LEEJ TSWV YIM Ntshiab QHIA TXOJ KEV TSEEB LOS RAU NEEG.

Lo lus hais tias, yog Leej Tswv Yim no, nws yog tus Tswv Ntuj tsim ntuj tsim teb nws lo lus. Los yog nws lub tswv Yim qhia los, pub rau neeg ua kev thoob tsib paub txog.
Kom muaj txoj kev thoob tsib los coj kav neeg ntiaj teb, lub tswv yim thiab lub cev. Mas Ntuj feeb los muaj peb yam li no:

1. Tus tib neeg yuav tsum muaj kev noj qab nyob zoo, los noj qab haus huv.  Nyob hauv neeg lub cev, neeg thiaj tsis muaj kev nyuaj siab, kom ua tau lub neej nyob kaj lug.

2. Tus neeg yuav tsum muaj hmoo, kom nws muaj nyiaj txaus siv.  Nws thiaj tsis qaug zog, ua tau siab loj muaj tswv yim nrhiav kawm thiab paub, tej yam tshiab yuav muaj tawm los rau yav tom ntej.
Kom tsim tau, yam muaj txiaj ntsim loj, rau tej tub ki los xeeb ntxwv pom thiab coj txuas mus rau lawv lub neej tom ntej ntxiv.

3. Tus neeg yuav tsum muaj ib txoj kev ntseeg, nyob hauv nws tus kheej.  Kev ntseeg kuj muaj ntau yam xws li:
a. Ntseeg Huab Tais Ntuj uas yog tus tsim ntuj tsim teb.
b. Koj yuav xub ntseeg koj tus kheej ua ntej uas koj mus ntseeg txog lwm tus neeg.
c. Los sis, mus ntseeg tej tug Tim Tswv, zoo li ntseeg tej tug Yaj Saub los cov npe neeg uas tau ua Vaj ib zaug dua los lawd.   Cov no yog cov uas Hmoob hu lawv ua Tim Tswv teb, Tim Tswv chaw no.
Yog koj ntseeg txog tej yam hais no, mas zoo li koj tus ntsuj Plig, tseem nyob ze tus Tswv Ntuj tsim ntuj tsim teb no.  Ces koj paub txog tus loj uas tau tsim lub ntuj lub teb, koj paub me ntsis txog tej yam nyob saum ntuj los, nyob yaj ceeb no thiab tej yam nyob nruab yeeb.
Ces thaum no lauj, ntiaj teb neeg sawv daws yuav tsis ntshai koj, xws li ntshai ib tug neeg phem tsis muaj siab muaj ntsws, thiab saib koj meej tseeb li yog neeg siab ncaj ncees.
Zeej tsoom yuav saib koj xws li ib tug neeg ntxim hlub, muaj kev thoob tsib puv npo nyob hauv koj. ces koj yuav tsis pluag kev hlub lawm.  Muaj neeg hlub thiab nyiam koj nyob tas qhov txhia chaw.
d. Hais txog txoj kev noj qab nyob zoo thiab noj qab haus huv, qhov tseeb yog koj tus kheej.  Koj yog thawj tug Dr xub kho koj kom koj zoo txaus tso, luag thiaj nyiam thiab hlub koj.
Koj thiaj yuav muaj txoj kev hlub loj, nyob puv hauv koj mus li.  luag thiaj xav hlub koj thiab pub kev hlub los rau koj.  Tej txij nkawm tub ki, los kwv tij neej tsa thiaj hwm koj. Lawv thiaj xav tsa koj ua lawv tus thawj neeg coj lawv txoj kev ua neej.
e. Kev muaj hmoo thiab kev ncaj ncees, yog kev nplua nuj muaj nyiaj txiag. Tsuav yog koj muaj nyiaj txaus noj haus yug koj lub cuab yim neeg, ces yog zoo lawm.
Thaum koj muaj nyiaj txiag txaus noj txaus haus, rau koj lub cuab yim neeg lawm. Luag muaj kev tso siab rau koj, xws li koj tsis yog cov neeg nyiam ua tub sab tub nyiag, niaj hnub yuav xav qee luag cuab tam toob xib mus siv.
f. Kev kawm muaj ntau yam kawm thiab muaj nuj nqes kawg:
af- Sab kev kawm paub yog ib txoj kev pov hwm koj ua ib tug neeg, tseem ceeb mus rau sab xyaum ua ib tug neeg, yog Nkauj siab dawb los Nraug siab huv uas Tswv Ntuj nyiam tas nrho.
bf-Sab kev kawm txuj zoo li kawm tom tsev kawm ntawv, yog kev kawm los sib tw ua thawj neeg. Los yog sib tw kom muaj nyiaj txiag ntau nrog ntiaj teb lub cuab tam thiab sib tw muaj hwj chim koob meej nyob ntiaj teb no.
cf- Kev ntseeg yog sab kev kawm los sib tw ua Nkauj siab dawb los ua Nraug siab huv. Kev ntseeg nws zoo li dej thiab cua.
Koj muab tsis tau los tuav ntawm tes saib, Koj kawm lawm koj mam paub nyob hauv nruab siab tias, tseem ceeb thiab muaj qab hau npaum li cas.
Koj kawm lawm koj thiaj yuav paub txog muaj peb txheej. xws li txheej nyob saum ntuj nrog txheej nyob Yaj ceeb, los nyob saum npoo av no, thiab paub txog txheej nyob nruab yeeb.
Hais txog kev ntseeg, mas yog ib yam nyob tsaus ntuj nti, li yav ntuj thaum ub neeg tsis tau muaj teeb tsom thooj taws pom kev mus hmo ntuj.
Neeg maub mus nrhiav tus muaj hmoo, ces nws mus xuas dub tau.  Tus tsis muaj hmoo ces nws yeej tsis ntsib dab tsi li.
Txoj kev ntseeg, mas yuav kawm tas ib sim neej. Niaj hnub Qaum Ntuj tso, los qhib tej yam tshiab uas npog nrees los, tsis tseg. Tus tsis xav kawm ces tsis muaj kev paub txog tas nws sid.
Txoj kev ntseeg, mas koj yuav nrhiav kawm nrog Leej Tswv Yim, los Leej Ntuj Plig, koj thiaj paub thiab to taub txog. Txhua txoj kev ntseeg puav leej yog yam zoo.
Tab sis muaj ib txoj xwb thiaj yog txoj ua koj yuav mus xyaum ua tau tus Nkauj siab dawb los Nraug siab huv ntawd tau.
Thaum koj ntsib tus ntawd lawm Tswv Ntuj yog tus yuav tsa koj ua tus Thawj Tim Tswv loj xws li Ntuj Leej tub uas tuaj yuav lub cev neeg nyob ntiaj teb no, thiaj yog tus tseeb.
Txoj kev ntseeg tseem ceeb zoo li dej thiab cua uas tib neeg txhais tes tuav tsis tau. mas nrhiav nyuaj heev, vim muaj ntau txoj kev los sib tshuam rau txoj ntawd.  Thiab yog ib txoj kev nqaim kawg neeg tsis paub zoo.
Txog kev ntseeg tseeb tshaj yog ib txoj kev neeg kawm los sib tw ua tus Nkauj siab dawb Nraug siab huv.  Kom tau ua tawj zeeg uas Tswv Ntuj tsa nws ua thawj tug Tim Tswv loj nyob ntawm Tswv Ntuj xub ntiag.
Kom tau lub npe muaj zoo puav pheej pov hwm Neeg ntiaj teb txhua tus ua neeg siab dawb. Tas nrho ib tsoom Xib Hwb uas lawv qhia cov kev ntseeg no, mas lawv yeej paub tsis tas li.
Lawv tsuas qhia tau li neeg taw tes tias, mus ped los mus nrad xwb.
Hais txog cov kee  xeeb muaj kev ntseeg:
Thawj lub kee, yog Huab Tais Ntuj li kee, uas Ntuj tsim neeg los nyob ntiaj teb no.  Thaum Ntuj tau xeeb muaj ob tug niam txiv hauv paus los, uas Hmoob hu ua Nkauj Iab Nraug Os nkawd los lawm.
Ua qab dej nyab ntiaj teb tas los, tau ntau pua txhiab xyoo lawm. Tswv Ntuj tau tshoj tej tus Tim Tswv zoo li cov Yaj Saub los tshaj Tswv Ntuj cov lus kom neeg ntiaj teb npaj siab tos tus Nkauj siab dawb thiab nws tus tub siab Huv. tas plaub txhiab xyoo ua ntej.
Mam los txog Yes Xus kee, uas Nws tuaj yuav lub cev neeg.
Kom tau qhia txog neeg ntiaj teb, muab Tswv Ntuj los sib zeem ua txiv tub, kom muaj kev zam txim rau neeg. Txij thaum ntawd los txog xyoo 2000 tawm no.
Yog txij li Yes Xus kee los, mas Leej Ntuj Plig thiaj qhia txuas los, kom neeg ntiaj teb sib tw los ua pab Nkauj siab dawb Nraug siab huv los txog lub zwj ceeb no.
Yes Xus tau hais tseeb kawg, kom neeg ntiaj teb to taub tias, zaj twg hauv cov kev ntseeg uas yog zaj tseeb. Yes Xus tau hais rau Nws pab Thwj Tim tias:
Kuv tsa Koj ua lub pob zeb khov kho no, ua tus Tim Tswv nyob ntiaj teb.  Kom Dab Phem cov rooj loog tsis muaj yeej lub pob zeb no.
Yes Xus pab Thwj Tim no, muaj raws li Hmoob lo lus uas, Hmoob hais tias:  Lawv yog pab Tim Tswv. Yes Xus tau tsa lawv 12 leeg ua Tim Tswv, kom mus thoob plaws rau lub qab ntuj khwb no.
Nyob hauv Tswv Ntuj lub Koom Txoos  muaj cov tseem Tim Tswv: uas yog Yes Xus tau tsa lawv los ua Tim Tswv, nyob ntiaj teb no, li Hmoob hu ua cov Tim Tswv teb Tim Tswv chaw, mas yog pab no lawm tiag.
Dhau tej hais no mus rau yav tom ntej, mas Mab Sua luag yuav sib tw ua tsov rog, saib yog leej twg yuav yeej los leej twg yog  pab yuav swb mus.
Ntawm kuv,  mas kuv xav ceeb toom tias, Haiv Hmoob tsis muaj teb chaws los tau ntau txhiab pua xyoo lawm.  Lub ntiaj teb no nyob qhov twg los Hmoob yeej muaj feem nyob hauv.
Peb yuav mus sib taw ua pab Nkauj siab dawb los Nraug siab huv no, mas yog qhov zoo rau Haiv Hmoob lawm.
Tab yog Hmoob pluag los Hmoob txoj hmoo yeej tsis zoo li tus pluag nyiaj txiag. Tej koob hmoov los ntawm kev ua tus Nkauj siab dawb Nraug siab huv no, tseem nplua nuj loj dua li cov neeg muaj nyiaj txog li peb roob.
Zaj lus no yog xav nthuav kev thoob tsib pub rau leej tib neeg ua neej nyob rau ntiaj teb no.
Kwv tij peb tseem yuav sib ntsib dua nyob hauv lwm zaj lus mus thiab,  nyob zoo sawv daws ua siab loj.


*Sacramento, tim 25/7/2017.
Yaj Zoosv Ntxheb Xib Hwb.