ZIM TXWV NO NTIAJ TEB TEEB MEEM LOJ
Zaj 384 : Ib cov ntseeg nyob Los Tsuas teb raug ntes.
…………………………………………………………………………………………………..
Nyob zoo ib tsoom kwv tij phooj ywg hmov thiab tshua sawv daws !
Hnub no kuv yuav muab 3 zag xov xwm coj los tshaj tawm pub rau nej sawv daws mloog xws li no :
1. Nyob Los Tsuas teb, muaj ib cov neeg ntseeg Plos Tes Taas raug tseem fwv ntes.
2. Nyob Is Lav teb, muaj 45 tus neeg raug cov tub rog Ais Es muab lawv hlawv ciaj ciaj.
3. Nyob Suav teb, muaj ib tug Tswv Qhia Suav laus laus tau tas sim neej.
Paj nruag
Hais txog zaj xwm 1 : Nyob Los Tsuas teb, muaj ib cov neeg ntseeg Plos Tes Taas raug tseem fwv Los Tsuas ntes, mas yog li no :
Kwv tij phooj ywg, yav dhau los nyob Los Tsuas teb hauv luv xeev Xab Vaam Nab Khej, mas cov nom tswv ua nruj kawg rau cov neeg ntseeg Ntuj, yam li lawv ua ntau ntau yam los tav txoj hauv kev kom tsis txhob muaj cov neeg ntseeg Ntuj ntxiv.
Piv txwv : Nyob hauv lub zos Xais Xoom Npoos thiab nyob ntau ntau lub zos, mas cov nom tswv tau txwv tsis pub cov neeg ntseeg sib sau los teev Ntuj lawm. Thiab kuj tseem muaj qee zaus uas cov nom tswv txhob txwm ntes ib cov neeg ntseeg, los yog ib cov txwj laus coj mus kaw rau hauv nkuaj, kom xwv cov neeg no thim ntawm kev ntseeg Ntuj rov los coj kev teev hawm Phus Thas.
Kwv tij, nyob hauv lub zos Xais Xoom Npoos, mas cov neeg ntseeg Plos Tes Taas kuj coob hauj sim, lawv tus Xib Hwb hu ua Kais Thoos.
Hnub tim 24 lub 6 hli xyoo 2014, tus Xib Hwb Kais Thoos no nrog rau nws 3 tug phooj ywg uas lawv puav leej yog Xib Hwb tib si thiab ib tug neeg ntseeg raug cov tub ceev xwm ntes coj mus kaw. Vim hnub tim 24 lub 6 hli ntawd, cov tub ceev xwm tau liam tias lawv 5 leeg no tau muab ib tug poj niam uas yog neeg ntseeg Ntuj hu ua Caas tua pov tseg.
Kwv tij, tus poj niam uas hu ua Caas, mas xyoo 2013, nws thiab nws 8 tus me nyuam lawv txawm txiav siab tig los ntseeg Ntuj nyob hauv lub Koom Txoos Plos Tes Taas. Vim tias tus poj niam Caas no nws muaj mob los tau ntev ntev heev lawm, ces nws thiaj coj nws cov me nyuam lawv los ntseeg Ntuj ua ke tib si.
Tab sis hnub tim 22 lub 6 hli xyoo 2014, tus Xib Hwb Kais Thoos thiab nws 4 tug phooj ywg lawv txawm txhob txwm mus xyuas tus pog Caas no rau hauv tsev kho mob. Lub caij thaum lawv mus txog hauv tsev kho mob, mas lawv tau sib sau los thov Ntuj pub rau tus poj niam uas hu ua Caas.
Thaum lawv yuav rov qab los tsev, tus poj niam Caas no nws tau thov kom lawv 5 leeg pab thauj nws rov qab mus tsev, vim tias nws tsis xav nyob hauv tsev kho mob ntxiv lawm. Lub caij ntawd, mas tus Xib Hwb Kais Thoos thiab nws 4 tus phooj ywg kuj hlub thiab hmov tshua txog tus tus poj niam Caas no kawg nkaus, ces thaum kawg lawv thiaj txiav siab pab thauj tus poj niam Caas rov qab mus tsev raws li tus pog no thov. Tab sis thaum lawv tab tom tsav tsheb los txog ntawm ib tog kev xwb, ces tus pog Caas txoj sia cia li tu twj ywm lawm.
Yog vim li no, ces hnub tim 24 lub 6 hli, cov tub ceev xwm Los Tsuas thiaj tau iab liam tias Xib Hwb Kais Thoos thiab nws 4 tug phooj ywg tau muab tshuaj los lom tus poj niam uas hu ua Caas, ces tus pog Caas thiaj tau tag sim neej lawm.
Hnub ntawd, mas tus Xib Hwb Kais Thoos tab tom ua cov kab ke pam tuag raws kev ntseeg Ntuj rau tus pog Caas. Thaum lawv tab tom ua cov kab ke pam tuag, tau muaj ib cov tub ceev xwm nrog 5 tug hauj sam txawm mus txog lub tsev uas lawv sib sau pam tuag.
Lub caij ntawd, cov tub ceev xwm tau quab yuam kom Xib Hwb Kais Thoos txhob ua cov kab ke pam tuag raws kev ntseeg Ntuj, tab sis kom cov hauj sam ua kab ke pam tuag raws kev teev hawm Phus Thas rau tus pog Caas thiab coj tus pog Caas no mus faus nyob rau hauv cov toj ntxas hauj sam. Cov tub ceev xwm kuj tsis kam muab tus Ntoo Cuam mus txhos rau ntawm tus pog Caas lub ntxa thiab.
Tsis tas li ntawd, cov tub ceev xwm kuj tau ntes tus Xib Hwb Kais Thoos nrog rau nws 4 tug phooj ywg uas lawv pab thauj tus pog Caas tawm hauv tsev kho mob rov los tsev, es ua rau tus pog no tau tag sim neej. Lawv 5 leeg puav leej raug coj mus kaw tas huv tib si rau hauv nkuaj.
Yog vim li no, ces ua rau cov neeg ntseeg hauv lub zos Xais Xoom Npoos chim siab kawg rau cov tub ceev xwm, tab sis lawv tsis pom qab ua cas.
Kwv tij, ua li mas peb thov koom nrog cov neeg ntseeg Plos Tes Taas hauv lub zos Xais Xoom Npoos koom tu siab thiab thov koom nrog lawv 5 leeg uas tau pab tus pog Caas no koom tu siab thiab. Vim tias yog muaj tseeb li hais, mas cov tub ceev xwm uas ua li no rau cov Xib Hwb, tau hla txoj cai txuag tib neeg kev ywj pheej lawm.
Paj nruag
Hais txog zaj xwm 2 : Nyob Is Lav teb, muaj 45 tus neeg raug cov tub rog Ais Es muab lawv hlawv ciaj ciaj, mas yog li no :
Kwv tij phooj ywg, hnub tim 17 lub 2 hlis tas los no, nyob rau hauv lub nroog As Npas Das Dis, teb chaws Is Lav, mas tau muaj ib cov neeg teev hawm kev cai Mawv Xis Lim uas lawv hu ua cov Ais Es, muab 45 tus neeg hlawv ciaj ciaj rau tsoom pej xeem sawv daws saib.
Ua li mas xav qhia rau nej tias cov Ais Es no, yog ib cov neeg dab tsi ?
Kwv tij, cov Ais Es, mas yog ib cov neeg uas teev hawm kev cai Mawv Xis Lim, uas nyob Is Lav teb thiab Xis Lias teb. Cov Ais Es no, lawv xav muab ib nrab ntawm lub teb chaws Is Lav thiab ib nrab ntawm lub teb chaws Xis Lias los tsim dua ua ib lub teb chaws Mawv Xis Lim tshiab.
Yog vim li no, ces yog leej twg tawm tsam lawv, tsis hais tej nom tswv, los yog cov pej xeem kuj xij, cov Ais Es puav leej muab ntes coj los tua thiab hlawv ciaj ciaj rau ib zeej tsoom saib, kom xwv sawv daws yuav tsum koom tes nrog cov Ais Es tsim dua ib lub teb chaws tshiab rau cov Mawv Xis Lim.
Cov Ais Es no tsis yog muaj nyob Is Lav thiab Xis Lias teb xwb, tseem muaj nyob rau ntau ntau lub teb chaws thiab, yam li nyob Lis Npias teb, Zos Das Nias teb, Hais Nkws Tos teb thiab kuj muaj ib txhia nyob lwm lub teb chaws mus koom thiab.
Kwv tij, hnub tim 7 lub 2 hlis tas los no, mas nyob Lis Npias teb, cov tub rog Mawv Xis Lim uas hu ua Ais Es tau ntes 21 tus neeg ntseeg Ntuj coj mus suam hlab pas tuag tag tib si. Ua rau cov tseem fwv Lis Npias npau taws kawg nkaus rau cov Ais Es.
Tsis tas li ntawd, thaum Vaj Qhia Faas Ntshis Kus hnov qhov xwm phem phem no, Vaj Qhia kuj tau tshaj lus tawm tias : « Cov neeg uas ua phem li no, mas thooj li yog ib cov neeg qus uas tsis txawj hlub neeg».
Kwv tij, hnub tim 13 lub 2 hlis xyoo 2015 no, mas nyob rau hauv lub nroog Kis Kus, Is Lav teb, tseem muaj ib cov tub rog Ais Es mus ntes ib cov pej xeem uas yog haiv neeg tsawg hu ua Khawj, coj mus kaw rau hauv ib cov nkuaj hlau thiab tseem muab tsheb thauj lawv coj mus ncig lub nroog kom ib zeej tsoom pom, kom sawv daws ntshai cov Ais Es thiab koom tes nrog.
Tsis tas li ntawd xwb, hnub tim 3 lub 2 hlis, tseem muaj dua ib cov tub rog Ais Es mus ntes ib tug kws tsav dav hlau uas yog neeg Zos Das Nias hu ua Muas As Kas Xes As Npes, vim tias nws ua lub dav hlau poob ces cov Ais Es txawm txhom tau nws thiab coj nws mus tsim txom hlawv ciaj ciaj rau hauv ib lub nkuaj hlau rau zeej tsoom saib. Ua rau cov tseem fwv Zos Das Nias npau taws kawg thiab chim siab heev tshaj paws, ces cov tseem fwv Zos Das Nias thiaj tau muab 2 tug neeg uas yog cov Ais Es tsim kev kub ntxhov tua kiag rau hnub ntawd thiab tseem txhib ib cov dav hlau ya mus tua cov Ais Es uas nyob ntau ntau thaj tsam hauv Xis Lias teb.
Kwv tij, lub caij no nyob hauv teb chaws Is Lav nram yav qab teb, mas kuj muaj ib cov tub rog Mes Kas uas qhia rawv cov tub rog Is Lav kom txawj tiv thaiv cov tub rog Ais Es. Tab sis los txog tav no mas cov tub rog Ais Es kuj tseem muaj zog kawg nkaus.
Yog vim li no, ces thiaj ua rau cov tseem fwv Mes Kas thiab cov tseem fwv Aws Los Pas xav tias ntshe yuav tsum pab cov tub rog Is Lav thiab cov tub rog Xis Lias cheb ntxuav cov Ais Es ntxiv mus kom heev dua qub. Ua rau lub caij no cov tseem fwv Fab Kis tau xa ib lub nkoj uas thauj dav hlau tua rog mus nyob ze ze rau ntawm lub hiav txwv Paws Xias npaj tua cov Ais Es.
Paj nruag
Hais txog zaj xwm 3 : Nyob Suav teb, muaj ib tug Tswv Qhia Suav laus laus tau tas sim neej, mas yog li no :
Kwv tij phooj ywg, tus Tswv Qhia Suav ntawd lub npe hu ua Sis Ees Xaas, nws hnub nyoog 94 xyoos lawm, nws yog tus Tswv Qhia nyob hauv lub Ceeb Koom Txoos Yis Xis Aas hauv xeev Huj Npej. Tus Tswv Qhia Sis Ees Xaas no nws raug cov tseem fwv koom tshaj Suav txhom coj mus kaw hauv nkuaj ntev txog 53 xyoos nkaus.
Tswv Qhia Sis Ees Xaas raug kaw xyoo 1962, ces lub caij uas nws nyob hauv nkuaj 53 xyoos ntawd mas nws tau raug quab yuam ua ntau ntau yam hauj lwm rau tseem fwv Suav.
Kwv tij, txij lub 4 hlis tim 13 xyoo 2001 los mus, mas tsis paub tseeb tias tus Tswv Qhia no raug cov tseem fwv Suav tshais chaw coj mus kaw rau qhov twg lawm. Vim tias nws tej txheeb ze thiab cov neeg ntseeg sawv daws uas nyob hauv lub Ceeb Koom Txoos Yis Xis Aas puav leej tsis muaj leej twg hnov nws lub moo kiag li.
Tab sis hnub tim 30 lub 1 hlis xyoo 2015 no, cov tseem fwv Suav tau ceeb toom rau nws tsev neeg tias : « Tswv Qhia Sis Ees Xaas tau tag sim neej lawm ». Tiam sis los txog tav no cov neeg ntseeg hauv lub xeev Huj Npej thiab nws tej txheeb ze puav leej laj tos txog hnub uas lawv pom Tswv Qhia lub cev ntaj ntsug uas tau tag sim neej.
Li ntawd, nyob ntau ntau thaj tsam hauv Suav teb, mas cov neeg ntseeg Ntuj raug tseem fwv Suav ua nruj nruj kawg rau lawv, ces ua rau cov neeg ntseeg tsis tshua muaj kev ywj pheej pes tsawg nyob hauv txoj kev teev Ntuj thiab kuj ua rau lawv ntxhov siab kawg nkaus.
Kwv tij phooj ywg, 23 xyoos sis law, mas Tswv Qhia Sis Ees Xaas raug cov tseem fwv Suav quab yuam kom mus ua hauj lwm hnyav hnyav rau hauv tej qhov thee av thiab nyob rau hauv tej liaj teb. Hos xyoo 1989, Tswv Qhia Sis Ees Xaas kuj tawm hauv tsev loj faj los nyob rau hauv lub nroog Yis Xis Aas ib zaug, ces nws tau nrog ib cov Tswv Qhia hauv lub Koom Txoos Zais Ntshis sab laj. Lub caij ntawd lawv sib tuav xam tau 2 hnub, ces txawm muaj ib cov tub ceev xwm coob coob tuaj ntes cov Tswv Qhia ntawd thiab coj lawv mus kaw rau hauv nkuaj. Lawv lub txim, mas yog raug kaw ntev li 4 xyoos.
Thaum cov neeg ntseeg nyob Suav teb hnov qhov xwm no, ua rau lawv sawv daws ntxhov siab kawg txog tej yam li no. Tiam sis txawm li cas los xij, cov neeg ntseeg Suav yeej paub tias Tswv Qhia Sis Ees Xaas tau ua tim khawv zoo heev rau hauv txoj kev ntseeg txog Tswv Ntuj lawm.
Kwv tij, tseem muaj dua ib tug Tswv Qhia hu ua Yas Kos Xus Zees Mis, hnub nyoog 84 xyoos, nws yog tus Tswv Qhia saib cov neeg ntseeg hauv lub Ceeb Koom Txoos Npaus Dees, uas nyob Suav teb. Xyoo 1997 thaum lub 10 hli hnub tim 8, mas Tswv Qhia Yas Kos Xus Zees Mis kuj raug cov tseem fwv Suav ntes coj mus kaw rau hauv nkuaj los txog niaj hnub no tseem tsis tau tso tawm thiab.
Li ntawd, mas hais rau peb tsoom Hmoob sawv daws paub tias : « Peb twb nyob rau cov teb chaws uas muaj kev ywj pheej lawm, xav kom peb tsoom Hmoob uas yog neeg ntseeg Ntuj sawv daws huv tib si sib hlub thiab sib pab li ib cov kwv tij tiag tiag nyob hauv Huab Tais Yes Xus lub Koom Txoos. Vim tias nyob rau cov teb chaws koom tshaj thiab cov teb chaws Mawv Xis Lim, mas muaj ntau ntau zaus txoj kev ntseeg Ntuj raug tej nom tswv txwv thiab ua phem los tsim txom cov neeg ntseeg Ntuj heev kawg nkaus, ua rau cov neeg ntseeg thiab lub Koom Txoos Kav Tos Liv muaj kev ntxhov siab ntau yam ».
Kwv tij phooj ywg, ua li mas peb vam tias sawv daws yuav muaj txoj kev sib hlub sib pab nyob rau hauv peb tsoom Hmoob. Hnub no kuv tsuas coj 3 zag xov xwm tuaj ntsib nej sawv daws xwb, yam li :
1. Hais txog nyob Los Tsuas teb, muaj ib cov neeg ntseeg Plos Tes Taas raug tseem fwv ntes.
2. Hais txog nyob Is Lav teb, muaj 45 tus neeg raug cov tub rog Ais Es muab lawv hlawv ciaj ciaj.
3. Hais txog nyob Suav teb, muaj ib tug Tswv Qhia Suav laus laus tau tag sim neej.
Kwv tij, ua li mas txuas ntxiv ntawm no mus thov caw nej los mloog ib zag nkauj. Tom qab zaj nkauj tag, peb mam rov sib ntsib dua, sawv daws nyob zoo !
Paj nruag
Zaj no Txiv Plig Txhiaj Foom ua nyob Lomsak.
Haam Kub pab ntaus thiab kho me ntsis.
Hnub tim 24 lub 2 hlis xyoo 2015