TXIV PLIG TXHIAJ FOOM LUB NEEJ.On November 8, 2017 By zootswvzovyaj
Nyob zoo ib tsoom kwv tij Hmoob sawv daws ! Ntawm no, kuv yog Txiv Plig Txhiaj Foom ! Hnub no kuv yuav piav me ntsis txog ntawm kuv tus kheej lub keeb chiv pub rau nej sawv daws tau paub txog me ntsis. Kuv yug los hnub tim 3 lub 8 hli ntuj xyoo 1936, nyob hauv lub zos hu ua Les Kees, nyob Fab Kis qaum teb. Thaum kuv sau zaj no, tshuav 1 hlis mas kuv lub hnub nyoog muaj 77 xyoo txwm nkaus. Kuv niam thiab kuv txiv yug tau peb 5 leeg nus muag. Tus hlob yog ntxhais, nws lub npe hu ua Tes Les Xas. Nyem no nws hnub nyoog twb muaj 82 xyoos lawm. Tus tom qab ntawm Tes Les Xas, mas kuj yog kuv 2 tug tij laug : xws li Pob Zeb thiab Mis Kas nkawd. Kuv yog tus yau Mis Kas thiab kuv tseem muaj ib tug muam yau ntxiv thiab. Nws yog tus yau kuv li 3 xyoos. Kuv tus muam yau kuv yug xyoo 1939, tiam sis nws txoj hmoov tsis zoo, ces thaum nws hnub nyoog muaj 10 hli ntau, mas nws tau ib tug mob hnyav thiab tau tag sim neej nyob hauv kuv niam lub xub ntiag lawm.
Kuv txiv yog ib tug neeg ua liaj ua teb, nws thaj av ua teb dav li 13-14 hev taj. Niaj xyoo kuv txiv cog nplej ua mov noj, cog qos yaj ywm thiab lwm yam ntxiv. Kuv txiv muaj 2 tug nees pab laij teb thiab cia thauj qoob loo. Tsis tas li ntawd, kuv niam thiab kuv txiv kuj tseem yug 5-6 tug maum nyuj thiab. Ces nkawd tso nyuj cov kua mis los muag. Yug npua li ntawm 5-6 tus thiab 1 pab qaib tsis coob pes tsawg. Tab txawm peb tsev neeg tsis yog ib tse neeg nplua nuj, tab sis kuj nyob nyog xws li luag tej thiab.
Hnub tim 17 lub 3 hlis xyoo 1963, kuv tau txais lub Cim Tiag Tes ua Txiv Plig nyob hauv lub nroog Xos Lis Nas nyob Fab Kis teb. Kuv txais lub Cim Tiag Tes ua ib tug Txiv Plig nyob hauv lub Koom Haum tshaj Ntuj Lus OMI.
Tom qab ntawd kuv tau mus kawm txuj nyob ze ntawm lub tuam ceeb Pas Lis li 1 xyoos ntxiv, yog txij xyoo 1963 mus txog lub 6 hli xyoo 1964. Kuv kawm txuj li 1 xyoos tag, mas kuv txiav siab meej meej ua ib tug Txiv Plig mus tag ib sim neej.
Lub 8 hli xyoo 1964, kuv thiaj txiav txim siab caij nkoj ntawm Fab Kis teb tuaj mus txog rau tuam ceeb Npaas Koj (Bangkok) nyob Thaib teb. Vim lub caij ntawd, mas tsis tau muaj cov dav hlau thauj neeg xws li niaj hnub nyem no, ces yuav tsum caij nkoj tuaj xwb. Kuv tau nyob hauv nkoj hla hiav txwv 28 hnub thiaj tuaj txog Thaib teb. Lub 9 hlis xyoo 1964, kuv tau mus txog Los Tsuas teb thiab kawm ntawv Los Tsuas li 1 xyoos. Kuv pib kawm ntawm xab lab as pos pas tuaj ntag ! Txij lub 1 hlis xyoo 1966 mus txog xyoo 1975, kuv nrog Txiv Plig Nyiaj Pov, Txiv Plig Neej Vaj thiab Txiv Plig Vaj Xwm nyob ua ke hauv tuam ceeb Vees Cas. Kuv nyob hauv lub tsev uas cov tub hluas Hmoob tuaj kawm ua Xib Hwb. Tas 9 xyoos ntawd, mas kuv zoo siab thiab ua Tswv Ntuj tsaug uas Tswv Ntuj tau pub kom cov Tim Hwb lawv muab siab rau kawm kev ntseeg thiab npaj siab tshaj Yes Xus lub Moo Zoo rau cov Hmoob. Xyoo 1975, lub teb chaws Los Tsuas nyob tsis tiaj tus, ces peb cov Txiv Plig thiaj tau khiav tawm Los Tsuas teb mus rau Thaib teb thiab mus rau txawv teb chaws. Lub 9 hlis xyoo 1975, kuv rov mus txog Fab Kis teb thiab rov mus kawm lus Aas Kiv me ntsis ntxiv.
Xyoo 1976, kuv thiab 3 tug Txiv Plig uas thaum ub peb nyob Los Tsuas teb ua ke, peb tau mus tshaj Ntuj Lus nyob hauv lub pov txwv Hes Tis, uas ze ntawm lub pov txwv Kws Npas, nyob As Mes Lis Kas nrab tau 2 xyoos.
Xyoo 1978, kuv thiaj ua raws li Txiv Plig Nyiaj Pov cov lus hais kom kuv rov qab mus Fab Kis teb. Vim muaj ib cov Hmoob ntseeg uas nyuam qhuav tuaj ntawm Thaib teb tuaj. Lub 2 hlis xyoo 1981, Xib Hwb Lauj Vam Thaiv tau caw kuv mus tshaj Ntuj Lus nyob As Mes Lis Kas teb (USA), ces kuv thiaj tau mus nyob As Mes Lis Kas teb mus txog xyoo 2001. Lub 8 hli xyoo 2001, Txiv Plig Nyiaj Pov rov hais kom kuv pab nws ua cov hauj lwm tshaj Ntuj Lus nyob hauv lub xov tooj cua Zoo Tswv Zov Yaj (The Good Shepherd) nyob Fis Lis Pees teb, ces kuv thiaj tau sawv kev ntawm USA mus rau Fis Lis Pees teb. Kuv mus nyob hauv lub xov tooj cua Radio Veritas-Asia, nyob hauv lub nroog Mas Nis Las. Tas lub caij kuv nyob Fis Lis Pees teb, mas kuj muaj 2-3 tug Hmoob sib hloov tuaj nrog kuv ua hauj lwm thiab. Peb cov hauj lwm ua nyob Fis Lis Pees teb, mas yog zom lus tshaj tawm nyob hauv lub xov tooj cua Zoo Tswv Zov Yaj. Xyoo 2008 txog xyoo 2011, tus hais lus nyob hauv xov tooj cua Zoo Tswv Zov Yaj yog Pov Lauj.
Lub 12 xyoo 2011, kuv thiab Pov Lauj wb thiaj tau tshais chaw los mus nyob rau hauv lub nroog Lomsak, xeev Phetchabun, Thaib teb lawm. Nyob ntawd kuj muaj 4-5 tug Hmoob nrog kuv ua hauj lwm ua ke thiab. Ces peb cov hauj lwm tshaj tawm nyob hauv xov tooj cua Zoo Tswv Zov Yaj yog ua nyob hauv lub nroog Lomsak, nyob Thaib teb. Txog xyoo 2015, kuv thiaj rov qab mus so nyob hauv peb cov Txiv Plig lub tsev laus nyob Fab Kis teb, vim kuv laus lawm. Saib puas muaj hnub kuv yuav tau kev rov qab tuaj txog Thaib teb, kom tau ntsib peb cov kwv tij Hmoob dua ! Nco thiab tshua txog ib tsoom kwv tij Hmoob sawv daws kawg ! Thov kom peb Leej Txiv Tswv Ntuj foom hmoov zoo pub rau nej sawv daws mog !