Tej Yam Ua Neeg Txoj Kev Xav Thiab Lub Siab Ntseeg

Raws li neeg txoj kev ntseeg, thiab muab sau nyob rau tej yam ntaub ntawv tseg cia tias nyob hauv txhua hnub thaum koj muaj kev tawm rooj mus deb koj yuav tau ua tej yam kev cai thov rau koj tus kheej ua ntej koj yuav tawm ntawm koj lub tsev mus raws li cov hnub hauv qab no:

1/. Zwj Hnub ( Sunday ) : Hnub no thaum koj npaj tau txhij lawm, koj yuav tawm hauv tsev mus mas koj yuav tau muab DEJ LOS NTXHUAV MUAG los yog muab ntub me me rau koj lub hauv pliaj, ua ntej koj mam li mus. Yog koj ua li no ces hnub ntawd koj yuav mus dawb mus huv tsis hmab dawm tes hlua dawm taw nyob tom koj txoj xub ke.

2/. Zwj Hli ( Monday ) : Hnub no thaum koj npaj tau txhij lawm, ua ntej yuav sawv ke mus koj yuav tau los pw da ib pliag me me saum txaj koj mam li tawm hauv koj lub tsev mus. Yog koj ua li no txhua yam phem nyob tom koj txoj xub ke yuav tsis raug tsis nphav koj.

3/. Zwj Quag ( Tuesday ) : Hnub no koj yuav tau noj los yog haus ib yam khoom qab zib, ua ntej koj yuav tawm hauv koj lub tsev mus. yog koj ua li no koj kuj yuav ntsib txhua yam zoo nyob tom koj hauv ntej.

4/. Zwj Feej ( Wednesday ) : Hnub no koj yuav tau noj ib dia mov los ib los mov, ua ntej koj yuav tawm hauv tsev mus. Yog koj ua li no hnub ntawd koj yuav tsis ntsib xwm txheej nyob rau koj txoj xub ke.

5/. Zwj Teeb ( Thursday ) : Hnub no koj yuav tau muab ntiv tes los tub tshauv los yog qab laub kaub los pleev ua ib lub cim ntoo khaub lig rau saum koj hauv pliaj, ua ntej koj yuav tawm hauv tsev mus. Yog koj ua li no, mas txhua yam kev phem kev tsis zoo nyob tom koj txoj xub ke yuav txav deb ntawm koj mus, koj yuav tau mus kaj mus huv.

6/. Zwj Kuab ( Friday ) : Hnub no, thaum koj tawm hauv tsev mus rau nraum zoov, koj yuav tau nres ib pliag li 1 los 2 feeb ces koj mam li mus. Yog koj ua li no mas txhua yam kev tsis zoo nyob tom koj txoj xub ke yuav tsis raug koj.

7/. Zwj Cag ( Saturday ) : Hnub no, thaum koj yuav tawm hauv tsev mus, koj yuav tau nrog koj ib tug neeg nyob hauv tsev sib thab sib tawb sib ntau ua si, ua koj yog tus yeej ces koj cia li tawm mus. Yog koj ua li no mas hnub ntawd koj yuav muaj yeej txhua yam nyob rau koj txoj xub ke yuav tsis los rau koj.

Tsoom thawj kws tshawb fawb, lawv tau taug dab ntub npau suav ib txheej dhau ib txheej los mus hais tias ua txoj kev npau suav yog qhia txog dab tsi tiag. Raws li tau paub los mus cov kws xib hwb tau muab teev thiab sau tseg raws li no:
yog koj npau suav rau hnub Sunday (Zwj Hnub) ces tus npau suav ntawv tsis yog koj, yog neeg zej tsoom sawv daws lawm.

Sunday (Zwj Hnub) = Zej tsoom
Monday (Zwj Hli)= Neeg txheeb ze
Tuesday (Zwj Quag) = Niam thiab txiv
Wednesday (Zwj Feej)= Poj niam/me nyuam
Thursday (Zwj Teeb) = Phaj xib hwb/kws txuj
Friday (Zwj Kuab) = Phooj ywg
Saturday (Zwj Cag) = Tus kheej (yus)

Nqe Npau Suav:

Npau suav: Lo tej yam phem qias qias neeg; yog yuav muaj hmoo tau nyiaj tau txiaj.
Npau suav: Hnav ris tsho tshiab; yog yuav khab seeb tau zoo, tej neeg phem yuav swb.
Npau suav: Ntaus vas, cuab ntses thiab tau ntses; yog yuav muaj ub muaj no ploj.
Npau suav: Pom ntshuab puag tes puag taw, yaim tes taw txhais tias; yuav muaj neeg pab yus.
Npau suav: Tau nplhaib coj txhais tias; yuav tau txwj tau nkawm uas txaus siab heev. Yog tias muaj cuab muaj yig lawm ces yog yuav tau tub tau ntxhais uas ntxim siab thiab ntxim hlub heev.
Npau suav: De thiab khaws tau txiv hmab txiv ntoo txhais tau tias; yuav tau txais tej yam uas raug yus siab heev.
Npau suav: Noj zaub noj mov nrog niam, txiv thiab nrog poj niam me nyuam txhais tias; yuav muaj hmoo tau noj yam txaus siab heev.
Npau suav: Raug txhom raug kaw, tau plaub tau ntug txhais tias; yog yuav tau hloov laj kam nce siab zuj zus mus.
Npau suav: Raug txiav tes txiav taw coj cuab txhias tias; tau xaiv meej mom siab mus.
Npau suav: Tau vaub kib, pom vaub kib; yog yuav tau neeg txib neeg hu.
Npau suav: Haus dej, haus cawv txhais tias; yuav muaj neeg txhawb yus.
Npau suav: Yus lub tsev kub hnyiab txhias tias; yuav txom nyem plam lub chaw nyob. Yog pom kub lwm tus lub ces yog yus yuav tau zoo.
Npau suav: Pom dav hlau, tsheb ya txhais tias; yuav tau ib yam dab tsi uas yus lub siab xav tau.
Npau suav: Muaj me nyuam yaus coob coob tuaj pw hauv vaj hauv tsev txhais tias; yuav tau t ub txib tub hu thiab yuav tau ua nom ua tswv.
Npau suav: Hnav ris tsho liab txhais tias; yuav muaj kev kub ntxhov yuav raug yeeb ncuab tsim txom.
Npau suav: Hnav ris tsho xiav paj yeeb (purple) txhais tias; yuav tau txwj tau nkawm uas ntxim siab.
Npau suav: Pom tswv ntuj txhais tias; yuav raug phooj raug ywg iab hiam.
Npau suav: Pom dab caum yus txhais tias; yog yuav tau plaub tau ntug nce txog nom txog tswv tsev hais plaub ntug.
Npau suav: Pom hluas nkauj taws tsau los cuag txhais tias; yuav tau poj tau sev uas txaus siab nyiam heev. Yog poj niam npau suav pom txiv neej ces yog yuav tau ib tug zoo txiv.
Npau suav: Thov ntuj los yog mloog lwm tus thov txhais tias; tej kev khuab tej kev khaum uas tau ua los lawm yuav dhau mus.
Npau suav: Taug kev tiv tshav, nraim duab ntxoov ntxoo txhais tias; yuav tau nyiaj tau txiaj tsim nyog sim kev twv txiaj.
Npau suav: Nkag tsev teev hawm thiab mloog lus qhuab ntuas txhais tias; yuav khab seeb thiab tau zoo heev.
Npau suav: Pom xib hwb, kws txuj txhais tias; xav yam twg los yuav tau li siab nyiam.
Npau suav: Pom niam pom txiv (txawm yog tias nyob thiab tsis nyob lawm los xij peem) txais tias; tsim nyog ua kev zoo siab xa koob xa hmoov mus rau lawv.
Npau suav: Tshuab raj tshuab ncas txhais tias; yuav mauj vaj huam loj leej twg los yuav txhawb yuav hawm.
Npau suav: Raug xob tua txhais tias; yuav txom nyem vim tej hlob.
Npau suav: Pom nab puag tes puag taw txhais tias; yuav tau txwj tau nkawm tsis ntev tom ntej no ntag.
Npau suav: Raug nab caum tom; yog yuav tau txwj nkawm siab ntev.
Npau suav: Tsiv nyob tsev tshiab txhais tias; yuav raug xaiv hwj chim, xaiv laj kam.
Npau suav: Caij nkoj hla dej txhais tias; muaj neeg khwv ua phem rau yus tiam sis ua tsis tau li cas.
Npau suav: Caij dav hlau txhais tias; yuav muaj hmoo thiab tau mus kev deb.
Npau suav: Pom dav hlau poob txhais tias; yuav muaj neeg txheeb ze ploj tuag.
Npau suav: Hniav tab meej lov txhais tias; yuav muaj kwv tij neej tsa ploj tuag.
Npau suav: Hniav puas lov txhais tias; niam, txiv los yog tej neeg laus yuav dua toj.
Npau suav: Raug ntaus, raug tua txhais tias; yuav muaj hmoov thiab yeeb ncuab yuav ntshai.
Npau suav: Khaws nyiaj kub tsis txawj tag txhais tias; yam uas xav tseg yuav tau li siab nyiam.
Npau suav: Caij ntxhw, caij nees, caij nyuj, thiab caij twm txhais tias; yuav muaj hmoo thiab tau zoo.
Npau suav: Tsov, ntxhw, thiab dais caum txhais tias; yuav raug yeeb ncuab rhuav tshem thiab tsim txom.
Npau suav: Caij nkoj, caij tsheb tiam sis ntxeev los yog muaj teeb meem txhais tias; yuav muaj txhiam laj txhiam xws ploj. Muaj khub phem nyob rau lub sij hawm no tsis tsim nyog mus kev deb.
Npau suav: Nrog hluas nkauj pw/nrog hluas nraug pw txhais tias; yuav muaj kev kub ntxhov kev nyuaj siab.
Npau suav: Pom hauj sam txhais tias; yuav khab seeb tau zoo tiam sis tsis tau noj tau haus.
Npau suav: Tau noj zaub noj mov, haus dej haus cawv luam taw laws txhais tias; yuav muaj mob muaj nkeeg.
Npau suav: Zaum hauv tej qab ntoo loj txhais tias; yuav tau ua tus coj zej tsoom suav daws.
Npau suav: Quaj txhais tias; yuav muaj kev iab siab tiam sis dhau mus yuav muaj hmoo.
Npau suav: Pom hli nra txhais tias; tus poj niam/tus txiv yuav ntxeev siab.
Npau suav: Pom hli tsaus txhais tias; yuav tsis sib haum nrog tus hlub (poj niam/txiv).
Npau suav: Lub vaj lub tsev puas txhais tias; tus niam tsev los yog tus txiv tsev, ib tug yuav ncaim los yog yuav tso ib tug mus.
Npau suav: De paj, txiav paj txhais tias; yuav tau txwj nkawm uas siab nyiam heev.
Npau suav: Lov hniav txhais tias; yuav tau khaub thuas thiab hnov xov phem.
Npau suav: Tau me nyuam, yug me nyuam txhais tias; yuav muaj noj muaj haus, koob hmoov tab tom zoo kawg li.
Npau suav: Ua liaj ua teb,txhais tias; yog yuav ploj khoom thiab yuav txom nyem.
Npau suav: Tau ua hauj sam/ntxuav plig txhais tias; yuav tau zoo muaj meej mom tiam sis tsis muaj hmoov.
Npau suav: Tau taug kev txhais tias; yuav poob laj poob kam.
Npau suav: Pom hma, plis txhais tias; yuav muaj phooj ywg teev tiam yuav tsis txom nyem.
Npau suav: Pom miv txhais tias; yuav poob nyiaj txiag mus pab lwm tus.
Npau suav: Nrog tej kwv tij sib thab sib ntaus txhais tias; muaj kwv tij nco txog yuav tuaj xyuas.
Npau suav: Nrog phooj ywg ze sib thab sib ntaus txhais tias; yuav muaj kev nyuaj siab.
Npau suav: Tuag thiab raug kwv mus pov tseg txhais tias; yuav muaj hmoo nyob laus, yog muaj mob muaj nkeeg ces yog yuav zoo sai.
Npau suav: Pom liaj, dav txhais tias; yog yuav ploj khoom.
Npau suav: Pom nab txhais tias; muaj ib tug neeg twg nyiag nyiam yus heev.
Npau suav: Tau hla dej txhais tias; yuav muaj teeb meem rau tes laj tes kam.
Npau suav: Raug tho plab txiav hnyuv txhais tias; yuav tau ua tus coj yeeb ncuab yuav ntshai.
Npau suav: Caij tsheb nqis nkoj txhais tias; yog yuav tau hloov laj kam.
Npau suav: Pom huab tais, Poj huab tais txhais tias; yuav muaj hmoov tau zoo, tej hlob yuav nrog saib nrog xyuas.
Npau suav: Pom tus thawj coj txhai tias; yog yuav raug thuam raug tib.
Npau suav: Coj saw caj dab txhais tias; yuav tau txwj tau nkawm uas txawj sib hlub heev.
Npau suav: Pom neeg tuag, pom cev tuag txhais tias; tej khuj phem yuav dhau los mus ua khub zoo.
Npau suav: Pom nyuj, twm txhais tias; yuav qaug zog thiab yuav tsis xis nyob.
Npau suav: Muaj neeg nqa nyiaj txiag tuaj pub txhais tias; yuav muaj hmoov tiam sis ceev faj tsam raug ntxias dag.
Npau suav: Nrog phooj ywg sib thab sib ntaus txhais tias; yuav muaj kev sib txeeb tsis sib haum.
Npau suav: Los zis ntub ris tsho txhais tias; yuav muaj kev txhawj xeeb nyuaj siab.
Npau suav: Quav lo ris tsho txhais tias; yog yuav tau nyiaj tau txiaj.
Npau suav: Pom kab, npauj, mes, muv tej ntawv txhais tias; yuav muaj kev txom nyem tshwm sim los ntawm tej tub tej ki.
Npau suav: Pom thee, hluav ncaig txhais tias; yuav tau lus xaiv lus ncua, raug thuam raug tib.
Npau suav: Pom txhuv pom mov txhais tias; yuav tau hmoov zoo.
Npau suav: Muaj neeg muab phuam ntxuav muag pub; yog yuav muaj kev nyuaj siab, kua muag yuav poob.
Npau suav: Poob tsev, poob ntoo txhais tias; yuav tag hmoov, tag meej mom. Tsim nyog daws khub thiaj li zoo.
Npau suav: Tau haus zib ntab; yog yuav tau ua tus coj.
Npau suav: Da dej txhais tias; yuav khab seeb tau zoo.
Npau suav: Raug txiav tes, taw; yog yuav plam phooj ywg.
Npau suav: Raug kaus qhov muag txhais tias; yuav plam me tub me ntxhais uas ntxim hlub heev.
Npau suav: Raug tho txeeb lub plawv lawmtxhais tias; yog yuav ploj txwj ploj nkawm.
Npau suav: Pom hav zoov ntsuab xiab txhais tias; yuav muaj hmoo tau nyiaj tau kub.
Npau suav: Ntxhw, nees los tsev; yog yuav tau ntsib nrog tej kwv tij uas tau sib ncaim ntev ntev lawm.
Npau suav: Tso quav txhais tias; yuav poob nyiaj.
Npau suav: Raug neeg caum ntaus; yog yuav raug tib raug thuam.
Npau suav: Pom khau, rau khau txhias tias; yuav muaj chaw mus kev deb.
Npau suav: Tau zoo chaw pw txhais tias; yuav tau zoo dim kev txom nyem.
Npau suav: Pom hnub txhais tias; yuav muaj hwj chim, muaj meej mom yeeb ncuab yuav ceeb ntshai.
Npau suav: Pom paj qhaus dej (doj npuas); yog yuav tau koob meej zoo. Tsis li ntawv ces yog tsev neeg yuav nqa meej mom los txhawb yus caj ces neeg.
Npau suav: Tau kaus mom, ntoo kaus mom; yog yuav muaj tej hlob nrog saib nrog xyuas yeeb ncuab yuav tsis kab ua phem.
Npau suav: Rau khau tshiab txhais tias; yuav tau phooj tau ywg ze pab yus yam zoo ntxiv.
Npau suav: Tau haus dej txhais tias; yog yuav pib tau zoo zuj zus mus.
Npau suav: Tau noj zaub mov txhais tias; yuav tau khaub thuas, muaj mob muaj nkeeg.
Npau suav: Quaj los kua muag txhais tias; yuav dhau tej khuj phem mus.
Npau suav: Txiav plaub hau, txiav rau tes rau taw txhais tias; yog yuav poob nyiaj poob txiaj, poob meej mom, hwj chim.
Npau suav: Pom hnub qub, pom hli txhais tias; yuav tau txais koob hmoov los ntawm tej hlob.
Npau suav: Pom ntxhw, twm qus txhais tias; yog yuav tau txais khoom plis.
Npau suav: Pom tsev zeb tsev tsua txhais tias; yuav muaj vaj huam loj yuav tau ua nom ua tswv.
Npau suav: Pom dev kwv lauj kaub txhais tias; yog yuav raug ntxias dag.
Npau suav: Pom yus lub cev lwj txhais tias; yuav tau txais xov ntawm tus hlub thiab tej phooj ywg.
Npau suav: Pom saub (kws saib tsawv) txhais tias; yuav muaj kev nyuaj siab.
Npau suav: Tau noj txiv hmab txiv ntoo txhais tias; yog yuav tau txais xov ntawm tus neeg nyob deb.
Npau suav: Poob roob, poob tej qho siab siab txhais tias; yuav poob meej mom, plam laj kam thiab koob hmoov .

Ntawm kuv mas kuv tsis ntseeg npua sauv, vim tias peb ib hmos xyov yus ua pes tsawg zaj npau suav. Yog yus muab los ntseeg mas tsuam nyob neeg tuag. Ntawm kuv mas kuv ntseeg qhov tseeb ntawm yus lub siab. Yus ntseeg hais tias zoo ces zoo xwb.Txhua yam yus ntseeg tias muaj Tswv Ntuj pom hwm yus thiab saib xyuas yus txhua lub sij hawm es yus muab tas ib puas tsav yam tso rau Nws nyob ntawm Nws coj yus mus qhov twg los xij. Vim Tswv Ntuj yog " Tus tsim tas puas tsav yam, yog txoj sia, yog qhov pom kev, yog lub zog, yog txoj kev zoo, kev kaj, tus siab zoo, siab ncaj, tus muaj hwj huam tas nrho, tus muaj txoj kev zam txim kev hlub loj tas nrho, tus ua tau txhua yam nyob saum Ntuj thiab nyob ntiaj teb no, Tswv Ntuj yog tus kav tas puas tsav yam.Tsis muaj lwm tus yuav loj dua Nws lawm." Txawm tias yus ua npau suav phem los yus sawv los thov Ntuj tag ces yus lub siab kaj lug lawm.

Peb txhob ntseeg npau suav, npau suav yog ib yam yaj ntshis xwb.

Ha ha ha... Xwb hwb os, tej zaum koj tus siab rau kuv cov lus lawm os. Qhov kuv hais mas vim hais tias yog koj ntseeg ces kuj muaj li koj hais xwb. Yog txawm ua npau suav los yus tsis txhob ntseeg nws, es yus ntseeg rau qhov zoo xwb ces muaj qhov zoo xwb. Yus txhob muab ntseeg mus sab tsis zoo. Ua npau suav hniav lov, tsev kuv nyhiab mas kuv ua ntau, tab sis yus tsis ntseeg thiab ua npau suav tas yus tsis kaj siab ces yus sawv los teev Ntuj tas ces yus siab kaj lawm tsis muaj dab tsi.

Huab Tais Yes Xus twb hais tias: " According to Your Faith Be It Unto You. " Ces peb yog neeg ntseeg lawm peb ntseeg mus rau qhov zoo xwb ces peb lus siab kaj thiab yeej muaj zoo xwb. Vim tias npau suav no mas ib hmos xyov yus ua pes tsawg zaj, yog yus ntseeg nws mas ntau dhau lawm.


Tsis tas li thaum muaj ib tug neeg hais tej zaj npau suav rau yus los yus hais tias tsis muaj dab tsis ntshai tsos siab rau Ntuj ces kuj tsis muaj li zaj npau suav.

Xwb Hwb, txhua yam koj hais yeej yog lawm peb ua neeg nyob mas peb yeej tsis paub tag kis los tom ntej yuav muaj dab tsis.Teeb meem yuav tshwm sim dab tsis los peb yeej tsis paub. Tab sis qhov peb ua ces tsua yog tso siab rau Huab Tais Ntuj txhua lub sij hawm xwb. Vim peb yeej tsis paub thiab ua tsis tau dab tsi, tsuas yog Tswv Ntuj tib leej thiaj ua tau txhua tsav yam xwb.

Huab Tais Yes Xus twb hais tias: Nej ntseeg Tswv Ntuj mog, nej txhob txhawj." Qhov kuv hais mas kuv hais tias kom peb txhob muab npau suav los ntseeg thiab txhawj tas mus li vim peb ua npau suav ntau dhau yog peb yuav muab los ntseeg thiab suav mas yam lub nra uas nhav dhau. Peb yuav tsum ua ib tug neeg tso siab rau Ntuj mus li. Txawm tias dab tsis yuav tshwm sim los cia Tswv Ntuj ua tus ntau thawj, es peb txhob muab los ris. Tej laus kuj hais ntxiv tias cem pob zeb ces pom roob ris, txhua yam kuj yog nyob ntawm peb lub ncauj thiab. Yog pe ua tau ib tug neeg muaj kev tso siab mas yuav zoo dua.

Kuv twb pom cov es ntseeg npau suav heev uas cov tseem coj qub kev cai mas lawv niaj hnoob mus saib yaig tsis muaj nyiaj tas.Tsis tas li muaj cov twb ntseeg lawm los tseem ntseeg npau suav ntau tas mus li, mas tseem nyiag mus saib yaig thiab. Nyob hauv peb lub zos kiag. Kuv thiaj hais tias npau suav ntau dhau lawm peb yauv tau txhob ntseeg, es tso siab rau Ntuj mus li xwb nthse yuav yog qhov zoo dua.

Thov txim uas kuv tau nrog koj sib hais txog npau suav koj txhob chim nawb mog.Vim tias peb yuav tsum sib cav li no kom xwb thiaj muaj lus hais saib ib leeg ho xav licas nawb.

Bao,

Tsis ua cas os nawv, tej koj hais kuv yeej nkag siab zoo, tej sib hais no kuj yog ib qho zoo ua kom cov tuaj nyeem lawv ho nkag siab thiab os nawv. Tej yam koj hais kuv yeej paub zoo peb ua neej nyob ces tus yuav xav li cas los yeej muaj. Hais txog yuav mus kom lwm tus saib yaig no mas kuv ho tsis ntseeg vim nws xav hais li cas los yeej tau, peb ua neej nyob ces tsuas muaj 2 txoj kev rau peb taug xwb, ib ciaj 2 tuag xwb.

Kuv mas hais txog tej yam ua npau suav phem es ho poob siab yuav thov ntuj ua ub ua no kom txhij kom txhua no mas kuv ho tsis nyiam ua li, kuv tsuas tso siab cia rau Tswv Ntuj ua tus pom zoo rau yus xwb. Hahhaaa.....txhob me siab os nawv, muaj dab tsis tsis nkag siab los muaj lus nug yeej meem hais tuaj kuv tsis xav li cas os nawv kuv zoo siab sib hais txhua yam kom peb txhua tus nkag siab rau peb txoj kev ua neej kom peb txhua tus paub meej mus tau txoj kev kaj siab xwb os nawv, ua tsaug koj muab Comment rau kev npau suav nrog kuv os nawv.

Saib caij nyoog raws 12 tug tsiaj

Qaib = Sam xeeb ntawm Qaib tus yeeb yam cwj pwm coj tus kheej

Qaib lub zim txwv sawv nres hnub nyob rau hli tab = 1, 13, 25, = nyob rau hli txooj = 7, 19, = Qaib lub zim txwv sawv nres hlis, nres lub 1, hlis ntuj.

Qaib lub zim txwv sawv nres xyoo, nyob rau cov xyoo no yog, Qaib xyoo,
Qaib xyoo yog -1933, 1945, 1957, 1969, 1981, 1993, 2005, 2017, 2029

Nyeej sawv ntawm Qaib lub sawm yeej coj tus cwj pwm sawv nres

Ua dab tsi tau siab heev, muaj peev xwm nrawm thiab ceev heev, muaj hwj chim zoo tab sis, sam xeeb me, ua qhov hnyav tsis tau vim lub zog tsis loj duav tsis tau dav,

muaj kev txom nyem thaum me, hais lus zoo heev , ua num muaj koob vim leej tab leej zag los yog leej tub leej roog yog tus pab txhawb nqa txhua yam ntawm lub luag dej nus xwb.

Nyeej kav ntuj nrag ntawm Qaib lub sawm yeej pov puag coj raws

Muaj mob heev, tab sis mob tsis loj, yog yuav puas tsuaj mus rau kev nruam sim ces puas thaum me lawm thiab thaum laus xwb, kev cawm seej yog cov kwv tij thiaj pab tau xwb thiab cov txheeb ze nkaus xwb hos tus sab ntaud ces tsuas yog tuaj loos ntxiv xwb os, Thaum ib nrab neeg mus mas zoo nkauj zoo nraug heev thiab muaj peev xwb heev rau kev hais lus thiab puam fab heev , zoo rau fab puam fab hais lus kom luag qaug yus quav ces luag raug yus muab tsaws ua zaub hno noj xwb,

Kev coj cwj pwm tus kheej ntawm Qaib lub zim txwv txoj hmoo.

Tus zeej keeb twg yug nyob rau Qaib xyoo, mas nyob rau hauv zim keeb txoj hmoo coj cwj pwm ntawm nws tus kheej,

mas nws coj siab luv heev, chim taus heev, tsis nyiam hais lus phem li, nws nyiam hais lus zoo zoo xwb, nws nquag heev thiab siab sib heev, sawv ntxov heev, nyiam tu tus kheej kom zoo huv si xwb, yog hais haum nws siab nws li mus, yog hais tsis haum nws siab ces nws tsis nyiam mus, yog nws nyiam leej twg nws li mus nrog ntaus phooj ywg rau hos nws tsis nyiam ces nws yeej tsis nyiam ua phooj ywg rau li, nws yuav nws siab xwb,

yuav kom zoo mas nws yuav tau yoog thiab yuav lwm tus hais thiab, lwm tus los yuav tau yoog nws thiab yuav nws siab ib nrab thiab thiaj li haum los nyob ua ke tau ua txij ua nkawm mus,

txhua yam yog lub zog txhawb los ntawm leej tub leej roog, leej tab leej zag, tas mus li thiaj li nrog luag muaj koob muaj meej nto lug, yuav tau hwm tub hwm roog, hwm tab hwm zag, thiab sib hlub kom tsim nyog thiaj yuav nrog luag muaj koob meej zoo,

Tus me nyuam twg yug rau xyoo no, koj yuav tis nws lub npe mas yuav tsum muaj tus ntsiaj niam ntawv no ( Q K ) nyob rau hauv nws lub npe thiaj yuav raug raws li nws txoj hmoov uas nws coj nrog nws puag pem nywj vab los ua neeg rau hauv ntiaj teb no, thiab nws ua dab tsi thiaj yuav tau raws li nws lub siab xav,

Yug los rau Qaib xyoo no mas siav me heev, yuav tau xyuam xim txog txoj kev luag dag yus es thiaj yuav tsis muaj kev phom tshij rau yus tus kheej, Hais txog kev Mob nkeeg mas cawm seej tsis muaj txaus, vim hais tias txhua tus txoj kev pab cawm ntawd muaj tsis txaus thiab lub zog tsis loj, nws tus cawm seej ces tsuas zoo li nws thiab xwb,

Hais txog ntawm siv qaib lub zim txwv no mus yuav poj niam mas tsis zoo li, vim hais tias qaib yog ib tug tsiaj qia dub heev, nws tsuas khwv rau nws noj xwb nws yeej pub tsis tau rau lwm tus noj thiab vim siab luv heev, ces yog siv qaib lub zim txwv ces muaj ntsis yuav zoo li qaib thiab nag hos,

Hais txog ntawm kev siv Qaib lub zim txwv no mus ua lag luam mas tsis tshua muaj paj laum zoo vim lub zog me heev tsua siv lub tswv yim los ntxias luag xwb, qhov yuav poob peev ces yog luag muab kev zoo nkauj zoo nraug los ntxias koj nag hos, Ces thaum koj raug ntxias lawm ces koj cia li poob peev lawm xwb nag,
Hos hais txog kev mus ua tsov rog mas tsis muaj yeej, vim yus lub zog tab heev nres tsis taus luag lub zog qhov yuav yeej ces yuav tau siv lub tswv yim los ntxias luag es kom luag qaug yus quav xwb nkaus nawb,

Qaib. Siav me heev, hwj chim zoo, sam xeeb me, ua hauj lwm hnyav tsis tau, nws nrawm heev ua dab tsi tau sai, siab luv, chim taus heev, tsis muaj cawm seej txaus, Leej twg yus rau qaib hnub, qaib hli, qaib xyoo mas zoo tsis heev, vim coj ceev siab luv heev, qhov zoo yog siab sib xwb, sawv ntxov heev, nquag heev tiam sis zog me khwv txaus noj txaus haus xwb, kev ua tus coj noj coj ua mas yuav ua tsis tau vim yuav yog tab zag txhawb thiaj zoo yog tab zag tsis txhawb ces yeej tsis tos li os nawb.

Yuav tau xyuam xim txog kev coj noj, coj ua, vim muaj dav muaj plis coob coob heev, yuav tau saib tom ntej tom qab zoo mam ua thiab tsis raug dav thiab plis tom, thoob ntuj sia paub neej dab lus zoo, kob xwb txog rau fab keeb zim caij nyoog, feeb kev phem kev zoo rau pab pawg kev ua neej nyob thoob tsib to nrog, luag tsis paub nws twg paub ua ntej lawm os nawb,

Yus tau yeeb ncuab ces yog tus phooj ywg zoo thiab nom tswv xwb, yus yuav tau xyuam xim txog fab kev hais lus thiab kev raug luag quab yuam kom yus ua tej yam tsis zoo xwb os nawb.

Dev= Sam xeeb ntawm Dev tus yeeb yam cwj pwm coj tus kheej

Dev lub zim txwv sawv nres hnub nyob rau hli tab = 2, 14, 26, = nyob rau hli txooj = 8, 20, = Dev lub zim txwv sawv nres hlis, nres lub 2, hlis ntuj.

Dev lub zim txwv sawv nres xyoo, nyob rau cov xyoo no yog, Dev xyoo,
Dev xyoo yog 1934, 1946, 1958, 1970, 1982, 1994, 2006, 2018, 2030

Ceeb tshaj kav ntuj nrag ntawm Dev lub sam xeeb sawv coj

Muaj cua zoo thiab nws hauj sim xwb, tsis muaj kom dhau qhov uas yuav muaj tau ( xav ceem ) phom tshij dab tsi thiab.

Nyeej kav ntawm Dev lub sawm yeej pov puag raws keeb kwm

Lub xyoo no zoo heev, Neej thiab dab los yeej ntshai tas, luag lwm tus los yeej hwm yus zoo,

mus kev deb ua tau heev, siab ntev heev tsis tuag sai, ua neej nyob thaum hluas mus txog thaum laus los fab nyiaj txiag txom nyem me ntsis, siab tawv ua dab tsi los tsis nco ntshai li tiam sis yuav xyuam xim txog kev phom tshij vim muaj yeej cuab txhua txhua lub sij hawm uas sawv kev ua dej num,

fab kev plees kev yi mas zoo heev, muaj txaus siab txaus ntsws, hais txog kev phooj kev ywg mas luag ntxub thiab nyiam sib npaug zos xwb, fab kev coj noj coj ua mas yog ib tug nyiam tsoo taus heev thiab luab lim luag heev li, tiam sis muaj ntsis muaj kev hom hais lus dag sib xyaws pes daws nrog tej lus tiag.

Tus me nyuam twg yug rau xyoo no, koj yuav tis nws lub npe mas yuav tsum tis kom muaj tus niam ntawv no ( D M ) nyob rau hauv nws lub npe thiaj yuav raug raws li nws txoj hmoov uas nws coj nrog nws los rau hauv ntiaj teb no thiab nws ua dab tsi thiaj yuav tau raws li nws lub siab xav nawb.

Kev coj cwj pwm tus kheej ntawm Dev lub zim txwv txoj hmoo.

Tus zeej keeb twg yug nyob rau Dev xyoo, mas nyob rau hauv zim keeb txoj hmoo coj cwj pwm ntawm nws tus kheej, nyiam kev plees kev yi heev, nyiam hais lus luab lim luag heev, yog tsis caiv txoj kev plees kev yi ces kawg neej nyob khuam siab heev, qhov zoo yuav tau yuav lwm tus neeg lus siab thiab txwv tsis txhob yuav tus kheej lub siab xwb, yuav tau yuav lwm tus neeg lub hom phiaj thiab,

Qhov nws pheej ua yam tsis txawj txaj muag ntawd mas nws yuav tau caiv tsis txhob siv tus cwj pwm liam liam li dev ntawd, yuav tau paub txoj kev txaj muag thiab es thiaj li yuav haum tau lwm tus neeg, yuav tau txo nws tus cwj pwm txhua yam xws li hauv qab no mas thiaj yuav tsis phoj tshij rau nws tus kheej os nawb mog,
1, txwv tsis txhob mus mus kev deb heev, 2, txwv tsis txhob luab lim luag heev heev li,

Yug los rau Dev xyoo no mas siav ntev heev, txoj kev muaj teeb meem ntawm tus kheej mas yog kev phom tshij xwb, Hais txog kev mob nkeeg mas tus cawm seej nyob hauv tsev thiab cov txheeb ze thiaj yuav cawm tau xwb, yuav tau caiv txoj kev plees tiag tiag lub neej thiaj yuav tsis plam mus yog muaj txig muaj nkawm lawm nas, muaj ntsis nyiam khaws xyeem luag tug yog tsis caiv mas yuav muaj teeb meem rau txoj kev plees no heev nawb,

Ho hais txog siv dev lub zim txwv no mus yuav poj niam mas muaj tsis tshua zoo heev, vim dev yog ib tug tsiaj tsis txaj muag thiab nyiam quab yuam lwm tus heev, ces yog siv dev lub zim txwv mas muaj ntsis nyiam kev plees kev yi thiab pheej muaj ntsis tub nkeeg , thaum nquag ces nquag dhau, hos thaum nkees ces ho nkees heev, Hais txog kev ua lag luam mas kuj muaj paj laum zoo thiab feem ntau mas yog mus txeeb luag lag luam ntau xwb thiab yuav tau raws li lub hom phiaj,

Hais txog kev ua tsov rog mas kuj muaj yeej thiab Dev kuj muaj kaus tom thiab tiam sis yuav tau xyuam xim heev vim yeeb cuab coob heev yuav tau ceev faj kom zoo thiaj yuav tsis poob rau txoj kev phom tshij thiab kev yuav muaj kev nruam sim tau, thiaj tau txais txoj kev muaj txiaj ntsim muaj yeej ncoo ko, Dev. Nyob rau hauv dev xyoo no mas zoo heev khaws noj khaws haus, neej dab ntshai yus, mus kev deb ua tau heev, siab ntev nyob laus, muaj yam zoo luag tsis pub yus pom thiab tsis qhia yus. Kev ua nom ua tswv mas yeej zoo thiab tab sis yuav yog tus kheej muaj peev xwm kom txaus thiaj yuav tau os nawb. Vim luag tsis nyiam yus pes tsawg mas yuav tau xyuas kom meej tso mam nrog luag sib tw kev nom kev tswv nawb.

thaum luag yuav yus zog, luag mam pub yus noj, thiab luag mam qhuas yus, tau ua luag tub tiag npab tiag tes, luag nyiam txib yus, thaum tau noj luag tsis nco txog tias muaj yus, hais qav num mas luag cia yus saib ntau tam tus qhev xwb, lub xyoo no yuav tau caiv tsis txhob mus nrog luag haus dej haus cawv tsam luag ntaus yus, rub lub siab ntev heev yog luag muaj siab pub yus tiag yus mam yuav,

thiab muaj siab hu yus tiag yus mam mus nrog luag noj, vim tias lub xyoo no luag tsis hwm yus li, caiv txhob mus nrog luag haus dej haus cawv ib tsam luag ntaus yus, .Rub lub siab ntev kom ntev, vim lub xyoo no luag tsis hwm yus.

Yus tus yeeb ncuab ces nws yog nom tswv thiab tus phooj ywg nag os nawb, vim yus yuav raug dab ntau fab kom yus qaug quav rau luag tag ces luag mam muab yus lom lis kiag xwb os nawb.


Npua = Sam xeeb ntawm npua tus yeeb yam cwj pwm coj tus kheej

Npua lub zim txwv sawv nres hnub nyob rau hli tab = 3, 15, 27, = nyob rau hli txooj = 9, 21, = Npua lub zim txwv sawv nres hlis, yog lub 3, hlis ntuj.

Npua lub zim txwv sawv nres xyoo, nyob rau cov xyoo no yog, Npua xyoo,
Npuas xyoo yog ---1935, 1947, 1959, 1971, 1983, 1995 ,2007, 2019, 2031

Nyeej kav ntawm Npua lub sawm yeej pov puag raws li keeb kwm

Muaj mob, thaum mob yuav ras li ceeb, nrhiav neeg khaws ceeb ces zoo, yuav tau siv tshuaj ntau thiaj zoo, txhob ua siab hnyav thiaj tsis txaus txhawj.
Tus me nyuam twg nws yug rau xyoo no, koj yuav tis nws lub npe mas yuav tsum muaj tus niam ntawv no ( NP-M ) nyob rau hauv nws lub npe thiaj yuav raug raws li nws txoj hmoov uas nws coj nrog nws los ua neeg rau lub ntiaj teb no, nws ua dab tsi thiaj rau raws li nws lub siab xav os nawb.

Kev coj cwj pwm tus kheej ntawm Npua lub zim txwv txoj hmoo.

Tus zeej keeb twg yug nyob rau Npua xyoo, mas nyob rau hauv zim keeb txoj hmoo coj cwj pwm ntawm nws tus kheej,

Ceeb tshaj kav ntuj nrag ntawm npua lub sam xeeb sawv coj

Muaj cua tab tom haum rau neeg ntiaj teb, vim tshav ntuj thiab los nag hauj sim ua rau qoob loo loj hlob zoo,
Hais txog siv npuas lub zim txwv sawv kev mus yuav txij nkawm nws zoo thiab txij nkawm kuj txawj sib hlub sib hwm kuj tsis sib cav sib ceg.

Nyeej sawv ntawm npua lub sawm yeej coj cwj pwm nres

Ua neej nyob mas laus heev, tsis sem cuab yig, mus yos deb tsis ntshai, mus txog twg los luag txais tos yam li yog kwv yog tij, hais lus yuav tau xyuam xim tsam dhau ciam ces raug luag cem yus, tau ua nom ua tswv mas luag khwv rau yus noj, siab kub maj rawm muaj phooj ywg coob.

Nyeej kav ntawm Npua lub sawm yeej pov puag raws li keeb kwm

Muaj mob heev rau thaum yau, mob hnyav txaus ntshai tab sis tsis tuag, yuav tau ua neeb mus hloov ntsuj mas thiaj yuav zoo mob nruab hnub mas kho tsis nyuab hos yog mob hmo ntuj los kuj tsis nyuab vim npua yos nruab hnub hmo ntuj tib yam nkaus li thiab os nawb feem ntau yog zwm hiav thiab poob plig vim npua pw muaj chaw.

Ceeb tshaj kav ntuj nrag ntawm npua lub sam xeeb sawv coj

Huab cua muaj hauj sim khiav xwm yeem, tsis muaj ( xav ceem ) yog phoj tshij dab tsi loj rau yus,

kev ua noj nyob kuj zoo hauj sim thiab yog los nag mas nws yuav los ua kob xwb, tiam sis nws los loj heev, yog tshav ntuj mas nws kuj tshav laj ntxiag xwb, vim npua yog ib tug tsiaj nyiam chaw qhuav thiab nyiam chaw ntub ib yam nkaus.

Yug los rau Npua xyoo no mas siav ntev heev, tiam sis mas yog ib tug tsiaj nyiam yos taus heev yuav tau xyuam xim txog txoj kev phom tsij, thiab yuav tau ceev faj txog txoj kev luag ntxias yus tsa luag ua neej, zoo nkaus li luag ntxias yus nce nthab es luag ho lauj yus taw ntaiv kom yus poob nthab,

Hais txog kev muaj mob mas tus cawm seej muaj tsawg vim hais npua yog ib tug tsiaj nyiam noj tej yam khoom qias neeg thiaj hais tias cawm seej ces tsuas muaj cov neeg txheej ze thiaj yuav cawm tau xwb,

Hos hais txog kev siv npua lub zim txwv mus yuav poj niam mas khwv heev thiaj yuav zoo, npua nyiam khwv nyiam tiv tshav tiv nag, nyiam khwv rau nws noj xwb,

hos kev mus ua lag luam mas kuj muaj paj laum zoo heev, hos kev mus ua tsov ua rog mas tsis tshua muaj yeej vim yeeb cuab soj yus qab taug yus lw tas li xwb yuav tau xyuam xim saib tom ntej tom qab kom meej pem heev thiaj yuav nyab xeeb hos.

Npua: = ua neej nyob laus heev, tsis sem lub neej, Niam nyob luag ntxhi thiab txiv nyob luag nyav, mus kev deb tso siab luag tsis muaj xav ceem ( phom tshij ) dab tsi, tos luag khwv pub rau yus noj, mus txog twg luag txais tos yus zoo heev, muaj kwv luag coob

hais dab tsi ua tau li ntawd tab sis yuav tau xyuam xim tsam hais dhau luag cem yus, ua nom tswv muaj peev xwm heev, hais lus muaj yeej kuab txaus. Kev nom kev tswv mas yeej ua tau raws li nws siab xav thiab tab si yuav tau xyuam xim kom zoo vim pheej muaj neeg tshum yus lub hom phiaj tas mus li nawb.

Yus tus yeeb ncuab ces yog nom tswv thiab tus hlub hlub yus tshaj plaws nag os nawb, vim luag muaj feem ntxias yus txhua fab kom yus raug luag dag ces luag mam muab yus lom lis xwb mas yuav tau ceev faj kom zoo heev thiaj tsis raug poob mus rau txoj kev phom tshij os nawb.

Nas = Sam xeeb ntawm Nas tus yeeb yam cwj pwm coj tus kheej

Nas lub zim txwv sawv nres hnub nyob rau hli tab = 4, 16, 28, = nyob rau hli txooj = 10, 22, = Nas lub zim txwv sawv nres hlis, yog lub 4, hlis ntuj.

Nas lub zim txwv sawv nres xyoo, nyob rau cov xyoo no yog, Nas xyoo,
Nas xyoo yog --1924, 1936, 1948, 1960, 1972, 1984, 1996, 2008, 2020

Nyeej sawv ntawm Nas lub sawm yeej coj cwj pwm sawv nres

Txom nyem tsis muaj noj, tau noj ces noj loj heev, muaj lus xaiv lus xov txom, muaj zoo laj lim cwj pwm nrawm, hais lus hauv niag neeg tau zoo heev,

tab sis zog me khaws noj khaws haus xwb, muaj ntsim nyiam ( ntaus hlau txias ), mus kev deb xyuam xim ib tsam tau ev kawm thiab mag yej mag ntxiab.

Kev coj cwj pwm tus kheej ntawm Nas lub zim txwv txoj hmoo.

Tus zeej keeb twg yug nyob rau Nas xyoo, mas nyob rau hauv zim keeb txoj hmoo coj cwj pwm ntawm nws tus kheej,

Tus me nyuam twg yug rau xyoo no, koj yuav tis nws lub npe mas yuav tsum muaj tus ntsiaj niam ntawv no ( N ) nyob rau hauv nws lub npe thiaj yuav raug raws li nws txoj hmoov uas nws coj nrog nws los neeg rau lub ntiaj teb no.

Nyeej kav ntawm Nas lub sawm yeej pov puag raws li keeb kwm

Kev muaj mob hauj sim xwb, yog thaum twg mob lawm yuav tau ua neeb theej txhoj, thiab hu plig qhib thwv vim nas nyob hauv qhov xwb,

yog mob mas nws kho nyuab kawg li thiab vim nas lub zim txwv no poob rau lub chib tsis tshua zoo li vim nas yog ib tug tsiaj txhoj puab heev, nws yuav xws nkauj li nas tus cwj pwm kiag ntag.

Yug los Nas xyoo mas siav me heev, hais txog ntawm kev mob nkeeg mas tsis tshua muaj cawm seej, hais txog siv nas lub zim txwv mus yuav poj niam mas tus poj niam ntawd nyiam tub sab heev, hais kev ua lag luam yuav tau ceev faj kom zoo vim yuav muaj neeg nyiag yus os, hais txog kev ua tsov rog mas tsis muaj yeej vim nas lub hwj chim me heev, qhov zoo yuav tau siv lub tswv yim los hem luag xwb,
Nas: = noj ua tau heev, khwv npaum li cas tsis txaus noj, muaj lus xaiv heev, muaj laj lim zoo heev, coj xeeb ceem nyiam txhoj puab heev, nyiam khiav yim plawv pliag rau ub rau no, hais txog yam khoom qias, lwj tsw, nyoos siav, los yeej tsis xyeej li, yeej noj tau tag nrho, tiam sis tsis txhob khaws luag qub ib tsam mag cuam koob ces kho siab nawb,

xyuam xim txhob nrog luag sib cav sib ceg tsam luag cuab yej cuab ntxiab mag yus, thiab txhob mus ua tub sab , vim muaj ntxiab muaj yej ntau heev ib tsam ho mag ntxiab mag yej ces nyuab siab os,

Leej twg yug rau nas hnub, nas hli, nas xyoo mas yuav tau xyuam xim txog kev plees kev yi, yog tsis xyuam xim ces kawg neej tawg xwb, vim nas no yog ib tug tsiaj nyiam noj txhua yam, hais kev plees kev yi mas nws yeej tsis xyeej leej twg li, Nws tus cwj pwm ces tsuas tos tsaus ntuj es mus tho luag qub noob qoob, noob tsa, xwb, vim muaj miv, muaj plas, muaj yej, muaj ntxiab, ntau heev yog taug tsis ncaj kab ces kawg poob ua luag zaub luag mov xwb, thiab muaj tsov muaj plis coob heev yog tsis xyuam xim ces kawg ua plis zaub os,

Feem ntau neej puas yog kev plees kev yi xwb yog tswj kev plees kev yi ces lub cuab lub yig yeej muaj nrog luag ua xwb, qhov tseeb lub neej puas ces yog nws siv lub me tswv yim nrawm nrawm heev ntawd mus nyiag noj nyiag haus, tos luag hnov ces nws twb tsau plab lawm xwb,

Lub me tswv yim ntawd ces yeej tsis muaj txog hnub yuav kav laus li vim tsuas nyiag luag noj tag ces ho nyiag dua xwb, qhov txhoj puab mas txhob heev rau txoj kev plees kev yi thiab, vim tus hauv tsev ntev tsis taus rau nws li lawm los nws yeej tsis quav ntsej tus hauv tsev,

Qhov tseeb nws tus kheej yuav tau txwv nws tus kheej tsis txhob siv nws lub me tswv yim nrawm nrawm ntawd mus nyiag noj nyiag haus heev thiab txhoj txhoj puab, pheej ko nkawv nki yam niag tseg tsis tau li, yuav tau txwv tiag tiag ces neej zoo xwb,

Yog tus kheej tsis pab tswj tus kheej ces pab tsis tau lawm, thaum kawg ces kawg poob mus khaum qab zeb qab ca xwb tiag, ces thaum ntawd muaj plis muaj plas, coob li os, xyov yuav li cas lawm lauj, nawb mog, hais txog kev ua nom ua tswv mas ua tsis tau nawb vim noj loj heev lub zog me heev mas thiaj yuav ua tsis tau nom tswv os nawb.

Yeeb ncuab mas muaj coob heev, yus yuav tau xyuam xim heev txog txoj kev nrhiav noj nrhiav haus, kev tawm rooj, kev noj nyob tib si vim yus tus yeeb ncuab mas nyob txhua txhua thaj chaw li os nawb.

Nyuj = Sam xeeb ntawm nyuj tus yeeb yam cwj pwm coj tus kheej

Nyuj lub zim txwv sawv nres hnub nyob rau hli tab = 4, 17, 29, = nyob rau hli txooj = 11, 23, = Nyuj lub zim txwv sawv nres hlis, yog lub 5, hlis ntuj.

Nyuj lub zim txwv sawv nres xyoo, nyob rau cov xyoo no yog, Nyuj xyoo,
Nyuj xyoo yog - 1925, 1937, 1949, 1961, 1973, 1985, 1997, 2009, 2021

Ceeb tshaj kav ntuj nrag ntawm nyuj lub sam xeeb sawv coj nres

Huab cua tawv, yog tshav ntuj mas tshav kub heev yog los nag mas los tas hnub tsis paub tu tab sis los tsis loj heev vim nyob rau hnub no nyiam tshav ntuj ntau dua.

Kev coj cwj pwm tus kheej ntawm Nyuj lub zim txwv txoj hmoo.

Tus zeej keeb twg yug nyob rau Nyuj xyoo, mas nyob rau hauv zim keeb txoj hmoo coj cwj pwm ntawm nws tus kheej,

Nyeej sawv ntawm nyuj lub sawm yeej coj cwj pwm sawv nres

Lub zog loj heev, neej thiab dab los yeej ntshai, tiam sis yog sib cav sib ceg mas tsis muaj leej twg cheem tau li.

Raug neeg pej kum luab lim heev, Nom tswv nyiam heev vim nyuj muaj kub pab nrau, muaj chov fom los ntawm tej laus qhua ntxa yuav tau ua neeb mus kho, yuav tau ua nom ua tswv, yus khwv los ntawm muaj peev xwm xwb. Noj tsis txob hnav los tsis txhawj vim nws muaj lub laj lim tswv yim zoo khwv txaus nws noj nws haus lawm tsis txhawj dab tsi li.

Tus me nyuam twg yug rau xyoo no, koj yuav tis nws lub npe mas yuav tsum muaj tus ntsiaj niam ntawv no ( NY G ) nyob rau hauv nws lub npe thiaj yuav raug raws li nws txoj hmoov uas nws coj nrog nws los ua neeg rau hauv lub ntiaj teb no mas nws ua dab tsi thiaj yuav tau raws li nws siab xav nawb.

Yug los Nyuj xyoo mas siav loj heev, hais txog ntawm kev mob nkeeg mas cawm seej muaj thiab, hais txog siv nyuj lub zim txwv mus yuav poj niam mas, tus poj niam ntawd nquag heev thiab zoo kawg,
hais txog kev ua lag luam mas yuav nqis peev kom ntau thiaj yuav tau paj laum raws siab xav, hais txog kev mus ua tsov rog mas nws kuj muaj yeej thiab vim nyuj no zog loj thiab nyuj muaj kub nrau hos

Nyuj: = lub zog loj heev ua nom ua tswv los luag hwm laj fab toob fab koj muaj peev xwm tswj tsav tau, yog siv lub zog xwb, thiab tawv ncauj heev nws yuav nws siab xwb, tab sis hma thiab tsov coob heev, ceev faj tsis txhob tawg npoj, thiab tsis raug luag noj, tsis txhob tawg pab thiaj tsis raug luag cab, yuav tsum hwm tswv thiaj tsis raug tsov kwv nawb mog, yog yus tau nom mas yuav tau hlub cov siv sawv thiab xyuam xim tsam luag muab yus chaws ntswg, ua dab tsi tsis tos luag lwm tus li yeeb ncuab yog tus coj yus, xyuam xim thiaj tsis raug coj hlua.

Feem ntau yog yug rau nyuj xyoo mas tawv heev, feem ntau nws tsis tshua yuav leej twg hais li nws tsuas yuav nws tus kheej siab xwb, hais tsis tshua tau vim nyuj yog ib tug tsiaj muaj zog heev thiab, tsis ntshai leej twg li nws muaj kub zoo nws tsuas yog xav peem li nws nyiam xwb,

Nyob rau nyuj hnub, nyuj hli, nyuj xyoo mas ua dab tsi los kuj tau raws li lub siab xav thiab vim nyuj yog ib tug tsiaj siab tawv, tsis ntshai, nyob tau chaw qhuav, nyob tau chaw ntub, noj taus zaub qhuav, noj taus zaub nyoos mas nyuj yeej yog ib tug tsiaj muaj peev xwm heev

Koj nqis peev loj yeej tau ntau, koj peev me tau me thiab tiam sis yuav tau ceev faj txog fab tswv kav haiv thiab mus rau fab vaj huam, ua dab tsi yuav tau poo npoj xwb thiaj yuav zoo nawb,

Yog tsis ceev faj es pheej lam tawg npoj sais raug luag noj, yog tawg pab ces yeej raug luag cab, vim koj ib txwm yeej muaj hlua khiab hlua ntswg, thiab luag yeej soj koj qab taug koj lw txhua lub caij nyoog os nawb,

Yog koj yug rau nyuj lub zim keeb lawm koj yuav tau mloog niam mloog txiv lus, yuav tsum nyob nraim niam txiv lub hwj chim kav coj, yog koj tsis mloog es koj pheej lam mloog luag haub, sais feem ntau kawg poob ua luag zaub, yog tsis mloog ces luag tuav tau koj hlua khiab hlua ntswg ces kawg tau cab luag laub, thiab laij luag liaj, thaum ntawd tsis muaj leej yuav pab tau os nawb,

Qhov tseeb yog yug rau nyuj lub zim keeb ces tsis txhob tawv tawv xwb thiaj yuav pab tau koj raws li koj lub siab xav yuav tau mloog lwm tus hais thiab qhia yus es yus thiaj muaj npoj yaig txhawb nqa yus txhua txhua lub caij nyoog,

hais txog kev ua nom ua tswv mas kuv zoo thiab tab sis yuav tau txhob yuav nws siab xwb, yuav tau yuav tag nrho ib tsoom npoj yaig siab mas thiaj yuav tsis plam meej mom vim yus tus kheej yeej tawv txaus tiam sis yeeb ncuab tseem tos yus kev tshuav thiab os nawb.

Yeeb ncuab ces yog yus cov phooj ywg thiab nom tswv xwb, vim hais tias txoj kev sib txeeb vaj huam thiab kev coj noj coj ua, txog kev nam nrim xwb, yus yuav tau xyuam xim txog txoj kev raug luag dag noj dag haus thiab kev ntxiam yus tawg npoj xwb os nawb.

Tsov =Sam xeeb ntawm tsov tus yeeb yam cwj pwm coj tus kheej

Tsov lub zim txwv sawv nres hnub nyob rau hli tab = 6, 18, 30, = nyob rau hli txooj = 12, 24, = Tsov lub zim txwv sawv nres hlis, yog lub 6, hlis ntuj.

Tsov lub zim txwv sawv nres xyoo, nyob rau cov xyoo no yog, Tsov xyoo,
Tsov xyoo yog - 1926, 1938, 1950, 1962, 1974, 1986, 1998, 2010, 2022

Nyeej kav ntawm Tsov lub sawm yeej sawv nres

kev mob mas yuav mob loj, yuav tau ua neeb fab laj thiaj zoo, vim poob rau lub nyeej thawj mob lawm, yog mob mas mob rau kev txhaum txheej thiab muaj chov fom thiab muaj neeg phem siv xwb los yog muaj vij npog xwb.

Tus me nyuam twg nws yug rau xyoo no, koj yuav tis nws lub npe mas yuav tsum muaj tus ntsiaj niam ntawv no ( Ts X ) nyob rau hauv nws lub npe thiaj yuav rau raws li nws txoj hmoov uas nws coj nrog nws los ua neeg rau hauv ntiaj teb no.

Kev coj cwj pwm tus kheej ntawm Tsov lub zim txwv txoj hmoo.

Tus zeej keeb twg yug nyob rau Tsov xyoo, mas nyob rau hauv zim keeb txoj hmoo coj cwj pwm ntawm nws tus kheej,

Ceeb tshaj kav ntuj nrag ntawm Tsov lub sam xeeb sawv nres

Huab cua loj heev, los nag loj muaj cua nrog, tshav ntuj kub muaj cua nplawm ntws tas mus li xwb raws qee suam xwb vim suam twg muaj nag ces yeej muaj cua hos suam tshav ces tshav laj ntxiag xwb tiag.

Nyeej sawv ntawm Tsov lub sawm yeej coj cwj pwm sawv nres

Sawm yeej ntawm tso loj thiab nyaum heev, txhua yam ntshai thiab hwm tsov lub hwj chim nyeej sawm, ua qoob loo zoo tsis xwm yeem, nws yuav zoo qee suam raws li tsov lub yeeb yam, thaum tshaib tsis muaj noj li thaum tau noj ho muaj ntau heev, nyiam mus kev deb, muaj lus xov txom heev, tau ua tus coj vim hmoov los ntawm tab zag txoj hmoov txhawb xwb.

Nyeej sawv ntawv Tsov lub sawm yeej pov puag li keeb kwm

Muaj mob mas mob heev, zoo sai, hais txog txoj kev qaug, feem ntau yog luag tua, txawm tsis tuag los yuav raug sab heev, thiaj muab piv rau zim keeb txoj hmoo raws li tsov tus cwj pwm.

Nyeej kav ntawm Tshov lub sawm yeej sawv nres

Huab cua loj heev, tiam sis muaj tsawg heev, tab sis ua rau txaus ntshai, vim muaj thaug twg ces yog cua daj cuab dub muaj zog heev, yog los nag yuav tsum muaj cua los nrog tas mus li xwb thiab muaj xob nroo nrog tas mus li xwb,

Zoo raws li tsov lub hwj chim coj cwj pwm kiag ntag thiab, ho tshav ntuj mas kuj ho tshav qee suam xwb tiam sis, kuj muaj tshav kub heeb thiab vim zoo tsis xwm yeem li

Ua qoob loo los yeej zoo raws nraim li tsov lub yeeb yam xwb vim hwj chim loj tiam sis hmoov phem heev,

Yug los rau Tsov xyoo mas siav loj heev, hais txog kev mob nkeeg mas tsis tshua muaj cawm seej vim tsov nrhiav noj hmo ntuj xwb yuav tau ua neeb yav hmo ntuj thiaj yuav mus raws tau tus ntsuj duab ntsuj hlaus, hais txog kev ua lag luam mas nws tau tsis xwm yeem thaum tau cem tau ntau hos thaum tsis tau ces tseem poob peev thiab vim luag hais tias ua tsov tsaib tsov tsau xwb no, hos hais kev ua tsov ua rog ces muaj yeej ntau xwb vim tsov lub hwj chim loj heev , pib thaum twg ces yeej thaum ntawd xwb,

Tiam sis tsis txhob siv hwj chim los quab yuam luag heev vim yus tus kheej muaj caij zoo muaj caij phem thiab feem ntau yuav yog nquag thiab siv zog thiaj yuav tau noj ywj siab,

Tsov: = sawm yeej loj nyaum heev, txhua yam ntshai yus tab sis muaj noj muaj haus tsis xwm yeem, thaum tau noj ces noj seem thaum tshaib mas muab tsis tau qhov twg los li, vim hais tias ua tso tshaib tso tsaus xwb,

tsis koom npoj tsis muaj kwv luag thiab nyob tsis muaj chaw, mus kev deb tas li xwb, yuav tau ua nom yog tab zag txhawb nqa yus xwb, hais lus hem moj, tso khav thawj luag ntshai heev, tsuas zoo rau hem moj xwb,

hais txog kev ua nom ua tswv mas kuv zoo thiab vim muaj hwv cheej loj tiam sis txoj hmoov zoo tsis xwm yeem muaj ntsis txom nyem fab nyiaj txiag thiab kev vaj huam, vim luag muaj ntsis tsis xav txhawb yus, vim yus muaj ntsis khav theeb heev, ua rau luag muaj kev tu siab txog fab meej mom me ntsis xwb.

Yus tus yeeb ncuab mas feem ntau yog phooj ywg thiab nom tswv nag os, vim txoj kev sib txeeb vaj huam ces luag nrhiav kev cov nyom los tshuam yus kom yus plam txoj kev zoo ntawm yus mus kom tag xwb tiag.

Luav = Sam xeeb ntawm Luav tus yeeb yam cwj pwm coj tus kheej

Luav lub zim txwv sawv nres hnub nyob rau hli tab = 7, 19, = nyob rau hli txooj = 1, 13, 25, = Luav lub zim txwv sawv nres hlis, yog lub 7, hlis ntuj.

Luav lub zim txwv sawv nres xyoo, nyob rau cov xyoo no yog, Luav xyoo,
Luav xyoo yog -1927,1939, 1951, 1963, 1975, 1987, 1999, 2011, 2023

Nyeej sawv ntawm Luav lub sawm yeej coj cwj pwm sawv nres

Zoo heev li tab sis qeeb siab, caum tsis cuag luag lwm tus, nom tswv nyiam, ua dab tsi luag pab yus txhawb nqa, txom nyem fab nyiaj txiag, tus neeg yuav muaj nws yuav nws siab xwb.

Nyeej kav ntawm Luav lub sawm yeej pov puag sawv nres

nws muaj nyeej mob nyeej nkeeg yog mob lawm yuav tau kub siab kho tiag tiag mas thiaj zoo, vim nws yuav mob laug niaj laug xyoo ntev heev thiab pheej mob qaug txaj xwb ,

Kev coj cwj pwm tus kheej ntawm Luav lub zim txwv txoj hmoo.

Tus zeej keeb twg yug nyob rau Luav xyoo, mas nyob rau hauv zim keeb txoj hmoo coj cwj pwm ntawm nws tus kheej,

tiam sis nws tsis tuag yooj yim vim luav yog ib tug tsiaj pw xyoo thiab pw hnub mas yuav tau kho tiag xwb. Tus me nyuam twg yug rau xyoo no, koj yuav tis nws lub npe mas koj yuav tsum muaj tus niam ntawv no ( L- R- K ) nyob rau hauv nws lub npe thiaj yuav raug raws li nws txoj hmoov uas nws feeb coj nrog nws los ua neeg rau hauv ntiaj teb no.

Ceeb tshaj kav ntuj nrag ntawm Luav tus cwj pwm pov puag
Huab cua tsis muaj li vim yog tshav ntuj mas yuav tshav kuj heev hos los nag ces kuj los hauj sim xwb vim Luav yog ib tug tsiaj nyiam nyob chaw qhuav xwb

Yug los rau Luav xyoo mas siav ntev heev, hais txog kev mob nkeeg mas cawm seej kuj muaj thiab tiam sim nyiam mob laug niaj laug xyoo heev, hais txog siv Luav lub mus yuav poj niam mas zoo heev vim siab ntev hais lub zoo thiab nquag heev, hos hais txog kev ua lag luam mas muaj paj laum qeeb heev, hais txog kev ua tsog rog mas kev muaj yeej yuav tau siv sij hawm ntev los nrog luag sib cuam tshuam thiaj yuav yeej, yuav tau caiv kev plees kev yi tsis txhob nrog luag lam zij ncaug ntxi muag kiag thiaj yuav nyob nyab xeeb nawb mog,

Luav: = Nyob rau hauv luav xyoo mas muaj hwj chim zoo heev, tab sis qeeb siab ua dab tsi caum tsis cuag luag lwm tus, nom tswv nyiam yus ua dab tsi muaj tus pab xwm yeem, tab sis txom nyem fab nyiaj txiag me ntsis,

feem ntau nws yuav nws siab lawm xwb, thaum luag yuav yus zog luag mam pub yus noj thiab qhuas yus, tau ua luag tub tiag npab tiag tes, luag nyiam txib yus heev thaum noj luag tsis nco txog yus pes tsawg thiab cia yus saib nyob yam plhws tes plhws taw qhuav nyob do pes dus xwb,

Luav hnub, luav hli, luav xyoo mas ua dab tsi los yeej caum tsis cuag luag vim luav yog ib tug tsiaj qeeb siab heev, kev ua lag luam los tau tsis xwm yeem, hos sawv kev mus yuav poj niam los yeej tsis zoo thiab vim siab qeeb txoj hmoov me heev, hais txog cawm seej mas muaj thiab tab sis yuav qeeb heev thiaj yuav tiav lub luag dej num tau,

Yuav tau xyuam xim txog fab kev txhoj puab vim hais tias muaj ntsis phob fab me ntsis, yog tsis xyuam xim sais mag qhaub mag hlua sai heev, thiaj ceeb toom rau koj tus uas yug rau xyoo no kom paub meej es koj thiaj yuav zam tau dhau os nawb,
Txhua tus yeeb ncuab uas taug koj qab thiab soj koj lw ntawd mas koj yeej tsis muaj lub cib fim yuav yeej nws li vim hais tias lub zog me heev, thiab koj qeeb heev, yog luag pom koj thaum twg ces kawg ua luag zaub luag mov xwb, qhov yuav zam tau dhau ntawm koj tus yeeb ncuab ces tsuas yog mloog niam mloog txiv lus xwb es tsis txhob tawg npoj, thiaj tsis raug luag noj, tsis txhob raug luag haub thiaj tsis poob ua luag zaub xwb tiag,

Qhov luag tsis nyiam koj mas tsuas yog li no xwb, ib yog koj qeeb siab, ob yog koj pheej noj luag tes xwb, peb yog qhov tias koj pheej tos luag sawv kev ua ntej xwb, plaub yog qhov koj tsis kam ntaus lub thawj, ces luag thiaj tsis nyiam koj li kiag es luag tau noj luag thiaj tsis nco qab hais tias muaj koj no nas,

Hais txog fab kev plees kev yi mas koj pheej nyiam muaj tug xwb ces luag muaj ntsis ntxub koj heev, vim thaum nyob nrog luag nyob mas koj lub siab xav koj ib yam lawm, hos thaum luag nyob nrog koj mas koj tsis kam luag txav ze ces luag tsis nyiam koj li os nawb,

Hais txog fab kev ua nom ua tswv mas ua tsis tau nawb vim luav lub zog me thiab qeeb heev, yog ua nom ua tswv mas yuav tsis muaj hwv cheej loj ces yuav ua tsis tau os nawb. Yuav tsum ua luag npom xwb mas thiaj yuav zoo os nawb.

Hais txog yus tus yeeb ncuab mas muaj coob heev, vim nom tswv kuj yog yeeb ncuab thiab os, vim yus qeeb heev ces luag tsis nyiam yus heev, luag tsuas nyiam yus thaum muaj txoj kev zoo xwb, thaum yuav noj yuav haus ces luag tsis nyiam yus lawm os nawb.

Zaj = Sam xeeb ntawm Zaj tus yeeb yam cwj pwm coj tus kheej.

Zaj lub zim txwv sawv nres hnub nyob rau hli tab = 8, 20, = nyob rau hli txooj = 2, 14, 26, = Zaj lub zim txwv sawv nres hlis, nres lub 8, hlis ntuj.

Zaj lub zim txwv sawv nres xyoo, nyob rau cov xyoo no yog, Zaj xyoo,
Zaj xyoo yog 1928, 1940, 1952, 1964, 1976, 1988, 2000, 2012, 2024

Ceeb tshaj kav ntuj nrag ntawm Zaj lub sam xeem sawv coj.

Huab cua zoo haum nyiam thiab, yog los nag no mas nws yuav los tas hnub ho yog tshav ntuj no nws ho yuav tshav ntau hnub heev, thiab nyob tau txias zias zoo hauj sim thiab os.
Kev coj cwj pwm tus kheej ntawm Zaj lub zim txwv txoj hmoo.

Tus zeej keeb twg yug nyob rau Zaj xyoo, mas nyob rau hauv zim keeb txoj hmoo coj cwj pwm ntawm nws tus kheej,

sawv ntawm zaj lub sawm yeej coj cwj pwm sawv nres

Muaj hwj chim zoo, muaj qhov zoo yeej txeem kawg li ua dab tsi tau raws nraim li lub siab xav tseg thiab, mus txog qhov twg los luag nyiam ib yam li keeb kwv keeb tij, yuav tau ua tus coj thiab muaj puam fab zoo heev txog fab hais lus thiab siv hwj chim los luag tsis mom txheej li thiab ua dab tsi los muaj yeej ntau dua qhov puas tsuaj thiab nawb.

Tus me nyuam twg yug rau xyoo no, koj yuav tis nws lub npe mas yuav tsum muaj tus ntsiaj niam ntawv no ( Z-G ) nyob rau hauv nws lub npe thiaj yuav raug raws li nws txoj hmoov uas nws coj nrog nws los ua neeg rau lub ntiaj teb no.

Yug los rau Zaj xyoo no mas siav loj heev, hais kev mob nkeeg mas cawm seej muaj coob, hais txog sib Zaj lub zim txwv mus yuav poj niam mas nyiam siv nyiaj loj heev, nyiam lus zoo ntau dua lus phem, ua neeg nyob muaj txoj hmoov zoo heev txog rau fab khwv nyiaj khwv txiaj, hais txog kev ua lag luam mas yuav tau nqis peev ntau los kuj tau ntau thiab vim Zaj lub cev ces yog nyiaj thiab kub xwb,

hais kev ua tsov ua rog mas zoo heev muaj yeej ntau xwb vim hais tias luag hnov yus lub npe xwb ces luag twb khiav lawm,

Zaj: Nyob rau hauv zaj xyoo mas muaj hwj chim loj heev, ua tau nom tswv coj noj coj ua, ua dab tsi tau raws li lub siab xav,

mus txog qhov twg los luag txais tos yus yam keeb kwv keev tij, muaj puam fab zoo heev, yog tau ua tus coj mas cov uas yau dua yus nyob ntawm yus xub ntiag yeej hwm txhua txhia leej thiab txhua tus.

Nyob rau zaj hnub, zaj hli, zaj xyoo, mas tawv heev, siab nyhav heev hais tsis mloog li, txib tsis tshua tau vim nws yuav mus ces sawv tsees mus kiag xwb hos tsis mus ces yeej tsis sawv taw li nag, yog leej twg yug rau xyoo no mas yuav tau xyuam xim txog fab kev siv nyiaj txiag, vim khwv tau ntau siv ntau thiab,

Kev noj kev nyob muaj ntsis muaj teeb meem rau kev siv nyiaj txiag xwb ho kev ua nom ua tswv mas zoo heev, luag hwm yus txhua fab, hos kev ua lag ua luam mas zoo heev vim zaj lub cev yog nyiaj yog kub xwb, plig nyiaj plig kub nyob nrog nraim nws txhua lub caij lub nyoog hos,

Hais txog kev ua tsov ua rog mas zoo heev, vim luag hnov yus lub npe xwb luag twb khiav lawm tag, hais txog kev yuav poj yuav sev mas zoo tsis tshua heev, vim nyiam siv luam thuam, noj luam thuam heev, hais txog tes dej tes num mas muaj ntsis qeeb siab xwb, thiab siab muaj ntsis nyhav xwb, khwv me kuj tau me, khwv ntau kuj tau ntau, thiab tsuas yog tsis tshua txawj txuag xwb
es thiaj tau ceeb toom rau tus uas yug rau zaj xyoo los yog siv zaj lub zim keeb tsaws tes dej num xwb os nawb, Nyob rau zim keeb kev coj noj coj ua mas kuj coj tau nyiam thiab coj txias feem ntau, yog thaum ceev mas ceev dhau, hos thaum txias mas dhau, thaum kub mas ho muab kub dhau ciam, tias sis luag kuj yoog tau thiab, muaj phooj ywg tsawg, feem ntau raug phooj ywg rau tej tus uas hlub nws xwb,

Leej twg yug rau xyoo no tsis nyiam poo npoj pes tsawg, nws nyiam nyob ib leeg ntau dua, nws txuag khoom siv heev, khuv xim txhua yam yog nws tug siab dav, siab dawb heev pub tau rau luag noj txaus, thaum luag tau noj lawm nyiam txib luag lub zog heev,

Hais txog fab kev ua nom ua tswv mas zoo heev vim hais tias zaj lub zog loj thiab muaj hwv cheej loj, yog yus ua nom ua tswv ces luag tsuas muaj hwm yus xwb thiab txhawb yus xwb os nawb.

Yus tus yeeb ncuab ces yog tib tug uas loj thiab siab tshaj yus xwb, yus yuav tsum tsis txhob pub yus lub hom phiaj rau tus nom tswv uas yog txheej siab tshaj yus ntawd paub ces yus yeej tsis muaj yeej ncuab li os nawb.

Nab = Sam xeeb ntawm nab tus yeeb yam cwj pwm coj tus kheej[/b]

[b]Nab lub zim txwv sawv nres hnub nyob rau hli tab = 9, 21, = nyob rau hli txooj = 3, 15, 27, = Nab lub zim txwv sawv nres hlis, nres lub 9, hlis ntuj.

Nab lub zim txwv sawv nres xyoo, nyob rau cov xyoo no yog, Nab xyoo,
Nab xyoo yog 1929, 1941, 1953, 1965, 1977, 1989, 2001, 2013, 2025

Nyeej kav ntuj nrag ntawm nab lub sawm yeej pov puag

Huab cua muaj xwm yeem, Tab tom ua rau poob loo zoo los nag kuj los hauj sim thiab los zoo xwm yeem cua tuaj txias zias xwb ua rau neeg nyiam.

Kev coj cwj pwm tus kheej ntawm Nab lub zim txwv txoj hmoo.

Tus zeej keeb twg yug nyob rau Nab xyoo, mas nyob rau hauv zim keeb txoj hmoo coj cwj pwm ntawm nws tus kheej,

Nyeej sawv ntawm nab lub sawm yeej coj cwj pwm sawv nres

Zoo kav tsis ntev, muaj txaus noj txaus haus xwb tsis muaj seem li, tau noj , noj tsau heev, hais lus tsis tshua haum kwv luag, xav ua ib tug kheej xwb, Yuav tau xyuam xim tsam raug luag ntaus.

Tus me nyuam twg nws yug rau xyoo no, koj yuav tis nws lub npe mas yuav tsum muaj tus ntsiaj niam ntawv no ( N- G ) nyob rau hauv nws lub npe thiaj yuav raug raws li nws txoj hmoov uas nws coj nrog nws los ua neej, nws dab tsi thiaj tau raws nws siab nyiam thiab

Yog muaj mob yuav tau theej txhoj thiab txog mov tus plig mus poob rau hiav looj teb hiav siv chaw lawm, muaj kev thawj thiab thawj thw, mob laug caij laug nyoog, laug niaj laug xyoo, yuav tau siv sij hawm ntev kho thiaj li zoo.

Yug los rau Nab xyoo no mas siav ntev heev, hais txoj kev muaj mob mas cawm seej tsis tshua muaj vim nab nyob qhov ntau xwb mas feem ntau yuav tau sib zog heev thiaj yuav kho tau, ua neeg yug rau xyoo no mas tsis nyiam phooj ywg coob, muaj hmoov khwv nyiaj khwv txiaj, ua neeg nyob mas nplaum heev, lwm tus vam khom tsis tshua tau,

hais txog siv Nab lub zim txwv mus yuav poj niam mas tsis tshua zoo vim nws tsis yuav leej siab li nws tsuas ua li nws lub siab xav xwb, hos hais kev mus ua lag luam mas zoo heev,
vim Nab lub cev yog npib nyiaj npib kub xwb, mus thaum twg tau noj thaum ntawd, nqis peev ntau los yeej tau hos nqis peev me los yeej tau,

hos hais txog kev ua tsov rog mas muaj yeej thiab vim hais tias nab yog ib tug tsiaj nplua thiab ntaug heev nrawm thiab ceev heev,

Nab: Nyob rau hauv nab lub xyoo no mas kev zoo kav tsis ntev, yeeb vim hais tias nab yog yam tsiaj uas noob neej thiab noob tsav nyob rau ntiaj teb yeej tsis nyiam nab li.

Yuav tsum nyob hauv tsev ntau xwb txhob mus yos kev deb thiab tsis txhob tuam yim ua tej yam uas nyob chaw do ib tsam raug luag ntaus.

Khwv txaus noj txaus hauv xwb, Thaum tau noj kuj tsau heev thaum tshaib mas tshaib heev. Vim tsis nyiam khwv khaws cia li tsuas nco txog khwv rau hauv lub qhov ncauj xwb Hais lus tsis haum lwm tus li thiab nyob tsis muaj kwv luag li,

Hais txog kev ua nom, ua tswv, mas luag tsis txhawb yus li vim tsis muaj phooj ywg coob, hais txog kev ua lag ua luam mas zoo heev, vim plig nyiaj plig kub nyob nrog nraim nws txhua lub ciaj, hais txog fab kev ua tsov, ua rog mas, kuj muaj thiab vim luag yeej ntshai yus heev thiab, yuav ceev faj ib tsam luag ho txiav tau yus ko tw xwb,

Hais txog kev yuav poj, yuav sev, mas vim qus heev, yuav tau npliag tas mus li vim nws nplua thiab ntaug heev, thiab nrawm heev, es nws tsis tshua nyiam hais, thiab tsis tshua nyiam qhia, yuav tau ywj nws ntau dua,

Keeb coj noj, coj ua mas tsiv heev, thiab nyiam siv hwj chim los hem luag ntau dua, thaum txias mas txias dhau lawm, thaum kub mas kub dhau lawm vim nws lub siab zoo thiab kob xwb heev,

Laj lim tswv yim mas ntse tshaj plaws feem ntau ntawm kev nruam sim mas yog raug luag txov yus xwb, mas yuav tau ceev faj txog ntawm tus yeeb ncuab soj yus qab taug yus lw ntawd xwb, tsis muaj kev phom tshij dab tsi li os nawb mog,

Hais txog fab kev ua nom ua tswv mas kuj zoo thiab tab sis vim yus yuav yus tus kheej xwb ces ua rau luag tsis nyiam txhawb yus li, qhov zoo heev mas yus tsuas sawv kev los rau txoj kev ua lag luam xwb mas thiaj yuav zoo tshaj rau yus lub neej lawm yav pem suab os nawb.

Yus tus yeeb ncuab ces twb yog nom tswv nag, yus yuav tau xyuam xim txog kev tawm rooj thiab kev khiav dej num txhua yam os nawb, vim luag yeej tsis nyiam yus thiab luag tsuas cem thiab ntxub yus xwb os nawb.

Nees = Sam xeeb ntawm nees tus yeeb yam cwj pwm coj tus kheej

Nees lub zim txwv sawv nres hnub nyob rau hli tab = 10, 22, = nyob rau hli txooj = 4, 16, 28, = Nees lub zim txwv sawv nres hlis, nres lub 10, hlis ntuj.

Nees lub zim txwv sawv nres xyoo, nyob rau cov xyoo no yog, Nees xyoo,
Nees xyoo yog 1930, 1942, 1954, 1966, 1978, 1990, 2002, 2014, 2026

Ceeb tshaj kav ntuj nrag ntawm nees lub sam xeeb sawv coj.

Huab cua muaj hauj sim xwb, muaj cua txias tsis sov tab tom haum neeg ntiaj teb lub siab nyiam ua rau xwm yeem laj ntxiag, Vim nees yog ib tug tsiaj uas nyiam nyob chaw qhua ntau dua thiaj yog qhov zoo luag nyiam yus heev.

Yog poob rau nees lub zim txwv lawm yuav tau kub siab tiam sis hnub no nws kuj zoo vim tus neeg zoo yog tus yuav pab koj xwb,

Kev coj cwj pwm tus kheej ntawm Nees lub zim txwv txoj hmoo.

Tus zeej keeb twg yug nyob rau Nees xyoo, mas nyob rau hauv zim keeb txoj hmoo coj cwj pwm ntawm nws tus kheej,

Nyeej sawv ntawm nees lub sawm yeej coj cwj pwm sawv nres

Nees muaj sam xeeb heev vim nees pab lis qav num, muaj laj lim txaus ua taus nom tswv, Siab ncaj ncees kob xwb, Nyiam kev sam hwm koob hmoov, nyiam fab kev lag luag ntau tshaj dua, siab sib heev thiab nquag heev, txawj xav siab ntev zoo.

Tus me nyuam twg nws yug rau xyoo no, koj yuav tis nws lub npe mas yuav tsum muaj tus niam ntawv no ( N M ) nyob rau hauv nws lub npe thiaj yuav raug raws li nws txoj hmoov uas nws coj nrog nws ua neeg nyob

Nyeej kav ntawm nees lub sawm yeej pov puag raws li keeb kwm

Muaj mob hauj sim xwb tab sis tau mob lawm kho nyuaj vim lub hwj chim nees, dab nees txaij nees kuas,
yog cua los txeem tsev, yuav tau ua neeb xa cua thiaj yuav zoo, yuav tau ua neeb nyav heev vim nees hnub ces muaj hwj chim phem rau kev muaj mob, yuav kho nyuab heev, yuav tau mob siab kho tiag tiag thiaj yuav zoo tau rov los, Yug los rau Nees xyoo no mas siav loj heev, hais txog kev mob nkeeg mas tsis tshua muaj cawm seej vim hais tias Nees lub zim txwv no muaj ntsis phem heev, yuav tau caiv tsis txhob nrog luag ntaus kev plees, yog tsis caiv ces muaj ntsis plam neej, kev luag yaum yus ceev faj heev, ib tsam raug luag sam xauv rau qhov ncauj nawb,

Vim muaj vij dab vij npog loj los paug rau hauv tsev mas yuav tau tsawv neeb tuaj ua thiaj yuav tau hos lam tau lam hu xwb mas tsis tshua haum nawb, Hos ho siv Nees lub zim txwv no mus yuav poj niam mas zoo heev vim tus poj niam ntawv nyiam nquag thiab nyiam zoo heev thiab coj cwj pwm los haum tub haum roog, haum niam haum txiv thiab haum nom haum tswv vim hais tias Nees yog ib tug tsiaj nom tswv nyiam heev,

Hais txog kev ua lag luam mas tsis tshua zoo vim hais tias Nees no nws ev ib nras mas Nees tau noj ib tshob xwb, kev nqis peev ntau thiab tsawg los yeej poob peev xwb, qhov zoo ces tsis txhob ua lag luam xwb,

Hais txog kev ua tsov ua rog mas muaj yeej thiab vim nees yog ib tug tsiaj luag siv los ntaus tsov ntaus rog, kev muaj yeej mas los ntawm yus lub peev xwm,

Txawm siv zog loj zog me los yeej muaj yeej ntau vim Nees yog ib tug tsiaj khiav ceev thiab khiav nrawm heev tsis muaj leej twg yuav caum tau qhov tseeb ces yuav tau tsis txhob mloog luag ntxias xwb ces yeej muaj txoj hau kev tau txais txiaj ntsim xwb,

Nees: Nyob rau hauv nees xyoo no mas zoo heev yus mus txog qhov twg los luag nyiam heev.yeeb cim yog nees lub zog muag thiab mloog lus raws li luag txib nws, siab ntsws maj rawm tsis tos leej twg txhib.

Ncaj ncees kob xwb nyiam kev sam hwm koob hmoov. Tsis nyiam ua noj ua haus nyiam ua lag luam nrhiav noj ntawm lub tswv yim. Ev nra ua tau heev nyiam kev pheej xeeb. Muaj mob kho nyuaj vim muaj hwj chim nees dab nees nraug, nees txaij nees kuas.yuav tau ua neeb xa tus cua ua ntej mam kho tom qab mas thiaj yuav zoo vim tus cua yog qhov ua npog loj rau hnub ntawd kiag lawm mas yuav tau kub siab tiag tiag thiaj yuav zoo tau los.

Hais txog kev ua nom ua tswv mas tsis zoo nawb vim luag txheej hlob tsuas xav txib yus lub zog xwb, thaum luag tsis muaj dej num tseem ceeb lawm ces luag tsis paub txog yus lawm mas qhov zoo dua mas yus yuav tsum ua luag npom zoo dua ua luag nom nawb.

Yus tus yeeb ncuab ces twb yog nom tswv nag, yus yuav tsum xyuam xim txog thaum yus mus leg nom tswv li dej num os nawb, yog yus tsis xyuam xim ces tus yuav muab yus hlawv ces yog nom tswv nag os, kev leg luag li dej num mas yuav tau ncaj ncees tiag tiag os vim muaj nom tswv soj yus qab taug yus lw tas mus li xwb os nawb.

Yaj = sam xeeb ntawm yaj tus yeeb yam cwj pwm coj tus kheeej...

Yaj lub zim txwv sawv nres hnub nyob rau hli tab = 11, 23, = nyob rau hli txooj = 5, 17, 29, = Yaj lub zim txwv sawv nres hlis, yog lub 11, hlis ntuj.

Yaj lub zim txwv sawv nres xyoo, nyob rau cov xyoo no yog, Yaj xyoo,
Yaj xyoo yog 1931, 1943, 1955, 1967, 1979, 1991, 2003, 2015, 2027

Nyeej sawv ntawm Yaj lub sawm yeej coj cwj pwm sawv nres

Yaj xyoo, lub xyoo no zoo heev, ua dab tsi los tsis muaj plaub ntug, Tsuas muaj sawm yeej xwb vim ob sab zoo ib yam nkaus. Txawj hais lus haum siab mus txog twg los luag nyiam zoo, muaj hmoo zoo heev, tshav tsis kub nag tsis ntub, Vim yaj cev plaub tuab heev.

Tus me nyuam twg yug rau yaj xyoo no, mas yuav kom zoo tshaj mas koj yuav tis nws lub npe mas yuav tsum muaj tus niam ntawv no ( S-H-Y- K ) nyob rau hauv nws lub npe thiaj yuav raug raws li nws txoj hnoov uas nws coj nrog nws los neeg nyob rau ntiaj teb no.

Kev coj cwj pwm tus kheej ntawm Yaj lub zim txwv txoj hmoo.

Tus zeej keeb twg yug nyob rau Yaj xyoo, mas nyob rau hauv zim keeb txoj hmoo coj cwj pwm ntawm nws tus kheej,

Nyeej kav ntawm Yaj lub sawm yeej looj loog pov puag.

Tsis muaj mob tab sis tuag sai, yog tuag ces yuav yog cov laus thiab cov me nyuam me xwb, thaum ib nrab neej tsis tuag lawm,

Ceeb tshaj kav ntuj nrag ntawm Yaj lub sam xeeb coj cwj pwm

Huab cua muaj xwm yeem, Huab cua khiav ceev thiab laj ntxiag ntuj nag muaj yeej txeem thoob plaws xwm fab puaj meem ib yam nkaus xwb tsis muaj yam yuav ua rau puas tsuaj tau li os,

Yog tshav ntuj mas tshav heev, yog los nag mas muaj cua daj cua dub nrog tas mus li xwb nws tsis qhuav kom yeej txeem vim yaj hnub mas hlawv teb kuj kub tsis zoo nws tsuas kub nplooj xwb tsis kub kav li thiab mas huab cua loj heev thiab ceev heev li nplawm tsis xwm yeem li, mas cua ntaus khaub zeeg kiv mus kiv los rau ub rau no xwb, los nag los yeej los tib yam nkaus li cov cua kiv ntawd xwb. Vim yaj cev plaub tuab heev nag kuj tsis ntub tshav kuj tsis kub mas nws thiaj tsis tshua zoo rau kev ua noj ua haus xwb. Yaj yog ib tug tsiaj uas neej dab los kuj nyiam ib yam nkaus mas sab twg los nws thiaj li feeb zim txwv kom mus sib luag zos nkaus xwb os nawb,

Muaj ib feem mas neej dab los kuj ntshais nws thiab ntxub nws thiab ces thiaj li feeb nws lub sawm yeej zoo rau ob sab thiab phem rau ob sab ib nkaus os, Yug los rau Yaj xyoo no mas siav loj heev, tiam sis muaj ntsis tuag sai rau txoj kev phom tshij xwb, ua neeg siab zoo heev, nyiam txaj muag heev, muaj ntsis txhoj puab tiam sis nws kuj zoo thiab, tsuas yog siab muaj ntsis nrawm xwb os nawb,

Hais txog ntawm kev mob nkeeg mas muaj cawm seej ntau, feem ntau ces tsuas yog raug dab xwb, tiam sis Hmoob yaj tsis txhob pib mob rau yaj hnub xwb ces yeej tsis ntshai li,

Hais txog kev siv Yaj lub zim txwv no mus yuav poj niam mas zoo heev vim yog Yaj lub cev mas plaub tuab heev nag los tsis ntub hos tshav los kuj tsis kub thiab ces thiaj hais muaj hmoo zoo heev li os,
Hais txog kev mus ua lag luam mas yeej muaj paj laum zoo vim hais tias Yaj cev plaub ces yog ntaub yog xov xwb, nqis peev npaum li cas los yeej tau li ntawd los thiab nawb,

Hais txog kev ua tsov rog mas kuj muaj yeej thiab vim hais tias Yaj kuj muaj kub thiab yog yuav nrau li cas los yeej tau thiab tiam sis yuav tau saib raws li lub zog loj thiab me mam pib lub luag dej num mus xwb ces yeej tau txais txiaj ntsig xwb mas,

Yaj : Nyob rau hauv yaj xyoo no mas zoo tshaj plaws ua dab tsi tsis muaj plaub tsis muaj ntug dab tsi los ua chaw nyuab siab, tsuas muaj yeej xwb, txawj qhoob txawj hais lo lus ua rau luag nyiam, yus mus txog twg luag txais tos yam li nom tswv,

Ua dab tsi tsis txhawj vim muaj sawm yeej txaus. Tsis muaj mob loj tab sis tuag sai heev, yeeb vim txoj kev tuag yog kev phom tshij xwb, txoj kev puas tsuaj yog raug luag tua ntau los yog luag siv siab phem mas yuav tsis txhob tsim yeeb ncuab rau yus tus kheej thiaj tsis qhov phem rau yus li xwb,

Hais txog kev ua nom ua tswv mas tsis zoo vim yus tsis muaj hwv cheej txaus ces yus tsuas ntshais luag xwb, qhov zoo mas yus yuav tsum ua luag npom xwb thiaj yuav tsis muaj kev luab lim yus tus kheej os nawb. Yus tus yeeb ncuab ces twb yog nom tswv nag, qhov tseeb ces yus yuav tsum hwm nom hwm tswv xwb thiab yus nyob li yog luag ib tug npom zoo xwb os nawb.

Liab = Sam xeeb ntawm liab tus yeeb yam cwj pwm coj tus kheej.

Liab lub zim txwv sawv nres hnub nyob rau hli tab = 12, 24, = nyob rau hli txooj = 6, 18, 30, = Liab lub zim txwv sawv nres hlis, nres lub 12, hlis ntuj.

Liab lub zim txwv sawv nres xyoo, nyob rau cov xyoo no yog, Liab xyoo, Liab xyoo yog 1932, 1944, 1956, 1968, 1980, 1992, 2004, 2016, 2028

Nyeej sawv ntawm Liab lub sawm yeej coj cwj pwm sawv nres

Yam zoo kuj zoo txaus, Yam phem kuj phem txaus, Vim tias Liab nyob tsis muaj chaws li, luag nyiam thaum ntej xwb hos ntev mus ces luag tsis nyiam, luag muaj qhov ntxub, thiab tos luag noj luag haus xwb. Muaj laj lim zoo heev kawm txuj kawm ci tau zoo heev li,

Tus me nyuam twg yug rau xyoo no, koj yuav tis nws lub npe mas yuav tsum muaj tus niam ntawv no ( L ) nyob rau hauv nws lub npe thiaj yuav raug raws li nws txoj hmoov uas nws coj nrog nws puag pem nywj vab los nyob rau hauv ntiaj no, thiab ua dab tsi thiaj tau raws li nws siab nyiam.

Kev coj cwj pwm tus kheej ntawm Liab lub zim txwv txoj hmoo.

Tus zeej keeb twg yug nyob rau Liab xyoo, mas nyob rau hauv zim keeb txoj hmoo coj cwj pwm ntawm nws tus kheej,

Nyeej kav ntawm Liab lub sawm yeej pov puag li keeb kwm

Muaj mob lim xyiam heev, vim yog tim tswv ua xwb, ua neeb mus kho ntawm tim tswv xwb, rau qhov Liab yog tim tswv li tsiaj, feem ntau yog raug dab tim tswv xwb.

ceeb tshaj kav ntuj nrag ntawm Liab lub sawm xeeb sawv coj.

Huab cua nplawm mus muaj suam xwb, loj thiab nag tsis los yeej txeem, Nag los qee suam xwb, Nws muaj nag tsis xwm yeem, nws xav los lub caij twg los yeej cias li los nag xwb, tab sim los nag tsis loj thiab nag nrog cua ntau xwb tshav los kuj ntuas tshav ntuas nag,

Yug los rau Liab xyoo no mas siav ntev heev, tiam sis muaj tsis muaj teeb meem rau txoj kev txhoj pob xwb yuav tau xyuam xim rau txoj kev txhob pob ces yeej tsis muaj dab tsi thiab, ua neeg yug rau xyoo no mas tes liab taw liab, zais siab heev, txhoj puab heev, hais txog fab kev nrhiav noj nrhiav haus mas zoo heev, yeej khwv txaus noj txaus haus li os tiam sis yog txiv neej no muaj ntsis nyiam kev plees, tab sis yuav tau caiv kom tsis txhob mus nrog luag ua xwb ces zoo xwb os nawb,

Hais txog kev mob nkeeg mas cawm seej muaj thiab tiam sim muaj ntsis yog raug dab ntau xwb vim hais tias Liab yog dab tim tswv li tsiaj ces yog mob rau Liab Hnub ces yog raug dab tim tswv ntawm lub teb chaws ntawd ntau xwb, Hais txog siv Liab lub zim txwv mus yuav poj niam mas tsis tshua zoo heev vim hais tias Liab no nyiam tub sab heev thiab lim xyiam heev ces yog mus Liab lub zim txwv ces muaj ntsis zoo li Liab ntau xwb,
Hais txog kev ua lag luam mas tsis tshua zoo vim hais tias yuav tau ceev faj kom zoo txog rau fab uas neeg dab yus tiab neeg nyiag yus, qhov yuav poob peev ces yog luag nyiag yus xwb,
Hais txog kev mus ua tsov rog mas kuj muaj yeej thiab vim hais tias Liab no kuj yog ib tug tsiaj muaj kaus thiab tsiv heev, nws yeej tsis ntshai leej twg li thiab Liab yog tim tswv teb chaws li tsiaj ces yog yus tuaj tog nom tswv ces yus yeej xwb, vim muaj nom tswv pab txhawb nqa yus lawm,
Liab: nyob rau hauv liab yxoo no mas zoo kawg tab sis yog phem mas phem heev li. yos taus heev ua dab tsi tsis muaj neeg nrog yus zeem tsam. Thaum ntej luag nyiam ntev mus luag tsis nyiam lawm

Leeg twg yug rau liab hnub, liab hli, liab xyoo mas ntse heev thiab tawv heev rau fab kab mob kev nkeeg, txawm mob heev npaum li cas los nws yeej tsis qhia leej twg hais tias mob no li,
Tes liab taw liab txhob puab heev, ua tau heev, khwv noj khwv hauv mas yeej tsis tos leej twg li, pom luag ua tau ces nws yeej ua tau thiab, luag tau noj los nws yeej tau noj thiab, muaj ntsis tawv ncauj hais tsis tshua mloog lus vim nws tsis nyiam qhia luag paub qhov tseeb,

Hais txog fab kev plees kev yi mas muaj ywj siab ywj ntsws zoo heev tiam sis yuav tau xyuam xim txog txoj kev txhoj puab mus muab luag khoom noj es thiaj tsis mag luag nkuaj nawb mog,
Ua dab tsi kuj tiav muaj pub tau luag noj thiab. Kawm dab tsi los kuj tau, us neeg nyob siab kub thiab lub hlwb khiav nrawm heev, txhoj puab kawg nkaus li, yuav xyuam xim tiag tiag thiaj tsis muaj kev txhaum plaub nawb..
Kaum ob tug tsiaj no nws muaj sawm yeej txaus ib yam tab sis nws muaj qhov zoo qhov phem xwb. Kaum ob tug tsiaj no yawm saub teem haum haum xws li 6 tus yog tsiaj nyeg hos 6 tus yog tsiaj qus.
Yeej sawv nyob rau hauv hnub, hli, xyoo, yeej muaj qhov zoo raws nraim li yam ntxwv thiab moj yam ntawm tus tsiaj, yog koj xam mas yuav tsum paub lub hnub nyoog ntawm cov tsiaj kom meej pem tseeb. Koj saib txog fab dab tsi los, koj yuav tsum xam kom raws tus thiab siab nws tus moj yam ntawm tus tsiaj mas koj thiaj yuav paub zoo tau raws siab xav ntawm koj yuav ntaus tsuam ntawd.

Lub yeej txam ntaus tsuam txwv, xam chib caij nyoog nyob rau lub niaj lub xyoo raws li keeb tsuam txwv, caij nyoog zoo thiab phem nyob rau hauv neej dab lub sawm yeej, keeb txoj hmoo los ua neej nyob rau hauv ntiaj teb,
Hais txog kev ua nom ua tswv mas zoo thiab tab sis vim yus tau ua nom no yus pheej xav nyob ntawm nom xub ntiag xwb ces ua rau nom ceeb laj ntsia yus heev li os nawb.