Thuam txoj kev ntseeg thiab thuam Tswv Ntuj

Kuv ntsib ib tug pojniam Hmoob, nws hais rau kuv tias, tej niag kev ntseeg ntuj yog dag xwb, nws txawm ntxuav plig tas los nws yeej tsis ntseeg, tsuas yog nws niam nws txiv muab nws ntxuav plig thaum yau ces nws lam tuaj koom tej laus kev noj haus kom lawv zoo siab xwb, yog teev ntuj thaum twg nws yeej tsis kam mus txais Yesxus lub cev , vim tej ntawv yog dag xwb. Neeg nim mus teev ntuj txhua hnub chiv, nws li nws yeej tsis mus thiab nws tsis ntseeg tias muaj tseeb, tsuas yog neeg lub tswv yim xwb. Nws tsuas ntseeg tau nws tus kheej, nws tus txiv thiab nws cov me nyuam xwb no. Nws hais khav theeb ntxhias rau kuv tias nws yeej yog ib tug neeg thuam cov neeg ntseeg, vim nws tsis pom yam peb ntseeg muaj tseeb. Kuv hais txog Huab Tais Yesxus pub txiaj ntsim rau kuv tau ntsib Huab Tais Yesxus hauv kuv lub siab, mas nws tseem ua qhov muag hle hlo rau kuv. Nws thuam kuv, thiab nws luag nrov kawg. Nws khav heev, nws ua rau kuv nyo hau twj ywm thiab kuv tsis hais lus ntau nrog nws, kuv tsuas muaj qhuas nws tias tsuav nws kaj siab lug xwb, mas nws tseem haj yam muaj phlus. Tus pojniam no, nws kuj yog neeg zoo nkauj cev yiag ntxiag, nws tus txiv yog neeg muaj neej mom, nkawv puav leej yog neeg txawj ntse. Tiam sis thaum nws hais nws tej lus ntawv rau kuv tas ,ces kuv cia li pom nws tsis muaj nqis , txawm zoo nkauj thiab ntse npaum twg los cas ua rau kuv yuav khuv leej nws thiab kuv lub kua muag yuav poob, vim kuv thov ntuj tsis tseg rau nws. Twb tau ob vas thiv no lawm los kuv tseem nco ntsoov thov ntuj rau tus pojniam ntawv. Tej zaum kuv yuav tsis ntse npaum tus pojniam ntawv, kuv yuav tsis zoo nkauj npaum tus pojniam ntawv, kuv yuav tsis muaj neej mom npaum tus pojniam ntawv, tiam sis kuv qhov zoo tshaj ntawm tus pojniam ntawv yog kuv tsis thuam Tswv Ntuj, kuv tsis khav theeb, thiab kuv txo kuv me me ntawm tus pojniam ntawv xub ntiag, kuv tsis cam thawj rau nws. Qhov no kuv tau txo kuv qis kawg nkaus ntawm nws kom nws siab nqig, nws muaj feem thuam thiab luag kuv vim txoj kev ntseeg. Tus pojniam ntawv saib kuv saum daiv tawv, tab sis kuv saib nws hauv kuv nruab plawv. Saib saum daim tawv, kuv yuav zoo nkauj thiab ntse tsis npaum nws, tiam sis saib hauv nruab plawv kuv dawb huv thiab kuv tsis muaj txhaum vim kuv tsis thuam tsis nyhos nws li nws nhyos kuv. Qhov no ua rau kuv zoo siab twj ywm tias kuv yeej nws , wb rov sib ntsib chim puav, kuv tsa muag saib taus nws, tiam sis nws dauv muag tsis kam saib kuv kiag li.


Kuv cov lus zoo hnub no kuv tsis tau hais rau tus pojniam ntawv, vim kuv zam rau nws, vim kuv tsis xav kom nws thuam Tswv Ntuj yog:

Cov neeg tsis muaj kev ntseeg, nej khav tau thaum nej noj qab nyob zoo, thaum nej muaj nyiaj muaj txiaj, thaum nej txawj ntse xwb, tiam sis thaum nej yuav tuag, nej yuav tsis muaj cuab kav khav tias nej yuav ciaj rov los. Nej lub siab muaj hlob, nej tsis muaj kev ntseeg tob, nej kev txawj ntse ua rau nej twv tus Tswv tsim nej, nej tsuas paub txij nej qhov muag pom xwb, nej yuav tsis paub txog yam nej qhov muag tsis pom. Nej zoo siab hnub no, vim nej tsuj tau luag rau hauv nej xib taws thuam tau luag thaum nej tseem muaj txoj sia, tiam sis hnub nej yuav tuag nej yuav sawv tsis taus los qhuas nej tus kheej thiab nej lub suab quaj suab ntshaj yuav los plooj nej lub suab luag. Tswv Ntuj yuav tsis lees paub nej tib yam li nej tsis lees paub Tswv Ntuj. Nej tsuas xav txog nej lub neej muaj daim tawv xwb, nej puas tau xav txog nej lub neej tsis muaj daim tawv? Nej ua zoo xav nawb, nej xav tias lub neej no nej zoo sthaj Tswv Ntuj lawm, tiam sis hnub nej tuag nej puas tseem khav tau tias nej loj tshaj Tswv Ntuj thiab? Nej txoj kev ntseeg tsawg thiab cuav hnub no yuav muab nej muag rau dab ntxwj nyoog, nej puas yeem muab nej txhais tes rau saum hluav taws li 1 nas this? yog nej tsis yeem ces thaum dab ntxwj nyoog coj nej mus ces tsis yog yuav muab nej txais tes hlawv 1 nas this saum hluav taws xwb, tiam sis yog yuav muab nej lub cev puag hauv kaw taw nto saum tob hlawv txhiab mus ib txhiab ib txhis tsis muaj hnub kawg. Yog nej yeem li no ces nej thuam Tswv Ntuj thiab nej luag nej mas mog. Cov neeg ntseeg cuav thiab khav txhias thuam luag diam uas muaj ib hnub nej mam paub ces yuav lig dhau lawm. Kheev lam txawm nej tsis muaj kev ntseeg, nej khav theeb ,nej thuam Ntuj, tiam sis nej lam paub txo nej kom qis mad Tswv Ntuj kuj yuav txawj txhawb nej me me thiab mad. Kuv nsthai tsam nej tsis paub txo nej me me li ces Tswv Ntuj txawm txhawb thiab pub txiaj ntsim npaum twg los nej txoj kev muaj hlob kev khav theeb thaiv nej siab ntsws nej qhov muag tag lawm ces nej yeej tsis txais tau Tswv Ntuj lub txiaj ntsim ib qho li lau. Zoo li no xwb tseem muaj phlus khav tias Ntuj Tsis muaj tseeb vim nej qhov muag tsis pom kiag. Yog nej lub siab ntsws zoo li no xwb ces txawm ntuj pub los nej yuav tsis muaj hnub pom mog.

Maiv Tooj......wow zoo siab rau cov lus koj tuaj tso hauv no, kuv twb tsis nco qab txog li koj hais saum toj no lawm. Muaj xav los yeej yog kiag li koj hais lawm. Tswv Ntuj coj peb kev tawg kom khiav dim hauv suav teb los mus, Tswv Ntuj tseem pub cov muaj hmoo los nyob teb chaws vam meej txog niaj hnub no lawm thiab, txheej dhau txheej, tiam dhau tiam, ib txhia laus tsis tau dua toj ua muaj tej kev ntxhov siab no nyob rawv hauv lawv nruab siab , lawv thiaj niaj hnub mus hawm ua ntuj tsaug, los cov txheej nim no txawm siv khav theeb thuam Tswv Ntuj lawm. Nyuam qhuav tau kawm ntaub kawm ntawv txawj ntse mus nrog luag sib tw khwv kom tau nyiaj xws luag xwb teb luag chaw xwb los txawm siv khav cuag li lawv ntse heev, tsis tos tsis vam txog Tswv Ntuj. Hmoob aw! puas tau muaj cov uas txawj ntse , muaj nyiaj muaj txiaj uas mus tsim tau tej lub tsev loj faj cev tes hlub peb haiv Hmoob cov me nyuam txom nyeem nyob los tsuas ? Nej puas tau txawj ntse txaus mus tiv thaiv tej tub tej ntxhais kom txhob raug cov niag yawg thaub laus mus ntxias lawv lub cev siv? yog txawj ntse thiab hlub tau txhua tus kom sib hwm ces cov hluas yuav tsis yuav cov niag thaub laus laus lawm. Peb twb kho tsis tau peb Hmoob lub neej kom sib hwm li es txawm siv thuam Tswv Ntuj. Thov kom Huab Tais Yesxus hnov peb txhua tus me nyuam neeg me me no lub suab hu suab thov los pab rau cov neeg txawj ntse kom lawv peb tau cawm tau peb haiv Hmoob lub koob npe, thiab kom lawv tig los hwm Tswv Ntuj.

Thov caw nej nyeem Ntawv Faj Lem txog " Kev Tsiv", nws zoo nkaus li Peb Hmoob lub neej tawg rog zaum no (1975) ntag.
Tus kab mob uas tau noj cov His Xas Lais lub siab thaum lawv tsiv los nyob teb chaws Suab Puam tau ntau caum txhiab xyoo no kuj tseem tsis tau tuag, tseem los noj Peb Hmoob lub siab tib yam nkaus thiab. Nej nyeem mas tu siab kawg, txaus los kua muag...

Nias nov mus nyeem ====> http://www.hmongrpa.org/pdf/?pdf=KevTsiv.pdf