KEV NTSEEG THIAB KEV HLUB MUAJ ZOG.

Ob txoj kev no, muaj zog kawg nyob hauv neeg lub neej.
1.Nyob hauv kev ntseeg,muaj qhov zoo thiab qhov phem, khiav sib law liag, sib caum nraws mus.  Nyob hauv neeg lub neej, Tus ntseeg tau yam zoo. Cuag li nws muaj hmoo, nrhiav tau tus tseem ntsuag nyiaj ntsuag kub thiab tseem pov haum, zoo los roos nws lub neej.
Hos tus ntseeg mus rau qhov phem, mas nws cia li lam saib tej quav tooj qua hlau, yog koov nyiaj koov kub, nws saib pob zeb los ua pov haum.
Tus ntseeg tau yam zoo, cuag li nws muaj hmoo, nws siv nws txoj kev ntseeg zoo. Los muas tau Tswv Ntuj thiab tas nrho tsoom txheeb ze los ua nws lub cuab tam.
Nws nplua nuj nyob hauv nws txoj kev ntseeg, vim nws mus ntsib txoj kev ntseeg muaj txoj sia  nyob ruaj nreb mus li tuaj pem ntuj tuaj.
Nws yuav muaj hmoo, los muas tau neeg ntiaj teb tej kev hlub, kev nyiam los nrog nws nyob.  Ces nws txawj pov hwm, kom nws kev ntseeg roos tau nws kev hlub kom txhob sib tawg mus uas dab los ua tsov teej tug thiab dhau mus ua tsov lus.
Nws xaiv Ntuj li lus los hlub nws tsoom txheeb ze nyob ua ib cuab ib yig nrog nws kev ntseeg. Ces tas nws tsoom txheeb ze, yuav ua lub neej tshav ntuj nrig xws li pab neeg mus taug txoj kev kaj lug nyob thaj yeeb.
Nws yuav txawj saib Tsoom pog tsoom yawg nrog rau phaj niam phaj txi thiab tsoom tub ki lawv nrog Tswv Ntuj nyob ua ib yim neeg ntshiab dawb huv.
Los puag thaum ntuj tsim teb raug los, uas lub ntuj pib tawg paj thiab lub teb pib tuaj nrog los. Uas Ntuj thiab neeg yeej tsis tau sib ncaim dua los li.
Tus neeg tsis to taub thiab paub kev ntseeg zoo, mas nws lam coj,kom luag saib tias nws yog neeg paub tab.  Kom nws txoj kev ntseeg ua zoo rau Leej tib neeg qhuas nws xwb.  Nws tsis muaj kev ntseeg  cia ua neeg kev thoob tsib li.
Ces nws muab nws txoj kev ntseeg mus zwm rau ib co Tim Tswv uas neeg tsis paub txog tias, yog dab tsi li.  Zoo li cov Tim tswv  uas tsis muaj npe  zov roob zov hav cia li muab lawv hu raws tej roob ntawd mus xwb. Tsis yog cov Tim Tswv muaj Ntuj lus nyob hauv!
Cov Tim Tswv no, tawm hauv neeg tej dab neeg zoo li ib tug neeg nyob puag txheej thaud los. Nws muaj ib txoj dab neeg, tsim tau ib yam zoo qhuas rau lub ntiaj teb hnov thiab paub xwb.
Li ntawd, muaj qee tus neeg thiaj muab nws hom kev ntseeg los chaw, kem txoj kev ua kwv ua tij nyob rau nruab nrab, rau lawv caj ces ua rau lawv tsis sib txheeb los rau lawv txoj kev ntseeg.
Uas muaj Tswv Ntuj nyob nruab nrab pov hwm saib sawv daws ua kwv ua tij, koom caj hlav ces ncau los.
Lawv mus ntseeg thiab zwm rau ib co Tim Tswv Tsis tuaj ntawm Huab Tais Tswv Ntuj tuaj. Ces cov kev ntseeg ntawd thiaj muab neeg txhem kom neeg sib txawv mus.
Ib co neeg ntseeg raws li tej tus Tim Tswv, zwm rau ib co dab uas neeg tsis paub.  Ib co ntseeg raws li qee tus Tim Tswv txua los no, yog cov kev cai muaj neeg lub tswv yim xav nrog Dab tswv yim qhia.
Uas tsis muaj Qaum Ntuj li lus nyob hauv, neeg ntiaj teb thiaj tsis muaj kev sib haum nyob hauv lawv tej kev ntseeg.  Ua rau dawv daws thiaj muaj kev sib tawm tsam yam tsis muaj qab hau.
Hom kev ntseeg tsis muaj cag li no, mas nws nyiam coj neeg kom tsis sib haum xeeb thiab tsis muaj kev sib pab sib hlub.
Yog tias yus mus pab lawv, mas yuav ua tub qaug rau yus kev ntseeg, los tub qaug rau cov dab uas yus coj thiab teev no.  
Thaum ua tub qaug rau dab lawm, ces dab tuaj tom kom cuab neeg ntawd, kom muaj mob tau tuag mus.
2. Txoj kev hlub, kuj mus raws nkaus li txoj kev ntseeg thiab. Yog hais qhov tseeb, mas kev hlub muaj zog, coj neeg ntiaj teb los sib mloog lus kom ua tau xws li Tswv Ntuj tsoom tub ki siab ntshiab thiab dawb huv tseeb kawg.
Coj tau zoo cuag li sawv daws yog koom ib pug pog yawg los thiab koom niam koom txiv yug los.  Cov tsis paub hwm kev hlub, mas kev hlub rhuav neeg lub siab kom sib ncaim mus sai heev.
Tseem rhuav neeg sai dua kev ntseeg thiab nrawm dua  los ceev tshaj.  Kev ntseeg txawm tsis sib haum, los tseem nyob ua phooj ywg mus ntev zog.
Hos kev hlub, mas tsis haum lawm, ib vuag ntev li ib rau ob fiab xwb twb muab kev ua phooj ywg los kev ua txij nkawm, kev ua txiv tub niam tub, kev ua kwv tij txiav ua hmab tu hlua pluam mus kiag lawm.
Txiav tu nrho tsis yuav los tsis suav tau ua txij nkawm, ua txiv tub niam tub los phooj ywg, txiav tu nrho li neej thiab dab, nyob tsi tau ua ke.
Foom lus hnyav tshaj, li Hmoob foom kom neej nyob neej teb, dab mus nyob dab chaws ntag.  Lub ncauj tsis hais tawm, los lub siab yeej twb cais meej tias, lub ntiaj teb loj npaum li no, los yeej tsis txaus koj thiab kuv wb nyob li.
Lub ntiaj teb no koj nyob lawm ces tsis txaus rau kuv nyob, wb mas kawg ib tug yuav ncaim tug mus. Peb neeg ntiaj teb no,tej kev txom nyem quaj ntsuag nrog kev mob kev nkeeg thiab kev ploj tuag puav leej yog, tsis txawj xav ces ua kev hlub ploj mus lawm, thiaj muaj txhua yam li neeg kev tu siab no.
Mas thiaj muaj li cov dab neeg hais txog tej tub ntsuag, los hais txog kev ua nkauj feb, nraug fav, kev mus ua neej nyob qav choj, los tej kwv tij muab yus nrauj mus rau nruab zoo, nruab tsuag.
Ntshai tsam los nyob hauv tsev ces ho tau qig zaub qig mov.  Yog nyob ua ke ces rooj txawj tuaj tis, tog txawj tuaj tw.  Tej no puav leej yog kev hlub tsim thiab qhia ua tawm los.
Tab txawm yog cov neeg zoo nplua nuj thiab cov neeg zoo nkauj zoo nraug los lawv yuav tau ris lub koob lub npe no mus.
Puav leej yog ncau nyob hauv kev sib hlub tawm los. Leej twg tsis paub ces qhib tau tej kev lwj siab puas ntsws no los ntag.
Thiaj hais tias, Kev hlub nyob tsis kav laus, ib tug paub hwm kev hlub, los ib tug tsis paub, ces muaj kev phem kev zoo tawm los xws li tus kab mob kis rau ob leej tib si, los kis tas nrho, rau lub cuab xeem ntawd tib si mus.
Nyob ntawm tej neeg qhua kem zog, uas yus hlub lawv tsis heev pes tsawg.  Los lawv kuj hlub yus tsis ntau, kuj tsis tshua muaj teeb meem pes tsawg.
Cov uas yus tau hlub lawv tshaj, los lawv tau hlub yus heev.  Mas yog sawv daws tsis paub tuav kev hlub kom ruaj.
Mas tsis hlob tsis yau, mas yus cia li muab kev hlub ua plam mus, ces kev hlub hloov kiag tam sim ntawd, los ua ib co tshuaj lom neeg, kom lub siab ntsws puas tsuaj mus khaub hlab tag  lwj mus.
Tej kev hlub uas thaum lub keeb hauv paus uas yus tau nrog nws cog lus sib hlub  cia li ploj mus sai cuag li khob dej muab ntov pov tseg lawm.
Kev tu siab thiab kev tuag cia li los hloov  kev hlub chaws nyob. Ua rau kev tuag tawm plaws los rau yus pom.
Tos peb Hmoob pheej kheev kheev pom dab tuag los hem, mas vim dab yeej caum leej tib neeg tej kev hlub no, tos tsis hnyoo lub caij uas Peb tuav kev hlub ruaj mus kiag tam sim ntawd.
Lub caij peb tsis sib to taub, ib tug tsis ntseeg tug, mas dab los cov ntsuj plig phem no, lawv nyiam txav los nyob ze neeg kawg nkaus li od.
Yuav hais tas nrho lus, tab txawm yog neeg mus peem tsheej ua dab, los dab yeej tsis yuav. Ib txwm, mas dab thiab neej yeej tsis sib haum los tsis sib raug zoo.
Los lus hais tias, dab hem neeg no, mas dab yeej tsis los ua, tej haum lwm me me thiab dog dig li ntawd, dab tsis xav tab kaum ua tej ntawd. Tsis muaj qab haus rau dab li.
Cov neeg pom dab heev, tsis yog cov neeg muaj Ntuj txiaj ntsim. Uas lawv muaj kev ntseeg thiab kev hlub loj!  Yog cov uas lawv puav leej yog cov neeg tsis muaj kev ntseeg, los muaj kev hlub khov nyob hauv lawv.  Xws li Hmoob hais, lawv yog cov neeg siab tsis ncaj plawv tsis tus.
Lawv yog cov neeg ua phem, ces lawv raug kev khaum los ntau xwb, lawv thiaj pom pom dab. Cov neeg siab ncaj tsis tshua pom dab ntau raws li Hmoob piav kwv huam los keeb kwm los.
Kwv tij ua li mas, kev ntseeg thiab kev hlub yog ob yam loj ib yam nkaus. Neeg tsis paub xaiv thiab ua, ces yog kiag li Hmoo kheev hais los tias:
Xav luaj nyug mas nws xu luaj ntug. Thiab zoo li hais tias, mov ncuav lawm tsis pub tsu. Zaub ncuav lawm ces tsis puv tais, yog dej ncuav lawm ces tag nrho li tsis muaj lawm.
Zaj no kuv tsuas sau los ua kev kawm kev paub paub xwb.

Sacramento 6/6/2018.        
Yaj Zoov Ntxheb X.H.