HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


 TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty

Latest topics

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

» Cov Txiv Plig ua tau muaj txiaj ntsim rau Peb Hmoob nyob Los Tsuas, Thaib teb ua ntej & tom qab 1975
by Maiv Tooj 14th November 2022, 10:03 am

Suav neeg tuaj saib, txij hnub 17/09/2010 los mus.


4 posters

    TSO TXHUA YAM YUAM KEV RAWS POJ YAWM TAU UA LOS TSEG

    xiong_jp
    xiong_jp


    Messages : 11
    Date d'inscription : 2012-08-08
    Age : 71
    Localisation : FRANCE Orleans

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty TSO TXHUA YAM YUAM KEV RAWS POJ YAWM TAU UA LOS TSEG

    Post  xiong_jp 27th June 2013, 12:19 am


    TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Saint_10

    1- Nyob zoo ib tsoom kwv tij nkauj muam hmoob nyob thoob ntiaj teb, Ua ntej kuv yuav los piav txog Tswv Ntuj lub txiaj ntsim kev hlub peb ib tsoom haiv neeg nyob thoob plaws rau saum lub npoo ntiaj teb no; mas kuv yuav xub thov hu txog peb leej Txiv Tswv Ntuj tus muaj hwj chim loj tas nrho. Hu txog leej Txiv, leej Tub thiab leej Ntuj plig ntshiab lub npe. Kuv thov kom peb Txiv Tswv Ntuj tus muaj hwj huam los pab cev tes yaws daim ntaub uas thaum ub dab phem tau muab los npog peb cov poj yawm txwv koob qhov muag tau ntau txhiab ntau pua xyoo los lawm. Thiab kuv thov kom Tswv Ntuj los pab rho tus ntsia uas dab phem tau muab los ntsaws peb cov poj yawm txwv koob pob ntseg.    

    2- Vim niaj hnub no peb haiv hmoob tsis hais tus muaj kev txawj ntse los tus tsis txawj ntse li. Peb hmoob qhov muag ntsia ntsoov los yeej tsis pom Tswv Ntuj txoj kev hlub hmoob; pob ntseg mloog ntsoov los hmoob tsis hnov thiab tsis to taub txog Tswv Ntuj txoj kev cawm kom hmoob dim ntawm dab phem txhais tes muaj taug no mus li. Kuv thov kom Tswv Ntuj pab qhib peb haiv hmoob qhov muag xwv tom ntej no hmoob lub qhov muag thiaj yuav qhib rov los pom Tswv Ntuj txoj kev hlub hmoob. Hnub no kuv yuav tuaj piav ib zaj hais txog peb txoj kev ntseeg Yes Xus thiab peb kev ntseeg dab qhuas poj yawm ua ke rau nej sawv daws tau hnov. Vim tias nyob ntiaj teb no muaj ntau txoj kev teev hawm; tiam sis tsuas muaj ib txoj thiaj yog teev tus tseem Tswv Ntuj xwb dua li ces yog neeg tsis paub qhov tseeb lam teev xwb.                   

    3- Hnub no yog nej tau hnov lawm saib nej puas yuav to taub tias txoj kev teev hawm twg thiaj yog txoj tseem ceeb thiab ciaj sia tiag tiag uas tsim nyog peb yuav teev hawm pab peb lub neej mus ntxiv tom ntej. Txhua txoj kev teev hawm nyob ntiaj teb no puav leej zoo tab sis nws zoo tsis txaus. Vim li cas ho hais tias  zoo tsis txaus? Rau qhov tias txhua txoj kev tee hawm no tsuas yog neeg lub tswv yim tsim tawm los xwb; nws tsis yog tuaj ntawm Tswv Ntuj tuaj. Nyob ntiaj teb no tsuas muaj ib tug thiaj yog tus tseem Tswv Ntuj saib xyuas neeg ntiaj teb xwb. Ntxiv no mus qhia nej paub  tseeb tias kuv yog ib tug ntseeg Yes Xus nyob rau hauv lub koom txoos Catholique tau 35 xyoos rau xyoo 2013 no lawm.

    4- Txij hnub kuv tau txiav siab los ntseeg YesXus mas kuv tau kub siab los muab txoj kev ntseeg YesXus no lub paus tshawb mus kawg ntsis kom paub txog lub ntsiab saib yog dab tsi tiag ! Thaum muab tshawb tas, kuv thiaj pom tseeb tias txoj kev ntseeg Yus Xus thiaj yog txoj kev teev hawm tus tseem Tswv Ntuj tiag tiag uas niaj hnub no nws lub qhov muag ntsia ntsoov peb neeg ntiaj teb ntag. Thaum kuv tshawb pom tseeb li hais no lawm kuv tseem tig rov los muab peb hmoob poj yawm txoj kev teev hawm dab qhuas tshawb xyuas lub paus mus kawg ntsis kom paub meej tias ua li peb poj yawm txoj kev ne ho yog mus dua twg lawm thiab? Thaum muab tshawb xyuas tas thiaj pom tseeb tias Peb Hmoob cov poj yawm txoj kev teev hawm dab qhuas no yeej yog yuam kev lawm tiag tiag li !

    5- Vim cov poj yawm tsis paub txog tus tseem tswv ntawm neeg lawm, Lawv mus teev tej yam uas yog neeg txhais tes tsim tawm los xwb, nws tsis muaj lub tswv yim yuav los pab tau neeg. Txoj kev ntseeg Yes Xus nws yog txoj hauv kev yuav coj tau neeg ntiaj teb rov mus ua Tswv Ntuj cov tub ki. Vim peb neeg ntiaj teb cov poj yawm tsis mloog Tswv Ntuj lus qhia; lawv tau mus mloog dab phem lus ntxias ces thiaj tau yuam kev ncaim ntawm Tswv Ntuj mus lawm xwb. Lub caij thaum kuv tseem nyob hauv lub neej teev dab qhuas poj yawm, kuv kuj tsis tau yog ib tug txiv coj dab; tab sis hais txog hmoob kev cai dab qhuas mas kuv yeej paub zoo tias yuav ua li cas thiaj haum dab tsuas yog tias kuv tsis txawj ua neeb xwb.

    6- Hais txog ntawm kuv mas qhia tseeb rau nej paub tias kuv tsis yog ib tug xib hwb nawv, kuv yog ib tug neeg ntseeg Yes Xus li sawv daws xwb. Mas hnub no sob lus kuv yuav tuaj piav me ntsis txog lub ntsiab hais tias yog vim li cas peb ntiaj teb neeg twb yog Tswv Ntuj tsim cas peb ho tsis teev haw Tswv Ntuj xwb nyias tseem mus teev dab qhuas raws nyias poj yawm  qhia los thiab. Hnub no xav kom nej sawv daws paub txog qhov muaj tseeb zoo li yuav hais mus nram no. Tsis yog yuav muab los hais hem nej los dag rau nej. Sob lus hnub no yuav muab los hais rau  nej no mas tsis yog  yuav muab hais los yuam ib leeg tus twg hos yog xav qhia qhov tseeb rau nej paub xwb. Txawm nej yuav ntseeg thiab tsis ntseeg los qhov ntawd tsis yuam nej. Kuv yuav tsis hais tas cov lus nyob hauv phau ntawv ntshiab tsuas yog muab lub ntsiab me me los piav qhia rau nej xwb.
    Hnub txheej thaum ub Tswv Ntuj tsim tau lub ntuj lub ntiaj teb, Tswv Ntuj tsim neeg los nyob rau ntiaj teb no yog kom neeg los teev thiab hawm Tswv Ntuj tib leeg xwb. Tsis yog kom neeg los teev dab teev mlom zoo li nej tau pom niaj hnub no. Tab sis kuj tsis yog neeg txhob txwm ntxeev siab rau Tswv Ntuj zoo li ntawd. Vim yog muaj ib tug los ntxias neeg kom neeg yuam kev ncaim ntawm Tswv Ntuj mus teev dab teev mlom zoo li ntawd lawm xwb. Yog nej tsis tau mus tshawb xyuas kom nej paub txog lub hau paus keeb chiv ces nej yuav xav tias Tswv Ntuj  ib txwm tsim neeg los teev dab teev mlom zoo li no. Niaj hnub no kuv tau hnov muaj coob leej hais tias txhua txoj kev teev hawm nyob ntiaj teb no puav leej yog tuaj ntawm Tswv Ntuj tuaj huv si. Cov hais li no mas yog vim lawv tsis paub qhov tseeb lawv thiaj hais li ntawd.

    7- Hais rau nej tias yog txhua txoj kev teev hawm no puav leej yog tuaj ntawm Tswv Ntuj tuaj thiab yog zoo txaus lawm mas Tswv Ntuj yuav tsis tso nws leej Tub Yes Xus los tuag saum tus ntoo khaub lig theej neeg ntiaj teb lub txhoj tuag no ib zaug li. Vim txhua txoj kev teev hawm no puav leej yog kev teev hawm cua tag nrho; yog tuaj ntawm dab phem txoj kev haub ntxias neeg kom yuam kev tuaj xwb, tsis yog ib cov kev teev hawm ciaj sia yuav cawm tau neeg ntawm tus nywj tuag. Txoj kev tuag no yog dab phem muab los nog rau neeg ris hnyav tas nrho ib txheej dhau txheej tiam dhau tiam los txog niaj hnub no kiag ! Li ntawd peb neeg ntiaj teb yog Tswv Ntuj tub ki Nws thiaj hlub peb tas npaud, Nws thiaj tso nws leej Tub Yes Xus yug los rau ntiaj teb no.

    8- Kom nws muaj lub cev zoo li neeg xwv thiaj los qhiav tau Tswv Ntuj txoj kev cawm no rau neeg ntiaj teb paub. Yog leej twg ntseeg thiab ua raws li Yes Xus cov lus qhia tseg tus ntawd nws lub neej tom ntej sab ntsuj plig yuav tsis poob mus rau lub teb chaws tuag lawm nws yuav tau txais txoj sia tshiab uas yog Tswv Ntuj npaj tseg rau nws. Hnub no hais rau nej txhua tus paub tias tus ntxias kom neeg ntxeev siab ncaim ntawm Tswv Ntuj mus nws yog leej twg ? Nws yog  tus dab phem uas peb hmoob hu ua ntxwg nyoog. Qhov no nws muaj tim khawv qhia tseeb kawg nkaus nyob hauv phau ntawv Ntshiab Cog Qub Lus. Yog nej leej twg ho tsis ntseeg tej lus hais no los kuv caw nej ho mus tshawb xyuas nyob hauv phau ntawv Cog Qub Lus. Ntawv hauv paus qhia tias thaum ub Tswv Ntuj tsim thawj tug neeg mas yog Tswv Ntuj muab ib thooj av nplaum los puab.

    9- Tswv Ntuj hais tias kuv yuav tsim kom neeg zoo xws li kuv tus duab me ntsis xwv neeg thiaj txawj los ua tus tswv kav lub ntiaj teb thiab txawj kav tas txhua yam kuv tau tsim xws lis kab ntsaum me nas noog tsiaj loj tsiaj me huv si. Ces Tswv Ntuj tshuab pa muab txoj sia rau neeg, neeg thiaj ciaj sia txawj ua zog txawj mus kev muaj lub tswv yim xws li Tswv Ntuj me ntsis. Muaj ntawv sau tseg tias thawj tug neeg yog As Das, peb hmoob lus hais tias yog Nraug Oo. Tswv Ntuj tso Nraug Oo nyob hauv lub vaj txiv ntoo uas Tswv Ntuj cog rau neeg noj kom neeg txhob tau khwv li niaj hnub no. Lub caij ntawd Tswv Ntuj pom tias cia Nraug Oo nyob ib leeg xwb tsis muaj ib tug phim nws los ua nws khub pab nws. Ces Tswv Ntuj thiaj tso ib tug dab ntub los ua kom Nraug Oo tsaug zog. Tswv Ntuj thiaj rho Nraug Oo ib tug tav los puab ua Nkauj Iab. Tswv Ntuj coj Nkauj Iab los rau Nraug Oo thaum Nraug Oo pom Nkauj Iab, Nraug Oo thiaj tsa ncauj hais tias tus no txha yog tseem kuv txha nqaij yog tseem kuv nqaij, nws yuav hu ua poj niam.

    10-  Luag lwm haiv neeg lus hu Nkauj Iab tias Eve; tab sis peb hmoob tsis muaj ntaub ntawv sau  cia li lwm haiv neeg tsuas yog hnov tej laus muab hais ua dab neeg txheej dhau txhee tiam dhau tiam xw; Hmoob tsis paub qhov tseeb lawm. Ces niaj hnub no hmoob feem coob thiaj to taub yuam kev tias, Nraug Oo thiab Nkauj Iab mas tsuas yog hmoob tus xwb tsis yog lwm haiv neeg tus. Tab sis qhov muaj tseeb ces, Nraug Oo, Nkauj Iab thiab Adam, Eve ces yog tib tug xwb tsis muaj lwm tus nyob qhov twg hlo li lawm. Yog vim thaum ub muaj zoo li no los ces niaj hnub no ntiaj teb neeg txhua nkawm niam txiv txwj nkawm mas thiaj muaj qee zaus tus txiv zoo zoo nraug ho yuav tus poj niam phem tsis zoo nkauj kom phim nws. Muaj qee nkawm niam txiv tus niam zoo zoo nkauj cas ho tsis yuav tus txiv zoo nraug kom ho phim tus niam. Qhov no hmoob hais li cas? Hmoob hais tias tos nws ho yuav los yog nws tus tav. Tej no nws yeej muaj tseeb tiag tsis yog lam hais.

    11-Lub caij ntawd Tswv Ntuj tau muab lub ntiaj teb no los ua Nraug Oo thiab Nkauj Iab nkawd tug lawm. Tswv Ntuj tau ceeb toom li cas rau nkawd. Tswv Ntuj hais tias nyob hauv lub vaj no, neb noj tau tas nrho cov txiv ntoo hauv lub vaj no; tab sis tshuav tsob nyob hauv lub plawv vaj mas neb tsis txhob noj tsis txhob kov li. Yog neb noj, neb kov hnub twg ces neb kawg tuag xwb ! Dhau ntawd los nkawd yeej tau ua lub neej mloog Tswv Ntuj lus. Nkawd ua lub neej nyob kaj siab lug xwb.  
    Tsis paub kev txob txhawj txog dab tsi li, tsis muaj kev quaj kev ntshai kev mob kev nkeeg dab tsi li. Nkawd ua lub neej nyob thaj yeeb lug xwb. Tab sis lub sij hawm ntawd tus dab phem ntxwg nyoog uas lwm haiv neeg lawv hu ua (satan) los ( lucifer ), tus dab phem no nws raug ntiab tawm saum Tswv Ntuj qaum Ntuj teb chaws poob los rau ntiaj teb vim nws siab phem. Ua ntej ntawd ntxwg nyoog yeej yog Tswv Ntuj ib tug tub txib uas Tswv Ntuj tsim los pab ua Tswv Ntuj tej dej num ib yam li txhua tus tim tswv. Tab sis nyob saum qaum Ntuj, Tswv Ntuj twb xub tsim muaj ib tug thawj tim tswv los ua tus thawj coj saib xyuas Tswv Ntuj tsoom tub txib lawm. Nyob hauv phau ntawv cog qub lus, Ntawv das nias zaj 12. nqi.1 txog 4. Lawv sau nws lub npe tias: "Thaum txog nub kawg, tus vaj txheeb loj Mis kas yuav los nyob ze koj tsoom pej xeem."

    12- Tswv Ntuj tus tub txib Mis Kas no mas kuv xav tias ntshe yog tus uas peb hmoob hu ua nyuj vab tuam teem no ntag. Vim hmoob muaj tej zaj kwv txhiaj hais tias: "wb daj dee plees nkauj nraum hais zoo luaj no tsis tau los tseg cia wb cev ntaj ntsug tuag nthi rau rab hniav riam es mam nco ntsoov rov mus thov dua ntawv pem nyuj vab teem rov yug los sib yuav rau fab lwm tiam." Nyob hauv Zam tsab ntawv Qhib yav tom ntej, zaj 12 nqi 1 txog 18  Sau tseg tias: "Muaj ib lub cim loj tas nrho tshwm nyob saum ntuj. Yog ib tug poj niam hnav lub hnub, lub hli nyob hauv nws qab xib taws, kaum ob lub hnub qub vij nws taub hau, nws ntsaj vim nws tab tom daws cev.

    13- Tseem muaj dua ib lub cim tshwm tuaj nyob saum ntuj, yog ib tug niag zaj loj kawg. Liab ploog cuag hluav taws, Tus zaj sawv ntsug ntawm tus poj niam uas tab tom yug me nyuam xub ntiag. Npaj yuav nqos tus me nyuam uas tus poj niam tab tom yug. Tus poj niam yug tau ib tug me tub, yog  tus yuav tuav ib rab cwj hlau coj tas txhua haiv neeg. Tab sis muaj neeg nqa tus me nyuam mus rau Tswv Ntuj. Nyob saum Tswv Ntuj lub theej kiab lawm. Ces tus zaj thiab tus vaj txheeb  Mis kas thiaj ua ib nthwv rog loj tas nrho nyob saum ntuj. Tus zaj swb rog rau tus vaj txheeb  Mis kas  ces tus zaj tsis muaj chaw nyob saum Ntuj lawm." Luag thiaj muab ntxwg nyoog pov los rau ntiaj teb mus nyob ntuj txiag teb tsaus. Tab sis niaj hnub no peb txhua tus yeej tsis tau paub tias, Ntuj txiag teb tsaus nyob qhov twg li; lo lus hais tias ntuj txiag teb tsaus tsuas yog peb hnov ntawm peb cov poj yawm txwv koob los xwb; xyov yog dab ntxwg nyoog qhia rau lawv paub los yog lawv paub lawv.

    14- Vim tias nyob hauv peb hmoob kev cai dab qhuas, thaum muaj ib tug tuag tso ntiaj teb tseg mas tus txiv cuab tsav los laig nqaij mov rau tus tuag mas nws hais rau tus tuag tias: "Tuag txij koj ib leeg tuag, noj txij koj ib leeg noj, noj tsis taus nchuav nruab taub, haus tsis taus nchuav nruab rag, ua tiag nqa mus pub poj pub yawm noj lawm ntuj txiag teb tsaus ntuj tshav teb nqhuab." Hnov lo lus no mas zoo li peb cov poj yawm lawv mus nyob rau ib lub teb chaws tshaib tshaib, nqis nqi, txom txom nyem tsis pom lub hnub lub hli li. Niaj hnub no peb cov kwv tij neej tsa uas tseem coj txoj kev teev dab qhuas poj yawm yeej tseem tsis tau tso tseg li. Peb cov tso txoj kev teev dab qhuas poj yawm tseg lawm mas peb hnov cov lus ntawd mas yog ib cov lus phem kawg.

    15- Tab sis nyob hauv peb cov kwv tij neej tsa uas tseem teev dab qhuas poj yawm mas nws zoo li yog ib lo lus npog lawv pob ntseg lawm. Tab lawv txawm mloog ntsoov los zoo li lawv yeej tsis hnov li. Nyob hauv phau Ntawv Ntshiab tsis muaj lo lus sau tias "ntuj txiag teb tsaus". Raws li kuv pom mas tsuas muaj los lus sau tias: "Teb chaws tuag thiab teb chaws tsaus ntuj xwb." Hnov coob leej pheej hais lo lus tias ntuj tawg. Nyob hauv ntawv kuj tsis pom los lus sau tias "Ntuj tawg". Kuv tsuas pom muaj teb chaws them txim thiab muaj lub pas leej faj nplaim taws xwb. Hais txog lub pas leej faj nplaim taws mas peb yeej tsis muaj leej twg paub txog tias nws zoo li cas. Tab sis kuv lam  muab hais piv txwv rau nej tias tej zaum yuav yog zoo li cov roob hluav taws tawg uas luag lwm haiv neeg hu ua (volcans), nej pom cov kua av yaj ntws cuag dej liab ploog cuag kua tooj kua hlau xwb.  Pom cov tub thaij duab muab tog pas pov rau mas. Tus pas poob twb tsis tau txog twb kuab nyiab yaj tas.

    16-Kuv hnov muaj coob leej lawv hais tias Tswv Ntuj pub lawv tau yees pom los yog npau suav mus pom cov neeg tej ntsuj plig poob rau ntuj tawg. Tab sis nws tsis yog ntuj tawg, tsuas yog lub teb chaws them txim xwb. Vim hais tias cov ntsuj plig uas nws poob mus rau ntuj tawg los yog lub pas leej faj nplaim taws mas nws yuav ciaj tsis tau ib nas this nyob li ! Lawv cov mus pom ntawd tsuas yog lub teb chaws them txim xwb. Vim cov ntsuj plig ntawd tseem hais tau lus rau lawv. Qhia rau nej paub tias cov ntsuj plig uas nws poob mus rau teb chaws them txim mas lawv tsis tuag nawv. Lawv nyob tag txim ces lawv kuj yuav dhau tau mus ua ib tug neeg ntshiab dawb huv thiab.
    Muaj ib lo lus nyob hauv Ntawv Ntshiab sau tseg tia: "Tswv Ntuj yuav muab neeg coj mus nchuav dua tshiab li cov tub nchuav nyiaj nchuav kub, Muab cov nyiaj kub qub tso rau hauv lub yeej vub; ces muab hlawv kom yaj nchuav los ces nws yog ib cov nyiaj kub tshiab lawm." Ntawm neeg cov ntsuj plig mus poob rau teb chaws them txim los zoo tib yam; thawm cov ntsuj plig poob hauv Tswv Ntuj cov hluav taws kub kub tawm los. Ces neeg kuj yuav yog ib tug dawb huv yug dua tshiab yuav tau mus nyob Ntuj ceeb tsheej thiab rov los hais txog ntawm dab ntxwg nyoog!

    17- Thaum ntxwg nyoog pom tias nws poob rau qhov chaw txom nyem lawm, ces nws npau taws heev nws  thiaj tuaj ntxias Nraug Oo thiab Nkauj Iab kom txhob mloog Tswv Ntuj tej lus qhia. Lub caij ntawd ntxwg nyoog thiaj tuaj xyuas Nraug Oo thiab Nkauj Iab nkawd nyob hauv lub vaj txiv ntoo. Vim nws yeej paub meej lawm hais tias Tswv Ntuj tau ceeb toom ib lo lus qhia tseg rau Nraug Oo thiab Nkauj Iab nkawd lawm. Thaum ntxwg nyoog tuaj nws txia ua ib tug nab tuaj ntxias nkawd. Nws xav ntxias Nraug Oo los nws paub tias txiv neej ces siab tawv me ntsis tsam ho tsis kam mloog nws lus ntxias. Ces nws thiaj tos kom thaum Nkauj Iab nyob nrug deb ntawm Nraug Oo lawm, ces nws thiaj hais rau Nkauj Iab tias: "Tswv Ntuj hais tias neb yuav tsis txhob noj txhua yam txiv ntoo hauv lub vaj no puas yog ?" Tus poj niam teb tias: Wb noj tau cov txiv ntoo hauv lub vaj no tib si tsuas tshwj tsob nyob nruab nrab hauv lub vaj xwb, Tswv Ntuj hais tias neb tsis txhob noj tsis txhob kov, yog neb noj neb kov hnub twg ces neb tuag xwb !  

    18- Tus nab teb tias tsis muaj li ntawd, neb yuav tsis tuag. Vim Tswv Ntuj paub tias yog hnub twg neb noj tsob txiv ntoo no lawm ces neb qhov muag yuav qhib, neb yuav paub qhov phem qhov zoo, neb yuav paub tas ib puas tsav yam li Tswv Ntuj. Ces Nkauj Iab xav zoj tias tsob txiv ntoo no tseem ua tau kom yus txawj nte tuaj thiab paub tas ib puas tsav yam li Tswv Ntuj thiab. Ces Nkauj Iab  thiaj de tsob txiv Tswv Ntuj txwv tsis pub nkawd noj nqa mus rau Nraug Oo noj thiab.

    19-Thaum nkawd noj lub txiv ces nkawd qhov muag txawm qhib li ntxwg nyoog hais tiag, Ces nkawd paub qhov phem qhov zoo paub kev txob kev txhawj kev ntshai tas ib puas tsav yam li niaj hnub no peb sawv daws ntag. Sij hawm ntawd Tswv Ntuj paub tias nkawd noj tsob txiv nws txwv lawm ces Tswv Ntuj tuaj xyuas nkawd tam sim ntawd. Nkawd hnov Tswv Ntuj tuaj nkawd ntshais thiaj khiav mus tsiv nraim rau hauv cov hav ntoo lawm. Thaum Tswv Ntuj tuaj txog cas tsis pom nkawd lawm, Tswv Ntuj thiaj hu tias: "Adam koj nyob qhov twg lawm?  Adam  teb tias: "Kuv nyob ntawm no, vim kuv hnov koj rhais ruam tuaj hauv lub vaj kuv ntshai vim kuv liab qab thiaj tau mus tsiv nraim." Tswv Ntuj  hais ntxiv tias: "Leej twg qhia tias koj liab qab? Puas yog koj noj lub txiv kuv txwv tsis pub noj lawm?" Ces Nraug Oo thiaj teb tias yog tus poj niam uas koj tso nyob ze kuv muab lub txiv rau kuv ces kuv thiaj noj. Tswv Ntuj hais rau tus poj niam tias: koj ua dab tsi li ntawd?

    20- Tus poj niam teb tias: Yog niag nab ntxias kuv, Kuv thiaj noj. Tswv ntuj hais rau tus nab tias vim koj tau ua ib qhov phem li ntawd mas koj hmoov yuav phem tshaj tas ib tsoom tsiaj hu si; koj lub plab yuav nkag hauv av mus tas koj sim neej. Li ntawd hniaj hnub no nab thiaj muab plab nkag hauv av li Tswv Ntuj tau foom lus phem ntawd. Raws li hnov tej laus hais dab neeg mas thaum ub nab muaj tes taw thiab no. Tswv Ntuj hais ntxiv tias: Kuv yuav ua kom koj thiab tus poj niam neb cov xeeb ntxwv yuav sib ua yeeb ncuab mus tas ib txhis. Nws yuav tsuj koj taub hau koj yuav tom nws luj taw. Vim muaj lus foom tseg li ntawd niaj hnub no peb neeg ntiaj teb pom tsis tau nab li. Txawm nab tsis tau ua phem los tsuav pom thaum twg ces kawg muab tua thiab ntaus kom tuag xwb; vim raug Tswv Ntuj Foom lus phem thaum ub lawm. Tswv Ntuj hais rau tus pom niam tias. Vim koj noj lub txiv kuv txwv tsis pub noj lawm ces kuv yuav foom lus phem rau koj !

    21- Txij no mus thaum koj yuav xeeb tub yug kiv, koj yuav muaj mob ntau koj thiaj yuav yug tau tub ki ! Koj yuav ntshaw txog koj tus txiv thiab koj tus txiv tseem yuav ua tus tswv tswj koj mus tas koj sim neej thiab. Vim thaum ub Tswv Ntuj tau foom tseg li ntawd lawm ces niaj hnub no txhua tus poj niam nyob ntiaj teb no, txawm yuav muaj kev txawj ntse siab npaum twg los nws yeej yuav tsum tau nyob qab tswj hwm ntawm nws tus txiv xwb thiaj zoo. Niaj hnub no yog tus poj niam twg tsis hwm nws tus txiv ces tus ntawd lub neej yeej tsis haum kwv haum tij tsis haum phooj ywg li. Qhov no tsis yog lam hais, nws yeej muaj tseeb zoo li ntawd. Tswv Ntuj hais ntxiv rau Nraug Oo tias vim koj mloog koj poj niam lus koj noj lub txiv kuv txwv tsis pub noj lawm ! Ces kuv yuav foom lus phem rau av kom nroj thiab hav pos tuaj puv av; koj yuav tau mus khwv kom hws nrog koj thiaj yuav tau noj. Yog vim thaum ub muaj li no los ces niaj hnub no peb txhua tus yuav tau noj los yuav tsum tau mus khwv kom hws nrog thiaj tau noj. Txij hnub ntawd mus Tswv Ntuj thiaj muab Nraug Oo thiab Nkauj Iab nkawd ntiab tawm hauv lub vaj txiv ntoo mus lawm. Cia neeg mus ua lub neej raws li neeg kev tsis mloog lus lawm. Dhau ntawv los Nraug Oo thiab Nkauj Iab nkawd muaj ob tug tub; tus hlob hu ua kas ees, tus yau hu ua As npes. Kas ees thiab As npes ces yog ob tug hmoob hu ua Cis Tuj thiab Qav Kaws no ntag. Tus hlob nyiam ua liaj ua teb, tus yau nyiam yug tsiaj. Thaum ub cov poj yawm txwv koob lawv kuj pib ua lub neej xws li peb sawv daws niaj hnub no thiab. Tab sis lawv tseem tsis tau paub kev teev dab qhuas poj yawm xwb. Ces ua tau ib cim qoob tshiab siav los yuav tau muab ib qhov los hlawv ua Tswv Ntuj tsaug. Vim yog muaj tswv ntuj tso lub hnub tuaj ziab tso nag tso dej los ywg thiaj ua tau noj, Tab sis los ntev tom qab  no ces ua tau ib cim qoob tshiab los ho tsis paub ua Ntuj tsaug lawm, ho hloov mus ua poj yawm tsaug thiab dab tsaug lawm xwb.

    22- Hais qhov tseeb ces txheej no yog yuam kev lawm, Vim tias tus tso lub hnub tuaj ziab, Tso nag tso dej los ywg lub ntiaj teb kom neeg ua tau noj, Nws tsi yog poj yawm tso los yog dab tso, Hos yog Tswv Ntuj tso, Tab sis kas ees nws txais tau dab ntxwg nyoog lub siab phem uas coj tuaj ntxias nkauj iab noj lub txiv uas Tswv Ntuj txwv tsis pub noj. Ces kas ees nws muaj ib lub siab phem xws li dab ntxwg nyoog lawm. Ces kas ees thiaj muab nws tej npluag nplej npluag pob kws los hlawv ua Ntuj tsaug xwb. Tswv Ntuj thiaj tsis kam txais nws cov paj tshab uas nws muab los hlawv ua ntuj tsaug.
    As npes mas nws ho txais tau lub siab zoo uas yog Tswv Ntuj pub rau nraug oo, Ces As npes.

    23- Nws mus xaiv tus zoo tshaj nyob hauv nws pab tsiaj los tua hlawv ua Tswv Ntuj tsaug. Ces Tswv Ntuj thiaj zoo siab txais As npe cov paj tshab thiab nyiam As npes dua Kas Ees. Tab sis Kas Ees tsis pom qhov nws tau ua txhaum rau Tswv Ntuj li. Nws tsuas xav tias yog vim muaj kuv niag kwv ntawd mas Tswv Ntuj thiaj tsis nyiam kuv xwb. Ces muaj ib hnub nws thiaj ntxias nws tus kwv tias: "Wb mus ncig ua si." Thaum nkawd ob kwv tij mus deb ntawm tej chaw nyob lawm, ces Kas Ees tig loo los mos ntiag nws tus kwv muab ntaus tuag kiag lawm! Ces nws thiaj khiav rov los tsev. Sij hawm ntawd Tswv Ntuj twb paub tias. Kas Ees muab nws tus kwv As npes tua lawm ! Ces Tswv Ntuj thiaj tuaj xyuas tam sis ntawd. Kas Ees tab tam khiav los mus,  ces Tswv Ntuj thiaj hais rau Kas Ees tias koj mus dab tsi los ? Kas Ees teb: "Kuv mus ua si los." Tswv Ntuj nug Kas Ees tias: "Koj tus kwv As Npes nyob qhov twg ? Kas Ees teb tias: " Kuv tsis paub Kuv puas yog tus zov rawv kuv tus kwv."

    24- Tswv Ntuj hais ntxiv tias. Koj tau ua dab tsi ? Koj sim mloog saib, koj tus kwv cov ntshav quaj qw hauv av tuaj rau  kuv ! Tswv Ntuj hais tias: "Neeg siab phem neeg rov tua neeg mas neeg yuav tuag raws tus no mus !" Tswv ntuj hais tias: "Tus nab siab phem diam, tiam sis muaj ib hnub muaj ib tug poj niam yuav yug ib tug tub los tsuj tus nab taub hau." Lo lus no yog hais txog Niam Mab Liab yuav yug YesXus lo yeej dab phem, Dhau ntawd los ces nraug oo thiab nkauj iab nkawd cov xeeb ntxwv huaj vam coob tuaj thiab tsis paub txog tias. Muaj ib tug Tswv Ntuj yog tus tswv ntawm neeg lawm,

    25- Ces Tswv Ntuj pom tias ntiaj teb neeg siab phem tas nrho thiab ua qias kawg li lawm. Neeg niaj hnub sib ntau sib tua tuag pawg lug xwb. Ces Tswv Ntuj tu siab thiab pom tias cas nws tsim tau neeg los nyob rau ntiaj teb no ib zaug zoo li tsis muaj txiaj ntsim qab hau dab tsi rau Tswv Ntuj li. Tswv Ntuj thiaj txiav siab tias nws yuav muab neeg rhuav kom ploj ntais hauv ntiaj teb mus tsis tshuav ib tug nyob ntiaj teb no li! Sij hawm ntawd Tswv Ntuj thiaj tuaj xyuas neeg ntiaj teb cas tseem tshuav Nom Hes tsev neeg tseem yog neeg siab zoo thiab hwm Tswv Ntuj. Coj tau raws li Tswv Ntuj nyiam. Tswv Ntuj thiaj hais rau Nom Hes tias: "Lub caij uas txhua tus muaj lub cev nqaij yuav ploj mus los txog lawm, kuv tau txiav li ntawd.

    26- Koj yuav tau txua ib lub nkoj ntev li 300 tshim, dav li 50 tshim siab li 30 tshim. Koj yuav coj tas cov tsiaj nyob ntiaj teb no ib hom ib nkawg nrog koj mus rau hauv lub nkoj, tau coj mus ua noob. Vim txhua yam yuav tuag nrog neeg ploj mus tas ! Koj yuav coj koj poj niam thiab cov tub nyab nrog koj mus hauv lub nkoj." Nom Hes thiaj ua raws li Tswv Ntuj tau qhia. Nws mus txua nkoj sawv daws pom nom hes txua nkoj lawv nug tias. Koj txua nkoj ua dab tsi ? Nom hes teb, Yog vim Tswv Ntuj yuav tso dej los nyab ntiaj teb kom neeg tuag tas ! Lawv luag nom hes, Lawv hais rau Nom Hes tias tsis yog koj vwm lawm los? Peb tseem yuav noj nqaij haus cawv ua lom zem, Cas koj ho hais tias dej yuav nyab ntiaj teb no? Tab sis nom hes tsis mloog qhov lawv thuam nws li; nws rau rau siab txua koj xwb.
    Thaum Tswv Ntuj pom tias Nom Hes txua tau nkoj lawm, ces Tswv Ntuj hais rau Nom Hes tias koj coj koj poj niam thiab koj cov tub nyab nej mus lawm hauv lub nkoj. Tswv Ntuj qhib plho cov qhov rooj thaiv dej saum ntuj, cia dej ntws sis laub sis lug los rau ntiaj teb  tau 40 hnub 40 hmo ces dej thiaj nyab ntiaj teb! Raws li ntawv sau tseg tias dej nyab ntiaj teb tau 150 hnub txwm nkaus dej thiaj qhua tas nyob ntiaj teb, Ua rau neeg ntiaj teb tuag tu noob tu tsav ! Tsuas dim Nom Hes tsev neeg 8 leej los tsim noob neej rau ntiaj teb no xwb. Kuv tseem tau hnov ib tu kwv tij hmoob piav tias sij hawm thaum ub dej nyab ntiaj teb mas nyob rau ntawm peb haiv hmoob yog dim ob nus muag nyob hauv lub nruas daj los tsim noob neej rau ntiaj teb no xwb. Nws hais tias xyov luag lwm haiv neeg luag ho ua li cas, luag thiaj dim thiab. Hnub no xav kom nej sawv daws paub txog qhov tseeb zoo li no:

    27- Nkauj muam nraug nus thiab Nom Hes ces yog tib tug xwb, tsis muaj lwm tus nyob qhov twg hlo li. Vim lub sij hawm ntawd neeg ntiaj teb tseem yog ib haiv neeg xwb. Tswv Ntuj tseem tsis tau muab neeg  faib ua ntau haiv neeg zoo li nej qhov muag tau pom niab hnub no, Dhau lub sij hawm dej nyob ntiaj teb lawm, Nom hes cov xeeb ntxwv rov huaj vam coob tuaj. Lawv kuj rov muaj lub siab twm xeeb muab hlob li qub tuaj thiab. Lawv rov tsis paub txog tswv ntuj lawm. Lawv thiaj los sab laj tias peb yuav tsum los koom siab puab ib tug pej thuam siab siab kom mus txog saum lub ntuj.

    28- Lawv tis npe rau tus pej thuam ntawd tias: "Pej thuam npas npes", Ces lawv tab tom pib puab tug pej thuam, Tswv Ntuj thiaj hais tias: "Haiv neeg no kuv tau tsim lawv los ua ib haiv neeg xwb kom lawv thiaj muaj kev sib hlub tab sis lawv tsis hwm kuv lawv tseem thuam kuv. Yog vim lawv xav ua ntau haiv neeg, cia kuv muab lawv los faib ua ntau haiv neeg ! Sij hawm ntawd lawv tab tom siv zog puab pej thuam, ces Tswv Ntuj thiaj tso ib nthwv cua hlob los nplawm lawv sawv daws ntog tas hauv av ! Thaum lawv sawv daws sawv tau los ces, koj hais lus rau kuv los kuv tsis paub, kuv hais lus rau koj los koj kuj tsis paub thiab. Nyias hais nyias xeem lus sib txawv lawm. Tsis tas li ntawd ntsej muag los kuj sib txawv tas lawm thiab ! Ces lawv thiaj tso tus pej thuam tseg tsis puab ntxiv. Nyias khiav nyias mus nyob thoob lub ntiaj teb no. Li ntawd niaj hnub no nej thiaj pom tias muaj ntau pua haiv neeg sib txawv thiab nyias hais nyias ib xeem lus sib txawv yog nej tsis tau paub txog lub hauv paus. Ces nej yuav xav tias, Ntshe thaum ub Tswv Ntuj yeej ib txwm tsim kom nyias muaj nyias poj yawm, Tab sis qhov tseeb ces, Tas ntiaj teb neeg sawv daws puav leej yog xeeb ntxwv los ntawm Nraug Oo, Nkauj Iab los yog Adam Eve los xwb. Tsis muaj lwm tus nyob qhov twg hlo li lawm.

    29-  Dhau ntawd los neeg ntiaj teb thiaj sib ncaim mus ua ntau pua haiv neeg nyob thoob plaws rau hauv ntiaj teb no. Raws li nej qhov muag tau pom niaj hnub no. Tas sawv daws tsis paub txog Tswv Ntuj lawm! Ces txhua haiv neeg nyias thiaj mus teev dab teev mlom raws nyias cov poj yawm qhia los. Lub caij ntawd Tswv  Ntuj pom tias neeg ntiaj teb tsis muaj tus paub txog Tswv Ntuj lawm! Ces Tswv Ntuj thiaj tuaj xaiv Has Nplas Has (Abraham) los ua thawj tug neeg paub Tswv Ntuj thiab teev Tswv Ntuj uas yog haiv neeg His Xas Lais lawv tus yawg koob. Tswv Ntuj hais rau Has Nplas tias: "Koj tso koj txiv koj tsev neeg tseg. Koj mus nyob lub teb chaws kuv yuav qhia rau koj, Kuv yuav muab koj los ua ib haiv neeg loj, Kuv yuav foom hmoov zoo rau koj kom koj lub npe nto moo loj nyob rau ntiaj teb no, Tom ntej no mus tas ntiaj teb neeg yuav tuav txog koj lub npe los sib foom hmoov zoo. Thiab kuv cog lus rau koj tias: "Kuv yuav yog koj tus Tswv Ntuj, Koj yuav kuv haiv neeg mus ib txhis."

    30- Dhau ntaw los tsuas muaj haiv neeg His Xas Lais thiaj yog haiv neeg paub Tswv Ntuj thiab teev Tswv Ntuj xwb. Dua li txhua haiv neeg ces nyias mus teev dab qhuas raws nyias poj yawm qhia. Los yog ua raws li dab phem qhia rau neeg xwb. Vim sawv daws tej poj yawm yeej mus zwm rau dab phem txij hnub Nraug Oo Nkauj Iab nkawd tsis mloog Tswv Ntuj lus! Nkauj Iab mus ntseeg dab phem ntxias noj lub txiv toj txiv taug uas Tswv Ntuj txwv tsis pub noj los lawm! Hnub no yuav qhia qhov tseeb rau nej paub zoo li no.

    31- Niaj hnub no nej pom muaj ntau txoj kev teev hawm xws li teev mlom (buddha) los yog buddhist, teev muv xis lim (musulmans) los yog teev dab qhuas poj yawm. Tsis tag li no neeg tseem muaj ntau txoj kev teev hawm dab qhuas uas tsis tau muab los piav rau hauv no. Txhua txoj kev neeg teev hawm no, tsuas yog neeg lub tswv yim yuam kev thiab neeg ob txhais tes tsim tawm los rau neeg teev xwb! Tsis yog ib txoj kev teev hawm muaj txoj sia tuaj ntawm Tswv Ntuj tuaj. Txoj kev teev hawm tseem ceeb thiab yog teev tus tseem Tswv Ntuj,  nws tsuas muaj txoj kev mloog Yes Xus cov lus qhia kom paub txog tus tseem Tswv Ntuj txoj kev hlub neeg xwb.
    Vim Yes Xus yog Tswv Ntuj leej Tub. Tus cawm qab ntuj neeg kom dim ntawm dab phem txoj kev tuag. Dua li lwm txoj ces tsis muaj qhov yuav cawm tau neeg ntawm txoj kev tuag rov mus ciaj ua Tswv Ntuj tub ki li.  Nws yog ib cov kev teev hawm cuav xwb ! Vim li cas ho yuav hais tias yog cuav xwb? Vim tias txij hnub Nraug Oo Nkauj Iab nkawd tsis mloog Tswv Ntuj lus qhia. Ces ntiaj teb neeg tau ncaim ntawm Tswv Ntuj mus zwm rau dab phem lawm ! Ces dab phem yeej paub ntsoov tias muaj ib hnub tom ntej Tswv Ntuj yeej yuav rov tuaj cawm kom tau neeg ntiaj teb dim ntawm dab phem mus xwb, Ces dab phem thiaj maj zeeg tuaj tshoj (buddha) siab kom los qhia txoj kev teev hawm mlom no ua Yes Xus ntej 543 xyoos kom xwv thaum Yes Xus los txog ces neeg ntiaj teb txoj kev teev hawm mlom twb ruaj cag khov lawm ces neeg thiaj yuav tsis mloog YesXus lus qhia.

    32- Tab sis lub caij ntawd neeg ntiaj teb tseem tsis tau vam meej, Neeg yuav mus tshaj buddha txoj kev teev hawm mlom rau ntiaj teb neeg tsis yooj yim; buddha los qhia kev teev mlom ua ntej rau lub teb chaws INDIA. Nyob ze rau sab teb chaws neeg tawv daj Asia ces cov neeg tawv daj feem coob thiaj txais txoj kev teev mlom coob dua cov neeg tawv dawb Europe. Neeg tsis paub qhov tseeb, neeg xav tias mlom thiaj yog neeg tus huab tais uas pab neeg txhua hnub txhua hmo. Tab sis qho tseeb ces yog teev dab ntxwg nyoog lub hwj chim xwb! Yog nej leej twg tsis ntseeg tej lus tau hais no, nej kuj mus saib hauj sam cov tsev teev mlom ces nej yuav pom lawv puab cov duab nab duab zaj loj loj tuaj kub tuaj kaus qhov ncauj rua ras kaus hniav liab ploog! Qhov no txhais tau tias yog teev hawm tus nab txheej thaud los ntxias Nkauj Iab noj lub txiv toj txiv taug uas Tswv Ntuj txwv tsis pub noj lub hwj chim xwb! Niaj hnub no haiv neeg suav cov teev hawm mlom.

    33- Hnub twg yog lawv ua ib lub koob tsheej loj, xws li tsiab peb caug los xij; lawv yeej kwv kiag tus duab zaj ua ntej ces cov pej xeem mam tshuab qeej, tshuab hom, ntaus nruas qw lom vab vab lawv qab xwb. Qhov no los kuj yog qhia tau tias yog tus nab txheej thaud lub hwj chim xwb! Tab sis yog vim dab phem npog neeg lub qhov muag thiab muab neeg lub hlwb kaw kom neeg txhob paub txog tus tseem Tswv Ntuj lawm; kom xwv neeg thiaj teev hawm dab phem mus. Ib txhias tsis xeev rov los teev tus tseem Tswv Ntuj, nyob hauv peb hmoob zaj taw kev muaj ib nqi hais li no: "Thaum ub neeg tseem pom tau dab, ces neeg siab phem neeg tswv yim loj pheej muab dab ntxias coj mus muag noj; dab thiaj mus nqa hmoov tshauv pem ntxwj nyoog los nphoo neeg qhov muag." Ces neeg thiaj tsis pom dab lawm. Tab sis qhov tseeb ces tsis yog neeg tswv yim loj, neeg pheej muab dab coj mus muag noj li cov laus hais ntawd, dab yeej muab tshauv los nphoo neeg qhov muaj txij hnub dab los ntxias tau Nkauj Iab noj lub txiv toj txiv taug uas Tswv Ntuj txwv tsis pub noj los lawm !

    34- Lub sij hawm vaj Yes Xus yug los qhia Tswv Ntuj txoj kev cawm kom neeg tau yeej dab phem txoj kev ntxias neeg mus zwm rau txoj kev tuag mas sab teb chaws Arabe kwv yees li 70 % lawv puav leej tso lawv poj yawm tej kev teev hawm dab qhua tseg. Tig los teev hawm Tswv Ntuj huv si. Tab sis lub caij ntawd dab ntxwg nyoog pom tias nws yuav tsis yeej Yes Xus ces nws thiaj tig loo rov los tshoj Mahomet los qhia txoj kev teev hawm Mus xis lim (Musulmans) nyob rau sab teb chaws ARABIE ces sab teb chaws Arabe thiaj rov thaub qab tig rov mus teev hawm txoj kev ntseeg Muslim tag nrho huv si. Nej hnov qhov kuv hais no tej zaum nej yuav tsis ntseeg; tab sis nws muaj tseeb zoo li ntawd. Niaj hnub no nej pom nyob sab teb chaws ntawd. Lawv ua rog tsis muaj lub chaw xaus li lub teb chaws tas lub  twb pib tuaj yog vim dab tsi ?

    35- Hais txog qhov no mas txhais tau tias yog Tswv Ntuj muab txim rau cov teb chaws ntawd xwb. Vim cov teb chaws ntawd lawv tig rov ntxeev siab rau Tswv Ntuj, lawv rov mus teev dab ntxwg nyoog lawm. Hais rau nej tias nyob ntiaj teb no yog leej twg ntxub Yes Xus ces tus ntawd nws yeej yog ib tug tawm tsam Tswv Ntuj mus tuaj dab ntxwg nyoog tog lawm! Nej puas pom niaj hnub no sab teb chaws ntawd cov neeg ntseeg muslim mas ntxub cov neeg ntseeg Yes Xus kawg. Vim dab ntxwg nyoog yog tus ib txwm tawm tsam Tswv Ntuj txij puag thaum lub hauv paus los txog hnub no. Vim li cas ho yuav paub tias yog Tswv Ntuj muab cov teb chaws nyob sab Arabe ntawd rau txim? Nws muaj zoo li no: "Thaum ub Tswv Ntuj xaiv tau haiv neeg His Xas Lais los ua thawj haiv neeg paub Tswv Ntuj thiab teev Tswv Ntuj; Tswv Ntuj taug cog lus rau Has Nplas, mas yog hnub twg lawv ntxeev siab mus teev dab; ces Tswv Ntuj muab txim rau lawv!"  Thaum ub Tswv Ntuj muab  txim rau lawv mas muaj ob yam zoo li no: Yam 1, Tswv Ntuj mus tshoj kom lwm haiv neeg tuaj ua rog tua lawv ua kom lawv swb rog rau luag ces luag muab lawv ntes coj mus rau txim ua qhev. Ces Tswv Ntuj mam los tshoj tej tus neeg siab ncaj los qhia rau lawv paub tias vim nej tau tso nej tus Tswv Ntuj pov tseg, nej ntxeev siab mus teev dab li pej kum neeg lawm. Ces lawv mam tig rov los teev Tswv Ntuj, lawv thiaj rov tau nyob thaj yeeb dua. Yam 2, yog hnub twg lawv rov ntxeev siab mus teev dab li luag pej kum neeg ces Tswv Ntuj tso tus mob aws los rau lawv kom lawv tuag pawg lug ces Tswv Ttuj mam los tshoj tej tus neeg siab ncaj los qhia rau lawv tias. Vim nej tso nej tus Tswv Ntuj uas hlub nej pov tseg lawm; nej rov mus teev dab li lwm cov neeg pej kum lawm. Ces lawv tig rov los teev Tswv Ntuj. lawv thiaj rov tau nyob thaj yeeb li qub. Lub caij Yes Xus tuaj qhia txoj kev teev hawm Tswv Ntuj rau neeg ntiaj teb ntawd mas tas cov neeg nyob sab teb chaws ntawd 70% puav leej tso kev teev dab qhuas poj yawm tseg tig los teev hawm Tswv Ntuj. Tab sis txij hnub Mahomet los qhia txoj kev teev muslim ces tas cov teb chaws  Arabes  ntawd  90 % yeej yog cov tig ntxeev siab rau Tswv Ntuj rov mus teev dab lawm. Li ntawd niaj hnub no nyob rau sab teb teb chaws ntawd thiaj ua rog sib ntaus sib tua tsis muaj  hnub xaus; vim yog Tswv Ntuj muab txim rau lawv.

    36-  Kuv ho yuav tig los hais txog peb haiv hmoob nws kuj zoo tib yam li ntawd thiab. Niaj hnub no, Kuv hnov muaj ntau leej seev hais tias cas hmoob twb yog Ntuj tsim los nyob rau ntiaj teb no thiab cas Tswv Ntuj ho tsis hlub hmoob ho tsis muab ib thooj av los ua hmoob tug rau haiv hmoob nyob; kom xwv txhob raug luag lwm haiv neeg quab yuam tsim txom caij tsuj lawm. Yog li ntawd kuv nug nej tias ua li peb Hmoob puas tau mloog Tswv Ntuj tej lus qhia ?   Hais rau nej tias niaj hnub no kuv pom peb haiv hmoob mas tawv ncauj cam thawj npaum nkaus li thaum ub haiv neeg His Xas Lais ntag. Nej sim tsa qhov muag ntsia tas cov teb chaws muaj kev txawj ntse siab thiab vam meej nyob ntiaj teb no saib luag twb muab luag poj yawm tej kev cai dab qhuas tso pov tseg los tau 2000 tawm xyoo los lawm; luag tig mus teev hawm tus tseem Tswv Ntuj uas yog tus tsim lub ntuj lub ntiaj teb lub hnub lub hli.

    37- Nws yog tus tsim kom muaj noob neej los nyob rau lub ntiaj teb no ntag, Tswv Ntuj thiaj pub txoj koob hmoov zoo rau cov haiv neeg teev Tswv Ntuj. Luag thiaj tau txais Tswv Ntuj lub txiaj ntsim kev thoob tsib kev txawj nte ntawd los ua luag tug. Luag thiaj vam meej nplua nuj tshaj peb haiv hmoob tseem tsis rua muag los pom tej no thiab nyob thoob plaws rau hauv lub ntiaj teb no. Peb haiv hmoob nyuam qhuav muaj 1 % los nrog tsoom neeg ntiaj teb teev Tswv Ntuj xwb, Tshuav 99 % ces yog cov thuam txoj kev teev Tswv Ntuj thiab tsis to taub dab tsi li. Tseem thuam peb cov feem tsawg ua mus nrog tsoom neeg ntiaj teb teev Tswv Ntuj hais tias nej yog neeg yuam kev, nej tso nej poj yawm tseg, nej ho mus teev luag poj yawm, nej yog neeg rov taw tuam Ntuj lawm.../...

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  37987010
    xiong_jp
    xiong_jp


    Messages : 11
    Date d'inscription : 2012-08-08
    Age : 71
    Localisation : FRANCE Orleans

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  xiong_jp 27th June 2013, 12:20 am

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  59872210

    38- Tab sis qhov tseeb ces twb yog cov teev dab qhuas poj yawm thiaj yog cov rov taw tuam Ntuj ntag ! Vim kev teev dab qhuas ces yog kev tsis mloog Tswv Ntuj lus qhia; nws yog kev txeev siab rau Tswv Ntuj mus zwm rau dab phem lawm ntag. Hais txog qhov no txawm nej ntseeg tsis tau li hais los xij; tab sis kuv xav kom nej rov muab peb tej kev cai dab qhuas poj yawm los tshawb xyuas kom nej paub meej tias peb cov poj yawm txwv koob lawv txoj kev yog mus dua qhov twg lawm tiag ? Ces nej thiaj yuav paub tias cov lus tau hais hnub no tsis yog dag rau nej. Tos kuv ho muaj cuab kav hais cov lus no rau nej los kuv yeej tau los muab tshawb xyuas pom tseeb tias peb cov poj yawm yeej mus zwm rau dab phem lawm tiag tiag li ! Kuv rov hais ib qhov rau nej zoo li no: "Niaj hnub no peb lub cev, peb txhais ko taw tsis tau mus ncig thoob lub ntiaj teb no; tab sis peb lub qhov muag tau pom nyob hauv lub T.V  Thoob plaws lub ntiaj teb no; peb paub tias nyob hauv ntiaj teb no uaj ntau pua haiv neeg.

    39- Cov haiv neeg muaj kev txawj ntse siab vam meej nplua nuj los coob. Cov haiv neeg tsis muaj kev txawj ntse poob qis txom nyem pluag pluag los muaj coob npaud. Thaum nej pom zoo li no nej mam tig los  muab sawv daws txoj kev ua nej nyob los soj ntsuam saib. Ces nej thiaj pom tseeb tias cov haiv neeg muaj kev txawj ntse siab thiab vam meej nplua nuj txoj kev ua neej nyob yog lawv teev hawm tus tseem Tswv Ntuj uas muaj hwj chim hwj huam loj tas nrho. Uas nws lub qhov muag ntsia ntsoov peb niaj hnub no ntag. Nej ho tig mus muab cov haiv neeg tsis muaj kev txawj ntse siab thiab txom nyem pluag. Txoj kev ua neej nyob los saib yog teev hawm dab qhuas poj yawm. Vim li ntawd cov haiv neeg no thiaj tsis tau txais Tswv Ntuj lub txiaj ntsim, kev txawj ntse kev nplua nuj. Vim hais tias tus yuav muab tau txoj koob txoj hmoov zoo, Kev txawj kev ntse rau neeg mas tsis yog dab tsis yog poj yawm muab; tsuas kawg yog Tswv Ntuj tib leeg thiaj muab tau rau neeg xwb. Yog nej tsis ntseeg tias peb cov poj yawm yog mus zwm rau dab phem no cia kuv muab ob peb nqi lus hmoob kev dab qhuas thaum muaj ib tug neeg tas txoj sia nyob ntiaj teb no los piav me ntsis zoo li no rau nej mloog saib nej ho xav li cas txog cov lus no. Peb hmoob poj yawm txoj kev teev dab qhuas, thaum muaj ib tug tuag lawm mas tus txiv qhuab kev yog tus ua thawj nqi kab kev rau tus tuag. Thaum pib los mus ua cov kab kev rau tus tuag mas ua ntej ntawd tus txiv taw kev yuav tsum xub tsim tas txhua yam yuav muab los siv rau tus tuag ntawd.

    40- Xws li 1 tus txhib ntawg, 2 dej cawv, 3 dej ntxuav muag, 4 lub tais laig nyag, 5 hno qho tshaib, 6 qaib hauv ncoo, 7 khau maj khau ntuag, 8 tus nees dab, 9 lub hleb, 10 daim ntaub npog ncauj. Raws li tus txiv taw kev cov ntsiab lus nws hais nyob hauv 10 yam khoom yuav muab siv rau tus tuag no mas puav leej yog mus thov ntawm dab ntxwg nyoog los huv siv. Dhau no mus ces mam pib qhia rau tus tuag hais tias vim li cas thiaj muaj mob muaj tuag los lawm! Zaj taw kev no hmob muab hais ua ntau lub ntsiab. Ib txhia hais tias yog vim thaum ub ntiaj teb raug tsis muaj mob teb cais raug tsis muaj tuag. Vim neeg ntiaj teb nyiam ploj nyiam tuag ces muab niam cab tua tuaj nruab kab, muab niam cuam tua tuaj nruab kev, muab niam cab los pam ua qauv quaj, muab niam cuam los pam ua qauv nyiav, muab tawv nyuj dub los zoj ua nruas ntaus, muab plhaub mag los ua qeej tshuab, ntaus  cuaj rws nrov cuaj suab deeg daws txog ntxwj nyoog lub ntuj ntsuab; ntxwj nyoog thiaj hais tias: "Ntiaj teb tim qas tsi teb cais tim li cas. Yuav nrov deeg qas daws tuaj txog kuv txiv yawm ntxwj nyoog lub ntuj ntsuab?"

    41- Ces ntxwj nyoog thiaj tso mos ntsuab tuaj tshuaj ces mos ntsuab thiaj rov mus hais rau ntxwj nyoog tias yog tau ntiaj teb muab niam cab tua tuaj  nruab kab, muab niam cuam tua tuaj nruab kev, muab niam cab los pam ua qauv quaj, muab niam cuam los pam ua qauv nyiav, muab tawv nyuj dub los zoj ua nruas ntaus, muab plhaub mag los ua qeej tshuab; ntaus cuaj qws nrov cuaj suab thiaj deeg daws tuaj txog koj txiv yawm ntxwj nyoog lub ntuj ntsuab. Ces ntxwj nyoog thiaj hais tias: "Yog ntiaj teb nyiam ploj nyiam tuag, cia kuv tso mob tso tuag mus rau ntiaj teb!" Tab sis qhov no tsis muaj tseeb li hmoob cov poj yawm hais ntawd, qhov muaj tseeb ces tsis yog tua niam cab niam cuam. Hos yog tua ib tug neeg kiag! Thiaj ua tau ib tug nywj rau peb ntiaj teb neeg ris hnyav kawg nkaus li! Vim dab ntxwg nyoog txia ua ib tug nab tuaj ntxias tau Nkauj Iab noj lub txiv toj txiv taug uas Tswv Ntuj tau ceeb toom rau Nraug Oo thiab Nkauj Iab tias neb tsis txhob noj tsis txhob kov li yog neb noj neb kov hnub twg ces neb tuag xwb!

    42-Tab sis vim dab ntxwg nyoog siab phem nws tuaj ntxias tau Nkauj Iab Nraug Oo noj lub txiv toj txiv taug no lawm. Ces neeg ntiaj teb thiaj tau txais txoj kev tuag no los txog niaj hnub no kiag! Vim li no Tswv Ntuj thiaj muaj ib lo lus sau tseg hais tias: "Tus nab siab phem diam; tiam sis muaj ib hnub ib tug poj niam yuav yug ib tug tub los tsuj tus nab taub hau."  Lo lus no yog hais txog  tias muaj ib hnub Niam Mab Liab yuav yug Tswv Ntuj leej Tub uas yog Yes Xus los rhua tus nywj tuag thaum ub tus tij tua kwv tuag! Tus tij thiab tus kwv ntawd, Hmoob hais tias. nws yog cis tuj thiab qav kaws nkawd ntag, Luag lwm haiv neeg hais tias. Yog Kas Ees thiab As Npes. Tab sis peb cov poj yawm txwv koob lawv muab hais ua paj lug ces lawv hais tias yog cis tuj tua tus qav kaws xwb.

    43- Nyob hauv peb hmoob cov tseem coj txoj kev teev hawm dab qhuas poj yawm mas thaum muaj ib tug tuag lawm. Tus txiv taw kev thiaj hais zaj taw kev qhia rau tus tuag tia: Thaum ub ntiaj teb raug tsis muaj mob teb cais raug tsis muaj tuag. Vim Cis Tuj siab tsis zoo Cis Tuj muab Qav Kaws tua tuag lawm. Thaum Qav Kaws nyob ces neeg ntiaj teb nqaij yog nqaij pob ntoos txhav yog txhav pob zeb txawj mob los txawj zoo txawj tuag los txawj feb. Zaum no Cis Tuj siab tsis zoo muab Qav Kaws tua tuag lawm ces neeg ntiaj teb nqaij yog nqaij ciab zib txhav yog txhav plhaub mag. Tshav ntuj ces nqaij ciab zib yuav yaj li tshaws, los nag ces txhav plhaub mag yuav dam lis daws. Tab sis qhov muaj tseeb ces tsis yog tua tus qav kaws hos yog tus tij tua kiag tus kwv tuag! Thiaj ua tau ib tug nywj tuag rau peb ntiaj teb neeg ris hnyav kawg nkaus los txog rau peb niaj hnub no.

    44- Nyob hauv hmoob zaj taw kev ntu xa mus cuag poj cuag yawm nws hais li no: Tav no leej tub tuag koj ua leej tib neeg nyob rau ntiaj teb, koj muaj ib tug ntsuj peb tug plig. Ntsuj duab ntsuj ce tuag tas; tshuav ntsuj plig tuag tsis tas. Muaj ib tug ces yuav mus zov qhov hleb qhov ntxa, muaj ib tug ces yuav mus thov ntaub thov ntawv rov los thawj xeeb lawm ntiaj teb, muaj ib tug ces yuav ntim tau lub txiaj zam lis yeev yuav los mus nrhiav poj nrhiav yawg. Zoo li leej tub tuag koj tuag sawv kev lis tsees yuav los mus nrhiav poj nrhiav yawm.  Koj nco ntsoov tuaj ntawm  ncauj cim ntsoov tuaj nruab siab; koj yuav ncig yeev tuaj nram tiaj, koj yuav mus nce hlo  ntxwj sib nyoog tus ntaiv nyiaj. Zoo li leej tub tuag koj tuag sawv lis tsees los mus nrhiav koj pog koj  yawm, koj yuav nco tsoov tuaj ntawm ncauj cim ntsoov tuaj nruab plawv, koj yuav ncig yeev tuaj nram tus, koj yuav mus nce hlo ntxwj sib nyoog tus ntaiv kub. 1 hnub koj nce 1 qib, 2 hnub koj nce 2 qib, 3 hnub koj nce 3 qib. Lawv suav li no mus txog ib tsug 13 hnub ces lawv hais tias yog nce nto 13 qib lawm; ces yog nce nto ib lub teem txwv lawm. Ntu hais tias yog mus txog rau poj yawm teb lawm nws hais li no: Zoo li leej tub tuag koj tuag saw kev lis tsees yuav los mus nrhiav koj pog koj yawg. Koj yuav nco ntsoov tuaj ntawm ncauj cim ntsoov tuaj nruab siab, Koj yuav mus qhib tau ntxwj sib nyoog lub rooj vam zeb. Koj tig ntiaj lees rov saib qab ua ciav yuav pom tau koj poj koj sev koj tub koj ntxhais quaj pos muag nti nyob lawm ntiaj teb. Koj tsa zaj muag saib rov tom ntej yuav pom tau koj pog koj yawm nyob tau cuaj caum yim pes tsawg zej. Tav no leej tub tuag koj tuag sawv kev li tsees yuav los mus nrhiav koj pog koj yawm, koj yuav nco ntsoov tuaj ntawm ncauj cim ntsoov tuaj nruab plawv, Koj yuav mus qhib lis plho ntxwj sib nyoog lub rooj vag tsis tseev kom nrov. Koj yuav tig ntiaj lees rov saib qab yuav pom tau koj poj koj sev koj tub koj ntxhais quaj pos muag nti nyob lawm ntiaj nrag. Koj tsa zaj muag saib rov tom ntej, Yuav pom tau koj pog koj yawm nyob tau cuaj caum pes tsawg zos. Zaj taw kev cov ntsiab lus xa mus txog pog yawg ces hais li no.

    45-Zaj qeej tu siav nws kuj hais li zaj taw kev thiab. Muaj ib nqi hais li no thaum txiv qeej yuav xav tus tuag mus cuag poj yawg mas nws tshuab hais tias: "Tav nov leej tub tuag koj ua leej tib neeg nyob lawm ntiaj teb koj muaj ib tug ntsuj peb tug plig, muaj ib tug ces yuav mus zov qhov hleb qhov ntxa, muaj ib tug ces yuav mus thov ntaub thov ntawv rov los thawj xeeb, muaj ib tug ces yuav ntim tau lub txiaj zam lis yeev yuav los mus cuag poj cuag yawm. Koj qaib qua sis laws ua koj ntej koj lawv koj qaib qab, koj yuav nce hlo mus txog ntxwj sib nyoog cuaj ntsug kab los sib tshuam, yim ntsug kev los sib lig; Muaj ib txoj tuaj pem toj yog tau poj mab yawm suav txoj kev mus ua luam ntaub coj luam xov, muaj ib txoj tuaj nram hav yog tau poj mab yawm suav txoj kev mus nrhiav hnav, muaj ib txoj tuaj nruab nrab yuav pom hneev khau maj khau ntuag los lawm lwj sis hlaw thiaj yog koj kab koj kev mus cuag koj pog koj yawg no nas leej tub tuag. Tav no leej tub tuag koj ntim tau lub txiaj zam lis yeev sawv kev lis tsees los mus nce hlo txog pem ob niam txiv dab zov rooj ntuj, Leej niam tuav nplawm tooj leej txiv tuav nplawm hlau nrov lis nrawv koj tsis tim ntshai. Koj nam lis qees mus koj hais tias koj nyob lawm ntiaj teb koj txoj sia txoj pa tu nrho, koj vuag yees nthab los plam ntawm npab, koj vuag yees tsev los plam ntawm tes, koj nyob tsis tau koj thiaj txia ntshis ua lub dub, koj yuav los mus ua ntxwj sib nyoog tus tseem tub no nas leej tub tuag! Zaj qeej tu siav nqi mus cuag poj yawm ces hais li no.

    46- Nyob hauv hmoob zaj txiv xaiv foom kom, nws kuj muaj ib ntu hais li no thiab.  Zoo li txhua niaj mus txhua xyoo, zoo nws laus niaj zoo nws laus xyoo, nws laus yuav caij tau nws laus tus txiv nees tshaj tsum mus ua qhua. Xyoo no tsiv nws laus niaj tsiv nws laus xyoo, nws laus cev qaj qaug lis yees yuav los mus caij tau lawm ntxwj sib nyoog tus nees txaij nees kws nyob mus tu hlua. Txhua niaj mus txhua xyoo zoo nws laus niaj zoo nws laus xyoo, nws laus yuav caij tau nws laus tus txiv nees tshaj tsum mus ua qoob. Xyoo no tsiv nws laus niaj nws laus xyoo, nws laus cev qaij qaug lis yees yuav los mus caij tau lawm ntxwj sib nyoog tus nees txaij nees kws nyob mus tu txoob. Zoo li xyoo no nws laus cev qaij qaug lis yees yuav los mus nce hlo txog ntxwj sib nyoog tej yas kev. Yuav nplua taw lis npleev rau ntwj sib nyoog tus dej ntxheb, yuav tshwm lis plaws rau ntxwj sib nyoog lub mus rooj vag zeb! Zoo li xyoo no nws laus cev qaij qaug lis yees los mus nce hlo txog rau ntxwj sib nyoog tej yas kab. Yuav nplua taw lis npleev rau ntxwj sib nyoog tus dej dag, yuav tshwm lis plaws rau ntxwj sib nyoog lub mus rooj vag lag.

    47- Cov kwv tij hmoob, Thaum nej hnov cov ntsiab lus hmoob niaj hnub xa hmoob cov neeg tas txoj sia nyob ntiaj teb no tej ntsuj plig mus cuag poj cuag yawm. Zaj taw kev Zaj qeej tu siav zaj txiv xaiv foo koom cov ntsiab lu no lawm, nej puas xav tias peb coj poj yawm lawv txoj kev yog mu dua qhov twm lawm tiag ? Puas yog mus Ntuj ceeb tsheej los yog mus rau dab ntxwg nyoog teb lawm ?
    Kuv tau muab los piav meej npaum no lawm, yog nej leej twg tseem tsis to taub thiab ces yog dab ntxwg nyoog npog nej qhov muag thiab ntsaws nej pob ntseg lawm xwb! Peb neeg ntiaj teb yog Tswv Ntuj me tub me nyuam. Nws thiaj hlub peb tas npawd. Nws thiaj tso nws leej tub yug los ua ib tug zoo li neeg kom tau los qhia Tswv Ntuj txoj kev cawm neeg ntawm txoj kev tuag!
    Kom neeg rov tau dim ntawm dab phem mus ua Tswv Ntuj tub ki. Li ntawd hnub no yuav qhia txog ib yam ua nws tseem tseeb heev rau nej nws zoo li no saib nej yuav xaiv txoj twg? Peb yug los ua ib leej tib neeg nyob rau hauv lub ntiaj teb no mas. Txawm yuav muaj pes tsawg txoj kev teev hawm los xij nws tsis tseem ceeb. Tab sis qhov tseem ceeb ces tsuas muaj ob txoj kev rau peb yuav mus xwb; 2 Txoj kev no muaj ib txoj yog qhia txog txoj sia nyob mus ib txhis. Muaj ib txoj yog qhia txog kev tuag mus li. 2 txoj kev no saib nej yuav xaiv txoj twg ?

    48- Yog nej xaiv txoj sia nyob mus ib txhis ces nej yuav tau txiav siab tso poj yawm txoj kev teev dab qhuas tseg tig los mloog Vaj Yes Xus cov lus qhia txog txoj sia uas yog tuaj ntawm Tswv Ntuj tuaj. Yog nej xaiv txoj ob nws yog poj yawm txwv koob txoj kev, nws tsuas yog qhia txog kev tuag xwb; vim poj yawm txoj kev yog tuaj ntawm kev tuag tuaj ! Nws yog kev tsis mloog Tswv Ntuj lus, nws tsis muaj lo lus qhia txog txoj sia nyob mus ib txhis; nws tsis muaj lo lus qhia kom neeg yeej dab phem yeej txoj kev tuag! Nyob hauv peb haiv hmoob yog leej twg paub txoj cai kab mob kev tuag, paub zaj tshoob txiv xaiv ces Hmoob tias nws yog tus txawj ntse lawm. Vim peb hmoob cov poj yawm ces tsuas paub txog txoj kev tuag uas yog dab phem coj tuaj tsim txog neeg txoj sia xwb! Thiab lawv tsuas paub txog tias dab thiaj yog tus loj thiab saib tas txhua yam nyob ntiaj teb no thiab nyob saum Ntuj.

    49-Peb cov poj yawm lawv paub tsis txog tus tseem Tswv Ntuj uas muaj hwj chim hwj huam loj tas nrho nws lub qhov muag ntsia ntsoov peb niaj hnub no. Nws yog tus yeej dab phem, nws yog tus pab peb txhua hnub txhua  hmo. Peb thiaj muaj txoj sia nyob, txawj ua zog txawj mus kev zoo li no. Niaj hnub no nej sim mloog hmoob hais kwv txhiaj ntsuag, hais zaj tshoob, hais txiv xaiv, hais zaj qhuab kev. Txhua yam yuav coj los siv mas yog mus nqa ntawm dab ntxwg nyoog los xwb. Peb hmoob yeej paub tsis txog tus Tswv tsim noob neej thiab tsim tas txhua yam nyob saum Ntuj thiab nyob ntiaj teb no li. Li ntawd hmoob thiaj tsis kam teev hawm tus yog tseem Tswv ntawm neeg ntiaj teb.

    50-Hmoob nyiam mus teev hawm tej dab qhuas uas yog cov poj yawm lawv txais los ntawm dab ntxwg nyoog los dua mus teev tus tseem Tswv Ntuj uas nws yog tus hlub neeg tiag. Niaj hnub no kus saib yam li peb haiv hmoob kuj tsis yog ib haiv neeg ruam ruam, kuj ho tsis yog ib haiv neeg ntse ntse thiab.  Tab sis cas niaj hnub no tsis hais cov muaj kev txawj ntse los cov tsis muaj kev txawj ntse li tsuav yog hais txog Yes Xus thiab Tswv Ntuj lub npe no ces Hmoob feem coob cia li tsis to taub lawm. Hmoob pheej hais tias qhov ntawd yog luag mab sua tug lawm xwb tsis yog peb hmoob tug. Yog li ntawd, ib lo lus nug rau nej xav, Hmoob puas tseem tshuav ib tug Tswv Ntuj nyob qhov twg uas tsis koom nrog luag lwm haiv neeg yuav los pab haiv hmoob ?

    51-Kuv xav tias hmoob tus Tswv Ntuj uas hmoob tos yuav los hlub hmoob mas ntshe hmoob tos tos txog hnub hmoob ploj tas hauv ntiaj teb no los hmoob yeej yuav tsis muaj hnub pom li ! Hais rau peb haiv hmoob tias, Kuv yog ib tug hmoob. Kuv yeej hlub hmoob kawg; tab sis kuv tu siab tias thaum txog hnub kawg peb haiv hmoob yuav poob mus raws li lub caij thaum ub Nom Hes tseem nyob rau ntiaj teb no. Lub caij ntawd Tswv Ntuj hais rau Nom Hes tias lub caij txhua tus muaj lub cev nqaij yuav puas tas mus los txog lawm ! Koj yuav txua kom tau ib lub nkoj los cawm koj tsev neeg. Vim kuv tau txiav tias kuv yuav tso dej los nyab ntiaj teb kom neeg tuag tas. Thaum Nom Hes hnov Tswv Ntuj hais li ntawd, Nom Hes tsis tau ua xyem xyav li. Nws cia li sawv tsees mus txua nws lub nkoj raws li Tswv Ntuj hais. Thaum cov neeg pom nom hes txua nkoj, lawv nug tias koj txua nkoj ua dab tsi ? Nom Hes teb tias yog vim Tswv Ntuj yuav tso dej los nyab ntiaj teb ! Lawv luag Nom Hes. Lawv hais tias tsis yog koj vwm los? Pev tseem yuav noj nqaij haus cawv ua lom zem. Tab sis nom hes tsis ua siab me rau lawv cov lus thuam nws; Vim li cas ho hais li no muab piv txwv.

    52- Nyob thoob ntiaj teb no xam peb haiv hmoob ntawm 100 % cov mus nrog tsoom neeg ntiaj teb teev tus tseem Tswv Ntuj, peb haiv hmoob nyuam qhuav yog 1 %  xwb. Tshuav  99 % Yog cov tsis to taub thiab tsis quav ntsej. Peb hmoob yog ib haiv neeg txawv luag lwm haiv neeg ! Hmoob yog ib haiv neeg nyiam txua dab qhuas heev tshaj. Nyob hauv luag lwm  haiv neeg mas txawm lawv tsis teev Tswv Ntuj los tsuav yog ib haiv neeg ces yeej los koom teev tau ib tug dab qhuas xwb. Hmoob mas muaj pes tsawg xeem ces yeej muaj pes tsawg tus dab qhuas, yeej los sib koom tsis tau li. Nyob hauv cov xeem tseem muaj ntau pab twb yog tib lub xeem xwb los nyias tseem muaj nyias dab qhuas koom tsis tau ua ke thiab ! Vim haiv hmoob nyiam coj ib lub neej zoo li hais no, ces hmoob thiaj tsim tsis tau ib lub neej tseem ceeb nrog luag muaj nyob rau ntiaj teb no. Hmoob thiaj los koom tsis tau ua ib pab loj kom muaj zog tswj tau ib  thooj av los ua hmoob tug.  Raws li kuv tau pom niaj hnub no nyob hauv peb haiv hmoob cov muaj tswv kev txawj ntse me ntsis tseem mus nrhiav tswv yim tsim dua ib cov kev teev hawm dab qhuas tshiab los rau haiv hmoob teev hawm ntxiv thiab kom haiv hmoob haj yam tau ris ib lub txim loj dua qub ntxiv thiab ! !

    53-Vim li cas ho hais li ntawd; vim tias thaum ub Nraug Oo thiab Nkauj Iab nkawd tau ua txhaum rau Tswv Ntuj ib zaug xwb. Peb txhua tus neeg nyob ntiaj teb no yeej nti tsis dim ntawm txoj kev tuag no hlo li ! Yog nej tsis ntseeg cov lus hais no. Saib nej puas muaj leej twg dhia dim txoj kev tuag niaj hnub no xwb mas ! Yog nej tseem mus tsim dua ib txoj kev teev hawm uas tsis yog tuaj ntawm Tswv Ntuj tuaj; nej sim xav saib puas txhaum rau Tswv Ntuj. Vim tias Tswv Ntuj twb tso nws leej tub uas yog Yes Xus los qhia Tswv Ntuj txoj kev cawm neeg no meej kawg nkaus rau neeg ntiaj teb lawm.     

    54-YesXus yog tus tau muab nws txoj sia thiab nws cov ntshav los ua nqi txhiv peb ntiaj teb neeg txhua tus ntawm tus nywj tuag ! Kom xwv tom ntej no. Peb neeg  ntiaj teb txhua tus tau rov ciaj ua Tswv Ntuj cov tub ki., Yog leej twg ho tsis ntseeg lo kuj tsis yuam, tsuav yog nws ho tsis ntshaw txog nws txoj sia xwb ces kav liam. Li ntawd thiaj muaj ib lo lus sau tseg tias, Tswv Ntuj muab txoj sia thiab txoj kev tuag tso rau ntawm neeg xub ntiag. Tswv Ntuj tsis txhob tias koj txais txoj sia los koj txais kev tuag. Tswv Ntuj cia neeg mam xaiv neeg ywj siab. Li ntawd thiaj muaj ntawv sau tseg tias s txoj kev ntseeg Yes Xus yog Tswv Ntuj ib txoj kab xwm cawm neeg thiab xaiv neeg lub siab mus txais txoj sia tshiab nyob mus li rau neeg lub neej tom ntej. Uas tseem tab tom tuaj yuav txog peb tom ntej no.

    55- Muaj ib lo lus sau tseg tias cov neeg uas lawv rov saib lawm tsis tsim nyog txais Ntuj txoj sia mas thaum nws hnov hais txog txoj sia ces Tus neeg ntawd nws twb pib ntxub cov lus ntawd lawm. Ces nws twb nrhiav tej lo lus los tawm tsam lawm. Qhov no nws muaj tseeb zoo li ntawd tiag. Niaj hnub no kuv yeej tau ntsib cov neeg zoo li hais no ntau leej. Muaj qee leej ces thaum nws hnov yus piav txog Tswv Ntuj ces nws cia li sawv twj ywm khiav mus lawm tsis kam nyob mloog. Muaj qee leej nws tsis khiav tab sis nws nrhiav tej lo lus los tawm tsam cov lus yus hais txog Tswv Ntuj ntawd ntag. Cov kwv tij hmoob peb txhua tus yug los ua lub neej ciaj txoj sia nyob ntiaj teb no, tsis hais tus ruam tus ntse tus muaj tus pluag li, peb sawv daws puav leej ntshaw kom muaj txoj sia nyob mus ib txhis tsis txawj tuag. Hnub no yuav qhia tseeb rau nej paub tias tswv Ntuj twb muab ib txoj kev cawm neeg txoj sia loj tas nrho tuaj cawm peb txhua tus neeg nyob ntiaj teb no lawm puas yog vim nej tsis to taub ? Los yog nej yeej tsis ntshaw txog txoj sia uas Tswv Ntuj pub tuaj rau nej ntawd li.

    56- Qhiav rau nej tias peb cov poj yawm txwv koob lawv txoj kev uas nej pheej xav tias yog txoj kev tseem ceeb rau nej mas nws tsuas yog ib txoj kev ua neej tsis mloog Tswv Ntuj lus qhia xwb. Ces peb tiam neej no thiaj tau txais ib hmoov phem los ua lub neej muaj kev mob kev nkeeg txhua yam los mus xaus rau txoj kev tuag ! Yeej tsis muaj leej twg hla dhau li, neeg lub neej tiam no ces qhov zoo zoo ces tsuas yog txij li 60  los 70 xyoo rov los xwb dhau ntawd ces yog tos tuag lawm xwb! Vim peb sawv daws lo Nkauj iab Nraug Oo lub keeb txhaum uas tsis mloog Tswv Ntuj lo lus qhia. Mus mloog dab phem lus ntxias ces peb neeg ntiaj teb thiaj tau txais txoj kev tuag zoo li niaj hnub no! Txawm nej yuav ntseeg thiab tsis ntseeg los tsis yuam, Hnub no qhia rau nej tias Tswv Ntuj twb rov tuaj cawm tau neeg ntiaj teb kom dim ntawm dab phem txhais tes muaj taug no rov tau  mus ua Tswv Ntuj cov tub ki li qub lawm.

    57- Li ntawd Tswv Ntuj thiaj tso nws leej tub Yes Xus los qhia peb neeg ntiaj teb kom paub tias nws yog tus los tuag theej neeg ntiaj teb lub txhoj tuag no nyob saum tus ntoo khaub lig kom neeg rov yeej kev tuag. Vim thaum ub qav kaws tuag tsis sawv rov los. Thiaj ua tau ib tug nywj tuag rau peb neeg ntiaj teb ris lub txim tuag no tsis sawv rov los. Tau ntau txhiab xyoo los txog niaj hnub no peb yeej dhia tsis dim li ! Vaj Yes Xus yog tus yeej dab phem, Nws tuag thiab sawv rov los kom tus nywj tuag no txhob tau ua vaj kav neeg mus ntxiv lawm. Hnub no lawm tom ntej, yog txoj sia yuav los ua vaj kav neeg ntiaj teb. Tus nywj tuag yuav ploj mus. Yog leej twg ntseeg Yes Xus cov lus qhia txog txoj sia nws lub neej txoj sia sab ntsuj plig yuav tsis poob mus zwm rau lub teb chaws tuag li peb cov poj yawm txwv koob lawm. Yes Xus tuag thiab sawv tsees rov muaj txoj sia ua ib tug nywj sawv rov los cawm tau peb ntawm qav kaws tus nywj tuag sawv tsees mus nrog Tswv Ntuj nyob pem qaum Ntuj lawm. Vim li cas niaj hnub no peb cov xub mus ntseeg Yes Xus pheej muab los qhia rau nej. Nej txhob to taub yuam kev tias yog xav ntxias nej. Qhov tseeb yog hlub thiab khuv leej txog nej xwb. Txawm peb muab los piav qhia rau nej los, peb yeej tsis tau txais ib yam paj tshab dab tsi li. Nej sim ntsia saib luag lwm haiv neeg, lawv twb tsis yog peb kwv tij neej tsa txheeb ze peb hmoob, lawv yog cov xub tau paub txog Tswv Ntuj txoj kev cawm neeg no xwb lawv twb hlub txog pe. Lawv thiaj zoo siab tuaj muab qhia rau peb hmoob paub, peb yog cov xub paub yog peb ho tsis kam qhia rau nej ces kuj piv tau tias yog tsis hlub tsis khuv leej txog nej puas yog ?  Vim Tswv Ntuj txoj kev cawm neeg no tsis yog yuav muab zais cia rau ntsaum kab rws noj. Nws yog cov lus yuav muab tshaj tawm kom tau cawm neeg txoj sia kom txhua tus tau mus ciaj ua Tswv Ntuj cov tub ki nyob mus ib txhis tsis muaj hnub yuav ploj tau lawm. Vaj Yes Xus tau muab Tswv Ntuj txoj kev hlub neeg los hais ua piv txwv rau ib tug neeg yug yaj zoo li no:

    58-Muaj ib tug neeg nws muaj 100 tus yaj, txawm muaj ib tug ploj lawm ! Ces nws yuav tso tas 99 tug rau tom tshav zaub, nws yuav mus nrhiav kom tau nws tus yaj ploj ntawd. Thaum nws nrhiav tau tus yaj ploj lawm mas nws zoo siab heev nws muab nws tus yaj kwv saum sub pwg, nws hais rau nws cov phooj ywg tias nej yuav nrog kuv zoo siab; vim kuv nrhiav tau kuv tus yaj ploj lawm. Yes Xus hais ntxiv tias nyob  saum Ntuj yog Tswv Ntuj pom ib tug neeg txhaum tig los yuav lub siab tshiab mas Tswv Ntuj tseem zoo siab tshaj tau pom 99 leeg neeg siab zoo. Vim li cas Yes Xus thiaj muab hais ua piv txwv li ntawd? Vim tias Yes Xus yeej paub tseeb tias peb neeg ntiaj teb txhua tus yeej lo Nraug Oo thiab Nkauj Iab lub keeb txhaum lawm ! Niaj  hnub no txawm peb yuav ua neeg siab zoo npaum twg los peb yeej yog neeg muaj txhaum. Vim peb txhua tus puav leej yog xeeb ntxwv los ntawm Nraug Oo thiab Nkauj Iab nkawd.

    59- Yog leej twg hais tias kuv tsis yog neeg txhaum ces tus ntawd nws yog ib tug neeg dag thiab yog tus tawm tsam Tswv Ntuj ntag ! Yog leej twg hais tias kuv tsis yog neeeg muaj txhaum yuav tsum yog nws yeej txoj kev tuag li Yes Xus mas thiaj yuav hais tau tias tsis yog neeg txhaum. Vaj Yes Xus yog tus dawb huv tsis lo txhaum vim nws tsis yog Nraug Oo thiab Nkauj Iab nkawd xeeb ntxwv. Muaj ntawv sau tseg tias Yes Xus yog Tswv Ntuj leej  Tub, yog tus yaj ntshiab dawb huv nqes saum Ntuj los muab nws lub cev ntshiab txi rau Ntuj ua ib thaj txim ntshiab txhiv tas qab ntuj neeg kom tau rov mus ua ib cov tub ki ntshiab huv rau Tswv Ntuj. Niaj hnub no hnov ntiaj teb neeg cav zom zaws tias twb yuav txog hnub kawg ntawm lub ntiaj teb ! Tab sis neeg lam kwv yees hais li ntawd xwb, yeej tsis muaj leej twg paub qhov tseeb li.

    60-Vim vaj Yes Xus yeej tsis tau qhia tias yog hnub twg los xyoo twg li. Hais txog tias muaj ib hnub tom ntej no lub ntiaj teb yuav ploj mus mas nws yeej muaj tseeb tiag tsis yog hais dab neeg. Yes Xus cov thwj tim nug Yes Xus tias Xib Hwb thaum yuav txog hnub kawg ntawd yuav muaj lub cim dab tsi tshwm sim tuaj thiaj paub tias txog lub caij lawm? YesXus teb Leej Tub los tsis paub, cov Tshiab kuj tsis paub. Tsuas kawg leej Txiv tib leeg thiaj paub xwb ! Tiam  sis kuv hais rau nej tias thaum nej pom ib haiv neeg sawv mus tiv lwm haiv neeg, ib lub teb chaws sawv mus tiv lwm lub teb chaws, nyob thoob plaws rau hauv lub ntiaj teb no thiab lub ntiaj teb yuav qeeg loj ! Neeg ntiaj teb yuav raug kev tshaib kev nqhis loj ! Thaum nej pom tej xwm tshwm sim tuaj zoo li no ces kom nej paub tias lub caij twb tuaj txog ntawm nej qhov rooj lawm !

    61- Cov kwv tij hmoob, Qhov hais tias lub ntiaj teb no muaj ib hnub tom ntej no yuav ploj mus mas yeej muaj tseeb tiag ! Nws tsis yog zoo li ib zaj dab neeg muab hais los ntxias me nyuam yaus xwb. Hos yog Tswv Ntuj lo lus ceeb toom qhia tseeg rau neeg ntiaj teb paub zoo li ntawd ! Kuv xav kom peb haiv hmoob tsis txhob ua neeg caj qwb txhav tawv ncauj cam thawj li txheej neeg thaum ub lub caij dej nyab ntiaj teb es lawv tuag tu noob tu tsav tsuas dim Nom Hes tsev neeg nyob hauv lub nkoj los tsim noob nej rau ntiaj teb no xwb. Thaum ub Tswv Ntuj tso dej nyab ntiaj teb mas nws tsuas cawm Nom Hes tsev neeg xwb. Txoj kev tuag zaum ob yuav tuaj tom ntej no mas Tswv Ntuj tau muab ib txoj kev cawm neeg loj kawg nkaus tuaj pub rau peb neeg ntiaj teb txhua tus. Vim Tswv Ntuj tau muab kiag nws leej Tub lub cev thiab nws cov ntshav tuaj ua nqi txhiv peb txhua tus kom tau yeej kev tuag zaum ob. Yog leej twg ntseeg leej Tub cov lus qhia txog txoj sia,  nws yuav tsis raug poob mus rau hauv txoj kev tuag zaum ob li txheej neeg thaum ub raug dej nyab lawv tuag tu noob ntawd lawm. Cov kwv tij nkauj muam hmoob yog nej leej twg xav nrhiav txoj kev cawm nej txoj sia kom yeej kev tuag zaum ob mas yog lub caij nej tseem tab tom ua lub neej nyob niaj hnub no ntag. Dhau lub caij nej tas caij nyob ntiaj teb no lawm ces Hmoob muaj ib lo lus hais tias txhob vam lawm ov. Vim tias lub caij thaum ub Tswv Ntuj tso dej los rhuav neeg lub cev nqaij uas peb pom niaj hnub no kiag. Hos txoj kev tuag zaum ob yuav tuaj tom ntej no mas Tswv Ntuj yuav tsis rhuav lub cev nqaij no lawm, Tswv Ntuj yuav tos rhuav tus ntsuj plig lawm xwb ! Vim tias niaj hnub no Tswv Ntuj tseem tos peb txhua tus saib puas yuav hloov siab tig los mus mloog Tswv Ntuj lo lus qhia txog txoj sia. Yog tos txog hnub peb tag caij nyob ntiaj teb no lawm, peb yeej tsis hloov siab tiag los mloog Tswv Ntuj lo lus qhia txog txoj sia li ces hnub ntawd Tswv Ntuj mam muab peb tus ntsuj plig rau txim los  yog muab pov rau hauv lub pas leej faj nplaim taws raws li Tswv Ntuj lo lus teem tseg hais tias yog kev tuag zaum ob ! Vim Tswv Ntuj twb pub ib lub sij hawm ntev kawg rau peb txhua tus neeg xaiv txoj sia thiab txoj kev tuag. Li ntawd yog leej twg xav cawm nws txoj sia nyob sab ntsuj plig ces nws yuav tau npaj  thaum nws tseem tab tom muaj txoj sia nyob nrog nws lub cev nqaij. Yog txog hnub nws txoj sia ncaim ntawm nws cev nqaij lawm ces yuav pab tsis tau nws tus ntsuj plig lawm !

    62- Cov kwv tij nkauj muam hmoob, tej lus hais tas los saum toj no txawm nej yuav ntseeg thiab tsis ntseeg los tsis yuam. Cov lus muab los tshaj rau nej tau hnov hnub no tsis yog yuav muab hais los hem nej los yuam nej. Yog xav qhia qhov tseeb rau nej txhua tus paub tias peb cov poj yawm txwv koob tau ncaim ntawm Tswv Ntuj mus teev hawm dab qhuas los tau ntau txhiab xyoo los lawm. Txoj kev teev hawm dab qhuas tsuas yog ib txoj kev pab peb me me ntawm peb lub neej sab cev nqaij daim tawv uas peb pom niaj hnub no xwb. Nws pab tsis tau peb lub neej  txoj sia sab ntsuj plig kom yeej txoj kev tuag zaum ob. Txoj kev teev hawm dab qhua poj yawm no nws cawm tsis tau nej kom yeej dab ntxwg nyoog ! Thiab yuav hloov tsis tau nej kom rov mus ciaj tau ua Tswv Ntuj cov tub ki. Yes Xus tau hais ib lo lus tseeb kawg tias:

    63- "Yog leej twg tsis tau yug nyob hauv dej thiab nyob hauv leej Tswv Yim Ntshiab los mas nws yuav mus tsis tau hauv Ntuj lub ceeb tsheej."  Lo lus no txhais hais tias yog nej leej twg tsis tau txais lub cim Ntxuav nyob hauv Yes Xus lub npe thiab txais Tswv Ntuj leej Tswv Yim Ntshiab ces txawm nej yuav ua ib tug neeg siab dawb siab zoo npaum twg los nej yeej yuav mus tsis tau rau Ntuj lub ceeb tsheej li. Piv txwv hais tias yog nej tsis tau txais lub cim ntxuav nyob hauv YesXus lub npe ces. Piv tau hais tias. Nej zoo li ib daim ntawv uas YesXus tsis tau kos npe thiab tsis tau ntaus Tswv Ntuj lub thwj rau nej ces nej yuav mus tsis tau rau Tswv Ntuj lub ceeb tsheej. Vim Yes Xus tseem tau hais ib lo lus ntxiv tias kuv yog txoj kev mus cuag leej Txiv, yog leej twg tsis mus ntawm kuv mus mas nws yuav mus cuag tsis tau leej Txiv ib zaug li.

    64- Kuv yog tsob tseem txiv cawv nej yog cov ceg. Yog tus ceg twg tsis txuas rau kuv ces, nws zoo li tus ceg qhuav lawm. Kuv txiv yuav muab txiav pov tseg rau hauv lub cub tawg! Niaj hnub no tseem tau hnov muaj tej tus kwv tij hmoob hais tias txawm kuv tsis ntseeg Ntuj los tsuav yog kuv ua neeg siab zoo zoo xwb ces yeej mus tau Ntuj ceeb ib yam. Hais txog qhov no mas tsuas yog lam hais kom zoo siab xwb yuav pab tsis tau! Vim Tswv Ntuj tsis yog ib tug dag lig neeg, yog nws tau hais li cas lawm ces nws yeej ua raws li ntawd.

    65- Kuv tseem tau hnov ib tug kwv tij hmoob tshaj tawm ib cov lus nyob hauv (YOUTUBE)  Hais tias yog cov xib hwb uas niaj hnub qhia Tswv Ntuj txoj lus thiab cov tau kawm phau ntawv Ntshiab (BIBLE) lawm mas yog tau hnov nws cov lus no mas lawv yuav ceeb xwb. Kuv mloog tus kwv tij hmoob ntawd cov lus hais mas zoo li nws twb tau muab phau ntawv Ntshiab kawm thoob lawm.  Peb cov uas tau kawm phau ntawv Ntshiab no lawm mas peb hnov peb yeej tau ceeb li nws hais tiag. Tab sis tsis yog ceeb hais tias ntshai cov lus nws hais tawm ntawd, hos yog ceeb tias ua cas nws twb yog ib tug neeg muaj lub hlwb xws li lwm tus neeg thiab cas nws ho yuav to taub yuam kev loj tas npaud. Nws to taub tsis mus raws li Tswv Ntuj cov ntsiab lus qhia tseg nyob hauv phau ntawv Ntshiab BIBLE. Hais rau nej txhua tus kwv tij hmoob tias. Yog leej twg tau kawm phau ntawv ntshiab no thoob lawm, yog nws tsis to taub los yog nws ho to taub yuam kev tsis raws li Tswv Ntuj cov lus qhia tseg ces yog nws rov saib nws tsis tsim nyog mus txais Tswv Ntuj txoj koob txoj hmoov los yog txoj sia uas Tswv Ntuj muab los pub rau nws lub neej sab ntsuj plig lawm. Vim hais tias Tswv Ntuj cov lus qhia nyob hauv phau ntawv ntsiab BIBLE mas feem ntau nws yog hais ua paj lug xwb. Yog leej twg tsis thoob tsib to nrog mas tab yog nws muab los kawm thoob tas los nws yeej tsis to taub tias yog hais txog dab tsi li. Nws yuav muab Tswv Ntuj cov lus tig los hais ib cov lus phem thuam Tswv Ntuj. Yog vim li ntawv Yes Xus thiaj hais tias cov neeg uas lawv lub npe tsis tau sau nyob hauv Tswv Ntuj phau ntawv txoj sia mas, Tab yog lawv qhov muag ntsia ntsoov los yeej tsis pom, Pob ntsej mloog ntsoov los lawv yeej tsis hnov li. Tsuas hais los xaus li no xwb, Sib ntsib dua.

    Sau npe: XIONG JP

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Bf376010
    Bao X Mary
    Bao X Mary
    Phooj Ywg
    Phooj Ywg


    Messages : 168
    Date d'inscription : 2011-07-09

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  Bao X Mary 27th June 2013, 4:12 am

    Xiong - JP

    Koj cov lus no yeej yog lus tseeb lawm, tsis muaj lwm tus Tswv Ntuj li tsuas muaj ib tug uas tsim ntuj tsim teb tsim tas puas tsav yam. Tus ntaws yog Tswv Ntuj tib leeg, tus muaj hwj huam, muaj txoj kev hlub kev zam txim loj tas nrho, tus ua tau txhua yam, tsis muaj ib yam uas Tswv Ntuj yuav ua tsis tau li. Nws lub qhov muag ntsia ntsoov ntiaj teb ua neej.

    Muaj ntau txoj kev teev hawm tab sis ib txog thiaj yog xwb. Txoj teev tus Tswv Ntuj uas tsim tas puas tsav yam thiaj yog txoj tseem.Nyob hauv ntiaj teb no tus ntseeg thiab tsis ntseeg los txhua tus yeej paub Tswv Ntuj lub npe thiab ntshai Tsawv Ntuj, tus laus tus hluas. Tab sis muaj ib cov thiaj teev thiab hawm Tswv Ntuj xwb. Thaum kawg kiag, cov teev poj yawm txwv koob los lawv hu lub Ntuj thiab. Qhov nov txhais tau tias Tswv Ntuj tib leeg thiaj yog leej Txiv rau txhua yam uas muaj txoj sia thiab txhua yam nyob saum ntuj thiab nyob ntiaj teb no.

    Hais txog peb hmoob mas peb muaj ib cov twb ntseeg Ntuj lawm los tseem ua xyem xyav, tseem niaj hnub mus ntseeg tej niag saub cuav mus nyiag ua neeb, mus saib yaig. Hos muaj ib cov twb ntseeg Ntuj ib ntus tab sis nws rov mus ua dab coj poj yawm txwv koob kev cai mas nws yog ib tug uas rov taw tuam Ntuj loj tshaj li. Hos muaj ib cov mas niaj hnub nyiam no hais lus hauv xov tooj cua thuam Ntuj los tshaj plaws li. Thiab khus xas nas kom neeg txhob ntseeg Ntuj. Kuv pom tau tias, tib neeg lub qhov muag yeej dig li koj hais tiag thiab yeej lag ntseg tsis hnov Ntuj lus thiab tsis pom Ntuj txoj kev hlub li.

    Peb hmoob mas yog ib cov neeg uas siab tawv, twm xeeb tshaj tsis kam hloov, tsis txo hwj chim li. Ces peb thiaj qheb peb lub siab tsis tau los mloog qhov tseeb thiab los paub tus tseem hauv Tswv Ntuj tiag. Hais txog peb hmoob txoj kev ntseeg mas peb yuav tau siv zog khwv tiag tiag li, peb thiaj yuav los pom tus Tswv Ntuj uas muaj txoj kev hlub loj tas nrho. Thaum ntawd peb thiaj yuav pom nws lub siab hlub mos nyoos, thiab pom nws lub hwj huam loj npaum cas, tias nws hlub peb npaum li cas.

    Txawm cov twb ntseeg lawm los, yog peb lam ntseeg xwb, peb tsuas ntseeg kom muaj pab pawg tau kev pab xwb, kom luag txhob hais tau yus xwb ces nws yeej tsis tseem ceeb dab tsi li. Yog peb ntseeg lawm peb yuav tau los tshawb fawb qhov tseeb thiab muab Tswv Ntuj tej lus qhia los cog cia hauv peb nruab siab kom ruaj khov thiab ciaj sia rau hauv, muab coj nrog peb ua neej. Tswv Ntuj cov lus qhia nws CIA SIA, yog peb coj nws tej lus qhia nrog peb ua neej mas txog thaum kawg peb tau txais kev cawm. Tswv Ntuj cov lus qhia muaj zog, nws txhawb peb lus zog, thiab pub txoj kev kaj rau peb, pub kom peb txawj ua sia loj thiab paub qhov tseeb.

    Kuv yog ib tug me nyuam neeg, xwb kuv tsis tau txais kev kawm dab tsi li, tab sis thaum kuv muab kuv lub siab lub neej cev rau Ntuj, muab nws tej lus qhia los coj kuv lub neej, txij thaum ntawd los, kuv pom tias kuv txoj kev xav txawv tsis zoo li qub, kuv ua tau siab loj, kuv rub taus lub siab ntev, kuv muaj txoj kev cia siab rau lub neej tom ntej, ua rau kuv lub siab kaj lug. Kuv hnov Tswv Ntuj lub zog tuaj rau kuv. Kuv ntseeg tias txog hnub kawg kuv yuav tau pom Tswv Ntuj lub ntsej muag tim ntsej tim muag. Qhov nov yog kuv qhov kev cia siab. Vim Yes Xus hais tias: " Nej ntseeg, muaj raws li nej ntseeg, nej thov ces muaj tus yuav pub rau nej, nej khov qhov rooj ces muaj tus yuav qhib rau nej." Yes Xus cov lus no, yog ib cov txhawb kuv lub zog, thaum kuv qaug zog kuv mus nyeem nws tej lus, ces kuv rov ua siab loj.

    Txoj kev ntseeg Tswv Ntuj mas zoo tshaj tas puas tsav yam tsis muaj ib yam dab tsis yuav los piv tau thiab pauv tau. Txhua yam zoo nyob ntiaj teb no, muaj ib hnub yuav dua mus, tej nom tej tswv, tej neeg nplua nuj, muaj ib hnub yuav dua mus, tab sis txoj kev ntseeg, kev tso siab rau Tswv Ntuj yuav nyob mus li. VIm thaum txog hnub kawg tsuas yog Tswv Ntuj tib leeg thiaj yog tus ua tau txhua yam thiab paub txhua yam xwb. Tswv Ntuj thiaj yog tus pub tau txoj sia rau yus mus ib txhiab ib txhi.

    Cov tseem tsis tau ntseeg los yim meem los ntseeg, txhob tos, tsis muaj sij hawm tos li lawm. Cov twb ntseeg lawm los, kav tsis thov Ntuj tiag kom yus txoj kev ntseeg nyob ruaj nreb, thiab pab thov Ntuj rau cov tsis tau ntseeg kom Tswv ntuj ho zam txhaum rau peb sawv daws, kom txog hnub kawg peb sawv daws tau txais txoj sia tshiab nyob mus li ntawm Tswv Ntuj xub ntiag mus ib txhiab ib txhi.





    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  Maiv Tooj 28th June 2013, 11:00 am



    Nyob zoo Xyooj JP thiab Bao X Mary,

    Tub JP, ua tsaug ntau rau zaj lus qhia kom peb ras xeev. Yog kawg, yeej yog li koj hais txhua yam, yog peb tib zoo xav thiab muab soj ntsuam los mas kev cai poj yawm no txaus ntshai heev thiab rhiab neeg kawg li. Tab sis neeg tsa hwj chim, tus twg los xav khav nws qhov zoo ces tsuav nws ua twg lawm ces txawm qhuas tias yam ntawd yog. tsis yog tias yog tiag tab sis yog raug dab phem moog thiab ntsaws pob ntseg li koj hais es khav yus qhov yog thiab zoo kom tau tsa hwj chim xwb. Qhov tseeb ces twb poob hwj chim tag, twb ua luag qhev xwb los yus tseem zoo zoo siab.

    Hais txog Peb Hmoob ntseeg, coob leej txoj kev ntseeg tsis ruaj khov vim nws lam ua neeg ua Ntuj Kev Cai xwb twb tsis paub Kev cai ib nyuag qhov li; twb tsis tau kawm kev ntseeg kom txaus, kom paub paus ntsis, kom paub qhov tseeb qhov yog li. Lam hais tias tsis teev xwm kab lawm ces yog ua neeg ntseeg lawm, twb tsis hais dab tsi ntau tab teev Ntuj twb tsis txawj teev es yuav ua li cas paub txog Ntuj Kev Cai lub ntsiab. Qhov sawv daws tsis paub kev ntseeg txaus mas kuj yog tim sawv daws xav taug kev ncaj kev yooj yim; tsis xav muab lub dag zog siv kom tsim nyog li. Yeej tsis teev Ntuj kom txaus, tsis teev Ntuj ib leeg, tsis mus ua Thaj Txi Ntuj Hnub Chiv li. Li ntawd dab phem thiaj li npog tau qhov muag, ntsaws tau pob ntseg yooj yim, chaws qhov ntswg cab ncab cab nkhaus los mloog tib si.

    Thaum yus tsis tau paub thiab nrhiav taus Tswv Ntuj txog kev hlub mas yus saib txoj kev ntseeg tsis muaj qab hau thiab yus saib li yus paub kev ntseeg zoo kawg lawm. Thaum yus ho nrhiav tau Tswv Ntuj txoj kev hlub mas yus mam pom tia syus twb tseem tsis tau paub dab tsi li, yus teev Ntuj ib hnub kaum zaus los tsis tsaus tau ntuj li lawm. Yog yus tsis txuag yus lub cev yus tus ntsuj plig kom ntshiab huv ces Leej tswv Yim Ntshiab tsis nyob hauv yus ces yus tsis hnov thiab pom Tswv Ntuj txoj kev hlub. Yog yus nquag teev Ntuj ib leeg txhua hnub, yus niaj lis piam mus Mis Xas txais lub Cim Yug, yus nquag mus Daws Txhaum mas kuj pab tau yus ntau heev ntxiv.

    Tub JP. kuv hais rau koj paub tias kuv tso N° rau koj zaj lus kom saib yooj yim thiab chaw cim. Vim nws ntev heev ces yog tsis tso N° cim ces nyeem nyuaj me ntsis. Dua li kuv kho cov nqe thiab ponctuation me ntsis rau lawm.

    Ua tsaug ib zaug ntxiv, koj sau tau tej zaj zoo heev. Kuv yuav muab luam rau tus puav laus uas tsis txawj kov cab sab tau nyeem. Ua li koj puas tau xav rau TP.Txhiaj Foom seb nws puas xav muab tso rau phau ntawv Tseb Plej?
    xiong_jp
    xiong_jp


    Messages : 11
    Date d'inscription : 2012-08-08
    Age : 71
    Localisation : FRANCE Orleans

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty XIONG J . P 29/06/2013 TSO TXHUA YAM YUAM KEV RAW POJ YAWM TAU LOS.

    Post  xiong_jp 29th June 2013, 6:35 am

    Nyob zoo phauj maiv tooj thiab npaub. Neb tau hais ib cov lus zoo los txhawb kuv, Ua neb tsaug ntau naw. Phauj maiv. Kuv ua koj tsaug ntau nawv mog. Koj tau rau n° rau cov kab ntawv kom yooj yim nrhiav mas zoo heev thiab 4 daim duab nws zoo nkauj kawg, Tsis hnov koj hais txog. Xyov yog koj tso los yog npaub tso li. Kuv thov ua tsaug rau 4 daim duab thiab nawv mog, Thiab koj hais ntxiv tias. Kuv puas tau muab xa mus rau txiv plig txhiaj foom muab tso tawm rau zoo tswv zov yaj los yog liaj luv tseb nplej. Mas kuv kuj tsis paub tias. Txiv plig lawv puas kam mub tso, Vim yog ib zaj ntev heev. Yog muab rau lawv tso mas xyov lawv phau ntawv me me ntawd puas ntim tas, Phauj koj hais ntxiv tias. Koj xav muab copie rau cov laus tsis txawj siv (Internet) Tau nyeem no nws yog ib lub tswv yim zoo heev, Yog koj pom muaj cov laus uas lawv paub nyeem ntawv hmoob ces. Koj muab copie rau lawv nws yog ib qhov zoo kawg nawv mog. Zaj lus kuv sau rau hauv lub vas sab no mas, Kuv sau raws li kuv tau tsawb pom xwb, Xyov puas yog thiab puas haum sawv daws siab nyiam, Vim kuv tsis tau yog ib tug xib hwb uas tau mus kawm tawm los. Kuv lus ntib koj ua phauj thiab cov nkauj muam kwv tij phooj ywg nej sawv daws li no xwb mog, Sib ntsib dua rau lwm tsab ntawv mog, SAU NPE XIONG J . P
    Npuagtub
    Npuagtub
    Tswv Cuab Hmong Catholique
    Tswv Cuab Hmong Catholique


    Messages : 1000
    Date d'inscription : 2009-08-16
    Age : 58
    Localisation : Fresno, California, USA.

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  Npuagtub 18th July 2013, 2:22 pm


    Nyob zoo Tij laug Xiong JP thiab cov phooj ywg txhua leej,

    Ntau ntev lawm tsis khoom tuaj sau ntawv rau nej li vim tsis muaj sij hawm li thiab. Tij laug JP, koj zaj lus zoo kawg, yeej yog li koj hais tiam sis peb cov hmoob yog ib yam neeg nyiam coj ib txoj kev cai tsis muaj leej twg tswj tsis hais kev ntseeg los yog kev noj nyob peb yog ib cov neeg nyiam nyob zoo li tej nas noog nyob tsis zwm rau leej twg li yus rov yog yus tswv xwb ces peb hmoob thiaj li ua lub neej nyob tsis muaj teb muaj chaw muaj nom muaj tswv nrog luag nyob.

    Peb ua ib cov neeg kom peb ciaj taus haiv thiab vam meej tau mas peb yuav tsum muaj 5 yam zoo li no:

    1. Ib tus laj txheej puav pheej ua haiv tus cim ntawm yus haiv neeg paub tias peb yog leej twg, peb tshwm sim qhov twg los.
    2. Ib txoj Kab li kev cai puav pheej haiv (culture ).
    3. Puav pheej ntawm ib yam lus thiab ib tus ntawv.
    4. Muaj ib tus laj txheej  txoj kev coj noj coj ua.
    5. Muaj ib txoj kev ntseeg (religion).

    Niaj hnub no tos peb hmoob tsis vam meej mas vim peb tsis muaj ib txoj kev ntseeg (religion) los tswj peb coj peb, peb, peb ces tsuas lam ntseeg dab niam dab txiv raws li poj ua tseg yawm ua cia los xwb. Los peb tseem ua tej kev dab kev qhua tsis zoo ib yam thiab koj ua tsis tau kuv dab kuv ua tsis tau koj dab tej no yog ib yam thaiv peb txoj kev vam meej, kev sib nyiam sib hlub ntawm peb haiv neeg hmoob.

    Zoo siab nej nyob Fab Kis tseem muaj ib co neeg zoo li koj muaj txoj kev ntseeg zoo thov pab coj peb cov hmoob nyob tim nej kom sawv daws muaj txoj kev ntseeg paub txog Tswv Ntuj zoo lawm yav tom ntej mog. Kuv muaj ntau tus phooj ywg nyob Fab Kis teb ib txwm lawv yeej ntseeg ntuj nyob tim Nplog los lawm tiam sis tam sis no lawv tso kev ntseeg tas lawv cia li ua ib co neeg tsis ntseeg ab tsi li, zoo li lawv yog ib co yaj poob zoo lawm vim lawv tsis paub yuav ua li cas rau lawv lub neej thaum txoj sia tu lawm lawv yuav mus rau qhov twg. Xav kom nej cov nyob sab tim nej yuav tau sib ntxawb sib pab txhawb cov neeg ntseeg nyob tim nej kom sawv daws txhob ua ib co neeg tsis paub tus tswv tsim yus los. Ua tsaug rau koj zaj lus os nawv. Thov kom Huab Tais Ntuj nrog nej nyob ua nej saib kaj lug.
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  Maiv Tooj 27th March 2014, 9:11 pm


    Tso txhua yam yuam kev raws poj yawm tau ua los tseg 1


    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  Maiv Tooj 28th March 2014, 11:07 am


    Tso txhua yam yuam kev raws poj yawm tau ua los tseg 2


    Mam txuas ntxiv lwm zaus.
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  Maiv Tooj 30th March 2014, 9:15 pm


    Tso txhua yam yuam kev poj yawm ua los tseg 3


    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  Maiv Tooj 1st April 2014, 7:50 am


    Tso txhua yam yuam kev poj yawm ua los tseg 4

    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5526
    Date d'inscription : 2009-08-18

     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  Maiv Tooj 3rd April 2014, 9:16 am


    Tso txhua yam poj yawm ua yuam kev los tseg 5/5


    Sponsored content


     TSO  TXHUA  YAM  YUAM  KEV  RAWS  POJ  YAWM  TAU  UA  LOS  TSEG  Empty Re: TSO TXHUA YAM YUAM KEV RAWS POJ YAWM TAU UA LOS TSEG

    Post  Sponsored content


      Current date/time is 27th March 2024, 9:16 pm