Nkauj Tshais nkauj hmo

**Maiv Tooj** 2nd December 2009, 6:55 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°1

Nkauj Tshais nkauj hmo

Post Maiv Tooj 2nd December 2009, 6:55 am

HAIS NKAUJ HMO = Zaj 1

(Lub suab hais raws li nkauj pam tuag)

Hloov cov npe raws phiaj neeg :

= Yawm liag
=Tub nraug laj
=Puj liag
=Nkauj qas mim

1= Npliaj mog si saub, saub sis laus I aid. Yog tau hnub txheej tshoj thaum ub, ntuj hnub puag thaum ntxov. Raug tau qas tsis raug, raug tau ntuj thiab teb cam sim vos, li raug tau Vaj Tswv Ceeb I los, nov I sub laus.

= Npliaj mog si saub, saub sis laus I aid. Yog tau hnub txheej tshoj thaum ub, ntuj hnub puag thaum ntxov. Raug tau qas tsis raug, raug tau ntuj thiab teb cam sim voos, li raug tau Vaj Tswv Ceeb I txoos, nov I sub laus.

2= Npliaj mog si saub, saub sis laus I aid. Raug tau qas tsis raug, raug tau lub Ntuj txawm qas zoj ceeb I los khav li raug tau qas tsis raug, raug tau neej thiab dab ceeb I los kav, nov I sub laus.

= Npliaj mog si saub, saub sis laus I aid. Raug tau qas tsis raug, raug tau lub Teb, txawm qas zoj ceeb I los txog, li raug tau qas tsis raug, raug tau neej thiab dab ceeb I los nyob, nov I sub laus.

3= Npliaj mog si saub, saub sis laus I aid.
Yog tau Ntxwj sib qas Nyoog siab tsis zoo, Ntxwj sib qas Nyoog tso plhuav lub mob coj lub tuag poob lis nthav rau N…tej ntshua siab, N…li khaws tau tuag, nov id sub laus.

= Npliaj mog si saub, saub sis laus I aid.
Yog tau Ntxwj sib qas Nyoog siab tsis tiaj, Ntxwj sib qas Nyoog tso plhuav lub mob coj lub tuag poob lis nthav rau N…tej ntshua plawv, N…li khaws tau ploj, nov id sub laus.

4= Npliaj mog si saub, saub sis laus I aid.
Ciav tav nov, N…seev qas yees tias: ua lub neej nyob lawm ntiaj teb nrog luag khwv niaj txhiab qas txhis los tsis tau niam ib ce zoo nrog luag hnav, cas zaum no N…ces ntaj ntsug mus tuag tas, cas li tshuav tus ntsuj qas plig yuav sawv list sees mus nrog lawm Vaj Tswv nyob pem Ntuj kag, nov id sub laus.

= Npliaj mog si saub, saub sis laus I aid.
Ciav tav nov, N…seev qas yees tias: ua lub neej nyob lawm ntiaj teb nrog luag khwv niaj txhiab qas txhis los tsis tau niam ib ce zoo nrog luag coj, cas zaum no N…ces ntaj ntsug mus tuag tas, cas li tshuav tus ntsuj qas plig yuav sawv list sees mus nrog lawm Vaj Tswv nyob pem Ntuj hu, nov id sub laus.

5= Npliaj mog si saub, saub sis laus I aid.
Ciav tav nov, yog tau N…nws seev yuj yees tias: cas txhia niaj mus txhia xyoo. N…nrog N…koom zoj ib plaj mus qoob muab, cas xyoo nov N…yuav nrog lawm N…sawv tuaj mus sib faib cuab, nov id sub laus.

= Npliaj mog si saub, saub sis laus I aid.
Ciav tav nov, yog tau N…nws seev yuj yees tias: cas txhia niaj mus txhia xyoo. N…nrog N…koom zoj ib plaj mus qoob ncig, cas xyoo nov N…yuav nrog lawm N…sawv tuaj mus sib faib yig, nov id sub laus.

6= Npliaj mog si saub, saub sis laus I aid.
Cas txhia niaj los txhia xyoo, N…nrog N…ua qoob qas lias tuaj mus puv txhab, zaum nov N…nws qaij qaug yuav los mus, N…puas yuav muab tau tsav yam nuj dab tsi rau N…hnav coj mus ua lawm lub mus neej tshiab, nov id sub laus.

= Npliaj mog si saub, saub sis laus I aid.
Cas txhia niaj los txhia xyoo, N…nrog N…ua qoob qas lias tuaj mus puv tsev, zaum nov N…nws qaij qaug yuav los mus, N…puas yuav muab tau tsav yam nuj dab tsi rau N…hnav coj mus ua lawm lub mus neej ntev, nov id sub laus.

7= Npliaj mog si saub, saub sis laus I aid.
Cas N…seev qas yees tias: txhia niaj mus txhia xyoo cas lub ntuj tsaug rov qas tshaws, N…yuav nrog N…ncig qas yeev rau lub vaj qib, zaum nob N…cev ntaj sib lis ntsug ploj qaug ceeb yuav mus ces, ntshai yuav yog xab nyeej lwm tiam li rov los sib ntsib, nov id sub laus.

= Npliaj mog si saub, saub sis laus I aid.
Cas N…seev qas yees tias: txhia niaj mus txhia xyoo cas lub ntuj tsaug rov qas plho, N…yuav nrog N…ncig qas yeev rau lub vaj ntsuas, zaum nob N…cev ntaj sib lis ntsug ploj qaug ceeb yuav mus ces, ntshai yuav yog xab nyeej lwm tiam li rov los sib cuag, nov id sub laus.

8= Npliaj mog si saub, saub sis laus I aid.
Cas nkauj hnub ib vuag ci tuaj txog, nraug hli ib vuag ci tuaj ziab, N…ua neej nyob tau noj Yes Xus lus nrog Yes Xus thooj siab, zaum no N…cev ntaj ntsug qaij qaug los mus yuav nrog Vaj Yes Xus nce hlo mus nyob lawm pem Ceeb Tsheej kiab, nov id sub laus.

= Npliaj mog si saub, saub sis laus I aid.
Cas nkauj hnub ib vuag ci tuaj ziab, nraug hli ib vuag ci tuaj txog, N…ua neej nyob tau noj Yes Xus lus nrog Yes Xus thooj plawv, zaum no N…cev ntaj ntsug qaij qaug los mus yuav nrog Vaj Yes Xus nce hlo mus nyob lawm pem Ceeb Tsheej chaw, nov id sub laus.

9= Npliaj mog si saub, saub sis laus I aid.
Ciav tav nov N…cev cwj mog nrog av luaj tshau sib puag ntub, tus ntsuj duab plhis lis plho nce hlo Ceeb Tsheej ntug, ntuj hnub tig los txog, teb hli ci los kaj, ces N…nrog poj yawm txwv koob txum zoj lub Teev Faj, li nrog, Vaj Yes Xus ua Vaj, nov sub id laus

10. = Npliaj mog si saub, saub sis laus I aid.
N…ua neej nyob lawm ntiaj teb, nws tau npaj zias lub siab tus, nws tau tsis siab rau Vaj Yes Xus tus Ntoo ciaj ceeb, Vaj Tswv li txheeb ntaub nthuav ntawv hu nws npe sawv mus pem Ntuj hu, kom niaj txhiab ib txhis N…tau nrog Vwj Tswv nyob kaj lug, tsis muaj caij tag, nov sub id laus.

= Npliaj mog si saub, saub sis laus I aid.
N…ua neej nyob lawm ntiaj teb, nws tau npaj zias lub siab ncaj, nws tau tsis siab rau Vaj Yes Xus tus Ntoo ciaj ceeb, Vaj Tswv li txheeb ntaub nthuav ntawv hu nws npe sawv mus pem Ntuj kaj, kom niaj txhiab ib txhis N…tau nrog Vwj Tswv nyob kaj nrig, tsis muaj caij kawg, nov sub id laus.

Last edited by Maiv Tooj on 2nd December 2009, 7:00 am; edited 1 time in total

**Maiv Tooj** 2nd December 2009, 7:00 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°2

Re: Nkauj Tshais nkauj hmo

Post Maiv Tooj 2nd December 2009, 7:00 am

NKAUJ ZOV HMO ZAJ 2

HLOOV RAWS TUS NEEG:

= Puj liag, niam nkauj lag, Nkauj qas mim
= Yawm liag, tub Raug laj

1= Npliaj mog siv saub! saub siv lug neej yuav saub es.
Yog tau lawm ntiaj teb no ces tej qaib noog ua neej txoos yees nyob yuav tsis ntshai niaj tus dab tsi; tsuas yuav ntshai liaj kus ntshai liaj dav ( nws puj, - nws yawm) liag li laus ua neej txoos yees nyob rau ntiaj teb no ces tsis ntshai niaj tus dab tsi os; tsuas yuav ntshai ruj lis rwg lub mob coj lub ntsaj nov ib sub es om.

= Npliaj mog siv saub! saub siv lug neej yuav saub es.
Yog tau lawm ntiaj teb no ces tej qaib noog ua neej txoos yees nyob yuav tsis ntshai niaj tus dab tsi; tsuas yuav ntshai luag cuav voj mus cuab hlua os ( nws puj, - nws yawm) liag li laus ua neej txoos yees nyob rau ntiaj teb no ces tsis ntshai niaj tus dab tsi os; tsuas yuav ntshai ruj lis rwg lub mob coj lub tuag nov ib sub es om.

2 = Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus ua neej txoos yees nyob rau ntiaj teb no nws xav tias tsis mus ua los ntshai nyob tsam tsis tau noj nis ( nws puj, - nws yawm) liag li laus yuav mus leg nruj nraim nws lub luaj qoob rov nram toj hos, cas yuav mus klhaws tau zaj mob lub taug los coj ces nws yuav coj cev los qaug txaj hos coj hau los qaug ncoo yuav los ua zaj mob ntxhia li ntxhis nyob tsis zoo, nws txoj sia txoj pa li tau sis laug tu nov ib sub es om.

= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus ua neej txoos yees nyob rau ntiaj teb no nws xav tias tsis mus ua los ntshai nyob tsam tsis tau noj nis ( nws puj, - nws yawm) liag li laus yuav mus leg nruj nraim nws lub luaj qoob rov nram roob, cas yuav mus klhaws tau zaj mob lub taug los ntoog ces nws yuav coj hau los qaug ncoo coj cev los qaug txaj es cas yuav los ua zaj mob ntxhia lis ntxhis nyob tsis kaj, ces nws txoj sia txoj pa li tau sis laug yaj nov ib sub es om.

3= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus ua neej txoos yees nyob rau ntiaj teb no nws tsuas yuav tau hau li ntsoov mus leg nws lub luaj qoob siav daj lis tseem lawm niaj ib huab ( Nws puj...Nws yawm) liag li laus ua neej txoos yees nyob rau ntiaj teb no ces nws yuav tau mloog li ntsoov Vaj Yes Xus lo lus qhuab nov ib sub es om.

= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus ua neej txoos yees nyob rau ntiaj teb no nws tsuas yuav tau hau li ntsoov mus leg nws lub luaj qoob siav daj lis tseem lawm niaj ib ntsug ( Nws puj...Nws yawm) liag li laus ua neej txoos yees nyob rau ntiaj teb no ces nws yuav tau mloog li ntsoov Vaj Yes Xus lub suab hu nov ib sub es om.

4= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus ua neej txoos yees nyob rau ntiaj teb no nws tsuas yuav tos li ntsoov Vaj Yes Xus yuav los sau nplej liag nplej teb mus nce thawv, yuav sau nplej nplog nplej npluag mus pov hlawv, yuav sau nplej ntshiab nplej txhuv mus nce phawv yuav sau tau ( nws puj, - nws yawm) liag li laus cev ntsuj pag mam nrog Vaj Yes Xus nce mus lawm li zawv yuav mus nyob kaj lug tag niaj txhiab ib txhis tsis muaj caij kawg nov ib sub es om.

= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus ua neej txoos yees nyob rau ntiaj teb no nws tsuas yuav tos li ntsoov Vaj Yes Xus yuav los sau nplej liag nplej teb mus nce thawv, yuav sau nplej nplog nplej npluag mus pov kub nyhiab, yuav sau nplej ntshiab nplej txhuv mus nce phawv yuav sau tau ( nws puj, - nws yawm) liag li laus cev ntsuj pag mam nrog Vaj Yes Xus nce mus lawm li zawv yuav mus nyob kaj lug tag niaj ib txhiab tsis muaj caij kawg nov ib sub es om.

5= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus ua neej txoos yees nyob rau ntiaj teb no ces, nws tsuas yuav mloog ntsoov Vaj Yes Xus lo lus qhuab, zaum no nws pluj ceeb qaug los mus os! Nws yuav vam txog Vaj Yes Xus tus Ntoo Cuam ciaj ceeb coj lawm nws laus duab nov ib sub.

= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus ua neej txoos yees nyob rau ntiaj teb no ces, nws tsuas yuav nrog Vaj Yes Xus thooj siab mus koom cev, zaum no nws pluj ceeb qaug los mus os! Nws yuav vam txog Vaj Yes Xus tus Ntoo Cuam ciaj ceeb coj nws kev nov ib sub.

6= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus pluj ceeb yuav los mus es, nws tsuas yuav hnav tau nws lub tsho tshaj sab plooj ntaub mag os! Nws laus tsuas yuav tshais roj li nrwb lis nruam yuav nce hlo mus nrog Vaj Yes Xus koom noj ib roog tshoob nyob puag pem Ntuj kag nov ib sub es.

= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus pluj ceeb yuav los mus es, nws tsuas yuav hnav tau nws lub tsho tshaj sab plooj ntaub dub es nws laus tsuas yuav tshais roj li nrwb lis nruam yuav nce lis hlo mus nrog Vaj Yes Xus koom noj ib roog kos nyob puag pem Ntuj ub nov ib sub es.

7= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus pluj ceeb yuav los mus os, nws tus roj tus ntshav ces yuav nchuav ntws mus xyaw tag ntiaj teb no peb txheej peb tis twv av mus luaj dawb os, nws ntsuj plig mam tuag tsis tag yuav nce hlo mus nrog Vaj Yes Xus zaum pes ywb pes yi lub rooj ntawv es tsuas yuav nrauj lis ncua tag ntiaj teb no txoj kev khwv iab mus khwv daw, txoj kev nyuaj siab mus ntxhov plawv nov ib sub es om.

= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus pluj ceeb yuav los mus os, nws tus roj tus ntshav ces yuav nchuav ntws mus xyaw tag ntiaj teb no peb txheej peb tis twv av mus luaj dub os, nws ntsuj plig mam tuag tsis tag yuav nce hlo mus nrog Vaj Yes Xus zaum pes ywb pes yi lub rooj kub es tsuas yuav nrauj lis ncua tag ntiaj teb no txoj kev khwv iab mus khwv daw, txoj kev tiv tshav tiv nag nov ib sub es om.

8= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus pluj ceeb yuav los mus os, nws cev ntsuj plig mam yuav nce li hlo mus nrog Vaj Yes Xus kawm txuj kawm ci nyob puag pem ntuj kag zoo puav tam li ib lub ntuj hnub qub tawg paj nra lis paug mus ci ntsa nov ib sub es om.

= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus pluj ceeb yuav los mus os, nws cev ntsuj plig mam yuav nce li hlo mus nrog Vaj Yes Xus kawm txuj kawm ci nyob puag pem ntuj tshiab, nkauj hnub nraug hli ci tuaj ziab ua tshav tshiab yuav zoo puav tam li ib ntuj hnub qub tawg paj nra lis paug mus ci ntsa iab nov ib sub es om.

9= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus tsuas yuav tau mus nrog Vaj Yes Xus kawm txuj kawm ci rau yav puag pem ntuj ub. Nws laus yuav nruj rooj teb los saib nrug rooj ntug los xyuas es, cas yuav pom nws tub nws kiv yuav quaj zaj quaj zig rov tom qab nws tub nws kiv tes lauj yuav tuav npauj xyab lauj nas yuav tuav lawm npauj ntawv tsuas yuav xyom theeb xyom tim hlawv tus pa xyab pa ntawv ncho ceeb luj lug lawm tsheej sab lawv nws laus qab. Zoo li nws laus yuav muaj lus foom li zoj tias zaum no nws tub kus nws kiv, nws tub kus nws nyab tsuas yuav ua neej nyob huam vam li ntws xws xub ntab nov ib sub es om.

= Npliaj mog siv saub! saub siv lug neej yuav saub es.
Yog tau lawm ( nws puj, - nws yawm) liag li laus tsuas yuav tau mus nrog Vaj Yes Xus kawm txuj kawm ci rau yav puag pem ntuj i. Nws laus yuav nruj rooj teb los saib nrug rooj ntug los xyuas es, cas yuav pom nws tub nws kiv yuav quaj zoj quaj zig rov tom tsev nws tub nws kiv nws ntxhais nws vauv tsuas yuav tes lauj coj cwj xyab lauj nas tuav lawm npauj ntawv yuav xyom theeb xyom tim hlawv tus pa xyab pa ntawv ncho ceeb luj log lawm tsheej tsuj xa nws lausmus.Nws laus tsuas yuav foom li zoj tias zaum no nws tub kus nws nyab, nws ntxhais nws vauv, nws tub kus nws kiv tsuas yuav ua neej nyob huam vam li ntws xws xub muv nov ib sub es om.

**Maiv Tooj** 2nd December 2009, 7:09 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°3

Re: Nkauj Tshais nkauj hmo

Post Maiv Tooj 2nd December 2009, 7:09 am

Nkauj zaj 2 txuas ntxiv.

TSHOOJ NOV YOG HAIS RAU COV TAB SEEB XWB

Hloov raws tus neeg:

=Nkauj qas mim
=Tub nraug laj
=Nkauj iab
=Txaij nraug txiv tub nruag

1= Npliaj mog sis saub, saub sis laus id aid.
Yog raug tau, N...cev los txoos rau ntiaj teb nyob mus puv niaj puv xyoo.
Zoo li nkauj hnub ib vuag ci tuaj tshiab, nraug hli ib vuag ci tuaj dua.
Yog tau Vaj Yes Xus lub faj huam roos tau N...tus ntsuj duab plhis lis plho nce hlo Ceeb tsheej kiab, nws li tso plhuav, nws qauv cwj mag nrog av luaj dag sib xyaws daws nov sub id laus.

2= Npliaj mog sis saub, saub sis laus id aid.
Yog raug tau, N...ntsuj duab plhis lis plho nce hlo Ceeb tsheej ntug.
Tso plhuav nws cev cwj mag nrog av luaj tshau sib puag ntub.
Ntuj hnub tig los txog teb hli ci tuaj kaj es, N...cev cwj mag yuav sawv tsees nrog poj yawm txwv koob txum zoj lub teev faj li yuav nrog Vaj Yes Xus sawv ua Vaj nov sub id laus.

3= Npliaj mog sis saub, saub sis laus id aid.
Yog raug tau, N...los ua neej nyob lawm ntiaj teb, nws tau tshwj zias lub siab zoo, rau leej tib neeg paub, xyoo no poob nthav nws hnub xyoo nqis los txog, nws ntsuj duab yuav plhis lis plho mus ua dua tsav neej tshiab nov id sub laus.

4= Npliaj mog sis saub, saub sis laus id aid.
Yog raug tau, N...nws los ua neej nyob lawm ntiaj teb nws tau npaj zias lub siab ncaj es, nws tau tso siab lug rau Vaj tswv Yes Xus tus Ntoo ciaj ceeb, Vaj tswv li txheeb ntaub nthuav ntawv hu nws npe kom nws lub cev cwj mag sawv nyob mus ciaj ntug no id sub laus.

5= Npliaj mog sis saub, saub sis laus id aid.
Yog raug tau, N...nws los ua neej nyob lawm ntiaj nrag,
nws tau npaj zias lub siab ntshiab, nws tau tso siab lug rau Vaj tswv Yes Xus tus Ntoo ciaj ceeb, Vaj tswv li txheeb ntaub nthuav ntawv hu nws npe, kom nws lub cev cwj mag sawv tsees nyob rov mus ciaj neeg no id sub laus.

TSHOOJ NO HAIS RAU TXIV NEEJ XWB

1= Npliaj mog si saub! saub siv lug neej yuav saub es.
Yog tau lawm zaum no nws yawm liaj li laus yuav tau nce hlo mus nrog Vaj Yes Xus kawm txuj kawm ci yav pem ntuj ub es, nws yuav tau mus ua Vaj yes Xus leej me tub tes txawj qeeg os nws muaj lus foom lis zoj rov fib qab foom lis zees rov fib lw kom nws tub nws kiv, nws tub kus nws nyab nws ntxhais nws vauv hlob nyob tom qab ua neej huam vam lis ntws mus ciaj tau faj tim huab tais neeg nov ib sub es om.

= Npliaj mog si saub! saub siv lug neej yuav saub es.
Yog tau lawm zaum no nws yawm liaj li laus yuav tau nce hlo mus nrog Vaj Yes Xus kawm txuj kawm ci yav pem ntuj i es, nws yuav tau mus ua Vaj Yes Xus leej me tub tes txawj tes txawj tes ntxuam raj hos nws muaj lus foom lis zoj rov fib qab foom lis zus rov fib lw rau nws tub nws kiv, nws tub kus nws nyab nws ntxhais nws vauv hlob nyob tom qab ua neej huam vam lis ntws mus ciaj hw mus ciaj vaj nov ib sub es om.

2= Npliaj mog si saub! saub siv lug neej yuav saub es.
Yog tau lawm zaum no ces peb txiv nkauj ces hais tag tsis muaj tag nws laus yuav muaj lus foom lis zus rau fab lis zees rau fib lw, kom peb zaj nkauj tawg paj txi txiv rau peb tsoom neeg ntseeg nyob rov lawm ntiaj nrag nov id sub es om.

= Npliaj mog si saub! saub siv lug neej yuav saub es.
Yog tau lawm zaum no ces peb txiv nkauj ces hais tag tsis muaj feb os nws laus yuav muaj lus foom lis zoj rau fib qab foom lis zus rau fib lw, kom peb zaj nkauj tawg paj txi txiv rau peb tsoom neeg ntseeg nyob rov lawm ntiaj teb no es, nkauj ces tsis muaj tag nov id sub es om.

TSHOOJ NOV YOG HAIS RAU COV POJ NIAM XWB

= Npliaj mog si saub! saub siv lug neej yuav saub es.
Yog tau lawm zaum no nws puj liag li laus yuav tau nce hlo mus nrog Vaj tswv Yes Xus kawm txuj kawm ci nyob pem ntuj i, yuav tau mus ua Vaj Yes Xus me ntxhais nkauj ntxawm mus chob koob. Nws puj liag li laus yuav muaj lus foom lis zoj rov fib qab foom li zees rov fib lw rau nws tub nws kis, nws tub kus nws nyab ua neej huam vam lis ntws mus ciaj tau faj tim huab tais neeg nov ib sub es om.

= Npliaj mog si saub! saub siv lug neej yuav saub es.
Yog tau lawm zaum no nws puj liag li laus yuav tau nce hlo mus nrog Vaj tswv Yes Xus kawm txuj kawm ci nyob pem ntuj ub tsuas yuav tau mus ua Vaj Yes Xus me ntxhais nkauj ntxawm mus chob xo. Nws puj liag li laus yuav muaj lus foom lis zoj rov fib qab foom li zees rov fib lw rau nws tub nws kis, nws tub kus nws nyab ua neej huam vam lis ntws mus ciaj tag lawm ib meej nom nov ib sub es om.

TAS