Yes Xus lub ntsej muag tiag

Yes Xus lub ntsej muag tiag tiag raws li muab daim ntaub qhwv uas Yes Xus thaum muab Nws tso hauv ntxa. Daim sawv no cia li ntau tau ib tug duab tib neeg rau yam tsis muaj tus kws txuj twg yuav nrhiav tau paus ntsis li. Raws li keeb kwm mas yeej hais tias yog daim ntaub uas muab qhwv Yes Xus tso hauv ntxa ntag no. Yog ib chaws ntaub dav li 1,10m thiab ntev li 4m. Muab ib tug pua rau lub nraub qaum rau pem taub ahu quav npho los rau ntawm ntsej muag los mus rau nram ko taw. Nws ntau tau tus duab muaj ib tug txiv neej, pom lub kauj pos saum taub hau ua rau lub taub hau to thiab los ntshwv ncig taub hau, pom ob txhais tes sib qhaib los rau ntawm xub ntiag li rub ob txhais tes los npog dab tsi, pom cov qhov txhab, mhuv nkaug thiab qhov ntsia hlau ntawm tes, ntawm ko taw tib si. Zaum no muaj hlwb hlau thiab tub txuj txawj ntse, xyoo no lawv thiaj li mus thov kev tso cai ntawm Koom Txoos; mus soj ntsuam nias duab tau 5 hnub. Lawv muab cov duab los tshawb xyuas hauv hlwb hlau, lawv ua tau ib lub ntsej muag raws li daim ntaub zwm duab. Lawv suav cov qhov nqaij ntuag ntawm cev nqaij muaj tshaj 100 qhov nqaij ntuag, to thiab ntsuab, lawv hais tias zoo nkaus li yog ib tug neeg raug tsheb sib tsoo es ua rau ib ce to thoob plaws.

Ib tug kws txuj hais tias raws li nws xav mas yeej yog daim ntaub uas qhwv Yes Xus xwb; vim ntiaj teb no tsis muaj yam dab tsi yuav ua tau ib qho li no, ntsia tsis muaj kob dab tsi zas, tsis muaj cem kos. Yog muab thaij ua duab coj mus saib, zoo nkaus li yog cov film thaij duab dub thiab dawb es pom qhov dub ua dawb, pom qhov dawb ua dub. Tus kws txuj hais tias yog Yes Xus daim ntau qhwv tseeb tseeb, yog thaum Yes Xus tus ntsuj plig rov nkag los rau Yes Xus lub cev , Yes Xus sawv rov los es nws ci ntsa iab tib laig thiaj li muab tau Yes Xus tus duab zwm kiag rau hauv daim ntaub lawm. Tseem hais ntxiv tias tej zaud twb yog Yes Xus txhob txwm tso nws tu duab cev nqaij daim tawv zwm cia rau neeg ntiaj teb kom pom. Nws yeej paub tias hnub qab nram ntsis neeg yuav txawj ntse, yuav txawj nrhiav ua kom tau nws lub ntsej muag los saib.

Nej ntsia daim video yog thaj tsham 108 fiab rov saud mas pom tus duab tej nqaij raug luag ntau ua khaub hlab tag mas cas txaus tu siab thiab khuv leej ua luaj li. Twb tau muaj ntawv sau tseg tias ib tug thawj peeb zeej hais tias: "Yog tsis yog Tswv Ntuj mas yuav thev tsis tau kev tsim txom loj npaum ntawd, yog neeg qhuav mas yuav tuag ua ntej lawm."

Maiv Tooj,

Daim ntaub no lawv ho muab tau qhov twg los tiag, cas lawv ho paub meej tias yog daim qhwv Yes Xus lub cev no.?

Yog li lawv puas tseem khaws cia thiab. Yog tias yeej paub tseeb tias yog daim tseeb tiag mas yeej xav kom yus tau tuav kiag saib zoo li cas. Ntshaiv yuav zoo siab heev li.

Nyob zoo Bao XMary,

Daim ntaub qhwv Yes Xus no nyob tim Italy teb, tam sim no nyob rau hauv lub tsev teev Ntuj Guarini de la cathédrale Saint-Jean-Baptiste lub nroog Turin. Sawv daws yeej mus saib mus hawm tau tab sis yuav kov tsis tau. Lawv muab zwm iav dai siab tsawv lawm.

Nyob zoo Bao X Mary,



Daim ntaub no lus Aas Kiv hu ua “the Shroud of Turin” no, txhais hais tias “Daim Ntaub Qhwv Tuag nyob Turin.” Peb lus Hmoob muaj daim ntaub hu ua “daim teem kiam” uas yog daim ntaub siv coj los pua rau qhov chaw yuav tso tus tuag.

Kuv yuav piav me ntsis txog daim ntaub nyob Turin, Is Tas Lis teb.  Daim ntaub ntawd mas nws yog ib daig ntev li 14’3” x 3’7”,  kwv yees yog 4.35 mev ntev 1.09 mev dav. Nyob saum daim ntaub no muaj ob tug duab neeg uas xuas qhov muag ntsia xwb mas pom tsis tseeb.  Ob tug duab ntawd, ib tug yog tus neeg sab xub ntiag, ib tug yog sab nrob qaum, ob lub taub hau los sib twb hauv nruab nrab, ob tog ko taw nyob rau tom ob tog tw ntaub.  Zoo li yog thaum lawv pua, lawv muab ib tog ntaub pua rau saum qhov chaw, ces lawv muab lub cev tso rau tas, lawv mam quav daim ntaub los npog rau tus neeg lub ntsej muag mus rau tom ko taw.  Koom Txoos Kas Tos Liv kuj tsis tau tab meeg tshaj tawm meej tias nws yog daim tiag, tiam sis tsoom ntseeg nrog rau cov tswv qhia thiab cov vaj qhia yav dhau  los yeej hwm daim ntaub no yog zoo li daim uas tau qhwv HT Yes Xus lub Cev tiag.

Zaj kwv huam txog daim ntaub no mas raws li kuv paub, nws yeej muaj puag thaum ub los lawm, tiam sis tsis muaj ntaub ntawv piav txog, ces peb tsuas paub txog daim ntaub no txij xyoo 1349 los xwb, vim muaj ntaub ntawv piav txog txij thaum ntawd los. Qhov muaj neeg hais txog yog qhov tias ua ntej xyoo 1349, daim ntaub nyob rau tim Constantinople, niaj hnub no yog lub nroog Istanbul, Turkey teb chaws. Muaj neeg mus nqa daim ntaub ntawd tim Costantinople los rau Fab Kis teb. Tej zaum yog tus knight neeg Fab Kis hu ua Geoffrey de Charny mus cpj los, los puas yog lwm tus neeg mus coj los thiab nws muab pub rau Geoffrey de Charny, peb tsis paub . Peb tsis paub hais tias lawv coj daim ntaub los xyoo twg lawm.

Tiam sis xyoo 1349 thaum lub 4 hlis tim 10 los 16 ntawd, nws txawm sau ntawv mus rau vaj qhia Clement VI tias nws yuav tsa ib lub tsev teev ntuj nyob rau lub nroog Lirey, Fab Kis teb, los uaTswv Ntuj Peb Leeg tsaug, vim Tswv Ntuj tau pab kom nws tau kev dim ntawm cov Aas Kiv uas tau ntes nws mus kaw. Nws thiaj tsa tau lub tsev teev ntuj hu ua St Mary nyob Lirey. Thaum lub caij ntawd nws twb muaj daim ntaub lawm. Nws muab daim ntaub tso rau lub tsev teev ntuj nyob Lirey, thiab nws tsa cov txiv plig hauv lub tsev teev ntuj ntawd ua tus saib daim ntaub, tiam sis nws tseem yog tus tswv ntaub.

Xyoo 1355, muaj ntaub ntawv sau tseg tias xyoo ntawd yog thawj zaug uas lawv thau daim ntaub ntawd los dai rau hauv lub tsev teev ntuj St Mary nyob Lirey rau txhua leej tuaj mus saib thiab mus hawm.  Muaj coob leej kawg tuaj saib.  Tiam sis tus tswv qhia tsis ntseeg tias yog daim tseeb, ces nws txwv kom lawv tsis txhob muab coj los rau neeg tuaj hawm ntxiv.  Ces lawv thiaj muab daim ntaub ntawd tais cia tsis muab tawm rau neeg xyuas tau ib ntus.
Xyoo 1356, thaum lub 9 hli, Geoffrey de Charny mus ntaus cov Aas Kiv nyob Poitiers, Fab Kis teb, thaiv nws lub teb chaws thiab nws tus vaj Fab Kis, nws raug phom tuag lawm. Nws poj niam thiab nws tus tub hu ua Geoffrey II de Charny kuj khaws daim ntaub ntawd ua lawv tsev neeg tug mus txog xyoo 1460 thaum lub 10 hli, uas Geoffrey II tus ntxhais hu ua Margaret de Charny tuag.

Margaret tau muab daim ntaub pub rau tus nom hu ua Duc Louis I de Savoie. Savoie yog ib lub xeev Fab Kis nyob puab ciam teb Fab Kis thiab Is Tas Lis. Ces txij ntawd los tsev neeg nom nyob Savoie tuav daim ntaub ntawd.  Ntu ntawd lawv coj daim ntaub mus tso rau neeg saib nyob ntau qhov chaw, mus mus los los caum lawv txog twg.  Muaj ib qho chaw uas lawv nquag tso daim ntaub yog nyob hauv lub tsev teev ntuj nyob lub nroog Chambéry.

Xyoo 1578, leej ntshiab tswv qhia Charles Borromeo, uas yog tus tswv qhia nyob Milan, Is Tas Lis teb, npaj hais tias nws yuav taug ko taw ntawm Milan mus rau Chambéry, mus teev ntuj ua ntuj tsaug ntawm daim ntaub, vim nws ntseeg hais tias daim ntaub tau pab cawm lub nroog Milan ntawm kev mob tuag aws.  Tiam sis tus nom Duc Emanuel Philibert nyob Savoie tsis pom zoo cia tswv qhia Charles Borromeo taug ko taw hla cov roob Alps tuaj, nws thiaj kom lawv coj daim ntaub ntawd mus rau sab Is Tas Lis teb.  Thaum lub 9 hli tim 14, 1578, daim ntaub thiaj tuaj txog Turin, nyob Is Tas Lis.  Tswv qhia Charles Borromeo thiab ob peb tug tswv qhia thiaj tuaj txais tos daim ntaub nyob Turin. Lawv tuaj ua kev teev ntuj ntau hnub. Ces txij thaum ntawd los daim ntaub cia li nyob Turin los lawm. Niaj xyoo lawv muab daim ntaub tawm ib zaug rau tsoom ntseeg tuaj mus ua kev teev ntuj thiab tuaj mus saib.


Mam tuaj tham ntxiv...

Maiv Tooj thiab Mim,

Ua tsaug uas neb tseem tau qhia rau kuv txog daim ntaub teem kiam qhwv Yes Xus lub cev thiab. Kuj ua rau kuv to taub zoo. Tseev yuav muaj ntau yam yuav noog neb ntxiv. Kuv yeej zoo siab tias Tswv Ntuj coj kuv tuag nrhiav tau nej lub Hmongcatholique no mas pab kuv txoj kev ntseeg lawm ntau. Vim txij kuv tuaj nrhiav tau nej mas kuv kawm tau ntau ntxiv txhawb kuv.

Thov kom Tswv Ntuj nrog nraim neb mus li.

Npaub

Thov ua tsaug ntau rau nej txhua tus tuaj tso tej yam no rau sawv daws kawm.
Hais txog HT Yes Xus lub neej teej qav teej num cawm ntiaj teb neeg mas tshuav ntau kawg sawv daws tseem tsi tau paub txog, xav kom sawv daws kub siab tau thiab tshawb nrhiav kom txhua coj los qhia rau tej me nyuam.