Pab xav txog lub ntsiab hauv tej zaj nyeem

Zam 6:

Yes Xus hais tias:
27 Nej tsis txhob khwv nrhiav cov txhiam xws uas txawj lwj,
nej yuav nrhiav cov txhiam xws tsis txawj puas
thiab pub txoj sia nyob mus li,
yog cov uas Neeg Leej Tub muab rau nej,
vim nws yog tus uas Leej Txiv uas yog Tswv Tswv Ntuj kiag,
tau ntaus thwj rau lawm.
28 Lawv hais rau Yes Xus tias :
"Peb yuav ua dab tsi, peb thiaj ua tau
Tswv Ntuj cov hauj lwm ?"
29 Yes Xus teb rau lawv hais tias :
"Tswv Ntuj txoj hauj lwm yog zoo li no :
Kom nej ntseeg txog tus nws xa tuaj."
35 …Kuv yog cov mov muaj txoj sia.
Tus tuaj cuag kuv yuav tsis tshaib ntxiv,
Tus ntseeg txog kuv yuav tsis nqhis ntxiv.”

Ob peb nqes Ntawv Moo Zoo saum no yog nyob hauv zaj nyeem rau tag kis Hnub Chiv 18 nyov nruab xyoos, Xyoo B

Hnub no peb yuav los tham txog HT Yes Xus lo lus no: “Tsis txhob nrhiav tej yam mov uas txawj lwj.” Yog peb xav txog tej zaub mov uas peb niaj hnub noj los yug peb lub cev xwb mas yeej txawj lwj tas nrho, tsis muaj ib yam yuav tsis txawj li. Yog peb xav txog tas puas tsav yam uas peb nrhiav los rau peb sab nqaij tawv thiab peb lub neej nyob ntiaj teb xwb, ces txhua yam txawj puas txawj ploj. Nyiaj txiag yog qhov txawj nqig, txawj tas, txawj ploj sai tshaj plaws. Thaum peb lub cev tas txoj sia lawm, lub cev txawj lwj ib yam thiab. Tiam sis ntawm no HT Yes Xus yog hais txog cov zaub mov uas yuav los yug peb tus ntsuj plig. Txawm lub cev tuag txawj lwj los tus ntsuj plig tsis tuag tsis lwj. Tus ntsuj plig yog sab uas Tswv Ntuj tsim kom zoo li Tswv Ntuj me ntsis, thiaj tsis txawj tuag tsis txawj lwj.

Tiam sis nyob hauv sab ntsuj plig muaj ob yam uas tus ntsuj plig yuav tau txais. Ib yam mas yog txoj kev nyob kaj siab lug mus li ib txhis, hos ib yam mas yog mus nyob hauv qhov tsaus ntuj, qhov kub thiab txom nyem tas mus li ib txhis. Peb yuav xav txog tej yam mob heev heev ua rau yus mob mob nyiaj tsis taus li lawm tiam sis yeej tsis muaj qhov ntaug zog ua rau yus siav loj zog li, ces yus txoj sia zoo li yuav tu tas mus li xwb los kuj tsis tu kiag thiab, mas nyob nyuaj tshaj plaws. Nyob hauv qhov tsaus ntuj qhov kub txom nyem mas ntshai yuav zoo li ntawd ntag, thiab tseem txom nyem tshaj qhov ntawd ib puas npaug lawm thiab.

Huab Tais Yes Xus xav cawm peb kom dim ntawm qhov txom txom nyem ntawd, nws thiaj li nqes los ua neeg, los qhia peb kom peb yuav tsum nrhiav yam txhiam xws uas yuav pab peb tau qhov nyob kaj siab lug mus li. Yam txhiam xws ntawd, HT Yes Xus qhia hauv no hais tias yog nws tus kheej ntag: “Kuv yog cov mov muaj txoj sia.”

Peb yuav saib HT Yes Xus yog peb cov mov muaj txoj sia zoo li cas? Thaum cov neeg nug HT Yes Xus tias lawv yuav ua dab tsi thiaj yog ua Tswv Ntuj cov hauj lwm. Yes Xus qhia rau lawv tias ua Tswv Ntuj txoj hauj lwm ces yog ntseeg txog Yes Xus xwb. Yog li ntawd, peb yuav muab HT Yes Xus los ua peb cov mov, mas yog ib, peb yuav tsum xub ntseeg txog tias HT Yes Xus yog Tswv Ntuj tiag, nws tuaj ntawm Tswv ntuj tuaj cawm peb tiag. Peb yuav saib nws cov lus qhia yog ib co mov rau peb lub siab ntag, kom peb yoog raws coj raws li nws hais, nyob hauv peb txoj kev ua neej niaj hnub. Nws cov lus qhia uas peb yuav tsum coj yog cov twg? Yog cov nyob hauv Tswv Ntuj Kaum Lo Lus Qhia. Tiam sis HT Yes Xus muab kaum lo lus ntawd los hais ua ob los nkaus rau sawv daws nco ntsoov xwb: “Koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj” thiab “Koj yuav nyiam tus nyob ze ntawm koj ib yam nkaus li koj nyiam koj.” Yog li ntawd peb puas nyiam Tswv Ntuj tshaj tas puas tsav yam tiag? Peb puas muab nws ua qhov loj tshaj nyob hauv peb lub neej? Peb puas niaj hnub nrhiav sij hawm los nco txog Tswv Ntuj los teev ntuj, tsis txhob tos txog Hnub Chiv xwb? Peb ho puas nyiam luag pab luag? Peb ho puas thov ntuj pab tus uas ua phem rau peb, los peb puas thov rau cov neeg ua zoo xwb? HT Yes Xus tseem tau hais ntau yam lus qhia peb ua neej nyob hauv Ntawv Moo Zoo. Peb puas xyaum nquag nyeem Ntawv Moo Zoo kom peb paub nws cov lus, peb thiaj coj tau li nws nyiam?

HT Yes Xus hais tias: “nej yuav nrhiav cov txhiam xws tsis txawj puas thiab pub txoj sia nyob mus li, yog cov uas Neeg Leej Tub muab rau nej.” Yes Xus lub Cev thiab cov Ntshav, uas yog lub Cim Yug, yog cov mov yug peb tus ntsuj plig kom muaj txoj sia tsis txawj tag tsis txawj kawg. Peb yuav saib hais tias lub mov peb mus noj, cov cawv peb mus haus yog HT Yes Xus tiag tiag. Peb yuav tau hwm lub Cim Yug ntawd zoo tshaj plaws, tsis txhob lam mus noj lam mus haus zoo li ib yam tsis tsim txiaj dab tsi. Peb tsis txhob xav tias, “yog ib qho nyuag ua kev nco txog Yes Xus xwb.” Peb nco ntsoov hais tias yog Yes Xus tiag tiag, yog yam zoo tshaj plaws uas yuav pab peb kom peb tau txoj sia nyob mus li kaj siab lug thaum kawg. Yog vim li ntawd lub Cim Daws Txhaum thiab lub Cim Yug yeej mus ua ke nraim. Peb yuav tau nquag siv lub Cim Daws Txhaum los ntxuav peb lub siab peb tus ntsuj plig nraim kom dawb huv, peb thiaj tsim nyog mus noj Yes Xus lub cev thiab haus nws cov Ntshav, thiab peb thiaj tau txais nws cov txiaj ntsim los txhawb peb lub neej.

Nyob zoo sawv daws,

Tau ntev heev no kuv tsis tau tuaj xav tswv yim txog cov zaj Ntawv Moo Zoo Hnub Chiv lawm. Kuv yuav rov tuaj sau zaj puav ntxiv.

Piav Zaj Ntawv Moo Zoo Hnub Chiv 33 Xyoo C

Nyob hauv zaj Ntawv Moo Zoo hnub Chiv 33 Xyoo C no, Yes Xus hais txog yuav muaj yaj saub cuav thiab muaj ntau yam xwv txheej tshwm sim thaum lub caij kawg, tiam sis kuv yuav tsis hais txog. Kuv yuav piav txog nqe lus uas Yes Xus hais tias peb cov ntseeg Yes Xus yuav raug luag ntes thiab tsim txom xwb. Zaj Ntawv Moo Zoo hnub no yog nyob hauv Lus Kas 21: 5-19, tiam sis kuv tsuas tso nqe 10-19 xwb, thiab kuv yuav hais txog nqe 12-19 xwb.

Lus Kas 21: 10-19
10 (Yes Xus) hais rau lawv tias: “Ib haiv neeg yuav sawv tawm tsam lwm haiv neeg, ib lub teb chaws tawm tsam lwm lub teb chaws. 11 Yuav muaj av qeeg loj, muaj kev tshaib plab, muaj tuag aws ib thaj tsam dhau ib thaj tsam; thiab yuav pom tej yam txawv txav thiaj tej lub cim muaj hwj huam loj tuaj saum saum ntuj tuaj. 12 Tiam sis ua ntej tej no yuav tshwm sim, luag yuav xub ntes nej thiab yuav tsim txom nej, yuav coj nej mus kom rau cov tsev txoos thiab cov tsev kaw nkuaj, yuav coj nej mus liam rau tej vaj ntxwv thiab tej nom tswv vim kuv lub npe. 13 Tej no yuav ua rau nej tau kev ua pov thawj. 14 Nco ntsoov, nej tsis txhob npaj ua ntej tias nej yuav hais li cas thiaj yuav dim, 15 vim kuv kiag yuav muab ib lub tswv yim thoob tsib rau nej hais lus kom tas nej cov yeeb ncuab yuav tsis muaj peev xwm teb tau los cav tau. 16 Tseem yuav yog kiag nej niam nej txiv, nej kwv tij neej tsa txheeb ze, thiab phooj ywg coj nej mus liam rau luag, ces lawv yuav muab nej ib txhia coj mus tua. 17 Luag yuav ntxub nej vim yog kuv lub npe nkaus xwb, 18 tiam sis nej ib txoj plaub hau yuav tsis raug puas. 19 Yog nej tiv kom txog qhov kawg, nej yeej yuav tau txais txoj sia.

Lub caij no yog lub caij uas peb pib xaus lub xyoo teev ntuj. Tshuav ib hnub Chiv ntxiv xwb: Hnub Chiv tom ntej no yog peb ua kev hwm HT Yes Xus ua Vaj kav tas lub sim ceeb. Dhau ntawd ces peb yuav pib lub caij Tos Huab Tais lawm, yog pib lub xyoo tshiab hauv xyoo teev ntuj. Niaj xyoo thaum xaus xyoo laus li no, lub Koom Txoos muab ib co zaj nyeem uas yog hais txog lub caij ntiaj teb kawg rau peb nyeem kom peb nco tias peb lub neej nyob ntiaj teb no yuav muaj caij kawg.

Peb tsis tas tos kom txog ntiaj teb kawg, tab txawm niaj hnub no los peb yuav tau coj lub neej ua tim khawv txog peb txoj kev ntseeg. Peb tsis raug leej twg ntes coj mus liam rau nom tswv tias peb yog neeg ntseeg. Tiam sis peb paub tias niaj hnub no, muaj ib co ntseeg, nyob cov teb chaws kos mws niv (xws li Suav teb, Cob Tsib teb - peb muaj ib co Hmoob uas raug ntes vim kev ntseeg) los mawv xis lim (xws li cov teb chaws Middle-East), raug luag ntes, raug luag tsim txom, raug luag tua, vim lawv ntseeg Yes Xus. Lawv yog ib co tim khawv txog Yes Xus tiag. Yog li peb yuav tau thov ntuj pab lawv txhawb lawv, kom lawv ua tau lub siab tawv ntseeg mus txog qhov kawg, txhob thim kev ntseeg.

Ntawm peb, txawm peb tsis raug luag ntes mus tsim txom, mus tua, los peb yeej muaj kev yuav ua tim khawv txog peb txoj kev ntseeg ib yam. Xws li yog peb muaj ib tug txheeb ze, los phooj ywg caw peb tias, “Hnub Chiv no, kuv muaj noj muaj haus li no… Xav kom koj tuaj koom kom tau xwb xwb nawb. Kuv paub tias nej muaj mus teev ntuj, tiam sis koj qhaj ib zaug xwb yeej taud.” Yog peb saib peb txoj kev mus pe hawm thiab mus txi Ntuj muaj nqe mas peb yuav ua tim khawv txog peb txoj kev ntseeg, peb yuav hais rau tus phooj ywg los txheeb ze li no, “Kuv yeej yuav tuaj koom koj xwb, tiam sis thov koj zam txim, kuv yuav tuaj lig me ntsis, vim yog kuv yuav tsum xub tau mus pe hawm Tswv Ntuj tso. Kuv tsis xav qhaj, vim kuv tuaj lig los yeej tau. Yog li kuv yuav tuaj lig.” Yog peb coj li no ces peb qhia rau peb cov txheeb ze thiab phooj ywg tias peb txoj kev ntseeg tseem ceeb.

Los xws li kev ua dej num nrhiav nyiaj nrhiav txiaj. Peb tuaj teb chaws no, mas peb leej twg los yeej xav kom muaj nyiaj muaj txiaj thiaj txaus noj txaus haus txaus siv. Nyob ntau qhov chaw ua hauj lwm, yog leej twg ua hauj lwm hnub Chiv mas tseem tau nyiaj ob npaug. Yog ib qho uas luag txhob txwm txhawb peb lub siab ntshaw. Peb yog ib tug neeg ntseeg, mas yog luag tsis yuam kom ua hauj lwm, peb yuav tsum tau saib peb txoj kev mus teev ntuj muaj nqes, thiab peb yuav tau saib Tswv Ntuj txoj cai uas qhia kom peb caiv Tswv Htuj hnub, tsis txhob ua hauj lwm, muaj nqes. Yeej yog ib qho nyuaj heev, vim peb muaj ib lub siab ntshaw kom tau nyiaj, tiam sis yog peb coj raws li Tswv Ntuj txoj cai, ces yog peb kev ua tim khawv txog peb txoj kev ntseeg ntag. Txoj kev ua tim khawv tsis khuv xim yus txoj sia los yog txoj kev ua tim khawv tsis ntshaw nyiaj txiag yeej nyuaj heev rau peb thiab yeej pub txiaj nysim ntau rau peb tus ntsuj plig.