TXOJ KEV NTIAB DAB.

Txoj kev ntiab dab tsis yog ib txoj kev yooj yim raws li leej tib neeg txoj kev xav. Tias muaj dab los nyob hauv neeg lub cev los tsis muaj. Cov neeg ntseeg yuav ceev faj, tsam peb yuam kev, mus vam txog lwm tus Tim Tswv tuaj nrog peb ntiab dab.

->Tab yog Yes Xus kiag, thaum Yes Xus ntiab dab, Yes Xus tsis hais lus ntau. Yes Xus tsuas hais ib lo lus tias:
Xas Tas koj tawm khiav mus no xwb, Yes Xus tsis hais lus nrov thiab tsis nthe ua yoj teg yim taw li neeg ntiaj teb ua. Uas yuav qw thiab nthe nrov nrov los ntiab dab.  Kom dab ntshai ces dab thiaj li khiav tawm mus.

->.Thaum Yes Xus kho cov neeg mob, Mas Yes Xus tsuas ntsia neeg nruab siab.  Thiab hais tias, Koj lub siab ntseeg cawm tau koj dim ntawm koj tus mob lawm. Koj mus koj nyob kaj lug mog no xwb.

->. Thaum peb ntiab dab, peb kuj tsuas tuav txog Yes Xus lub npe los ntiab cov dab raws li Yes Xus tau ua los lawd. Qhov tseeb, mas peb ntseeg thiab tso siab rau Yes Xus, yog tus ntiab tau dab tawm mus.
Peb thov thiab vam txog Yes Xus lub hwj chim muaj zog los pab caum dab cov ntsuj plig phem ntawd. Yog Tswv Ntuj pom zoo ua li cas, mas peb mloog thiab yuav li ntawd xwb.
Peb txhob ntshaw qhov uas peb nthe nrov, ces dab yuav ntshai thiab tawm khiav mus ua rau dab qw tej niag zaj nkaus vos khiav lawm. Yog peb ntshaw yam kom dab quaj thiab tawm khiav quaj tej niag zaj nkaus vos tawm mus.
Tsam peb yuam kev, ces peb tau vam txog tus thawj dab los ntiab cov dab me. Dab phem yeej ua tau qhov ntawd, kom peb ntseeg thiab zoo siab. Thiab ua rau luag tej ntseeg tias, peb muaj peev xwm cuag li Yes Xus ntag.
Peb ntiaj teb neeg, tsis hais pab twg los npoj neeg twg li: Cov ua thawj neeg, zoo li cov Xib Hwb, cov txiv muam, cov ua Yaj Saub, cov txwj laus ub txwj lus no.
Leej twg ntseeg txog tus Tim Tswv twg, mas peb tsuas hu txog tus Tim Tswv ntawd tuaj pab.  Cov neeg ntseeg txog Yes Xus lub npe, peb kawg hua txog Yes Xus tuaj pab ntiab dab xwb. Ntuj pom zoo pub li cas rau tus neeg mob peb tsuas tso siab xwb.

->. Thaum peb thov Ntuj rau cov neeg mob peb ntseeg thiab tso siab rau Leej Ntuj Plig yuav pub peb txais lub txiaj ntsim loj los me li cas. Thiab hais tau hom lus twg.  Los nyob ntawm, Leej Tswv Yim Ntshiab lub txiaj ntsim Nws kam pub rau tus neeg mob ntawd xwb.
Peb txawj hais li cas peb yuav hais mus raws li seem Leej Ntuj plig qhia peb hais ntawd.  Peb tsuas tso siab rau Yes Xus  thiab Leej Tswv Yim Ntshiab. Peb yuav ceev faj tsam peb ua neeg yuam kev, ces peb coj neeg mus rau txoj kev tsaus ntuj.
Tos kuv sau piav txog zaj ntiab dab no. Kuv tau pom nyob hauv facbouk, ib tug xib hwb, nws hais tias, nws yog Xib Hwb txawj ntiab dab.
Muaj ob tug niam txiv hmoob tus me nyuam mob, Hmoob hais tias, yog rau dab no.  Coj mus rau Xib Hwb ntiab dab tawm, ces Xib Hwn muab phau ntawv Bible los nplawm tus tub raug dab no.
Txij li thaum peb teev sawv ntxov, mus txog yim teev. Muab phau ntawv Ntshiab ntawd.  Ntaus tus tub raug dab no, ntaus  mus txog yim teev sawv ntxov, dab tsis tawm khiav li.  Ces tus tub ntawd tuag lawm, nws tej nqaij ntawm lub ntsej muag ,tej hauv siab thiab ob sab npab doog ntshav dub nciab tas tib si.

->. Zaj ntiab dab ob, tib tug Xib Hwb no thiab, nws coj ib pab tim khawv,  uas yog nws npoj neeg ntiab. Lawv mus ntiab dab, lawv pib ntiab dab rau ib tug neeg mob.  Vim tus neeg mob no, Hmoob hais tias, yog raug dab thiaj mob.
Lawv ntiab dab ces ib pliag dab nkag rau tus tod ua rau nws ntog qaug kiag rau hauv av lawm. Lawv rov ntiab rau tus ntog ntawd, ib pliag zoj dab siv nkag kiag rau lwm tus cov tuaj ntawd, ib tug dua lawm thiab.
Dab nkag yuav luag txhua, cov neeg uas Xib Hwv coj tuaj ntawd.  Hos tus neeg mob Hmoob hais tias raug dab no, nws tus mob raug dab los yeej tsis zoo li thiab.  Dab tsis kam tawm mus li.
Tej no kuj yog peb cov neeg ntseeg sawv daws tej kev ceev faj thiab kev kawm paub. Peb ntseeg lawm peb tsuas thov  kom Tswv Ntuj pab  Ntuj pab thiab muaj kev tso siab rau Tswv Ntuj xwb.  Peb ua Ntuj tsaug, txawm nws tus mob yuav zoo los tsis zoo, peb yuav cav txog Ntuj thiab tso siab rau Tswv Ntuj nkaus xwb.
Tswv Ntuj pom thiab paub peb tej nruab siab tas tib si lawm, Mob ces yog raug kab mob xwb. Tsis yog raug dab li peb xav, yog rau dab npaum li Hmoob hais mas Dab twb coj Hmoob mus nyob rau dab teb tas nrho lawm.
Peb ntseeg peb tsuas thov Ntuj kom Tswv Ntuj hlub thiab pub txiaj ntsim rau cov neeg mob kom lawv tso siab thiab ua siab loj mus nrhiav tshuaj los kho kom mob zoo xwb.
Qhov yuav zoo thiab tsis zoo, mas peb tsis paub lawm. Peb tsuas saib txoj hmoo yuav nyob ntev los luv kawg tsos siab kom tus ntsuj plig tau ua neeg dawb huv mas txaus siab lawm.
Nyob hauv Hmoob kev ua khawv koob, hmoob tus hais cov lus ntiab dab. Yog raug dab lawm tsuas ua khawv koob kom thim laj thim sob mus xwb.  Puas yog raug dab los nws yeej xeeb txawm muaj mob sab foob khaub thuas.
Hmoob kuj tsis tau muab tus neeg mob raug dab no ntaus kom nqaij doog, kom dab tau ntshai, dab thiaj li tawm khiav mus.
Ib tug neeg ntseeg txog Yes Xus lub npe, Yog nws nyob tsis muaj ciam,  mas kawg yog ib txoj kev mus zwm rau lwm tus Tim Tswv coj nws ua tej hauj lwm txawv txawv ntawd.  Kom qaug mus rau cov dab ntsuj plig phem sab.
Peb txhob nyiam ib txoj kev ntiab dab zoo li tej hauj lwm zwm rau lwm tus dab.  Cov kev cai qhia coj kom neeg muaj peev xwm thiab muaj hwj chim cuag li Tswv Ntuj zaj txuj ci, tsam ua rau Tswv Ntuj tau dhuav tej neeg coj li ntawd. .

Sacramento,31/10/2018.
Yaj Zoov Ntxheb Xib Hwb.