THEEM 1 : YES XUS TSIM LUB CIM CAV TXIAJ NTSIM.Ua ntej hmo lawv yuav muab Yes Xus rau cov nom ntes.
Huab Tais Yes Xus tuav ib lub ncuav mov mog, nws muab ntais, nws hais tias :
“Qhov no yog kuv lub cev uas cia rau cawm nej.
Nej ua qhov no kom tau nco txog kuv.”
Thaum noj hmo tas, Huab Tais Yes Xus kuj tuav lub ntim cawv, nws hais tias :
“Lub ntim cawv no, yog zaj cog lus tshiab nyob hauv kuv cov ntshav.
Nej haus lub ntim no thaum twg,
mas nej haus kom tau nco txog kuv.”
1 KLN 11:23-25
THEEM 2 : YES XUS LAWV TUAJ TXOG NKES TXES MAS NIS.
Yes Xus coj Pob Zeb, Yas Kos thiab Zam nrog nws mus.
Yes Xus hais tias : “Kuv ntxhov siab yuav tuag, nej zov hmo mog !”
Yes Xus txav mus, nws khoov rau hauv pem teb, Yes Xus hais tias :
“Txiv, thov koj tshem lub ntim no mus deb kuv,
tab sis txhob ua raws li kuv xav, koj ua raws li koj xav.”
Yes Xus pom nws 3 leeg thwj tim tsaug zog,
ces Yes Xus thiaj hais rau Pob Zeb tias :
“Nej zov hmo thiab nej teev Ntuj mog.”
Yes Xus rov thov Leej Txiv dua, nws kuj rov pom lawv tsaug zog 3 zaug diam.
Zaum 3, ces Yes Xus thiaj hais rau lawv tias :
“Txog caij lawm ! Nej sawv, tus muab kuv muag tuaj yuav txog.”
MK 14…
THEEM 3 : YUS DAS NWJ YES XUS – COV THWJ TIM KHIAV.
Thaum lawv ntes tau Yes Xus,
lawv coj Yes Xus mus rau hauv tus Tuam Leej Choj tsev.
Cov txwj laus Xas Nes Nrees nrhiav lus liam Yes Xus.
Muaj ob peb tug sawv los iab liam Yes Xus, lawv hais tias :
“Peb hnov nws hais tias KUV UA 3 HNUB XWB,
TXHIM TAU LUB UAS TSIS YOG NEEG TES UA.”
Tus Tuam Leej Choj thiaj nug Yes Xus tias :
“Koj puas yogLeej Pleev ?
Yes Xus teb tias : “Kuv yog !”
Lawv thiaj nto aub ncaug thiab xuas nrig ntaus Yes Xus.
MT 26: 47… MK 13:43…14… + LK 22:47…
THEEM 4 : LAWV COJ YES XUS MUS HAUV LUB TSHAV TXIAV TXIM.
Lawv muab pos los qhaib ua ib lub kauj,
ces lawv muab looj rau saum Yes Xus taub hau, lawv hais tias :
“Koj nyob kaj lug, cov Yes Xus tus vaj !”
Pob Zeb nyob hauv lub tshav loog thiab,
ces ib tug ntxhais txib txawm hais rau Pob Zeb tias :
“Koj nrog tus Nkas Lis Lais Yes Xus ua ke thiab”
Pob Zeb tsis kam lees Yes Xus 3 zaug sib law, ces ib tug qaib txawm qua rhe.
Peb Zeb nco dheev txog cov lus Yes Xus xub hais tseg ua ntej.
Pob Zeb thiaj mus nraum zoov, ces nws quaj tu siab tas nrho.
MT 26:69… MK 14:55 … LK 22:56… Z 18:12…
THEEM 5 : PIS LAS TOS TXIAV TXIM.
Thaum nyuam qhuav kaj ntug txoog, lawv muab Yes Xus khi.
Lawv coj nws mus rau tus nom Pis Las Tos, ces Piv Las Tos nug Yes Xus tias :
“Koj puas yog cov Yus Dus tus vaj ?”
Yes Xus teb tias : “Yog, koj hais li ntawd.”
Yes Xus tsis teb dab ntsi ntxiv, ces Pis Las Tos thiaj xa Yes Xus mus rau Hes Los.
Yes Xus kuj tsis hais ib lo lus rau Hes Los thiab.
Niaj xyoo thaum ua lub ntees Hla, mas lawv tso ib tug nyob txim tawm mus.
Lawv thiaj qw tias : “Koj tso Npas Las Npas, hos muab Yes Xus dai saum ntoo cuam !”
Pis Las Tos thiaj kom lawv nplawm Yes Xus
thiab muab nws coj mus dai saum ntoo cuam.
MT 27:1… MK 15:1… LK 23:2… Z 18:29 + 19:2…
THEEM 6 : MUS TXOG NKOS NKOS THAS.
Lawv coj Yes Xus mus.
Yes Xus kwv nws tus ntoo cuam,
ces nws tawm mus txog qhov chaw hu ua :
“Khauj Khaum Taub Hau”.
Lus Hes Nplaws yog “Nkos Nkos Thas.”
Lawv muab Yes Xus dai rau saum tus ntoo cuam.
Lawv kuj muab 2 tug neeg phem dai saum ntoo cuam thiab,
yam li ib tug nyob ib sab, hos Yes Xus nyob hauv nruab nrab.
Z 29:17-18
THEEM 7 : PIS LAS TOS TXIAV TXIM.
Xis Moos Xis Les Nas.
Thaum lawv yuam Yes Xus kwv ntoo cuam mus (Yes Xus ntog).
Lawv ntho nkaus ib tug txiv neej hu ua Xis Moos Xis Les Nas.
Xis Moos Xis Les Nas mus ua teb rov los xwb,
ces lawv quab yuam muab tus ntoo cuam rau Xis Moos kwv,
kom nws kwv lawv Yes Xus qab.
LK 23:26
THEEM 8 : COV POJ NIAM YES LUS XAS LES.
Ib pab pej xeem coob coob raws Yes Xus qab mus.
Muaj ib cov poj niam ntaus lawv hauv siab thiab quaj hlub Yes Xus.
Yes Xus tig los hais tias :
“Cov ntxhais nyob Yes Lus Xas Les, nej txhob hlub kuv.
Nej quaj hlub nej thiab hlub nej cov me nyuam mog !”
Vim yuav muaj tej hnub uas nej yuav hais rau cov roob tias :
“Nej vau los tsuam peb mas.”
LK 23:27-31
THEEM 9 : TSA YES XUS NYOB SAUM NTOO CUAM.
Lawv muab ib cov cawv xyaw tsib rau Yes Xus haus.
Yes Xus saj me ntsis, nws tsis xav haus.
Lawv ntaus kuam muab Yes Xus cov ris tsho sib faib.
Lawv sau ntawv dai rau ntawm Yes xus taub hau.
Lawv piav txog Yes xus lub txim tias :
“Tus no yog Yes Xus, cov Yus Das tus vaj.”
Cov thawj Leej Choj nrog cov kws Ntawv Ntshiab
thiab cov txwj laus hnyos Yes xus tias :
“Nws cawm tau luag tej, tab sis nws rov cawm nws tsis tau.”
MT 27:33… MK 15:22… LK 23:33… Z 19:17…
THEEM 10 : TUS TUB SAB SIAB NCAJ THOV YES XUS.
Ob tug neeg phem uas daim saum ntoo cuam,
mas muaj ib tug hais rau Yes Xus tias :
“Yes Xus, thaum koj mus txog saum koj lub Ceeb Tsheej,
thov koj nco txog kuv thiab mog.”
Yes Xus thiaj hais rau nws tias :
“Kuv hais tseeb rau koj !
Hnub no kiag, koj yuav nrog kuv nyob hauv lub nras lom zem.”
LK 23 : 42-43
THEEM 11 : MAB LIAB THIAB ZAM NYOB ZE YES XUS.
Yes Xus pom nws niam thiab pom tus thwj tim uas nws nyiam
sawv ze nws niam, ces Yes Xus thiaj hais rau nws niam tias :
“Niad, tus ntawd yog koj tus tub.”
Thiab Yes Xus kuj hais rau nws tus thwj tim tias :
“Zam, tus no yog koj niam.”
Txij ntawd los, tus thwj tim Zam thiaj coj Mab Liab mus hauv nws tsev.
Lub caij ntawd muaj ib cov poj niam nyob nrug deb me ntsis ntsia ntsoov Yes Xus thiab,
xws li yog Mab Liab Mas Ntas Las thiab cov poj niam tsob hwb Yes Xus,
uas nyob Nkas Lis Lais thiab nyob Yes Lus Xas Les.
Z 19:25-27 MT 27:56… MK 15:40… LK 24:49
THEEM 12 : YES XUS TXOJ SIA TU.
Kwv yees txij tav su dua, ces lub hnub txawm ploj ntais.
Ua rau tas lub ntiaj teb tsaus ntuj nti mus txog 3 teev hnub qaij.
Daim ntaub hauv Kem Tsev Ntshiab txawm ntuag rhe nruab nrab.
Yes Xus hu ib suab nrov nrov tias :
“TXIV, kuv tso kuv txoj sia rau hauv koj txhais tes.”
Yes Xus hais li ntawd tas, ces nws txoj sia tu nrho.
Tus xab txheeb pom Yes Xus txoj sia tu li ntawd, ces nws thiaj hais tias :
“Tus no, yog Tswv Ntuj Leej Tub tiag !”
Z 19:31… MK 15:37…
THEEM 13 : MUAB YES XUS LUB CEV ZWM NTXA.
Thaum tsaus ntuj, Yos Xes As Lis Mas Thias tuaj.
Nws txawm mus cuag Pis Las Tos, nws thov Yes Xus lub cev.
Pis Las Tos tso lus rau nws mus txo Yes Xus lub cev.
Yos Xes As Lis Mas Thias thiaj mus muas tau ib daig ntaub qhwv tuag los,
nws tso Yes Xus lub cev rau hauv ib lub ntxa uas txaug nyob hauv qhov tsua.
Nws dov daim txiag zeb los kaw lub rooj ntxas.
Mab Liab Mas Ntas Las thiab lwm tus Mab Liab,
ntsia ntsoov qhov chaw uas lawv tso Yes Xus lub cev zwm ntxa.
MT 27:57 MK 15:42 LK 23:50… Z 19:38…
THEEM 14 : LUB NTXA KHOOB LUG – YES XUS ROV SAWV.
Dhau hnub Xas Npas Tos, Mab Liab Mas Ntas Las mus muas tshuaj pleev tuag.
Hnub Chiv lis piam ntawd thaum sawv ntxov, lawv txawm mus tom ntxa.
Ua cas lawv pom daim txiag zeb swb rau ib sab,
ces lawv thiaj mus xyuas ntxa thiab pom ob tug neeg hnav tsoos ci ci.
Ob tug neeg no hais rau cov poj niam tias :
“Ua cas nej nrhiav Tus Ciaj hauv cov neeg tuag ?”
Cov poj niam thiaj rov los qhia tej ntawd rau Yes Xus cov thwj tim.
Tab sis Yes Xus cov thwj tim tsis ntseeg.
Ib tsam, Yes Xus thiaj nrog ob tug thwj tim mus Es Mas Ws tham.
Hmo ntuj, Yes Xus tawm los rau cov thwj tim pom.
7 hnub tom qab, Yes Xus tawm los rau Tos Mas pom.
Hos thaum cov thwj tim mus Nkas Lis Lais teb,
Yes Xus kuj tawm los rau lawv pom thiab.
Yes Xus sawv rov los tau 40 hnub, ces nws mam mus saum ntuj lawm.
MT 28… MK 16… LK 24… Z 20+21…
Home
Yog koj tso siab rau Yesxus lub siab ntshiab, nws yuav ua koj siab kaj lug 
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
