Mim wrote:Nyob zoo sawv daws,
hnub no kuv yuav tuaj tso ib zaj kwm huam uas tau muaj tiag txog lub txiaj Mab liab Miraculeuse. Zaj no qhia ntau yam txog peb txoj kev ntseeg Kas Tos Liv. Tej zaum peb yeej paub txog tej yam ntawd tiam sis peb twb tsi rau nqe rau tej yam ntawd pes tsawg. Zaj no yuav qhia rau peb tias peb txoj kev ntseeg Kas Tos Liv muaj nqes tiag thiab Niam mab Liab pab tau peb tiag.Claude Newman thiab lub txiaj Mab Liab Miraculeuse.
Claude Newman yog ib tug neeg dub raug kaw nyob nkuaj xyoo 1944, vim nws tau tua nws yawg tshiab.
Nws yug los tim 1 lub 12 hlis 1923 nyob lub zos Stuttgart, xeev Arkansas. Nws txiv hu ua Willie Newman, nws niam hu ua Floretta Young. Xyoo 1928, nws txiv coj nws thiab nws tus tij laug nkawd mus nrog nkawd pog, Ellen Newman, nyob hauv lub zos Bovina, xeev Mississippi.
Xyoo 1939, nws pog txawm yuav tau ib tug txiv tshiab hu ua Sid Cook. Tsis ntev xwb ces tus yawg tshiab ntawd txawm pib ua phem phem rau nws pog, ua rau Claude npau taws heev. Xyoo 1940, Claude pib mus ua zog nyob hauv thaj teb (plantation) uas nws yawg tshiab yug los thiab ua zog thiab. Kuj muaj neeg tau sau tseg tias Claude yuav poj niam xyoo ntawd, thaum nws muaj 17 xyoo. (Tiam sis peb tsis paub txog nws poj niam li, thaib xyov puas muaj tseeb.)
Xyoo 1942, lub 12 hlis tim 19, Claude txawm mus nyas nws yawg Sid Cook tom nws tsev. Thaum Sid Cook tab tom nkag los tsev, Claude xuas phom tua Sid Cook tuag kiag ntawd, nws nqa Sid Cook cov nyiaj, ces nws cia li khiav mus nrog nws niam nyob nyob tom Little Rock, xeev Arkansas. Nws mus txog tod tim 20 lub 12 hlis.
Thaum lub 1 hlis 1943, tub ceev xwm ntes tau Claude nyob Arizona thiab coj nws rov los rau Vicksburg, Mississippi. Lawv nrhiav tau kev ua kom nws lees tias nws tau tua nws yawg Sid. Ces lub rooj txiav txim txiav tias nws yuav tsum tuag raug hluav taws xob hlawv (electric chair). Lawv muab teem rau lub 5 hlis tim 14, 1943. Nws tus lawyer ua ntawv thov kom rov qab qhib ib lub rooj txiav txim tshiab rau Claude, tiam sis cov nom txiav txim tsis kam. Lawv muab Claude lub caij tuag hloov must so rau lub 1 hlis tim 20, 1944 xwb.
Lub caij nws nyob hauv nkuaj tos txog hnub lawv yuav coj nws mus hlawv, nws nyob hauv ib chav nkuaj uas tseem muaj 4 leeg ntxiv nrog nws. Muaj ib hmos lawv 5 leeg txawm sib tham, ces Claude txawm pom ib lub txiaj Mab Liab uas dai ntawm ib tug hluas caj dab. Nws txawm nug tus hluas tias lub txiaj ntawd yog dab tsi. Tus hluas ntawd yog ib tug Kas Tos Liv, tiam sis nws twb tsis paub dab tsi txog lub txiaj uas nws coj li, ces nws txawm txaj muag thiab npau taws, nws hle hlo txoj saw nrog lub txiaj pov rhees hauv av rau ntawm Claude ko taw, nws tseem hais ib co lus phem nrog, thiab nws hais rau Claude tias kom nws yuav “qhov niag ntawd.” Claude txawm mus khaws nkaus lub txiaj Mab Liab, muab saib saib tas, txawm muab coj ntawm caj dab. Nws yeej tsis paub tias yog dab tsi li, nws tsuas xav tias yog ib yam yus coj zoo saib no xwb.
Hmo ntawd thaum nws pw tsaug zog, nws hnov dab tsi chwv nws lub qij teg, ces nws ceeb ib plhaw tsim dheev los. Nws txawm pom ib tug poj niam ci ci zoo nkauj tshaj tas txhua tus poj niam, sawv ntawd. Nws txawm pib ntshai, tiam sis tus poj niam hais rau nws tias:
“Yog koj xav kom kuv ua koj niam thiab koj xav ua kuv tus me nyuam, mas koj yuav hu ib tug txiv plig hauv Koom Txoos Kas Tos Liv tuaj.”
Tus poj niam hais li tas xwb, nws cia li ploj ntais lawm. Ces Claude cia li qw nrov nrov tias “Dab os! Dab os!” thiab nws qw tias kom hu ib tug txiv plig tuaj.
Thaum sawv ntxov lawv thiaj hu tau txiv plig Robert O’Leary SVD (1911-1984) tuaj. Nws yog tus uas piav zaj kwv huam no. Txiv plig tuaj txog, nws mus saib Claude, Claude txawm piav tas puas tsav yam tshwm sim tuaj thaum hmo ntuj. Ces nws thiab lawv plaub leeg nyob hauv nws chav txawm thov tias lawv xav kawm kev ntseeg. Hnub tom qab, txiv plig rov tuaj thiab nqa ntawv tuaj yuav pib qhia kev cai rau lawv. Ces nws mam pom tias Claude tsis paub nyeem ib tug ntawv li. Yog nws pom muaj duab, ces nws mam paub tias tog twg thiaj tsis yog tog rov xwb. Vim nws tsis tau mus kawm ntawv kiag li, thiab nws yeej tsis tau hnov hais txog HT Yes Xus yog Tswv Ntuj tus Tub li. Ces nws thiab nws cov phooj ywg thiaj pib kawm kev ntseeg.
Ob peb hnub tom qab, muaj ob tug leej phauj nyob hauv TP O’Leary lub tsev kawm ntawv txawm tuaj thov tso cai rau nkawd tuaj hauv lub nkuaj kaw neeg, vim nkawd xav ntsib Claude, thiab nkawd xav tuaj ntsib cov poj niam raug kaw thiab. Tsis ntev tom qab ces ob tug leej phauj txawm tau kev tuaj pib qhia kev ntseeg rau cov poj nuiam nyob txheej ob saud.
Lawv kawm li no tau ob peb lis piam lawm. Ces TP O’Leary txawm npaj yuav qhia txog lub Cim Daws Txhaum rau lawv. Hnub ntawd ob tug leej phauj kuj tuaj nyob ntawd mloog thiab. Txiv plig txawm pib hais rau lawv tias:
“Hnub no, kuv yuav qhia txog lub Cim Daws Txhaum rau nej.”
Claude teb ntua tias:
“Aub kuv twb paub txog tias yog li cas lawm thiab! Tus Poj Niam qhia rau kuv tias thaum peb mus daws txhaum, mas peb tsis yog txhos caug ntawm ib tug txiv plig, hos yog peb txhos caug ntawm nws Leej Tub tus Ntoo Cuam no. Thiab yog peb tu siab tiag tiag rau peb cov txhaum thiab peb lees peb cov txhaum, mas Yes Xus cov ntshav ntws los rau saum peb, los ntxuav peb cov txhaum pov tseg tas nrho.”
TP O’Leary thiab ob tug leej phauj txawm ceeb tag, lawv nyob ntawd rua ncauj u tsis paub hais dab tsi. Claude xav tias ntshai yog lawv npau taws, nws txawm hais tias:
“Thov nej txhob npau taws, thov nej txhob npau taws. Kuv tsis tau xav tias yuav hais li ntawd.”
TP thiaj teb tias: “Peb tsis npau taws, yog peb ceeb xwb. Koj tau rov pom tus Poj Niam dua lod?”
Claude teb tias: “Nws tuaj thaum kuv tawm ntawm kuv chav mus sab nraud, thaum tsis muaj neeg nrog kuv.”
Ces TP O’Leary thiaj qhia ntxiv txog lub Cim Daws Txhaum rau lawv sawv daws. Claude hais rau nws cov phooj ywg tias:
“Nej tsis txhob ntshai mus daws txhaum. Nej tsis yog hais nej cov txhaum rau txiv plig, nej hais rau Tswv Ntuj.”
Claude kuj tseem hais li no:
“Tus Poj Niam hais tias mus daws txhaum mas yog zoo li lub xov tooj (telephone). Peb hais lus rau Tswv Ntuj peb siv txiv plig, hos Tswv Ntuj hais lus rau peb, nws kuj siv txiv plig thiab.”
Thaum Claude thiab TP nkawd ob leeg lawm xwb, Claude hais rau TP tias:
“Tus Poj Niam hais rau kuv tias yog koj tsis ntseeg kuv ces kom kuv hais rau koj tias thaum 1940, koj pw nkaum hauv kwj qhov taub nyob Holland, koj tau cog ib lo lus rau nws lawm. Niaj hnub no nws tseem tos tias koj yuav ua raws li koj tau cog lus no.” Ces Claude qhia rau TP tias nws tau cog lus li cas lawm.
Ces TP O’Leary thiaj paub meej meej tias Claude tsis dag, nws yeej pom Niam Mab Liab tiag. TP qhov kev cog lus yog li no: thaum nws npaj tau lawm mas nws yuav tsa ib lub tsev teev ntuj hwm Niam Mab Liab xeeb los tsis lo lub keeb txhaum. Xyoo 1945, TP raug hloov los rau Clarksdale, Mississippi. Nyob ntawd muaj ib pab neeg ntseeg Kas Tos Liv dub thov kom tsa ib lub tsev teev ntuj rau lawv. Ces xyoo 1947, TP O’Leary thiab nws tus Tswv Qhia thiaj tsa ib tsev teev ntuj hwm Niam Mab Liab tsis lo lub keeb txhaum (Church of Immaculate Conception) rau ntawd. Niaj hnub no tseem nyob.
Ib lub lis piam tom qab, TP O’Leary npaj yuav qhia txog lub Cim Yug rau lawv. Ob tug leej phauj kuj tuaj mloog thiab. Claude nug txiv plig tias tus Poj Niam kuj qhia txog qhov ntawd rau nws lawm thiab, ua li nws piav puas tau qhov tus Poj Niam hais. TP Teb ntua tias kom kav tsij hais, ces Claude thiaj pib hais:
“Tus Poj Niam hais tias thaum peb mus txais Yes Xus lub Cev, mas peb tsuas pom ib qho mov ci xwb, tiam sis qhov ntawd yeej yog nws leej Tub tiag tiag. Nws yuav los nyob hauv peb ib yam li thaud nws nyob hauv tus Poj Niam ua ntej nws yug los nyob Npes Les Hes. Tus Poj Niam hais tias kom kuv yuav tsum siv kuv lub sij hawm zoo li thaud nws siv nws sim neej nrog nws tus Tub nyob, yog siv los nyiam Nws, hawm Nws, ua Nws tsaug, qhuas txog Nws, thiab thov txiaj ntsim koob hmoov ntawm Nws. Kom kuv tsis txhob muab lwm tus neeg los lwm yam coj los xav txog, tiam sis kom kuv siv kuv lub sij hawm li ob peb feeb los xav txog Nw(Yes Xus) nkaus nkaus xwb.”
Lawv kawm tau ntau lub lis piam, ces thaum lawv kawm tas lawm, Claude thiab nws ob peb tug phooj ywg txais lub Cim Ntxuav thiab los ua neeg ntseeg Kas Tos Liv. Tsis ntev kiag tom qab, txawm txog lub caij uas lawv yuav los coj Claude mus zaum hauv lub rooj uas lawv yuav tso hluav taws xob hlawv nws. Lawv teem lub caij rau thaum ib tag hmo 12 teev mus 5, lub 1 hlis tim 20, 1944.
Hmo ntawd, tus thawj tub ceev xwm (sheriff) los hais rau Claude tias:
“Claude, koj muaj cai yuav thov ib yam tshwj xeeb ua zaum kawg. Koj yuav yuav dab tsi?”
Claude teb tias:
“Kuv cov phooj ywg sawv daws ntsoos tas tus. Tus saib lub nkuaj no los nws ntsoos tas li thiab. Vim nej tsis to taub li. Kuv yuav tsis tuag, tsuas yog lub cev no tuag xwb. Kuv yuav tau mus nrog nws(tus Poj Niam) nyob. Vim li ntawd kuv xav kom peb muaj kev lom zem.”
Tus thawj tub ceev xwm hais tias:
“Koj hais li cas nod?”
Claude teb tias:
“Xav kom peb ua kev lom zem na has. Koj puas kam tso cai rau TP O’Leary nqa ncuav qab zib (cake) thiab ice cream tuaj, thiab koj puas kam tso cov neeg raug txim nyob txheej ob saud tawm los nrog peb sawv daws nyob hauv chav tsev loj, kom peb thiaj tau ua ke ua kev lom zem?”
Tus thawj tub ceev xwm hais tias:
“Tsam muaj neeg ua phem li cas rau txiv plig ne?”
Claude tig mus ntsia cov neeg uas nyob ntawd, nws hais ntsia ntsoov lawv tias:
“Lawv tsis ua li os, puas yog mas lawv?”
Tus thawj tub ceev xwm thiaj kam kom ua li ntawd. Thiab nws tso ib co tub ceev xwm tshiab tuaj ntxiv. Ces TP O’Leary mus ntsib ib tug poj niam nplua nuj hauv nws pab ntseeg. Tus poj niam zoo siab yuav cake thiab ice cream tuaj rau lawv, ces lawv sawv daws tau ua kev zoo siab lom zem. Thaum ua kev lom zem tas, Claude thov kom lawv sawv daws mus teev ntuj ua ke li ib teev (Holy Hour).
Thaum lub caij los txog ze lawm, luag los kom nws cov phooj ywg nyias rov mus nyias kem nkuaj lawm. Txiv plig thiaj mus tom chav tsev teev ntuj, mus nqa Yes Xus lub Cev los rau Claude txais ua ntej nws yuav tuag.
TP O’Leary rov los nrog Claude nyob. Nws nyob sab nraum cov ntxaij hlau, Claude nyob sab hauv, nkawd txhos caug thov ntuj ua ke tos lub caij uas lawv los coj Claude mus.
Kaum tsib feeb ua ntej lub caij teem, tus thawj tub ceev xwm khiav khiav nce ntaiv los qw qw rau nkawd tias: “Lawv kam ncua lawm, lawv kam ncua lawm! Tus Governor kam muab ob lis piam ntxiv rau koj nyob!”
Claude tsis paub hais tias tus thawj tub ceeb xwm thiab tus District Attorney nkawd siv zog nrhiav kev tav kom lawv tseg Claude txoj sia tsis txhob muab nws tua. Lawv mam qhia rau nws mam paub xwb. Ces Claude txawm pib quaj.
Tus thawj tub ceev xwm thiab txiv plig nkawd xav tias yog nws zoo siab nws quaj xwb. Tiam sis Claude hais rau nkawd tias: “Neb tsis to taub li na! Yog neb tau pom Nws lub ntsej muag thiab tau ntsia ntsoov nws lub qhov muag lawm mas neb yeej tsis xav nyob ib hnub ntxiv li lawm na!”
Claude hais ntxiv tias: “Ob peb lub lis piam no, kuv tau ua txhaum li cas es Tswv Ntuj thiaj tsis kam kuv rov mus tsev li?”
TP O’Leary hais lus pov thawj tias Claude tsa suab hlo quaj tu siab kawg nkaus li.
Tus thawj tub ceev xwm cia li tsis paub xav li lawm, nws cia li mus lawm. TP nyob ntawd nrog Claude nyob. Thaum Claude siab tus me ntsis lawm, TP muab lub Cim Yug rau Claude txais. Ib ntsis ces Claude txawm hais rau txiv plig tias:
“Txiv plig, yog vim li cas kuv thiaj tseem yuav tsum tau nyob ob lub lis piam ntxiv thiab?”
Txiv plig thiaj xav tau ib lub tswv yim. Nws hais rau Claude tias Claude puas nco qab tus neeg raug txim hu ua James Hughs, uas yog ib tug txiv neej dawb,tus uas ntxub ntxub Claude kawg nkaus li. Thaum James yau, nws yog ib tug neeg ntseeg Kas Tos Liv, tiam sis thaum nws tias hluas lawm, nws cia li mus ua neeg phem, cia li ntxub Tswv ntuj thiab tas puas tsav yam hais txog kev ntseeg.
Txiv plig txawm hais tias:
“Tej zaum Niam Mab Liab xav kom koj muab koj qhov kev nyuaj siab uas koj tseem yuav tau nyob ntxiv no fij rau Ntuj los ua kev them txim txhaum pab cawm nws. Yog li koj kuj muab koj lub sij hawm uas koj tsis tau mus pom niam Mab Liab sai no los cev rau Ntuj pab rau nws, kom nws thiaj li tsis txhob tau ncaim ntawm Tswv Ntuj mus tas ib txhis.”
Claude xav tswv yim me ntsis, ces nws txawm kam ua li ntawd. Nws thov kom TP O’Leary qhia ib co lus rau nws hais los cev nws txoj kev nyuaj siab rau Ntuj los pab James. TP thiaj qhia thiab pab Claude ua qhov kev fij nws txoj kev nyuaj siab ntawd rau Ntuj. TP ua pov thawj qhia tseeb tias, tsuas muaj TP thiab Claude nkawd ob leeg nkaus thiaj paub txog qhov no xwb.
Thaum kaj ntug, TP rov tuaj xyuas Claude. Claude hais rau TP tias:
“Yav tas los James ntxub kub kawg, tiam sis nyem no mas nws haj yam ntxub kuv tshaj qub!”
Yog vim James paub txog tias lawv tau ncua ob lis piam ntxiv rau Claude lawm, no ces nws khib, nws thiaj haj yam ntxub Claude. Txiv plig xav txhawb kom Claude txhob ntaus siab me, nws hais rau Claude tias:
“Yog li mas tej zaum haj yam zoo xwb!”
Ces tas ob lub lis piam ntawd Claude niaj hnub cev nws lub sij hawm los ua kev them txim txhaum thiab niaj hnub thov Ntuj pab rau James kom James tso nws lub siab tsis hwm Ntuj tseg, tig rov los hwm Ntuj.
Thaum ob lis piam tas lawm, yog tim 4 lub 2 hlis 1944, lawv thiaj los coj Claude mus zaum hauv luv rooj hluas taws xob (electric chair). TP O’Leary hais lus pov thawj li no txog:
“Kuv tsis tau pom dua ib tug neeg uas mus ntsib txoj kev tuag zoo siab hlo thiab luag ntxhi npaum li ntawd li. Tab cov tub ceev xwm tuaj zov ntawd thiab cov tub sau xov xwm uas tuaj saib los sawv daws yeej qhuas kawg. Sawv daws hais tias lawv tsis to taub ua cas ib tug neeg cia li yuav mus zaum hauv lub rooj hluav taws xob luag ntxhi zoo siab hlo npaum li ntawd.”
Claude cov lus kawg rau TP O’Leary:
“TP, kuv yuav nco ntsoov txog koj. Thaum twg koj xav tau dab tsi, koj hais rau kuv, kuv mam thov Nws (Niam Mab Liab).”
Peb lub hlis tom qab, lub 5 hlis tim 19, 1944, txog hnub uas lawv yuav coj James Hughs mus zaum hauv lub rooj hluav taws xob thiab. TP O’Leary piav li no txog:
“Tus neeg no yog ib tug phem tshaj qias tshaj uas kuv tau ntsib. Nws txoj kev ntxub Tswv Ntuj thiab tas txhia yam txog Tswv Ntuj mas tsis muaj lus yuav piav tau li.”
Nws yeej tsis pub kom ib tug txiv plig los ib tug neeg uas tham txog Tswv Ntuj nkag rau nws chav nkuaj li. Ua ntej lub caij uas lawv yuav los coj nws, tus kws tshuaj saib lawv ua zoo hais kom nws txhos txaus caug hauv av es ua tiag hais zaj “Peb Txiv nyob saum ntuj.” Nws phem tsis phem mas nws nto kiag aub ncaug rau kws tshuaj ntsej muag xwb.
Thaum lawv muab nws pav rau hauv lub rooj hluav taws xob, tus thawj tub ceev xwm hais rau nws tias:
“Yog koj muaj dab tsi xav hais ces yog caij hais lawm.”
Tus neeg ntawd cia li pib hais lus phem phem thuam Ntuj, tiam sis ua cas nws cia li ntsiag kiag, hos nws qhov muag ntsia ntsoov tim ces kaum tsev, ua ntsej muag ntshai tshee na yoob tag. Ib pliag nws cia li qw tawg ntho nrov nrov ua rau sawv daws ceeb tag. Nws tig mus hais rau thawj tub ceev xwm tias:
“Thawj tub ceev xwm, koj cia li hu ib tug txiv plig tuaj!”
Thaum ntawd, TP O’Leary yeej nyob hauv chav hlawv neeg thiab, vim Mississippi txoj cai yuav kom muaj ib tug txiv plig los xib hwb nyob rawv ntawd. Tiam sis TP mus nyob nraim rau nram qab cov tus sau xov xwm lawm, vim tus txiv neej ntawd yeej tau hais tias yog nws tseem pom ib tug txiv plig los xib hwb mas nws yuav hais lus thuam Tswv Ntuj no.
Thaum nws hais tias nws xav kom hu ib tug txiv plig tuaj, TP O’Leary thiaj tawm plaws los mus rau ntawm nws. Lawv hais kom tas sawv daws tawm hauv chav hlawv neeg mus, ces TP thiaj mloog nws lees txhaum. Nws hais tias nws yog ib tug Kas Tos Liv, tiam sis thaum muaj 18 xyoo nws cia li tso kev ntseeg tseg lawm vim nws nyiam ua kev phem kev qias heev. Nws lees nws cov txhaum tas tib si thiab nws tu siab kawg nkaus rau nws tej kev txhaum.
Thaum sawv daws rov qab los rau hauv chav tsev, thawj tub ceev xwm nug txiv plig tias:
“Txiv plig, yog dab tsi ua kom nws pauv hlo li ntawd?”
Txiv plig hais tias:
“Kuv tsis paub, kuv tsis tau nug nws.”
Thawj tub ceev xwm hais tias:
“Yog kuv tsis nug nws mas ib tsam kuv yuav pw tsis tsaug zog li.”
Thawj tub ceev xwm txawm mus ntawm tus neeg raug txim thiab nug tias:
“Tub, dab tsi ua kom koj hloov siab li no?”
Tus raug txim teb tias:
“Koj puas nco tus txiv neej dub Claude, tus uas kuv ntxub ntxub tshaj plaws li na? Nws sawv ntawm ces kaum tsev ntawd na (nws taw tes rau ces kaum tsev). Hos Niam Mab Liab sawv nraum nws qab ob sab tes tuav nws ob sab xub pwg. Claude hais rau kuv tias: ‘Kuv twb muab kuv txoj kev tuag fij nrog Yes Xus txoj kev tuag saum ntoo cuam los cawm koj lawm. Niam Mab Liab thov tau lub txiaj ntsim kom koj xub tau pom koj qhov chaw nyob hauv dab phem teb yog koj pheej tsis kam los lees txhaum.’ Kuv tau pom kuv qhov chaw nyob dab phem teb lawm, vim li ntawd kuv thiaj ntshai thiab qw.”
James Hughs tau raug hlawv raws li teem cia lawm, tiam sis Niam Mab Liab thiab Claude tau ua kom nws pom nws qhov chaw nyob dab phem teb, ces nws cia li thim xav tam sid thiab tig los lees txhaum thiab cawm nws tus ntsuj plig thaum lub caij kawg kiag ntawm nws lub neej lawm. Niam Mab Liab thiab TP O’Leary tau qhia Claude kom nws muab nws txoj kev txom nyem fij rau Yes Xus nrog Yes Xus txoj kev txom nyem los cawm tau ib tug tib neeg. Peb sawv daws yuav tsum paub qhov no tias peb yeej ua tau ib yam li ntawd thiab. Yog li ntawd peb yuav tsis txhob xav tias peb tej kev txom nyem tsis zoo dab tsi. Peb txoj kev txom nyem muaj nqes heev yog muab koom nrog Yes Xus txoj, thiab ib txhij peb yuav tsum thov Niam Mab Liab pab.
Peb pom tau tias Niam Mab Liab muaj hwj huam npaum li cas pab tib neeg. Peb muab tau Claude Newman zaj kwv huam los piv tau rau Niam Mab Liab tuaj tshwm sim nyob Fatima xyoo 1917. Niam Mab Liab qhia tias kom nquag mus daws txhaum, nquag mus txais Yes Xus lub Cev, thiab kom ua tej yam los them txim txhaum pab cawm cov neeg txhaum. Thiab nws tau ua kom cov me nyuam nyob Fatima pom dab phem teb, nws hais rau lawv tias:
“Coob tus ntsuj plig poob rau dab phem teb, vim tsis muaj leej twg thov ntuj pab lawv thiab ua kev them txim txhaum pab cawm lawv.”
Peb kuj yuav tau nquag xyaum hais zaj thov ntuj saum lub txiaj Miraculeuse:
Mab Liab tus xeeb los tsis lo txhaum, thov koj thov ntuj pab peb cov uas vam txog koj!
Muab hauv cov sites nram no los:
Yog nej xav nyeem ua lus Aas Kiv, taum hauv no:
http://www.mysticsofthechurch.com/2011/12/miraculous-story-of-claude-newman-his.html
Yog nej xav nyeem ua lus Fab Kis taum hauv no:
http://spiritualitechretienne.blog4ever.com/blog/lire-article-83937-546562-la_conversion_miraculeuse_de_claude_newman.html
Home
Yog koj tso siab rau Yesxus lub siab ntshiab, nws yuav ua koj siab kaj lug 
XH.Npuag Tub thiab Bao XMary,
" longdesc="84" /> 
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
