VAJ QHIA FRANCIS MUS KAUS LIM TEB

Nyob zoo txhua leej txhua tus,

Tau ib ntus ntev heev lawm, kuv tsis tau tuaj nrog nej tham li. Hnub no kuv mam rov tuaj tham me ntsis txog Vaj Qhia Francis yuav mus xyuas Kaus Lim teb. Nyaj nej ib txhia kuj paub lawm, tiam sis tsam ib txhia kuj ho tsis hnov txog, kuv thiaj tuaj tham me ntsis kom coob leej ho paub txog.



Tag kis, Hnub Plaub tim 13 lub 8 hli 2014, Vaj Qhia Francis yuav sawv kev mus rau Kaus Lim (Korea) Qab Teb. Nws must saws Kaus Lim teb yog Hnub Tsib tim 14 lub 8 hli thaum tav li 10:30 sawv ntxov. Nws yuav mus nyob 5 hnub. Hnub Ob tim 18 lub 8 hli, nws mam rov qab los mus tsev.

Nws lub hom phiaj yog xav coj kev thaj yeeb mus rau sab As Xias. Xyoo 1984 thiab xyoo 1989, Vaj Qhia Zam Paj Lug II kuj tau mus xyuas Kaus Lim ob zaug.  Thaum ntawd, cov nom tswv Suav tsis pub kom Vaj Qhia lub dav hlau ya mus rau hauv Suav av, ces Vaj Qhia Zam Paj Lug II ya dav hlau hla Lav Xias teb mus. Zaum no, Vaj Qhia Francis yuav mus, cov nom tswv Suav ho kam kom nws hla hauv Suav teb ciam dej ciam av. Tus kev cai, yog Vaj Qhia hla ib lub teb chaw mas nws yuav tsum tau xa ib tsab xov mus hais nyob zoo rau tus nom kav teb chaws.  Yog li zaum no Vaj Qhia Francis yuav tau kev xa xov rau tus nom kav Suav teb, Xi Jinping.

Vaj Qhia npaj yuav npaj mus nyob 5 hnub. Thaum nws mus txog nws yuav mus ntsib cov nom tswv Kaus Lim, thiab nws kuj yuav mus ntsib ib pab Tswv Qhia Kaus Lim.

Hnub Rau, tim 15, nws yuav ua ib thaj txi ntuj hwm Niam Mab Liab nce mus saum ntuj, nyob hauv ib lub tsev ncaws pob (soccer stadium). Tas ntawd nws yuav mus ntsib cov hluas tuaj ua kev txhawb siab, thiab nws yuav hais ib co lus txhawb lawv.  Tsoom tub ntxhais nyob sab As Xias lub rooj txhawb siab yuav muaj txog li ntawm 2,000,000 leej tub ntxhais hluas tuaj ua kev txhawb siab, txij hnub tim 13 mus txog tim 17 lub 8 hli, 2014.

Hnub Xya tim 16,  Vaj qhia yuav mus Seoul, mus tsa 124 tus leej ntshiab Kaus Lim, uas tau tuag ua tim khawv txog lawv txoj kev ntseeg xyoo 1791.  Nws kuj yuav mus ncig xyuas thaj chaw uas lawv raug tua.

Hnub Chiv tim 17, nws yuav rov mus koom tsoom tub ntxhais hluas thiab ua thaj txi ntuj xaus rau lawv lub rooj txhawb siab.

Hnub Ob tim 18, Vaj Qhia yuav ua ib thaj txi ntuj yav sawv ntxov thov kom muaj  kev thaj yeeb thiab kev sib haum xeeb rau ob lub teb chaws Kaus Lim (Kaus Lim Qaum teb thiab Kaus Lim Qab teb). Ces nws yuav sawv kev rov los tsev yav tsaus ntuj.


Thov peb cov ntseeg thov ntuj pab rau txiv Vaj Qhia Francis thiab, kom nws txoj kev must sham xyuas teb chaws Kaus Lim tsis txhob ntsib teeb meem thiab kom mus tsim tau kev thaj yeeb, kev sib haum rau cov teb chaws As Xias.

Nyob zoo Mim, koj mus ntev peb kuj nco koj kawm li.
Peb cov nyob sab ntuj no los kuj tuaj sau zaj tsi raws siab xav li.
Koj tsi tuaj pab N hlob ces tshuav nws ib leeg sau nkau xwb.
Mim hnub no nws tuaj nws kuj coj tau ib rab xov zoo kawg tuaj pub rau peb, thov ua tsaug ntau rau nws txoj kev khwv og nawb, thov HT Ntuj pub txiaj ntsim rau nws.

Hnub 6 uas txiv vaj qhia Faas Tshes Kus mus Kaum Lim teb ntsib cov hluas suam teb chaws As Xis. Tuaj tsis coob heev, vim tsis yog tag nrhov cov hluas tuaj, tsuas yog cov tiam lis nyob cov teb chaws ib ncig tuaj ntsib txiv vaj qhia xwb.
Muaj tag nrho 1200 tus tiam lis teb chaws thiab 5000 tus hluas kaus lim tuaj koom Txiv Vaj Qhia thaj txi Ntuj hnub no.

Lub ntsiab mus xyuas tsoom hluas phab teb chaws As Xis, txiv vaj qhia hais rau lawv tias: "Tsoom hluas As Xis, sawv txhob tsaug zog, tsoom neeg raug tsim txom tuag ua tim khawv lub koob meej ci ntsa iab saum nej".