TXAIS LUB CIM PLEEV.
28-05-2013
Ib zaj kwv huam nyuam qhuav tshwm sim tsis ntev no.
Muaj ib tug yawg mob nyhav, ib hnub kuv leej nkawm wb txawm mus xyuas tim tsev kho mob; mus txog nws kuj nyob cus plaws, tab sis zoo li nws tsis tshua paub tom ntej tom qab lawm. Wb mus txog, nws poj niam zoo siab heev, txawm hais rau nws, uas pheej hais lus tsis tso tseg li, tias: "Koj puas paub ob tug ntawd yog leej twg?" Nws teb tias paub kawg, paub zoo kawg. Tab sis zoo li nws pheej tsis ntsia wb, li tsis pom wb, ntsia li nws ntsia nws lwm yam. Wb nyob ib pliag, wb nrog tus tub hlob tham me ntsis txog Kws tshuaj cov lus plov meej rau lawv ces wb kom tus tub thiab nyab nyob zov nws wb txawm nrog tus niam los mus tom lawv tsev ib pliag. Los ces kuv xav los zoo li yuav yog ib qho nyuaj, ib qho nyhav heev ntshe yuav tsis dim tus mob, kuv txawm hais kom leej niam mus nrhiav ib tug Txiv Plig tuaj ua lub Cim Pleev rau nws; leej niam teb tias tsis txawj hais es yuav ua li cas, kuv thiaj kom nws mus hais nws tus ntxhais kwv (tus niam hluas tus ntxhais) pab ntau xov tooj nrhiav. Nws rov hais tias tsis paub yuav piav li cas rau lawv, ces kuv txawm sau ua lus hmoob thiab lus fab kis tib si rau ib daim ntawv kom nws muab li ntawd rau tus ntxhais kwv.
Wb ob niam txiv txawm rov los tsev lawm.
Lawv mus nrhiav tau Txiv Plig tuaj ua lub Cim Pleev rau tus neeg mob Hnub Peb, tim 14-05-12013 thaum 14h15.
Ib txwm tus yawg no nws coj lub neej ntxhov siab, nws tsa hwj chim rau cov niam tub, nws ua ywj nws lub siab ntau ua rau cov niam tub muaj kev tu siab ntau yam, nws tseem hla txoj cai lij choj zaum puav thaum tsis ntev dhau los no nws kuj nrhiav tham nkauj hmoob nplog nyob cab sab ntau xov tooj ua hnub ua hmo, ib hlis tej nqe txog li 2.400€, twb tsis xam cov uas niaj hli xa mus pub lawv thiab.
Zoo li nws twb feeb tsis meej, tsis pem lawm, thaum Txiv Plig nrog ib tug phauj tuaj teev Ntuj ua lub Cim Pleev rau nws, Txiv Plig hais lus Las Tees xwb, nws twb tsis paub thiab nws kuj tseem twb sis paub lus fab kis zoo li; txawm yog hais ua lus fab kis kiag los nws yeej tsis to taub tag. Tab sis thaum Txiv Plig ua lub Cim Pleev rau nws tag, ces nws rov tsim meej meej los hais lus rau nws cov niam tub, hais ib tug dhau ib tug, hais tag puas tsav yam rau lawv; nws thov txhaum ntawm lawv ib tug dhau ib tug tag nrho nws sim neej uas nws tau ua siab lawv thiab cem lawv. Tej yam nws tus poj niam paub txog los nws hais tej yam uas nws ua nws es poj niam tsis paub txog los nws hais tib si, nws thov txim ntawm nws poj niam thiab cov me nyuam txhua tus ua ntu zus.
Nws hais tias: "Dab phem los nyob ntawm nws ob lub qhov muag, es dab phem kom nws ua phem rau nws cov niam tub, nws thiaj li tau ua phem tag nrho ib sim neej rau lawv."
Nws hais tias thaum Txiv Plig tuaj teev Ntuj rau nws tag ces zoo li leej twg muab nws ob lub qhov muag ntxuav, ua rau nws pom txawv, nws pom txoj kev hlub. Muaj ib tug poj niam hais rau nws tias: "Txij no koj txhob ua phem ntxiv lawm."
Ces nws hais tag puas tsav yam rau nws poj niam, nws poj niam tus niam hluas mus xyuas los nws yeej tham tib yam, nws hais quaj, hais quaj, nws hais tias nws tsis kam ris lub nra nyhav ntawd, nyhav nws heev nws yuav muab hle pov tseg. Txij no mus nws yuav los ua neeg zoo, nws yuav los ua ib tug txiv zoo rau nws cov niam tub. Nws hais thiab quaj tau ob hnub ces nws cia li tsis hais lus li lawm. Hnub Chiv 19-05-2013, kuv hais kom tus niam mus teev Ntuj no ces nws nqa lub Cim Yug los rau nws noj. Hnub ntawd, tus niam mus nqa tau Yes Xus lub Cev los rau nws noj, tus niam kom nws los tom txaj (cov me nyuam tuaj qhov txhia chaw tuaj xyuas nws ces thov lawv tso nws los tsev nruab hnub me ntsis), kom nws ua Ntoo Cuam Lub Cim tag teev zaj Peb Txiv thiab zaj Koj Nyob Zoo Mab Liab, nws sab sab hais tsis tshua taus tab sis tus poj niam nrog nws hais ua ke, nws kuj ua tiag hais tag ces tus poj niam muab lub Cim Yug rau nws noj. Dhau hnub ntawd los ces nws tsis tham lus ntxiv lawm, yog nws xav sawv xav zaum, xav mus tsev dej los nws hais kom lawv coj nws mus xwb. Zoo li nws tsis xav hais dab tsi ntxiv tsam nws ho ua txhaum ntxiv xwb. Nws xav nyob dawb huv li uas lub Cim Pleev ntxuav nws thiab nws tau lees nws cov txhaum hauv nruab siab tag nrho yam tsis txaj muag thiab tsis khuv xim, tsis ntshai poob tsim li. Nws tseem hais ntxiv tias: "Cov niag hluas nkauj tim nplog teb ces nej tsis paub xwb, twb tsis yog hluas nkauj, yog tib cov dab phem ntxias neeg xwb." Dhau li ntawd tsis ntev hnub ces nws tso lub ntiaj teb tseg.
Yam ib tug neeg uas yus paub, yus txheeb nws, yus kuj khuv xim kawg uas nws yuav ploj mus ib sid tsis rov. Tab sis pom qhov uas nws yog ib tug neeg yug los tsis zoo nqaij zoo tawv, tsis muaj laj lim tswv yim, nws nim ntshaw ntshaw kom luag hwm es nws thiaj ua neej yuam kev rhuav, txog thaum kawg nws hle tag nrho nws lub nra rau ntiaj teb yam tsis txaj muag, mas kuv kuj zoo siab heev tias thaum nyob ntiaj teb nws yog tus txom nyem tshaj uas tsis muaj suab muaj npe, tus tsis khuab qhov muag tab sis hnub no nws tso lub ntiaj teb tseg yam dawb huv, ntshe nws yuav yog tus tau txiaj ntsim tshaj; vim nws tau txais lub Cim Pleev, nws tau txais Yes Xus lub cev rau lub caij kawg ntawm nws lub lav mob, nws tau xeev rov qab los leev txhaum tag puas tsav yam rau lub ntiaj teb no mam li mus fim Tswv Ntuj. Yog ib qho uas zoo tshaj plaws.
H.Y
Tag sim neej rau hnub tim 27/05/2013 thaum ib tag hmo.
Fab Kis teb.Tus sau: Maiv Tooj.