COV ZAJ NYEEM NRUAB LIS PIAM XYOO II, 2015-2016

TIM 18 LUB 5 HLIS 2016

Hnub Plaub Lis Piam Xya Nruab Xyoo C Nruab Lis Piam Xyoo II

Hwm LN Vaj Qhia Zam I

Zaj Nyeem Ib: YAS KOS 4: 13-17

Cov kwv tij zoo nyiad,
13 hais rau nej cov uas hais tias : ‘Hnub no, los tag kis, peb yuav mus tom lub tsheej no los lub tod, peb yuav mus nyob ntawd ib xyoos ua lag ua luam, ces peb yuav tau nyiaj ntau,’ 14 nej twb tsis paub tias tag kis nej lub neej yuav zoo li cas, nej tsuas zoo li ib co pa dej uas nyob ib pliag xwb yuav yaj tas mus. 15 Phim nej yuav tsum hais tias : ‘Yog Huab Tais pom zoo, mas peb tseem yuav muaj txoj sia nyob, ces peb yuav ua qhov no los qhov tod.’ 16 Nej yog neeg khav theeb vim nej muab hlob. Txoj kev khav theeb no yog ib yam phem. 17 Li ntawd, leej twg paub tias qhov twg yog qhov zoo, tab sis nws tsis ua, mas nws ua txhaum.

NPN 49: 2-3, 6-7, 8-10, 11

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug.

Cov haiv neeg, nej sawv daws mloog qhov no ;
tas tsoom neeg nyob qab ntuj khwb, nej tig pob ntseg mloog,
tsis hais laj mej pej xeem los neeg muaj koob nto npe,
tsis hais cov muaj los cov pluag, nej sawv daws mloog !

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug.

Thaum tsiv hnub tsiv nyoog tuaj txog, vim li cas kuv thiaj ntshai ?
Cov neeg nkhaus txoj kev phem nyob puag ncig kuv.
Lawv tso siab rau lawv peev nyiaj txiag,
lawv muaj plhus ntxiag vim lawv nplua nuj loj kawg nkaus.

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug.

Ib tug neeg yuav rov txhiv nws tus kheej tsis tau,
nws kuj yuav rov them tsis tau nws tus nqi rau Tswv Ntuj li.
Tus nqi txhiv ib tug neeg txoj sia hnyav dhau, nws yuav muaj tsis txaus them ib zaug li
Kom nws thiaj muaj sia mus li tsis txhob pom lub qhov tuag.

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug.

Nws yuav pom cov neeg thoob tsib tuag,
ib yam li cov neeg vwm thiab cov neeg tsis txawj xav los tuag,
lawv tso lawv tej nyiaj txiag rau lwm cov neeg yuav.

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias : "Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis taug ntawm kuv mus.

Txais: As les lus yas, as les lus yas.

Ntawv Moo Zoo: MK 9: 38-40

38 Zam hais rau Yes Xus tias : "Xib Hwb, peb pom ib tug neeg hu txog koj lub npe los ntiab dab, ces peb hais kom nws tsum, vim nws tsis nrog peb pab. 39 Tab sis Yes Xus hais tias : “Nej txhob txwv nws, vim tsis muaj ib tug neeg hu txog kuv lub npe los ua hwj huam thiab ho ib txhij hais lus phem txog kuv. 40 Leej twg tsis tiv peb, mas nws tuaj peb tog.”

TIM 19 LUB 5 HLIS 2016

Hnub Tsib Lis Piam Xya Nruab Xyoo C Nruab Lis Piam Xyoo II

Zaj Nyeem Ib: YAS KOS 5: 1-6

1 Nyem no, yog hais rau cov nplua nuj: nej yuav quaj yuav nyiav vim xwv txheej yuav tuaj raug nej. 2 Nej tej kev nplua nuj yuav lwj tas, kab yuav txo nej tej tsoos tsho tu tas. 3 Nej tej nyiaj tej kub xeb tas, cov xeb ntawd yuav ua tim khawv txiav txim rau nej, thiab yuav tom nej tej nqaij zoo li hluav taws hlawv. Nej tau khaws nyiaj cia npaj rau hnub kawg. 4 Hos cov tub zog uas sau nej tej qoob, nej tsis pub nqe zog rau lawv. Cov nqe zog ntawd lub suab qw thiab cov tub zog lub suab quaj nce mus txog tus Huab Tais kav tsoom hnub qub. 5 Nyob ntiaj teb no, nej ua neej noj tsis txhawj haus tsis txuag thiab muaj kev lom zem xauv npo, nej tau txav nej tus kheej kom rog rau lub caij luag yuav cab nej mus tua. 6 Nej tau muab txim rau, nej tau muab tus neeg tsis txhaum tua, nws tsis cav nej ib qho li.

NPN 49: 14-15AB, 15CD-16, 17-18, 19-20

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug!

Cov uas tso siab tag nrho rau lawv tus kheej yuav zoo li cas,
cov uas siv lawv lub ncauj ua kom neeg raws lawv yuav zoo li no :
Lawv yuav raug puav mus kaw hauv ntuj txias teb tsaus zoo li ib pab yaj.
Kev tuag yuav ua tswv coj lawv mus noj zaub, cov neeg ncaj yuav ua tswv kav lawv.

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug!


Thaum kaj ntug lawv lub ntsej muag yuav puas mus,
Ntuj txias teb tsaus yog lawv chaw nyob.
Tab sis, Tswv Ntuj yuav txhiv kuv txoj sia ntawm
ntuj txias teb tsaus lub hwj huam, nws yuav txais kuv nrog nws nyob.

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug!

Koj txhob txhawj thaum ib tug neeg nplua nuj tuaj
thiab nws tsev neeg nto koob meej loj tuaj;
Vim hnub nws tuag, nws nqa tsis tau dab tsi li,
nws lub koob meej kuj yuav caum tsis tau nws mus.

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug!

Thaum ua neej nyob, nws rov zoo siab rau nws tus ntsuj plig tias :
"Luag yuav qhuas koj, vim koj ua tau txhua yam zoo rau koj! "
Tus ntsuj plig twb yuav mus cuag nws cov niam cov txiv hauv kev tuag,
lawv yuav tsis pom lub hnub ci ib zaug ntxiv.

Txais: (MT 5: 3) Cov pluag hauv nruab siab tau hmoov zoo, ntuj ceeb tsheej yog lawv tug!

As Les Lus Yas: 1 TXLN 2: 13

Txais: As les lus yas, as les lus yas.

Nej txais Tswv Ntuj Lo Lus, tsis txhob txais zoo li yog neeg lo lus xwb,
nej yuav txais raws li qhov tseeb uas yeej yog Tswv Ntuj Lo Lus tiag.

Txais: As les lus yas, as les lus yas.

Ntawv Moo Zoo: MK 9: 41-50

Yes Xus hais rau nws cov thwj tim tias:
41 "Leej twg muab ib khob dej rau nej haus, vim nej yog Leej Pleev tug, mas kuv hais tseeb rau nej, tus ntawd yuav txais koob haum.” 42 Yog leej twg coj ib tug neeg ntseeg me me no, kom ua txhaum, mas txhiaj khoov cia luag muab lub zeb uas luj zom mus dai ntawm nws caj dab, thiab muab nws pov rau hauv dej ntuj. 43 Yog koj txhais tes coj koj mus ua txhaum, muab txiav pov tseg : txhiaj khoov koj tu ib sab tes mus hauv Txoj Sia, zoo dua koj muaj ob sab tes mus hauv dab phem teb, uas hluav taws tsis txawj tuag. [44]. 45 Yog koj txhais taw coj koj mus ua txhaum, muab txiav pov tseg : txhiaj khoov koj tu taw mus hauv Txoj Sia, zoo dua muaj ob txhais taw, tab sis koj poob hauv dab phem teb [46]. 47 Yog koj lub qhov muag coj koj mus ua txhaum, muab kaus pov tseg : txhiaj khoov koj dig ib sab qhov muag mus hauv Tswv Ntuj lub Ceeb Tsheej, zoo dua koj muaj ob sab qhov muag, tab sis koj poob hauv dab phem cov hluas taws, 48 hauv lub teb chaws uas lawv cov kas tsis txawj tuag, thiab hluav taws tsis txawj kug. 49 Vim tias hluav taws yuav ua kom sawv daws qab ntsev. 50 Ntsev yog ib yam qab, tab sis, yog ntsev tsuag lawm, yuav muab dab tsi las kom ntsev daw li qub. Nej cia ntsev nyob hauv nej mog, nej thiaj yuav nrog sawv daws ua neej nyob thaj yeeb.

TIM    20   LUB   5   HLIS    2016

Hnub Rau Lis Piam Xya Nruab Xyoo C Nruab Lis Piam Xyoo II

Hwm LN Bernardine nyob Siena

Zaj Nyeem Ib:    Yas Kos   5:   9-12

9 Kwv tij, nej ib tug txhob yws txog lwm tus, Ntuj thiaj yuav tsis txiav txim rau nej. Tus txiav txim twb nyob ze ntawm qhov rooj lawm. 10 Kwv tij, nej yuav muab cov Yaj Saub los ua ib tug piv txwv txog kev ua siab ntev ris txoj kev txom nyem rau nej yoog, lawv yog cov tau hais lus nyob hauv Huab Tais lub npe. 11 Nej xav saib, peb hais tias cov neeg uas muaj lub siab nyob ruaj nreb khov kho mas lawv thiaj tau txoj hmoov zoo. Nej tau hnov hais txog Yob muaj ib lub siab nyob ruaj nreb khov kho, thiab nej paub tias qhov kawg Huab Tais ua zoo li cas rau nws, vim Huab Tais yog tus khuv leej neeg thiab hlub cov raug txom nyem. 12 Kuv cov kwv tij e, qhov uas nej yuav xub mob siab rau tshaj cov mas yog nej yuav tsis txhob cog lus twv ntuj los twv teb, los yog muab lwm yam los cog lus kiag li. Thaum nej hais tias ‘yog’, mas yuav tsum hais ‘yog’ xwb, thaum nej hais tias ‘tsis yog,’ mas yuav tsum  hais ‘tsis yog’ xwb,  nej thiaj yuav tsis nrhiav txim rau nej ris.

NPN     103:   1-2, 3-4, 8-9, 11-12

Txais:    (8a) Huab Tais siab zoo thiab khuv leej neeg.

Kuv tus ntsuj plig, cia li cav txog HUAB TAISs;
tas nrho kuv tus kheej, cia li cav txog nws lub npe ntshiab.
Kuv tus ntsuj plig, cia li cav txog HUAB TAISs,
thiab tsis txhob hnov qab nws tej  txiaj ntsim koob hmoov.

Txais:    (8a) Huab Tais siab zoo thiab khuv leej neeg.

Nws zam tas nrho koj cov txhaum rau koj,
nws kho tas koj tej mob nkeeg kom zoo.  
Nws txhiv koj txoj sia ntawm lub kwj tob los,  
nws muab txoj kev hlub thiab lub siab muag rau koj ntoo.

Txais:    (8a) Huab Tais siab zoo thiab khuv leej neeg.

HUAB TAIS khuv leej thiab hlub neeg,
nws npau taws qeeb, nws muaj kev hlub loj
Nws tsis npau taws tas  mus li,
nws kuj tsis chim tas mus ib txhis.

Txais:    (8a) Huab Tais siab zoo thiab khuv leej neeg.

Siab npaum li lub ntuj siab nyob saum ntiaj teb,
nws kuj hlub cov neeg uas hwm nws loj npaum li ntawd.  
Deb npaum li sab hnub tuaj nyob deb sab hnub poob,
nws tau muab peb tej txhaum pov deb ntawm peb npaum li ntawd  

Txais:    (8a) Huab Tais siab zoo thiab khuv leej neeg.

As Les Lus Yas:    ZAM   17:  17B, 17A

Txais:   As les lus yas, as les lus yas.

Koj lo lus yog qhov tseeb ,  Huab Tais,
thov koj qee lawv mus nyob hauv txoj kev tseeb .

Txais:   As les lus yas, as les lus yas.

Ntawv Moo Zoo:      MK   10:   1-12

1 Yes Xus tso qhov chaw ntawd tseg, nws mus rau xeev ntuj Yus Das, thiab mus rau sab dej Yos Las Das tim ub. Rov muaj dua tej pab neeg tuaj mus cuag nws. Nws rov qhia lawv xws li nws ua kam. 2 Ib cov Fas Lis Xais xav sim Yes Xus, lawv txav los nug nws tias : "Ib tug txiv neej puas muaj cai yuav nrauj nws poj niam?" 3 Yes Xus teb rau lawv tias : "Mais Xes qhia dab tsi rau nej ?" 4 Lawv teb tias : "Mais Xes kom ua ntawv nrauj tso thiaj nrauj tau." 5 Yes Xus teb rau lawv tias : "Yog vim nej lub siab txhav dhau, Mais Xes thiaj sau txoj cai ntawd. 6 Tab sis, thaum chiv lub keeb tsim neeg, Tswv Ntuj tsim nkawd ua txiv neej thiab poj niam. 7 Vim li ntawd, txiv neej yuav tso nws niam nws txiv tseg, 8 nkawd ob leeg yuav ua ib lub cev nqaij xwb. Ua li mas nkawd tsis yog ob leeg lawm, nkawd yog ib lub cev nqaij xwb. 9 Yog vim qhov no, mas yam uas Tswv Ntuj muab sau los ua ke, neeg yuav tsis txhob muab cais.”  10 Thaum lawv rov los txog tsev,  cov thwj tim rov nug Yes Xus txog qhov ntawd. 11 Ces Yes Xus hais rau lawv tias : "Tus txiv neej twg nrauj nws poj niam ho rov yuav dua lwm tus, mas nws yog ib tug muaj poj niam mus deev hluas, nws ua txhaum rau nws poj niam. 12 Hos tus poj niam twg nrauj nws tus txiv, rov yuav dua lwm tus, mas nws yog ib tug neeg muaj txiv mus deev hluas.”

TIM    21   LUB   5   HLIS    2016

Hnub Xya Lis Piam Xya Nruab Xyoo C Nruab Lis Piam II

Hwm LN Christopher Magallanes thiab Cov

Zaj Nyeem Ib:     YAS KOS   5:   13-20

Cov kwv tij,
13 Nyob hauv nej, tus twg raug txom nyem, mas nws yuav thov Ntuj.  Tus twg nyob kaj siab lug, mas nws yuav hu nkauj cav txog Ntuj. 14 Tus twg muaj mob, mas nws yuav hu lub Koom Txoos cov txwj laus kom lawv tuaj thov Ntuj rau nws, thiab kom lawv tuav txog Huab Tais lub npe muab roj los pleev nws. 15 Cov neeg ntseeg tej lus thov Ntuj yuav cawm tus neeg mob, Huab Tais yuav tsa nws sawv rov los. Yog nws tau ua txhaum, mas nws cov txhaum yuav daws tas. 16 Nej yuav rov lees txhaum ib leeg rau ib leeg,  nej ib leeg yuav thov Ntuj rau ib leeg, kom nej tus mob zoo hlo. Thaum tus neeg siab ncaj thov Ntuj, mas nws lo lus thov muaj zog. 17 Es Lias yog ib tug neeg zoo li peb  xwb tiam sis nws thov Ntuj tas zog kom txhob los nag, ces nag tsis poob los yug lub ntiaj teb tau peb xyoos thiab rau hli. 18 Es Lias mam rov qab thov Ntuj  dua ces ntuj thiaj qhib lug tso nag los, lub ntiaj teb thiaj rov txi txiv tau. 19 Kuv cov kwv tij, thaum nej ib tug yuam kev mus deb ntawm qhov tseeb lawm, yog muaj ib tug coj nws rov los, 20 mas nej yuav tsum paub tias, tus uas coj ib tug neeg txhaum ntawm nws txoj kev poob zoo rov los, nws cawm tus ntawd tus plig ntawm txoj kev tuag, thiab nws so ntau yam txhaum pov tseg.

NPN       141:  1-2, 3 + 8

Txais:  (2a) Thov kom kuv zaj teev Ntuj nce tuaj rau koj xws li pa xyab.

HUAB TAIS, kuv hu txog koj : tsuag tsuag tuaj pab kuv !
Thaum kuv hu txog koj, thov koj tig los mloog kuv.
Thov kom kuv zaj teev Ntuj nce tuaj xws li pa xyab,
Kom kuv ob txhais tes tsa tuaj zoo li cev txim thaum tsaus ntuj.

Txais:  (2a) Thov kom kuv zaj teev Ntuj nce tuaj rau koj xws li pa xyab.

HUAB TAIS, thov koj zov kuv lub ncauj,
Thov koj zov lub qhov rooj ntawm kuv di ncauj.
HUAB TAIS kuv tus Tswv Ntuj, kuv tig qhov muag ntsia ntsoov koj,
kuv khiav tuaj nkaum hauv koj, koj txhob cia kuv plam txoj sia.

Txais:  (2a) Thov kom kuv zaj teev Ntuj nce tuaj rau koj xws li pa xyab.

As Les Lus Yas:      MT 11:  25

Txais:   As les lus yas, as les lus yas.

Peb cav txog koj, Leej Txiv, tus Huab Tais kav lub ntuj lub teb,
vim koj qhib cov txuj txog lub Ceeb Tsheej rau cov neeg me paub.

Txais:   As les lus yas, as les lus yas.

Ntawv Moo Zoo:       MK  10:   13-16

13 Luag coj ib co me nyuam tuaj rau Yes Xus kom Yes Xus kov lawv, tab sis cov thwj tim cem lawv. 14 Yes Xus pom li ntawd, nws npau taws, nws hais rau lawv tias : "Nej cia cov me nyuam tuaj cuag kuv, nej txhob txwv lawv. Yog cov neeg uas zoo li cov me nyuam no thiaj yuav tau Tswv Ntuj lub Ceeb Tsheej los ua lawv tug. 15 Kuv hais tseeb rau nej : leej twg tsis txais Tswv Ntuj lub Ceeb Tsheej zoo li ib tug me nyuam, mas nws yuav mus tsis tau rau hauv. 16 Ces Yes Xus puag cov me nyuam, nws tsa tes rau saum lawv, nws foom hmoov zoo rau lawv.

TIM 23 LUB 5 HLIS 2016

Hnub Ob Lis Piam Yim Nruab Xyoo C Nruab Lis Piam II

Zaj Nyeem Ib: 1 POB ZEB 1: 3-9

3 Peb cav lus zoo txog Tswv Ntuj peb tus Huab Tais Yes Xus Pleev Leej Txiv; vim nws muaj lub siab khuv leej neeg kawg nkaus, nws thiaj ua kom peb rov yug los tshiab muaj kev tso siab lug nyob hauv Yes Xus Pleev txoj kev sawv ntawm cov tub tuag rov los, 4 nws thiaj pub ib lub cuab tam uas tsis txawj lwj, tsis txawj tsuas, thiab tsis txawj nphob rau peb; nws tshwj zias lub cuab tam ntawd rau nej nyob saum Ntuj. 5 Yog vim nej ntseeg, mas Tswv Ntuj lub hwj huam thiaj txuag nej, kom nej tau txais txoj kev cawm neeg, uas yuav tawm tuaj hnub kawg rau sawv daws pom.
6 Vim li no, nej thiaj muaj kev zoo siab luag ntxhi, txawm tias nej yuav raug ntau yam kev txom nyem kev sim siab ib ntus ntxiv, 7 kom Ntuj tau sim nej txoj kev ntseeg uas muaj nqes dua kub, zoo li luag sim tej kub txawj puas nyob hauv hluav taws; ces hnub Yes Xus Pleev rov los, nej yuav hnov ib co lus qhuas nej, nej yuav tau koob meej, thiab yuav txais hwj chim. 8 Txawm nej tsis tau pom nws dua los nej nyiam nws; niaj hnub no nej tsis pom nws li, tab sis nej ntseeg, mas nej muaj ib txog kev zoo siab loj uas piav tsis tau, 9 vim nej paub tseeb tias nej yuav tau txais raws li nej txoj kev ntseeg qhia, uas yog txoj kev cawm nej tus ntsuj plig.

NPN 111: 1-2, 5-6, 9 + 10C

Txais: (5) Huab Tais yuav nco ntsoov tias nws tau cog lus mus tas ib txhis.
los: As les lus yas.

Kuv yuav ua HUAB TAIS tsaug tas kuv lub siab lub ntsws
thaum kuv nrog tsoom neeg siab ncaj koom ua ib pab, nrog lawv ua lub txoos.
HUAB TAIS cov hauj lwm loj tas nrho,
zoo ntxim siab kawg nkaus.

Txais: (5) Huab Tais yuav nco ntsoov tias nws tau cog lus mus tas ib txhis.
los: As les lus yas.

Nws muab txiam xws rau cov hwm nws tau noj,
nws yuav nco ntsoov mus li txog tias nws tau cog lus.
Nws tau ua kom nws haiv neeg paub txog nws tej hauj lwm muaj hwj huam,
Nws muab cov haiv neeg lub cuab tam pub rau lawv.

Txais: (5) Huab Tais yuav nco ntsoov tias nws tau cog lus mus tas ib txhis.
los: As les lus yas.

Nws tau xa kev cawm dim tuaj rau nws haiv neeg,
nws yuav tsis hloov nws lo lus tas mus li ib txhis;
nws lub npe ntshiab thiab tsim nyog peb yuav hwm.
Nws lub koob meej yuav nyob mus li ib txhiab ib txhis. .

Txais: (5) Huab Tais yuav nco ntsoov tias nws tau cog lus mus tas ib txhis.
los: As les lus yas.

As Les Lus Yas: 2 COR 8: 9

Txais: As les lus yas, as les lus yas.

Yes Xus Pleev tuaj yeem ua tus pluag txawm tias nws yog tus nplua nuj,
kom xwv nws txoj kev pluag ua nej nplua nuj tuaj.

Txais: As les lus yas, as les lus yas.

Ntawv Moo Zoo: MK 10: 17-27

17 Thaum Yes Xus yuav sawv kev mus, muaj ib tug neeg khiav los txhos caug ntawm Yes Xus xub ntiag, nws nug tias : "Xib Hwb siab zoo, kuv yuav ua dab tsi thiaj yuav tau txais txoj sia nyob mus li los ua cuab tam ?" 18 Yes Xus hais rau nws tias : "Vim li cas koj hais tias kuv siab zoo ? Tsis muaj leej twg siab zoo, tsuas kawg Tswv Ntuj tib leeg xwb. 19 Koj paub cov lus qhia tias : koj txhob tua neeg, txhob zes luag txij luag nkawm, txhob ua tub sab, txhob ua tim khawv cuav, txhob ua luam cuav, hwm koj niam koj txiv." 20 Tus neeg ntawd teb rau Yes Xus tias : "Xib Hwb, txij thaum kuv yav hluas los, kuv yeej coj raws nraim li ntawd." 21 Yes Xus ntsia nws, ces Yes Xus nyiam nws. Nws hais rau tus neeg ntawd tias : "Tsuas tshuav ib yam xwb koj tsis tau ua : koj mus, koj muab koj lub cuab tam muag, muab tus nqi pub rau cov pluag, koj yuav tau ib lub cuab tam muaj nqis nyob saum ntuj. Ces koj los raws kuv." 22 Tus neeg ntawd hnov lo lus no, nws lub ntsej muag ntshaus tas, ces nws rov mus tu siab nrho, vim nws muaj cuab yeej cuab tam ntau. 23 Ces Yes Xus ntsia ib ncig nws, nws hais rau cov thwj tim tias : "Cov neeg nplua nuj mus hauv Tswv Ntuj lub Ceeb Tsheej mas nyuaj npaum no!" 24 Cov thwj tim yoob tas rau cov lus no. Tab sis Yes Xus rov hais rau lawv tias : "Kuv cov me nyuam, kev mus hauv Tswv Ntuj lub Ceeb Tsheej mas yeej nyuaj npaum no ! 25 Ib tug ntxhuav yuav nkag hauv lub qhov koob yooj yim dua ib tug nplua nuj nkag mus hauv Tswv Ntuj lub Ceeb Tsheej." 26 Cov thwj tim yim huab yoob heev. Lawv sib tham tias : "Leej twg thiaj yuav txais kev cawm ?" 27 Yes Xus ntsia lawv, nws hais tias : "Yog neeg ua neeg xwb, mas yeej tsis tau li, tab sis Tswv Ntuj ua tau. Vim Tswv Ntuj ua tau tas ib puas tsav yam."

TIM 24 LUB 5 HLIS 2016

Hnub Peb Lis Piam Yim Nruab Xyoo C Nruab Lis Piam II

Zaj Nyeem Ib: 1 POB ZEB 1: 10-16

10 Txoj kev cawm nej tus ntsuj plig ntawd, mas cov Yaj Saub twb tau nrhiav thiab tau tshuaj txog lawm. Lawv tau tshaj lus txog lub txiaj ntsim uas nej yuav tau txais ua nej tug. 11 Lawv tau nrhiav thiab tshuaj saib lub caij thiab cov xwm yuav tshwm rau thaum twg. Vim Leej Pleev lub Tswv Yim uas nyob hauv lawv xub qhia ua ntej tias Leej Pleev yuav raug txom nyem, thiab yuav muaj koob meej tom qab. 12 Cov Yaj Saub tau txais kev to taub tias cov lus lawv tshaj tawm txog tej yam uas zaum no nej tau hnov txog lawm, uas yog cov tub tshaj lub Moo Zoo tuaj qhia rau nej paub nyob hauv Leej Tswv Yim Ntshiab tus tuaj saum ntuj tuaj, mas yog tshaj rau nej tsis yog tshaj rau lawv. Tab yog cov Tshiab kiag lawv yeej ntshaw kom lawv tau pom tej yam no.
13 Vim li no, nej lub tswv yim yuav nyob npaj rawv tos, nej tsis txhob haus dej haus cawv qaug, nej tsis txhob tso siab rau dab tsi tsuas tso siab tos lub txiaj ntsim uas nej yuav tau txais thaum Yes Xus Pleev tshwm los nkaus xwb. 14 Nej ua ib co me nyuam mloog lus, tsis txhob ywj mloog nej lub siab ntshaw xws li yav thaud uas nej tseem tsis tau paub qhov tseeb. 15 Nej ua dab tsi nej yuav coj ib tug cwj pwm ntshiab , raws li tus hu nej nws yog tus ntshiab, 16 vim muaj lus sau tseg tias : ‘Nej yuav ua neeg ntshiab vim kuv ntshiab.’

NPN 98: 1, 2-3AB, 3CD-4

Txais: (2a) HUAB TAIS ua kom sawv daws paub txog nws txoj kev cawm neeg.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis, nws sab npab ntshiab
tau ua kom nws yeej.

Txais…

HUAB TAIS ua kom sawv daws paub txog nws txoj kev cawm neeg,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo rau thiab hlub
tsev neeg His Xas Lais.

Txais…

Tas npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhuam teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais…

As Les Lus Yas: MT 11: 25

Txais: As les lus yas, as les lus yas.

Peb cav txog koj, Leej Txiv, tus Huab Tais kav lub ntuj lub teb,
vim koj qhib cov txuj txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: MK 10: 28-31

28 Pob Zeb hais rau Yes Xus tias : “Peb, mas peb tso ib puas tsav yam tseg, peb los raws koj.” 29 Yes Xus hais tias : "Kuv hais tseeb rau nej, tsis muaj ib tug neeg uas tau tso vaj tse, kwv tij nkauj muam, niam thiab txiv, me tub me nyuam, thiab liaj teb tseg vim kuv thiab vim lub Moo Zoo, 30 uas yuav tsis tau txais ib puas npaug tiam no ntawm vaj tse, kwv tij nkauj muam, niam thiab txiv, me tub me nyuam thiab liaj teb ntxiv, nrog rau kev raug luag hiam, thiab lwm tiam, nws yuav txais txoj sia nyob mus li. 31 Tiam sis coob leej ua luag ntej, yuav tuaj puag tom qab, hos coob leej ua luag qab, yuav tuaj ua ntej.

TIM 25 LUB 5 HLIS 2016

Hnub Plaub Lis Piam Yim Nruab Xyoo C Nruab Lis Piam II

Hwm LN Bede tus Venerable, LN Grogory VII, LN Mary Magdalene de Pazzi

Zaj Nyeem Ib: 1 PZ 1: 18-25

Cov kwv tij zoo nyiad,
18 Nej paub tias, tus txhiv nej ntawm tus yam ntxwv tsis muaj nqes uas nej txais ntawm nej poj yawm txwv koob los, mas nws tsis muab nyiaj tsis muab kub, los muab tej yam txawj ploj los txhiv, 19 nws muab ib co ntshav muaj nqi loj uas yog Yes Xus Pleev, tus yaj huv tsis muaj chaw xyeej tsis tsuas ib tee, cov ntshav los txhiv nej. 20 Tswv Ntuj twb xaiv nws ua ntej ntuj tsim teb raug los lawm, tiam sis nws nyuam qhuav tshwm tawm los rau lub caij kawg no xwb, nws tshwm los vim nej. 21 Yog nyob hauv Leej Pleev, nej thiaj muaj kev ntseeg txog Tswv Ntuj, uas yog tus tsa nws sawv hauv cov tuag rov los thiab muab hwj chim rau nws, kom nej thiaj ntseeg thiab tso siab rau Tswv Ntuj.
22 Vim nej mloog txoj kev tseeb, ces nej thiaj tau ua kom nej lub siab huv tuaj kom nej txawj sib hlub xws li ib co kwv tij, ua li mas nej yuav tsum sib nyiam sib hlub tseeb tiag kom tas nej siab nej ntsws. 23 Nej tsis yog rov yug dua tshiab ntawm ib lub noob txawj lwj los, nej rov yug dua tshiab ntawm ib lub noob tsis txawj lwj los uas yog Tswv Ntuj Lo Lus muaj txoj sia nyob mus li ib txhiab ib txhis. 24 Vim tias, “Tas txhua leej tib neeg zoo li tsob nroj tsuag, nws lub hwj chim zoo li lub paj tawg hauv nruab liaj nruab teb; tsob nroj ntsws, lub paj qhuav paj caws. 25 Tsuas tshuav Huab Tais Lo Lus thiaj nyob tas ib txhiab ib txhis.” Lo Lus ntawd yog lub Moo Zoo uas tau tshaj rau nej lawm.

NPN 147: 12-13, 14-15, 19-20

Txais: (12a) Yes Lus Xas Les, koj cia li cav txog Huab Tais.
Los: As les lus yas.

Yes Lus Xas Les, cia li cav txog Huab Tais lub koob meej,
Xis Yoos, cia li cav txog koj tus Tswv Ntuj,
vim nws tau ua kom koj cov tab ntawm rooj vag khov tuaj lawm,
nws tau foom hmoov zoo rau koj cov me nyuam nyob hauv koj.

Txais: (12a) Yes Lus Xas Les, koj cia li cav txog Huab Tais.
Los: As les lus yas.

Nws pub kev thaj yeeb rau koj hauv koj ciam dej ciam av,
nws pub mov nplej mov mog rau koj noj txaus siab.
Nws txib nws lo lus tuaj rau ntiaj teb,
nws lo lus khiav yeev tam sis ntawd.

Txais: (12a) Yes Lus Xas Les, koj cia li cav txog Huab Tais.
Los: As les lus yas.

Nws tau tshaj nws lo lus rau Yas Kos,
nws cov kev cai thiab lij choj rau His Xas Lais.
Nws tsis tau ua zoo li ntawd rau lwm haiv neeg twg li,
nws tsis tau qhia nws cov lij choj rau lawv paub li.

Txais: (12a) Yes Lus Xas Les, koj cia li cav txog Huab Tais.
Los: As les lus yas.

As Les Lus Yas: MK 10: 45

Txais: As les lus yas, as les lus yas.

Neeg Leej Tub tuaj tsob hwb sawv daws thiab
muab nws txoj sia los ua nqi txhiv coob leej.

Txais: As les lus yas, as les lus yas.

Ntawv Moo Zoo: MK 10: 32-45

32 Yes Xus thiab cov thwj tim taug kev nce mus pem Yes Lus Xas Les. Yes Xus mus ua lawv ntej. Lawv poob siab tas, hos cov neeg raws lawv mus kuj ntshai tas. Yes Xus rov hu Pab Kaum Ob los rau ib cag, ces nws pib hais txog tej yam uas yuav tuaj raug nws li no : 33 "Zaum no peb nce mus pem Yes Lus Xas Les, mas luag yuav muab Neeg Leej Tub rau cov thawj leej choj thiab cov kws Ntawv Ntshiab. Lawv yuav txiav lub txim tuag rau nws, yuav muab nws rau cov neeg teev pej kum dab. 34 Lawv yuav thuam nws, nto aub ncaug rau nws, muab nws nplawm thiab muab nws tua. Peb hnub tom qab, nws yuav sawv rov los."
35 Yas Kos thiab Zam uas yog Ntxes Npes Dais ob tug tub txav los ze nws, nkawd hais rau nws tias : "Xib Hwb, wb xav thov kom koj ua ib yam rau wb." 36 Yes Xus hais rau nkawd tias : "Neb xav kom kuv ua dab tsi rau neb ?" 37 Nkawd hais rau nws tias : "Thov koj pub wb ib tug zaum ntawm koj sab xis, ib tug zaum ntawm koj sab laug nyob hauv koj lub hwj chim." 38 Yes Xus hais rau nkawd tias : "Neb tsis paub neb thov dab tsi. Neb puas haus taus lub ntim uas kuv yuav tsum haus ? Thiab txais taus lub cim ntxuav uas kuv yuav tsum txais ?” 39 Nkawd teb tias : “Wb ua tau.” Yes Xus hais rau nkawd tias : “Lub ntim uas kuv yuav tsum haus, neb kuj yuav haus, thiab lub cim ntxuav uas kuv yuav tsum txais, neb kuj yuav txais. 40 tiam sis qhov yuav zaum ntawm kuv sab xis los sab laug, mas tsis yog kuv yuav muab rau leej twg. Ntuj npaj qhov ntawd rau leej twg, mas yog leej twg tug.” 41 Kaum leej thwj tim hnov li ntawd, lawv tsis txaus siab rau Yas Kos thiab Zam nkawd.
42 Yes Xus hu cov thwj tim los ntawm nws, nws hais rau lawv tias : "Nej paub tias nyob hauv cov neeg coj pej kum dab, mas cov ua thawj coj kav sawv daws nruj xws li ib co tswv, thiab cov loj yuam sawv daws nruj. 43 Nyob hauv nej, mas yuav tsis txhob pub muaj zoo li ntawd : leej twg xav ua tus loj nyob hauv nej, nws yuav ua nej tus tub txib, 44 hos leej twg xav ua tus thawj hauv nej, mas nws yuav ua sawv daws tus qhev. 45 Vim tias Neeg Leej Tub tsis tuaj kom luag tsob hwb nws, tiam sis nws tuaj tsob hwb sawv daws thiab muab nws txoj sia los ua nqi txhiv coob leej."

TIM    26   LUB   5   HLIS    2016

Hnub Tsib Lis Piam Yim Nruab Xyoo C Nruab Lis Piam Xyoo II

Hwm LN  Philip Neri, ua Leej Choj

Zaj Nyeem Ib:     1 PT  2:   2-5, 9-12

2 Xws li tus me nyuam mos yug los tshiab, nej yuav tsum tshaib txog cov kua mis dawb huv yug lub tswv yim, kom nej hlob tuaj nyob hauv txoj kev txais kev cawm, 3 vim zaum no nej tau saj tias Huab Tais siab zoo npaum li cas lawm. 4 Nej kav tsij txav los ze Huab Tais uas yog lub pob zeb muaj txoj sia; zeej tsoom muab xyeeb pov tseg, tab sis Tswv Ntuj xaiv nws, thiab saib nws muaj nqi kawg li. 5 Nej yuav tsum zoo li ib co pob zeb muaj sia, cia Ntuj siv nej los txhim ib lub Tuam Tsev rau sab ntsuj plig kom nej tsa txoj cai ua Leej Choj ntshiab uas yuav cev ib co txim ntshiab kom xis Tswv Ntuj lub siab nyob hauv Yes Xus Pleev.
9 Nej yog tsav neeg Ntuj xaiv, yog tsoom Leej Choj ua vaj, yog haiv neeg ntshiab, yog tsoom neeg Ntuj qee, kom nej tau tshaj cov lus cav txog tus hu nej ntawm qhov tsaus ntuj los nyob hauv nws qhov pom kev zoo saib. 10 Vim tias thaud, nej tsis yog ib haiv neeg, hos nyem no, nej yog Tswv Ntuj haiv neeg.  Thaud, nej tsis tau txais Ntuj txoj kev khuv leej, nyem no, nej tau Ntuj txoj kev khuv leej.  
11 Cov hmov tshua, kuv xav ntuas nej tias nej yog ib co neeg tuaj mus tawm rooj ua qhua xwb, mas nej txhob mloog nej lub cev tej kev ntshaw, vim lub cev ua rog tua tus ntsuj plig xwb. 12 Nej yuav coj ib tug cwj pwm kom zoo nyob hauv nruab nrab cov neeg teev pej kum dab, kom yog lawv liam tias nej yog ib co neeg ua phem, mas lawv yuav tsum lees pom nej tej hauj lwm zoo thiab cav txog Tswv Ntuj thaum txog hnub uas Tswv Ntuj tuaj txiav txim.

NPN:    100:  1-2, 3, 4, 5

Txais:   (2c) Nej cia li zoo siab chaws los ntawm Huab Tais xub ntiag.  

Tas lub ntiaj teb, nej zoo siab hu nkauj rau HUAB TAIS !
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag !

Txais:   (2c) Nej cia li zoo siab chaws los ntawm Huab Tais xub ntiag.

Nej cia li lees tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog pab yaj nws saib.

Txais:   (2c) Nej cia li zoo siab chaws los ntawm Huab Tais xub ntiag.

Nej chaws mus hauv nws cov rooj loog, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais:   (2c) Nej cia li zoo siab chaws los ntawm Huab Tais xub ntiag.

HUAB TAIS muaj lub siab zoo :
nws hlub peb mus li,
nws ua ncaj rau peb txheej dhau txheej.

Txais:   (2c) Nej cia li zoo siab chaws los ntawm Huab Tais xub ntiag.

As Les Lus Yas:     JN  8:  12

Txais: As les lus yas, as les lus yas.

Huab Tais hais tias, kuv yog ntiaj teb neeg qhov pom kev,
leej twg los raws kuv yuav tau kev pom kev hauv nws lub neej.

R. Alleluia, alleluia.

Ntawv Moo Zoo:     MK  10:  46-52

46 Lawv tuaj txog Yes Lis Kos, ces thaum Yes Xus nrog cov thwj tim thiab ib pab neeg coob tawm hauv mus, muaj ib tug neeg dig muag hu ua Npas Tis Mes, uas yog Tis Mes tub, zaum thov khawv ntawm ntug kev.  47 Thaum nws hnov tias yog Yes Xus Nas Xas Les tuaj, nws pib qw nrov nrov tias : "Yes Xus, Das Vis Leej Tub, thov koj khuv leej kuv !"
48 Muaj ntau leej cem nws kom ua twj ywm, tab sis nws haj yam qw nrov tias : "Das Vis Leej Tub, thov koj khuv leej kuv!" 49 Yes Xus nres, nws hais tias : "Nej hu nws los." Ces lawv hu tus dig muag tias : "Koj tso siab ! Koj sawv mus. Yes Xus hu koj." 50 Ces tus dig muag pov rhees nws lub tsho ntev cia, nws sawv tsees dhia mus cuag Yes Xus. 51 Yes Xus nug nws tias : "Koj xav kom kuv ua dab tsi rau koj ?" Tus dig muag teb tias : "Xib Hwb, kuv xav rov pom kev tuaj!" 52 Yes Xus hais rau nws tias : "Koj mus , koj lub siab ntseeg cawm koj lawm." Tam sis ntawd, tus dig muag rov pom kev tuaj, ces nws taug kev lawv Yes Xus qab.

TIM 27 LUB 5 HLIS 2016

Hnub Rau Lis Piam Yim Nruab Xoo C Nruab Lis Piam Xyoo II

Hnub hwm LN Augustine nyob Canterbury

Zaj Nyeem Ib: 1 PZ 4: 7-13

7 Lub caij uas tas txhua yam yuav kawg los txog ze lawm. Li ntawd, nej yuav tsum ua neeg xav tswv yim tob thiab tsis muab hlob, kom nej thiaj xav teev Ntuj. 8 Qhov loj tshaj yog nej yuav tsum kub siab sib nyiam sib hlub zoo, vim txoj kev nyiam kho tau ntau yam kev txhaum. 9 Nej ib leeg yuav xyiv fab txais ib leeg zoo tsis txhob nroo. 10 Nej ib leeg tau txais ib lub txiaj ntsim, yog li nej yuav ua ib co tub txib zoo uas txawj siv Tswv Ntuj cov txiaj ntsim sib txawv ntawd los kom tau ib leeg tsob hw bib leeg. 11 Tus txawj hais lus ntuas, nws yuav tsum ntuas raws Tswv Ntuj cov lus; tus nyiam pab luag, nws yuav siv lub zog Tswv Ntuj muab rau nws los pab luag, kom xwv txhua yam hauj lwm yuav ua kom Tswv Ntuj nto koob meej nyob hauv Yes Xus Pleev, tus muaj lub koob meej thiab lub hwj huam mus tiam dhau tiam. Ua li.
12 Cov zoo nyiad, nej txhob poob siab tias nej raug ib txog kev sim siab nyob hauv hluav taws, xws li yog ib yam txawv txav uas nej tsis to taub tuaj raug nej. 13 Txawm nej tau nrog Leej Pleev raug txom nyem loj npaum li cas los nej yuav tsum zoo siab xwb; vim thaum nws lub hwj chim yuav tawm los rau nej pom xyeem, mas nej haj yam yuav muaj kev zoo siab loj ntxiv xwb.

NPN 96: 10, 11-12, 13

Txais: (13b) Huab Tais tuaj txiav txim rau lub ntiaj teb.

Hais rau txhua haiv neeg tias: HUAB TAIS yog vaj ntxwv;
Nws tau tsim lub ntiaj teb kom nyob ruaj nreb, kom muab tshem tsis tau.
Nws tswj tsoom pej xeem raws kev ncaj ncees.

Txais: (13b) Huab Tais tuaj txiav txim rau lub ntiaj teb.

Kom lub ntuj zoo siab, lub ntiaj teb hom khaj;
kom dej hiav txwv thiab txhua yam nyob hauv tsa suab nrov nrov;
kom cov tiaj nras thiab txhua yam nyob hauv luag ntxhi!
Thiab kom txhua tus ntoo hauv hav zoov co zoo siab.

Txais: (13b) Huab Tais tuaj txiav txim rau lub ntiaj teb.

Kom lawv zoo siab ntawm HUAB TAIS xub ntiag,
vim nws tuaj txog lawm, nws tuaj kav lub ntiaj teb.
Nws yuav tswj lub ntiaj teb raws kev ncaj ncees,
thiab cov haiv neeg raws kev pheej xeeb.

Txais: (13b) Huab Tais tuaj txiav txim rau lub ntiaj teb.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias, kuv xaiv nej hauv ntiaj teb neeg los,
kom nej mus txi ib co txiv uas yuav nyob ruaj.

Txais: As les lus yas, as les lus yas..

Ntawv Moo Zoo: MK 11: 11-26

11 Yes Xus mus hauv Yes Lus Xas Les, nws chaws mus hauv lub Tuam Tsev Teev Ntuj, nws ntsia txhua yam nyob ib ncig nws. Thaum ntawd twb lig lawm ces nws tawm nrog Pab Kaum Ob leeg mus rau Npes Tas Nias. 12 Hnub tom qab, thaum lawv tawm hauv Npes Tas Nias mus, Yes Xus tshaib plab. 13 Nws tuaj deb pom ib tsob txiv ncuav pias muaj nplooj, nws mus xyuas saib puas muaj dab tsi. Tab sis thaum nws mus txog ze, nws nrhiav tsis muaj dab tsi tsuas muaj nplooj xwb, vim tsis yog lub caij txi txiv. 14 Yes Xus hais rau tsob txiv ncuav pias tias : "Txij no mus, kom txhob muaj neeg noj koj tej txiv ib zaug ntxiv li !" Cov thwj tim hnov Yes Xus hais li ntawd.
15 Thaum lawv tuaj txog Yes Lus Xas Les, Yes Xus chaws mus hauv lub Tuam Tsev Teev Ntuj, nws pib ntiab cov neeg tuaj muag thiab cov tuaj yuav toob xib nyob hauv. Nws ntxeev cov tub pauv nyiaj tej rooj, thiab cov muag nquab tej tog zaum. 16 Nws tsis kheev leej twg nqa toob xib hla hauv lub Tuam Tsev. 17 Yes Xus qhia lawv, nws hais rau lawv tias : "Puas yog ntawv tau sau tseg tias : ‘Kuv lub tsev yuav hu ua tsev cia rau ib tsoom haiv neeg teev ntuj?’ Tab sis, nej muab ua tub sab lub qhov nkaum !" 18 Cov thawj leej choj thiab cov kws Ntawv Ntshiab hnov, ces lawv nrhiav saib yuav ua cas muab Yes Xus tua. Tab sis lawv kuj ntshai nws thiab, vim tas tsoom pej xeem zoo siab rau Yes Xus cov lus qhia. 19 Thaum tsaus ntuj, Yes Xus tawm hauv nroog mus sab nraud .
20 Tag kis sawv ntxov, lawv hla mus, lawv pom tsob txiv ncuav pias qhuav ti nkaus cag. 21 Pob Zeb nco dheev txog, nws hais rau Yes Xus tias : "Xib Hwb, koj saib : tsob txiv ncuav pias uas koj tsawm qhuav tas lawm." 22 Yes Xus teb tias : "Nej ntseeg Tswv Ntuj mog. 23 Kuv hais tseeb rau nej, yog leej twg hais rau lub roob no tias : "Koj txav, koj dhia lawm hauv dej ntuj," yog tias tus ntawd tsis ua xyem xyav hauv siab li, thiab nws ntseeg tias qhov nws hais yuav tshwm sim tiag, mas qhov ntawd yuav tsheej xeeb rau nws tau. 24 Vim li ntawd, kuv thiaj hais rau nej tias : tas puas tsav yam uas thaum nej teev Ntuj nej thov, nej cia li ntseeg tias nej twb tau txais lawm, ces Ntuj yuav pub yam ntawd rau nej. 25 Thiab thaum nej tab tom sawv ntsug teev Ntuj, yog nej muaj ib lo lus tsis txaus siab rau ib tug, mas nej zam rau nws, kom xwv nej Txiv nyob saum ntuj zam nej cov txhaum rau nej thiab.”

TIM 28 LUB 5 HLIS 2016

Hnub Xya Lis Piam Yim Nruab Xyoo C Nruab Lis Piam II

Hwm Niam Mab Liab

Zaj Nyeem Ib: YUS DAS 17, 20B-25

Nej uas yog kuv cov phooj ywg zoo nyiam, nej yuav tsum nco ntsoov txog txhua yam peb tus Huab Tais Yes Xus Pleev cov Hauv Paus Xa Lus tau xub hais qhia rau nej lawm.
20 Nej yeej meem siv nej txoj kev ntseeg ntshiab los txhim kho nej tus kheej kom tsuas zoo tuaj, nej thov Leej Ntuj Plig Ntshiab pab. 21 Nej nyob ruaj nreb hauv Tswv Ntuj txoj kev nyiam thiab nej tos ntsoov peb tus Huab Tais Yes Xus Pleev txoj kev khuv leej neeg uas yuav pub txoj sia nyob mus li rau nej. 22 Yog muaj cov neeg ua xyem xyav, nej khuv leej lawv; 23 yog muaj cov raug hluav taws kub, nej rub lawv tawm; tseem muaj lwm cov neeg, nej ib txhij yuav hlub lawv thiab yuav ntshai lawv; nej yuav ntshai chwv lawv cev ris tsho uas lawv lub cev tau ua qias rau lawm.
24 Thov kom tus uas muaj lub hwj huam txuag nej kom nej txhob ntog thiab coj nej yog ib co neeg dawb huv nyob luag ntxhi los sawv rau ntawm nws lub xub ntiag muaj hwj chim, 25 kom tus Tswv Ntuj, tsuas muaj tib tug Tswv Ntuj, Tus cawm peb nyob hauv peb tus Huab Tais Yes Xus Pleev, thov kom nws muaj lub koob meej , muaj lub hwj xyeej, muaj txoj kev tswj fwm thiab txoj kev muaj hwj huam ua nws tug mus li, txij puag hnub txheej thaum ub los txog zwj ceeb no mus txog txhiab niag tim puas xyoo. Ua li.

NPN 63: 2, 3-4, 5-6

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Tswv Ntuj, koj yog kuv tus Tswv Ntuj, kuv nrhiav koj ;
kuv tus plig nqhis txog koj, kuv lub cev seev txog koj
zoo puav tam li av qhuav qhawv, nkig nkuav, tsis tau dej.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Kuv mus ntsia saib koj nyob hauv lub tuam tsev,
kuv pom koj lub zog thiab koj lub hwj chim.
Koj txoj kev hlub muaj nqis dua txoj sia,
kuv di ncauj yuav cav lus zoo txog koj.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

Kuv yuav cav txog koj tas kuv sim neej,
kuv yuav tsa tes thov ntuj nyob hauv koj lub npe.
Kuv tus ntsuj plig yuav txaus siab hlo li tus tau noj nqaig noj hno,
kuv di ncauj yuav zoo siab, kuv lub ncauj yuav qhuas txog koj.

Txais: (2b) Huab Tais kuv tus Tswv Ntuj, kuv tus ntsuj plig nqhis txog koj.

As Les Lus Yas: KLX 3: 16A, 17C

Txais: As les lus yas, as les lus yas.

Thov kom Leej Pleev Lo Lus nyob txawm hauv nej nplua mias.
Nej ua Leej Txiv Tswv Ntuj tsaug nyob hauv nws.

Txais: As les lus yas, as les lus yas.

Ntawv Moo Zoo: MK 11: 27-33

27 Yes Xus thiab nws cov thwj tim rov qab los hauv Yes Lus Xas Les dua. Thaum Yes Xus mus mus los los hauv lub Tuam Tsev Teev Ntuj, cov thawj leej choj, cov kws Ntawv Ntshiab thiab cov txwj laus tuaj cuag nws. 28 Lawv hais rau nws tias : "Koj tau cai qhov twg los ua tej ntawd ? Leej twg muab cai rau koj ua tej ntawd?" 29 Yes Xus teb rau lawv tias : "Kuv kuj yuav nug nej ib lo thiab. Nej teb kuv, kuv mam li qhia nej tias kuv tau cai ntawm leej twg los ua tej ntawd. 30 Zam lub cim ntxuav puas tuaj ntawm Ntuj tuaj los ntawm neeg tuaj ? Nej teb kuv saib." 31 Ces lawv sib tham tias : "Yog peb hais tias : 'Tuaj ntawm Ntuj tuaj,' nws yuav hais tias : 'Ua cas nej tsis ntseeg txog nws ?' 32 Yog peb hais tias : Tuaj ntawm neeg tuaj ? Lawv kuj ntshai tsoom sid, vim tas sawv daws saib Zam yog ib tug yaj saub tiag. 33 Ces lawv teb li no rau Yes Xus : "Peb tsis paub." Yes Xus hais rau lawv tias : "Kuv kuj yuav tsis qhia nej tias kuv tau cai ntawm leej twg los ua tej ntawd thiab."

TIM 30 LUB 5 HLIS 2016

Hnub Ob Lis Piam Cuaj Nruab Xyoo C Nruab Lis Piam II

Zaj Nyeem Ib: 2 PZ 1: 2-7

2 Thov kom nej tau txais txiaj ntsim thiab kev thaj yeeb ntau nyob hauv txoj kev paub Tswv Ntuj thiab paub peb tus Huab Tais Yes Xus. 3 Tswv Ntuj lub hwj huam tau pub tas ib puas tsav yam qhia txog txoj sia thiab qhia txog kev hwm Ntuj rau peb nyob hauv peb txoj kev paub txog tus tau siv nws lub hwj chim thiab nws lub siab zoo los hu peb. 4 Vim nws lub hwj chim thiab lub siab zoo ntawd mas peb tau txais ib co kev cog lus muaj nqes thiab tseem ceeb heev uas ua tau kom peb dim ntawm txoj kev lwj kev phem uas muaj nyob hauv ntiaj teb no vim txoj kev siab phem thiab kev ntshaw. 5 Vim qhov no mas nej yuav tsum siv zog xyaum coj zoo vim nej muaj kev ntseeg, xyaum ua neeg paub tab vim nej coj zoo, 6 xyaum tswj tau nej tus kheej vim nej paub tab, xyaum nyiaj kom dhau kev nyuaj vim nej tswj tau nej tus kheej, xyaum ua neeg hwm Ntuj vim nej txawj nyiaj dhau kev nyuaj, 7 xyaum sib hwm vim nej muaj kev hwm Ntuj, thiab xyaum sib nyiam sib hlub vim nej muaj kev sib hwm.

NPN 91: 1-2, 14-15B, 15C-16

Txais: (2b) Kuv tus Tswv Ntuj, kuv tso siab rau koj.

Tus tsa tsev rau hauv tus Nyob Siab lub chaw nkaum,
Tus nyob hauv tus Muaj Hwj Huam qhov ntxoov.
Koj hais rau HUAB TAIS tias: kuv qhov chaw nkaum, kuv lub yeej ntsa zeb,
kuv tus Tswv Ntuj, kuv tso siab rau koj."

Txais: (2b) Koj yog kuv tus Tswv Ntuj, kuv tso siab rau koj.

Vim nws npuab kuv, kuv yuav cawm nws dim.
Kuv yuav tso nws rau qhov siab, vim nws paub kuv lub npe.
Yog nws hu txog kuv, kuv yuav teb nws,
thaum nws txom nyem, kuv yuav nrog nws nyob.

Txais: (2b) Koj yog kuv tus Tswv Ntuj, kuv tso siab rau koj.

Kuv yuav cawm nws dim, kuv yuav ua kom nws nto koob meej.
Kuv yuav pub nws ua neej nyob ntev xyoo kom txaus nws siab,
kuv yuav cia nws pom kuv txoj kev cawm neeg.

Txais: (2b) Koj yog kuv tus Tswv Ntuj, kuv tso siab rau koj.

As Les Lus Yas: QYTN 1: 5ab

Txais: As les lus yas, as les lus yas.

Yes Xus Pleev, koj yog tus Tim Khawv pheej xeeb,
tus xub yug hauv cov tub tuag los,
Koj tau hlub peb, muab koj cov ntshav los ntxuav peb ntawm peb cov txhaum.

Txais: As les lus yas, as les lus yas.

Ntawv Moo Zoo: MK 12: 1-12

1 Yes Xus pib hais tej zaj paj lug li no : "Muaj ib tug neeg cog tau ib daim teb txiv cawv. Nws xov laj kab ncig, nws txaug ib lub zeb tsuam cawv, thiab nws txhim ib lub lawj siab siab. Nws ntiav ib co tub zog saib, ces nws tawm rooj mus ua qhua deb. 2 Thaum txog caij, nws xa ib tug tub txib mus cuag cov tub zog, kom lawv muab ib feem ntawm cov txiv cawv rau nws. 3 Tab sis lawv nthos nkaus nws, muab nws ntaus tas, kom nws rov qab mus tes dawb tes npliag. 4 Tus tswv teb xa dua ib tug tub txib mus : cov tub zog kuj ntaus nws taub hau thiab ua phem kawg rau nws. 5 Tus tswv teb rov xa dua ib tug mus , cov tub zog muab tus tub txib ntawd tua. Lawv kuj ua ib yam li ntawd rau ntau tus tub txib ntxiv, lawv muab ib co ntaus, muab ib co tua. 6 Tus tswv teb tseem tshuav ib tug neeg ntxiv, yog nws tus tub uas nws nyiam. Nws xa nws tus tub mus tom qab, nws xav tias : "Lawv yuav hwm kuv tus tub." 7 Tab sis, cov tub zog sib tham tias : "Tus ntawd yog tus yuav txais lub cuab tam. Tsuag tsuag ! Peb muab nws tua, lub cuab tam thiaj yuav yog peb tug." 8 Ces lawv nthos nkaus nws, muab nws tua thiab coj nws mus pov tseg rau tom ntug teb. 9 Tus tswv teb ntawd yuav ua dab tsi ? Nws yuav tuaj muab cov zov teb tua, thiab yuav muab daim teb txiv cawv pub rau lwm cov neeg. 10 Nej tsis tau nyeem cov lus no hauv Ntawv lod? “Lub pob zeb uas cov tub txhim tsev muab pov tseg, hloov ua lub pob zeb txheem tsev. 11 Qhov ntawd, Huab Tais yog tus ua kom muaj, yog ib yam peb saib tias zoo kawg nkaus." 12 Lawv to taub tias Yes Xus zaj paj lug no tsom lawv hais. Lawv nrhiav kev ntes Yes Xus, tab sis lawv ntshai tsoom sid. Ces lawv tso Yes Xus tseg, lawv rov mus.

TIM 31 LUB 5 HLIS 2016

Hnub Peb Lis Piam Cuaj Nruab Xyoo C Nruab Lis Piam II

Hwm Niam Mab Liab mus saib Es Lis Xas Npes

Zaj Nyeem Ib: XFN 3:14-18A

14 Leej me ntxhais Xis Yoos, koj cia li nqua suab qw zoo siab ! Tsoom His Xas Lais, nej cia li hu nkauj luag ntxhi ! Me ntxhais Yes Lus Xas Les, koj lub siab cia li zoo siab tas nrho dhia hom khaj ! 15 HUAB TAIS tau thim nws cov lus txiav txim rau koj lawm. Nws tau caum koj cov yeeb ncuab khiav mus tas. HUAB TAIS , His Xas Lais tus vaj nws nyob nruab nrab hauv koj, koj yuav tsis ntshai kev phem dab tsi ntxiv. 16 Hnub ntawd, Yes Lus Xas Les yuav hnov cov lus no tias: “Xis Yoos, koj txhob ntshai, txhob ntaus siab me ! 17 HUAB TAIS koj tus Tswv Ntuj nyob nruab nrab hauv koj ! Nws yog tus muaj hwj huam cawm koj. Nws zoo siab tas nrho vim muaj koj. Nws kev hlub ua kom koj rov tshiab tuaj. Nws hu nkauj dhia zoo siab yog vim koj, 18 xws li thaum neeg hu nkauj ua koob tsheej zoo siab.”

Los: LOS MAS 12:9-16

9 Nej tsis txhob ua txuj lam nyiam luag xwb. Nej yuav nyiam qhov zoo tuag nthi ntxub qhov phem. 10 Nej yuav sib hlub xws li nej yog ib co kwv tij txheeb tiag. Nej ib leeg yuav saib ib leeg muaj nqes. 11 Nej yuav siv zog rau siab ua hauj lwmtsob hwb Huab Tais, txhob ua neeg nkees, thiab yuav siv tas nej lub tswv yim. 12 Nej yuav xyiv fab nyob hauv txoj kev tso siab rau Ntuj, nej yuav ua siab ntev ris kev txom nyem, nej yuav nquag teev Ntuj tsis tseg li. 13 Nej yuav muab kev pab rau cov ntshiab. Nej yuav xyiv fab txais cov qhua tuaj hauv nej. 14 Nej yuav foom lus zoo rau cov neeg hiam nej, foom lus zoo xwb, txhob foom lus phem. 15 Nej yuav zoo siab nrog cov neeg muaj kev zoo siab, nej yuav quaj nrog cov neeg tau kev quaj ntsuag. 16 Nej yuav ua siab zoo rau sawv daws ib yam nkaus; nej tsis txhob ua neeg muab hlob, tiam sis yuav saib taus cov neeg me nrog lawv ua taus phooj ywg; txhob rov saib nej zoo dua luag tej.

NPN HIS XAIS 12: 2-3, 4BCD, 5-6

Txais: (6) His Xas Lais tus loj thiab tus Ntshiab tuaj nyob hauv nej lawm.

Tswv Ntuj yog tus cawm kuv,
Kuv tso siab rau nws, kuv tsis txhawj.
Kuv lub zog thiab kuv lub peev xwm yog HUAB TAIS,
Nws yog tus cawm kuv.
Nej yuav zoo siab luag ntxhi mus ce dej
Hauv lub qhov dej muaj kev cawm neeg."

Txais: (6) His Xas Lais tus loj thiab tus Ntshiab tuaj nyob hauv nej lawm.

Nej ua HUAB TAIS tsaug, nej cav txog nws lub npe;
Nej tshaj nws tej hauj lwm loj rau cov haiv neeg paub,
Nej qhia rau lawv tias nws lub npe zoo tas nrho.

Txais: (6) His Xas Lais tus loj thiab tus Ntshiab tuaj nyob hauv nej lawm.

Nej hu nkauj qhuas HUAB TAIS txog nws tej hauj lwm muaj hwj chim,
Coj mus qhia rau tas ntiaj teb paub kom thoob .
Nroog Xis Yoos, koj tsa suab qw zoo siab,
vim His Xas Lais tus loj thiab tus Ntshiab tuaj nyob hauv nej lawm!

Txais: (6) His Xas Lais tus loj thiab tus Ntshiab tuaj nyob hauv nej lawm.

As Les Lus Yas: LK 1: 45

Txais: As les lus yas, as l;es lus yas.

Koj tau hmoov zoo, nkauj tsim txiaj Mab Liab, vim koj ntseeg
tias yuav muaj tuaj raws Huab Tais hais rau koj.

Txais: As les lus yas, as les lus yas.

Ntawv Moo Zoo: LK 1: 39-56

39 Mab Liab sawv kev mus, nws rau siab ntso maj nroos mus pem toj siab, mus rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !" 46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws dauv muag ntsia nws tus ntxhais txib tsis muaj tsim. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab hlub cov neeg hwm nws tiam dhau tiam. 51 Nws tau xyab nws txhais npab muaj zog , ua kom cov neeg uas lub siab muab hlob tawg tas. 52 Huab Tais nchuav cov muaj hwj chim poob ntawm lawv lub theej kiab, hos nws tsa cov neeg hauv txheej qis kom siab. 53 Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav qhawv. 54 Huab Tais tuaj pab nws tus tub txib His Xas Lais, vim nws nco ntsoov tias nws khuv leej neeg, 55 raws lo lus nws tau cog rau peb cov yawg koob, rau Has Nplas Has thiab Has Nplas Has tsoom xeeb leej xeeb ntxwv mus ib txhiab ib txhis."
56 Mab Liab nrog Es Lis Xas Npes nyob peb lub hlis tej, ces nws rov mus tsev.

TIM    1   LUB   6   HLI    2016

Hnub Plaub Lis Piam Cuaj Nruab Xyoo C Nruab Lis Piam II

Hwm LN Justin, ua Tim Khawv

Zaj Nyeem Ib:      2 TM  1:  1-3, 6-12

1 Kuv, Paj Lug, uas yog Yes Xus Pleev ib tug Hauv Paus Xa Lus, vim Tswv Ntuj pom zoo li ntawd, kom tau tshaj txog tias Tswv Ntuj cog lus yuav pub txoj sia nyob hauv Yes Xus Pleev.  2 Kuv sau ntawv tuaj rau Tis Mos Tes, kuv leej tub zoo nyiam. Thov kom koj tau txais txiaj ntsim, kev khuv leej, thiab kev thaj yeeb tuaj ntawm Leej Txiv Tswv Ntuj, thiab peb tus Huab Tais Yes Xus Pleev tuaj. 3 Kuv ua Tswv Ntuj tsaug, tus Tswv Ntuj uas kuv muab ib lub siab dawb paug los teev hawm raws li kuv cov yawg koob tau ua los, vim kuv nco txog koj tas mus li hauv kuv zaj teev ntuj, nruab hnub hmo ntuj.

6 Yog vim li ntawd, kuv rov txhib koj kom koj nco ntsoov thob kom lub txiaj ntsim uas Tswv Ntuj tso rau hauv koj hnub kuv tiag tes rau saum koj kom nws cig nplaim tuaj. 7 Vim Tswv Ntuj tsis pub ib lub tswv yim ntshai ntshai rau peb, tiam sis nws pub ib lub tswv yim muaj peev xwm, muaj kev nyiam, thiab txawj tswj tus kheej rau peb. 8 Koj tsis txhob txaj muag ua tim khawv zeem peb tus Huab Tais, txhob txaj muag zeem kuv uas yog ib tug neeg raug kaw vim nws. Koj yuav zoo siab siv lub zog tuaj ntawm Tswv Ntuj tuaj nrog kuv ris kev txom nyem vim lub Moo Zoo. 9 Nws cawm peb thiab hu peb kom coj ib lub neej ntshiab dawb huv, tsis yog vim peb cov dej num tiam sis yog vim nws pom zoo thiab vim lub txiaj ntsim nws pub rau peb txij puag hnub txheej thaum ntxov ub nyob hauv Yes Xus Pleev lawm. 10 Nyiam no, lub txiaj ntsim ntawd tawm tuaj thaum Yes Xus Pleev tus cawm peb tawm tuaj. Nws rhuav txoj kev tuag, thiab nws lub Moo Zoo qhia kom peb paub txog txoj sia thiab txoj kev yuav nyob mus li. 11 Ntuj tau tsa kuv ua tus kws qhuab qhia thiab ua Hauv Paus Xa Lus thiab ua xib hwb tshaj lub Moo Zoo ntawd. 12 Yog vim qhov ntawd, kuv thiaj tau nyiaj kev raug txom nyem. Tab sis kuv tsis txaj muag, vim kuv paub tus uas kuv ntseeg thiab kuv tso siab tias nws muaj peev xwm yuav txuag tau qhov nws muab rau kuv ceev tseg mus txog lub hnub nyoog ntawd.

NPN       123:  1B-2AB, 2CDEF

Txais:  (1b) Huab Tais, kuv tsa muag ntsia ntsoov koj.  

Kuv tsa muag ntsia ntsoov koj tus zaum
saum lub theej kiab saum ntuj,
zoo puav tam li cov tub txib tsa muag
ntsia lawv tus tswv txhais tes.

Txais:  (1b) Huab Tais, kuv tsa muag ntsia ntsoov koj

Zoo puav tam li ib tug ntxhais txib
tsa muag ntsia ntsoov nws tus niam tsev txhais tes,
peb qhov muag kuj ntsia ntsoov HUAB TAIS
peb tus tswv Ntuj  mus txog thaum nws khuv leej peb.

Txais:  (1b) Huab Tais, kuv tsa muag ntsia ntsoov koj

As Les Lus Yas:     JN  11:  25A, 26

Txais:    As les lus yas, as les lus yas.

Huab Tais hais tias, kuv yog txoj kev sawv rov los thiab txoj sia,
leej twg ntseeg txog kuv yuav tsis txawj tuag li.    

Txais:    As les lus yas, as les lus yas.

Ntawv Moo Zoo:     MK  12:   18-27

18 Ib co xas dus kais uas hais tias neeg tuag yuav tsis sawv rov los, lawv tuaj cuag Yes Xus, lawv nug nws tias : 19 "Xib Hwb, Mais Xes sau cia rau peb tias : "Yog leej twg ib tug kwv tij tuag tseg poj niam cia, tsis tau muaj me nyuam, mas tus kwv yuav tsum qaws tus niam tij kom tsa tau tus kwv tij ntawd lub keeb sawv." 20 Muaj xya leej kwv tij. Thawj tug yuav poj niam, nws tuag, tsis tau muaj tub ki. 21 Tus ob qaws tus niam tij ntawd, nws kuj tuag tsis tau muaj tub ki ; tus peb kuj tuag ib yam li ntawd. 22 Xya leej kwv tij ntawd yeej tsis muaj tub ki li. Thaum lawv tuag tas lawm, tus poj niam kuj tuag thiab. 23 Thaum txog caij neeg lub cev sawv rov los, lawv kuj yuav sawv rov los, mas tus poj niam ntawd yuav yog leej twg tus ? Vim lawv xya tus kwv tij puav leej tau yuav nws ua lawv poj niam." 24 Yes Xus hais rau lawv tias : "Puas yog vim nej tsis paub Ntawv Ntshiab thiab tsis paub Tswv Ntuj lub hwj huam, nej thiaj yuam kev ? 25 Vim tias, thaum neeg lub cev yuav sawv hauv cov tuag los, sawv daws yuav tsis yuav poj niam, tsis yuav txiv, sawv daws yuav zoo li cov Tshiab nyob saum ntuj lawm xwb. 26 Hais txog cov tuag kev sawv rov los, nej puas tau nyeem Mais Xes phau Ntawv, zaj hais txog tsob me nyuam ntoo  uas Tswv Ntuj hais rau Mais Xes tias : Kuv yog Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj. 27 Tswv Ntuj tsis yog cov tuag tus Tswv Ntuj,  nws yog cov neeg ciaj tus Tswv Ntuj. Nej yuam kev lawm deb."

TIM 2 LUB 6 HLI 2016

Hnub Tsib Lis Piam Cuaj Nruab Xyoo C Nruab Lis Piam II

Hwm LN Marcellinus thiab LN Pob Zeb

Zaj Nyeem Ib: 2 TMT 2: 8-15

8 Koj nco ntsoov txog Yes Xus Pleev, uas nws sawv hauv cov tub tuag rov los, nws yog Das Vis ib tug xeeb ntxwv: qhov no yog lub Moo Zoo kuv qhia. 9 Vim lub Moo Zoo ntawd, kuv thiaj raug txom nyem thiab raug saw hlau xauv kuv xws li ib tug neeg phem. Tab sis Tswv Ntuj lo lus tsis raug saw hlau xauv. 10 Kuv thiaj ua siab ntev nyiaj txhua yam pab cov neeg Ntuj tau xaiv, kom lawv tau txais kev cawm, thiab txais lub hwj chim nyob mus li nyob hauv Yes Xus Pleev. 11 Lo lus no, yog ib lo lus tseeb :
“Yog peb nrog nws tuag, mas peb kuj yuav nrog nws muaj txoj sia. 12 Yog peb ntseeg ruaj nreb tsis thim, mas peb kuj yuav nrog nws ua vaj. Yog peb tsis lees nws, mas nws kuj yuav tsis lees peb. 13 Yog peb tsis npuab nws, los nws tseem npuab peb, vim nws yuav rov tsis lees nws tsis tau.”
14 Koj yuav rov hais txhua yam no huv tib si rau sawv daws. Koj ua pov thawj zeem tseeb nyob ntawm Tswv Ntuj xub ntiag, tias yuav tsum tseg tsis txhob muab tej lus los ua chaw sib cav ntev ntev. Vim sib cav tsis zoo dab tsi, tsuas ua kom cov neeg nyiam mloog lus hloov mus ua qhov phem xwb. 15 Koj muab siab rau ua kom Tswv Ntuj saib koj xws li yog ib tug neeg siab ruaj nrej hla dhau tej kev sim siab tas, xws li ib tug neeg tsis muaj chaw txaj muag nyob hauv nws lub neej tes dej num, thiab xws li ib tug neeg uas qhia tau qhov tseeb tsis muaj yuam kev.

NPN 25: 4-5AB, 8-9, 10 + 14

Txais: (4) Huab Tais, thov qhia koj tej kev rau kuv paub.

HUAB TAIS, ua kom kuv paub koj tej kev,
qhia koj tej kev rau kuv kawm.
Coj kuv mus taug koj txoj kev tseeb, thov qhia rau kuv kawm,
vim koj yog Tswv Ntuj tus cawm kuv.

Txais…

HUAB TAIS yog txoj kev siab zoo thiab siab ncaj,
nws qhia cov neeg txhaum rov los taug txoj kev zoo.
nws coj cov neeg me mus rau txoj kev ncaj,
nws qhia nws txoj kev rau cov neeg me kawm.

Txais…

Tas HUAB TAIS tej kev yog kev hlub thiab kev ua ncaj
rau cov neeg coj raws nraim li nws tau cog lus thiab nws txoj cai.
Cov neeg hwm HUAB TAIS xwb thiaj paub nws lub siab,
thiab lawv thiaj to taub txog nws txoj kev cog lus.

Txais…

As Les Lus Yas: 2 TM 1: 10

Txais: As les lus yas, as les lus yas.

Peb tus cawm seej Yes Xus Pleev tau rhuav txoj kev tuag,
thiab nws lub Moo Zoo tau qhia kom peb paub txog txoj sia.

Txais: As les lus yas, as les lus yas.

Ntawv Moo Zoo: MK 12: 28-34

28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, nws txav los nug Yes Xus tias : "Nyob hauv cov lus qhia tas huv tib si, lo lus qhia twg yog thawj lo lus qhia ?" 29 Yes Xus teb rau nws tias : "Thawj lo lus qhia yog lo lus no : ‘His Xas Lais, koj mloog mog ! Peb tus Huab Tais Tswv Ntuj tib leeg xwb yog Huab Tais. 30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog.’ 31 Lo lus qhia ob yog lo lus no : Koj yuav nyiam tus nyob ze koj ib yam li koj nyiam koj. Tsis muaj lwm lo lus qhia loj dua ob lo lus no." 32 Tus kws Ntawv Ntshiab hais rau Yes Xus tias : "Koj hais raug kawg, Xib Hwb, koj hais qhov tseeb, qhov tias: tsuas muaj ib tug Huab Tais Tswv Ntuj xwb, tsis muaj dua lwm tus dhau ntawm nws lawm, 33 thiab kom nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab kom nyiam tus nyob ze yus ib yam li yus nyiam yus, qhov ntawd zoo tshaj txhua yam kev hlawv tsiaj thiab cev lwm yam txi Ntuj huv tib si." 34 Yes Xus pom tus kws Ntawv Ntshiab txhab ib lo lus thoob tsib, ces nws hais rau tus kws Ntawv Ntshiab tias : "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug Yes Xus ntxiv.

TIM    3   LUB   6   HLI    2016

Thawj Hnub Rau Lis Piam Cuaj Nruab Xyoo C Nruab Lis Piam Xyoo II

Hwm Yes Xus lub Plawv Ntshiab




Zaj Nyeeem Ib:      EXK  34:  11-16

11 HUAB TAIS Tswv Ntuj hais li no : Zaum no, tus yuav tu kuv pab yaj yog kuv, kuv yuav saib xyuas nws kom zoo. 12 Kuv yuav mus tshuaj xyuas kuv pab yaj zoo li ib tug tswv zov yaj, uas nws mus sawv hauv nruab nrab pom tas txhua tus yaj uas nyias tawg mus nyob nyias rau ib qho lawm.  Kuv yuav mus coj lawv ntawm tej chaw uas kev pos huab kev tsaus coj lawv tawg mus nyob, rov los. 13 Kuv yuav coj lawv tawm ntawm cov teb chaws uas lawv nyob, kuv yuav sau lawv ntawm pej kum teb los, thiab coj lawv rov los rau hauv lawv thaj av. Kuv yuav cia lawv nog zaub nyob pem His Xas Lais tej hauv roob, nram tej vos hav thiab tas qhov txhia chaw uas muaj neeg nyob hauv lub teb chaws. 14 Kuv yuav cia lawv nog zaub nyob hauv ib thaj chaw zaub mos nyoos; His Xas Lais tej hauv roob yuav yog lawv chaw nog zaub. Lawv yuav tau so dhuav nyob hauv tej lub tshav zaub zoo;  lawv yuav nog tej hav zaub ntsuab xiab saum His Xas Lais tej toj roob. 15 Kuv kiag yuav coj kuv cov yaj mus nog zaub, kuv yuav qhia qhov chaw rau lawv mus so, tus Tswv HUAB TAIS yog tus hais lus. 16 Kuv yuav mus nrhiav tus uas poob zoo lawm; kuv yuav coj tus ncaim npoj lawd rov los poo npoj; kuv yuav qhwv tus muaj qhov txhab, yuav kho tus muaj mob kom muaj zog tuaj. Kuv yuav saib xyuas tus yaj rog thiab tus noj qab nyob zoo. Kuv yuav ua lawv tus tswv zov yaj raws kev ncaj ncees.

NPN     23:  1-3A, 3B-4, 5, 6

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

HUAB TAIS yog tus tswv zov yaj saib kuv, kuv yuav tsis ntshaw dab tsi.
Nws coj kuv mus so nyob hauv tej tshav zaub mos ntsuab xiab.
Nws coj kuv mus tso nyob ze tej tus dej tus yees;
nws ua kom kuv tus ntsuj plig los siav.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Nws coj kuv mus taug txoj kev ncaj vim nws lub npe.
Txawm kuv taug kev nyob hauv lub hav tsaus nti,
kuv tsis ntshai dab tsi phem, vim koj nyob rawv ntawm kuv ib sab
nrog koj rab pas nplawm thiab rab pas nrig, ua rau kuv muaj siab loj.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov.
Koj muab roj pleev kuv taub hau;
kuv lub khob puv phwj yaws.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Tsuas muaj txoj kev ua siab zoo ua siab dawb caum cuag kuv
txhua txhia hnub hauv kuv lub neej xwb.
Kuv yuav tau nyob hauv HUAB TAIS tsev
ntev niaj ntau xyoo lawm tom ntej.

Zaj Nyeem Ob:    LM  5:  5B-11

Vim Leej Ntuj Plig Ntshiab, uas Ntuj pub rau peb, twb tau hliv Tswv Ntuj txoj kev hlub rau hauv peb lub siab lawm. 6 Thaum lub sij hawm peb tseem tsis tau txais kev pab, thaum txog lub hnub nyoog teem, Leej Pleev tau tuag kom tau pab cov neeg tsis hwm Ntuj. 7 Yeej nyuaj kawg nkaus nrhiav tau ib tug neeg kom nws yeem tuag txawm yuav yog tuag los pab ib tug neeg ncaj ; tiam sis tej zaud,  kuj yuav muaj tej tug muaj peev xwm tuag taus los pab ib tug neeg siab zoo thiab. 8 Li no, qhov uas qhia tseeb tiasTswv Ntuj hlub peb tiag, yog qhov tias thaum peb tseem yog neeg txhaum, Leej Pleev twb tau tuag kom tau pab peb lawm. 9 Peb ntseeg tias, nyem no peb twb tau txais kev ncaj nyob hauv Leej Pleev cov roj ntsha lawm, mas nws haj yam yuav cawm peb ntawm Ntuj kev npau taws. 10 Vim yog tias thaum peb tseem ua yeeb ncuab rau Tswv Ntuj, nws Leej Tub kev tuag ua kom peb nrog tau Tswv Ntuj rov sib haum xeeb , mas nyem no thaum peb twb nrog Tswv Ntuj rov sib haum xeeb tau lawm, mas nws Leej Tub txoj sia haj yam yuav cawm tau peb. 11 Tsis tas li xwb, peb tseem muaj kev zoo siab loj tso siab lug rau Tswv Ntuj, nyob hauv peb tus Huab Tais Yes Xus Pleev uas tau ua kom peb nrog nws rov sib haum xeeb lawm.

As Les Lus Yas:    MT 11:  29AB

Txais:  As les lus yas, as les lus yas.

Huab Tais hais tias, nej txais kuv tus quab los kwv,
nej kawm ntawm kuv, vim kuv muaj lub siab ua neeg me tsis muab hlob.

Txais:  As les lus yas, as les lus yas.

Los:    JN  10: 14

Txais:  As les lus yas, as les lus yas.

Huab Tais hais tias, kuv yog tus zoo tswv zov yaj,
kuv paub kuv cov yaj, kuv cov yaj paub kuv.

Txais:  As les lus yas, as les lus yas.

Ntawv Moo Zoo:    LK  15:  3-7

3 Yes Xus thiaj hais zaj paj lug no rau lawv : 4 "Yog nej leej twg muaj ib puas tus yaj, tab sis ib tug ploj lawm, mas nws yeej yuav tso cuaj caum cuaj tus yaj tseg rau tom hav quav poj, nws mus nrhiav kom tau tus uas poob zoo lawm. 5 Thaum nws nrhiav tau lawm, nws muab kwv saum xwb pwg, nws zoo siab tas nrho. 6 Nws rov los txog tsev, nws yuav nqua hu nws cov phooj ywg thiab cov nyob ze nws tuaj, nws hais rau lawv tias : 'Nej nrog kuv zoo siab, vim kuv nrhiav tau kuv tus yaj poob zoo lawm.' 7 Kuv hais rau nej tias, ib yam li ntawd, thaum ib tug neeg txhaum hloov siab los ntxub kev txhaum, mas nyob saum ntuj yuav muaj kev zoo siab rau nws loj dua kev zoo siab rau cuaj caum cuaj leeg siab ncaj uas tsis tas yuav hloov siab los ntxub kev txhaum.”

TIM 4 LUB 6 HLIS 2016

HnubXya Lis Piam Caij Nruab Xyoo C Nruab Lis Piam Xyoo II

Hwm Niam Mab Liab lub Plawv tsis lo txhaum

ZajNyeemIb: 2 TMT4:1-8

1 Kuv nyob ntawm Tswv Ntuj thiab Yes Xus Pleev xub ntiag, tus uas yuav txiav txim rau cov neeg ciaj thiab cov neeg tuag, thiab kuv tuav txog nws txoj kev yuav rov tawm tuaj thiab nws txoj kev ua vaj, kuv tso txoj hauj lwm no rau koj: 2 koj cia li tshaj Lo Lus mog ! Koj yuav tshaj Lo Lus tsis tseg, tsis muaj caij tsis muaj thaum li. Koj tiv cov neeg dag neeg cuav, koj kho cov yuam kev, koj coj sawv daws kom los mloog lus. Koj yuav rub koj lub siab kom ntev nyob hauv txhua yam hauv txoj kev qhuab qhia sawv daws. 3 Yuav muaj ib lub caij tom ntej uas tib neeg yuav tsis kam mloog txoj kev cai tseeb, lawv yuav ua ywj lawv lub siab xib rau txoj kev phem thiab ntshaw paub txog ntau yam, ces lawv yuav nrhiav ntau tus xib hwb, 4 lawv yuav tig pob ntseg mus deb ntawm txoj kev tseeb, lawv yuav tig mus mloog tej zaj cuav. 5 Ntawm koj mas koj yuav xyuam xim rau txhua yam. Koj ua siab ntev ris txoj kev nyuaj; koj ua txoj hauj lwm ua tub tshaj lub Moo Zoo, koj leg koj txoj dej num kom zoo mus nto luag.
6 Ntawm kuv, mas txog lub caij kuv yuav raug nchuav mus txi rau Ntuj lawm, txog lub caij kuv yuav mus lawm. 7 Kuv tau nrog luag ua kev sib tw sib ntsuas zog txaus, kuv twb khiav mus txog chaw lawm. Kuv tau ceev txoj kev ntseeg zoo. 8 Nyem no, luag twb npaj tau lub kaus mom yeej phim cov neeg ncaj rau kuv lawm; txog Hnub Ntawd, Huab Tais, tus tswv txiav txim ncaj yuav muab rau kuv ntoo. Tsis yog yuav muab rau kuv ib leeg xwb, nws yuav muab rau tas tsoom neeg tos ntsoov txog lub Hnub Nyoog nws yuav tawm los rau sawv daws pom xyeem tib si.

NPN 71:8-9, 14-15AB, 16-17, 22

Txais: (15ab) Kuv yuav hu nkauj qhuas txog koj txoj kev cawm.

Lo lus cav txog koj nyob nraim hauv kuv lub ncauj,
Thiab lo lus cav txog koj lub koob meej niaj hnub.
Zaum no kuv laus, koj txhob ntiab kuv ;
Kuv lub zog ntaug zuj zus, koj txhob tso kuv pov tseg.

Txais: (15ab) Kuv yuav hu nkauj qhuas txog koj txoj kev cawm.

Kuv yuav tso siab tas mus li
thiab yuav cav txog koj tsis tseg tsis txawj kawg.
Kuv lub ncauj yuav niaj hnub piav txog
koj txoj kev ncaj thiab kev cawm neeg.

Txais: (15ab) Kuv yuav hu nkauj qhuas txog koj txoj kev cawm.

Kuv yuav cav txog HUAB TAIS cov hauj lwm loj ;
Kuv yuav cav txog txoj kev ncaj uas tuaj ntawm koj tib leeg tuaj.
TswvNtuj, koj tau qhuab qhia kuv puag thaum yau los,
Los txog tav no kuv tau tshaj koj tej dej num txaus qhuas.

Txais: (15ab) Kuv yuav hu nkauj qhuas txog koj txoj kev cawm.

Kuv yuav siv nkauj nog ncas los ua koj tsaug,
Vim koj txog kev pheej xeeb, kuv tus Tswv Ntuj,
Kuv yuav ntaus thaj cheej cav lus zoo txog koj,
His Xas Lais tus Ntshiab !

Txais: (15ab) Kuv yuav hu nkauj qhuas txog koj txoj kev cawm.

As Les LusYas: LK 2:19

Txais: As les lus yas, as les lus yas.

Tus nkauj tsim txiaj Mab Liab tau hmoov zoo vim nws
khaws Tswv Ntuj lo lus cia rau nruab siab thiab muab coj los xav.

Txais: As les lus yas, as les lus yas.

Ntawv Moo Zoo: LK 2:41-51

41 Yes Xus niam thiab txiv nkawd niaj xyoo mus ua lub Ntees Hla pem Yes LusXas Les. 42 Thaum Yes Xus muaj kaum ob xyoos, lawv kuj mus ua lub Ntees Hla ped raws li kev cai thiab. 43 Thaum cov hnub ua ntees ntawd tas lawm, Yos Xes thiab Mab Liab nkawd sawv kev rov los, hos tus me tub Yes Xus tseem nyob Yes Lus Xas Les, nws niam thiab nws txiv tsis paub. 44 Nkawd xav tias nws nyob hauv pab neeg coob nrog sawv daws rov qab los lawm. Ces nkawd mus ib hnub ke, nkawd mam li pib nrhiav nws hauv cov txheeb ze thiab cov swm neeg. 45 Tiam sis nkawd nrhiav tsis tau, ces nkawd thiaj rov mus nrhiav nws pem Yes Lus Xas Les. 46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj, nws zaum hauv nruab nrab cov kws Txoj Cai, nws mloog lawv thiab nug lawv. 47 Cov neeg uas tau hnov nws hais lus puav leej yoob tas rau nws lub tswv yim ntse thiab nws cov lus teb. 48 Thaum nkawd pom Yes Xus, nkawd xav tsis thoob, ces nws niam hais rau nws tias : "Me tub, vim li cas koj ua li ntawd rau wb ? Saib koj txiv wb nrhiav koj, wb ntxhov siab tas nrho." 49 Yes Xus hais rau nkawd tias : "Vim li cas neb nrhiav kuv ? Neb tsis paub tias kuv yuav leg kuv Txiv cov hauj lwm lod ?” 50 Tiam sis nkawd tsis to taub nws lo lus tias yog nws xav hais tsi. 51 Yes Xus nrog nkawd rov mus nyob Nas Xas Les, nws mloog nkawd lus. Nws niam khaws tej ntawd huv tib si cia rau nruab siab.

TIM    6   LUB   6   HLI    2016

Hnub Ob Lis Piam Kaum Nruab Xyoo C Nruab Lis Piam II

Hwm LN Norbert

Zaj Nyeem Ib:      1 VAJ  17:  1-6

1 Es Lias uas yug los nyob Tis Npis, nyob Nkas Las As  teb, nws hais rau As Kas tias : "Nyob hauv tus HUAB TAIS muaj txoj sia uas yog His Xas Lais tus Tswv Ntuj uas kuv tsob hwb lub npe, yuav tsis muaj lwg tsis muaj nag los ob peb xyoos, tsuas kawg yuav muaj thaum kuv kom muaj xwb." 2 HUAB TAIS hais rau Es Lias tias : 3 "Koj tso thaj chaw no tseg, koj mus rau sab hnub tuaj, koj mus tsiv nraim nyob hauv lub kwj ha muaj tus dej txhawv Kes Lis, nyob ntawm tus dej Yos Las Das sab toob fab. 4 Koj yuav haus tus dej txhawv ntawd. Kuv mam kom cov uab lag nqa mov rau koj noj nyob ntawd." 5 Ces Es Lias sawv kev mus thiab ua raws li HUAB TAIS hais, nws mus nyob hauv lub kwj deg Kes Lis nyob ntawm tus dej Yos Las Das sab toob fab. 6 Thaum sawv ntxov cov uab lag nqa mov tuaj rau nws noj, thaum tsaus ntuj lawv nqa nqaij tuaj rau nws,  nws haus tus dej ntawd yug siav.

NPN    121:   1BC-2, 3-4, 5-6, 7-8

Txais:  (2)  Tus yuav tuaj pab peb yog Huab Tais, tus tsim lub ntuj lub teb.

Kuv tsa muag ntsia hauv toj hauv pes saib,
leej twg thiaj yuav tuaj pab kuv ?
Tus yuav tuaj pab kuv yog HUAB TAIS,
tus tsim lub ntuj tsim lub ntiaj teb.

Txais:  (2)  Tus yuav tuaj pab peb yog Huab Tais, tus tsim lub ntuj lub teb.

Thov kom nws txhob cia koj dawm ko taw,
kom tus zov koj txhob qaug dab ntub.
Tus zov His Xas Lais nws yeej tsis
qaug dab ntub tsis tsaug zog.


Txais:  (2)  Tus yuav tuaj pab peb yog Huab Tais, tus tsim lub ntuj lub teb.

HUAB TAIS yog tus zov koj, nws yog tus duab ntxoov koj.
Nws nyob ntawm koj ib sab ntawm sab xis.
Nruab hnub, lub hnub yuav tsis kub koj,
hmo ntuj, lub hli yuav tsis tsaus rau koj.

Txais:  (2)  Tus yuav tuaj pab peb yog Huab Tais, tus tsim lub ntuj lub teb.

HUAB TAIS yuav txuag koj ntawm txhua yam phem,
Nws yuav txuag koj txoj sia.
HUAB TAIS yuav txuag koj thaum koj mus thiab thaum koj los,
Nws yuav txuag koj nyem no mus tas ib txhiab ib txhis.

Txais:  (2)  Tus yuav tuaj pab peb yog Huab Tais, tus tsim lub ntuj lub teb.

As Les Lus Yas:    MT  5:  12A

Txais:   As les lus yas, as les lus yas.

Nej zoo siab thiab nej luag ntxhi,
vim nej yuav txais koob haum loj nyob saum ntuj.  

Txais:   As les lus yas, as les lus yas.

Ntawv Moo Zoo:     MT  5:  1-12

1 Yes Xus pom neeg coob coob tuaj, nws nce mus saum lub roob, nws zaum, ces cov thwj tim txav los ntawm nws. 2 Ces Yes Xus tsa ncauj qhia lawv hais tias : 3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. 4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. 5 Cov tau txoj hmoov zoo, yog cov quaj ntsuag, vim Ntuj yuav nplij lawv. 6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. 7 Cov tau txoj hmoov zoo, yog cov hlub luag tej, vim Ntuj yuav hlub lawv. 8 Cov tau txoj hmoov zoo, yog cov siab huv, vim lawv yuav pom Tswv Ntuj. 9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam. 10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. 11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. 12 Nej zoo siab thiab nej hom khaj mog, vim nej yuav tau txais koob haum loj nyob saum ntuj. Cov yaj saub ua nej ntej, kuj raug luag hiam zoo li ntawd thiab.

TIM    7   LUB   6   HLI    2016

Hnub Peb Lis Piam Kaum Nruab Xyoo C Nruab Lis Piam Xyoo II

Zaj Nyeem Ib:      1 VAJ  17:   7-16

7 Tau ib ntus xwb ces tus dej qhuav tas, vim ntuj tsis los nag nyob hauv lub teb chaws li. 8 Ces Es Lias hnov HUAB TAIS ib lo lus hais rau nws tias : 9 "Koj sawv kev mus tom lub zos Xas Les Tas nyob Xis Doos, koj yuav mus nyob ntawd. Kuv twb tau tshoj kom  ib tug poj ntsuam nyob tod yuav pub mov rau koj no lawm." 10 Es Lias thiaj li sawv kev mus Xas Les Tas. Thaum nws tuaj txog ntawm ntug zos, muaj ib tug poj ntsuam tab tom nrhiav taws rauv. Nws thov tus poj ntsuam tias : "Thov koj nqa ib khob dej me me tuaj rau kuv haus saib !" 11 Tus poj ntsuam txawm sawv kev yuav mus nqa dej. Es Lias qw caum tus poj ntsuam tias : "Thov koj nqa ib qho ncuav mov tuaj rau kuv noj thiab !" 12 Tus poj ntsuam teb tias : "Tseeb ib yam li HUAB TAIS koj tus Tswv Ntuj muaj sia nyob, kuv tsis muaj ib qhov mov siav li. Kuv kawg tshuav me ntsis hmoov nplej nyob hauv lub qab hub xwb, thiab tshuav me me roj nyob hauv lub qab hwj xwb. Zaum no, yog kuv tab tom tuaj sau ib tsuag taws mus rauv, tso kuv yuav ua ib lub ncuav mov rau kuv tus tub thiab kuv wb noj. Noj tas ces wb kawg tos tuag lawm xwb." 13 Es Lias hais rau tus poj ntsuam tias : "Koj txhob txhawj, koj kav tsij mus ua raws li koj npaj lawm. Tiam sis koj yuav xub ua ib lub ncuav mov nqa tuaj rau kuv noj tso, koj mam li mus ua rau koj thiab koj tus tub neb noj. 14 Vim Huab Tais, His Xas Lais tus Tswv Ntuj cog lus tias:  ‘lub hub hmoov nplej yuav tsis txawj tas, lub hwj ntim roj yuav tsis txawj qhuav mus txog hnub uas Tswv Ntuj tso nag los ywg lub ntiaj teb." 15 Tus poj ntsuam mus ua raws li Es Lias qhia. Ces nws thiab nws tus tub thiab Es Lias lawv tau mov noj tsis tu pluas. 16 Lub hub rau hmoov nplej tsis txawj tas li hos lub hwj rau roj tsis txawj qhuav li, raws nraim li Tswv Ntuj tau kom Es Lias hais tseg lawm.

NPN     PS  4:   2-3, 4-5, 7b-8

Txais:    (7a) Huab Tais, Ua kom koj lub ntsej muag ci tuaj rau peb.

Kuv tus Tswv Ntuj siab ncaj , thaum kuv hu txog koj, koj teb kuv.
Thaum kuv raug kev txhawj xeeb, koj daws kuv kev txhawj.
Thov koj khuv leej kuv, koj mloog kuv lo lus thov koj.
Leej tib neeg, nej yuav hais lus thuam kuv mus txog thaum twg?
Nej yuav nyiam qhov tsis muaj nqes thiab nrhiav kev dag mus txog thaum twg?

Txais:    (7a) Huab Tais, Ua kom koj lub ntsej muag ci tuaj rau peb.

Nej yuav paub tias HUAB TAIS ua hwj huam loj pab tus ntseeg nws,
HUAB TAIS yuav mloog kuv thaum kuv hu txog nws.
Nej yuav ntshai, nej txhob ua txhaum,
Nej nyob ntsiag to saum nej txaj xav tswv yim.

Txais:    (7a) Huab Tais, Ua kom koj lub ntsej muag ci tuaj rau peb.

HUAB TAIS, koj ua kom koj lub ntsej muag ci tuaj rau peb.
Koj ua kom kuv lub siab muaj kev zoo siab loj,
Tseem loj dua thaum sau tau nplej thiab cub tau cawv ntau.

Txais:    (7a) Huab Tais, Ua kom koj lub ntsej muag ci tuaj rau peb.

As Les Lus Yas:     MT  5:  16

Txais:   As les lus yas, as les lus yas.

Nej lub teeb yuav tsum ci nyob ntawm zeej tsoom xub ntiag,
kom lawv pom nej cov dej num zoo, ces lawv yuav cav txog nej Txiv nyob saum ntuj.

Txais:   As les lus yas, as les lus yas.

Ntawv Moo Zoo:    MT  5:   13-16

Yes Xus hais rau lawv tias:
13 "Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov qab tuaj ? Ntsev tsuag tsis zoo ua dab tsi ntxiv, tsuas kawg muab pov tseg nraum zoov rau neeg tsuj xwb. 14 Nej yog lub teeb ci rau lub ntiaj teb. Ib lub nroog txhim rau saum ib lub ncov roob, yuav muab zais tsis tau. 15 Hos, luag kuj tsis taws teeb coj mus khwb rau hauv qab pob tawb, luag muab txawb saum tus ncej teeb, kom lub teeb ci rau tas cov neeg nyob hauv tsev pom kev. 16 Li ntawd, nej lub teeb kuj yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv nyob saum ntuj.

TIM    8   LUB   6   HLI    2016

Hnub Plaub Lis Piam Kaum Nruab Xyoo C Nruab Lis Piam II

Zaj Nyeem Ib:     1 VAJ  18:  20-39

20 Tus vaj As Kas hu tas tsoom His Xas Lais thiab sau cov yaj saub tuaj nyob saum lub roob Kas Mes. 21 Es Lias nqua hu rau tas tsoom sid, nws hais tias : "Nej yuav nrhab ceg tsuj ob tog mus txog thaum twg ? Yog tias HUAB TAIS yog Tswv Ntuj ces nej raws nws kiag! Yog tias Npas Has yog Tswv Ntuj ces nej raws Npas Has kiag !" Tsoom sid tsis teb dab tsi rau Es Lias li. 22 Es Lias hais ntxiv tias : "Tshuav kuv ib leeg ua HUAB TAIS tus Yaj Saub xwb, hos Npas Has cov yaj saub muaj plaub puas tsib caug leej diam. 23 Nej coj ob tug thav nyuj tuaj rau peb. Cia lawv xaiv ib tug, lawv muab txiav ua tej daim thiab muab tso rau saum cov taws, tab sis tsis txhob rauv taws rau li. Kuv kuj yuav npaj ib tug, muab tso rau saum cov taws thiab, thiab kuv kuj yuav tsis rauv taws rau li. 24 Nej yuav hu txog nej cov tswv ntuj lub npe, hos kuv yuav hu txog HUAB TAIS lub npe. Tus tswv ntuj uas tso hluav taws los hlawv cov tsiaj mas tus ntawd thiaj yog tus tseem Tswv Ntuj tiag." Tsoom sid teb tias : "Peb pom zoo ua li ntawd!" 25 Ces Es Lias hais rau Npas Has cov yaj saub tias : "Nej xaiv ib tug ntsuag nyuj, cia nej npaj ua ntej vim nej yog cov coob. Nej hu txog nej cov tswv ntuj xwb, nej tsis txhob rauv taws li." 26 Lawv muab tus nyuj tua, thaum lawv npaj tas, mas lawv hu txog Npas Has lub npe txij sawv ntxov mus txog tav su, lawv hais tias : "Npas Has, thov koj teb peb mas !" Tab sis tsis hnov ib lub suab tsis hnov leej twg teb li. Lawv dhia, lawv kim caug ntawm lub thaj txi ntuj uas lawv tau txhim. 27 Thaum txog tav su, Es Lias thuam lawv tias : "Nej qw nrov dua mas ! Nws yog ib tug tswv ntuj diam, ntshai nws muaj chaw ntxhov siab ntau los muaj hauj lwm ntau lawm . Los ntshai nws muaj chaw tawm rooj lawm. Los tej zaus nws tsaug zog lawm, nej hu tiag ces nws yuav tsim dheev los xwb !" 28 Lawv haj yam qw nrov dua tuaj thiab lawv xuas ntaj xuas hmuv los hlais lawv kom ntshav los raws li lawv kev cai ua kam. 29 Thaum tav su dua lawm, lawv cov yaj saub nthe los nthe ntuas los ntuas mus txog lub caij yuav cev cov txim txi ntuj. Tab sis tsis hnov ib lub suab los ib lo lus teb li.

30 Es Lias thiaj hais rau tsoom sid tias : "Nej sawv daws txav los ze kuv." Thaum Sawv daws txav los lawm, Es Lias thiaj rov tsa HUAB TAIS lub thaj txi ntuj uas puas tas lawm. 31 Nws muab kaum ob lub pob zeb kom raws li Yas Kos kaum ob leeg tub. Yas Kos yog tus uas HUAB TAIS tau hais rau nws tias : “Koj lub npe yuav hu ua His Xas Lais.” 32 Es Lias muab cov pob zeb ntawd los txhim ua ib lub thaj rau HUAB TAIS. Nws khawb ib tug kwj ntim taus ob kawg noob ncig lub thaj. 33 Nws teeb cov taws tas rau , nws muab tus thav nyuj phua ua tej daim thiab muab tso rau saum cov taws. 34 Ces nws hais tias : "Nej ntim plaub hub dej thiab nej nqa los nchuav ywg tus nyuj thiab cov taws." Lawv ua li ntawd tas. Es Lias hais tias : "Nej ua zaum ob thiab !" Lawv tseem ywg dej zaum ob. Es Lias tseem rov hais tias : "Nej ua zaum peb ntxiv thiab !" Lawv thiaj ua zaum peb ntxiv. 35 Dej nyab ncig lub thaj txi Ntuj tas, tus kwj kuj puv dej tas.

36 Thaum txog lub caij txi Ntuj, tus Yaj Saub Es Lias txav los hais tias : "HUAB TAIS, uas koj yog Has Nplas Has, His Xas Has thiab His Xas Lais tus Tswv Ntuj, thov koj ua kom tsoom pej xeem paub tias koj yog tus Tswv Ntuj nyob hauv His Xas Lais, thiab koj ua kom lawv paub tias kuv yog koj tus tub txib, thiab yog koj kom ua , kuv thiaj ua tas txhua yam no. 37 HUAB TAIS, thov koj teb kuv ! Koj teb kuv, Huab Tais,  ces tsoom pej xeem nyob ntawm no thiaj yuav paub tias koj yog Tswv Ntuj, koj yog tus ua kom lawv lub siab rov xeev los cuag koj." 38 Ces HUAB TAIS cov hluav taws nqes los hlawv tus nyuj thiab cov taws, cov pob zeb, cov plua tshauv,  thiab los nqus cov dej nyob hauv tus kwj tas huv si. 39 Tsoom pej xeem pom tej no, tas sawv daws ntog khwb rwg pe hauv av, lawv hais tias : "HUAB TAIS yog Tswv Ntuj tiag ! HUAB TAIS yog Tswv Ntuj tiag !"


NPN    16:  1B-2AB, 4, 5AB + 8, 11

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Tswv Ntuj, thov koj txuag kuv, kuv tuaj khaub zig koj.
Kuv hais rau HUAB TAIS tias: " Koj yog kuv tus HUAB TAIS !
Kuv tsis muaj lwm qhov chaw kaj siab dua ntawm koj."


Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Cov neeg teev lwm cov dab,
rov nrhiav kev txom nyem ntau rau lawv.
Kuv yuav tsis hliv ntshav los txi lawv.
Kuv di ncauj yuav tsis tuav txog lawv lub npe.

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Huab Tais, kuv lub cuab tam, kuv lub ntim,
Koj yog tus tuav rawv kuvb txoj hmoov.  
Kuv cia HUAB TAIS nyob ntawm kuv xub ntiag tsis tseg,
cia nws nyob ntawm kuv sab xis, kuv yuav tsis qaij tsis qaug.

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

Koj yuav qhia kuv taug txoj kev mus txog txoj sia,
mus txog kev zoo siab nyob ntawm koj xub ntiag,
mus txog kev luag ntxhi mus li nyob ntawm koj sab xis.  

Txais: (1) Tswv Ntuj, thov koj txuag kuv, koj yog kuv chaw tso siab.
Los : As les lus yas.

As Les Lus Yas:    NPN  25:  4B, 5A

Txais:    As les lus yas, as les lus yas.  

Kuv tus Tswv Ntuj, qhia koj tej xub ke rau kuv paub.
coj kuv mus taug koj txoj kev tseeb

Txais:    As les lus yas, as les lus yas.

Ntawv Moo Zoo:     MT  5:   17-19

Yes Xus hais tias:
17 Nej txhob xav tias kuv tuaj rhuav Txoj Cai thiab cov Yaj Saub : kuv tsis yog tuaj rhuav, kuv tuaj qhia ntxiv kom thoob xwb. 18 Muaj tseeb, kuv hais rau nej tias: lub ntuj lub teb yuav dua, tab sis tsis muaj ib tug txwm ntawv, los ib lub cim ntawv me me hauv Txoj Cai yuav ploj. Tas ib puas tsav yam nyob hauv Txoj Cai yuav tsum tshwm sim tuaj tso. 19 Vim li no, yog leej twg hla ib txog cai me tshaj nyob hauv txoj cai, thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua raws Txoj Cai tas huv si, thiab nws qhia kom luag ua xws li nws, Ntuj yuav saib nws yog tus loj tshaj cov nyob hauv Ntuj lub Ceeb Tsheej.

TIM 9 LUB 6 HLI 2016

Hwm LN Ephrem

Hnub Tsib Lis Piam Kaum Nruab Xyoo C Nruab Lis Piam Xyoo II

Zaj Nyeem Ib: 1 VAJ 18: 41-46

41 Es Lias hais rau tus vaj As Kas tias: “Koj rov mus noj mov mus haus dej, vim twb hnov los nag nrov loj loj lawm.” 42 Ces As Kas mus noj mov mus haus dej lawm, hos Es Lias nce mus saum lub ncov roob Kas Mes; nws mus nyo hau khoov ti hauv av muab nws taub hau ntsaws rau ob ceg ntawm nws ob lub hauv caug. 43 Nws hais rau nws tus tub txib tias: “Koj mus lawm saud mus ntsia lawm sab tim dej hiav txwv saib.” Tus tub txib nce mus saib lawm sab tim dej hiav txwv. Nws hais tias: “Twb tsis muaj dab tsi li as.” Es Lias hais xya zaus rau nws tias: “Koj yuav tsum rov mus xyuas dua.” 44 Zaum xya, tus tub txib hais tias: “Zaum no muaj ib tauv huab me me luaj li ib txhais tes nce hauv dej hiav txwv mus rau saud lawm.” Es Lias hais rau nws tias: “Koj mus hais rau As Kas tias: ‘Koj yuav tsum nog nra rau koj lub tsheb kav tsij nqes mus tsev ua ntej ntuj los nag, tsam koj rov mus tsis tau.’” 45 Ces tam sis ntawd ntuj cia li dub nciab tsaus huab nti tuaj, muaj cua daj cua dub, thiab los nag loj nchuav lug saum ntuj los. As Kas thiaj nce hlo saum tsheb thiab rov qab mus rau Yis Les Ees lawm. 46 Huab Tais txhais tes lub hwj huam los roos Es Lias, nws khi tsho khov kho ntawm duav ces nws khiav rag ntws ua As Kas ntej mus txog ntua rau tom ntug nroog Yis Les Ees.

NPN 65: 10, 11, 12-13

Txais: (2a) Tswv Ntuj, tsim nyog peb cav txog koj nyob saum Xis Yoos.

Koj tuaj xyuas lub ntiaj teb, koj ywg dej rau;
koj ua kom lub ntiaj teb nplua nuj muaj txhij txhua.
Tswv Ntuj tus dej rov muaj dej ntws puv nkaus kwj.
koj npaj kom muaj noob qoob noob loo rau lawv.

Txais: (2a) Tswv Ntuj, tsim nyog peb cav txog koj nyob saum Xis Yoos.

Koj npaj txhua yam zoo li no:
Koj ua kom muaj dej puv tej kwj, kom qhov ua ncov tiaj tuaj,
koj tso nag los ywg kom av phom,
koj foom kom cov noob hlav mos nyoos.

Txais: (2a) Tswv Ntuj, tsim nyog peb cav txog koj nyob saum Xis Yoos.

Koj pub kom thaum xyoo tas, sau tau qoob loo ntsu ntws lug,
Txhua yam muaj ntws lug hauv txoj lw koj hla.
Tej tshav zaub hauv teb chaws suab puam mos nyoos ntsuab xiab,
Tej pov roob hnav zam muaj kev zoo siab puv npo.

Txais: (2a) Tswv Ntuj, tsim nyog peb cav txog koj nyob saum Xis Yoos.

As Les Lus Yas: ZAM 13: 34

Txais: As les lus yas, as les lus yas.

"Kuv muab ib lo lus qhia tshiab rau nej :
Nej yuav ib leeg hlub ib leeg ib yam li kuv tau hlub nej.

Txais: As les lus yas, as les lus yas.

Ntawv Moo Zoo: MT 5: 20-26

Yes Xus hais rau nws cov thwj tim tias:
20 "Kuv hais rau nej : yog nej tsis coj ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv Ntuj lub Ceeb Tsheej. 21 Nej tau kawm cov lus qhia rau tej laus thaud tias : ‘Koj tsis txhob tua neeg, tus twg tua neeg, nws yuav raug luag txiav txim rau nws nyob tom tsev hais plaub.’ 22 Hos kuv hais rau nej tias: Leej twg npau taws rau nws tus kwv tij, yuav raug txim ntawm tsev hais plaub. Yog leej twg hais rau nws tus kwv tij tias "Niag ruam !" mas nws yuav raug mus txiav txim ntawm lub rooj txwj laus Xas Nes Nrees. Yog nws hais rau nws tus kwv tij tias : "Niag neeg vwm", mas nws yuav raug txim nyob hauv dab phem cov hluav taws. 23 Vim li no, thaum koj tuaj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj lus tsis zoo rau koj lawm, 24 mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov tuaj cev koj cov txim. 25 Koj yuav kav tsij hais kom haum nrog koj tus yeeb ncuab thaum tseem muaj sij hawm zoo, thaum koj tseem nrog nws taug kev mus lawm tom tsev hais plaub, tsam nws coj koj mus kom rau tus nom txiav txim, ces nom txiav txim muab koj cob rau tub ceev xwm kom muab koj kaw hauv tsev loj faj. 26 Kuv hais tseeb rau koj tias, koj yuav tawm tsis tau hauv tsev loj faj los, mus txog thaum koj rho nyiaj qab nas mus them kom txaus nkaus koj tus nqe mus txog npib kawg.”

TIM 10 LUB 6 HLI 2016

Hnub Rau Lis Piam Kaum Nruab Xyoo C Nruab Lis Piam Xyoo II

Zaj Nyeem Ib: 1 VAJ 19: 9A, 11-16

Thaum Es Lias mus txog ntawm Tswv Ntuj lub roob Hos Les, 9 nws chaws mus hauv ib lub qhov tsua, nws mus pw hmo ntawd nyob ntawd.
11 Huab Tais lub suab hais rau nws tias : "Koj tawm mus, koj mus ntsib HUAB TAIS saum lub roob, HUAB TAIS yuav tuaj hla saud.” Txawm muaj ib nthwv cua hlob tas nrho tuaj phua cov roob thiab ua cov pob tsuas tawg tas, tab sis HUAB TAIS tsis nyob hauv nthwv cua ntawd. Dhau nthwv cua lawm, txawm muaj av qeeg, tab sis HUAB TAIS tsis nyob hauv qhov av qeeg ntawd thiab. 12 Thaum av qeeg tas lawm, muaj ib co hluav taws tawm tuaj, tab sis HUAB TAIS kuj tsis nyob hauv cov hluav taws ntawd thiab. Thaum cov hluav taws dhau tas lawm, hnov ib nthwv cua me me tuaj ntxuj ntxiag. 13 Es Lias hnov cov cua ntawd mas tam sim ntawd nws muab nws lub tsho tshaj sab los thaiv ntsej muag, ces nws tawm los nyob ntawm lub rooj qhov tsuas. Nws hnov ib lub suab hu nws tias : "Es Lias, koj ua dab tsi ntawm no ?" 14 Es Lias teb tias : "Kuv kub siab lug rau HUAB TAIS Xas Npas Os, vim His Xas Lais cov tub tau tso koj pov tseg, lawv rhuav koj cov thaj txi Ntuj thiab lawv rho ntaj tua koj cov Yaj Saub tuag tas. Tshuav kuv ib leeg xwb, lawv tseem nrhiav kuv tua thiab." 15 HUAB TAIS hais rau nws tias : "Koj rov mus, koj taug txoj qub ke rov qab mus tom lub hav suab puam Das Mas. Koj yuav mus tsa Has Xas Es ua vaj kav As Las, 16 koj yuav tsa Yes Hus uas yog Nis Sis tub ua vaj kav His Xas Lais, thiab koj pleev Es Lis Xais, uas yog Xas Fas tub nyob As Npes Mes Hos las, ua Yaj Saub hloov koj."

NPN 27: 7-8A, 8B-9ABC, 13-14

Txais: (8b) Huab Tais, kuv ntshaw rwg xav pom koj lub ntsej muag.

HUAB TAIS, thov koj mloog kuv lub suab hu koj,
Thov koj hlub kuv, thiab teb kuv mas!
Kuv lub siab hais txog koj tias :
"Koj nrhiav nws lub ntsej muag !"

Txais: (8b) Huab Tais, kuv ntshaw rwg xav pom koj lub ntsej muag.

HUAB TAIS, kuv nrhiav kom tau pom koj.
Thov txhob muab koj lub ntsej muag zais ntawm kuv,
txhob npau taws txhob ntiab koj tus tub txib.
Koj yog tus pab kuv: txhob ntiab kuv khiav ntawm koj mus.

Txais: (8b) Huab Tais, kuv ntshaw rwg xav pom koj lub ntsej muag.

Kuv ntseeg tias kuv yuav tau pom HUAB TAIS lub siab zoo
nyob hauv tsoom neeg ciaj lub teb chaws.
Koj tos ntsoov HUAB TAIS, ua siab loj loj ;
ua siab tawv qhawv, tos ntsoov HUAB TAIS !

Txais: (8b) Huab Tais, kuv ntshaw rwg xav pom koj lub ntsej muag.

As Les Lus Yas: FLP 2: 15D, 16A

Txais: As les lus yas, as les lus yas.

Nej yuav tsum ci li cov hnub qub ci pom kev kaj lub ntiaj teb,
Vim nej tshaj Lo Lus pub txoj sia rau lawv paub.

Txais: As les lus yas, as les lus yas.

Ntawv Moo Zoo: MT 5: 27-32

Yes Xus hais rau nws cov thwj tim tias:
27 “Nej hnov tej lus qhia tias : ‘Koj yuav tsis txhob deev luag txij luag nkawm.’ 28 Hos kuv, mas kuv hais rau nej : Leej twg ntsia ib tug poj niam vim ntshaw zes nws, tus ntawd twb deev tus poj niam ntawd hauv nruab siab lawm. 29 Yog koj sab qhov muag xis coj koj mus ua txhaum, mas kav tsij muab sab qhov muag ntawd kaus pov tseg deb koj : txhiaj khoov cia ib sab qhov muag puas zoo dua tas koj lub cev poob hauv dab phem teb. 30 Yog koj sab tes xis coj koj mus ua txhaum, kav tsij muab txiav pov tseg deb koj : txhiaj khoov cia tu ib sab tes zoo dua tas koj lub cev poob hauv dab phem teb. 31 Kuj tseem muaj tej lus qhia tias : ‘Leej twg nrauj nws poj niam, yuav tsum muab ib daim ntawv nrauj rau tus poj niam.’ 32 Tab sis, kuv hais rau nej : Tus txiv neej twg nrauj nws poj niam, tus ntawd tso nws poj niam rau luag deev. Qhov no tsis yog hais txog tus poj niam uas mus 'nrog lwm tus txiv neej ua dev ua npua.' Hos leej twg yuav ib tug poj nrauj, mas tus ntawd yog ib tug deev luag txij luag nkawm.

TIM 11 LUB 6 HLI 2016

Hnub Xya Lis Piam Kaum Nruab Xyoo C

Hwm LN Npas Nas Npas, Hauv Paus Xa Lus

Zaj Nyeem Ib: HAUJ LWM 11: 21B-26; 13:1-3

11 21b Lub caij ntawd cov neeg txais kev ntseeg thiab tig los cuag Huab Tais coob kawg. 22 Lub Koom Txoos nyob Yes Lus Xas Les hnov lub moo ntawd, lawv thiaj xa Npas Nas Npes mus nyob As Nthias Kias. 23 Thaum Npas Nas Npes tuaj txog, nws pomTswv Ntuj lub txiaj ntsim, mas nws zoo siab hlo. Nws pab lawv ua siab loj siab tawv kom lawv nyob ruaj nreb hauv txoj kev ntseeg txog Huab Tais. 24 Npas Nas Npes yog ib tug neeg zoo. Leej Ntuj Plig Ntshiab nyob puv hauv nws, thiab nws yog ib tug neeg ntseeg ruaj. Ib pab neeg coob kawg los ntseeg txog HuabTais ntxiv. 25 Ces Npas Nas Npes mus nrhiav Xauv nyob Tas Xis. 26 Thaum nws nrhiav tau Xauv lawm, mas nws coj Xauv los nyob As Nthias Kias. Nkawd nyob li ntawd ib xyoos hauv lub Koom Txoos, nkawd qhia ib pab neeg coob kawg. Yog nyob As Nthias Kias mas luag thiaj pib hu cov thwj tim ua cov Pleev.
13 1 Lub Koom Txoos nyob As Nthias Kias muaj ib co yaj saub thiab ib co kws txoj cai : yog Npas Nas Npes, Xis Mes Oos uas luag hu nws ua Nis Zes, Lus Xyus tus nyob Xis Les Nas teb tuaj, Mas Nas Ees uas thaum yau nws nrog tus vaj Hes Los ua phooj ywg, thiab Xauv. 2 Muaj ib hnub, lawv tab tom ua lub txoos teev ntuj, thiab coj cov kab ke yoo, mas Leej Ntuj Plig Ntshiab hais rau lawv tias : "Nej qee Npas Nas Npes thiab Xauv nkawd, vim kuv hu nkawd mus ua dua ib txog hauj lwm." 3 Ces thaum lawv yoo mov tas thiab teev Ntuj tas, lawv tsa tes rau saum nkawd, lawv xa nkawd mus.


NPN 98: 1, 2-3AB, 3CD-4, 5-6

Txais: (2b) Huab Tais muab nws txoj kev ncaj rau cov haiv neeg pom.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
Thiab nws sab npab ntshiab.

Txais: (2b) Huab Tais muab nws txoj kev ncaj rau cov haiv neeg pom.

HUAB TAIS ua kom sawv daws paub txog nws txoj kev cawm neeg,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo rau thiab hlub
tsev neeg His Xas Lais.

Txais: (2b) Huab Tais muab nws txoj kev ncaj rau cov haiv neeg pom.

Tas npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhuam teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais: (2b) Huab Tais muab nws txoj kev ncaj rau cov haiv neeg pom.

Nej ntaus nkauj nog ncas cav txog Huab Tais,
nej ntaus nkauj nog ncas nrog tej zaj nkauj zoo mloog.
Nej tshuab hom ntxuag suab kub nyuj,
nej dhia zoo siab nyob ntawm tus vaj ntxwv HUAB TAIS xub ntiag.

Txais: (2b) Huab Tais muab nws txoj kev ncaj rau cov haiv neeg pom.

As Les Lus Yas: NPN 119: 36A, 29B

Txais: As l;es lus yas, as les lus yas.

Tsawv Ntuj, thov koj ua kom kuv lub siab xib mus rau koj txoj lij choj,
koj pub lub txiaj ntsim rau kuv kom kuv nyiam koj txoj cai.

Txais: As l;es lus yas, as les lus yas.

Ntawv Moo Zoo: MT 5: 33-37

Yes Xus hais rau nws cov thwj tim tias:
33 Nej tseem tau hnov cov lus qhia rau tej laus thaud tias : Koj tsis txhob twv ntuj, koj yuav ua raws li cov lus koj tau cog rau Huab Tais lawm. 34 Tab sis kuv hais rau nej, nej tsis txhob twv ntuj ib zaug li. Txhob muab lub ntuj los ua tim khawv, vim ntuj yog Tswv Ntuj lub theej kiab ; 35 txhob muab lub ntiaj teb los ua tim khawv, vim lub ntiaj teb yog Tswv Ntuj lub rooj tiag taw ; txhob muab Yes Lus Xas Les los ua tim khawv, vim yog tus Tuam Vaj lub Nroog. 36 Txhob muab koj lub taub hau los ua tim khawv, vim koj ua tsis tau kom ib txog plaub hau dawb tuaj los dub tuaj. 37 Nej yuav hais li no : Muaj, ces hais tias muaj ; tsis muaj, ces hais tias tsis muaj. Cov lus hais tshaj, yog tuaj ntawm tus Phem tuaj.

TIM 13 LUB 6 HLI 2016

Hnub Ob Lis Piam Kaum Ib Nruab Xyoo C Nruab Lis Piam Xyoo II

Hwm LN Anthony nyob Padua, Ua Leej Choj thiab Kws Kev Ntseeg

Zaj Nyeem Ib: 1 VAJ 21: 1-16

1 Nas Npos nyob Yes Les Ees. Nws muaj ib lub vaj txiv cawv nyob puab tus vaj Xas Mas Lias hu ua As Kas lub tsev. 2 As Kas hais zoo li no rau Nas Npos tias : "Koj muab koj lub vaj txiv cawv rau kuv ua kuv lub vaj cog zaub. Vim koj lub vaj txiv cawv twb nyob ze ze kuv tsev. Kuv mam li muab dua ib lub vaj txiv cawv zoo dua rau koj. Los puas yog koj xav yuav nyiaj mas kuv yuav muab nyiaj kom txaus tus nqe rau koj." 3 Tab sis Nas Npos hais rau As Kas tias : "Thov kom HUAB TAIS tsis txhob cia kuv tso kuv cov yawg koob tej qub txeeg qub teg rau koj !" 4 As Kas rov mus tsev, nws chim, nws ua ntsej muag dub nciab, nws tsis zoo siab rau lo lus Nas Npos hais rau nws tias : 'Kuv yuav tsis tso kuv cov yawg koob tej qub txeeg qub teg rau koj.' Nws mus pw saum txaj, nws fee plhu, nws tsis xav noj mov.

5 Nws tus poj niam Zes Xas Npes los hais rau nws tias : "Vim li cas koj thiaj chim siab,koj thiaj tsis noj mov ?" 6 As Kas teb tias : "Vim kuv hais rau Nas Nposnyob Yes Les Ees tias : 'Muab koj lub vaj txiv cawv rau kuv, kuv mam muab nyiaj rau koj. Los yog koj nyiam, kuv mam muab dua lwm lub vaj txiv cawv los pauv.' Tab sis nws hais tias : 'kuv tsis muab kuv lub vaj txiv cawv rau koj." 7 Ces Zes Xas Npes hais rau As Kas tias : "Koj kam yog ib tug vaj His Xas Lais diam ! Kav tsij sawv tsees los noj mov. Koj kav tsij zoo siab ! Kuv yuav muab kom tau Nas Npos lub vaj rau koj."

8 Zes Xas Npes siv As Kas lub npe los sau ib tsab ntawv. Nws ntaus tus vaj lub thwj rau saum tsab ntawv. Nws xa mus rau cov txwj laus thiab cov nom nrog Nas Npos nyob hauv nws lub zos. 9 Nyob hauv tsab ntawv ntawd, Zes Xas Npes sau tias: "Nej tshaj ib lub caij yoo mov. Nej cia Nas Npos mus zaum ntawm tsoom sid hauv ntej. 10 Nej coj ob tug tim khawv los zaum ntawm Nas Npos xub ntiag. Ob tug tim khawv ntawd yuav liam li no tias : 'Koj tau thuam Tswv Ntuj thiab thuam tus vaj !' Ces nej coj Nas Npos tawm mus nraum sab nraug nraud thiab nej xuas pob zeb txawb kom nws tuag."

11 Cov nom tswv thiab cov txwj laus nyob hauv Nas Npos lub nroog sawv daws ua raws li Zes Xas Npes hais kom ua nyob hauv nws tsab ntawv nws sau tuaj rau lawv. 12 Lawv ua kab ke yoo mov thiab lawv kom Nas Npos mus zaum ntawm tsoom pej xeem hauv ntej. 13 Ces ob tug tim khawv tuaj sawv ntawm Nas Npos xub ntiag thiab liam tias Nas Npos tau thuam Tswv Ntuj thiab thuam tus vaj. Ces lawv coj Nas Npos tawm ntawm lub nroog mus thiab lawv txawb pob zeb ntaus nws tuag. 14 Lawv ua li ntawd tas ces lawv tso neeg mus hais rau Zes Xas Npes tias : "Peb tau xuas pob zeb txawb tua Nas Npos tuag lawm." 15 Thaum Zes Xas Npes hnov tias Nas Npos tuag lawm, nws hais rau As Kas tias : "Koj sawv mus yuav Nas Npos lub vaj txiv cawv los ua koj tug. Nws tsis xav muab rau koj kom nws tau nyiaj. Zaum no nws tsis nyob, nws tuag lawm." 16 Thaum As Kas hnov tias Nas Npos tuag lawm, ces nws sawv tsees, nws nqes mus nram Nas Npos lub vaj, nws muab Nas Npos lub vaj los ua nws tug.

NPN 5: 2-3AB, 4B-6A, 6B-7

Txais: (2b) Huab Tais, thov koj mloog kuv thaum kuv nroo.

HUAB TAIS, thov koj tig ntsej los mloog kuv tej lus,
Thov koj quav ntsej txog kuv thaum kuv xyu tej zaj.
Koj ua tib zoo mloog kuv thaum kuv hu kom koj tuaj pab,
Koj kuv tus vaj, kuv tus Tswv Ntuj!

Txais: (2b) Huab Tais, thov koj mloog kuv thaum kuv nroo.

Sawv ntxov tsees, kuv tuaj thov koj, kuv tos ntsoov koj kev pab.
Tswv Ntuj, koj tsis zoo siab pom txoj kev phem.
Tus neeg phem yuav nyob tsis taus nrog koj.
Tus neeg saib tsis taus luag yuav sawv tsis taus rau koj pom.

Txais: (2b) Huab Tais, thov koj mloog kuv thaum kuv nroo.

Koj ntxub tas tsoom neeg nrhiav kev ua phem.
Koj txo kom cov neeg hais lus cuav ploj mus tag.
Cov neeg txo luag roj ntsha thiab cov neeg dag,
HUAB TAIS ntxub lawv tas siab nrho.

Txais: (2b) Huab Tais, thov koj mloog kuv lub suab nroo.

As Les Lus Yas: NPN 119: 105

Txais: As les lus yas, as les lus yas.

Koj lo lus yog lub teeb tsom kuv ko taw taug kev,
yog qhov pom kev kaj kuv txoj xub ke.

Txais: As les lus yas, as les lus yas.

Ntawv Moo Zoo: MT 5: 38-42

Yes Xus hais tias:
38 Nej tau hnov tej lus qhia tias : Qhov muag pauj qhov muag, kaus hniav pauj kaus hniav. 39 Hos kuv hais rau nej tias : nej tsis txhob nrog tus neeg phem sib cav. Yog leej twg ib ncuav pias rau koj sab plhu xis, mas koj yuav tig koj sab plhu laug rau nws thiab. 40 Yog leej twg xav ua plaub rau koj kom tau koj lub tsho hnav, mas koj muab koj lub tsho tshaj sab ntxiv rau nws thiab. 41 Yog leej twg thov koj xa nws mus ib ncuas kev , mas koj nrog nws mus ob ncuas. 42 Yog leej twg thov koj ib yam, mas koj muab pub rau nws. Yog leej twg xav txais nyiaj ntawm koj, mas koj txhob tig nraub qaum rau nws.

TIM 14 LUB 6 HLI 2016

Hnub Peb Lis Piam Kaum Ib Nruab Xyoo C Nruab Lis Piam Xyoo II

Zaj Nyeem Ib: 1 VAJ 21: 17-29

Thaum Nas Npos tuag lawm,
17 HUAB TAIS hais rau Es Lias uas nyob Tis Npis tias : 18 "Koj cia li sawv kev nqes mus cuag tus vaj His Xas Lais As Kas nyob Xas Mas Lias teb. Koj yuav mus pom nws nyob hauv Nas Npos lub vaj txiv cawv, nws mus rau nrad mus txeeb lub vaj los ua nws tug. 19 Koj yuav mus hais li no rau nws : "HUAB TAIS hais li no: 'Koj tua tus neeg tuag thiab koj tseem txeeb nws tug yuav ! Vim li ntawd, Huab Tais hais tias: nyob ntawm qhov chaw uas cov dev yaim Nas Npos cov ntshav, mas dev kuj yuav yaim koj cov ntshav thiab." 20 As Kas hais rau Es Lias tias : "Kuv tus yeeb ncuab aw, koj ntes tau kuv lawm lod?" Es Lias teb tias : "Kuv ntes tau koj lawm tiag, vim koj ua tsis ncaj, koj ua qhov tsis ntxim HUAB TAIS siab. 21 Kuv yuav tso kev puas tsuaj tuaj raug koj. Kuv yuav cheb koj caj ces neeg pov tseg kom tas, kuv yuav tsis pub kom As Kas tsev neeg seem ib tug noob cia nyob His Xas Lais teb li, tsis hais cov ua qhev los cov twj lij li. 22 Kuv yuav ua rau koj tsev neeg ib yam li kuv tau ua rau Yes Los Npuag uas yog Nes Npas tub thiab Npas Sas uas yog As His Zas tub nkawd ob tsev neeg, vim koj tau ua kom kuv npau taws thiab koj coj His Xas Lais mus ua txhaum." (23 HUAB TAIS kuj foom ib lo lus phem rau Zes Xas Npes tias: “Dev yuav sib huas dua Zes Xas Npes nyob hauv thaj teb nyob Yes Les Ees.) 24 “Nyob hauv As Kas tsev neeg, tus twg tuag nyob hauv nroog mas dev yuav noj nws, tus twg tuag nyob tom tej nras teb mas cov dav yuav noj nws.“

25 Tsis tau muaj dua ib tug neeg ua phem npaum li As Kas ua li. Nws ua tej yam tsis haum HUAB TAIS siab vim yog nws tus poj niam txhob kom nws ua. 26 Nws coj raws ib txog kev phem kawg nkaus, nws mus teev dab zoo nkaus li cov As Mos Lis uas HUAB TAIS ntaus lawv tawg tas kom lawv swb rau cov His Xas Lais.

27 Thaum As Kas hnov cov lus ntawd, As Kas dua rhe nws cev khaub ncaws, nws mus hnav ntaub tsaj ntxhib ntxhib npuab nws cev nqaij, nws yoo mov thiab nws pw hauv cov ntaub tsaj. Nws maj mam mus kev qeeb qeeb. 28 Ces HUAB TAIS hais rau Es Lias tias : 29 "Koj puas pom tias As Kas yeem ua tus neeg me nyob ntawm kuv xub ntiag lawd? Vim nws yeem ua tus me li ntawd mas kuv yuav tsis tso xwv txheej los raug nws thaum nws tseem ua neej nyob; kuv yuav tso xwv txheej los raug nws tsev neeg yog thaum lub caij nws tus tub sawv los ua vaj."

NPN 51: 3-4, 5-6AB, 11 + 16

Txais: (3a) Tswv Ntuj, thov koj khuv leej peb vim peb tau ua txhaum lawm.

Tswv Ntuj, thov koj khuv leej kuv, vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas
thiab koj muab kuv qhov txhaum tshem mus kom kuv dawb huv tuaj.

Txais: (3a) Tswv Ntuj, thov koj khuv leej peb vim peb tau ua txhaum lawm.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais: (3a) Tswv Ntuj, thov koj khuv leej peb vim peb tau ua txhaum lawm.

Thov koj fee ntsej muag mus deb ntawm kuv cov txhaum,
koj so kuv cov txhaum pov tseg huv tib si
Tswv Ntuj, kuv tus Tswv Ntuj Cawm neeg, thov koj npo kuv ntawm lub txim tua neeg ;
kuv ncauj nplaig yuav cav txog koj txoj kev ncaj !

Txais: (3a) Tswv Ntuj, thov koj khuv leej peb vim peb tau ua txhaum lawm.

As Les Lus Yas: ZAM 13: 34

R. Alleluia, alleluia.

"Kuv muab ib lo lus qhia tshiab rau nej : yam li nej yuav sib nyiam sib hlub. Nej yuav rov sib nyiam sib hlub ib yam li kuv tau nyiam nej
I give you a new commandment:
love one another as I have loved you.

R. Alleluia, alleluia.

Ntawv Moo Zoo: MT 5: 43-48

Yes Xus hais tias:
43 "Nej tau hnov tej lus hais tias : Koj yuav nyiam tus nyob ze koj, koj yuav ntxub koj tus yeeb ncuab. 44 Tab sis, kuv hais rau nej tias : nej yuav nyiam nej cov yeeb ncuab, nej yuav thov Ntuj rau cov tsim txom nej ; 45 nej thiaj yuav yog nej Txiv nyob saum ntuj cov tub ; vim nws ua kom nws lub hnub tawm tuaj ziab cov neeg phem thiab cov neeg zoo, thiab nws ua kom nag los rau cov siab ncaj thiab cov siab nkhaus tib si. 46 Vim yog nej nyiam cov neeg nyiam nej xwb, mas nej yuav tau koob haum dab tsi ? Tab yog cov sau se, lawv kuj txawj nyiam li ntawd thiab puas yog? 47 Yog nej tshwj zias nej cov lus zoo rau nej cov kwv tij xwb, mas nej tau ua dab tsi zoo tshaj luag ? Tab yog cov neeg teev pej kum dab, los lawv kuj txawj ua li ntawd thiab. 48 Ntawm nej, mas nej yuav ua neeg zoo txhij zoo txhua, ib yam li nej Txiv nyob saum ntuj nws zoo txhij zoo txhua.”

TIM 15 LUB 6 HLI 2016

Hnub Plaub Lis Piam kaum ib Nruab Xyoo C Nruab Lis Piam Xyoo II

Zaj Nyeem Ib: 2 VAJ 2: 1, 6-14

1 HUAB TAIS xa ib lub khaub zeeg cua tuaj nqa Es Lias mus saum ntuj mas yog zoo li no : Es Lias thiab Es Lis Xais nkawd sawv kev tawm hauv Zis Nkas mus.
6 Es Lias hais rau Es Lis Xais tias : "Koj nyob ntawm no, HUAB TAIS tsuas hais kom kuv mus txog tus dej Yos Las Das xwb." Tab sis Es Lis Xais teb tias : "Kuv cog lus tias ib yam li Huab Tais muaj txoj sia thiab koj muaj txoj sia, kuv yuav tsis tso koj tseg li." Ces nkawd ob leeg mus ntxiv. 7 Muaj tsib caug leej hauv lub koom haum yaj saub caum nkawd qab tuaj, lawv tuaj nres nyob nrug deb me ntsis ntawm nkawd thaum nkawd tab tom mus sawv ze ntawm tus ntug dej Yos Las Das. 8 Es Lias hle nws lub tsho tshaj sab, nws muab kauv zoj ua ib tug ces nws muab nplawm cov dej. Tus dej cia li faib ua ob sab nyob sab laug thiab sab xis, ces nkawd hla dej ko taw tsis ntub dej li. 9 Thaum nkawd hla dhau lawm, Es Lias hais rau Es Lis Xais tias : "Koj thov saib kuv ua puas tau dab tsi pab koj, cheem luag tseem tsis tau tshem kuv ntawm koj mus ?" Es Lis Xais teb tias : "Kuv thov kom kuv tau txais ob npaug ntawm koj lub tswv yim los ua kuv tug." 10 Es Lias hais tias : "Koj thov ib yam nyuaj ! Yog koj pom kuv nce mus saum ntuj mas koj yuav tau txais li koj thov. Yog koj tsis pom mas koj yuav tsis tau txais."
11 Ces nkawd mus ntxiv, nkawd ke tham ke taug kev. Cia li muaj ib lub tsheb hluav taws thiab ib co nees hluav taws tawm plaws tuaj nyob ntawm nkawd kis nruab nrab. Ces Es Lias nce hlo saum lub tsheb thiab nrog lub khaub zeeg cua ya mus dua saum ntuj lawm. 12 Es Lis Xais pom Es Lias mus, nws qw tias : "Kuv Txiv ! Kuv Txiv ! His Xas Lais lub tsheb thiab nws cov nees xob nees cua!" Ces Es Lis Xais tsis pom ntxiv lawm. Es Lis Xais nthos nkaus nws lub tsho muab dua rhe ua ob daig. 13 Nws khaws nkaus Es Lias lub tsho tshaj sab uas poob rau hauv av lawm. Ces nws rov qab los sawv ntawm ntug dej Yos Las Das. 14 Nws muab Es Lias lub tsho los nplawm cov dej nws qw nrov nrov tias : " HUAB TAIS Es Lias tus Tswv Ntuj nyob qhov twg ?" Nws ntaus cov dej, dej cia li faib kiag ua ob sab nyob sab laug thiab sab xis, ces Es Lis Xais hla dej los lawm.

NPN 31: 20, 21, 24

R. (25) Tas ib tsoom neeg uas tso siab rau HUAB TAIS, nej cia li ua siab loj !

HUAB TAIS, koj muaj lub siab zoo tas nrho ,
Koj tshwj zias ua zoo rau cov neeg hwm koj,
Koj pab cov uas tuaj khaub zig koj,
Koj tab meeg pab lawv rau tib neeg pom.

R. (25) Tas ib tsoom neeg uas tso siab rau HUAB TAIS, nej cia li ua siab loj !

Koj coj lawv mus nkaum nyob ntawm koj xub ntiag
kom deb ntawm neeg tej kev ua siab phem.
Koj coj lawv mus nraim deb ntawm
tus nplaig nkhaus tsawm neeg.

R. (25) Tas ib tsoom neeg uas tso siab rau HUAB TAIS, nej cia li ua siab loj !

Tas nej cov neeg hwm HUAB TAIS, nej nyiam nws mog !
HUAB TAIS txuag cov ntseeg nws mus li,
hos nws nplua tus muab hlob ti txha nkaus.

R. Let your hearts take comfort, all who hope in the Lord.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws,
kuv Txiv wb yuav los nyob hauv nws.

Txais: As les lus yas, as les lus yas.

Ntawv Moo Zoo: MT 6: 1-6, 16-18

Yes Xus hais rau nws cov thwj tim tias:
1 Nej ceev faj, nej txhob ua ncaj nyob ntawm neeg xub ntiag xwb, kom luag qhuas nej. Yog nej ua li ntawd, mas nej yuav tsis txais koob haum ntawm nej Txiv nyob saum ntuj. 2 Thaum koj pub rau luag, koj txhob tshuab hom ua koj ntej. Cov neeg zoo sab nraud ua li ntawd nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm. 3 Hos koj, mas thaum koj pub rau luag, koj txhob cia koj sab tes laug paub qhov uas sab tes xis ua. 4 Li ntawd, tsis muaj neeg paub tias koj tau pub. Ces koj Txiv uas nws pom hauv qhov chaw nraim yuav pauj rau koj. 5 "Thaum nej teev Ntuj, nej txhob ua li cov neeg zoo sab nraud : lawv nyiam sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm. 6 Hos koj, mas thaum koj teev Ntuj, koj mus nyob twj ywm hauv koj kem txaj, kaw koj qhov rooj ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
16 Thaum nej yoo mov, nej txhob ua ntsej muag ntshaus xws li cov neeg zoo sab nraud : lawv ua ntsej muag mluas mluas, kom luag pom meej tias lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm. 17 Hos koj, mas thaum koj yoo mov, koj yuav pleev tshuaj tsw qab saum taub hau, koj ntxuav muag, 18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv pom hauv qhov chaw nraim yuav pauj rau koj.