Home
Yog koj tso siab rau Yesxus lub siab ntshiab, nws yuav ua koj siab kaj lug 
KEV HWM LUB THAJ TXI NTUJ
TP. Cwj Vuam Chiv, Nthuav Ntawv Ntshiab 2012-06-10
Ua neeg ntseeg yuav tsum paub txog qhov muaj nqes ntawm lub ntsiab Kev Ntseeg, qhov tseem ceeb ntawm Huab Tais Ntuj lub hom phiaj, tus lwj lwm.
Kev teev Ntuj, yuav paub qhov twg yog qhov tseem ceeb thiab muaj nqes.
Peb yuav tau teev Ntuj niaj hnub, nyeem Ntawv Ntshiab, txhais cov paj lug uas Yes Xus hais rau peb.
Niaj hnub teev Ntuj yog ib qho zoo, tab sis tseem tshua kev mus koom Thaj Txiv Ntuj Hnub Chiv thiab txais Yes Xus lub Cev los rau hauv yus tus kheej. Kev mus txais Yes Xus lub Cev yog kev Koom Siab nrog Huab Tais Yes Xus, Huab Tais Ntuj.
Yog peb niaj hnub teev Ntuj peb tus kheej, peb tsis kam mus teev Ntuj ua lub Txoos hauv Tsev teev Ntuj, txais Yes Xus lub Cev mas yuav tsis muaj txiaj ntsim thiab ntshe peb tsis yog ib tug neeg ntseeg zoo tiag tiag; peb yuav tau rov thim xav me ntsis.
Thaum peb muaj kev txhawj xeeb, peb hlawv tswm ciab pawg lug lam lug rau txhua tus leej Ntshiab, peb ho tsis mus ua Mis Xas Hnub Chiv, ua puas yog lawm?
Thaum muaj ib siab ob qeg, peb sib sau teev Ntuj ua hnub ua hmo, txhawb tsev neeg thiab tus mus lawd siab; tab sis peb ho tsis kum siv coj tus mus nkag mus hauv Tsev teev Ntuj, hauv Tswv Ntuj lub tsev, tsis thov Txiv Plig Foom Hmoov Zoo rau nws lub cev ua ntej lub cev yuav hla ntiaj teb no mus.
Ntau zaus zoo li peb yog neeg paub Ntuj Kev Cai zoo, tab sis zaum puav ntshe peb yuav tau rov tig los xav seb peb paub qhov twg rau qhov twg, yam twg nyob qhov twg kom meej thiab to tog. Yog peb ua neeg paub thiab ho tsis paub mas peb yog ib co neeg ceg tawv hauv peb lub neej, peb yuav yuam kev ntau yam thiab nruam qhov muaj nqes tseem ceeb uas peb rov muab tsis tau rov qab.
Peb cov Hmoob, cov nyob deb tsis muaj Txiv Plig mas tsis hais, vim lawv nyob raws li lawv lub neej tsis muaj Txiv Plig, lawv twb tu siab npaum li cas lawm, lawv kuj tseem yog cov uas muaj txoj kev ntseeg zoo thiab ruaj khov.
Cov uas nyob rau teb chaw Ywj Pheej, Txiv Plig thiab Tsev teev Ntuj pawg lug ntawm tej tog vaj tog tsev, lub loj luv me los muaj mas yuav tau rov tig xav txog qhov TSEEM CEEB ntawm Peb txoj kev ntseeg es xav tias tsuav sawv daws tuaj teev Ntuj ua ke xwb ces yog ib qho zoo lawm, tsis mus hais Txiv Plig ua Thaj Mis Xas. Kev mus koom nrog luag lwm haiv neeg, yog rhawv yus kev dav rau yus tsoom neeg, yog muaj kev sib fim, yus mus teev Ntuj nrog luag ib txhia, yuav tau hais kom ib tug Txiv Plig tuaj ua Mis Xas nrog yus cov Hmoob zaum puav es tsis txhob cia li sib sau niaj hnub teev Ntuj ua ke tias Peb Pawg no mas muaj zog heev, peb niaj hnub teev Ntuj; tab sis ho tsis yog ua lub Txoos.
Kev teev Ntuj ua ke muaj lub Txoo nws muaj nqes ntau yam rau yus xws li:
-Txiaj ntsim ntawm kev teev Ntuj (tau txiaj ntsim ntau dua yus teev yus).
-Nyob hauv qab Koom Txoos Txiv Vaj Qhia ua tus coj (ncaim thiab ncaim ces yuav hloov ua ib cov kev ntseeg tshiab tau thiab tsis muaj kev hwm lub Koom Txoos tiag).
-Rov Yus los Tshiab nyob hauv Yes Xus (Txais lub Cim Yug, yog txais Yes Xus los nyob hauv yus lub siab, lub zog).
-Koom siab nrog Huab Tais Peb Leeg (Koom siab nrog Tswv Ntuj, yus xyaum coj kom ntxim Tswv Ntuj siab, yus mloog tau qhov Tswv Ntuj nyiam thiab ntxub, yus nrhiav txoj hauv kev zoo).
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
