YES XUS UA HWJ HUAM & KHO NEEG MOB

**Npuagtub** 22nd July 2011, 4:08 pm

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°1

YES XUS UA HWJ HUAM & KHO NEEG MOB

Post Npuagtub 22nd July 2011, 4:08 pm

Yes Xus Ua Thawj zaug Hwj Huam Nyob Lub Zos Kanas, NkasLisLais Teb, ( Xyoo 27 AD).

Muaj neeg ua ib rooj tshoob nyob hauv Nkaslislais tebchaws, hauv lub zos hu ua Kasnas. Yes Xus niam mus nrog lawv noj tshoob, lawv caw yes xus thiab nws cov thwj tim mus thiab. Sawv daws noj haus txog tog ces cawv tas lawm, Yes Xus niam los hais rau yes Xus tias cawv tas lawm. Yes Xus teb tias: Niam tsis tas koj yuav hais li koj rau kuv, tseem tsis tau txog kuv lub sij hawm.

Yes Xus niam hais rau cov tub ce cawv tias nws kom nej ua dab tsi mas nej cia li ua li nws hais. Nyob ntawd, muaj rau lub hub zeb teem dej rau cov Yus Das siv raws li lawv tej kev cai ntxuav tes. Ib lub hub ntim tau peb los plaub thoob dej.

Yes Xus hais rau cov tub ce cawv tias : "Nej hliv dej kom puv cov hub no." Ces lawv hliv dej puv nkaus cov hub. Yes Xus hais rau lawv tias : "Zaum no, nej ce cov dej no nqa mus rau txiv thiaj com." Ces lawv ce cov dej ntawd nqa mus. Thaum txiv thiaj com saj cov dej txia ua cawv, mas nws tsis paub cov cawv los qhov twg los. ( Zam 2 : 1 ).

YES XUS UA HWJ HUAM & KHO NEEG MOB Cid_0210

Cov phooj ywg txhua leej, thov caw nej mus nyeem zaj no ( Zam 2: 1 ) mus kom tas nej thiaj li yuav paub tias nws yog ib zaj lus zoo thiab muaj nuj nqis heev rau koj tus kheej kom koj paub tias Yes Xus yog leej twg thiab nws niam yog leej twg.
Ua cas Yes Xus niam ho paub tias Yes Xus muaj peev xwm muab dej hloov ua tau cawv ? Tom qab Yes Xus hais rau nws niam tias: Kuv lub sij hawm tseem los tsis tau txog, ces nws cia li ua kom cov dej nyob hauv cov thoob hloov ua cawv.

Last edited by XH. Npuagtub on 27th July 2011, 5:23 pm; edited 1 time in total

**Npuagtub** 22nd July 2011, 5:28 pm

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°2

Re: YES XUS UA HWJ HUAM & KHO NEEG MOB

Post Npuagtub 22nd July 2011, 5:28 pm

Yes Xus Kho Ib tug Thawj Tub Rog tus Tub Nyob Kas Nas, Xeev Nkas Lis Lais, ( xyoo 27 AD ).

Yes Xus thiaj rov tuaj Kas Nas xeev Nkas Lis Lais, lub zos uas nws muab dej los txia ua cawv. Tus vaj ib tug nom muaj ib tug tub mob nyob Kas Fas Naus. Nws hnov tias Yes Xus los Yus Das teb los txog Nkas Lis Lais lawm, ces nws mus cuag Yes Xus, nws thov Yes Xus kom nqes mus kho nws tus tub ; vim tus tub twb yuav tuag.
Yes Xus hais rau nws tias : "Yog nej tsis pom ib co cim thiab tej yam hwj huam, mas nej tsis ntseeg." Vaj ntxwv tus nom hais rau Yes Xus tias : "Huab Tais, thov koj nqes mus, cheem kuv tus me nyuam tsis tau tuag." Yes Xus hais rau nws tias : "Koj rov mus mog, koj tus tub zoo lawm."

Tus neeg ntawd ntseeg lo lus Yes Xus hais rau nws, ces nws sawv kev mus. Thaum nws tab tom nqes mus, nws cov tub txib tuaj tos nws. Lawv hais tias nws tus tub zoo neej lawm. Nws nug lawv saib yog lub sij hawm twg tus tub thiaj rov zoo.
Lawv hais rau nws tias : "Nag, thaum ib teev hnub qaij, ces tus mob kub cev thim hlo lawm." Leej txiv thiaj pom tias yog lub sij hawm uas Yes Xus hais rau nws tias : 'Koj tus tub zoo lawm.' Ces nws ntseeg, nws thiab tas nws tsev neeg huv si ntseeg. ( Zam 4 : 46 ).

YES XUS UA HWJ HUAM & KHO NEEG MOB 6a00d810

Tus Thawj Tub Rog nws tus tub mob hnyav ze qhov yuav tuag, nws mus cuag Yes Xus vim nws ntseeg tias Yes Xus yuav tsum cawm tau nws tus tub. Thaum nws mus ntsib Yes Xus nws thov kom Yes Xus mus kho nws tus Tub tiam sis Yes Xus tsis mus, Yes Xus hais tias koj rov mus koj tus tub zoo lawm. Tus thawj tub rog ntseeg ces nws tus tub cia li zoo hlo thaum lub sij hawm Yes Xus hais rau nws.

Cov phooj ywg, thaum nej nyeem zaj no tas nej xav li cas? Nej puas tau raug zoo li tu thawj tub rog no ? Nej puas xav tias yog nej raug ib yam li nws nej puas yuav ntseeg li nws ? Thiab Yes Xus puas yuav pab nej ib yam li nws pab cawm tus thawj tub rog tus tub?

Zaj no yog Yes Xus xav qhia rau peb tias nws yog peb tus cawm seej tiag, nws paub thiab pom hauv peb txoj kev xav, nws xav kom peb ntseeg thiab tso siab tiag los lees txais nws ua peb tus cawm seej mas nws thiaj li yuav cawm tau peb ntawm txoj kev tuag mus rau txoj sia...

**Npuagtub** 22nd July 2011, 8:25 pm

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°3

Re: YES XUS UA HWJ HUAM & KHO NEEG MOB

Post Npuagtub 22nd July 2011, 8:25 pm

Yes Xus kho ib tug neeg raug dab.
Nyob Kasfasnaus, ( Xyoo 27 AD ).

Yes Xus lawv mus hauv Kas Fas Naus. Hnub Xas Npas Tos, Yes Xus mus hauv lub tsev txoos, nws qhia sawv daws tam sim ntawd. Zeej tsoom qhuas nws cov lus qhia, vim nws qhia lawv xws li neeg muaj peev xwm, tsis zoo li cov kws Ntawv Ntshiab.

Nyob hauv lawv lub tsev txoos, tam sim ntawd, muaj ib tug neeg raug ib tug dab tsis huv nthe nthe tias : "Yes Xus Nas Xas Les, koj xav ua dab tsis rau wb ? Puas yog koj tuaj rhuav wb ? Kuv paub koj yog leej twg : koj yog Tswv Ntuj tus Ntshiab." Yes Xus cem nws tias : "Ua twj ywm, koj cia li tawm hauv tus neeg no mus."

Dab tsis huv siv zog muab tus neeg ntawd co heev heev, nws nthe ib suab nrov nrov ces nws tawm hauv tus neeg mus. Tas sawv daws ntshai, lawv sib nug zom zaws tias : qhov ntawd yog dab tsi ? Puas yog ib txog kev qhuab qhia tshiab muaj peev xwm ? Tab yog dab tsis huv, los nws tswj lawv, ces lawv mloog nws lus. Ces ib sij huam, Yes Xus lub moo nto lug rau txhua qhov, mus thoob ib cheeb tsam hauv xeev Nkas Lis Lais.
( Maskos 1: 21 )

YES XUS UA HWJ HUAM & KHO NEEG MOB James_10

Yog vim li cas Yes Xus thiaj li ntiab tau dab tawm hauv tus neeg khiav mus? Puas yog vim Yes Xus nrog dab sib tham tau ? Ua cas dab thiaj li mloog Yes Xus lus ? * Qhov tseeb tiag, dab yeej ib txwm ntshai Yes Xus, vim dab yeej paub tias Yes Xus yog leej twg..Dab yeej tsis muaj peev xwm tawm tsam Yes Xus tau.

Yes Xus kho Xis Moos niam tais zoo.
Nyob Kasfasnaus ( xyoo 27 AD ).

Tam sim ntawd, Yes Xus tawm hauv tsev txoos, nws nrog Yas Kos thiab Zam nkawd mus hauv Xis Moos thiab As Nres nkawd tsev.

Xis Moos niam tais mob kub cev, nws pw saum txaj. Tam sim ntawd, lawv tham txog tus niam tais rau Yes Xus paub. Yes Xus txav los tuav niam tais txhais tes, tsa nws sawv.Ces nws tus mob kub cev cia li thim hlo. Ces nws tsob hwb lawv.
( Maskos 1 : 29 - 31, Mastais 8 : 14 - 15, Luskas 4 : 38 - 41 )

Yes Xus muaj peev xwm kho tau tas txhua yam mob, tsis hais mob loj los mob me, mob phem mob hnyav li cas los nws yeej tsis txhawj kho li vim nws yog tus muaj hwj huam thiab paub tas ib puas tsav yam phem thiab zoo nyob tas qhov txhia chaw..

YES XUS UA HWJ HUAM & KHO NEEG MOB Mat08110

Nej puas ntseeg tias niaj hnub tam sis no Yes Xus tseem kho tau nej tej mob kheeg thiab ? Nej puas ntseeg tias Yes Xus yeej paub thiab pom nej txhua yam nej xav thiab txhua lub sij hawm tsis hais nruab hnub los hmo ntuj, txawm nws lub cev tsis nrog nej nyob thiab nej tsis pom nws, los nej puas ntseeg tias nws yeej pom nej thiab nrog nej nyob zoo ib yam li thaum ub nrog nws cov thwj tim nyob ua ke.?

Thaum koj muaj lub cev nqaij nrog tus ntsuj plig mas koj tshuas pom ntawm ko taw, tiam sis thaum koj lub cev yog ntsuj plig mas koj pom tas qhov txhia chaw....

Yes Xus Kho ib tug neeg mob ruas zoo.
Nyob Nkaslislais ( xyoo 27 AD ).

1 Thaum Yes Xus nqes saum roob los, ib pab neeg coob pib raws nws. 2 Ces ib tug neeg mob ruas txav los ze, nws pe ntawm Yes Xus xub ntiag, nws hais tias :

“Huab Tais, yog koj xav, mas koj ua tau kom kuv rov huv tuaj.” 3 Yes Xus cev tes kov tus mob ruas, nws hais tias : "Kuv xav kom koj lub cev rov huv tuaj." Nws tus mob ruas zoo hlo tam sis ntawd. ( Mastais 8 : 1 ).

Yog vim li cas Huab Tais Yes Xus ho kho tus neeg mob ruas kom zoo ? Vim Yes Xus hlub nws thiab paub tias nws tos nrw txog Yes Xus tuaj kho nws tus mob.

Vim li cas tus neeg mob ruas ho los thov Yes Xus pab kho nws tus mob kom zoo ? Vim nws yeej ntseeg thiab tso siab tias Yes Xus yeej kho tau nws tus mob.

YES XUS UA HWJ HUAM & KHO NEEG MOB 0122610

**Npuagtub** 24th July 2011, 6:07 am

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°4

Re: YES XUS UA HWJ HUAM & KHO NEEG MOB

Post Npuagtub 24th July 2011, 6:07 am

Yes Xus Kho Ib Tug Neeg Tuag Ceg
Nyob Kasfasnaus. ( xyoo 27 AD ).

( Matt 9:1-8; Mark 2:1-12; Luk 5:18-26 ).

Ob peb hnub tom qab, Yes Xus rov los hauv Kas Fas Naus, sawv daws paub tias Yes Xus nyob hauv tsev. Ces neeg tuaj sib sau coob coob ua ke, tsis tshuav chaw seem ntawm qhov rooj li. Yes Xus qhia ntau Lo Lus rau sawv daws.

Muaj plaub leeg nqa ib tug tuag ceg tuaj rau Yes Xus. Lawv tsis tau kev nqa tus tuag ceg los rau Yes Xus vim neeg coob dhau, ces lawv yaws lub ruv tsev ncaj qhov chaw Yes Xus nyob, lawv tho qhov saum ruv tsev, lawv dauv lub txaj uas tus tuag ceg pw nqes los.
Yes Xus pom lawv lub siab ntseeg, nws hais rau tus tuag ceg tias : "Me kwv, koj cov txhaum daws tas lawm." Koj sawv nqa koj lub txaj koj rov mus tsev. Ces tus tuag ceg cia li sawv tseev tam sis thiab nws rov mus tsev.

*Vim li cas cov neeg ntawd thiaj li muab lub ru tsev yaws es tso tus neeg tuag ceg los kom tau rau ntawm Yes Xus xub ntiag? Vim lawv muaj lub siab ntseeg tiag tias Yes Xus yeej kho tau lawv tus neeg tuag ceg .

YES XUS UA HWJ HUAM & KHO NEEG MOB Jesus-11

'' Me Kwv Sawv, koj Cov Txhaum Daws Tas Lawm".

Nyob hauv Zam ntawv Moo Zoo zaj 6 : 35, Yes Xus yeej hais tias: Kuv yog cov mov muaj txoj sia, tus tuaj cuag kuv nws yuav tsis tshaib, tus ntseeg txog kuv nws yuav tsis nqhis ib zaug li..

Yes Xus Kho Ib Tug Neeg Qhuav Tes.
Nyob Nkaslislais ( xyoo 28 AD ).

( Mastais 12 : 9-14 ; Maskos 3 : 1-6 ; Luskas 6 : 6-11 ).

Yes Xus tso qhov chaw ntawd tseg, nws mus hauv lawv lub tsev txoos. Muaj ib tug neeg uas txhais tes qhuav nyob ntawd. Lawv xav liam rau Yes Xus, ces lawv nug Yes Xus tias : "Hnub Xas Npas Tos, puas kheev kho neeg mob ?"

Yes Xus teb rau lawv tias : "Yog nej leej twg tsuas muaj tib tug yaj xwb ; hnub Xas Npas Tos, tus yaj ntawd mus poob hauv ib lub qhov. Nws puas yuav mus muab, mus rub tawm los ? Neeg muaj nqi dua ib tug yaj lawm pes tsawg npaug ? Vim qhov ntawd, hnub Xas Npas Tos, yeej kheev kom ua ib yam hauj lwm zoo."

Ces Yes Xus hais rau tus qhuav tes tias : "Koj xyab koj txhais tes." Tus neeg ntawd xyab tes, txhais tes cia li zoo hlo, muaj zog ib yam li lwm sab.

YES XUS UA HWJ HUAM & KHO NEEG MOB The_wi10

" Xyab Koj Txhais Tes Mas "

Raws li Mais Xes txoj cai tau qhia nyob hauv Tswv Ntuj 10 lo lus mas txhua tus yuav tsum caiv hnub 7 ( Xas npas tos ) tsis pub ua ib yam hauj lwm dab tsis li, vim tswv ntuj tau hais rau Mais Xes kom sawv daws so los teev hawm Tswv Ntuj Hnub yog ib hnub Ntshiab. Yog li cov neeg Fas lis xais yog ib co neeg ntseeg ntuj nruj heev thaum lawv pom Huab Tais Yes Xus kho tus neeg qhuav tes hauv hnub caiv mas lawv tsis txaus siab rau Huab Tais Yes Xus.
Tiam sis Huab Tais Yes Xus nws hais tias: Hnub Xas Npas Tos peb yeej ua tau tej yam hauj lwm zoo, los pab cawm lwm tus txoj sia los yog lwm yam hauj lwm tshwj xeeb. Tswv Ntuj tsuas xav kom peb mus khwv noj khwv haus 6 hnub xwb kom hnub 7 peb so, peb thiaj muaj caij los ntsib Tswv Ntuj, peb thiab li tsis khiav deb ntawm nws mus. Vim hnub 7 yog hnub Tswv Ntuj foom koob hmoov rau txhua yam hauv lub ntiaj teb, yog li hnub ntawd nws xav kom peb los nyob ze nws los txais nws tej koob hmoov.

Yes Xus Kho Tus Xab Txheeb Tus Tub Txib.
Nyob Kas Fas Naus ( xyoo 28AD ).

( Mastais 8 : 5-13 ; Luskas 7 : 1-10 ).

Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias : "Huab Tais, kuv tus tub txib pw tom tsev, nws tes taw tuag tas. Nws mob heev kawg." Yes Xus teb tias : "Kuv yuav mus kho nws." Tus xab txheeb hais ntxiv tias "Huab Tais, kuv tsis tsim nyog koj chaws los hauv kuv tsev, tsuav yog koj hais ib los lus xwb ces kuv tus tub txib yuav zoo hlo.

Txawm tias kuv yog ib tug neeg zwm rau luag tej, kuv kuj muaj ib co tub rog zwm rau kuv thiab. Yog kuv hais rau ib tug tias : 'Koj mus !' nws cia li mus, kuv ho hais rau lwm tus tias : 'Koj los,' nws kuj cia li los. Kuv hais rau kuv tus tub txib tias : 'Koj ua qhov no !' nws cia li ua." Yes Xus hnov nws hais li ntawd, Yes Xus qhuas.

YES XUS UA HWJ HUAM & KHO NEEG MOB A0060910

Yes Xus hais rau cov neeg raws nws tias : "Kuv hais tseeb rau nej, kuv tsis tau pom ib tug neeg ntseeg npaum li ntawd hauv cov His Xas Lais. Yes Xus hais rau tus xab txheeb tias : "Koj rov mus ! Xav kom koj tau raws li koj lub siab ntseeg !" Ces tam sis ntawd, tus tub txib zoo hlo.

Yes Xus tsa tus poj ntsuam nyob
Nas Ees tus tub sawv rov los. xyoo 28 AD
( Luskas 7 : 11 - 17 )

Yes Xus mus hauv ib lub nroog hu ua Nas Ees. Yes Xus cov thwj tim thiab ib pab neeg coob nrog Yes Xus ua ke mus. Thaum Yes Xus tuaj yuav txog lub qhov rooj loog nkag hauv lub nroog, luag tab tom kwv ib tug tuag tawm tuaj txog ntawd. Yog ib leeg tub twm zeej, hos leej niam yog ib tug poj ntsuam. Ib pab neeg coob hauv nroog nrog leej niam tawm tuaj. Huab Tais pom tus poj ntsuam, Huab Tais khuv leej nws. Huab Tais hais rau nws tias : "Koj txhob quaj." Yes Xus txav los tuav lub hleb, cov kwv hleb nres. Ces Yes Xus hais tias : "Tus hluas, kuv hais koj : Koj sawv !" Ces tus tuag sawv zaum, thiab nws pib hais lus.

YES XUS UA HWJ HUAM & KHO NEEG MOB 6a00e510

Yes Xus muab tus tub hluas ntawd cob rau nws niam. Tas sawv daws ntshai tas nrho. Lawv cav txog Tswv Ntuj tias : "Ib tug yaj saub loj sawv los nyob hauv peb, Tswv Ntuj tuaj xyuas nws haiv neeg." Cov lus hais txog tus hluas ntawd ncha mus thoob tas xeev Yus Das thiab ib ncig lub teb chaws ntawd

Yes Xus Ua Cua daj cua dub rov tus yees.
Nyob Hiav Txwv Nkaslislais. (xyoo 28AD)
( Mt. 8 : 23 - 27 ; Mk. 4 : 35 - 37 ; LK. 8 : 22 - 25 )

Yes Xus nce mus hauv nkoj, cov thwj tim lawv nws qab nce mus hauv thiab. Ces dej sawv nphau tej niag twv hauv dej ntuj tuaj. Cov nplaim dej nphau tuaj npog nkaus lub nkoj. Hos Yes Xus tsaug zog lawm.

Cov thwj tim los ze Yes Xus, lawv tsa nws tias : "Huab Tais, koj cawm peb, peb yuav tuag !" Yes Xus hais rau lawv tias : "Vim li cas nej ntshai, ua cas nej ntseeg me ua luaj ?"

Ces Yes Xus sawv ntsug, nws txwv cua thiab dej ntuj. Dej cia li rov tus yees. Cov neeg ntawd nyob hab nuv cia ; lawv sib hais zom zaws tias : "Tus ntawd yog leej twg ? Tab yog cua thiab dej ntuj los yeej mloog nws lus !"

Yuav ua cas peb thiaj li pab tau cov neeg raug tej yam xwm txheej xws li dej nyab los yog Av qeeg ?

Tej yam peb yuav pab tau yog, pab khoom noj, nyiaj txiag, thiab thov Ntuj tas zog rau cov ua tau raug tej xwm ntawd. Tswj peb lub siab ntseeg kom ruaj kho nyob hauv Tswv Ntuj txoj kev hlub ces tej yam xwm txheej ntawv thiaj li txav deb ntawm peb mus. Vim Tswv Ntuj yog tus muaj hwj huam tshaj txhua yam, nws tib tug xwb thiaj muaj peev xwm txwv tau txhua yam xwm txheej uas yuav tuaj raug peb.

YES XUS UA HWJ HUAM & KHO NEEG MOB Images10

**Npuagtub** 27th July 2011, 6:37 pm

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°5

Re: YES XUS UA HWJ HUAM & KHO NEEG MOB

Post Npuagtub 27th July 2011, 6:37 pm

Yes Xus Kho Cov Neeg Raug Dab Nyob Nkas Das Las. (xyoo 28AD)
( Mt. 8:28-34 ; Mk. 5:1-10 ; LK. 8:26-29 )

YES XUS UA HWJ HUAM & KHO NEEG MOB Jesus-13

Thaum Yes Xus tuaj txog sab ntug dej tim ub, txog rau Nkas Das Las teb chaws, muaj ob tug neeg raug dab tawm hauv cov ntxa tuaj cuag Yes Xus. Nkawd tsiv tsaim kawg, tsis muaj leeg twg muaj cuab kav taug txoj kev ntawd li.
Ob tug ntawd qw nrov nrov tias : "Tswv Ntuj Leej Tub, koj xav ua dab tsi rau wb ? Tsis tau txog lub caij, koj txawm siv tuaj tsim txom wb lod ?" Nyob tsis deb ntawd, muaj ib pab npua coob tab tom noj zaub.

Cov dab thov Yes Xus tias : "Yog koj ntiab peb tawm, thov koj cia peb mus nyob hauv pab npua tod." Yes Xus teb tias : "Kav tsij mus." Cov dab tawm plaws nkag mus nyob hauv cov npua, ces tas pab npua dhia puag saum tsag rau hauv dej ntuj.

Pab npua tuag tas rau hauv dej. Cov tub zov npua tso tes khiav mus hauv nroog, lawv mus piav tej xwm tshwm sim rau ob tug neeg raug dab ntawd huv tib si. Ces tas lub nroog tawm tuaj cuag Yes Xus. Thaum lawv pom nws, lawv thov kom nws tawm hauv lub teb chaws mus.

Huab Tais Yes Xus nws yog Tswv Ntuj leej tiag vim dab pom thiab hnov xwb dab yeej hwm thiab ntshai thov nws tshee na xwb. Yog li koj kuv peb puas yuav tsim nyog hwm thiab ntshai nws thiab..?

Kho ib tug neeg dig muag nyob
Npes Xais Das. ( xyoo 28AD )
( MK. 8:22-25 )

Yes Xus Lawv tuaj txog Npes Xais Das, luag coj ib tug neeg dig muag tuaj rau Yes Xus, lawv thov kom Yes Xus kov tus dig muag. Yes Xus tuav tus dig muag tes, thiab coj nws tawm hauv zos rau sab nraud. Yes Xus muab nws aub ncaug pleev tus dig muag ob lub qhov muag, ces nws tsa tes rau saum tus dig muag.

Yes Xus nug nws tias : "Koj puas pom ib qho dab tsi ?" Tus dig muag pib pom kev, teb tias : "Kuv pom ib co neeg, zoo li ib co ntoo mus kev."
Yes Xus rov qab tsa tes rau saum tus dig muag ob lub qhov muag dua, ces tus dig muag pom kev tseeb, nws zoo lawm. Nws pom ib puas tsav yam meej thiab nws pom tau deb.

* Huab Tais Yes Xus nws kho ntau leej tsis pom kev qhov muag rov pom kev tuaj, vim nws hlub peb txhua leej, nws tsis xav cia peb ib tug poob hauv txoj kev tsaus ntuj ib yam li cov neeg dig muag tsis pom kev. Nws xav kom peb pom kev deb, tsis yog peb lub qhov muag pom kev deb xwb, tiam sis nws xav kom peb lub siab lub tswv yim txawj pom kev deb peb thiaj li yuav pom Tswv Ntuj.

Zaj Yes Xus kho tus neeg dig muag rov pom kev tuaj mas nws yog ib zaj tseem ceeb qhia kom peb nkag siab tias, Yes Xus qhib tau peb lub siab lub tswv yim kom peb paub thiab zeem tseeb tau Tswv Ntuj. Tiam sis peb yuav tsum ntseeg thiab tso siab thov Yes Xus pab peb mas peb thiaj li tsis zoo li cov neeg dig muag.

Kho ob tug neeg dig muag. ( xyoo 28AD )
Mt. 9 : 27 - 31.

YES XUS UA HWJ HUAM & KHO NEEG MOB Healin10

Thaum Yes Xus tawm ntawm qhov chaw ntawd mus, muaj ob tug neeg dig muag raws nws qab. Nkawd qw qw hais tias : "Das Vis Leej Tub, thov koj khuv leej wb."

Thaum Yes Xus los txog hauv tsev, ob tug dig muag los ze Yes Xus, ces Yes Xus hais rau nkawd tias : "Neb puas ntseeg tias kuv ua tau qhov ntawd ?"

Nkawd teb tias : “Huab Tais, wb ntseeg.”Ces Yes Xus kov nkawd qhov muag, nws hais tias : "Xav kom muaj rau neb raws li neb ntseeg." Ces nkawd qhov muag qhib los.

Yes Xus txwv nkawd nruj nruj tias :
"Neb ceev faj ! Kom txhob muaj neeg paub !"
Tab sis, thaum nkawd tawm mus lawm, nkawd tshaj rau ib cheeb tsam ntawd paub tas huv si, vim nkawd zoo siab heev tias nkawd qhov muag pom kev lawm tiag tiag li.

Yes Xus Kho Ib Tug Neeg Raug Dab Nplaig Txhav Thiab Dig Muag.
( Xyoo 28AD ) Mt. 12 : 22 - 26.

YES XUS UA HWJ HUAM & KHO NEEG MOB Brookl10

Thaum ntawd, luag coj ib tug neeg raug dab tuaj rau Yes Xus, nws yog ib tug dig muag thiab nplaig txhav. Yes Xus kho nws, ces tus neeg nplaig txhav hais lus tau thiab pom kev tuaj.

Tsoom neeg nyob ntawd ntshai kawg, sawv daws nug tias : ‘Tej zaum tus ntawd yog Das Vis leej Tub ?’

Tab sis cov Fas Lis Xais hnov cov lus ntawd, lawv hais tias : "Tus neeg ntawd kawg hu txog tus tuam thawj dab Npes Ntxes Npus los ntiab dab xwb."

Yes Xus paub lawv xav li cas, nws hais rau lawv tias : "Lub teb chaws twg tawm tsam rov sib ntaus, yeej yuav liam sim tas. Tsis muaj ib lub nroog, los ib tse neeg uas tawm tsam rov sib ntaus, yuav nyob ruaj ua ke tau. Li ntawd, yog Xas Tas rov ntiab Xas Tas, mas nws rov tawm tsam tiv nws : yog li ntawd, nws lub teb chaws yuav ua cas nyob ruaj tau ?

* Nyob hauv zaj lus no, cov neeg pom thaum Yes Xus ntiab dab mas lawv muaj ib co xav tias Yes Xus yog Tswv Ntuj leej tub, hos muaj ib cov lawv xav tias Yes Xus hu tus thawj dab loj tuaj ntiab tus dab ua tus neeg nplaig txhav ntawd.

Tiam sis qhov tseeb tiag sawv daws dig muag tas, tsis paub tias Yes Xus yog Tswv Ntuj leej tub, peb tus cawm seej nws thiaj muaj peev xwm kho tau txhua txhia yam mob thiab txhua tus dab thiaj ntshai nws.

Yes Xus Mus Kev Saum Nplaim Dej
Hiav Txwv Nkaslislais Xyoo 29AD.
Mt. 14:22-33; Mk. 6:45-52; Zam. 6:15-21.

Tam sis ntawd, Yes Xus txib cov thwj tim kom nce nkoj ua nws ntej
mus lawm sab ntug dej tim ub, hos nws nyob xa tsoom sid rov qab.
Thaum Yes Xus xa zeej tsoom rov qab mus tas lawd,
nws nce mus saum roob, rau ib qho chaw xu kev, ces nws teev Ntuj.
Thaum tsaus ntuj, tshuav nws tib leeg xwb.

Lub nkoj twb mus deb ntawm ntug nqhuab lawm ntau ntsua muag.
Dej nphau nphwv tuaj nplawm lub nkoj, vim cua tshuab tom hauv ntej tuaj.
Thaum yuav kaj ntug, Yes Xus mus ko taw saum nplaim dej,
nws tuaj caum cov thwj tim. Lawv pom Yes Xus mus ko taw saum
dej ntuj, lawv ib ce xob : lawv hais tias : "Yog poj ntxoog".

Lawv ntshai kawg, ces lawv qw qw. Tam sis ntawd Yes Xus hais rau lawv tias
"Nej tso siab mas ! Yog kuv ! Txhob ntshai." Pob Zeb teb rau Yes Xus tias : "Huab
Tais, yog koj tiag no, koj kheev kom kuv tsuj nplaim dej tuaj cuag koj."
Yes Xus teb tias : "Tuaj mas !" Ces Pob Zeb nqes nkoj tso ko taw tsuj
saum nplaim dej mus cuag Yes Xus. Tab sis nws pom cua hlob, nws ntshai,
ces nws pib tog hauv dej, nws qw tias : "Huab Tais, cawm kuv mas !"
Yes Xus cev tes tam sis ntawd tuav Pob Zeb, nws hais rau Pob Zeb tias :
"Neeg ntseeg tsawg, ua cas koj ua xyem xyav.

**Npuagtub** 6th August 2011, 12:36 pm

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°6

Re: YES XUS UA HWJ HUAM & KHO NEEG MOB

Post Npuagtub 6th August 2011, 12:36 pm

Yes Xus Kho Kaum Tus Neeg Mob Ruas Zoo.
Luskas. 17 : 11 - 19.

Yes Xus taug kev mus Yes Lus Xas Les, nws hla Xas Mas Lias thiab Nkas Lis Lais ciam teb. Thaum Yes Xus yuav mus hauv ib lub zos, muaj kaum tus mob ruas tuaj cuag nws, lawv nres nrug deb.

Lawv tsa suab hais nrov rau nws tias : "Xib Hwb Yes Xus, thov koj khuv leej peb." Yes Xus pom lawv, nws hais rau lawv tias : “Nej mus thws nej lub cev rau cov Leej Choj saib." Thaum lawv tab tom mus, ces lawv lub cev huv.

Muaj ib tug hauv pab ntawd pom tias nws lub cev zoo lawm, ces nws tig hlo rov qab los, nws tsa suab nrov cav txog Tswv Ntuj. Nws pe ntsej muag ti av rau ntawm Yes Xus ko taw, nws ua Yes Xus tsaug.

Nws yog ib tug Xas Mas Lias. Yes Xus thiaj tsa ncauj hais tias : Tsis muaj kaum leej rov huv tuaj lod ? Tshuav cuaj leeg ne, lawv dua qhov twg lawm? Ua cas tsuas muaj tus qhua no xwb thiaj rov los cav txog Tswv Ntuj ?"

Ces Yes Xus hais rau nws tias : "Koj sawv mus, koj lub siab ntseeg cawm koj lawm."

Nyob rau hauv zaj Mas Kos sau hais txog Yes Xus kho 10 tus neeg mob ruas zoo no mas kuj yog ib yam tseem ceeb qhia rau peb paub tias ntau zaus Tswv Ntuj pab peb tiam sis peb feem coob tsis nco ua nws tsaug thiab pom txog nws lub txiaj ntsim, vim nej twb pom tias ua cas Yes Xus hais kom lawv mus cuag cov leej choj saib lawv xwb ces lawv tej mob txawm cia li zoo tam sis lawm. Muaj ib tug thiaj li rov los ua Yes Xus tsaug xwb, hos 9 leeg cia li mus lawm. Txawm peb ua zoo li 9 tug mob ruas los Tswv Ntuj yeej tseem hlub peb vim peb yog nws cov me nyuam.

Yes Xus Pub Mov Rau 5000 leej Noj.
MK.6:30-44; Mt.14:13-21; LK.9:10-17; Z. 6:1-14.

Cov Hauv Paus Xa Lus los sib sau ncig Yes Xus, lawv piav tas puas tsav yam uas lawv tau ua thiab tau qhia. Ces Yes Xus hais rau lawv tias : "Nej los rau ib qho chaw xu kev tsis muaj neeg, nej so me ntsis." Vim cov neeg tuaj thiab cov rov mus coob, ces cov Hauv Paus Xa Lus tsis xyeej noj mov.

Lawv thiaj caij nkoj mus rau ib qho chaw xu ke, tsis muaj neeg. Tsoom sid pom cov Hauv Paus Xa Lus caij nkojmus, coob leej twb mem tau lawm.

Ces sawv daws khiav ko taw hauv cov nroog tuaj mus. Lawv xub mus txog chaw. Thaum Yes Xus nqes nkoj, nws pom ib pab neeg coob, nws hlub lawv, vim lawv zoo li cov yaj uas tsis muaj tswv zov.

Ces Yes Xus qhia lawv ntev loo. Thaum lig heev lawm, cov thwj tim los hais rau Yes Xus tias : “Qhov chaw no tsis muaj neeg nyob, thiab tsam no lig heev lawm, koj tso lawv rov mus, kom lawv mus muas noj ntawm cov tsev twj cuab thiab cov zos nyob ib ncig ntawm no.” Yes Xus hais rau lawv tias : "Nej muab rau lawv noj mas." Cov thwj tim hais tias : "Peb puas yuav mus muas mov txog ob puas lub txiaj nyiag coj los rau lawv noj ?” Yes Xus hais rau lawv tias : "Nej muaj pes tsawg lub ncuav mov ? Nej mus xyuas saib." Cov thwj tim mus nug, lawv hais tias : "Tsib lub ncuav mov, thiab ob tug ntses."

Yes Xus kom cov thwj tim coj sawv daws zaum ua tej pawg saum cov nroj ntsuab. Ces tas sawv daws zaum pem teb ua tej pawg ib puas leej, tej pawg tsib caug leej. Yes Xus tuav tsib lub ncuav mov thiab ob tug ntses, nws tsa muag ntsia saum ntuj, nws hais zaj foom hmoov zoo, nws muab cov ncuav mov ntais, nws cev rau cov thwj tim kom lawv nqa mus rau sawv daws noj. Yes Xus kuj muab ob tug ntses faib rau sawv daws thiab. Sawv daws noj tsau tas. Lawv khaws tej sab mov seem thiab cov ntses seem puv kaum ob tawb. Cov neeg noj cov mov ntawd muaj tsib txhiab leej txiv neej.

**Npuagtub** 8th August 2011, 9:41 am

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°7

Re: YES XUS UA HWJ HUAM & KHO NEEG MOB

Post Npuagtub 8th August 2011, 9:41 am

Yes Xus kho ib tug poj niam tsob ntshav. Nws tsa Yais Los tus ntxhais sawv rov los. Mt. 9:18-26; Mk. 5 : 21-43; Lk. 8: 40-56.

Thaum Yes Xus caij nkoj rov los txog sab ntug dej tim no, ib pab neeg coob tuaj sib sau ntsauv nws. Thaum ntawd, Yes Xus tseem nyob ntawm ntug dej ntuj. Muaj ib tug hauv cov tswj tsev txoos hu ua Yais Los tuaj txog. Thaum nws pom dheev Yes Xus, nws txhos caug ntua ntawm Yes Xus ko taw. Nws thov Yes Xus tias : "Kuv tus me ntxhais txoj sia yuav tu, thov koj tuaj tsa tes cawm nws kom nws ciaj." Yes Xus nrog Yais Los mus. Ib pab neeg coob raws Yes Xus mus thiab, lawv sawv daws txiv Yes Xus. Muaj ib tug poj niam tsob ntshav tau kaum ob xyoos los lawm. Ntau tus kws tshuaj tau ua kom nws txom nyem kawg. Nws siv tas nws lub cuab tam los kho tsis tau nws zoo.

Nws mob heev zuj zus ntxiv. Nws hnov luag hais txog Yes Xus, ces nws nrog tsoom sid sib txiv tom Yes Xus nraub qaum. Nws kov Yes Xus lub tsho. Vim nws xav hauv siab tias : "Tsuav yog kuv tau kov nws lub tsho xwb, mas kuv yeej yuav dim." Ces tam sis ntawd, nws qhov tsob ntshav tu nrho, nws hnov nws lub cev zoo hlo ntawm tus mob. Tam sim ntawd, Yes Xus kuj hnov ib lub zog tawm hauv nws mus ; ces Yes Xus tig los nug pab neeg ntawd tias : "Leej twg kov kuv lub tsho ?" Cov thwj tim hais rau nws tias : "Koj ntsia saib, tas tsoom sid txiv koj txhua sab tuaj, koj tseem hais tias : "Leej twg kov kuv ?" Yes Xus ntsia ib ncig kom pom tus neeg uas tau kov nws. Ces tus poj niam ntshai, nws tshee tshee, vim nws paub qhov uas nyuam qhuav tshwm sim hauv nws. Nws los txhos caug ntawm Yes Xus taw thiab qhia qhov tseeb rau Yes Xus. Yes Xus hais rau tus poj niam tias : “Phauj, koj lub siab ntseeg cawm koj lawm. Koj rov mus kaj siab lug, koj tus mob zoo lawm."

Thaum Yes Xus tseem tab tom hais lus, ib co neeg tuaj ntawm tus tswj tsev txoos lub tsev tuaj hais tias : “Koj tus ntxhais twb tuag lawm, koj tseem yuav txob Xib Hwb ua dab tsi ?” Tab sis Yes Xus twb hnov lo lus lawv nyuam qhuav hais, nws hais rau tus tswj tsev txoos tias : "Koj txhob ntshai, tsuav koj ntseeg xwb." Yes Xus tsis kheev leej twg nrog nws mus li.

Nws tsuas cia Pob Zeb, Yas Kos thiab Yas Kos tus kwv Zam nrog nws mus xwb. Lawv tuaj txog tus tswj tsev txoos lub tsev, Yes Xus pom sawv daws ua ntxhov hnyo ib txhia quaj, ib txhia qw nrov nrov. Yes Xus los hauv tsev, nws hais tias : "Ua cas sawv daws ua ntxhov hnyo thiab quaj zom zaws ? Tus me ntxhais tsis tuag, nws tsaug zog xwb." Ces lawv luag Yes Xus.

Tab sis Yes Xus ntiab sawv daws tawm mus nraum zoov, nws tsuas kheev tus me nyuam niam thiab txiv, thiab cov nrog nws tuaj, nyob xwb.Nws chaws mus hauv kem uas tus me nyuam nyob. Yes Xus tuav tus me nyuam txhais tes, nws hais rau tus me nyuad tias : "Tas lis tas kus," txhais tias : "Me ntxhais, kuv hais koj, koj sawv !" Tus me ntxhais sawv tsees tam sis ntawd, nws mus kev, vim nws twb muaj kaum ob xyoos lawm. Tam sim ntawd, sawv daws ntshai kawg. Yes Xus txwv lawv heev kom txhob qhia leej twg paub. Ces nws kom lawv muab mov rau tus me ntxhais noj.

Cov Phooj ywg sawv daws, nyob hauv 2 zaj no xws li tus poj niam tsob ntshav thiab tus ntxhais Yes Xus tsa nws ciaj rov los, mas yug ib lub ntsiab xwb. Lub ntsiab yog Yes Xus Xav kom peb muaj lub siab ntseeg ruaj tiag tiag txhob ua xyem xyav, zoo li ntseeg saum daim tawv xwb, nws xav kom peb yuav tsum ua ib tug neeg ntseeg kom ti txha ces peb thiaj li yuav tau txais Tswv Ntuj txoj kev cawm peb. Zoo ib yam tus tus poj niam nws tsob ntshav tau 12 xyoo, tiam sis nws ntseeg tias tsuav nws tau kov Huab Tais Yes Xus lub tsho xwb mas nws tus mob yuav zoo, ces txawm muaj li nws txoj kev ntseeg vim nws yeej ntseeg tuaj hauv nws nruab siab tiag tiag. Yog li peb yuav tau muab tus poj niam no nws txoj kev ntseeg los coj mas peb txoj kev ntseeg thiaj li loj hlob puv npo hauv peb lub neej. Txawm peb yuav txom nyem ntev npaum li cas los peb tso siab tias muaj ib hnub Tswv Ntuj yeej yuav cawm peb vim nws yog tus tsim peb, peb yuav ua tiag nyiaj khwv peb tus ntoo cuam tas li mas peb thiaj li yuav pom Tswv Ntuj lub Ceeb Tsheej.

**Npuagtub** 24th August 2011, 4:56 pm

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°8

Re: YES XUS UA HWJ HUAM & KHO NEEG MOB

Post Npuagtub 24th August 2011, 4:56 pm

Yes Xus Kho Tus Tub Raug Dab
MAS KOS: 9:14-29

Thaum Yes Xus lawv rov los txog ntawm cov thwj tid, lawv pom ib pab neeg coob nyob ncig cov thwj tim, thiab ib co kws Ntawv Ntshiab nrog cov thwj tim tham. Tam sim ntawd, tas tsoom sid pom Yes Xus, lawv poob siab, lawv khiav tuaj tos Yes Xus, lawv foom kev kaj lug rau nws. Ces Yes Xus nug lawv tias : "Nej nrog lawv sib cav txog dab tsi ?" Muaj ib tug hauv pab neeg ntawd hais rau Yes Xus tias : "Xib Hwb, kuv coj kuv tus tub tuaj rau koj, nws raug ib tug dab nplaig txhav. Thaum tus dab nkag rau hauv nws, dab muab nws thawb rau pem teb, ces tus tub ua npuas ncauj, nws zom hniav, ib ce txhav tas. Kuv thov koj cov thwj tim kom lawv ntiab tus dab ntawd, tab sis lawv tsis muaj hwj huam yuav ntiab tau." Yes Xus teb rau lawv tias : "Tiam neeg tsis ntseeg, kuv yuav nrog nej nyob txog thaum twg ? Kuv yuav nyiaj nej txog thaum twg ? Nej coj tus tub los rau kuv saib." Ces lawv coj tus tub los rau Yes Xus. Thaum tus dab pom dheev Yes Xus, dab muab tus tub ntswj heev heev, ces tus me nyuam ntog pem teb, nws dov lam rau hauv av, ua npuas ncauj tawm plaws. Yes Xus nug leej txiv tias : "Nws raug qhov ntawd tau hov ntev los lawm ?" Leej txiv teb tias : "Txij thaum yau los. Muaj ntau zaus dab muab nws thawb rau hauv hluav taws los rau hauv dej kom tuag. Yog koj pab tau, thov koj pab peb, thov koj khuv leej peb." Yes Xus teb tias : "Tus ntseeg, nws yuav ua yam twg kuj tau." Tam sis ntawd, tus me nyuad txiv hais nrov tias : "Kuv ntseeg ! Thov koj pab kuv vim kuv ntseeg me me xwb !" Yes Xus pom muaj neeg coob tuaj ntsauv, nws cem tus dab tsis huv tias : "Dab nplaig txhav, dab lag ntseg, kuv yuam koj, koj tawm hauv tus me nyuam no mus, txhob rov los nkag hauv nws ib zaug ntxiv li." Tus dab nthe nrov nrov, nws muab tus me nyuam co heev heev, ces nws tawm mus. Tus me nyuam zoo li tuag lawm. Coob leej hais tias : ‘nws tuag lawm.’ Tab sis, Yes Xus tuav nws tes, tsa nws sawv, ces tus me nyuam sawv ntsug. Thaum Yes Xus rov los txog tsev, nws cov thwj tim nug nws twj ywm tias : "Vim li cas peb ntiab tsis tau tus dab ntawd ?" Yes Xus hais rau lawv tias : "Hom dab ntawd tsuas yog txoj kev teev Ntuj xwb thiaj ntiab tau."

Cov Phooj ywg, hnub no peb los nyeem zaj Yes Xus ntiab tus dab tawm hauv tus me nyuam tub lub cev mus. Nej xav li cas rau zaj nyeem hnub no? Nyob rau hauv zaj no Yes Xus hais txog kev Ntseeg thiab kev Teev Ntuj, thiaj ntiab tau dab no ua li koj kuv peb niaj hnub no peb puas ntseeg thiab puas Teev Ntuj li Yes Xus hais. Nej puas xav tias yog peb ua thiab coj li Yes Xus qhia peb no dab puas yuav ntshai peb thiab. Kuv hais tias dab yeej txav deb ntawm peb mus yog peb ua thiab coj li Yes Xus cov lus qhia.

Yog li no niaj hnub nim no muaj ib co lawv muaj lub siab ntseeg tiag tiag lawv yeej sib zog teev ntuj txhua hnub txhua hmo ces lawv thiaj muaj peev xwm ua tau tej yam kev cawm neeg ntiaj teb zoo tau. Ntau zaus peb hais tias peb ntseeg tiam sis thaum peb muaj mob muaj kev ntxhov siab ua dab ntub npau suav phem los yog raug kev txom nyem loj mas ua cas peb thov ntuj los zoo li ntuj tsis pab li, tej yam zoo li no mas peb yuav rov qab los xav txog peb tus kheej saib peb yog leej twg thiab peb puas muaj lub siab ntseeg thiab tso siab tiag rau Tswv Ntuj? Ib yam li Yes Xus cov thwj tim twb hais rau Yes Xus tias lawv ntiab tus dab ntawd tsis tau lis, Yes Xus thiaj hais rau lawv tias, vim lawv twb tsis muaj kev ntseeg ne dab puas yuav ntshai lawv. Dab mas nws paub peb txoj kev xav, yog thaum peb tsis muaj Tswv Ntuj nrog peb nyob lawm mas dab tsis ntshai peb tiam sis peb ntshai dab heev, qhov peb pheej ntshai dab mas vim peb xav tias dab muaj zog dua peb thiab yuav tsis muaj leej twg ua tau kom dab ntshai, thaum peb xav li no ces dab twb paub peb txoj kev xav lawm ces dab yim huab muaj zog tsim peb kom peb txom nyem.

Nco ntsoov tias Yes Xus yog " Qhov Tseeb, Txoj Sia, Txoj kev " yog li no cov dab txhua tus hwm thiab ntshai, yog peb ntseeg txog nws, peb hwm nws, peb tuav txog nws lub npe xwb ces dab twb tsis kam txav ti peb lawm, vim Yes Xus yog tus tswv ntuj tau pleev nws thiab tsa nws ua tus tswv nyob siab thiab muab tas ib puas tsav yam rau nws ua tus kav thiab hnub kawg nws yuav yog tus txiav txim rau txhua leej txhua tus ntawm txoj kev tuag mus tau txoj sia nyob mus li.

**Npuagtub** 25th August 2011, 3:14 pm

Npuagtub

Npuagtub: Hmong Catholique; Messages : 999
Date d'inscription : 2009-08-16
Age : 59
Localisation : Fresno, California, USA.

Post n°9

Re: YES XUS UA HWJ HUAM & KHO NEEG MOB

Post Npuagtub 25th August 2011, 3:14 pm

Yes Xus tsa Las Ntxas Los sawv rov los nyob Npes Tas Nias.
Zam 11 : 1 - 44.

Muaj ib tug neeg mob hu ua Las Ntxas Los, nws nyob Npes Tas Nias. Yog Mab Liab thiab nws tus niam laus Mas Tas lub zos. Mab Liab yog tus uas yav dhau los nws muab tshuaj tsw qab pleev Huab Tais thiab muab nws cov plaub hau so Huab Tais ko taw. Tus neeg mob, yog Mab Liab tus nus Las Ntxas Los. Nkawd ob viv ncaus xa xov mus hais rau Yes Xus tias : "Huab Tais, tus uas koj nyiam, mas nws mob lawm." Yes Xus hnov li ntawd, Yes Xus hais tias : "Tus mob no tsis coj mus rau qhov tuag, nws yuav ua kom Tswv Ntuj nto koob meej, kom xwv Tswv Ntuj Leej Tub txais koob meej vim tus mob ntawd." Yes Xus nyiam Mas Tas, thiab nws tus niam hluas, thiab Las Ntxas Los lawv. Tab yog nws hnov hais tias Las Ntxas Los mob lawm, tsis kav nws tseem nyob qhov qub ob hnub ntxiv thiab. Ces Yes Xus mam li hais rau cov thwj tim tias : "Peb rov mus Yus Das teb." Cov thwj tim hais rau Yes Xus tias : "Las Npis, ob peb hnub ntawd, cov Yus Das xav xuas pob zeb txawb rau koj. Koj tseem yuav rov mus Yus Das teb thiab lod ?" Yes Xus teb tias :
"Nruab hnub tsis muaj kaum ob teev lod ? Tus twg mus kev nruab hnub, nws tsis dawm taw, vim nws tau lub ntiaj teb qhov pom kev. Hos tus twg mus kev hmo ntuj, mas nws dawm taw, vim qhov pom kev tsis nyob hauv nws." Yes Xus hais li ntawd tas, nws thiaj hais rau cov thwj tim tias : "Peb tus phooj ywg Las Ntxas Los tsaug zog lawm ; tab sis kuv yuav mus tsa nws sawv." Cov thwj tim hais rau Yes Xus tias : "Huab Tais, yog nws tsaug zog lawm, mas nws tus mob yuav zoo." Yes Xus hais txog Las Ntxas Los txoj kev tuag, tab sis cov thwj tim xav tias yog Yes Xus hais txog kev pw tsaug zog. Yes Xus thiaj li ncaj qha qhia tias : "Las Ntxas Los tuag lawm. Kuv tsis nyob ntawd, tsis kav kuv zoo siab, vim qhov ntawd yuav pab nej ntseeg. Peb mus xyuas nws." Tos Mas, tus uas hu ua Dis Dws Mos, hais rau cov npawg thwj tim tias : "Peb kav tsij mus mas, kom peb nrog nws tuag thiab." Thaum Yes Xus tuaj txog, nws pom Las Ntxas Los twb zwm ntxa tau plaub hnub lawm. Npes Tas Nias nyob ze ntawm Yes Lus Xas Les, kwv yees li kaum tsib ncuas kev. Cov Yus Das coob leej tuaj xyuas Mas Tas thiab Mab Liab nkawd, lawv tuaj nplij nkawd vim nkawd tus nus tuag lawm. Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev. Mas Tas hais rau Yes Xus tias : "Huab Tais, yog koj ntxov tuaj txog ntawm no, mas kuv tus nus yuav tsis tuag. Tsis kav, kuv paub tias nyem no, koj thov yam twg ntawm Tswv Ntuj, mas Tswv Ntuj yuav muab rau koj." Yes Xus hais rau Mas Tas tias : "Koj tus nus yuav sawv rov los." Mas Tas hais rau Yes Xus tias : "Kuv paub tias thaum txog Hnub Kawg, lub caij leej tib neeg lub cev ciaj rov los, mas nws yuav sawv rov los." Yes Xus hais rau Mas Tas tias : "Kuv yog Txoj Kev Sawv Rov Los thiab yog Txoj Sia : tus ntseeg txog kuv, tab yog nws tuag lawm, nws yuav muaj txoj sia nyob. Leej twg ua neej nyob ntseeg txog kuv, nws yuav tsis tuag ib zaug. Koj puas ntseeg qhov ntawd ?" Mas Tas hais rau Yes Xus tias : "Huab Tais, kuv ntseeg. Kuv ib txwm ntseeg hais tias koj yog Leej Pleev, yog Tswv Ntuj Leej Tub tuaj nyob hauv lub qab ntuj no." Mas Tas hais li ntawd tas, nws rov mus hu nws tus niam hluas Mab Liab. Nws ntxhi twj ywm rau Mab Liab tias : "Xib Hwb tuaj txog tod lawm, nws hu koj." Thaum Mab Liab hnov dheev li ntawd, nws sawv tsees mus cuag Yes Xus. Yes Xus tsis tau mus txog hauv zos. Nws tseem nyob ntawm qhov chaw uas Mas Tas tuaj cuag nws. Cov Yus Das uas tuaj nplij Mab Liab thiab nrog Mab Liab nyob hauv tsev, pom Mab Liab sawv tsees tawm lawm, lawv raws nws qab, vim lawv xav tias Mab Liab yuav mus quaj tom ntxa. Thaum Mab Liab tuaj txog ntawm Yes Xus, nws pom Yes Xus, nws txhos caug ntawm Yes Xus ko taw, nws hais rau Yes Xus tias : "Huab Tais, yog koj ntxov tuaj txog ntawm no, mas kuv tus nus yuav tsis tuag." Thaum Yes Xus pom Mab Liab quaj, thiab pom cov Yus Das uas nrog Mab Liab tuaj sawv daws quaj, mas Yes Xus tu siab kawg nyob hauv nruab siab, nws ib ce qaub thoob tas. Yes Xus hais tias : "Nej muab nws tso qhov twg ?" Lawv teb tias : "Huab Tais, koj los tom no, koj yuav pom." Yes Xus kua muag poob nthav. Cov Yus Das thiaj hais tias : "Saib, nws nyiam Las Ntxas Los kawg." Tab sis muaj ib co Yus Das hais tias : "Nws yog tus uas qhib tau neeg dig muag qhov muag, nws ho ua tsis tau kom tus neeg no txhob tuag ?" Ces Yes Xus rov tu siab heev kawg nyob nruab siab, nws mus tom lub ntxa. Yog ib lub qhov tsua, muaj ib daim txiag zeb kaw lub rooj ntxas. Yes Xus hais tias : "Nej tshem daim txiag zeb." Mas Tas uas yog tus tuag tus muam, hais rau Yes Xus tias : "Huab Tais, nws tuag tau plaub hnub lawm : nws twb tsw lawm." Yes Xus hais rau Mas Tas tias : "Kuv tsis tau hais rau koj tias yog koj ntseeg, koj yuav pom Tswv Ntuj lub hwj chim lod ?" Ces lawv tshem daim txiag zeb, Yes Xus tsa muag ntsia saum ntuj, nws hais tias : "Txiv, kuv ua koj tsaug vim koj mloog kuv. Kuv paub tias koj yeej ib txwm mloog kuv, tab sis kuv hais cov lus no, kom tsoom neeg uas sawv ncig kuv ntseeg tias yog koj xa kuv tuaj." Yes Xus hais li ntawd tas, nws hu ib suab nrov nrov tias : "Las Ntxas Los, koj tawm los nraum no !" Tus tuag tawm los, cov saw tseem pav nws tej tes taw, daim ntaub npog ncauj tseem vov nws lub ntsej muag. Yes Xus hais rau lawv tias : "Nej daws cov saw, nej cia nws mus nws.