TXIV NEEJ TXOJ HAUJ LWM

TXIV NEEJ TXOJ HAUJ LWM Sau 4 hlis 2000 tu sau Yaj Zam Nob

Huab tais Ntuj muaj ib tug xwb. Neeg nyob huav lub qab ntuj no, txawm haiv neeg twg kuj xij, thaum pom lawv ua ntoo cuam lub Cim mas yeej paub tias lawv thiab peb yeej coj ib txoj kev ntseeg Ntuj. Kuv txoj kev ntseeg Ntuj, zoo li Yes Xus tau hais tseg tias: "Cov ntsev." Kuv zoo li cov ntsev, tsis pub kom tsuag. Kuv txais txoj kev ntseeg, xyoo 1953 nyob rau Roob Nyuj Qus, teb chaws Los Tsuas. Kuv tsuas coj txoj kev ntseeg xwb. Kev pab kwv tij neej tsa, txoj kev ib siab ob qeg, kev tshoob kos, peb tseem sib pab li qub.
Peb ua neej nyob, peb cov txiv neej yuav tsm paub peb txoj hauj lwm: Ua ib tug txiv neej, yuav tsum tau paub Hmoob tej txuj, yam li: kev neeb kev yaig, kab tshoob kev kos, kev ploj kev tuag. Hmoob tej txuj no mas kuv tau kawm txhij kawm txhua. Yog yuav muab tej txuj nov los tham mas yuav tham 3 hnub 3 hmos los tham tsis tag.
Peb Hmoob thaum muaj tub muab nyab, tsis zoo li tej kev ua luam tsiaj luam txhuv. Yuav ua muaj kab muaj kev. Yog li yuav tau kawm. Lus tshoob kos: "Luag tias: wb tub rog tub ruag, wb tsis pab los wb muaj tub muab nyab."

Hos lus kab mob kev tuag: "Luag tias: wb tub rog tub ruag, wb tsis ua los ib leeg muaj ib daig lag zeb yuav nplua." Peb ua neej nyob yuav tau sib pab. Peb ua neej nyob tsis muaj ib tug yuav dim ntawm txoj kev txom nyem. txawm yus yog nom yog tswv los yeej yuav tuag ib hnub. Thaum luag tau kev tsaus ntuj, yus mus pab luag, yim ntawd thiaj li yuav muaj kev kaj, tau kev dim pa.

Kev ua neeb ua yaig, mas yeej tssi pom ib qho tseeb. Nyob li tias: Luag muaj ib tug mob, luag kom yus mus ua neeb kho, mas yus yuav ntsuas zoj saib tus neeg ntawd ua neeg daj ntseg, kho siab. Thaum yus ua neeb ces yus cia li kwv yees muab nws tus xyob txhiaj ntawd quas kiag. Yus hais rau nws tias: "Ua siab loj, kuv muab koj tus xyob txhiaj quas lawm." Thaum tus neeg ntawd hnov li ntawd, nws kuj zoo siab ces zoo li nws tus mob zoo lawm.

Kuv mas Hmoob tej txuj, kev neeb yaig, kab tshoob kev kos, kab mob kev tuag, nyuag kwv txhiaj, kuv txawj txhij txawj txhua. Txij kuv los ua neeg ntseeg, mas kev neeb kev yaig kuv tso tseg.
Hais txog "Txiv xaiv Foom Kom," mas tus tsis nyiam los nws tsis hais los tau. Tus ho nyiam raug, los nws ntiav luag hais yeej tsis muaj txhaum dab tsi.

Txiv xaiv foom kom, yog thaum ub muaj ib tug yawg yug tau 3 tug me nyuam tub. Tsis tsheej tsis kiab li. Niaj hnub mus cuab yij, cuab noog. Leej txiv hais tsis tau, leej txiv hais rau cov tub tias: "Hnub twg kuv tuag, mas nej mus thov tus Yawg Xeev txwj tuaj pab ntuas nej."
Nyob nyob muaj ib hnub, tus yawg ntawd txawm tuag lawm. Cov tub tau mus thov tus Yawg Xeev txwj tuaj sawv lawv txiv chaw ntuas lawv. Yawg Xeev txwj tias: "Thaum nej txiv ua neej nyob, nej txiv hais nej; nej twb tsis mloog. kuv hais nej ho yuav mloog? Tsis tuaj ntuas."
Cov tub teb tias: "peb txiv tau xaiv koj laiv, koj yuav tau pab xwb."
Ua li mas, Xeev txwj thiaj li tias: "Yog li, npaj ib pluag rau kuv noj tso, kuv mam ntuas."
Lawv tau npaj ib pluag rau Xeev Txwj noj tas. Xeev Txwj ntuas pab tub ntawd. Muab lawv txiv pam tas, cov tub lub neej cia li zoo, ua neej xws luag. ua li ntawd, mas thiaj li ciaj tau lawm ib txoj kev cai xwb. Tsis yog ua dab dab tsi li.