QHUAB KE zaj ntev==> Ntu Ib ( zaj 1)

**Maiv Tooj** 6th November 2009, 4:11 am

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°1

QHUAB KE zaj ntev==> Ntu Ib ( zaj 1)

Post Maiv Tooj 6th November 2009, 4:11 am

Qhuab ke tsim muaj ib zaj xwb. Tab sis ib txhia ho hais tias ntev dhau lawm no ces TP. Cwj Vuam Chiv tau muab ib txhia ntawm zaj nov txiav tawm. Li ntawm kuv yuav tso ob zaj tib si. Tus ho nyiam siv zaj twg los nws siv zaj ntawd.

Yog tus tsis nyiam siv cov zaj Qhuab Ke nov los cia li siv zaj Xa Plig xwb kuj tau.

===> Kev siv

Yog siv zaj Qhuab ke thiab zaj Xa Plig tib si ces xub hais zaj Qhuab ke tag...Ces txuas kiag rau zaj Xa Plig Ntu Ob tib txhij ua ke kiag.

Dua li niaj hnub yuav muaj teev Ntuj rau tus qauv ib hnub ob zaug, sawv ntxov thiab tsaus ntuj. Thaum teev Ntuj tag muaj hais Nkauj Ntshais, Nkauj Su, Nkauj Hmoo nrog.

QHUAB KE Ntu Ib (zaj 1)

* NPAJ ua ntej yuav ua cov kab ke

- 1 TUG NTOO CUAM ME ME TSIS MUAJ HLAU ua tus txhib ntawg
- 1 NTIM DEJ NTSHIAB dej fomm hmoov zoo
- 1 RE NPLOOJ raus hauv ntim dej
- 1TUG CWM CIAB
- 1 DAIM NTAUB DAWB ME ME

1-QHIB LUB TXOOS XA PLIG:

TC= Tus Coj ( Tus coj, xib hwb los txiv plig)
SD= Sawv daws

Sawv daws ua ntoo cuam lub cim: …+… Hu txog Leej Txiv, thiab Leej Tub, thiab Leej Ntuj Plig lub npe. Ua li.

Hais lus thov Tswv Ntuj kom zam txhaum rau tus tas sim neej:

Huab Tais Tswv Ntuj, peb leej txiv siab zoo, N…… yog koj ib tug me nyuam, koj yog tus tau tsim nws cev nqaij daim tawv, koj yog tus muab txoj sia, txoj pa, tus ntsuj plig rau nws. Zaum no txog lub caij nws sawv kev rov los cuag koj lawm. Tab sis, vim nws yug ntawm noob neej lub keeb txhaum los. Thaum nws tseem ua neej nyob, ntshai muaj ntau zaus, nws tau ua ntau yam yuam kev, tau hla koj cov lo lus qhia, tau ua txhaum. Tswv Ntuj txhua yam uas nws tau ua yuam kev, koj txhob teem txim tsub txim rau nws, thov koj cia li zam pub dawb paug rau nws. Thov koj cev tes qhib ntuj ceeb tsheej lub qhov rooj txais tos nws, coj nws mus ua koj ib leej tub tsim nuj, yuav nws los ua koj ib leej ntxhais tsim nqi. Tswv Ntuj peb leej txiv, peb cia siab ntsoov tias: koj yuav zam txhua yam rau nws raws li peb lo lus thov.

Sawv daws sawv nws chaw hais zaj nkauj: Lees Txhaum.

SD: Koj lees txhaum ntawm Tswv Ntuj muaj hwj huam. Ntawm tsoom kwv tij sawv daws: koj lub siab xav txhaum, koj lub ncauj hais txhaum, koj lub cev ua txhaum. Li ntawd, koj vam txog Nkauj Ntshiab Mab Liab, cov Tshiab, cov Leej Ntshiab thiab tsoom kwv tij sawv daws pab thov Huab Tais Tswv Ntuj rau koj.

TC: Thov kom Tswv Ntuj hlub koj, daws koj cov txhaum thiab coj koj mus txog txoj sia nyob mus li.
SD: Ua li.

2-ZAJ THOV HUAB TAIS TSWV NTUJ SO NWS COV TXHAUM POV TSEG:

Txais: Koj lub siab zoo, Huab Tais, koj zam rau nws. Koj lub siab hlub neeg, Huab Tais, koj so nws cov txhaum.

1. Nws ua txhaum rau koj ib leeg xwb. Muaj tej yam koj ntsia yog tsis zoo nws twb ua lawm.

2. Nws paub nws cov txhaum. Nws tsis zais. Nws cia li lees. Nws cov txhaum nyob ntawm nws xub ntiag tsis tseg.

3. Koj ntsia txij thaum nws niam xeeb nws los nws siab dub. Koj saib txij thaum nws yug los nws muaj txim.

4. Koj ntxuav nws kom nws dawb dua daus. Koj muab koj cov dej los yaug nws kom nws ntshiab tuaj.

5. Nws lub siab ntxhov hnyo. Nws cov pob txha ntsoog lis ntxaws. Koj hais tej lo lus zoo rau nws, nws lub siab yuav kaj.
6. Huab Tais, koj tsis txhob ntiab nws mus deb ntawm koj xub ntiag. Koj tsim ib siab huv lis si los rau nws.

7. Koj cawm nws mas nws yuav paub txoj kev lom zem. Koj pub ib lub siab loj rau nws mas nws yuav rov paub txoj kev kaj lug.

8. Nws yuav qhia koj txoj kev lom zem rau cov neeg txhaum. Cov neeg yuam kev yuav rov los cuag koj.

9. Nws muab yam twg txi koj los tsis xis koj lub siab. Nws hlawv yam twg rau koj los koj tsis yeem yuav.

10. Koj tsis luag ib tug neeg kho siab. Koj tsis thuam ib tug neeg lwj plawv. Qhov nws yuav muab txi rau koj yog nws lub plab plaw lwj.

Txais: Koj lub siab zoo, Huab Tais, koj zam rau nws. Koj lub siab hlub neeg.Huab Tais, koj so nws cov txhaum.

3-THAWJ NQE KAB KE XA PLIG

TC: Huab Tais, koj khuv leej yuad!
SD: Huab Tais, koj khuv leej yuad!

TC: Leej Pleev, koj khuv leej yuad!
SD: Leej Pleev, koj khuv leej yuad!

TC: Huab Tais, koj khuv leej yuad!
SD: Huab Tais, koj khuv leej yuad!

Hais ob peb lo lus ua ntej, mam ua cov kab ke xa plig:

Tsoom niam txiv kwv tij neej tsa nkauj muam nraug nus txhua tus, tam sis no peb yuav pib ua cov kab ke xa plig ntu 1 mus. Peb sawv daws yog ib haiv neeg Hmoob, peb nyias mus coj nyias txoj kev ntseeg sib txawv lawm los peb yeej tseem yog ib haiv neeg Hmoob li qub. Nej pom peb ua cov kab ke raws li Hmoob Kav Tos Liv tus cai pam tuag los thov txhua tus muab kev koom tes. Ib txwm los nyob hauv peb Hmoob tej kev cai dab qhuas yeej ua tsis sib thooj, tsis kav thaum koj tuaj txog kuv, koj yoog kiag li kuv dab kuv qhua sib koom tes nroos ua kom tiav, kuv ho tuaj txog koj los kuv tsis thuam, cia li koom tes nroos sib cog leg kom tas. Hnub no, peb yuav ua cov kab ke mus raws lub koom txoos Hmoob Kav Tos liv tus txhooj pam tuag. Thov nej sawv daws txhua tus muab kev koom tes mog. Peb zaj xa plig no ntev kwv yees li 2 teev tej. Thov nej txhua tus muab kev koom tes nrog peb sib cog mloog kom thaum
ua cov kab ke tas.

Ua tsaug ntau

4- CUAB LUB SUAB QHUAB KE. NUG SAIB PUAS YOG NWS TUAG TIAG?

NTEV HEEV YOG OB LEEG TXIV NEEJ SIB HLOO HAIS IB LEEG IB NQES LOS TAU

1. Tav nov, zoo li ntuj nkig teb hav caj sis voos, yeeb vim yog tau hnub txheej tshoj thaum ub, txawm tau lub ntuj los nyob thiaj li xeeb tau koj N…… (tub Nraug laj, niam Nkauj Lag), cev los txoos.

= Tav no, zoo li ntuj nkig teb hav caj sis vos, yeeb vim yog tau hnub txheej tshoj thaum ntxov i, xeeb tau lub teb los txoos thiaj li txawm tau koj N…… (tub Nraug Laj, niamNkauj Lag), cev los nyob.

*** (Txij qhov no mus tas lawm niam ib qib. Ntawm no mus tas lawm niam ib quag no nas)

2. Ua ciav, yuav tsaus ntuj lis zus txog N…… (hmo no, kaj ntug lis zim txog hnub no) koj N…… (tub Nraug Laj, niam Nkauj Lag), ntim tau lub txiaj zam lis zim los pw li ko tuaj rau tej npoo hleb. Zoo li, yog koj tuag daj los tuag tiag? Tuag tseeb los tuag cuav? Yog koj tuag daj no ces, sawv lis tsees los ncig qav ncig num? Yog koj tuag tiag no ces, tig ntsej los mloog, tig muag los ntsia kuv yuav hu nkauj qhia kev rau koj mus cuag tus Tswv tsim koj lub cev no nas?

= Ua ciav, kaj ntug lis zus xab tag kis kaj, leej ua lub zam lis zim los txog tim toj. Leej hlob leej yau ntsia los yog koj. Yog koj los tsis yog? Yog koj no ces tig muag los ntsia, tig ntsej los mloog kuv yuav hu nkauj qhia kab rau koj mus cuag tus Tswv tsim koj txoj sia no nas?

*** (Txij qhov no mus tas lawm niam ib qib. Ntawm no mus tas lawm niam ib quag no nas)

5-MUAB COV DEJ NTSHIAB LOS NTXUAV
NEEG LUB KEEB TXHAUM.

3. Zoo li, yog tau hnub txheej tshoj tuaj puag thaum ub, ntuj hnub tuaj puag thaum ntxov i, yeeb vim Ntxwj Nyoog siab tsis zoo ne! Ntxwj Nyoog yuav txia li ntshis ua lawm niag zaj luav tuaj peb hlis kub, yuav ziab zoj lawm ntiaj teb nrag cai tau xya niaj ces dej ntxheb thiaj li qhuav mus tu caj.

= Ua ciav, niam yeeb vim hnub txheej tshoj puag thaum ntxov i, Ntxwj Nyoog siab tsis zoo. Ntxwj Nyoog txia lis ntshis ua niag zaj nab tuaj peb hlis tshav, ziab zoj lawm ntiaj teb nrag cai tau xya xyoo ces dej cag thiaj qhuav mus tu moo.

4. Zoo li, ntiaj teb leej tib neeg noob neej li hais seev lis yees tias: “ntshai yuav ua tsis nyog neej rau ntiaj teb no.” Zaum no, ntiaj teb leej tib neeg noob neej li ntaus ntawv lis zus mus nug Saub Yawm tias: “puas muaj dej ntxheb nyob qhov twg? Puas tshuav lawm dej cag nyob qhov twg?” Saub Lim Yawm tsa ncauj los qhub tias: “dej ntxheb ces tshuav nyob ntawm Tswv Ntuj lub qab rooj vag zeb. Dej cag ces tsuas tshuav nyob ntawm Tswv Ntuj lub qab rooj vag lag.”

= Ntiaj teb leej tib neeg noob neej li nug lis zoj tias: “leej twg thiaj pom dej ntxheb qab, nkawm twg pom dej cag lw?” Saub Lim Yawm hais seev lis yees tias: “yog tau Tswv Ntuj leej Tub Yes Xus niaj ib leeg thiaj pom dej ntxheb qab. Yog tau lawm Tswv Ntuj Leej Tub Yes Xus niaj ib tug thiaj li pom dej cag lw.”

5. Saub Lim Yawm qhia lis zoj tias: “yog nej ntiaj teb leej tib neeg noob neej ntseeg Tswv Ntuj tuaj rau nruab siab ces nej yuav tau haus Vaj Yes Xus cov dej ntshiab los ntxuav nej lub keeb ntxhaum lawm tej sis niab ces nej noob neej thiaj yuav tau nyob
kaj lug lawm niaj ib txhiab no.”
= Saub Lis Yawm qhub seev lis yees tias: “yog nej ntiaj teb leej tib neeg noob neej ntseeg Tswv Ntuj li zoj tuaj nruab plawv, ces nej yuav tau siv lawm Vaj Yes Xus cov dej huv los ntxuav nej lub keeb txhaum lawm tej sis zawv ces noob neej thiaj yuav
tau nyob kaj lug lawm niaj ib txhis no.” Hais li no rau koj mloog no nas.

6. Zoo li, ntiaj teb leej tib neeg noob neej li rais loj lees rov los txog, thiaj li los tsa ncauj thov dej ntxheb ntawm Tswv Ntuj tuaj rau nruab siab. Tswv Ntuj li tso sis plhuav lawm dej ntxheb tawm lis plaws nruab qhov av los ua ntshua niab. Ua ciav dej
ntxheb nro tuaj tis ua nro, dej ntxheb tsis tau yog dej ntshiab.

= Zoo li, ntiaj teb leej tib neeg noob neej li rais loj lees rov los poob, thiaj li los tsa ncauj thov dej cag ntawm Tswv Ntuj tuaj rau nruab plawv. Tswv Ntuj li tso sis plhuav lawm dej cag tawm lis plaws nruab qhov luaj los ua ntshua lis zawv. Ua ciav, dej cag nro tuaj tis ua nro, dej cag tsis tau yog dej huv.

7. Zoo li, ntiaj teb leej tib neeg noob neej ces li tsa ncauj thov lawm Tswv Ntuj mus thawm niaj. Tswv Ntuj li tso sis plhuav nws Leej Tub Yes Xus nqes nroos los tshwm rau ntiaj teb no lub mus nkuaj tsiaj.

= Zoo li, ntiaj teb leej tib neeg noob neej ces li tsa ncauj thov lawm Tswv Ntuj mus thawm hnub. Tswv Ntuj li tso sis plhuav nws Leej Tub Yes Xus nqes nroos los tshwm rau ntiaj teb no lub mus nkuaj txhuv. Hais li no rau koj mloog.

8. Zoo li, Vaj Yes Xus ua neej tau 30 xyoo. Nws hlob mus tiav txuj. Vaj Yes Xus li nqes lis nroos rau tus dej Yos Las Das. Nws li muab tau dej cag coj los tov lawm dej ntxheb. Dej cag thiab dej ntxheb li plhis lis plho ua dej huv. Tsaus ntuj txog N……(hmo no, kaj ntug txog hnub no) yuav muab tau dej huv coj los ntxuav lawm koj, N…… (tub Nraug Laj, niam Nkauj Lag), lub mob lub ntsaj, lub keeb txog keeb txhaum ntxuav kom tag, kom koj lub ntsej muag plhis lis plho, dawb mos qas nyoos
tuaj. Koj tus ntsuj plig yuav tau kev ya lis plho los mus nyob lawm pem Tswv Ntuj lub ntuj kag no nas.

= Zoo li, Vaj Yes Xus ua neej tau 30 niaj. Nws hlob mus tiav ci. Vaj Yes Xus li nqes lis nroos rau tus dej Liab. Vaj Yes Xus muab lawm dej ntxheb coj los tov lawm dej cag. Ua ciav dej ntxheb thiab dej cag li plhis lis plho ua lawm dej ntshiab. Tsaus ntuj txog N…… (hmo no, kaj ntug txog hnub no) yuav muab tau dej ntshiab los ntxuav lawm koj N…… (tub Nraug Laj, niam Nkauj Lag), lub mob lub ntsaj, lub keeb txog mus keeb txhaum ntxuav kom huv. Koj lub ntsej muag yuav plhis lis plho, dawb mos qas nyoos tuaj dua tshiab. Koj tus ntsuj plig yuav tau kev ya lis plho los mus nyob lawm pem Tswv Ntuj lub Ceeb Tsheej kiab. Koj yuav tau so lawm niaj ib txhiab no nas.

*** (Txij qhov no mus tas lawm niam ib qib. Ntawm no mus tas lawm niam ib quag no nas)

Muab cov dej ntshiab pov ib lwm rau saum tus tas sim neej ib ce: Ib txhij pov cov dej ntshiab thiab hais cov lus no:

N…… kuv muab Huab Tais Tswv Ntuj cov dej ntshiab no los ntxuav koj lub keeb txog keeb txhaum, ntxuav koj kev mob kev nkeeg nyob ntiaj teb no kom ploj mus. Koj lub cev thiab koj tus ntsuj plig yuav plhis plho dua tshiab tuaj, koj thiaj yuav tau kev mus tus roj sib lis yiag cev sib lis kha mus txog Tswv Ntuj lub ceeb tsheej nyob kaj lug kaj nrig ib txhiab ib txhis.

6- MUAB TSOOS LAUS

9. Tav nov, yeeb vim tau hnub txheej tshoj thaum ub, niag tsoos maj los txawm tsis tau, tsoos ntuag los raug tsis muaj. Noob neej ntiaj teb leej tib neeg hais seev lis yees tias: “ntshai yuav ua tsis nyog neej rau ntiaj teb no.” Ua ciav noob neej leej tib neeg yuav mloog xov lis zus tias: “puas muaj tsoos maj nyob qhov twg? Puas tshuav tsoos ntuag nyob qhov twg?”

= Ua ciav, noob neej leej tib neeg ces cav lis zus tias: “tsoos maj tshuav nyob nram Poj Mab. Tsoos ntuag ces muaj nyob nram Yawm Suav.”

10. Ua ciav, tub txib los raug tsis muaj, tub khaiv los txawm tsis tau. Muab tau peev nyiaj txiag ntsaws lis ntso rau leej tub tij tej quav npab, leej tub tij thiaj sawv mus ywj kab.

= Ua ciav, tub txib los raug tsis muaj, tub khaiv los txawm tsis tau. Muab tau peev nyiaj txiag ntsaws lis ntso rau leej tub kwv tej quav tes, leej tub kwv thiaj sawv mus ywj kev.

11. Ua ciav, leej tub tij ces mus txog nram Poj Mab: pom Poj Mab tsoos maj kim tuaj tis ua kim. Tub tij ces tsuas muas tau lawm niaj peb tib lis tshim.

= Leej tub kwv ces ncig lis yeev mus txog nram Yawm Suav: ua ciav Yawm Suav tus tsoos ntuag iab tuaj tis ua iab. Tub kwv ces tsuas muas tau lawm niaj peb tib lis fab.

12. Tub tij nqa tsoos maj los txog ntua, muab tsoos maj nrom nroos tuaj saum zeb, cia noog pej noog kos ncaws: yuav rheeb lis ko tuaj ntawm taw, ncaws tawv to tuaj ntawm ncauj. N…… (tsaus ntuj, kaj ntug), txog N…… (hnub, hmo) no yuav coj tsoos maj los ua koj N…… (tub Nraug Laj, niam Nkauj Lag), tus tsoos laus. Muab rau koj lub cev laus no hnav coj mus tiv tag 90 twv av mus luaj dub no nas.

= Leej tub kwv nqa tsoos ntuag los txog ntua, muab tsoos ntuag nrom nroos tuaj saum cav, cia noog pej noog kos ncaws: yuav ncaws tawv to tuaj ntawm ncauj, rheeb lis ko tuaj ntawm taw. N…… (tsaus ntuj, kaj ntug), txog N…… (hnub, hmo) no yuav
coj los ua koj N…… (tub Nraug Laj, niam Nkauj Lag), tus tsoos dua nras. Muab rau koj lub cev laus no hnav coj mus tiv tag 90 twv av mus luaj dag no nas.

*** (Txij qhov no mus tas lawm niam ib qib. Ntawm no mus tas lawm niam ib quag no nas)

7- COB NTOO CUAM. NTOO CUAM
YOG TXOJ KEV

13. Tav nov, yeeb vim hnub txheej tshoj thaum ub, ntuj hnub tuaj puag thaum ntxov i, yog tau ntiaj teb leej tib neeg ces tsis muaj tus siab ntshiab, Tswv Ntuj thiaj li tso sis plhuav nws Leej Tub Yes Xus nqes lis nroos tuaj tu ntug. Yes Xus li tuaj tshwm sim
rau ntiaj teb leej tib neeg lub mus nkuaj nyug.

= Yeeb vim, hnub txheej tshoj thaum ub, ntuj hnub tuaj puag
thaum ntxov i, yog tau ntiaj teb leej tib neeg ces tsis muaj tus
siab huv, Tswv Ntuj thiaj tso sis plhuav nws Leej Tub Yes Xus
nqes lis nroos los tu plaub. Yes Xus li tuaj tshwm sim rau ntiaj
teb leej tib neeg lub nkuaj tsiag mus dab zaub.

14. Ua ciav, Vaj Yes Xus tuag tau 33 niaj, yog nws tuaj cawm kom
fab lwm tiam, peb ntiaj teb leej tib neeg, noob neej ces txawj
tuag los ho txawj ciaj.

= Ua ciav, Vaj Yes Xus tuag tau 33 xyoo, yog nws tuaj cawm kom
fab lwm tiam, peb ntiaj teb leej tib neeg, noob neej ces txawj
mob los ho txawj zoo.

15. Zaum no ces Vaj Yes Xus tuaj tshwm sim rau ntiaj teb no lawm.
Tswv Ntuj tso sis plhuav tus plaub xo ncej ntug rau Leej Tub
Yes Xus ua tus pab. Ua ciav, ntiaj teb leej tib neeg yog tub roj tub ruag tsis paub haj tseem tau muab Vaj Yes Xus tua lis
nthi, dai lis ncuv tuaj saum tus ntoo mus ua daj npab.

= Yog tau Vaj Yes Xus tuaj tshwm sim rau ntiaj teb no lawm. Tswv Ntuj tso sis plhauv tus plaub xo ncej ntug rau Leej Tub Yes Xus ua tus nres. Ua ciav, ntiaj teb leej tib neeg yog tub roj tub ruag tsis paub haj tseem muab Vaj Yes Xus tua li nthi, dai lis ncuv tuaj saum tus ntoo mus ua daj tes. Hais li no qhia rau koj mloog nas.

16. Zaum no ces Vaj Yes Xus li tau tuag lis nthi ua daj tes lis ruav rau ntiaj teb leej tib neeg xyuas. Peb ntiaj teb leej tib neeg tsis paub, twb yog Vaj Yes Xus tuaj yeem tuag kom tau los mus txhaws peb ntiaj teb leej tib neeg no lub qhov ploj mus qhov
tuag no.

= Vaj Yes Xus tau tuag lis nthi ua daj tes lis ruav rau ntiaj teb leej tib neeg ntsia. Peb ntiaj teb leej tib neeg tsis paub, twb yog Vaj Yes Xus tuaj yeem tuag kom tau los mus txhaws peb ntiaj teb leej tib neeg no lub suab quaj mus suab nyiav no nas.

17. Zoo li, yog tau Vaj Yes Xus tuag lis nthi tau lawm niaj peb hnub. Nws sawv lis tsees, npuaj teg ntaug taw, luag sis nqhub, nce lis hlo puag Ceeb Tsheej i. Yog tau Vaj Yes Xus tuaj yeem tuag, kom fab lwm tiam, txhaws tau peb ntiaj teb neeg no lub
cev nqaij kom txawj sawv rov los mus nyob kaj lug lawm niaj ib txhis.

= Zoo li, yog tau Vaj Yes Xus tuag lis nthi tau lawm niaj peb hmo. Nws sawv lis tsees, npuaj teg ntaug taw, luag sis nyav, nce hlo puag Ceeb Tsheeb kiab. Yog tau Vaj Yes Xus tuaj yeem tuag, kom fab lwm tiam, txhaws tau peb ntiaj teb neeg no lub cev nqaij kom txawj sawv rov los mus nyob kaj nrig lawm niaj ib txhiab no nas. Hais li no qhia rau koj mloog nas.

18. Tav nov, N…… (tub Nraug Laj, niam Nkauj Lag), koj yuav nco lis ntsoov tuaj nruab siab, cim lis nraim tuaj nruab plawv tias: Vaj Yes Xus tau tuag lis nthi, pw lis ko yeeb sim yaj no tej mus qab qho. Yog tau Vaj Yes Xus tuaj yeem tuag los mus txhaws
lawm koj N…… (tub Nraug Laj, niam Nkuaj Lag), lub qhov ploj mus qhov tuag kom fab lwm tiam koj lub cev laus tau muaj txoj sia sawv rais rov no nas.

= Zoo li, N…… (tub Nraug Laj, niam Nkuaj Lag), koj yuav nco lis ntsoov tuaj nruab siab, cim lis nraim tuaj nruab plawv tias: Vaj Yes Xus tau tuag lis nthi, pw lis ko yeeb sim yaj no tej mus npoo hleb. Yog tau Vaj Yes Xus tuaj yeem tuag los mus txhaws
lawm koj N…… (tub Nraug Laj, niam Nkuaj Lag), lub qhov ploj mus qhov tuag kom fab lwm tiam koj lub cev laus tau muaj txoj sia sawv rais feb. Hais li no qhia rau koj nas.

19. Tav nov, N…… (tub Nraug Laj, niam Nkuaj Lag), koj yuav nco lis ntsoov tuaj nruab siab, cim lis nraim tuaj nruab plawv tias: thaum koj ua neej txoos ntiaj teb no, koj tau yuav Vaj Yes Xus lus qhub. Koj tau mloog Vaj Yes Xus lus qhia. Koj tau nrog
nws thooj siab mus koom cev. Zaum no koj ntim tau lub txiaj zam lis zim los mus ces koj yuav vam tau Vaj Yes Xus tus Ntoo Cuam, nyob ntawm no (Muab tus ntoo cuam tib hom rau tus tuag). coj koj kev no nas.

= N…… (tub Nraug Laj, niam Nkuaj Lag), koj yuav nco lis ntsoov tuaj nruab siab, cim lis nraim tuaj nruab plawv tias: thaum koj ua neej txoos ntiaj teb no, koj tau mloog Vaj Yes Xus lus qhia. Koj tau yuav lawm Vaj Yes Xus lus qhuab. Zaum no koj ntim tau lub txiaj zam lis zim los mus ces koj yuav vam tau Vaj Yes Xus tus Ntoo Cuam, nyob ntawm no (Muab tus ntoo cuam tib hom rau tus tuag). roos koj duab no nas.
Hais li no qhia rau koj nas.

[color="#FF00FF"]*** (Txij qhov no mus tas lawm niam ib qib. Ntawm no mus tas lawm niam ib quag no nas)

Muab tus Ntoo Cuam nqa coj mus cob kiag rau tus tuag txhais tes xis, los yog ntawm nws hauv siab.

N…… (hais tus tuag lub npe) koj txais Huab Tais Yes Xus ntoo cuam nyob ntawm no, nws yuav ua txoj kev coj koj mus kom txog Tswv Ntuj lub ceeb tsheej ntshiab, koj thiaj yuav tau nyob kaj lug kaj nrig tas nrho niaj txhiab ib txhis.

N…… (hais nws lub npe) muab daim ntaub no rau koj lub cev laus ua tsoos laus tiv luaj tiv av nyob tos ntshis kom txog hnub Tswv Ntuj tso koj tus plig ntshiab rov los nrog koj lub cev laus muaj txoj sia tshiab sawv rov los ua lub neej ntshiab nyob mus ib txhiab ib txhis.

Last edited by Maiv Tooj on 2nd December 2009, 6:21 am; edited 3 times in total

**Maiv Tooj** 6th November 2009, 4:12 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°2

Re: QHUAB KE zaj ntev==> Ntu Ib ( zaj 1)

Post Maiv Tooj 6th November 2009, 4:12 am

8- COB TUS TSWM CIAB NTSHIAB.

20. Tav no, nim yog tau hnub txheej tshoj thaum ub, ntuj hnub tuaj puag thaum ntxov i, Vaj Yes Xus nqes lis nroos los qhia txoj kev ncaj, rau ib tsoom txiv neej. Zaum no Vaj Yes Xus thiaj yog tus tswm ciab ntshiab kaj mus lawm ntau txheej.

= Hnub txheej tshoj thaum ntxov ub, Vaj Yes Xus nqes lis nroos los qhia txoj kev huv, rau ib tsoom leej niam. Zaum no nws thiaj yog tus tswm ciab huv ci mus lawm ntau tiam.

21. Koj N…… (tub Nraug Laj, niam Nkauj Lag), yuav nco lis ntsoov tuaj nruab siab, cim lis nraim tuaj nruab plawv tias: thaum koj ua neej txoos lawm ntiaj teb no, koj tau mloog lawm Yes Xus lus. Zaum no koj ntim tau lub txiaj zam lis zim los mus.
Koj yuav txais Yes Xus tus tswm ciab huv, nyob ntawm no ua koj txoj kev kaj mus.

= Thaum koj ua neej txoos lawm ntiaj teb no, koj tau yuav Yes Xus tej lus ncaj. Zaum no koj ntim tau lub txiaj zam lis yeev los mus. Koj yuav txais Yes Xus tus tswm ciab ntshiab, nyob ntawm no ua koj txoj kev kaj no nas.

22. Zaum no ces koj txais zoj tau tus tswm ciab ntshiab coj los puag lis nraim tuaj rau koj tej mus hauv siab. Koj yuav tau mus tus roj sib yiag cev sib lis kha, mus txog Tswv Ntuj lub theej kiab no nas.

= Zaum no koj txais zoj tau tus tswm ciab huv coj los puag lis nkaus rau koj tej mus nruab plawv. Koj yuav tau mus tus roj sib yiag, cev sib lis kha, mus txog Tswv Ntuj lub zoo chaw. Hais li no qhia rau koj nas.

*** (Txij qhov no mus tas lawm niam ib qib. Ntawm no mus tas lawm niam ib quag no nas)

Muab tus tswm ciab taws coj mus cob nkaus rau tus tas sim neej txhais tes laug. Tus tswm ciab no cia taws kom ciaj tas hnub tas hmo kom txog thaum coj tus tuag mus sam sab.

N…… (hais tus tuag lub npe) koj txais Huab Tais Yes Xus tus tswm ciab ntshiab nyob ntawm no, nws yog lub teeb ci kaj lug coj koj kev mus kom txog Tswv Ntuj lub ceeb tsheej ntshiab, koj yuav tau nyob kaj lug kaj nrig tas nrho niaj txhiab ib txhis.

9- COB LUB HLEB UA CHAW TIV LUAJ TIV AV.

23. Yeeb vim hnub txeej tshoj thaum ub, Ntxwj Nyoog muab lub txiv ntawm ntoo ciaj ceeb los rau noob neej noj, ces zaum no, noob neej thiaj tau txais lawm txoj niag kev ploj.

= Yog tau Ntxwj Nyoog muab lawm ntoo ciaj ceeb lub txiv rau noob neej haus, ces zaum no noob neej thiaj tau txais lawm txoj niag kev tuag taug.

24. Noob neej tau noj lawm ntoo ciaj ceeb lub txiv poob lis zoj tuaj rau nruab siab. Tswv Ntuj tau hais rau noob neej tias: “yeeb vim noob neej tsis tsim txiaj, noob neej mus mloog tau Ntxwj Nyoog tej lus ntxias. Yog noob neej ploj tuag los mus, ces mus txiav ntoo ciaj ceeb los ua lawm noob neej hwm hleb tshiab.”

= Noob neej tau noj lawm ntoo ciaj ceeb lub txiv poob lis nthav tuaj rau nruab plab. Tswv Ntuj tau hais rau noob neej tias: “yeeb vim noob neej tsis mloog lus, noob neej tau mloog Ntxwj Nyoog lo lus haub. Yog noob neej ploj tuag los mus, ces mus txiav
ntoo ciaj ceeb los ua lawm noob neej lub tsev laus.

25. Ces, zaum no, koj N…… (tub Nraug Laj, niam Nkauj Lag) qaij qaug lis yeev los mus ces koj kwv koj tig mus raws tau Tub Txawj nqes tuaj txog, Txawj Nkiag nqes tuaj poob. Ua ciav ntoo ciaj ceeb nyob lawm ntoo ciaj ceeb tej mus qab roob.

= Zaum no koj tub koj kiv mus raws tau Tub Txawj nqes tuaj poob, raws tau Txawj Nkiag nqes tuaj txog. Ua ciav ntoo ciaj ceeb nyob ntoo ciaj ceeb tej qab mus laj tog.

26. Tub Txawj nqes tuaj txog, Txawj Nkiag nqes tuaj poob, kwv tau rab taus peb ntxuj hniav, ncig lis yeev qab ntoo tuaj, lug pes zoj qaum ntoo los, ntxus tawv to rau ntoo ciaj ceeb. Ntoo ciaj ceeb tiv tsis nyog. Ntoo ciaj ceeb li vau tav toj. Teg pes lauj txiav
lis nrawv tog paus. Lauj pes nas txhij lis zoj tog ntsis. Muab phua lis plhawv ua plaub sab. Zaum no thiaj coj los ua lawm koj N…… (tub Nraug Laj, niam Nkauj Lag), lub tsev mus xwm fab.

= Txawj Nkiag nqes tuaj poob, Tub Txawj nqes tuaj txog, kwv tau rab taus peb ntxuj plhu, ncig lis yeev qaum ntoo tuaj, lug zoj qab ntoo los. Ntxus tawv to rau ntoo ciaj ceeb. Ntoo ciaj ceeb tiv tsis taus. Ntoo ciaj ceeb li vau mus tav tsuag. Lauj pes nas txhij lis zoj tog paus, teg pes lauj txiav lis nrawv tog ntsis. Muab phua li plhawv ua plaub nreej. Zaum no thiaj coj los ua lawm koj N…… (tub Nraug Laj, niam Nkauj Lag), lub tsev mus xwm leej no nas.

27. Zaum no, koj N…… (tub Nraug Laj, niam Nkauj Lag), lub cev laus yuav siv ntoo ciaj ceeb mus tiv tag 90 twv av luaj dub, pw nyob mus ntsiag ntub. Tshuav koj tus ntsuj plig yuav plhis li plho, dawb mos qas nyoos, ya lis plho los mus rau Ntuj Ceeb
Tsheej puag pem ub.

= Zaum no, koj N…… (tub Nraug Laj, niam Nkauj Lag), lub cev laus yuav siv ntoo ciaj ceeb mus tiv tag 90 twv av luaj noo, pw nyob mus ntsiag moo. Tshuav koj tus ntsuj plig yuav plhis li plho, dawb mos qas nyoos, ya lis plho los mus rau Ntuj Ceeb
Tsheej zoo no nas.

*** (Txij qhov no mus tas lawm niam ib qib. Ntawm no mus tas lawm niam ib quag no nas)

10- PHWB TXOG HNUB TXHEEJ TSHOJ THAUM UB. TSWV NTUJ TSIM LUB SIM CEEB.

28. Tav nov, hnub txheej tshoj thaum ub, ntuj hnub tuaj puag thaum i, lub ntuj raug tsis tau muaj, lub teb raug tsis tau xeeb. Lub ntuj ces yoj lis yees xws lawm quav os, lub teb ces yees lis yi xws lawm quav qiab. Yog tau Tswv Ntuj tso sis plhuav cua moj lwg kaw nplawm ntuj ntws hauv ntuj tuaj tshuab. Tso sis plhuav nkauj hnub nraug hli tuaj ziab ntiaj teb nrag cai thiaj qhuav lis qhawv xws toj roob mus zeb liab.

= Zoo li hnub txeej tshoj thaum ntxov i, ntuj hnub tuaj puag thaum ntxov ub, lub ntiaj teb ces txawm tsis tau xeeb, lub ntuj ces txawm tsis muaj. Lub teb ces yees lis yi xws lawm quav qiab, lub ntuj ces yees lis yi xws lawm quav os. Yog tau Tswv Ntuj tso sis plhuav cua moj lwg kaw nplawm ntuj ntws qab ntug tuaj ntsawj. Tso sis plhuav nkauj hnub nraug hli tuaj ci ntiaj teb nrag cai ces qhuav lis qho xws toj roob mus zeb do. Hais li no rau koj mloog no nas!

*** (Txij qhov no mus tas lawm niam ib qib. Ntawm no mus tas lawm niam ib quag no nas)

11- TSWV NTUJ TSIM XYOOB NTOO, QOOB LOO, TSIAJ TXHU LOS NYOB NTIAJ TEB.

29. Zaum no Tswv Ntuj tsim tau lub ntuj loj li tom cas tuaj zoo saib. Tsim tau lub ntiaj teb dav li tom ci tuaj zoo ntsia. Tswv Ntuj li qhub li zoj tias: “lub ntuj los tsim txhij, lub ntiaj teb los tsim txhua. Kuv yuav tso noob qoob noob loo, noob xyoob noob
ntoo, nqes lawm ntiaj teb.”

= Zaum no Tswv Ntuj tsim tau lub ntuj loj li tom cas tuaj zoo saib. Tsim tau lub ntiaj teb dav li tom ci tuaj zoo ntsia. Tswv Ntuj li qhub li zoj tias: “lub ntuj los tsim txhij, lub ntiaj teb los tsim tag. Kuv yuav tso noob qoob noob loo, noob xyoob noob ntoo, nqes
lawm ntiaj nrag.”

30. Ua ciav, yeeb vim yog tau Ntxwj Nyoog siab tsis zoo. Ntxwj Nyoog txia lis ntshis ua niag zaj nab tuaj peb hlis tshav. Ziab zoj lawm ntiaj teb no qhuav lis qhawv tau xya niaj. Ua ciav, noob qoob noob loo nyob mus ntsiag txiaj.

= Yog tau Ntxwj Nyoog siab tsis zoo. Ntxwj Nyoog txia lis nshis ua lawm niag zaj luav tuaj peb hlis kub. Ziab zoj lawm nrag cai no qhuav lis qho tau xya xyoo. Ua ciav, noob xyoob noob ntoo nyob ntsiag moo.

31. Zoo li, Tswv Ntuj li ua tau lub ntuj tsaus li nciab, ua cua nplaws lis sis, tso tau nag tshauv nag tshia hua rag lis rhi mus ntxaum zoj lawm ntiaj teb noo lis zawv. Noob qoob noob loo li tau kev hlav kaus nthaw tuaj ntsuab lis xiab doog lawm tej sis
nkawv.

= Ua ciav, Tswv Ntuj lis ua tau lub ntuj tsaus li nti, ua cua nplaws lis sis, tso tau nag tshauv nag tshia hua rag lis rhi mus ntxaum lis awv lawm ntiaj teb tej sis niab. Noob xyoob noob ntoo li tau kev hlav kaus nto tuaj ntsuab lis xiab.

32. Zaum no ces Tswv Ntuj li saub lis zoj tias: “noob qoob noob loo los tsim txhij, ntshai yuav tau tsim 12 haiv tsiaj mus txoos lawm ntiaj teb.”

= Zaum no ces Tswv Ntuj li saub lis zoj tias: “noob xyoob noob ntoo los tsim tag, ntshai yuav tau tsim 12 haiv txhuv mus txoos lawm ntiaj nrag.”

33. Zoo li, Tswv Ntuj tsim tau 12 haiv tsiaj txoos lawm ntiaj teb ua lawm niaj ib pab. Ua ciav, tsis muaj leej twg los ua tswv kav.

= Zoo li, Tswv Ntuj tsim tau 12 haiv txhuv txoos lawm ntiaj teb ua lawm niaj ib puab. Ua ciav, tsis muaj lawm leej twg los ua tswv cuab. Hais li no rau koj mloog no nas!

12-TSWV NTUJ TSIM NOOB NEEJ-LEEJ TIB NEEG LOS TXOOS RAU NTIAJ TEB

34. Zaum no Tswv Ntuj li hais seev lis yees tias: “ntshai yuav tau tsim noob neej leej tib neeg los saib 12 haiv tsiaj, thiaj li yuav tu tau lub ntiaj teb no kom tiav.”

= Zaum no Tswv Ntuj li hais seev lis yees tias: “ntshai yuav tau tsim noob neej leej tib neeg los saib 12 haiv txhuv, thiaj li yuav tu tau lub ntiaj teb no kom huv.”

35. Ua ciav, niaj yeeb vim hnub txheej tshoj tuaj thaum ntxov ub, ntuj hnub tuaj puag thaum ntxov i, Tswv Ntuj muab lis zoj lawm twv av luaj dub, coj los puab ua ib leej tub. Tswv Ntuj tau tshuab ib pas ua txoj sia rau ces leej tub lub cev nqaij sawv lis
tsees los ciaj ntug.

= Ua ciav, niaj yeeb vim hnub txheej tshoj tuaj thaum ntxov ub, ntuj hnub tuaj puag thaum ntxov i, Tswv Ntuj muab lis zoj lawm twv av luaj doog, coj los puab ua ib leej tub. Tswv Ntuj tau tshuab ib pas ua txoj sia rau ces leej tub lub cev nqaij sawv lis
tsees los ciaj ntug. Tus no yog thawj tug. Yog leej txiv neej. Tswv Ntuj li muab hu ua “Nraug Oo”.

36. Zoo li, Nraug Oo sawv lis tsees los ciaj ntug. Nraug Oo tsa muag los ntsia pom 12 haiv tsiaj nyob muaj txij nkawm. Kho kho Nraug Oo plawv, Nraug Oo seev lawm tej sis zawv.

= Zoo li, Nraug Oo sawv lis tsees los mus ciaj noob neej. Nraug Oo tsa muag los pom 12 haiv txhuv nyob mus muaj tug. Kho kho Nraug Oo siab, Nraug Oo seev lawm tej sis niab.

37. Ua ciav, Tswv Ntuj li hais tias: “yuav tau tsim leej ntxhais los nrog leej tub ua nkawm”. Muaj lawm niaj ib hnub mus zoo caij, ib hmo mus zoo nyoog. Tswv Ntuj li ua kom Nraug Oo pw lis ko tuaj twv av mus luaj txhais. Tswv Ntuj li muab lawm Nraug Oo niaj ib tug txha tav coj los puab ua lawm ib leej ntxhais.

= Ua ciav, Tswv Ntuj li hais tias: “yuav tau tsim leej ntxhais los nrog leej tub ua nkawm”. Muaj lawm niaj ib hnub mus zoo caij, ib hmo mus zoo nyoog. Tswv Ntuj li ua kom nraug Oo pw li ko tuaj twv av mus luaj liab. Tswv Ntuj li muab lawm Nraug Oo niaj ib tug txha tav coj los puab ua leej ntxhais. Tswv Ntuj tshuab ib pas ua txoj sia rau. Leej ntxhais lub cev sawv li tsees los ciaj neeg. Tus no yog tus ob. Yog leej niam. Tswv Ntuj muab hu ua “Nkauj Iab”. Hais li no rau koj mloog nas.

38. Zoo li zaum no ces, Tswv Ntuj coj leej ntxhais los rau Nraug Oo. Nraug Oo pom Nkauj Iab. Nraug Oo hais luag lis nyav tias: “Koj nqaij zoo xws kuv nqaij, cia kuv yuav koj los ua kuv me nplooj siab.”

= Zoo li zaum no ces, Nkauj Iab pom txiv Nraug Oo. Nkauj Iab hais luag li nyav tias: “kuv txha zoo xws koj txha. Cia kuv yuav koj los ua kuv me txiv Nraug Zoo.”

39. Zoo li zaum no ces, Nkauj Iab thiab Nraug Oo sawv lis tsees los ciaj noob neej nyob hauv Tswv Ntuj lub vaj loog xyoob. Cuaj hnub yim hmo nkawd ncig lis yeev peg dhau taug los lub txiaj ntsim kua muag tsis paub poob.

= Zoo li zaum no ces, Nkauj Iab thiab Nraug Oo sawv lis tsees los iaj noob neej nyob hauv Tswv Ntuj lub vaj loog do. Cuaj hnub yim hmo nkawd ncig lis yeev peg dhau taug los lub txiaj ntsim kua muag tsis paub nrog.

40. Zaum no ces, Tswv Ntuj li tsa ncauj los qhub lis zoj tias: “Neb nyob hauv kuv, Tswv Ntuj, lub vaj loog zeb, txiv dab txiv qas tsi los neb noj tau txhij. Neb tsuas tshwj lis zoj tsis txhob noj tsob txiv toj txiv taug, txi zoj tuaj lub liab. Yog neb tsis noj lus mus mloog hais, neb noj tsau mus haus txhua, ces neb yuav paub txoj kev nyob mus lwj siab.”

= Zaum no ces, Tswv Ntuj li tsa ncauj los qhia lis zoj tias: “Neb nyob hauv kuv, Tswv Ntuj, lub vaj loog tsua, txiv dab txiv qas tsi los neb noj tau txhua. Neb tsuas tshwj lis zoj tsis txhob noj tsob txiv toj txiv taug, txi zoj tuaj lub doog lis nkawv. Yog neb tsis noj lus mus mloog qhia, neb noj tag mus haus txhij ces neb yuav paub txoj kev nyob mus lwj plawv.” Hais li no rau koj mloog no nas!

*** (Txij qhov no mus tas lawm niam ib qib. Ntawm no mus tas lawm niam ib quag no nas)

**Maiv Tooj** 6th November 2009, 4:16 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°3

Re: QHUAB KE zaj ntev==> Ntu Ib ( zaj 1)

Post Maiv Tooj 6th November 2009, 4:16 am

13-NTXWJ NYOOG NTXIAS TAU NOOB NEEJ MUS UA TXHAUM

41. Ua ciav, hnub txheej tshoj tuaj puag thaum ntxov ub, ntuj hnub tuaj puag thaum ntxov i, Tswv Ntuj tsim tau Nkauj Iab thiab Nraug Oo los txoos lawm ntiaj teb no nyob tsis muaj mob, pw tsis txawj tuag. Ua ciav, niaj yeeb vim Ntxwj Nyoog siab phem siab tsis zoo, Ntxwj Nyoog xav lis ntsoov tias: “Yog cia noob neej nyob hauv Tswv Ntuj lub vaj loog mus xov tsua, ces tas ib sim neej, noob neej yuav tsis txawj tuag.”
= Ua ciav, hnub txheej tshoj tuaj puag thaum ntxov ub, ntuj hnub tuaj puag thaum ntxov i, Tswv Ntuj tsim tau Nkauj Iab thiab Nraug Oo los txoos lawm ntiaj teb no nyob tsis muaj mob, pw tsis txawj tuag. Ua ciav, niaj yeeb vim Ntxwj Nyoog siab phem siab tsis zoo, Ntxwj Nyoog xav lis ntsoov tias: “Yog cia noob neej nyob hauv Tswv Ntuj lub vaj loog xov, ces tas ib sim neej, noob neej yuav tsis paub txoj niag kev ploj.”

42. Ntxwj Nyoog paub tias: yog cia Nkauj Iab thiab Nraug Oo nkawd ua neej nyob luag tej sis nyav hauv Tswv Ntuj lub vaj loog mus xov cav, ces txawm tso cuaj hauv mob yim hauv tuag tuaj los yuav tsis nphav.

= Ntxwj Nyoog paub tias: yog cia Nkauj Iab thiab Nraug Oo nkawd ua neej nyob luag tej sis ntxhi hauv Tswv Ntuj lub vaj loog mus xov hlau, ces txawm tso cuaj hauv mob yim hauv tuag tuaj los yuav tsis raug.

43. Ntxwj Nyoog thiaj ua zaj ua ntxeev ntxias, kom cuaj hnub yim hmo, Nkauj Iab thiab Nraug Oo nkawd tsis txhob mloog Tswv Ntuj lus qhia, kom Tswv Ntuj yuav tsum muab nkawd ntiab tawm hauv lub vaj loog mus xov cav. Ntxwj Nyoog mam tso cuaj hauv mob yim hauv tuag tuaj ces thiaj li nphav.

= Ntxwj Nyoog ua zaj ua ntxeev ntxias, kom cuaj hnub yim hmo, Nkauj Iab thiab Nraug Oo nkawd tsis txhob mloog Tswv Ntuj lus qhia, kom Tswv Ntuj muab nkawd ntiab tawm hauv lub vaj loog mus xov hlau. Ntxwj Nyoog mam tso cuaj hauv mob
yim hauv tuag tuaj ces thiaj li raug.

44. Ntxwj Nyoog thiaj txia lis ntshis ua niaj nab txaij nab nraug, laum zog tuaj tus ceg cav. ua zaj ua ntxeev ntxias Nkauj Iab thiab Nraug Oo tias: “Neb tsis txhob mloog li Tswv Ntuj hais. Neb kav tsij noj zoj tsob txiv toj txiv taug. Yog neb noj tag mus haus tsau, ces neb yuav paub tas ib puas tsav yam li Tswv Ntuj kav.”

= Ntxwj Nyoog txia lis ntshis ua niaj nab txaij nab nraug, laum zog tuaj tus ceg ntoo nkoj. ua zaj ua ntxeev ntxias Nkauj Iab thiab nraug Oo tias:“Neb tsis txhob mloog li Tswv Ntuj qhia. Neb kav tsij noj zoj tsob txiv toj txiv taug. Yog neb noj tag mus haus txhua, ces neb yuav paub tas ib puas tsav yam li Tswv Ntuj coj.”

45. Zoo li, Nkauj Iab li xav lis zoj tias: “Yog li sim noj zoj lub txiv toj txiv taug li Ntxwj Nyoog hais saib, ntshai yuav paub tas ib puas tsav yam li Tswv Ntuj kav.” Nkauj Iab tes lauj thiaj li de li zoj tuaj lub daj, lauj nas thiaj li muab ntsaws lis ntso tuaj nruab ncauj, poob sis nthav tuaj nruab siab. Ua ciav, Nraug Oo hnov lis dheev Nkauj Iab lub suab dab ntsaj.

= Zoo li, Nraug Oo li xav lis zoj tias: “Yog li sim noj zoj lub txiv toj txiv taug li Ntxwj Nyoog hais saib, ntshai yuav paub tas ib puas tsav yam li Tswv Ntuj khiav,” Nraug Oo tes lauj thiaj li txais nkaus tuaj lub doog lis nkawv, lauj nas thiaj li rub lis zog tuaj nruab lo, poob sis nthav tuaj nruab plawv. Ua ciav, Nkauj Iab hnov lis dheev lawm Nraug Oo lub suab dab nyiav.

46. Zoo li, kaj ntug lis zus tuaj xab tag kis kaj, kaj ntug lis zus tuaj xab tag kis ntxov, Tswv Ntuj ncig lis yeev tuaj txog tej mus nrab loog. Ua ciav, tsis hnov Nkauj Iab thiab Nraug Oo lub suab luag. Tswv Ntuj hu zoj lawm niaj peb suab. Ua ciav, Nkauj Iab thiab Nraug Oo nkawd teb sis ntua tuaj nruab koog pos ntsuab. Tswv
Ntuj hais seev lis yees tias: yog vim li cas neb hais lus xws li Ntxwj Nyoog suab?

= Ua ciav, kaj ntug lis zus tuaj xab tag kis ntxov, Tswv ntuj ncig lis yeev tuaj txog tej mus nrab vaj. Ua ciav, tsis hnov Nkauj Iab thiab Nraug Oo lub suab tham. Tswv Ntuj hu zoj lawm niaj peb los. Ua ciav, Nkauj Iab thiab Nraug Oo nkawd teb sis ntua tuaj nruab koog pos daj. Tswv Ntuj hais seev lis yees tias: yog vim li cas neb hais lus xws li Ntxwj Nyoog lub suab ntsaj?

47. Nkauj Iab Nraug Oo li tsa ncauj hlo hais tias: yeej vim ntxwj nyoog ua zaj ua ntxeev ntxias wb lawm niaj peb suab. Zaum no wb thiaj raug tau ntxwj nyoog txoj niag kev tuag.

= Yeej vim ntxwj nyoog ua zaj ua ntxeev ntxias wb lawm niaj peb los. Zaum no wb thiaj raug tau ntxwj nyoog txoj niag kev ploj.

*** (Txij qhov no mus tas lawm niam ib qib. Ntawm no mus tas lawm niam ib quag no nas)

14-TSWV NTUJ FOOM LUS PHEM RAU NTXWJ NYOOG

48. Zaum no, Tswv Ntuj cem lis zoj rau Ntxwj Nyoog, uas txia lis ntshis ua niaj nab txaij nab nraug, tias: “Vim li cas koj tuaj ntxias noob neej niaj peb suab? Txij no mus tom ntej ces noob neej yuav nrog koj ua yeeb ncuab.”

= Zaum no, Tswv Ntuj cem lis zoj rau Ntxwj Nyoog, uas txia lis ntshis ua niaj nab txaij nab nraug, tias: “vim li cas koj tuaj ntxias noob neej niaj peb lo? Txij no mus tom ntej ces noob neej yuav nrog koj ua yeeb ncuab loj.”

49. Zoo li, Tswv Ntuj tsa ncauj foom li zoj rau niaj nab txaij nab nraug tias: “Yeeb vim koj tau ua siab tsis ncaj. Koj tuaj ntxias tau noob neej raug suab dab ntsaj. Txij no mus yav tom ntej, koj yuav xuas koj lub plab tshiav av nkag.

= Zoo li, Tswv Ntuj tsa ncauj foom li zoj rau niag nab txaij nab nraug tias: “koj ua siab phem siab tsis zoo, koj tuaj ntxias tau noob neej mus raug lub suab dab nyiav. Txij no mus yav tom ntej, koj yuav xuas koj lub plab los ua tes taw rau koj khiav.

*** (Txij qhov no mus tas lawm niam ib qib. Ntawm no mus tas lawm niam ib quag no nas)

15-TSWV NTUJ QHIA TIAS NEEG YUAV KHWV, YUAV MUAJ MOB MUAJ TUAG

50. Zoo li, yog tau Nkauj Iab thiab Nraug Oo tsis nloog Tswv Ntuj lus qhub Tswv Ntuj thiaj li hais rau Nkauj Iab thiab Nraug Oo tias: “Txij no mus yav tom ntej ces neb yuav khwv nkag lis kaws mus puv toj, neb mam li tau diav mov nplej mov kws
los noj.”

= Zoo li, yog tau Nkauj Iab thiab Nraug Oo tsis mloog Tswv Ntuj lus qhia Tswv Ntuj thiaj li hais rau Nkauj Iab thiab Nraug Oo tias: “Txij no mus yav tom ntej ces neb yuav khwv nkag lis kaws mus puv hav, neb mam li tau daim tsoos maj tsoos ntuag los hnav.”

51. Zoo li, Tswv Ntuj hais lis ntsees rau Nkauj Iab thiab Nraug Oo tias: “neb yuav nco lis ntsoov tuaj nruab siab, cim lis nraim tuaj nruab plawv. Zaum no ces neb yuav tsim noob neej kom mus puv lawm lub ntiaj teb no. Neb nco ntsoov ua neej coj lawm lub siab tus. Muaj lawm niaj ib hnub yav tom ntej, kuv, Tswv Ntuj, haj tseem yuav tuaj rhawv niaj ib txog zoo kev rau neb mus.”

= Zoo li, Tswv Ntuj hais lis ntsees rau Nkauj Iab thiab Nraug Oo tias: “neb yuav nco lis ntsoov tuaj nruab siab, cim lis nraim tuaj nruab plawv. Zaum no ces neb yuav tsim noob neej kom mus puv lawm lub ntiaj teb no. Neb nco ntsoov ua neej txhob ntaus lawm lub siab yau. Muaj lawm niaj ib hnub yav tom ntej, kuv, Tswv Ntuj, haj tseem yuav tuaj rhawv niaj ib txog zoo kev rau neb taug.

52. Ua ciav, yeeb vim hnub txheej tshoj thaum ub, ntuj hnub tuaj puag thaum ntxov i, Tswv Ntuj tsim ntiaj teb leej tib neeg noob neej los nyob, tsim tau nqaij yog nqaij toog, txhav yog Txhav hlau. Leej tib neeg noob neej nyob tsis txawj mob, pw los tsis
txawj tuag. Yog tau noob neej mloog Ntxwj Nyoog lus haub tuaj tim tsuag. Noob neej txhav toog thiaj plhis plho ua txhav plhaub mag, nqaij hlau thiaj plhis plho ua nqaij ciab zib. Zaum no ces tshav tuaj nqaij ciab zib thiaj li yaj lis ntsuav. Los nag txhav plhaub mag thiaj dam lis dhuav no nas.

= Ua ciav, yeeb vim hnub txheej tshoj thaum ub, ntuj hnub tuaj puag thaum ntxov i, Tswv Ntuj tsim ntiaj teb leej tib neeg noob neej los nyob, tsim tau nqaij yog nqaij toog, txhav yog txhav hlau. Leej tib neeg noob neej nyob tsis txawj mob, pw tsis txawj tuag. Yog tau noob neej mloog Ntxwj Nyoog lus haub tuaj tim dawm. Noob neej txhav toog thiaj plhis plho ua txhav plhaub mag, nqaij hlau thiaj plhis plho ua nqaij ciab zib. Zaum no ces tshav tuaj nqaij ciab zib thiaj li yaj lis tshaws. Los nag txhav plhaub mag thiaj dam lis daws no nas.

53. Ua ciav, noob neej lub cev nqaij thaum ub yog Tswv Ntuj muab av luaj los puab, tus ntsuj plig yog Tswv Ntuj muab. Zaum no, koj N…… (tub Nraug Laj, niam Nkauj Lag), lub cev nqaij ntaj ntsug tuag lis nthi los mus ces koj lub cev laus yuav mus zwm
twv av luaj liab. Koj tus ntsuj plig yuav plhis li plho ya mus cuag Tswv Ntuj pem lub Ceeb Tsheej kiab no nas.

= Noob neej lub cev nqaij thaum ub yog Tswv Ntuj puab los ntawm twv av luaj dub, tus ntsuj plig yog Tswv Ntuj pub. Zaum no, koj N…… (tub Nraug Laj, niam Nkauj Lag) lub cev nqaij ntaj ntsug tuag lis nthi los mus ces koj lub cev laus yuav mus zwm twv av luaj noo. Koj tus ntsuj plhis yuav plhis li plho ya mus cuag Tswv Ntuj pem lub Ceeb Tsheej zoo no nas

*** (Txij qhov no mus tas lawm niam ib qib. Ntawm no mus tas lawm niam ib quag no nas)

16- YOG VIM NOOB NEEJ TAU UA TXHAUM, NYEM NO NOOB NEEJ THIAJ MUAJ MOB MUAJ TUAG

54. Zoo li, yeeb vim hnub txheej tshoj thaum ub, ntuj hnub tuaj puag thaum ntxov i, Nkauj Iab thiab Nraug Oo nkawv khaws tau Ntxwj Nyoog lus haub tuaj rau nruab tsuag. Nyiam no, koj N…… (tub Nraug Laj, niam Nkauj Lag), thiaj li khaws tau
Ntxwj Nyoog lub mob coj lub tuag los puag.

= Zoo li, yeeb vim hnub txheej tshoj thaum i, ntuj hnub tuaj puag thaum ntxov ub, Nkauj Iab thiab Nraug Oo nkawv khaws tau Ntxwj Nyoog lus ntxias tuaj rau tim toj. Nyiam no, koj N…… (tub Nraug Laj, niam Nkauj Lag), thiaj li khaws tau Ntxwj
Nyoog lub mob lub ploj los coj.

55. Zoo li zaum no ces, koj N… (tub Nraug Laj, niam Nkauj Lag), ua neej txoos lawm ntiaj teb no, koj tsis khwv los tsis tau noj. Koj thiaj mus ua daim teb luj lias rau tej yas kab. Luag ces luag txawj khaws: luag khaws tau Ntxwj Nyoog lub mob lub tuag. Luag muab ntsaws ntso rau luag tej mus nqaws tiab. Koj tsis txawj khaws: koj yuav khaws ntsaws ntso rau koj tej ntshua siab no.

= Zoo li zaum no ces, koj N…… (tub Nraug Laj, niam Nkauj Lag), ua neej txoos lawm ntiaj teb no, koj tsis khwv los tsis tau hnav. Koj thiaj mus ua daim teb luj lias rau tej yas kev. Luag ces luag txawj khaws: luag khaws tau Ntxwj Nyoog lub mob lub tuag. Luag muab ntsaws ntso rau luag tej mus nqaws awv. Koj tsis txawj khaws: koj yuav khaws ntsaws ntso rau koj tej mus ntshua plawv.

56. Nyiam no, koj thiaj li ua mob qas ntxiag tuaj nruab siab, ua noo qas zias tuaj nruab cev. Koj pw qaug hau lias tuaj saum txaj. Ua ciav, zaj mob txawj mob los tsis txawj kaj. Nyiam no koj thiaj li ua mob qas ntxiag tuaj nruab cev, ua noo qas zias tuaj
nruab siab. Koj pw qaug hau lias tuaj saum ncoo. Ua ciav, zaj mob txawj mob los tsis txawj zoo, no sub.

17-MUS RAWS POJ MAB YAWM SUAV TUAJ NROG KHO SAIB PUAS ZOO?

57. Zoo li, koj kwv koj tig, koj tub koj kiv, txaum yim tuaj tom txuas, sab laj tuaj tom taj. Cav tau leej twg txawj ntsuas mob, nkawm twg txawj kho ntsaj?

= Zoo li, koj kwv koj tig, koj tub koj kiv sab laj tuaj tom taj, txaum yim tuaj tom txuas. Cav tau leej twg txawj kho mob, nkawm twg txawj kho nquag?

58. Ua ciav, cav tau Poj Mab txawj kho mob, Yawm Suav txawj kho ntsaj. Zoo li, tub txib los raug tsis muaj, tub khaiv los txawm tsis tau. Muab tau peev nyiaj txiag ntsaws ntso rau tub tij tej quav npab. Tub tij seev lis yees mus ywj kab.

= Zoo li, tub txib los raug tsis muaj, tub khaiv los txawm tsis tau. Muab tau peev nyiaj txiag ntsaws ntso rau tub kwv tej quav tes. Tub kwv seev lis yees mus ywj kev.

59. Zoo li, nyiam no ces leej tub tij ntoj nraws txog nram Poj Mab. Raws tau Poj Mab nqes tuaj poob. Poj Mab nkaus hlo cuaj hauv kuab los rau, yim hauv tshuaj los txhaj. Ua ciav, zaj mob txhooj nyob tsis kaj.

= Zoo li, nyiaj no ces leej tub kwv seev yees txog nram Yawm Suav. Raws tau Yawm Suav tuaj txog. Yawm Suav nkaus hlo cuaj hauv tshuaj los txhaj, yim hauv kuab los ntxuav. Ua ciav, zaj mob txhooj nyob tsis nquag.

60. Zoo li, nyiaj no ces, koj vuag yees nthab los plam ntawm npab, vuag yees tsev los plam ntawm tes. Koj ntog ib teeg sawv tsis tsheej neeg. Koj ntog ib vuag sawv raws tsis tau luag. Koj ncauj nplaig qhuav lis qho. Koj txoj pa tu lis nrho no sub.

= Zoo li, nyiaj no ces, koj vuag yees nthab los plam ntawm npab, vuag yees tsev los plam ntawm tes. Koj ntog ib teeg sawv tsis tsheej neeg. Koj ntog ib vuag sawv raws tsis tau luag. Koj ncauj nplaig qhuav lis qhawv. Koj txoj pa tu lis nrhawv no yuas.

61. Zaum no ces, koj ntim tau lub txiaj zam lis zim, seev lis yees los mus: ntshai koj yuav tseg ncua ib cim tsoos maj tsis tau nrog luag hnav. Yuav tseg tau N…… (koj tub koj kiv, koj txij koj nkawm, koj niam koj txiv), ua neej txias qas to lawm niaj ib tog
txaj no.

= Zoo li, zaum no ces, koj ntim tau lub txiaj zam lis zim, seev lis yees los mus: ntshai koj yuav tseg tau ib cim tsoos maj, ob cim tsoos ntuag tsis tau nrog luag zoo. Yuav tseg tau N…… (koj tub koj kiv, koj niam koj txiv, koj txij koj nkawm), ua neej txias qas to lawm niaj ib tog ncoo no.

62. Zaum no ces, koj ntim tau lub txiaj zam lis zim los pw lis ko tuaj ntawm cub. Koj kwv koj tig, koj tub koj kiv, mus hu qhua zej qhua zos tuaj nrog hlub.
= Zaum no ces, koj ntim tau lub txiaj zam lis zim los pw lis ko tuaj ntawm plag. Koj kwv koj tig, koj tub koj kiv, mus hu qhua zej qhua zos tuaj nrog nta.

63. Zaum no ces, qhua zej los tuaj txhij, qhua zos los tuaj tag. Muab cuaj txog kab los lis txhij, yim txoj kev los lis tag. Txawj Nkiag tub txawg yuav xa koj los mus lawm pem lub ntuj kag no yuas.

= Zaum no ces, kev zej los tuaj txhua, kev zos los tuaj txhij. Muab cuaj txog kab los lis tag, yim txoj kev los lis du. Tub txawg Txawj Nkiag yuav xa koj los mus lawm pem lub ntuj hu no nas.

*** (Txij qhov no mus tas lawm niam ib qib. Ntawm no mus tas lawm niam ib quag no nas)

18- UA LUB SIM CEEB IB LOS TSAUG

64. Tav no, koj N…… (tub Nraug Laj, niam Nkauj Lag), koj yuav cim lis ntsoov tuaj nruab siab, nco lis nraim tuaj nruab plawv tias: thaum koj ua neej txoos rau lawm ntiaj teb no, koj tau noj tsuag tus tsim ntiaj teb ib cim txuj: koj tau siv tas nws ib ntsug
zoov nuj. Koj tau haus tas tus tsim av ib ntu dej, rauv tsuag nws ib ntsug taws. Koj yuav nco ntsoov ua nws tsaug dej, tsaug taws, koj thiaj yuav tau kev los mus cuag tus tswv tsim koj lub cev no nas.

= Tav no, koj N…… (tub Nraug Laj, niam Nkauj Lag), yuav cim lis ntsoov tuaj rau nruab plawv, nco lis nraim tuaj nruab siab tias: thaum koj ua neej txoos lawm ntiaj teb no, koj tau siv tas tus tsim nrag cais ib cim ci; koj tau rauv tas nws ib ntsug taws, haus tsuag tus tsim av ib ntu dej. Koj yuav nco ntsoov ua nws tsaug dej, tsaug taws, tsaug txuj tsaug ci koj thiaj li yuav tau kev los mus cuag tus tswv tsim koj txoj sia no nas.

*** (Txij qhov no mus tas ib qib. Ntawm no mus tas lawm niam ib quag no nas).

19- MUAB TSHO TSUJ TSHO NPUAG

65. Zaum no ces, koj ntim tau lub txiaj zam li zim, sawv kev lis tsees los mus. Koj yuav nco lis ntsoov nqa koj Ntoos Cuam thiab tus Tswm Ciab ntshiab seev lis yees ua ntej, sawv kev lis tsees los mus txog N…… (hais qhov chaw yug lub npe zos, npe teb chaws). Yog qhov chaw thaum ub koj niam thiab koj txiv xov xeeb koj. Koj yuav nco lis ntsoov tuaj nruab siab, cim lis nraim tuaj nruab plawv. Koj mus muab koj tsho tsuj tsho npuag hnav. Koj yog ib leeg tub, ces koj tsho tsuj tsho npuag nyob ntawm ncej ntug.

= Zaum no ces, koj ntim tau lub txiaj zam lis zim, sawv kev lis tsees los mus. Koj yuav nco lis ntsoov nqa koj Ntoo Cuam thiab tus Tswm Ciab ntshiab seev lis yees ua ntej ais. Koj sawv kev lis tsees los mus txog N…… (hais qhov chaw yug lub npe zos, npe teb chaws). Yog qhov chaw thaum ub koj niam thiab koj txiv xov xeeb koj. Koj yuav nco lis ntsoov tuaj nruab siab, cim lis nraim tuaj nruab plawv. Koj mus muab koj tsho tsuj tsho npuag hnav. Koj yog ib leeg ntxhais, ces koj tsho tsuj tsho npuag nyob ntawm ncej paim. Hais li no qhia rau koj nas.

66. Zoo li, koj yog ib leeg tub ces, koj yuav khiav khuav sab laug tuaj muab. Tes lauj rub lis zog tuaj ntawm cev, lauj nas swb lis zog tuaj ntawm ntiag. Lub haum koj ces koj li hnav koj thiaj tau koj tsho tsuj tsho npuag hnav sawv lis tsees los mus cuag tus
tswv tsim koj txoj sia no nas.

= Zoo li, koj yog ib leeg ntxhais ces, koj yuav khiav khuav sab xis tuaj khaws. Tes lauj rub lis zog tuaj ntawm npab, lauj nas hus zog tuaj ntawm tes. Lub haum koj ces koj li hnav, koj thiaj tau koj tsho tsuj tsho npuag hnav sawv lis tsees los mus cuag tus
tswv tsim koj lub cev no nas.
*** (Txij qhov no mus tas lawm niam ib qib. Ntawm no mus tas lawm niam ib quag no nas)

20-XA MUS NCE NTAIV NTUJ.

Tus ua cov kab ke xa plig yuav nco ntsoov hais cov lus hauv qab no rau xyom cuab:

*** Cov tub cov nyab, cov ntxhais cov vauv, nej vam vam tos tos kom kuv (peb) tuaj pab nej, tab sis, kuv (peb) twb tuaj pab tsis tau nej raws li nej lub siab xav mog. Txij qhov no mus yog txwm xa nej N…… (niam txiv, txiv), mus nce ntaiv ntuj. Cuag li kuv (peb) tseem haj yam tuaj muab nej N…(niam, txiv), xa mus deb deb ntawm nej kom tas nrho ib sim neej xwb. nej txhob tu siab os mog. Tsis ua li ntawd los txoj kab txoj kev tsis tag ais kuv (peb) thiaj ua raws li txoj kab txoj kev kom nej N… (niam,txiv), tau kev mus txog chaw ais nej txhob tu siab os mog!

*** Lub caij tus xa plig hais lus xaus nkaus; yog xyom cuab paub tab ces xyom cuab sawv tsees mus hais li no:

Muaj lus ua tsaug mog N… (saib yus hu tus xa plig li cas, tuav kiag nws npe), qhov niag laj mas koj (nej) yeej ceeb tis laj laud! tab sis, tav no peb N… (niam, txiv), nyob tsis ua caij tuag tsis ua nyoog lawm, thov koj (nej) ua siab ntev xa peb N…(niam, txiv), mus kom txog chaw mog, koj (nej) tus txiaj tus ntsim peb yeej nco ntsoov tseg .… Ces xyom cuab pe kiag tus xa plig ib pes.

*** Tus xa plig teb tias:
Txhob pe os mog, nej txawm vam vam tos tos los kuv (peb) twb pab tsis tau raws li nej siab xav, sawv lau mog! (txaum yim tsa kom xyom cuab sawv).

67. Tav nov ces, koj ntim tau lub txiaj zam lis zim, nqa koj ntoo cuam thiab koj tswm ciab ntshiab seev lis yees los mus muab tau koj tsho tsuj tsho npuag hnav tag. Zaum no ces, kuv (peb) xa koj los mus nce lis hlo Tswv Ntuj 90 qib mus ntaiv av. Ua ciav, koj tig ntsia lawm ntiaj teb: koj yuav pom tau koj N…… (tub koj kiv, koj niam koj txiv, koj txij koj nkawm), ua neej quaj ntsuag pos muag nti lawm ntiaj nrag.

= Zaum no ces, kuv (peb) xa koj los mus nce lis hlo Tswv Ntuj 90 qib mus ntaiv zeb. Ua ciav, koj tig ntsia lawm ntiaj nrag: koj yuav pom tau koj N…(koj tub koj kiv, koj niam koj txiv, koj txij koj nkawm), ua neej quaj ntsuag pos muag nti lawm ntiaj teb no nas.

68. Zaum no ces, kuv (peb) xa koj los mus nce lis hlo lawm Tswv Ntuj tus ntaiv ntuj. Koj cim lis ntsoov tuaj nruab siab, nco lis nraim tuaj nruab plawv. Koj yuav nce niaj qib quas lawm niaj ib ntaiv, ces koj li yuav nce nto lis hlo Tswv Ntuj tus ntaiv ntuj lawm.

= Zaum no ces, kuv (peb) xa koj los mus nce lis hlo lawm Tswv Ntuj tus ntaiv zeb. Koj cim lis ntsoov tuaj nruab siab, nco lis nraim tuaj nruab plawv. Koj yuav nce niaj ib qib quas lawm niaj ib ntaiv, ces koj yuav nce nto lis plaws Tswv Ntuj tus ntaiv zeb lawm.

69. Ua ciav, koj yuav mus pom tau ob tug tswv zov rooj ntug. Leej sab xis tuav ntaj toog, ua daj lis zus ntsuas lawm koj cev, laug rooj vag hlau los thaiv koj kev.

= Leej sab laug tuav ntaj hlau, ua dos lis nyas ntsuas lawm koj npab, laug rooj vag tooj los thaiv koj kab. Nkawv hais rau koj tias: “koj yog ntiaj teb leej tib neeg. Koj nqa koj Ntoo Cuam thiab koj Tswm Ciab ntshiab los mus ua tus tsi?”

70. Koj yuav tsa ncauj los hais tias: “niaj yeeb vim thaum koj ua neej txoos lawm ntiaj teb, koj tsis khwv los tsis tau noj. Koj ua tau daim teb zuj zias tuaj tim toj. Ntxwj Nyoog siab phem siab tsis zoo: Ntxwj Nyoog tso tau zaj mob zaj tuag poob sis nthav
rau ntiaj teb ais koj thiaj khaws tau coj, koj thiaj li tau txais txoj niag kev ploj.”

= Koj yuav tsa ncauj los qhub lis zoj hais tias: “niaj yeeb vim thaum koj ua neej txoos lawm ntiaj teb, koj tsis khwv los tsis tau hnav. Koj ua tau daim teb zuj zias tuaj tim tsuag. Ntxwj Nyoog siab phem siab tsis zoo: Ntxwj Nyoog tso tau zaj mob zaj nkeeg
poob sis nthav rau ntiaj nrag ais koj thiaj khaws tau puag, zaum no koj thiaj li tau txais txoj niag kev tuag.”

71. Koj vuag yees nthab los plam ntawm npab. Vuag yees tsev los plam ntawm tes. Koj ntog ib teeg sawv tsis tsheej neeg. Koj ntog ib vuag sawv raws tsis tau luag. Zaum no koj thiaj ntim tau lub txiaj zam lis yeev yuav los mus cuag tus tswv tsim koj lub
cev.

= Koj vuag yees tsev los plam ntawm tes. Vuag yees nthab los plam ntawm npab. Koj ntog ib teeg sawv tsis tsheej neeg. Koj ntog ib vuag sawv raws tsis tau luag. Zaum no koj thiaj ntim tau lub txiaj zam lis yeev yuav los mus cuag tus tswv tsim koj txoj pa.

72. Koj hais lo ib tas. Hais lo ob tuaj tias: “thaum koj ua neej txoos lawm ntiaj teb no, koj tau noj lawm Vaj Yes Xus lus qhuab, koj tau mloog lawm nws qhia. Zaum no koj sawv kev lis tsees los mus koj thiaj vam tau Vaj Yes Xus tus Ntoo Cuam ua lawm niam Nkauj Nraug Ntxuam Cua xa koj los mus cuag tus tswv tsim koj txoj sia.”

= Koj hais lo ib tas. Hais lo ob tuaj tias: “Thaum koj ua neej txoos lawm ntiaj teb no, koj tau noj lawm Vaj Yes Xus lus qhia, koj tau mloog lawm nws qhuab. Zaum no koj sawv kev lis tsees los mus koj thiaj vam tau Vaj Yes Xus tus Tswm Ciab ntshiab ua
lawm niam Nkauj Nraug Ntxuam Cua xa koj los mus cuag tus tswv tsim koj tug ntsuj duab. Koj hais li ces ob tug tub zov rooj ntug li qhib rooj ntug rau koj mus, nrug lub rooj teb rau koj hla no nas.”

*** (Txij qhov no mus tas lawm niam ib qib. Ntawm no mus tas lawm niam ib quag no nas)

21- MUS TXOG TSWV NTUJ LUB CEEB TSHEEJ

73. Zoo li, zaum no ces, koj yuav nco ntsoov nqa koj Ntoo Cuam ntshiab thiab koj Tswm Ciab huv ua koj ntej seev lis yees los mus txog Tswv Ntuj lub hav paj ntshua nplaim liab. Koj yuav pom tau Vaj Yes Xus nrog tas nrho ib tsoom Leej Ntshiab thiab koj tsoom Pog tsoom Yawg siab huv tuaj tos koj ua ntshua lis niab.

= Zaum no, koj nqa koj Ntoo Cuam huv thiab koj Tswm Ciab ntshiab seev lis yees los mus txog Tswv Ntuj lub hav paj ntshua nplaim dawb. Koj yuav pom tau Vaj Yes Xus nrog tas nrho ib tsoom Leej Ntshiab thiab koj tsoom Pog tsoom Yawg siab ntshiab tuaj tos koj ua ntshua lis zawv.

74. Koj nco ntsoov nqa koj Ntoo Cuam ntshiab thiab koj Tswm Ciab huv dhia paj paws lias rau Vaj Yes Xus tej mus nqaws tiab. Vaj Yes Xus yuav coj koj mus nyob hauvTswv Ntuj lub mus theej kiab. Koj yuav tau nyob kaj lug kaj nrig mus tas nrho niaj ib txhiab.

= Koj nco ntsoov nqa koj Ntoo Cuam huv thiab koj Tswm Ciab ntshiab dhia paj paws lias rau Vaj Yes Xus tej nqaws awv. Vaj Yes Xus yuav coj koj mus zaum ntua Tswv Ntuj lub mus zoo chaw. Koj yuav tau nyob kaj lug kaj nrig mus tsis muaj caij kawg no nas.

75. Zoo li, Tswv Ntuj li tsa ncauj hu koj luag lis nyav hais rau koj tias: yeeb vim thaum koj ua neej nyob ntiaj teb. Koj tau mloog lis nraim Huab Tais Yes Xus cov lus qhub. Zaum no, koj los txog ntuj ceeb tsheej lawm, cia Kuv, Tswv Ntuj, yuav coj koj mus ua ib leej mus zoo tub.

= Tswv Ntuj li tsa ncauj hu koj luag lis nyav hais rau koj tias: yeeb vim thaum koj ua neej nyob ntiaj teb. Koj tau mloog lis nraim Huab Tais Yes Xus cov lus hais. Zaum no, koj los txog ntuj ceeb tsheej lawm cia, Kuv, Tswv Ntuj, yuav coj koj los ua ib leej mus zoo ntxhais.

76. Tswv Ntuj hais rau koj tias: koj tso siab mog, vim thaum koj ua neej nyob ntiaj teb, koj hais lis nraim zaj peb Txiv. Zaum no, Kuv, Tswv Ntuj yuav coj koj mus zaum ntua nws lub zoo mus theej tim. Koj yuav tau nyob kaj lug kaj nrig lawm niaj ib txhis.

= Tswv Ntuj hais rau koj tias: koj tso siab mog, vim thaum koj ua neej nyob ntiaj teb, koj tau hais lis nraim zaj koj nyob kaj lug Mab Liab. Zaum no, Kuv, Tswv Ntuj yuav coj koj mus zaum ntua nws lub zoo mus theej kiab. Koj yuav tau nyob kaj lug lawm niaj ib txhiab no nas.

22-TXWM NROM TXIAJ NTSIG RAU TUB KI:

*** Tig xub ntiag rau xyom cuab.

77. Zaum no ces, koj tau mus zaum ntua Tswv Ntuj lub mus zoo rooj. Koj nco lis ntsoov thov kom Tswv Ntuj foom txiaj ntsha huv, nrom txiaj ntsim nshiab los rau koj tsoom npoj tub npoj nyab, npoj ntxhais npoj vauv, tub xeeb leej ntxhais xeeb ntxwv, kom ua neej nyob tom qab tau nyob mus sawm koob.

= Zaum no ces, koj tau mus zaum ntua Tswv Ntuj lub zoo sam phiaj. Koj nco ntsoov thov kom Tswv Ntuj foom txiaj ntsha ntshiab, nrom txiaj ntsim huv, los rau koj tsoom npoj tub npoj nyab, npoj ntxhais npoj vauv, tub xeeb leej ntxhais xeeb ntxwv, kom ua neej nyob tom qab tau nyob mus sawm txhiaj no yuad!

23- TXWM XAUS: Txij txwm no mus hais ua lub suab lus taum

78. Ua ciav! zaum no kuv (peb) xa koj tuaj nto ntuj plaws. Tshav ntuj tuaj tis ua tshav. Koj yog qaum ntuj neeg. Koj mus taus ces cia koj mus. Kav tsij maj zeeg mus cuag tus tswv tsim koj lub cev thiab koj tsoom pog tsoom yawg siab huv, tsam niaj coob quaj zig qees qab kev los, niaj cais quaj ziag qees qaum kev tuaj, muaj tug ho los tuav koj npab. Oob niaj hlob tuaj tis ua hlob, niaj oob ho ntws los tav lawm koj txoj mus hauv kab.

= Zaum no kuv (peb) xa koj tuaj nto ntuj plaws. Tshav ntuj tuaj tis ua tshav. Koj yog qaum ntuj neeg. Koj mus taus ces cia koj mus. Kav tsij maj zeeg mus cuag tus tswv tsim koj txoj sia thiab koj tsoom pog tsoom yawg siab ntshiab, tsam niaj coob quaj zig
qees qab kev los, niaj cais quaj ziag qees qaum kev tuaj, muaj tug ho los tuav koj tes. Oob niaj hlob tuaj tis ua hlob, niaj oob ho ntws los tav lawm koj txoj mus hauv kev yuas.

24- ZAIS ROJ ZAIS NEEV.

79. Ua ciav! (muam nkauj lag, txiv Nraug Laj, txiv Nuj Sis Loob) ais om! Zaum no, kuv (peb) xa koj tuaj nto ntuj lis plaws. Koj yog qaum ntuj neeg. Koj mus taus ces cia koj mus. Kuv (peb) yog ntiaj teb neeg. Kuv (peb) mus tsis tau ces kuv (peb) yuav yaj lis ntshis nrog Tswv Ntuj lub txiaj ntsha ntshiab, txia lis ntshis nrog Tswv Ntuj lub txiaj ntsha huv, ploj pliag lawm tej qab zeb, tawm plaws lawm ntiaj teb.

= Ua ciav! zaum no kuv (peb) xa koj tuaj nto ntuj lis plaws. Koj yog qaum ntuj neeg. Koj mus taus ces cia koj mus. Kuv (peb) yog ntiaj teb neeg. Kuv (peb) mus tsis tau ces kuv (peb) yuav yaj lis ntshis nrog Tswv Ntuj lub txiaj ntsha huv, txia lis ntshis nrog Tswv Ntuj txiaj ntsha ntshiab, ploj pliag lawm tej qab ca, tawm plaws lawm ntiaj nrag om.

TAS

*** Tus xa plig muab kiag cov dej ntshiab pov rau saum tus tuag thiab thoob plaws rau
saum tsoom neeg sawv daws.

Sponsored content

Re: QHUAB KE zaj ntev==> Ntu Ib ( zaj 1)

Post Sponsored content

HMONG CATHOLIQUE

Yesxus Pleev

Phau Ntawv Ntshiab2002

Search

Gallery

Latest topics

Speciale Hmong Guyane

Hmoob Tshav Ntuj

Suav neeg tuaj saib, txij hnub 17/09/2010 los mus.

QHUAB KE zaj ntev==> Ntu Ib ( zaj 1)

QHUAB KE zaj ntev==> Ntu Ib ( zaj 1)

Re: QHUAB KE zaj ntev==> Ntu Ib ( zaj 1)

Re: QHUAB KE zaj ntev==> Ntu Ib ( zaj 1)

Re: QHUAB KE zaj ntev==> Ntu Ib ( zaj 1)

Similar topics

Similar topics

Niam Mab Liab

Tshiab Mis Kas Ees

NtawvXamNyoog2017_18_B.

KEV KAWM

KEEB KWM

NKAUJ TEEV NTUJ

KOOM TXOOS

CAW LOS NYEEM NTAWV

Search Query

Display results as : Posts Topics
Advanced Search

HMONG CATHOLIQUE

Yesxus Pleev

Phau Ntawv Ntshiab2002

Search

Gallery

Latest topics

Speciale Hmong Guyane

Hmoob Tshav Ntuj

Suav neeg tuaj saib, txij hnub 17/09/2010 los mus.

QHUAB KE ***zaj ntev***==> Ntu Ib ( zaj 1)

QHUAB KE ***zaj ntev***==> Ntu Ib ( zaj 1)

Re: QHUAB KE ***zaj ntev***==> Ntu Ib ( zaj 1)

Re: QHUAB KE ***zaj ntev***==> Ntu Ib ( zaj 1)

Re: QHUAB KE ***zaj ntev***==> Ntu Ib ( zaj 1)

Similar topics

Similar topics

Niam Mab Liab

Tshiab Mis Kas Ees

NtawvXamNyoog2017_18_B.

KEV KAWM

KEEB KWM

NKAUJ TEEV NTUJ

KOOM TXOOS

CAW LOS NYEEM NTAWV

QHUAB KE zaj ntev==> Ntu Ib ( zaj 1)

QHUAB KE zaj ntev==> Ntu Ib ( zaj 1)

Re: QHUAB KE zaj ntev==> Ntu Ib ( zaj 1)

Re: QHUAB KE zaj ntev==> Ntu Ib ( zaj 1)

Re: QHUAB KE zaj ntev==> Ntu Ib ( zaj 1)