Daim Scapulaire yog dab tsi?

________________________________________

Lo lus nov yog los ntawm lus las tees los, scapula txhais hais tias xwb pwg.
Scapulaire thaum ub yog ib daim khaub ncaws uas cov Phauj los Txiv Plig cov khaub ncaws hnav, yog daim tiag xwb pwg, daim tiag xub ntiag thiab nraub qaum kom thaum ua hauj lwm tiv lawv cov khaub ncaws txhob lo phem.

Qhov uas peb xav paub yog daim scapulaire ua Nkauj Ntshiab Mab Liab caw kom peb coj xwb.



Daim scapulaire ntawm Mont Carmel mas yog xuas ob daim ntaub pwm cib liab tsaus  (laine brun) luaj li ob ntis, xwm fab xwm meem, tis rau ob txoj hluas khuam saum xwb pwg, ob daim ntaub ib daim ntawm hauv siab, ib daim nyob nraum nraub qaum ( kom zoo li daim ntaub tiag xwb pwg, ua hauj lwm).
Txawm peb yuav yog phauj, Txiv Plig los yog neeg ntseeg xwb los yeej coj tau daim scapulaire no tib yam nkaus ; tseem xav kom tag nrho tsoom ntseeg coj kom tag mas haj yam zoo.

Keeb kwm :
Yog hnub tim 16-07-1251, Niam Mab Liab tau tshwm sim rau LN.Simon Stock ib tug Tij hau lub koom haum Carmel. Vim thaum lub caij ntawd lub koom haum cov Tij ntawd muaj teeb meem heev, lawv lub tsev yuav raug kaw ces Tij Simon Stock tsis pom qab ua li cas, nws txhawj heev nws thiaj li tau tso siab rau Leej Niam Ntshiab, tau thov Niam Mab Liab pab. Nws thov ces nws thiaj li pom Niam Mab Liab puag me nyuam Yes Xus thiab cev daim scapulaire rau nws thiab hais tias :

« Me tub, txais koj lub Koom Txoos daim Scapulaire nov ua lub cim uas cov txiaj ntsim tshwj xeeb uas kuv tau txais rau nej cov me nyuam Carmel lub koom haum. Yog tus twg coj daim no thaum nws tuag mas nws yuav tau kev cawm, nws yuav tsis tau txom nyem hauv cov hluav taws kub mus li.  Yog lub Cim koob hmoov, tiv thaiv kev plhom sij, pub kev thaj yeeb thiab kev cog lus mus ib txhiab ib txhi. »

23 xyoos tom qab, lub Koom Txoos thiaj li xaiv hnub tim 16 lub 7 hli ua hnub Hmoov Leej Niam Mont Carmel. Los hawm txog Niam Mab Liab ntawm Mont Carmel.

Xyoo 1322, Vaj Qhia Zam 22 pom Niam Mab Liab los hais rau nws ntxiv txog Niam Mab Liab kev roos cov neeg coj daim Scarpulaire thiab nws hais kom lawv tis npe ua : « Lub npuas Sabatine » los yog cov xaiv Sabatine :
 
Lub npuas Sabatine los yog cov xaiv Sabatine :
Yog tag nrho cov uas coj thiab muab daim Scapulaire tso rau lub sam xeeb, cov uas nquag teev Ntuj thiab cov neeg uas tswj lawv lub cev dawb huv (kev plees kev yi)  raws li lawv lub meej mom. Nkauj Ntshiab cog lus tias nws yuav tso lawv cov ntsuj plig hauv teb chaw them txim kom dim sai sai, xws li thawj Hnub 7 tom qab lawv tuag.

Yuav coj li cas ?
Daim Scapulaire no yuav coj ntawm caj dab tas hnub tas hmo, yuav qhe luv li luv tau xws li thaum da dej nkaus xwb. Yog ua li txiv vaj qhia Zam Paj Lug 2 kuj zoo, nws muab roj hmab leem ces da dej los tsis ntub. Kuj muaj ib cov Scapulaire ua phiaj hlau, nyiaj, thiab tab sis lawv tsuas siv tshwj xeeb rau cov teb chaws muaj ntuj nag ntau los kub heev ua rau cov ntaub tsis thev xwb. Tsis zoo coj rau txhua qhov yog tias tseem coj tau cov ntaub. Yog tus neeg twg xav coj cov txiaj mas twb yuav tsum xub coj cov ntau ua ntej lawm mas thiaj li muaj cai coj cov txiaj.

Yog twb coj thawj daim uas yog Txiv Plig los LTH.muab rau yus coj lawm mas cov tom qab (yog thawj daim puas lawm) tsis tas yuav foom hmoov zoo thiab tsis tos Txiv Plig los LTH muab rau yus ntxiv lawm; cia li mus yuav ib daim tshiab los coj lawm xwb.


Niam Mab Liab cog 3 lo lus cia :

- Tsis pub kom raug cov nplaim taws kub mus li.

- Tso tawm hauv teb chaws them txim sai (privilège sabbatin)

- Tiv thaiv ntsuj plig thiab lub cev ntaj ntsug ntawm kev plhom sij,


Yuav kom tau txais 3 los lus cog ntawd, yuav tsum hwm daim Scapulaire uas yog ib tug Txiv Plig los yog ib tug Leej Tsob Hwb ua tus muab rau yus coj. Yog thaum tsis muaj Txiv Plig los Leej Tsob Hwb es maj ceev, ib tug neeg mob nyhav yuav tag txoj siavv mas ib tug neeg ntseeg xwb los yeej muab tau rau tus mob coj tab sis yuav tsum yog tias daim Scapulaire ntawd Txiv Plig twb foom hmoov zoo rau lawm thiab twb tau haiv cov lus uas muab rau ib tug lawm mas thiaj li yuav muab tau.

Cov lus thaum muab rau coj:
(Formule d'imposition)

Txiv Plig foom hmoov zoo rau daim Scapulaire thiab muab rau coj ces  hais cov lus no:

"Txais daim Scapulaire no, ua lub cim nrog Niam Mab Liab sib cuag tau tshwj xeeb,
Uas  koj lees tias yuav ua raws li Yes Xus leej Niam tus lw lwm.
Kom daim Scapulaire no ua kom koj nco ntsoov lub hwj chim neeg ntseeg Yes Xus,
Rau koj txoj kev pab luag tej thiab ua raws li Mab Liab tus lw lwm.
Coj kom ua nws lub cim tiv thaiv koj thiab lub cim koj los ua Carmel tsev neeg,
kom koj txaus siab hlo los ua raws li Tswv Ntuj nyiam thiab koj yuav lees ua txoj hauj lwm txhim kho lub ntiaj teb raws li Nws lub hom phiaj ua kwv ua tij thiab ncaj ncees thaj yeeb.“


Yog ib daim scapulaire qub los ntuag lawm mas yuav tsum muab qhwv hauv ib daim ntaub es muab faus rau tej qhov chaw huv los yog muab hlawv. Yuav tsum hwm txog cov lus uas Niam Mab Liab cog rau yus.

Txhais los ntawm lub site: http://www.scapulaire.fr/scapulaire/1-Bienvenue.html
Tim 26-01-2015.