Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» Thov Leej Ntshiab YOS XES
by Maiv Tooj Today at 10:36 am

» COV ZAJ NYEEM NRUAB LIS PIAM XYOO I 2016-2017
by Mim Yesterday at 2:09 pm

» COV ZAJ NYEEM NRUAB LIS PIAM XYOO II, 2015-2016
by Mim Yesterday at 1:29 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 1st December 2016, 12:54 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 1st December 2016, 12:35 pm

» XH. Yaj Zoov Ntxheb lub Tsev THOOB TSIB
by Maiv Tooj 1st December 2016, 12:33 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

» COV ZAJ NYEEM HNUB CHIV XYOO C 2015-2016
by NrhiavTswvNtuj 19th November 2016, 4:57 am

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO II, 2015-2016

    Share

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 2nd October 2016, 11:10 am

    TIM 3 LUB 10 HLI 2016

    Hnub Ob Lis Piam Nees Nkaum Xya Nruab Xyoo C Nruab Lis Piam Xyoo II

    Zaj Nyeem Ib: NKAS LAS TIAS 1: 6-12


    Paj Lug sau ntawv tias:
    6 Kuv poob siab tas tias cas nej tso tus uas tau hu nej vim Leej Pleev lub txiaj ntsim pov tseg sai tas npaud, nej cia li mus rau lwm yam moo zoo lawm, 7 txawm tias tsuas muaj ib lub moo zoo xwb; tiam sis yog muaj ib co neeg xav ua kom ntxhov quav niab nyob hauv nej : lawv xav muab Leej Pleev lub Moo Zoo ntxeev. 8 Nej yuav tsum paub tias, tab yog peb los yog Ntuj ib tug Tshiab nqes saum ntuj los qhia ib lub moo zoo txawv lub peb tau tshaj rau nej lawm, mas thov kom tus ntawd tau hmoov phem. 9 Peb twb tau hais rau nej lawm, hnub no, kuv rov hais dua tias : yog muaj neeg qhia ib lub moo zoo txawv lub nej tau txais lawm, mas thov kom tus ntawd raug txoj hmoov phem. 10 Nyem no, kuv puas nrhiav kom neeg nyiam kuv, los kom Tswv Ntuj nyiam kuv ? Kuv puas yog nrhiav kom ua xis neeg siab ? Yog kuv xav ua xis neeg siab xwb, mas kuv yuav tsis yog Leej Pleev ib tug tub qhe li. 11 Cov kwv tij, nej yuav tsum paub tias lub Moo Zoo uas kuv tuaj qhia rau nej, mas neeg lub tswv yim tsis duav li. 12 Kuv tsis tau txais thiab tsis tau kawm lub Moo Zoo ntawm ib tug neeg los : yog Yes Xus Pleev yees tawm tuaj qhia rau kuv paub.

    NPN 111: 1B-2, 7-8, 9 + 10C

    Txais: (5) Huab Tais yuav nco ntsoov nws cov lus nws tau cog tas mus li.

    Kuv yuav ua HUAB TAIS tsaug tas siab tas ntsws
    nyob hauv cov neeg ncaj lub rooj tuav xam thiab hauv lub txoos.
    HUAB TAIS cov hauj lwm loj tas nrho,
    Cov neeg nyiam HUAB TAIS cov hauj lwm, lawv kawm nws tej dej num.

    Txais: (5) Huab Tais yuav nco ntsoov nws cov lus nws tau cog tas mus li.

    Cov hauj lwm nws txhais tes ua yog hauj lwm tseeb thiab ncaj nces.
    Nws cov lus qhuab qhia yog cov lus tsim nyog tso siab rau,
    Yog cov lus yuav nyob ruaj mus li ib txhis,
    xab xeeb rau hauv kev tseeb thiab kev ncaj ncees.

    Txais: (5) Huab Tais yuav nco ntsoov nws cov lus nws tau cog tas mus li.

    Nws xa kev cawm dim tuaj rau nws haiv neeg,
    nws tau tshaj kom lo lus nws tau cog nyob mus li.
    Nws lub npe ntshiab muaj hwj xyeej tas nrho.
    Lo lus cav txog HUAB TAIS nyob mus txheej dhau txheej.

    Txais: (5) Huab Tais yuav nco ntsoov nws cov lus nws tau cog tas mus li.

    As Les Lus Yas: ZAM 13: 34

    Txais: As les lus yas, as les lus yas.

    Kuv muab ib lo lus qhia tshiab rau nej :
    nej yuav sib nyiam sib hlub ib yam li kuv tau nyiam tau hlub nej.

    Txais: As les lus yas, as les lus yas.

    Ntawv Moo Zoo: LK 10: 25-37

    25 Lub sij hawm ntawd, ib tug Kws Lij Choj sawv, nws xav sim Yes Xus ces nws nug tias : "Xib Hwb, kuv yuav ua dab tsi thiaj tau txais txoj sia nyob mus li los ua kuv lub cuab tam ?" 26 Yes Xus hais rau nws tias : "Nyob hauv Txoj Cai muaj dab tsi sau tseg ? Koj nyeem txog dab tsi ? 27 Tus Kws Lij Choj teb tias : "Koj yuav nyiam Huab Tais, koj tus Tswv Ntuj, tas koj siab ntsws, tas koj tus ntsuj plig, tas koj lub zog, tas koj lub tswv yim, thiab koj yuav nyiam tus nyob ze koj ib yam li koj nyiam koj.” 28 Yes Xus hais rau tus Kws Lij Choj tias : "Koj teb raug lawm. Koj ua li ntawd, koj yuav muaj txoj sia." 29 Tab sis tus Kws Lij Choj xav kom nws tau cai ces nws hais rau Yes Xus tias : "Leej twg yog tus nyob ze kuv ?” 30 Yes Xus thiaj hais ntxiv tias : "Muaj ib tug neeg nqes ntawm Yes Lus Xas Les mus rau nram Yes Lis Kos. Nws ntsib ib pab tub sab, lawv muab nws tej ris tsho hle, muab nws ntaus to tas, ces lawv mus lawv lawm, tso nws tseg, tshuav txoj sia xwb. 31 Muaj ib tug Leej Choj taug txoj kev ntawd nqes tuaj tom thawj, nws pom tus raug mob, nws lug kev hla mus. 32 Muaj ib tug Les Vis ho tuaj txog ntawd, nws pom tus raug mob, nws kuj lug kev hla mus. 33 Tab sis ib tug Xas Mas Lias mus tawm rooj tuaj txog ze tus raug mob, nws pom tus neeg raug mob, nws hlub. 34 Nws txav los Lus Kas, Zaj 10 630 ntawm tus raug mob, nws hliv roj thiab hliv cawv rau cov qhov txhab, nws muab qhwv. Nws tsaws tus raug mob caij nws tus luj, ces nws coj tus raug mob mus txog lub tsev txais qhua, nws tu tus raug mob ntawd. 35 Hnub tom qab, nws rho tau ob lub txiaj nyiag rau tus tswv tsev txais qhua, nws hais tias : ‘Koj tu tus neeg mob no, yog koj siv tshaj lawd, thaum kuv rov qab los, kuv yuav them rov rau koj.’ 36 Raws li koj xav, lawv peb leeg no, leej twg yog tus nyob ze tus neeg uas poob rau hauv tub sab txhais tes ?" 37 Tus Kws Lij Choj hais tias : "Yog tus uas tau khuv leej tus raug mob." Ces Yes Xus hais rau nws tias : "Koj mus, koj yuav ua ib yam li ntawd thiab."





    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 3rd October 2016, 3:12 pm

    TIM 4 LUB 10 HLI 2016

    Hnub Peb Lis Piam Nees Nkaum Xya Nruab Xyoo C Nruab Lis Piam Xyoo II

    Hwm LN Francis/François nyob Assisi

    Zaj Nyeem Ib: NKAS LAS TIAS 1: 13-24


    Cov kwv tij,
    13 nej yeej tau hnov lawm tias thaum kuv tseem coj Yus Das kev cai, kuv tau coj li cas. Nej yeej hnov tias kuv hiam Tswv Ntuj lub Koom Txoos tsis tseg, kuv tau ua xwv txheej loj kawg rau lawv. 14 Nyob hauv txoj kev cai Yus Das kuv coj mus tau deb tshaj coob leej hauv kuv phaum neeg hauv peb haiv neeg, vim kuv kub siab lug rau peb cov poj yawm txwv koob tej kab lis kev cai. 15 Tiam sis tus uas tau xaiv kuv txij thaum kuv tseem nyob hauv kuv niam plab los lawm, thiab tau hu kuv nyob hauv nws lub txiaj ntsim, 16 nws tau txaus siab cia nws Leej Tub tawm los rau kuv paub, kom kuv tshaj txog nws Leej Tub rau cov neeg teev pej kum dab. Tam sim ntawd, kuv tsis mloog kuv lub cev thiab kuv tej roj ntsha, 17 kuv tsis mus cuag cov xub ua Hauv Paus Xa Lus nyob Yes Lus Xas Les, kuv ncaj qha mus rau As Las Npias teb, ces kuv mam rov los rau Das Mas dua. 18 Peb xyoos tom qab, kuv thiaj mus pem Yes Lus Xas Les, mus cuag Pob Zeb. Kuv nrog nws nyob kaum tsib hnub. 19 Kuv tsis tau ntsib lwm tus Hauv Paus Xa Lus li, tsuas tau ntsib Yas Kos, uas yog Huab Tais tus kwv tij xwb. 20 Kuv sau cov lus no tuaj rau nej, mas kuv ua taus tim khawv rau ntawm Tswv Ntuj xub ntiag tias kuv tsis dag. 21 Tom qab ntawd kuv mus rau Xis Lias teb, thiab Xis Lis Xias teb. 22 Cov Koom Txoos hauv Yus Das teb, uas nyob hauv Leej PLeev, mas lawv tsis paub kuv li, 23 lawv tsuas hnov tias, “tus uas yav thaud hiam peb mas nyem no nws tshaj txoj kev ntseeg uas yav nram ntej nws xav muab rhuav pov tseg.” 24 Ces lawv cav txog Tswv Ntuj vim kuv.

    NPN 139: 1B-3, 13-14AB, 14C-15

    Txais: (24b) Huab Tais, thov koj coj kuv mus taug txoj kev muaj sia nyob mus li.

    HUAB TAIS, koj ntsia pom tshab hauv kuv, koj paub kuv :
    koj paub thaum kuv sawv thiab thaum kuv zaum ;
    koj nyob deb tsom pom tas tej kuv xav.
    kuv mus kev los kuv pw, koj saib ntsoov,
    koj paub txhua txoj kev kuv taug.

    Txais: (24b) Huab Tais, thov koj coj kuv mus taug txoj kev muaj sia nyob mus li.

    Koj yeej yog tus tsim kuv tej plab plaw tiag ;
    koj xaws koj ntxiv kuv hauv kuv niam plab.
    Kuv cav lus zoo ua koj tsaug, vim koj lub hwj huam loj tas nrho :
    koj tsim kuv zoo ua luaj, koj tej dej num zoo nkauj kawg nkaus.

    Txais: (24b) Huab Tais, thov koj coj kuv mus taug txoj kev muaj sia nyob mus li.

    Koj paub kuv tus ntsuj plig zoo;
    koj pom kuv cov pob txha tas huv tib si
    thaum uas kuv xeeb los nyob hauv qhov chaw nraim,
    thaum luag xaws kuv nyob puag hauv nruab a.

    Txais: (24b) Huab Tais, thov koj coj kuv mus taug txoj kev muaj sia nyob mus li.

    As Les Lus Yas: LK 11: 28

    Txais: As les lus yas, as les lus yas.

    Cov uas mloog Tswv Ntuj Lo Lus thiab ua raws li
    Tswv Ntuj Lo Lus, mas lawv txoj hmoov zoo."

    Txais: As les lus yas, as les lus yas.

    Ntawv Moo Zoo: LK 10: 38-42

    38 Thaum Yes Xus lawv taug kev, lawv mus txog hauv ib lub zos; ib tug poj niam hu ua Mas Tas txais Yes Xus los hauv nws tsev. 39 Nws muaj ib tug niam hluas hu ua Mab Liab; Mab Liab zaum ntawm Huab Tais ko taw, nws mloog Huab Tais hais lus. 40 Hos Mas Tas rau siab ntso lis ntau yam qav num. Ces Mas Tas los hais rau Yes Xus tias : "Huab Tais, koj tsis quav ntsej tias kuv tus niam hluas cia kuv tib leeg lis qav lis num xwb lod ? Koj hais kom nws pab kuv thiab mas !" 41 Tab sis Huab Tais teb rau Mas Tas tias : "Mas Tas, Mas Tas, koj ua siab fab thiab txhawj txog ntau yam, 42 tab sis tsuas yuav ib yam xwb. Mab Liab xaiv tau yam zoo tshaj lawm, yuav tsis txhob muab tshem ntawm nws mus."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 4th October 2016, 9:20 am

    TIM      5     LUB     10     HLI      2016

    Hnub Plaub Lis Piam Nees Nkaum Xya Nruab Xyoo C Nruab Lis Piam Xyoo II

    Zaj Nyeem Ib:      NKAS LAS TIAS  2:   1-2, 7-14


    1 Kaum plaub xyoos tom qab, kuv tau rov mus pem Yes Lus Xas Les dua. Npas Nas Npes nrog kuv mus thiab Tis Tos kuj mus thiab. 2 Tos kuv mus ped, yog vim kuv tau muaj ib qho kev yees pom qhia kom kuv mus, ces Kuv thiaj mus piav txog lub Moo Zoo uas kuv qhia rau cov pej kum neeg rau lawv paub; kuv tseem coj cov neeg tseem ceeb mus nyob rau ib qho kuv piav tshwj xeeb rau lawv nkaus xwb, vim kuv ntshai tsam kuv lam khiav kev los puas tau khiav kev dag xwb.
    7 Cov Txwj Laus kuj pom tias yog Tswv Ntuj tsa kuv tshaj Ntuj lus rau cov pej kum neeg, ib yam li Ntuj tsa Pob Zeb ua tus tshaj Ntuj lus rau cov txais lub cim txiav. 8 Vim tus ua hauj lwm hauv Pob Zeb, nws tsa Pob Zeb ua Hauv Paus Xa Lus rau cov txais lub cim txiav ; nws kuj ua hauj lwm ib yam li ntawd rau kuv, thiab tsa kuv ua Hauv Paus Xa Lus rau cov pej kum neeg. 9 Thaum lawv zeem tseeb tias kuv tau txais lub txiaj ntsim ntawd lawm, Yas Kos thiab Pob Zeb thiab Zam, uas lawv yog cov tseem ceeb thiab cov ncej, lawv kuj tuav Npas Nas Npes wb tes, ua lub cim tias peb koom siab koom ntsws koom ib txog dej num : wb yuav mus cuag cov pej kum neeg ; lawv yuav mus cuag cov txais lub cim txiav. 10 Tsuav yog wb nco ntsoov txog cov pluag xwb: qhov no yog qhov kuv muab siab rau saib kawg lawm.
    11 Thaum Pob Zeb tuaj nram As Nthias Kias, kuv tau tab meeg tib nws, vim kuv pom tseeb tias nws yuam kev. 12 Thaum cov neeg uas nrog Yas Kos nyob tseem tuaj tsis tau txog, mas Pob Zeb nrog cov pej kum neeg noj mov. Tab sis thaum Yas Kos cov neeg tuaj txog lawm, mas Pob Zeb cia li tseg tsis nrog lawv noj mov ntxiv, nws txav deb ntawm cov pej kum neeg, vim nws ntshai cov txais lub cim txiav. 13 Ces cov Yus Das sawv daws yoog li Pob Zeb, lawv ua txoj tsis kam nrog cov pej kum neeg lawm thiab. Ces Npas Nas Npes los kuj cia li ua txoj coj li lawv lawm thiab. 14 Thaum kuv pom lawv ua tsis yog li ntawd, tsis raws li qhov tseeb hauv lub Moo Zoo lawm, mas kuv hais rau Pob Zeb nyob ntawm sawv daws xub ntiag, tias : “Koj twb yog ib tug Yus Das, ua cas koj ua xws li cov pej kum neeg,  koj tsis ua xws li ib tug Yus Das, koj yuav ua cas muaj peev xwm yuam tau cov pej kum neeg kom lawv coj raws li cov Yus Das ?”

    NPN      117:   1BC, 2

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.

    Tas ib tsoom kuj cuab, nej cav lus zoo txog HUAB TAIS.
    Tas ib tsoom haiv neeg, nej cav txog nws lub hwj chim.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.


    Vim nws lub siab hlub peb nyob ruaj nreb,
    HUAB TAIS lub siab pheej xeeb mus ib txhiab ib txhis.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.

    As Les Lus Yas:       LOS MAS  8:   15BC

    Txais:     As les lus yas, as les lus yas.

    Nej tau txais ib lub tswv yim ua tub ki tshiab,
    thiaj ua kom peb hu Tswv Ntuj tias : ‘As Npas ! Txiv !

    Txais:     As les lus yas, as les lus yas.

    Ntawv Moo Zoo:      LK  11:   1-4

    1 Muaj ib zaug, Yes Xus teev Ntuj nyob ib qho chaw. Thaum nws teev Ntuj tas lawd, nws ib tug thwj tim hais rau nws tias : "Huab Tais, koj qhia peb teev Ntuj xws li Zam qhia nws cov thwj tim saib." 2 Yes Xus hais rau lawv tias : "Thaum nej teev Ntuj, nej hais li no : Txiv, ua kom koj lub Npe ntshiab, 3 kom koj lub Ceeb Tsheej los txog, thov koj niaj hnub pub mov rau peb noj txwm hnub. 4 Thov koj zam txhaum rau peb vim peb zam rau cov tshuav nuj nqes ntawm peb i. Koj txhob cia peb poob rau hauv txoj kev ntxias.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 5th October 2016, 4:47 am

    TIM 6 LUB 10 HLI 2016

    Hnub Tsib Lis Piam Nees Nkaum Xya Nruab Xyoo C Nruab Lis Piam Xyoo II

    Hwm LN Bruno, thiab tus tau koob hmoov (blessed) Marie Rose Durocher

    Zaj Nyeem Ib: NKAS LAS TIAS 3: 1-5


    1 Aub ! Cov Nkas Las Tias, neeg tsis muaj tswv yim aw! Leej twg tso dab tuaj mooj tau nej li ntawd lawd? Nej twb hnov qhia meej txog Yes Xus Pleev nyob saum ntoo cuam lawm sad! 2 Kuv tsuas xav paub ib yam ntawm nej xwb : puas yog vim nej coj Txoj Cai, nej thiaj txais Leej Ntuj Plig, los yog vim nej ntseeg txog Ntuj lo lus uas peb tau tshaj ? 3 Nej puas ruam npaum li ntawd? Ua cas chiv thawj, nej twb pib ua raws leej Tswv Yim, tab sis thaum kawg, nej coj raws lub cev nqaij ? 4 Nej puas lam txais ntau yam txiaj ntsim los cia nyob dag xwb? Ntshai nej lam txais dag xwb tiag lau! 5 Tus pub Leej Tswv Yim rau nej thiab ua hwj huam yees ntxwv hauv nruab nrab nej, nws puas ua tej ntawd vim nej coj Txoj Cai los vim nej ntseeg Ntuj lo lus uas peb tau tshaj ?

    NPN LK 1: 69-70, 71-72, 73-75

    Txais: (68) Kom Huab Tais His Xas Lais tus Tswv Ntuj nto koob meej,
    nws tuaj xyuas nws haiv neeg lawm.

    Nws tsa tau ib tug cawm seej muaj zog rau peb
    Tawm ntawm nws tus tub txib Das Vis tsev neeg los.

    Txais: (68) Kom Huab Tais His Xas Lais tus Tswv Ntuj nto koob meej,
    nws tuaj xyuas nws haiv neeg lawm.

    Nws ua raws li nws cog lus rau cov yaj saub ntshiab txheej thaud tias
    nws yuav cawm peb ntawm peb cov yeeb ncuab,
    thiab ntawm cov neeg ntxub peb txhais tes.

    Txais: (68) Kom Huab Tais His Xas Lais tus Tswv Ntuj nto koob meej,
    nws tuaj xyuas nws haiv neeg lawm.

    Nws tau cog lus tias yuav hlub peb cov yawg koob
    Thiab yuav nco ntsoov txog cov lus ntshiab nws nrog lawv cog,

    Txais: (68) Kom Huab Tais His Xas Lais tus Tswv Ntuj nto koob meej,
    nws tuaj xyuas nws haiv neeg lawm.

    Nws tau cog lus rau peb txiv Has Nplas Has tias :
    nws yuav npo peb dim ntawm peb cov yeeb ncuab txhais tes,
    peb thiaj tau kev tsob hwb nws tsis muaj kev nthsai,
    hauv txoj kev ntshiab thiab txoj kev ncaj
    nyob ntawm nws xub ntiag tas peb sid.

    Txais: (68) Kom Huab Tais His Xas Lais tus Tswv Ntuj nto koob meej,
    nws tuaj xyuas nws haiv neeg lawm.

    As Les Lus Yas: HAUJ LWM 16: 14B

    Txais: As les lus yas, as les lus yas.

    Huab Tais, thov koj qhib peb lub siab
    kom peb mloog koj Leej Tub cov lus.

    Txais: As les lus yas, as les lus yas.

    Ntawv Moo Zoo: LK 11: 5-13

    5 Yes Xus hais rau nws cov thwj tim tias : "Yog nej muaj ib tug phooj ywg tuaj cuag nej thaum ib tag hmo, thiab nws hais rau nej tias : 'Phooj ywg, koj txais peb lub ncuav mov rau kuv, 6 vim kuv ib tug npawg mus tawm rooj los so hauv kuv tsev, kuv tsis muaj dab tsi rau nws noj.' 7 Hos tus nyob hauv tsev teb tias : 'Txhob txob kuv, lub qhov rooj twb xauv lawm, kuv cov me nyuam peb pw tas lawm, kuv sawv tsis tau los muab dab tsi rau koj li.' 8 Kuv hais rau nej tias, tab yog nws tsis sawv los muab vim tus ntawd yog nws phooj ywg, los nws yeej yuav tsum sawv los muab rau tus ntawd raws li nws thov, vim nws pheej taij tsis tseg.
    9 Li ntawd, kuv hais rau nej : Nej thov, ces Ntuj yuav pub rau nej. Nej nrhiav, ces nej yuav ntsib, nej khob qhov rooj, ces Ntuj yuav qhib rau nej. 10 Vim tias leej twg thov, nws yuav tau txais, leej twg nrhiav, nws yuav ntsib, hos leej twg khob qhov rooj, luag yuav qhib rau nws. 11 Nyob hauv nej, leej txiv twg, yog nws tus tub taij ib tug ntses, nws tsis muab ntses rau hos muab ib tug nab rau ? 12 Los yog nws tus tub taij ib lub qe, nws yuav muab ib tug kab lij tshooj rau ? 13 Txawm tias nej yog neeg phem, tsis kav, nej twb txawj pub tej yam zoo rau nej cov me nyuam, ua li mas Leej Txiv nyob saum ntuj haj yam yuav txawj pub Leej Ntuj Plig Ntshiab rau cov uas thov nws!"



    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 7th October 2016, 12:51 pm

    TIM      7     LUB     10      HLI        2016

    Thawj Hnub Rau Lis Piam Nees Nkaum Xya Nruab Xyoo C Nruab Lis Piam Xyoo III

    Hwm Niam Mab Liab Coj Txoj Saw (Our Lady of the Rosary/Notre Dame du Rosaire)

    Zaj Nyeem Ib:      NKAS LAS TIAS  3:   7-14


    Cov kwv tij,
    7 Nej yuav to taub zoo mog : cov neeg ua Has Nplas Has cov tub, yog cov muaj kev ntseeg. 8 Ntawv Ntshiab xub pom ua ntej tias Tswv Ntuj yuav ua kom cov pej kum neeg txais kev ntshiab nyob hauv txoj kev ntseeg, ces Ntawv thiaj xub xa ib lub Moo Zoo rau Has Nplas Has hais tias : ‘Txhua haiv neeg yuav tau txoj hmoov zoo nyob hauv koj.’ 9 Li ntawd, txhua leej txhua tus uas muaj kev ntseeg, yuav nrog Has Nplas Has txais txoj hmoov zoo, vim Has Nplas Has yog tus muaj kev ntseeg.
    10 Txhua tus neeg uas saib txoj kev coj raws ntaim Txoj Cai yog qhov loj, mas lawv yuav tau hmoov phem; vim muaj Ntawv sau cia tias : ‘Tus tsis mob siab niaj hnub ua raws txhua lo lus sau tseg nyob hauv phau Ntawv Txoj Cai, mas nws yuav raug hmoov phem.’ 11 Yeej tseeb tias, Txoj Cai ua tsis tau kom ib tug neeg ntshiab tuaj nyob ntawm Tswv Ntuj xub ntiag, tiam sis ‘tus uas txoj kev ntseeg ua kom nws ncaj ncees tus ntawd yuav muaj txoj sia.’ 12 Ua li mas Txoj Cai tsis tas yuav tsum muaj kev ntseeg, tiam sis ‘Tus twg ua raws li txhua lo lus qhia mas nws thiaj yuav muaj txoj sia nyob hauv cov lus qhia ntawd.’ 13 Leej Pleev tau txhiv peb ntawm Txoj Cai cov lus foom phem, nws txia ua qhov kev foom phem ntawd vim peb, raws li cov lus sau tseg tias : ‘Tus uas luag muab dai rau saum tus ncej tua neeg, mas nws raug lus foom phem.’ 14 Yes Xus ua li ntawd, kom lo lus foom hmoov zoo rau Has Nplas Has ri mus txog cov pej kum haiv neeg nyob hauv Yes Xus Pleev, kom peb tau txais Leej Ntuj Plig uas Ntuj cog lus pub rau peb nyob hauv kev ntseeg.

    NPN     111:   1B-2, 3-4, 5-6

    Txais: (5) Huab Tais yuav nco ntsoov mus tas ib txhis tias nws tau cog lus.

    Kuv yuav ua HUAB TAIS tsaug tas kuv lub siab lub ntsws
    thaum kuv nrog tsoom neeg siab ncaj koom ua ib pab sau ua ib oawg.
    HUAB TAIS cov hauj lwm loj tas nrho,
    zoo ntxim siab kawg nkaus.

    Txais: (5) Huab Tais yuav nco ntsoov mus tas ib txhis tias nws tau cog lus.

    HUAB TAIS cov hauj lwm muaj hwj xyeej thiab muaj hwj chim,
    nws txoj kev ncaj yuav nyob ib txhiab ib txhis.
    Nws nto koov meej lug vim nws cov hwj huam yees ntxwv ;
    HUAB TAIS lub siab hlub neeg, nws nyiam zam txhaum.

    Txais: (5) Huab Tais yuav nco ntsoov mus tas ib txhis tias nws tau cog lus.

    Nws muab txhiam xws rau cov hwm nws tau noj,
    nws yuav nco ntsoov mus li txog tias nws tau cog lus.
    Nws ua kom nws haiv neeg paub txog nws tej hauj lwm muaj hwj huam,
    Nws muab cov haiv neeg lub cuab tam pub rau lawv.

    Txais: (5) Huab Tais yuav nco ntsoov mus tas ib txhis tias nws tau cog lus.

    As Les Lus yas:      Zam  12:   31b-32

    Txais:   As les lus yas, as les lus yas.    

    Huab Tais hais tias:  zaum no, tus Tswj lub qab ntuj neeg
    yuav raug ncaws tawm, hos thaum luag tsa kuv siab rau
    saum ntiaj teb, mas kuv yuav rub tas ib tsoom neeg los cuag kuv.

    Txais:   As les lus yas, as les lus yas.

    Ntawv Moo Zoo:       LK  11:   15-26

    Yes Xus ntiab ib tug dab phem tawm,
    15 tab sis, muaj ib txhia nyob hauv cov neeg hais tias : "Nws hu txog tus vaj dab phem Npes Ntxes Npus los ntiab dab." 16 Tseem muaj ib txhia xav sim Yes Xus, ces lawv thov kom Yes Xus ua ib lub cim tawm saum ntuj tuaj. 17 Tab sis Yes Xus paub qhov lawv xav, nws hais rau lawv tias : "Lub teb chaws twg muaj sib tawm tsam, mas nws kawg raug kev puas tsuaj; tej vaj tse, ib lub yuav vau tsuam ib lub. 18 Yog tias Xas Tas rov tawm tsam Xas Tas, mas nws lub teb chaws yuav ua cas nyob tau ruaj ? Vim nej hais tias kuv hu txog Npes Ntxes Npus los ntiab dab no,  19 yog tias kuv vam txog Npes Ntxes Npus los ntiab dab no, nej cov tub ho vam txog leej twg los ntiab dab ? Ua li mas, nej cov tub yuav txiav txim rau nej. 20 Hos yog tias kuv tuav txog Tswv Ntuj tus ntiv tes los ntiab dab, mas  yog Tswv Ntuj lub Ceeb Tsheej los txog nej lawm.
    21 Thaum ib tug neeg muaj zog tuav ntaj tuav hmuv zov nws lub tsev vaj loog, mas nws lub cuab tam nyob nyab xeeb. 22 Tab sis, thaum twg lwm tus muaj zog dua nws tuaj ntaus yeej nws, mas tus ntawd yuav txeeb nws cev ris tsho hlau uas yog nws lub chaw tso siab mus, thiab yuav muab nws tej cuab yeej cuab tam los sib faib. 23 Leej twg tsis nrog kuv, mas yog nws tiv kuv. Leej twg tsis nrog kuv sau cia, mas yog nws ua kom ploj.”
    24 "Thaum dab tsis huv tawm hauv ib tug neeg mus, nws mus ua loj leeb rau hauv tej teb chaws quav poj, nrhiav ib lub chaw so, tab sis nrhiav tsis tau, ces nws hais tias : 'Kuv yuav rov mus nyob hauv lub tsev uas kuv tawm los.' 25 Thaum dab tsis huv rov qab los txog, nws pom lub tsev cheb huv si thiab tu du lug cia. 26 Ces tus dab ntawd mus coj xya tus dab tseem tsiv tsaim dua nws nkag los nyob hauv lub tsev ntawd. Thaum kawg, tus neeg ntawd lub neej tseem phem tshaj qhov qub tuaj."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 7th October 2016, 2:02 pm

    TIM 8 LUB 10 HLI 2016

    Hnub Xya Lis Piam Nees Nkaum Xya Nruab Xyoo C Nruab Lis Piam Xyoo II

    Hwm Niam Mab Liab

    Zaj Nyeem Ib: NKAS LAS TIAS 3: 22-29


    22 Ntawv Ntshiab muab tas puas tsav yam kaw rau hauv kev txhaum, kom xwv cov uas ntseeg txog Yes Xus Pleev tau txais raws lis Ntuj tau cog lus yuav pub rau cov uas ntseeg.
    23 Thaum txoj kev ntseeg tuaj tsis tau txog, mas Txoj Cai muab peb kaw, thiab zov rawv peb mus txog hnub uas txoj kev ntseeg tawm tuaj. 24 Li ntawd, Txoj Cai yog ib tug xib hwb qhia peb mus txog hnub Leej Pleev tuaj, kom peb ntshiab tuaj vim txoj kev ntseeg. 25 Tab sis nyem no, txoj kev ntseeg tuaj txog, mas peb tsis zwm rau tus xib hwb lawm. 26 Vim nej sawv daws puav leej yog Tswv Ntuj cov tub huv tib si nyob hauv txoj kev ntseeg txog Yes Xus Pleev. 27 Nej sawv daws tau txais lub cim ntxuav nyob hauv Leej Pleev, mas nej hnav Leej Pleev lawm. 28 Tsis muaj Yus Das los Hes Las, tsis muaj tus qhev los tus twj lij, tsis muaj txiv neej los poj niam lawm; vim nej sawv daws koom ua ib leeg xwb nyob hauv Yes Xus Pleev. 29 Yog tias nej yog Leej Pleev tug, mas nej kuj yog Has Nplas Has cov xeeb ntxwv thiab, ces nej yog cov txais cuab tam raws li Ntuj cog lus yuav pub.

    NPN 105: 2-3, 4-5, 6-7

    Txais: (8a) Huab Tais nco ntsoov tas mus li tias nws tau cog lus.

    Nej hu nkauj rau nws, nej ntaus suab paj nruag cav txog nws,
    nej tshaj tawm txog tej yam loj nws tau ua.
    Nej txais koob meej nyob hauv nws lub npe,
    nej cia li zoo siab, nej cov uas muaj lub siab nrhiav HUAB TAIS!

    Txais: (8a) Huab Tais nco ntsoov tas mus li tias nws tau cog lus.

    Nej nrhiav Huab Tais thiab nws lub zog,
    nej nrhiav nws lub ntsej muag mus li.
    Nej nco ntsoov txog cov hwj huam txaus qhuas nws tau ua,
    nws cov hauj lwm loj, thiab cov lus txiav txim nws lub ncauj tau hais.

    Txais: (8a) Huab Tais nco ntsoov tas mus li tias nws tau cog lus.

    Nej yog Has Nplas Has tsoom xeeb ntxwv, nws cov tub txib,
    yog Yas Kos cov tub, nws pab neeg nws tau xaiv!
    Huab Tais nws yog peb tus Tswv Ntuj,
    tas ntiaj teb yuav raws nws txiav.

    Txais: (8a) Huab Tais nco ntsoov tas mus li tias nws tau cog lus.

    As Les Lus yas: LK 11: 28

    Txais: As les lus yas, as les lus yas.

    Cov tau hmoov zoo yog cov mloog Tswv Ntuj lo lus
    thiab coj raws nraim li ntawd.

    Txais: As les lus yas, as les lus yas.

    Ntawv Moo Zoo: LK 11: 27-28

    27 Thaum Yes Xus tseem hais tej lus ntawd, muaj ib tug poj niam nyob hauv nruab nrab tsoom sid tsa suab hais nrov nrov rau Yes Xus tias : "Lub plab uas tau nqa koj thiab lub xub ntiag uas pub mis rau koj tau txoj hmoov zoo !" 28 Tab sis Yes Xus hais tias : "Cov uas mloog Tswv Ntuj Lo Lus thiab ua raws li Tswv Ntuj Lo Lus, mas lawv thiaj yog cov tau txoj hmoov zoo."





    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 10th October 2016, 5:15 am

    TIM 10 LUB 10 HLI 2016

    Hnub Ob Lis Piam Nees Nkaum Yim Nruab Xyoo C Nruab Lis Piam Xyoo II

    Zaj Nyeem Ib: NKAS LAS TIAS 4: 22-24, 26-27, 31–5:1


    22 Ntawv sau tias, Has Nplas Has muaj ob tug tub, ib tug yug ntawm tus ntxhais qhev los, ib tug yug ntawm tus niam tsev twj lij los. 23 Tus ntxhais qhev tus tub yug ntawm nqaij los raws li kev cai. Hos tus niam tsev twj lij tus tub yug los vim muaj kev cog lus. 24 Zaj ntawd yog ib zag paj lug. Ob tug poj niam yog ob txog kev cog lus : Thawj tug poj niam yog txoj kev cog lus nyob saum lub roob Xis Nais, tus poj niam ntawd yug ib co me nyuam ua qhev : Yog As Nkas.
    26 Tab sis lub tsheej Yes Lus Xas Les saum txheej siab, yog ib lub tsheej twj lij ; nws yog peb niam. 27 Muaj ntawv sau txog hais li no tias : “Koj kav tsij zoo siab, pog khab seeb uas yug tsis tau me nyuam; koj kav tsij luag ua suab ntas ntua, koj tus tsis tau paub dua kev mob dua plab; vim tus poj niam uas luag muab tso pov tseg cov me nyuam coob dua tus poj niam muaj txiv pab tub.”
    31 Cov kwv tij, peb tsis yog tus ntxhais qhev cov me nyuam. Peb yog tus niam tsev twj lij cov me nyuam.
    5 1 Leej Pleev tau cawm peb dim kom peb tau kev twj lij. Li ntawd, mas nej yuav tsum nyob ruaj nreb (hauv kev twj lij) tsis txhob rov mus zwm rau rab quab ua qhev.

    NPN 113: 1B-2, 3-4, 5A + 6-7

    R. (see 2) Blessed be the name of the Lord forever.

    HUAB TAIS cov tub txib, nej cav txog nws,
    nej cav txog HUAB TAIS lub npe.
    Kom HUAB TAIS lub npe nto moo lug,
    txij no mus txheej dhau txheej !

    R. Blessed be the name of the Lord forever.

    Txij thaum hnub tawm txog hnub poob qho,
    kom HUAB TAIS lub npe nto koob meej.
    HUAB TAIS nyob siab tshaj ib tsoom kuj cuab,
    nws lub koob meej nyob siab dua txheej ntuj saud.

    R. Blessed be the name of the Lord forever.

    Leej twg thiaj zoo li HUAB TAIS, peb tus Tswv Ntuj?
    Nws dauv muag los ntsia lub ntuj thiab lub ntiaj teb.
    Nws tsa tus pluag hauv plua tshauv los,
    nws rub tus txom nyem hauv qhov qias los.

    R. Blessed be the name of the Lord forever.

    As Les Lus Yas: NPN 95: 8

    Txais: As les lus yas, as les lus yas.

    Yog hnub no ne hnov nws lub suab,
    nej tsis txhob ua nej lub siab tawv ncauj.

    Txais: As les lus yas, as les lus yas.

    Ntawv Moo Zoo: LK 11: 29-32

    29 Thaum neeg tseem tuaj ntxiv tas zog rau tej pab neeg coob coob sib txiv nyob ua ke, Yes Xus hais cov lus li no : "Tiam neeg no yog ib tiam neeg phem. Lawv taij ib lub cim, tab sis yuav tsis muaj ib lub cim rau lawv, lawv tsuas kawg yuav pom Yos Nas lub cim xwb. 30 Vim tias xws li Yos Nas yog ib lub cim rau cov neeg nyob Nis Nis Vas, Neeg Leej Tub kuj yuav yog ib lub cim rau tiam neeg no. 31 Hnub txiav txim, tus poj vaj nyob Naj Fab yuav nrog tiam neeg no sawv los, nws yuav muab txim rau lawv, vim nws tuaj puag tim npoo ntiaj teb tuaj mloog Xas Los Moos cov lus thoob tsib, hos nyob ntawm no, twb muaj tus loj dua Xas Los Moos ! 32 Hnub txiav txim, cov neeg nyob Nis Nis Vas yuav nrog tiam neeg no sawv los, lawv yuav muab txim rau tiam neeg no, vim tias thaum Yos Nas tuaj qhia lawv, mas lawv thov txhaum, hos nyob ntawm no twb muaj tus loj dua Yos Nas! “





    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 10th October 2016, 8:13 am

    TIM 11 LUB 10 HLI 2016

    Hnub Peb Lis Piam Nees Nkaum Yim Nruab Xyoo C Nruab Lis Piam Xyoo II

    Hwm LN Vaj Qhia Zam XXIII

    Zaj Nyeem Ib: GAL 5: 1-6


    1 Leej Pleev tau cawm peb dim, kom peb tau kev twj lij twj lij. Li ntawd, mas nej yuav tsum nyob ruaj nreb (hauv kev twj lij) tsis txhob rov mus zwm rau rab quab ua qhev. 2 Tus hais rau nej yog kuv, Paj Lug : yog nej cia lawv ua lub cim txiav rau nej, mas Leej Pleev tsis muaj qab hau dab tsi rau nej. 3 Kuv rov hais dua tias, tus twg cia luag ua lub cim txiav rau nws, mas nws yuav tsum coj Txoj Cai kom txhij txhua. 4 Nej cov uas nrhiav kev ncaj nyob hauv Txoj Cai, mas nej ncaim ntawm Leej Pleev, nej poob tsis tau lub txiaj ntsim lawm. 5 Ntawm peb, mas yog Leej Tswv Yim ua kom peb tso siab tias, peb yuav txais kev ncaj ntawm txoj kev ntseeg los. 6 Vim nyob hauv Yes Xus Pleev, txawm ua lub cim txiav thiab tsis ua lub cim txiav los tsis muaj nqes dab tsi, qhov muaj nqes tsuas txoj kev ntseeg ua hauj lwm nyob hauv txoj kev nyiam xwb.

    NPN 119: 41, 43, 44, 45, 47, 48

    Txais: (41a) Huab Tais, thov tso koj txoj kev khuv leej tuaj rau kuv.

    Huab Tais, thov muab koj txoj kev khuv leej rau kuv,
    Muab koj txoj kev cawm rau kuv raws li koj tau cog lus.

    Txais: (41a) Huab Tais, thov tso koj txoj kev khuv leej tuaj rau kuv.

    Koj txhob rho lo lus tseeb ntawm kuv lub ncauj mus,
    vim kuv tso siab rau koj cov cai tswj siab.

    Txais: (41a) Huab Tais, thov tso koj txoj kev khuv leej tuaj rau kuv.

    Kuv yuav khaws koj Txoj Cai mus li
    tsis muaj caij tag tsis muaj caij kawg.

    Txais: (41a) Huab Tais, thov tso koj txoj kev khuv leej tuaj rau kuv.

    Kuv yuav taug kev hauv qhov chaw twj lij,
    vim kuv nrhiav koj cov cai lij choj.

    Txais: (41a) Huab Tais, thov tso koj txoj kev khuv leej tuaj rau kuv.

    Kuv zoo siab tas nrho nyob hauv koj cov lus qhia,
    uas kuv nyiam tas siab tas ntsws.

    Txais: (41a) Huab Tais, thov tso koj txoj kev khuv leej tuaj rau kuv.

    Kuv tsa tes rau koj cov lus qhia uas kuv nyiam,
    thiab kuv ua tib zoo xav txog koj cov cai lij choj.

    Txais: (41a) Huab Tais, thov tso koj txoj kev khuv leej tuaj rau kuv.

    As Les Lus Yas: HES NPLAWS 4: 12

    Txais: As les lus yas, as les lus yas.

    Tswv Ntuj lo lus muaj txoj sia thiab ua tau hauj lwm,
    Nws mem tau neeg lub tswv yim thiab tej zaj xav hauv nruab siab.

    Txais: As les lus yas, as les lus yas.

    Ntawv Moo Zoo: LK 11: 37-41

    37 Thaum Yes Xus tseem tab tom hais lus, muaj ib tug Fas Lis Xais caw Yes Xus mus noj mov tim nws tsev. Yes Xus chaws mus hauv tsev, nws mus xyab ntawm rooj mov. 38 Tus Fas Lis Xas pom li ntawd, ces nws poob siab rau qhov Yes Xus tsis xub ntxuav tes tso mam noj mov. 39 Ces Huab Tais hais rau tus Fas Lis Xais ntawd tias : "Nej cov Fas Lis Xais ntawm ko, , nej ntxuav khob ntxuav phaj sab nraud kom huv, tab sis muaj kev tub sab thiab kev phem nyob puv nkaus nej sab hauv. 40 Neeg ruam ! Tus tsim sab nraud, nws tsis tau tsim sab hauv thiab lod ? 41 Vim nej sab hauv, phim nej yuav muab yam nej muaj pub rau luag, ces txhua yam yuav huv tuaj rau nej.”



    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 11th October 2016, 4:46 am

    TIM 12 LUB 10 HLI 2016

    Hnub Plaub Lis Piam Nees Nkaum Yim Nruab Xyoo C Nruab Lis Piam Xyoo II

    Zaj Nyeem Ib: NKAS LAS TIAS 5: 18-25


    18 Yog nej cia Leej Ntuj Plig coj nej, mas nws tsis zwm rau Txoj Cai. 19 Cov hauj lwm los ntawm lub cev mas yeej pom tseeb kawg: kev ua phem, ua tsis huv ua qias, kev ua plees ua yi, 20 kev teev dab teev mlom, kev siv khawv koob, kev sib ntxub, kev sib twv, 21 sib khib, kev npau lwj npau liam, kev qia dub, kev sib ciav sib cais, sib tawg nyias mus nyias,kev khib luag, kev noj haus liam sim, noj haus hu dab, thiab lwm yam phem zoo li no ntxiv. Kuv thiaj li ceeb toom rau nej, ib yam li kuv twb tau ceeb toom rau nej dua los lawm tias: cov neeg uas ua tej yam zoo li ntawd yuav tsis tau txais Tswv Ntuj lub Ceeb Tsheej los ua lawv tug. 22 Tiam sis, cov txiv uas txi ntawm Leej Tswv Yim los mas txawv tej ntawd kawg nkaus: yog kev nyiam , kev zoo siab, kev kaj lug, kev ua siab ntev, kev ua zoo rau luag, kev ua siab dav pab luag, kev ua siab ncaj, kev ntseeg siab, 23 kev ua siab tus tus rau luag, thiab kev txawj tswj yus lub cev zoo. Tsis muaj ib txog cai yuav txwv tej yam kev ua zoo zoo li no. 24 Nej yuav ua Yes Xus Pleev neeg tsis tau, yog tias nej tsis muab nej lub cev thiab lub siab ntshaw ua phemua qias ntsia rau saum ntoo cuam.
    25 Vim peb muaj sia nyob hauv Leej Tswv Yim, mas peb yuav tsum cia Leej Tswv Yim coj peb lub neej.

    NPN 1: 1-2, 3, 4 + 6

    Txais: (Zam 8:12) Huab Tais, cov raws koj qab yuav muaj kev pom kev kaj lub neej.

    Muaj hmoov zoo yog tus uas tsis coj raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS txoj cai nruab hnub hmo ntuj.

    Txais: (Zam 8:12) Huab Tais, cov raws koj qab yuav muaj kev pom kev kaj lub neej.

    Nws zoo li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj zeeg li.
    Nws ua yam twg tau yam ntawd.

    Txais: (Zam 8:12) Huab Tais, cov raws koj qab yuav muaj kev pom kev kaj lub neej.

    Cov neeg phem tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais: (Zam 8:12) Huab Tais, cov raws koj qab yuav muaj kev pom kev kaj lub neej.

    As Les Lus Yas: ZAM 10: 27

    Txais: As les lus yas, as les lus yas.

    Huab Tais hais tias: Kuv cov yaj mloog kuv lub suab;
    kuv paub lawv, lawv raws nraim kuv qab mus.

    Txais: As les lus yas, as les lus yas.

    Ntawv Moo Zoo: LK 11: 42-46

    Yes Xus hais tias:
    42 “Nej tsoom Fas Lis Xais txoj hmoov phem! Vim nej them se ib feem kaum ntawm cov pum hub, cov zaub txhwb nyug dub, thiab ntawm txhua yam zaub, tab sis nej tsis rau siab saib txoj kev haum pheej thiab txoj kev nyiam Tswv Ntuj. Yuav tsum tau ua qhov no, thiab tsis txhob tso qhov tod pov tseg. 43 Nej tsoom Fas Lis Xais txoj hmoov phem! Vim nej nyiam zaum thawj lub rooj kim txwv hauv cov tsev txoos, thiab nyiam kom luag hawm nej tom tej tshav puam. 44 Nej txoj hmoov phem! Vim nej yog zoo li tej ntxa uas tsis muaj dab tsi qhia tias yog ntxa, ces sawv daws mus tsuj saud.
    45 Ces ib tug Kws Lij Choj hais rau Yes Xus tias : "Xib Hwb, koj hais tej ntawd mas kuj tub qaug peb thiab." 46 Yes Xus thiaj hais tias : "Nej cov Kws Lij Choj, nej kuj tau txoj hmoov phem thiab! Vim nej nog tej lub nra ceeb laj ris kawg rau zeej tsoom sawv daws, tab sis nej twb tsis xuas nej ib tug nyuag ntiv tes mus kov tej nra ntawd.“




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 13th October 2016, 12:33 pm

    TIM 13 LUB 10 HLI 2016

    Hnub Tsib Lis Piam Nees Nkaum Yim Nruab Xyoo C Nruab Lis Piam Xyoo II

    Zaj Nyeem Ib: ES FES XOS 1: 1-10


    1 Kuv, Paj Lug, tus uas Tswv Ntuj pom zoo tsa ua Yes Xus Pleev ib tug Hauv Paus Xa Lus, kuv sau ntawv tuaj rau cov ntshiab nyob Es Fes Xos uas yog cov ntseeg nyob hauv Yes Xus Pleev. 2 Thov kom peb Txiv Tswv Ntuj, thiab Huab Tais Yes Xus Pleev pub txiaj ntsim thiab kev thaj yeeb rau nej. 3 Peb yuav cav lus zoo txog Tswv Ntuj peb tus Huab Tais Yes Xus Pleev Leej Txiv; nws yog tus tau foom hmoov zoo rau peb nyob hauv Leej Pleev, kom peb tau txais txhua yam txiaj ntsim nyob saum ntuj los yug peb tus ntsuj plig. 4 Tswv Ntuj twb xaiv peb nyob hauv Leej Pleev txij puag thaum tseem tsis tau tsim lub ntuj lub teb los lawm, kom peb ua neeg ntshiab huv tsis muaj chaw xyeej nyob ntawm nws xub ntiag nyob hauv txoj kev nyiam. 5 Nws yeej ib txwm xaiv peb los ua nws cov tub ki tshiab nyob hauv Yes Xus Pleev; nws lub siab pom zoo ua li ntawd, 6 kom peb cav txog nws lub txiaj ntsim muaj hwj chim, uas nws pub dawb paug rau peb nyob hauv tus Zoo Nyiam.
    7 Nyob hauv Leej Pleev, peb tau txais kev cawm dim nyob hauv nws cov roj ntsha, kev daws peb cov txhaum nyob hauv nws lub txiaj ntsim muaj nqes nplua nuj, 8 uas Leej Txiv pub ntws lug los rau peb nyob hauv nws lub tswv yim thoob tsib thiab ntse. 9 Nws tau qhia yam zais tob tob puag hauv nws lub siab xav rau peb paub, yog zaj tswv yim zoo uas nws ib txwm npaj puag ntxov los lawm; 10 ces thaum txog lub caij teem, nws ua kom zaj tswv yim zoo no tsheej xeeb tau : nws yuav coj txhua tsav txhua yam thiab coj txhua leej txhua tus nyob saum ntuj thiab nyob ntiaj teb rov los zwm rau Leej Pleev ib leeg xwb.

    NPN 98: 1, 2-3AB, 3CD-4, 5-6

    Txais: (2a) HUAB TAIS ua kom sawv daws paub txog nws txoj kev cawm.

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej,
    Thiab nws sab npab ntshiab.

    Txais: (2a) HUAB TAIS ua kom sawv daws paub txog nws txoj kev cawm.

    HUAB TAIS ua kom sawv daws paub txog nws txoj kev cawm,
    nws muab nws txoj kev ncaj rau cov haiv neeg pom.
    Nws rov nco txog nws txoj kev ua zoo rau thiab hlub
    tsev neeg His Xas Lais.

    Txais: (2a) HUAB TAIS ua kom sawv daws paub txog nws txoj kev cawm.

    Tas npoo ntuj npoo ntiaj teb tau pom
    peb tus Tswv Ntuj txoj kev cawm neeg.
    Tas txhua teb chaws, nej zoo siab hu nkauj rau HUAB TAIS,
    nej qw suab hu nkauj, nej cav txog nws.

    Txais: (2a) HUAB TAIS ua kom sawv daws paub txog nws txoj kev cawm.

    Nej ntaus nkauj nog ncas cav txog Huab Tais,
    nej ntaus nkauj nog ncas nrog tej zaj nkauj zoo mloog.
    Nej tshuab hom ntxuag suab kub nyuj,
    nej hu nkauj zoo siab ntawm tus vaj ntxwv HUAB TAIS xub ntiag.

    Txais: (2a) HUAB TAIS ua kom sawv daws paub txog nws txoj kev cawm.

    As Les Lus Yas: ZAM 14: 6

    Txais: As les lus yas, as les lus yas.

    Huab Tais hais tias: "Kuv yog Txoj Kev, yog Qhov Tseeb, thiab yog Txoj Sia;
    tsis muaj leej twg mus cuag Leej Txiv tau, yog nws tsis mus ntawm kuv mus.

    Txais: As les lus yas, as les lus yas.

    Ntawv Moo Zoo: LK 11: 47-54

    Yes Xus hais tias:
    47 Nej txoj hmoov phem, vim nej txhim cov yaj saub tej ntxa, uas yog nej phaj txiv tau muab tua. 48 Nej yog cov tim khawv uas pom zoo tias nej phaj txiv ua yog lawm : lawv yog cov muab tua, hos nej yog cov txhim ntxa. 49 Yog vim li ntawd Tswv Ntuj txoj kev Thoob Tsib thiaj hais tias : Kuv yuav xa ib co yaj saub thiab ib co tub xa lus mus cuag lawv, lawv yuav muab ib co tua thiab hiam lwm cov. 50 Vim li ntawd tiam neeg no yuav tsum ris lub txim them cov yaj saub tej roj ntsha uas tau nchuav txij thaum ntuj tsim teb raug los lawm, 51 txij As Npes cov ntshav los txog Ntxas Kas Lias cov ntshav, tus uas raug tua ntawm lub thaj txi Ntuj thiab lub tuam tsev kis nruab nrab. Kuv hais rau nej tias : tiam neeg no yuav raug lub txim them cov nqi ntshav ntawd. 52 Nej tsoom Kws Lij Choj nej txoj hmoov phem! Vim nej tau rho tus yuam sij qhib kev txawj ntse tawm lawm; nej tsis kam nkag mus hauv thiab cov xav nkag mus hauv los nej tsis pub lawv mus."
    53 Thaum Yes Xus tawm ntawm qhov chaw ntawd mus lawm, cov Kws Ntawv Ntshiab thiab cov Fas Lis Xais pib ntxub Yes Xus tas siab nrho, lawv nug Yes Xus ntau yam kawg nkaus, 54 vim lawv npaj tswv yim tos rawv thaum twg nws hais ib lo lus yuam kev ces lawv thiaj tau kev liam nws.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 13th October 2016, 2:41 pm

    TIM 14 LUB 10 HLI 2016

    Hnub Rau Lis Piam Nees Nkaum Yim Nruab Xyoo C Nruab Lis Piam Xyoo II

    Hwm LN Callistus I, Vaj Qhia ua Tim Khawv

    Zaj Nyeem Ib: ES FES XOS 1: 11-14


    11 Ntuj kuj tseem tau xaiv peb nyob hauv Leej Pleev, tau qee peb raws li Tswv Ntuj tus txheej txheem uas nws ib txwm tsa los coj txhua tsav txhua yam kom haum nws lub siab xav, 12 kom peb cav txog nws lub koob meej vim peb yog pab neeg xub tso siab rau Leej Pleev. 13 Nyob hauv Leej Pleev, nej cov uas tau hnov Lo Lus tseeb uas yog lub Moo Zoo muab txoj kev cawm rau nej, thiab nej tau ntseeg, mas nej kuj tau txais ib lub thwj muaj Leej Tswv Yim Ntshiab uas Ntuj tau cog lus yuav pub. 14 Leej Tswv Yim Ntshiab yog thawj yam nyob hauv lub cuab tam uas peb yuav tau txais ua peb tug; nws ua hauj lwm txhiv peb los ua Tswv Ntuj neeg kom peb cav txog Tswv Ntuj lub hwj chim.

    NPN 33: 1-2, 4-5, 12-13

    Txais: (12) Haiv neeg Huab Tais xaiv ua nws tug lawv txoj hmoov zoo.

    Cov neeg siab ncaj, nej cia li zoo siab nyob hauv HUAB TAIS,
    txoj kev qhuas Huab Tais phim tus neeg siab ncaj.
    Nej ntaus nkauj nog ncas ua HUAB TAIS tsaug,
    nej ntaus thaj cheej kaum txoj hlua cav txog nws.


    Txais: (12) Haiv neeg Huab Tais xaiv ua nws tug lawv txoj hmoov zoo.

    HUAB TAIS lo lus yog lus ncaj,
    nws tej num yog num tseeb.
    Nws nyiam kev ncaj thiab kev haum pheej;
    HUAB TAIS txoj kev hlub nyob puv lub ntiaj teb.

    Txais: (12) Haiv neeg Huab Tais xaiv ua nws tug lawv txoj hmoov zoo.

    Haiv neeg uas lawv tus Tswv Ntuj yog HUAB TAIS, lawv txoj hmoov zoo!
    Haiv neeg uas Huab Tais xaiv lps ua nws lub cuab tam, lawv txoj hmoov zoo!
    HUAB TAIS nyob txheej ntuj saud dauv muag los ntsia,
    nws pom tas nrho ib tsoom neeg.

    Txais: (12) Haiv neeg Huab Tais xaiv ua nws tug lawv txoj hmoov zoo.

    As Les Lus Yas: NPN 33: 22

    Txais: As les lus yas, as les lus yas.

    HUAB TAIS, thov kom koj lub siab hlub roos peb,
    vim koj yog peb qhov chaw tso siab.

    Txais: As les lus yas, as les lus yas.

    Ntawv Moo Zoo: LK 12: 1-7

    1 Thaum ntawd, neeg coob coob, muaj txog ntau txhiab leej tuaj sib txoos ua tsheej pawg, sawv daws nyob sib txiv qev sib tsub sib nias. Yes Xus pib hais lus, nws xub hais rau nws cov thwj tim tias : "Nej ceev faj txog cov poov xab– uas yog txoj kev ua zoo sab nraud – ntawm cov Fas Lis Xais. 2 Tsis muaj ib yam zais ntshis uas yuav tsis qhib tawm los, tsis muaj ib yam npog cia uas yuav tsis muaj neeg paub. 3 Yog vim li ntawd, tas ib puas tsav yam uas nej hais nyob hauv qhov tsaus ntuj nti, yuav nrov rau luag hnov nruab hnub nrig; yam uas nej ntxhi rau hauv luag pob ntseg nyob hauv tej chav kaw nti, yuav muaj tus tuaj saum ru tsev tshaj tawm.
    4 Kuv cov phooj ywg, kuv hais rau nej : Nej tsis txhob ntshai cov uas tua neeg lub cev, thaum lawv tua tas, lawv ua tsis tau dab tsi ntxiv rau lawm. 5 Kuv qhia rau nej tias nej yuav tsum ntshai leej twg : nej yuav ntshai tus uas tua lub cev tas, tseem muaj peev xwm yuav muab nej pov rau hauv dab phem teb thiab. Kuv hais rau nej tias, tus ntawd mas nej yuav tsum ntshai nws tiag tiag.
    6 Tsib tug noog tsig txhuv tsuas muag tau ob lub txiaj toog xwb, puas yog ? Tsis kav, tsis muaj ib tug tsig txhuv uas Tswv Ntuj yuav tsis nco txog. 7 Tab yog nej cov plaub hau los Tswv Ntuj yeej suav tas huv si lawm. Nej tsis txhob txhawj mog : nej muaj nqis dua tej pab tsig txhuv coob coob.”




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 14th October 2016, 7:34 pm

    TIM 15 LUB 10 HLI 2016

    Hnub Xya Lis Piam Nees Nkaum Yim Nruab Xyoo C Nruab Lis Piam Xyoo II

    Hwm LN Teresa nyob Avila, Nkauj Dawb Huv thiab Kws Txuj Ci Kev Ntseeg

    Zaj Nyeem Ib: ES FES XOS 1: 15-23


    15 Thaum kuv hnov luag tej hais lus zoo txog nej txoj kev ntseeg nyob hauv Huab Tais Yes Xus, thiab txog nej lub siab nyiam tas tsoom ntshiab, 16 mas kuv ua Ntuj tsaug tsis tseg vim nej, thiab kuv nco ntsoov txog nej thaum kuv teev Ntuj. 17 Kuv thov kom peb tus Huab Tais Yes Xus Pleev tus Tswv Ntuj, Leej Txiv tus muaj koob meej, pub ib lub tswv yim thoob tsib thiab ib lub tswv yim txawj mem tau tej yam uas Ntuj qhib tawm los, nej thiaj yuav paub Tswv Ntuj zoo tiag. 18 Kuv thov kom Tswv Ntuj qhib nej lub siab cov qhov muag, kom nej pom tias txoj kev uas Ntuj hu nej yuav pub ib txog kev tso siab loj npuam li cas rau nej, thiab nws lub cuab tam nej yuav txais yuav pub kev nto koob meej nplua nuj npaum li cas rau nej nyob hauv tsoom ntshiab; 19 thiab nws lub hwj huam kuj yuav pub ib lub hwj chim loj tas nrho rau peb cov uas ntseeg, vim nws lub zog muaj peev xwm heev; 20 Tswv Ntuj nthuav nws lub zog nyob hauv Leej Pleev : nws tsa Leej Pleev sawv hauv cov tub tuag rov los thiab nws kom Leej Pleev zaum ntawm nws sab xis nyob saum cov txheej ntuj saud, 21 nyob siab dua cov Tuam Tshiab, siab dua cov Tshiab muaj hwj huam, siab dua cov Tshiab muaj zog, siab dua cov Tshiab tswj luag, siab dua txhua leej uas muaj npe, tsis yog hauv lub zim txwv no xwb tiam sis tseem nyob rau tiam tom ntej huv tib si. 22 Tswv Ntuj tso tas puas tsav yam rau hauv Leej Pleev qab xib taws; nws tsa Leej Pleev ua tus Hau uas nyob siab dua cov, saib txhua yam nyob hauv lub Koom Txoos, 23 uas yog nws lub Cev thiab yog tus uas nyob puv qhov txhia chaw thiab puv txhua tsav yam nws tus kheej tas nrho.

    NPN 8: 2-3AB, 4-5, 6-7

    Txais: (7) Koj tsa koj leej Tub kav txhua yam koj txhais tes tau tsim los.

    HUAB TAIS, peb tus HUAB TAIS, cas koj lub npe
    muaj hwj xyeej ua luaj, nws ncha mus puv tas ntiaj teb!
    Koj tsa koj lub koob meej nyob siab dua cov txheej ntuj saud.
    Koj ua kom cov me nyuam yaus thiab cov me nyuam mos lub ncauj
    Txawj cav lus zoo kawg nkaus txog koj vim koj cov yeeb ncuab.

    Txais: (7) Koj tsa koj leej Tub kav txhua yam koj txhais tes tau tsim los.

    Thaum kuv ntsia lub ntuj uas koj ntiv tes tau tsim los,
    lub hli, cov hnub qub uas koj muab txawb rau nyias qhov chaw,
    neeg yog dab tsi, koj thiaj nco txog nws?
    Los leej tib neeg yog tus tsi, koj thiaj txhawj txog?

    Txais: (7) Koj tsa koj leej Tub kav txhua yam koj txhais tes tau tsim los.

    Koj tsim neeg los nyob siab yuav luag cuag ib tug tswv ntuj,
    Koj muab koob meej thiab muab hwj chim rau neeg ntoo.
    Koj tsa neeg kav txhua yam koj txhais tes tau tsim los,
    koj tso tas puas tsav yam rau hauv neeg qab xib taws.

    Txais: (7) Koj tsa koj leej Tub kav txhua yam koj txhais tes tau tsim los.

    As Les Lus Yas: ZAM 15: 26B, 27A

    Txais: As les lus yas, as les lus yas.

    Huab Tais hais tias: “Leej Tswv Yim qhia qhov tseeb
    yuav ua tim khawv txog kuv thiab nej kuj yuav ua tim khawv thiab.”

    Txais: As les lus yas, as les lus yas.

    Ntawv Moo Zoo: LK 12: 8-12

    Yes Xus hais tias:
    8 “Kuv hais rau nej : leej twg lees paub kuv rau ntawm tsoom neeg xub ntiag, mas Neeg Leej Tub kuj yuav lees paub tus ntawd nyob ntawm Tswv Ntuj cov Tshiab xub ntiag. 9 Tab sis leej twg tsis lees paub kuv nyob ntawm tsoom neeg ntiag, mas yuav tsis muaj tus lees paub nws nyob ntawm Tswv Ntuj tsoom Tshiab xub ntiag thiab. 10 Leej twg hais ib lo lus cem Neeg Leej Tub, mas Ntuj yuav zam rau nws. Tab sis tus twg thuam Leej Ntuj Plig Ntshiab, mas Ntuj yuav tsis zam rau nws li.
    11 Thaum luag coj nej mus sawv hauv cov tsev txoos, ntawm cov thawj tswj cai, thiab ntawm cov nom tswv xub ntiag, mas nej txhob txhawj tias nej yuav teb li cas thiab yuav hais dab tsi ; 12 vim lub sij hawm ntawd, Leej Ntuj Plig Ntshiab yuav qhia nej kom hais dab tsi."




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 16th October 2016, 6:19 pm

    TIM 17 LUB 10 HLI 2016

    Hnub Ob Lis Piam Nees Nkaum Cuaj Nruab Xyoo C Nruab Lis Piam Xyoo II

    Hwm LN Ignatius nyob Antioch, Tswv Qhia ua Tim Khawv

    Zaj Nyeem Ib: ES FES XOS 2: 1-10


    Cov kwv tij,
    1 Yav thaud, nej yog neeg tuag nyob hauv txoj kev yuam kev thiab kev txhaum, 2 uas nej coj ua nej lub neej thaud, vim nej mloog raws lub qab ntuj neeg, thiab mloog raws tus kav lub hwj huam saum cov huab cua. Zaum no tus dab ntawd tseem ua nws tej hauj lwm nyob hauv cov neeg uas tiv Tswv Ntuj. 3 Yav thaud peb txhua leej txhua tus kuj yog neeg coj ib yam li ntawd thiab : peb tau ua lub neej mloog lub cev nqaij txoj kev ntshaw, peb ua ywj peb lub cev tej kev xav kev nqhis, thiab ywj peb lub siab tej kev xav ua qhov phem, ces peb thiaj yog ib co me nyuam poob rau hauv txoj kev npau taws xws li sawv daws. 4 Tab sis, Tswv Ntuj uas nws muaj txoj kev zam txhaum nplua mias, thiab vim nws txoj kev hlub peb loj tas nrho,
    5 txawm tias peb twb tuag nyob hauv peb txoj kev txhaum lawm los, Tswv Ntuj tseem ua kom peb nrog Leej Pleev rov muaj txoj sia tuaj – nco tias yog Ntuj lub txiaj ntsim cawm nej --, 6 Tswv Ntuj tsa peb nrog Leej Pleev sawv rov los, nws coj peb los zaum nrog nws saum cov txheej ntuj saud nyob hauv Yes Xus Pleev. 7 Tswv Ntuj ua li ntawd yog nws xav qhia kom cov tiam tom ntej pom nws lub txiaj ntsim nplua nuj loj tas nrho nyob hauv nws txoj kev ua zoo rau peb nyob hauv Yes Xus Pleev. 8 Vim yeej yog Ntuj lub txiaj ntsim cawm nej tiag, vim nej ntseeg. 9 Txoj kev cawm ntawd tsis tuaj ntawm nej tuaj, tiam sis yog Tswv Ntuj pub ua paj tshab rau nej; nws kuj tsis yog tuaj ntawm cov hauj lwm tuaj thiab, kom tsis txhob muaj ib tug tau kev khav. 10 Peb yog cov hauj lwm tawm ntawm Tswv Ntuj txhais tes los ; Tswv Ntuj tsim peb nyob hauv Yes Xus Pleev, kom peb ua cov hauj lwm zoo uas Tswv Ntuj yeej ib txwm xub npaj rau peb ua nyob hauv peb lub neej lawm.

    NPN 100: 1B-2, 3, 4AB, 4C-5

    Txais: (3b) Nws tsim peb los, peb yog nws tug.

    Tas lub ntiaj teb, nej zoo siab hu nkauj rau HUAB TAIS !
    Nej xyiv fab hlo luag ntxhi tsob hwb HUAB TAIS ;
    nej hu nkauj zoo siab chaws los ntawm nws xub ntiag

    Txais: (3b) Nws tsim peb los, peb yog nws tug.

    Nej cia li lees tias HUAB TAIS yog Tswv Ntuj.
    Nws tsim peb los, peb yog nws tug,
    peb yog nws haiv neeg, yog pab yaj nws saib.

    Txais: (3b) Nws tsim peb los, peb yog nws tug.

    Nej chaws mus hauv nws cov rooj loog, nej ua nws tsaug,
    Nej mus hauv nws cov tshav loog, nej cav txog nws

    Txais: (3b) Nws tsim peb los, peb yog nws tug.

    nej ua nws tsaug, nej foom lus zoo rau nws lub npe,
    vim HUAB TAIS muaj lub siab zoo;
    nws txoj kev ua zoo yuav nyob mus li,
    nws ua siab ncaj rau peb txheej dhau txheej.

    Txais: (3b) Nws tsim peb los, peb yog nws tug.

    As Les Lus Yas: MT 5: 3

    Txais: As les lus yas, as les lus yas.

    "Cov cov pluag hauv nruab siab tau txoj hmoov zoo,
    vim Ntuj lub Ceeb Tsheej yog lawv li.

    Txais: As les lus yas, as les lus yas.

    Ntawv Moo Zoo: LK 12: 13-21

    13 Muaj ib tug neeg hauv tsoom sid hais rau Yes Xus tias : "Xib Hwb, koj hais kom kuv tij laug faib peb lub cuab tam rau kuv thiab." 14 Yes Xus hais rau nws tias : "Npawg, leej twg tsa kuv ua tus txiav txim los tus faib cuab tam rau neb ?" 15 Ces Yes Xus hais rau lawv tias : "Nej ceev faj, nej yuav txuag kom nej txhob muaj kev ntshaw, vim tias neeg txawm nplua nuj npaum twg, los nws txoj sia tsis yog tas rau nws lub cuab tam." 16 Yes Xus hais zaj paj lug no rau lawv : "Muaj ib tug neeg nplua nuj, nws cov teb ntsu qoob loo kawg. 17 Nws nug nws tus kheej tias : 'Kuv yuav ua li cas, vim kuv tsis muaj chaw rau kuv cov qoob ?' 18 Ces nws hais tias : 'Kuv yuav ua li no : kuv yuav rhuav kuv cov txhab, yuav rov ua ib co txhab loj dua, kuv yuav sau kuv cov nplej thiab kuv tej cuab yeej cuab tam los tso rau hauv. 19 Ces kuv yuav hais rau kuv tus plig tias : 'Me ntsuj plig, koj muaj qoob loo cuab tam ntau kav koj ntev niaj ntau xyoo : koj so mog, koj noj, koj haus, koj ua si lom zem xauv npo.’ 20 Tab sis Tswv Ntuj hais rau nws tias : 'Neeg vwm ! Hmo no kiag, Ntuj yuav nug koj txog koj tus ntsuj plig. Tej yam uas koj npaj tau, yuav yog leej twg tug ?’ 21 Tus uas khaws nyiaj txiag ntau ntau tseg rau nws tib leeg kheej kuj yuav zoo li ntawd, vim nws tsis nrhiav kev nplua nuj nyob hauv Tswv Ntuj."





    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 18th October 2016, 8:12 am

    TIM 18 LUB 10 HLI 2016

    Hnub Peb Lis Piam Nees Nkaum Cuaj Nruab Xyoo C Nruab Lis Piam Xyoo II

    Hwm LN Lus Lus Kas, tus sau Ntawv Moo Zoo

    Zaj Nyeem Ib: 2 TM 4: 10-17B


    Cov hmov tshua,
    10 Des Mas uas nyiam lub ntiaj teb dua ntaais, nws tso kuv tseg thiab nws sawv kev mus rau Tes Xas Los Nis lawm; Khes Xees mus Nkas Las Tias teb, hos Tis Tos mus Das Mas Tias teb lawm. 11 Tshuav Lus Kas tib leeg nrog kuv nyob xwb. Koj mus coj Mas Kos nrog koj tuaj thiab, vim nws yog ib tug muaj nqis rau txoj hauj lwm tshaj Ntuj lus. 12 Kuv tau xa Tws Sis Kos mus nyob Es Fes Xos lawm. 13 Thaum koj tuaj, mas koj pab nqa kuv lub tsho tshaj sab uas kuv tso nyob Thuas, hauv Kas Pos tsev; koj nqa cov kauj ntawv thiab qhov tseem ceeb yog cov tawv sau ntawv tuaj thiab.
    14 Tus kws nchuav tooj As Les Xas Nraws tau ua phem kawg rau kuv; cia Huab Tais mam li ua pauj rau nws raws li nws tau ua. 15 Koj yuav tau ceev faj txog nws thiab, vim nws yog ib tug yeeb ncuab tsiv tsaim tiv peb txoj kev tshaj Ntuj lus. 16 Thawj zaug uas kuv tau mus sawv ntawm cov nom txiav txim xub ntiag, mas tsis muaj leej twg tuaj nres kuv tog li, sawv daws tso kuv pov tseg tas tib si. Kuv thov kom Ntuj txhob suav txim rau lawv! 17 Tab sis Huab Tais tau nrog nraim kuv, nws tso nws lub zog los txhawb kuv, kom kuv tshaj lub Moo Zoo kom tiav log, ces lub Moo Zoo thiaj nrov mus txog cov neeg teev pej kum dab pob ntseg.

    NPN 145: 10-11, 12-13, 17-18

    Txais: (12) Huab Tais, koj cov phooj ywg tshaj tawm txog
    koj lub Ceeb Tsheej muaj hwj chim ci ntsa iab.

    HUAB TAIS, cia tas koj cov hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    thiab piav txog koj lub hwj huam loj.

    Txais: (12) Huab Tais, koj cov phooj ywg tshaj tawm txog
    koj lub Ceeb Tsheej muaj hwj chim ci ntsa iab.

    Cia lawv qhia rau neeg paub txog koj lub hwj huam loj
    thiab koj lub Ceeb Tsheej muaj hwj chim ci ntsa iab.
    Koj lub Ceeb Tsheej yog ib lub Ceeb Tsheej txais tas cov hlob nrog cov yau,
    thiab koj txoj kev tswj kav yuav nyob mus txheej dhau txheej.

    Txais: (12) Huab Tais, koj cov phooj ywg tshaj tawm txog
    koj lub Ceeb Tsheej muaj hwj chim ci ntsa iab.

    Huab Tais tej kev yog kev ncaj
    nws tej dej num yog kev hlub.
    Huab Tais nyob ze cov hu txog nws,
    cov uas muaj lub siab hu txog nws tiag.

    Txais: (12) Huab Tais, koj cov phooj ywg tshaj tawm txog
    koj lub Ceeb Tsheej muaj hwj chim ci ntsa iab.

    As Les Lus Yas: ZAM 15: 16

    Txais: As les lus yas, as les lus yas.

    Huab Tais hais tias: yog kuv xaiv nej hauv lub ntiaj teb los
    Kom nej mus txi ib co txiv uas yuav nyob ruaj.

    Txais: As les lus yas, as les lus yas.

    Ntawv Moo Zoo: LK 10: 1-9

    1 Dhau qhov ntawd lawm, Huab Tais tseem xaiv xya caum ob leeg thwj tim, nws xa lawv mus tej pab ob leeg, ua nws ntej mus rau hauv cov nroog thiab tej qhov chaw uas nws yuav mus. 2 Nws hais rau lawv tias : "Qoob loo zoo sau muaj ntau kawg, tab sis cov tub zog muaj tsawg. Nej thov tus Tswv qoob kom nws xa ib co tub zog tuaj sau nws cov qoob. 3 Nej kav tsij mus! Kuv xa nej zoo li ib co yaj mus nyob nruab nrab ib cov hma. 4 Nej tsis txhob nqa nas nyiaj, txhob ris hnab, txhob rau khau, txhob hais lus rau leej twg ntawm kev. 5 Nej chaws mus hauv lub tsev twg, nej xub hais tias : "Kom lub tsev no nyob kaj lug lau!" 6 Yog muaj txoj kev kaj lug ib leeg tub nyob ntawd, mas nej txoj kev kaj lug yuav roos nws. Yog tsis muaj, mas nej txoj kev kaj lug yuav rov los rau nej. 7 Nej nyob hauv lub tsev ntawd, nej noj nej haus tej yam uas lawv muaj hauv tsev, vim tus tub zog tsim nyog txais ib tug nqi zog. Nej txhob tawm hauv ib lub tsev mus nyob dua lwm lub. 8 Nej mus hauv lub nroog twg, yog luag txais nej, nej noj tej yam uas luag muab rau nej. 9 Nej kho cov neeg mob hauv lub nroog ntawd kom zoo, thiab nej hais rau lawv tias : "Tswv Ntuj lub Ceeb Tsheej tuaj txog ze nej lawm."




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 18th October 2016, 1:01 pm

    TIM 19 LUB 10 HLI 2016

    Hnub Plaub Lis Piam Nees Nkaum Cuaj Nruab xyoo C nruab Lis Piam Xyoo II

    Hwm cov Leej Ntshiab John de Brébeuf, Isaac Jogues, thiab lwm cov tuag ua Tim Khawv.

    Zaj Nyeem Ib: ES FES XOS 3: 2-12


    Cov kwv tij,
    2 Kuv xav tias nej yeej tau hnov piav txog qhov Tswv Ntuj pub txiaj ntsim zoo li cas rau kuv lawm, kom kuv tau pab nej. 3 Nws tau qhib nws cov txuj ci zais tob tob los rau kuv pom xyeem raws li kuv tau xub piav me ntsis ua ntej rau nej lawm. 4 Thaum nej twm kuv cov lus no, nej yuav pom tias kuv kuj to taub txog Leej Pleev cov txuj zais tob tob thiab. 5 Ntuj tsis tau qhib cov txuj no rau cov neeg txheej thaud paub li, nws nyuam qhuav qhib rau nws cov Hauv Paus Xa Lus ntshiab, thiab rau nws cov Yaj Saub nyem no, nyob hauv Leej Tswv Yim xwb: 6 yog qhov tias cov neeg teev pej kum dab yeej nrog sawv daws koom ib lub cuab tam thiab koom ua ib lub Cev xwb, thiab lawv kuj nrog sawv daws koom tau txais raws nraim li cov lus cog tseg nyob hauv Yes Xus Pleev yog lawv ntseeg lub Moo Zoo. 7 Kuv ua ib tug tub tsob hwb lub Moo Zoo ntawd vim Tswv Ntuj lub txiaj ntsim pub kom kuv ua, yog nws lub hwj huam pub lub txiaj ntsim ntawd rau kuv. 8 Ntuj pub lub txiaj ntsim no rau kuv tus me dua cov nyob hauv tas tsoom ntshiab, kom kuv tshaj Leej Pleev txoj kev nplua nuj loj uas neeg ntsuas tsis tau rau cov neeg teev pej kum dab kom lawv hnov txog, 9 kom kuv qhia sawv daws paub tseeb tias lub ntsiab ntawm cov txuj ci zais tob tob yog dab tsi; cov txuj no nyob zais ntshis txij puag txheej thaud los lawm nyob hauv Tswv Ntuj tus tsim tas ib puas tsav yam, 10 kom nyem no thaum cov tuam tshiab thiab cov Tshiab muaj hwj huam nyob saum ntuj pom lub Koom Txoos, lawv thiaj paub tias Tswv Ntuj txoj kev thoob tsib tsis txawj kawg, ua tau ntau yam. 11 Tej no yeej yog raws nraim li Tswv Ntuj lub tswv yim nws ib txwm npaj puag ntxov los lawm tias nws yuav ua nyob hauv peb tus Huab Tais Yes Xus Pleev, 12 tus uas ua kom peb muaj cuab kav thiab muaj kev tso siab lug txav los ze Tswv Ntuj vim peb ntseeg txog Yes Xus.

    NPN HX 12: 2-3, 4BCD, 5-6

    Txais: (3) Nej yuav zoo siab luag ntxhi mus ce dej hauv cov dej muaj kev cawm neeg.

    Tswv Ntuj yog tus cawm kuv tiag.
    Kuv tso siab rau nws, kuv tsis ntshai dab tsi.
    Kuv lub zog thiab kuv lub peev xwm yog HUAB TAIS.
    Nws yog tus tau cawm kuv.
    Nej yuav zoo siab luag ntxhi mus ce dej
    hauv cov dej muaj kev cawm neeg."

    Txais: (3) Nej yuav zoo siab luag ntxhi mus ce dej hauv cov dej muaj kev cawm neeg.

    Nej ua HUAB TAIS tsaug, nej cav txog nws lub npe.
    Nej tshaj nws tej hauj lwm loj rau cov haiv neeg paub,
    Nej cav txog tias nws lub npe zoo tas nrho.

    Txais: (3) Nej yuav zoo siab luag ntxhi mus ce dej hauv cov dej muaj kev cawm neeg.

    Nej hu nkauj rau HUAB TAIS cav txog nws cov hauj lwm
    muaj hwj huam; kom tas ntiaj teb paub txhua nrho.
    Tsoom neeg nyob Xis Yoos, nej seev suab qw zoo siab,
    vim tus loj nyob hauv nej yog His Xas Lais tus Ntshiab!

    Txais: (3) Nej yuav zoo siab luag ntxhi mus ce dej hauv cov dej muaj kev cawm neeg.

    As Les Lus Yas: MT 24: 42A, 44

    Txais: As les lus yas, as les lus yas.

    Nej yuav tsis txhob tsaug zog!
    Vim nej twb tsis paub tias hnub twg nej tus Huab Tais yuav tuaj.

    Txais: As les lus yas, as les lus yas.

    Ntawv Moo Zoo: LK 12: 39-48

    Yes Xus hais tias:
    39 “Nej yuav tsum to taub tias: Yog tus tswv tsev paub lub sij hawm twg tub sab yuav tuaj, mas nws yuav tsis cia tub sab tho qhov tsev. 40 Nej kuj yuav tsum npaj ib yam li ntawd thiab, vim yog lub sij hawm uas nej tsis nco faj, mas Neeg Leej Tub thiaj yuav tuaj ." 41 Ces Pob Zeb hais tias : "Huab Tais, koj hais zaj paj lug no, puas yog koj hais rau peb, los hais rau sawv daws ?" 42 Huab Tais teb hais tias : "Leej twg yog tus tub txib pheej xeeb thiab xyuam xim, uas tus tswv tsev yuav tsa nws saib tus tswv cov tub zog, kom thaum txog caij nws faib hmoov nplej rau lawv ? 43 Yog thaum tus tswv rov los txog, nws pom tus tub txib tab tom lis nws txoj dej num, mas tus tub txib no txoj hmoov zoo. 44 Kuv hais tseeb rau nej, tus tswv yuav tsa nws saib tus tswv lub cuab tam tas huv si. 45 Tab sis yog tus tub txib ntawd xav hauv siab tias 'kuv tus Tswv yuav los lig,' ces nws muab tus tswv tej tub txib ntxhais txib ntaus, nws noj nws haus kom qaug. 46 Tus tub txib no tus tswv yuav los txog hnub uas nws tsis nco faj, thiab lub sij hawm uas nws tsis paub. Tus tswv yuav rau txim hnyav rau tus tub txib thiab yuav ntiab nws mus nrog cov tsis hwm Ntuj nyob. 47 Tus tub txib uas nws yeej paub qhov uas tus tswv xav kom ua, tab sis nws tsis npaj dab tsi li, thiab tsis ua raws li qhov tus tswv xav kom ua, mas tus tub txib ntawd yuav raug nplawm ntau tes. 48 Hos tus tub txib uas yeej tsis paub qhov uas tus tswv xav kom ua li, ces nws kuj tau ua tej yam tsim nyog ntaus kom sab, tiam sis nws yuav raug nplawm tsawg tes dua.
    Tus uas Ntuj tau pub ntau rau nws, mas Ntuj kuj yuav taij ntau ntawm nws rov qab. Yog Ntuj tseem pub ntau tshaj rau lwm tus, mas Ntuj haj yam yuav taij ntau yam tshaj ntawm nws.”




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 19th October 2016, 6:17 pm

    TIM 20 LUB 10 HLI 2016

    Hnub Tsib Lis Piam Nees Nkaum Cuaj Nruab Xyoo C Nruab Lis Piam Xyoo II

    Hwm LN Paul of the Croos/ Paul de la Croix

    Zaj Nyeem Ib: ES FES XOS 3: 14-21


    14 Vim tej uas tau hais no, mas kuv txhos caug nyob ntawm Leej Txiv xub ntiag, 15 yog Leej Txiv uas tas ib tsoom ua txiv nyob saum ntuj thiab nyob ntiaj teb no, txais lub npe txiv ntawm nws los. 16 Kuv thov kom Leej Txiv pub nws lub zog loj zog nchav rau nej nyob hauv nws Leej Tswv Yim, raws li nws lub hwj chim plua nuj, kom los pab txhawb nej txoj sia sab hauv, 17 thiab kuv thov kom Leej Pleev los nyob txawm hauv nej lub siab vim nej ntseeg, ces nej yuav nrhau cag thiab yuav cog nej lub siab ruaj rau hauv txoj kev nyiam. 18 Nej thiaj yuav txais ib lub zog pab nej, kom nej nrog tsoom neeg ntshiab to taub tias qhov dav thiab qhov ntev, qhov siab thiab qhov tob yog li cas, 19 ces nej thiaj yuav paub Leej Pleev txoj kev hlub uas tob tshaj txhua txoj kev paub txuj, thiab nej thiaj yuav tau txais Tswv Ntuj txoj kev puv npo los nyob puv nkaus hauv nej.
    20 Tus Tswv muaj hwj huam ua hauj lwm nyob hauv peb, nws ua tau ntau tshaj ob peb npaug qhov peb thov, thiab qhov peb xav tau hauv peb lub tswv yim. 21 Vim li ntawd, lub koob meej nyob hauv lub Koom Txoos, thiab hauv Yes Xus Pleev, yog nws tug mus tas txhua tiam mus li ib txhiab ib txhis ! Ua li !

    NPN 33: 1-2, 4-5, 11-12, 18-19

    Txais: (5b) Huab Tais txoj kev hlub nyob puv nkaus lub ntiaj teb.

    Cov neeg siab ncaj, nej cia li zoo siab nyob hauv HUAB TAIS,
    txoj kev qhuas nws phim tus neeg siab ncaj.
    Nej ntaus nkauj nog ncas ua HUAB TAIS tsaug,
    nej ntaus thaj cheej kaum txoj hlua cav txog nws. .

    Txais: (5b) Huab Tais txoj kev hlub nyob puv nkaus lub ntiaj teb.

    HUAB TAIS lo lus yog lus ncaj,
    nws tej num yog num tseeb.
    Nws nyiam kev ncaj thiab kev haum pheej;
    HUAB TAIS txoj kev hlub nyob puv lub ntiaj teb.

    Txais: (5b) Huab Tais txoj kev hlub nyob puv nkaus lub ntiaj teb.

    Tej yam HUAB TAIS npaj nyob mus li,
    Yam nws lub siab xav ua nyob txheej dhau txheej.
    Haiv neeg uas lawv tus Tswv Ntuj
    yog HUAB TAIS, lawv txoj hmoov zoo,
    Huab Tais xaiv haiv neeg ntawd los ua nws lub cuab tam.

    Txais: (5b) Huab Tais txoj kev hlub nyob puv nkaus lub ntiaj teb.

    Ntsias saib HUAB TAIS lub qhov muag saib ntsoov cov neeg hwm nws,
    sntsia ntsoov cov tso siab rau nws txoj kev hlub,
    tias nws yuav npo lawv dim ntawm kev tuag,
    thiab yuav txuag lawv txoj sia thaum muaj kev tshaib plab.

    Txais: (5b) Huab Tais txoj kev hlub nyob puv nkaus lub ntiaj teb.

    As Les Lus Yas: FLP 3: 8-9

    Txais: As les lus yas, as les lus yas.

    kuv saib txhua yam tsis muaj nqis,
    vim kuv xav tau Leej Pleev thiab xav nyob hauv nws.

    Txais: As les lus yas, as les lus yas.

    Ntawv Moo Zoo: LK 12: 49-53

    Yes Xus hais tias:
    49 "Kuv coj ib co hluav taws tuaj zes rau lub ntiaj teb, kuv xav kom cov hluav taws ntawd twb cig lam lug lawm. 50 Kuv yuav tsum txais ib co kab ke ntxuav. Kuv ntxhov siab loj kawg mus txog hnub uas tej ntawd tiav tas.
    51 Nej puas xav tias kuv coj kev thaj yeeb tuaj rau ntiaj teb no ? Kuv hais rau nej tias, kuv tsis coj kev thaj yeeb tuaj, kuv coj kev sib ncaim tuaj. 52 Txij no mus, ib tse neeg muaj tsib leeg yuav sib ncaim, peb leeg yuav tiv ob leeg, ob leeg yuav tiv peb leeg : 53 sawv daws yuav sib ncaim, txiv yuav tiv tub, tub yuav tiv txiv, niam yuav tiv ntxhais, ntxhais yuav tiv niam, poj yuav tiv nyab, nyab yuav tiv poj."




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 21st October 2016, 6:27 am

    TIM 21 LUB 10 HLI 2016

    Hnub Rau Lis Piam Nees Nkaum Cuaj Nruab Xyoo C Nruab Lis Piam Xyoo II

    Zaj Nyeem Ib: ES FES XOS 4: 1-6


    1 Kuv yog tus raug txim rau Huab Tais, kuv thov nej, kom nej coj ib lub neej phim txoj kev uas Ntuj hu nej los taug. 2 Nej yuav ua neeg tsis muab hlob, ua neeg siab mos siab zoo, ua neeg siab ntev; nej yuav ib leeg txhawb ib leeg nyob hauv txoj kev nyiam. 3 Nej yuav siv zog txuag txoj kev sib koom siab kom sawv daws koom ib lub tswv yim xwb, vim nej muaj kev thaj yeeb ib leeg nrog ib leeg. 4 Tsuas muaj ib lub Cev thiab ib lub Tswv Yim xwb, ib yam li Ntuj hu nej los taug ib txoj kev tso siab xwb; 5 tsuas muaj ib tug Huab Tais, ib txoj kev ntseeg, ib lub cim ntxuav, 6 ib tug Tswv Ntuj ua sawv daws Txiv xwb, nws nyob siab dua sawv daws, nws tuaj ntawm sawv daws tuaj, nws nyob hauv sawv daws.

    NPN 24: 1-2, 3-4AB, 5-6

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Lub ntiaj teb thiab puas tsav yam nyob hauv yog HUAB TAIS li,
    lub sim ceeb thiab cov nyob hauv yog nws tug.
    Vim nws yog tus tsim lub ntiaj teb los txawb rau saum cov hiav txwv
    thiab muab tso rau saum cov dej ntws.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    Leej twg thiaj yuav nce tau saum HUAB TAIS lub roob?
    Los leej twg thiaj yuav mus sawv taus nyob hauv nws thaj chaw ntshiab?
    Yog tus uas txhais tes tsis muaj txhaum, lub siab dawb huv,
    tus uas tsis ntshaw tej yam tsis muaj qab hau.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    HUAB TAIS yuav foom koob hmoov rau nws. ,
    yog paj tshab tuaj ntawm Tswv Ntuj tus cawm nws tuaj.
    Lawv yuav zoo li no, tsav neeg uas nrhiav Tswv Ntuj,
    cov uas nrhiav Yas Kos tus Tswv Ntuj lub ntsej muag.

    Txais: (6) Huab Tais, lawv yog haiv neeg uas ntshaw pom koj lub ntsej muag.

    As Les Lus Yas: MT 11: 25

    Txais: As les lus yas, as les lus yas.

    Txiv, kuv cav lus zoo txog koj, Huab Tais kav lub ntuj lub teb,
    vim koj qhib tej yam tob txog lub Ceeb Tsheej rau cov neeg me paub.

    Txais: As les lus yas, as les lus yas.

    Ntawv Moo Zoo LK 12: 54-59

    54 Yes Xus hais rau tsoom neeg sawv daws tias : "Thaum nej pom huab sawv ntxoov sab hnub poob, tam sis ntawd, nej hais tias ntuj yuav los nag, ces kuj los nag tiag. 55 Thaum nej hnov cua tshuab qab teb tuaj, nej hais tias ntuj yuav sov, mas muaj li ntawd tuaj tiag. 56 Neeg zoo sab nraud, nej twb paub ntsuas lub ntuj lub teb tus yam ntxwv, ua cas nej ntsuas tsis tau lub zim txwv no tej xwm li? 57 Vim li cas nej tsis txiav nej tus kheej tias qhov ncaj yog qhov twg ?
    58 Yog koj nrog tus ntxub koj mus cuag nom, mas thaum koj tseem txog ib tog kev, koj yuav ua tib zoo nrog nws hais kom haum, tsam nws coj koj mus rau tus nom txiav txim, ces tus nom txiav txim muab koj cob nkaus rau tub ceev xwm, ces tub ceev xwm muab koj pov rau hauv tsev loj faj. 59 Kuv hais rau koj : Koj yuav tsis tau tawm hauv tsev loj faj los mus txog thaum koj rho nyiaj qab nas txog xus kawg los them kom tas.”





    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 21st October 2016, 8:31 am

    TIM 22 LUB 10 HLI 2016

    Hnub Xya Lis Piam Nees Nkaum Cuaj Nruab Xyoo C Nruab Lis Piam Xyoo II

    Hwm LN Zam Paj Lug II, ua Vaj Qhia; hwm Niam Mab Liab

    Zaj Nyeem Ib: ES FES XOS 4: 7-16


    7 Peb nyias tau txais Ntuj lub txiaj ntsim raws li Yes Xus Pleev pub rau nyias. 8 Li ntawd luag thiaj hais tias : ‘Nws nce mus puag saum qhov siab, nws coj cov raug txim mus, nws pub paj tshab rau leej tib neeg.’ 9 Thaum ntawv hais tias : ‘nws nce’, yog txhais li cas? Yog txhais tias nws tau xub nqes mus txog puag hauv yeeb ceeb lawm thiab los tsis yog? 10 Tus tau nqes mus kuj yog tus nce mus nyob siab dua cov txheej ntuj saud tib si thiab, kom nws thiaj nyob puv hauv txhua yam.
    11 Thiab Yes Xus Pleev tau pub kom ib txhia ua Hauv Paus Xa Lus, ib txhia ua Yaj Saub, ib txhia ua tub tshaj lub Moo Zoo, ib txhia ua tswv zov yaj, ib txhia ua xib hwb, 12 nws tsa li no kom cov ntshiab thiaj pom qab ua txoj hauj lwm tshaj Ntuj Lus, kom lawv maj mam txhim tau Leej Pleev lub Cev, 13 mus txog thaum peb sawv daws yuav ua ib leeg xwb nyob hauv txoj kev ntseeg thiab txoj kev paub Tswv Ntuj Leej Tub; mus txog thaum peb hlob tiav tib neeg haum raws li Leej Pleev lub Cev uas hlob tiav log lawm. 14 Ces peb yuav tsis yog ib co me nyuam yaus ntxiv, peb yuav tsis raug txhua yam tswv yim tawm hauv neeg lub siab phem los thiab tawm hauv neeg lub tswv yim xav ntxias kom luag yuam kev los, muab peb ntsawj thiab muab peb pus rau sab ub sab no. 15 Peb yuav ua neej raws qhov tseeb nyob nraim hauv txoj kev nyiam; peb yuav hlob nyob hauv txhua txoj kev kom peb zoo li tus uas yog lub Taub Hau, Leej Pleev. 16 Tas nrho nws lub Cev huv tib si, uas sib dhos thiab sib txuas ua ke vim muaj ntau txoj leeg yug thiab ua kom lub cev txawj ua zog raws li nyias txoj hauj lwm, nws maj mam rov ua ua kom nws hlob tuaj thiab rov txhim nws kom hlob nyob hauv txoj kev nyiam.

    NPN 122: 1-2, 3-4AB, 4CD-5

    Txais: (1) Tuaj peb zoo siab hlo mus pem Huab Tais tsev.
    los: As les lus yas.

    Kuv zoo siab vim lawv hais rau kuv tias:.
    "Peb yuav nce mus lawm pem Huab Tais tsev.”
    Nim no, peb txhais taw tau tsuj
    koj cov rooj loog lawm os Yes Lus Xas Les.

    Txais…

    Yes Lus Xas Les, luag txhim zoo li ib lub nroog
    Uas zoo tau xwm yeem.
    Cov xeem neeg nce mus pem nws,
    Yog Huab Tais cov xeem neeg

    Txais…

    Lawv nce mus raws li txoj cai qhia rau His Xas Lais,
    Kom tau cav txog Huab Tais lub Npe.
    Nyob ntawd muaj ib co rooj txiav txim teeb tau tseg,
    Yog cov rooj cia rau Das Vis tsev neeg.

    Txais…

    As Les Lus yas: ES XES KIAS 33: 11

    Txais: As les lus yas, as les lus yas.

    Huab Tais hais tias: Kuv tsis zoo siab pom tus neeg siab phem tuag,
    Kuv xav pom nws hloov siab ua qhov zoo kom nws muaj txoj sia nyob.

    Txais: As les lus yas, as les lus yas.

    Ntawv Moo Zoo: LK 13: 1-9

    1 Tib lub zim txwv ntawd, muaj ib co neeg tuaj qhia Yes Xus txog cov Nkas Lis Lais uas Pis Las Tos muab lawv cov ntshav hliv xyaw rau cov ntshav uas lawv txi Ntuj. 2 Ces Yes Xus thiaj hais rau lawv tias : "Nej puas xav tias cov Nkas Lis Lais ntawd tau ua txhaum loj dua lwm cov neeg nyob Nkas Lis Lais, lawv thiaj raug tsim txom zoo li ntawd ? 3 Lawv tsis tau ua txhaum loj dua li! Tiam sis kuv hais rau nej tias yog nej tsis tig los hloov siab, mas nej yuav tuag ib yam li ntawd thiab. 4 Hos kaum yim leej neeg uas tus pej thuam Xis Los Es vau los tsuam lawv tuag tas, mas nej puas xav tias lawv tau ua txhaum loj dua ib tsoom neeg nyob Yes Lus Xas Les huv si ? 5 Lawv yeej tsis tau ua txhaum loj dua li! Tab sis kuv hais rau nej tias yog nej tsis xav tig los hloov dua siab tshiab, mas nej yuav tuag ib yam li ntawd thiab."
    6 Yes Xus tseem hais zaj paj lug no tias : "Muaj ib tug neeg cog tau ib tsob txiv ncuav pias rau hauv nws lub vaj txiv ntoo. Nws tuaj de txiv ncuav pias, tab sis tsis pom muaj txiv li. 7 Ces nws hais rau tus tub txib zov vaj tias : "Koj saib ! Tau peb xyoos no kuv tuaj de txiv ncuav pias, kuv yeej tsis pom ib lub txiv li. Koj muab tsob ntoo ncuav pias ntov. Yuav cia nws nyob nkim av ua dab tsi ?" 8 Tus tub txib teb rau tus tswv vaj tias : "Tus Tswv, thov koj cia tsob ntoo nyob xyoo no ntxiv. Kuv yuav khawb av ncig lub hauv paus ntoo thiab npoog chiv rau. 9 Tej zaum yav tom ntej, tsob ntoo yuav txi txiv. Yog tsis txi, koj mam muab ntov."




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 23rd October 2016, 6:35 pm

    TIM      24     LUB     10     HLI      2016

    Hnub Ob Lis Piam Peb Caug Nruab Xyoo C Nruab Lis Pia, Xyoo II

    Hwm LN Anthony Mary Claret/Antoine Marie Claret

    Zaj Nyeem Ib:     ES FES XOS  4:   32–5:8


    32 Nej sawv daws yuav rov sib ua zoo, sib hlub, nej yuav ib leeg zam rau ib leeg, ib yam li Tswv Ntuj zam rau nej nyob hauv Leej Pleev.
    5   1 Nej yuav yoog raws li Tswv Ntuj, xws li nej yog nws cov me nyuam nws hlub tshua. 2 Nej yuav ua neej taug txoj kev nyiam, raws li Leej Pleev tau nyiam peb, nws tau muab nws tus kheej tso rau luag ntes kom tau pab peb,  nws muab  nws cev xws li ib tug tsiaj hlawv txi Ntuj tsw qab ntxiag mus rau Tswv Ntuj. 3 Hais txog kev tsis tsim txiaj, kev ua phem ua qias txhua yam, los kev nyiam nyiaj txiag, mas nej yuav tsis txhob tham ib los txog nyob hauv nej li, thiaj phim ib co neeg ntshiab dawb huv, 4 uas tsis muaj tej lus dev, tej lus ruam ruam, tej lus plhom moj, txhua yam tsis zoo mloog ntawd li, tiam sis tsuas muaj tej zaj lus ua Ntuj tsaug xwb. 5 Nej yuav tsum paub zoo tias tus ua dev ua npua, tus ywj nws lub cev ua phem, tus nyiam nyiaj txiag, (uas yog ib tug neeg teev dab teev mlom), mas nws yuav tsis muaj cai tau txais lub cuab tam nyob hauv Yes Xus Pleev thiab Tswv Ntuj lub Ceeb Tsheej ua nws tug li.
    6 Nej tsis txhob cia luag tej cov lus dag ntxias tau nej; yog vim tej kev ntxhov hnyo uas txhawv ntawm tej kev dag ntxias ntawd, mas Tswv Ntuj yuav npau taws rau cov neeg tiv nws tsis mloog nws lus. 7 Nej tsis txhob nrog cov neeg zoo li ntawd sib fim. 8 Vim yav thaud, nej yog qhov tsaus ntuj nti, tiam sis zaum no nej yog qhov pom kev nrig nyob hauv Huab Tais lawm, mas nej yuav tsum coj raws li cov me nyuam muaj qhov pom kev.

    NPN      1:   1-2, 3, 4 + 6

    Txais:  (EFX  5:1)  Nej yuav yoog raws li Tswv Ntuj,
    nej thiaj yog nws cov me nyuam uas nws hlub.

    Muaj hmoov zoo yog tus uas tsis coj
    raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS txoj cai nruab hnub hmo ntuj.

    Txais:  (EFX  5:1)  Nej yuav yoog raws li Tswv Ntuj,
    nej thiaj yog nws cov me nyuam uas nws hlub.

    Nws zoo li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj zeeg li.
    Nws ua yam twg tau yam ntawd.

    Txais:  (EFX  5:1)  Nej yuav yoog raws li Tswv Ntuj,
    nej thiaj yog nws cov me uas nyuam nws hlub.

    Cov neeg phem tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais:  (EFX  5:1)  Nej yuav yoog raws li Tswv Ntuj,
    nej thiaj yog nws cov me nyuam uas nws hlub.

    As Les Lus Yas:     ZAM  17:   17B, 17A

    Txais:   As les lus yas, as les lus yas.

    Huab Tais, koj lo lus yog qhov tseeb;
    thov koj muab peb cog rau hauv txoj kev tseeb.

    Txais:   As les lus yas, as les lus yas.

    Ntawv Moo Zoo:     LK  13:   10-17

    10 Muaj ib hnub Xas Npas Tos, Yes Xus qhia nyob hauv ib lub tsev txoos. 11 Nyob ntawd muaj ib tug poj niam raug ib tug dab tau kaum yim xyoo. Tus dab ua kom nws lub cev tsis zoo, nws khoov nkoos, yeej sawv tsis tau ntseg li. 12 Yes Xus pom tus poj niam ntawd, Yes Xus hu nws, hais rau nws tias : "Tus poj niam, zaum no koj dim ntawm koj txoj kev txom nyem lawm." 13 Ces Yes Xus tiag nws txhais tes rau saum tus poj niam ntawd. Tam sis ntawd, tus poj niam khoov duav sawv taus ntseg, ces nws cav txog Tswv Ntuj. 14 Tiam sis tus tswj lub tsev txoos tsis txaus siab rau qhov Yes Xus kho neeg hnub Xas Npas Tos, nws thiaj qhib ncauj hais rau tsoom sid tias : "Muaj rau hnub uas sawv daws yuav tsum ua hauj lwm, nej tuaj kom luag kho nej tej hnub ntawd, txhob tuaj hnub Xas Npas Tos !" 15 Huab Tais teb rau tus tswj tsev txoos tias : "Neeg lam zoo sab nraud ! Hnub Xas Npas Tos, nej txhua leej txhua tus daws nej tus nyuj los tus luj ntawm lub dab zaub cab mus haus dej los tsis yog ? 16 Has Nplas Has tus ntxhais no, Xas Tas twb muab khi tau kaum yim xyoo lawm, nws haj yam yuav tsum txais tau kev dim ntawm nws txoj kev txom nyem hnub Xas Npas Tos los tsis sub?" 17 Thaum Yes Xus hais li ntawd, cov neeg ntxub Yes Xus tau txaj muag, hos tas tsoom sid zoo siab rau txhua yam hauj lwm zoo hauj lwm loj uas Yes Xus tau ua.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 25th October 2016, 5:49 am

    TIM 25 LUB 10 HLI 2016

    Hnub Peb Lis Piam Peb Caug Nruab Xyoo C Nruab Lis Piam Xyoo II

    Zaj Nyeem Ib: ES FES XOS 5: 21-33


    21 Nej yuav rov sib mloog, ib leeg mloog ib leeg, vim nej hwm Leej Pleev. 22 Cov poj niam yuav mloog lawv tus txiv lus, ib yam li yog mloog Huab Tais. 23 Vim tus txiv yog tus poj niam lub taub hau, ib yam li Leej Pleev yog lub taub hau rau lub Koom Txoos, nws muab nws tus kheej los ua tus cawm lub Cev. 24 Ib yam lu lub Koom Txoos mloog Leej Pleev lus, ua li mas cov poj niam kuj yuav mloog lawv tus txiv lus nyob hauv txhua yam. 25 Nej cov ua txiv, nej yuav hlub nej cov poj niam xws li Leej Pleev hlub lub Koom Txoos, nws muab nws txi rau ntuj los pab kom lub Koom Txoos ntshiab tuaj. 26 Leej Pleev ua kom lub Koom Txoos dawb huv tuaj nyob hauv cov dej uas ntxuav lawv nrog cov lus ib txhij hais, 27 kom thaum Yes Xus muab lub Koom Txoos rov cev rau nws tus kheej, lub Koom Txoos yuav ci ntsa iab tsis tsuas ib tee, tsis muaj ib kab txoom, los tej yam zoo li ntawd, ces lub Koom Txoos thiaj li yuav ntshiab huv thiab tsis muaj ib qho xyeej li. 28 Ua li mas, cov ua txiv yuav hlub lawv cov poj niam, ib yam li yog lawv lub cev kiag; yus nyiam yus tus poj niam, yog yus rov nyiam yus ntag. 29 Tsis muaj leej twg yuav ntxub nws lub cev : nws yug nws lub cev thiab tu kom zoo; Leej Pleev ua zoo ib yam li ntawd rau lub Koom Txoos, 30 vim lub Koom Txoos yog nws lub Cev, peb yog tswv cuab nyob hauv lub Cev ntawd. 31 Vim li ntawd, ‘Tus txiv neej yuav tso nws niam nws txiv tseg, mus nrog nws poj niam ua ib nkawg; nkawd ob leeg yuav ua ib lub cev xwb’. 32 Lo lus no muaj ib lub ntsiab tob, uas yog kuv piav hais txog Leej Pleev thiab lub Koom Txoos. 33 Tiam sis qhov loj hais rau nej, mas yog nyias yuav hlub nyias tus poj niam ib yam li nws hlub nws tus kheej, hos tus poj niam kuj yuav hwm tus txiv.

    NPN 128: 1-2, 3, 4-5

    Txais: (1a) Cov uas hwm Huab Tais tau txoj hmoov zoo.

    Nej cov hwm HUAB TAIS, nej txoj hmoov zoo,
    vim nej taug raws nws txoj kev!
    Nej yuav tau noj lub txiv ntawm nej tej hauj lwm,
    nej yuav tau hmoov zoo thiab nws yuav nyiam nej.

    Txais: (1a) Cov uas hwm Huab Tais tau txoj hmoov zoo.

    Kuj tus poj niam yuav zoo li ib txoj hmab txiv cawv txi txiv ncw
    nyob rau hauv koj tej kaum vaj kaum tsev,
    koj cov me nyuam zoo li ib co ntoo txiv roj
    nyob ncig lees koj lub phaj tsum.

    Txais: (1a) Cov uas hwm Huab Tais tau txoj hmoov zoo.

    Nej saib, tus neeg muaj txoj hmoov zoo
    yog tus ntshai HUAB TAIS.
    HUAB TAIS nyob saum roob Xis Yoos foom koob hmoov rau nej,
    kom nej tau pom Yes Lus Xas Les vam meej niaj hnub hauv nej lub neej.

    Txais: (1a) Cov uas hwm Huab Tais tau txoj hmoov zoo.

    As Les Lus yas: MT 11: 25

    Txais: As les lus yas, as les lus yas.

    Txiv, kuv cav lus zoo txog koj, Huab Tais kav lub ntuj lub teb,
    vim koj qhib tej yam tob txog lub Ceeb Tsheej rau cov neeg me paub.

    Txais: As les lus yas, as les lus yas.

    Ntawv Moo Zoo: LK 13: 18-21


    18 Yes Xus thiaj hais tias : "Tswv Ntuj lub Ceeb Tsheej yog zoo li cas ? Kuv yuav muab piv rau dab tsi ? 19 Tswv Ntuj lub Ceeb Tsheej zoo li ib lub noob zaub roj uas ib tug neeg nqa mus tseb rau hauv nws lub vaj. Lub noob hlob loj tsheej ib tsob ntoo : ces noog ya saum ntuj los nkaum hauv cov ceg."
    20 Yes Xus tseem hais tias : "Kuv yuav muab Tswv Ntuj lub Ceeb Tsheej piv rau dab tsi ? 21 Tswv Ntuj lub Ceeb Tsheej zoo li ib co poov xab uas ib tug poj niam muab do rau hauv peb kawg hmoov nplej mus txog thaum cov hmoov su tuaj tas huv si."




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 26th October 2016, 2:24 pm

    TIM     26    LUB    10    HLI     2016

    Hnub  Plaub Lis Piam Peb Caug Nruab Xyoo C Nruab Lis Piam Xyoo II    

    Zaj Nyeem Ib:      ES FES XOS  6:   1-9

    1 Cov me nyuam, nej yuav mloog nej niam nej txiv lus nyob hauv Huab Tais, vim ua li ntawd thiaj yog. 2 ‘Koj yuav hwm koj niam koj txiv’, yog thawj lo lus qhia uas muaj ib qho kev cog lus nrog tias:  3 ‘koj thiaj yuav tau nyob zoo, thiab koj yuav ua neej nyob ntev xyoo nyob ntiaj teb no’.  4 Cov ua niam ua txiv, nej txhob ua nruj dhau kev cai rau nej cov me nyuam kom lawv npau taws; thaum nej qhuab qhia lawv, nej yuav siv tej lo lus ntuas thiab tej txoj kev cob qhia tuaj ntawm Huab Tais tuaj.
    5 Cov tub mab tub qhe, nej yuav mloog nej cov tswv uas yog tib neeg lus ib yam li yog mloog Leej Pleev lus; nej yuav ua lub siab ncaj ncees hwm lawv ntshai lawv,  6 tsis txhob lam mloog lus sab nraud xwb, uas yog lam nrhiav ua kom haum neeg siab xwb. Tiam sis  nej yuav mloog lus ib yam li nej yog Leej Pleev cov qhev, uas muaj lub muab siab dawb paug ua raws li Tswv Ntuj lub siab xav. 7 Nej txoj kev ua zoo rau luag ntawd yog nej ua rau Huab Tais tsis yog ua rau tib neeg.       8 Nej yeej paub lawm tias Huab Tais yuav them rau nyias raws li nyias txoj kev ua zoo, tsis hais tus qhev los tus neeg twj lij. 9 Nej cov ua tswv, nej kuj yuav ua zoo rau nej cov qhev thiab, tsis txhob ua phem phem rau lawv. Nej nco ntsoov tias, lawv thiab nej muaj ib tug Tswv nyob saum ntuj; tus Tswv ntawd tsis tsa leej twg cai li.

    NPN      145:   10-11, 12-13AB, 13CD-14

    Txais:   (13c)  Huab Tais tsis fav xeeb, nws ua raws nws tej lus.

    HUAB TAIS, cia koj txhua yam hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    thiab piav txog koj lub hwj huam loj.

    Txais:   (13c)  Huab Tais tsis fav xeeb, nws ua raws nws tej lus.

    Cia lawv qhia rau neeg paub txog koj lub hwj huam loj
    thiab koj lub Ceeb Tsheej muaj hwj chim ci ntsa iab.
    Koj lub Ceeb Tsheej yog ib lub Ceeb Tsheej txais tas cov hlob nrog cov yau,
    thiab koj txoj kev tswj kav yuav nyob mus txheej dhau txheej.  

    Txais:   (13c)  Huab Tais tsis fav xeeb, nws ua raws nws tej lus.

    Huab Tais tsis fav xeeb, nws ua raws nws tej lus,
    nws tej dej num dawb huv tas nrho.
    Huab Tais tsa cov ntog kom lawv rov sawv taus,
    nws tsa cov khoov nkoos kom sawv taus ntseg.  

    Txais:   (13c)  Huab Tais tsis fav xeeb, nws ua raws nws tej lus.

    As Les Lus yas:       2 THESS  2:   14

    Txais: As les lus yas, as les lus yas.

    Tswv Ntuj hu peb los ntseeg lub Moo Zoo,
    kom peb tau txais peb tus Huab Tais Yes Xus Pleev lub hwj chim.


    Txais: As les lus yas, as les lus yas.

    Ntawv Moo Zoo:      LK  13:   22-30

    22 Yes Xus hla hauv cov nroog thiab cov zos, nws qhia sawv daws,  nws taug kev mus ntxiv rau Yes Lus Xas Les. 23 Muaj ib tug nug Yes Xus tias : "Huab Tais, cov yuav txais kev cawm puas yog cov tsawg xwb?" Yes Xus teb rau lawv tias : 24 "Nej ua tiag chaws ntawm lub qhov rooj nqaim mus mog. Kuv hais rau nej tias : coob leej yuav sim chaws ntawd mus, tab sis lawv yuav tsis muaj zog mus tau.
    25 Thaum tus tswv tsev sawv mus kaw qhov rooj tas rau lawm, tab sis nej tseem nyob nraum zoov, nej yuav khob qhov rooj thiab nej yuav hais tias : 'Huab Tais, koj qhib qhov rooj rau peb mas.' Ces nws yuav teb rau nej tias : 'Kuv tsis paub nej nyob qhov twg tuaj.' 26 Ces nej yuav hais rau nws tias : ‘Peb twb noj thiab haus nyob ntawm koj xub ntiag, hos koj twb qhia sawv daws nyob hauv peb cov tshav puam.’ 27 Ces tus tswv tsev yuav hais rau nej tias : 'Kuv tsis paub nej nyob qhov twg tuaj. Nej txav mus deb kuv, tas nej cov uas ua tsis ncaj huv tib si.’
    28 Nyob ntawd, nej yuav quaj ncia thiab yuav tom hniav nkawv, ces nej yuav pom Has Nplas Has, His Xas Has, Yas Kos, thiab tas ib tsoom yaj saub nyob hauv Tswv Ntuj lub Ceeb Tsheej, hos nej mas nej yuav raug luag pov rau sab nraud.  29 Luag yuav tuaj toob tab thiab xib fab tuaj, tuaj pej fab thiab naj fab tuaj, sawv daws yuav tuaj zaum ntawm rooj qav nyob hauv Tswv Ntuj lub Ceeb Tsheej. 30 Ces muaj ib co neeg ua luag qab, yuav tau ua ntej, hos ib co ua ntej yuav tau ua qab."



    Last edited by Mim on 1st December 2016, 10:56 am; edited 1 time in total

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 26th October 2016, 4:10 pm

    TIM      27     LUB     10     HLI      2016

    Hnub Tsib Lis Piam Peb Caug Nruab Xyoo C Nruab Lis Piam Xyoo II

    Zaj Nyeem Ib:      ES FES XOS  6:   10-20


    Paj Lug sau ntawv tias:
    10 Nej yuav ua kom nej muaj zog nyob hauv Huab Tais thiab nyob hauv nws lub hwj huam loj. 11 Nej yuav hnav Tswv Ntuj lub tsho hlau nej thiaj tiv yeej dab phem tej kev haub kev ntxias. 12 Vim peb tsis tsa rog ntaus ib co yeeb ncuab muaj nqaij muaj ntshav zoo li peb, peb tsa rog ntaus cov vaj dab phem, cov dab phem muaj hwj huam, cov dab phem kav lub sim ceeb tsaus ntuj; peb tsa rog ntaus cov tim tswv phem, uas nyob saum cov txheej ntuj saud. 13 Vim li ntawd, nej thiaj yuav tsum hnav Tswv Ntuj lub tsho hlau, kom txog hnub phem, nej thiaj tiv yeej; thaum nej ua tas txhua yam lawm, nej thiaj nyob ruaj nreb.
    14 Nej yuav sawv ntsug khov kho, nej muab qhov tseeb los ua siv sia duav, muab txoj kev ncaj ua tsho hlau thaiv hauv siab, 15 thiab muab lub siab kub lug mus tshaj lub Moo Zoo xa txoj kev thaj yeeb los khau rau. 16 Nej ua txhua yam nej tuav rawv txoj kev ntseeg ntawm tes xws li ib daig leem phiaj, ces nej yuav tua yeej tus Phem cov xub tswm faj. 17 Nej kuj tseem yuav tsum ntoo kev cawm los ua kaus mom hlau thaiv, thiab tuav rawv Leej Tswv Yim rab ntaj, uas yog Tswv Ntuj lo lus.
    18 Nej yuav teev Ntuj thiab thov Ntuj tsis tseg, nej yuav teev Ntuj txhua sij hawm txhua caij nyoog nyob hauv Leej Tswv Yim. Nej yuav teev Ntuj tsis paub sab tsis paub nkees,  nej thov Ntuj pab tas cov neeg ntshiab. 19 Kuv kuj vam nej thov Ntuj rau kuv thiab, kom kuv tau kev qhib ncauj hais lus, thiab tsis ntshai tshaj cov txuj zais tob tob hauv lub Moo Zoo 20 vim kuv yog lub Moo Zoo tus Tiam Lis uas raug cov saw hlau no khi. Nej thov Ntuj pab kom kuv muaj peev xwm hais tau raws li kuv yuav tsum hais.

    NPN       144:   1B, 2, 9-10

    Txais:   (1) Thov kom HUAB TAIS nto koob meej, nws yog kuv lub tsua!

    Thov kom HUAB TAIS nto koob meej, nws yog kuv lub tsua,
    nws qhia kuv ob txhais tes kom txawj ntaus rog,
    kuv ntiv tes kom txawj ntaus tsam.

    Txais:   (1) Thov kom HUAB TAIS nto koob meej, nws yog kuv lub tsua!

    Nws yog kuv qhov chaw nkaum, yog kuv lub yeej ntsa zeb,
    Yog kuv lub loog ruaj nreb, yog tus cawm kuv dim,
    Yog kuv daim leem phiaj, kuv tso siab rau nws ;
    nws rub kuv cov neeg kom los zwm rau kuv.

    Txais:   (1) Thov kom HUAB TAIS nto koob meej, nws yog kuv lub tsua!

    Tswv Ntuj, kuv yuav hu ib zag nkauj tshiab txog koj,
    Kuv yuav ntaus lub thaj cheej kaum txoj hlua cav txog koj.
    Koj yog tus pub kev yeej rau cov vaj,
    Yog tus cawm koj tus tub txib Das Vis ntawm rab ntaj tua neeg.

    Txais:   (1) Thov kom HUAB TAIS nto koob meej, nws yog kuv lub tsua!

    As Les Lus Yas:        LK  19:   38;  2:   14

    Txais:    As les lus yas, as les lus yas.

    Tus Vaj uas Huab Tais xa tuaj nto koob meej.
    Nyob saum cov txheej ntuj siab, Tswv Ntuj nto meej nto moo,
    nyob ntiaj teb, tsoom neeg Tswv Ntuj nyiam nyob thaj yeeb lug.

    Txais:    As les lus yas, as les lus yas.

    Ntawv Moo Zoo:      LK  13:   31-35

    31 Tib lub zim txwm ntawd, ib co Fas Lis Xais txav los hais rau Yes Xus tias : "Koj khiav ntawm no mus, vim Hes Los xav muab koj tua." 32 Yes Xus hais rau lawv tias : "Nej mus hais rau tus hma ntawd tias : ‘Hnub no thiab tag kis, kuv ntiab dab phem thiab kho cov neeg mob, hnub peb, kuv ua kuv txoj hauj lwm kom tiav. 33 Tab sis hnub no, tag kis thiab nag kis, kuv yuav tsum taug kuv txoj kev mus ntxiv, vim tias ib tug yaj saub yuav tuag nyob Yes Lus Xas Les sab nraud tsis tau.’
    34 "Yes Lus Xas Les, Yes Lus Xas Les, koj yog tus muab cov yaj saub tua, koj xuas pob zeb txawb cov uas Ntuj xa tuaj cuag koj. Muaj pes tsawg zaus kuv xav sau koj cov me nyuam xws li ib tug poj qaib sau nws cov me nyuam qaib rau hauv nws ob phab tis, tab sis kojj tsis yeem ! 35 Nyem no, koj lub tsev yuav nphob xuav cia tsis muaj neeg nyob. Kuv hais rau nej tias : nej yuav tsis pom kuv ntxiv mus txog hnub uas nej hais tias : ‘Tus tuaj ntawm Huab Tais lub npe tuaj nto koob meej.’ "



    Last edited by Mim on 18th November 2016, 10:20 am; edited 1 time in total

    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 28th October 2016, 5:38 am

    TIM 28 LUB 10 HLI 2016

    Hnub Rau Lis Piam Peb Caug Nruab Xyoo C Nruab Lis Piam Xyoo II

    Hwm LN Xis Moos thiab LN Yus Das (Jude), Hauv Paus Xa Lus

    Zaj Nyeem Ib: ES FES XOS 2: 19-22


    19 Li ntawd, nej tsis yog ib co pej kum neeg, los ib co qhua ntxiv : nej koom nrog cov ntshiab ua ib cuab, nej yog Tswv Ntuj tsev neeg. 20 Nej yog ib lub tuam tsev txhim rau saum cov Hauv Paus Xa Lus thiab cov Yaj Saub ua taw ntsa, Yes Xus Pleev yog lub pob zeb txheem tas lub tsev. 21 Nyob hauv Leej Pleev, lub tuam tsev sib dhos ruaj thiab hlob ua ib lub tuam tsev teev ntuj ntshiab nyob hauv Huab Tais. 22 Nyob hauv Leej Pleev, nej kuj raug muab nej tsim tsa ua ke ua ib lub tsev rau Tswv Ntuj nyob, nyob hauv Leej Ntuj Plig.

    NPN 19: 2-3, 4-5

    Txais: (5) Lawv lo lus xa moo nrov mus thoob ntiaj teb.

    Cov txheej ntuj saud piav txog Tswv Ntuj lub koob meej,
    lub qab ntuj khwb tshaj cov hauj lwm nws txhais tes tau ua.
    Nruab hnub hais lo lus rau nruab hnub mloog,
    Hmo ntuj qhia rau hmo ntuj paub txog.

    Txais: (5) Lawv lo lus xa moo nrov mus thoob ntiaj teb.

    Tsis muaj ib lo lus los ib zaj lus piav
    Uas leej tib neeg yuav tsis hnov txog.
    Lawv lub suab yeej ncha puv tas ntiaj teb,
    lawv lo lus xa moo yeej nrov txog tim npoo ntuj.

    Txais: (5) Lawv lo lus xa moo nrov mus thoob ntiaj teb.

    As Les Lus Yas - Te Deum

    Txais: As les lus yas, as les lus yas.

    Tswv Ntuj, peb cav txog koj,
    peb tshaj tias koj yog Huab Tais;
    tsoom Hauv Paus Xa Lus uas
    muaj koob meej lawv cav txog koj.

    Txais: As les lus yas, as les lus yas.

    Ntawv Moo Zoo: LK 6: 12-16

    12 Ob peb hnub ntawd, Yes Xus mus teev Ntuj pem roob, nws teev Tswv Ntuj ib hmos. 13 Thaum kaj ntug, nws hu nws cov thwj tim los, nws xaiv kaum ob leeg, nws hu lawv ua Hauv Paus Xa Lus. 14 Yog Xis Moos, uas nws tis npe hu ua Pob Zeb, As Nres, Pob Zeb tus kwv, Yas Kos, Zam, Fis Lis Pos, Npas Tos Los Mas Yos, 15 Mas Tais, Tos Mas, Yas Kos uas yog As Fas Yos tus tub, Xis Moos Siab Kub, 16 Yus Das, Yas Kos tus tub, thiab Yus Das Kas Lis Yaus, uas yog tus ntxeev siab.




    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 28th October 2016, 7:15 am

    TIM 29 LUB 10 HLI 2016

    Hnub Xya Lis Piam Peb Caug Nruab Xyoo C Nruab Lis Piam Xyoo II

    Hwm Niam Mab Liab

    Zaj Nyeem Ib: FIS LIS POS 1: 18-26


    18 Xij peem! Txawm tias muaj tus lam ua zoo sab nraud xwb los muaj tus ua lub siab ncaj tiag, tsuav yog muaj kev tshaj tawm txog Leej Pleev xwb ces kuv zoo siab lawm. Kuv tseem yuav zoo siab mus ntxiv, 19 vim kuv paub tias, tej xwm ntawd yuav pab cawm kuv, vim nej thov Ntuj pab kuv, thiab Yes Xus Pleev lub Tswv Yim yuav pab cuam kuv. 20 Kuv tos ntsoov thiab tso siab tas zog tias: yuav tsis muaj dab tsi ua tau kom kuv poob ntsej muag; kuv yuav muaj lub siab ruaj nreb, thiab zaum no xws li txhia zaus, Leej Pleev yuav nto koob meej nyob hauv kuv lub cev, txawm kuv yuav ciaj los kuv yuav tuag. 21 Ntawm kuv mas kuv saib tias kuv txoj sia yog Leej Pleev, thiab txoj kev tuag tsis yog ib qho poob peev rau kuv. 22 Tsis kav, yog kuv tseem ua neej nyob ntxiv, mas kuv tseem yuav tau ua tej yam hauj lwm uas yuav tawg paj txi txiv ntxiv. Ces kuv tsis paub tias kuv yuav xaiv txoj twg li... 23 Kuv lub siab ua xyem xyav muab kuv dua ua ob sab : ib lub siab ntshaw tso lub neej tseg mus nrog Leej Pleev nyob; qhov ntawd yog qhov kuv nyiam tshaj. 24 Tiam sis, yog kuv ua neej nyob ntxiv, mas yuav zoo dua rau nej. 25 Li ntawd, kuv tsis ua xyem xyav lawm, kuv paub meej tias kuv yuav ua neej nyob ntxiv, yuav nyob ze nej sawv daws pab nej kom nej hlob nce ib kauj ruam ntxiv thiab kom nej zoo siab nyob hauv txoj kev ntseeg, 26 ces thaum kuv rov tuaj nrog nej nyob, nej yuav rov muaj ntsej muag tau kev khav vim kuv, nyob hauv Yes Xus Pleev.

    NPN 42: 2, 3, 5CDEF

    Txais: (3) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.

    Xws li tus kauv nqhis cov dej ntws lug,
    kuv tus ntsuj plig nqhis txog koj, Tswv Ntuj.

    Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.

    Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
    Thaum twg kuv li tau mus pom Tswv Ntuj lub ntsej muag?

    Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.

    kuv mus koom pab neeg coob coob,
    kuv coj lawv taug kev mus pem Tswv Ntuj lub tsev,
    sawv daws qw suab zoo siab thiab cav lus zoo txog nws,
    peb yog ib pab neeg suav tsis txheeb mus nquam paj nraum nruas.

    Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.

    As Les Lus yas: MT 11: 29AB

    Txais: As les lus yas, as les lus yas.

    Nej txais kuv tus quab mus kwv, nej kawm ntawm kuv,
    vim kuv siab zoo, kuv tsis muab hlob

    Txais: As les lus yas, as les lus yas.

    Ntawv Moo Zoo: LK 14: 1, 7-11

    1 Muaj ib hnub Xas Npas Tos, Yes Xus mus noj mov nyob hauv ib tug thawj coj Fas Lis Xais tsev. Cov neeg nyob ntawd nyas ntshis Yes Xus.
    7 Yes Xus hais ib zag paj lug rau cov neeg tuaj noj mov mloog, vim nws pom lawv xaiv thawj cov rooj los zaum. Nws hais tias : 8 "Thaum luag caw koj mus noj tshoob, koj tsis txhob mus zaum thawj cov rooj, tsam luag caw ib tug muaj meej mom dua koj tuaj thiab. 9 Ces tsam tus tswv tsev uas tau caw neb tuaj lam los hais rau koj tias : 'Koj cia qhov chaw kod rau tus no.' Ces koj yuav sawv tus txaj txaj muag mus zaum lub rooj puag nram qab kawg. 10 Thaum luag caw koj, mas koj yuav mus zaum lub rooj puag nram qab, kom thaum tus caw koj los txog, nws hais rau koj tias : 'Npawg, koj nce los pem toj no.' Ces koj yuav tau ntsej muag nyob ntawm cov neeg tuaj nrog koj koom rooj qav xub ntiag. 11 Vim tias tus uas nws tsa nws siab, mas Ntuj yuav txo nws qis, hos tus uas nws txo nws qis, mas Ntuj yuav tsa nws siab."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1644
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II, 2015-2016

    Post  Mim on 30th October 2016, 2:35 pm

    TIM 31 LUB 10 HLI 2016

    Hnub Ob Lis Piam Peb Caug ib Nruab Xyoo C Nruab Lis Piam Xyoo II

    Zaj Nyeem Ib: FIS LIS POS 2: 1-4


    1 Kuv txhib nej tsis tseg kom yog tias nej txawj rov sib txhawb sib nplij nyob hauv Leej Pleev, txawj sib nres nyob hauv txoj kev nyiam, txawj sib koom nyob hauv Leej Tswv Yim, txawj ib leeg hlub ib leeg, ib leeg khuv leej ib leeg lawm, 2 mas xav thov nej ua kom kuv txoj kev zoo siab haj yam loj puv npo tuaj nyob hauv nej txoj kev koom siab koom ntsws: Nej yuav tsum muaj ib lub tswv yim, ib txoj kev nyiam, koom ib lub siab, xav ib yam nkaus xwb. 3 Nej ua yam twg tsis txhob ua raws yus siab xav nkaus, txhob ua kom yus tau koob meej, tiam sis, nej nyias yuav txo nyias hwj chim, yuav saib luag tej loj dua yus. 4 Nej nyias txhob nrhiav yam zoo rau nyias, tiam sis yuav nrhiav yam zoo rau luag.

    NPN 131: 1BCDE, 2, 3

    Txais: Nyob hauv koj, Huab Tais, kuv nrhiav tau txoj kev kaj lug.

    HUAB TAIS, kuv lub siab tsis khav theeb,
    kuv tsis tsa hau siab los ntsia luag.
    Kuv tsis nrhiav tej yam loj nto koob meej,
    los tej yam tob uas kuv lub tswv yim tsis duav.

    Txais: Nyob hauv koj, Huab Tais, kuv nrhiav tau txoj kev kaj lug.

    Kuv cia kuv tus plig nyob thaj yeeb ntsiag to
    zoo li tus me nyuam khooj rau nws niam.
    Kuv tus plig nyob hauv kuv
    zoo li tus me nyuam nyob hauv nws niam xub ntiag.

    Txais: Nyob hauv koj, Huab Tais, kuv nrhiav tau txoj kev kaj lug.

    His Xas Lais, koj tso siab rau HUAB TAIS,
    txij nyem no mus tas ib txhiab ib txhis.

    Txais: Nyob hauv koj, Huab Tais, kuv nrhiav tau txoj kev kaj lug.

    As Les Lus Yas: ZAM 8: 31B-32

    Txais: As les lus yas, as les lus yas.

    Huab Tais hais tias: “Yog nej nyob nraim hauv kuv lo lus,
    mas nej yog kuv cov thwj tim tiag, thiab nej yuav paub qhov tseeb."

    Txais: As les lus yas, as les lus yas.

    Ntawv Moo Zoo: LK 14: 12-14

    12 Yes Xus tseem hais rau tus Fas Lis Xais uas caw nws tuaj noj mov tias : "Thaum koj npaj ib roog su los ib roog hmo, koj txhob nqua hu koj cov phooj ywg, los koj cov kwv tij, los neej tsa, los cov neeg nplua nuj uas nyob ze koj, tsam lawv ho caw koj thiab pauj koj rooj nqaij rooj hno rov rau koj. 13 Thaum koj ua ib roog qav, koj nqua hu cov pluag, cov tu tes tu taw, cov ceg tawv, cov dig muag. 14 Koj txoj hmoov yuav zoo, vim lawv tsis muaj dab tsi pauj rau koj. Yog Ntuj yuav pauj rau koj thaum cov neeg siab ncaj sawv rov los."




    Sponsored content

    Re: COV ZAJ NYEEM NRUAB LIS PIAM XYOO II, 2015-2016

    Post  Sponsored content Today at 12:52 pm


      Current date/time is 3rd December 2016, 12:52 pm