Leej Ntshiab Yos Xes nyob Cupertino, Italie teb.

Yos Xes (Giuseppe) Maria Desa yug hnub tim 17/06/1603 lub zos Cupertino, nyob Pouilles, Italie qab teb.
Nws txiv Yos Xes Desa, yog ib tug kws txua ntoo, tab sis tuag ua ntej yug, tseg poj niam rau tom qab ib plab me nyuam ua poj ntsuam thiab ris nws tej nuj nqes nyhav. Nws poj niam raug ntiab tawm hauv nkawd lub tsev nyob, tej khoom vaj khoom tsev luag lws tag nrho, tsis muaj chaw nyob thiaj li mus yug me nyuam rau hauv ib lub nkuaj tsiaj. Thaum Yos Xes hnub nyug 5 xyoos, nws mob siab kawm teev Ntuj, nws txhos caug zoo zoo tsis ua zog lub qhov muag ntsia rau saum ntuj teev Ntuj. Yos Xes yog ib tug me nyuam txaj txaj muag, tsis muaj peev xwm ua ub ua no thiab ua dab tsi los muaj ntsis thoj chim, tes taw tsis nrawm, nws nyob xam nuv li nws nyob ib kuag hauv npau suav, ua li mas tej ib ncig ntawm nws thiaj siav npe hu ua "neeg yoob".
Nws kawm xaws khau, tab sis ib txwm nws yeej xav ua txiv plig ces thaum hnub nyug 17 xyoo, pom tias nws muaj ib tug txiv ntxawm thiab ib tug dab laug ua txiv plig hauv lub koom haum Franciscains zoo heev ces nws thiaj li nkag mus thov kawm txiv plig nyob rau lub tsev kawm txiv plig Franciscains nyob Naple, tab sis lawv tsis txais nws vim nws muaj ntsis taj. Lawv thiaj li txais nws los ua tij, los ua tub txib tub txuas hauv lub tsev kawm txiv plig, tab sis tes taw tsis nkiag, ua tsis tau dab tsi li, tsuas ua piam xwb ces tau 8 lub hlis lawv tsis kam yuav nws.
Zoo nkaus li nws pheej pam neej pam dab ces thaum nws yoob, nws nrog Ntuj lawm ces nws ua tsis tau tej hauj lwm ntiaj teb lawm.
Nws niam thiaj li hais kom nws tus nus Jean Donato uas yog ib tug txiv plig franciscain pab, lawv thiaj li txais nws mus rau lub tsev txiv twj cuab Grottella nyob rau lub me nyuam zos Balsorano ze ntawm Copertino ua tij tu tsiaj, thiab tu txiv plig lawv tus luj. Nws paub nws txoj hauj lwm, nws thiaj tis npe rau nws tus kheej tias: "Tij luj ( Frère âne) ". Nws niaj hnub ko taw liab cab tus luj mus thov khawv tom zos los rau cov txiv plig.

Yos Xes yog neeg xyiv fab, luag ntxhi tab sis tsis muaj cim xeeb kawm ntawv li. Nws mloog lus, hwm neeg, txo hwj chim li ntawd cov hlob thiaj li txiav txim siab muab nws coj los kawm ua txiv plig.

Lub 6 hli 1625 nws hnav cev khaub ncaws ua txiv plig thawj zaug nyob rau Altamura. Nws paub nyeem thiab sau ntawv me me xwb. Yos Xes tsis muaj peev xwm yuav txhais tau ib qho ntawv Ntshiab li, nws tsuas paub Lus Kas Ntawv Moo Zoo tshooj 11 qeb 27 nkaus xwb uas pib hais tias:
"Lub plab uas tau nqa
koj thiab lub xub ntiag uas pub mis rau
koj tau txoj hmoov zoo !"

Hnub tim 03/01/1627, Tswv Qhia Jérôme de Franchis tuaj twv ntawv rau lawv nkag ua txiv plig thawj qeb.
Nws muab phau Ntawv Ntshiab los nthuav, cas nthuav ncaj nqeb ntawd, txawm nug Yos Xes, Yos Xes teb ntse ntsuav thiab nthuav ntaug lees, ces Tswv Qhia thiaj li txais nws mus rau cov kawm txiv plig xyoo ib.

3 xyoos tom qab Tij Yos Xes thov txais lub Cim Tiag Tes, Tswv Qhia Jean-Baptiste Deti nyob Castro tuaj twv ntawv thaum kawg rau lawv ua txiv plig, nws xub nug cov ua ntej, lawv tus twg los paub thiab teb tau zoo heev ces nws cia li teg ntaug txais tag nrho sawv daws tsis nug cov tom qab li. Li no Tij Yos Xes txais lub Cim Tiag Tes yog hnub tim 04/03/1628 yam uas cia li tsis tau twv.

Thawj zaug ua Yos Xes ntab (ya) saum cua yog nyob rau lub zos Cupertino, hnub tim 04/10/1630, hnub lawv nquam Leej Ntshiab François d'Assise. Nws nrog sawv daws tab tom nquam teev ntuj taug kev, nws cia li ntab nce mus saum ntuj thiab nws cia li nyob tij ywm rau saum cov neeg taub hau sab saud, cov neeg mus nws kuj maj mam ya mus raws cov neeg thiab. Thaum nws nqes los, nws mam paub tias nws ua li ntawd, nws ntshai thiab txaj muag, nws khiav mus tsiv nraim.

Txij thaum ntawd los ces txiv plig Yos Xes lub neej hloov, nws ib sij ya ib zaug, tsuav yog nws tswm xeeb teev Ntuj kiag los yog nws taug kev nws pom me kab me ntsaum los yog me nroj tsuag zoo nkauj, nws qhuas txog tus Tswv Tsim xwb ces nws cia li ya li lawm. Thiab tsuav yog nws hnov kiag Mab Liab thiab Yes Xus lub npe los yog nws hu cov nkauj paj nruag thaum ua mis xas xwb ces nws yeej ya li txog thaum nws cov thawj coj kom nws nqes mas nws mam li rov maj mam poob los ( hais tias ya no tab sis yog nws lub cev cia li ntab siab zuj zus lawm xwb, nws tsis tau cuab zog ya).
- Muaj ib zaug nws pom ib lub piag deg tuaj pos (oursin) nws qhuas txog tus Tswv tsim tau zoo nkauj xwb nws cia li ya lawm.
- Muaj ib zaug nws ya mus tsaws rau ntawm ib tug ceg ntoo, tus ceg ntoo tsis rawv li, tab sis thaum nws rov xeev los tus ceg ntoo rawv vos yuav lov, thiab Yos Xes tsis muaj peev xwm yuav nqes tau los, lawv thiaj li tuam ntaiv rau nws nqes.
- Muaj ib zaug ib co tub zog yuav tsa ib tug ntoo cuam rau saum roob, lawv khawb tau qhov tab sis tus ntoo cuam nyhav heev ces lawv nqa tau mus ntxig rau lub qhov tab sis tig tsis tau kom los dhos lub qhov, lawv ua ua tsis tau, Yos Xes los mus ncaj ntawd, nws thiaj li nqa kiag tus ntoo cuam dhos daws rau.
- Muaj ib zaug, nws nqa ib tug me nyuam yaj, tus yaj tsis quaj li nyob tij ywm rau nws nqa ya ib pliag nqes los ces nws tso tus yaj rau hauv av (tus me nyuam yaj txhais tias yog Yes Xus).
- Muaj ib tug yawg npe hu Baldassare mob zoo li qaug dab peg, tuaj tib tug qaub ncaug nrog zig tuaj thov Yos Xes kho nws, nws mas ntshai neeg heev, tab sis Yos Xes muab nws puag ntawm xub ntiag, plhws nws taub hau thiab nqa nws ya ib pliag rov nqes los tso yawg rau hauv av, yawg cia li zoo hlo li lawm.
- Tag nrho cov neeg puav leej hais tias tuaj thov Yos Xes thov Ntuj rau lawv mas lawv cov mob puav leej zoo tag nrho li lawm.
- Thaum Yos Xes tawm hauv tsev mus sab nraud rov los mas qhov ntau nws tej khaub ncaws tshuav hauv paus xwb, txoj hlua sia duav kiag los tshuav tw lawm xwb vim cov neeg pom nws ces tsuas yeem dua thiab tu nws ib qho khaub ncaws coj mus ua pov haum, ua tshuaj.

Thaum nws nyob Cupertino muaj tshwj sim tshaj 70 zaus, ntau pua leej neeg tseem ceeb tau ua pov thawj txog.

Tom qab 1638 uas nws tsis nyob Cupertino lawd, kuj muaj coob tug neeg tseem ceeb tau ua pov thawj txog nws.

- Xyoo 1645, Spain (Espagne) tus tiam lis tim Vas Tis Kaas , l'Amiral de Castille Juan Alfonso Enríquez de Cabrera, hla ntawm lub nroog Assise xav ntsib Yos Xes, nws ntsib tag nws poj niam xav pom thiab thiaj li kom ob tug txiv plig coj Yos Xes los rau tom tsev teev Ntuj. Nyuam qhuav los txog ntawm qhov rooj xwb Yos Xes cia li ya kiag hla lawv taub hau los mus rau saum tus mlom Mab Liab yug los Dawb Hu siab li 4 m, nyob ib pliag saud ces rov ya los tsaws rau qhov chaw qub uas thaum tuaj txog ces nws mam rov mus taw mus rau tom nws kem tsev lawm. Tiam lis poj niam ntshai heev cia li vau hlo rau ntawd, lawv zaws tag nws thiaj li rov xeev.

- Xyoo 1649, yog tus tub huab tais Jean-Frédéric, duc de Brunswick-Calenberg, hnub nyug 24 xyoos nrog rau nws tus Kws tshuaj thiab Tswv Qhia Liab Brancati di Lauria. Yog thaum txiv plig Yos Xes tab tom ua mis xas, tus tub huab tais pom txiv plig ya nws txawm xav tias tsam yog dag xwb, nws rho hlo nws rab ntaj los yom hauv qab ko taw, saum taub hau, ib ncig tag nrho tsis muaj dab tsi khuam txiv plig li.

- Qhov uas lawv qhuas tshaj mas yog thaum nws mus tim Vas Tis Kaas, Txiv Vaj Qhia Urbain VIII tab tom qhia kev cai ntawm Tshav Puam LN.Pob Zeb. Thaum Yos Xes txhos caug khoov hnia Txiv Vaj Qhia nkawm khau looj, txiv plig cia li ya mus nyob rau saum Vaj Qhia lub theej kiab ntev loo txog thaum nws tus thawj uas coj nws mus kom nws nqes los, nws mam li rov poob los. Txiv Vaj Qhia ntsia tij ywm, nws mam hais rau txiv plig tus thawj hais tias: "Yog Tij Yos Xes tuag thaum peb tseem ua Vaj Qhia, peb yuav zoo siab hlo ua tim khawv rau nws ua Leej Ntshiab, vim peb yuav ua pov thawj rau qhov peb pom Tswv Ntuj lub hwj chim." Tab sis Txiv Vaj Qhia Urbain 8 ho tuag ua ntej Yos Xes lawm.

Thaum Yos Xes ya mas nws ya siab txg 7-8 mev li.
Nws tsis yog ya nyob tij ywm saud xwb, nws ya raws qhov nws xav mus xws li mus rau ntawm ib tug ntoo cuam, mlom Mab Liab los yog lub Cim Yug.
Nws tsis zoo li ib txhia es yuav tsum yog nyob qhov tsaus ntuj thiab hauv tej kem tsev kaw nti xwb. Tsis hais nyob nraum zoov hauv tsev, hav zoov hav tsuag, tsuav yog nws "ua Ntuj tsaug" rau txhua yam zoo ua Tswv Ntuj tsim thiab cav txog Mab Liab los yog Yes Xus lub npe xwb ces nws ya. Ua ntej yuav ya, yog nws tswm xeeb teev Ntuj ua ntej nws mam li ya tom qab. Txhais tau tias yog nws muab tag nrho nws lub siab lub ntsws los rau Tswv Ntuj ces thiaj li ua rau nws ya.

Yam ua txiv plig Yos Xes ntshaw tshaj yog muab tag nrho nws lub cev lub siab mus nrog Tswv Ntuj nyob, nws ua kev txom nyem puas tsav yam kom nws nyob ze Tswv Ntuj. Nws nyiam nce mus nyob saum qab vuas tsev teev Ntuj, mus yoob ib leeg nyob saud nrog Tswv Ntuj. Nws nyiam hais rau Tswv Ntuj hais tias: "Tswv Ntuj, kuv tsis ntshaw dab tsi tag nrho hauv ntiaj teb nov, koj pom tias kuv ua neeg pluag tag nrho, kuv tshua kuv lub siab lub cev los txi rau koj nkaus xwb."

Thaum nws yuav yoob, nws ua ntsej muag liab me ntsis, tag nws ua kua muag txia txev li tus neeg yuav tso txoj sia tseg rau ntiaj teb, yuav mus nyob saum Ntuj.
Thaum nws yoob lawd, nws mloog li ib qho pom kev pem Ntuj tuaj qhwv nws, nws ob txhais tes nthuav ua ntoo cuam, nws lub qhov muag ntsia rau saum ntuj, nws tsis ua zog, tej thaum nws ua li ib tug neeg mus kev tab sis tsis ua zog li, tsis muaj leej twg yuav ua kom nws nti tau li.

Xyoo 1638, Vaj Qhia Inocent 10 txwv tsis pub nws tawm rau tsoom sid lawm, mas kuj ua ib qho rau nws zoo siab thiab vim nws yog ib tug neeg txaj muag, nws tsis nyiam kom neeg tuaj xyuas nws coob. Tab sis nws kuj tu siab heev thiab, vim Txiv Vaj Qhia txwv tsis pub nws daws txhaum, tsis pub nws ntsib leej twg li lawm, muab nws khaw nti tib leeg rau ib lub tsev cov txiv plig twj cuab xwb. Tom qab 1655 Vaj Qhia Inocent 10 tuag tas, Alexendre 7 los ua Vaj Qhia, cov txiv plig capucin nyob Cupertino rov thov kom Vaj Qhia tso Yos Xes rov tawm los los Vaj Qhia kuj tsis kam thiab.

Cov nom tswv loj nyob phab teb chaws Europe coob leej xav ntsib txiv plig Yos Xes, lawv thov tsis tau ntawv mus xyuas txiv plig li.

Vaj Qhia txwv tsis pub txiv plig Yos Xes fim tsoom sid vim Vaj Qhia txiav tias:
1/ Ib tug Leej Ntshiab tsis yog ib tug tsiaj hauv vaj tsiaj rau sawv daws mus saib.
2/ Txiv Plig kev txawj ya, tsis yog ib qho zoo piv txwv rau sawv daws xyaum, zam tsis dhau,cia tsoom ntseeg mam ua tus saib xyuas.
3/ Yuav tsum tsis txhob pom tej yam hwj huam mam li ntseeg, yuav tsum xub ntseeg ntawm tus kheej tuaj mus.

Li nov lawv thiaj li tsis pub txiv plig Yos Xes tawm txog ntua hnub nws tuag, uas muaj hnub nyug 60 lub xyoo.

HNub tim 10 lub 8 hli 1663, txiv plig kub taub hauv, hnub tim 15/08/1663 hmoov Niam Mab Liab lub cev mus saum Ntuj, nws ua mis xas yog zaum kawg ua nws ya. Txawm nws paub hais tias tshuav tsis ntev nws yuav mus cuag Tswv Ntuj los nws kuj tseem nyob cus plaws luag ntxhi.

Thaum lub cuaj hlis xuab ces nws hais tias: "tus luj yuav pib nce roob." cov txiv plig sib ntxhi zom zaws hais tias ntshe nws hais txog qhov nws "nce yuav nce hauv toj".

Tim 18/09/1663, lawv ua lub Cim Pleev tag rau nws ces nws tso nws txoj sia. Nws muaj 60 xyoo.

Yog Vaj Qhia Benoît 14 Tsa Txiv Plig Yos Xes ua cov neeg siab ntshiab hnub tim 24/02/1753.
Vaj Qhia Clément 23 tsa nws ua Leej Ntshiab hnub tim 16/07/16767. Nws sau rau hauv cov ntawv thov ua Leej Ntshiab hais tias "qhov ya, tsis tau muaj dua ib tug yuav piv tau LN. Yos Xos".

Xyoo 2003, ua hmoov puag ncig 400 xyoo, vaj qhia Zam Paj Lug 2 tis npe ua " tus Leej Ntsiab Ya".

Txiv Plig Yos Xes ua tus LN. Pov hwm:
- Cov tub ntawv, thaum lawv yuav twv ntawv lawv thov LN. Txawj Ya los pab lawv twv ntawv.
- Cov tub tsav dav hlau, ya saum nruab ntuj.

Nws lub cev ntej ntsug nyob rau lub Crypte de la basilique d'Osimo, Italie teb.

Yos Xes cov lus ntuas:
"Tsis yog ceeb tsheej ua cov leej ntshiab. Yog thaum nyob ntiaj teb ua kom tau Leej Ntshiab".
"Kev mloog lus yog rab riam siv los hlais neeg qhov phem caj pas".


Maiv Tooj.
Tim 11/11/2017
Txhais los ntawm:
https://fr.wikipedia.org/wiki/Joseph_de_Cupertino#Enfance.2C_jeunesse_et_entr.C3.A9e_dans_les_Ordres

Zaj yeeb yaj kiab LN. Yos Xes nyob Cupertino, Italia teb nov mas zoo ua qauv heev rau peb sawv daws lub neej raug txom nyem, raug luag quab yuam thiab saib tsis taus, raug luag thuam. Yuav txhawb peb lub zog xyaum ua neeg me thiab txo hwj chim vim peb haj yam ua neeg me Tswv Ntuj haj yam yuav nyob rau hauv peb.