Paj huam: Xyu Tub zaj dab neeg

Xyu Tub Yaj txoj dab neeg.



Na Ku Sa--------------------- teb chaws Nyab Laj
Xyu Tub Yaj-------------yuav los nthuav tawm
Lub keej khawm---------tsev neeg tshwm los
Yuav muab ntos---------ntawm txiv tus kheej
Yug ntau leej-------------------tau tsib kwv tij
Nyob tsis txhij----------------ob leeg tsis nyob
Hmoov pov plob-------khuam tsis tau nkawv
Txoj hmoov cawv-----------pov tau peb nyob
Tus tij hlob-----------------yog Yaj Txoos Qhua
Tij nrab sua------------------yog Yaj Tswv Riam
Kuv keeb kiam----------------yog Yaj Xyu Tub
Tau muab qhub-------------kuv tsev noj nyob
Neej pov plob--------------tshuav peb kwv tij
Nrog yawm yij--------muam phauj yawg laus
Tau noj haus---------------------ua ke ywj siab
Caij noj tsiab----------------koom txoos ua ke
Noj sib ce--------------------kuj haus sib hlub
Lub neej qub----------------ib txwm muaj los
Thiaj muab ntos-------------kuv li keeb kwm
Peb ib txwm---------------teev dab teev qhua
Thiab tseem ua--------------Nyuj Dab Npua Tai
Raws txoj cai--------------yav puag thaum ub
Lub neej qub--------------hmoob txoj kev cai
Yug nruas dai------------------ua neeb ua yaig
Peb tseem laig-----------poj yawm txwv koob
Lub neej poob---------qab txom nyem ntsuav
Thiaj li dhuav------------xav pauv txoj tshiab
Niam txiv siab----------------kuj nyob tsis kaj
Kom txhob maj---------------tos niam dua toj
Los txog zoj-----------------ib cuaj cuaj plaub
Lub ntuj qaub-----------------lub teb los vuag
Txoj kev ntsuag------------los raws lawv tau
Thiaj li sau--------------txhua tsav txhua yam
Muab pov plam------------mus rau dej tshoob
Ntws mus poob--------------rau lawm zaj qho
Nws ntxeev npho-----------rau ntuj nraum ub
Tsis muaj hnub----------------yuav rov los tau
Cuaj caum rau--------------li pauv kev ntseeg
Lawv tsev neeg--------------tus txheeb tus ze
Tag loj me------------niam hlob txiv ntxawm
Niaj hnub tsawm---------yuav qhia nom tswv
Kwv tij txwv------------------kom cia li tsum
Tus yeej cum---------------kev cai ntseeg Ntuj
Yog tseem yuj--------------ces qhia nom tswv
Nrom hiav txwv-----------yog lawv tsis tsum
Muaj neeg tshum----------nom tswv tuaj ntes
Vim tsis nres----------------tau mus pw nkuaj
Txoj kev quaj-------------yuam lawv ua qhev
Zoo tam dev------------------mov tsis pub noj
Yuam luaj nroj----------------tsis pub lawv so
Raws li nco----------------plaub hau raug dob
Tawv nqaij mob----------------su luaj qe qaib
Ua tsis saib------------------thiaj nyob tsis tau
Lawv thiaj dhau--------nrhiav dua zos tshiab
Xyoo ob txhiab-----------thaum ob txhiab ob
Pauv zos nyob---------------------rau Na Ku Sa
Kev txhawb nqa------------ntawm Kav Tos Liv
Thiaj li chiv---------------qhia kev ncaj ncees
Li tau lees-------------------nthuav loj zuj zus
Lawv txhua tus----------------li tau mus ntsib
Txoj kev pib-------------------Ntuj kev cai siv
Yaj Vuam Chiv-------------kws qhia teev Ntuj
Ntsuj plig yuj---------------nrog Tswv Zov Yaj
Kaj siab tshaj-------------------tej qub kev cai
Tsis nco ntshai--------------------tus dab tsi li
Leej txiv ntxhi-------nyiam nrog lawv ntseeg
Lawv tsev neeg-------------tau los ntseeg Ntuj
Txhua tus kuj----------------txaus siab ib yam
Thiaj muab tham-------------sau ua lus nceeg
Txoj dab neeg------------muab cim khaws cia
Ho tau qhia------------tsoom zeej xeeb ntxwv
Muaj tus Tswv----------------ua lub kaus ntoo
Tau tso loo---------------yeej huam yeej koob
Rau peb Hmoob-------------nyob Nyab Laj teb
Ua rau peb-------------------txoj kev lawm loo
Thiaj yuav zoo--------------rau neej pem suab
Tswv Ntuj muab----------txoj kev haum xeeb
Vaj Tswv teeb----------------lub neej thiaj zoo
Txhiab pua xyoo------------nco kev teev Ntuj
Muaj zoo txuj-------------pom thoob ntiaj teb
Muag pom deb---------thiaj ntsib phooj ywg
Txawm nyob twg-------yuav nco teev hawm
Txoj kev kawm----------xyoo ob txhiab yim
Kuj tau tsim-------------------tho txoj kev dav
Tswv Ntuj kav-----------xyoo ob txhiab cuaj
Chiv Vuam tuaj----------qhia txoos teev Ntuj
Txhua leej kuj------------paub txog hnub Chiv
Ntawm leej txiv--------------Zoo Tswv Zov Yaj
Txoj kev tshaj----------------cev Tswv Ntuj lus
Kom txhua tus--------------ua neeg dawb huv
Hais txog kuv------------------yog Yaj Xyu Tub
Thiaj muab qhub-------------nthuav qhia li no
Lwm zaus tso--------------mam rov tham dua
Hais tsis txhua--------------los thov zam txim
Yeeb yog vim------------tsis muaj caij nyoog
Hais tau toog-----------------nej lub pob ntseg
Txhob pov tseg------------khaws ua dab neeg
Txoj kev ntseeg-----------nyuab npaum li cas
Kom xeev ras--------------nco muaj peb thiab
Kev cai tshiab--------------peb teev Tswv Ntuj
Ib tug txuj---------------------yeej teev ib yam
Ces kuv tham----------------li no xwb nawb./.



Source : cevenol.centerblog.net sur centerblog.