HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


Thoj Zoov Ntsuab tau txais Txiaj Ntsim Empty

Latest topics

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Maiv Tooj Yesterday at 11:22 pm

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

Suav neeg tuaj saib, txij hnub 17/09/2010 los mus.


    Thoj Zoov Ntsuab tau txais Txiaj Ntsim

    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    Thoj Zoov Ntsuab tau txais Txiaj Ntsim Empty Thoj Zoov Ntsuab tau txais Txiaj Ntsim

    Post  Maiv Tooj 7th August 2010, 8:51 am


    Yuav tsum ua siab tawv



    Kuv yog Zoov Ntsuab Thoj,
    kuv yug xyoo 1918 nyob teb chaws Los Tsuas.
    Ua ntej 1975 kuv ua Hau Zos  nyob lub zos Naj Haus ( Naj Nkos) ,
    xeev Luam Naj Thas, Nplog teb.

    PAUB NTAU YAM

    Yus lub neej hmoob kev neej kev tsav dav dav li. Kuv thiaj tau mus kawm khawv koob ntau  yam kom ho tau los pab tej kwv tij neej tsa sawv daws thaum luag huab vam txog.
    Kuv paub khawv koob ntau yam kawg :

    - Khwav koob ua dab zoo
    - Khawv koob nqa tooj nqa hlau
    - Khwav koob nqa yias
    - Khawv koob hwj huam yees ntxwv hu laj sim sawv

    Cov khawm koob hu laj sim sawv no mas yog cov khawv koob uas TSUAG ROJ. Zaj khawv koob no mas yog ua kom thaum yus tsuag roj mas tsuas muaj kub mus lawm xwb kom txhob kub yus.

    Ntwam zaj nqa yias ; yus muab dej rau hauv ib lub yias, muab rhaub kom dej npau npau lub yias liab ploog. Yus ua khawv koob hu kiag yus cov dab kom lawv nqa dej txiag tuaj rau hauv lub yias ntawd. Ua li no tag yus ntaus kuam tias : « ua li kuv nqa puas tau lub yias ntawd ? ». yog kuam qhib plho tias : « koj nqa tau xwb ». ces yus muab kiag peb nyuag daim txiaj ntawv coj los tiag lub yias, txawm  lub yias liab ploog los yus nqa yeej tsis ua cas, yus nqa kiag los mus ncig tus mob peb lwm mam rov nqa mus txawb rau saum lub xab cum (kos). Hais txog ntawm khawv koob mas tsuas tshuav khawv koob yaim hlau liab ploog kuv thiaj tseem ua tsis tau tau.

    Muaj tej tus mob uas raug dab poj ntxoog cov txiv neeb tsis kam kho lawm, kuv tseem kam mus kho. Thaum raug dab poj ntxoog li no yus yuav tau hais zaj khawv koob tias :
    « nej cov dab kav tsij txav kev deb tsam kuv rab riam vwm no tuaj tua nej, txiav nej caj dab, nej taub hau poob hauv pem teb ces nej yuav tsis tau los rau yaj ceeb no ».

    mas tej mob no tej thaum yus ua khawv koob kho ku muaj tus zoo lawm kuj muaj tus tsis zoo thiab. Muaj tej tug mob mas muaj kab mob nyob hauv lub cev. Yus Hmoob tsis paub ces pheej ua khawv koob ua neeb kho tag zog, kho kho los niag mob nws tseem tuag lawm thiab piv xam :
    nyob tim hav zoov muaj tej hom yoov tom mas tsis ua cas tab sis muaj tej hom yoov tom mas muab kab mob rau hauv tus neeg ntawd lub ces lawm, tus neeg ntawd muaj mob tuaj lawm ces pheej ua neeb kho xwb ua ua los tus neeg ntawd kuj cia li tuag lawm thiab. Kuv xav xog li no kuv thiaj li ho mus kawm kom paub tshuaj hmoob ; kim npaum li cas txawm raug ib ob choj nyiag los kuv yij kawm li. Hais txog ntawm tej mob uas kuv muab tshuaj kho zoo mas tsis txog pua los txog caum lawm.

    HNOV LUB NPE


    Peb Hmoob ua neej tau ntau txhiab ntau xyoo ntau txheej ntau tiam neeg puag pem Suav teb los. Peb tsuas paub tias muaj lub ntuj, muaj thooj av thiab muaj txoj sia xwb. Peb tsis paub tias yog leej twg ua tus tsim ntuj tsim teb thiab muab txoj sia rau peb kom peb ua taus neeg.
    Txog rau thaj tsam xyoo 1940 ntawm, muaj ib cov Suav Tuam Tshoj tuaj muag khoom txog rau ntawm peb zos ; lawv thiaj hais tias :  « nyob pem Tuam Tshoj teb muaj ib cov hu ua –Yes Xus- no mas lawv siab zoo kawg thiab txawj kho mob kho nkeeg kawg ». peb kuj tsis paub tias xyov Yes Xus yog dab tsi thiab nws lub neej zoo li cas.Txij li 1950 tawm rov saum thiaj hnov tuaj txog ib cheeb tsam ntawm Luam Naj Thas uas peb nyob  . Thaum ntej mas peb tsuas hu lawv ua Yes Cus no xwb, tom  qab no thiaj mam pab tias yuav tsum hu ua Txiv plig los yog  Khoun Pho (lus Nplog) no.

    SIB NTSIB THAWJ ZAUG[…………………….

    Muaj ib hnub kuv thiaj li coj tau kuv tus nthais Zuag thiab tus dab laug tuaj mus thov tshuaj pem Luam Naj Thas. Txiv Plig Vaj Pov thiab nug kuv tias :
    - « koj yog Hmoob los yog Co ? »
    Kuv teb tias : « kuv yog Hmoob ».
    -« Ua li koj nyob hnub tuaj los hnub, nyob ntawm txoj kev mus Huab Xais ».
    hais li no tag ces ob peb hnub txiv plig thiaj tuaj ntsib peb ntawm peb zos.


    PIB TXAIS NTUJ LUS

    Xyoo 1957 peb pib txais Ntuj Lus, tso kev teev dab , xwm kab,  dab roog, nyuj dab tej ntawd pov tseg tag. Thaum peb kawm Ntuj kev cai no mas, kawm kawm ces muaj ib txhia siab me cia li rov mus ua dab lawm.
    Dab mas lawb tag tab sis yus niam yus txiv mas tsis lawb, rau qhov yus yeej paub tias lawv mus nrog Yes Xus nyob xwb. Thaum uas yus paub Huab Tais Ntuj tsis zoo heev mas yus siab kuj tseem me. Zoo li nyob hauv Luam Naj Thas yog Nplog liaj Nplog av xwb no ces peb niam thiab txiv yuav tsum hla tus dej mus ua teb lawm puag tim Phus Tauj Phub thiaj muaj teb ua. Hla tus nyuag dej no xwb tseem muaj mob muaj tuag lawm thiab. Kuv tuag kiag ib tug muam rau tim teb. Muaj ib cov Hmoob Xyooj mas hla tus dej no xwb lawv tias dab tom lawv no lawv ntshai kiag tsis mus ua teb tid li lawm.
    Tom qab no Kwv Txhoob mus luaj tag ib daig teb rau tid thiab ces Kwv Txhoob tuag tuag lawv cia li tso daim teb ntawd tseg.

    Txij thaum peb coj kev cai ntuj tag lawm kuv tus muam hlob, kuv tus kwv thiab kuv tij laug lawv tias :
    “Ab!! Peb ua kev cai ntuj tag lawm ces peb nqa tshuaj, peb nqis lawm nram chaw qis, mus ua teb noj lawm nrad qoob loo thiaj zoo”.

    Thaum ntawd kuv me nyuam kuv coob thiab kuv txawm coj kev cai ntuj lawm los kuv tseem siab yau, kuv thiaj tsis nrog lawv mus. Thaum ntawd txiv plig nrog nraim lawv leej twg ua npaws muab tshuaj kiag rau noj los yog muab tsuaj txhaj kiag rau. Lawm mus ua tau nplej thiab pob kws mas zoo zoo tas kev dho li. Xyoo tom qab kuv thiaj nqis mus thiab (qhov uas Hmoob mus chaw nqis es Hmoob rov los txog pem toj siab Hmoob pheej mob mob cia li tuag lawm. Qhov no peb twb sau tawm rau hauv xov xwm Ntseeg Ntuj Sib Fi Txuj tsab 11 ntawm yawg Tsuj Xyooj Yaj cov lus teb. Nws tub hais tias thaum txiv plig Nyuaj Pov mus txog rau peb Roob Nyuj Qus, txiv plig hais rau Hmoob hais tias mus chaw nqis ces raug cos yoov tshaj cum uas muaj kav npaws nyob hauv tom. Rov los txog tsev Hmoob tsis muaj tshuaj tua kav npaws noj, mob mob ces kawg tuag xwb, zoo li no Hmoob txawm pheej hais tias mus chaw qis raug dab tom).

    Nyob nram qhov chaw peb mus ua teb muaj ib tug dej tawm plaws ntawm ib lub qab pob tsuas los, muaj ib tsob xyoob Puj Tswm txawm kiag hauv tus dej qhov chaw txhawv ntawd thiab. Mas muaj muaj ntses ntawm qhov dej txhawv ntawd kawg. Peb mus txog peb muab kiag thaj tsam ib puag ncig ntawd sab tim ub tim no luaj kiag ua teb pov kws. Peb mus ntes cov nteses ntawm dej txhawv ntawd los noj thiab mus txiav tsob niag xyoob los ua tsev. Daum (Pub Thawj tuaj pom peb ua li ntwad, Daum thiaj hais tias : “Aub!! Ua cas nej ho muaj cuab kav hla tus dej mus ua teb rau sab tid, mus txiav tsob xyoob hauv thiab txhom cov ntses los noj. Peb li mas twb tsis muaj cuab kav hla tus dej no li”. Daum xav xav , Daum thiaj hais tias: “Lawv twb txiav txiav lawm peb kuj txiav mus ua tsev thiab!” Daum muab txiav tag, Daum mob mob, Daum tuag ib phaum, Daum ua neeb saib thiaj tias tim yog mus txiav tsob xyoob; ces Daum thiaj li nqa tau ib niag npua dawb tuaj txoj ntawm peb zos, coj tuaj txi dab.

    TUS TSIAJ DAB TSI?

    Lawv cov xub mus, lawv mus luaj teb pem toj nram hav tag. Lawv tshwj qhov nyuag nruab nrab ho tsis ua, qhov ntawd mas niag ntxhab ntxhab thiab muaj muaj ncaug li. Kuv thiaj lam ua rau qhov tsis muaj lwm qhov lawm. Kuv thiaj mus luaj thiab ua tau tsev teb rau tim teb (Thaj chaw uas Txiv Plig coj peb mus nyob nov mas yog txoj kev thaum ub Mab tuaj tuaj mus ev ntsev pem Suav teb los noj. Tuaj  so ntawm thaj chaw nov mas cov Mab uas lawv hnav ris tsho dub tsis ua cas. Tab sis cov hnav dawb, zoo li hnav lub thoov thoov (daim tiab) dawb, tsho dawb es tuaj pw ntawm thaj chaw no tsawg zaus los tsov yeej tom ib tug xwb xwb li. Mab hais li no rau peb).

    Kuv mus ua tau tsev rau tim teb thiab pw tid ua teb; cov tij laug thiab cov kwv thiaj hais tias: “Teb chaws no luag cav cav tias niag qus qus li mas koj rov los pw tim zos no es peb mam sib pauv zog luaj xwb”. Cov kwv thiab cov tij laug mas txawm peb coj kev cai Ntuj lawm los lawv siab tseem me. Kuv thiaj teb lawv tias: “Luag hais tias ua kev cai Ntuj lawm ces Ntuj pov hwm yus lawm mas cia txhob ntshai, yuav mus pw tim teb ua teb thiab yuav zov yij.”  Rau qhov tias teb chaws ntawd mas muaj muaj yij, muaj mos lwj, , muaj mauj kauv. Yus nkag kiag  mus tim hav zoov mas tej tsiaj qus nyob pawg lug ntawm tej li. Thaum ntawd muaj kuv thiab kuv ob tug tub, Tswv yaj Thoj thiab Neeb Thoj, nkaws tseem yau, kuv tus ntxhais Ntxhi, niam Xib Hwb Txhiaj Tawb Hawj kuj tiav me nyuam hluas nkauj lawm thiab.

    Kuv tus vauv Nom Phaj tus ntxhais ntsuag ho raws peb mus pw tim teb thiab; mus ua tsev pheeb suab nplooj tsawb pw. Muaj tej thaum yus los txog ntawm tsev pheeb suab tsis muaj neeg nyob ntawd, yus hnov khiav rig ruag rau sab nraum qaum tsev los yog sab tsev uas  yus tsis  pom; khiav mus xyuas xauj kuj tsis muaj dab tsi li , kuj ua rau yus plaub hau xob vog. Tej thaum yus luaj teb los hnov khiav los hnov khiav rig ruag li leej tib neeg ntawm tej qab ke, yus xam kuj tsis pom dab tsi, txhua zaus kuj ua rau yus plaub hau xob. Tej yam li hais nov mas kuv tus ntxhais Ntxhi kuj nrog kuv hnov thiab.

    Nyob nyob cas yoov cia li nteg qe ntau ntau rau peb tej pam, Ntxhi (Zoov Ntsuab tus ntxhais hlob) duav siv yoov kuj nteg tej thooj tej thooj qe rau hauv thiab, muaj ib txhia twb daug ua me nyuam kas lawm. Raws li tej laus luag hais tias yog zoo li nov mas yog txwv yawm txwv koob tsis pub peb ua thaj teb no. Cov tij laug thiab cov kwv nrog rau kuv tus muam ntxawm hais rau kuv kom kuv txhob ua daim teb ntawd es muab tso pov tseg. Txawm tias peb ua Ntuj Kev Cai lawm los yus kuj tsis paub thiab. Kuv thiaj teb lawv tias:

    “Peb yuav tsum ua siab loj siab tawv, peb kawm nyob hauv Ntawv Moo Zoo twb hais tias dab phem yuav muab tej yam nyob ze ze peb coj los ntxias peb kom peb rov zwm rau Dab. Thiab peb twb hnov hais hauv Ntawv Moo Zoo tias:

    ***Thaum Leej tswv Yim coj Huab Tais Yes Xus mus rau teb chaws suab puam, cia dab phem tuaj ntxias Yes Xus. Yes Xus yoo mov tau 40 hnub 40 hmo tag nws tshaib plab heev. Tus Niag ntxias neeg tuaj ze Yes Xus hais rau Yes Xus tias: “Seb koj yog Tswv Ntuj Leej Tub tiag no koj sim kpm cov pob zeb nov txia ua mov seb!”  Yes Xus teb rau Dab Phem tias:
    “Ntawv sau muaj tseg tias: Neeg tsis kawg muab mov los yug siav xwb, neeg tseem yuav cov lo lus tawm ntawm Tswv Ntuj lub qhov ncauj los yug siav thiab. Dab Phem tseem coj Yes Xus mus txog lub Tsheej tshiab, tso Yes Xus rau puam saum lub ruv tuam teev Ntuj, nws hais rau Yes Xus tias:
    “ Yog koj yog Tswv Ntuj leej Tub tiag no koj dhia lawm hauv av seb! Vim Ntawv sau tseg tias: Ntuj yuav txhib cov Tshiab nqa koj nyob hauv lawv txhais tes, tsis cia koj dawm pob zeb li.
     Yes Xus teb rau Dab Phem hais tias:
    Koj yuav tsis txhob ntxias koj tus Huab tais Tswv Ntuj”. Thiab dab Phem tseem ntxias ntau yam ntxiv…”

    LUB CAIJ HLAWV TEB

    Hlawv teb tag, kuv mus ua ib lub tsev teb rau tim teb, cov kwv tij rov hais rau kuv tias:
    “Teb chaws no luag yeej cav cav tau ob peb tiam los no lawm tias muaj muaj tsov thiab tsov tom tom neeg li, ces koj txhob mus pw tim teb es rov los pw tim no. Peb sawv daws mam sib pab pauv zog ua teb xwb.”
    Kuv thiaj teb lawv tias:
    “Ab rov los tim tsev no los pheej mus mus los los, thaum los ces twb yuav tsum los ntxov tim teb los, thaum mus los mus txog tim teb ces twb lig lawm thiab ces twb ua tsis qeg teb. Poj niam me nyuam los tseem nyob puag pem qub zog Npam naj Xees thiab ces cia ua teb tsuag tsuag tsos yuav xav mov thiab ub no coj mus rau poj niam me nyuam noj.”
    Lub caij cog plej, thaum no kuv tus maum dev yug tau ob tug me nyuam; ib tug txaij hos ib tug dawb. Nyob nyob tej thaum peb tseem tab tom noj mov los yog nyuam qhuav noj  hmo tag los yog nyuam qhuav nce chaw pw ua cas cov niam tub aub tom huas pes dhawv ntawm tej. Yug muab teeb tsom tsis pom dab tsi li. Muaj qee zaud mas dev caum caum dua puag tim tej hav zoov lawm dev mam rov los.
    Txog lub caij dob nplej, peb cov txiv tub rov mus pw tim teb dob nplej. Mas cov niam tub dev kuj pheej caum li qub thiab tab sis mas yus kuj ua siab loj heev. Muaj ib hnub kuv tus ntxhais Ntxhi txawm hais rau kuv tias:
    “ Cas nag hmo muaj ib tug dab tsi los tsuj kuv, tsuj zoo nkaus li ib tug me nyuam yaus. Tsuj nyhav pes zog, nyhav pes zog nram ko taw los rau pem kuv duav, kvu ntshai ntshai ces kuv cia li hu txog Leej txiv, Leej Tub thiab Leej Ntuj Plig lub npe thov pab kuv. Hu li no tag kuv cia li nti tau kiag tam sim ntawd. Mas ntshai heev tsis tau luag, peb yuav tsum tsis txhob pw ntawm no lawm.”
    Kuv thiaj teb tias:
    “Txhob xav dab tsi, txhob ntshai, koj tsis paub xwb, yog nas tsuag xwb os!!!”
    Tiag tiag mas kuv yeej paub tias tsis yog nas tsuag tab sis kuv lam hais li kom tus me nyuam txhob ntshai ntshai xwb . Nws thiaj rov hais kuv tias: “ Ab! Ntshe tsis yog nas tsuag rau qhov kuv mloog mas tsuj nyhav li tus me nyuam yaus diab os!!!
    Txhua txhua hmo ua ntej peb yuav pw, peb yeej teev Ntuj ua tag peb mam pw. Kuv tus ntxhais hais li ntawd rau kuv tag, ua cas hmo tom qab txawm los tsuj kiag kuv ntag. Kuv hnov los tsuj ib yam nkaus li Ntxhi hais tsuj Ntxhi ntag. Thaum nws los tsuj kuv ntawd mas yus yeej hnov ntsoov, rua muag ntsi yeej pom cub tawg liab pliv ntawd tab sis nti tsis taus li. Kuv thiaj hu txog Leej txiv, Leej Tub thiab Leej Ntuj Plig thov pab, kuv hu hauv siab xwb rau qhov hais tias yus yeej tsa tsis taus tes los ua lub Cim Ntoo Cuam li lawm. Hu li no tag nrho kuv thiaj nti tau, kuv tib tsaug taw tam sim ntawd ces kuv pab niag niam tub aub mam tom huam dhawv ntawm qhov rooj, lawv muab caum caum rau puag tim hav zoov lawm.
    Hmo peb  ua ntej peb yuav pw,  peb kuj teev Ntuj tib yam li thiab. Kuv thiaj li thov hauv kuv lub siab tsis pub rau cov me nyuam hnov tias:
    “Hlob yog Ntuj hlob, Huab Tais Tswv Ntuj! Koj yog tus muaj hwj chim tas nrho, yog koj muab txim rau leej twg mas nws yuav tsum txais, yog koj pab leej twg mas nws yuav tsum noj qab nyob zoo, nyob kaj nyob huv. Hmo no mas kuv paub meej tias tus dab phem no yuav los zes peb, yuav los ua tej yam tsis zoo rau peb. Thov koj tso koj cov Tshiab tuaj pov hwm peb, tuaj tua kom tau tus dab phem thiab muab txim rau nws kom nws txhob los zes peb ntxiv lawm.”
    Tej zaud nej cov tub tshaj Ntuj Lus los yog lwm tus yuav hais tias kuv lam hais. Tab sis nyob hauv kuv mas kuv tsis dag Ntuj ib zaug nawb. Kuv yeej nco ntsoov tias kuv tau thov thiab lub ntuj tau pab kuv los lawm.
    Hmo ntawd kuv thov Ntuj nyob hauv kuv lub siab tag ces peb teev Peb Txiv nyob saum Ntuj, teev peb caug lub Saw Mab Liab thiab teev zaj Leej Ntuj Plig. Thov Ntuj li no tag peb pw, hmo ntawd tsis hnov aub tom, tsis ua npau suav dab tsi li. Tab sis tiag tiag mas aub twb tom kiag hauv peb qab txag rau nram kwj ha los peb yeej tsis hnov li. Hais tau hais tias Huab Tais Ntuj muab nws lub hwj chim tuaj roos peb thiab nws muab txim rau tus dab phem ntawd lawm. Taig kis ntawd peb sawv los, kuv tus ntxhais ho ua dab tub nkeeg ( ua npaws) tom thawj thiab. Kuv thiaj hais rau nws tias:
    “Me ntxhais koj tsis zoo nyob ces koj pw koj es cia peb mus ua teb xwb. Mus ua teb ib ntsis los tso kuv mam coj koj rov  lawm tim zos, mus thov tshuaj rau koj”.
    Hnub ntawd peb mus dob nplej lawm, Ntxhi pw nram tsev teb. Pw pw twb yuav tav su nws txawm tias:
    “Ab! Kuv twb nquag me ntsis lawm ces sawv mus kwv dej los ua su tos kuv vaim lawv (vaim= leej txivlus Hmoob Dub) ».
    Peb tseem tab tom ua teb txog puag pem luag teb, cas Ntxhiv txawm hu nram tsev tuaj tias :
    « Vaim aw !!!! Tsis tau luag os !!!Xyov dab tsi tom tau ib niag dab tsi nram qaum cav os !!! »
    Peb thiaj khiav khiav mus txog, ua cas peb niam tub dev twb muab nws caum los pem peb qab txag los mus, nplej mas pib lov kiag ntawm qab tsev mus rau puag nrad. Kuv ho ntov tau ib tug ntoo loj loj vau rau nrad ces mus txog nrad yav cav uas kuv ntov ntawd nws hla tsis dhau ces peb niam tub aub muab nws mos  rau ntawd mas thaj tsam ntawm qaum cav ntawd nplej cia li lov ti nkaus npoo av, hlob tsis taus li lawm. Dev muab tom tuag rau ntawd mas ob tug me nyuam dev yeej zov rawv, tsuav yus mus ze zog tus tsiaj ntawd mas ob tug me nyuam dev yeej xob xob plaub li ntag.
    Tus tsiaj uas dev muab tom tuag ntawd mas kuv kuj zeem tsis tseeb thiab, xyov tus tsiaj dab tsi, tsis tau pom dua ib tug tsiaj zoo li ntawd. Kuv thiaj tso me nyuam mus hu kuv tij laug tus tub….?, kuv tus kwv thiab kuv tus vauv Nom Phaj lawv nram qab teb los pab xyuas. Lawv los txog tus yuav hais li cas los muaj. Ib txhia hais tias:
    -“Yog mab lee”
    Kuv tias tsis yog Mab Lee, Mab Lee mas kuv twb tua tau ntau zaus lawm, tus ko tw ntev ntev, tus no tsi muaj ko tw.
    -“Yog liab npog muag”
    Tsis yog liab npog muag, liab npog muag mas txaij peb kab ntawm caj qaum thiab tssi ntev li no, tus nov mas duav ntev ntev li nyaj tab kuj tsis yog nyaj thiab. Nej sim ua zoo zoo saib mas, ob lub qhov muag ntsug lug tsawv, nws zaum zaum ob sab pob tw ua kaub puab tag, tsis muaj tus stiaj twg thooj nws li tiag.
    -Kawg yog liab npog muag xwb!
    -Nej hais tias yog liab npog muag, kuv kuj hais tias yog liab npog muag. Tab sis nyob hauv kuv siab mas tsis yog , yog ib yam tsiaj uas txawj los ua tej yam dab tsi  rau neeg. Kuv thiaj txiav tau plaub txhais tes taw cia; tab sis kuv niam tij ho thov ces muab ob txhais rau nws lawm tshuav ob txhais xwb.


    ZOO TSHUAJ


    Thaum peb los txog Thaib teb, lawv ib tug poj niam Hmoob Ham, nws yog nkauj Hmoob Yaj,  mob mob lawv kuj kho ntau yam kawg ua neeb los ua ntau kawg lawm, kho khawv koob los kuj kho ntau kawg lawm thiab los nws yeej tsis zoo li. Kuv los txog, nws tus txiv thiaj tuaj thov kuv. Nws tus txiv hais tias:
    “Koj paub dab tsi los pab lauj! Rau qhov tias neeb los ua kawg kev lawm, tshuaj los kuj txhaj kawg kev lawm. Thaum tej zej zog tuaj nyob coob leej no mas nws kuj pw twj ywm thiab; tab sis lawv rov mus tsev tag lawm mas nws yeej tshawb hauv ncoo, tshawb txaj nyooj pes laws yuav nce phab ntsa tsev li ub li no.”
    Kuv thiaj mus xyuas kiah seb mob li cas. Muaj tej xeem Hmoob mas lawv mob dab nplooj los yog mob Tsov, cov mob no mas tus mob ntawd ob lub qhov muag ci ci, hos xam qhov twg los zoo li nws pheej ntshai ntshai neeg. Kuv thiaj hais rau tus Hmoob ntawd hais tias:
    “Tsis yog kuv tsis muab, kuv yeej muab tab sis mas hais tag nrho lus rau koj, kuv qhov tshuaj tshuav me me lawm xwb kuv muab rau tus mob yog tsis zoo ces kuv yuav nqe tsawg me ntsis, hos yog zoo mas kuv yuav 5 mas txiaj nawb.”
    Nws thiaj teb kuv tias: “ Koj muab rau es zoo ces kuv mam them ntag txhob poob siab tus txiv ntxawm.”
    Kuv thiaj muab ob txhais tes tsiaj uas kuv txiav los cia ntawd txhoov ib qho coj mus tsau dej rau tus mob haus,  thiab kuv xaws ib lub hnab muab cov tshuaj tso rau hauv, kuv nyiag coj mus dai rau. Taig kis tom qab xwb tus niam Hmoob Ham bntawd twb sawv taus los tu me nyuam, mus ev dej, nws cia li zoo txij ntawd los li lawm.
    Hais ncaj qha tias tus tsiaj uas kuv cov niam tub dev muab tom tuaj es kuv txiav tau ob txhais tes taw los nov yog poj ntxoog ntag.
    Hais rau nej cov nyeem sawv daws tias peb ua siab loj mas peb yeej dab phem thiab yeej yeej tag ib puas tsav yam. Niaj hnub no kuv nyob Fab Kis teb, txhua txhua hnub chiv ( Sunday) kuv mus Mis Xas nram tsev teev Ntuj, mus hlawv ib tug tswm ciab thov Ntuj raws li siab xav.

    LUB TXIAJ NTSIM

    Xyoo 1962 peb tawg rog Luam Nab Tha ( Nplog teb) los rau tim Thaib teb. Muaj 12 tug Thaib muab peb yuam rau hauv nkoj, hauv Niam Dej Naj Khoos; lawv yuav tua peb txawm yuav tua peb xwb xwb li. Thaum ntawd peb muaj 4 leeg Hmoob nrog cov Thaib nyob hauv lub nkoj. Muaj ib tug Hmoob Muas, ib tug Hmoob Lauj, ib tug Hmoob Yaj thiab kuv. Tus Hmoob Yaj npe hu ua Txiaj Xyum, niaj hnub no nws nyob rau USA. Txiaj Xyum Yaj thiab kuv wb coj Ntuj Kev Cai lawm, hos tus Hmoob Muas thiab tus Hmoob Lauj coj qub kev cai ( Coj Dab).
    Nkawd li ces nkawd fiv yeem raws qub kev cai, hos wb li wb thov Ntuj xwb. Kuv thiaj thov Niam Mab Liab tias:
    “Niam Mab Liab, thov koj dauv muag los ntsia peb, thov koj Leej Tub thiab peb Txiv Tswv Ntuj nyob saum Ntuj tso Leej Ntuj Plig los nplij cov Tub Rog Thaib ntawd kom lawv txhob tua peb; rau qhov lawv hem tias peb nyuam qhuav los tim Nplog teb los mas peb yog Hmoob Liab ( Koom Tshas=Communiste), lawv thiaj yuav tua peb xwb xwb li.”
    Thaum ntawd tus Hmoob Lauj nws kuj muaj ib tug ” kaus npua”, nws fiv yeem tag nws kuj hais tias:
    “Kuv yeem muab ib yam dab tsi rau cov nom tswv ntawd, thov lub Ntuj pab tiag tiag kom lawv txhob tua peb.”
    Thaum ntawd ho muaj ob tug Thaib mus ntau ntses sab tim Nplog. Cov Thaib hauv nkoj txawm hu tias:
    -Neb ntaus puas tau ntses ¿
    Nkawd teb tias : Wb ntau tau thiab.
    Yawg thawj coj thiaj hais tias kom yawg tsav nkoj tig lub nkoj lawm tid. Peb mus txog sab tim Nplog, ob niaj ntaus ntses hais rau cov hauv nkoj tias :
    -Nej yog nom yog tswv, wb tsis muag rau nej, muab ob peb tug nov pub nej coj mus noj xwb. »
    Yawg  thawj coj txawm muab cov ntses coj los yaug yaug  hauv dej, nws hais rau ob yawg ntaus ntses tias :
    -Ib ntsis yog peb tso ntses los mus mas neb txhob khaws ntses, neb xav yuav khoom ces neb khaws khoom xwb. »
    Hais li ntawd tag ces peb haj yam ntshai heev lawm. Kuv thiaj pe kiag niam Mab Liab hais tias :
    -Niam Mab Liab ! Koj thov Peb Txiv Tswv Ntuj nyob saum Ntuj, Hlob yog NWS Hlob, Nws pub dab tsi mas peb yuav zoo siab txais dab tsi. Thov nws cawm peb 4 txoj sia no mas kuv yuav nco Ntuj 10 lo lus qhia mus tag sim neej thiab mus txog chaw thaum twg kuv yuav ua ib tsum mov hu sawv daws tuaj teev Ntuj ua Ntuj tsaug.

    Peb lub nkoj tig los rau sab tim Thaib, ces lub tshuab nkoj pheej tuag tuag, mus zoj ib pliag tuag, mus zoj ib pliag tuag, yawg tsav nkoj mas tsuas ib sij rib, ib sij rub xwb. Lawv txawm cem peb hais tias :
    - Tim muaj nej 4 tug nyuag Khos Mus Niv nyob hauv peb lub nkoj, peb lub nkoj thiaj tuag tuag ; txawm nej mus rau Thaib teb los nej yuav mus ua phem rau peb teb chaws xwb. Peb yuav muab nej tua, saib nej yeem xuas riam nkaug los xuas phom tua ?
    Lawv hais li ntawd tag ces kuv thiaj sawv tseem los txhos caug rau ntawm tus thawj coj xub ntiag, thov nws hais tias :
    -Thov nej txhob tua peb, peb 4 leeg nov yeej tsis xav tuag, peb tsis yog Khos Mus Niv, txawm yog peb tsis nyiam Khos Mus Niv peb thiaj khiav qhov chaw kub los rau qhov chaw txias, yuav los vam nej lub teb chaws txais peb, vam nej ua peb nom peb tswv. Peb twb tsis txhaum qhov twg, tsis muaj ib npej nyiaj ( npaj=Baht nyiaj Thaib lub npe), ib npau kub li mas nej yuav tua peb ua dab tsi ? Peb txawm yuav tuag los cia peb mus tuag rau ntawm nej tej nom tej tswv xub ntiag. Peb yuav los no, nej tej nom tej tswv yeej paub tag, As Mes Liv Kas (America) yeej paub tag, luag tuaj nyob rawv tim chaw nres nkojtos yuav them nqes nkoj rau nej xwb.
    Thaum yus thov Ntuj tag, Ntuj ua yus lub sia loj tuaj, hais qhov twg los yus yeej tsis ntshai, hais tau yus cov lus tib cov muaj muaj nqes xwb.
    Yawg  Thaib ntawd thiaj nug tias:
    -Ua li koj puas muaj kwv tij?
    Kuv teb tias:
    -Muaj 5 leeg kwv tij thiab poj niam me nyuam nrog tej txheeb ze, ze ntawm ob puas  tawm leej nyob pem Tseeb Khoos ( Chieng Khong), nyob hauv nej lub Tsev Txais Neeg Tawg Rog. Mas nej tus Loj kav thaj tsam ntawd puav leej paub peb tig si. Peb yuav rov los rau teb chaws Nplog los yeej yog lawv kom peb los peb thiaj los.”
    Thaum nov ces nws nthaug zog lawm ntag, nws txawm hais ib nyuag los tsuag tsuag tias:
    -Nej cov nyuag Khos Mus Niv no txawm tsis xav tuag li los yeej yuav tau tuag li las as!
    Peb los ib pliag pem toj, tus Hmoob Lauj thiaj rho hlo nws tus Kaus Npua cev kiag rau rus Thawj Coj Thaib hais tias:
    -Me Yaus tsis muaj nyiaj, tsis muaj kub, Me yaus tsis yog neeg ua lag ua luam, yog neeg tawg tsov tawg nrog yuav los mus nrhiav zej nrhiav zos hauv nej lub teb chaws nyob. Me Yaus tsis muaj dab tsi, Me Yaus tsuas muab tus Kaus Npua ( Kaus Npuas pov haum) nov rau koj ua hlob. Koj coj mus kom tau nrog luag ua Nom ua Tswv. Tsuas muaj kom tau tus loj zuj zus mus ntxiv lawm yav tom ntej, mas thov nej txhob tua peb xwb lauj!!!”
    Tus Yawg Thaib thiaj teb tias:
    -Peb tsis yuav laiv!
    Tus Hmoob tias:
    -Thov yuav xwb xwb, vim peb tsis muaj dab tsi tiag tiag uas yuav muab rau nej. Txawm nej tua peb los tua neeg tuag qhuav qhuav xwb, es nej ho pheej yuav tua peb ua dab tsi? Peb poj niam me nyuam puav leej nyob pem Tseeb Khoos tib si.
    Thaim tau tus Kaus Npuas lawm ces Thaib thiaj tshoj peb los rau Thaib teb.

    CUAG DAG

    Ua ntej sawv daws yuav tawg teb chaws xyoo 1975 ntawd, kuv tus tub Tsav Yaj Thoj ua Xib Hwb qhia ntawv nyob Huab Xais, kuv yog Hau Zos nyob lub zos Naj Nkos, Xeev Luam Naj Thas.
    Nplog Liab yuab ntes wb ob txiv tub, vim muaj neeg kom wb. Wb mus nyob hav zoov xwb, tab sis wb kuj teev Ntuj heev kawg. Wb khiav mus hla tus dej loj loj, Tsav Yaj mas nws txawj ua luam dej, nws muab wb cov khoom xa hla dhau dej tag ces nws los tuav kuv tes. Kuv mas tsis txawj ua luam dej yog poob deg ces kawg tuag xwb. Wb ob txiv tub sib tuav tes txog ntua hauv nruab nrab dej, ces dej tib ntsawg kuv ko taw ntab plaws, kuv tsuas nco hu tias: “Ntuj laud! Pab lauj!” Cas zoo li muaj ib lub pob zeb los tiag nkaus kuv ko taw lawm ntag….
    Tej zaud lwm tus yuav xav hais tias kuv dag, tab sis Ntuj pab tau yus ntau zaus dhau lawm mas zoo siab dhau thiaj muab tshaj rau sawv daws paub.
    Txoj kev tso siab, txoj kev ntseeg nyob hauv kuv mas loj heev dhau, tas ib puas tsav yam kuv tso siab rau Huab tais Ntuj lub xtiaj ntsim lawm xwb….



    Tus sau: Thoj Zoov Ntsuab
    Hmoob Npam Naj Xees, Los tsuas teb
    Fab Kis teb, lub 1hlis 1991


    Thoj Zoov Ntsuab tau txais Txiaj Ntsim Thoj_z10

    Sab lauj rau xis: See, Zuag, Neeb, Lig, Paj, Zoov Ntsuab, Yaj Xeeb, Vaj Yig, Xis, Mab Muas thiab Kos.

      Current date/time is 28th March 2024, 8:09 am