TP.Michel Lynde, 60 XYOO NTAWM KEV UA LEEJ CHOJ 1950 – 2010

Zoo Tswv Zov Yaj, Lomsak, Thaib teb

Txiv Plig Michel Lynde yog ib tug neeg Fab Kis. Nws lub npe Hmoob hu ua Txiv Plig Tswv Tuam.Txiv Plig Tswv Tuam yog ib tug Txiv Plig zwm rau lub Koom Haum OMI. Nws yug hnub tim 26 lub 12 hlis xyoo 1925 nyob hauv lub zos Hes Npaws, nyob Fab Kis teb. Hnub tim 24 lub 2 hlis xyoo 1946,Txiv Plig Tswv Tuam tau txais lub Cim Tiag Tes ua Leej Choj.

Hnub tim 19 lub 2 hlis xyoo 1950,Txiv Plig Tswv Tuam hais rau cov hlob tias nws zoo siab mus tshaj Ntuj Lus nyob hauv cov teb chaws qaum teb ntawm xeev ntuj Aws Los Pas. Tab sis vimTswvNtuj lub hom phiaj zoo dua ntawd, ces lub Koom Haum OMI thiaj tau xaTxiv Plig Tswv Tuam tuaj mus rau Los Tsuas teb. Vim li ntawd,Txiv Plig Tswv Tuam thiaj hais kam tias : “Txiv yug nyob Los Tsuas teb.” Zaj lus raws liTxiv Plig Tswv Tuam piav tseg :

Lub caij uas peb tab tom npaj ib co tub tshaj Ntuj Lus nyob hauv lub nroog Paksan, peb kuj ib txij kawm lus Los Tsuas thiab kawm Los Tsuas tej kev cai. Lub caij ntawd peb tsuas muaj 2-3 lub tsev nruab vov nqeeb uas yog npaj rau cov tub kawm tshaj Ntuj Lus. Niaj hnub peb ua liaj ua teb thiab txhom ntses hauv tej kwj ha los sis ntes ntses hauv tus niam dej Naj Khoom los ua txhiam xws noj. Tab sis nyob hauv lub nroog Paksan kuj muaj ib co neeg ntxeev teb chaws nyob txawm haud. Lub caij ntawd kuv yog tus Txiv Plig saib lub tsev teev Ntuj hauv lub nroog Paksan. Muaj ib hmos, kuv raug tib neeg nyiag tua. Lub tsev uas kuv nyob, yog xuas av tuav xyaw quav nplej los puab. Cov muas txwv raug sab phab ntsa av to qhov ua nplhaus nplhiv tas. Lub tsev tsam phooj kuj raug ib lub muas txwv. Kuv xuas riam lij lub muas txwv tawm. Kuv tos suab phom nrov ntsiag, ces kuv thiaj mam tawm khiav. Thaum ntawd kuv nkaum nyob ntawm ib sab lub phij xab rau ntaub ntawv.



Xyoo 1954 tsov rog tiaj tus, peb thiaj rov tau kev mus los ywj siab. Peb tau zoo kev mus tsham hauv tej zej zog. Peb tsuas yog mus ko taw xwb. Kuv pib paub Los Tsuas teb zoo zuj zus, yam li tej teb chaws, kab lis kev cai thiab lus Los Tsuas. Qhov loj tshaj ntawd, yog yus rov paub txog yus tus kheej zoo dua tuaj. Kev thaj yeeb tsuas muaj ib nyuag ntu tsis ntev xwb, rov qab muaj tsov rog ntawm As Mes Lis Kas thiab Nyab Laj sawv tuaj. Los Tsuas teb yog lub hom phiaj ntawm cov Nyab Laj. Muaj kev pov hoob pob caws hoob pob thiab sib ntaus sib tua. Ib tsoom neeg thiaj khiav ua thoj nam rau qhov ub qhov no. Thaum ntawd thiaj muaj neeg khiav coob los nyob Vees Cas thiab peb kuj tsiv mus nyob Vees Cas. Tab txawm lub teb chaws muaj kev kub ntxhov li ntawd, tsis kav peb kuj tseem npaj ib pab neeg tshaj Ntuj Lus thiab. Peb tsim ib lub tsev npaj cov Xib Hwb nyob nrug deb ntawm lub tuam ceeb Vees Cas li 70 kis lus mev. Yog ib qho chaw zeem tseeb tias kev muaj peev xwm yuav tsis muaj hnub tuag. Peb nyob los txog xyoo 1975, ces tas peb cov tub tshaj Ntuj Lus uas yog neeg txawv teb chaws raug ncaws tawm hauv Los Tsuas teb. Tab sis kuv tseem nyob tau 3 xyoos ntxiv. Vim yog kuv muaj feem cuam ua hauj lwm pab tsoom pej xeem Fab Kis uas lawv tuaj nyob Los Tsuas teb. Hnub tim 5 lub 7 hli xyoo 1978 kuv thiaj tau tawm hauv Los Tsuas teb. Cov tseem hwv Los Tsuas tsuas kheev kuv nqa kuv tej cuab yeej cuab tam li ntawm 20 kis lus xwb. Kuv muab tas nrho txhua yam uas kuv tau tsim tseg tso rau cov neeg ntseeg Los Tsuas thiab cov tub tshaj Ntuj Lus uas lawv tau muab lawv txoj sia los ua tim khawv txog Tswv Ntuj nyob hauv daim av Los Tsuas. Txawm li ntawd tsis kav kuv txoj hauj lwm kuj tseem muaj ntxiv mus. Txij ntawm sab laug los rau sab xis, tsuas yog muaj ib tug nyuag dej los kem nruab nrab xwb. Tab sis txhua yam kuj tsis yooj yim raws siab xav. Kuv tau hla dej Naj Khoom los rau sab Thaib teb. Muaj ib tug Tswv Qhia Thaib hu ua Yoj (Yod Phimphisan) ua tus tos txais kuv nyob hauv nws lub Cheeb Koom Txoos Udon. Ces kuv tau tshaj Ntuj Lus rau tsoom pej xeem Thaib nyob hauv lub xeev Moos Lem. Moos Lem yog ib lub xeev uas nyob npuas dej Naj Khoom hla mus rau Los Tsuas teb. Lub zim txwv no txhua yam kuj tseem ntxhov quav niab tsis yooj yim raws siab xav. Nyuam qhuav pib muaj ib pab neeg ntseeg me me nyob hauv lub zos Thaj Npoos. Hauv lub xeev Moos Lem tseem tsis tau muaj tsev teev Ntuj li. Tsuas muaj ib lub tsev rau 4 tug Leej Phauj uas tuaj ntawm lub Cheeb Koom Txoos Thaj Lej nyob xwb. 4 tug Leej Phauj ntawd lawv saib ib lub tsev kawm ntawv me me, muaj cov me nyuam kawm ntawv li ntawm 30 tawm leej. Tom qab 3 hnub uas kuv mus txog, mas muaj cua daj cua dub los raug loj heev. Ua rau lub tsev kawm ntawv thiab lub tsev uas cov me nyuam kawm ntawv nyob 2 lub ru tsev ya tas. Yog vim muaj kev qhia los ntawm Leej Tij Npes Nas, ces kuv thiaj pib paub tug puav tub kawm ntawv thiab tug puav Xib Hwb qhia ntawv. Lawv yog cov Xib Hwb thiab cov tub kawm nyob hauv lub tsev qhia ntawv txheej siab nyob hauv lub xeev Moos Lem. Ib lis piam kuv tau mus qhia ntawv Fab Kis nyob hauv lub tsev kawm ntawv txheej siab 4 teev. Ua rau kuv tau paub cov neeg Thaib coob zuj zus tuaj. Kuv tau qhia ntawv Fab Kis nyob hauv lub tsev qhia ntawv txheej siab Moos Lem 2 xyoos. Kuv ntiav ib lub tsev kom nyob tsis deb ntawm lub tsev kawm ntawv pes tsawg. Kuv them ib lub hlis yog 500 npaj. Kuv xav nyob ib qho chaw kom muaj neeg coob dhau mus dhau los. Kom kuv tau kev nrog cov neeg mus los sib fim thiab faib ntawv rau lawv. Ib ntus ntxiv, mas kuv kuj tau txais txoj hauj lwm saib xyuas thiab tshaj Ntuj Lus rau cov Hmoob thoj nam uas lawv los nyob hauv lub yeej thoj nam Vib Nais. Ces kuv tsis muaj sij hawm mus qhia ntawv nyob hauv lub tsev qhia ntawv txheej siab Moos Lem ntxiv lawm. Vim niaj lis piam kuv yuav tsum tau mus tshaj Ntuj Lus rau cov Hmoob nyob hauv yeej thoj nam Vib Nais. Txhua txhua hnub 7, kuv sawv kev ntawm lub xeev Moos Lem mus ua thaj txi Ntuj rau lub zos Thaj Npoos. Lub caij ntawd txoj kev tsheb ntawd yog kev av thiab ua qhov taub heev. Dhau ntawd kuv yuav tsum caij tsheb mus li 40 kis lus mev ntxiv thiaj mam mus txog lub yeej thoj nam Vib Nais. Kuv kuj xyaum ua thaj txi Ntuj hais lus Hmoob. Dua li ntawd, kuv kuj mus ua thaj txi Ntuj rau cov Leej Phauj uas lawv nyob hauv lub nroog Chiangkhan thiab. Tas ntawd kuv rov los ua thaj txi Ntuj tim 4 nyob Moos Lem hnub Chiv yav tsaus ntuj. Kuv ua thaj txi Ntuj hais lus Thaib hnub 7 nyob Chiangkhan, hos ua thaj txi Ntuj hais lus Hmoob Hnub Chiv nyob hauv yeej thoj nam Vib Nais. Kuj muaj cov neeg thoj nam uas lawv yog neeg Los Tsuas thiab, ces kuv kuj tau ua thaj txi Ntuj hais lus Los Tsuas. Lub caij ntawd cov neeg thoj nam nyob Vib Nais muaj kwv yees li ntawm 50,000 tawm leej. Muaj 900 leej yog neeg ntseeg Kav Tos Liv. Tib lub caij ntawd nyob Moos Lem kuj tau txhim tsa ib lub tsev teev Ntuj tshiab. Tab txawm yog ib lub tsev teev Ntuj tsis loj pes tsawg, tsis kav zoo li yog thawj tug nplaim taws uas cig nyob hauv Moos Lem. Lub caij kuv khiav kev mus mus los los ntawm Moos Lem mus rau lub yeej thoj nam Vib Nais, mas kuv khaws tej nyuag tog xyoob tog ntoo thiab tej pob zeb zoo nkauj ntawm tog kev coj los teeb tu lub tsev teevNtuj nyob Moos Lem kom zoo nkauj zoo saib. Nyob ntawm lub tsev teevNtuj Moos Lem, muaj Txiv Plig Plasung thiab tus Leej Phauj Nab Phas tau txais lubCim Ntxuav nyob ntawd.