THAJ TXI NTUJ LUB NTSIAB

**Npuagtub** 7th September 2012, 4:55 am

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°1

THAJ TXI NTUJ LUB NTSIAB

Post Npuagtub 7th September 2012, 4:55 am

LUB THAJ TXI NTUJ

Lub txiaj ntsim tseem ceeb ntawm lub Thaj txi Ntuj rau tsoom neeg ntseeg Catholic muaj ntau yam uas peb txhua leej yuav tsum paub thiab hawm nyob hauv peb lub neej txoj kev ntseeg.

Vim li cas Hnub Chiv yog ib hnub ntshiab dawb huv rau tas cov neeg ntseeg nyob thoob ntiaj teb mus sib sau teev hawm Tswv Ntuj ua ke ?

Lo lus teb: Yog vim tias hnub ntawd yog hnub uas Yes Xus yeej txoj kev tuag thiab nws sawv rov los muaj txoj sia nyob mus ib txhiab ib txhis nyob saum Tswv Ntuj lub Ceeb Tsheej. Ua li mas thiaj xav qhia rau sawv daws paub tias: "Txij ntawm xyoo 33AD los mus, uas yog hnub Leej Ntuj Plig Ntshiab tau nqes los rau saum cov hauv paus xa lus txog lub zim txwv no mas tsoom neeg ntseeg Kastosliv thiaj li mus sib sau teev hawm Tswv Ntuj ua ke txhua txhia zaus rau hnub Chiv (Sunday).

Nyob hauv ntawv ntshiab puas muaj tej lo lus sau tias, thawj pab neeg ntseeg sib sau teev ntuj hnub Chiv?

Lo lus teb: Muaj ntau qib lus hais txog qhov ntawd, yam li phau ntawv qhib yav tom ntej kuj sau tseg tias: " Cov ntseeg sib sau teev hawm nyob hauv Tswv Ntuj Hnub." (QYTN 1:10)
Tseem muaj hais nyob hauv phau ntawv hauj lwm tias: "Thawj pab neeg ntseeg mas lawv nquag tuaj mloog cov hauv paus xa lus qhia lawv, ces lawv sawv daws koom siab los ua ib pab kwv tij, los ua cov kab ke lov ncuav mov thiab teev ntuj ua ke." (HL 2:42)

Lo lus hais tias: "Ua cov kab ke lov ncuav mov" mas txhais tias lawv sib koom los ua Thaj Txi Ntuj raws li cov neeg ntseeg lub zim txwv no uas niaj hnub ua kam nyob rau hauv Hnub Chiv (Sunday). Tsis tas li ntawd xwb tseem muaj lo lus sau nyob rau hauv phau ntawv Ntshiab tias: "Hnub Chiv ntawm thawj lub lis piam, peb sawv daws tuaj sib txoos ua cov kab ke Lov Ncuav Mov, yam li yog nyob hauv phau ntawv Hauj Lwm zaj 20 qib 7".

Ua li mas tsoom neeg ntseeg Ntuj yuav tau nco ntsoov tias: "Yes Xus tau tsim lub Cim Yug nyob rau hmo uas nws tau tawm tuaj ntsib cov thwj tim thiab nrog lawv noj pluas mov kawg, mas Yes Xus kuj tau foom hmoov zoo rau cov Ncuav Mov thiab cov Cawv, kom txia ua nws lub Cev Ntshiab thiab ua nws cov Ntshav Ntshiab uas muaj nuj nqis tas nrho." huab Tais Yes Xus tseem hais rau nws cov thwj tim tias: Nej yuav ua li no kom tau nco txog kuv.

Li ntawd, thawj pab neeg uas mloog Yes Xus lo lus qhia no, lawv thiaj sib sau los ua Thaj Txi Ntuj kom tau kev nco txog Huab Tais Yes Xus txoj kev tuag thiab sawv rov los.

Thawj pab neeg ntseeg uas lawv sib sau txhua txhia hnub Chiv los teev hawm Tswv Ntuj mas lawv ua cov kab ke zoo li cas?

Lo lus teb: "lawv tau ua ob yam kab ke tseem ceeb xws lis lawv nquag mloog Yes Xus cov lus qhia thiab ua cov kab ke Lov Ncuav Mov uas yog qhov tseem ceeb nyob hauv lawv lub Thaj Txi Ntuj." li ntawd nyob hauv txhua txhia hnub Chiv peb tsoom ntseeg sawv daws yuav tsum nco ntsoov qhib peb lub siab los txais Tswv Ntuj cov lus ua ke, ces peb yuav pom meej tias: "Tswv Ntuj yog tus tsim lub ntuj lub teb thiab yog tus Huab Tais cawm neeg." Li ntawd thaum ib tug neeg ntseeg tas sim neej mas cov neeg ntseeg thiaj li coj nws mus ua lub Thaj Txi Ntuj nyob hauv lub tseev teev ntuj ua ntej yuav coj nws lub cev mus zwm av.