Teev Saw Mab Liab.

Nyob zoo cov phooj ywg,

Nej tham ntau yam txiaj ntsim, ua rau kuv nco txog ib qho uas tshwm sim rau kuv thaum lub hauv xyoo 2013 no; kuv kuj tsis ntau nqe nyhav thiab tsis xav txog ntau yam thiaj li tsis nco qab piav rau nej mloog, tab sis zaum no nej tham ntau yam ntxiv ua rau kuv xav txog ces kuv lam muab piav khaws tseg, tab sis txhob ntau nqe nyhav dab tsi, tej zaud yog kuv lub tswv yim ua rau kuv xwb.

Thaum lub xyoo 2013 no pib, muaj ib tug yawg nyob ntawm peb zos hnub nyug kuj nchav lawm thiab, nws mob nyhav heev ces Hnub Chiv tim 03-01-2013, peb teev Ntuj thiab sab laj koom haum tag ces kuv leej nkawm wb txawm yaum ob tug phooj ywg thiab peb caij tsheb ua ke mus xyuas, nyob ib nyuag ntu kev deb tsawv. Mus txog hais nyob zoo rau s d tag, kuv leej nkawm nrog rau tus phooj ywg txiv neej txawm mus nrog cov txiv neej zaum tom salon (kem txais qhua, kuv thiab tus poj niam txawm nkag mus nrog cov niam tsev nyob hauv tsev mov. Kuv tsis yaum tus phooj ywg poj niam nrog kuv mus xyuas tus yawg mob tom txaj, vim kuv tsis paub tias nws siab puas loj tsam ces tus neeg mob txog lub caij kawg ho ua rau nws ntshai ces kuv nrog nws sawv ib pliag hauv tsev mov, kuv cia li tawm tij ywm mus xyuas tus mob tom txaj (lub paim); kuv mus txog, kuv mus hais nyob zoo rau nws, kuv plhws nws taub hau, nws ntsia kuv, nws tseem paub kuv tab sis hais tsis tau lus lawm. Kuv plhws nws taub hau tag, kuv txawm los zaum nram taw txaj uas yeej muaj ib cov rooj zaum nyob nrad. Peb muaj ob peb tug nyob ua ke hauv, yog nws cov tub thiab cov vauv. Kuv los zaum ces kuv pib teev Ntuj nruab siab me ntsis, vim pom tias yog nws lub caij kawg lawm kuj hlub nws kawg li.

Thaum kuv zaum kiag teev Ntuj, cas kuv pom nws li yog pom hauv kuv lub tswv yim, lub hlwb xwb tsis yog pom xyeem ntawm qhov muag los yog npau suav. Kuv pom ib tug tub hluas li 15-16 xyoo hnav cov tsoos tsho hmoob txheej thaum ub li teb chaws Luam Nab Thas, lub tsho luv, lub tsho dawb tuaj hauv qab, sia txoj siv liab thiab ris dub; tab sis pom txij li hauv caug tsem tsawv rov saud xwb, kuj zoo li hauv qab ces muaj huab thaiv es tsis pom xwb tsis zoo li daim duab es cia li txiav tus yees; pom li daim duab dub thiab dawb tab sis tus neeg ciaj sia, nws luag nyav ntsia kuv, zoo li nws nyob ib qho chaw siab tsawv li nce toj, pom li nws tab tom nce toj es nws tig los ntsia kuv. Kuv pom li ntawd kuv xav tsis tag li.

Ces ib pliag kuv txawm los nrog lawv nyob tom kem txais qhua, yuav rov los tsev, kuv hais kuv leej nkawm wb rov qab mus saib nws dua, thaum wb yuav rov los kuv plhws nws taub hau, nws hais rau nws tias: "Yawg! kuv yuav rov mus tsev es koj nyob mog". No ces nws quaj kua muag poob tom kaum muag, nws tus tub nrab tib txhij nrog kuv so nws lub kua muag; thaum kuv so nws kuag muag tas, kuv rov plhws nws taub hau dua, kuv ib sab tes mus tuav nws txhais tes uas tseem zoo zoo nkauj tab sis lub ntsej muag ces poob tag lawm, kuv rov hais rau nws tias: "Yawg! Kuv yuav rov mus tsev es koj nyob rau siab noj mov kom zoo los ua peb niam peb txiv mog!"  Ces nws tig loo rau ib sab tsis tig los li lawm, kuv paub tias nws tsis xav nyob ntxiv lawm; kuv kuj tu siab rau kuv tias cas kuv hais tau ib los lus rau nws tu siab, tab sis txoj sia yog txoj sia es yus khuv khuv xim ib txoj sia heev thiaj li kom nws peem nrog peb nyob ntxiv kom ntev li yuav ntev tau.

Tau ob hnub ntxiv ces nws tag sim neej, peb mus ua nws lub ntee, muaj ib hnub peb ua thaj Txiv Ntuj tag, tsis muaj dab tsi ua ces kuv txawm mus zaum ntawm ib sab teev tag 4 txoj Saw Mab Liab sib law. Thaum kuv teev, kuv tsis pom thiab tsis hnov dab tsi li, tab sis thaum kuv teev tag kuv los nrog cov neeg zaum nram hav no, cas kuv rov pom tus hluas qub uas kuv xub pom thaum kuv mus xyuas nws tom tsev. Pom yeej yog tus hluas qub thiab hnav cev tsoos tsho li qub, pom li daim duab dub thiab dawb li qub, pom txij li hauv caug rov saud xwb. Tab sis tsis pom li nws nyob ib qho nce toj lawm, pom li nws nyob ib qho tiaj tab sis deb tsawv ntawm kuv. Qhov kuv pom tseeb ces zoo li pom ib cov kaub puab av mos qhuav nti ntawm nws poob rau hauv av, zoo li pheej tawg nti poob tab sis zoo li poob tsis txawj tag li thiab pom ib cov khawb saw hlau loj li 2-3 nti es lub khawb tawg kiag plam kiag poob, tawg kiag plam kiag poob ib lub ib lub; tab sis tsis pom txoj saw hlau loj tag nrho li, tsuas pom cov khawb hlau tu ib lub ib lub poob xwb. Zoo li cov kaub puab av mos qhuav mas yog nyob saum taub hau rau lub cev hos cov khawb hlau mas zoo li nyob txij yav duav rov nrad xwb.

Kuv pom zoo li nov nyob hauv kuv lub tswv yim, ua rau kuv xav tsis tag li. Kuv tsis ntseeg kuv tus kheej kuv thiaj li tsis tham; tab sis nej tham ntau yam ces kuv kuj lam tham khaws cia seb lwm hnub puas muaj tus ho paub txhais thiab qhia qhov tseeb los qhov cuav rau peb mloog.

Raws li kuv xav mas thaum kuv xub pom, yog yawg twb yuav mus thiaj rov pom nws hluas hluas li yus tus ntsuj plig. Vim yus tus ntsuj plig mas yeej hluas hluas li tus neeg 16-20 xyoo xwb. Zaum ob yog kuv teev Saw Mab Liab rau nws es pab daws tau nws tej txhaum. Txawm tias nws ua neeg nyob, nws yog ib tug neeg zoo tas nrho los tej thaum yus tsis paub txog, tseem tshuav yam puav uas yus ua tsis tau li Tswv Ntuj nyiam thiab.

Kuv lam piav pem xwb, thov zam txim pub kuv, yog qhov twg ho hais tau tsis zoo thiab tsis yog lawm.