TXOJ KEV HWM NTUJ.

Txoj kev hwm Ntuj, yog ib txoj kev tseem ceeb thiab loj, duav tas nrho txhua txoj kev ntseeg tib si mus.  Zoo li tej kev hwm niam hwm txiv, nrog rau tej kev hwm tej pog tej yawg mus thoob plaws, nrog kev sib hwm nyob hauv cuab kwv tij  cuab neej tsa, los tsoom phooj ywg txhua npoj neeg tib si.

->.Vim li cas ho hais tias, loj duav tas txhua txoj kev hwm!  Nyob hauv cov thawj neeg, tej nom tswv, cov hlob thiab cov yau mus rau cov txiv muam coj dab qhuas.
Mus rau cov thawj Hauj Sam loj thiab me los rau cov thawj neeg coj ib txoj kev ntseeg zoo li cov Vaj Qhia, Tswv Qhia, rau tsoom Leej Choj thiab tsoom Xib Hwb.
Los mus rau txhua npoj neeg, tsis hais pab coj kev ntseeg dab tsi li.  Tswv Ntuj yog thawj tug nyob saum txhua txoj kev ntseeg.  Vim Ntuj yog tus tsim tas nrho txhua yam, muaj tuaj nyob ntiaj teb no.

->. Koj yuav tau hwm, tas txhua Haiv neeg, los txhua npoj neeg, uas koj paub nyob ntiaj teb no.  Vim sawv daws yog Ntuj me nyuam tas tib si, ua ke nyob hauv Tswv Ntuj txhais tes tau tsim los.
Tsuav yog koj tau hwm ib tug neeg xwb, los koj tau hwm Tswv Ntuj lub meej mom lawm.  Thaum koj tau hwm ib tug neeg lawm, ces koj twb tau luag, thiab tsis muaj kev ntshai yeeb ncuab lawm.
Vim koj tau ua yam zoo rau Ntuj ces Ntuj pab txhawb zog rau koj ua lub neej nyob kaj siab thiab tau nyob thaj yeeb tuaj lawm.

->. Muaj tej yam tseem ceeb, uas koj tau paub txog kom koj tau nyob tiaj tus.  Thiab ua rau koj tau luag ua neej nyob, koj mus txog twg los muaj phooj ywg ua rau koj siab loj thiab nyob kaj lug.
Vim koj hwm tej yam, uas yog Ntuj tau tsim los, kom muaj nyobrau ntiaj teb no. Ces lawv ua koj luag, koj thiaj muaj lub siab loj.  Vim koj tsis tau hais lus, los thuam Ntuj thiab thuam tej yam Ntuj tau tsim los.  Vim sawv saws yog koj tsoom txheeb ze nyob nrog koj.
Lawv sawv daws txawm coj, tej kab lis kev cai dab tsi, los koj txhob thuam. Vim luag yog neeg tsis thoob tsib, luag tsuas paub txog tej yam ntiav ntiav tuaj ntawm neeg tej ncauj lus hais tawm los xwb.
Lawv tsuas ntseeg txog tej yam ntiav ntiav, kom pab tau lawv me ntsis xwb.  Tsuav yog lawv tau nyob kom ib nyuag kaj siab lug ces zoo rau lawv lawm.
Yam uas yuav txaus txhawj, mas yog cov neeg uas lawv tsis ntseeg txog dab tsi li.  Lawv tsuas ntseeg lawv lub plab xwb, thaum lawv noj mov tsau plab lawm, lawv kuj yog neeg zoo.
Lub caij lawv tau tshaib plab tuaj, mas lawv txawj mus ua tub sab tho luag qhov vaj qhov tsev. Yuav muaj zaum puav lawv raug kev ploj tuag mus, nyob rau lub caij lawv tab tom ua kev txhaum.
Khuv xim lawv tus ntsuj plig, uas tsis mus taug txoj kev zoo, kom tus Ntsuj Plig muaj txoj sia nyob, nrog Tswv Ntuj thiab nrog Ntuj cov Tshiab los nrog tsoom neeg siab dawb huv nyob ua ke.
Koj yuav hwm lawv thiab coj ib tug qauv zoo, rau lawv pom. Tswv Ntuj yuav maj mam muab lawv tig los kom paub yam zoo zuj zus tuaj.  Vim koj tau ua ib tug qauv zoo rau luag pom thiab paub.
Ces lawv yuav maj mam pom Tswv Ntuj tus duab, nyob hauv lawv kev xyaum ua neeg zoo. Lawv yuav ncawg koj thiab nrog koj ua phooj ywg, nyob hauv Tswv Ntuj kev thoob tsib.  Muaj ib hnub lawv yuav pom Tswv Ntuj lub txiaj ntsim, vim koj yog lawv tus zoo phooj ywg.

->. Hais txog tus yam ntxwv, koj yuav coj nyob hauv koj cov phooj ywg. Tsis hais hom kev ntseeg twg li, koj nyob nrog lawv, thaum lawv mus pe Mlom los pe tej niam tej txiv los pog yawg.
Koj nrog lawv pe ib yam nkaus, lawv lub tswv yim mus txog tus mlom los tej niam tej txib ntawd xwb.  Hos koj pe li lawv pe, tab sib koj lub tswv yim thaum koj pe ntawd, Koj muab los mus cev, los cob rau koj tus Tswv Ntuj.
Ces koj tau ua ib yam zoo xis neeg siab, thiab tseem haj yam zoo xis rau Tswv Ntuj siab tshaj. Koj nrog lawv ua ib co kab ke pe hawm, kuj yog koj tau pe hawm kiag, koj tus Tswv Ntuj nyob ntawm lawv xub ntiag.  Mas yog ib yam zoo tshaj uas cia rau Tswv Ntuj ib leeg paub xwb.
Ces koj txoj kev nrog luag pe hawm ntawd, yuav rub tau lawv los paub txog Tswv Ntuj cov txiaj ntsim los pab cov neeg, uas koj tau nyiam thiab hlub lawv, kom lawv tau paub tus Tswv Ntuj tseem ceeb tiag.
Koj yuav txhob tsawm thiab hais lawv dab plig txog cov neeg tsis tau paub tab ntawd. Tab yog ib pab neeg ntseeg txog Yes Xus lub npe, uas lawv ua ib cov neeg, ncauj qab zib nplaig qab ntse, uas Hmoob hais tias, lawv nyiam kev ntxias noj ntxias qhe ntawd, los txhob thuam thiab.
Lawv yuav maj mam pom, Tswv Ntuj tus duab ua zem zuag nyob hauv koj tej hauj lwm, uas koj tau ua zoo rau lawv. Ces kuj yog ib yam zoo, coj lawv los paub txoj kev ua Ntuj me nyuam.  Koj yuav nco tias, yuav ua li cas, thiaj li txaus Tswv Ntuj nyiam.

->. Hais txog txoj kev sau nyiaj, nyob hauv cov tsev teev ntuj. Tsuas yog sau los kom tau pab tej tus neeg, uas lawv tsis tau tes mus khwv nyiaj los yug lawv tsev neeg.
Thiab coj los pab lub tsev teev Ntuj, tej nqi dej nqi taws, los pab  lub tsev teev ntuj no, tej twj los qhov muaj chaw yuav siv los kho thiab hloov tej yam qub lawd, rau tas sawv daws tau siv xwb.
Tsis hyog sau los kom tus saib lub tsev teev ntuj muaj txiag nplua nuj mus. Tus uas nws muab nyiaj siv los ua tsi yog cai, lam siv cov nyiaj no, txhais tau tias nws yog ib tug tub sab ib yam nkaus li tus mus tho luag qhov vaj qhov tsev, los yog neeg dag noj dag haus lawm.

->. Muaj tej yam xwm, uas tsim nyog yuav muab los tshaj tawm, kom sawv daws tau paub txog:
Yam li xyoo 1975  muaj kob tsov rog Mes Kas thiab Cob Tsib qaum teb ua rog ntawd. Cov neeg sib ua rog muaj neeg tuag coob kawg.
Cov cheem tsov rog zaum ntawd, yog cov neeg ntseeg txog Yes Xus lub npe, ua cov cheem kob tsov rog no ntag. Cov neeg ntseeg nyob Mes Kas teb yog cov xub pib.
Ces tas ntiaj teb cov neeg ntseeg txog Yes Xus lub npe koom siab ua ke nrog cov Mes Kas lawv kwv tej daim phiaj {paib} los tawm tsam kom tso kob tsov rog no tseg.
Ua rog tshaj no ntxiv mus , mas neeg yuav tuag coob heev. Tsis tsim nyog lawm, thov kom tso tseg. Nyob hauv cov neeg muaj plaub ntug raug luag kev ntxub. Yuav khiav tawm teb chaws kom muaj kev ua lub neej nyob thaj yeeb.
Tej nqi tsheb nqi nkoj ya thaum neeg khiav nrhiav kev thaj yeeb rau cov muaj paub ntug no, kuj yog cov neeg ntseeg txog Yes Xus lub npe.  Ua cov pab nyiaj nqi tsheb nqi dav hlau, kom tau kev hla mus nyob rau lwm teb chaws tib si.
Mus txog los, kuj tseem  yog cov neeg ntseeg Yes Xus lub npe ua cov ncauj lus thov kom tej tseem hwv nrog tej pej xeem sib tawm nyiaj se los yug sawv daws txhua tus.
Tej teeb meem no, lawv muaj nyiaj pab cov neeg thoj nam ua neej nyob rau pej kub teb.  Twb yog pab neeg ntseeg txog Yes Xus lub npe no.  Nrog rau tej Nom Tswv tus tseev tsim teb chaws lub tswv yim no ua tuaj. Thiaj muaj kev pab cuam rau tsoom neeg thoj nam.
Cov ntseeg txog Yes Xus lub npe, lawv lub hwj chim loj thiab dav npaum li no. Tsim nyog sawv daws yuav sib hwm, sib hlub nyob haus Yes Xus lub npe. Uas tau tshaj tias, sawv daws yog Tswv Ntuj me nyuam nyob ua ke.
Yog tsis muaj lub Koom Haum ntseeg txog Yes Xus lub npe, mas cov neeg Los Tsuas, thia Haiv neeg Cob Tsib thiab Khas Npaus dias.  Yuav raug kev txom nyem loj, rau sab kev ua tsov rog thiab tuag, los raug kev sib ntxub sib tua.  Mas tseem yuav muaj coob leej uas peb yuav tsis tau rov sib pom.  Los tau nyob ua ke li tej peb tau pom thiab paub niaj hnub no.
Xav kom peb tsoom Hmoob paub me ntsis txog tej xwm txheej no. Peb yuav tau sib hlub, cov nyob rau sab tim ub, los sab tim no.  Peb yuav qhuas thiab ua Ntuj tsaug, vim muaj ib co neeg ntseeg Ntuj, tsis hais pab twg sawv daws koom siab.
Los yuav txoj kev sib thov kom tso tsov rog tseg, kom muaj kev thaj yeeb rau cov teb chaws me, muaj tej haiv neeg tsawg nyob coob kom txhob sib tua.
Thaum neeg txom nyem tuaj lawd, neeg ntshaw kev nyob tiaj tus thiab nyob thaj yeeb. Neeg thiaj muaj lub tswv yim thov, lub ntuj lub teb, kom nyias muaj nyias cai thiab nyias muaj nyias lub teb chaws rau nyias Haiv beeg nyob.
Neej thiaj sib tw los nrhia ib tug Tswv Ntuj los pov hwm nyias haiv neeg. Neeg thiaj thov kom Tswv Ntuj los tshoj thiab qhia neeg.
Muaj qee leej kuj yog Ntuj tshoj, kom los nrhiav tau ib txoj kev zoo, cov muaj ntuj txiaj ntsim yog ib feem tsawg. Cov tsis muaj txoj hmoov zoo yog feem coob.
Cov ntawd yog cov Ntsuj Plig phem tuaj tshoj, qee leej, kom pom nws tus kheej nyiam ua tus loj. Ces tsis muaj txiaj ntsim zoo pab lawv. Lawv yuav mus xaus rau txoj kev sib tawm tsam kom muaj kev sib ntxub sib cav sib ceg nyob hauv txhua npoj neeg.
Ces sawv daws yuav muaj kev sib cav sib ceg ntau. Kwv tij rov tawm tsam txog rau kwv tij.  Phooj ywg rov sib tawm tsam rau Phooj ywg.
Yuav muaj ntau pab ntau pawg ua ntxhov hnyo plaub ntug puv ntia zej zog.
Neeg yuav rov nyob tsis thaj yeeb dua, vim yog lub tswv yim tawm ntawm cov ntuj Plig phem tuaj tshoj. Ces tsis muaj txiaj ntsim zoo los sib nplij thiab sib hlub los pab sawv daws kom zoo sib luag mus.

->. Leej tib neeg kev ua neej nyob rau ntiaj teb no, yuav muaj kev zoo kev phem khia sib law sib liag nrog neeg nyob ua ke. Ob txoj kev no yuav coj neeg kom ua neej sib ntxub coob tshaj, nyob hauv neeg lub neej sib hlub.
Cov neeg nyob hauv txoj kev sib hlub, muaj coob kawg, los lawv sib tawg lawv ua ntau pab ntau pawg. Ces cov ntsuj plig phem yuav cob qhia kom lawv haj yam muaj ntau pab ntau pawg sib txawv, kom coj tsis sib haum.
Muaj coob leej ntau pab, nyias yuav qhuas nyias pab zoo. Tsis muaj ob pab hais zoo ib yam uas yuav coj tus cuj pwm sib xws.
Cov neeg siab me lawv yuav tsis paub ua neej nyob, vim cov kev ntseeg thiab neeg tej siab ntsws tsis xav ib yam.  Ntsia mas sab twg los yeej muaj yeeb ncuab tos neeg kev kom sib nrhuav sib tawm tsam mus li.

->. Lo lus kawg xav qhia sawv daws tias, yeej muaj ib txoj kev zoo thiab nws nyob ruaj nreb tos ntshis sawv daws. Vim yog cov ntsuj plig phem sawv los nyob tom hauv ntej, thaiv sawv daws tej xub ke tas lawm.
Nws txhob txwm tuaj tav kev thiab qhia yam tsis tseeb rau neeg kom neeg sib ncaim mus, ces ua rau neeg siab ntsws nyob tsis tiaj tus. Kom neeg txhob ntsib txoj kev zoo.
Cov ntsuj plig phem ntawd, yog cov ntxub tus Tswv Ntuj uas yeej ib txwm nyob.  Cov Ntsuj Plig phem no kuj yog tus tsim ntuj tsim teb, tau tsim lawv los. cov ntsuj plig  phem ntawd, lawv xav ua tus loj los kav neeg ntiaj teb.  Ces lawv thiaj tau ua txhaum rau Tswv Ntuj.
Ces Tswv Ntuj tau muab lawv pov los rau ntiaj teb no. Lawv khuv xim tswv Ntuj kawg. Lawv yog ib co ntsuj plig phem, ces thaum lawv ua txhaum tas, mas lawv hloov tsis tau li neeg ntiaj teb lawm.  Vim tias, lawv yog ntsuj plig xwb.
Neeg mas neeg muaj lub cev nrog tus ntsuj plig. Yog lub cev kam hloov siab, mas daws tau kom neeg tus ntsuj plig rov dawb thiab ntshiab huv tuaj dua.
Neeg ntiaj teb yog thaum tuag mus, tsis tau tuag nyob hauv kev ua txhaum, mas tseem hloov tau kom tus ntsuj plig dawb huv mus nyob pem ntuj.
Thaum tus ntsuj plig tuag nyob nrog lub cev ua kev txhaum. Yam li nws tuag rau lub caij ua tub sab tub nyiag los deev luag poj luag sev los ob leeg muaj kev sib ntxub.
Koj teg kub tuag nthi, kuv ho teg koj tuag ntais, ces yog tuag nyob hauv kev ua txhaum.  Ces tus ntsuj plig hloov tsis tau los ua ntsuj plig dawb huv. Vim nws tuag nrog lub cev ris kev txhaum, ces kawg yuav tau rog kev txom nyem nyob mus li.
Hos yog nws ua kev txhaum tas, nws hloov sib mus lawm. Tseem pab tau kom tus ntsuj plig rov hloov ua tus ntsuj plig dawb huv tuaj. Yog thaum nrog lub cev ntaj ntsug, nws yeem hloov sib thiab ntxub kev ua txhaum.  Txhob ua kev txhaum ntxiv, sib lees kev txhaum, thov kom  Ntuj thiab neeg zam kom tas mus.  Tig los hlub luag luag tej thiab txiav siab tsis ua kev txhaum rau luag ntxiv lawm.
Ces nws hloov tau ua tus ntsuj plig dawb huv ces nws rov tau yog Ntuj me nyuam dua tshiab tuaj.

Sacramento tim 24/10.2018.
Yaj Zoov Ntxheb Xib Hwb.