Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» COV ZAJ NYEEM NRUAB LIS PIAM XYOO I 2016-2017
by Mim Today at 6:17 am

» COV ZAJ NYEEM HNUB CHIV XYOO A 2016-2017
by NrhiavTswvNtuj 8th December 2016, 12:32 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 8th December 2016, 12:26 pm

» XH. Yaj Zoov Ntxheb lub Tsev THOOB TSIB
by Maiv Tooj 8th December 2016, 12:18 pm

» Xib Hwb Thoj Xyooj lub neej
by Maiv Tooj 6th December 2016, 10:30 pm

» Thov Leej Ntshiab YOS XES
by Maiv Tooj 3rd December 2016, 10:36 am

» COV ZAJ NYEEM NRUAB LIS PIAM XYOO II, 2015-2016
by Mim 2nd December 2016, 1:29 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO II, 2015-2016

    Share

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 31st October 2016, 9:28 am

    TIM 1 LUB 11 HLIS 2016

    Hnub Peb Lis Piam Peb Caug Ib Nruab Xyoo C Nruab Lis Piam Xyoo II

    Hwm tas ib tsoom Leej Ntshiab - Yog ib hnub uas tsoom ntseeg yuav tsum mus teev ntuj ib yam li Hnub Chiv (Holiday of Obligation/ Fête d’Obligation).


    Zaj Nyeem Ib: QYTN 7: 2-4, 9-14


    2 Kuv, Zam, rov pom dua ib tug Tshiab tawm sab Toob Fab tuaj ; nws nqa tus Tswv Ntuj muaj txoj sia lub thwj. Nws hu ib suab nrov nrov rau plaub tug Tshiab uas tau txais txoj hauj lwm tso xwv txheej rau lub ntiaj teb tias : 3 “Nej txhob rawm tso xwv txheej mus rau lub ntiaj teb, los lub hiav txwv, los tej ntoo. Tos peb ntaus cim rau saum Tswv Ntuj cov tub txib hauv pliaj tso.” 4 Ces kuv hnov tias lawv ntaus cim rau npaum no leej : ib puas plaub caug plaub txhiab leej nyob hauv tas nrho cov xeem His Xas Lais.
    9 Dhau tej ntawd tas lawm, kuv pom ib pab neeg coob coob suav tsis txheeb; muaj tas txhua teb chaws, txhua haiv neeg, txhua xeem lus tib si nyob hauv. Lawv sawv ntsug ze ntawm lub theej kiab, nyob ntawm Leej Yaj xub ntiag. Lawv hnav tsho dawb ntev, thiab tuav tej rev nplooj ntoo txoob ntawm tes. 10 Lawv ua ib suab qw nrov nrov muaj ceem tias : “Kev cawm seej yog peb tus Tswv Ntuj uas nws zaum saum lub theej kiab tug, thiab yog Leej Yaj tug !” 11 Ces tas tsoom Tshiab uas sawv ncig lub theej kiab, ncig cov txwj laus thiab plaub Leeg Muaj Txoj Sia, lawv txhos caug, ntsej muag khoov ti av pe Tswv Ntuj. 12 Lawv hais tias : “Lo Lus cav, lub hwj chim, kev thoob tsib, kev ua tsaug, kev nto koob meej, kev muaj hwj huam thiab muaj zog yog peb tus Tswv Ntuj li, mus tas ib txhiab ib txhis ! Ua li.” 13 Ib tug txwj laus txawm hais rau kuv tias : “Cov neeg uas hnav tsho dawb ntev ntawd yog leej twg ? Lawv tuaj qhov twg tuaj ?” 14 Kuv teb tias : “Huab Tais, yog koj thiaj paub xwb.” Nws rov hais tias : “Lawv yog cov uas hla dhau txoj kev raug luag hiam hnyav los. Lawv tau ntxhua lawv cov tsho ntev, thiab muab raus Leej Yaj cov ntshav kom dawb.”

    NPN 24: 1BC-2, 3-4AB, 5-6

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Lub ntiaj teb thiab puas tsav yam nyob hauv yog HUAB TAIS li,
    lub sim ceeb thiab cov nyob hauv yog nws tug.
    Vim nws yog tus tsim lub ntiaj teb los txawb rau saum cov hiav txwv
    thiab muab tso rau saum cov dej ntws.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Leej twg thiaj yuav nce tau saum HUAB TAIS lub roob?
    Los leej twg thiaj yuav mus sawv taus nyob hauv nws thaj chaw ntshiab?
    Yog tus uas txhais tes tsis muaj txhaum, lub siab dawb huv,
    tus uas tsis ntshaw tej yam tsis muaj qab hau.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    HUAB TAIS yuav foom koob hmoov rau nws. ,
    yog paj tshab tuaj ntawm Tswv Ntuj tus cawm nws tuaj.
    Lawv yuav zoo li no, tsav neeg uas nrhiav Tswv Ntuj,
    cov uas nrhiav Yas Kos tus Tswv Ntuj lub ntsej muag.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Zaj Nyeem Ob: 1 ZAM 3: 1-3

    Cov zoo nyiad,
    1 Nej ntsia saib, Leej Txiv txoj kev hlub peb loj tas npaum no, peb thiaj tau lub npe hu ua Tswv Ntuj cov me nyuam; peb yeej yog Tswv Ntuj cov me nyuam tiag tiag! Tos lub ntiaj teb tsis paub peb los vim lawv twb tsis paub Tswv Ntuj.
    2 Cov zoo nyiad, zaum no peb yog Tswv Ntuj cov me nyuam lawm. Qhov uas yav tom ntej peb yuav plhis mus zoo li cas, tseem tsis tau tawm los rau peb qhov muag pom xyeem. Peb paub tau tias, thaum qhov ntawd tawm los rau peb qhov muag pom, mas peb yuav zoo li Leej Pleev, vim nws zoo li cas mas peb yuav pom Nws zoo li ntawd. 3 Tus twg tso siab rau Leej Pleev, mas nws kuj yuav dawb huv tuaj, vim Leej Pleev yog tus dawb huv.

    As Les Lus Yas: MT 11: 28

    Txais: As les lus yas, as les lus yas.

    Huab Tais hais tias: “Nej tuaj cuag kuv mog, tas nej sawv daws
    uas nej khwv thiab ris nra hnyav! Kuv yuav cia nej so los siav.

    Txais: As les lus yas, as les lus yas.

    Ntawv Moo Zoo: MT 5: 1-12A

    1 Yes Xus pom neeg coob coob tuaj, nws nce mus saum lub roob. Nws zaum, cov thwj tim txav los ze Yes Xus. 2 Ces Yes Xus tsa ncauj qhia lawv hais tias : 3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. 4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. 5 Cov tau txoj hmoov zoo, yog cov quaj ntsuag, vim Ntuj yuav nplij lawv. 6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. 7 Cov tau txoj hmoov zoo, yog cov hlub luag tej, vim Ntuj yuav hlub lawv. 8 Cov tau txoj hmoov zoo, yog cov siab daw huv, vim lawv yuav pom Tswv Ntuj. 9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam. 10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. 11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. 12 Nej zoo siab thiab nej hom khaj mog, vim nej yuav tau txais koob haum loj nyob saum ntuj.”



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 1st November 2016, 10:48 am

    TIM      2     LUB     11     HLIS      2016

    Hnub Plaub Lis Piam Peb Caug Ib Nruab Xyoo C Nruab Lis Piam Xyoo II

    Nco txog tas ib tsoom ntseeg tau tas sim neej lawm (All Souls/Fête des Morts)




    Zaj Nyeem Ib:     THOOB TSIB  3:   1-9


    1 Cov neeg ncaj tus ntsuj plig nyob hauv Tswv Ntuj txhais tes, tsis muaj ib yam xwv txheej dab tsi yuav raug tau lawv. 2 Cov neeg tsis muaj tswv yim xav tias cov neeg ncaj tuag lawm, lawv txoj kev ncaim mus yog ib yam xwv txheej loj, 3 thiab lawv txoj kev tawm rooj mus deb ntawm peb, yog ib txog kev puas tsuaj loj. Tab sis cov neeg ncaj ntawd nyob hauv kev thaj yeeb lawm. 4 Tib neeg xav tias yog cov neeg siab ncaj raug txim loj, tab sis lawv mas lawv tso siab lug tias lawv muaj txoj sia nyob mus li. 5 Lawv raug ib txog kev txom nyem sib, tab sis lawv yuav txais txiaj ntsim koob hmoov loj. Tswv Ntuj yeej tau sim lawv tiag, ces nws pom tias lawv tsim nyog ua nws tug. 6 Tswv Ntuj tau sim cov neeg siab ncaj zoo li sim kub nyob hauv lub yeej vub, nws tau pom zoo txais lawv zoo li thaj txi Ntuj zoo txhij zoo txhua. 7 Thaum txog lub caij Tswv Ntuj tuaj xyuas lawv, mas lawv yuav ci ntsa iab; lawv yuav khiav nrawm cuag li hluav taws ri mus kis tej roob nqeeb qhuav. 8 Lawv yuav txiav txim rau cov kuj cuab, lawv yuav tswj cov haiv neeg, Huab Tais yuav yog lawv tus vaj mus ib txhis. 9 Cov neeg tso siab rau Huab Tais yuav to taub txoj kev tseeb, cov neeg npuab Huab Tais yuav nyob ze nws hauv txoj kev nyiam: Vim Huab Tais tshwj zias nws lub txiaj ntsim thiab nws txoj kev khuv leej rau nws cov ntshiab, thiab nws txoj kev hlub tshua rau nws cov xaiv.

    NPN      23:   1-3A, 3B-4, 5, 6

    Txais:    (1) Huab Tais yog tus tswv zov yaj saib kuv, kuv yuav tsis tshaib dab tsi li.  
    Los:     (4) Txawm kuv taug kev hauv ib lub hav tsaus nti,
    los kuv tsis ntshai dab tsi phem, vim koj nrog nraim kuv.

    HUAB TAIS  yog tus tswv zov yaj saib kuv,
    kuv yuav tsis tshaib txog dab tsi.  
    Nws cia kuv so nyob hauv tej tshav zaub mos ntsuab xiab;  
    Nws coj kuv mus nyob ze cov dej tus yees;  
    nws ua kom kuv tus ntsuj plig muaj zog.  

    Txais…

    Nws coj kuv mus taug txoj kev ncaj, vim nws lub npe.
    Txawm kuv taug kev hauv ib lub hav tsaus nti,
    kuv tsis ntshai dab tsi phem; vim koj nyob rawv ntawm kuv ib sab,
    koj rab nplawm thiab rab pas nrig ua kuv luag.

    Txais…

    Koj rau ib rooj mov rau ntawm kuv xub ntiag
    rau kuv cov yeeb ncuab ntsia ntsoov;
    koj muab roj pleev kuv taub hau;
    kuv lub ntim puv phwj yaws.

    Txais…

    Txiaj ntsim thiab kev zoo siab raws kuv nraim
    niaj hnub hauv kuv lub neej;
    Kuv lub chaw  nyob yog hauv HUAB TAIS tsev
    mus kom tas cov hnub nyoog.

    Txais…

    Zaj Nyeem Ob:     LOS MAS  5:   5-11

    Paj Lug sau ntawv tias:
    5 Kev tso siab ua kom peb tsis muaj chaw khuv xim, vim Leej Ntuj Plig Ntshiab, uas Ntuj pub rau peb, nws hliv Tswv ntuj txoj kev nyiam rau hauv peb lub siab. 6 Vim tias thaum lub sij hawm peb tsis muaj zog, thaum txog lub hnub nyoog teem tseg, yog thaum ntawd Leej Pleev thiaj tau tuag kom tau pab cov neeg tsis hwm Ntuj. 7 Yog yuav tsum tuag kom tau pab ib tug neeg ncaj, mas yus twb txiav txim siab nyuaj; yog yuav tuag kom tau pab ib tug neeg siab zoo mas nyaj tej zaum yus yuav muaj peev xwm zog. 8 Tiam sis yam uas zeem tseeb tias Tswv Ntuj hlub peb yog qhov tias thaum peb tseem yog neeg txhaum, Leej Pleev tuag kom tau pab peb. 9 Nyem no peb twb muaj kev ncaj nyob hauv Leej Pleev cov roj ntsha lawm, mas nws haj yam yuav cawm peb ntawm Ntuj txoj kev npau taws. 10 Yog tias thaum peb tseem ua yeeb ncuab rau Tswv Ntuj, nws Leej Tub txoj kev tuag twb ua kom peb nrog Tswv Ntuj rov sib haum xeeb, mas nyem no thaum peb nrog Tswv Ntuj rov sib haum xeeb lawm, mas Tswv Ntuj Leej Tub txoj sia haj yam yuav cawm tau peb. 11 Tsis tas li xwb, peb tseem khav tau tias peb nyob hauv Tswv Ntuj vim peb tus Huab Tais Yes Xus Pleev, tus uas tau ua kom zaum no peb muaj kev haum xeeb  nrog Tswv Ntuj.

    Los     LM  6:   3-9

    Paj Lug sau ntawv tias:
    3 Nej puas paub txog tias thaum peb tau txais lub Cim Ntxuav nyob hauv Yes Xus Pleev, mas kuj yog peb sawv daws tau txais lub Cim Ntxuav nyob hauv Yes Xus txoj kev tuag thiab? 4  Li ntawd thaum peb txais lub Cim Ntxuav peb kuj nrog Yes Xus tuag mus zwm ntxa thiab, kom, ib yam li Leej Pleev tau sawv hauv cov tub tuag rov los vim Leej Txiv lub hwj huam tau tsa nws sawv, peb kuj yuav tau coj dua ib lub neej tshiab thiab. 5 Vim tias yog peb nrog Leej Pleev koom ua ib tug nyob hauv txoj kev tuag zoo li nws txoj, mas peb kuj yuav nrog Leej Pleev koom ib txoj kev sawv rov los thiab. 6 Peb yuav tsum to taub tias peb tus qub neeg raug muab ntsia nrog Yes Xus dai saum ntoo cuam lawm, kom peb lub cev uas xib rau kev txhaum tsis txhob muaj zog kav peb, peb thiaj tsis txhob ua kev txhaum cov qhev ntxiv. 7 Vim tias tus neeg tuag tau txais kev zam nws cov txhaum tas lawm. 8 Tab sis, yog peb tau nrog Leej Pleev tuag mas peb ntseeg tias peb yuav tau nrog nws muaj txoj sia nyob thiab. 9 Peb paub tias Leej Pleev tau sawv hauv qhov tuag los lawm, nws yuav tsis tuag ntxiv, txoj kev tuag tsis muaj cuab kav tuaj raug nws ib zaug ntxiv.

    As Les Lus Yas: MT  25:   34

    Txais:    As les lus yas, as les lus yas.

    Nej los mog ! Nej cov uas kuv Txiv pub txoj hmoov zoo rau nej,
    los txais lub Ceeb Tsheej uas yeej npaj tseg rau nej
    txij puag thaum pib tsim lub sim ceeb los lawm ua nej tug.

    Txais:    As les lus yas, as les lus yas.

    Ntawv Moo Zoo:      ZAM  6:   37-40

    Yes Xus hais rau cov neeg tias:
    37 “Txhua yam uas kuv Txiv muab rau kuv yuav los cuag kuv. Hos tus tuaj cuag kuv, kuv yuav tsis ntiab nws rau nraum zoov. 38 Vim kuv nqes saum ntuj los, tsis yog los ua ywj kuv siab, yog los ua raws li Tus Xa kuv tuaj lub siab. 39 Tus Xa kuv tuaj lub siab xav yog zoo li no : Kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los. 40 Qhov uas kuv Txiv nyiam yog zoo li no : kom leej twg pom Leej Tub thiab ntseeg txog Leej Tub, mas nws yuav muaj txoj sia nyob mus li, thiab Hnub Kawg, kuv yuav tsa nws sawv rov los."

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 3rd November 2016, 7:12 pm

    TIM      3     LUB     11     HLIS      2016

    Hnub Tsib Lis Piam Peb Caug Ib Nruab Xyoo C Nruab Lis Piam Xyoo II
    Hwm LN Martin de Porres

    Zaj Nyeem Ib:     FIS LIS POS  3:   3-8A


    Paj Lug sau ntawv tias:
    3 Peb thiaj yog cov txais lub cim txiav tiag, vim peb yog cov cev ib txoj kev teev Ntuj raws li Tswv Ntuj lub Tswv Yim thiab peb tau koob meej yog nyob hauv Yes Xus Pleev, tsis yog vim peb tso siab rau lub cev nqaij. 4 Tsis kav yog hais txog lub cev xwb mas twb phim kuv muaj cai tso siab rau lub cev kawg ; yog muaj tej tus xav tias, lawv muaj cai tso siab rau lub cev, mas kuv yog tus haj yam muaj cai! 5 Kuv yug los puv yim tag kis xwb, kuv twb txais lub cim txiav lawm, kuv yug hauv haiv neeg His Xas Lais, hauv lub xeem Npes Yas Mis; kuv yog ib tug neeg Hes Nplaws, yug ntawm niam txiv Hes Nplaws los; hais txog ntawm Txoj Cai, kuv yog ib tug Fas Lis Xais;  6 hais txog txoj kev kub siab, kuv yog ib tug tau hiam lub Koom Txoos loj; hais txog txoj kev ncaj raws li Txoj Cai kom ua, mas kuv yog ib tug neeg coj tau zoo tshaj plaws. 7 Tiam sis tej paj tshab uas kuv tau txais ntawd, mas nyem no kuv saib yog tej yam tsis muaj nqes, vim Leej Pleev. 8 Tseem tshaj ntawd thiab, nyem no kuv saib txhua yam yeej tsis muaj nuj nqis dab tsi li, yog muab piv rau yam uas muaj nuj nqe loj tas nrho, uas yog txoj kev paub Yes Xus Pleev, kuv tus Huab Tais.

    NPN      105:   2-3, 4-5, 6-7

    Txais:    (3b)  Cov uas muaj lub siab nrhiav Huab Tais yuav ntsib kev zoo siab.

    Nej hu nkauj rau nws, nej hu nkauj cav txog nws,
    nej tshaj tawm txog tej yam loj nws tau ua.
    Nej txais koob meej nyob hauv nws lub npe,
    nej cia li zoo siab, nej cov uas muaj lub siab nrhiav HUAB TAIS

    Txais:    (3b)  Cov uas muaj lub siab nrhiav Huab Tais yuav ntsib kev zoo siab.

    Nej nrhiav Huab Tais thiab nws lub zog,
    nej nrhiav kom tau tsob hwb nws txhua sij hawm.
    Nej nco ntsoov txog cov hwj huam txaus qhuas nws tau ua,
    nws cov hauj lwm loj, thiab cov lus txiav txim nws lub ncauj tau hais.

    Txais:    (3b)  Cov uas muaj lub siab nrhiav Huab Tais yuav ntsib kev zoo siab.

    Nej yog Has Nplas Has tsoom xeeb ntxwv, nws cov tub txib,
    yog Yas Kos cov tub, nws pab neeg nws tau xaiv!
    Huab Tais nws yog peb tus Tswv Ntuj,
    tas ntiaj teb yuav raws li nws txiav.

    Txais:    (3b)  Cov uas muaj lub siab nrhiav Huab Tais yuav ntsib kev zoo siab.

    As Les Lus Yas:       MT  11:   28

    Txais:   As les lus yas, as les lus yas.

    Huab Tais hais tias: “Tas nej sawv daws uas nej khwv
    thiab ris nra hnyav, nej tuaj cuag kuv, kuv yuav cia nej so los siav.

    Txais:   As les lus yas, as les lus yas.

    Ntawv Moo Zoo:     LK  15:   1-10

    1 Cov neeg sau se thiab cov neeg txhaum sawv daws txav los ze kom tau mloog Yes Xus hais lus. 2 Tiam sis cov Fas Lis Xais thiab cov Kws Ntawv Ntshiab pib yws zom zaws tias : "Tus neeg ntawd txais cov neeg txhaum thiab nws tseem nrog lawv noj mov tib si !" 3 Yes Xus thiaj hais zaj paj lug no rau lawv tias: 4 " Nej puas muaj leej twg, yog nws muaj ib puas tus yaj, tab sis ib tug ploj lawm, nws yuav kav liam tsis tso cuaj caum cuaj tug tseg rau tom hav suab puam, es mus nrhiav kom tau tus uas ploj lawd? 5 Thaum nws nrhiav tau tus yaj ploj, nws muab kwv hlo saum xwb pwg, nws zoo siab tas nrho. 6 Nws los txog tsev, nws yuav nqua hu nws cov phooj ywg thiab cov nyob ze nws tuaj, nws hais rau lawv tias : 'Nej nrog kuv zoo siab, vim kuv nrhiav tau kuv tus yaj poob zoo lawm.' 7 Ib yam li ntawd, kuv hais rau nej tias, nyob saum ntuj kuj yuav muaj kev zoo siab loj rau ib tug neeg txhaum uas hloov siab los ntxub kev txhaum, dua rau cuaj caum cuaj leeg siab ncaj uas tsis tas yuav hloov siab los ntxub kev txhaum.”
    8 “Los, puas muaj ib tug poj niam twg uas nws muaj kaum lub txiaj nyiag, yog ib lub poob lawm, nws yuav tsis taws teeb cheb tsev, ua tib zoo nrhiav kom tau nws lub txiaj nyiag? 9 Thaum nws nrhiav tau lawm, nws nqua hu nws cov phooj ywg thiab cov nyob ze nws tuaj, nws hais tias : ‘Nej nrog kuv zoo siab mas ! Vim kuv nrhiav tau lub txiaj uas poob lawm !’ 10 Ib yam li ntawd, kuv hais rau nej tias, yuav muaj kev zoo siab loj nyob hauv Tswv Ntuj tsoom Tshiab, yog tias ib tug neeg txhaum hloov siab tig los ntxub kev txhaum.”


    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 4th November 2016, 10:13 am

    TIM 4 LUB 11 HLIS 2016

    Hnub Rau Lis Piam Peb Caug Ib Nruab Xyoo C Nruab Lis Piam Xyoo II

    Thawj Hnub Rau. Hwm LN Charles Borromeo, ua Tswv Qhia

    Zaj Nyeem Ib: FIS LIS POS 3: 17—4:1


    Paj Lug sau ntawv tias:
    17 Cov kwv tij, nej yuav yoog raws li kuv tus lwj lwm mog, nej saib ntsoov cov neeg uas coj raws nraim li peb tus piv txwv. 18 Vim tias, raws li kuv twb tau hais rau nej ntau zaus los lawm thiab kuv tseem rov hais dua rau nej hnub no ntxuag lub kua muag tias, muaj coob leej coj xws li yog ib co yeeb ncuab ntxub Leej Pleev tus ntoo cuam. 19 Cov neeg ntawd, kawg yuav xaus rau kev poob phem. Lawv tus tswv ntuj yog lawv lub plab. Lawv txoj kev nto koob meej yog nyob hauv lawv qhov kev txaj muag. Lawv tsuas nyiam tej yam nyob ntiaj teb nkaus xwb. 20 Ntawm peb, mas peb lub tsheej yog nyob saum ntuj; peb tos ntsoov tias Huab Tais Yes Xus Pleev yuav tuaj saum ntuj tuaj cawm peb. 21 Nws yuav muab peb lub cev txom nyem no hloov ua ib lub cev muaj hwj chim xws li nws lub, vim tias nws muaj hwj huam ua tau kom txhua tsav txhua yam zwm rau nws.
    4 1 Kuv cov kwv tij zoo nyiam thiab hmov tshua, nej yog kuv qhov chaw zoo siab, yog kuv lub koob meej, nej nyob ruaj nreb hauv Huab Tais mog, kuv cov mi kwv tij zoo nyiad.

    NPN 122: 1-2, 3-4AB, 4CD-5

    Txais: (1) Tuaj peb zoo siab hlo mus lawm pem Huab Tais tsev.
    los: As les lus yas.

    Kuv zoo siab vim lawv hais rau kuv tias:.
    "Peb yuav nce mus lawm pem Huab Tais tsev.”
    Nim no, peb txhais taw tau tsuj
    koj cov rooj loog lawm os Yes Lus Xas Les.

    Txais…

    Yes Lus Xas Les, luag txhim zoo li ib lub nroog
    Uas zoo tau xwm yeem.
    Cov xeem neeg nce mus pem nws,
    Yog Huab Tais cov xeem neeg

    Txais…

    Lawv nce mus raws li txoj cai qhia rau His Xas Lais,
    Kom tau cav txog Huab Tais lub Npe.
    Nyob ntawd muaj ib co rooj txiav txim teeb tau tseg,
    Yog cov rooj cia rau Das Vis tsev neeg.

    Txais…

    As Les Lus Yas: 1 ZAM 2: 5

    Txais: As les lus yas, as les lus yas.

    Yog tus twg coj Leej Pleev cov lus qhia,
    mas txoj kev nyiam Tswv Ntuj loj tiav nyob hauv nws lawm.

    Txais: As les lus yas, as les lus yas.

    Ntawv Moo Zoo: LK 16: 1-8

    1 Yes Xus tseem hais rau cov thwj tim tias : "Muaj ib tug neeg nplua nuj, nws muaj ib tug tim xyoob xam txiaj. Luag qhia tus tswv tias tus tim xyoob muab nws tej nyiaj txiag siv lwj siv liam. 2 Tus tswv hu tus tim xyoob tuaj, nws hais rau tus tim xyoob tias : ‘Kuv hnov hais dab tsi li no txog koj ? Koj qhia txog tas puas tsav yam rau kuv saib koj siv kuv tej nyiaj txiag li cas rau li cas. Txij no mus, koj yuav tsis tau ua kuv tus xam txiaj ntxiv.’ 3 Tus tim xyoob xav zoj rau nruab siab tias : Kuv yuav ua li cas, vim kuv tus tswv yuav tshem txoj hauj lwm xam txiaj ntawm kuv mus? Mus ncaws teb ? Kuv tsis muaj zog. Mus thov khawv ? Kuv kuj txaj muag... 4 Kuv paub lawm tias kuv yuav ua dab tsi, kom thaum luag tshem kuv ntawm txoj hauj lwm xam txiaj lawm, thiaj yuav muaj neeg txais kuv mus nyob hauv lawv tsev. 5 Ces tus tim xyoob hu cov neeg tshuav nqi ntawm tus tswv ib tug zuj zus tuaj. Nws hais rau thawj tug tias : ‘Koj tshuav nuj nqi ntawm kuv tus tswv npaum li cas ?’ 6 Tus tshuav nqi teb tias : ‘Ib puas hub roj.’ Tus tim xyoob hais rau nws tias : 'Muab koj daim ntawv tshuav nqi los, koj zaum, koj sau sai sai rau ua tsib caug hub.' 7 Tus tim xyoob hais rau lwm tus tias : Koj ne, koj tshuav nqi pes tsawg ? Nws hais tias : ‘Ib puas tawb nplej.’ Tus tim xyoob hais rau nws tias : 'Muab koj daim ntawv tshuav nqi los, koj sau ua yim caum rau.' 8 Ces tus tswv qhuas txog tus tim xyoob siab tsis ncaj tias nws txawj ua neeg xyuam xim. Vim tias ntiaj teb neeg cov tub txawj ua neeg xyuam xim thaum lawv nrog lawv cov kwv luag dua kev kaj cov tub.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 4th November 2016, 3:17 pm

    TIM 5 LUB 11 HLIS 2016

    Thawj Hnub Xya Lis Piam Peb Caug Ib Nruab Xyoo C Nruab Lis Piam Xyoo II

    Hwm Niam Mab Liab

    Zaj Nyeem Ib: FIS LIS POS 4: 10-19


    Paj Lug sau ntawv tias:
    10 Kuv zoo siab kawg nkaus nyob hauv Huab Tais, vim kuv pom nej rov xyiv fab xav pab kuv dua; nej lub siab yeej xav pab kuv, tab sis yog nej nrhiav tsis tau ib txog kev pab kuv xwb. 11 Kuv hais li no, tsis yog vim kuv tsis muaj txaus noj txaus haus, kuv mus txog qhov twg kuv yeej tau xyaum ua neeg siv raws li yus muaj xwb. 12 Kuv txawj yoo thaum tsis muaj txawm peem, kuv kuj txawj noj kom tsau thaum muaj ntau. Txhua lub sij hawm txhua lub caij nyoog, kuv tau xyaum yoog lub caij muaj noj muaj haus los lub caij tshaib nqhis, lub caij nplua nuj los lub caij txom nyem. 13 Kuv ua tau tas puas tsav yam nyob hauv Tus ua kom kuv muaj zog. 14 Tab sis, nej tau pab kuv hauv kuv txoj kev txom nyem, mas yog ib qho zoo kawg.
    15 Nej cov nyob Fis Lis Pos, nej yeej paub lawm tias thaum lub Moo Zoo nyuam qhuav tuaj txog, thaum uas kuv tso Mas Xes Dos Nias tseg, mas tsis muaj ib lub Koom Txoos xa nyiaj txiag tuaj pab kuv li, tsuas muaj nej xwb. 16 Nej yog cov uas txij thaum kuv tuaj nyob rau Tes Xas Los Nis no, nej tau xa ob zaug tej yam uas kuv yuav tsum muaj tuaj raus siv. 17 Kuv tsis yog nrhiav kom tau txais ntau yam, tiam sis yog kuv xav kom nej tsim tau ib co paj tshab tseg rau nej kom txawj ntau zuj zus tuaj xwb. 18 Tam sis no, kuv muaj txhij muaj txhua lawm, tseem muaj ntau dua kuv tej kev siv lawm thiab. Txij thaum Es Pas Fos Dis muab nej cov paj tshab rau kuv lawm, mas kuv muaj ntau yam dhau lawm: nej cov paj tshab yog zoo li ib co tshuaj tsw qab, thiab ib thaj txi Ntuj uas Tswv Ntuj txais, thiab xis nws siab. 19 Kuv tus Tswv Ntuj yeej yuav pauj rau nej thiab yuav muab txhua yam nej xav tau rau nej, raws li nws txoj kev nplua nuj nto koob meej nyob hauv Yes Xus Pleev.

    NPN 112: 1B-2, 5-6, 8A + 9

    Txais: Tus tau hmoov zoo yog tus neeg hwm Huab Tais.
    los: As les lus yas.

    Tus hwm HUAB TAIS, nws txoj hmoov zoo :
    Nws nyiam Huab Tais cov lus qhia tas siab nrho,
    Nws caj ces yuav muaj zog nyob ntiaj teb,
    ntuj yuav foom hmoov zoo rau tiam neeg siab ncaj.

    Txais: Tus tau hmoov zoo yog tus neeg hwm Huab Tais.
    los: As les lus yas.

    Tus neeg txawj hlub luag thiab qiv rau luag, nws hmoov zoo.
    Nws ua nws tej hauj lwm raws kev ncaj.
    Nws yuav tsis qaug ib zaug, yuav nyob rua mus lij;
    sawv daws yuav nco ntsoov mus li txog tus neeg ncaj.

    Txais: Tus tau hmoov zoo yog tus neeg hwm Huab Tais.
    los: As les lus yas.

    Nws ua siab tawv qhawv, nws yuav tsis txhawj.
    Nws pub ntau rau cov pluag :
    nws txoj kev ua siab dav yuav nyob mus li,
    nws yuav tau ntsej muag, yuav nto koob meej lug,

    Txais: Tus tau hmoov zoo yog tus neeg hwm Huab Tais.
    los: As les lus yas.

    As Les Lus Yas: 2 KLN 8: 9

    Txais: As les lus yas, as les lus yas.

    Yes Xus Pleev yog tus nplua nuj, tab sis nws ua kom nws pluag,
    kom xwv nws txoj kev pluag ua nej nplua nuj tuaj.

    Txais: As les lus yas, as les lus yas.

    Ntawv Moo Zoo: LK 16: 9-15

    Yes Xus rau nws cov thwj tim tias:
    9 Kuv hais rau nej: Nej kav tsij mus muab tej nyiaj txiag tsis ncaj ntawd los tsim phooj ywg rau nej, ces thaum nyiaj dua toj tas lawm, cov phooj ywg ntawd yuav txais nej mus hauv cov tsev tsam phooj nyob mus li. 10 Leej twg pheej xeeb thaum nws saib tej yam me, nws kuj yuav pheej xeeb thaum nws saib tej yam loj. Leej twg ua tsis ncaj thaum nws saib tej yam me, nws kuj ua tsis ncaj thaum nws saib tej yam loj thiab. 11 Yog nej twb tsis pheej xeeb saib cov nyiaj txiag uas xeeb kev tsis ncaj, mas leej twg yuav muab yam zoo tseem ceeb rau nej saib ? 12 Thaum nej saib yam uas yog luag tug, yog nej ua tsis ncaj, mas leej twg yuav muab yam uas yog nej tug rau nej tuav?
    13 Tsis muaj ib tug tub txib yuav tsob hwb ob tug tswv tau. Nws yeej yuav tsum ntxub ib tug, nyiam lwm tus, los nws yuav tsum npuab ib tug, thuam lwm tus. Nej yuav ua Tswv Ntuj tub txib thiab ua nyiaj txiag tub txib tsis tau. 14 Cov Fas Lis Xais uas yog neeg nyiam nyiaj txiag, lawv hnov cov lus ntawd, lawv thuam Yes Xus. 15 Ces Yes Xus hais rau lawv tias : "Nej yog cov uas rov qhuas nej rau ntawm neeg xub ntiag tias nej ncaj, tab sis Tswv Ntuj paub nej siab. Vim tias yam uas neeg muab saib siab, mas yog ib yam phem kawg nyob ntawm Tswv Ntuj qhov muag pom."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 6th November 2016, 11:55 am

    TIM 7 LUB 11 HLIS 2016

    Hnub Ob Lis Piam Peb Caug Ob Nruab Xyoo C Nruab Lis Piam Xyoo II

    Zaj Nyeem Ib: TIS TOS 1: 1-9


    1 Kuv, Paj Lug, uas yog Tswv Ntuj ib tug tub khaiv, thiab Yes Xus Pleev ib tug Hauv Paus Xa Lus, kom tau pab cov neeg uas Tswv Ntuj xaiv, los txais kev ntseeg thiab txais txoj kev paub qhov tseeb nyob hauv kev hwm Ntuj, 2 kom lawv vam ntsoov yuav tau txoj sia nyob mus li, uas puag thaum tsis tau muaj lub zim txwv, tus Tswv Ntuj tsis txawj dag twb cog lus yuav pub lawm. 3 Thaum txog lub caij teem, Tswv Ntuj peb tus cawm seej tau qhia nws lo lus tawm nyob hauv ib txoj kev ceeb toom uas txib kuv kom kuv ua tus tshaj nws lo lus, 4 kuv sau ntawv tuaj rau Tis Tos, kuv tus tseem tub nyob hauv peb txoj kev ntseeg. Thov kom Leej Txiv Tswv Ntuj, thiab Yes Xus Pleev, uas yog tus cawm peb, pub txiaj ntsim thiab kev thaj yeeb rau koj.
    5 Tos kuv tau tso koj tseg nyob Khes Tas los yog vim xav kom koj ua kom tiav tej yam tseem tsis tau tiav thiab xav kom koj tsa ib co Txwj Laus nyob hauv txhua lub nroog, raws nraim li kuv tau qhia rau koj lawm. 6 Tus koj yuav tsa ua Txwj Laus yuav tsum yog ib tug tsis muaj chaw xyeej, yuav ib tug poj niam xwb, nws cov me nyuam yog neeg ntseeg, uas luag hais tsis tau tias, lawv coj tus yam ntxwv tsis zoo, thiab lawv tsis mloog lus. 7 Vim tias, ib tug ua tswv qhia uas yog tus tswj Tswv Ntuj cov hauj lwm, mas nws yuav tsum yog ib tug neeg tsis muaj chaw xyeej, nws tsis muab hlob, nws tsis yog neeg npau taws sai, tsis quav cawv, tsis nrog luag sib ntaus, sis ntshaw noj nyiaj raws tej txoj kev tsis ncaj, 8 tiam sis nws zoo siab tos txais qhua, nws nyiam ua zoo, nws txawj xav tom ntej tom qab, nws ua ncaj, nws nyiam teev Ntuj, nws txawj tswj nws tus kheej, 9 nws qhia kev cai raws qhov tseeb uas tau qhia los lawm kom haum txoj kev cai ntseeg. Ua li mas nws thiaj yuav muaj peev xwm ntuas sawv daws raws li txoj kev cai tseem ceeb, thiab hais yeej cov neeg tiv nws.

    NPN 24: 1B-2, 3-4AB, 5-6

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Lub ntiaj teb thiab puas tsav yam nyob hauv yog HUAB TAIS li,
    lub sim ceeb thiab cov nyob hauv yog nws tug.
    Vim nws yog tus tsim lub ntiaj teb los txawb rau saum cov hiav txwv
    thiab muab tso rau saum cov dej ntws.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Leej twg thiaj yuav nce tau saum HUAB TAIS lub roob?
    Los leej twg thiaj yuav mus sawv taus nyob hauv nws thaj chaw ntshiab?
    Yog tus uas txhais tes tsis muaj txhaum, lub siab dawb huv,
    tus uas tsis ntshaw tej yam tsis muaj qab hau.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    HUAB TAIS yuav foom koob hmoov rau nws. ,
    yog paj tshab tuaj ntawm Tswv Ntuj tus cawm nws tuaj.
    Lawv yuav zoo li no, tsav neeg uas nrhiav Tswv Ntuj,
    cov uas nrhiav Yas Kos tus Tswv Ntuj lub ntsej muag.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    As Les Lus yas: FIS LIS POS 2: 15D, 16A

    Txais: As les lus yas, as les lus yas.

    Nej yuav ci li tej lub teeb ci pom kev kaj lub ntiaj teb,
    Vim nej tuav rawv Lo Lus pub txoj sia tsis muab tso tseg.

    Txais: As les lus yas, as les lus yas.

    Ntawv Moo Zoo: LK 17: 1-6

    1 Yes Xus hais rau cov thwj tim tias : "Yeej yuav cheem tsis tau kom txhob muaj tej yam coj neeg ua txhaum, tab sis tus coj kom luag ua txhaum mas nws txoj hmoov phem ! 2 Txhiaj khoov cia muab ib lub zeb zom dai ntawm nws caj dab thiab muab nws pov rau hauv dej ntuj, yuav zoo dua cia nws coj ib tug neeg me me li no mus ua txhaum. 3 Nej yuav ceev faj tiag! Yog koj tus kwv ua txhaum, koj yuav qhuab ntuas nws. Yog nws thov txhaum, mas koj zam rau nws. 4 Yog ib hnub nws ua txhaum rau koj xya zaus, nws rov los thov koj xya zaus hais tias 'Kuv thov txhaum,' mas koj yuav tsum zam rau nws." 5 Cov Hauv Paus Xa Lus hais rau Huab Tais tias : "Koj txhab kom peb txoj kev ntseeg loj tuaj !" 6 Ces Huab Tais hais tias : "Yog nej muaj kev ntseeg luaj li lub noob zaub, mas nej yuav hais tau rau tsob ntoo txiv pos no tias 'Rho koj cov cag, koj tshais mus cog koj rau hauv dej ntuj,' mas tsob ntoo yuav mloog nej lus.”





    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 8th November 2016, 5:21 pm

    TIM 8 LUB 11 HLIS 2016

    Hnub Peb Lis Piam Peb Caug Ob Nruab Xyoo C Nruab Lis Piam Xyoo II

    Zaj Nyeem Ib: TIS TOS 2: 1-8, 11-14


    Paj Lug sau ntawv rau Tis Tos tias:
    1 “Ntawm koj, mas koj yuav qhuab qhia kom haum raws txoj kev ntseeg tseem ceeb, 2 qhia kom cov neeg laus txawj cheem lawv txhob haus dej haus cawv kom qaug, kom lawv ua neeg tsim nyog luag hwm, txawj xav tom ntej tom qab, nyob ruaj nreb hauv txoj kev ntseeg, txoj kev nyiam, thiab txoj kev tsis txhob thim. 3 Koj yuav qhia ib yam nkaus rau cov poj niam laus kom lawv coj ib tug yam ntxwv phim cov neeg ntshiab, tsis txhob hais lus xaiv, txhob quav cawv, thiab txawj qhia qhov zoo rau lwm tus. 4 Lawv coj li ntawd, mas lawv thiaj yuav pab qhia tau cov poj niam tseem hluas kom txawj hlub lawv tus txiv thiab lawv cov me nyuam, 5 kom tsis txhob ua neeg plees, kom ua neeg tsim txiaj, ua niam tsev nyob hauv lub vaj lub tsev, ua neeg siab zoo, mloog tus txiv lus, ces luag thiaj tsis thuam Tswv Ntuj lo lus. 6 Koj yuav qhuab ntuas cov hluas kom lawv coj tus yam ntxwv tus tus nyob hauv txhua yam lawv ua. 7 Koj tus kheej yuav ua ib tug piv txwv zoo los qhia txog txhua yam dej num zoo, xws li kev qhia ib txoj kev cai raws qhov yog tsis yuam kev, kev ua neeg muaj tsim, 8 kev hais lus ncaj lus meej pem kom luag thuam tsis tau, ces tus neeg xav tiv peb yuav poob ntsej muag vim nws hais tsis tau dab tsi phem txog peb.
    11 Vim tias Tswv Ntuj lub txiaj ntsim, uas yog lub qhov txhawv txoj kev cawm txhua leej txhua tus neeg, tau tawm los rau sawv daws pom xyeem lawm. 12 Lub txiaj ntsim ntawd qhia peb kom tso tej kev tsis hwm Ntuj pov tseg, kom tso txoj kev ntshaw ntau yam raws lub ntiaj teb pov tseg, kom tiam neej no peb ua neej nyob hauv txoj kev cheem peb lub siab lub cev, hauv txoj kev ncaj, thiab txoj kev hwm Ntuj. 13 Peb tos ntsoov peb vam ntsoov tias yuav tau txoj kev tso siab kaj siab lug. Peb tos ntsoov tias yuav tau pom peb tus Tswv Ntuj loj tas nrho thiab peb tus cawm seej Yes Xus Pleev lub hwj chim tawm los rau qhov muag pom xyeem. 14 Yes Xus Pleev, nws muab nws rau luag ntes kom tau txhiv peb ntawm txhua txoj kev phem thiab kom tau ntxuav ib haiv neeg kom dawb huv los ua nws tug, uas yog ib haiv neeg kub siab ua qhov zoo.

    NPN 37: 3-4, 18 + 23, 27 + 29

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Nej tso siab rau HUAB TAIS thiab ua qhov zoo,
    ces nej yuav tau nyob hauv lub teb chaws thiab muaj noj nrog kev tso siab.
    Nej zoo siab nyob hauv HUAB TAIS,
    ces nws yuav pub rau nej raws nej lub siab ntshaw.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    HUAB TAIS saib cov neeg coj ncaj ncees lub neej,
    lawv lub cuab tam yuav nyob mus li.
    HUAB TAIS ua kom ib tug neeg tshais taus ruam mus kev khov kho,
    txoj kev nws taug xis Huab Tais siab.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Koj lug txoj kev phem, koj ua qhov zoo,
    koj thiaj yuav tau nyob mus li.
    Cov neeg ncaj yuav tau thaj av ua lawv tug,
    lawv yuav tau nyob hauv thaj av mus li.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    As Les Lus Yas: ZAM 14: 23

    Txais: As les lus yas, as les lus yas.

    Yog leej twg nyiam kuv, nws yuav coj rawv kuv lo lus,
    ces kuv Txiv yuav nyiam nws;
    kuv Txiv wb yuav los nyob hauv nws.

    Txais: As les lus yas, as les lus yas.

    Ntawv Moo Zoo: LK 17: 7-10

    Yes Xus hais tias:
    7 "Nyob hauv nej, yog nej tus tub txib mus laij teb, los mus zov tsiaj tom teb los txog ntua, nej puas muaj leej twg yuav hais rau nws tias : ‘Koj tsuag tsuag los ntawm no, los zaum noj mov ?’ 8 Ntshai yuav yog li no dua: nws yuav hais rau tus tub txib tias : ‘Koj los ua mov rau kuv noj tso. Kav tsij sia daim ntaub npua cev, ces koj los rau mov rau kuv noj. Thaum kuv noj kuv haus tas lawm, koj mam noj mam haus tom qab.’ 9 Tus tub txib ua raws li nws tus tswv txib, tus tswv puas pom nws txiaj ntsim ? 10 Nej kuj zoo ib yam li ntawd : thaum nej ua tas txhua yam raws li luag txib nej lawm, mas nej yuav hais tias : ‘Peb yog ib co tub txib tsis muaj nqis ; peb tau ua qhov uas peb yuav tsum ua xwb.’ "




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 8th November 2016, 7:23 pm

    TIM 9 LUB 11 HLIS 2016

    Hnub Plaub Lis Piam Peb Caug Ob Nruab Xyoo C Nruab Lis Piam Xyoo II

    Nco Txog lub Caij Ua cov Kab Ke Qhib lub Tuam Tsev Teev Ntuj Lateran (Dedication of the Lateran Basilica/Consecration de la Basilique du Latran)

    Zaj NYeem Ib: ES XES KIAS 47: 1-2, 8-9, 12


    1 Tus tshiab coj kuv rov los txog ntawm lub qhov rooj vag mus hauv lub Tuam Tsev Teev Ntuj. Ua ciav muaj ib tug dej ntws hauv taw rooj tawm los mus dua sab hnub tuaj lawm, vim lub Tuam Tsev tig mus rau sab hnub tuaj. Dej txhawv hauv qab lub Tuam Tsev Teev Ntuj sab naj los, uas yog sab naj ntawm lub thaj txi Ntuj. 2 Tus tshiab coj kuv tawm ntawm lub rooj vag nyob sab pej los mus ncig sab Tuam Tsev nraud los txog ntawm lub rooj vag uas tig rau sab hnub tuaj. Nyob ntawd, kuv pom dej ntws ntawm sab naj los.
    8 Nws hais rau kuv tias : "Cov dej no ntws mus rau toob fab mus nram lub hav As Las Npas, yuav mus tshwm rau hauv lub hiav txwv. Cov dej no mus ua kom lub hiav txwv cov dej tsis txhob daw ntxiv. 9 Tus dej no ntws txog qhov twg mas tas puas tsav yam muaj sia uas txawj huam vam yuav ciaj nyob hauv cov dej no. Yuav muaj ntses ntau heev vim tus dej no ntws mus txog qhov twg mas hiav txwv yuav tsis daw ntxiv thiab txoj sia yuav hlob taus.
    12 Nyob ntawm ob sab ntug dej yuav tuaj tas puas tsav yam txiv ntoo, lawv cov nplooj yuav tsis zeeg ib zaug thiab lawv yuav txi txiv mus li. Niaj hli lawv yuav txi ib co txiv tshiab, vim cov dej ntws ntawm thaj chaw ntshiab los. Cov txiv yuav yog ib co txhiam xws, cov nplooj yuav yog ib co tshuaj."

    NPN 46: 2-3, 5-6, 8-9

    Txais: (5) Cov dej hauv tus dej ua kom Tswv Ntuj lub Tsheej zoo siab,
    Lub tsheej uas yog Tus Nyob Siab lub tsev ntshiab.

    Tswv Ntuj yog peb chawm nkaum yog peb lub zog,
    yog tus pab peb mus li thaum peb ntsib kev nyuaj.
    Vim li no, txawm ntiaj teb yuav ua zog koog thiab toj roob hauv pes
    yuav nphau nphwv rau hauv qab tiv txwv los peb tsis ntshai.

    Txais: (5) Cov dej hauv tus dej ua kom Tswv Ntuj lub Tsheej zoo siab,
    Lub tsheej uas yog Tus Nyob Siab lub tsev ntshiab.

    Muaj ib tug dej, nws cov ceg ncau mus ua kom Tswv Ntuj lub tsheej zoo siab,
    nws ntxuav kom tus Nyob Siab tej vaj tse dawb huv.
    Tswv Ntuj nyob hauv lub tsheej, nws yuav tsis muaj kev swb,
    Tswv Ntuj yuav pab nws thaum kaj ntug txoog.

    Txais: (5) Cov dej hauv tus dej ua kom Tswv Ntuj lub Tsheej zoo siab,
    Lub tsheej uas yog Tus Nyob Siab lub tsev ntshiab.

    Tus Huab Tais kav tsoom tshiab nrog peb nyob,
    peb lub yeej ntsa zeb yog Yas Kos tus Tswv Ntuj.
    Nej tuaj xyuas HUAB TAIS cov hauj lwm saib!
    xyuas tej yam txaus ntshai nws ua nyob ntiaj teb.

    Txais: (5) Cov dej hauv tus dej ua kom Tswv Ntuj lub Tsheej zoo siab,
    Lub tsheej uas yog Tus Nyob Siab lub tsev ntshiab.

    Zaj Nyeem Ob: 1 KLN 3: 9C-11, 16-17

    Paj Lug sau ntawv tias:
    9c Nej yog Tswv Ntuj lubTsev. 10 Kuv ua raws li lub txiaj ntsim uas Tswv Ntuj pub rau kuv, kuv zoo li ib tug neeg txhim tsev thoob tsib, kuv tau txhim lub taw ntsa cia lawm, lwm tus mam txhim ntxiv rau saud. Tab sis nyias yuav muab siab rau saib nyias txoj kev txhim tsev. 11 Vim tias tsis muaj leej twg yuav txhim ib tug taw ntsa txawv tus uas ib txwm nyob : tus taw ntsa ntawd yog Yes Xus Pleev
    16 Nej puas paub tias nej yog Tswv Ntuj lub Tuam Tsev thiab Tswv Ntuj Leej Tswv Yim tuaj nyob hauv nej ? 17 Yog muaj ib tug rhuav Tswv Ntuj lub Tuam Tsev, mas Tswv Ntuj yuav rhuav tus ntawd. Vim tias Tswv Ntuj lub Tuam Tsev, uas yog nej, yog ib yam ntshiab.

    As Les Lus Yas: 2 XWM 7: 16

    Txais: As les lus yas, as les lus yas.

    Huab Tais hais tias: “Kuv tau xaiv thiab qee lub tsev no cia rau kuv,
    Kom kuv lub npe nyob hauv lub tsev no mu sib txhis.”

    Txais: As les lus yas, as les lus yas.

    Ntawv Moo Zoo: ZAM 2: 13-22

    13 Yuav txog cov Yus Das lub Ntees Hla, ces Yes Xus mus pem Yes Lus Xas Les. 14 Nyob hauv lub Tuam Tsev Teev Ntuj, Yes Xus pom cov tub luam muag nyuj, muag tshis, muag nquab, thiab cov neeg pauv nyiaj zaum ntawm lawv cov rooj. 15 Nws muab ib co hlua ua ib rab nplawm, nws ntiab sawv daws huv tib si tawm hauv lub Tuam Tsev Teev Ntuj mus, nws caum cov yaj thiab cov nyuj tawm. Nws nchuav cov pauv nyiaj tej nyiaj, nws ntxeev lawv tej rooj. 16 Nws hais rau cov muag nquab tias : "Nej tshem tej ntawd tawm hauv no mus. Nej tsis txhob muab kuv Txiv lub Tsev los ua ib lub tsev ua luam ntxiv." 17 Yes Xus cov thwj tim nco txog lo lus uas Ntawv sau tseg tias : ‘Kev mob siab rau koj lub Tsev ua kom kuv lub siab kub lug.’ 18 Cov Yus Das thiaj qhib ncauj hais rau nws tias : "Koj tau ua li no, koj yuav muab lub cim dab tsi rau peb pom ?” 19 Yes Xus teb rau lawv, nws hais tias : "Nej muab lub tsev ntshiab no rhuav, ces peb hnub tom qab, kuv yuav rov txhim tau tas.” 20 Cov Yus Das thiaj hais tias : "Lawv kam ua hauj lwm plaub caug rau xyoo diam thiaj mam txhim tau lub Tsev Ntshiab no, hos koj li, koj yuav ua peb hnub xwb ces koj yuav rov txhim tau no?" 21 Tab sis Yes Xus hais txog lub Tsev Ntshiab uas yog nws lub Cev. 22 Thaum Yes Xus sawv hauv cov tuag rov los lawm, nws cov thwj tim thiaj rov nco tias nws twb tau hais li ntawd, ces lawv ntseeg txog Phau Ntawv thiab ntseeg txog lo lus uas Yes Xus tau hais.





    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 9th November 2016, 7:57 am

    TIM 10 LUB 11 HLIS 2016

    Hnub Tsib Lis Piam Peb Caug Ob Nruab Xyoo C Nruab Lis Piam Xyoo II
    Hwm LN Leo tus Loj (Leo the Great), ua Vaj Qhia thia Kws Kev Ntseeg (Pope and Doctor of the Church)

    Zaj Nyeem Ib: FIS LES MOOS 7-20


    Paj Lug sau ntawv rau Fis Les Moos tias:
    7 Thaum kuv paub txog koj txoj kev txawj hlub neeg mas kuv zoo siab kawg thiab muaj kev nplig siab loj. Me kwv, lawv tau qhia rau kuv tias, koj tau txhawb cov ntshiab lub siab no. 8 Li ntawd, txawm tias kuv yeej muaj cai yuam koj nyob hauv Leej Pleev, kom koj yuav tsum ua li cas thiaj yog, 9 tab sis kuv yuav tuav txog txoj kev nyiam kev hlub los thov ib yam ntawm koj xwb. Tus yuav hais lus rau koj yog Paj Lug, tus yawg laus laus Paj Lug, uas nyem no yog ib tug neeg nyob txim pub rau Yes Xus Pleev. 10 Kuv thov koj rau kuv tus me nyuam Os Nes Xis Mos, uas kuv tau yug nws los ntawm cov saw hlau khi kuv nyob hauv nkuaj. 11 Yav dhau los, nws yog ib tug neeg tsis muaj nqis rau koj, tab sis, txij no mus, nws yuav muaj nqis rau koj, ib yam li nws muaj nqis loj rau kuv. 12 Kuv xa nws rov qab los rau koj; nws yog kuv nplooj siab ntag. 13 Kuv twb xav cia nws nyob ze kuv, kom nws sawv koj chaw pab kuv nyob hauv kuv txoj kev raug cov saw hlau khi vim lub Moo Zoo. 14 Tab sis, kuv tsis xav ua ib yam uas kuv tsis tau xub nug koj lus pom zoo tso, kom xwv yam zoo uas koj yuav ua, tsis yog vim koj raug yuam tiam sis yog koj yeej txaus siab ua koj. 15 Tos Os Nes Xis Mos tau ncaim ntawm koj mus ib ntus, los ntshai yog vim Ntuj xav xa nws rov qab los nrog koj nyob mus li, 16 tsis yog xa nws rov los ua koj ib tug qhev, tiam sis nws yuav zoo tshaj ib tug qhev, nws yuav yog ib tug kwv tij uas yus hlub. Nws twb yog kuv ib tug kwv uas kuv hlub kawg; nws haj yam yuav yog koj ib tug kwv tij uas koj hlub raws li kev cai neeg ntiaj teb thiab nyob hauv Huab Tais. 17 Li ntawd, yog koj saib tias wb yog ob tug neeg muaj kev sib hlub, mas koj yuav txais nws ib yam li txais kuv. 18 Yog nws tau ua tub qaug koj li cas lawm los yog nws tshuav koj nuj nqis dab tsi, mas cia kuv ua tus ris. 19 Kuv, Paj Lug, sau ntawv cog lus tias: kuv yog tus yuav them. Kuv tsis xav hais txog qhov tias, cov nuj nqis uas koj tshuav ntawm kuv yog koj kiag ntag. 20 Me kwv e, kuv tso siab tias koj yuav ua qhov ntawd pub rau kuv nyob hauv Huab Tais. Koj ua kom kuv lub siab kaj nyob hauv Leej Pleev mog.

    NPN 146: 7, 8-9A, 9BC-10

    Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

    HUAB TAIS tsa cov raug luag quab yuam cai.
    nws pub mov rau cov neeg tshaib noj.
    HUAB TAIS tso cov neeg raug txim kom lawv dim.

    Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

    HUAB TAIS qhib cov dig muag qhov muag,
    HUAB TAIS tsa cov khoov nkoos kom sawv ntseg,
    HUAB TAIS nyiam cov neeg ncaj.
    HUAB TAIS pov hwm cov pej kum neeg.

    Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

    Nws txhawb tus ntsuag nos thiab tus poj ntsuam,
    nws ua kom tus siab phem plam qhov nws xav ua.
    HUAB TAIS yuav ua vaj nyob mus li;
    Xis Yoog, koj tus Tswv Ntuj yuav ua vaj txheej dhau txheej ! As les lus yas!

    Txais: (5a) Tus tau hmoov zoo yog tus muaj Yas Kos tus Tswv Ntuj pab nws.

    As Les Lus Yas: ZAM 15: 5

    Txais: As les lus yas, as les lus yas.

    Huab Tais hais tias: “Kuv yog tsob txiv cawv, nej yog cov ceg;
    tus twg nyob hauv kuv thiab kuv nyob hauv nws, mas nws yuav txi txiv ncw.

    Txais: As les lus yas, as les lus yas.

    Ntawv Moo Zoo: LK 17: 20-25

    20 Cov Fas Lis Xais nug Yes Xus saib thaum twg Tswv Ntuj lub Ceeb Tsheej thiaj li los txog. Yes Xus teb rau lawv tias : "Tswv Ntuj lub Ceeb Tsheej yog ib yam uas neeg qhov muag tsom tsis tau. 21 Neeg yuav hais tsis tau tias 'Ntuj lub Ceeb Tsheej nyob ntawm no', los ‘nyob tod', vim tias Tswv Ntuj lub Ceeb Tsheej yog nyob nruab nrab hauv nej.”
    22 Yes Xus hais rau cov thwj tim tias : "Yuav muaj tej lub sij hawm uas nej ntshaw pom ib hnub hauv lub caij uas Neeg Leej Tub tseem nrog nej nyob, tab sis nej yuav tsis pom. 23 Ces luag yuav hais rau nej tias : ‘Nws nyob tod', los 'Nws nyob ntawm no'. Mas nej tsis txhob mus, tsis txhob tso sas ntws khiav mus caum. 24 Vim tias Neeg Leej Tub lub zim txwv yuav zoo xws li ib kab xob laim ci dawb paug ib ceg kaum ntuj mus rau lwm ces. 25 Tab sis nws yuav tsum xub raug luag tsim txom loj kawg thiab raug tiam neeg no muab xyeeb pov tseg tso.




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 10th November 2016, 7:29 am

    TIM 11 LUB 11 HLIS 2016

    Hnub Rau Lis Piam Peb Caug Ob Nruab Xyoo C Nruab Lis Piam Xyoo II
    Hwm LN Martin of Tours/Martin de Tours, ua Tswv Qhia

    Zaj NYeem Ib: 2 ZAM 4-9


    Zam sau ntawv rau ib tug poj niam tias:
    4 Kuv zoo siab heev, vim kuv ntsib koj ib co me nyuam mus taug txoj kev tseeb, raws li lo lus qhia uas Leej Txiv hais rau peb. 5 Niam Pog, kuv thov koj , kuv tsis sau ib lo lus qhia tshiab tuaj rau koj, kuv tsuas sau lo lus qhia uas peb yeej muaj, txij puag thaum lub hauv paus los lawm xwb , kuv thov koj tias kom peb yuav tsum sib nyiam sib hlub. 6 Txoj kev nyiam, yog txoj kev ua neej raws li Ntuj cov lus qhia. Thawj lo lus qhia, uas nej yeej tau kawm txog txij thaum lub hauv paus los lawm, yog qhov tias nej yuav ua neej nyob hauv txoj kev nyiam.
    7 Muaj coob tus neeg dag tau ncig mus nyob thoob qab ntuj lawm. Lawv tsis ntseeg txog tias Yes Xus Pleev yug los ua neeg muaj ib lub cev nqaij. Muaj ib tug hauv cov neeg dag ntawd yog tus neeg cuav, tus tiv Leej Pleev. 8 Nej ceev faj, kom nej txhob plam yam uas peb tau siv zog khwv rau nej lawm, tiam sis kom nej tau txais cov paj tshab tas huv si. 9 Tus twg qhia ib txog kev tshiab mas nws tsis nyob hauv Leej Pleev lo lus qhia, nws tsis muaj Tswv Ntuj nyob hauv nws. Tus nyob hauv Leej Pleev lo lus qhia, nws muaj Leej Txiv thiab Leej Tub nyob hauv nws.

    NPN 119: 1, 2, 10, 11, 17, 18

    Txais: (1b) Cov tau hmoov zoo yog cov ua raws nraim HUAB TAIS Txoj Cai.

    Cov tau txoj hmoov zoo yog cov neeg taug txoj kev zoo,
    lawv ua raws nraim li HUAB TAIS Txoj Cai.

    Txais: (1b) Cov tau hmoov zoo yog cov ua raws nraim HUAB TAIS Txoj Cai.

    Cov tau txoj hmoov zoo yog cov ua raws li HUAB TAIS hais,
    Lawv nrhiav nws tas siab tas ntsws.

    Txais: (1b) Cov tau hmoov zoo yog cov ua raws nraim HUAB TAIS Txoj Cai.

    Kuv nrhiav koj tas siab tas ntsws,
    Thov koj txhob cia kuv ncaim mus deb koj cov lus qhia.

    Txais: (1b) Cov tau hmoov zoo yog cov ua raws nraim HUAB TAIS Txoj Cai.

    Kuv khaws koj cov lus koj cog rau nruab siab
    kom kuv thiaj tsis txhob ua txhaum rau koj.

    Txais: (1b) Cov tau hmoov zoo yog cov ua raws nraim HUAB TAIS Txoj Cai.

    Thov koj ua zoo rau koj tus tub txib,
    kuv thiaj yuav muaj txoj sia, thiab yuav khaws koj cov lus.

    Txais: (1b) Cov tau hmoov zoo yog cov ua raws nraim HUAB TAIS Txoj Cai.

    Thov koj qhib kuv qhov muag, kuv thiaj yuav pom
    tias koj Txoj Cai zoo tshaj plaws.

    Txais: (1b) Cov tau hmoov zoo yog cov ua raws nraim HUAB TAIS Txoj Cai.

    As Les Lus Yas: LK 21: 28

    Txais: As les lus yas, as les lus yas.

    Nej yuav sawv kom ntseg, nej yuav tsa taub hau,
    vim txoj kev txhiv nej los txog ze lawm.

    Txais: As les lus yas, as les lus yas.

    Ntawv Moo Zoo: LK 17: 26-37

    26 Lub caij Nos Hes ua neej nyob zoo li cas, mas kuj yuav zoo ib yam li ntawd thaum txog Neeg Leej Tub lub caij. 27 Sawv daws noj sawv daws haus, sawv daws yuav poj niam thiab muab tshoob muab kos, mus txog ntua hnub uas Nos Hes chaws mus rau hauv lub nkoj, ces dej los nyab ua kom sawv daws tuag tas. 28 Thiab kuj yuav zoo li lub zim txwv uas Los ua neej nyob : Sawv daws noj sawv daws haus, sawv daws muas sawv daws muag cuab yeej, sawv daws cog qoob loo, sawv daws txhim vaj txhim tsev. 29 Hnub uas Los tawm plaws khiav ntawm Xos Dos Mas mus, hluav taws thiab leej faj poob saum ntuj los ua sawv daws tuag tas huv si. 30 Hnub uas Neeg Leej Tub yuav tawm los rau qhov muag pom kuj yuav zoo ib yam li ntawd thiab. 31 Hnub ntawd, tus uas nyob saum sam thiaj saum ru tsev, tab sis nws cov cuab yeej nyob hauv tsev, mas nws yuav tsis txhob nqes mus nqa; Tus nyob tom teb kuj ib yam, nws yuav tsis txhob tig rov mus tom qab. 32 Nej nco ntsoov txog Los tus poj niam. 33 Leej twg nrhiav kev txuag nws txoj sia, mas nws yuav plam nws txoj sia, hos leej twg plam nws txoj sia, mas nws txoj sia yuav nyob. 34 Kuv hais rau nej : Hmo ntawd, ob leeg pw ib txag, luag yuav coj ib tug mus, tseg ib tug. 35 Ob tug poj niam ua ke zom zeb : luag yuav coj ib tug mus, tseg ib tug." [36...] 37 Ces cov thwj tim qhib ncauj hais rau Yes Xus tias : “Coj mus qhov twg, Huab Tais ?" Yes Xus hais rau lawv tias : "Lub cev tuag nyob qhov twg, dav kuj yuav sib sau ntsauv nyob ntawd."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 11th November 2016, 7:23 am

    TIM 12 LUB 11 HLIS 2016

    Hnub Rau Lis Piam Peb Caug Ob Nruab Xyoo C Nruab Lis Piam Xyoo II
    Hwm LN Josaphat, Tswv Qhia ua Tim KHawv

    Zaj Nyeem Ib: 3 JN 5-8


    Zam sau ntawv rau Nkas Yus tias:
    5 Tus zoo nyiam, koj yog ib tug neeg tsis fav xeeb nyob hauv koj txoj kev xyiv fab ua txhua yam pab cov kwv tij, tab txawm lawv yog ib co pej kum neeg xwb. 6 Lawv tau zeem tseeb txog koj txoj kev nyiam kev hlub nyob ntawm lub Koom Txoos xub ntiag lawm. Thov koj npaj tej yam pab lawv, kom phim rau Tswv Ntuj, thaum lawv tawm mus ncig ntxiv. 7 Yog vim Tswv Ntuj lub npe, mas lawv thiaj tau sawv kev tawm mus ncig, lawv tsis tau txais dab tsi ntawm cov neeg teev dab qhuas li. 8 Peb yuav ua tib zoo txais cov neeg zoo li ntawd, peb thiaj tau nrog lawv koom tes ua lawv txoj hauj lwm tshaj txoj kev tseeb.

    NPN 112: 1-2, 3-4, 5-6

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Nws muaj hmoov zoo tus uas hwm HUAB TAIS,
    thiab nyiam coj Huab Tais cov lus qhia tas siab tas ntsws.
    Nws caj ces yuav muaj nto koob meej nyob ntiaj teb,
    ntuj yuav foom koob hmoov rau caj ces neeg siab ncaj.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Kev nplua nuj kev tau zoo puv nws lub tsev;
    Nws txoj kev ncaj yuav nyob ruaj nreb mus li.
    Nws ci hauv qhov tsaus ntuj, ua lub teeb kaj cov neeg siab ncaj,
    nws muaj lub siab zoo, khuv leej luag, thiab ua ncaj.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Tus neeg txawj hlub luag thiab qiv rau luag nws txoj hmoov zoo.
    Nws tswj nws tej nyiaj txiag raws kev ncaj.
    Tus neeg ncaj yuav nyob ruaj nreb,
    sawv daws yuav nco ntsoov txog nws mus li.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    As Les Lus Yas: 2 TES XAS LOS NIS 2: 14

    Txais: As les lus yas, as les lus yas.

    Tswv Ntuj hu peb nyob hauv lub Moo Zoo,
    kom peb tau txais peb tus Huab Tais Yes Xus Pleev lub koob meej.


    Txais: As les lus yas, as les lus yas.

    Ntawv Moo Zoo: LK 18: 1-8

    1 Yes Xus hais ib zag paj lug rau nws cov thwj tim, nws qhia lawv tias yuav tsum teev Ntuj tsis tseg, txhob ntaus siab yau. Nws hais tias : 2 “Nyob hauv ib lub nroog, muaj ib tug txwj laus txiav txim, nws tsis ntshai Tswv Ntuj thiab tsis hwm leej twg li. 3 Muaj ib tug poj ntsuam nyob hauv lub nroog ntawd tuaj cuag tus txwj laus txiav txim, nws hais tias : "Thov koj pab txiav txim tsa kuv cai, tiv tus neeg ntxub kuv." 4 Tus txwj laus tsis quav ntsej, nws muab ncua ntev ntev. Tab sis thaum kawg nws xav tias : "Tab yog kuv tsis hwm Tswv Ntuj thiab tsis ntshai ib tug neeg li los, 5 vim tus poj ntsuam ntawd tuaj txob kuv dhau, ces kuv yuav txiav txim ncaj rau nws, kom xwv nws txhob tuaj txob kuv tas zog thiab txhob ua kuv dias taub hau ntxiv."
    6 Ces Huab Tais hais tias : "Nej mloog tus txwj laus txiav txim siab tsis ncaj ntawd cov lus saib. 7 Yog Tswv Ntuj cov xaiv ua hnub ua hmo hu txog nws tsis tseg, nws puas yuav tsis tsa lawv cai li ? Txawm tias nws ua siab ntev ntev rau lawv. 8 Kuv hais rau nej tias, Tswv Ntuj yeej yuav tsa lawv cai sai sai. Tab sis thaum Neeg Leej Tub rov los, nws puas yuav pom muaj kev ntseeg nyob ntiaj teb ?"




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 13th November 2016, 2:35 pm

    TIM      14     LUB     11     HLIS      2016

    Hnob Ob Lis Piam Peb Caug Peb Nruab Xyoo C Nruab Lis Piam Xyoo II

    Zaj Nyeem Ib:       QYTN  1:   1-4; 2:1-5


    1 Yes Xus Pleev qhia txog yav tom ntej; yog Tswv Ntuj qhia rau nws paub, kom nws qhia rau nws cov tub txib txog tej yam uas tshuav tsis ntev yuav tshwm sim tuaj. Nws xa nws tus Tshiab tuaj qhia cov lus ntawd rau nws tus tub txib Zam paub. 2  Zam ua tim khawv zeem tseeb txog Tswv Ntuj Lo Lus thiab txog Yes Xus Pleev cov lus pov thawj:  yog tej yam nws tau yees pom. 3 Tus tsa suab nyeem kpm nrov nrov yuav tau txoj hmoov zoo, thiab cov uas mloog cov lus saub no thiab coj raws li tau sau rau hauv no, lawv kuj yuav tau hmoov zoo, vim lub caij los txog ze lawm!
    4 Zam,  sau ntawv rau xya lub Koom Txoos nyob As Xias. Thov kom nej tau txais lub txiaj ntsim thiab txoj kev thaj yeeb tuaj ntawm ‘Tus Nyob, Tus Ib Txwm Nyob, thiab Tus Tab Tom Los,’ tuaj, thiab tuaj ntawm xya tus leej tswv yim uas nyob ntawm hauv ntej ntawm nws lub theej kiab tuaj.
    (Huab Tais hais rau kuv tias):
    2   1 “Koj sau ntawv rau tus Tshiab hauv lub Koom Txoos nyob Es Fes Xos tias : Tus uas nws tuav xya lub hnub qub nyob hauv nws txhais tes xis, thiab nws mus kev hauv nruab nrab xya tus ncej kub txawb teeb hais li no : 2 Kuv paub koj cov dej num, paub koj txoj kev khwv, thiab koj lub siab tawv qhawv coj mus kom txog qhov kawg. Kuv paub tias koj tsis nyiam cov neeg siab phem. Koj tau sim cov uas lawv hais tias lawv yog hauv paus xa lus, tab sis koj pom tias lawv yog ib co hauv paus xa lus cuav. 3 Koj yog ib tug muaj lub siab loj siab tawv qhawv. Koj tau raug txom nyem vim kuv lub npe. Koj tsis ntaus siab me li. 4 Tsis kav, kuv tsis zoo siab rau koj, vim koj ua koj txoj kev nyiam kuv yav thaum nyuam qhuav pib  ploj lawm. 5 Ua li mas koj sim rov nco saib koj poob deb npaum li cas lawm;  koj thov txhaum, thiab koj rov ua cov dej num yav thaud koj ua mog. Yog koj tsis ua li ntawd, yog koj tsis thov txhaum, mas kuv yuav tuaj rho koj tus ncej txawb teeb ntawm nws qhov chaw mus.”

    NPN        1:   1-2, 3, 4 + 6

    Txais:    (QYTN  2:   17) Cov uas ntaus yeej, kuv yuav muab tsob ntoo muaj txoj sia rau lawv noj.

    Muaj hmoov zoo yog tus uas tsis coj
    raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS txoj cai nruab hnub hmo ntuj.

    Txais:    (QYTN  2:   17) Cov uas ntaus yeej, kuv yuav muab tsob ntoo muaj txoj sia rau lawv noj.

    Nws zoo li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj zeeg li.
    Nws ua yam twg tau yam ntawd.

    Txais:    (QYTN  2:   17) Cov uas ntaus yeej, kuv yuav muab tsob ntoo muaj txoj sia rau lawv noj.

    Cov neeg phem tsis zoo li ntawd, lawv tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais:    (QYTN  2:   17) Cov uas ntaus yeej, kuv yuav muab tsob ntoo muaj txoj sia rau lawv noj.

    As Les Lus Yas:       ZAM  8:   12


    Txais:    As les lus yas, as les lus yas.

    Huab Tais hais tias:  "Kuv yog qhov pom kev kaj lub qab ntuj neeg.
    Leej twg lawv kuv qab, nws yuav tau qhov pom kev uas coj mus rau txoj sia.

    Txais:    As les lus yas, as les lus yas.

    Ntawv Moo Zoo:       LK  18:   35-43

    35 Thaum Yes Xus tuaj yuav txog Yes Lis Kos, muaj ib tug dig muag zaum thov khawv ntawm ntug kev. 36 Nws hnov ib pab neeg taug kev, nws nug saib yog muaj dab tsi. 37 Luag qhia nws tias:  “Yog Yes Xus Nas Xas Les hla tuaj mus.” 38 Ces nws tsa suab hu nrov nrov tias : "Yes Xus, Das Vis Leej Tub, thov koj khuv leej kuv !" 39 Cov uas mus kev tom hauv ntej cem nws kom ua twj ywm, tab sis nws haj yam hu nrov tias : "Das Vis Leej Tub, thov koj khuv leej kuv !” 40 Ces Yes Xus nres, nws kom lawv coj tus dig muag los rau nws. Thaum tus dig muag los txog ze lawm, Yes Xus nug nws tias : 41 "Koj xav kom kuv ua dab tsi rau koj ?" Tus dig muag teb tias : "Huab Tais, thov ua kom kuv rov pom kev." 42 Ces Yes Xus hais rau nws tias : "Koj rov pom kev mas ! Koj lub siab ntseeg cawm koj lawm." 43 Tam sis ntawd, tus dig muag rov pom kev, ces nws raws Yes Xus mus, nws cav txog Tswv Ntuj. Tas tsoom pej xeem pom qhov ntawd, lawv cav lus zoo txog Tswv Ntuj.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 14th November 2016, 10:47 am

    TIM 15 LUB 11 HLIS 2016

    Hnub Peb Lis Piam Peb Caug Peb Nruab Xyoo C Nruab Lis Piam Xyoo II
    Hwm LN Albert tus Loj

    Zaj Nyeem Ib: QYTN 3:1-6, 14-22


    Zam hnov Huab Tais lub suab hais tias:
    1 “Koj sau ntawv rau tus Tshiab hauv lub Koom Txoos nyob Xas Des tias : Tus uas muaj Tswv Ntuj xya tus Leej Tswv Yim thiab xya lub Hnub Qub nws hais li no : Kuv paub koj cov dej num koj ua; koj muaj lub koob lub npe tias koj ciaj sia, tiam sis koj twb tuag lawm. 2 Kav tsij txhob tsaug zog ! Koj cia li ua kom cov uas tseem tshuav txoj sia thiab cov uas twb yuav tu siav rov muaj zog tuaj. Vim kuv tsis pom tias koj tau ua koj cov dej num tiav log rau ntawm kuv tus Tswv Ntuj xub ntiag. 3 Koj nco ntsoov txog tias koj tau muaj siab txais thiab hnov lo lus npaum li cas; cia li muab khaws cia, thiab los lees txhaum mas! Yog koj tsis nyob tos ntsoov, mas kuv yuav tuaj xws li ib tug tub sab, ces koj yuav tsis paub lub sij hawm twg kuv tuaj txog ntawm koj. 4 Tab sis, nyob Xas Des, koj tseem muaj ob peb leeg uas lawv tsis tau ua lawv cov tsoos tsho dub. Lawv hnav tsoos dawb, lawv yuav nrog kuv mus, vim lawv tsim nyog nrog kuv mus. 5 Tus twg ntaus yeej, mas nws yuav hnav tsoos tsho dawb; kuv yuav tsis tshem nws lub npe tawm hauv Phau Ntawv Txheeb Txoj Sia. Kuv yuav lees nws nyob ntawm kuv Txiv xub ntiag, thiab ntawm nws cov Tshiab xub ntiag. 6 Leej twg muaj pob ntseg, mas nws kav tsij mloog cov lus uas Leej Ntuj Plig hais rau cov Koom Txoos. “
    14 “Koj sau ntawv mus rau tus tshiab hauv lub Koom Txoos nyob Laus Dis Kes Yas tias : Tus As Mees, tus Tim Khawv pheej xeeb thiab tseeb, tus ua Hauv Paus Chiv Tswv Ntuj tej hauj lwm tsim lub sim ceeb, nws hais li no : 15 Kuv paub koj cov dej num koj ua: koj tsis txias, tsis kub li. Kheev lam koj yuav txias txawm txias kiag, koj yuav kub txawm kub kiag mas! 16 Vim koj sov ntem ntauv, koj tsis txias, tsis kub, mas kuv yuav ntuav koj tawm hauv kuv qhov ncauj mus. 17 Koj hais tias : ‘Kuv nplua nuj, kuv muaj koob nto npe, kuv tsis ntshaw dab tsi li,’ tab sis koj twb tsis pom tias koj txom nyem, koj kob huam, koj pluag, koj dig muag, koj liab qab ! 18 Kuv pab koj tswv yim li no : koj muas kub ntawm kuv uas yog cov kub nchuav tawm hauv hluav taws los, koj thiaj yuav nplua nuj tuaj; koj muas cov tsoos tsho dawb ntawm kuv los hnav vov koj qhov liab qab thiab npog koj qhov txaj muag; koj muas tshuaj ntawm kuv mus pleev koj qhov muag kom koj pom kev tuaj. 19 Kuv qhuab ntuas thiab qhuab qhia cov neeg uas kuv nyiam. Kav tsij kub siab ! Tig los hloov siab tshiab mog !
    20 Saib : kuv nyob ntawm qhov rooj, kuv khob qhov rooj. Tus twg hnov kuv lub suab, thiab nws qhib qhov rooj, mas kuv yuav chaws mus hauv nws tsev, kuv yuav nrog nws noj mov, nws kuj yuav nrog kuv noj mov. 21 Tus twg ntaus yeej, mas kuv yuav pub kom nws tau nrog kuv zaum saum kuv lub theej kiab, ib yam li thaum kuv tau xub ntaus yeej lawm, kuv tau nrog kuv Txiv zaum saum nws lub Theej Kiab. 22 Leej twg muaj pob ntseg, kom nws kav tsij mloog cov lus uas Leej Ntuj Plig hais rau cov Koom Txoos.”

    NPN 15: 2-3A, 3BC-4AB, 5

    Txais: (QYTN 3: 21) Kuv yuav cia tus uas ntaus yeej zaum ntawm kuv ib sab saum kuv lub theej kiab.

    Tus uas coj tus yeeb yam tsis muaj chaw xyeej thiab ua ncaj,
    Tus uas xav qhov tseeb nyob hauv nws nruab siab,
    Thiab nws tsis cia nws tus nplaig hais lus dag.

    Txais: (QYTN 3: 21) Kuv yuav cia tus uas ntaus yeej zaum ntawm kuv ib sab saum kuv lub theej kiab.

    Nws tsis ua phem rau lwm tus neeg
    Nws tsis nrhiav lus rau tus nyob ze nws.
    Nws ntxub tus uas HUAB TAIS muab xyeeb pov tseg.
    Nws hwm cov neeg hwm HUAB TAIS.

    Txais: (QYTN 3: 21) Kuv yuav cia tus uas ntaus yeej zaum ntawm kuv ib sab saum kuv lub theej kiab.

    Nws qiv nyiaj txiag, nws tsis tsuam paj.
    Nws tsis txais luag cov nyiaj xiab
    kom muab txim rau tus tsis txhaum.
    Leej twg ua li hais no, mas nws yuav nyob ruaj nreb mus li.

    Txais: (QYTN 3: 21) Kuv yuav cia tus uas ntaus yeej zaum ntawm kuv ib sab saum kuv lub theej kiab.

    As Les Lus Yas: 1 ZAM 4: 10b

    Txais: As les lus yas, as ;es lus yas.

    Tswv Ntuj hlub peb, nws xa nws Leej Tub tuaj
    ua nqi txhiv peb ntawm peb cov txhaum.

    Txais: As les lus yas, as ;es lus yas.

    Ntawv Moo Zoo: LK 19: 1-10

    1 Yes Xus mus hauv Yes Lis Kos, nws hla lub tsheej. 2 Muaj ib tug neeg lub npe hu ua Ntxas Kais, nws yog ib tug nom sau se, nws yog neeg nplua nuj. 3 Nws nrhiav kom tau kev pom saib Yes Xus yog leej twg, tab sis nws tsis tau kev, vim neeg coob dhau, thiab nws yog neeg qig taub. 4 Ces nws khiav mus ua ntej, nws nce saum tsob ntoo kom tau pom Yes Xus, vim Yes Xus yuav hla ntawd mus. 5 Thaum Yes Xus los txog ntawm qhov chaw ntawd, nws tsa muag ntsia saud, nws hais tias : "Ntxas Kais, koj nqes los sai sai, vim hnub no kuv yuav tsum mus so hauv koj tsev." 6 Ntxas Kais nqes nrawm nroos los, nws zoo siab txais Yes Xus. 7 Sawv daws pom li ntawd, lawv yws yws hais tias : "Nws mus so hauv ib tug neeg txhaum lub tsev !" 8 Hos Ntxas Kais sawv ntsug nyob ntawd, nws hais rau Huab Tais tias : "Huab Tais, kuv yuav muab kuv tej cuab yeej cuab tam ib nrab pub rau cov pluag. Yog kuv tau ua tsis ncaj rau leej twg, mas kuv yuav muab plaub npaug pauj rau nws." 9 Yes Xus hais rau Ntxas Kais tias : "Hnub no, txoj kev cawm los txog hauv lub tsev no lawm, vim tus no kuj yog Has Nplas Has ib leeg tub thiab. 10 Vim tias Neeg Leej Tub tuaj yog tuaj nrhiav thiab tuaj cawm yam uas ploj lawm."




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 16th November 2016, 7:13 pm

    TIM       17      LUB      11      HLIS       2016

    Hnub Tsib Lis Piam Peb Caug Peb Nruab Xyoo C Nruab Lis Piam Xyoo II

    Hwm LN Elizabeth nyob Hungary, ua Leej Phauj

    Zaj Nyeem Ib:      QYTN  5:   1-10


    1 Ces kuv pom ib phau ntawv kauv nyob hauv tus zaum saum lub theej kiab txhais tes xis. Phau ntawv ntawd sau sab hauv thiab sab nraud huv si; muaj xya lub thwj kaw phau ntawv no. 2 Kuv pom ib tug Tshiab muaj hwj chim tshaj tawm nrov nrov tias : “Leej twg thiaj tsim nyog qhib phau ntawv no thiab rhuav cov thwj ?” 3 Tab sis tsis muaj leej twg nyob ntiaj teb, nyob saum ntuj, los nyob nruab yeeb tsim nyog qhib phau ntawv thiab nyeem phau ntawv li. 4 Ces kuv quaj heev rau qhov tias tsis muaj ib tug tsim nyog qhib thiab nyeem phau ntawv. 5 Ib tug Laus thiaj hais rau kuv tias : “Tsis txhob quaj ! Tus Tsov Ntxhuav xeem Yus Das, tus Ntsuag hlav ntawm Das Vis, nws ntaus yeej lawm, nws yuav qhib phau ntawv uas muaj xya lub thwj.”
    6 Ces kuv pom ib tug Yaj sawv ntsug hauv nruab nrab ntawm lub theej kiab thiab plaub leeg ciaj sia thiab cov Laus. Zoo li nws lub caj dab raug luag nkaug; nws tuaj xya tus kub, thiab muaj xya lub qhov muag, yog Tswv Ntuj xya leej Tswv Yim uas nws xa mus ua hauj lwm nyob thoob ntiaj teb. 7 Tus Yaj mus txais phau ntawv ntawm tus zaum saum lub theej kiab txhais tes xis. 8 Thaum tus Yaj txais tau phau ntawv lawm, mas Plaub Leeg Ciaj Sia thiab nees nkaum plaub tug Laus txhos caug pe nws. Lawv ib leeg tuav ib rab nkauj nog ncas thiab ib co tais kub ntim tshuaj tsw qab puv nkaus. Cov tshuaj tsw qab no yog cov ntshiab cov zaj teev Ntuj. 9 Lawv hu ib zag nkauj tshiab tias : “Koj tsim nyog tuav kauj ntawv thiab qhib cov thwj, vim koj raug luag nkaug ntawm caj dab, koj muab koj cov ntshav los txhiv tas txhua haiv neeg, txhua xeem lus, txhua tsav neeg txhua lub teb chaws. 10 Koj tsa lawv ua ib lub Ceeb Tsheej, thiab ib co Leej Choj tsob hwb peb tus Tswv Ntuj. Lawv yuav ua vaj kav lub ntiaj teb.”

    NPN      149:   1B-2, 3-4, 5-6A + 9B

    Txais:  (QYTN 5:  10) Leej Yaj tau tsim ib lub ceeb tsheej muaj leej choj tsob hwb peb tus Tswv Ntuj.
    los: As les lus yas.

    Nej hu ib zaj nkauj tshiab rau HUAB TAIS,
    nej cav txog nws nyob hauv tsoom ntseeg lub txoos.
    His Xas Lais yuav zoo siab nyob hauv tus uas tsim lawv,
    Xis Yoos cov me nyuam yuav luag ntxhi nyob hauv lawv tus vaj.

    Txais:  (QYTN 5:  10) Leej Yaj tau tsim ib lub ceeb tsheej muaj leej choj tsob hwb peb tus Tswv Ntuj.
    los: As les lus yas.

    Lawv yuav ua kev lom zem yoj cev cav txog nws lub npe,
    lawv yuav hu nkauj cav txog nws nrog suab nruas suab nkauj nog ncas.
    Vim HUAB TAIS hlub nws haiv neeg,
    thiab nws muab txoj kev yeej ua zam npua cov neeg me.

    Txais:  (QYTN 5:  10) Leej Yaj tau tsim ib lub ceeb tsheej muaj leej choj tsob hwb peb tus Tswv Ntuj.
    los: As les lus yas.

    Cov muaj lub siab ntseeg hom khaj nyob hauv txoj kev nto koob meej;
    lawv yuav hu nkauj zoo siab hauv lawv tej chaw nyob;
    lawv lub qa tsuas muaj qw suab cav txog Tswv Ntuj.
    Cov uas ntseeg nws lawv lub koob meej yog zoo li no. As les lus yas.

    Txais:  (QYTN 5:  10) Leej Yaj tau tsim ib lub ceeb tsheej muaj leej choj tsob hwb peb tus Tswv Ntuj.
    los: As les lus yas.

    As Les Lus Yas:      NPN 95:   8

    Txais:   As les lus yas, as les lus yas.

    Yog hnub no nej hnov nws lub suab,  
    tsis txhob cia nej lub siab tawv ncauj.    

    Txais:   As les lus yas, as les lus yas.

    Ntawv Moo Zoo:      LK  19:   41-44

    41 Thaum Yes Xus tuaj yuav txog Yes Lus Xas Les, nws pom lub nroog, nws quaj rau lub nroog, 42 nws hais tias : "Hnub no, kheev lam koj to taub txog tias yog yam twg ua kom muaj kev thaj yeeb mas ! Tab sis, tej ntawd nyob zais ntshis rau koj qhov muag. 43 Vim tias, yuav muaj hnub uas koj cov yeeb ncuab yuav khawb qhov vij koj, lawv yuav puav koj, lawv yuav nias qees qhov txhia chaw tuaj. 44 Lawv yuav tsuj koj rau hauv av, thiab tsuj koj cov me nyuam uas nyob hauv koj. Lawv yuav tsis tseg ob lub pob zeb sib tshooj nyob, yog vim koj tsis kam lees lub caij uas Ntuj tuaj xyuas koj.”

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 17th November 2016, 3:24 pm

    TIM 18 LUB HLIS 2016

    Hnub Rau Lis Piam Peb Caug Peb Nruab Xyoo C Nruab Lis Piam Xyoo II

    Nco txog Hnub ua kab ke foom hmoov zoo rau lub Tuam Tswv Teev Ntuj LN Pob Zeb thiab Paj Lug;
    Hwm LN Rose Philippine Duschesne

    Zaj Nyeem Ib: QYTN 10: 8-11


    8 Lub suab uas kuv tau hnov nrov saum ntuj tuaj rov qab hais rau kuv tias : “Koj mus nqa phau ntawv me me uas qhib, nyob hauv tus Tshiab sawv ntsug saum hiav txwv thiab saum av txhais tes.” 9 Ces kuv mus txog ntawm tus Tshiab, kuv thov nws kom muab phau ntawv me me rau kuv. Tus Tshiab hais rau kuv tias : “Koj nqa mus, kom muab noj. Phau ntawv no yuav iab koj lub plab, tab sis hauv koj qhov ncauj mas yuav qab cuag zib ntab.” 10 Kuv txais phau ntawv ntawm tus Tshiab txhais tes los, ces kuv muab noj. Thaum nyob hauv kuv qhov ncauj, mas kuv hnov qab cuag zib ntab, tab sis thaum kuv nqos tas mas kuv lub plab iab tas nrho. 11 Ces luag hais rau kuv tias : “Koj yuav tsum rov qab ua Yaj Saub qhia cov haiv neeg, cov kuj cuab, cov xeem lus, thiab cov vaj ntxwv.”

    NPN 119: 14, 24, 72, 103, 111, 131

    Txais: (103a) Lo lus koj tau cog tseg qab zib ua luaj rau kuv qhov ncauj!

    Kuv zoo siab taug txoj kev ua raws li koj lo lus,
    Zoo siab tshaj ua neeg nplua nuj muaj txhij txhua.

    Txais: (103a) Lo lus koj tau cog tseg qab zib ua luaj rau kuv qhov ncauj!

    Koj cov lus qhia ua rau kuv zoo siab,
    Koj cov lus pab tswv yim rau kuv.

    Txais: (103a) Lo lus koj tau cog tseg qab zib ua luaj rau kuv qhov ncauj!

    Txoj Cai uas tawm hauv koj lub ncauj los,
    muaj nqe rau kuv dua ib txhab nyiaj ib txhab kub.

    Txais: (103a) Lo lus koj tau cog tseg qab zib ua luaj rau kuv qhov ncauj!

    Cov lus koj tau cog tseg qab zib ua luaj rau kuv tus nplaig,
    qab dua zib ntab zib mu nyob hauv kuv qhov ncauj !

    Txais: (103a) Lo lus koj tau cog tseg qab zib ua luaj rau kuv qhov ncauj!

    Koj cov lus qhia yog kuv lub cuab tam mus li,
    yog kuv txoj kev sov siab.

    Txais: (103a) Cov lus koj tau cog tseg qab zib ua luaj rau kuv qhov ncauj!

    Kuv huas pa laws rua ncauj txog siav,
    Vim kuv tshaib nqhis koj cov lus qhia.

    Txais: (103a) Cov lus koj tau cog tseg qab zib ua luaj rau kuv qhov ncauj!

    As Les Lus Yas: Zam 10: 27

    Txais: As les lus yas, as les lus yas.

    Huab Tais hais tias: “Kuv cov yaj mloog kuv lub suab,
    kuv paub lawv, lawv lawv kuv qab nraim.

    Txais: As les lus yas, as les lus yas.

    Ntawv Moo Zoo: LK 19: 45-48

    45 Yes Xus chaws mus hauv lub Tuam Tsev Teev Ntuj, nws ntiab cov neeg muag toob xib tawm, nws hais rau lawv tias : 46 "Ntawv sau hais tias : Kuv lub tsev yog tsev teev Ntuj, tab sis nej muab ua ib lub qhov tsua rau tub sab nkaum." 47 Yes Xus niaj hnub qhia nyob hauv lub Tuam Tsev Teev Ntuj. Cov Thawj Leej Choj, cov Kws Ntawv Ntshiab, thiab pej xeem cov thawj coj nrhiav ib txog kev muab nws ntes tua. 48 Tab sis lawv nrhiav tsis tau kev yuav ntes nws li cas, vim tas tsoom pej xeem mloog nws hais lus mas lawv dai ncuv rau nws lub qhov ncauj xwb.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 18th November 2016, 11:29 am

    TIM       19      LUB      11      HLIS       2016

    Hnub Xya Lis Piam Peb Caug Peb Nruab Xyoo C Nruab Lis Piam Xyoo II

    Hwm Niam Mab Liab

    Zaj Nyeem Ib:      QYTN  11:   4-12


    Zam hnov ib lub suab hais saum ntuj tuaj tias:
    4 “Ob tug no yog ob tsob txiv ntoo roj thiab ob tug ncej txawb teeb uas sawv ntawm tus Huab Tais kav ntiaj teb xub ntiag. 5 Yog leej twg xav ua phem rau nkawd, mas hluav taws yuav tawm hauv nkawd qhov ncauj los hlawv nkawd cov yeeb ncuab ; tus twg xav ua phem rau nkawd, mas nws yuav tsum raug tuag zoo li hais los. 6 Ob tug no muaj hwj huam kaw tau lub ntuj kom txhob los nag, mus txog hnub nkawd ua yaj saub tas tso. Nkawd kuj muaj hwj huam hloov tau dej ua ntshav, thiab tso tas puas tsav yam xwv txheej rau lub ntiaj teb thaum twg los tau ywj nkawd siab. 7 Tab sis thaum nkawd ua tim khawv tas lawm, mas tus tsiaj uas tawm hauv qhov ntuj los, yuav tuaj ua rog rau nkawd; nws yuav yeej nkawd thiab yuav muab nkawd tua. 8 Nkawd ob lub cev yuav nyob nraum tshav puam ntawm txoj kev loj hauv lub Tuam Tsheej uas luag muab hu piv rau Xos Dos Mas, los Hais Nkws Tos, nyob ntawm thaj chaw uas nkawd tus Huab Tais raug muab dai saum ntoo cuam. 9 Tib neeg tuaj ntawm txhua haiv, txhua hom neeg, txhua xeem lus, txhua lub teb chaws tuaj yuav ntsia ntsoov nkawd ob lub cev peb hnub thiab ib tog hnub. Lawv yuav tsis pub coj mus zwm ntxa li. 10 Cov neeg nyob ntiaj teb yuav zoo siab kawg thiab yuav hais lus qhuas ib leeg rau ib leeg, lawv yuav sib pub paj tshab, vim ob tug Yaj Saub no tau ua kom cov neeg nyob ntiaj teb ntxhov siab ntau. 11 Tab sis dhau peb hnub thiab ib tog hnub lawm, mas ib txog pa muaj sia yuav tawm ntawm Tswv Ntuj tuaj rau hauv nkawd, ces nkawd yuav sawv tsees tau los. Cov neeg uas ntsia nkawd, yuav ntshai loj kawg nkaus. 12 Ces lawv yuav hnov ib lub suab hais nrov nrov saum ntuj tuaj rau nkawd tias : “Neb nce los saum no !” Nkawd thiaj li nce saum tauv huab mus lawm saum ntuj rau nkawd cov yeeb ncuab qhov muag ntsia ntsoov.

    NPN      144:   1, 2, 9-10

    Txais: (1) Thov kom HUAB TAIS nto koob meej, nws yog kuv lub tsua!

    Thov kom HUAB TAIS nto koob meej, nws yog kuv lub tsua,
    nws qhia kuv ob txhais tes kom txawj ntaus rog,
    kuv ntiv tes kom txawj ntaus tsam.

    Txais: (1) Thov kom HUAB TAIS nto koob meej, nws yog kuv lub tsua!

    Nws yog kuv qhov chaw nkaum, yog kuv lub yeej ntsa zeb,
    Yog kuv lub loog ruaj nreb, yog tus cawm kuv dim,
    Yog kuv daim leem phiaj, kuv tso siab rau nws ;
    nws rub kuv cov neeg kom los zwm rau kuv.

    Txais: (1) Thov kom HUAB TAIS nto koob meej, nws yog kuv lub tsua!

    Tswv Ntuj, kuv yuav hu ib zag nkauj tshiab txog koj,
    Kuv yuav ntaus lub thaj cheej kaum txoj hlua cav txog koj.
    Koj yog tus pub kev yeej rau cov vaj,
    Yog tus cawm koj tus tub txib Das Vis ntawm rab ntaj tua neeg.

    Txais: (1) Thov kom HUAB TAIS nto koob meej, nws yog kuv lub tsua!

    As Les Lus Yas:       2 TM  1:   10

    Txais:   As les lus yas, as les lus yas.

    Peb tus Cawm Seej Yes Xus Pleev tau rhuav txoj kev tuag,
    thiab nws lub Moo Zoo ua kom txoj sia ci tawm tuaj.

    Txais:   As les lus yas, as les lus yas.

    Ntawv Moo Zoo:      LK  20:   27-40

    27 Muaj ob peb tug Xas Dus Kais txav los, lawv yog cov uas hais tias neeg tuag tsis muaj kev sawv rov los. 28 Lawv nug Yes Xus tias : "Mais Xes sau cia rau peb tias : Yog leej twg tus kwv tij tuag lawm, tseg poj niam cia tsis tau muaj me nyuam li, mas tus kwv yuav tsum qaws tus poj ntsuam kom tsa tau tus kwv tij uas tuag lawd lub keeb sawv. 29 Muaj xya leej kwv tij. Thawj tug yuav poj niam, nws tuag tsis tau muaj tub ki li. 30 Tus ob kuj ua ib yam li ntawd, 31 thiab tus peb kuj qaws tus poj niam, tas lawv xya leej puav leej qaws tus poj niam thiab tuag tsis muaj tub ki li. 32 Thaum kawg, tus poj niam kuj tuag lawm thiab. 33 Ua li mas lub zim txwv neeg tuag yuav sawv rov los, tus poj niam ntawd yuav yog tus twg poj niam ? Vim lawv xya leej tau yuav nws ua poj niam." 34 Yes Xus thiaj hais rau lawv tias : "Cov tub ki hauv tiam no sib qaws ua txij ua nkawm. 35 Tab sis cov uas Ntuj txiav tias lawv tsim nyog mus nyob fab lwm tiam, thiab tsim nyog sawv hauv cov tuag rov los, mas lawv tsis yuav poj niam thiab tsis yuav txiv; 36 Lawv kuj yuav tsis txawj tuag ntxiv, vim lawv yuav zoo ib yam li cov tshiab lawm xwb; thiab lawv yog Tswv Ntuj cov tub, vim lawv yog cov yuav sawv rov los. 37 Hais txog tias cov tuag yuav sawv rov los, mas Mais Xes twb qhia txog qhov ntawd nyob hauv zaj hais txog Tsob Pos, thaum nws hu Huab Tais ua Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj. 38 Ua li mas Tswv Ntuj tsis yog cov tuag tus Tswv Ntuj, yog cov neeg ciaj tus Tswv Ntuj; vim tias rau Tswv Ntuj mas tas sawv daws muaj txoj sia." 39 Ob peb tug Kws Ntawv Ntshiab qhib ncauj hais tias : "Xib Hwb, koj hais tau zoo kawg." 40 Ces lawv tsis muaj cuab kav rov nug Yes Xus ib lo lus ntxiv.


    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 30th November 2016, 7:57 pm

    Thov txim tias kuv tseg tau kaum tawm hnub tsis tau tuaj tso cov zaj nyeem nruab lis piam lawm. Kuv tau mus xyuas kuv txiv ntxawm Koov Tooj uas nws muaj mob hnyav lawm, ces hnub no mam rov tuaj tso. Ntshai yuav yog peb plaub hnub mam li yuav caum cuag lub caij os.


    Last edited by Mim on 1st December 2016, 10:43 am; edited 1 time in total

    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 30th November 2016, 8:01 pm

    TIM 21 LUB 11 HLIS 2016

    Hnub Ob Lis Piam Peb Caug Plaub Nruab Xyoo C Nruab Lis Piam Xyoo II

    Hwm Hnub Niam Mab Liab mus nyob hauv lub Tuam Tsev Teev Ntuj (Memorial of the Presentation of the Blessed Virgin Mary)

    Zaj Nyeem Ib: QYTN 14: 1-3, 4B-5


    1 Ces kuv pom tus Yaj sawv ntsug saum lub roob Xis Yoos. Thiab muaj ib puas plaub caug plaub txhiab leej neeg uas lawv muaj nws lub npe thiab nws Txiv lub npe sau rau saum lawv hauv pliaj. 2 Thiab kuv hnov ib lub suab nrov saum ntuj tuaj xws li dej nrov, thiab xws li xob quaj ib rhe muaj ceem. Lub suab kuv hnov muaj ntsis nrov zoo li ib co tub ntaus thaj cheej tab tom ntaus lawv cov thaj cheej. 3 Lawv hu ib zag txuj pag seev tshiab nyob ntawm lub theej kiab hauv ntej, thiab nyob ntawm Plaub Leeg Muaj Txoj Sia thiab ntawm cov Laus xub ntiag. Tsis muaj leej twg kawm tau zaj txuj pag seev ntawd li, tsuas yog ib puas plaub caug plaub txhiab leej uas Ntuj tau txhiv lawv ntawm lub ntiaj teb los xwb.
    4 Lawv cov ntawd yog cov raws Leej Yaj mus tas qhov txhia chaw. Lawv yog cov uas Ntuj txhiv ntawm ib tsoom neeg los ua Tswv Ntuj thiab Leej Yaj thawj phaum txiv. 5 Tsis muaj leej twg nrhiav tau ib lo lus dag hauv lawv lub ncauj li. Tsis muaj ib qho xyeej nyob hauv lawv li.

    NPN 24: 1BC-2, 3-4AB, 5-6

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Lub ntiaj teb thiab puas tsav yam nyob hauv yog HUAB TAIS li,
    lub sim ceeb thiab cov nyob hauv yog nws tug.
    Vim nws yog tus tsim lub ntiaj teb los txawb rau saum cov hiav txwv
    thiab muab tso rau saum cov dej ntws.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Leej twg thiaj yuav nce tau saum HUAB TAIS lub roob?
    Los leej twg thiaj yuav mus sawv taus nyob hauv nws thaj chaw ntshiab?
    Yog tus uas txhais tes tsis muaj txhaum, lub siab dawb huv,
    tus uas tsis ntshaw tej yam tsis muaj qab hau.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    HUAB TAIS yuav foom koob hmoov rau nws. ,
    yog paj tshab tuaj ntawm Tswv Ntuj tus cawm nws tuaj.
    Lawv yuav zoo li no, tsav neeg uas nrhiav Tswv Ntuj,
    cov uas nrhiav Yas Kos tus Tswv Ntuj lub ntsej muag.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    As Les Lus Yas: MT 24: 42A, 44

    Txais: As les lus yas, as les lus yas.

    Nej kav tsij zov hmo,
    vim nej tsis paub thaum twg Neeg Leej Tub yuav los.

    Txais: As les lus yas, as les lus yas.

    Ntawv Moo Zoo: LK 21: 1-4

    1 Yes Xus tsa muag ntsia, nws pom cov neeg nplua nuj tso nyiaj pub ua paj tshab rau hauv lub txhab ceev nyiaj. 2 Nws kuj pom ib tug poj ntsuam pluag tso ob lub txiaj toog thiab, 3 ces nws hais tias : "Kuv hais tseeb rau nej tias tus poj ntsuam pluag no tso nyiaj ntau tshaj sawv daws huv tib si. 4 Vim tias tas cov neeg ntawd, lawv rho lawv cov nyiaj seem los pub ua paj tshab. Tab sis tus poj ntsuam ntawd rho nyiaj hauv nws txoj kev pluag los, nws muab tas nws lub cuab tam los tso rau hauv."




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 30th November 2016, 8:03 pm


    TIM 22 LUB 11 HLIS 2016

    Hnub Peb Lis Piam Peb Caug Plaub Nruab Xyoo C Nruab Lis Piam Xyoo II

    Hwm LN Xes Xis Lias (Cecilia), Nkauj ua tim Khawv

    Zaj Nyeem Ib: QYTN 14: 14-19


    14 Ces kuv pom ib twv huab dawb. Muaj ib tug zoo xws li Tib Neeg ib Leeg Tub zaum saum twv huab. Nws ntoo ib lub teev kub, thiab tuav ib rab liag ntse zuag plias ntawm tes. 15 Muaj dua ib tug Tshiab tawm hauv lub Tuam Tsev Ntshiab tuaj. Nws hu tus zaum saum twv huab nrov nrov tias : “Koj nrom koj rab liag mus sau qoob. Txog lub caij sau qoob lawm. Vim cov qoob loo nyob ntiaj teb siav lawm.” 16 Ces tus zaum saum twv huab pov nws rab liag mus rau ntiaj teb ; nws sau cov qoob nyob ntiaj teb tas huv si.
    17 Muaj dua ib tug Tshiab tawm hauv lub Tuam Tsev Ntshiab saum ntuj tuaj, nws kuj tuav ib rab liag ntse zuag plias. 18 Thiab lwm tus Tshiab ntxiv tawm hauv lub thaj txi Ntuj los, nws yog tus Tshiab uas txais lub peev xwm tswj hluav taws. Nws qw nrov nrov rau tus Tshiab tuav rab liag ntse tias : “Koj nrom koj rab liag ntse mus hlais cov ntwg txiv cawv nyob ntiaj teb. Cov txiv cawv siav lawm.” 19 Tus Tshiab thiaj pov rhees nws rab liag mus rau ntiaj teb. Nws txiav cov txiv cawv tas huv si los ntim hauv lub thoob zom txiv ua cawv uas rau Tswv Ntuj tej kev chim kev npau.

    NPN 96: 10, 11-12, 13

    Txais: (13b) Huab Tais tuaj txiav txim rau lub ntiaj teb.

    Hais rau txhua haiv neeg tias: HUAB TAIS yog vaj ntxwv.;
    Nws tsim lub ntiaj teb kom nyob ruaj, kom txhob muaj leej twg muab txav;
    Nws tswj tsoom pej xeem nrog kev ncaj ncees.

    Txais: (13b) Huab Tais tuaj txiav txim rau lub ntiaj teb.

    Kom lub ntuj zoo siab, lub ntiaj teb hom khaj;
    kom dej hiav txwv thiab txhua yam nyob hauv tsa suab nrov nrov;
    kom cov tiaj nras thiab txhua yam nyob hauv luag ntxhi!
    Thiab kom txhua tus ntoo hauv hav zoov zoo siab.

    Txais: (13b) Huab Tais tuaj txiav txim rau lub ntiaj teb.

    Lawv yuav dhia zoo siab ntawm HUAB TAIS xub ntiag,
    vim nws tuaj txog lawm, nws tuaj kav lub ntiaj teb.
    Nws yuav tswj lub ntiaj teb raws kev ncaj ncees,
    thiab cov haiv neeg raws kev pheej xeeb.

    Txais: (13b) Huab Tais tuaj txiav txim rau lub ntiaj teb.

    As Les Lus Yas: QYTN 2: 10C

    Txais: As les lus yas, as les lus yas.

    Koj nyob ruaj nreb txog hnub tuag mog !
    Ces kuv yuav muab txoj sia ua mom teev kub rau koj ntoo.

    Txais: As les lus yas, as les lus yas.

    Ntawv Moo Zoo: LK 21: 5-11

    5 Thaum ntawd, ib txhia hais tias lub Tuam Tsev Teev Ntuj txhim tau pob zeb zoo nkauj rau thiab muaj paj tshab txi Ntuj zoo saib. Yes Xus hais tias : 6 "Tej uas nej qhov muag ntsia ntawm no, muaj ib hnub luag yuav rhuav tsis tseg ob lub pob zeb txhim sib tshooj sawv ntsug." 7 Lawv nug Yes Xus tias : "Xib Hwb, thaum twg tej ntawd mam li tshwm sim tuaj, thiab yuav muaj lub cim dab tsi thaum tej ntawd yuav tshwm sim tuaj ?”
    8 Yes Xus hais tias : "Nej ceev faj txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias : 'Yog kuv', thiab yuav hais tias : 'Lub zim txwv twb los txog ze ze lawm'. Mas nej txhob mus raws lawv. 9 Thaum nej hnov luag tham txog kev tsov rog thiab kev kub ntxhov, mas nej tsis txhob ntshai. Vim tias tej ntawd yuav tsum tshwm sim tuaj tso, tab sis tsis tau txog lub zim txwv kawg tam sis ntawd." 10 Yes Xus hais rau lawv tias : "Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws. 11 Lub ntiaj teb yuav qeeg heev kawg. Nyob rau ntau qhov chaw yuav muaj mob aws, thiab muaj kev tshaib. Yuav muaj tej yam xwm txaus ntshai kawg, thiab tej lub cim loj nyob saum ntuj. “




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 1st December 2016, 2:12 pm

    TIM 23 LUB 11 HLIS 2016

    Hnub Plaub Lis Piam Peb Caug Plaub Nruab Xyoo C Nruab Lis Piam Xyoo II

    Hwm LN Clement I, LN Columban, thiab tus tau hmoov zoo Miguel Pro

    Zaj Nyeem Ib: QYTN 15: 1-4


    1 Kuv, Zam, tseem rov pom dua ib lub cim ntxiv, yog ib lub cim loj thiab txaus ntshai tas nrho nyob saum ntuj: Yog xya tus Tshiab nqa xya yam xwv txheej. Cov xwv txheej no yog cov kawg uas yuav ua kom Tswv Ntuj lub siab npau nqig. 2 Ces kuv pom zoo li ib lub hiav txwv ci ci xws li tsom iav xyaw hluav taws. Cov neeg uas tau yeej tus Tsiaj, yeej nws tus duab thiab nws tus zauv, mas lawv sawv ntsug saum lub hiav txwv iav. Lawv tuav Tswv Ntuj cov thaj cheej ntawm tes. 3 Lawv hu Tswv Ntuj tus tub txib Mais Xes zaj nkauj thiab Leej Yaj zaj nkauj tias : “Huab Tais Tswv Ntuj Muaj Hwj Huam, koj cov hauj lwm loj thiaj zoo tas nrho! Vaj kav txhua haiv neeg, koj tej kev yog kev ncaj thiab kev tseeb. 4 Huab Tais, leeg twg thiaj tsis xav hwm koj, thiab tsis xav cav lus zoo txog koj lub npe ? Vim koj tib leeg thiaj yog Tus Ntshiab. Txhua haiv neeg yuav tuaj pe hawm koj, vim koj qhia koj cov hauj lwm ncaj rau sawv daws paub.”

    NPN 98: 1, 2-3AB, 7-8, 9

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej,
    Thiab nws sab npab ntshiab.

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    HUAB TAIS ua kom sawv daws paub txog nws txoj kev cawm,
    nws muab nws txoj kev ncaj rau cov haiv neeg pom.
    Nws rov nco txog nws txoj kev ua zoo rau thiab hlub
    tsev neeg His Xas Lais.

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    Kom dej hiav txwv thiab cov tsiaj uas nyob hauv ua nrov nroo ntws,
    Kom lub ntiaj teb thiab tsoom neeg ua lom zem ntsuag qees;
    Kom cov niam dej npuaj teg,
    Kom cov roob nrog lawv qw zoo siab,

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    nyob ntawm HUAB TAIS xub ntiag, vim nws tab tom tuaj,
    nws tuaj tswj kav lub ntiaj teb.
    Nws yuav tswj kav qab ntuj neeg raws kev ncaj,
    Nws yuav tswj kav cov haiv neeg raws kev haum pheej.

    Txais: (QYTN 15: 3b) Huab Tais Tswv Ntuj muaj hwj huam, koj cov hauj lwm loj thiab zoo tas nrho!

    As Les Lus Yas: QYTN 2: 10C

    Txais: As les lus yas, as les lus yas.

    Koj ntseeg ruaj nreb mus txog hnub tuag mog !
    Ces kuv yuav muab txoj sia ua mom teev kub rau koj ntoo.

    Txais: As les lus yas, as les lus yas.

    Ntawv Moo Zoo: LK 21: 12-19

    Yes Xus hais tias:
    12 Ua ntej ib puas tsav yam ntawd, luag yuav ntes nej thiab yuav hiam nej, luag yuav coj nej mus kom rau cov tsev txoos thiab tsev loj faj. Luag yuav coj nej mus rau ntawm cov vaj thiab cov nom tswj teb chaws xub ntiag vim kuv lub npe. 13 Tej ntawd yuav pub ib lub zoo sij hawm rau nej ua tim khawv. 14 Nej khaws rau nruab siab tias nej yuav tsis txhob xub npaj ib co lus teb kom txuag tau nej. 15 Vim kuv yuav muab ib co lus thiab ib txog kev thoob tsib rau nej, ces cov ntxub nej yuav tsis muaj ib tug teb tau thiab cav tau nej cov lus. 16 Tab yog nej niam nej txiv, nej cov kwv tij, cov txheeb ze, thiab cov phooj ywg, los lawv tseem yuav mus kom nej. Luag yuav muab nej ib txhia tua. 17 Luag yuav ntxub nej vim kuv lub npe. 18 Tab sis tsis muaj ib txoj plaub hau saum nej taub hau yuav ploj. 19 Nej ua siab ruaj kom tom thawj, ces nej yuav cawm nej txoj sia."




    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 1st December 2016, 2:23 pm

    TIM 24 LUB 11 HLIS 2016

    Hnub Tsib Lis Piam Peb Caug Plaub Nruab Xyoo C Nruab Lis Piam Xyoo II

    Thanksgiving Day – Hnub Ua Ntuj Tsaug.


    Niaj xyoo nyob rau USA mas lub 11 hlis Hnub Tsib hauv lub lis piam plaub, peb muaj kev Ua Ntuj Tsaug Thanksgiving). Xyoo no raug rau tim 24, xyoo tas lawm raug rau tim 26, lwm xyoo tej zaum yuav raug rau ib hnub txawv lawm thiab. Vim li ntawd, kuv yuav xub tso cov zaj nyeem rau Hnub Ua Ntuj Tsaug, ces kuv mam tso cov zaj nyeem rau hnub tim 24 Nruab Lis Piam Xyoo II rau nram qab, vim xyoo tom ntej ub yuav tsis yog Thanksgiving lawm. Thiab tsis tas li xwb, nyob lwm teb chaws tsis muaj Thaksgiving, ces lawv yuav mus nyeem cov tsab ntawv uas yog rau hnub tim 24 lub 11 hlis no xwb.

    Zaj Nyeem Ib: Npes Xis Las SIR 50: 22-24

    22 Zaum no, nej cia li cav txog tus Tswv Ntuj kav tas lub sim ceeb, nws yog tus tau ua tej yam loj tas nrho nyob qhov txhia chaw, nws yog tus ua kom peb txawj loj hlob txij puag thaum peb tseem nyob leej niam plab los, thiab nws ua rau peb raws li nws txoj kev hlub kev khuv leej. 23 Thov nws pub kom peb muaj kev zoo siab puv npo thiab kom muaj kev thaj yeeb lug lub caij peb ua neej thiab nyob hauv His Xas Lais mus li txheej dhau txheej tiam dhau tiam. 24 Thov kom nws pub nws tej txiaj ntsim nyob nrog peb nraim thiab kom nws cawm peb hauv peb lub neej.

    NPN 145: 2-3, 4-5, 6-7, 8-9, 10-11

    Txais: (1) Kuv yuav cav txog koj lub npe mus li, Huab Tais.

    Kuv yuav niaj hnub cav txog koj lub koob meej,
    kuv yuav cav lus zoo txog koj lub npe mus li ib txhiab ib txhis.
    HUAB TAIS loj tas nrho, tsim nyog cav txog nws ;
    nws loj tas nrho, neeg ntsuas tsis tau.

    Txais: (1) Kuv yuav cav txog koj lub npe mus li, Huab Tais.

    Sawv daws yuav qhuas txog koj tej hauj lwm txheej dhau txheej,
    Lawv yuav tshaj koj txoj kev muaj hwj xyeej rau neeg paub.
    Koj cov hauj lwm qhia txog koj lub hwj huam hwj chim loj ci ntsa iab,
    kuv yuav hais tag hais thiab txog koj cov dej num tsim nyog qhuas.

    Txais: (1) Kuv yuav cav txog koj lub npe mus li, Huab Tais.

    Neeg yuav hais txog koj lub hwj huam ua tej yam txaus ntshai,
    lawv yuav tshaj koj lub hwj huam loj kawg nkaus.
    Neeg yuav tshaj txog koj lub siab zoo siab dav tas nrho,
    thiab yuav qw ntsuag qees cav txog koj lub siab ncaj.

    Txais: (1) Kuv yuav cav txog koj lub npe mus li, Huab Tais.

    HUAB TAIS lub siab hlub mos nyoos thiab khuv leej neeg,
    nws npau taws qeeb, nws lub siab hlub neeg tas nrho.
    HUAB TAIS ua siab zoo rau txhua leej txhua tus,
    nws lub siab khuv leej tas puas tsav yam nws tau tsim.

    Txais: (1) Kuv yuav cav txog koj lub npe mus li, Huab Tais.

    HUAB TAIS, cia koj txhua yam hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim

    Txais: (1) Kuv yuav cav txog koj lub npe mus li, Huab Tais.

    Zaj Nyeem Ob: 1 KLN 1: 3-9

    Cov kwv tij,
    3 Thov kom peb Txiv Tswv Ntuj thiab Huab Tais Yes Xus Pleev pub txiaj ntsim thiab kev thaj yeeb rau nej. 4 Kuv ua Tswv Ntuj tsaug tsis tseg vim nej, vim lub txiaj ntsim uas Tswv Ntuj tau pub rau nej nyob hauv Yes Xus Pleev, 5 ces nej muaj kev nplua nuj nyob hauv txhua yam, kev nplua nuj txawj hais lus thiab kev nplua nuj paub txog tas txhua yam txuj ci, 6 ib yam li txoj kev ua tim khawv txog Leej Pleev kuj tau cog ruaj khov kho nyob hauv nej lawm, 7 ces nej sis tshuav ib lub txiaj ntsim uas nej tsis tau txais, thaum lub caij uas nej tos ntsoov peb tus Huab Tais Yes Xus Pleev yuav tshwm sim los. 8 Nws yuav ua kom nej ntseeg ruaj nreb mus txog qhov kawg, kom hnub uas peb tus Huab Tais Yes Xus Pleev rov los txog, mas tsis muaj ib qho xyeej nyob hauv nej. 9 Tswv Ntuj yog tus pheej xeeb, nws hu nej kom los nrog nws Leej Tub, peb tus Huab Tais Yes Xus Pleev muaj kev sib raug zoo sib koom siab.

    As Les Lus Yas: 1 TXLN 5: 18

    Txais: As les lus yas, as les lus yas.

    Txawm nej yuav raug dab tsi los nej yuav ua Ntuj tsaug sis tseg,
    Vim Tswv Ntuj lub siab xav kom nej ua li ntawd nyob hauv Yes Xus Pleev.

    Txais: As les lus yas, as les lus yas.

    Ntawv Moo Zoo: LK 17: 11-19

    11 Thaum Yes Xus taug kev mus Yes Lus Xas Les, nws hla Xas Mas Lias thiab Nkas Lis Lais teb. 12 Thaum nws yuav mus hla hauv ib lub zos, muaj kaum tus mob ruas tuaj cuag nws, lawv nres deb ntawm nws. 13 Lawv tsa suab hais nrov nrov rau nws tias : "Xib Hwb Yes Xus, thov koj khuv leej peb!" 14 Yes Xus pom lawv, nws hais rau lawv tias : “Nej mus thws nej lub cev rau cov Leej Choj saib." Thaum lawv tab tom mus, lawv lub cev cia li huv tuaj. 15 Muaj ib tug hauv pab ntawd pom tias nws lub cev zoo lawm, nws tig hlo rov qab los, nws tsa suab nrov nrov cav txog Tswv Ntuj. 16 Nws khoov ti av pe ntawm Yes Xus ko taw, nws ua Yes Xus tsaug. Nws yog ib tug neeg Xas Mas Lias. 17 Yes Xus thiaj tsa ncauj teb tias : “Tsis yog muaj kaum leej rov huv tuaj lawm lod ? Tshuav cuaj leeg ne, dua qhov twg lawm? 18 Ua cas tsuas muaj tus qhua no xwb thiaj rov los ua tsaug cav txog Tswv Ntuj ?" 19 Ces Yes Xus hais rau nws tias : "Koj sawv mus mus tsev, koj lub siab ntseeg cawm tau koj lawm."

    +++++++++++++++++++++++++++++++++++++

    TIM 24 LUB 11 HLIS 2016

    Hnub Tsib Lis Piam Peb Caug Plaub Nruab Xyoo C Nruab Lis Piam Xyoo II

    Hwm LN As Nres Dung-Lac, ua Leej Choj, thiab Cov, sd tuag ua Tim Khawv

    Zaj Nyeem Ib: QYTN 18: 1-2, 21-23; 19: 1-3, 9A


    18 1 Dhau qhov ntawd tas, kuv, Zam, pom dua ib tug Tshiab nqes saum ntuj los, nws muaj hwj chim loj, nws lub hwj chim ci ntsa iab rau lub ntiaj teb. 2 Nws qw muaj zog nrov nrov tias : “Lub Tsheej Npas Npis Los loj loj poob lawm, poob lawm. Npas Npis Los hloov ua dab phem lub chaw nyob, ua dab tsis huv lub chaw nkaum, ua txhua hom noog tsis huv lub chaw nkaum thiab ua txhua hom tsiaj tsis huv thiab qias neeg lub chaw nkaum.”
    21 Ces ib tug Tshiab muaj zog khawv tau ib lub pob zeb zoo li ib lub zeb zom loj loj, nws muab cuam loo mus rau hauv dej ntuj, nws hais tias : “Ib yam li no, ib sij huam xwb, lub tsheej loj Npas Npis Los yuav raug siv zog muab cuam pov rau hauv av, ces yuav nrhiav tsis pom ib zaug ntxiv.
    22 Ces yuav tsis hnov cov kws ntaus thaj cheej thiab cov kws ntaus paj nruag lub suab nrov ntxiv, yuav tsis hnov suab raj, suab hom nrov nyob hauv koj ib zaug ntxiv. Yuav tsis pom muaj cov kws tes txawj tes nkiag nyob hauv koj ib zaug ntxiv. Yuav tsis hnov zom zeb nrov hauv koj ib zaug ntxiv.
    23 Teeb yuav tsis ci hauv koj ib zaug ntxiv. Yuav tsis hnov nkauj nyab nraug vauv lub suab sib hu nyob hauv koj ib zaug ntxiv; vim tias koj cov tub lag tub luam yog cov nom loj nyob ntiaj teb, thiab vim koj txoj kev ua khawv koob tso dab mus dag kom tas txhua haiv neeg yuam kev.”
    19 1 Dhau tej no lawm, kuv hnov zoo li ib lub suab nrov nroo ntws muaj ceev kawg tuaj ntawm ib pab neeg coob coob nyob saum ntuj tuaj, lawv qw tias : “As Les Lus Yas ! Txoj kev cawm neeg, lub koob meej, lub hwj huam yog peb tus Tswv Ntuj tug. 2 Vim nws txiav txim raws qhov tseeb thiab qhov ncaj, nws txiav txim rau tus Poj Ntiav uas coj lub ntiaj teb mus rau hauv txoj kev phem kev lwj liam lawm, thiab nws ua pauj rau tus poj ntiav vim nws cov tub txib cov ntshav lawm.” 3 Ces pab neeg rov txais tias : “As Les Lus Yas ! Cov pa taws uas hlawv tus Poj Ntiav yuav ncho mus ib txhiab ib txhis !”
    9 Tus Tshiab hais rau kuv tias : “Koj sau qhov no : Cov tau txoj hmoov zoo, yog cov uas raug caw tuaj noj Leej Yaj rooj tshoob rooj hno .”

    NPN 100: 1B-2, 3, 4, 5

    Txais: (Rev. 19: 9a) Cov tau hmoov zoo yog cov raug caw mus noj Leej Yaj rooj tshoob rooj hno.

    Txhua lub teb chaws, nej zoo siab hu nkauj rau HUAB TAIS !
    Nej xyiv fab hlo luag ntxhi tsob hwb HUAB TAIS ;
    nej hu nkauj zoo siab chaws los ntawm nws xub ntiag

    Txais: (Rev. 19: 9a) Cov tau hmoov zoo yog cov raug caw mus noj Leej Yaj rooj tshoob rooj hno.

    Nej yuav paub tias HUAB TAIS yog Tswv Ntuj.
    Nws tsim peb los, peb yog nws tug,
    peb yog nws haiv neeg, yog pab yaj nws saib.

    Txais: (Rev. 19: 9a) Cov tau hmoov zoo yog cov raug caw mus noj Leej Yaj rooj tshoob rooj hno.

    Nej chaws mus hauv nws cov rooj loog, nej ua nws tsaug,
    Nej mus hauv nws cov tshav loog, nej cav txog nws ;
    nej ua nws tsaug, nej foom lus zoo rau nws lub npe.

    Txais: (Rev. 19: 9a) Cov tau hmoov zoo yog cov raug caw mus noj Leej Yaj rooj tshoob rooj hno.

    Vim HUAB TAIS muaj lub siab zoo,
    nws txoj kev ua zoo yuav nyob mus li,
    nws ua ncaj rau peb txheej dhau txheej.

    Txais: (Rev. 19: 9a) Cov tau hmoov zoo yog cov raug caw mus noj Leej Yaj rooj tshoob rooj hno.

    As Les Lus Yas: LK 21: 28

    Txais: As les lus yas, as les lus yas.

    Nej sawv kom ntseg, nej yuav tsa taub hau,
    vim txoj kev txhiv nej los txog ze lawm.

    Txais: As les lus yas, as les lus yas.

    Ntawv Moo Zoo: LK 21: 20-28

    Yes Xus hais rau nws cov thwj tim tias:
    20 "Thaum nej pom tej pab tub rog tuaj vij Yes Lus Xas Les, mas nej yuav to taub tias kev rhuav Yes Lus Xas Les kom puas ntsoog nyob ze lawm. 21 Thaum ntawd mas, cov nyob hauv xeev Yus Das kav tsij cia li khiav mus lawm pem roob, cov nyob hauv nroog yuav tsum khiav tawm mus kom deb, hos cov uas nyob tom tej teb txhob mus hauv nroog. 22 Vim yog lub caij rob caub lawm, txhua tsav txhua yam uas sau tseg lawd yuav tsum tshwm sim tuaj. 23 Lub caij ntawd, cov poj niam cev hnyav thiab cov uas muaj me nyuam mos noj mis yuav raug txom nyem loj, vim tias yuav muaj xwv txheej loj los raug ntiaj teb, thiab yuav muaj kev npau taws loj rau txim rau haiv neeg no. 24 Lawv yuav ntog vim raug hniav ntaj tua thiab luag yuav ntes lawv mus nyob txim rau hauv txhua haiv neeg uas teev pej kum dab, ces cov haiv neeg teev pej kum dab yuav tsuj Yes Lus Xas Les mus txog hnub cov neeg teev pej kum dab lub caij dua lawm."
    25 "Yuav muaj ib co cim nyob saum lub hnub, lub hli thiab cov hnub qub. Nyob ntiaj teb, ib tsoom haiv neeg yuav raug kev txhawj xeeb loj, yuav nyuaj siab kawg nkaus vim yuav hnov dej hiav txwv ntas ntua thiab nphau nphwv ua suab nrov nroo ntws. 26 Neeg yuav tuag ntshai, thaum lub caij lawv nyob tos tej yam yuav tuaj raug lub qab ntuj neeg, vim tej yam muaj hwj huam nyob txheej ntuj saud yuav co ua zog koog. 27 Ces thaum ntawd, sawv daws yuav pom Neeg Leej Tub muaj hwj huam thiab muaj hwj chim loj kawg nkaus, los saum ib tw huab los. 28 Thaum tej ntawd pib tshwm sim tuaj, mas nej yuav sawv kom ntseg, nej yuav tsa taub hau, vim txoj kev txhiv nej los txog ze lawm."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 1st December 2016, 4:37 pm

    TIM 25 LUB 11 HLIS 2016

    Hnug Rau Lis Piam Peb Caug Plaub Nruab Xyoo C Nruab Lis Piam Xyoo II

    Hwm LN Kas Tes Lis Nas (Catherine) nyob Alexandria

    Zaj Nyeem Ib: QYTN 20: 1-4, 11—21:2


    1 Ces kuv, Zam, pom ib tug Tshiab nqes saum ntuj los, nws tuav tus yawm sij qhib lub Qhov Ntuj, thiab tuav ib txog saw loj loj. 2 Tus Tshiab nthos nkaus tus Zaj, uas yog tus Nab txheej thaud, yog tus Dab Phem thiab yog Xas Tas. Nws muab khi kom puv ib txhiab xyoo. 3 Nws muab nrom sis rau hauv Qhov Ntuj, nws kaw nkaus lub ncauj qho, muab xauv rau, kom nws tsis tau kev mus ntxias cov haiv neeg ntxiv, mus txog hnub puv ib txhiab xyoo. Thaum dhau ib txhiab xyoo lawd, mas Ntuj yuav tso nws tawm rov los ib ntus tsis ntev.
    4 Ces kuv pom ib co theej kiab. Cov neeg zaum saum cov theej kiab ntawd tau txais txoj cai txiav txim. Kuv tseem pom cov ntsuj plig uas raug luag txiav caj dab, vim lawv ua tim khawv txog Yes Xus thiab txog Tswv Ntuj lo lus, lawv tsis tau hawm tus Tsiaj thiab nws tus duab, thiab tsis tau txais tus Tsiaj lub cim rau saum lawv hauv pliaj los saum lawv txhais tes. Lawv rov muaj txoj sia tuaj, ces lawv nrog Leej Pleev nyob ua vaj ib txhiab xyoo.
    11 Kuv tseem pom ib lub theej kiab loj kawg, dawb paug, thiab pom tus zaum saum lub theej kiab. Lub ntuj thiab lub ntiaj teb khiav mus deb ntawm nws lub ntsej muag. Tsis muaj chaw rau lub ntuj lub teb nyob ntxiv lawm. 12 Ces kuv pom cov tuag, cov hlob, cov yau huv tib si, sawv daws sawv ntsug nyob ntawm hauv ntej ntawm lub theej kiab. Luag nthuav tej phau ntawv, luag tseem nthuav dua ib phau ntxiv thiab, yog phau ntawv txoj sia. Ces ib tsoom neeg tuag raug txiav txim raws li sau tseg rau hauv tej phau ntawv ntawd, raws li cov hauj lwm uas lawv tau ua. 13 Lub hiav txwv xa cov tuag uas nws khaws cia tawm los; txoj Kev Tuag thiab Tub Tuag Teb kuj xa cov tuag rov los. Lawv nyias raug txiav txim raws li nyias cov hauj lwm. 14 Ces Txoj Kev Tuag thiab Tub Tuag Teb raug muab cuam pov rau hauv lub pas hluav taws : lub pas hluav taws no yog kev tuag zaum ob. 15 Tus twg lub npe tsis tshwm nyob hauv phau ntawv txoj sia, mas luag muab nws pov rau hauv lub pas hluav taws ntawd.
    21 1 Ces kuv pom ib lub ntuj tshiab thiab ib lub ntiaj teb tshiab. Thawj lub ntuj thiab thawj lub ntiaj teb dua tas lawm. Hiav txwv kuj tsis muaj ntxiv lawm. 2 Ces kuv pom lub nroog Ntshiab, uas yog lub Yes Lus Xas Les tshiab nqes saum ntuj, pem Tswv Ntuj los. Nws ua zam zoo nkauj xws li tus nkauj nyab tshiab ntim zam sees tos nraug vauv.

    NPN 84: 3, 4, 5-6A + 8A

    Txais: (QYTN 21: 3b) Tswv Ntuj nrog nws haiv neeg nyob ntawm no.

    Kuv tus plig ntshaw seev yees yuj plaws
    rau HUAB TAIS cov tshav loog.
    Kuv lub siab lub cev quaj qw hu
    txog tus Tswv Ntuj muaj txoj sia.

    Txais: (QYTN 21: 3b) Tswv Ntuj nrog nws haiv neeg nyob ntawm no.

    Tab cov me noog liaj nrhiav tau chaw nyob,
    noog luv nrhiav tau zes puag nws cov me nyuam,
    ntawm koj cov thaj txi ntuj, HUAB TAIS kav tsoom tshiab,
    kuv tus vaj, kuv tus Tswv Ntuj!

    Txais: (QYTN 21: 3b) Tswv Ntuj nrog nws haiv neeg nyob ntawm no.

    Cov neeg nyob hauv koj tsev lawv txoj hmoov zoo :
    lawv tau kev cav txog koj mus li tsis tseg.
    Cov uas saib koj yog lawv lub zog, lawv txoj hmoov zoo.
    Lawv yim mus kev lawv lub zog yim loj tuaj.

    Txais: (QYTN 21: 3b) Tswv Ntuj nrog nws haiv neeg nyob ntawm no..

    As Les Lus Yas: LK 21: 28

    Txais: As les lus yas, as les lus yas.

    Nej yuav sawv kom ntseg, nej yuav tsa taub hau siab,
    Vim txoj kev txhiv nej los txog ze ntawd lawm.

    Txais: As les lus yas, as les lus yas.

    Ntawv Moo Zoo: LK 21: 29-33

    29 Yes Xus hais ib zag piv lus tias : "Nej ntsia tsob txiv ncuav pias thiab tas cov ntoo huv tib si. 30 Thaum lawv cov cos pib tawg nplooj, mas nej pom thiab nej to taub tias ntuj sov los yuav txog. 31 NKkuj ib yam li ntawd thiab, thaum nej pom tej xwm ntawd tshwm sim tuaj, nej yuav to taub tias Tswv Ntuj lub Ceeb Tsheej los yuav txog. 32 Kuv hais tseeb rau nej tias tiam neeg no yuav tsis dua mus, mus txog thaum tas ib puas tsav yam ntawd xub tshwm sim tuaj tso. 33 Lub ntuj thiab lub ntiaj teb yuav dua mus, tab sis kuv cov lus yuav tsis dua.”



    Mim
    Tswv Cuab Hmong Catholique
    Tswv Cuab Hmong Catholique

    Messages : 1650
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 2nd December 2016, 1:29 pm

    TIM      26     LUB     11     HLIS      2016

    Hnub Xya Lis Piam Peb Caug Plaub Nruab Xyoo C Nruab Lis Piam Xyoo II

    Hwm Niam Mab Liab

    Zaj Nyeem Ib:      QYTN  22:   1-7


    Zam sau tias:
    1 Ces tus Tshiab qhia tus dej muaj txoj sia rau kuv xyuas, dej mas ntshiab ci cuag tsom iav; nws txhawv ntawm Tswv Ntuj thiab Leej Yaj lub theej kiab los ntws taug hauv nruab nrab txoj kev. 2 Ntawm tus dej ob sab ntug, tuaj cov ntoo uas pub txoj sia. Lawv txi kaum ob phaum txiv, ib hlis txi ib phaum. Cov nplooj ntoos zoo tshuaj, kho tau cov haiv neeg kom zoo hlo. 3 Yuav tsis muaj lus foom phem ntxiv. Tswv Ntuj thiab Leej Yaj lub theej kiab yuav txawb nyob hauv lub tsheej ; Tswv Ntuj cov tub txib yuav pe hawm Tswv Ntuj. 4 Lawv yuav pom Tswv Ntuj lub ntsej muag ; Tswv Ntuj lub npe yuav sau rau saum lawv hauv pliaj. 5 Yuav tsis muaj hmo ntuj lawm. Lawv yuav tsis siv teeb thiab tsis tos lub hnub ci tuaj kom lawv pom kev ntxiv : vim Huab Tais Tswv Ntuj yuav ci pom kev nrig tuaj rau lawv. Lawv yuav ua vaj nyob txheej dhau txheej.
    6 Ces tus Tshiab hais rau kuv tias : “Cov lus no yog lus txaus ntseeg thiab lus tseeb. Huab Tais Tswv Ntuj uas yog tus tshoj cov Yaj Saub, nws tau xa nws tus Tshiab tuaj qhia kom nws cov tub txib paub txog cov xwm uas yuav tshwm sim tuaj tsis ntev tom ntej no. 7 Ntsia saib ! Kuv twb yuav rov los sai sai.”  Tus tau txoj hmoov zoo yog tus khaws cov lus saub qhia txog yav tom ntej uas sau tseg rau hauv phau ntawv no .”

    NPN      95:   1-2, 3-5, 6-7AB

    Txais:   (1 KLN 16: 22b, QYTN 22: 20c)  Huab Tais yuav tuaj! Thov koj tuaj tsuag tsuag, Huab Tais Yes Xus!

    Nej tuaj ! Peb qw zoo siab rau HUAB TAIS,
    peb cav txog lub tsua uas cawm peb ;
    Peb txav los ntawm nws xub ntiag, ua nws tsaug,
    peb nqua suab hu nkauj cav txog nws.

    Txais:    Huab Tais yuav tuaj! Thov koj tuaj tsuag tsuag, Huab Tais Yes Xus!

    Vim HUAB TAIS yog tus Tswv Ntuj loj,
    Thiab tus vaj loj nyob siab dua txhua tus tswv ntuj.
    Nws tuav lub ntiaj teb qhov tob rau hauv nws txhais tes;
    Cov hauv roob siab yog nws li;
    Cov hiav txwv nws li yog nws tsim,
    cov tuam teb yog nws tug, yog nws ob txhais tes puab.

    Txais:    Huab Tais yuav tuaj! Thov koj tuaj tsuag tsuag, Huab Tais Yes Xus!

    Nej chaws los ! Peb khoov cev pe hawm nws;
    peb txhos caug pe tus HUAB TAIS uas tsim peb los.
    Nws yog peb tus Tswv Ntuj. Peb yog nws haiv neeg,
    nws coj mus noj zaub, yog pab yaj uas nws tuav rawv.

    Txais:    Huab Tais yuav tuaj! Thov koj tuaj tsuag tsuag, Huab Tais Yes Xus!

    As Les Lus Yas:       LK  21:   36

    Txais:   As les lus yas, as les lus yas.

    Nej yuav ceev faj nraim thiab thov ntuj tsis tseg,
    nej thiaj yuav muaj zog sawv taus ntseg ntawm Neeg Leej Tub xub ntiag.

    Txais:   As les lus yas, as les lus yas.

    Ntawv Moo Zoo:      LK  21:   34-36

    Yes Xus hais rau nws cov thwj tim tias:
    34 “Nej ceev faj mog, kom nej lub siab txhob qaug rau txoj kev phem kev qias, rau kev luab cawv qaug cawv, thiab rau lub neej tej kev txob kev txhawj, kom xwv lub zim txwv ntawd tsis txhob poob nthav los rau saum nej  35 xws li ib lub vas los cuab nej. Vim tias lub zim txwv ntawd yuav los raug txhua leej txhua tus uas nyob saum ntiaj teb daim npoo av. 36 Nej yuav tsum ceev faj nraim tas mus li, nej thov Ntuj tsis tseg, kom nej thiaj muaj zog hla dhau ib puas tsav yam xwm txheej uas yuav tshwm sim tuaj, thiab nej thiaj yuav sawv taus ntsug nyob ntawm Neeg Leej Tub xub ntiag."


    Sponsored content

    Re: COV ZAJ NYEEM NRUAB LIS PIAM XYOO II, 2015-2016

    Post  Sponsored content Today at 3:13 pm


      Current date/time is 10th December 2016, 3:13 pm