TP.Txhiaj Foom lub TSEV Ntawv

Cov kwv tij , hnub no peb thiaj zoo siab tshaj ib zag lus tshiab kom nej
tau pab nthuav piav nej tej siab ntsws rau Tswv Ntuj ,kuj yog thaum nej
teev hawm Tswv Ntuj…..Zoo li muaj tej hnub uas peb sawv daws tsis
tshua pom kev .Ces peb sawv daws xav txog ntau yam zoo li no tias :
peb puas muaj cai nug Tswv Ntuj txog 2- 3 yam uas kom peb nyuaj
siab ntxhov plaws xws li no TIM LI CAS kuv nrog lwm tus tsis tshua sib
haum ? TIM LI CAS kuv raug mob nkeeg tau ntev hnub ? TIM LI CAS
kuv tus swm neeg tau tas sim neej ntxov tas npaud ? Cov kwv tij , peb
yeej muaj cai los nug Tswv Ntuj txog ntau yam uas kom peb nyuaj siab
ntxhov plaws zoo li ntawd - Peb yuav nco ntsoov txog qhov tseem ceeb
tias : Huab Tais Ntuj yog tus tsim peb los - peb yog Tswv Ntuj tus me
nyuam - Tswv Ntuj yog peb Txiv - Nws hlub peb tshaj plaws - Peb tab
meeg nthuav piav tau peb tej siab ntsws rau Ntuj , hos tsis zais dab
tsi rau Tswv Ntuj vim tias Nws yog tus nplij neeg tej siab ntsws kom
zoo

.NUG : nyob hauv NTAWV NTSHIAB puas muaj tej phab ntawv uas qhia
peb teev hawm Tswv Ntuj raws qhov yog ?

TEB : yeej muaj ntau zaj lus uas hais txog qhov ntawd. Zoo li zaj lus uas
qhia peb tias : Yes Xus nrog cov kws Txoj Cai tham hauv lub tuam tsev
teev Ntuj hauv lub nroog Yes Lus Xas Les . « Hnub ntawd mas nws niam
Mab Liab thiab nws txiv Yos Xes nkawd coj tus tub Yes Xus . Txog lub caij
rov mus tsev, mas Yes Xus tseem nyob Yes Lus Xas Les – Nws niam txiv
tsis paub . Nkawd nrhiav Yes Xus peb hnub, ces nhiav tau Yes Xus
mloog cov kws Txoj Cai thiab nug lawv . Mab Liab nkawd xav tsis thoob,
ces niam Mab Liab nug Yes Xus tias : » Me tub ,VIM LI CAS koj ua li
ntawd rau wb ? Saib : koj txiv nrhiav koj –wb ntxhov siab tas nrho » .Yes
Xus teb rau nkawd « VIM LI CAS NEB NRHIAV KUV ?. Neb tsis paub
tias kuv yuav tsum leg kuv Txiv cov hauj lwm lod ? » Mab Liab thiab Yos
Xes tsis to taub lo lus uas Yes Xus hais rau nkawd . Yes Xus nrog nkawd
rov mus tsev nyob Nas Xas Les “ Lus Kas 2 : 41 -52
Cov kwv tij, lo lus TIM LI CAS ntawd mas tau hais 2 zaug diam . Yog
niam Mab Liab thiab Yes Xus nkawd tau hais ntag . Thiab yog thawj thawj
lo lus uas Yes Xus tau hais . Peb tau mloog zaj lus tseem ceeb hauv
NTAWV NTSHIAB lawm – Ua li nyem no thiaj to taub tias : txog lub
caij uas peb raug kev nyuaj siab ntxhov plaws, mas peb tsoom
ntseeg tsis ntshai ncaj qha hu txog Tswv Ntuj pab tias :
“ Peb Txiv siab zoo tas nrho, kuv niaj hnub nco tias kuv yog koj tus me
nyuam -,Tab sis zoo li nyem no mas kuv lub neej raug kev tsaus ntuj nti –
Yog tias koj tsis pub koj tej txiaj ntsim uas loj tas nrho tuaj rau kuv, mas
kuv nyob tsis tau kiag – Thov koj ua Txiv hlub tshua me yau os mog”
Nyob hauv NTAWV NTSHIAB, peb nyeem tau ntau phab ntawv pab qhia
teev hawm Tswv Ntuj raws qhov yog - Ces peb yuav nco txog 2 qib lus
tseem ceeb uas Huab Tais Yes Xus hais tseg, kuj yog thaum Yes Xus dai
saum Ntoo Cuam – Yog lo lus TIM LI CAS thiab lo lus TSO SIAB LUG
RAU TSWV NTUJ .

LO LUS 1 :” Kuv tus Tswv Ntuj – Kuv tus Tswv Ntuj !, UA CAS koj tso
kuv pov tseg” ‘Marc 15 :34 – Yam li : Yes Xus tsis pom Tswv Ntuj nqes los
pab cawm ntawm txoj kev tuag - Yes Xus tab meeg hais lo lus ntawd -
Yog vim qhov ntawd ces peb kuj muaj cai hais tib zaj lus raws li Yes Xus
ntag
Li cas los ,tshuav LO LUS_2, uas pab peb dim ntawm kev ntxhov siab –
Yes Xus muab nws kev ntseeg los teev hawm Tswv Ntuj zoo li no tias :
TXIV, KUV TSO KUV TXOJ SIA RAU HAUV KOJ TXHAIS TES
Cov kwv tij, niaj hnub nyem no, muaj tej lub caij uas peb kuj hais tau lo
lus 1 tias : :” Kuv tus Tswv Ntuj – Kuv tus Tswv Ntuj !, UA CAS koj tso kuv
pov tseg” - Tab sis peb ib txhij yuav tau nrog Huab Tais Yes Xus koom ua
ib lub siab npuab peb Txiv nyob saum ntuj tias TXIV, KUV TSO KUV
TXOJ SIA RAU HAUV KOJ TXHAIS TES . Peb mam li coj tau lub neej
ruaj nreb khov kho – yog lub neej nyob thaj yeeb nyab xeeb, lub neej nyob
tiaj nyob tus , nyob ntawm Tswv Ntuj lub xub ntiag , tsis tu ncua lauj .

TEEV NTUJ : Peb Txiv khuv leej neeg tas nrho , thov koj xa Leej Ntuj
Plig Ntshiab nqes los tshoj tas peb tsoom kwv tij neej tsa Hmoob , kom xwv
lawv sawv daws TSO SIAB LUG rau koj , tag mus li : peb ua koj tsaug
ntau .

T.P. Txhiaj Foom omi

Cov kwv tij phooj ywg sawv daws, hnub no zoo hnub , rau qhov tias nej yuav txais tej zaj lus uas pab peb TSO SIAB RAU NTUJ. Peb sawv daws tseem nco ntsoov tias peb nyob kaj lug ua neeg ntseeg Ntuj, ces peb niaj hnub xyaum NYIAM Tswv Ntuj uas nws yog peb Txiv nyob saum ntuj - Hos peb tej kev TSO SIAB LUG thiaj loj hlob zuj zus ntag.
Thov kom nej khaws tej qib lus hauv Nkauj Paj Nruag 25 tseg, ces 2-3 hnub saum no, thiab 2-3 hlis saum no , nej mam li rov los twm dua tau haj yam zoo ;
Ib feem hauv NPN ( =Nkauj Paj Nruag ) 25 kuj sau zoo li no tias
: « Huab Tais, kuv cev kuv tus plig nce tuaj rau koj - Kuv tus Tswv Ntuj koj lub siab hlub mos nyoos thiab koj lub siab nyiam ruaj, uas koj ib txwm muaj– Koj xav txog kuv vim koj siab zoo – Tus twg hwm Huab Tais mas nws tus plig yuav nyob hauv lub chaw kaj siab -- Kuv muab koj los ua kuv lub chaw nkaum.
– Huab Tais , koj txhob nco txog kuv tej txhaum ,vim koj hlub kuv-- Huab Tais, thov koj zam kuv qhov txhaum , vim koj lub npe nto koob meej - – Thov koj tig los ntsia kuv ! Thov koj khuv leej kuv, vim tej kev txhawj xeeb nyob hauv kuv nruab siab loj kawg - thov koj rub kuv tawm ntawm kuv tej kev ntxhov siab – Thov koj so kuv cov txhaum tas tib si – Koj txuag kuv txoj sia ! Koj npo kuv mog ! – Thov koj npo kuv dim ntawm kuv tej kev txhawj xeeb mas » .
Cov kwv tij, hauv Nkauj Paj Nruag 25 ntawd , peb mloog 2 zag NTAWV MOO ZOO , uas tuaj kaj peb tej siab ntsws kom xwv peb thiaj rov nyob tiaj nyob tus .

ZAJ 1 hais tias Tswv Ntuj lub siab nyiam ruaj - ZAJ 2 : Tswv Ntuj muab nws lub hwj huam los so peb tej txhaum .
.. ZAJ 1 hais tias « Tswv Ntuj lub siab nyiam ruaj » - Yeej tsim nyog khaws qib lus tseem ceeb ntawd tseg tias : « Kuv tus Tswv Ntuj, koj lub siab hlub mos nyoos thiab koj lub siab nyiam ruaj, uas koj ib txwm muaj– Koj xav txog kuv vim koj siab zoo ».
Cov kwv tij , Tswv Ntuj yog peb Txiv siab zoo nyob saum ntuj ,peb tej siab ntsws kaj huv, ces ntau ntau zaus, peb thiaj kub siab hais tias : KUV TSO SIAB RAU TSWV NTUJ TIB LEEG XWB .

.. ZAJ 2 : Tswv Ntuj muab nws lub hwj huam los so peb tej txhaum Yeej tsim nyog khaws tej qib lus tseem ceeb hauv Zaj Nkauj Paj Nruag 25 tseg tias , « Huab Tais ,koj txhob nco txog kuv tej txhaum ,vim koj hlub kuv--–– Thov koj so kuv cov txhaum tas tib si .Thov koj npo kuv dim ntawm kuv tej kev txhawj xeeb mas » .
Cov kwv tij thaum peb tau txais lub Cim Ntxuav mas peb kuj tau xav txog qib lus ntawd lawm, tab sis peb tseem ntog hauv ntau yam txhaum - Li ntawd, peb yuav tsum rov thov Tswv Ntuj so peb cov txhaum tas tib si -
Mas muaj ib zaj teev Ntuj uas peb hais kam ( peb kuj paub hauv nruab siab ) tias :- Yog ZAJ TU SIAB hais tias : « Zaj tu siab, kuv tus Huab Tais , koj lub siab zoo tas nrho – Koj zoo nyiam tas nrho – Neeg lub txhaum tsis ntxim koj siab – Kuv tseem ua txhaum rau koj -Kuv tu siab nrho - Kuv tsis xav txhaum lwm zaus – thiab kuv xav them txim – Koj pub txiaj ntsim pab kuv – Ua li »
Cov kwv tij vim PEB TSO SIAB LUG RAU NTUJ, ces peb thov kom Tswv Ntuj muab nws lub hwj huam los so peb tej txhaum tas tib si . Yuav thov Tswv Ntuj pab peb zoo li ntawd ntau zaus ntag .
Peb sawv daws lees txog peb tej kev tsis muaj zog txaus ua dawb huv. Ces peb nyias hais tau tib zaj lus hauv nyias lu siab raws li tus Hauv Paus Xa Lus Paj Lug hais tias : « Kuv lub cev nqaij xav ua yam zoo, tab sis kuv ua tsis tau yam zoo – Ua li mas kuv txom nyem tas nrho » ( Los Mas 7 :18 +24 )
Li ntawd ib yam tseem ceeb ( uas peb xav tau, txhua txhia zaus peb hu txog Tswv Ntuj pab ) kuj mus tau li no : « Huab Tais muaj hwj huam tas nrho – Tswv Ntuj khuv leej neeg tas nrho - KUV TSO SIAB LUG RAU KOJ : thov koj koj npo kuv dim ntawm kev txom nyem thiab dim ntawm qhov txhaum os mog ! Ua koj tsaug ntau» .

T.P.Txhiaj Foom omi

Cov kwv tij hmov thiab tshua, yav dhau los , mas nej tau mloog 3 nqe lus tseem ceeb uas yog tej zaj lus hais txog kev sib nyiam sib hlub, uas muaj sau tseg hauv NTAWV NTSHIAB. Mas yeej muaj tej nqe lus uas tau raug nej siab kawg nkaus, xws li 1 : Nej yuav nyiam nej cov yeeb ncuab – Nej yuav thov Ntuj rau cov tsim txom nej – 2 : Nej yuav zam txog xya caum xya zaus. 3 :Nej yuav rov sib nyiam sib hlub ib yam li kuv tau nyiam nej..
..Cov kwv tij phooj ywg ,ob hnub no ,mas thiaj yog LUB CAIJ 40., yam peb haj yam yuav khaws Tswv Ntuj tej Lo Lus tseg hauv peb nruab siab, yam peb rov nplua nuj zuj zus hauv txoj kev paub Tswv Ntuj txoj kev khuv leej neeg – Tsis tas li ntawd xwb : peb kuj yuav rov sib nyiam sib hlub -Hos hnub no zoo hnub : peb yuav kub siab twm 2-3 zaj lus tseem ceeb uas qhia peb txog txoj kev sib nyiam sib hlub – Ces thov kom nej kawm ib lus no tseg hauv nruab siab tias :” Qhov loj tshaj yog txoj kev nyiam”-
Zaj lus 1 kuj nyob hauv tus Hauv Paus Xa Lus Paj Lug tsab ntawv 1 rau cov Kos Lis Nthos – Zaj lus 13 qib 1 txog qib 13 – Ces tsim nyog peb khaws qib lus tseem ceeb no tseg hais tias : Qhov loj tshaj yog txoj kev nyiam”….Thov kom nej qhib nej siab los mloog Tswv Ntuj Lo Lus hais tias : “Tab yog kuv paub tas ib puas tsav yam lus tob, ib puas tsav yam txuj ci thiab kuv lub siab ntseeg loj heev ,tab sis kuv tsis muaj ib lub siab nyiam, mas kuv lub neej tsis muaj nqis dab tsi”.. Cov kwv tij, Leej Ntshiab Paj Lug tej lo lus ntawd meej pem tias : kev paub ntau yam txuj ci thiaj pab peb ua tus thawj coj, los ua tus neeg muaj ,tab sis qhov loj tshaj plaws nyob ntawm Tswv Ntuj lub xub ntiag thiaj yog ib lub siab nyiam, yog ib lub siab khuv leej neeg
Leej Ntshiab Paj Lug hais lus ntxiv tias :” Lub siab nyiam kuj txawj ua siab ntev, ua siab sib , tsis txawj khib, tsis khav theeb, tsis muab hlob- Lub siab nyiam kuj tsis ua tub qaug luag, tsis npau taws, tsis cib nyeej- Lub siab nyiam tsis zoo siab pom luag tej ua tsis ncaj- nws xav pom luag tej nrhiav qhov tseeb—Nyem no, txoj kev ntseeg, txoj kev tso siab, thiab txoj kev nyiam tseem muaj nyob ua peb txog kev . Tiam sis, qhov loj tshaj mas yog txoj kev nyiam”…Cov kwv tij, Leej Ntshiab Paj Lug tej lo lus txhib peb siab los mus rub peb sawv daws ua neeg siab ntshiab –Ua li, peb yuav nquag coj rawv Lo Lus ntawd, ces peb coj tau lub neej dawb huv zuj zus, nyob ntawm Tswv Ntuj xub ntiag ,

…………………………….
.. Hos Zaj lus 2 hauv tsab ntawv rau cov Los Mas, ( zaj 12: qib 9-21 yam peb yuav khaws lo lus no tseg tias :”Nej yuav sib hlub vim nej yog ib co kwv tij ”.Leej Ntshiab Paj Lug tej lo lus txhib peb siab, mas yog Tswv Ntuj Lo Lus ntag tias :”Nej tsis txhob ua txuj nyiam luag tej - Nej yuav sib hlub vim nej yog ib co kwv tij- Nej ib leeg yuav saib ib leeg tsim nyog qhuas. Nej yuav xyiv fab nyob hauv txoj kev tso siab rau Ntuj –Thaum nej raug txom nyem ,nej ua siab ntev mog –Nej yuav nquag teev Ntuj – Nej tsis txhob pauj qhov phem uas luag tau ua rau nej” .
Cov kwv tij, thov kom nej muab siab rau kawm 2 qib lus no hauv nruab siab - xws li : 1 : qhov loj tshaj mas yog txoj kev nyiam”- 2 : Nej yuav sib hlub vim nej yog ib co kwv tij- Lub Caij 40 thiaj yog ib lub caij muaj nqi heev - Ces saib : qib lus twg haj yam raug nej siab kawg nkaus ?

TEEV NTUJ : “Huab Tais Yes Xus ,koj qhia lo lus no tias :”Nej yuav rov sib nyiam sib hlub ib yam li kuv tau nyiam nej” ( Zam 13 : 34 ) – Huab Tais. peb kuj txiav txim siab mloog koj lo lus qhia ntawd tiag - Thov koj xa Leej Ntuj Plig Ntshiab nqes los txhab zog rau peb tsoom Hmoob sawv daws, ces peb yuav tau mloog koj tej lus -Huab Tais siab zoo,ua koj tsaug ntau” T.P. Txhiaj Foom

Vaj Qhia Faas Xuas tau sau ib phau ntawv uas pab nthuav piav zaj teev Ntuj PEB TXIV . Hos, hauv phau ntawv ntawd,( hauv phab 45 ) thiaj yus twm qib lus no :
TXHUA TXHIA ZAUS PEB TAIJ TSWV NTUJ, MAS PEB TSIS
XAV QHIA TSWV NTUJ TXOG TEJ YAM NWS TSIS PAUB , TAB SIS
QHOV LOJ MUS LI NO TIAS : PEB TSEEV KOM TEJ KEV NTSEEG
THIAB KEV TSO SIAB HAJ YAM RUAJ NREB KHOV KHO .
Vaj Qhia sau tej lo lus no tias : “Koj yuav nco tias : Huab Tais Tswv Ntuj yog peb Txiv . Nws tau muab nws lub hwj chim los hlub tshua peb sawv daws – Nws pov hwm peb, tsis tu ncua ,nyob saum ntuj ntag - Tab txawm koj ua koj tej hauj lwm dab tsi , los peb Txiv ua koj luag - Nws paub tas ib puas tsav yam hauv koj lub neej, uas yog qhov muaj nqe heev thiab tej yam tsis huv tas huv tib si “–
Ua li ,peb yuav zoo siab khaws Huab Tais Yes Xus lub Moo Zoo tseg tias :” Nej thov Ntuj mog, ces nej yuav tau txais “ ( Mas Tais 7:7 + Lus Kas 11:9
+ 1 Zam 5:14 “Peb muaj kev tso siab lug nyob hauv Tswv Ntuj --Yog peb thov ib yam raws li Tswv Ntuj lub siab xav , mas Tswv Ntuj kuj mloog peb tej lo lus thov” .
Cov kwv tij , yeej tsim nyog khaws Ntuj tej lo lus ntawd ,uas nplij peb siab kom zoo
……………………………. ………………. ………………….
Cov kwv tij phooj ywg, hauv lub zos POOS MEES ( hauv Fab Kis sab hnub poob , uas kuv nyob ) mas lub 1 hlis xyoos 1871 tus Nkauj Tsim Txiaj Mab Liab ( nws kuj hlub peb los ua nws cov me nyuam ) nws nws tau tshwm sim tuaj rau 4 tus tub ntxhais hluas pom xyeem ntawm qhov muag -- Hnub ntawd ,Niam Mab Liab tau tshaj tej lo lus txhib 4 tus tub ntxhais hluas zoo li ntawd tias :” Kuv cov me nyuam – Nej teev Ntuj tas zog mog : ces nej tsuas tos ib pliag xwb ,vim tias nej tej lus thov kuj raug kuv Leej Tub Yes Xus tiag “
Cov kwv tij phim peb yuav khaws peb niam Mab Liab tej lo lus kuj yog vim peb tej lus thov Ntuj pab yeej raug Huab Tais Yes Xus lub siab ntag.
Tsis tas li ntawd xwb , peb niaj hnub yuav nco ntsoov txog 2 zaj lus ( uas puag tas peb tau qhia rau nej- Yam li
1 : Nej thov Ntuj mog, ces nej yuav tau txais “
Thiab lwm zaj lus tias :
2 : “Peb muaj kev tso siab lug nyob hauv Tswv Ntuj : yog peb thov ib yam raws li Tswv Ntuj lub siab xav , mas Tswv Ntuj kuj mloog peb tej lo lus thov”

Cov kwv tij, nyem no mus ,thov kom nej kub siab hais lo puav lus TEEV NTUJ zoo li no tias : Peb Txiv khuv leej neeg tas nrho, thov koj pov hwm peb tsoom kwv tij Hmoob sawv daws – Thov koj pab xa Leej Ntuj Plig Ntshiab nqes los tshoj peb sawv daws tej siab ntsws , kom xwv peb yuav saib peb tej zaj teev hawm Tswv Ntuj loj tshaj plaws hauv peb lub neej thiab hauv peb txoj sia - . Ua li ,hauv peb tus ntsuj tus plig, peb thiaj yuav ua neeg nplua nuj, nyob ntawm Tswv Ntuj lub xub ntiag Ua koj tsaug ntau .

T.P.Txhiaj Foom omi

Cov kwv tij sawv daws ,,hnub no ,zaj lus tseem ceeb hauv Zam Ntawv Moo Zoo ( Zaj 6 : qib 1 txog qib 15 ) kuj qhia peb tias Huab Tais Yes Xus pom tias ib pab neeg coob txog 5.000 leej uas tshaib tshaib plab – Nws khuv leej pab neeg ntawd - Ib ntsis Yes Xus ua kom mov tsu los mus faib rau lawv sawv daws noj - - Lawv noj cov ncuav mov thiab ib cov ntses -- lawv cia li noj tsau tas –

Lub zim txwv no , peb zoo siab ntseeg ruaj nreb khov kho tias : HUAB TAIS YES XUS TSEEM KHUV LEEJ TAS SAWV DAWS NEEG – Huab Tais nyob ze ntawm peb - Nws tej kev khuv leej neeg ciaj sia cuag li qub . Nws mam li txhib sawv daws neeg kom xwv sawv daws thiaj khwv tas niaj tas xyoo, ces cov neeg ( nyob thoob ntiaj teb ) yuav tau muaj noj mus haus .

Tsis tas li ntawd xwb : niaj hnub no , mas Huab Tais caw peb sawv daws los mus thov Ntuj tas zaj tas zog : Huab Tais tshaj tej lo lus kom xwv peb vam txog Huab Tais pab daws peb qhov nqhis ,hauv peb nruab siab -. Nws caw peb sawv daws zoo li no tias : “ Leej twg nqhis , mas kom nws tuaj cuag kuv - Leej twg ntseeg txog kuv , kom nws haus “ ( Zam 7:37 )
Cov kwv tij , peb yuav tsum ua dab tsi, ces peb tej kev ntseeg thiaj yuav rov ruaj nreb zuj zus ? Huab Tais teb lo puav lus ,,uas peb twb tau khaws tseg hauv nruab siab lawm tias :” Neeg tsis kawg muab mov xwb los yug txoj sia

- Neeg tseem muab txhua lo lus tawm ntawm Tswv Ntuj lub ncauj los yug txoj sia thiab “ ( Mas Tais 4:4 ) .
Cov kwv tij ,, dhau lub caij peb twm tej qib lus tseem ceeb hauv NTAWV NTSHIAB, mas tsim nyog yuav thov Ntuj tas zog, zoo li no tias :” Sawv ntxov tsees , thov koj pub koj lub siab hlub rau peb saj kom tsau , ces peb yuav qw zoo siab tas ib sim neej “ ( hauv Zaj Nkauj Paj Nruag 90 : 14 .

TEEV NTUJ: Huab Tais Yes Xus, koj Txiv pub ib puas tsav yam hwj huam rau koj nyob saum ntuj thiab nyob ntiaj teb no” ‘( Mas Tais 28 18 ) - Koj mam li khuv leej 5.000 leej , ces law tau noj tsau - Hos thov koj niaj hnub pov hwm thiab khuv leej peb cov kwv tij Hmoob , tsis tu ncua- Thov koj pab daws lawv qhov nqhis , kom xwv koj txoj kev hlub nqes los hauv lawv nruab siab, kom puv npo . Huab Tais siab zoo, peb yuav nco txog koj tej siab ntsis, mus li .

T.P Txhiaj Foom omi

Cov kwv tij, hnub no , peb zoo siab khaws Huab Tais Yes Xus lub Moo Zoo tseg tias : « KUV YOG COV MOV MUAJ TXOJ SIA –TUS TUAJ CUAG KUV YUAV TSIS TSHAIB - TUS NTSEEG TXOG KUV, NWS YUAV TSIS NQHIS IB ZAUG LI » Zam 6 : 35

NUG : Huab Tais Yes Xus lo lus puas qhia ib zaj lus tseem ceeb rau peb ?

TEB : Huab Tais Yes Xus zaj lus yeej tseem ceeb kawg , vim tias Huab Tais xub xav txog hmo uas Yes Xus yuav tau tsim tsa Thaj Txi Ntuj thiab lub Cim Yug - Saib : txhua txhia zaus peb nrog ib pab neeg ntseeg sib sau teev hawm Tswv Ntuj ua Thaj Txi Ntuj , mas peb kuj hnov tus Txiv Plig nyeem lo lus no tias :

Huab Tais Leej Txiv , koj yog tus Ntshiab tiag – Txhua txhia txoj kev ntshiab txhawv hauv koj los - Peb thov koj tso koj Leej Tswv Yim Ntshiab los ua kom cov txim no ntshiab tuaj thiab txia ua koj Leej Tub , peb tus Huab Tais Yes Xus Pleev, lub Cev thiab cov Ntshav- Thaum Yes Xus tuaj yeem cia luag muag thiab hiam nws, nws tuav lub mov mog – nws ua koj tsaug - Nws muab lov thiab faib rau nws cov thwj tim – Nws hais tias :

NEJ SAWV DAWS TXAIS. NEJ NOJ .
YOG KUV LUB CEV RAUG PUAS KOM TAU PAB NEJ .

Noj hmo tas, Txiv Plig kuj tuav lub ntim - Nws rov ua Ntuj tsaug - Nws muab rau nws cov thwj tim –Nws hais tias :

NEJ SAWV DAWS TXAIS – NEJ HAUS- YOG LUB NTIM RAU KUV ROJ NTSHA COG LUS TSHIAB
NYOB MUS LI - YOG ROJ NTSHA YUAV NTWS LOS DAWS NEJ
THIAB TSOOM SID COV TXHAUM . NEJ YUAV UA LI NTAWD KOM TAU NCO TXOG KUV ..

NUG : Huab Tais Yes Xus qhuab qhia lo lus tias : NEJ YUAV UA LI NTAWD KOM TAU NCO TXOG KUV . Mas saib : txij ntawm lub caij uas Huab Tais Yes Xus rov mus lawm saum ntuj ,mas cov pawg ntseeg puas tau mloog Huab Tais lo lus qhia ntawd nej ?

TEB : cov pawg ntseeg hauv peb lub Koom Txoos Kav Tos Liv tau kub siab coj rawv Huab Tais Yes Xus lo lus qhia ntawd ntag . Txhais tias : zaj ua hwj huam yees ntxwv tias ib cov mov mog txia ntshis ua Huab Tais lub Cev Ntshiab - ib cov cawv txia ntshis ua Huab Tais Roj Ntsha Ntshiab thiaj rov tshwm sim dua , ib yam nkaus li hmo uas Huab Tais Yes Xus tau ua hwj huam yees ntxwv ntawd

NUG: Tej tus neeg ( uas niaj hnub nyem no ,lawv rov hais dua Huab Tais Yes Xus lo lus foom hmoov zoo rau saum cov mov mog thiab lub ntim cawv ) thiaj yog cov Txiv Plig , puas yog ?

TEB: Yog li koj hais - Cov neeg uas muaj peev xwm rov hais dua Huab Tais Yes Xus lo lus foom hmoov zoo ntawd thiaj yog peb cov Txiv Plig – Lawv tau txais LUB CIM TIAG TES TSA LAWV UA LEEJ CHOJ - Ces muab txhais tias : Huab Tais rov hais nws tej qub lus foom hmoov zoo dua, kuj yog vim cov Txiv Plig tej hauj lwm ntag.

Yog vim li ntawd ces niaj hnub nyem no peb tsoom ntseeg Kav Tos Liv kuj tau txoj hmoov zoo tshaj plaws , kuj yog vim txhua txhia Hnub Chiv peb nyob kaj lug kaj nrig nrog peb cov kwv tij ( uas taug tib txoj kev ntseeg cuag li peb ) sib koom siab koom ntsws mus ua Thaj Txi Ntuj thiab peb los mus txais lub CIM YUG los ua peb lub zog –

Peb niaj hnub yuav nco txog Ntuj tej txiaj ntsim …..

T.P. Txhiaj Foom omi

Cov kwv tij , hnub no ,mas hauv Ntawv Moo Zoo , peb zoo siab khaws Huab Tais Yes Xus ib cov lus muaj nqe heev tseg , hais tias : 1 : TUS NTSEEG THIAJ MUAJ TXOJ SIA NYOB MUS LI – - 2 : KUV YOG COV MOV PUB TXOJ SIA “
Zaj lus 1 tias TUS NTSEEG THIAJ MUAJ TXOJ SIA NYOB MUS LI – Mas zaj ntawd rub peb siab los mus taug kev nyob kaj lug kaj nrig – Saib : peb tsa muag nco txog peb tus Huab Tais Tswv Ntuj, uas nws niaj hnub yog tus tsim lub ntuj lub teb , thiab ntseeg txog peb tus Huab Tais Yes Xus Pleev, uas yog tus Huab Tais cawm neeg dim ntawm qhov txhaum thiab nws pub sawv rov los ua Tswv Ntuj cov me nyuam ;
Peb niaj hnub khaws Tswv Ntuj tej qib lus tseem ceeb tshaj plaws tseg, uas yog tej lus peb nyias hais tau hauv nyias lub siab xws li no tias :” Tswv Ntuj Leej Tub tau nyiam kuv , ces nws rov muab nws txi Ntuj ,kom nws pab tau kuv “ ( Nkas Las Tias 2 : 20 )
Cov kwv tij txhua txhia zaus peb ua Ntoo Cuam lub Cim thiab hnub uas peb nrog ib pawg ntseeg ua Thaj Txi Ntuj, mas peb nyias rov nco ntsoov txog qib lus ntawd hauv nyias nruab siab tias : Huab Tais Yes Xus niaj hnub muab nws tej kev hlub lub hwj huam loj los so kuv tej txhaum thiab nws pab txhim kho yus tej siab ntsws kom rov dawb huv tuaj ; ces peb nyias zoo siab rov hais tib zaj lus xws li tus Hauv Paus Xa Lus Paj Lug tias :” Huab Tais Yes Xus Pleev txoj sia ciaj nyob hauv kuv” ( Nkas Las Tias , 2 : 2O ) .
TEEV NTUJ : Huab Tais Yes Xus, koj yog peb tus Tswv Ntuj - Ua koj tsaug ntau ,koj tej kev nyiam kev hlub loj tas npaud kuj ciaj sia rov mus txog txhiab niag tim puas xyoo - Thov koj pab xa Leej Ntuj Plig Ntshiab nqes los kaj peb siab kom xwv peb tej kev ntseeg thiaj yuav tau loj hlob zuj zus, ces peb yuav taug kev nyob kaj lug kaj nrig, nyob ntawm koj xub ntiag, ntxiv mus os mog .
…………………………………. ………………………..
Zaj lus 2 tias :KUV YOG COV MOV PUB TXOJ SIA : Hauv Ntawv Moo Zoo , Huab Tais Yes Xus hais lo lus no tseg tias :”Leej twg noj cov mov no, nws yuav muaj txoj sia nyob mus li . Cov mov, uas kuv muab rau noj, kom xwv lub sim ceeb muaj txoj sia yog kuv lub cev“
NUG : Ua li, thaum twg Huab Tais Yes Xus tau ua hwj huam yees ntxwv los ua kom ib cov mov mog txia ntshis los ua nws lub Cev Ntshiab ?
TEB : Yog hmo uas Yes Xus noj rooj qav rau cov Hauv Paus Xa Lus thiaj tau muaj ib yam loj kawg nkaus : “ Yes Xus tuav lub mov mog - Nws ua Ntuj tsaug – Nws muab faib rau nws cov thwj tim - Yes Xus hais tias : NEJ SAWV DAWS TXAIS - NEJ NOJ – YOG KUV LUB CEV RAUG PUAS KOM TAU PAB NEJ .
NUG : yuav tsum paub tias Huab Tais Yes Xus tau ua hwj huam yees ntxwv ntawd ib zaug xwb lod ?
TEB : tsis yog ib zaug xwb lauj , vim tias Yes Xus tau qhia nws cov thwj tim tias : “NEJ YUAV ROV UA LI NTAWD , KOM TAU NCO TXOG KUV .Txhais tias : txhua txhia peb sib sau los ua Thaj Txi Ntuj , Huab Tais rov hais dua nws tej lus tseem ceeb tias : NEJ SAWV DAWS TXAIS - NEJ NOJ – YOG KUV LUB CEV RAUG PUAS KOM TAU PAB NEJ .
Cov kw tij, txhua txhia Hnub Chiv, peb tsuas hnov tus Leej Choj ( tus Txiv Plig ) lo lus foom hmoov zoo rau ib cov mov mog xwb – Tab sis peb zoo siab ntseeg ruaj nreb khov kho : Huab Tais Yes Xus xuas tus Leej Choj rov hais dua Huab Tais tej qib lus ,ib yam nkaus li lub caij puag thaud ntag – Peb zoo siab ntseeg txog zaj ua hwj huam yees ntxwv, uas Huab Tais yees ua kiag , kom tau pab txhim kho thiab yug peb tej siab ntsws kom rov ntshiab dawb huv dua .

TEEV NTUJ : Huab Tais siab zoo tas nrho, koj tej kev hlub neeg kuj loj tas nrho thiab ciaj sia , rov mus txog txhiab niag tim puas xyoo - Koj mam li tau tsim lub Cim Yug - Ua koj tsaug ntau – Thov koj pub peb tshaib nqhis txog lub Cim Yug, ntxiv mus os mog

T.P.Txhiaj Foom omi

Cov kwv tij phooj ywg ,mas txhua txhia xyoo, mas txog hnub 15 lub 8 hlis, peb tsoom ntseeg kuj zoo siab hwm tus Nkauj Tsim Txiaj Mab Liab , uas Tswv Ntuj tsa nws tus ntsuj plig thiab nws lub cev nqaij daim tawv mus pem Tswv Ntuj lub Ceeb Tsheej .
NUG : Ntawv Moo Zoo kuj qhia lo lus tseem ceeb dab tsi txog tus Nkauj Tsim Txiaj Mab Liab ?
TEB : Peb twm tau ib zaj lus tseem ceeb zoo li no tias : Tswv Ntuj tus tshiab Nkas Nplias tshaj lo lus rau Mab Miab zoo li no tias : » Koj nyob kaj lug, Mab Liab , tus tau txiaj ntsim puv siab , Huab Tais nrog koj nyob – Koj tau koob tau hmoov tshaj ib zeej tsoom neeg poj niam tib si «
NUG : Puas muaj lwm zaj lus uas qhia tib yam ntawd rau peb tsoom ntseeg ?
TEB ; Yeej muaj zaj lus uas tau tshwm sim tuaj los qhia peb txog qhov ntawd - Yam li : nyob hauv lub zos Lus Ntws, hauv Fab Kis qab teb, xyoo 1858,lub 2 hlis tus Nkauj Tsim Txiaj tshwm sim tuaj 18 zaus rau tus hluas Nkauj Npes Nas Des pom xyeem ntawm qhov muag, ces Mab Liab hais lus tseem ceeb tseg tias : KUV YUG LOS - TSIS LO NEEG NEEG LUB QEEB TXHAUM .
NUG : Peb hwm tus Nkauj Tsim Txiaj los ua peb niam nyob pem Tswv Ntuj lub Ceeb Tsheej - Peb thiaj yuav xav li cas ?
TEB : Tsim nyog peb yuav hwm Mab Liab zoo li no tias : » Niam Mab Liab, uas koj nyob pem Tswv Ntuj lub Ceeb Tsheej, thov koj hlub tshua peb cov neeg , uas peb yog koj cov me nyuam , thov koj cev peb tej zaj teev Ntuj mus rau peb Txiv Tswv Ntuj – Yeej yog raws li lo lus peb hais kam tias ;
LEEJ NTSHIAB MAB LIAB , TSWV NTUJ LEEJ NIAM ,
KOJ THOV NTUJ HLUB PEB COV NEEG TXHAUM -
NYEM NO MUS TXOG HNUB THAUM PEB LUB CAIJ DUA – UA LI

T.P. Txhiaj Foom

Cov kwv tij, lub caij ntawd, nyob hauv lub tsev teev Ntuj , hauv lub nroog Kas Fas Naus, Huab Tais Yes Xus tshaj lub Moo Zoo -Nws xub hais txog hnub tom ntej uas nws yuav txhim tsa lub Cim Yug hais tias :” Leej Txiv uas nws muaj txoj sia , nws xa kuv tuaj , ces kuv muaj txoj sia vim Leej Txiv. - Kuv lub cev nqaij yog ib cov tseem txhiam xws noj “. Tus noj cov mov no, nws yuav ciaj nyob mus li” . Yes Xus ib cov thwj tim coob tau hnov cov lus ntawd, lawv yws yws hais tias :” Cov lus ntawd tawv dhau : leej twg yuav mloog tau ?” .; Txij ntawm hnub ntawd los, Yes Xus ib cov twj tim thiaj li rov qab mus tsev – Lawv tsis nrog Yes Xus mus ntxiv lawm . Yes Xus thiaj hais rau Pab Kaum Ob tias : “ “Nej ne , nej puas xav mus thiab ?”. Xis Moos Pob Zeb teb rau Yes Xus tias:” “Huab Tais, peb yuav mus nrog leej twg ? Koj muaj cov lus pub txoj sia nyob mus li – Peb ntseeg thiab peb paub tias koj yog Tswv Ntuj tus Ntshiab “ .Zam 6: 60- 68
Cov kwv tij , lub zim txwv ntawd, thaum Huab Tais Yes Xus ncig teb chaws, mas hauv pab neeg ( uas tuaj mloog Huab Tais Lo Lus) mas ib txhia rov qab mus tsev – Lawv tsis nrog Yes Xus mus ntxiv lawm – Tab sis lawv ib txhia ntseeg Huab Tais Lo Lus ntag -
mas lub zim txwv no , xyoo 2018 no ,phim yuav xav tias : hauv peb cov kwv tij Hmoob ( uas ntseeg Ntuj tau ntau xyoo lawm ) nyias kuj hnov Huab Tais lo lus nug nyias , zoo cuag li lub caij thaud tias :” Nej ne , nej puas xav mus thiab ? “ - . Txhais tias : “Nej ne ,nej puas yuav txiav txim ib siab tsis ua neeg ntseeg ntxiv lod ? “ – Thaum ntawd mas nyias puas yuav teb hauv nyias nruab siab raws li Xis Moos Pob Zeb tias:” Huab Tais, kuv yuav mus nrog leej twg ? Koj muaj cov lus pub txoj sia nyob mus li – Kuv ntseeg thiab kuv paub tias koj yog Tswv Ntuj tus Ntshiab “ ( Zam 6:68. Tej zaus, nyias kuj yuav tau hais lwm zaj lus zoo li no tias :” Huab Tais siab zoo , kuv nyiam koj kawg nkaus “.
NUG : Peb yuav ua dab tsi thiab dab tsi, ces thiaj rov kub siab ntseeg Ntuj ruaj nreb ntxiv mus ?
TEB : Peb ua tau ntau yam tseem ceeb los rov txhab zog dua rau yus kev ntseeg :
Qhov loj kuj mus zoo li no tias :peb rov txais Ntuj Lo Lus dua – Nyob hauv yus tsev , nyias muaj NTAWV NTSHIAB lawm, los tsis sub – Mas yus rov qhib tau NTAWV NTSHIAB ntau zaus haj yam zoo .
Tej zaj lus uas peb tsoom ntseeg sawv daws ib txwm nyiam tas siab tas ntsws mas thiaj yog cov NKAUJ PAJ NRUAG ( = NPN ), zoo li NPN 42 + .NPN 51 + NPN103 + NPN 130 . Thaum twg nej nrhiav tau 2 - 3 qib lus hauv ib zag NPN uas raug nej siab kawg nkaus, mas vam ntsoov tias nej yuav kub siab khaws qib lus ntawd tseg .thiab nej yuav kawm tej qib lus ntawd hauv nruab siab puas tau
Hos nej yuav nrhiav tau 2 - 3 qib lus hauv ib zag NPN uas raug nej siab kawg nkaus , mas yus vam ntsoov tias nej yuav nyob kaj lug kaj nrig rov twm tej qib lus ntawd dua 5 zaug los 10 zaus tej lauj thiab nej yuav tau kawm hauv nruab siab thiab.
Thov kom Tswv Ntuj pov hwm nej thiab pub nej coj lub neej nyob thaj yeeb nyab xeeb tsis tu ncua kuj yog vim nej yuav tau khaws tej qib lus hauv NTAWV NTSHIAB los mas


T.P. Txhiaj Foom omi

Cov kwv tij,hnub no, mas hauv Ntawv Ntshiab, mas peb zoo siab khaws 2 qib lus tseem ceeb no tseg tias: 1 : Txhua txhia zaus peb hu txog Tswv Ntuj mas Huab Tais Tswv Ntuj nyob ze ze peb – 2: Haiv neeg no tsuas hwm kuv ntawm lawv di ncauj xwb - Hos lawv lub siab nyob deb kuv .
..1: “Txhua txhia zaus peb hu txog Tswv Ntuj mas Huab Tais Tswv Ntuj nyob ze ze peb “.’ Phau Tsib 4:7
Cov kwv tij, nyob hauv peb nruab siab, Leej Ntuj Plig Ntshiab tseem tshoj peb siab tas npaud , peb niaj hnub khaws Ntuj Lo Lus no tseg tias
:”Peb tseem tsis tau pom Huab Tais Yes Xus, tsis kav peb twb nyiam nws . Peb tsis tau pom nws , tab sis peb ntseeg “ 1 Pob Zeb 1,8
Li ntawd, peb zoo siab khaws tej lo lus tseeb uas Huab Tais Yes Xus tau cog tseg tias :”Nej thov , ces nej yuav tau txais- Nej nrhiav, ces nej yuav ntsib - Nej khob qhov rooj ,ces luag yuav qhib rau nej , vim tias leej twg thov, nws yuav tau txais – Leej twg nrhiav , nws yuav ntsib – –Leej twg khob qhov rooj ,mas yuav muaj tus qhib qhov rooj rau nej ..Tab txawm nej yog neeg phem, tsis kav nej txawj pub tej yam zoo rau nej cov me nyuam – Li ntawd ,nej Txiv nyob saum ntuj haj yam txawj pub qhov zoo tshaj rau cov neeg thov nws “ ( Mas Tais 7:7 11 ) .
Li ntawd, txhua txhia zaus peb teev hawm Tswv Ntuj mas peb tsis ua xyem xyav – Tab sis peb tso siab lug tas nrho txog peb tus Huab Tais Tswv Ntuj , tas siab tas ntsws ,tas tswv yim tas zog , vim tias Huab Tais Tswv Ntuj nyob ze ze peb – Thiab muaj zaj lus tseeb hauv NTAWV NTSHIAB tias : “ Tswv Ntuj yog txoj kev nyiam : tus twg nyob hauv txoj kev nyiam ,mas nws kuj nyob hauv Tswv Ntuj ,thiab Tswv Ntuj kuj nyob hauv tus neeg ntawd “ 1 Zam 4:16
2 : “Haiv neeg no tsuas hwm kuv ntawm lawv di ncauj xwb” - ( Mas Kos 7:6 ) -Tsim nyog peb yuav muab qib lus ntawd los qhuab qhia txoj hauv kev dawb huv tuaj txhib peb siab – Yuav khaws Ntuj tej Zaj Lus tseem ceeb tseg zoo li tej qib lus no
“ Peb txhob muab peb lo lus thiab tus nplaig los nyiam xwb , tab sis peb ua kiag tej yam hauj lwm los nyiam kom tseeb mog – Peb yuav ua li ntawd, ces peb lub siab yuav tiaj tus nyob ntawm Tswv Ntuj xub ntiag” 1 Zam 3:18 -19 )
Saib peb puas txiav txim kawm tej qib lus hauv Ntawv Ntshiab hauv peb nruab siab – Xws li zaj lus no tias :” Yog muaj ib tug hais tias:”Kuv nyiam Tswv Ntuj”, tab sis nws ntxub nws tus kwv, mas nws yog ib tug neeg dag –Tus tib neeg uas tsis nyiam nws tus kwv uas qhov muag pom ,mas nws nyiam tsis tau Tswv Ntuj uas nws qhov muag tsis pom .” ( 1 Zam 4:20 )

TEEV NTUJ : Huab Tais Yes Xus, koj tej Lo Lus raug peb kawg nkaus hais tias :” Peb txhob muab peb lo lus thiab tus nplaig los nyiam xwb, tab sis peb ua kiag tej yam hauj lwm los nyiam kom tseeb mog . Thov koj pab xa Leej Ntuj Plig Ntshiab nqes los txhab zog rau peb tej siab ,ces peb yuav kub siab mloog koj tej Lo Lus- Peb mam li yuav tau coj lub neej nyob thaj yeeb nyab xeeb nyob ntawm koj xub ntiag, tsis tu ncua – Peb zoo siab ua koj tsaug

T.P. Txhiaj Foom omi

Hnub no zoo hnub, rau qhov tias NTAWV MOO ZOO kuj tshaj lo lus tseem ceeb tias Huab Tais Yes Xus ua hwj huam yees ntxwv pab kho tus neeg ruam thiab lag ntseg kom zoo . 2-3 qib lus kuj sau li no tias :“ Yes Xus coj tus neeg ntawd mus rau ib cag . Yes Xus muab nws ntiv tes rau hauv tus neeg ntawd pob ntseg

- Nws nti aub ncaug
– Nws kov tus neeg ntawd tus nplaig, ces Yes Xus tsa muag ntsia saum ntuj
- Nws hais tias:”Es Fes Tas” ,lo lus no txhais tias :” Koj qhib los mas !” . Tam sim ntawd, tus neeg ntawd pob ntseg qhib hlo
–Cov hlua khi nws tus nplaig daws tas . Nws hais tau lo lus meej. .Sawv daws poob siab nthav
- Lawv hais tias:”Yes Xus ua tas puas tsav yam zoo ! Nws ua kom neeg lag ntseg hnov lus tau
– nws ua kom cov neeg ruam hais tau lus meej “ ( Mas Kos 17: 31– 37 )

NUG : Yes Xus ua hwj huam yees ntxwv loj kawg nkaus – Hos nws lub hwj huam txhawv ntawm qhov twg los ?

TEB : Huab Tais Yes Xus yog Tswv Ntuj Leej Tub – Ua li, Huab Tais Leej Txiv lub huam loj kawg nkaus kuj nrog Yes Xus nyob nraim – Li ntawd Huab Tais Yes Xus muaj peev xwm ua tau hwj huam yees ntxwv ntawd vim “tsis muaj ib yam uas Tswv Ntuj ua tsis tau” ( Lus Kas 1:37 )

NUG : Nyob hauv tas ib xyoo mas yeej muaj ntau Hnub Chiv uas peb mloog tej zaj lus tseem ceeb hauv Ntawv Moo Zoo uas pab peb rov nco ntsoov tias :” Huab Tais Yes Xus ncig txhua cov nroog thiab cov zos huv si
– Nws tshaj lub Moo Zoo txog Ntuj lub Ceeb Tsheej
– Nws pom tsoom pej xeem
– Nws hlub lawv, ces nws tseem kho sawv daws coob leej tej txiab xeeb thiab tej mob nkeeg tas huv si .” ( Mas Tais 9;35 )
– Huab Tais muab Tswv Ntuj lub hwj huam uas loj ntas nrho kom tau hlub lawv sawv daws tas huv si . Ua li, kuv ntseeg tias Huab Tais ua zoo li ib tug kws tshuaj los pab lawv kawg nkaus
– Mas xav paub tias lub zim txwv no Ntawv Moo Zoo ntawd pab peb ntseeg txog dab tsi tseem ceeb ?

TEB : Lub Moo Zoo qhia peb hais tias : Huab Tais Yes Xus yog tus kws tshuaj tseem ceeb uas pab cawm peb cov neeg txhaum tej siab ntsws kom xwv peb tej siab ntsws thiaj rov dawb huv tuaj zuj zus . Yeej tsis muaj ib tug neeg uas Huab Tais Yes Xus tsis nco txog lauj .

TEEV NTUJ : Huab Tais , koj yog tus khuv leej tas nrho
– Hos nyob hauv peb nruab siab “ peb yog neeg txom nyem ,vim peb xav ua zoo, tab sis peb ua tsis tau yam zoo “( Los Mas 7:18 – 24 )
–Huab Tais, thov koj hlub peb –Thov kom koj kav tsij pab cawm peb os mog
- Ua koj tsaug ntau ntau.

T.P.Txhiaj Foom omi

Cov kwv tij phooj ywg sawv daws, hnub no kuj zoo hnub, vim tias hauv Ntawv Moo Zoo , Huab Tais Yes Xus nug nws cov thwj tim ib leeg dhau ib leeg, ib tug dhau ib tug tias : “Koj ne , koj hais tias kuv yog leej twg ?” ( Mas Kos 8:29 );
Hos lub zim txwv no ,Huab Tais rov hais dua tib qub lus nug peb sawv daws ib leeg dhau ib leeg saib : “Koj ne , koj hais tias kuv yog leej twg ? “ – Mas peb nyias yuav teb raws li nyias lub siab xav tau –
Mas hauv NTAWV MOO ZOO yeej muaj tej lo lus teb uas tsim nyog peb yuav khaws tseg – Ces peb twm tau lo puav lus meej pem zoo li no tias :”Huab Tais Yes Xus , koj yog tus CAWM lub qab ntuj neeg tiag ( Zam 4:42 )
Phau ntawv Hauj Lwm kuj tshaj lo lus no tias:” Tswv Ntuj txhais tes xis tsa Yes Xus siab kom Yes Xus ua tus Thawj thiab tus Cawm Seej - Yog vim Yes Xus, mas Tswv Ntuj thiaj pub txoj kev thov txhaum thiab kev zam txhaum” ( Hauj Lwm 5:31 .
Ua li, lub zim txwv no , tau muaj peb ib cov kwv tij Hmoob ,uas tau zoo siab ntseeg tias :” Huab Tais Yes Xus, koj yog tus CAWM qab ntuj neeg tiag” ces lawv tau thov txais lub Cim Ntxuav thiab lub Cim Txhab Zog – Ces niaj Hnub Chiv lawv zoo siab mus ua Thaj Txi Ntuj – lawv kuj txais lub Cim Yug ,uas nti tau Huab Tais lub Cev Ntshiab - Nyob nyob mas lawv kub siab vam txog Huab Tais Yes Xus tib leeg xwb los mus pab txhim kho lawv tej siab ntsws kom rov plhis tshiab tuaj ua Tswv Ntuj cov me nyuam, tsis tu ncua .Tsis tas li ntawd xwb : lawv kuj muab siab taug Ntuj Lo Lus qhia kom tom thawj -
Peb cov kwv tij od ,niaj hnub no , Huab Tais rov hais dua nws tej qub lus nug peb cov kwv tij Hmoob ( uas tau ntseeg Ntuj tau ntev xyoo ) tias : “Koj ne , koj hais tias kuv yog leej twg ?”- Ces thov kom nej mloog peb ib cov kwv tij lawv tej zaj lus teb
== Peb coob leej kuj teb tau tej lo lus tseem ceeb rau Huab Tais tias - : : “ Huab Tais Yes Xus od, koj tib leeg yog tus ntxuav tau peb tej txhaum pov tseg – Koj yog tus pub peb rov yug los tshiab tuaj – ces peb thiaj plhis ua Tswv Ntuj cov me nyuam ,tsis tu ncua - -Huab Tais od , peb tej kev ntseeg Ntuj thiaj yog peb txoj sia ntag ” -
.== Peb coob leej kuj thov kom Leej Ntuj Plig Ntshiab nqes los hauv peb nruab siab kom xwv Tswv Ntuj yuav ua peb lub dag lub zog tiv thaiv tej zaj tswv yim tsis huv ces thiaj tau txais yeej – Ces thiaj tau hnov peb ib cov kwv tij lawv tej lus meej pem tias :” Huab Tais siab zoo ,yog tias me yau tsis tau muaj koj hauv kuv nruab siab ,mas kuv nyob tsis tau” -
= Peb coob leej tseem thov kom Huab Tais tuav peb tes, coj peb kev , ces peb niaj hnub muab siab rau taug lub neej ntshiab dawb huv ,raws li Huab Tais Yes Xus tus piv txwv .
= Peb ib txhia kuj xav tias : “Dhau lub caij kuv yuav tso ntiaj teb no tseg , mas kuv yuav nyob li cas ?”- Thaum peb xav tswv yim zoo Ii ntawd ,mas yog ib lub caij zoo kom xwv peb kuj thov kom Huab Tais niaj hnub txuag peb nruab siab ces peb lub neej thiaj yuav tau ntxim Tswv Ntuj lub siab, tsis tu ncua - Ua li ntawd, txog lub caij peb yuav tso lub ntiaj teb no tseg , mas peb thiaj yuav tau tsim nyog nce mus pem Tswv Ntuj lub Ceeb Tsheej , rov mus txog txhiab niag tim puas xyoo.
PEB THOV NTUJ : Huab Tais Yes Xus , peb nyob kaj lug kaj nrig ntseeg Ntuj tib leeg thiab ntseeg ruaj nreb khov kho tias koj niaj hnub ua peb luag - Koj nyob ze peb sawv daws , tsis tu ncua – Thov koj pub peb tshaib nqhis txog Ntuj tej txiaj ntsim CAWM peb nruab siab kom xwv peb rov ntshiab dawb huv zuj zus ,nyob ntawm koj xub niag mus li – Huab Tais khuv leej neeg tas nrho, peb ua koj tsaug ntau

( T.P. Txhiaj Foom omi )

TUS XAV UA TUS THAWJ

Cov kwv tij phooj ywg, hnub 23 yuav tuaj , mas nyob hauv NTAWV MOO ZOO Huab Tais Yes Xus tshaj ib zaj lus tseem ceeb los mus txhab zog rau peb lub neej ntseeg Ntuj ( raws li Tswv Ntuj lub siab xav ) – Peb twb paub tias kawg yog Huab Tais Yes Xus tib leeg uas tshaj tau Lo Lus zoo li ntawd tseg .
Yog Ntuj Lo Lus uas mus zoo li no tias :” NEJ LEEJ TWG XAV UA TUS THAWJ, MAS NWS YUAV UA TUS TUAJ TOM TW – NWS YUAV UA SAWV DAWS TUS TUB TXIB “ – ( Mas Kos 9:35 )
Peb sawv daws yeej paub tias : tus tib neeg txiav txim coj rawv Ntuj Lo Lus ntawd mas nws yuav muaj cov phooj ywg coob ( uas suav tsis txeeb) – Tsis tas li ntawd xwb , tus tib neeb neeg ntawd ib txhij yog tus tsim KEV THAJ YEEB NYAB XEEB los rub luag lwm leej lwm tus coj ib lub neej nyob kaj lug kaj nrig kom zoo dua yav tas los lawm .
Saib peb sawv daws puas kam coj rawv 2 tus yeeb yam zoo li no tias :

LUB NTSIAB LUS : 1 : Yuav zam rau luag – 2 : Saib lwm tus los ua yus ib tug kwv tij txeeb txeeb

= Qhov 1 : yus yuav zam rau luag lwm leej lwm tus uas nws tau hais tej lo lus tsis ntxim yus siab . Saib yuav zam pes tsawg zaus ? – Mas Huab Tais Yes Xus teb tias :” Kuv tsis hais rau koj tias “ Yuav zam txhaum rau luag txog 7 zaus -Kuv hais rau koj tias yuav zam txog xya caum xya zaus “( Mas Tais 18:22 ) . Mas muab txhais tias : yus ib siab zam txhaum rau luag tas mus li , tsis tu ncua .
NUG : vim li cas Huab Tais Yes Xus ncaj qha tshaj Lo Lus zoo li ntawd ?
TEB : Yuav ib siab zam rau luag npaum li ntawd ,kuj yog vim Ntuj Lo Lus sau tseg tias :” Nej yuav khuv leej luag ib yam li nej Txiv khuv leej nej :”( Lus Kas 6;36 ).

= Qhov 2 : yus yuav saib lwm tus los ua yus ib tug kwv tij txeeb txeeb ( Mas Tais 23:8 ) . Peb tsoom neeg sawv daws zoo siab ntseeg ruaj nreb khov kho tias : Tswv Ntuj yog peb niam peb txiv ces nyob ntawm nws xub ntiag mas peb tsoom neeg sawv daws kuj yog Tswv Ntuj cov me nyuam – Huab Tais Tswv Ntuj uas yog tus tsim ntuj tsim teb, nws khuv leej neeg tas nrho , nws niaj hnub saib sawv daws sib npaug zog – Peb Txiv muab nws tej kev nyiam kev hlub uas muaj zog tas nrho los hlub tshua peb, tsis tu ncua - Ces peb yuav saib lwm tus los ua yus ib tug kwv tij txeeb txeeb .

NTAWV NTSHIAB kuj sau li no tias :”Leej Txiv Tswv Ntuj txoj kev nyiam peb loj tas npaum no : yam li peb hu ua Tswv Ntuj cov me nyuam. - Peb yog Tswv Ntuj cov me nyuam tiag” ( 1 Zam 3:1 )
TEEV NTUJ : Huab Tais Tswv Ntuj, koj yog peb Txiv ces peb zoo siab ntseeg khov kho tias peb yog koj cov me tub me nyuam –Ces niaj hnub peb nyob kaj lug kaj nrig nrog Huab Tais Yes Xus koom ua ib lub siab khuv leej luag– ces thiaj hais tau zaj teev Ntuj tias PEB TXIV NYOB SAUM NTUJ ….

T.P. Txhiaj Foom.

Hauv Ntawv Moo Zoo Mas Kos 10:2- 16
Neeg tsis txhob muab sib sau los ua ke, neeg tsis txhob muab sib txhem-
Cov kwv tij, peb zoo siab txais Ntawv Moo Zoo tias :Huab Tais Yes Xus tshaj lo lus tseeb tias : Tswv Ntuj txwv, tsis pub kom ob niam txiv sib nrauj –Peb nco tias hauv peb haiv neeg Hmoob mas tsis tshua pom cov niam txiv sib nrauj sib ncaim pes tsawg – Qhov ntawd mas kuj yog ib lub moo zoo muaj nqe-Txawm li cas tsim nyog soj ntsuam saib : hauv ob tug tub ntxhais hluas uas nkawd sib sau los ua ib tsev neeg ,mas tej yam tseem ceeb uas hauv tas nkawd lub neej ob niam txiv yuav tsum muab siab ua , kom xwv nkawd tsev neeg thiaj yuav tau nyob ruaj nreb khov kho ntxiv mus thiaj yog dab tsi thiab dab tsi – Yeej muaj ntau ntau xws li 2-3 yam no

1 : thaum ib leeg tau ua tej yam ( los tau hais tej lo lus ) uas raug yus lub siab, mas yus kav tsij hais tej lo lus qhuas txog qhov ntawd SAI SAI – Dhau lub caij uas yus tau mloog tej lo lus qhuas txog yus tus yam ntxwv ( los qhuas txog tej lo lus yus tau hais ), mas yus ib siab yuav coj rawv tib tus yam ntxwv muaj nqe ntawd ntxiv mus lauj .
2 : Thaum twg yus yuav tsum hais txhib lwm tus kom xwv lwm tus yuav hloov nws tus yam ntxwv , mas yuav ceev faj – Yuav tsis npau taws , yus maj mam hais yus tej lo lus –Yeej yuav tsum muaj tej lub caij uas yus ib txhij luag ntxhi ntag .
3 : Dhau lub caij yus tau npau taws lawm, mas yus yuav thov txim ntawm lwm tus sai sai – Tsis yooj yim , tab sis yus txiav txim ib siab thov txim thiaj pab kom yus tej kev sib nyiam sib hlub loj hlob zuj zus ntag .
4 : Dhau lub caij uas lwm tus tau hais tej lo lus siab yus ,mas yus yuav ceev faj zam txim rau - Ces tag kis nag kis tej yuav tsis rov sib tham txog qhov ntawd ntxiv – Hos kev zam txim yeej tsis yooj yim -Tab sis yog ib yam muaj nqe : kev zam txim yeej txhab zog rau yus tej kev thaj yeeb nyab xeeb .
Thov kom Tswv Ntuj KEV THAJ YEEB NYAB XEEB nqes los puv nej tej siab ntsws , tsis tu ncua .

T.P.Txhiaj Foom omi

HNUB 28- Lub 10 hlis – Hnub Chiv 30 - Xyoo B

Ntawv Moo Zoo : Mas Kos 10 : 46 – 52
Yes Xus, Das Vis Leej Tub , thov koj khuv leej kuv mas
Cov kwv tij, hnub no zoo hnub ,rau qhov tias hnub no Ntawv Moo Zoo pab peb nco txog ib zag lus tseem ceeb tias Huab Tais Yes Xus, uas yog Tswv Ntuj Leej Tub, muab nws txoj kev khuv leej neeg los pab txhim kho ib tug neeg dig muag kom zoo . Tus neeg ntawd lub npe hu ua Npas Tis Mes .Nws txom nyem tas nrho ntag : hnub ntawd mas nws zaum tom ntug kev – Nws hnov tias tus neeg uas los txog nws xub ntiag yog Yes Xus Nas Xas Les tuaj – Ces 2 zaug sis law, Npas Tis Mes qw thov Yes Xus tas zog tias : Yes Xus, Das Vis Leej Tub , thov koj khuv leej kuv kom kuv rov tau pom kev !
Cov kwv tij ,phim yuav nco tias : 1.000 xyoo ua ntej ntawm Yes Xus yug los mas tus vaj Das Vis nto koob meej tshaj plaws, nws tau tswj kav haiv neeg His Xas Lais zoo kawg nkaus – Ces Npas Tis Mes ntseeg ruaj nreb khov kho tias Yes Xus , Das Vis leej tub , yuav ua tau hwj huam yees ntxwv loj los kho nws kom zoo – Ces Npas Tis Mes qw thov Yes Xus tas zog tias : Yes Xus, Das Vis Leej Tub , thov koj khuv leej kuv kom kuv rov tau pom kev mas – Ces peb zoo siab mloog zaj lus tseem ceeb tias Yes Xus tsuas hais ib nyuag lus luv xwb tias : Koj mus – Koj lub siab ntseeg cawm koj lawm . Ces tam sis ntawd tus dig muag rov pom kev
Cov kwv tij , zaj lus hauv Ntawv Moo Zoo ntawd kuj txhab zog rau peb tej kev ntseeg – Ua li ntawd txhua txhia zaus peb thov Huab Tais Yes Xus pab, mas peb tsis ua xyem xyav tias :” Xyov ! Huab Tais puas yuav tau pab ?” – Peb tsis xav li ntawd ib zaug li – Tab sis PEB TSO SIAB LUG RAU TSWV NTUJ TAS SIAB TAS NTSWS TAS TSWV YIM TAS ZOG

Tus Hauv Paus Xa Lus Yas Kos kuj hais ib qib lus, uas tsim nyog peb yuav khaws tseg hauv peb nruab siab - Nws hais tias:” Thaum ib tug neeg siab ncaj thov Ntuj , mas nws lo lus muaj zog” ( Yas Kos 5:16 ).
Cov kwv tij, peb sawv daws kuj nco ntsoov txog 1 qib lus tseem ceeb hauv Mas Tais Ntawv Moo Zoo – Huab Tais Yes Xus txhib peb siab zoo li no tias :”Thaum 2 leeg los 3 leeg sib sau ua ke tuav txog kuv lub npe ,mas kuv nyob hauv nruab nrab lawv “ ( Mas Tais 18:20 ) .
Mas muab lo lus ntawd txhais zoo li no tias : Hauv ib yim neeg, uas niam txiv nrog cov me nyuam sib koom siab koom ntsws hawm Tswv Ntuj thiab teev Ntuj ua ke , mas Huab Tais Yes Xus nyob hauv nruab nrab lawv “
Cov kwv tj hmov thiab tshua , kuv vam ntsoov tias : nyem no mus lawm tom ntej, nej ua niam ua txiv ( thiab nej cov me tub me nyuam ) yuav txiav txim ib siab sib koom siab koom ntsws hawm Tswv Ntuj thiab teev Ntuj ua ke NYOB HAUV NEJ TSEV . Tsuas yog nej KUB SIAB ua li ntawd ,mas Tswv Ntuj KEV THAJ YEEB NYAB XEEB yuav tawg paj txi txiv hauv nej nruab siab, tsis tu ncua .

Txiv Plig Txhiaj Foom omi

Hnub tim 30/08/2019 kuv tau mus xyuas Txiv Plig Txhiaj Foom thiab nqa nws thiab xib hwb Lauj Vam Thaiv phau ntawv qhia kev ntseeg rau nws sau yuas.