Niam Mab Liab cov lus ceeb toom rau tiam 20 uas peb nyob no

Tiam 16, muaj ib tug leej phauj hu ua Mother Mariana de Jesus nyob lub zos Quito, Ecuador teb chaws (As Mes Kas qab teb).  Xyoo 1582, muaj ib zaug nws tab tom teev ntuj nyob ntawm lub thaj txi ntuj muaj lub tsev tsam phooj uas kaw lub Cim Yug. Ib sij huam nws cia li hnov nrov cuag li yog av qeeg, hos lub tsev teev ntuj cia li tsaus ntuj nti tuaj, tsuas tshuav lub thaj txi ntuj xwb thiaj ci pom kev cuag nruab hnub nrig. Nws txawm pom lub qhov rooj tsev tsam phooj qhib plho, ces HT Yes Xus dai saum ntoo cuam tawm plaws los… Pom Niam Mab Liab thiab LN Zam thiab LN Mab Liab Mas Ntas Las lawv peb leeg sawv ntsug nyob ze ntawd, ib yam nkaus li yog tiag tiag. HT Yes Xus tab tom ua nruj nriaj txoj sia yuav tu tsis tu.

Tus leej phauj txawm hnov ib lub suab hais tias: “Ntawm no yog kev rau txim rau tiam 20.” Ces nws pom muaj 3 rab ntaj, uas muaj ib co lus sau rau saud, dai nyob ncaj saum HT Yes Xus taub hau. Saum thawj rab ntaj muaj sau hais tias: “Kuv yuav rau txim rau txoj kev ntseeg yuam kev (heresy)”; saum rab ntaj ob, muaj sau hais tias: “Kuv yuav rau txim rau txoj kev thuam ntuj (blasphemy)”; saum rab ntaj peb muaj sau hais tias: “Kuv yuav rau txim rau txoj kev ua qias (impurity).”

Ces Niam Mab Liab txawm hais lus rau tus leej phauj tias: “Me ntxhais, koj puas kam muab koj txi rau ntuj los pab cov neeg ntawd?”
Tus leej phauj teb ntua tias: “Kuv kam.”  Tam sis ntawd, peb rab ntaj cia li ncaj qha los chob nkaus rau tus leej phauj lub plawv, ces tus leej phauj cia li vau hlo ntawd thiab cia li tuag kiag lawm.

Hnub ntawd ua cas tsis pom tus leej phauj tawm los koom nrog cov leej phauj noj mov los teev ntuj thiab ua hauj lwm li. Kev cai mas nws yog tus xub xub los txog, ces sawv daws txhawj thiab nrhiav nws.  Lawv nrhiav tau nws vau nyob ntawm lub thaj txi ntuj hauv tsev teev ntuj. Nws lub cev twb txias tas lawm. Lawv coj nws los tso rau saum nws lub txaj, thiab lawv hu kws tshuaj tuaj saib. Tus kws tshuaj thiab cov leej tij Franciscans hais tias nws yeej tuag lawm tiag tiag, kawg yuav tsum npaj ua nws lub ntees lawm xwb.

Thaum lub caij ntawd, Mother Mariana tus ntsuj plig mus tshwm ntawm Tswv Ntuj lub rooj txiav txim. HT Yes Xus uas yog tus tswv txiav txim nrhiav tsis tau ib qho txhaum dab tsi, ces nws hais rau M Mariana tias: “Tus uas kuv Txiv nyiam, koj los txais lub mom yeej kub uas peb yeej tau npaj rau koj txij puag thaum ntuj tsim teb raug los lawm.”  Thaum ntawd, M Mariana muaj txoj kev zoo siab puv npo nyob ntawm Tswv Ntuj Peb Leeg lub xub ntiag.

Tiam sis nyob ntiaj teb, cov leej phauj, cov txiv plig thiab leej tij, thiab cov neeg ntseeg sawv daws  tu siab thiab thov ntuj tsis tseg kom M Mariana rov los nrog sawv daws nyob.  Ces HT Yes Xus thiaj muab tau ob lub mom yeej kub los rau nws xaiv. Ib lub yog lub mom yeej kub nto koob meej, hos ib lub yog lub muaj pos thiab ib cov paj dawb (lilies). HT Yes Xus ua rau nws to taub tias nws muaj cai xaiv lub twg los tau, yog nws xaiv lub nto koob meej mas nws yuav nyob saum ntuj, tiam sis yog nws xaiv lub muaj pos mas nws yuav rov los ntiaj teb thiab yuav nyiaj kev txom nyem tsim txom mus ntxiv.

M Mariana thiaj thov hais tias kom HT Yes Xus xaiv rau nws. Tiam sis HT Yes Xus tsis kam, nws hais tias: “Thaum kuv qhaib koj los ua kuv tug, mas twb yog kuv xav sim koj siab. Nyem no los kuv tseem xav sim koj siab ib yam thiab.”
Ces Niam Mab Liab thiaj hais rau nws tias: “Me ntxhais, kuv tau tso txoj kev muaj koob meej nyob saum ntuj tseg thiab tau rov mus hauv ntiaj teb kom tau pab kuv cov me nyuam. Kuv xav kom koj yoog raws li kuv tau ua, vim koj lub neej yuav muaj nqes pab tau kuv lub Koom Haum (Order of the Immaculate Conception)

Hmoov phem yuav raug nej lub teb chaws tiam 20! Yog txog thaum ntawd tsis muaj ib co ntsuj plig uas yuav coj lub neej nyiaj kev txom nyem los them txim txhaum raws li koj tus piv txwv, kom ua tau Tswv Ntuj lub siab nqig, mas  yuav muaj hluav taws poob saum ntuj los hlawv cov tib neeg thiab los ntxuav Quito kom huv tuaj.”

M Mariana hnov li ntawd ces nws txiav txim siab rov los ntiaj teb. Nws rov tsim los, nws rov los ua neej ntev niaj ntau xyoo ntxiv,  nyiaj kev txom nyem loj them txim txhaum pub rau peb tiam neeg phem thiab qias nyob rau tiam 20 no.

Xyoo 1594 tim 2 lub 2 hlis, thaum sawv ntxov M Mariana tab tom txhos caug taub hau khoov hauv av teev ntuj thov ntuj pab nws lub koom haum leej phauj thiab pab ntiaj teb neeg muaj txhaum. Nws txawm hnov ib lub suab hu nws lub npe. Nws sawv tsees los saib, nws pom ib tug poj niam zoo nkauj rhib nyob hauv ib tauv pom pom kev. Nws puag tus me nyuam Yes Xus ntawm nws sab npab laug, hos nws tuav ib tug cwj nrig kub (crosier/la crosse episcopale) nyob ntawm nws sab tes xis. Tus pas ntawd muaj ntau yam pov haum muaj nqes uas ntshai tsis muaj cov zoo li ntawd nyob ntiaj teb no li.

Tus leej phauj txawm nug tias: “Leej niam tus zoo nkauj e, koj yog leej twg? Thiab koj xav tau dab tsi? Koj tsis paub tias kuv tsuas yog ib tug phauj pluag pluag xwb, uas muaj txoj kev nyiam Tswv Ntuj puv npo, qhov no muaj tseeb, tiam sis kuv raug txom nyem, raug tsim txom loj kawg kev nkaus li no lod?”
Tus poj niam teb tias: “Kuv yog Mab Liab tus pab kom txhua yam mus zoo (Mary of Good Success), yog tus Poj Vaj nyob saum ntuj thiab nyob ntiaj teb. Twb yog vim li ntawd ntag, vim koj yog ib tug ntsuj plig ua leej phauj uas muaj txoj kev nyiam Tswv ntuj puv npo thiab nyiam nws leej Niam uas tab tom nrog koj tham no, kuv thiaj tuaj saum ntuj tuaj kom tau nplig koj lub siab.”

Niam Mab Liab tseem rov tuaj nrog M Mariana tham ntau zaus ntxiv. Nws kuj tuaj kom txua ib tug mlom Mab Liab zoo nkaus li tus M Mariana pom thiab nrog tham. Nws kuj qhia hais tias tus neeg yuav txua tus mlom yog leej twg tib si. Thaum kawg, yog peb tug tshiab Mis Kas, Nkas Nplias thiab Las Fais tuaj kho tus mlom kom tiav. (saib daim duab)

Niam Mab Liab tau qhia ntau yam uas yuav muaj nyob hauv peb tiam 20 no, xws li:

- Muaj ib tug Vaj Qhia yuav tshaj tawm tias Niam Mab Liab xeeb los tsis lo neeg lub keeb txhaum (1854) thiab nws kuj yuav tshaj tawm tias Vaj Qhia tsis txawj yuam kev (1870) thaum nws txiav ib yam dab tsi txog kev ntseeg. “Tus vaj qhia ntawd yuav raug tsim txom thiab raug kaw hauv nws lub loog tsis tau kev mus qhov twg.”

- Lub caij ntawd(tiam 20) neeg yuav tsis muaj kev cheem nyias lub siab lub cev li lawm, yuav muaj tso kev plhuav rau neeg ua ywj siab, vim li ntawd yuav muaj kev lwj liam ntau tsav ntau yam. Dab phem Xas Tas xav ua tus tswj neeg, nws yuav siv cov koom haum Masonic los cob qhia tej me nyuam kom sawv daws nyiam txoj kev ywj siab, ces ntiaj teb yuav poob rau kev phem kev qias tas nrho.

- Cov me nyuam yug rau lub caij ntawd yuav tau hmoov phem kawg nkaus li! Vim cov coob yuav tsis tau txais lub Cim Ntxuav los Cim Txhab Zog. Hais txog lub Cim Daws Txhaum, mas lawv tsuas mus daws txhaum lub caij lawv tseem kawm ntawv hauv cov tsev kawm ntawv Kas Tos Liv xwb. Tiam sis dab phem yuav nrhiav tswv yim tas zaj tas zog los rhuav tshem cov tsev kawm ntawv Kas Tos Liv. Nws yuav siv cov neeg ua nom ua tswv los ua nws tes hauj lwm ntawd.

- Hais txog lub Cim Yug, yuav muaj neeg ua txhaum loj ntau yam rau lub Cim Yug, cov ua zais ntshis los muaj cov tab meeg ua rau sawv daws paub los muaj, ua rau Niam Mab Liab tu siab kawg nkaus li.

- Lub Cim Pleev Roj: Lub caij ntawd mas neeg feem coob yuav tsis saib lub Cim Pleev muaj qab hau… Coob leej tas sim neej tsis txais lub Cim Pleev li, ces lawv yuav tsis tau txais cov txiaj ntsim txhawb lawv txoj kev ntseeg thiab lawv txoj kev tso siab rau ntuj thaum lawv tab tom hloov lub caij hauv ntiaj teb no mus rau lub caij tsis txawj kawg saum ntuj.

- Lub Cim Cog Lus yog ib lub cim qhia txog HT Yes Xus txoj kev cog lus nrog lub Koom Txoos, Neeg yuav thuam thiab rhuav lub Cim Cog Lus. Cov Masons yuav ua cov kav thoob ntiaj teb. Lawv yuav ua ib co cai los rhuav lub Cim Cog Lus. Lawv yuav tso kev plhuav kom tib neeg nyob ua ke raws kev txhaum, ces yuav muaj cov me nyuam tsaub yug los coob uas tsis tau txais lub Koom Txoos txoj kev foom hmoov zoo…

- Txoj kev kawm ntaub kawm ntawv nyob hauv tseem hwv cov tsev kawm ntawv yog ib qho ua kom tsis muaj cov tub hluas ntxhais hluas kam mus ua leej choj los ua leej phauj qee lawv lub neej pub rau tswv ntuj.

- Lub Cim Tiag Tes yuav raug thuam, raug tsim ,thiab raug ntxub. Vim cov leej choj yog cov sawv Tswv Ntuj chaw nyob hauv lub Koom, vim li ntawd ces zoo cuag li yog Tswv ntuj thiab lub Koom Txoos raug thuam raug tsim thiab raub ntxub thiab.

- Dab phem yuav ua tas puas tsav yam los tsim cov leej choj uas yog HT cov tub txib. Nws yuav ua kom lawv txias siab rau Tswv Ntuj tes dej num; coob leej yuav poob rau dab phem tes. Cov poob rau txoj kev haub ntxias yuav ua rau tsoom ntseeg poob siab loj thiab yuav ua kom cov neeg ntseeg phem thiab cov ntxub lub Koom Txoos Kas Tos Liv haj yam thuam haj yam ntxub tas nrho ib tsoom leej choj. Thaum ntawd yuav zoo li dab phem yeej tas nrho lawm, ces yuav ua rau cov tub txib zoo (leej choj) hauv lub Koom Txoos raug kev txom nyem loj kawg li… thiab yuav ua rau Vaj Qhia, uas yog HT Yes Xus tus tiam lis nyob ntiaj teb, tau poob kua muag twj ywm nyob ntawm Tswv ntuj xub ntiag, thov kev pom kev, kev ntshiab thiab kev zoo rau tas tsoom tub txib leej choj nyob ntiaj teb…

- Yuav muaj tej lub caij tu siab loj uas twb phim cov neeg tuav dej num yuav tsum txhawb lub Koom Txoos tas siab nrho, tiam sis lawv tseem cev tes mus koom nrog lub Koom Txoos cov yeeb ncuab ua yeeb ncuab cov hauj lwm. Thaum lub caij uas kev phem yeej nyob qhov txhia chaw, thiab txoj kev tswj hwm siv hwj chim los quab yuam thiab ua tsis ncaj rau cov neeg me, thaum ntawd lau, yog lub caij uas lawv txoj kev poob tsag nyob ze ze lawm. Lawv yuav vau hlo ntsoog tas rau hauv av.

- Ces lub Koom Txoos yuav zoo li ib tug hluas nkauj uas zoo siab luag ntxhi thiab yeej tas txhua yam, nws yuav rov tsim dheev nruab dab ntub los nyob hauv ib leeg txiv zoo lub xub ntiag, uas yog ib tug Vaj Qhia tseeb ceeb rau lub caij ntawd. “Yog nws tig pob ntsegmloog ntuj lub txiaj ntsim tshoj nws lub siab –muaj ib yam yog kam mus nyeem tej yam piav txog kuv leej Tub thiab kuv wb txoj kev khuv leej nej sawv daws loj kawg nkaus- mas wb yuav pub txiaj ntsim ntau rau nws, thiab yuav pub tej yam txuj tshwj xeeb rau nws, wb yuav ua kom nws yogi b tug loj nyob ntiaj teb no, thiab nws tseem yuav loj dua nyob saum ntuj. Wb tau npaj ib qho chaw tseg rau nws lawm, vim nws tsis quav ntsej txog tib neeg zaj, nws tsuas nrhiav tas zog qhov tseeb thiab tawm tsam tas zog kom tau txuag lub Koom Txoos txoj cai xwb. Vim li ntawd tsim nyog hu nws ua ib tug ‘Tim Khawv’ (martyr).”

- Thaum tiam 19 yuav tas mus rau ib nrab ntau hauv tiam 20, yuav muaj ntau yam kev ntseeg yuam kev (heresies) rim us thoob cov teb chaws ntawd…

- Muaj ib feem tsawg ntawm cov ntsuj plig uas lawv khaws twj ywm txoj kev ntseeg thiab coj lub neej raws kev zoo, mas lawv yuav tau nyiaj ib txog kev ua tim khawv txom nyem loj kawg nkaus thiab ntev. Muaj coob leej yuav tas txoj sia vim raug txoj kev txom nyem loj mas lawv yuav raug suav nyob hauv cov ua tim khawv uas muab lawv tus kheej txi rau ntuj los pab lub teb chaws thiab lub Koom Txoos.

- Vim xav kom tib neeg dim ntawm txoj kev ua cov kev ntseeg yuam kev qhev, mas HT Yes Xus yuav npaj ib cov neeg uas muaj lub siab txawj txiam txiv tuag nthi, muaj siab tawv qhawv, tsis muaj yuav tso tseg, thiab yuav tso siab lug rau tswv ntuj. Tswv Ntuj yuav sim lawv siab, ces yuav muaj qee lub sij hawm uas zoo lit as puas tsav yam poob tag nrho, tiam sis yog lub sij hawm ntawd ntag uas tas puas tsav yam yuav rov sawv rov pib tshiab dua tas nrho.

- Lub caij ntawd, tas puas tsav yam nqus cov pa puv nkaus lub tswv yim ua phem ua qias, yuav zoo nkaus ib lub hiav txwv qias los nyab tas nrho tej kev kev chaw sawv daws ncig, ces neeg yuav ua lwj ua liam nyob qhov txhia chaw… tej me nyuam yaus yuav muaj tsawg tsawg leej thiaj tseem dawb huv, cov poj niam uas coj tus cwj pwm ua neeg tsim txiaj los muaj tsawg tsawg lawm xwb.

- Tus neeg uas tsim nyog yuav tsum hais lus phim lub sij hawm, nws yuas nyob ntsiag to xwb.

- Muaj tsawg tsawg tus ntsuj plig xwb uas tseem txuag tau nws lub cev dawb huv nyob ntiaj teb. Lub paj dawb paug ntawd yuav tsum tau mus nrhiav chaw nkaum hauv cov tsev twj cuab… Yog tsis muaj txoj kev dawb huv ntxiv lawm mas hluav taws yuav tsum poob saum ntuj los ntxuav tas tej av…

- Tej yam kev phem yuav nkag tau rau tas txhua hom neeg, thiab yuav nkag tau rau lub tsev neeg kiag, ces yuav mus rhuav tej me nyuam txoj kev dawb huv. Tej me nyuam lub siab dawb yuav zoo nkaus li tej yam qab qab uas dab phem zoo siab hlo khaws nkaus mus noj…

- Cov tsev koom haum leej phauj los txiv twj cuab tseem yuav muaj ntxiv, thiab yuav ua hauj lwm txhawb lub Koom Txoos thiab pab cawm tib neeg tus nplig… Cov leej choj (secular clergy) yuav ua tsis tau hauj lwm vim lawv lub siab tsis npuab Tswv Ntuj tes dej num uas Tswv ntuj npaj rau lawv. Lawv lub siab yuav ntshaw nyiaj txiag thiab yuav ua hauj lwm nrhiav nyiaj xwb.

- “Nej yuav teev ntuj tsis so, yuav thov ntuj tas mus li, thiab yuav quaj kua muag iab kua muag daw nyob hauv nej nruab siab los thov kuv leej tub uas nyob hauv lub Cim Yug, kom nws khuv leej txog nws cov tub txib ua leej choj thiab kom nws muab lub caij txom nyem no txo kom luv li luv tau, kom nws tsuag tsuag xa tus Vaj Qhia uas yuav los txhawb siab rau nws cov leej choj tuaj sai sai.”


http://www.tfp.org/tfp-home/about-our-lady/a-victim-for-the-twentieth-century.html