov zoo, rau neeg qhuas nws mus xwb.
Nws lub siab thiab lub tswv yim, nyob deb ntawm tswv Ntuj kawg. Vim peb neeg ntiaj teb, peb tsis paub tias; qhov zoo peb tau txais yog nqes saum ntuj los.
Peb ua mus rau sab neeg qhuas peb nkaus xwb, thaum tsis muaj neeg qhuas yus lawd, ces yus tswv yim tas. Vim yus tsuas ua kom neeg qhuas yus xwb, hnub twg neeg tsis qhuas koj lawm, ces koj muaj kev tu siab, koj rov ua neeg ruam tuaj. Vim koj tsis vam thiab cia siab rau Ntuj tus muaj txiaj ntsim loj tau pab koj.
Nco ntsoov tias:
Yam zoo yuav nyob mus li thiab ruaj kho, mas yog tej yam nqes saum ntuj los. Yog Tswv Ntuj pub rau yus, mas yog yam muaj nqi thiab tseem ceeb uas luag nyiag tsis tau mus ua lug tug.
Hais li no, mas peb rov nco txog Leej Ntshiab Pob Zeb. Pob Zeb yog Yes Yes tus phooj ywg thiab tus Thwj Tim zoo tshaj, thaum lawv yuav muab Yus Yes tua nyob saum ntaoo cuam.
Pob Zeb tseem tsis kam lees, paub Yes Xus txog peb zaug diam. Yus txoj kev cia siab thiab dai rau luag, mas tsis paub qhov luag yuav nyiam thiab hlub yus mus li.
Tswv Ntuj yog tus tsim yus los, nws pub txhua yam zoo rau yus, mas yus thiaj tso siab tau tias: Txhob tos kom luag pom zoo rau yus tso, yus mam ntseeg thiab txhawb kom yus mus deb.
Txawm tsis muaj neeg paub thiab pom los yus nco ntsoov tias; tsam luag tsis qhuas, los luag tsis pom zoo. Ces koj yog tus swb mus lawm, vim koj ua rau neeg, kom luag qhuas txog koj thiab luag zoo siab xwb. Koj tsis tau ua kom koj zoo tuaj rau N tuj pom.
Yus yuav tsum paub tias; yus tsev neeg thiab yus cov txheeb ze. Luag yeej muaj kev ntxhov siab, luag tsis khoom los hais lus thiab txawb yus. Luag tsis yog tus niaj hnub yuav los tuav thiab saib txog koj kev ntxhov siab los kev tu siab.
Yus yuav xyaum saib yus tus kheej muaj nuj nqis, kev meej thiab tseeb, yog nqes saum ntuj los. Tab txawm tsis muaj neeg paub thiab pom los qhuas yus, Ntuj yog tus pom thiab paub txhua yam, Ntuj yuav pab kom tau li txhua yam uas yus ntshaw.
Yog muaj neeg thuam tias; yus tsis zoo, yus txhob ntseeg cov lus luag hais ntawd tas tas. Yus yeej muaj yus kev zoo, Yus yeej pub yus lub zog thiab qhov zoo rau luag tau.
Yog yus tos neeg cov kev qhuas zoo tuaj nyob hauv yus lub zog ua pub rau luag tas, ces yus tsis muaj qhov zoo lawm. Vim tsis yog cov kev zoo nqes saum ntuj los.
Yam uas yog neeg muab rau yus, hnub neeg rho rov qab lawd, ces yus rov pluag mus li. Vim neeg muab tsis tau rau yus ua yus tug mus li.
Peb yuav mloog thiab coj raws li Leej Ntshiab paj Lug hias; yus yeej muaj yam zoo txaus txaus lawm. Yog Tswv Ntuj muab rau yus, txawm tsis muaj neeg qhuas, los yus ua yus mus txhob tos leej twg tuaj qhuas txog yus li.
Yus pom zoo, yam twg yuav ua rau Ntuj, tsis muaj neeg qhuas los yus cia li ua mus. Koj txhob tos neeg hais thiab cia koj lub siab dai rau luag.
Yam uas koj tos kom luag qhuas koj tso, koj mam ua. Ces zoo li koj tsis pom zoo rau koj tus kheej ua. Yus yuav pom tias yus muaj txhij txhua lawm, Ntuj twb muab txhua yam zoo rau yus.
Yus xav tias, yus pom zoo ua rau Ntuj ces yus ua kiag. Txhob tos kom neeg qhuas thiab npuaj teg rau teg tso mam ua rau.
Thaum koj yuav nce mus rau qib siab, tsis yog neeg ua kom koj nce tau mus rau qib siab saud. Yog Ntuj ua mas koj thiaj yuav nce mus rau qib siab tau.
Ib yam li luag tsis xav ua phooj ywg rau koj, koj txhob ntshai tshais ib ruam mus rau tom ntej. Luag tsis muaj ib yam pub rau yus, los yus txhob tu siab, vim luag yeej tsis muaj ib yam zoo uas luag yuav muab los pub rau koj li.
Nws sim neej yeej tsis tau muaj neeg muab los pub rau nws dua thiab. Cov neeg zoo li hais no, koj txhob muab koj lub siab los dai khuam rau nws.
Yus yuav tos txog Ntuj xwb, Ntuj thiaj yuav hlub thiab pub tau rau yus. Luag tsis pom koj zoo, los txhob xav ntau yam. Ua li me nyuam yaus hais: Sawv tsees koj mus saib tsom iav, koj yeej zoo txaus txaus lawm, tsis txawv li tus qub neeg. Ntuj yeej pub txhij txhua rau koj.
Koj txhob dai rau cov neeg txheeb ze rau koj, zoo li niam thiab txiv, los tej thawj neeg txheeb ze koj ntawd.
Uas koj yuav tus siab rau lawv, yog koj dai rau lawv, ces koj yuav muaj kev tu siab tias; luag tsis nyiam los tsis qhuas koj lawm. Koj yim muaj kev tus siab ces koj yim tsis paub xav dab tsi ntxiv mus lawm.
Yuav xav li no. Lawv tsis tshuav yus nqi, nyias paub yias yus yuav mus cuag leej twg lawm. Tej zaum Tswv Ntuj yuav xa ib tug neeg tuaj qhia ib lo lus, los ib zaj lus rau yus…
Koj tso siab rau NTuj, ces Ntuj pub kev pom kev rau koj, Ntuj yuav txhawb koj mus ntxiv, txhob tso siab rau neeg kev txhawb koj, ces koj mam mus ib ruam ntxiv kom siab.
Yus txhob xav txog niam thiab txiv txoj kev txom nyem yav thaud tias; Niam thiab txiv yuav ua neeg ruam ua luaj no, tsis xav txog kev kawm txuj ci. Yus tseem tu siab qees tias ; yus ruam vim yog niam txiv lawv kev ruam, tsis xa yus mus kawm ntawv no.
Koj sim xav saib yog koj nyob koj niam thiab koj txiv qhov chaw thiab koj rau lawv txhais khau ned, koj yuav ua zoo li cas! Koj uav txiav tau yus niam yus txiv txoj kev tu siab mus li cas, kom lawv tau noj qab hnav zoo li yus tiam no!
Yus txoj kev tus siab no, yog yus mus nug Tswv Ntuj, Tswv Ntuj yuav teb li cas rau yus. Ntuj yuav teb tias; koj niam thiab koj txiv nkawd ua txhaum li cas rau koj lawm lod!
Koj yuav teb tis; vim nkawd tsis hlub kuv nkawd thiaj tsis xa kuv mus kawm txij ci, los koj yuav hais tias; nkawd cia kuv txom txom nyem thiab ua neeg ruam luag thiaj tsis qhuas kuv no lod!
Thaum koj xav li no lawd, mas koj muab niam txiv txoj kev txom nyem dai rau saum nqe lauj. koj tsis tau ua yam zoo rau nkawd thiab zoo rau koj mus rau yav tom ntej.
Yog luag tsis paub txog yus, luag tsis qhuas thiab npauj teg rau yus, mas yus txhob tu siab. Luag tsis tau tshuav yus nqi uas luag tsis xav them rau yus mog!
Txhua yam lus zoo los lus phem, Ntuj hnov thiab Ntuj khaws tseg tas tib si lawm. Nco ntsoo tsam lwm hnub Ntuj hais qhia rau yus paub tias:
Ua cas koj tu siab rau koj niam thiab koj txiv, thiab koj cov thawj neeg tias ; lawv niam nrog Ntuj ua ib nqag tuaj ib tog tsis pab koj thiab tsis qhua txog koj. Koj thiaj ua neej poob tuaj rau lub qab tsag lawm.
Tas txhua yam zoo thiab phem, mas Ntuj tau khaws tseg tas tib si lawm. Ntuj paub zoo, Ntuj tsis yuam kev ib zaug li.
Tus neeg nyiam ua qhov zoo, mas ntuj yuav hloov thiab pub yam zoo rau nws. Tus neeg zoo, mas Ntuj yuav them tej yam ua neeg tsis nco qab them, Ntuj yuav them tib si rau yus.
Txawm yog neeg muab tsis tau, los Ntuj yuav them pauj tib si rau nws. Txhob tu siab, yog Ntuj foom los mas yuav tau ntau tshaj li ib npaug ntxiv.
Tog neeg ua tsis zoo rau yus los txhob tu siab, yus yuav daws yam tsis zoo uas tau muab khuam saum nqe lauj mus. Kom txhob tshuav dab tsi khuam rau ntawm tus nqe lauj ntawd uas yog yam tsis sib haum ntawd mus.
Yus thiaj ua tau phooj ywg zoo, yog ib yam ua zoo rau tej txij nkawm tas nrho, kom lawv khaws tau ua puav pheej zoo rau lawv, kom nyob sib haum xeeb mus ua lub neej nyob kaj siab lug.
Peb txhob tig mus rau neej sab, peb yuav xyaum tig mus rau Ntuj sab. Ntuj yuav pab kom peb ua tau mus zoo dua.
Hais txog cov txij nkawm, tus leej niam nws muaj 80% qhov zoo, tshuav li 20% nws tsis paub thiab tsis txawj ua xwb. Tus Leej txiv los nws zoo tib yam, qhov zoo nws tsuas muaj li 80% thiab xwb. Tshuav 20% nws tsis paub thiab tsis txawj ua.
Yuav saib tias; nws yeej zoo txaus lawm, yam nws tsis txawj los tsis paub txhob cem los txhob thuam thiab txhob ntxub, los yus nws tias; nws yog neeg siab phem. Nws twb muaj 80% qhov zoo lawm. tshuav 20% qhov nws tsis paub los tsis txawj xwb.
Yus los ib yam nkaus thiab, yus tsuas txawj thiab paub 80% xwb, Yog luag paub txog 100% tshaj yus lawm. Mas luag yuav tsis kam yuav yus thiab, vim yus nyuam qhuab paub txog 80 % xwb.
Qhov tseeb, mas ob leeg yuav sib zam mus. Qhov tshuav 20% no, Ntuj tseg rau sawv daws kom nyias txawj sib zam ib leeg rau ib leeg. Yus yuav tsum paub thiab to taub txog qhov luag thiab yus muaj txog 80% no, yog qhov zoo lawm.
Yus thiab luag, muaj sib npaug zoo tib yam sib xws. Nws tsis txawj hais lus,los yuav zam rau nws, yus ho tsis paub txog los nws kuj yuav zam rau tib yam.
Yam nyob hauv 20% no, nws los tsis paub, yus kuj tsis txawj. Ob leeg yuav sib zam kom nws los tig tau cev mus, yus los ib yam thiab. Ces nyias tsis txawj kho nyias tus kheej. Yog koj tsis zam rau nws, ces cuag li koj muab nws yuam ntsaws rau hauv ib lub hub ua kom nws tawm tsis tau los tig cev kho nws tus kheej.
Nws yuav raug txom nyem thiab tu siab rau qhov tshuav 20%, uas nws tsis txawj ua ntawd. Vim nws raug koj kev quab yuam. Nyias yuav daws qhov ua nyias pheej muab dai tseg rau saum niag nqe lauj , uas yus tau muab khuam tseg ntawd.
Yog yus ua tsis tau hauj lwm zoo, yus txhob mus nug luag tias; ua li kuv ua no, nej puas qhuas kuv! Tus hais tej lus no, mas nws lub tswv yim mus tsis deb.
Koj yuav ntseeg thiab tso siab rau Ntuj, mas koj thiaj yuav nyob kaj siab lug dua. Yam uas yus tau ua zoo tawm hauv yus lub siab los mas yus kaj siab dua, yam yus luag kom yus ua ces luag mam qhuas txog yus.
Yog tus neeg uas nws tso siab rau leej tib neeg qhuas nws, mas nws yog tus neeg mus siab saud, tsis tau. Hnub twg tsis muaj neeg qhuas txog nws, ces yus rov ua neeg ruam rau luag thuam nwss mus dua. Nws haj yam yuav tsis muaj peev xwm thiab tawm tsis tau qhov twg li.
Yog thaum Ntuj coj yus txoj hauv kev lawm, mas cov yeeb ncuav yuav ntxub yus heev. Lawv yuav tsis txaus siab, rau yus lub tswv yim thiab yus tes hauj lwm.
Yog yus pom zoo rau Ntuj lawm, mas yus ua kiag mus rau Ntuj saib. Yam twg yog yuam kev, mas Ntuj tsis muab txim rau yus li leej tib neeg nrhia kev liam txim rau yus.
Yus txhob tos kom neeg pom pom zoo rau yus, ces yus mam ua thiab mam hais kom meej. Yus txhob nrhiav kev ntxias, kom neeg zoo siab li, Ntuj tsis tos qhov, uas koj yuav tsum mloog luag lus ntawd tso.
Ntuj yuav tsis nug ib zaug tias; ua cas koj tsis mloog cov neeg hais rau koj ua ntej tso! Ntuj pub rau yus muaj puv npo, ces yus tso siab rau Ntuj yus hais kiag mus kom meej thiab tseeb.
Yus tau Ntuj lub tswv yim pab yus ua, yus tej hauj lwm lawm. Yus txhob tos kom neeg txib yus ua ntej mam ua mus. Txhob tsos leej ywg li yog Ntuj muab rau yus los hais qhov zoo xwb.
Ntuj tsis cob ib tug neeg kom nws hais lus phem thiab thuam luag, uas yog Ntuj me nyuam. Mas koj yim hais yim tawg tau lub paj tshiab thiab txi tau lub txiv qoos zoo xwb.
Leej Tib Neeg yuav tuaj khaws mus kawm tseg ua noob kom tau coj mus cog tawg paj txi txiv ncw thoob plaws ntiaj teb, mas yog yam zoo xwb.

Sau nyob Sacramento
Tim 29/6.2021.
Yaj Zoo Ntxheb Xib Hwb.

Peb yog ib tug neeg muaj kev ntseeg, mas peb yuav coj li yus yog ib tug neeg xyuam xim. Kev ua neeg xyuam xim, mas muaj Leej Tswv Yim Ntshiab nyob hauv. Yus yuav saib txhua tus neeg nyob ze yus sib luag thiab muaj nqissib xws.
Yus yuav hwm sawv daws thiab xaiv cov lus zoo los hais, vim tias; leej tib neeg txhua tus tsis paub sib luag. Cov txawj mloog thiab lawv yog neeg thoob tsib, mas tsis muaj dab tsi li cas.
Muaj qee leej lawv paub tab tsis txaus, tab twb yog lus zoo, los lawv hnov. Mas zoo li rooj tog los txawj hais lus tib si, tseem tau ib cov lus txawv txawv tawm los thiab.
Ces ua rau lwm tus, tsis to taub mus rau sab zoo, luag muaj kev tu siab tuaj. Luag ntaus nqi mus rau sab mloog tau cov lus tsis zoo lawm. Ces ua teeb meem tuaj txog sawv daws, ces txhua tus cia li lam muab ua kev tu siab rau cov lus nws tau hais tawm los ntawd.
Cov teeb meem hais no, tsis yog cov neeg nyob deb hais thiab ua tawm los. Vim lawv yog cov neeg nyob deb, cov tau qhia kom tej rooj tog txawj nrog neeg hais lus thiab paub tias:
Yus yog tus tsim teeb meem rau luag, mas yog cov uas lawv nrog yus nyob ua ke. Hmoob hais tias; peb yog cov sib hlub thiab noj siav noj nyoos ua ke no ntag.
Yus txhob xav tias; yus yog tus ntse thiab paub, los txawj hais zoo tshaj luag, uas luag nyiam thiab xav mloog yus tej lus kawg.
Kev xav thiab kev hais lus, zoo nkaws li Hmoob tej lus. Uas Hmoob hais rau cov tub txawj thiab ntxhais ntse ntawd tias:
Tub txawg los tshuav ib qib, ntxhais txawj los tshuav ib rau. Yuav tau mus thawj kws { Hmoob hais tias; yuav mus thawj xub tsag no!}
Nco ntsoov cov neeg nyob ua ke, yog peb cov txij nkawm, los cov yog niam yog txiv. Thiab yus cov tub ki thiab tsoom txheeb ze sawv daws.
Tus hais tau cov lus tsis muaj ko, los ua siab ntev zam rau nws. Nws txuj tsuas luaj li ntawd xwb, ua li Hmoob hais dab neeg, qav kaws khav kawg, thaum qav kaws nrog tsov sib tw tuaj.
Nws xob vog tsuas loj luaj li vuab kib lub khauj khaum xwb, nws loj tsis tau ntxiv lawm. Qav kaws thiaj nce mus zaum saum lub pov toj, tsov hu ces qav kaws teb saum lub pov toj tuaj.
Kom tsov zeem tias, qav kaws mas txawj ua kom nws loj tuaj luaj li lub pov toj no. Peb sawv daws, ib tug tsis loj los paub tshaj lwm tus mus siab npaum li cas.
Sawv daws yuav sib zam thiab saib tias; ntshai yog rooj tog txawj hais lus xwb, txhob muab ntaus nqi ua qhov tseeb mus, siv tsis tau mog!
=>.Yam no yog yam tseem ceeb, khaws tseg ua pov haum thiab ceev ua nyiaj xwv pov tseg cia rau hauv qab nas mog!
A. Tus neeg hlub hlub koj thiab hwm koj zoo kawg, nws yog koj tus Xib Hwb qhia txuj rau koj. Kom koj kawm mus nto qib, koj koj paub ua qhov zoo tuav pov hwm koj lub neej kom muaj koob meej nto moo lug zoo, mus rau yav tom ntej.
B. Tus nws ho ntxub koj heev, hais koj dab plig pheem tas nrho qhia rau luag tej paub tas tib si mus lawm.
Tus no kuj yog koj ib tug Xib Hwv qhia txuj rau sab ua neeg phem rau koj paub. Koj cia nws yeej koj lub caij no mus mog, txhob tu siab rau nws.
Koj tau kawm nws cov txuj tas nrho mus tib si lawm thiab, koj tau paub sab zoo los ntawm tus Xib Hwb siab zoo los. Thiab kawm tiav sab phem los ntawm tsis Xib Hwb siab phem los tib si lawm.
Koj mas cuag li koj kawm tiav Npav sas lauj qaws nqis tiav log los lawm. Koj nco ntsoov ua nws tsaug rau qhov nws tuaj yeem qhia koj paub thoob plaws los.
Thaum koj kawm tiav ob sab tib si los lawd, yog koj tau zam rau tus xav ua phem rau koj. mas 10 xyoo tom qab ces koj mam yeej nws, ces koj yeej mus ib sim neej.
Nws cov plooj ywg, mloog nws cov lus thiab saib nws tes hauj lwm. Tawg paj los tsis tshiab, txi txiv los tsis qoos. Ces lawv khiav los zwm rau koj tas nrho, ces koj mam yeej, ces yeej mus li lawm.
Kev yeej thiab kev tau nyob kaj siab lug, yog tawg paj txi txiv hauv koj txoj kev zam tawm los. Nws ua koj txoj kev yeej mus ib sim neej.

Sacramento tim 12/8/2021.
Yaj Zoov Ntxheb X.H.

Peb leej tib neeg tsis hais leej twg li, peb muaj ib txoj saw khi rawv peb tseg. Nyob txhua yam teeb meem uas yuav tuaj raug rau peb xws li, kev tu siab los kev muaj txiav xeeb.
Los kev txom nyem, kev ua neeg tsis muaj peev xwm. Thiab kev ntshai tsam yus ua tub qaug rau Ntuj los tub qaug rau neej thiab tub qaug rau dab qhuas.
Raws li Hmoob lo lus hais tias; yog poj ua tseg, yawm ua cia los ntawd. Hloov tsis tau, tsam ho muaj kev khaum, los ua teeb meem rau yus, ces yus yuav raug kev txom nyem loj!
Ces yus raug luag sab nraud thuam thiab saib tsis taus tias; yus yog caj ces noob tsis huv, ces yus thiaj ua neej nyob nrog kev tsis muaj peev xwm.
Peb yuav nco ntsoov tias; Tswv Ntuj yog tus muaj peev xwm. Ntuj yuav txiav peb txoj saw hlau khi peb kev ua neeg ruam, tsis thoob tsib no mus kom tu nrho tau!
Cov xwm hais no, yog yus xav tau ua yaum kev mus lawm xwb, los yus tau ua neeg ncauj ncab dhau mus lawm, thiaj hais tau tej lus tsis muaj ko, tshaj dhau lawm. Thiaj raug luag thuam los luag cem, vim yus ntseeg tias; yus hloov tsis tau yus tus kheej.
Peb yuav thov kom Ntuj txiav txoj saw no, kom tu nrho mus, yus thiaj mus tshab rau lwm lwm sab kev xav thiab paub zoo dua. Tswv Ntuj yog tus txiav tau, ces Ntuj yuav txiav yam tsis tseeb ntawd tawm mus.
Ntuj yuav tso koob hmoov los pub rau yus, ces yus tseem yuav tau txais yam zoo tshaj no mus li los ob npaug rov saud.
Yog peb tso siab rau Ntuj, ces Ntuj yeej txiav tau xwb. Kev txawj ntse thiab koob hmoov yuav khiav los raws yus. Vim tias, yus yog tus, yuav khaws tau tej txiaj ntsim koob hmoov no, tseg cia rau tej xeeb ntxwv yav tom ntej txuas ntxiv mus.
Nyob hauv Lus Kas ntawv Moo Zoo 13: 16 hais tias:
Muaj ib tug poj niam, nws muaj mob tau ntev ntev los lawm. Nws niaj hnub yuav tsum ua hauj lwm pub rau nws tus tswv.
Muaj ib hnub Yes Xus tuaj txog ntawd, Yes Xus hais ib lo lus xwb, ces nws tus mob cia li zoo hlo. Yes Xus pom nws, ces Yes Xus hais rau nws tias; koj sawv los mog, koj yog Has Nplas ib tug ntxhais xeeb ntxwv, ces nws sawv tsees, nws tus mob cia li zoo hlo lawm.
Yog yus ntseeg tias; yus yog Ntuj me nyuam, ces muaj teeb meem nyob hauv mob nkeeg. Yus thov ces yus yuav zoo hlo, vim yus txoj kev ntseeg Ntuj muaj zog. Ces yus yuav sawv tsees rov muaj zog tuaj.
Yus yuav muaj txoj kev ntseeg cog lus nrog Tswv Ntuj, yus txhob muab txoj kev phem los cog tseg nyob rau yus nruab siab. Ces Nyuj thiaj yuav txiav tau txoj saw khi yus ntawd mus kom tu nrho!
Tsuav yog yus ntseeg thiab tso siab rau Ntuj, ces Ntuj yuav pab txiav kom yus dim plaws mus.
Peb mus saib zoo li thaud, Tswv Ntuj cawm cov His Xas Lais, nyob Hais Nkws Tos teb. Tswv Ntuj hais rau lawv tias:
Cov yeeb ncuab ua phem, uas tau yuam nej ua lawv qhev, nyob Hais Nkws Tos teb ntawd. Mas txij no mus nej yuav tsis pom, muaj muaj li ntawd ib zaug ntxiv li lawm.
Yog peb nco txog zaj lus uas Tswv Ntuj hais no, mas peb tej kev txom nyem, los ntawd qhov peb muaj ntshav qab zib, los ntshav siab no. Nws ua kom peb tau mob srauj los kuj yuav txiav tau kom tu nrho mus thiab.
Yog peb ntseeg thiab tso siab tiag rau Ntuj, mas Ntuj yuav pab peb txiav thiab tshem kom tau txoj saw khi peb nyob hauv txhua yam mob nkeeg, nrog kev tu siab, kev quav yeeb quav tshuaj los quav cawv mus, kev ua neeg poob tsim tej no. Los yuav txiav tau kom peb dim plaws mus.
Zoo li tus poj niam uas nws tau ntsib Yes Xus ntawd, Nws hnov Yes Xus hais ib lo lus xwb, ces nws tus mob cia li zoo hlo dim plaws ntawm nws mus lawm.
Yog vim lo lus uas Yes Xus hais tias; koj yog Has Nplas ib tug ntxhais xeeb ntxwv no. Yog peb ntseeg ruaj tias, peb yog Tswv Ntuj me nyuam, ces Tswv Ntuj yog peb Leej Txiv.
Ntuj yuav pab peb txiav cov saw khi peb nyob hauv peb kev nyiam mus zwm rau kev ua txhaum thiab zwm rau kev muaj mob nkeeg.
Nrog lub tswv yim qub qub, uas tshai tsam ua kev txhaum tub qaug rau kev dab qhuas. los tub qaug rau neeg ntawd, pov tseg mus tib si.
Peb yuav ntseeg thiab tso siab rau Ntuj, raws li txhua zaus, uas Yes Xus kho cov neeg muaj mob nkeeg. Yes Xus xub hais lo lus tias; koj cov txhaum daws tas lawm. peb yuav ntseeg thiab tso siab tias; daws tas lawm tiag.
Peb txhob coj li thaum peb muaj ib tug mob, Dr twb kho peb zoo lawm. Peb tseem tu siab tias; vim peb muaj mob ib zaug lawm, peb thiaj tsis xws luag.
Yog yus tseem muaj tej kev tu siab ntawd, nrog yus nyob, mas kev tu siab tseem yuav coj yus pw nrog tej mob nkeeg qub dhau los ntawd, ua kom yus tawm tsis tau mus rau kev kaj siab.
Peb mus saib Leej Ntshiab Pob Zeb, thaum nws nyob hauv tsev loj faj. Pob Zeb tseem khi rawv nyob ntawm txoj saw hlau, Pob Zeb tsim los cov saw hlau twb qhib tas lawm.
Pob Zeb cia li tawm los, cov qhov rooj kuj qhib tas tib si lawm. Cov ntseeg pom Pob Zeb tawm los li ntawd. Lawv nug tias, leej twg tso koj, koj thiaj dim tau los.
Pob Zeb hais rau lawv tias; Pob Zeb tseem tsaug zog. Nws tsim los ces cov saw ntawd cia li qhib tas lawm. Lub qhov rooj los kuj qhib lawm, ces Pob Zeb cia li tawm los xwb.
Kuj muaj ib zaj hais txog ib tug neeg yuav tsev. Kev cai mas nws yuav them mus txog li 30 xyoo, thiaj tas nws lub nqi tsev.
Nyob nyob ces, tus tswv muag tsev. Hais tuaj rau nws tias, koj tsis muaj nqi tswv yuav them lawm. thov txim kuv tsis tau sau ntawv tuaj qhia rau koj paub! Uas nag hmo koj tuaj tem tas lawm. txij no mus koj tsis tshuav kuv nuj nqi lawm qhia li no rau ko!.
Kuj yog tej yam, uas txawv kawg thiab, yog Ntuj ua los Ntuj daws thiaj ua tau zoo li ntawd musk om tas nuj nqi.
Peb yuav xav tias, Tswv Ntuj txawj ua tej yam uas yus tsis paub txog li, tab yog Ntuj tsis tau ua los yuav nco ntsoov ua Tswv Ntuj tsaug. Ntuj tau pab lwm yam, uas yus tsis nco qab li yus tej mob nkeeg cia li zoo hlo mus thaum tawg lawm.
Nyob hauv kev ua txij nkawm, los kev ua phooj ywg, kuj ib yam thiab. Yus tus txij nkawm los yus tej phooj ywg lawv tau ua zoo rau yus.
Tsis yog yus muaj zoo lub peev xwm, los yus muaj kev zoo nkauj los zoo nraug, yus thiaj muaj kev yeej. Yog Ntuj txiav txoj saw kom kev phem txhob los raug rau yus, ces yus tau dim plaws li yam yus tsis paub txog.
Ua li cas los xij, nco ntsoov ua Ntuj tsaug thiab lees paub, ces yus kho yus tus kheej los kom sib haum. Txhob cia txoj saw khi rawv rau yus,yus ntsib kev ua zoo rau yus, vim yus yog Ntuj me nyuam.
Ces yus thiaj yeej tej voj hluas, khi yus ntawd mus. Yus txhob ua kom cov qub voj hluas no, raur rau cov xeeb ntxwv, txheeb ze yus tsam lawv ho tau mag saw khi lawv tseg dua thiab.
Yog Ntuj pab muab txoj hlua ntawd daws lawm, yus muab cuam pov tseg mus deb li deb tau. Zoo li Hmoob lo lus hais tias; kom ntsej tsis hnov muag tsis pom.
Yog koj muaj ib tug me nyuam, nws nyiam nrog cov laib ua phooj ywg. Koj yuav thov Ntuj zam rau nws, vim nws taug tau txoj kev yuam kev lawm. Thov kom Ntuj pab daws txoj saw khi nws nyob hauv txoj kev yuam kev ntawd mus.
Piv li muaj ib tug txiv neej los ib tug poj niam, tau quav yeeb quav tshuaj loj heev lawm. Nws ua lub neej tsis xws luag. Muaj neeg ntxub, neeg cem thiab thuam nws, mus thoob plaws rau qab zej hauv zos txhua nrho. Nws ua tsis tau ib tug neeg zoo li lawm.
Nws thov Ntuj pab nws kom, nws nrhiav tau yeeb tshauj los daws nws kev qhis. Ntuj tau pab nws, kom nws dhuav yeeb dhuav tshuaj mus, ces tsis nqhis yeeb tshuaj ntxiv lawm. Ces nws cia li thum tau yeeb tshuaj mus, vim Ntuj tau pab nws txiav tau lawm.
Peb sawv daws kuj ib yam, peb nco ntsoov tias; peb yog Ntuj me nyuam. Thaum lub sij hawm muaj kev nyuaj siab tuaj. Peb yuav txhos caug thov Ntuj, li tus poj niam quv yeeb quav tshuaj no. Thov kom Ntuj pab peb daws tus teeb meem no mus.
Yus yuav ua yus li hauj lwm, Ces Ntuj kuj yuav ua Ntuj hauj lwm. Yus ua yus tug Ntuj kuj yuav ua Ntuj tug, ses yuav daws tau mus xwb.
Peb zoo li cov tsiaj, tsis mloog lus, ces luag thiaj muab hlua khi rau peb caj dab, los chaws ntswg rau peb kom mloog tus tswv lus thiab txhob mus deb dhau.
Lub tswv yim nyob hauv peb hmoob cov qub kev cai muaj tej qhov zoo xws li kev cob tsiaj kom mloog lus ntag. Txhob hla tsam txhaum dab qhuas, ces yuav muaj kev khaum mus.
Peb yuav saib tias, yog Ntuj tsis khi yus, mas yus txhob rov khi yus tseg. Txoj hlua khi peb no, yogi b yam ua khaum kev, rau yus mus tsis tau deb thiab tsis pom txog yam zoo li.
Peb ntseeg thiab tso siab tias, peb sawv daws yog Ntuj me nyuam. Peb yog ib co noob neej zoo uas Ntuj tsim los kom muaj peev xwm.
Txoj hlua khi peb no, yog kev ua neeg tsis muaj peev xwm, hla mus rau qhov zoo. Txhob ntseeg tias; yog poj rhawv kab yawm rhawv kev los lawm, daws tsis tau li.
Peb yuav cev peb tus kheej rau Tswv Ntuj daws, kom Tswv Ntuj coj peb peb lub neej sab siab ntsws mus rau sab vam meej, nplua nuj nyob rau sab kev txawj hwm ntuj thiab hwm neeg.
Peb nyob hauv txoj kev khwv ua noj ua haus kom tau yus ib tse neeg. Peb yuav tig los yuav qhov tseeb tias; peb yog Ntuj me nyuam.
Kom Ntuj daws peb txoj saw khi peb, ua neeg tsis muaj peev xwm thiab tsis muaj kev hlub. Loj hlob los mus sib cob ciam, zoo li koom niam txiv yug los koom roj koom ntshav ua ke.
Qhov peb yuav daws tau txoj saw khi peb xws li tus tsiaj tsis mloog lus no, yog peb yuav hloov peb txoj kev xav. Ces peb yuav daws tau kom dim plaws li tus noog dim hauv nruab tawm mus.
Peb txoj kev sib hlub sib raug zoo, yuav ua tau ib hauv tshuaj muaj kuab los cawm peb. Kom muaj kev zoo siab zoo plawv, mus mus rau sab yeej kev mob kev nkeeg.
Zoo li peb sib caw mus noj nqaig haus cawv, lom zem zoo siab nyob kaj lug. tuaj rau nruab siab. Peb lub ncauj lo lus nrog lub tswv yim tsis caw cov dab phem los txeem vaj txeem tsev.
Li cov neeg noj nqaij daig dab haus cawv mus daig nru muaj kev xam khib cib yeej npaj ua xaiv ua lus. kom muaj kev chawj chim daws tsis tau.
Yog Ntuj daws txoj saw txoj saw khi peb caj dab tsis yog daws kom peb tau mloog lus tuaj. Ntuj txiav txoj hlua khi peb kom peb muaj txuj los zeem N tuj ua peb niam peb txiv.
Thiab txiav txoj saw khi hmoov hmoov nyiaj hmoov kub kom tsis muaj chaw khuam los daig cia, thiab kom kev ntws sis laub sis lug los rau peb.
Kom peb muaj ntau siv tsis tas txawj sib faib tjiab tseb mus pub rau zej zog, tuam cuab neeg txheeb ze txhua leej txhua tus muaj sib npaug tau sib luag.

Sau nyob Sacramento
Tim 27/7/2021.
Yaj Zoov Ntxheb X.H.

Hais txoj lub neej uas, ib txwm Hmoob coj nyob hauv Qaum Ntuj kev nyiam kev hlub. thiab Hmoob ua cov kev cai daws dab thiab ntiab cov dab tsis huv tawm mus!
1.Txij li thaum dab tuaj ntxias, kom Noob neej ncaim ntawm Tswv Ntuj mus lawd. Twb tau ntau txhiab vam xyoo los lawm, tsis hais Haiv neeg Hmoob los lwm haiv neeg li, nyob hauv lub qab ntuj khwb no.
Txheej thaud, neeg nyob ze Tswv Ntuj dua tiam neeg no. Peb Haiv Hmoob, lawv tseem paub txog kev txhaum kev khaum tias; txhob ua phem rau tej tub ntsoj tub ntsuag, los tej neeg txom nyem, zoo li tej Mab yog Suav, tsam yus ho raug kev khaum mus.
Ces yus yuav raug txom nyem zoo li lawv, los tseem yuav raug kev txom nyem loj tshaj li tej neeg uas yus tau ua saib tsis taus lawv ntawd.
Yog yus lam ua rau tej neeg txom nyem. los neeg pluag thiab neeg tsis muaj zog ntawd, tsam yus ho raug nplua los. Ces yus tseem yuav raug txom nyem mus lawm ib npaug ntxiv thiab.
Vim nws yog kev ua tub qaug rau Qaum Ntuj, vim tias; tus neeg muaj los tus pluag, tus muaj peev xwm los tus tsis muaj peev xwm. Sawv daws yog Ntuj me nyuam tib si. Tsam yus tau raug kev poob tsag mus, ces yus khaws tau lawv txoj kev txom nyem mus. Los yus tseem yuav raug txom nyem tshaj lawv, mus lawm pes tsawg npaug.
Yog yus tau ua tej yam loj dhau lawm, ntshai tam xob tua. Los yus tau txais kev mob nkeeg loj, zoo li lov ceg los lov lov npab mus, khwv tsis tau noj los tau hnav.
2. Yav ntuj thaud, mas neeg tseem saib zoo li Ntuj nyob ze Leej Tib Neeg dua nyem no. Zoo li peb Haiv Hmoob tseem txawj ua cov khawv koob, los kem dab thiab daws dab mus ntawd.
Vim dab tso mob tso nkeeg, los rau neeg kom neeg muaj kev txhov siab thiab kev tu siab, nyob rau sab tau kev ploj kev tuag.
Kom Noob Neej tu siab tias, yog Qaum Ntuj tsis pab thiaj li tau ploj tau tuag mus lawm. Tej laus tseem muab ua kwv txhiaj hais tias; Yog Qaum Ntuj sau se thiaj sau leej niam Leej txi tus Ntsuj Mam Huab xyws mus lawm tej sib lis niab no.
Nyem no, dab kav tas nrho Noob Neej, tej nplooj siab nplooj ntsws mus lawm. Cov khawv koob, ua los kem thiab cais dab tawm mus no. Mas muab los hloov ua ib hom khawv koob tshiab cia tau daws neej mus lawm.
Tus dab tsis huv no, muab kev npau taws, kev cib nyeej, kev sib cav sib ceg. sib ntaus sib tua. Los hloov ua cov Khauv Koob tshiab, kom cais tau neej tawm ntawm neej mus.
Thaum koj nrog koj tus txij nkawm, los koj nrog koj niam koj txiv, los koj tej txheeb tej ze, tej phooj ywg sib cav sib ceg. Ces koj tau ua hom Khauv Koob tshiab daws thiab ntiab neej, tus nyob ze koj tshaj plaws ntawd, kom tau ntiab thiab cais nws tawm ntawm koj mus.
Nyem no, hom Khawv Koob qub ntawd, yog koj ua rau dab, mas dab mloog thiab dab pab koj, dab ua hwj huam rau koj cov lus kom zoo mus ib vuag. Nws tsuas kav txog lub caij nws teem tseg xwb, ces rov mob dua tsis muaj caij xaus li.
Koj yuav tau poob nyiaj, rau hom neeg ua khawv koov qub no. Kom nws tau nyiaj, los tau nyiaj coj mus yuav qaib noog xyab ntawv los fij rau dab.
3. Cov dab tsis huv no, mas lawv ua tsis tau dab tsi rau Tswv Ntuj. Dab yuav ua rau Ntuj tsoom tub ki, kom Ntuj cov tub ki no, ua tub qaug rau Ntuj. Ces Ntuj tej tub ki no tau ncaim ntawm Ntuj mus.
Peb cov neeg ntseeg txog Tswv Ntuj nyob hauv Yes Xus lub npe. Peb yuav xyaum kawm thiab ua hom Khawv Koob tshiab los kem thiab daws cov dab tsis huv, no tawm mus kom tau!
Peb cov Khawv Koob tshiab tiam no. Yog peb tej nkauj los peb cov zaj teev Ntuj uas peb thov thiab cav txog Tswv Ntuj, kom Tswv Ntuj pab peb yeej cov dab tsis huv nws cov zaj ntxias peb:
Zoo li cov kev ua txhaum hla tas nrho, Tswv Ntuj 10 los lus qhia. Ces peb tsis muaj siab thiab tso siab nyob hauv peb cov Khawv Koob tshiab uas yog peb cov zaj teev Ntuj thiab thov Ntuj.
Peb khiav mus nyob hauv cov dab tsis huv cov zaj Khawv Koob, uas yog kev sib cav sib ceg thiab sib tsawg sib tua. kom lub ntuj lub neb no kawg mus:
Qhov uas ua kom lub ntuj lub teb kawg mus, ces yog zoo li no: koj teg kuv tug nthi, kuv ho teg koj tuag ntais, ces koj thiab kuv lub ntuj lub teb. kawg kiag mus rau hnub no lawm.
4. Nej yuav tsum paub tias; dab ntxias thiab cob qhia tau ib tug neej loj, li nws yog ib tug nom loj. Los ib tug Tuam Los Pav loj, muaj nyiaj txiag ntau. Los ib tug Xeev Laus muaj koob nto npe zoo. Ib tug Xib Hwb coj tau ib pab neeg coob, mus ua tej yam tsis yog kev ncaj ncees. Los ib tug txiv muam txawj ua neeb dav thiab leej heev. Los ib tug saub rov taw tuam Ntuj, hais tej lus tsis tseeb, tuaj saum ntuj tuaj. Los ntxias tau ob pab neeg coob los sib tawm tsam, kom muaj xaiv muaj lus, lawv raug sib ntaus siab tua.
Ua Ntuj cov me nyuam tsis paub tab, tuag sis laub sis lug mus, sawv daws muaj kev txom nyem kev tu siab quaj ntsuag mus.
Mas cov dab tsis huv no, yuav ua tej lub koob tsheej loj los qhuas thiab cav txog koj tus ntxias no, mus txog li 7 hnub 7 hmo.
Hos dab ntxias tau ob tug txij nkawm, sib tso sib nrauj mus. Los ntxias tau ob tug kwv tij, los ob tug phooj ywg, sib tawm tsam ua xaiv ua lus mus, kom Ntuj tsis tsa leej cai thiab qhuas nkawd ob leeg ib yam li.
Mas dab yuav ua koob tsheej { los pov dim } rau nkawd mus ib hnub ib hmos.
Hos hais txog qhov yuav tau mus ntuj tawg mus nyob tas ib sim neej rau lub hav hluv taws uas tsis txawj kug, nws yuav tau nyob mus txhiab niag tim puas xyoo.
Mas kawg yog Tswv Ntuj ib leej thiab paub txog, Leej Tib Neeg tsis muaj cai paub txog tej ntawd tau.
5. Lo lus kawg ntawm tsab ntawv no, yuav hais me ntsis txog zaj lus ua Hmoob hais rau cov neeg tuag. los cov lus uas cov neeg tuag hais los rau cov tseem muaj txoj sia nyob: Cov neeg tuag rov los hais rau cov tseem ua neej nyob ntiaj teb no!
Hmoob hais tias; nyob rau ntuj txias teb tsaus, mas cov neeg tuag,lawv raug kev tshaib kev nqhis loj kawg. Niam txiv los tub ki, yuav tau tua tsiaj tua txhuv thiab hlawv xyab hlawv ntawv rau coj mus rau lawv, kom lawv tau noj tau haus, thiab muaj nyiaj siv.
Hos sab kev ntseeg txog Tswv Ntuj, mas peb hais tias; lawv nyob ntuj txias teb tsaus. Mas lawv tshaib thiab nqhis txog txiaj ntsim koob hmoov, thiab kev thov Ntuj kom zam txim daws txhaum rau lawv.
Yog cov tseem ua neej nyob, muaj lub cev thiab tus Ntsuj Plig tseem nyob ua ke rau ntiaj teb. Tsis tau sib ncaim mus, lawv thov Ntuj, ces Ntuj thiaj mloog lawv cov lus thov, Ntuj xa lawv tej zaj thov ntawd mus daws tso cov Ntsuj Plig mus so nyob teb chaws them txim. kom lawv tau dim mus nyob rau Ntuj Ceeb tsheej.
Thaum lawv tau mus txog Ntuj Ceeb Tsheej lawm, lawv mam pauj txiaj ntsim koob hmoov los pov hwm rau cov tseem nyob rau ntiaj teb no.
Thaum lawv hla dhau lub ntiaj teb no, mus rau Ntuj Ceeb Tsheej lawm. Mas lawv yog cov Ntsuj Plig hu ua Tsoom Leej Ntshiab no. lawv cov Ntsuj Plig yog cov dawb huv lawm.
Lawv mus nrog Ntuj cov Tshiab nyob ua ke, zoo li Leej Ntshiab Miv Kas { Michel} Las Fais, Das Nias, thiab Nkas Nplia lawv. Nyob saum ntuj, Tswv Ntuj muaj 7 los 9 tug Tshiab ua thawj nyob saum Ntuj Tsoom Tshiab txhua tus.


Yaj Zoov Ntxheb X.H.