Keeb Kwm Hmoob mus nyob Guyane

Nyob zoo os tais Tooj thiab tag nrhov cov phooj ywg txhua tus,
Hais txog cov Hmoob uas xyoo 1977 mas tsis muaj ib tug kuv yuav tsis paub li tsuas yog cov me nyuam uas lub caij ntawd tseem me mas kuv thiaj nco tsis tau lawm.
Yog nej xav kom kuv qhia cov neeg nyob hauv cov duab los tau kawg tsuas yog tus ua pom tsis tseeb los yog tsis pom lub ntsej muag mas kuv kuj yuav qhia tsis tau.
Thov txim tam sis no kuv tseem npaj yuav thaij 3-4 daim duab txiv lwm tsib thiab ib hom txiv ntxiv uas thaum ub Guyane teb yeej tsis muaj, cia thaum kuv npaj tau kuv mam qhia rau nej ov !
Ib qho ntxiv: tus uas tau piav txog txiv lwm tsib mas tej zaum ntev dhau lawm nws nco tsis tshua zoo ces nws tau piav yuam kev me ntsis lawm, kuv mam rov piav dua kom ntxaws.
Vam tias nej sawv daws yuav zoo siab tos saib thiaj mloog.
Sis ntsib dua.

Y.Suav Nus

Nyob zoo tais Tooj thiab tag nrho cov phooj ywg,
Yog yuav tham txog kev cog qoob loo nyob Guyane mas yeej muaj ntau zaj tab sis hnub no kuv tsuas muab ib co txiv ntoo uas nej yeej paub lawm los tham laug lub sij hawm. Cov txiv no kuv xav tias yeej muaj nyob tas qhov txhia chaw.
Cov txiv no muaj nyob tas qhov txhia chaw ua cas kuv ho muab los tham ?
Vim lub teb chaws Guyane yeej tsis muaj neeg yuav muaj peev xwm cog tau cov txiv no kom txi tau noj los yog coj mus muag rau nruab kiab nruab khw li, tab yog ib tug neeg Fab Kis uas nyob Fab Kis teb twb cog dua cov txiv no lawm los nws yeej tsis muaj peev xwm yuav cog kom tau cov txiv no coj mus muag thiab.

Yog tias siv cov txuj uas kawm tawm hauv tsev qhia cog txiv xwb mas tsuas cog tau saib xwb yeej tsis tau muag, li ntawd Hmoob thiaj siv Hmoob lub peev xwm thiab lub zog los ntxiv kev kawm ces thaum kawg Hmoob thiaj tau txais txiaj ntsim. Hmoob lub peev xwm thiab lub zog no mas qhia tsis tau. Yog koj tuaj nyob Guyane lawm mas Hmoob thiaj kam qhia rau koj.

Caw koj saib ob peb daim duab no:

Cov phooj ywg yog nej leej twg muaj sij hawm no thov pab tais Tooj muab kuv cov duab no kho kom loj los me, kuv tsis paub li kuv yeej kho tsis tau kom loj los me. Ua tsaug.
Lwm lub lis piam kuv yuav tham txog "txiv lwm tsib"

Y.Suav Nus

Txiv Suav Nus,


haum koj ua parourir tag, koj copy kab N°2 koj daim duab thiaj loj. Nov yog koj copy thawj kab, koj cov duab thiaj me me li nov. Seb Maypaj puas khoom tuaj kho ua ntej, tsis li ib tsam tsaus ntuj kuv mam tuaj kho rau.

Hais txog keeb kwm cov txiv kab ntxwv, koj tsis tham qhov npog zais kev cog los tsis ua cas, yog txoj cai tseev txhawm. Tab sis koj tham keeb kwm hauv paus hauv ntsis uas cov txiv nov tuaj txog rau Guyane teb puas tau?
Yog koj tsis tham dab tsi li ces ntev mus tej yam txiaj ntsim uas Hmoob ua tau coj mus tsim lub Guyane teb los ua ib lub teb chaws muaj noj muaj haus xws niaj no no yuav ploj nrog huab nrog cua mus xwb. Vim li cas luag lwm hais neeg thiaj vam meej taus, vim luag tso tshav lug, leej twg xav siv, xav paub ywj siab nkiag tes npliag. Thiab tseem tshaj tawm tsis tseg kom deev neeg siab, yus hais neeg thiaj yuav tsis txia ua ib haiv neeg tub nkeeg. Ntawm qhov Secret uas muab dab tsi los txuas rau sab tsi, koj tsuas hais tias peb muab txuas hom ntoo ntxim peb cov huab cua no xwb, tsuas xav tau qhov keeb kwm li kuv tham txog txiv lwm tsib es koj tias kuv tham tau yuam kev me ntsis lawm no. Peb sau tseg, tsis yog peb yuav sau kom ib tug tub liaj tub teb muab tau coj mus siv. Peb tsuas tham keeb kwm Hmoob txoj kev zoo kev muaj peev xwm kom tau khaws ua puav pheej tseg xwb.

Nyob zoo XH Npuag Tub thiab tag nrho cov phooj ywg txhua tus,
Kuv teb raws li koj los lus nug:
Cov txiv kab ntxwv no mas xam thaum ua tus yub mus txog thau txi yuav siv sij hawm 5 xyoos.
Thaum pib txi mus txog rau thaum tuag yog 10 xyoo.
Thaum pib ua yub mus txog rau thaum tuag mas yog 15 xyoos.
Nyob hauv 1 xyoos mas cov txiv no txi 2 phaum yam li: lub 2 hlis thiab 3 hlis siav ib phaum thiab lub 9 hli thiab 10 hli siav ib phaum. Lub teb chaws Guyane txhib qoob loo zoo kawg.
Cov txiv no yog tias ua twb zoo tu kom zoo mas yuav qab zib heev, tus neeg uas tuaj yuav mas yog nws tau saj lawm ces nws tsis nco khuv xim nyiaj thiab hla tsis dhau li, nws yuav tsum yuav xwb xwb ntag !
Raws li kuv nco tau nyob thaib teb thiab lwm teb chaws mas ib xyoos tsuas txiv ib phaum xwb.
Sib ntsib dua lwm zaus.

Y.Suav Nus

Npuag Tub wrote:

TXIV KAB NTXWV NYOB CACAO, GUYANE, FRANCE.

Cov txiv kab ntxwv no mas xam thaum ua tus yub
mus txog thau txi yuav siv sij hawm 5 xyoos.
Thaum pib txi mus txog rau thaum tuag yog 10 xyoo.
Thaum pib ua yub mus txog rau thaum tuag mas yog 15 xyoos.
Nyob hauv 1 xyoos mas cov txiv no txi 2 phaum yam li:
lub 2 hlis thiab 3 hlis siav ib phaum thiab lub 9 hli thiab 10 hli siav ib phaum.
Lub teb chaws Guyane txhib qoob loo zoo kawg.
Cov txiv no yog tias ua twb zoo tu kom zoo mas yuav qab zib heev,
tus neeg uas tuaj yuav mas yog nws tau saj lawm ces nws tsis nco khuv xim nyiaj
thiab hla tsis dhau li, nws yuav tsum yuav xwb xwb ntag !

Nyob zoo os , Tij laug suav nus , Thiab XH NpuagTub ,

Wow !! ua li cas Neb yuav tham tau lom zem ua luaj li os , neb tseem qa tau cov duab txiv kab ntxwv ntxim qab ua luaj no tuaj rau peb saib os , Ua li puas qab thiab ua li cas ntxim noj ua luaj li os yuad ! , Teb chaws nkws yas no qoob loo zoo tiag tiag li os , Es ua li lub caij no twb muaj cov txiv no siav lawm lod , Zoo li nws kuj tseem no heev li thiab as nyob rau teb chaws av loj no nas , Ua tsaug os tij laug suav nus ua koj tseem qhia rau peb hais tias lub teb chaws nkwsyas no kuj xis nyob kawg li thiab qoob loo los kuj tseem zoo kawg li thiab no os txawm peb yuav tuaj tsis txog los peb twb ho tau pom lawm thiab no os . Ua tsaug os mog .

Maivxis .

Ua tsaug Suav Nus koj tseem qhia txog Hmoob Guyane txoj kev thoob tsib tsim txiv hmab txiv ntoo, thov kom tom ntej no tuaj mus Hmoob Guyane tsuas muaj tsim ntau thiab zoo zuj zus mus ntxiv, tseem tshuav ntau tsav ntau yam Hmoob Guyane yuav nrhiav tau zoo tshaj qub tuaj, thov kom Tswv Ntuj foom hmoov zoo rau peb haiv Hmoob nyob Guyane kom ua dab tsi los tau raws li siab xav.

Hmoob twb tsim tau muaj txiv lwm tsib nyob teb chaws Guyane lawm, zaum no tseem tsim tau txiv kab txws ntxiv thiab mas yog ib yam zoo kawg nkaus uas yog Hmoob tug. Kuv xav mas Hmoob txhob tos yuav muaj teb muaj chaw ntxiv lawm, yog xav kom muaj zej muaj zos hmoob li yav ntuj qub qab dhau los uas nyob los tsuas teb ces tsuas yog peb haiv Hmoob Guyane lawm xwb thiab tsim tau muaj Hmoob ntiag tug tiag tiag .

Ua tsaug ntau ntau nawb Suav Nus, muaj dab tsi zoo tham tuaj pub peb mloog thiab nawb mog.

Npuag Tub wrote:MX,

Hais txog cov txiv kab ntxwv (orange) nyob teb chaws Cacao, Guyane mas kuv kuj tsis tau mus pom thiab tiam sis raws li D. Suav Nus tau sau hais hauv no mas ( yog tus neeg twg tau noj lawm mas nws yeej tso tsis tau tseg li, yog thaum twg mus txog ntawm khw muag cov txiv kab ntxwv no mas yuav tsum yuav noj xwb thiaj tas). Qhov no txhais tias yeej qab zib kawg li lawm tiag, nyob rau Mevkuj teb tim peb no mas kuj pom muaj muag nyob rau tom tej kiab khw thiab tiam sis peb yuav los noj mas tsis qab qib pes tsawg, cov txiv kab ntxwv loj tseem qab zib dua cov txiv kab ntxwv Asia ntawd.

XH , NpuagTub ,Koj hais yog lawm los mas yuad ! ! tab sis kuv tseem xav hais tias ua li es thaum mus txog ntawm khw lawm yuav tsum yuav xwb no es ua li yog zoo nkauj heev los puas yog qab zib heev li ma lod !! kuv lam tso dag xwb os txhob xav li cas ,
Oh es ua li txiv kab ntxwv Memkuj tsis qab zib los cov uas yog Asia li na los , Es puas yog nws tsis haum cov av ntawd ma los , Los puas yog nyias muaj nyias hom ne yom , Es thiaj li tsis qab zib sib xws os lod , puas yog zoo li teb chaws
California ntawd kod muaj ntau yam txiv kawg thiab na los ,

Maivxis .

Nyob zoo Maiv Xis thiab XH Npuag Tub,
Kuv thov nrog neb txuas ob lo lus nawb !
Cov txiv kab ntxwv kuv tham peb hu raws Fab Kis ua Madarine tsis yog Orange; kuv twb tau hais tias yog ua zoo tu mas qab zib kawg.
XH Npuag Tub hais tias qab zib tsem tsawv, yog lawm vim cov txiv tuaj deb tuaj thiab luag twb de lub txiv ua ntej thaum lub txiv yuav siav kom thaum tuaj txog ntawm qhov chaw muag tab tom siav, los yog luag siv ib co tshuaj txhib kom cov txiv ua ib txhij siav ces lub txiv laus thiab mos thiaj siav tib txhij ua rau kom neeg saib mas raug qhov muag kawg, tab sis saj no tsis tsua qab zib. Kuv tham li no vam tias neb yuav to taub zoo.
Sib ntsib dua lwm zaus.

Y.Suav Nus

Nyob zoo cov phooj ywg,
Hnub no kuv tham txog txiv lwm tsib (Ramboutan), vam tias tej lub caij nej tsis muaj dab tsi ua nej yuav nyeem kuv zaj no kom lub hnub txhob ntev ntev, yog tias qhov twg kuv ho tham tau tsis haum siab los kuv xub thov nej zam lub txim nawb ! Kuv tham tas nej leej twg xav muab ua dab neeg hais los tau.

Yaj Tsheej uas yog Hmoob thoj nam nyob lub yeej thoj nam Soptuang Thaib teb, tuaj rau teb chaws Guyane lub zos Cacao xyoo 1977.

Xyoo 1982 yaj Tsheej nqa ib co txiv lwm tsib mus pub rau txiv plig Neej Vaj saj nws hais rau txiv plig Neej Vaj tias:

"txiv plig koj saj saib puas qab."

- Tam sis ntawd txiv plig saj thiab hais tias qab kawg koj muab cov txiv no qhov twg los ?
- puas yog koj nqa noob tim thaib tuaj cog ?
- Yaj Tsheej thiaj teb tias tsis yog li koj xav, cia kuv mam piav rau koj mloog:
"3 xyoos dhau los kuv tau tuaj kom koj pab kuv ua ntawv thaum ntawd yog tav su, kuv tuaj txog mas nej tam tom noj su tas thiab nej tseem mus tham dua lwm chav lawm kuv pom lub rooj nej noj mov tsis tau ntsaig ces muaj ib co plhaub txiv lwm tsib thiab ib co noob uas nej noj tas nej muaj tso rau saum rooj. Thaum ntawd tsis muab neeg nyob hauv chav noj mov li kuv thiaj nyiag tau 5 lub noob ntsaws rau hauv hnab ris, kuv thiaj coj 5 lub noob ntawd los ua yub... Muaj 3 lub noob tuaj tau 3 tug yub hos tshuav 2 lub tsis tuaj, kuv muab hlib xyuas no yog lwj lawm. Kuv coj 3 tug yub mus cog rau 3 qho chaw: ib tug coj mus cog rau hauv daim teb zaub, ib tug coj mus cog rau thaj teb uas yuav npaj cog txiv ntoo, tshuav ib tug ces kuv muab cog rau ntawm tog tsev. Tus yub cog rau hauv daim teb zaub ces kuv poj niam tsis paub thaum nws mus luaj nroj nws muab luaj raug thiab tuag lawm, tus yub kuv cog ntawm tog tsev ces kuv xav kom hlob zoo kuv rau me ntsis chiv thiab niaj hnub ywg dej rau ces nws cia li tuag lawm thiab; tshuav tus yub uas coj mus cog rau thaj teb yuav npaj cog txiv ntoo...kuv mus xov vaj ncig kom poj niam me nyuam txhoj txhob raug thiab kuv mus dob cov nroj tuaj ncig lub hauv paus; kuv tsis siv chiv thiab tshuaj tua nroj tsis ywg dej li vim kuv ntshai tsam kuv tsob txiv tuag... Kuv tu li ntawd los tau 3 xyoo mas xyoo no txi tau cov txiv no yog thawj phaum... Zaum no siav lawm kuv thiaj nqa ob peb lub tuaj rau koj saj..."





Nyob Guyane muaj 2 lub zos Hmoob loj dua cov yam li Cacao thiab Javouhey, cov txiv lwm tsib nyob Cacao qab dua cov nyob Javouhey. Ntshai koj xav nug tias yog vim li cas cov txiv lwm tsib nyob Cacao ho qab dua cov nyob Javouhey ?
Lo lus teb: nyob Cacao teb chaws ua toj roob, thiab tseem yog teb chaws toj siab me ntsis, huab cua txias dua Javouhey, av daj, av liab, toj roob av yog av quav tshis.
Nyob Javouhey teb tiag, teb chaws chaw qis huab cua sov cov teb tiag feem ntau yog av xuav ntau (yam li av suab puam) tej toj roob kuj yog av daj thiab.

Txiv lwm tsib taum cog mus txog thaum tuag yuav yog pes tsawg xyoo ne ?
Los lus teb: Raws li Hmoob tau mus nrhiav paub nyob rau thaib teb yog txawj tu mas yuav nyob mus txog 90 xyoo (koj yog tus cog yuav kav tam ib sim neej).
Nyob Cacao mas txhua txhua xyoo Hmoob muab ib hnub hauv lub caij txiv lwm tsib siav los ua lub HMOOV txiv lwm tsib (fête du Ramboutan).
Kuv twb thaij tau ib co dua thaum ua hmoov txiv lwm tsib, cov phooj ywg ! yog nej muaj tus xav kom kuv tham thiab tso daim puav duab rau nej saib no 2 hnub tom ntej no ntxiv kuv mam tuaj tham rau nej mloog.
Hnub no kuv nrog nej tham li no xwb peb mam sis ntsib dua lwm hnub.

Y.Suav Nus

D. Suav Nus,

Wow.......! Cas nej cov txiv lwm ntsib yuav txi ncw ua luaj li.. Lawv e.......nej xav li cas os thaum nej pom peb Hmoob lub peev xwm txawj ntse zoo li no?
Kuv mas nyiam noj hom txiv lwm ntsib no kawg, nyob tim USA no mas kim heev yuav tsis taus noj li, lam yuav ob peb kis lus los noj kom zoo siab xwb. Hom txiv lwm ntsib no mas noj qab tau laj siab tshaj lwm hom txiv. Ua tsuag rau koj cov duab coj tuaj tso rau peb tau pom nawv D. Suav Nus.

Nyob zoo cov phooj ywg,
Ua tsaug rau koj tej kev tshaj lij uas tau pab kuv kho tej qhov uas kuv tso tau tsis zoo thiab txua tej qhov kom zoo nkauj nawb !
Thov txim uas kuv tsis tuav koj npe vim kuv tsis paus koj yog leej twg ! ntseeg tias koj yog cov ua tau pab dua kuv los lawm.

Tseem tshuav ib qho kuv xav nug nej sawv daws, raws li kuv saib mas muaj ntau daim duab tsis hais cov kuv tso los cov Maib Tooj tso mas muaj tej daim tsuas pom ib nrab xwb thiab lwm zaus los yog lwm hnub kuv rov tuaj xyuas no daim duab uas zaum tas lawd pom ib nrab ho pom tag nrho lawm thiab daim uas zau tag lawd pom tag daim duab ho pom tsis tag lawm, tsis tag li ntawd xwb zoo li tej daim duab mas tsis pom tshwm li. Kuv xav tias ntshai yog kub pc rub (télécharger) tsis tau kom tas thiaj li zoo li ntawd.

Y.Suav Nus