XH. Zoov Ntxheb lub neej tshaj Ntuj Lus.

1.Xyoo 1954, Txiv Plig Nyiaj Pov xa wb ob kwv tij mus kawm ntawv nyob Paksane. Peb nyuam qhuav muaj 4 yim neeg los ntseeg Ntuj xwb.
Txiv Plig Nyiaj Pov, xa wb ob kwv tij mus kawm ntawv. Ces muaj ib lub plaub ntug loj sawv los tias: Peb tij laug muab wb muag rau Txiv Plig coj mus pub nyav noj lawm.
Wb rov los, ces mam muaj peb yim txais kev ntseeg ntxiv. Cov tom qab no, yog lawv xav kom lawv cov tub tau mus kawm ntawv lawv mam txais kev ntseeg, Sab Xas Niam (Sam Neua) thiab sab Luang Nam Tha thiab sab Vees Cas ntseeg Ntuj coob dua peb lub zos Roob Nyuj Qus.
2. Xyoo 1959 Kuv mus ua Xib Hwb nyob rau, sab Luang Nam Tha. Kuv ua Xib Hwb qhia ntawv hmoob, ntawv nplog thiab qhia kev ntseeg. Tham peb hnub xwb twb muaj 15 yim Hmoob los txiav dab ntseeg Ntuj lawm… ( Piav txoj dab neeg Hmoob sawv ua Huab Tais…) ntawm Ob lub teb chaws Sam Neua thiab Npam Naj Xees no:
Ob pab Hmoob no, yog ob pab Hmoob tos Niam Txiv Huab Tais tshiab yuav nqe pem ntuj los pab Hmoob.
- Thawj pab Hmoob ntseeg nyob Roob Nyuj, yog nws muaj mob Txiv Plig thov Ntuj pab thiab kho nws tus mob zoo. Uas nws yog tus thawj neeg, yog ib tug txiv neeb loj, ua neeg dav heev kho ib nqaj tog Hmoob los saum nws cov kev ua neeb yaig. Nws xub yug peb leej me nyuam tsis nyob tas tib si….
3. Xyoo 1962, Kuv los nyob Vees Cas. Los qhia cov Xib Hwb thiab cov ntxhais kawm ntawv nyob Vees Cas. Peb mam mus rhawv kev ntseeg rau pab Hmoob nyob Roob Kub Twm thiab roob Phuv Nyawj.
4. Xyoo 1966, kuv mus tshaj Ntuj lus nyob rau Thaib teb. Mus mus rau lub Roob Hooj Kav, kuv hla lub zos Thab Npawb, Paj Nyab, Roob Nploj, Khej Me.
Txiv Plig Tshaj Sawm mam mus tsa tsev nyob Khej Me. Kuv tos Xib Hwb Lis Nom Npis tuaj kawm ua Xib Hwb. Tos Vaj Kuam, thiab Yaj Toog, Yaj Rwg, Lis Tsheej, Lis Mab lawv cov tom qab no.
5. Xyoo 1968, kuv los mus nyob Looj Ceeb, kuv ua tau lub tsev teev Ntuj, ces kuv caw yawg hlob Vaj Pov tuaj qheb kub lub tsev teev Ntuj.
Yawg hlob Vaj Pov coj nws pab Tim xyoob, co colonels thiab cov Commandants tuaj thiab. Ces peb ib huam ua phooj ywg los txog thaum lub teb chaws tawg, nyias ncaim mus nyias, ib leeg mus ib qho lawd.
6. Thaum peb nyob hauv lub Yeej thoj nam Vib Nais, cov Xaha paxasath(ONU) tuaj ntsib kuv, saib leej twg thiaj yuav paub faib khoom rau cov neeg tawg rog tau:
Zoo li faib pam, lev, tog hauv ncoo ct… Kuv lees faib, tab sis kuv tsis kam ceev cov nyiaj yuav coj mus muas tej khoom los faib. Kuv tsuas ua cov ntawv (liste) yuav tshuaj xwb lawv mam them rau lub tsev muag tshuaj. kuv thiaj li tuaj yeem faib tshuaj xwb kuv tsis lees kev faib toob xib.
Tej pam, tog hauv ncoo thiab lev cia lawv yuav tau lawv xa tuaj txog peb mam faib rau Hmoob. Ua rau lawv zoo siab, lawv yuav raws li kuv hais, peb tsuas ua cov faib rau Hmoob xwb.
7.Kuv tau thov tus Tswv Qhia nyob Oudone Thani kom nws pab plaub tug Xib Hwb ib leeg 400 Npaj nyiaj. peb yuav qhia kev ntseeg rau tsoom Hmoob nyob hauv lub yeej thoj nam.
Lub caij ntawd peb ua ib co tsev hais tias ua tsev kawm ntawv, peb qhia kev ntseeg cuag li qhia ntawv. Qhia ib pab tas hloov qhia lwm pab mus ntxiv.
Cov neeg txais kev ntseeg tshiab, coob ib npaug li thaum peb tseem nyob Los Tsuas teb. Thaum Hmoob tuaj rau txawv teb chaws, Hmoob thiaj ntsib cov kev ntseeg no ntau, los pab Hmoob lub caij lawv tsis paub lus no.
8.Thaum kuv kawm ua Xib Hwb, Txiv Plig Nyiaj Pov Xa kuv mus kawm cov txuj no:
a.Kawm ua Xib Hwb qhia kev ntseeg.
b. Kawm ua Xib Hwb qhia ntawv
c. Kawm kev cog qoob loo kom paub qhia Hmoob cog qoob los thiab tu tsiaj txhu.
d. Mus kawm Hmoob tej kev cai:
. kom paub hmoob dab qhuas li cov txiv muam hmoob.
. Ua Xib Hwb kom paub Hmoob cov Zaj tshoob txiv xaiv foom kom.
. Ua Xib Hwb yuav tsum paub hmoob ua ib thaj neeb nqes yog hais txog dab tsi. Thaum kawm tas tej no, mas nws yuav tsum paub neej lus thiab paub dab lus. Puav leej yog Ntuj li lus. Dab tsis tau qhia ib yam dab tsi los rau neeg li, yam neeg hais tsis meej, ces neeg hais tias yog dab thawj no….
. Yam uas peb yuav tsum ua, yog kho Hmoob cov kev cai txhua yam kom los haum kev ntseeg. Nyob hauv Hmoob cov rooj mov sam koob sam hmoov yog peb kho kom zoo haum kev ntseeg peb Hmoob pom Hmoob cia li tuaj tos peb mus ntiab dab rau Hmoob.
Thiaj xav kom muaj ib pab niam tsev txiv tsev, mob siab teev Ntuj. Thov kom Leej Ntuj Plig qheb peb lub siab kom txawj ua tej yam zoo tshaj plaws ua ib tug qauv zoo nyob hauv txoj kev ntseeg. Kom Leej Ntuj Plig, coj peb Haiv Hmoob los nyiam Tswv Ntuj thiab nyob hauv Ntuj txoj kev Nyiam kev Hlub.

Yaj Zoov Ntxheb.
2021.

Peb cov ntseeg txog Tswv Ntuj nyob hauv lub Koom Txoos Ka tau Liv, uas Yes Xus tau tsa nyob saum lub pob zeb. Uas dab phem cov rooj loog yuav tsis yeej lub pob zeb ntawd.
Mas nyias yuav paub hlub nyias yus kheej, vim Tswv Ntuj tau hlub peb xws li peb yog Yes Xus cov kwv thiab cov muam. Nyob hauv peb tsoom tub ki, uas Tswv Ntuj tau tsim ntawm peb tej roj ntsha los.
Mas tas txhua leej leej txhua tus, sawv daws yog Ntsuj Plig, zoo nkauj zoo nraug. Ib yam li Tswv Ntuj cov Tshiab, lawv zoo nkauj zoo nraug li ib sob npauj npaim.
Yog koj paub txoj kev hlub koj tus kheej lawm, mas koj twb tau ua ib tug neeg ntseeg txog Txwv Ntuj li no. Koj yuav hlub Tswv Ntuj, Ces koj yuav thov kom Tswv Ntuj hu koj ib leej tub.
Los mus ua Xib Hwb, los ua txiv Plig. Hloov Yes Xus cov Thwj Tim, zoo li Yes Xus tau hu Pob Zeb, Zam thiab Paj Lug lawv.
Kom tau sawv Yes Xus chaw, ua hauj lwm nyob nruab nrab ntawm tsoom neeg ntseeg. kev vam khom, kom Yes Xus tau txib lawv los foom hmoov zoo, pub rau cov neeg muaj kev txom nyem.
Uas niaj hnub muaj neeg tos Tswv Ntuj cov lus foom hmoov zoo.
Cov tau ua Yes Xus cov Thwj Tim no, mas lawv muaj Yes Xus nyob nrog nraim lawv. Yog nej hlub nej tus kheej nyob hauv Yes Xus, mas nej yuav txawj hlub nej cov Xib Hwb thiab nej cov txiv Leej Choj.
Nej yuav thov kom Yes Xus hu nej ib Leej Tub, los mus ua Xib Hwb los mus ua Leej Choj. Kom tau los sawv sawm lub Pob Zeb, uas Yes Xus tau tsa los thaiv dab phem cov rooj loog.
Kom Leej Tswv Yim Ntshiab, tau nqes los nyob saum nej cov tub. Tau ua Yes Xus Thwj Tim los foom hmoov zoo, rau cov neeg txom nyem muaj mob muaj nkeeg uas lawv niaj hnub tos txog Yes Xus tej koob Hmoov.
=>.Lo lus kawg, xav kom nej nyob ruaj, hauv Yes Xus txoj kev ntseeg. Txoj kev sis nyiam sis hlub thiaj tsis ua lub nra hnyav rau nej ris.
Thaum nej muaj ib leej tub los ua Yes Xus Thwj Tim lawd, Tswv Ntuj yuav yuav tsa lawv ua Tswv Ntuj ib tug Tiam Lis. Ntuj yuav muab ib lub mom nyiaj mom kub muaj nqis loj rau nej leej Tub ntoo.
Kom lawv tiv thaiv tau cov ntsuj Plig phem, txoj kev tuaj haub ntxias neeg kom ncaim ntawm Tswv Ntuj mus. Vim Yes Xus cov tiam Lis, mas lawv muaj zog nyob hauv txoj kev teev Ntuj.
Lub sim Ceeb neeg no, yuav phis los txia ua tau Tswv Ntuj cov Tshiab. Nej yuav paub tias, tej phov dim uas neeg sib yaum mus ua si, sib yaum mus noj nqaig haus dej haus cwv ua kev lom zem no.
Thiab kev ua neeg tub nkeeg no,
Nws yog dab phem ib co, ntxiab uas Dab phem tab tom cuab, kom mag tau peb yooj yim kawg ntag. Peb yuav tsum caum Leej Tswv Yim txhua lub caij, Peb thiaj yuav zam dhau cov rooj ntxhiab no mus.

Yaj Zoov Ntxheb X.H.

Yeej muaj tseeb thiab yog,tsoom thawj coj, txij li tus txiv tsev mus, rau cov Xib hwb nce ib theem zuj zus mus txog tus resident thiab cov Tswv Qhia.
Peb txhua tus, yuav xyaum ua neeg ncaj ncees.  coj qhov tseeb ua qhov yog.  Kom Tswv Ntuj, cov lus muaj nuj nqes siab. Txhua yam hauj lwm puav leej yog kev tseem ceeb heev.
Tab yog txawm nyob rau qhov twg, los yuav tau muaj kev pab saib Tswv Ntuj Tsoom Tub ki. Peb tseem muaj ntau leej tsis paub thiab tsis to taub zoo.
Peb yeej muaj qee leej Xib Hwb siv kev ntseeg los ua tseem hwv tus kev tseev tsim. { Tseev tsim= poli tical} Cov siv tus tseev tsim no nws yuav ua rau ib pab neeg tau txais kev txom nyem loj nrog kev tuag mus.
Zoo li cov xwm nyob Cob Tsib teb, ib co neeg mus ua lawv tus tseev tsim, lawv mus tsis tau.  Lawv dag yuav Tswv Ntuj cov tub txib lub npe, ua Xib Hwb mus.
Vim cov neeg ntseeg siab zoo, lawv tsis nyiam plaub ntug. lawv txais tos nws.   Nws mus ces nws siv kev ntseeg los mus ua koj tus kev tseev tsim xyaw.  Ces tub qaug rau nom tswv txoj cai,
Muaj teeb meem tuaj tsis muaj neeg lees paub. ces muaj neeg raug txim, lawv mus nyob txim tas nws sim neej.  Peb cov Xib Hwb tshaj Ntuj lus ua tsis nyog tej no.
Koj yuav ua rau lawv lub cev ntaj ntsug rau txom nyem, Tseem yuav ua rau lawv tus Ntsuj Plig, tau ntxeev siab mus, tsis ntseeg txog Tswv Ntuj lawm thiab.  Hais tias ua cas Ntuj tsis pab no.
Tsis yog tej yam loj li nyob Cob Tsib teb xwb, Tej yam peb paub tsis zoo, hais txog li Hmoob tej kab lis kev cai coj, peb lam tau lawm hais tias, yog dab kev cai thiab yog dab lus no.
Peb twb yuam kev coj peb cov neeg, mus poob ib theem qis lawm. Yog peb tsis muaj kev ceev faj, mas yog peb nce mus nyob hloov Tswv Ntuj chaw thiab nce mus hloov, tus dab Xyob txhiaj chaw no nyob tib si lawm.
{{Tus Dab xyob txhiaj= yog cov dag kom neeg poob nyiaj, ua kom zoo me ntsis xwb, niaj hnub rov pauj dua rau dab mus li. pheej ua ntau zaus li no, ces thiaj hu ua dab xyob txhiaj no.}}
Cov ua thawj neeg zoo li cov Xib Hwb, mas peb ua ib lub neej denger kawg.  Zoo li peb xub lees ua Tswv Ntuj tus tub txib zoo heev, tab sis peb tuaj yeem mus siv dab txuj ci.  Pev cia li mus ua Dab Xas Tas tus Xib Hwb.  Vim peb yuav dab lub tswv yim thiab peb coj dab tus cai, ces peb nyiam neeg tsis sib luag.
Peb muab Ntuj cov lus hloov, los ua peb tug.  Ces peb hais li yog Ntuj hais, peb coj li yog dab qhia, cov kev cai peb txua rau ces yog Dab li kev cai ntag.
Ces yus yuav yog Cov hma uas Yes Xus hais, tsis yog cov los ntawm lub qhov rooj los.  Hos yog cov dhia los ntawm cov qhov rai los, co no mas nws yog cov yaj thiaj Yes Xus tus yeeb ncuab.
Yog peb tsis muaj kev ceev faj, mas peb ua ib co Xib Hwb muaj 50 % phem thiab muaj 50% yog Xib Hwb zoo.
Nyob hauv tsoom ntseeg, muaj 4 hom neeg no:
A.Cov thawj neeg, suav txij li tus txiv tsev, ib theem zuj zus mus txog tus President los tua Vaj Ntxwv.
B. Hauv cov neeg Ntseeg, suav tus paub tab nce ib theem zuj zus mus txog cov Tswv Qhia, thiab cov Tiam Lis Vaj Qhia.
D. Cov txiv muam, txiv Neeb Txiv Yaig…
E. Cov Hauj Sam.
1. Cov thawj neeg, uas lawv tsis muaj kev nyiam kev hlub, lawv tso hem thawj rau luag tej. Thiab yuam neeg, lawv twb nce mus nyob Tswv Ntuj chaw txiav txim rau luag tej lawm.
2. Cov ua tub tshaj Ntuj lus li cov Xib Hwb, Qhia Yes Xus lub Moo Zoo thiab pub lub Cim Ntxuav rau luag.  Kom tau ua Tswv Ntuj tsoom tub ki.
Yog lawv tsis kawm kom tiav, mas lawv lees ua Tswv Ntuj tus tub txib. Tab sis lawv npuab Yes Xus. Lawv kuj yog Dab Xas Tas tus tub txib lawm, vim lawv hla Tswv Ntuj cov lus ntau,paub hais xwb tsis paub coj raws.
3.Cov txiv Muam, Txiv Neeb Txiv Yaig, Lawv sawv mus nyob dab xyob txhiaj chaws tas, Tsis yog dab tom los lawv hais tias, yog raug dab tom lawm. Lawv yuam neeg tua tsiaj los pauj rau dab. lawv noj nqaij, ces dab haus tus pa.  tsis tseeb lawm.
4. Cov Hauj Sam, lawv nyob hauv cov tsev teev hawm. Tos foom koob hmoov pub rau pej xeem zej zog cov muaj kev txom nyem kom rov muaj hmoo  tuaj lawv tos kev noj kev haus ntawm cov pej xeem.
Tas nrho cov hais saum no, nyias yuav zaum nyias lub rooj. Txhob dag mus zaum luag lwm tus lub rooj.  Coj tej pej xeem mus ua kev txhaum tub qaug rau Tswv Ntuj thiab ua kev txhaum rau Nom Tswv tus cai tswj hwm teb chaws.
Yog leej twg tau ua kev txhaum hla Tswv Ntuj 10 lo lus qhia, mas nws tau rhua Tswv Ntuj lub meej Mom thiab rhuav cov dab nws teev ntawd mus lawm!
Yam li peb nqes lus yuav hais no:
a.Yog koj ua txhaum hla tswv Ntuj lo lusqhia 5, hais tias:  Koj tsis txhob tua neeg, Yog koj ua li no, ces txhais tau hais tias, koj tus Tswv Ntuj Nws yog tus siab phem tshaj plaws li ntag. Tswv Ntuj nyiam tua neeg kom tuag paug lug mus.
b. Koj ua txhaum hla Tswv Ntuj lo lus qhia 6, hais tias: Koj txhob zes luag poj luag sev. Yog koj nyiam kev ua plees ua yi, nyiam kev ua nkauj ua nraug.  Ces txhais tau tias koj tus Tswv Ntuj yog tus zoo li ntawd lawm.   Nws nyiam kev ua nkauj ua nraug kawg.
Tseem tseem muaj tej yam hnyav dua thiab, cuag li koj muab tua neeg koj siv nws los ua kev txhaum no los txi rau koj lawm ntag. koj mas zoo siab tsis txawj tas li.
c. Koj ua txhaum hla lo lus 7 hais tias. txhob ua tub sab tub nyiag, Koj ua li ntawd, ces yeej txhais los tias:  Koj tus Tswv Ntuj mas Nws mas yog tus Tswv Ntuj Pluag, Nws ntshaw nyiaj kawg nkaus li lawm li.
Peb cov Tub tshaj Ntuj lus, ua Xib Hwb yuav paub thiab ceev faj, txog tej hais hais no.  Tsam peb tau muab Yes Xus lub meej mom  ua ntuag khaub hlab thiab liam txwv tas mus lawm.

Sacramento
Tim 3/4/ 2020.
Yaj Zoov Ntxheb Xib Hwb.