Paj huam piv txoj lug

Maiv Tooj wrote:

Yaj Tsuj Xyooj
	1985

Twb tau ntev cim tuaj ntau xyoo los kuv yeej tsis nrog nej tshaj ntaub mus sib fim
Es ho thuav ntawv los isb soo, es ho yuav nrog leej hlob los tus yau,
ho yuav nug tus hluas los tus laus yuav nug leej kwv npawg,
Ho yuav nug lawm leej pog los tus yawg, seb peb puas muaj ib lo lus qheb phiaj.
Ais puas muaj ib lo lus yuav rhawv kab, tho txoj kev rau peb mus.
Kuv hais rau cov tub los cov hluas, peb tshaj ntaub thuav ntawv, peb nrhiav dab tsi?

Ua li tej laus piv txoj lug:

Txawm ntau thiab tsawg los peb muab ua cuaj phab thiab yim phau
Peb tshaj cuaj phab mus cuaj txoj kab,
puas muaj peb phab txais lub tswv yim ncab,
ais ho yuav chaws tau lub ntiaj teb nruab nrab,
es ho yuav coj peb nce txoj hauv kab.
Peb yuav nthuav yim phau mus ua yim txoj kev,
seb puas muaj peb phau mus txog lub laj fab,
lub tswv yim ntev as yuav coj peb mus nce txoj hauv kev,
ais yuav mus txog rau ntswg liaj ncab ntsw iav ntev,
yuav mus tsim vaj los rhawv tsev.
Tsim ib phab kaum yam, kom ciaj zog yuav tshwm plaws lub ntiaj teb,
nruab nrog,mas lub laj lim plab plaw yeej zoo hlo.
Tej hluas thiab cov yawg, peb yuav tshaj pes tsawg fab,
quas pes tsawg tsem li teb ntaub, faj xeeb kais ntawv.
Ntawv faj lem yuav faj lub neej tom qub qab,
yog tias peb tseem ua ntawv faj lem yuav tsis loj,
mas twb paub ntiaj teb neeg lub txhoj.
Yog tias peb tseem ua ntawv seeb, mas yuav tsis tau,
peb twb paub ntiaj teb neeg lub keeb, thiab pom ntiaj teb neeg lub txhaum.
Peb npaj siab puas tsim nuj,
yog tsim nuj mas peb yeej yuav poo tau luag lub tswv yim yuj tuaj mus saum ntuj.
Peb teeb saib puas tsim nqe,
yog tsim nqe mas peb yeej poo tau luag lub laj fab tswv yim uas luag yuav nce tuaj mus saum hli.
Peb yuav npaj lub laj lim plab plaw los ntsim cov lus tawv thiab lus txaum.
Nyob hauv peb cov lus mas muaj lus txeej lus txuas,
yog tias peb nrhiav peb lo lus los ua tswg, los coj mas peb thiaj yuav tsim tau npoj.
Yog tias peb muab peb los lus ua tswg,
los kav mas peb thiaj yuav cais tau peb cov lus txawv thiab lus txuam txav.
Hais rau ib tsoom niam txiv kwv tij neej tsa, tsoom phooj ywg sawv daws.
Tej laus piv txoj lug tias:
Txoj cai nyias ntsai xws nplooj yeeb, yeej zeem tsis tseeb yog dab tsi?
Tej laus piv txoj lug tias:
Txoj ntug cai sub plias xws nplooj tauj ais, tsis muaj leej twg los zeem tau yuav. Txoj cai thiab txoj ntug yog peb lo lus xwb. Ib yuav noj, ob yuav ua, peb yuav tas ntiaj teb neeg muab peb lo lus los ua txoj cai thiab txoj ntug, leej hlob los tus yau yeej hla tsis dhau. Tus txawm siab thiab qis los yeej dhia tsis dim.

Tus sau: Yaj tsuj Xyooj
Xov xwm Ntseeg Ntuj si Fi Txuj
Fab Kis teb, Tim 9 lub 2 hlis 1985.

Mim,...Kuv muab zaj nov tshwj xeeb rau koj os...

Maiv Tooj wrote:

UA NEEG NYOB...

Ua neej nyob nyias huas nyias siav siab fab xeeb tias yuav npaj neej khov kho Thiaj rau siab ntso kom kawg tssi qhia leej twg Txhawj ntshai ruj rwg tsam khaws tau txoj kev pluag Ces caum tsis cuag tus muaj ntsej los muaj txiag Yog tsis kam tiag tsam txaj muag yuav tuag tiag Nim tso tub ntxhais mus nrhiav txuj seb puas tau Nrog luag yuav zauv seb ib hnub puas txawj plhis Ua luam hais nqi khiav khuav tag hnub tsis nrug Tus nkees ua plhu nyiag luag tias:"khwv tau os lawv!" Muaj plaub ntug sawv thov txwj laus hais nrog tsuam Ntshai nkuaj ntshaw luam cia haus yeeb tias zoo tshuaj Tub ntxhais tus ras tsim nkauj hu suab seev yees Laus hluas hnub nkees tau muab los mloog nplij plawv Tus txawj tes taw cev kho phim ntsej rau muag Zeej tsoom nrog qhuas loj me puav leej paub txhua Tus tsis txawj vuag xawb tshuaj lob cawv deev siab Tsis tsheej tsis kiab tej laus txhawj tssi tag rau Ua neeg ntsiag to ib txhia lub neej twb ntsa Tus ywj siab pla txwj nkawm saib dua lub neej Tus txhawj txhua yeej nrhiav kev koom siab thooj ntsws Muaj phooj muaj ywg sib txhim kho luag lub neej Hawm ntuj hwm neeg tsuav yug tu hlob muaj npe Poj koob yawm ntse cim nws npe cia hwm neeg. Thoj Qhua Xab Castres, Fab Kis teb Xov xwm Ntseeg Ntuj sib fi txuj Lub 12hli 1999.