Home
Yog koj tso siab rau Yesxus lub siab ntshiab, nws yuav ua koj siab kaj lug 
| |
 |
Rieux La Pape, Fab Kis teb 13/06/2011 |
HAWM TXOG TXOOJ TUB THIAB NIAM TXOOJ TUB UAS YOG PEB TUS THAWJ TSWJ LUB KOOM HAUM KEV NTSEEG CATHOLIC NTAWM PEB COV HMOOB NYOB LUB NROOG LYON.
Kuv zoo siab uas neb ho muaj lub siab loj siab dav los tuav peb cov Ntseeg yam tsis muaj teeb meem, mas peb sawv daws zoo siab heev.
Txij ntawm no kuv yuav piav me ntsis txog Tswv Ntuj tau pab kuv yam uas kuv pom kiag ntawm kuv lub qhov muag mas zoo li no. Niaj hnub no tsis muaj ib tug twg yuav pom tau Huab Tais Ntuj lub ntsej muag thiab tsis paub Huab Tais Ntuj lub npe. Peb hais raws li nyob hauv Ntawv Faj Lem hais tias Huab Tais Ntuj lub npe yog As Fas thiab Aus Mes Nkas no thiab Huab Tais Ntuj tau pab kuv yam ua rau kuv muaj ntsej muag nyob ntawm cov ua dab thiab cov kuv tau nrog lawv sib cav hais txog txoj kev ntseeg Tswv Ntuj.
NQE IB: Tswv ntuj lub Hwj Huam muaj zog tas nrho.
Xyoo 1968-69 peb mus ua peeb zeej nyob rau Hwm Phab Me (Xieng Lom), yog thaum lub 5 hlis ntawd ces tshav tshav ntuj peb tsis tau dej haus, vim muaj nyab laj zov peb lub qhov dej lawm. Ces peb tus Nais Cas txawm hais lus yam saib tsis taus peb cov ntseeg. Nws txawm hais rau kuv tias :
"Yawg Neeb aw ! Koj thov koj tus Huab Tais kom tso dej los rau peb haus los mas."
Ces txawm muaj ntsis meem txom kuv. Kuv txawm teb yam tias yog ib cov lus khav theeb rau Nais Cas Rwg Vaj hais tias :
« Koj kav tsij txhib koj cov peeb kom lawv muab cov xab mos txwv coj mus cug thiab muab cov tsho kauv nag khi ua plaub ceg kom ncaj rau hauv cov thawv mos txwv, ib pliag no xwb yuav los nag."
Ua cas kuv hais li ntawd tas ib pliag kwv yees li 10 fiab xwb, ntuj tsaus ntais txawm los nag hlob hlob tsis tu li lawm lauj. Ces Nais Cas rov qab qw qw tias :
"Yawg Neeb aw ! kav tsij thov koj tus Huab Tais kom nag tu lauj, peb tej chaw pw dej meem tag lawm ntshai ib ntsis peb yuav tsis tau chaw pw lawm lauj Yawg Neeb. »
Ces kuv txawm teb rau nws tias :
« Ib pliag xwb nag tu lawm os. »
Ua cas nag cia li tu nrho lawm tiag. Lub sij hawm ntawd cov txiav dab muaj kuv thiab Xab Ham wb xwb, hos dua li cov ces puav leej yog cov coj dab xwb.
Tsis ntev tom qab, peb cov uas xub xub mus ntawd, nyob puv hnub nyug lawm, lawv yuav xa ib pab tuaj hloov peb kom peb rov qab los mus rau Ban Muang. No ces taig kis ntawd kuv ho ua ntej loo, peb los thaum 6 teev sawv ntxov. Peb los mus pheej pom Nyab Laj tej chaw uas lawv zov yuav tua peb tshiab khwb khiv xwb tiam sis lawv ho tsis tua peb li. Kuv ua ntej li ntawd los mus li 3km, ces kuv li nab thib ua ntej tas, kuv zam kiag kom Xab Ham ua ntej no Xab tsis kam ces thiaj li muab ib tug Nplog hu ua Phees no laub ua ntej. Thaum lub caij ntawd yog lub 7 hli ntuj ib nrab, mas txoj kev ntawd kuj nplua heev. Ces Nais Cas Rwg hais rau Nplog tias: “Ua ntej mas dhia dhia xwb Nyab Laj thiaj tua tsis raug nws.” Ces Phee ua ntej kiag li 600 mev xwb Nyab Laj tua kiag raug nws ob tsem quav npab thiab ib sab plab ces Phee ntog kiag rau hauv qab ke lawm. Peb los mus 6 leej tab sis muaj 5 rab phom xwb hos Nyab Laj Hmoob muaj li 40 leej. Peb sib tua ib pliag, kuv cov kwv luag, lawv khiav tag tshuav kuv ib leeg tiv Nyab Laj tau 1 teev. Kuv thiaj li tau khiav caum lawv qab los pom tus Nplog, Phee, tseem tsis tau tuag. Kuv thiaj los coj lawv, peb rov qab mus muab tau Phee coj los lawm. Tiam sis hmoov tsis muaj, peb cawm tsis tau nws vim raug phom sab heev thiab tau ib hnub ob hmos, nws ua kas ntau dhau lawm peb thiaj li pab tsis tau nws.
NQE OB: Lub Cim Ntxuav.
Peb mas txiav dab los ntev heev lawm, txiav puag thaum nyob Npam Naj Vas 1959 uas Xyooj thiab Txiv Plig Vaj Pov nkawd tuaj. Tab sis xyoo 1962 Luang Nam Thas tawg, peb nrog Txiv Plig lawv khiav mus nyob Pham Dees (Thaib teb) tau ob xyoos, ho khiav los nyob rau Naj Ngos nrog Txiv Plig lawv thiab. Tab sis tseem tsis tau txais lub Cim Ntxuav.
Kuv thiab kuv tsev neeg, peb txais lub Cim Ntxuav nyob hauv lub Yeej Thoj Nam Ban Tong, Thaib teb, xyoo 1978. Kuv yeej paub tseeb lawm tias peb sawv daws yuav tawm hauv Yeej Thoj Nam tuaj mus txawv teb chaws xwb xwb li thiaj tau thov Xib Hwb Nyiaj Kaub Ntsum Teem Yaj (Thawj thawj tus Tub Tsob Hwb Hmoob nyob Los Tsuas thiab Thaib teb) ua lub Cim Ntxuav rau peb.
Hnub kuv ntxuav Plig tas, hmo ntawd kuv pw, kuv ua npau suav pom ib chaws ntaub pag dawb hlauv saum ntuj los zoo li txoj viav vias ncig kuv. Ces kuv txawm mus tuav nkaus txoj viav vias ntawd, ua cas tos kuv nco ces kuv mus pom lawv tab tom noj ib rooj mov tos kuv. Tab sis cov neeg ntawd kuv yeej tsis paub leej twg li (pom yog Hmoob xwb), kuv tsuas paub Vam Neeb Thoj tib leeg xwb (Nais Xaim Txoov Neeb, 2011 no nws nyob rau USA).
NQE PEB: Tswv Ntuj txuag kuv txoj sia.
Xyoo 2003, kuv tuaj Orléans tuaj mus rau Lyon (Fab Kis teb), kuv tsav ib lub tsheb NISSAN TURBO DIASEL tuaj mus txog tom ntug Rouane (ib thaj chaw com kawb, kev me thiab nkhaus heev), kuv lub tsheb tuam yas qab ke, ua rau kuv lub tsheb mluav tag nrho pem taub hau thiab ob lub qhov rooj mluav tag nrho, lub coffre (xab rau khoom) nram qab qheb plho, kuv lub phij xab thiab cov khoom nram qab dhia tawm tag nrho, tiam sis kuv kuj tsis raug mob dab tsi li.
Nyob hauv 3 nqes no, kuv pom hais tias:”Kuv txoj kev ntseeg Ntuj ntawd yeej muaj Tus Tswv Tsim tiag thiab yog yus ntseeg ruaj khov lawm mas yeej pab tau yus tiag tiag no. Kuv txoj kev ntseeg no ruaj thiab khov nyob hauv kuv lawm tiag. HAIS LI NO RAU NEJ XWB.
Sau npe: Thoj Laj Neeb,
nyob Rieux-La-Pape, Fab Kis teb.
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
